Kryeministri i Kosovës, Albin Kurti, gjatë intervistës me gazetaren e Radios Evropa e Lirë, Doruntina Baliu. Prishtinë, 16 nëntor, 2021.
Doruntina Baliu
Kryeministri i Kosovës, Albin Kurti, në një intervistë për Radion Evropa e Lirë, thotë se Lëvizja e tij Vetëvendosje po i analizon shkaqet e rezultatit të zgjedhjeve lokale.
Pas rundit të dytë të këtyre zgjedhjeve, që u mbajt më 14 nëntor, Vetëvendosje përfundoi me udhëheqjen në katër komuna nga 38 gjithsej. Ky rezultat, sipas Kurtit, është i pakënaqshëm.
Në lidhje me dialogun me Serbinë, Kurti thotë se është i gatshëm për këtë proces, por shton se takimi i radhës me presidentin e Serbisë, Aleksandar Vuçiq, do të varet nga dialogu në nivel negociatorësh.
Duke folur për marrëveshjen e mundshme me Serbinë për normalizimin e marrëdhënieve, ai thotë se ajo duhet të ketë në qendër njohjen reciproke.
Sipas Kurtit, brengosës është edhe fakti i “militarizimit të Serbisë”.
Radio Evropa e Lirë: Zoti Kurti, Lëvizja Vetëvendosje, në zgjedhjet e fundit lokale ka marrë udhëheqësinë në katër komuna nga 38 gjithsej. Si e komentoni këtë rezultat?
Albin Kurti: Ne kemi pritur që do të kemi rezultat më të mirë dhe, rrjedhimisht, rezultati nuk është i kënaqshëm. Tani po e bëjmë një lloj analize të brendshme për defektet strukturore dhe organizative, të cilat me siguri që janë shkak i rezultatit të pakënaqshëm. Por, në anën tjetër, është edhe fakti që kishte një lloj bashkimi shumë të madh, një koordinim të të gjithë të tjerëve kundër Lëvizjes Vetëvendosje. Besoj se këta dy faktorë kanë përcaktuar një rezultat jo të mirë për ne. Por aty ku jemi opozitë, do ta bëjmë opozitën e mirë e të fuqishme, e aty ku jemi në qeverisje, do ta bëjmë qeverisjen e mirë dhe efikase.
Radio Evropa e Lirë: A mund të na shpjegoni më shumë defektet që po i përmendni?
Albin Kurti: Së pari, unë kam zhvilluar tashmë një takim me 12 kandidatët që i kemi pasur në balotazh – edhe ata që kanë fituar, edhe ata që nuk kanë fituar. Jemi duke pritur një raport të shtabit zgjedhor në Lëvizjen Vetëvendosje, mbi bazën e të cilit pastaj do të diskutojmë në kryesi. Ajo që mund të them se është evidente, është [fakti] se Lëvizja Vetëvendosje, në këto vitet e fundit, në këta katër vjetët e fundit, është rritur jashtëzakonisht shumë. Ne nuk kemi më as struktura, as organizatë, e cila është e përshtatshme për nga përmasa dhe as funksionale për nga përbërja, që t’i përgjigjet një rritjeje të këtillë. Pra, edhe zgjedhjet e 6 tetorit, 2019, edhe zgjedhjet e 14 shkurtit, 2021, na e kanë rritur shumë mbështetjen si Lëvizje Vetëvendosje dhe nuk kemi arritur që të mbajmë zgjedhje të brendshme dhe të krijojmë struktura që do të ishin adekuate për këtë situatë. Kjo është evidente, por natyrisht se ka edhe defekte të tjera, me të cilat do të na duhet të merremi.
“Nuk mendoj se ka pasur ndëshkim nga votuesit”
Radio Evropa e Lirë: Disa analistë politikë, por edhe pjesëtarë të opozitës kanë thënë se rezultati i zgjedhjeve lokale pasqyron një lloj ndëshkimi të Lëvizjes Vetëvendosje nga votuesit. A konsideroni ju se ka pasur një ndëshkim të tillë?
