“Do filloj fjalën time me një mirënjohje të pakufishme ndaj jush se qëndruat ju në idealet tuaja më të larta njerëzore, ne jemi sot këtu më të fortë se kurrë. Rrofshi ju, Zoti ju bekoftë”.

Kështu e nisi fjalën e tij në Kuvendin Kombëtar, lideri historik i demokratëve, Sali Berisha.

Sipas tij, në këtë Kuvend do vendoset jo vetëm për fatet e PD-së, por edhe të pluralizmit.

“Ne mblidhemi sot krenarë sepse pas një eksperience unike në historinë e një force politike në Europë, patëm një ditëlindje të dytë. Më 11 dhjetor të vitit 2021, me një Kuvend historik, rilindi sërish PD-ja, kjo parti nuk vdes kurrë. Ajo jeton dhe do të jetojë në idealet më fisnike të shqiptarëve.

Ju e rithemeluat atë sepse donit të fshinit nga faqja e dheut, regjimin e bazuar në krimin, drogën dhe urrejtjen ndaj shqiptarëve. Ju u bashkuat dhe ne rithemeluam PD-në, pasi donim që kjo parti, ashtu siç lindi, të mbetej avokate e pamposhtur e vlerave më të arrira konservatore.

Ne u rithemeluam sepse ne donim të vendosur të mbrojmë interesin kombëtar të shqiptarëve, të nëpërkambur nga një albanofob bastard i nomenklaturës së vjetër komuniste, që shqelmon mbi dinjitetin dhe interesat e shqiptarëve, Edi Rama.

Ne u rithemeluam sepse kulti ynë është vota e lirë. Ne u rithemeluam të vendosur se për demokratët shqiptarë do të vendosin vetëm ata me votën e tyre të lirë,” tha Berisha.

Berisha akuzon Bashën, Sorosin dhe Ramën: Kjo rrugë na u imponua

Deputeti Agron Shehaj, në fjalën e tij në Kuvendin Kombëtar të PD-së, tha se opozita duhet të jetë e vërtetë.

“Ne duhet të jemi të vërtetë. Së pari duhet që të bëjmë një opozitë të vërtetë. Duhet të zgjedhim të luftojmë dhe të mbrojmë interesin e qytetarëve.

Vetëm në këtë mënyrë mund të dallohemi nga ata që sot kanë pushtetin dhe që e përdorin për interesat e tyre personale.

Nuk mund të jemi opozitë e besueshme nëse jemi selektivë apo shfaqim shenja dobësie para skandaleve. Aq më keq, nëse heshtim apo mbyllim njërin sy.

Hapja e partisë nuk varet nga sa të gatshëm jemi ne të mirëpresim të tjerët, por sidomos se sa të besueshëm jemi për qytetarët. Njerëzit do vijnë atëherë kur nuk të mos ketë asnjë dyshim, kur të binden se ne po punojmë për interesin e njerëzve.

Vetëm nëse bëjmë këtë dallim kryesor nga kjo shumicë, vetëm nëse bëjmë kontrastin me ta, mund të sjellim ndryshimin për shoqërinë. Vetëm kështu mund të fitojmë,” tha Shehaj.

syri.net

Lordi britanik Xhejms Uarton, ishte ndër folësit në Kuvendin Kombëtar të PD-së.

Politikani konservator tha se Sali Berisha dhe PD-ja kanë shumë miq në mbarë Europën dhe botën.

“Faleminderit që më ftuat të marr pjesë në këtë konferencë të rëndësishme. Faleminderit për punën e mrekullueshme që keni bërë për ta çuar vendin përpara.

Është një nder i madh që flas për këtu dhe që të kemi të nderuarin zotin Berisha, që ka qenë në front të kësaj beteje.

Ka shumë vlera të përbashkëta që ndajmë ne si konservatore. Këto janë vlera që duhet t’i çojmë përpara. Është e detyrueshme që partitë konservatore në mbarë botën të punojnë së bashku për t’u përballur me sfidat dhe me ndryshimet e vështira. Po ashtu duhet të fuqizojmë punën tonë dhe të risjellim vlerat ku besojmë,” tha politikani.

Ai shtoi se edhe konservatorët britanikë kishin probleme, deri në momentin kur ai drejtoi fushatën e Boris Xhonson dhe konservatorët u rikthyen fuqishëm.

“Edhe ne kemi pasur probleme dhe përçarje në historinë tonë, por mësimet që duhet të nxjerrim janë të ngjashme në mbarë botën, ashtu si konservatorët shqiptarë. Ne ecëm përpara, ne e rinovuam partinë tonë dhe gjetëm besimin te qytetarët. Kjo arrihet me një debat të hapur me vlera dhe qëllime të ngjashme.

Kandidatët tanë duhet të jenë të aksesueshëm dhe të hapur për qytetarët. Ata duhet të jenë edhe të qëndrueshëm dhe të përfaqësojnë vlerat që përfaqësojnë.

Është kënaqësi që të shoh që kjo parti është duke e rigjetur këtë ideologji dhe këto vlera. Ne duhet të mbështetemi te këto vlera dhe të mësojmë nga njëri-tjetri.

Ju keni mbështetjen e plot miqve në Europë dhe në botë. Vazhdoni kështu dhe fuqizoni partinë tuaj për qëllimet e përbashkëta,” tha Uarton.

syri.net

Aktivistja shqiptaro-amerikane, Evi Kokalari, ishte një nga folëset në Kuvendin Kombëtar të demokratëve.

“Shqipëria është një shtet sovran dhe i tillë do mbetet. Lulzim Basha dhe u kontrollua dhe u këshillua në vetëvrasje politike. Fatkeqësia e tij ishte bekimi ynë.

Shqipërisë nuk mund t’i imponosh një lider me urdhër nga elementët e huaj, sepse ne jemi pasardhës të Gjergj Kastriotit, kjo është tokë e ilirëve dhe jemi njerëz të besës dhe kanunit. Fatkeqësisht kjo mikpritje merret për dobësi ndonjëherë dhe abuzohet deri në pikën kur ne jemi të detyruar t’u tregojmë vendin miqve problematikë.

Besnikëria jonë i përket Amerikës dhe jo interesave të veçanta. George Soros është armik i Amerikës dhe i vlerave të saj. Ai është armik i vlerave themeltare mbi të cilat është krijuar Amerika. Çdo tentativë për të cenuar opozitën në një vend pritës, cenon interesin e amerikanëve pasi ata janë kundër ndërhyrjeve në shtetet e tjera. Mos besoni se këto ndërhyrje i bëjnë në emër të Amerikës.

Më vjen turp kur shoh nivelin me të cilin përfaqësohet Amerika, por edhe ku ishte katandisur PD-ja e vlerave konservatore.

Për ata që më akuzojnë se kam ndihmuar për një karrige, u kam thënë se nuk jam njeri i karrigeve, por jam elektron i lirë. Prandaj u them se nuk do jem pjesë e Këshillit dhe as e Kryesisë.

