Skënder Kapiti në listën e kandidatëve për këshilltarë bashkiakë në Durrës të propozuar nga Enkelejd Alibeaj është larguar nga gara.

Sipas News 24, Kapiti do i bashkohet fushatës elektorale të Igli Carës, i cili kandidon për kreun e Bashkisë së Durrësit, për koalicionin ‘Bashkë Fitojmë’.

Ky është largimi i rradhës i kandidatëve të Alibeajt nga kjo garë.

Kandidati i opozitës për Bashkinë e Tiranës, Belind Këlliçi vijoi turin e takimeve me qytetarët dhe bizneset në kryeqytet, për t`u shpjeguar planin e tij fiskal që parashikon reduktim dhe zerim të disa taksave dhe tarifave vendore.

Teksa u ndal në zonën e “Sheshit Willson”, Këlliçi u tregoi bizneseve disa nga taksat që do të hiqen pas 14 majit, nga të cilat do të përfitojnë biznesi i vogël dhe i mesëm.

“Taksa e tarifa do t`i heqim. Të paktën ty të prek taksa e arsimit, do hiqet, do zerohet direkt. Hapësirën publike, pastrim gjelbërimit, taksën e arsimit i ke aty, nuk keni pse e paguani. I ke të gjitha aty në plan. Të gjitha reduktohen dhe zerohen një pjesë e madhe dhe përfitoni si biznes i vogël” – tha Këlliçi.

Gjatë takimeve në këtë zonë, qytetarët kanë mirëpritur premtimin e bërë nga Belind Këlliçi për transport publik falas. Duket se qytetarët janë dakord, që paratë të cilat  sot i jepen inceneratorin që nuk ekziston në Sharrë, të shkojnë pikërisht për transportin publik falas.

“Ke marrë iniciativa tepër të bukura. Ajo e autobusit është tepër e bukur. i kam ndjekur të tëra me dëshirën më të madhe. Absolutisht bëhet! Vetëm atë inceneratorin që ka ai, që e paguan pa punuar. Inshallah të ndihmon i madhi Zot, dhe njerëzit inshallah ndërgjegjësohen se ka ardhur koha me reagu çdo qytetar” – u shpreh një qytetare gjatë bashkëbisedimit me Belind Këlliçin.

Licensimi i shumë kompanive që ofrojnë shërbim TAXI nga Bashkia e Tiranës, ishte një tjetër shqetësim i ngritur nga përfaqësues të këtij sektori gjatë takimit me kandidatin e opozitës për drejtimin e bashkisë së kryeqytetit.

“Nuk na shqetësojnë më shumë informalet, sesa taksitë që po jepen kështu sikur janë karroca dore” – tha një shofer taksie, i cili këtë profesion e ushtronte prej 15-vjetësh.

Për këtë shqetësim, Belind Këlliçi bëri një tjetër premtim, duke garantuar taksistët se do t`i japë fund dhënies së licensave klienteliste për kompanitë e taksive.

“Po licencat që jep ky, i jep sepse i ka klientelistë të gjitha këto. Nuk do ndodhi kjo që po ndodh deri tani, sepse ka mjaftueshëm taksi edhe nuk do happen taksi që janë të lidhura me kryetarin. Sepse kam dëgjuar që janë dy-tre kompani që janë të lidhura, i ka të vetat ky. Jo një e ka Endri Fuga, jo një e ka Erion Veliaj” – u shpreh Këlliçi.

Duke shtrënguar duart me qytetarët, Belind Këlliçi mori jo vetëm mbështetjen e tyre për zgjedhjet e 14 majit, por dëgjoi njëkohësisht edhe problemet që shqetësojnë banorët e kësaj zone prej vitesh.

“Nuk mban më asnjë gjë. është bërë gjithandej pisllik, gjithandej tmerr. Trotuaret aty janë të parregulluara nga të dy anët, u bënë 30 vjet. është shumë problem kjo pjesa e trafikut. Unë e kam në Dajt, por jam i regjistruar këtu te Njësia Nr.7. Po trafiku është shumë keq. Një orë nuk diskutohet, më shumë duhet të ikësh jashtë qytetit sesa me ardhë deri këtu” – u shpreh një tjetër qytetar në takim me Belind Këlliçin.

 Kandidati i Opozitës për Bashkinë e Tiranës, Belind Këlliçi, u shpreh sonte në emisionin ‘Erla Now’, në Euronews, se fokusi kryesor i programit të tij është të zbusë koston e jetesës për qytetarët.

Këlliçi tha se në këtë sens, ai do të ofrojë transportin publik falas, një gjë që do të ndihmojë të paktën 200 mijë qytetarë që përdorin autobuzët urbanë, duke bërë që ata të kursejnë mbi 50 mijë lekë në muaj.

Këlliçi shtoi se transporti publik falas do të ndikojë edhe në lehtësimin e qarkullimit dhe uljen e ndotjes së ajrit.

Kjo, pasi programi i Këlliçit parashikon edhe shtimin dhe modernizimin e flotës.

Kandidati i Opozitës theksoi se ky projekt i kushton Bashkisë vetëm 6.8 përqind të buxhetit, dhe është tërësisht i mundshëm, nëse paratë nuk shpërdorohen.

Këlliçi u shpreh se propozimet e tjera që ai ka për të zbutur koston e madhe të jetesës në Tiranë që vuajnë banorët, janë ulja e taksave dhe tarifave, dhe ndërhyrja urgjente në çështjen e parkingjeve, që është një barrë shumë e rëndë sot në kryeqytet, me çmime të papërballueshme, pothuajse sa në vende të zhvilluara të Bashkimit Europian.

Belind Këlliçi solli si shembull të abuzimit dhe keqpërdorimit të buxhetit të Bashkisë, rastin e inceneratorit të Tiranës që merr 41 mijë euro në ditë, edhe pse nuk ekziston.

Korrupsioni, sipas Këlliçit, është i përhapur edhe në fusha të tjera e në sektorë të Bashkisë, ku përmendi studimin se pothuaj 40 përqind e të ardhurave nuk mblidhen nga administrata e Veliajt, si pasojë e qokave dhe përfitimit të paligjshëm.

Me një qeverisje të mirë, transparente dhe të ndershme, Këlliçi tha se të ardhurat e Bashkisë mund të shtohen me 60 milionë euro në vit. syri.net

Biznese dhe qytetarë të shumtë janë prezantuar me programin e kandidatit demokrat për bashkinë e Tiranës, Belind Këlliçi për uljen e taksave. Këlliçi është shprehur se kjo nismë do të zbutë kostot e jetesës. 

Sipas Këlliçit, ky program do të ndihmojë biznesin e vogël dhe të mesëm.

“Do t’ju lë njhë kopje të programit për tarifat dhe taksat për biznesin e vogël që do të ulen dhe një pjesë do t’i zerojmë se nuk jeni pse të paguani as taksë për shkollën, për infrastrukturë shkolle nga dy herë. Ideja është të ndihmojmë biznesin e vogël. Kam shpalosur programin për uljen e taksave për biznesin e mesëm dhe të vogël që janë më të persekutuarit në këto vite”.

Belind Këlliçi, kandidat për kryetar të bashkisë Tiranë

Ky program është mbështetur edhe nga vetë qytetarët dhe bizneset.

“Nuk është vendi jonë ky, prandaj u them fëmijëve ikni, ikni. Ta thotë prindi është shumë e rëndë”.

“Na e hiqni këtë”.

“Me mençuri dhe qytetari, ashtu do të fitosh”.

“Besojmë shumë”.