Albin Kurti: Nuk mendoj se ka pasur ndëshkim nga votuesit. Mendoj që mund të ketë pasur lëshime nga ana jonë, e strukturave tona. Por unë besoj që qytetarët nuk e duan më pak Lëvizjen Vetëvendosje. Përkundrazi. Në zgjedhjet e 17 tetorit të këtij viti, ne u bëmë me votat e gjithmbarshme të parët edhe në nivel vendi, siç kemi qenë edhe në zgjedhjet parlamentare. Pra, në vitin 2017 ishim në nivelin e tretë, në rangun e tretë për zgjedhjet lokale. Tash jemi të parët edhe aty.
Infografikë
LDK prin në zgjedhjet për kuvendet komunale
Mirëpo, zgjedhjet lokale, për dallim prej zgjedhjeve parlamentare, janë një lloj tjetër i lojës dhe rregullave elektorale. Është pak a shumë sikur në tenis, ku mund të fitosh shumë ‘game’, por mund të humbasësh set-in. Edhe ne, me votën e gjithmbarshme të popullsisë, jemi të parët në Republikë për zgjedhjet lokale, ndonëse do të kemi kryetarë vetëm në katër komuna.
Radio Evropa e Lirë: A mendoni se kanë luajtur rol edhe kandidatët që i keni pasur?
Albin Kurti: Padyshim, por kandidatët janë përzgjedhur nga një lloj bashkëpunimi midis qendrave tona, degëve tona dhe kryesisë së Lëvizjes. Ndoshta ka mundur më mirë, mirëpo unë jam i bindur se këta 12 kandidatë që i kemi pasur në balotazh, nuk kanë mundur të përzgjidhen më mirë. Por ka pasur koordinim tejet të madh të të tjerëve kundër Lëvizjes Vetëvendosje. Kjo mendoj se nuk ka të bëjë aq shumë me pushtetin lokal dhe vizionet për komunat, por ka shumë më tepër të bëjë me një lloj kundërvënieje ndaj pushtetit qendror, që ka dalë nga zgjedhjet e 14 shkurtit, e që vazhdojnë të jenë një lloj traume opozitare.
Radio Evropa e Lirë: Përmendët që do të bëni opozitë aty ku është e nevojshme në nivel lokal. Por, si pritet të jetë bashkëpunimi me kryetarët e zgjedhur nga niveli qendror, nga ju si kryeministër?
Albin Kurti: Unë sigurisht që do të bashkëpunoj me të gjithë kryetarët. Ata do të kenë shumë punë për t’iu shërbyer qytetarëve, sa u përket detyrave institucionale që i kanë, shërbimit publik që banori i komunës duhet ta marrë. Por, po ashtu synoj që të bashkëpunoj me ta edhe sa i përket luftimit të krimit dhe korrupsionit. Kjo është tejet e rëndësishme, sepse nuk mund të ketë zhvillim, nëse ka korrupsion, nëse ka krim, nëse ka keqpërdorime. Prandaj, sidomos në fushën e luftimit të krimit dhe korrupsionit do të kërkoj bashkëpunimin me kryetarët e komunave dhe do t’i mbikëqyr ata me vëmendje.
Infografikë
Votat për zgjedhjet lokale 2017-2021
Radio Evropa e Lirë: E keni përmendur edhe një çështje, atë që e keni quajtur mafi të ndërtimit, si dhe krimin e korrupsionin që ndodhin në nivelin lokal. A do të ketë presion në kryetarët e zgjedhur nga Lëvizja Vetëvendosje në këto komuna që të bëhet një luftë më e ashpër në këtë drejtim?
