Po e rishpërndaj këtë opinion shkruar më 28 maj 2017, me qëllimin e mirë, që PD të reflektojë dhe të mos vazhdojë ta konsiderojë gazetarinë kritike dhe gazetarët kritikues si armiq të partisë, se në fakt PD-në e shkatërroi pikërisht elita politike e kësaj partie. Tani pritet ringjallja e PD, duke hequr dorë nga stili i vjetër, duke u fokusuar tek vota e lirë. Kur themi “votë e lirë” nuk është vetëm fjala tek demokracia brënda në parti, por tek sistemi zgjedhor që vazhdon të mbetet ai i deputetëve të listave projektuar nga Njëshi/EB

—–

Po shikoj se në rrjetin social ka nisur një garë hipokrizie, në mbrojtje të atyre që i ka hequr nga lista Lulzim Basha. Janë fokusuar tek Jozefina Topalli dhe Majlinda Bregu.

Bile ka nga ata syresh që kërcënojnë, “ta shikoni tani se çfarë do të ngjasë”!

Kërcënimet e të gjitha llojeve mbajnë erë shëmtim !

Nuk ka asnjë arsye që nxjerrja nga lista e këtyre dy zonjave të shkaktojë tronditje në politikën shqiptare, aq më tepër në popull.

Sepse edhe këto dy zonja janë në përbërje të klasës politike që është shkaktarja e kësaj gjendjeje të rëndë ku ndodhet Shqipëria!

Asnjë politikan në Shqipëri nuk mund të krenohet me veten e tij, sepse të gjithë sa kanë hyrë apo kanë dalë nga listat e deputetëve, nuk i janë nënshtruar asnjë lloj gare demokratike sikur ndodh në Perëndim. Aty i ka përfshirë Njëshi. Shkurt, Jozefina, sikur Majlinda apo edhe vetë Lulzim Basha, janë prurje direkte të Sali Berishës!

Tani Lulzim Basha bën listë njëlloj si Berisha, me të njëjtin standard, por të personalizuar me emrin e tij, me guston dhe shijen e tij.

E njëjta histori ndodh edhe me partitë e tjera. Sipas modelit të PPSH. Edi Rama është një lloj sulltani. Lulzim Basha nuk e ka ende këtë format se deri tani sulltan ka qenë Sali Berisha.

Unë po ju kujtoj zgjedhjet e vitit 2005, kur PD la jashtë parlamentit Mandelën e Ballkanit Pjetër Arbnorin.

Merreni me mend Pjetër Arbnorin e  nxorrën jashtë liste dhe në vend të tij futën Ilir Rusmajlin, të birin e një ish presekutori të PPSH!

Pjetër Arbnorit i premtuan se do ta emëronin Ambasador në Vatikan. Dhe e mashtruan!

Këto janë bëmat e PD! Dhe askush nga PD nuk protestoi!

Por ajo që përbën shqetësim, është se PD po hyn në zgjedhje pa katharsis! Po hyn si parti motër me PS dhe LSI!

Nëse PD është A, LSI – B dhe PS -C, atëherë nga marrëdhëniet tranzitive, do të rrjedhë barazimi, që kur A=B dhe B=C, edhe A=C.

Ky është realiteti. Marrëveshja ?! U bë në të mirë të kupolës! Të kësaj klase politike, pjesë e së cilës janë edhe këto dy zonjat.

Dhe drama kombëtare është se në vend që të merren me kauzat, merren me listat!

Sot fansat janë çmendur nga padrejtësia që paska bërë Lulzim Basha, duke i përjashtuar dy zonjat nga lista e tij!

Sepse listat janë bërë si prona private, në vendin, ku politika shqiptare e ka shkatërruar me themel nocionin e pronës private!

Mos e mallëngjeni Edi Ramën! Se është i njohur si mbështetës i mirë i grave!

Kur lanë jashtë liste Pjetër Arbnorin, kontributi dhe sakrificat e të cilit as që nuk mund të krahasohen kurrë me kontributin e këtyre dy zonjave, mos u revoltoni kot, hiqni dorë nga servilizmi, merreni shtruar dhe filloni e bëni analiza!

Sepse në këtë pikë është katandisur PD!

A mund të ndryshojë kështu PD, duke ndryshuar njëshin dhe ky duke përjashtuar oponentët dhe rivalët?

Jo, deri kur listat të përpilohen nga njëshi dhe kodi zgjedhor të jetë ky që është, sikur të ketë dalë nga guzhina e partisë të punës të Shqipërisë!

Po ju, popull shqiptar, a e keni dëgjuar ndonjëherë që Jozefina Topalli apo Majlinda Bregu të dalin publikisht sikur i kemi parë tash së fundmi, proVetingut dhe kundër bojkotit, unë isha dakord me të dyja në këto dy pika, në mbrojtje të zgjedhjeve të lira, për një kod të ri dhe një sistem zgjedhor demokratik, ku të valorizohet vota e shqiptarit?!

Jo! Asnjëherë!

Veç i kemi parë që e kanë konkuruar njëra-tjetrën në parada mode, sharmante, shik, të kolme, elegante, të kuruara në sallone bukurie!

Po kujt i hyn në punë kjo!

Sepse edhe atyre dikur u vjen rradha nga njëshi që i nxjerr nga lista, sikur edhe i futi në lista!

Njëshi është njësh. Është diktator!

Destruktiviteti emocional i turmave është mjeran sepse nuk proteston kundër fenomenit që e ka shkatërruar sistemin në Shqipëri, por e personalizon fenomentin me emrin e Lulzim Bashës, që i nxori ato dy zonjat nga lista!