Qytetarë

Programi i paraqitur nga Belind Këlliçi synon uljen dhe zerimin e të paktën 7 taksave dhe tarifave vendore për 41 mijë biznese të vogla dhe të mesme në kryeqytet. syri.net

Kryetari demokrat, Sali Berisha, deklaroi sot në një konferencë për shpopullimin, se Shqipëria ka humbur 35 përqind të popullsisë gjatë qeverisjes së Ramës, një rekord i zi në historinë botërore.

“Ne mblidhemi për një debat rreth doktrinës së Vaso Çubrilloviçit dhe unë dua të falënderoj zotin Shahu dhe Duraku për publikimin e këtij libri që sot është më aktual se kurrë për çdo shqiptar.

Ne përjetojmë këto vite krizën më të rëndë të ekzistencës tonë që nga vitet 1870.

Shqiptarët ishin para alternativës: to bo or not. Përveç vetes së tyre, shumë të paktë ishin ata që i pranonin për kohën. Porta e Lartë dhe Pallati Jolldiz ishin të gatshëm të shpallnin grekë, sllavë, të gjithë të krishterët shqiptarë, me qëllim që shqiptarët t’i paraqisnin si otomanët e Europës.

Ne ngritëm zërin tonë fillimisht me pushkë. Ishte ajo rezistencë që iu bë vendimeve të Kongresit të Berlinit, kryesisht në zonat e alpeve, e cila faktoi se këta ishin një komb. Rilindësit formësuan doktrinën e shqiptarisë, doktrinë perëndimore, dhe kombi mori rrugë.

Nga ajo kohë kemi kaluar rreziqe. Prandaj them se sot jemi pas vitit 1870 në një gjendje të pashembullt ndonjëherë.

Në rast se gjatë Luftës së Parë Botërore, toka shqiptare u shkel nga 7 fuqi të huaja ku u aplikuan gjenocide nga të katër anët, megjithatë popullata shqiptare e humbur është 10 përqind.

Sot ne kemi një statistikë më të saktën që kemi pasur kurrë në histori. Në 8 vite kemi humbur vetëm në hapësirën e Shengenit, 937 mijë shqiptarë, mbi 1 milion nëse llogarit edhe vendet e tjera, pra rreth 35 përqind të popullatës në Shqipëri.

Kurrë një komb nuk ka humbur kaq shumë në histori.

Doktrina e Vaso Çubrilloviçit është doktrinë e mirëfilltë e gjenocidit ndaj shqiptarëve. Nuk është i vetëm për fat të keq. Njësoj si ai është dhe Ivo Andriç, i cili për turpin e turpeve ka edhe çmimin Nobel. Në njëfarë mënyrë edhe ky është një lloj racizmi ndaj shqiptarëve.

Kthehemi pak te kriza që po kalojmë.

Ky është një spastrim etnik bazuar te doktrina e Çubrilloviçit në sensin e krijimit të kushteve të kalkuluara që shqiptarët të largohen nga Shqipëria.

Nga viti 2007 deri në vitin 2014, numri i shqiptarëve në Shqipëri është rritur çdo vit dhe kjo është statistikë e pamohueshme.

Nga viti 2014 gjer më sot, ajo pakësohet në mënyrë të rrufeshme sepse janë krijuar kushtet e kalkulueshme për largimin e shqiptarëve nga Shqipëria.

Një nga kushtet më themelore është pasiguria e plotë në të cilën sot jetojnë shqiptarët në këtë vend. Vetëm në një vit, në vitin 2015 në mos gaboj, janë arrestuar 37 mijë shqiptarë.

80 përqind u arrestuan për çështje civile, që nuk mund të ndodhë përveçse në atë vend që nuk njeh ligjin, përveçse aty ku bëhet gjithçka për të dhunuar qytetarin, për t’i nxirë jetën, për t’i bërë të pamundur që të jetojë.

Statistika e vitit 1946 tregon se u arrestuan 17 mijë shqiptarë, kaq u arrestuan.

Pasiguria vjen nga lidhja e qeveritarëve me bandat. A nuk ishte Shullazi që donte të emëronte rektorin, sepse Edi Rama nuk mblidhte dot votat për të emëruar një zonjë? Dhe ai dilte në mes të qytetit dhe i thoshte se të rrëmbej djalin po nuk u largove,” tha Berisha.

I ftuar në edicionin e pasdites në Syri Tv me moderatoren, Armela Ferko ishte urbanisti dhe pedagogu, Gent Kaprata.

Kaprata foli për mungesën e projekteve efikase të urbanizimit që do të sillnin një standard më të lartë për jetën e qytetarëve, ndërsa projekti i mbjelljes së pemëve në një trotuar 80 cm është qesharake.

“Duhet të kuptojmë që qeverisja e Veliaj në Tiranë është një shtojcë e qeverisjes kryesore të rilindjes kjo e parë në karakteristikat e populizmit, fasadizmi, demagogjia dhe policia. Këto ishin aspektet që e kanë shoqëruara Veliajn në këto 8 vite.

Nuk do ta quaj veçanti por ajo që e shoqëron më shumë Veliajn në këto vite ishte në vend se të kthehej një kryetar që shikon  në të ardhmen por u kthye në legalizues i gjendjes ekzistues, ai i thelloi anët më negative të asaj gjendje.

Gjithë punët e Veliajt kanë një të përbashkët duke dhënë një produkt minimalist në impaktin e qytetit në krahasim të shumës 1 miliardë euro që ka shpenzuar bashkia në këto 8 vite.

Ky grup punës nuk është vërtetë që të kenë impakt por janë bërë që të tërheqin vëmendjen e publikut se ja ne po punojmë, kjo duke parë që ngulen fidanë dhe pemë në një trotuar që është rreth 80 cm e gjerë.

Urbanistika nuk shikohet me numër pemës, ajo nis nga njeriu dhe qeliza më e vogël e projektimit dhe menaxhimit urban nis nga ajo që quhet kompleks i banimit. Një kompleks banimi ndërtohet për 4 mijë banorë dhe për çdo element të atij kompleksi ndërtimi  përkthehet në metra katror për banorë, dhe në bazë të asaj projektohen dhe hapësirat e gjelbërta dhe jo të mbjellësh pemë në mënyrë të çthurur.”

Policia dhe prokuroria nuk kanë ende asnjë të dyshuar apo shoqëruar për sulmin me armë ndaj Top Channel ku mbeti i vrarë roja Pal Kola. Pas sulmit, Policia shoqëroi ish-dhëndrin e viktimës, por u lirua sërish pasi nuk kishte lidhje me atentatin. Autoritetet kanë vendosur edhe një shpërblim prej 100 mijë eurosh për këdo që jep informacion që do të çojë në zbardhjen e kësaj ngjarje.

Nga SYRI TV

Një ditë pas sulmit me armë zjarri kallashnikov në ambientet e e Top Channel ku humbi jetën 60-vjeçari Pal Kola, roja i sigurisë, Policia nuk ka ende një person të dyshuar apo të shoqëruar.

Teksa hetimet vijojnë, pistat ku po hetohet janë disa, kjo nisur edhe nga fakti që vetëm pak ditë më parë, familja Hoxha shiti 100 % të aksioneve në një kompani të regjistruar në parajsë fiskale.  Ndërkohë që pista të tjera lidhen drejtpërsëdrejti me aktivitetin e këtij televizioni, si ajo e denoncimeve të kryera nga Top Channel që lidhen me aktivitete të paligjshme nga grupe të caktuara individësh apo grupe kriminale, që kanë qenë nën fokusin e emisioneve investigative.