Albin Kurti: Po të ishin kryetarët nga Lëvizja Vetëvendosje, atëherë do të isha natyrisht me më shumë besim, se rezistenca ndaj mafias ndërtimore, që dëshiron që qytetet tona t’i shndërrojë në kantiere ndërtimi për shpëlarjen e parasë së pistë… Do të ishte më i madh ky lloj besimi që do të kisha në rezistencë të suksesshme. Tash duhet të angazhohem më shumë, por nuk do të mund të ketë zmbrapsje të shtetit ndaj cilitdo individ ose grupacion. Pra, shteti do të jetë më i fuqishëm se çdo individ dhe se çdo grup, në mënyrë që të kemi sundim të ligjit dhe demokraci. Unë dua të besoj që bashkë do t’ia dalim, mirëpo natyrisht që do të varet edhe prej vetë kryetarëve të komunave se në çfarë mase do të jenë në nivel të detyrës. Pra, kushtetutshmëria, ligjshmëria, rregullat, interesi publik, e jo ato tjerat.
S’ka marrëveshje “pa njohjen reciproke në qendër”
Radio Evropa e Lirë: Po kalojmë te tema e dialogut me Serbinë. Ka qenë një prej temave qendrore të qeverisjes suaj. Si e shihni, si do të vazhdojë dialogu për normalizimin e marrëdhënieve me Serbinë?
Albin Kurti: Ne jemi duke biseduar për dialogun e ardhshëm me Serbinë, për kapitullin e ardhshëm të dialogut. Kur ne kemi ardhur në qeverisje nuk ka pasur dialog, ai ka qenë i ndërprerë dhe nuk mund të them që dialogu me Serbinë ka treguar rezultate në këto vitet e fundit jo vetëm për shkak se pati devijuar në çështjen e ndarjes territoriale të Kosovës, që mbështillej në ambalazhin e shkëmbimit territorial.
Ka mungesë të progresit dhe kjo nuk ka nisur me neve, shumë më herët ka pasur mungesë të progresit, veçse ne e kemi vënë në spikamë që një pjesë e madhe e mungesës së progresit vjen nga qasjet e gabuara. Pra, nënshkruan marrëveshje të dëmshme për Kosovën që edhe Gjykata Kushtetuese, e tillë çfarë ishte, s’i kapërdinte dot (v.j. Marrëveshja për Asociacionin e komunave me shumicë serbe). Në këtë kuptim, kemi nevojë për një kapitull të ri, kemi nevojë për një qasje të re, e për ne ajo duhet të jetë parimore me qytetarët si përfitues dhe me njohjen reciproke në qendër.
Ka një zhvendosje tektonike kohëve të fundit për të mirë, përderisa në dekadën e shkuar është konsideruar që Kosova bën koncesione sepse në fund e fiton njohjen nga Serbia. Pra, dialogu dhe njohja janë vënë në raport diakronik, janë vënë të shtrira në kohë, ku njohja na vije në fund e Serbia e shtynte fundin pafundësisht. Tash kemi një zhvendosje prej kontekstualizimit kohor në atë, le të themi, hapësinor, ku njohja reciproke është në qendër të marrëveshjes dhe këtë e thonë të gjithë miqtë dhe partnerët e Republikës së Kosovës, të shtetit tonë të pavarur.
Pra, marrëveshja nuk do të jetë vetëm njohja reciproke, mirëpo nuk ka marrëveshje pa njohjen reciproke në qendër. Pra, jo në fund, në kuptimin e kohës, por në qendër, në kuptimin e hapësirës së gjësendeve të cilat i përfshin ajo marrëveshje.
Nëse ka një temë për të cilën ne jemi menjëherë të gatshëm që të angazhohemi për të gjetur sa më shpejt e sa më shumë zgjidhje është ajo e të pagjeturve, të zhdukurve me dhunë meqenëse aty ankthi i familjarëve është më i madh se pikëllimi i tyre.
Takimi me Vuçiqin varet nga “dialogu i kryenegociatorëve”
Radio Evropa e Lirë: Shefi i politikës së jashtme të BE-së, Josep Borrell ka paralajmëruar që pritet një takim mes jush dhe presidentit të Serbisë, Aleksandar Vuçiq para fundit të vitit. A do të merrni pjesë në këtë takim dhe çfarë pritet të ndodhë?