Nëse Trump do të ishte në Shtëpinë e Bardhë, lufta në Ukrainë nuk do të kishte ndodhur dhe Sali Berisha nuk do të ishte bërë non-grata.

Për herë të parë në 100 vjet me miqësinë me Amerikën, shqiptarët kanë humbur besimin te ajo. Amerika mbetet e njejtë, lojtarët kanë ndryshuar. Ashtu siç amerikanët po bëjnë durim derisa të largohet administrata false e Biden, ju bëj edhe ju thirrje për durim,” tha ajo.

syri.net

Ish-kryetarja e Kuvendit, Jozefina Topalli u prit me ovacione në sallën e Kuvendit Kombëtar të PD-së.

E përlotur, ajo mbajti një fjalim të ndjerë, duke thënë se kjo është prova e vërtetë e demokratëve.

“Në vitet e opozitës së vështirë para vitit 2005, askush nuk mendonte të na quante opozitë e rreme. Nuk shiteshim, nuk digjnim mandate, nuk merrnim zarfe dhe nuk imagjinonim të hidhnim gaz mbi njerëzit tanë. Ishim mësuar të bënim betejat tona dhe besonim se ishin mbrojtësit e të drejtave të shqiptarëve. Ishim mësuar të mos tërhiqeshim nga kërcënimet.

Por erdhi dita kur Partisë tonë Demokratike të mos i mbetej asgjë demokratike. Për vite me radhë ka ndodhur kjo dhe ne kemi heshtur. Pas vitit 2013, tatëpjeta e PD-së mori vrapin. PD hyri në krizë identiteti, krizë përfaqësimi, krizë vlerash,” tha ajo.

Sipas saj, Lulzim Basha i tradhtoi të gjitha kauzat e opozitës, duke bërë pazare. Ajo tha se “PD-në e shkatërroi gjumi fitimprurës i Lulzimit!”

“Pas vitit 2013, PD hyri në krizë. Krizë identiteti. Krizë përfaqësimi. Krizë lidershipi:

-Në parlament deputetët bënin betejën me krimin, ndërkohë udhëheqja me buzëqeshje bënte pazare me pushtetin.
-Në rrugë, qytetarët protestonin per te drejtat e tyre, në zyrën bashkiake të kryetarit të PD, kishin nisur negociatat për lejet e ndërtimit.
-Në shtëpitë e shqiptarëve kishte nisur largimi nga puna, në shtëpinë e kryetarit shtohej puna për kunatin”.

“Ne nuk e meritonim këtë opozitë. Prandaj Foltorja ishte gjëja më e bukur që mund të ndodhte për të zgjuar strukturat. Kuvendi i 11 dhjetorit ishte hapi i parë për t’u ndarë nga pazaret. Ne i dimë që betejat i kemi të forta. Nuk është hera e parë.

Nuk është vetëm pushteti që korrupton, por edhe frika. Ne nuk kemi pse kemi frikë prej frikës.

Ne duhet të mësohemi se partia nuk është kryetari, nuk është sigla dhe aq më pak godina. Partia është njerëzit, është fryma, janë vlerat. Sot jam më optimiste se sa kam qenë më parë. Erdha këtu si një nderim për trashëgiminë tonë. Kemi bërë shumë dhe kemi frymëzuar shqiptarët.

Dikush mund të thotë që krijove lëvizjen tënde dhe ike. Jo, unë nuk kam ikur unë, ka ikur PD-ja nga demokratët. Të vërtetat kanë qenë liria ime.  Kur opozita të bëhet pushtet moral, rruga jonë do jetë e qartë,” tha Topalli.

syri.net

Analisti Artan Hoxha mbajti fjalimin e tij në Kuvendin Kombëtar të PD, duke theksuar se ky Kuvend do përcaktojë se si do jenë 30 vitet në vazhdim.

“Gëzuar dhe e gëzofshim PD-në e rithemeluar. Është një ngjarje e madhe pas një përpjekje për të zgjidhur një konflikt absurd, ku një pakicë uzurpoi për pak kohë të drejtat e shumicës.

Sot jemi këtu për të hapur një kapitull të ri për PD-në. Unë shpresoj dhe besoj te ju se në Kuvendin e sotëm, ju do projektoni trajektoren e 30 viteve të ardhshme. Nëse do e bëni këtë, ky do të jetë një Kuvend historik.

Disa muaj më parë, më 11 dhjetor, ishte një tjetër Kuvend historik, pasi ju u vetëmblodhet si anëtarësi. U vetëmblodhët dhe mbajtët një qëndrim. Qëndrime që do mbeten në histori. Ju patët kurajo që t’i thoshit edhe Amerikës që gabon kur mbështet pa kriter këtë qeveri, gabon kur godet pa kriter këtë opozitë. Kjo tregon se ju keni dinjitet dhe sovranitet. Vetëm kështu mund të jeni një partner i mirë. Pa këto cilësi, mund të jesh një shërbëtor dhe vasal.

Sot ju jeni në rrugën e mbarë. Unë do jem bashkë me ju në pjesën tjetër të rrugëtimit në 30 vitet e ardhshme. Suksese dhe fitore në betejat e ardhshme,” tha Hoxha. syri.net

Bardh Spahia, kryetar i Bashkisë së Shkodrës, në fjalën e tij në Kuvendin Kombëtar të PD, tha se pushtetin në PD tani e ka vota.

“Këtu pushtetin e ka vota dhe jo emërimi dhe kjo është arritja më e madhe në 30 vite.

PD ishte kthyer në një parti ku një parti ku një njeri vendoste për gjithçka dhe për gjithkënd. Tani vota vendos se kush do të kandidojë, kush do të marrë përgjegjësi.

Ky Kuvend duhet të na shkëpusë nga modeli humbës 8-vjeçar. Sepse ne jemi demokratë që i besojmë votës. Unë vetëm jam produkt i një procesi të jashtëzakonshëm bazuar te vota. Vota ka rritur konkurrencën dhe pjesëmarrjen e demokratëve sepse ata vendosin vetë se kush do i përfaqësojë.

Më 6 mars, Shkodra mbeti fortesa e vetme e demokracisë sepse respektuam votën. Ne mundëm t’u jepnim shpresë demokratëve dhe fituam sepse ishim në anën e drejtë.

Besimin që kemi vendosur me demokratët duhet ta injektojmë të çdo votues. Ne duhet ta bëjmë PD-në një parti të shpresës. Vendit i duhet një ndryshim dhe këtë ndryshim mund ta sjellë vetëm për PD-në. Është koha që ne të frymëzojmë njerëzit, të bëhemi zëri i tyre. Është koha që të bëhemi bashkë,” tha Spahia. syri.net

Ish-ministri i Mbrojtjes, Arben Imami, e nisi fjalimin e tij në Kuvendin Kombëtar me thirrjen: Rroftë PD!

Ai vlerësoi proceset e fundit në parti, duke thënë se ato kanë vendosur votën dhe anëtarin në bazën e partisë. Imami tha se fjalimi i tij do të bazohet vetëm te e ardhmja. Imami tha se kriza në PD ishte krizë përfaqësimi.