Teksa automjeti tip “Range Rover” rezulton i vjedhur më 10 korrik 2020 në Tale të Lezhës, një shtetasi nga Kosova që kishte ardhur në Shqipëri të kalonte pushimet. Syri TV ka siguruar videon e momentit kur automjeti është vjedhur nga persona ende të paidentifikuar.

Lidhur me ngjarjen, Policia ka shoqëruar Roberto Papçin i cili rezulton se është ish-dhëndri i 60-vjeçarit dhe shokun e tij Agustin Tonaj. Ata janë ndaluar në Vlorë dhe u shoqëruan pasi dhanë përgjigje kontradiktore lidhur me destinacionin e më pas u transportuan në Policinë e Tiranës ku dëshmuan se nuk kanë lidhje me ngjarjen. Më pas, Policia i ka lënë të lirë.

Një ndër arsyet pse u morën në pyetje ka qenë pasi në periudhën që Papçi dhe vajza e Pal Kolës janë divorcuar kanë pasur konflikte për kujdestarinë e fëmijëve.

Vetura me të cilën u sulmua Top Channel dyshohet se është e Ramadan Makollit nga Kosova. Kjo makinë iu vodh më 10 korrik të vitit 2020 në Shëngjin.

Arbresh.info ka arritur të kontaktojë me Makollin, i cili ka thënë se “Range Rover” me të cilin dyshohet se u sulmua “Top Channel”, ka qenë më parë vetura e tij, por i është vjedhur nga roja e sigurisë e hotelit ku ai po qëndronte.

““Range Rover” me të cilin është sulmuar Top Channel ka qenë veturë e imja deri më 10 korrik të 2020-ës, por ajo m’u vodh nga roja i hotelit ku po qëndroja në Shëngjin me pushime atëherë”, tha Makolli për arbresh.info.

Lajmin e konfirmoi sot edhe Policia e Tiranës.

“Automjeti i përdorur nga autorët është i tipit “Range Rover Sport”, me ngjyrë kafe, i cili ka rezultuar i vjedhur më datë 10.07.2020, në fshatin Tale të Lezhës. Ky automjet i është vjedhur një shtetasi kosovar, i cili ishte me pushime në këtë zonë, ndërsa targat e automjetit “AA 456 HC”, janë kallëzuar të vjedhura më datë 31.12.2022, në qytetin e Tiranës”, thuhet në njoftimin zyrtar.

Makolli ka publikuar edhe pamjet kur i vidhet mjeti në Shëngjin. syri.net

Partia Demokratike ka publikuar sot raportin për financimin rus për lotimin në SHBA. Pas prezantimit të raportit, Kreu i Partisë Demokratike, Sali Berisha deklaroi se ky financim është një akt personal i Lulzim Bashës dhe asnjë qindarkë nuk ka hyrë apo të ketë dal nga arka e Partisë Demokratike. Berisha solli në vëmendje, mbylljen e hetimit nga prokuroria shqiptare, e sipas tij kjo u bë me urdhër të Edi Ramës, duke shpëtuar bashin nga dënimi me 6 vite burg, duke e marrë peng.

Nga SYRI TV

Partia Demokratike ka përfunduar auditin për çështjen e lobimit rus në kohën kur kjo forcë politike drejtohej nga Lulzim Basha. Raporti u prezantua nga kryetarja e komisionit të Auditit, Ledina Mandia e cila deklaroi se në dosjen e hetimit Rezulton se në arkën e PD nuk ka transaksione të paligjshme, dhe nuk ka pasur pagesa në drejtim të kompanisë ‘Binata Trade’.

Pas prezantimit të Raportit, kreu i selisë blu, Sali Berisha deklaroi se PD nuk ka asnjë lidhje me paratë ruse, se për përgjegjësia është personale e Lulzim Bashës.

Sipas Berishës, Edi Rama shpëtoi Lulzim Bashën nga 6 vite burg nga dosja e lobimit, për ta përdorur më pas si peng kundër opozitës.

Teksa u ndal tek kontraktimi i ish-drejtuesit te FBI-së, Mcgonigal nga Edi Rama për shkatërrimin e PD, Berisha kërkoi që të hetohen të gjitha provat e reja që sjellin Dorian Duçka, Edi Rama dhe dëshmitarë të tjerë, për pastrimin e parave të Lulzim Bashës.

Deklaratat kreu i demokratëve i bërti gjatë konferencës me gazetarët, nga ku komentoi edhe kandidatët e grupimit ‘Alibeaj’ për zgjedhjet lokale të 14 majit.

Kryetari demokrat, Sali Berisha, reagoi sot pas publikimit të raportit të auditit për financimin rus të Lulzim Bashës.

“Prej kohësh, me të drejtë keni pritur raportin e auditit se PD ka pranuar financime ruse. Audituesit e pavarur kanë paraqitur një raport të pavarur, serioz, pasi kanë analizuar të gjithë veprimtarinë financiare, buxhetore të PD-së,” tha Berisha.

Sipas tij, ky është një akt personal i Lulzim Bashës.

“Raporti ynë nuk ka asnjë element të ri krahasuar me dosjen e prokurorisë që hetoi dhe mbylli Edi Rama.

Ne nuk kemi gjë të re, kemi vetëm këtë fakt, që PD nuk ka në arkën e saj një qindarkë të vetme të hyrë apo të dalë për 500 mijë dollarë të paguar nga Biniatta Trade, një kompani e zbulimit rus në Skoci, në emër të PD-së. Nuk ka!

Ky është konkluzioni i raportit tonë. Këtë e ka ditur prokuroria, e ka dosja e prokurorisë, por prokuroria, e cila e vuri nën akuzë Lulzim Bashën për larje parash, e mbylli dosjen dhe mori peng Bashën.

Ka një zhvillim, zhvillimi është aktakuza e organeve amerikane të drejtësisë, në të cilën Edi Rama ka kontraktuar McGonigal për hetimin e lobistit Nick Muzin, në të cilën Edi Rama nëpërmjet këshilltarit të tij privat, Dorian Duçka ka dërguar dy dëshmitarë nga Europa, nuk specifikohet vendi, për të dëshmuar para FBI-së lidhur me financimin rus të PD-së.

Çfarë kemi të bëjmë këtu? Këtu kemi të bëjmë me një vepër krimi shumë të rëndë të Edi Ramës, i cili konfirmoi edhe në daljen e tij në Opinion se dëshmitarët janë dërguar dhe se ata janë njerëz të PD-së. Domethënë, Edi Rama, këshilltari i tij Duçka, kontraktuan McGonigal dhe e furnizuan atë, e paguan de facto, se paratë Agron Nezës ia ka dhënë Dorian Duçka.

A përbën kjo një detyrim hetimor për prokurorinë? E padiskutueshme. Edi Rama del se fsheh krimin. Ai automatikisht vendoset nën hetim. Dorian Duçka vendoset automatikisht nën hetim. Duhet të tregohen se kush janë dëshmitarët dhe të dëshmojnë të vërtetën pranë prokurorisë.

Lulzim Basha duhet të ballafaqohet me të gjithë provat e reja që sjellin Duçka, dëshmitarët dhe Rama në kuadrin qoftë të larjes së parave, qoftë të financimit rus. A hap SKAP-i partisë çështje për këtë çështje? Ai është organi më i kapur në Europë sot,” tha Berisha. syri.net

Sulmi ndaj Top Channel vjen vetëm pak ditë pas familja Hoxha, si pronarë të këtij televizioni, shitën aksionet te një kompani e regjistruar në Belize. Grupi hetimor po heton për sulmin në disa pista, ku një ndër to është edhe denoncimet që ky televizion ka bërë nëpërmjet emisioneve investigative

SYRI TV

Grupi hetimor ka ngritur disa pista hetimore për zbardhjen e sulmit me armë ndaj Top Channel. Kjo ngjarje vjen vetëm pak ditë pasi doli në dritë se pronarët e Top Channel kanë kryer një transaksion për shitjen e televizionit.