Albin Kurti: Ne duhet të shohim së pari se si po shkojnë këto bisedimet kësaj jave ndërmjet dy kryenegociatorëve. Në njërën anë është zëvendëskryeministri (Besnik) Bislimi, në anën tjetër është përfaqësuesi i Qeverisë së Serbisë (Petar Petkoviq) dhe më pastaj do të mund të themi se cila është perspektiva e një takimi të ardhshëm, me ç’rast natyrisht se duhet të dihet edhe cili është synimi i një takimi të tillë. Unë nuk i them jo një takimi në parim, por natyrisht që duhen të dihen edhe elementet e atij takimi të ardhshëm.
Qeveria e Republikës së Kosovës, unë si kryeministër kemi shprehur gatishmërinë dhe interesimin tonë për marrëveshje gjithëpërfshirëse, për takime konstruktive, për bisedime parimore dhe nëse do të ftohemi për to në Bruksel, natyrisht që do të marrim pjesë siç kemi qenë edhe dy herëve të shkuara.
Radio Evropa e Lirë: E thatë edhe ju, por edhe BE-ja në vazhdimësi ka insistuar që një marrëveshje përfundimtare duhet të ndodhë sa më parë që është e mundur. A prisni që kjo mund të ndodhë brenda mandatit tuaj si kryeministër?
Albin Kurti: Unë nuk mund të parashikoj se kur do të ndodhë, por nëse kemi parasysh që mandati i presidentit amerikan, (Joe) Biden, mandati i zëvendëskryetarit të Komisionit Evropian, Borrell dhe mandati im përafërsisht do ta kenë të njëjtën kohëzgjatje, është e pritshme që në kuadër të këtyre mandateve, që në kohë janë pak a shumë të njëjta, ta përmbyllim marrëveshjen gjithëpërfshirëse me Serbinë. Pra, te ne ekziston vullneti dhe interesimi, varet a ekziston gatishmëria te Serbia.
Normalizimi i raporteve midis Kosovës dhe Serbisë është i tillë që varet shumë më tepër nga gatishmëria e Serbisë për të ndryshuar qasjen dhe veten e saj.
Militarizim i Serbisë, “shumë brengosës për ne”
Radio Evropa e Lirë: Kur jemi te gatishmëria e Serbisë, një prej bllokadave më të mëdha të këtij dialogu është edhe Marrëveshja e Asociacionit. Ju keni thënë se nuk pranoni assesi një asociacion njëetnik, megjithatë nga Serbia është bërë e qartë që po kërkojnë që Asociacioni të themelohet sipas marrëveshjes që është bërë në Bruksel. Edhe nga BE-ja është kërkuar respektimi i marrëveshjeve të arritura deri më tani. Si do të mendoni ta tejkaloni këtë pengesë? A do të kishin pranuar rinegocim për këtë marrëveshje?
Albin Kurti: Bisedimet ndërmjet Kosovës dhe Serbisë, dialogu midis dy shteteve tona nuk është dialog për statusin e Kosovës, as për çështje të brendshme të Kosovës, por për statusin e raporteve tona. Pra, Kosova është shtet i pavarur dhe sovran, me integritet territorial, me shumë probleme, njëri ndër kryesorët është Serbia. Pra, Kosova nuk është problem, Kosova ka problem dhe problemi i Kosovës është edhe Serbia. Ne nuk jemi vet problem, ne kemi probleme të shumta e njëri prej tyre, mbase kryesori, është Serbia.
Por, dialogu nuk bëhet për ta vënë në pikëpyetje Kosova vetveten, por për të normalizuar raportet me Serbinë. E për ta normalizuar raportin me Serbinë unë besoj që duhet të ndryshojë shumë më tepër Serbia. Ajo duhet të demokratizohet, duhet të ketë sundim të ligjit, duhet të ballafaqohet me të kaluarën dhe duhet të kemi një si lloj simetrie të reciprocitetit të të drejtave të pakicave.
