Prishtinë, 10 korrik 2026

Kryeministri në detyrë i Republikës së Kosovës, Albin Kurti, u takua me kryetarin e Partisë Demokratike të Kosovës (PDK), Bedri Hamza, në kuadër të konsultimeve me partitë politike për formimin e institucioneve të reja të vendit.

Pas takimit të mbajtur në Kuvendin e Kosovës, kryeministri Kurti ka deklaruar se diskutimi me kryetarin e PDK-së ishte konstruktiv ndonëse nuk pati rezultat konkret.

“Uroj që kjo frymë e konstruktivitetit të mbizotërojë edhe në vijim dhe në përputhje me afatet të konstituojmë institucionet. Për bindjen time vullneti është aty, atmosfera konstruktive duhet të vazhdojë të mbizotërojë”, ka thënë ai.

Kryeministri Kurti ka deklaruar po ashtu se “për zgjedhjen e presidentit përgjegjësia bie mbi të gjitha partitë”, ndërsa shtoi se për këtë pozitë duhet një figurë konsensuale, të mos jetë i asnjë partie, dhe dikush që është përtej polemikave të skenës aktuale, që i ka vlerat e dëshmuara kombëtare e profesionale dhe të jetë shprehje e unitetit.

Në kuadër të konsultimeve, kryeministri në detyrë Kurti pasdite do të takojë kryetarin e Lidhjes Demokratike të Kosovës, Lumir Abdixhiku./Zyra e Kryeministrit

Analisti i njohur Fatos Lubonja, i ftuar në studion e lajmeve në News24, ka komentuar situatën politike dhe tensionet sociale në vend, ndërsa sot shënohet dita e 41-të radhazi e protestave masive kundër kryeministrit Edi Rama dhe kabinetit të tij qeveritar.

Lubonja u shpreh se revolta qytetare buron nga keqmenaxhimi dhe vendimmarrjet arbitrare të pushtetit, duke u ndalur specifikisht te alokimi i fondit prej 4 milionë eurosh për organizimin e një koncerti. Sipas tij, ky akt përbën shkelje të Kushtetutës dhe dëshmon se vendi po drejtohet nga një pushtet autokratik.

“Qytetarët protestojnë kundër arrogancës e zhvatjes. Nuk jemi për instalimin e një diktature revolucionare, nuk jemi për përdorimin e dhunës. Jemi në një situatë ku kërkojmë zgjedhje të lira. Por kjo ka edhe anën tjetër të medaljes, sepse Marx thotë për revolucionet se arma e kritikës nuk e zëvendëson dot kritikën me armë. Rama ka shkelur Kushtetutën duke dhënë 4 milionë euro për një koncert, nuk ka mësuar asgjë nga kjo protestë,” deklaroi Lubonja.

Më tej, analisti lëshoi kritika të ashpra ndaj deputetëve dhe ministrave të maxhorancës, duke vënë në dyshim integritetin e tyre dhe funksionimin e shtetit ligjor në Shqipëri.

“Çfarë deputetësh janë ata, çfarë ministrash janë ata? Pse, me ligj do shkojmë ne apo me kode nderi e turpi që shpikin? Shqipëria turpërohet nga ky akt sepse tregon se nuk është një demokraci ku vendos populli, por vendos një autokrat që i jep 4 milionë euro një kompanie private. Ky duhet te frenohet nga parlamenti, opozita dhe drejtësia,” përfundoi Fatos Lubonja në analizën e tij.

Kreu i lëvizjes “Shqipëria Bëhet”, Adriatik Lapaj, ka depozituar në Gjykatën Kushtetuese një kërkesë për shfuqizimin e Aktit Normativ të Këshillit të Ministrave, përmes të cilit është miratuar një fond prej 4 milionë eurosh për kompaninë organizatore të koncertit të këngëtarit Kanye West në Shqipëri.

Lapaj ka kërkuar nga Gjykata Kushtetuese pezullimin e çdo veprimi që lidhet me kryerjen e pagesave, ndërsa ka deklaruar se dyshon që fondet mund të jenë kaluar tashmë.

“I kemi kërkuar Gjykatës Kushtetuese të pezullojë çdo veprim për të bërë pagesat, edhe pse kam përshtypjen se këta i kanë bërë pagesat. Së dyti, kemi kërkuar shfuqizimin e këtij akti si në kundërshtim me Kushtetutën e Shqipërisë”, u shpreh Lapaj. gsh

Emigrimi, plakja e popullsisë dhe pjesëmarrja e ulët në trajnim po tkurrin forcën e punës së Shqipërisë, ndërsa numri i vendeve të lira po rritet shpejt.

Popullsia e vendit ra me rreth 430,000 banorë ndërmjet viteve 2011 dhe 2023. Tkurrja prej afro 14% e çoi popullsinë rezidente në rreth 2.4 milionë banorë, një rënie që raporti i OECD-së, “Indeksi i Politikave për Ndërmarrjet e Vogla dhe të Mesme në Ballkanin Perëndimor dhe Turqi 2026 – Profili Ekonomik i Shqipërisë”, e lidh me emigrimin e vazhdueshëm dhe normat e ulëta të lindshmërisë.

Raporti, i cili vlerëson politikat dhe kushtet për zhvillimin e ndërmarrjeve të vogla dhe të mesme në vend, nënvizon se presioni mbi tregun e punës shkon përtej numrit të banorëve që janë larguar.

Numri i shqiptarëve që jetonin jashtë vendit vlerësohej në më shumë se 1.2 milionë në vitin 2024, ose mbi 230,000 persona më shumë se në vitin 2015. Norma e emigrimit arriti në 31.1%, e dyta më e lartë në Ballkanin Perëndimor dhe Turqi.

Prirja mund të vazhdojë. Një anketë e vitit 2023 tregoi se pothuajse dy të tretat e popullsisë në moshë pune (rreth 67%) do ta konsideronin emigrimin nëse do t’u jepej mundësia, ndërsa rreth 13% deklaruan se kishte gjasa të largoheshin në vitet e ardhshme.

Largimet po përqendrohen gjithnjë e më shumë te punonjësit me kualifikime të larta, duke rritur presionin mbi kompanitë që kërkojnë staf të specializuar. Rreth 95% e bizneseve të anketuara kërkuan veprime më të forta nga qeveria për të mbajtur talentet në vend dhe për të trajtuar boshllëqet në tregun e punës.

Në të njëjtën kohë, popullsia që mbetet në Shqipëri po plaket me shpejtësi. Mosha mediane u rrit nga 35.5 vjeç në vitin 2011 në 44.3 vjeç në vitin 2024.

Një në pesë banorë është tashmë 65 vjeç ose më i moshuar. Vetëm ndërmjet viteve 2024 dhe 2025, numri i banorëve mbi 65 vjeç u shtua me më shumë se 21,000 persona. Gjatë së njëjtës periudhë, numri i të rinjve të moshës 15-29 vjeç ra me më shumë se 18,000. Kombinimi i emigrimit dhe plakjes ka bërë që popullsia në moshë pune të tkurret me 18.3% që nga viti 2011, duke ngushtuar bazën nga e cila bizneset mund të rekrutojnë punonjës.

Rikualifikimi i punonjësve

Nga ana tjetër, ritmi i rikualifikimit të fuqisë punëtore mbetet i ulët. Vetëm 1.6% e personave të moshës 25-64 vjeç morën pjesë në arsim ose trajnim gjatë vitit 2024.

Kjo përqindje ishte vetëm 12% e mesatares së Bashkimit Europian, ku pjesëmarrja arriti në 13.3%. Hendeku me BE-në po zgjerohet. Pjesëmarrja në arsimin e të rriturve në Shqipëri është rritur me vetëm 0.5 pikë përqindjeje që nga viti 2016, ndërsa në Bashkimin Europian treguesi është rritur me më shumë se tri pikë përqindjeje gjatë së njëjtës periudhë.

Pjesëmarrja e ulët në trajnim po bëhet më problematike ndërsa kërkesa për punonjës rritet. Shqipëria regjistroi më shumë se 61,000 vende të lira pune në vitin 2023, një rritje prej 54% krahasuar me një vit më parë. Rreth 75% e tyre ishin pozicione të sapokrijuara.