Sipas dokumenteve të dala në media, familja Hoxha i ka shitur 100% aksionet e televizionit kompanisë “Western Media Conglomerate Investments LTD” me një çmim prej 9 milionë eurosh. Kompania blerëse përfaqësohej nga Neidy Leoneli Gonzalez, drejtore e vetme e “Western Media Conglomerate Investments LTD” dhe rezulton e regjistruar në Belize, e njohur si parajsë fiskale.

Kjo pistë është duke u shqyrtuar nga grupi hetimor, duke qenë veprimi i fundit i kryer nga kjo media, ndërkohë që pista të tjera lidhen drejtpërsëdrejti me aktivitetin e këtij televizioni.

Pistë tjetër është ajo e denoncimeve të kryera nga Top Channel, që lidhen me aktivitete të paligjshme nga grupe të caktuara individësh apo grupe kriminale, që kanë qenë nën fokusin e emisioneve investigative. Ndërkohë që edhe Top Channel ka reaguar me një deklaratë për mediat, duke e cilësuar sulmin akt terrorist që cenon fjalën e lirë.

“Top Channel shpreh qartësinë që ky akt terrorist i paprecedent, është kryer për të dëmtuar e goditur misionin e medias së lirë dhe fuqisë së fjalës së lirë. Ky akt terrorist është i paprecedent ndaj një media kombëtare, e lidhet vetëm me misionin e saj të fjalës së lirë”.

Ndërkohë që ky akt përbën sulmin më të rëndë ndaj medias e fjalës së lirë, më e rëndë ishte humbja e një jete, i cili punonte për të siguruar bukën mes varfërisë ku ndodhej familja e tij. E ajo që la pas ishte vetëm një 5-lekësh, që Pal Kolës i ra nga xhepi teksa plumbat i morën jetën.

Në Shqipëri, denoncimi i dhunës ndaj grave dhe vajzave po rritet dhe mbrojtja e tyre është bërë angazhim kryesor i organizatave për të drejtat e njeriut.

Veprimtaret pohojnë se megjithë shtimin e denoncimeve, dhuna ndaj grave dhe vajzave është dukuri shumë e përhapur dhe pak e njohur.

Albana është një prej zonjave, që denoncoi dhunën, kërkoi zgjidhje martese dhe po përpiqet të nisë një jetë të re. Për arsye sigurie, portreti i saj është fshehur, ndërsa emri dhe zëri i saj janë ndryshuar.

Pasi denoncoi dhunën e ish bashkëshortit, ajo ka marrë urdhër mbrojtjeje nga gjykata dhe është në proces zgjidhje martese.

Albana thotë për Zërin e Amerikës se dhuna fizike ndaj saj nisi menjëherë pas martese, duke u mbuluar prej tij si formë xhelozie pa asnjë shkak.

“Nga dhuna fizike, ai vazhdoi në kërcënime: “Ti nuk mund të largohesh në asnjë mënyrë. Thoshte: “Ti je e humbur. Do të të vras. Do të hedh nga ndërtesa”. Më mbante frika në këtë marrëdhënie; nëse largohesha, do të isha vrarë siç përsëriste ai. Kam ndenjur në atë marrëdhënie 4 vite, por prapë po të njëjtat ngjarje, derisa u lodha dhe thashë “Mjaft më!”, theksoi Albana.

Albanën e takuam në mjediset e Qendrës për Nisma Ligjore Qytetare, ku ndihmohen vazhdimisht dhjetëra gra e vajza kurajoze si ajo prej avokateve dhe psikologeve. Këtu juristet dëgjojnë histori të shumta dhe tronditëse të dhunimit ndaj vajzave nga mosha studentore deri zonja mbi 60 vjeç, nga dhuna më fillestare e deri në vrasje.

Nadja Guni është pjesëtare e një grupi të gjerë juristesh të reja, që kanë kryer studimet universitare për jurisprudencë rezultate të larta, dhe që i janë kushtuar mbështetjes së vajzave e grave të dhunuara me këshillime avokatie.

Ajo thotë se ky angazhim e ka përfshirë shumë, po bëhet mbizotëron në përkushtimin profesional të saj dhe po bën gjithçka që të ndikojë sa më shumë në zbutjen e kësaj dukurie.

Vetëm kur gjendesh në kontakt me to, mund të kuptohet se sa shumë është e përhapur kjo dukuri në shoqërinë shqiptare, thotë ajo.

“Faktorët ekonomikë dhe ata socialë ndikojnë më së shumti. Problemet e dhunuesve me alkoolin janë të vazhdueshme. Këtu vijnë vazhdimisht mjaft viktima të dhunës prej familjarëve konsumues të lëndëve narkotike dhe të alkoolit. Përpiqemi t’i ndihmojmë të gjithë”, thotë juristja Guni.

Ndihma juridike në këtë qendër nis nga hartimi i dokumentave, deri tek përfaqësimi i tyre në organet administrative dhe gjyqësore, duke qëndruar pranë grave dhe vajzave të dhunuara në të gjithë proceset juridike.

Urdhërat e mbrojtjes janë marrë pothuajse në gjithë rastet e paraqitur në gjykatë, ndërsa pas mbrojtjes fizike nis kalvari i një seri çështjesh të tjera, thotë juristja Klea Cahani.

“Ndihma nis me trajtimin e dhunës, por më vonë nisin proceset për zgjidhje martese, për kujdestarinë e fëmijëve, mbi përfitimin e ndihmës ekonomike të viktimave, apo për ndarjen e pasurisë bashkëshortore, trajtim psikologjik, nevoja strehimi. Gratë vuajnë edhe dhunën edhe gjithë këto probleme të tjera më pas”, thotë juristja Cahani.

Gratë dhe vajzat e dhunuara nuk mbeten vetëm; organizatat ia përcjellin njëra tjetrës sipas profileve të tyre, juridike, ekonomike etjj për t’i ndihmuar për t’i ndihmuar deri në fund.

Kjo dhunë jo vetëm trajtohet rast pas rasti por edhe studiohet me detaje nga ekspertet e juridikut.

Një studim të hollësishëm shumëvjeçar sapo ka përmbyllur Qendra për Nisma Ligjore Qytetare, duke nisur nga vrasjet e grave dhe vajzave, fati i proceseve gjyqësore në mbrojtje të tyre, dënimi apo jo i agresorëve dhe sjelljet e institucioneve të ndryshme administrative dhe gjyqësore ndaj kësaj dukurie.

“Nga vendimet gjyqësore të shqyrtuara ndër vite, ne kemi evidentuar për fat të keq, se ka raste kur viktimat janë vrarë pasi kanë patur një urdhër mbrojtjeje. Pra, urdhëri i mbrojtjes në këtë rast nuk ka funksionuar. Kemi evidentuar arsyet se përse nuk kanë funksionuar urdhërat për mbrojtjen e jetës së tyre. Rreth 75 për qind e vendimeve gjyqësore të shqyrtuara tregojnë se dhuna ka ardhur për shkaqe familjare. Në studim renditen një seri shkaqesh të tjera. Ne kemi rekomanduar veçimin e çifteve me akte dhune fizike filimisht, por kjo është një masë tejet e pamjaftueshme, nëse sistemi i drejtësisë nuk do të ketë gjerësisht një qasje dashamirëse ndaj viktimave të dhunës dhe t’i trajtojë çështjet në kompleksitetin e tyre”, thotë dr. Aurela Anastasi, pedagoge e universitetit dhe drejtuese e Qendrës për Nisma Ligjore Qytetare.