“Anëtari i partisë është themeli i partisë. Për herë të parë u thirr një Kuvend nga anëtarët e Kuvendit. Referendumi i dhjetorit ishte një ngjarje historike për politikën shqiptare, ku anëtarësia mori vendime”.

“Ish-kryetari bëri spastrimin e partisë nga nivelet më të ulëta deri te ato më të larta. Zgjedhjet e kontrolluara, të manipuluara dhe të falsifikuara për kryetarin e PD në 2017-ën dhe 2021-shin, pas shkeljeve të vazhdueshme statutore, ishin një turp. E kundërta ndodhi në referendumin e dhjetorit. Anëtarët dolën masivisht në votime pasi menduan se vota e tyre ka rëndësi. Me garë të lirë mund të fitojmë partinë tonë. kjo duhet të jetë rruga jonë për ringritjen e PD-së.

Por nuk mjafton vetëm pjesëmarrja, por duhet të synojmë përfaqësimin e qytetarëve. Ka njerëz me kontribute dhe partia duhet të jetë e hapur për ata. Natyrisht sa më të rinj, aq më mirë. Të mos mbetemi me formulime të rinj dhe të vjetër, se ato janë parulla të OJQ-ve.

Krahas kësaj hapje të vazhdueshme, mendoj se është vendimtare mbajtja dhe ruajtja e palcës së partisë, e historisë dhe traditës së saj më të mirë. Partia nuk ka nevojë të rishpiket. Nuk jemi për konservatorizëm që nuk pranon asnjë ndryshim, por jemi për një konservatorizëm modern. Po ndryshimit, por jo çdo ndryshimi. Me gjithë respektin për çdo gjë, babai dhe nëna nuk ndryshojnë, burri dhe gruaja nuk ndryshojnë,” tha Imami.

Sipas tij, askush nuk e ka ndryshuar vendin më shumë se qeverisja e PD. Kjo parti ka kontribute historike, tha ai.

Imami vazhdoi duke e akuzuar Lulzim Bashën se krijoi një opozitë fasadë.

“Duhet t’i japim Shqipërisë një opozitë të vërtetë dhe nesër një qeverisje më të mirë, ashtu siç e meriton”, tha Imami.

syri.net

Me propozim të Komisionit të Rithemelimit dhe delegatëve janë zgjedhur drejtuesit e Kuvendit Kombëtar të PD.

Më konkretisht, për përbërjen e komisionit të drejtimit të punimeve, janë zgjedhur Albana Vokshi Edmon Spaho, Ervin Minarolli, Ivi Kaso dhe Belind Këlliçi.

Ndërkohë për Sekretariatin teknik është zgjedhur Ledio Nuraj, Minushe Lazaj si dhe Nadja Daullja.

Kuvendin do e drejtojë sërish Belind Këlliçi. Pasi janë numëruar të pranishmit, në sallë rezultoi se janë 1425 delegatë, nga 1800 të thirrur gjithsej.

Kryetari i Komisioni i drejtimit të punimeve të Kuvendit të PD-së, Belind Këlliçi ka treguar se sa është numri i delegatëve që marrim pjesë sot në Kuvend. Ai mes humorit tha se nuk janë 5004 delegatë

“Për këtë arsye deklaroj zyrtarisht çeljen e punimeve të Kuvendit Kombëtar dhe aftësinë vendimmarrëse të tij. Kuvendi është thirrur në mënyrë të rregullt, sipas statutit të PD-së,” tha Këlliçi. syri.net

Deputetja demokrate, Ina Zhupa i është bashkuar Kuvendit Kombëtar të demokratëve.

Ajo ka dhënë një mesazh për mediat në hyrjë të Pallatit të Kongreseve.

“Shpresoj dhe ndaj po vij që të bëjmë gjithçka është e mundur drejt bashkimit.

Përballë Edi Ramës fitojmë po të jemi të bashkuar.

Erdha këtu si një shenjë bashkimi. Është një proces dhe kjo duhet të jetë një shtyrje për të gjithë deputetët që të lënë pas sedrën dhe të bëjnë një hap drejt bashkimit për të fituar përballë Edi Ramës.

Demokratët mund të bashkohen me vullnet. Përderisa e kanë vullnetin, le ta shprehin,” tha ajo.

Ish-kryetarja e Kuvendit, Jozefina Topalli, mbajti një prononcim për mediat në hyrje të Kuvendit Kombëtar të PD.

Ajo tha se vendi ka nevojë për opozitë reale.

“Kurrë më shumë se sot vendi nuk ka pasur nevojë për opozitë reale dhe opozitë të vërtetë. Ne duhet t’u rikthemi vlerave dhe pushtetit moral. Opozita duhej të ishte pushtet moral. Sot është një moment kyç kur PD mund të kthehet te vlerat e saj.

Nuk është hera e parë që PD është gjendur në vështirësi, por nuk jemi tërhequr, pasi kemi besuar,” tha Topalli.

“Edhe pa qenë deputete, pa qenë në PD, njeriu duhet të gjejë forcën për të thënë të vërtetën. E vërteta është forca e çdo njeriu. E vërteta është liria e individit. Jemi në një kohë që duhet të bëjmë beteja të vërteta.

E rëndësishme është që bashkimi të bëhet mbi vlerat. Kërkohet një opozitë reale, jo një opozitë false. Sot është dita me bë opozitë, prandaj jam sot këtu,” tha ajo.

Edi Rama dhe Lulzim Basha janë takuar në Dhërmi mbrëmjen e të premtes. 

Mësohet se kryeministri dhe ish-kryetari i PD kanë darkuar së bashku.

Lajmi konfirmohet për Syri.net nga një punonjës i një prej resorteve në Dhërmi ku janë takuar Rama dhe Basha.

Mesazhi i mbërritur në redaksinë e Syri.net
Erdhi i madhi në drekë në Dhërmi…tani në darkë erdhi Luli pa rënë në sy fare, pa fenelina…

Mund të hanë darkë bashkë. Rama pritet të dalë tani. Rama erdhi me eskportë (shoqërues) ndërsa Lulin e ndaluam se nuk e njohëm makinën.  

*** 

Lulzim Basha dhe Edi Rama vizituan këtë pasdite Vlorën në të njëjtën orë.

Rama inspektoi disa vepra publike në qytetin bregdetar, ndërsa Basha tha se do takonte demokratët, por në kafen ku u ulën nuk ishin më shumë se 10 veta.

Deputetja demokrate Ina Zhupa komentoi koncesionin e Parkut Kombëtar të Butrintit në edicionin e pasdites me Armela Ferkon në Syri TV. Zhupa deklaroi se marrëveshja ka qenë sekrete ndërsa shtoi se ka pasur një debat të fortë në Komisionin e Edukimit ku denoncoi se Butrinti po konsiderohet një mall tregtar për të përfituar fondacioni.