Rritja e vendeve të lira nuk u shoqërua me një ulje të ngjashme të papunësisë. Norma e papunësisë mbeti në 9.4% në vitin 2024, ndërsa papunësia afatgjatë ishte 6.6%, kundrejt 1.9% në Bashkimin Europian. Industria përbënte 33.8% të vendeve të lira, tregtia 14.6%, ndërsa akomodimi dhe shërbimet ushqimore 14.2%.

Sipas OECD-së, kombinimi i një numri të lartë vendesh të lira me papunësi të vazhdueshme tregon se problemi nuk lidhet vetëm me mungesën e punëkërkuesve. Ai pasqyron një mospërputhje strukturore ndërmjet aftësive që kërkojnë punëdhënësit dhe atyre që ofron forca ekzistuese e punës.

Pa zgjerimin e programeve të rikualifikimit dhe trajnimit, veçanërisht në sektorët që po krijojnë më shumë vende pune, raporti paralajmëron se ky hendek mund të vazhdojë ose të zgjerohet, duke kufizuar si rritjen ekonomike, ashtu edhe rezultatet e punësimit./ Monitor

Vendimi i qeverisë shqiptare për të financuar me 4.56 milionë dollarë koncertin e reperit amerikan Kanye West ka tërhequr vëmendjen e mediave ndërkombëtare.

Pas Reuters, edhe NBC News i ka kushtuar një artikull çështjes, duke raportuar mbi debatet që ka shkaktuar përdorimi i fondeve publike për organizimin e eventit.

Sipas NBC News, kryeministri Edi Rama mbrojti vendimin për të akorduar 4 milionë euro, duke argumentuar se fondet u përdorën për të shmangur anulimin e koncertit dhe dëmtimin e imazhit të Shqipërisë.

“Ne akorduam 4 milionë euro në momentin e fundit për të shmangur turpërimin e Shqipërisë në sytë e gati 25 mijë vizitorëve të huaj nga 80 vende, të cilët tashmë kishin blerë bileta”, citohet Rama nga NBC Neës.

Sipas kryeministrit, koncerti i planifikuar më 11 korrik pranë Tiranës pritet të gjenerojë të paktën 100 milionë euro të ardhura për ekonominë shqiptare, falë rritjes së rezervimeve në sektorin e turizmit.

NBC News kujton gjithashtu se Kanye West, i njohur edhe si Ye, është përballur me polemika ndërkombëtare pas deklaratave të mëparshme që u konsideruan si lavdërime për Adolf Hitler dhe përdorimit të simboleve naziste. Sipas artikullit, artisti ka kërkuar më vonë falje për disa prej këtyre deklaratave.

Artikulli thekson se vendimi i qeverisë shqiptare ka shkaktuar reagime të shumta në rrjetet sociale, ku një pjesë e komentuesve kanë kundërshtuar përdorimin e parave publike për organizimin e koncertit.

NBC Neës raporton gjithashtu se Shqipëria po përballet prej më shumë se një muaji me protesta të përditshme në Tiranë. Sipas medias amerikane, demonstratat nisën pas kundërshtimeve ndaj projektit të resortit luksoz të lidhur me Jared Kushner dhe më pas u zgjeruan me akuza për korrupsion ndaj qeverisë dhe kërkesa për dorëheqjen e kryeministrit Rama, akuza të cilat ai i ka mohuar. bw

Analisti Edvin Kulluri komentoi vendimin e qeverisë së Edi Ramës për të financuar koncertin e reperit Kanye West me 4 milionë euro.

Në një intervistë për News24, ai deklaroi se fondi i emergjencës nuk mund të preket për një koncert, por vetëm për gjëra jetike për vendin.

“Besoj që nëse është prekur fondi rezervë i qeverisë preket çështje krejt të tjera, për çështje shumë më serioze se një koncert. Kryeministri nuk mund të prekë fondin e emergjencës për këtë çështje por për gjëra që janë realisht emergjente për shoqërinë, si emergjencat civile, mund të jetë rritja e papritur e interesave të borxhit publik, ose një vepër infrastrukturore kritike.

Ne sot kemi diku te 10 milionë turistë. Impakti ekonomik i një koncerti në turizëm nuk është kaq sa e shet kryeministri. Ti nuk heq plehrat pas hoteleve me 5 yje në Dhërmi dhe ti do të investosh te koncerti. Ka mbetur po i njëjti Edi Rama kryetari i bashkisë. Punët serioze të shtetit i ka kthyer në qesharake. Që nga siguria kombëtare e deri te gjëra të tjera. Nuk ka koncepte menaxhimi të interesave të përbashkëta qytetare.”, theksoi ai.

Sipas tij, kjo është një aventurë personale e kryeministrit, ndërsa shtoi se me këtë sfidoi protestuesit të cilët dalin çdo ditë në shesh kundër padrejtësive.

“Pas fasadës ka realitete të vështira që kanë nxjerrë këta njerëz në shesh. Nuk besoj se këto 4 milionë euro  do t’u zgjidhin problemet, por në këtë situatë kjo është një sfidë që Rama iu bën atyre njerëzve në shesh se disa janë ish pronarë që nuk janë dëmshpërblyer, disa iu janë marrë pronat për interesa publike dhe nuk janë dëmshpërblyer, disa mendojnë se me këto lekë duhen bërë shumë gjëra bazike. Kur kujton se sa miliarda janë shpërdoruar për shkak të korrupsionit nga kjo qeveri, irritohesh edhe më shumë. Nuk është treguar i mençur me këtë ndërhyrje, këto janë aventura personale se dikujt i pëlqen Kanye West, dikujt Scorpions.”, tha ai.

Duke komentuar deklaratën e Ramës se dhanë financimin në minutën e fundit për të mos turpëruar Shqipërinë, analisti deklaroi se vendi turpërohet nga veprimet e qeverisë që po e shkatërron atë me vendimet e saj.

“Turpërohet ky jo Shqipëria. Shqipëria turpërohet për shkak të standardit të ulët demokratik, se shkatërrohet natyra me firmën e qeverisë, se është bërë mal betoni, krimin e organizuar që ky e mban mbi shpatulla. Nuk është ky modeli i zhvillimit. Këto dështime të mëdha nuk i mbulon dot me një koncert apo me penelat që hedh ky poshtë e lartë. “, shtoi Kulluri.

Mungesa e fuqisë punëtore vendase po shtyn gjithnjë e më shumë bizneset shqiptare të kërkojnë staf jashtë vendit. Vitet e fundit është rritur ndjeshëm prania e punonjësve të huaj, veçanërisht nga vendet aziatike, në sektorë si shërbimet (baret dhe restorantet), industria dhe bujqësia.

Nga kamerierë e punonjës mirëmbajtjeje deri te inxhinierë dhe kujdestarë fëmijësh dhe të moshuarish, të huajt po bëhen një pjesë gjithnjë e më e dukshme e tregut shqiptar të punës.

Sipas të dhënave të Agjencia Kombëtare e Punësimit dhe Aftësive (AKPA) në total për vitin 2025 janë miratuar online 18,156 kërkesa punësimi për shtetas të huaj. Krahasuar me vitin paraardhës numri i tyre u rrit me 43.4%. AKPA pohoi se 14 mijë leje pune për shtetasit e huaj u dhanë për herë të parë në 2025-n, duke treguar fluksin e lartë të të huajve që po vijnë të punojnë në vend.

Për vitin 2025 shtimi më i lartë i kërkesave ishte për të punësuarit nga Filipinet dhe India.

18% e kërkesave për punësime të miratuara online nga AKPA ishin nga Filipinet. Edhe punësimet nga India zunë 18% të totalit të kërkesave të miratuara online.

Kërkesat e miratuara të lejeve të punës për shtetasit nga Egjipti zunë 15% të totalit, ndërsa nga Turqia 9%, Kosova 4% dhe Italia 3%.

Në vitin 2025, u dhanë 3,251 leje pune për shtetas indianë, gati dy herë më shumë se një vit më parë dhe 3279 leje për shtetasin nga Filipinet.

Shtetasit e huaj për t’u punësuar në Shqipëri, sipas ligjit “Për të huajt”, duhet të pajisen me Leje Unike, që përfshin miratimin e lejes për punësim + dhënie vizë + leje qëndrimi.

Nga AKPA miratohen online vetëm lejet e punësimit, ndërsa dhënia e vizës dhe e lejes së qëndrimit miratohen nga institucionet përkatëse. Pra pajisja e të huajve me Leje Unike (qëndrimi në Shqipëri me motiv punësimi) finalizohet nga Drejtoria e Kufirit dhe Migracionit në Policinë e Shtetit.