Ndërkohë Albana, denoncuesja kurajoze e dhunës, po përpiqet të rifillojë jetën e saj, duke ndjekur ëndrrën e saj të ndjekë studimet për psikologji dhe hobin e saj të bëhet një make up artiste e njohur.

“Mesazhi im është që gratë dhe vajzat të mos e fshehin dhunën dhe të mos e durojnë për shumë vite si unë, por të largohen menjëherë prej atij personi dhe ta denoncojnë, pa mbajtur shpresa më kot se dhunuesi do të përmirësohet”, thotë Albana.

Megjithë denoncimet në rritje, dhuna ndaj grave dhe vajzave është ende një dukuri e shtrirë gjerësisht, por pak e njohur në shoqërisë shqiptare.

Ajo del në dritë në fazën ekstreme, kur viktimat vriten nga bashkëshortët, pas shumë vite fshehje të gjendjes.

Veprimtarët këmbëngulin që falë përmirësimeve ligjore, pushteti vendor dhe ai qendror të kujdeset përditë për dhunimet e shfaqura qysh në fazat e hershme të dhunës para se ato të shndërrohen në ngjarje tragjike.

Kryetari demokrat, Sali Berisha, deklaroi në takimin me të rinjtë e PD-së, se Shqipëria ndodhet në një monizëm të dytë.

“Sot, pas 30 vitesh, Shqipëria ka rënë në një monizëm të dytë, i cili në dallim nga monizmi i viteve ’90, që bazohej në doktrinën çnjerëzore marksiste, monizmi i sotëm bazohet në krimin, drogën dhe vjedhjen. Edi Rama sot kontrollon 10 përqind më shumë pushtete se diktatori i fundit komunist në vitin 1991.

Ne erdhëm në një situatë kritike. Ronald Regan e thotë me të drejtë se demokracisë i mjafton një gjeneratë për t’u zhdukur. Në njëfarë mënyre kjo po ndodhte në Shqipëri.

Edi Rama, që shëtit nëpër botë duke e ekspozuar zhgarravina, të cilat dy kritikë i cilësuan zhgarravina të një adulti të droguar, arriti të korruptojë kryezbuluesin e SHBA, të FBI, ta kontraktojë atë si vrasës me pagesë ndaj PD-së dhe opozitës shqiptare.

Ky skandal ka marrë përmasa botërore, por në ato kushte, kur vërtet po bëheshin përpjekje për të asgjësuar PD-në si forcë të të vërtetë politike opozitare, ishin të rinjtë, forumi rinor, i pari që mbështeti nismën me të cilën unë kundërshtova vendosmërisht atë përpjekje shkatërrimtare për opozitën shqiptare.

McGonigal nuk ishte një bajloz i zi solitar. Edi Rama kishte korruptuar edhe të tjerë,” theksoi Berisha. syri.net

SPAK ka ngritur zyrtarisht 3 akuza ndaj Arben Ahmetajt për aferën e inceneratorëve. Ndaj Ahmetajt rëndojnë akuzat pastrim parash, shpërdorim të detyrës dhe korrupsion, dhe tashmë hapi i radhës është që SPAK t’i drejtohet Kuvendit, që t’i hapi rrugë marrjes të pandehur të ish-zv kryeministrit Arben Ahmetaj. Akuzat janë kofirmuar edhe nga vetë Ahmetaj në akt-padinë ku kundërshton kontrollin e ushtruan në banesat e tij.

Nga SYRI TV

Prokuroria e Posaçme ka zyrtarizuar hetimin për tri vepra penale ndaj ish-zv/kryeministrit Arben Ahmetaj. Çështja ndaj tij është regjistruar për pastrim parash, korrupsion dhe shpërdorim detyre.

Hapi i radhës që mbetet në kompetencë të SPAK është nëse kjo strukturë do ti drejtohet Kuvendit me kërkesë për heqjen e mandatit të deputetit apo jo, ish-numrit dy të qeverisë. Ka qenë vetë Arben Ahmetaj që konfirmoi akuzat në ankimin e bërë prej tij, lidhur me kundërshtimin e kontrollit të banesave nga agjentët e Byrosë Kombëtare të Hetimit.

Në këtë ankim, theksohet njëherësh se procedimi panel nr 771/1 për akuzën e shpërdorimit të detyrës lidhur me inceneratorin e Elbasanit,  dhe ai nr 30 për pastrim parash dhe korrupsion, pas kallëzimit që i është bërë për vilën në Hamallaj, janë bashkuar në një të vetëm.

Ndërkohë, përveç kontrolleve dhe sekuestrimit të dokumentave që kanë të bëjnë me blerjen e pasurive apo ndërtimin e tyre, SPAK ka vijuar me marrjen në pyetje të disa personave, përfshirë edhe ish-bashkëshorten. Ajo pranon pronësinë e një banese në zonën e ish-Bllokut në Tiranë por jo vilën në Palasë.

Përmes një ankimi në Gjykatë, Arben Ahmetaj pretendon se kontrolli i ushtruar nga agjentët e BKH-së, është anti-kushtetues pasi nuk është marrë leje nga Kuvendi duke qenë se ai është deputet i Kuvendit të Shqipërisë.

Në Shqipëri autoritetet më të larta të vendit përshëndetën pajtimin e arritur në Ohër, mes Kosovës dhe Serbisë për zbatimin e planit europian, duke falenderuar njëkohësisht Bashkimin europian dhe Shtetet e Bashkuara për angazhimn e tyre të fortë.

Presidenti Bajram Begaj deklaroi se “ky dakordësim është një garanci më shumë për paqen, stabilitetin dhe të ardhmen e rajonit në Bashkimin Evropian”, shkruajti ai në një postim në Facebook duke u shprehur “besimplotë se garantët e këtij dakordësimi do ta bëjnë atë të detyrueshme e të zbatueshme nga palët”.

Nga ana e tij, kryeministri Edi Rama, që pak pas njoftimit të dakortësimit të palëve afër mesnatës së mbrëmshme, reagoi duke shkruar se shpresonte “që djalli të mos fshihet në detaje sonte dhe që marrëveshja e rënë dakord por e pa nënshkruar të mos jetë një tjetër mashtrim ballkanik”. Në rast të kundërt, sipas tij “kjo do të ishte një arritje historike që do të shpallte një pranverë të shumëpritur në marrëdhëniet mes dy kombeve më të mëdha të Ballkanit, shqiptarëve dhe serbëve”.

Postimin e tij në Twitter, kryeministri e mbylli duke uruar “që së shpejti marrëveshja e panënshkruar të kthehet në një realitet të ri të pakthyeshëm mes Kosovës dhe Serbisë, shqiptarëve dhe serbëve, Ballkanit Perëndimor dhe Bashkimit Evropian”.

Për kryetaren e parlamentit shqiptar Lindita Nikolla “normalizimi i marrëdhënieve dypalëshe midis Kosovës dhe Serbisë shënoi një hap të qëndrueshëm përpara, me dakordësimin në takimin e Ohrit për hapat praktikë për zbatimin e marrëveshjes, sipas aneksit të planit evropian”.