“Po i jepet një privati me koncesion pa pyetur për pasurinë kombëtare. Një qëllim, të pasurohet një grup i caktuar njerëzish. Isha e bindur që para se të kisha marrëveshjet. Çdo koncesion i qeverisë nuk mund të ishte ndryshe dhe me Butrintin, ndryshe do e mbante shteti.”-tha Zhupa.

Më tej deputetja deklaroi se bëhet fjalë për 5 milionë euro të ardhura në vit ndërsa për 10 vite 50 milionë euro vetëm nga biletat për hyrjen në Butrint.

“Pa llogaritur që do vendosin bileta të reja për ndërtimet në Butrint. Të gjithë arkeologët shqiptarë, ata që kam kontaktuar deri tani, nuk është një çështje konflikti PD-PS, nuk e kam thjesht se jam në opozitë, një çështje që ndan ata njerëz që duan trashëgiminë kulturore përkundrejt atyre që duan ta vjedhin dhe të pasurohen me të.

Ka filluar që në 2018 ndryshimi i ligjin për trashëgiminë kulturore, me planin e menaxhimit të integruar të Butrintit po nga ADF, ku ministrja e Kulturës ka vendosur veten e saj në bordin e drejtorëve.

Katër persona privatë që kanë interesa ekonomike. Në janar janë hequr 800 hektarë zonë e mbrojtur në Butrint. U krijua mundësia që këto zona të betonizohen, të krijohen hotele rreth Butrintit, pra të shfrytëzohet për aktivitet tregtar.”-deklaroi Zhupa.

Deputetja duke iu drejtuar banorëve të zonës tha se tokat e tyre do merren për t’u përdorur nga fondacioni në Butrint.

“Shteti merr garanci për shpronësimet duke e quajtur si interes publik por përfiton fondacioni. Butrinti shndërrohet nga një pasuri kombëtare në një pasuri private të një grupi, fondacioni të cilin e merr për 10 vite dhe ka të drejtë rinovimi.”-tha Zhupa.

Në përfundim Zhupa theksoi se ministrja ka thënë se s’ështe koncesion ndërsa Rama nga ana tjetër pohoi se do të sjellë fitime.

syri.net

Deputeti demokrat Edi Paloka ka folur në lidhje me peticioni “online” kundër qëndrimeve të ambasadores së SHBA në Tiranë, Yuri Kim.

Paloka hodhi poshtë akuzat duke thënë se peticioni nuk është bërë nga Sali Berisha, por që ai e mbështeste atë.

Deputeti ndër të tjera ka thënë se vetë e kishte firmosur atë peticion me bindje të plotë.

“Nuk është e vërtetë që e ka bërë Berisha. Berishës as nuk i ka shkuar në mendje. Se ça ka Berisha dhe se çfarë kemi ne, e kemi thënë hapur dhe e themi çdo ditë, nuk kemi nevojë ne të bëjmë peticione. Berisha nuk është kundër këtij peticioni është pro, por nuk e ka bërë ai”.

“Unë e kam firmosur këtë peticion. E kam firmosur, por nuk e kam bërë unë. Ai peticion e lexove me kujdes, nuk kishte asnjë lajthitje dhe më pëlqeu, jam dakord se ishte njësoj sikur e kisha bërë unë. Por nuk kemi lidhje fare me atë peticion. Mendojmë plotësisht ashtu edhe e firmosa me bindje”, tha Paloka në emisionin “Të paekspozuarit” në MCN TV.

Kultivimi i lëndëve narkotike në ambiente të mbyllura, të njohura si “shtëpi bari”, po gjen përhapje të jashtëzakonshme në vendin tonë. Së fundmi një rast i tillë është zbuluar në Tropojë. Policia ka shpallur në kërkim pronarin e banesës, Shpëtim Selimaj. Kurse elektricisti i zonës po procedohet në gjendje të lirë.

NJOFTIMI ZYRTAR

Kontrolle intensive për parandalimin dhe goditjen e veprimtarisë kriminale në fushën e kultivimit të bimëve narkotike në terren të hapur dhe në terren të mbyllur, me anë të llambave.

Finalizohet operacioni policor i koduar “Valbona”, i zhvilluar nga Komisariati i Policisë Tropojë.

Zbulohet një ambient i përshtatur për kultivimin e kanabisit, me anë të llambave, në një banesë në të cilën kishte lidhje të paligjshme të energjisë elektrike.

Sekuestrohen një sasi lënde e dyshuar narkotike kanabis, fidanë narkotikë, llamba dhe pajisje të ndryshme elektrike, që shërbejnë për kultivimin e bimëve narkotike në ambiente të mbyllura.

Shpallet në kërkim pronari i banesës.

Procedohet në gjendje të lirë elektricisti i zonës, për veprën penale “Shpërdorimi i detyrës”.

Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, shërbimet e Komisariatit të Policisë Tropojë, bazuar në informacionet e marra në rrugë operative, se në fshatin Valbonë, një shtetas kishte përshtatur banesën, për kultivimin e bimëve narkotike kanabis, në kushte laboratorike, organizuan dhe finalizuan operacionin policor të koduar “Valbona”.

Në kuadër të këtij operacioni u bë i mundur lokalizimi dhe ndërhyrja në banesën e shtetasit Sh. S., ku u evidentua se njëra prej dhomave ishte përshtatur për të kultivuar bimë narkotike, me anë të llambave, që furnizoheshin me lidhje të paligjshme të energjisë elektrike. Në këtë ambient, shërbimet e Policisë gjetën dhe sekuestruan fidanë të dyshuar narkotikë kanabis, 500 gramë lëndë të dyshuar narkotike kanabis, 34 llamba dhe pajisje të ndryshme elektrike, që shërbejnë për kultivimin e bimëve narkotike në ambiente te mbyllura.

Në momentin e ndërhyrjes, shërbimet e Policisë nuk kanë gjetur njeri në banesë. Në vijim të veprimeve u bë shpallja në kërkim e pronarit të banesës, shtetasit Sh. S., 43 vjeç, banues në Valbonë, për veprat penale “Kultivimi i bimëve narkotike” , “Prodhimi dhe shitja e narkotikëve” dhe “Vjedhja e energjisë elektrike”.

Gjithashtu, në vijim të veprimeve u procedua në gjendje të lirë, për veprën penale “Shpërdorimi i detyrës”, shtetasi Q. B., 59 vjeç, banues në Shoshan, me detyrë elektricist.

Materialet procedurale iu referuan Prokurorisë pranë Gjykatës së Shkallës së Parë Tropojë, për veprime të mëtejshme.

Plani i biznesit për dhënien me koncesion të Parkut Kombëtar të Butrintit tek një ‘organizatë jofitimprurëse’, synon shtimin e të ardhurave përmes rritjes së çmimit të biletës dhe shitjes së pijeve freskuese dhe ushqimeve.

Nga Gjergj Erebara dhe Blerina Gjoka-BIRN

Një plan i qeverisë shqiptare për menaxhimin e Parkut Kombëtar të Butrintit si një fondacion, parashikon rritje të çmimit të biletës për vizitorët si dhe krijimin e të ardhurave nga shërbimi i kateringut, me synimin final të punësimit të 44 personave me paga më të larta se sa standardet e zakonshme të administratës publike si dhe krijimin e një bordi që do të kushtojë rreth 140 mijë USD në vit, nën supozimin se një menaxhim i tillë do të përmirësojë eksperiencën e vizitorëve në të.