Shtetasit nga Kosova dhe Italia ndjekin procedura të lehtësuara për punësimin

Në 2025 sipas të dhënave të Policisë së Shtetit, numri i shtetasve nga Kosova të pajisur me leje qëndrimi në vend arriti në 6,076 banorë, që përbën rreth 22% të totalit. Krahasuar me 2024 numri i tyre u rrit 32%.

Ndryshe nga shtetasit e tjera, pas marrëveshjes së nënshkruar mes qeverive të Shqipërisë dhe Kosovës në vitin 2022, shtetasit e Kosovës mund të pajisen me Leje Qëndrimi biometrike 5-vjeçare, e cila shërben njëkohësisht edhe si Leje Pune. Dokumenti merret përmes një procedure të thjeshtuar online dhe eliminon nevojën për aplikime të veçanta ose rinovime të shpeshta të lejes së punës.

Për këtë arsye, një pjesë e punësimeve të shtetasve të Kosovës nuk kalojnë më në të njëjtën procedurë të miratimit të lejeve të punës nga AKPA si shtetasit e vendeve të treta, duke ndikuar edhe në uljen e numrit të kërkesave të regjistruara nga agjencia. Po ashtu pjesa e madhe e shtetasve nga Kosova dhe Italia operojnë me bizneset e tyre në vend, për këtë arsye nuk kanë nevojë të aplikojnë për leje punësimi online.

Pas Kosovës numrit më të lartë të shtetasve të huaj të pajisur me leje qëndrimi në 2025 ishte nga Italia me 3,776 persona që përbëjnë 14% të totalit të të huajave. Krahasuar me 2024 numri i tyre u rrit 75%.

Po ashtu edhe italianët, si shtetas të BE-së nuk kanë nevojë për miratim punësimi nga AKPA. Punëdhënësi ose vetë personi bën vetëm deklarimin e punësimit, dhe ligji u njeh të drejtën e punësimit në të njëjtat kushte si shtetasve shqiptarë, përveç vendeve të punës që kërkojnë shprehimisht shtetësi shqiptare.

Sipas legjislacionit “Për të huajt” pas 5 vitesh qëndrimi të ligjshëm dhe të vazhdueshëm, një i huaj mund të plotësojë kushtet për leje të përhershme; dokumenti i kësaj lejeje zëvendësohet çdo 10 vjet me procedurë automatike. Statusi i banorit afatgjatë nuk humbet vetëm sepse skadon karta 10-vjeçare.

Pra, praktikisht një shtetas italian nuk aplikon çdo vit për kërkesë punësimi, si shtetasit e vendeve që i nënshtrohen kontrollit të tregut të punës. Por mund t’i duhet të rinovojë lejen e qëndrimit sipas afatit të kontratës, derisa të fitojë leje të përhershme. /Monitor

Deputetja Marjana Koçeku ka reaguar përmes një postimi në rrjetet sociale, ku thotë se prej disa ditësh është objekt i një fushate sulmesh nga profile të rreme dhe patronazhistë, të cilët, sipas saj, i kërkojnë të heqë dorë nga mandati.

Koçeku deklaron se sulmet lidhen me vendimin e saj për t’u shkëputur nga radhët e Partisë Socialiste dhe me mbështetjen që i ka dhënë protestës. Ajo akuzon funksionarë të shtetit për organizimin e këtyre fushatave denigruese në rrjetet sociale.

Sot protesta ka hyrë në ditën e 38 të saj dhe gjatë gjithë ksaj periudhe protestuesit kanë kërkuar dorëheqjen e kryeministrit Edi Rama dhe përmbysjen e kastës së vjetëer politike.

I ftuar në programin e drekës në News 24, përballë Ola Brukos, ish-drejtuesi i Policisë, Mithat Havari deklaroi se ai po proteston sepse misioni i protestave në vitn 1990 nuk është përmbushur. Ai tha se ende sundojnë bolshevikët dhe nëse vendet e tjera i kanë hequr figurat e vjetra në vendin tonë kanë ngelur drejtues që për pushtet janë gati të vrasin.

“Protesta mision i pambyllur nga ‘90, misioni nuk u përmbush. Mendova se do të ndryshonte ndonjë gjë, por nuk ndidhi. Keta për pushtet të vrasin, kujtojmë Berishën e 97 ku rrahu gazetarët, pastaj firmat Piramidale, bahskëpunimi me Ilir Metën, 21 janari dhe tai “Mbreti Lakuriq” i braktisi protestuesit dhe u fsheh.

Rama është i etur për pushtet.

Lubonja pak ditë më parë tha se i ka thënë të mos futet në politikë se Rama është person i rrezikshëm për popullin, nuk ka gabuar në optikën e tij.
Unë në protestë jam për fëmijët e mi, duhet të shporret kjo kastë sepse ka 82 vjet, tani po na sundojnë fëmijët e bolshevikëve”, tha Havari.

Në një kohë kur prej 38 ditësh mijëra qytetarë shqiptarë dalin çdo ditë në shesh dhe kërkojnë dorëheqjen e kryeministrit Edi Rama, akademiku Artan Fuga thotë se parlamenti duhet të shpallë afatet e vetëshpërndarjes.

“E mira është që Kuvendi i Shqipërisë të shpallë afatet e vetëshpërndarjes së tij! Nëse deputetëve u ka mbetur një fije përgjegjësie morale dhe sociale”, shkruan akademiku.

Me anë të një postimi në Facebook, Fuga shpreh kritika për mënyrën e funksionimit të Kuvendit, ndërsa shprehet i zhgënjyer nga përvoja e tij në komisionet parlamentare.

Sipas tij, mbledhjet karakterizoheshin nga mungesa e përgjegjësisë, rreshtimi partiak, mungesa e kompetencave profesionale dhe, në disa raste, edhe nga sjellje që ai i cilësoi si “budallallëk” nga ana e disa deputetëve.

“Për sa më përket, kur më ka qëlluar të jem në komisione të Kuvendit të Shqipërisë për çështje të kulturës, shkencës, arsimit, rinisë, etj., kam vënë duart në kokë nga kotësia, nga mungesa e përgjegjësisë, nga rreshtimi partiak, nga mungesa e kompetencave profesionale, përse jo edhe nga budallallëku i ndonjë deputeti apo deputeteje. Por, nuk rikthehem më me emra se historia i ka hedhur në kosh! Kjo më ka bërë disa vite më parë të deklaroj se refuzoj nga ai çast e tutje të marr pjesë në ndonjë mbledhje komisioni kuvendor. Ishte e kotë, dukej sikur merrje pjesë në një mbledhje kukullash me mekanizma të prishur brenda barkut prej kashte”, mbyll reagimin e tij Artan Fuga.

Vijoi edhe në ditën e 37-të protesta masive e mijëra qytetarëve kundër qeverisë Rama. 

Para nisjes së marshimit nga shesi Skënderbej drejt Kryeministrisë një protestues kishte një pankartë ironizuese me vete ku dukej Rama në pranga i arrestuar.

Ai tha për News24 se ka besim te SHBA, ku ka bindjen se Kongresi do hapë hetim nga kryeminsitrit për paratë e drogës.

Aktivisti: Duke qenë se jemi kreativ dhe kemi kuptuar se politika na ka bërë në 36 vite. Unë po ndihmoj prokurorin Klodian Braho, ky zotëria ka bërë betonizimin në Tiranë dhe gjithë Shqipërinë. Nga dalin këto para, mos ndoshta nga kokaina. Mos duhet ti themi amerikanëve ta hetoj këtë zotëri. Kemi shumë besim te amerikanët dhe kongresmeni që shume shpejt do hapi hetim.

U  zhvillua protesta e 37-të qytetare kundër qeverisë Rama.

Para nisjes së marshimit nga sheshi Skënderbej, foli për mikrofonin e News24 një qytetar.

Ai shpjegoi arsyet e tij pse ka dalë në protestë, nga korrupsioni dhe sistemi i kalbur politik.

Protestuesi: Kam ardhur për herë të parë, erdha me motrën edhe një më shumë sot. Për korrupsion, drejtësinë, policinë. Kam dy vjet në dyert e gjykatës. Kam apartament me certifikatë pronësie nuk po zgjidh dot të drejtën. Ka qenë një prokurore në këtë çështje e shkarkuar nga vetingu.