Në postimin e saj në Facebook ajo shprehet më tej se “pajtimi me propozimet, zbatimi i këtij plani dhe dialogu mes dy vendeve do t’i kontribuojë prosperitetit e paqes në rajon dhe avancimit të tyre drejt familjes evropiane”.

Protesta e Bërxullës ku banorët e zonës kërkojnë prej muajsh shpronësimin e drejtë sipas tyre të pronave që preken nga projekti i aksit Thumanë-Kashar ka nisur si çdo fundjavë edhe sot.

Këtë herë aksioni i tyre ka nisur menjëherë duke mos i kushtuar kohë as mikrofonave të mediave si zakonisht, por duke bllokuar menjëherë rrugën së bashku me fëmijët e tyre.

Sakaq efektivët e policisë kanë rrethuar banorët ndërsa u kanë kërkuar që të lirojnë rrugën vazhdimisht, edhe pse ata kanë refuzuar kategorikisht.

‘Këtë projekt rruge nuk e ka as AZHK as ARRSH, ato i hedhin topin njëra-tjetrës. Ku duhet të shkoj unë të kërkoj, rruga është pa projekt. Aktualisht që flasim është muaji i 6-të i protestës. Nuk është caktuar asgjë. Ne po sillemi njerëzisht dhe me edukatë në protestën tonë, ndërsa shteti bën sehir. Pse u ndryshua VKM për portin e Durrësit, për banorët e Bërxullës nuk ndryshon?

Do ta bllokojmë gjithë aksin, le të kalojnë nga Vora njerëzit. Ku del ky çmim 4 euro për tokën, kontrata e fundit ka qenë 52 euro për metër, e thotë ligji, nuk kam pse t’i drejtohem gjyqit. Shteti ka gjithë mundësinë ta zgjidhë këtë dhe nuk lëviz. Është çmenduri, nuk mund ta lejojmë. Ne do e përshkallëzojmë protestën çdo ditë, jo një herë në javë’ deklaroi një prej banorëve.

‘Nuk do lejojmë asnjë fadromë që të vijë në tokët tona. Shteti nuk do t’ia dojë për ne që kemi 6 muaj në rrugë. Kemi kaq kohë që nuk na zë gjumi natën. Na është sosur durimi, nuk vjen as ministria e Bujqësisë, as e Infrastrukturës, as Belinda nuk vjen të pyesë’, u shpreh një prej protestueseve. syri.net

Komisioneri Shtetëror i Zgjedhjeve, Ilirjan Celibashi regjistroi koalicionin “Bashkë Fitojmë”.

Ai hoqi nga ky koalicion siglën e Partisë Demokratike.

Celibashi u shpreh se PDa nuk ka shprehur vullnet për t’u bërë pjesë e këtij koalicioni dhe si e tillë, sigla nuk mund të jetë pjesë e koalicionit “Bashkë Fitojmë”.

“Jemi përballë të njëjtës situatë si përpara zgjedhjeve të pjesshme të 6 marsit 2022. Regjistrojme koalicionin “Bashkë Fitojmë”, por vetëm me pjesëmarrëse PL, PBDNJ dhe PDK”, theksoi Celibashi gjatë fjalës së tij.

Në këtë mënyrë ky koalicion do të jetë i përbërë nga tre parti, PL, PBDNJ dhe PDK. syri.net

“Sot, pata nderin të vlerësoj me titullin “Mjeshtër i Madh”, etnografen e shquar, Afërdita Onuzi.

Zonja Onuzi, përfaqëson një nga emrat më frymëzues të etnografisë shqiptare. Përmes jetës së saj të dedikuar studimit, kërkimit, dokumentimit të pasurisë sonë etnografike, ajo ka kontribuar në njohjen, ruajtjen dhe promovimin e vlerave të identitetit kombëtar shqiptar.

Nëse sot e njohim më mirë identitetin tonë, nëse sot jemi edhe më të vetëdijshëm për pasurinë etnografike të Shqipërisë, është edhe falë kontributit të paçmuar të zonjës Onuzi.

Përgjithmonë mirënjohës ndaj punës së të gjithë studiuesve dhe kërkuesve të etnografisë shqiptare!”, shkruan Presidenti Begaj.

Prof. Dr. Afërdita Onuzi ia ka kushtuar gjithë karierën e saj trashëgimisë kulturore shqiptare, kryesisht Xhubletës, e cila tash së fundi është marrë në mbrojtje nga UNESCO.

Me këtë rast lind pyetja, me këtë kontribut të shquar a nuk e meriton Prof. Dr.Afërdita Onuzi të jetë Nderi i Kombit, sepse ka bërë që Xhubleta 4000 vjeçare të fitojë vendin që meriton?!

Më poshtë po i sjellim lexuesit një shkrim të Anila Dedajt kushtuar Etnografes dhe xhubletës.

Etnografja Afërdita Onuzi rrëfen historinë e rrallë 4000-vjeçare të Xhubletës: Shqiptarët e ruajtën, se Alpet i dhanë besën.

Etnografja Afërdita Onuzi, sjell botimin e rrallë “Xhubleta”. Në kuadër të përurimit të librit dhe ekspozitës me këtë veshje dhe objekte të tjera shoqëruese në Institutin e Antropologjisë (ASA), gjatë “Ditëve të Albanologjisë” ajo rrëfen historinë e kësaj dukurie prej gjurmëve të para 4 mijë vjeçare deri më sot.

“Kërkush tjetër nuk mun e majë”; “Asht e dhënave tona, prandaj e kemi rujtë e do ta ruejmë”; “Kërkund tjetër nuk e gjen”. Janë vetëm disa nga fjalët që Afërdita Onuzi, pat dëgjuar plot gjysmë shekulli më parë, teksa ecnin rrafsh nga Nikaj-Mërtur, në Dukagjin e der në Shkodër. Gjatë asaj ekspedite në Alpet e Shqipërisë, etnografja do të mahnitej krahas natyrës e mikpritjes me  veshjen e “ujdisur” të xhubletës; teknikën artizanale të krijimit, zellin e ruajtjes apo edhe legjendat që e rrethonin e krijonin dyzimet mes mitit e reales.

Studiuesja i përcjell këto dëshmi edhe përmes ilustrimeve, në botimin shkencor “Xhubleta” si dhe një ekspozite unikale, të çelur këtë të martë në Institutin e Antropologjisë Kulturore dhe Studimit të Artit, duke tentuar të krijohet mjedisi tipik etnokulturor i kësaj veshje. Shoqërohet nga të tjera objekte karakteristike, si një karrige agallarësh, vendi i lahutarit, ku Afërdita Onuzi thotë se në një të ngjashme është ulur Papa i Romës në Mesjetë, stoli grash, breza pështjellaku, e të tjera pjesë të mbledhura nga “i dashuruari” pas xhubletës, studiuesi Rrok Zojzi. Onuzi gjatë kësaj ngjarje, tërheq vëmendjen mbi vlerat e rralla të kësaj pjese të trashëgimisë sonë, gjurmët e së cilës, siç rrëfen datojnë mbi 4 mijë vjet më parë.

“Në fakt edhe këtu konsiston specifika e kësaj veshje, siç e thatë dhe ju, mbi 4 mijë vjeçare, fakt i dokumentuar nga arkeologë shqiptarë dhe të huaj”, thotë studiuesja etnografe Afërdita Onuzi, autore e librit “Xhubleta”.