Plani i biznesit u mbajt fillimisht ‘sekret’ nga qeveria, për arsye se, sipas asaj që deklaroi ministrja e Kulturës, Elva Margariti, të dhënat financiare “mund të keqinterpretohen”.

Pasi media dhe opozita ngriti pikëpyetje se pse çështja e menaxhimi të trashëgimisë kulturore të vendit duhet të bëhet me kontrata sekrete, Kuvendi publikoi të mërkurën në mbrëmje një version të plotë të draft-marrëveshjes në faqen e internetit.

Kryeministri Edi Rama u shpreh i revoltuar të enjten në parlament ndaj kritikëve, duke sharë opozitën si antiamerikane si dhe duke e fyer atë si rracë budallenjsh.

“Budallallëku në familjen tuaj është sëmundje ngjitëse se nuk ka se si të shpjegohet ndryshe që trashëgohet brez pas brezi,” deklaroi Rama me një gjuhë të pazakontë të enjten gjatë seancës parlamentare. “E keni në ADN-në e partisë suaj që të trashëgoni budallallëkun brez pas brezi,” vijoi ai, në një fjalim, të cilin zyra e tij e shtypit e shpërndau të transkriptuar për median.

Kontrata midis Ministrisë së Kulturës dhe Fondacionit për Menaxhimin e Butrintit parashikon zhvillimin e parkut kombëtar për shërbime turistike, duke investuar në restorante dhe një shërbim vozitje me varka, si dhe sigurimin e të ardhurave nga shitja e biletave, e ushqimeve dhe pijeve.

Plani i biznesit është përgatitur nga një kompani angleze në vitin 2019, kompani që është kontraktuar nga Fondi Shqiptaro-Amerikan. Ky i fundit është një korporatë jofitimprurëse e regjistruar në Delaëare të Shteteve të Bashkuara dhe që ka aktivitete të ndryshme ekonomike në Shqipëri, përfshirë një paketë minorance në koncesionin shumë fitimprurës të prodhimit të pasaportave dhe kartave të identitetit, koncesion që është në gjendje të paguajë për aksionerët e vet dividentë çdo vit me vlerë disafish mbi kapitalin e investuar.

Plani i biznesit për menaxhimin e Butrinit nuk parashikon të jetë kaq fitimprurës, por gjithsesi ai parashikon që fondacioni të realizojë kthime me mbi 15% në vit mbi vlerën e investimit, me synimin final që kur të jetë plotësisht operacional, të realizohet një fitim prej 1.5 milionë USD në vit. Gjithsesi Fondacioni Shqiptaro-Amerikan nuk do të përfitojë të ardhura nga aktiviteti i Butrintit, pasi fitimet do t’i mbesin fondacionit të Butrintit.

“Nevojitet një investim kapital total prej 7.52 milionë USD, nga të cilat 39% do të shpenzohen për

konservimin e sitit dhe 61% për ndërtimin e strukturave të reja për vizitorët dhe stafin,” thuhet në planin e biznesit të parë nga BIRN.

“Projekti në tërësi gjeneron suficit operativ vjetor në Vitin 3 dhe suficit të akumuluar në Vitin 7 ku ai operon me fitim prej afërsisht 1.5 milionë USD në vitin pasardhës,” shkruhet më tej në planin e biznesit.

Plani parashikon investime prej 7.1 milionë USD, nga të cilat, 4.99 milionë USD do t’i investojë Fondi ndërsa 2.1 milionë do t’i investojë qeveria me paratë e taksapaguesve. Plani i biznesit parashikon shtimin e të punësuarve në parkun arkeologjik nga 14 që janë aktualisht në 44.

Rritje çmimi biletash

Butrinti është sakaq një operacion praktikisht shumë fitimprurës për qeverinë shqiptare. Sipas të dhënave të planit të biznesit, Butrinti është vizituar nga rreth 236 mijë vetë në vit para pandemisë, të cilët kanë paguar bileta me vlerë rreth 900 mijë dollarë. Butrinti ka aktualisht një staf prej 14 vetësh me fond vjetor pagash prej 88 mijë USD në vit, ndërsa pjesa tjetër e parave janë në Ministrinë e Kulturës, shuma e akumuluar prej tyre do të duhet t’i transferohet fondacionit të ri.

Plani i ri i qeverisë është që, pas transferimit të menaxhimit te fondacioni, çmimi i biletës të mund të rritet nga 6 në 11 USD përgjatë një periudhe shtatëvjeçare, gjë që do të sjellë shumicën dërrmuese të të ardhurave shtesë si dhe fitimet me vlerë 1.5 milionë USD në fund të vitit të shtatë. Edhe investimet e planifikuara do të paguhen pjesërisht nga të ardhurat operacionale. Plani i biznesit parashikon që numri i vizitorëve të rritet deri në 296 mijë vetë, ndërsa supozon se Butrintit do t’i duhen edhe pesë vite nga sot që të arrijë numrin e vizitorëve të para pandemisë.

Plani i biznesit parashikon gjithashtu se shërbimi i pijeve dhe ushqimeve, të cilave ai u refereohet si “shërbimi i kateringut”, të sigurojë të ardhura vjetore prej 296 mijë USD.

Në total, nga viti i shtatë i operimit, falë rritjes së çmimit të biletave dhe rritjes së pritshme të vizitorëve, fondacioni do të sigurojë të ardhura me vlerë 3.7 milionë USD në vit, nga të cilat, 1.5 milionë do të jenë fitime neto.

Plani i biznesit bën të qartë se transformimi i menaxhimit të Butrintit nga sistemi aktual në një fondacion, do të mundësojë çlirimin nga kufizimet ligjore si dhe rritjen e pagave.

Plani i biznesit thekson se rreziku që ndërmarrin investitorët në kryerjen e këtij investimi është i ulët për shkak se vizitorët do të kthehen gjithsesi në Butrint pas pandemisë dhe për rrjedhojë, do të vijojnë të paguajnë biletat e hyrjeve.

Kontrata e menaxhimit do të zgjasë për 10 vjet me të drejtë rinovimi. Në rast se ajo nuk rinovohet, fondacionit do t’i mbesin në fund të vitit të dhjetë rreth 4.5 milionë dollarë fitime neto. Këto fitime, sipas marrëveshjes, nuk do të shpërndahen, por do të mbahen nga fondacioni.

Marrëveshja parashikon gjithashtu që bordi i drejtorëve të fondacionit, një institucion me pesë vetë, nuk do të marrë paga, por atyre do t’u mbulohen shpenzimet për vete dhe një staf ndihmës prej pesë vetësh me një kosto të përgjithshme prej 140 mijë dollarësh në vit.