Korrupsionin nuk na ndahet. Qeverinë duhet ta rrëzojmë me kokë poshtë. Rama ik Berisha ik. Rama në burg, Belinda në burg, Berisha në burg. E gjithë PS duhet të jetë në burg. E gjithë PS janë me makina me 150 mijë euro. Ne jemi me rrangalle. Duhet të çohemi që të gjithë. Ata që rrinë ulur duhet të merren zvarrë dhe të vijnë në protestat tona. Edi Rama duhet të bëjë  dorëheqje. E gjithë PS në burg. Nuk janë për neve, janë për qejfet e tyre. Avokati i Popullit nuk i përgjigjet populli iku me pushime. Ç’janë këto njerëz. Ju lumtë juve gazetarëve që na udhëhiqni. Vetëm prej News24 i dëgjojmë lajmet. Më ndihmoni të shkoj në shtëpi.

Gazetari Klevin Muka i është kundërpërgjigjur me të njëjtën monedhë kryeministrit Edi Rama, pasi ky i fundit publikoi në rrjetet sociale poezinë “Kundërshtarëve të mi” të Dritëro Agollit, duke e përdorur si mesazh në mes të protestave që prej 37 ditësh kërkojnë largimin e qeverisë dhe dorëheqjen e tij.

Rama ka reaguar pothuajse çdo ditë ndaj protestuesve, duke deklaruar se ata po mashtrohen dhe po përdoren, ndërsa ka hedhur edhe akuza se protestat mbarëpopullore organizohen nga agjentë të huaj. Në postimin e tij të fundit, ai zgjodhi të ndajë vargjet e Agollit, të cilat u interpretuan si një përgjigje ndaj kritikëve.

Në reagimin e tij, gazetari Muka zgjodhi t’i përgjigjej me një tjetër poezi të shkrimtarit të madh, me titull “Një i çmendur një vend e çmend”.

“Në vendin tim e në vendin tënd
E shpojnë lakrën, i hedhin mend.
Në vendin tim e në vendin tënd
Ty të kruhet, tjetrit i dhëmb.
Në vendin tim e në vendin tënd
Hënën si petull e pjekin në shkëmb.
Në vendin tim e në vendin tënd
Një i çmendur, një vend e çmend”, thuhet në poezinë e Dritëro Agollit.

Postimi i Klevin Mukës:

Poezia e Dritëro Agollit, “Kundërshtarëve të mi”, postuar nga Rama:
“Ju aq baltë po hidhni mbi mua, Sa në baltën që kam përmbi trup Mund të mbijë një dardhë a një ftua, Një korije e madhe me dushk.
Në korije dhe dru mund të mbani, Mund të shkoni për gjah me langonj, Mund të ngjiti në pemë të hani, Po të doni dhe dardha, dhe ftonj.
Balta ngrihet mbi mua e pasur, Sa mbi baltën korija bleron… Trupin tim ma bleruat padashur Dhe ma bëtë vërtet plantacion”, thuhet në poezinë e ndarë nga kreu I qeverisë.

Aktivisti i diasporës në SHBA, Florian Xhudi, i ftuar drejtpërdrejt në studion e emisionit “News24 Fundjavë”, ka lëshuar akuza të rënda në adresë të kryeministrit Edi Rama dhe kabinetit të tij. Xhudi deklaroi se revolta e përbashkët e qytetarëve dhe emigrantëve është e shënjestruar qartë kundër korrupsionit galopant dhe sistemit të padrejtë që ka ndërtuar kreu i qeverisë në këto vite.

Sipas aktivistëve të diasporës, reagimi agresiv i kryeministrit në ditët e para të tubimeve ka ardhur si pasojë e rënies drastike të mbështetjes popullore, çka ka sjellë edhe humbjen e plotë të legjitimitetit të ekzekutivit.

“Sondazhet e nxjerrin qeverinë aq keq, sa Rama në ditët e para të protestës nxori anën e tij shumë të keqe dhe tejkaloi limitet e njerëzores. Ka përdorur fjalor të rëndë, nuk kemi të bëjmë më me legjitimitet të qeverisë,” u shpreh Xhudi.

Një tjetër pikë e fortë e denoncimit të aktivistit nga SHBA ishte edhe lëvizja më e fundit në sferat e larta të politikës amerikane, ku dyshimet për lidhjet e zyrtarëve shqiptarë me krimin e organizuar kanë mbërritur në Kongres.

“Para dy ditësh doli një lajm se një kongresmen amerikan i ka kërkuar Kongresit të ngrejë një grup investigimi për hetimin e lidhjeve të qeverisë shqiptare me narkotrafikun. Sido që të shkojë ngritja e këtij grupi, lajmi është që Kongresi Amerikan, kongresmenë të caktuar, dyshojnë se qeveria shqiptare është e përfshirë dhe bashkëpunon me trafikantët e drogës! Çështja është që ka dyshime dhe informacione se qeveria shqiptare është në raporte bashkëpunimi me trafikantët e drogës,” deklaroi Xhudi.

Salo Salillari, një nga qytetaret e pranishme në protestat masive që po zhvillohen në kryeqytet, ka ndarë eksperiencën e saj në studion e emisionit “News24 Fundjavë”. Ajo tregoi se i është bashkuar tubimit që në ditën e tretë të tij dhe se në këtë revoltë ka zgjedhur të marrë me vete edhe fëmijët.

Ajo theksoi se arsyeja që e shtyn të dalë në shesh lidhet me mungesën e të drejtave më bazike dhe me dështimin e plotë të sistemit aktual në çdo sektor.

Salillari e mbylli mesazhin e saj me bindjen se revolta popullore ka arritur në një pikë pa kthim, duke deklaruar se për këtë mënyrë qeverisjeje tashmë ka ardhur fundi.

Aktivistja Arilda Lleshi, e ftuar në emisionin “Fundjavë” në News24, ka folur mbi ecurinë dhe suksesin e protestave masive që po zhvillohen kundër kryeministrit Edi Rama dhe kabinetit të tij qeveritar. Ajo tregoi zanafillën e kësaj lëvizjeje dhe reflektoi mbi pjesëmarrjen e jashtëzakonshme të qytetarëve, e cila ka tejkaluar parashikimet.

“Njerëzit u bashkuan në mënyrë spontane, duke u shndërruar me shpejtësi në mijëra veta që marshuan drejt Kryeministrisë. Gjërat rrodhën shumë shpejt dhe ranë poshtë të gjitha supozimet e skeptikëve. Shumë menduan se temperaturat e larta të qershorit do ta zbehnin qëndresën, apo se tensionet e shënuara së fundmi te Parlamenti do ta dobësonin kauzën, por tubimi madhështor i 4 korrikut tregoi të kundërtën me një pjesëmarrje masive”, u shpreh ajo.

Lleshi theksoi se kjo protestë është e decentralizuar dhe ka sjellë arritje thelbësore, ku më kryesorja është fuqizimi i qytetarëve dhe thyerja e barrierës së frikës, gjë që nuk ishte parë më parë.

Ajo shtoi se përmes aksioneve të ndryshme, njerëzit po tregojnë gatishmëri për të rifituar hapësirën publike, ndërsa vihen re përpjekje nga grupe të ndryshme interesi për t’u organizuar.

Aktivistja dha një mesazh të prerë duke deklaruar se kjo qeveri nuk e ka më tagrin për të vijuar qeverisjen pasi ka humbur besimin e qytetarëve, ndaj dorëheqja e saj është hapi i parë dhe i domosdoshëm që duhet të ndodhë.

Në protestën e zhvilluar në Tirana, në mënyrë simbolike është paraqitur një bust i kryeministrit Edi Rama.

Në të shkruhej “diktatori i fundit”, ndërsa në mënyrë simbolike ata e rrëzuan me litar dhe e shkelën e këmbë, duke e krahasuar me rrëzimin e bustit të ish diktatorit Enver Hoxha.

Organizatorët e kanë cilësuar protestën si një nga më të mëdhatë e zhvilluara në vend, me pjesëmarrje të gjerë nga qytetarë brenda vendit dhe nga diaspora. gsh

Aktivisti Olgert Rakipllari ka deklaruar në një intervistë për News 24 se data 4 korrik është përzgjedhur për protestën kombëtare për arsye simbolike, duke e lidhur atë me Ditën e Pavarësisë së Shteteve të Bashkuara të Amerikës dhe ditëlindjen e kryeministrit Edi Rama.