Ndonëse në zanafillë, hapësira e përdorimit të kësaj veshje ka qenë më e zgjedhuar, përgjatë këtyre mijëvjeçarëve sipas studiueses, e sjell deri në ditët e sotme në vendin tonë  jo vetëm mjedisi natyror, por edhe ai njerëzor…

“Ka qenë një veshje, jo vetëm në territorin e banuar nga parailirët, ilirët e më pas pasardhësit e tyre por që gjendej në gjithë Pellgun e Mesdheut, çka e dëshmojnë të gjitha këto gjetje arkeologjike. Bashkë me këto veshje i shtohet edhe pjesa e Ilirisë. Por ndryshe nga këto vendet e tjera të Pellgut të Mesdheut si Kreto-Mikena, Serbi, Bosnje etj., dhe zona të tjera, kjo veshje erdhi tek shqiptarët duke kaluar te ilirët, e më pas shqiptarët e Mesjetës së Hershme dhe Mesjetës së Vonë, deri në fillim të shekullit të XX-të, e patundur nga istikami, të themi përsa i përket formës së saj”, shprehet më tej studiuesja.

Studiues të ndryshëm, siç rrëfen Onuzi, e konsiderojnë si veshje në formë kambane të valëzuar.

“Është forma, është sistemi dekorativ i përdorur në xhublet i cili na sjell jehonën e periudhave më të hershme historike. Dhe specifikë tjetër është që ndryshe nga veshje të tjera që pësojnë evolucionin e tyre jo vetëm në formë, por edhe në dekorative, xhubleta nuk ka ceduar fare. Është ruajtur krejtësisht brenda tipit llojit të vet pa pësuar ndryshime që të na e tjetërsojnë sadopak këtë veshje”, thotë më tej Onuzi.

Xhubleta nuk është prodhuar me porosi nga artizanë të zonës, por në gjirin e çdo familje shqiptare. Është përçuar brez pas brezi nga gratë tek gratë. Nga nënat te bijat. Nga punimi i saj, me sqimë, tek mënyra e veshjes, çdo detaj është respektuar si ritual i vetëm.

“Ka pasur gra të zonës që e prodhonin, e për këtë arsye kishte shije kolektive, kishte rregulla kolektive që ato nuk kalonin… Duhej diçka që pranohej nga kolektivi, ishte brenda shijeve, brenda etnopsikologjisë. Një grua e një zone tjetër nuk mund ta punonte xhubletën, për shumë arsye. E para, dhe kjo është arsyeja, që kur ne dëgjojmë fjalën “ne jemi bijë të xhubletës”, pra duhet ruajtur xhubleta me identitetin e saj dhe jo të veshjeve të tjera. Pra, jemi banorë të këtij mjedisi gjeografik, ku ka qarkulluar xhubleta, Dhe kjo çon “ujërat e mullirit”, që pse u ruajt në këtë zonë. Se Alpet, ku u ruajt, i dhanë besën xhubletës”, shton Onuzi.

Siç rrëfen Onuzi, në esencë të konceptit të saj, në veshjen e xhubletës studiuesit kanë pikasur elementë të vendeve të ndryshme, si forma e fundit në Serbi, apo objekte të ngjashme të Mikenës e Kretës,  mirëpo konservimi i saj në Shqipëri deri në ditët e sotme, u shoqërua më përshtatje në material me zonën klimatike të ftohtë në Alpe.

“E tjetërsoi në fakt në material sepse kur ishte në Pellgun e Mesdheut, nuk kishte material kaq të trashë, por ishte prej liri. Dimë që pëlhurat më të hershme janë prej liri, por fije të trasha që e ruanin atë pamjen statike. Më pas duke qenë se mbeti në një zonë me dëborë me të ftohtë, u bë me material leshi, me material të trashë, gjë që e përforcoi pamjen statike”

Ndonëse tanimë ngjyra mbizotëruese e xhubletës është e zeza, etnografja, thotë se deri në tri shekuj më parë, kjo veshje ka qenë e plotësuar me një larmishmëri ngjyrash që i jepnin një pamje më të gëzueshme.

“Xhubleta deri në shekullin e XVIII-të ka qenë me më shumë ngyra. E thonë dhe shumë udhëtar të huaj, mes tyre një udhëtar hungarez që thoshte ‘as palloi nuk ka pasur kaq shumë ngjyra”, rrëfen etnografja.

Tjetërsimi i ngjyrës në të zezës, është rrëfyer nga populli gojarisht si shenjë zie, për vdekjen e heroit, Gjergj Kastriot Skënderbeun, por parë shekujt e vonë kur ndryshimi ka ndodhur, siç tregon Onuzi, ky variant bie…

“E thotë populli kështu, por në fakt është bërë për prakticitet. se nuk mund të lahej kollaj. U bë e zezë me qëllim për të pasur sa më pak ndotje.. Ndonëse edhe për ta pastruar xhubletën ka një teknologji të veçantë hidhej mbi borë, dhe pastaj pastrohej duke e goditur që t’i binin papastërtitë”, tregon ajo.

Onuzi tregon se tradita e ka dashë, që një nuse të kishte në pajë 5 xhubleta, nga dita që martohej deri në moshë të tretë… Xhubleta e nusërisë quhej e mira. Ajo mund të vishej në festa fetare, ose në vitet e para të martesës kur martoheshin vëllezërit. E pasmira përdorej deri në moshën 40 vjeç. E treta i takonte një dekade më pas në ciklin jetësor të gruas, ndërsa më tej pasonin e parakeqja dhe e keqja. Ndërsa me kalimin e viteve, stolitë përdoreshin gjithnjë e më pak.

“Një vajzë në pajë duhet të kishte 5 xhubleta, edhe mund të mos i kishte, por t’i  merrte nga nëna, nga gjyshja, të kalonte brez pas brezi e të  trashëgohej. Sepse të bëje 5 xhubleta do të thoshte të angazhohej “një ushtri” e tërë për ta punuar brenda një kohe të shkurtër. Në këto raste ndihmonin farefisi, vajzat, gratë, kishte një angazhim sepse kërkonte shumë kohë, shumë punë për ta bërë xhubletën.”, shton studiuesja.

Lidhja e grave shqiptare me xhubletën, është kthyer për gratë e Alpeve në një simbolikë të fortë. Në librin “Xhubleta”, Onuzi sjell në vëmendje rastin e një zonje të moshuar nga Berisha e Pukës, që kishte të trashëguar një xhubletë të mirë, të cilën studiuesi Rrok Zojzi i kishte propozuar t’ia blinte e që ajo refuzonte përballë çdo kërkese ta jepte, pasi donte që ribashkimi me të shoqin të ndarë nga jeta ta kishin si në martesë, po me atë veshje.

“Ka qenë në atë goditjet e mia, ndjesitë e mia pasi u ktheva nga ekspedita, kur morëm vesh që një grua në Berishë të Pukës, kishte xhubletën e mirë të parën, të cilën Rrok Zojzi e kishte parë dhe ëndërronte ta kishte pjesë të Arkivit. Kur hyn në bisedime me të ajo ishte në prag të vdekjes, dhe tentuan t’ia merrnin duke i ofruar një shumë me të vërtetë të konsiderueshme për kohën. Por ajo refuzoi sepse donte që ta kishte… Me atë xhubletë kishte ardhur nuse, dhe donte, që kur i shoqi t’i dilte përsëri përpara, ta njihte duke e parë sërish me atë veshje”, tregon Onuzi.

Kjo ishte vetëm një dëshirë e zonjës së moshuar që u respektua ngë fëmijët e saj, por siç thotë Onuzi, nuk është pjesë e traditës.