Aktualisht bordi i fondacionit drejtohet nga ministrja e Kuturës Elva Margariti si kryetare, drejtuesit e Fondi Shqiptaro-Amerikan, Martin Mata dhe Aleksandër Sarapuli, juristja Flonja Boriçi, si dhe Presidenti i Universitetit Amerikan të Romës Richard Andrew Hodges. Drejtues ekzekutiv i fondacionit është emëruar arkeologu Lorenc Bejko. syri.net

Të shtunën Partia Demokratike do të mbajë Kuvendin Kombëtar, ku do të zgjedhë anëtarët e rinj të Këshillit Kombëtar, si dhe do të vendoset edhe për hapjen e garës për kreun e ri të PD.

Në një prononcim për SYRI TV, anëtar i Komisonit të Rithemelimit të PD-së Ivi Kaso deklaroi se një nga ndryshimet e statutit do të jetë edhe futja automatikisht e deputetëve demokrat dhe krerëve te degëve në Këshillin Kombëtar.

Në Kuvendin Kombëtar të 30 prillit, Partia Demokratike do të zgjedhë anëtarët e rinj të Këshillit Kombëtar, si dhe do të vendos edhe për hapjen e garës për kreun e ri të PD-së.

Sipas Ivi Kaso ndryshimet që do të pasqyrohen në statutin e Partisë Demokratike, do dërgohen në gjykatën e Tiranës për t’u regjistuar.

Kaso bëri me dije se ashtu si në Kuvendin e 11 Dhjetorit, secili delegat që do të marrë pjesë në Kuvend e së shtunës, do të identifikohet me anë të barkod –it. syri-net

Pas përplasjeve të forta për Parkun Kombëtar të Butrintit dje në Komisionin parlamentar të Edukimit, midis deputetes së PD, Ina Zhupa dhe Ministres së Kulturës, Elva Margariti, ku Zhupa ngriti zërin kundër marrëveshjes për administrimin e Butrintit nga një fondacion për menaxhim, ka reaguar akademiku Apollon Baçe, profesor i arkeologjisë.

Akademiku tha në një prononcim të shkurtër, “se privatizimi i Butrintit shkel konventën e Parisit dhe Kushtetutën. Bordi i drejtimit ka kryetar Hodges-in, një antishqiptar ekstrem, më të cilin jam zënë në 2006-ën nga që foli sende ekstremisht të pabesueshme. Kam folur në 2 emisione, por më kot”, shtoi profesori i njohur.

Kujtojmë se deputetja Zhupa insistoi dje në komisionin e Edukimit se para se Ministria e Kulturës të bënte këtë marrëveshje, duhej të dëgjohej mendimi i ekspertëve të fushës në duhej të administrohej apo jo Butrinti nga një fondacion privat.

Çfarë përmban projektligji për Butrintin, që u miratua nga qeveria më 6 prill 2022?

Ministrja Elva Margariti atë ditë shpjegoi se “Këshilli i Ministrave miratoi projektligjin “Për miratimin e marrëveshjes për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit, ndërmjet Ministrisë së së Kulturës dhe Fondacionit të Menaxhimit të Butrintit”.

Së bashku me partnerin tonë strategjik, Fondacionin Shqiptaro-Amerikan për Zhvillim (AADF) kemi themeluar Fondacionin e posaçëm të Menaxhimit të Butrintit.

Bordi i Fondacionit të Menaxhimit të Butrintit përbëhet nga 5 anëtarë, 2 prej të cilëve nga Ministria e Kulturës e 2 të tjerë nga partneri strategjik AADF, ndërsa një i pestë, që do të sigurojë paanshmërinë e këtij bordi vendimmarrës është një figurë e njohur e trashëgimisë kulturore, Richard Hodges.

Marrëveshja e nënshkruar, që merr jetë me miratimin e këtij projektligji, krijon një model menaxhimi hibrid jofitimprurës ku shteti është pjesë, por i jep zë dhe garanci edhe donatorit për administrimin e fondeve; i hap rrugë donatorëve të tjerë potencialë që t’i bashkohen procesit në vazhdim duke i garantuar fondacionit të posaçëm autonomi në vendimmarrje, brenda rregullave të caktuara me ligj, duke bazuar në një plan biznesi të detajuar.”

Indrit Hoxha, i deleguar i Komisionit të Rithemelimit në njësinë 8 në Tiranë, është shprehur se në Kuvendin e 30 prillit, deputetët ndahen përfundimisht, nëse do ti bashkohen PD-së apo do ikin te Rama.

‘30 Prilli, është dita kur deputetët e PD ndahen përfundimisht ose me anëtarësinë e PD-së ose me Ramen.

Të gjithë delegatët e zgjedhur të PD-s duhet të zgjedhin Këshillin Kombëtar në Kuvend, Këshilli Kombëtar duhet të zgjedhë Kryesinë e kjo e fundit nënkryetarët e Sekretariatin.

Më pas Baza kryetarin e PD, e me pas përballje vetëm me Ramën’, – shkruan Indrit Hoxha në Facebook. syri.net

Sistemi i Drejtësisë ka nevojë për prokurorë e gjyqtarë të rinj, për shkak se shumë i ka larguar vetingu. Sot përfundoi provimi rekrutues në Shkollën e Magjistraturës nga ku do dalin 80 gjyqtarë e prokurorë.

Në tre vitet e fundit janë rekrutuar 176 magjistratë gjyqtarë e prokurorë, të cilët janë gati të zëvendësojnë ata që ikën. Të dhënat hedhin dritë mbi një fakt që tërheq vëmendje: gati gjysma e tyre vijnë nga administrata shtetërore e viteve të fundit.

Punonjës të shtetit, me pozicione në administratën qendrore ose lokale, janë brezi i ri i Reformës në Drejtësi, ata që do zëvendësojnë të “vetinguarit”. Janë ata që kaluan filtrat e rreptë të Shkollës së Magjistraturës. Fillimisht, u rekrutuan nga administrata shtetërore dhe pasi studiuan e punuan njëkohësisht, sot do jenë drejtësia e re.

Shumë magjistratë vijnë nga ministritë. Të tjerë nga institucionet në varësi të ministrive apo kryeministrisë. Institucionet që kanë trajtuar çështjet e pronësisë dhe pushteti vendor mbajnë numrin më të madh. Disa magjistratë janë rekrutuar prej ndërmarrjeve me kapital shtetëror nga pozicione të mirëpaguara.