“Sot është edhe dita e ditëlindjes së Ramës, festojmë fundin e diçkaje dhe nisjen e bashkëpunimit me Amerikën. Jemi proamerikanë dhe proeuropianë”, u shpreh ai.

Rakipllari theksoi se protesta që shënon sot 35 ditë është pro SHBA-së dhe Bashkimit Europian, por kundër, siç tha ai, veprimeve të paligjshme ndaj Shqipërisë.

“Jemi pro Amerikës, por kundër veprimeve të jashtëligjshme kundër Shqipërisë”, deklaroi ai.

Ai shtoi se protestuesit mirëpresin sinjalet nga ndërkombëtarët dhe mbështetjen e partnerëve europianë.

“Mirëpresim sinjalet nga ndërkombëtarët, të gjithë duhet të na japin një dorë. Në Europë kemi mbështetësit tanë dhe po lobojnë. Çdo ditë është në favorin tonë, duhet qëndresë”, tha Rakipllari.  “Fakti që kemi sinjale nga SPAK-u me intensifikimin e hetimeve, këtë kemi pritur”, u shpreh ai.

Aktivisti Ilir Xhemalaj në protestën e 34-t para kryeministrisë për dorëheqjen e kryeministrit Edi Rama, ka deklaruar se zëri i protestuesve shqiptarë ka mbërritur deri në Shtetet e Bashkuara të Amerikës, duke përmendur edhe një reagim të senatorit amerikan Jon Ossoff.

“Sot ne nuk jemi vetëm, senatori amerikan Jon Ossoff ngriti zërin për ne, denoncoi marrëveshjet e errëta të pushtetit dhe mbështeti revolucionin tonë për Shqipërinë e re”, tha ai, ndërsa shtoi se kjo mbështetje nga Senati i SHBA tregon qartë se lufta kundër korrupsionit i ka kaluar kufijtë dhe nuk ndalet më.

“Nuk ka forcë më të madhe se ajo e një populli të bashkuar”, u shpreh ai.

Aktivisti Ilir Xhemalaj: Sot zëri ynë dëgjohet lart, deri në dyert e Senatit amerikan në Washington. Sot ne nuk jemi vetëm, senatori amerikan Jon Ossoff ngriti zërin për ne, denoncoi marrëveshjet e errëta të pushtetit dhe mbështeti revolucionin tonë për Shqipërinë e re.

Falenderojmë senatorin Ossoff dhe miqtë tanë në Senatin amerikan që mbrojnë të vërtetën dhe dinjitetin e popullit shqiptar. Kjo mbështetje nga Senati i SHBA tregon qartë se lufta jonë kundër korrupsionit i ka kaluar kufijtë dhe nuk ndalet më. Nuk ka forcë më të madhe se ajo e një populli të bashkuar. GSH

Shqiptarët janë populli më proamerikan dhe më proevropian në Ballkan dhe se protesta mbahet kundër politikanëve dhe pushtetarëve që kanë grabitur Shqipërinë.

Kështu u shpreh sot nga podiumi i protestës një prej emigrantëve folës para mijëra qytetarëve para kryeministrisë, teksa i bëri thirrje qeverisë për dorëheqje dhe për lirimin e të arrestuarve dje para Kuvendit.

“Interesat politike shitën një demokraci falsë dhe larguan të gjithë qytetarët dhe studentët. Rama në burg dhe të gjithë ata që i ndjekin nga pas. Mua më kanë dekoruar pishtar i demokracisë, por i kam refuzuar. Sepse këta janë këlyshë të bolshevizmit, janë me mision që të vjedhin e grabisin shqiptarët e pastaj t’i largojnë nga Shqipëria. I bëj një pyetje kryeministrit, kryehajdutit të Shqipërisë, kur flet për ata 850 mijë vetë kontratë, a i ke pyet ata votues pse janë larguar. Ata atje janë gati të sheshin edhe familjet e tyre për pushtet”, tha ai mes të tjerash.

Më tej ai tha se nuk janë kundër investimeve amerikane apo evropiane, por kundër pushtetit abuziv. Ai shtoi se rinia dhe diaspora janë e ardhmja e vendit dhe jo hajdutët politikanë.

“Asnjë nga ne nuk jemi kundër investimeve evropiane dhe amerikane, ne jemi populli më amerikan që e duam demokracinë, por këta që janë duan ta vjedhin Shqipërinë. Rinia dhe diaspora është e ardhmja e Shqipërisë dhe do e çojnë në BE, jo këta hajdutët këtu. Jemi në momente të vështira, populli lufton për ekzistencë, ose ne, ose ata”, vijoi ai.

Një thirrje shkoi edhe për diasporën, që nesër kur të vinin për protestë të filmonin pengesat në kufi nga Policia dhe t’i denonconin. Në fund edhe apel për Policinë që të lironte të arrestuarit.

“Thirrje të gjithë diasporës që të bëjnë filmime nga pikat kufitare nëse i ndalojnë, që të tregojmë se si vepron diktatura. I bëj thirrje edhe Ministrisë së Brendshme që të lirojnë ata çunat e arrestuar, sepse janë patriotë të vërtetë, janë atdhetarë, ndaj t’i lirojnë sa më parë”, përfundoi emigranti. gsh

Deputeti socialist Damian Gjiknuri, gjatë diskutimeve në Kuvend, ngriti pikëpyetje për pasojat që mund të kenë sekuestrimet e mëdha te palët e treta, furnitorët apo qytetarët që kanë lidhje ekonomike me asete që më pas rezultojnë si pasuri të krimit.

TIRANË- Goditjet e SPAK ndaj pasurive të dyshuara si produkt i trafikut të drogës kanë sjellë shqetësim edhe në radhët e maxhorancës për efektet që mund të krijohen në ekonomi. Deputeti socialist Damian Gjiknuri, gjatë diskutimeve në Kuvend, ngriti pikëpyetje për pasojat që mund të kenë sekuestrimet e mëdha te palët e treta, furnitorët apo qytetarët që kanë lidhje ekonomike me asete që më pas rezultojnë si pasuri të krimit.

Gjiknuri mori si shembull një rast me vlerë 160 milionë euro, duke paralajmëruar se ndikimi në ekonomi mund të jetë i jashtëzakonshëm.

“Çfarë pasojash kanë personat që kanë porositur apo furnizuar në asete që rezultojnë pasuri e krimit? Po hyni me vlera të mëdha, 160 milionë vetëm një rast. A dimë ku po shkojmë? Te palët e treta. Impakti në ekonomi mund të jetë i jashtëzakonshëm”, tha Gjiknuri.

Por prokurori i Posaçëm, Klodian Braho, dha një përgjigje të prerë, duke deklaruar se pasuritë e krimit janë “tumor në ekonomi” dhe se SPAK nuk do të tërhiqet nga sekuestrimet.

“Pasuritë e krimit janë tumor në ekonomi dhe nuk ka zgjidhje tjetër veç sekuestrimit dhe konfiskimit. SPAK është i vendosur të mos tolerojë”, tha Braho.

Ai theksoi se produktet e krimit do të sekuestrohen dhe se vala e goditjeve do të vijojë.

“Do të ketë të tjera”, paralajmëroi prokurori i Posaçëm./Dosja.al

Me anë të një postimi në rrjetet sociale, avokati thekson se pamjet filmike tregojnë raste kur qytetarë të neutralizuar ose duke u larguar janë goditur me shkop gome, shqelma, janë tërhequr zvarrë dhe ndaj tyre është përdorur gaz lotsjellës dhe spraj.

TIRANË– Avokati, Dorian Matlija i ka bërë thirrje Prokurorisë së Tiranës lidhur me dhunën që policia ushtroi ditën e djeshme ndaj protestuesve para Parlamenteti, që krahas hetimit të protestuesve të ndaluar, të verifikojë edhe veprimet e efektivëve të policisë gjatë tubimit. Me anë të një postimi në rrjetet sociale, avokati thekson se pamjet filmike tregojnë raste kur qytetarë të neutralizuar ose duke u larguar janë goditur me shkop gome, shqelma, janë tërhequr zvarrë dhe ndaj tyre është përdorur gaz lotsjellës dhe spraj.