“Jo, nuk ishte pjesë e traditës. Përgjithësisht në traditë ka qenë që zonat me popullsi katolike, me banorë katolikë, kanë shkuar të veshur, dhe jo me qefinin e bardhë. Zakonisht katoliket kudo shkonin të veshura. Madje në Shkodër ka pasur, për t’i përcjellë,  çarçafët e kuq dhe çarçafët e bardhë. Kush vdiste i pari, i vendosnin çarçafët e kuq me vete dhe i veshur me rrobat më të mira. Edhe burrat kur vdisnin në disa kujtime të autorëve të ndryshëm dhe priftërinjve që kanë udhëtuar në zonën e Dukagjinit, flasin për diçka të tillë. Ka pasur një rast kur një zotëri vdiq, për shkak të gjakëmarrjes, dhe nuk e futën në dhem derisa u gjet edhe brezi i mirë, tirqi i mirë për ta çuar në atë botë si zotni”, tregon Onuzi.

Xhubletat janë punuar me gajtanë e penjë të fortë, e për të duhen një numër i madh copash edhe rripash për t’i dhënë formë kompakte. Ajo shkon deri në 14 kg e  gratë malësore siç rrëfen etnografja, e përkufizojnë si veshje që “rri në këmbë”. Tri pjesët kryesore të saj janë shtati, prehri e shpina, ndërsa ka një sërë elementësh të tjerë si paraniku, pështjellaku, kërdhokla, kraholi, grykësja, kallmat, ruba e kresë si dhe opaktë. Onuzi rrëfen se kjo veshje, nuk ka asnjë të ngjashme në Evropën Juglindore.

“Absolutisht me asnjë lloj veshje, ndoshta më gjerë, jo vetëm në Evropën Juglindore. Kam pasur raste të shoh muze jo vetëm të vendeve evropiane, të shoh edhe Muzeun e Artit Metropolitan, ku janë veshje të kulturave të ndryshme botërore po edhe muzetë e popujve ballkanikë. Xhubleta është vetëm në zonën e Alpeve të Shqipërisë.”, shprehet ajo.

Janë të rrallë stilistët, siç thotë Onuzi, që i qëndrojnë besnik, traditës së xhubletës, duke synuar të mos devijojnë nga origjinali.

“Për fat të keq shumë rrallë arrihet të ruhet pamja… Ka pak emra, si, Edlira Sula, që merret me veshje popullore. Dhe kur ajo ka marrë guximin për të riprodhuar xhubletën, sepse në fakt është një punë që kërkon guxim, ka ardhur këtu (Instituti i Antropologjisë Kulturore dhe Studimit të Artit-ASA) dhe  ka konsultuar disa lloj xhubletash, duke gjetur edhe materialin më të trashë për të qenë sa më afër materialit të xhubletës. Nga ana tjetër, xhubleta do dhe ruajtjen e motiveve.Sot vëmë re që rëndom i shtohen lule të ndryshme, që janë krejtësisht kundër natyrës së xhubletës.”, thotë ajo.

Edhe në mënyrën se si vishet sot xhubleta në Festivale, apo ngjarje të tjera, Onuzi thotë se shumica, veçmas brezi i ri nuk i përmbahen mënyrës tradicionale që ajo është përdorur nder shekuj

“Do përjashtoja brezin e ri, që ka qejf ta vesh xhubletën për të dalë, por nuk ka qejf t’i rrijë strikt disiplinës së xhubletës, edhe pjesë të veçanta të saj nuk vendosen në vendin e tyre, ndoshta sepse nuk e njohin. Dhe në këto raste edhe në festivale apo aktivitete të ndryshme, ne merrnim si konsulentë të para, gratë e moshuara, sepse ato nuk çedonin as në radhë, as në mënyrën e vendosjes së pjesëve të veçanta”, shprehet Onuzi.

Por, në këto rrethana, a rrezikon tradita e xhubletës të humbasë?

“Dije bërja po! Rrezikon sepse kërkon dije të bëhet. Xhubleta kërkon njohje të mirë, nuk pritet në një pjesë, por përdoren për disa rripa për ta realizuar…Rripi i poshtëm që krijon valëzimin, duhet të jetë më i gjatë dhe më i gjerë, pastaj vjen gradualisht duke u ngushtuar dhe problemi kryesor është ngjitja e këtyre rripave që bëhet me spik, me disa lloje gajtanësh. Dhe kjo është punë e vështirë shumë e vështirë, që njëkohësisht kërkon të mos krijohet asnjë rrudhosje, që sipërfaqja të jetë krejtësisht e rrafshuar”, thotë studiuesja.

Edhe vetë Ministria e Kulturës e konsideron mbajtjen gjallë të dukurisë së xhubletës si sfidë. Xhubleta është dosja e parë që është futur në proces për t’u pranuar në UNESCO prej marsit të kaluar. E pasi ka kaluar fazën e parë të kontrollit administrativ, siç tregon Kumbe, pritet që në dhjetor komiteti të marrë një vendim.

“Për UNESCO-n do më vinte keq nëse nuk e ka në avantazh madje do të thosha në maj të majave. Duhet të jetë xhubleta e para në çdo drejtim , sepse është një veshje unikale, është çelës edhe për kulturën evropiane”, shprehet Onuzi.

Në pritje të vendimit të UNESCO-s, reflektimi kërkohet prej institucioneve tona të kulturës për të marrë masa për ndërgjegjësim e investim në komunitete, ku kjo dukuri, mund të vijojë të trashëgohet.

“Sigurisht duke mbështetur së pari dije bërjen dhe së dyti ne kemi Arkivin tonë (pjesë e IAKSA-së) shumë të pasur me këtë rast, sa mund të dëgjojnë ato që i kanë në dorë këto punë, të na krijojnë mundësi për ruajtjen në dollap të posaçëm. Ne këtu bëjmë punë me mjete rrethanore mund të themi me kujdesin, me vëmendjen, ne dashurinë tonë… Por sa do vazhdojë ruajtja me dashuri? Pra mjedis më të mirë, kimikatet e duhura, publikime dhe ruajtja e panteonit të xhubletës.”, shprehet ajo./shqiptarja.com

Gazetarja Klodiana Lala raportoi për “BalkanWeb” se Bushi ka mbërritur në Prokurorinë e Posaçme, por nuk dihet arsyeja e thirrjes së tij nga SPAK.

Artur Bushi është një emër i përfolur dhe i akuzuar shpesh nga opozita për të kaluarën e tij.

Po dje ish-kryebashkiaku i Durrësit Vangjush Dako ka dëshmuar për 3 orë në SPAK, por nuk dihet motivi. Ndërkohë që të tre zyrtarët dhe ish-zyrtarët kanë çështje të hapura në SPAK.

Pas verifikimeve të kryera në lidhje me materialet kallëzuese ndaj shtetasit Artur Bushi, rezulton se kanë ardhur gjithsej 7 materiale kallëzuese, nga të cilët:

Për 3 materiale kallëzuese është regjistruar procedim penal.
Për 2 materiale kallëzuese është vlerësuar të dërgohen për kompetencë në Prokuroritë e Rretheve Gjyqësore.
Për 2 materiale kallëzuese është vendosur mosfillim procedimi.

Në lidhje me procedimet penale rezulton:
Për një procedim penal është vendosur të dërgohet në Gjykatë me kërkesë për pushim (pa persona të regjistruar në regjistrin e procedimeve penale);
2 procedime penale janë në fazën e hetimit dhe emri i shtetasit Artur Bushi, deri në këtë faze të hetimit, nuk është i regjistruar në regjistrin e procedimeve penale.bw