Lista e magjistratëve gjyqtarë e prokurorë tregon vetëm ku kanë punuar para rekrutimit dhe nuk analizon aftësitë e tyre:

• Albert Spahiu- ASHK

• Agim Korçari- ASHK

• Alisa Spahja- ASHK

• Besmira Arshiaj- ASHK

• Ema Lazaj- ASHK

• Klajdi Terova- ASHK

• Gladiola Bregu- ASHK

• Matilda Peza- ASHK

• Griselda Haxhiaj- ASHK

• Anisa Xake- Ministria e Drejtësisë

• Enea Babameto- Ministria e Drejtësisë

• Ornela Ferhati- Ministria e Drejtësisë

• Mirjon Brahimllari- Ministria e Drejtësisë

• Edona Vajushi- Ministria e Drejtësisë

• Dejvi Çelçima- Ministria e Drejtësisë

• Emirjana Dimo- Ministria e Drejtësisë

• Esmeranda Basho- Ministria e Drejtësisë

• Dajana Ndreja- Ministria e Infrastrukturës dhe Energjisë

• Alma Veizi- Ministria e Infrastrukturës dhe Energjisë

• Lumturi Zhupa- Ministria e Infrastrukturës dhe Energjisë

• Anjeza Kalanxhi- Ministria e Infrastrukturës dhe Energjisë

• Eni Çulli- Ministria e Infrastrukturës dhe Energjisë

• Hava Memko- Ministria e Bujqësisë

• Megi Strakosha- Ministria e Bujqësisë

• Nertil Dushku- Ministria e Bujqësisë

• Erolda Tarelli- Ministria e Mbrojtjes

• Leonard Kryeziu- Ministria Mbrojtjes

• Irida Barkaj- Ministria e Financave

• Sonila Qerolla- Ministria e Financave

• Lirim Bulica- Ministria e Arsimit

• Valjona Haxhiraj- Ministria e Mjedisit.

• Edison Tatoshaj- Drejtoria e Tatimeve

• Urim Kalia- Drejtoria e Tatimeve

• Alba Ngresi- Bashkia Tiranë

• Glenda Zeneli- Bashkia Tiranë

• Mexhit Doçi- Bashkia Tiranë

• Dorina Stroka- Bashkia Gjirokastër

• Vasjana Postol- Bashkia Korçë

• Uran Korra- Bashkia Elbasan

• Aida Yzeiraj- Bashkia Fier

• Malvina Pellumbi- Bashkia Kavajë

• Dorina Alushi- Prefektura Durrës

• Lirëza Sinollari- Prefektura Korçë

• Gentiana Shukullari- Këshilli Qarkut Korçë

• Brisida Leka- DPPPP

• Delvijot Llusha- DPPPP

• Olta Cenaj- Fondi Shqiptar i Zhvillimit

• Aurora Alimadhi- Fondi Shqiptar i Zhvillimit

• Mikel Hysometaj- Avokatura e Shtetit

• Besiana Sadikaj- Avokatura e Shtetit

• Albulena Kuliçi- OSHEE

• Megi Muhaj- OSHEE

• Irma Cacaj- Posta Shqiptare

• Eva Hysko- Posta Shqiptare

• Enri Rista- AKEP

• Bevil Beqiraj- DAP

• Eni Naqellari- ADISA

• Olta Hadushaj- Komisioni i Prokurimit Publik

• Anjeza Topçi- Agjencia Kombëtare e Mjedisit

• Kristi Jorgji- Drejtoria e Përgjithshme e Transportit Rrugor

• Alfred Gjonpali- Drejtoria e Përgjithshme e Doganave

• Silvana Belishta- Agjensia e Trajtimit të Pronave

• Ermelinda Fejzo- Albpetrol

Shkolla e Magjistraturës menaxhohet nga i njëjti staf pedagogjik dhe drejtues prej shumë vitesh.

Megjithëse sistemi i drejtësisë po reformohet, ata që kanë rekrutuar, trajnuar dhe nxjerrë breza prokurorësh, gjyqtarësh që i largoi vettingu, bashkë me të tjerët që po zëvendësojnë të ikurit, “menaxherët” e Magjistraturës mbeten të njëjtë.

Analisti Lorenc Vangjeli ka deklaruar se Shtetet e Bashkuara të Amerikës kanë sjellë një dosje për ish kryetarin e Partisë Demokratike Lulzim Basha.

Vangjeli tha në studion e Abc Live se fati i dosjes për Lulzim Bashën nuk dihet, sepse rasti nuk është bërë publik.

“Ka ardhur një dosje tjetër nga Amerika për pasardhësin e Berishës, Lulzim Bashën. Nuk dihet fati i saj. Nuk mund të them detaje tjera sepse nuk e kam çelësin e sirtarit ku është dosja”, tha Vangjeli./CNA.al/

Ish kryeministri Berisha ka përshendetur rizgjedhjen në postin e Presidentit të Francës të Emanuel Macron.

Në një mesazh në facebook Berisha shkruan se, “kjo ishte nje fitore e madhe për Francën dhe mbarë Europën. Rivalja e tij Marine Le Pen ishte një ekstremiste pro Putin por edhe raciste dhe albanofobe”.

Postimi i plotë:

Rizgjedhja e Presidentit Makron, një fitore për Francën dhe Europën!

Të dashur miq, në zgjedhjet presidenciale të Francës presidenti Emanuel Macron u rizgjodh, mori mandat të dytë.

Kjo ishte një fitore e madhe për Francën dhe mbarë Europën. Rivalja e tij Marine Le Pen ishte një ekstremiste pro Putin por edhe raciste dhe albanofobe.

Ndaj dhe ti urojmë suksese Presidentit Macron në të mirë të Francës dhe Bashkimit Europian. sb

syri.net

Presidenti i Republikës Ilir Meta ka uruar Presidentin e Francës Emanuel Macron për fitoren pas rizgjedhjes së tij.

“Rizgjedhja Juaj si President i Francës, më jep kënaqësinë e veçantë që, në emër të popullit shqiptar dhe në emrin tim personal, t’Ju përcjell urimet më të përzemërta e të sinqerta për përmbushjen me sukses të misionit Tuaj në drejtimin e Republikës Franceze”, shkruan Meta në një postim në faqen e tij në facebook.

Ja postimi i plotë:

I nderuar Zoti President, Shkëlqesia Juaj, Emmanuel Macron,

Rizgjedhja Juaj si President i Francës, më jep kënaqësinë e veçantë që, në emër të popullit shqiptar dhe në emrin tim personal, t’Ju përcjell urimet më të përzemërta e të sinqerta për përmbushjen me sukses të misionit Tuaj në drejtimin e Republikës Franceze.

Besoj fort se marrëdhëniet e shkëlqyera midis Shqipërisë dhe Francës, miqësia, bashkëpunimi dhe partneriteti euroatlantik do të rriten e forcohen edhe më shumë, gjatë mandatit tuaj të ri.

Bashkëpunimi i ngushtë dypalësh edhe shumëpalësh është shumë i rëndësishëm sot, si në kuadër të Këshillit të Sigurimit të OKB-së, ashtu edhe si vende të NATO-s, veçanërisht në përballjen me sfidat rajonale, europiane dhe globale që të dy vendet tona kanë përpara.

Duke shprehur mirënjohjen për mbështetjen e vazhdueshme që Franca i ka dhënë Shqipërisë dhe të gjitha vendeve të Ballkanit Perëndimor, përgjatë procesit të integrimit në Bashkimin Europian, shpresoj fort se, rizgjedhja Juaj si President i Francës do të nxisë edhe më fort mbështetjen që ky proces i rëndësishëm gjeostrategjik rajonal dhe europian të përfundojë me sukses dhe në kohën e duhur.