Ai thekson se veprime të tilla nuk mund të justifikohen si masa për ruajtjen e rendit publik dhe duhet të hetohen penalisht. Avokati sjell në vëmendje edhe nenin 3 të Konventës Evropiane për të Drejtat e Njeriut, i cili ndalon çdo trajtim çnjerëzor ose poshtërues, duke nënvizuar se ky nen nuk parashikon përjashtime, pavarësisht rrethanave. Ai kërkon që përgjegjësia penale të mos kufizohet vetëm te protestuesit, por të shtrihet edhe ndaj çdo efektivi policie apo eprori që mund të ketë tejkaluar kompetencat gjatë ndërhyrjes.

Reagimi i Avokatit, Dorian Matlija:

THIRRJE PËR PROKURORINË E TIRANËS

Në këto orë, Prokuroria e Tiranës ka në dorë arrestimet e protestuesve dhe me siguri është duke analizuar pamjet filmike. Në to bie në sy qartë se cfarë ka bërë edhe vetë policia. Ne avokatët që po merremi më këto cështje, si dhe çdo qytetar, po i shohim mirë. Kur një qytetar është i shtrirë përtokë, i neutralizuar, ose po largohet, goditja me shkop gome, me shkelma, tërheqja zvarritja, hedhja e gazit lotsjellës apo spraji i përdorur, nga ai për arinjtë, nuk janë aspak në emër të ruajtjes së rendit. Janë krime që duhen hetuar penalisht.

Neni 3 i Konventës Evropiane për të Drejtat e Njeriut ndalon cdo trajtim çnjerëzor dhe poshtërues. Ky është i vetmi nen i konventës që nuk ka përjashtime dhe justifikime. Nuk justifikohet dot as nga rendi publik, as nga emergjenca, as nga dhuna e ndonjë protestuesi, as nga asnjë interes tjetër shtetëror. Prandaj Prokuroria që tani sheh videot për të nxjerrë përgjegjësitë e protestuesve, nuk mund të rrijë pa e vënë re dhunën kriminale policore. Nëse do hetohen individualisht qytetarët protesues, duhet të hetohet edhe dhuna e shtetit, për cdo efektiv policie dhe për cdo urdhërdhënës.

Në këtë moment delikat, i bëj thirrje Prokurorisë së rrethit Tiranë që të konsiderojë sa më poshtë:
1. Protesta nuk është krim, me leje apo pa leje. Gjykata Kushtetuese e ka dhënë verdiktin e saj për këtë gjë.
2. Hedhja e vezëve në drejtim të objekteve, ulja në shesh, bllokimi paqësor, thirrjet, pankartat apo revolta qytetare nuk janë krime.
3. Rrahja e qytetarëve, tërheqja zvarrë, poshtërimi, janë krime, të eprorëve dhe vartësve të tyre.

Këtu detyra e Prokurorisë është me rëndësi parësore për të ruajtur rendin. Sepse po nuk u trajtua përgjigjesia penale e atyre me uniformë, që buron nga të njëjtat prova që po mblidhni për qytetarët, shumë të tjerë nesër do nxiten me të drejtë që ta zgjidhin vetë këtë hall, qoftë edhe duke marrë në vazhdim përgjegjësi penale individuale po qe nevoja./Dosja.al

Kreu i SPAK, Klodian Braho, nuk përjashtoi mundësinë e një kërkese të re për heqjen e imunitetit të zëvendëskryeministres Belinda Balluku, por theksoi se çdo vendimmarrje do të mbështetet ekskluzivisht në ligj dhe në provat që do të dalin nga hetimet.

Gjatë raportimit në Komisionin e Ligjeve, Braho u pyet nga deputeti Oerd Bylykbashi nëse SPAK do t’i drejtohet sërish Kuvendit me një kërkesë për heqjen e imunitetit të Ballukut.

“Nuk do të kishte çështje nëse nuk do të kishte shkelje të ligjit. Qëndrimi i Prokurorisë është i qartë dhe po aq e qartë është edhe mënyra se si hetimet kanë vijuar edhe pas refuzimit të kërkesës së mëparshme. Faktet tregojnë se Prokuroria ka bërë punën e saj,” deklaroi Braho.

Ai shtoi se çështja mbetet në fazën e hetimit dhe se nuk mund të paragjykojë vendimin përfundimtar.

“Nuk mund të them sot nëse do të ketë apo jo një kërkesë tjetër. Ajo që mund të garantoj është se çdo vendim do të merret në përputhje me ligjin, mbi bazën e provave që do të sigurohen gjatë hetimit, duke marrë në konsideratë edhe arsyetimin e Kuvendit për rrëzimin e kërkesës së mëparshme,” u shpreh kreu i SPAK.

Ata thonë se edhe pse protestat dhe grumbullimet e mëdha shpesh nisin në mënyrë paqësore, situata mund të ndryshojë me shpejtësi.

TIRANË- Ambasada amerikane në Tiranë u ka bërë thirrje shtestave amerikanë që gjenden në Tiranë të tregojnë kujdes të shtuar, pasi kryeqyteti po përballet me protesta masive. Përmes një njoftimi zyrtar, ajo këshillon që qytetarët amerikanë të shmangin pjesëmarrjen në protesta dhe të ndjekin zhvillimet e fundit përmes mediave.

Ata thonë se edhe pse protestat dhe grumbullimet e mëdha shpesh nisin në mënyrë paqësore, situata mund të ndryshojë me shpejtësi. Ambasada amerikane këshillon që qytetarët amerikanë të kenë gjithmonë një plan emergjence ose një strategji daljeje nga zona si dhe të shmangin tërheqjen e vëmendjes.

Njoftimi i plotë i Ambasadës së SHBA-së në Tiranë:

Vendndodhja: Në të gjithë vendin; Tiranë, Bulevardi “Dëshmorët e Kombit”, segmenti mes Sheshit “Skënderbej” dhe Sheshit “Nënë Tereza”, përpara Kryeministrisë.

Data/Koha: Në vijim.

Njoftimi: Protestat e përnatshme vazhdojnë përpara godinës së Kryeministrisë, e cila ndodhet në Bulevardin “Dëshmorët e Kombit”, mes Sheshit “Nënë Tereza” dhe Sheshit “Skënderbej”. Protesta të tjera mund të zhvillohen edhe në ditët në vijim, si në Tiranë ashtu edhe në qytete të tjera.

Edhe pse protestat dhe grumbullimet e mëdha shpesh nisin në mënyrë paqësore, situata mund të ndryshojë me shpejtësi. Tubimet mund të shtrihen edhe në zonat përreth, përfshirë ndërtesa të tjera qeveritare. Në orët para zhvillimit të protestave dhe gjatë tyre pritet prani e shtuar e forcave të policisë, bllokime rrugësh, devijime të qarkullimit dhe ndërprerje të trafikut.

Nëse ndodheni në një qytet ku po zhvillohet një protestë, tregohuni vigjilentë dhe vendosni në prioritet sigurinë tuaj personale. Ndiqni mediat lokale dhe zbatoni udhëzimet e autoriteteve të rendit për informacionet më të fundit.

Masat e rekomanduara për sigurinë:

Qytetarët amerikanë këshillohen të shmangin pjesëmarrjen në protesta.

Tregohuni të vetëdijshëm për mjedisin përreth jush dhe kufizoni shpërqendrimet, si përdorimi i telefonit apo kufjeve në vende publike.

Ndiqni vazhdimisht mediat lokale për zhvillimet e fundit.

Keni gjithmonë një plan emergjence ose një strategji daljeje nga zona.

Mbani një profil të ulët dhe shmangni tërheqjen e vëmendjes./Dosja.al

Është hapur një fushatë në GoFundMe për të mbështetur financiarisht Altin Hilën dhe familjen e tij, pas arrestimit të tij gjatë protestës së zhvilluar një ditë më parë  para Kuvendit.

Hila mori pjesë në protestë për 32 ditë me radhë, i shoqëruar nga djali i tij i sëmurë, i cili është person me status invaliditeti. Në disa pamje të publikuara në rrjetet sociale, i riu Hila ushqen në protestë djalin e tij direkt në stomak me anë të një shiringe.

Organizatorët e nismës shprehen se familja ndodhet në vështirësi ekonomike dhe pretendojnë se Hila u dhunua nga Policia e Shtetit gjatë protestës, përpara se të arrestohej, duke e lënë familjen në një situatë edhe më të rënduar.

“Në shenjë solidariteti me atdhetarin tonë Altin Hila, po organizojmë këtë mbledhje fondesh për të lehtësuar sadopak situatën e familjes së tij”, thuhet në përshkrimin e fushatës.

Deri tani, sipas të dhënave të publikuara në GoFundMe, janë mbledhur mbi 95 mijë euro nga donatorë të ndryshëm për të ndihmuar familjen Hila.

Fushata e sensibilizimit 

Në shenjë solidarizimi per atdhedashësin tonë z. Altin Hila qe protestoi për 32 dite me fëmijën e tij të paralizuar, si nga fotot e bashkangjitura me status invalidi, po bëjmë këtë mbledhje fondesh për të lehtësuar sadopak situaten e tyre familjare.

Përveç faktit që shteti nuk ka ndihmuar ekonomikisht ndër vite, sot ai është dhunuar nga Policia e Shtetit gjatë protestës dhe është arrestuar, duke lënë familjen në gjendje akoma më të mjerueshme pa prezencën e tij fizike.

Kontakti direkt me bashkëshorten e z. Hila, zonja Lindita 686630634

Një ditë pas protestës para Parlamentit, Policia e Tiranës ka njoftuar arrestimin e 19 personave dhe procedimin penal të 12 të tjerëve.

Protesta e një dite më parë u shoqërua me tensione mes protestuesve dhe policisë, ku këta të fundit hodhën gaz lotsjellës, spraj dhe ujë.

Sipas njoftimit zyrtar, të arrestuarit akuzohen se kanë kundërshtuar dhe goditur me sende të forta punonjësit e Policisë, kanë dëmtuar një automjet policie, si dhe kanë sulmuar deputetët gjatë zhvillimit të tubimit.

Mes të arrestuarve është edhe shtetasi me iniciale A. Ll., 35 vjeç, i cili, sipas Policisë, ka goditur një gazetar gjatë protestës.

Ndërkohë, 12 persona të tjerë janë proceduar penalisht në gjendje të lirë për veprime të ndryshme të kundërligjshme të kryera gjatë tubimit.

Policia bën me dije se puna vijon për identifikimin edhe të gjashtë personave të tjerë, të cilët janë dokumentuar me pamje filmike duke kryer akte dhune.

Sipas bilancit zyrtar, gjatë përplasjeve u plagosën 15 punonjës policie dhe u dëmtua një automjet i Policisë.

Njoftimi:

Kundërshtuan dhe goditën me sende të forta punonjësit e Policisë, dëmtuan një automjet policie si dhe sulmuan deputetët e Kuvendit të Shqipërisë gjatë tubimit të zhvilluar dje, arrestohen 19 shtetas.

Procedohen penalisht 12 shtetas.

Vijon puna për identifikimin dhe të 6 shtetasve të tjerë që janë dokumentuar me pamje filmike për veprime të dhunshme.

Gjatë tubimit u dëmtuan 15 punonjës policie dhe një automjet policie.

Në vijim të veprimeve procedurale të kryera nga strukturat e Drejtorisë Vendore të Policisë Tiranë, në lidhje me tubimin e zhvilluar dje pranë Parlamentit, u bë arrestimi në flagrancë i shtetasve:

-B. K., 35 vjeç; A. E., 24 vjeç; G. P., 36 vjeç; D. B., 32 vjeç; K. P., 46 vjeç; R. D., 30 vjeç; A. Y., 40 vjeç; N. Q., 43 vjeç; Y. Sh., 52 vjeç; E. Gj., 39 vjeç; F. B., 56 vjeç; R. P., 35 vjeç; A. T., 34 vjeç; A. N., 35 vjeç; E. B., 45 vjeç; A. H., 35 vjeç; E. G., 23 vjeç, E. B., 20 vjeç.

Si dhe shtetasi A. Ll., 35 vjeç, pasi ka goditur një gazetar.

Gjithashtu, u proceduan penalisht në gjendje të lirë shtetasit: F. D., 63 vjeç; Sh. B., 33 vjeç; V. D., 29 vjeç; E. Gj., 38 vjeç; T. T., 43 vjeç; E. A., 31 vjeç; G. S., 20 vjeç; R. D., 30 vjeç; A. M., 39 vjeç; M. J., 47 vjeç, A. G., 47 vjeç dhe A. K., 22 vjeçe.

Grupi hetimor vijon punën për identifikimin e shtetasve të tjerë që mund të kenë kryer veprime të kundërligjshme gjatë tubimit të zhvilluar dje.

Materialet procedurale i janë referuar Prokurorisë së Tiranës, për veprat penale “Shkatërrim prone”, “Kundërshtim i punonjësit të policisë”, “Goditje për shkak të detyrës”, “Prishje e rendit dhe e qetësisë publike”, “Organizim dhe pjesëmarrje në grumbullime dhe manifestime të paligjshme”, “Mosbindje ndaj urdhrit të ligjshëm të punonjësit të policisë” dhe “Pengim i qarkullimit të mjeteve të transportit”.

Shqipëria vazhdoi të përballet me një sfidë strukturore në tregun e punës së të rinjve, ku 20,1% e grup-moshës 15-29 vjeç rezultojnë jashtë sistemit arsimor, pa punë dhe pa përfshirje në formim profesional (NEET) në vitin 2025.

Të dhënat e fundit zyrtare nga INSTAT tregojnë se brenda kësaj grup-moshe në Shqipëri, 38,5% e të rinjve rezultojnë të papunë aktivë, pasi janë duke kërkuar punë dhe janë të gatshëm të hyjnë në tregun e punës. Pjesa tjetër 1,6 % mbetet jashtë tregut të punës pasi klasifikohen si të dekurajuar, ndërsa 19,5% janë të angazhuar në detyra familjare, duke rritur fëmijë apo duke u kujdesur për dikë në familje.

Një pjesë e konsiderueshme për 40,4%, renditet në kategorinë “të tjera”, çka tregon një nivel të lartë informaliteti ose pasigurie në deklarimin e statusit të tyre ekonomik.

Në raport me vitin paraardhës, vërehet një përmirësim i lehtë në kategorinë e të dekurajuarve, me një ulje prej 0,4 pikë përqindje. Megjithatë, ky ndryshim mbetet i kufizuar dhe nuk reflekton ende një transformim në integrimin e të rinjve në tregun e punës.

Të dhënat tregojnë se meshkujt janë më aktivë në tregun e punës sesa femrat. Rreth 46,5% e meshkujve NEET janë në kërkim aktiv të punës dhe të gatshëm për punësim, ndërsa tek femrat kjo përqindje zbret në 31,9%.

Shqipëria ka përqindjen e të rinjve as në punës dhe as në shkollë gati dyfish mbi mesataren e BE-së dhe në nivele të larta rajonale. Kosova rezulton me nivelet më të larta të NEET në rajon, që arrin rreth 30% ose, e ndjekur nga Shqipëria me rreth 20%. Maqedonia e Veriut dhe Mali i Zi lëvizin në intervalin 17%, ndërsa Bosnja dhe Hercegovina dhe Serbia regjistrojnë nivele më të ulëta, por ende dukshëm mbi standardet europiane.

Nga rritja ekonomike në aspektin e punësimit duket se po përfitojnë vetëm pensionistët, pasi papunësia vijon të jetë e lartë ndër të rinjtë. Vitin e kaluar shkalla zyrtare e papunësisë është 8,4%, teksa ky tregues për grup-moshën 15–24 vjeç është 21,5%, gati trefish më shumë se në popullsinë e përgjithshme.

Në paradoks me të rinjtë, numri i të punësuarve në moshën mbi 65 vjeç ka pësuar rritje. Të dhënat e INSTAT tregojnë se nga 119,862 në 2024 numri i tyre arriti në 130,274 në 2025. Këta persona edhe pse në moshë pensioni, janë kryesisht të vetëpunësuar në bujqësi pa kontribute, të cilët sipas metodologjisë vendase konsiderohen të punësuar edhe kur angazhohen në fermën e tyre të vogël dhe prodhojnë vetëm për vetë-konsum./ Monitor

Katër nga protestuesit e ndaluar gjatë tensioneve në protestën para Kuvendit të mbajtur paraditen e sotme, do të kalojnë natën në qeli.

Nesër ata do të dalin para Gjykatës së Tiranës për caktimin e masës së sigurisë, ndërsa përballen me akuzën “shkatërrim prone”.

Në total janë 20 qytetarë të ndaluar. bw

Qindra qytetarë kanë protestuar sot në tri fronte, sa tek Kuvendi, në dy prej Komisariateve ku janë shoqëruar dhe izoluar protestuesit.