Nënkryetari i LSI, Petrit Vasili, shkruan në rrjete sociale se kryeministri Edi Rama po rrezikon integritetin e Shqipërisë si më 1913. Duke e quajtur atë serborus Vasili thotë se Rama ka nxjerrë në pazar kufijtë detar të vendit siç nxorri më parë kufijtë e Kosovës.

Më tej Petrit Vasili thekson se në çdo tavolinë ku diskutohet interesat e Shqipërisë Rama është kundër vendit të tij.

Statusi i Vasilit
Me nje serborus si Rama integriteti i Shqiperise i rrezikuar si ne 1913! Shqiperia njeh dy serboruse te medhenj ne historine e saj Esat Pashe Toptanin dhe Edi Ramen. I pari shiti kufijte e Shqiperise dhe demtoi ne menyren me te rende atdheun si askush tjeter i mbeshtetur nga Serbia dhd Rusia per te realizuar qellimet e tij.

Sot nje serborus i ri i deklaruar si Edi Rama, avokati me i zjarrte i Vuçiçit dhe Serbise, ka nxjerre ne pazar kufijte detare te vendit sic nxori me pare kufijte e Kosoves. Serborusi Rama si avokat i Vuçiçit shume i ekzaltuar thote:

“Rreshtimi i Serbisë përsëri me Perëndimin në këtë përshkallëzim të ri kundër agresionit rus, lajm i mirë për rajonin!” thote Rama.

Eshte vertet mjerane dhe qesharake te shohesh se si Rama shfaqet si nje zgjatim serb dhe ben nje avokati abortive si alibi pro serbe.

Sepse vete Vucic me i sinqerte thote po per kete votim te Serbise:

“Vendimi ynë ka qenë që të jemi të përmbajtur, dhe pastaj vijnë presione të panumërta, të rënda që nuk kanë të bëjnë me anën personale. Askush nuk më ka ardhur dhe nuk më ka thënë, as më ka shantazhuar, por po shantazhojnë vendin” tha Vuçiç për RTS më 7 prill.

Serish Vuçiç me i sinqerte deklarohet kunder sanksioneve ndaj Rusise dhe thote:

“Serbia nuk do të rrezikojë interesat e saj kombëtare duke iu bashkuar sanksioneve perëndimore kundër Rusisë për shkak të Ukrainës” tha Vuçiç. Ate qe vete Vuçic nuk e pranon del Rama i veteposhteruar dhe ja justifikon neveritshem.

Pra eshte e qarte per te gjithe se me Ramen ne krye te qeverise te gjitha interesat kombetare te Shqiperise jane te rrezikuara si kurre me pare. Ne cdo tavoline ku negociohen interesat e Shqiperise, Rama si kryeministri i saj eshte kunder vendit te tij dhe ne krah te interesave te cdo lloj shovinizmi antishqiptar.

Qendrimi ndaj kufijve detare te Shqiperise dhe vendimet  e qendrimet e fshehta te Rames, duke ju fshehur cdo trasparence dhe instituconeve kushtetuese te vendit eshte nje prove shume e rende se sa te rrezikuara jane interesat e vendit me kete kryeminister.

Po keshtu Ballkani i Hapur serborus eshte nje fakt, qe flet vete dhe ku askush nga aksi euroatlantik nuk e ka mbeshtetur pervec aksit Beograd Moske dhe klounit Rama ne Tirane.

Qendrimi coptues proserb dhe i eger ndaj kufijve te Kosoves eshte prove asgjesuese per antishqiptarizmin e pazarxhiut antikombetar Edi Rama. Sot Shqiperia eshte po aq e rrezikuar si 1913.

Eshte e rrezikuar sepse ne krye te qeverise eshte kryeministri i vetem i deklaruar serborus si asnje kryeminister tjeter ne historine e saj, kryeminister i hapur per çdo pazar ne dem te vendit.

Ndaj qendrimi perballe Rames deri ne largimin e tij eshte nje perballje historike per mbrojtjen e integritetit dhe sovranitetit te nje Shqiperie te rrezikuar si kurre me pare nga nje kryetradhetar i pashembullt. syri.net

Aktivistja Evi Kokalari ka komentuar zgjedhjet për kryetar të degëve në Partinë Demokratike. Kokalari shprehet se mbështet të gjitha gratë që janë përfshirë në këtë garë. Përmes rrjeteve sociale ajo thekson se prej largimit të monstrave të Lulzim Bashës, gratë e PD po shkëlqejnë.

“Di që disa gra fantastike janë në garë për kryetare dege. Ju uroj suksese sot! Që kur larguam monstrat e Bashës, gratë e PD-se po shkëlqejnë.

Por suksese të gjithëve sot, pa përjashtim. Shanset e fitores janë të barabarta për të gjithë ju.”-shkruan Kokalari. syri.net

Gazetari dhe Drejtori i Politiko.al, Alfred Lela, në një lidhje me Skype për ‘Ora 19:00’ me moderatoren Juli Krisafi në Syri Tv, komentoi vendimin e Gjykatës së Apelit të Tiranës, që pranoi ankimimin e Enkelejd Alibeajt, edhe pse nuk ishte palë në proces. 

Sipas tij, Gjykata është ndikuar nga deklaratat që vijnë nga zyrat, duke iu referuar ndërhyrjeve të ambasadores së SHBA në Tiranë, Yuri Kim.

“Gjyqësori po përdoret si mjet për luftën politike. Këtë radhë mjetet janë gjyqësori, aparati i sistemit të drejtësisë, ndikimi i tij. Deklaratat e kanë bërë punën e vet për arsyen e zyrës prej nga vijnë, apo zyrave, por edhe për arsye të diskurit shumë të ngarkuar për domosdoshmëri të Reformës në Drejtësi, deri në shenjtëri të Reformës. Kështu që, edhe në mos pastë qenë i drejtpërdrejtë, i tërthortë ka qenë ky vendim, gjë që u duk edhe te vendimi për të marrë në shqyrtim kazusin e Enkelejd Alibeaj, të cilin s’di si ta quaj se ka qenë i ngarkuar më shumë punë në PD“, u shpreh Lela.

Politikisht në PD shumica është Sali Berisha dhe kjo u konfirmua në 6 mars, thotë Lela, duke shtuar se vendimi i Apelit nuk ndryshon gjë.

“Në 6 mars Sali Berisha certifikoi se cila është mazhoranca dhe cila është pakica, ose togjet e mbetura nga fraksioni Basha i dikurshëm. Politikisht është e qartë, por loja e nervave mes kundërshtarëve të qartë politik, me stërkëmbësha, me ndërhyrje, do të vazhdojë. Unë nuk mendoj se ndryshon gjë, ndonjë vendim që është marrë, ndonjë verdikt të dhënë në 6 mars. Kështu që do të mbetet në nivelin e lojës dytësore, që mundohet të ndikojë politikën, por është, sa më takon mua, ekstra politik. 6 marsi e ka vendosur se kë preferon baza“, theksoi ai.