Deri tani mësohet se ka 20 qytetarë të shoqëruar, mes tyre shumë aktivistë të njohur si Gent Progni apo Altin Goxhaj.

Gjithashtu raportohet për 9 efektivë të lënduar që po mjekohen në spital.

Pas marshimit në mesditë ata po qëndrojnë në Komisariatet nr. 4 dhe 1 në Tiranë, ku mbahen protestuesit, duke kërkuar me thirrjet “Lironi çunat tanë”, apo “Arrestoni Ramën dhe Ballukun”, “Parlament i Krimit”, “Revolucion” dhe të tjera.

Pas largimit me shpejtësi të deputetëve dhe ministrave të mazhorancës nën mbrojtjen e forcave të rendit, vjen edhe bilanci i parë i asaj që u shndërrua në një përplasje të dhunshme përpara Parlamentit.

Përplasjet e dhunshme, përdorimi i sprejit lotësjellës dhe hedhja e ujit me presion nga autobotët kanë lënë pas pasoja nga të dyja palët.

Burime bëjnë me dije se deri tani Policia e Shtetit ka shoqëruar në komisariate 20 protestues.

Nga ana tjetër, përleshjet fizike kanë sjellë edhe dëmtimin e uniformave blu. Aktualisht, 9 efektivë policie janë dërguar në spital, ku po marrin ndihmën e nevojshme mjekësore.gsh

Aktivisti Andi Tepelena iu bëri thirje ndërkombëtarëve që të reagojnë dhe të ndërhyjnë për largimin e qeverisë së Edi Ramës.

Duke folur për gazetarët, pas tensioneve dhe përplasjeve mes protestuesve dhe policisë përpara Kuvendit, aktivisti deklaroi se ambasada e SHBA-së duhet të reagojë ndaj dhunës.

Ai akuzoi edhe kreun e grupit parlamentar socialist, Taulant Balla se po nxit policinë që të ushtrojë dhunë ndaj protestuesve dhe se po i etiketon ata si anti-amerikanë apo agjentë të Iranit.

“Janë dhunuar në mënyrë të tmerrshme. I bëj thirrje ambasadës amerikane se ka shumë shqiptar me nënshtetësi amerikane që të ndërhyjë urgjent. Duhet ndërhyrja ndërkombëtare për t’i vënë fre këtij regjimi gjakatar. Balla është bandit që  ka bërë thirrje policisë që të ushtrojë dhunë ndaj qytetarë paqësorë. Ata ministrat se donin të hanin bukë, urdhëruan policinë që të ndërhynin ndaj nesh. Ai është llumi i shoqërisë shqiptare.

Ka ardhur koha që të ikin. Ne jemi qytetarët më paqësorë të këtij vendi, pro evropianë dhe pro perëndimorë. Që në ditët e para të protestës kemi treguar qytetari. Balla është një legen që do të provojë dhunën për të na nxjerrë si anti-amerikan, si agjentë të Iranit. Është provokator i rëndomtë. Iu bëj thirrje protestuesve që të jenë të shumtë në numër. Nuk ka kthim pas.”, tha ai. gsh

Vijojnë tensionet para Kuvendit, ku qindra qytetarë protestojnë për dorëheqjen e qeverisë.

Përshkallëzimi erdhi në momentin që Kuvendi mbylli punimet dhe deputetët nisën të dilnin.

Qytetarët bllokuan daljet kryesore me thirrjet “parlamenti i krimit”, “Arresto Ballukun”, “Arrestoni Ramën”, “Shqipëria kërkon revolucion”, “Rama jepe dorëheqjen”.

Policia u përpoq të largonte me dhunë protestuesit, por ata iu përgjigjën duke u ulur këmbëkryq në mes të rrugës.

Policia dhe FNSH krijuan një kordon para tyre dhe më tej qëndronte autoboti i ujit. gsh

TIRANË- Këshilli Kombëtar i PD-së ka zgjedhur 20 anëtarët e rinj të Kryesisë, ku Ilda Zhulali u shpall si më e votuara, ndërsa Grigels Muçollari kryesoi listën mes burrave me 170 vota. Procesi zgjedhor u zhvillua në prani të kandidatëve dhe vëzhguesve të tyre dhe përfundoi në orët e para të mëngjesit.

Po ashtu në zgjedhjet e mbajtura ditën e djeshmme, jashtë kryesisë kanë mbetur dhe disa figura të rëndësishme apo deputetë të PD-së. Konkretisht, emra si Arjan Ndoja, Edi Paloka, Gent Strazimiri, Fidel Kreka dhe Luan Baçi nuk arritën të siguronin një vend në këtë organ drejtues.

Ndërkohë që në kryesinë e PD-së janë automatikisht figurat kryesore që kanë drejtimin e PD-së, si kryetari, nënkryetarët, sekretari i PD-së, kryetarja e LDG-së si dhe Kryetari i FRPD-së.

Anëtarët e Kryesisë para zgjedhjeve:

Anëtarët e Kryesisë pas zgjedhjeve të 1 korrikut 2026:

Eda Grimci

Edith Harxhi

Florjana Garo

Ilda Zhulali

Lili Sula

Mimoza Hajdarmataj

Andia Ulliri

Desada Xhetani

Fatjon Bathorja

Glauk Olldashi

Lorenca Hoxha

Nikola Kedhi

Atird Hoxha

Dorjan Teliti

Ervin Minarolli

Fisnik Qosja

Gjin Gjoni

Grigels Muçollari

Ilir Alimehmeti

Keltis Kruja

Qytetarët nuk dorëzohen në protestën e tyre para Kuvendit, teksa Policia ka bërë disa arrestime që në momentet e para të disa prej përfaqësuesve të saj.

Pas dy orësh proteste me thirrjet “Rama jepe dorëheqje”, “Arrestoni Ramën” apo “Parlamenti i krimit”, ku u përdorën vezë e miell nga qytetarët dhe gaz lotsjellës nga Policia, organizatorët bënë thirrje me megafon që t’i drejtoheshin me marshim Komisariateve nr. 1 dhe 4 në Tiranë, aty ku mbaheshin të shoqëruar protestuesit.

“Qytetarë, të shkojmë të gjithë te Komisariatet nr. 1 dhe 4 për të liruar çunat tanë, të nxjerrim njerëzit tanë!”, ishte thirrja e një prej aktivistëve.

Shumë nga qytetarët u zhvendosën me marshim drejt Komisariateve, kurse të tjerët qëndruan para Kuvendit, duke u bërë gardh me policinë.

Deri tani raportohet për të paktën 6 protestues të shoqëruar, mes tyre edhe aktivisti Gent Progni.

Ndërkohë që vijojnë edhe tensionet para Parlamentit, ku protestuesit janë vendosur që në orët e para me thirrjet “Parlament i krimit, dorëzoni mandatet”.

Gjatë kësaj proteste ka pasur edhe përplasje me policinë, ndërsa FNSH gjithashtu u vendos në hyrje të Parlamentit.

Protestuesit kanë hedhur vezë me herët në drejtim të automjeteve të disa deputetëve. Ndërkohë revolta vijon para Parlamentit me thirrjet “Arrestoni Ramën”. gsh

Teksa qëndronin të ulur, ata iu bënin thirrje deputetëve që të dorëzojnë mandatet dhe t’u bashkohen atyre në revoltën kundër qeverisë.

“Dorëzoni mandatet. Dorëzoni mandatet. Bashkohuni me ne.”, theksonin ata, ndërsa përsërisnin edhe thirrjet për të arrestuar kryeministrin Edi Rama dhe liderin e opozitës, Sali Berisha. Panorama

Situata ka agravuar dhe ka kaluar në përplasje fizike përpara Parlamentit. Protestuesit e revoltuar kanë ndërmarrë një aksion në grup, duke tërhequr dhe shkulur me forcë gardhin metalik rrethues që ishte vendosur në hyrje të Pedonales, nga ana e godinës së Kuvendit.

Përballë këtij momenti tensioni dhe tentativës për të çarë kordonin e sigurisë, forcat e policisë kanë ndërhyrë menjëherë për të zmbrapsur turmën.

Efektivët kanë hedhur sprej lotësjellës në drejtim të protestuesve për të bërë të mundur shpërndarjen e tyre dhe stabilizimin e perimetrit, por protestuesit qëndrojnë të vendosur. bw