Përgjatë gjithë Ballkanit Perëndimor me gjashtë shtete ende të paintegruara në Bashkimin Evropian ka pakica të ndryshme kombëtare të cilët nuk kanë përafërsisht të drejta të barabarta, se s’po them identike, do të krijohen tensione që mund të shkaktojnë konflikte.
Andaj, sundimi i ligjit kundër korrupsionit e krimit, demokratizimi kundrejt autokracive, ballafaqimi me të kaluarën kundër kriminelëve të luftës dhe gjithashtu reciprociteti i të drejtave kundër dominimit të nacionalizmave shovinistë e hegjemonistë, janë formula edhe për krejt Ballkanin në përgjithësi edhe në veçanti në raportin tonë me Serbinë.
Shikoni, Serbia aktualisht shpenzon më shumë për ushtri sesa pesë shtetet tjera të Ballkanit Perëndimor marrë së bashku. Bosnja dhe Hercegovina, Mali i Zi, Shqipëria, Kosova dhe Maqedonia e Veriut së bashku nuk shpenzojnë për ushtri sa shpenzon Serbia si e vetme. Ajo këtë nuk po e bën për Hungarinë e Rumaninë dhe ky militarizim i Serbisë është shumë brengosës për ne.
Përshtypja ime është që Serbia i ngjan gjithnjë e më shumë Gjermanisë midis dy luftërave botërore pas përfundimit të Republikës së Vajmarit. Dekada e parë e këtij shekulli në Serbi kishim një version serb të Republikës së Vajmarit, që nisi me ish-kryeministrin serb që e vranë, Zoran Gjingjiq e përfundoi me ish-presidentin, Boris Tadiq dhe që prej atëherë e kemi një periudhë ku Serbia i ngjan Gjermanisë midis dy luftërave botërore, por pas përfundimit të Republikës së Vajmarit me ç’rast militarizimi është shtysa kryesore shtetërore e institucionale.
Radio Evropa e Lirë: Zoti Kurti, po thoni në vazhdimësi se Serbia është problemi kryesor, megjithatë Kosovës po i kërkohet një lloj kompromisi për të vazhduar tutje në politikën e jashtme, për të arritur edhe njohjet që deri më tani nuk janë arritur. Si e shihni vazhdimin e këtij procesi? Na intereson të dimë edhe si e shihni angazhimin e SHBA-së, sidomos në kohët e fundit, me dërgimin e emisarit Gabriel Escobar. A e shihni një ofensivë të diplomacisë amerikane në dialog si një lloj shtyse për arritjen e kompromisit?
Albin Kurti: Ne gjithmonë e mirëpresim angazhimin amerikan në Ballkan, mirëpo për formën dhe intensitetin e atij angazhimi vendosin vetë Shtetet e Bashkuara të Amerikës. Ato janë superfuqia botërore, e cila vendos për këtë gjë. Në faza të ndryshme ka qenë e ndryshme, sepse politikat e tyre janë sovrane. Në anën tjetër, unë jam këtu si kryeministër i Republikës së Kosovës, jo për të menduar për kompromiset që duhet t’i bëjë Kosova, por për ta forcuar shtetin e Kosovës.
Rritja ekonomike në këtë vit do të jetë së paku 9.9 për qind sipas Bankës Qendrore të Kosovës, ndërkohë që ekonominë e kemi marrë nga viti i kaluar me tkurrje prej 3.1 për qind, sipas Bankës Botërore. Për një të tretën janë rritur të hyrat buxhetore, i kemi zvogëluar shumë shpenzimet qeveritare dhe e kemi miratuar në mbledhjen e Qeverisë buxhetin për vitin 2022, i cili është 8.7 për qind më i lartë sesa rishikimi i buxhetit në mesvit. Qarkullimi në ekonomi është rritur për 30 për qind, eksportet janë rritur 68 për qind. Ne kemi problem me Serbinë, mirëpo, në të njëjtën kohë, ne duhet të jetojmë dhe të forcohemi.
Në gjashtëmujorin e këtij viti kishim 230 milionë investime të huaja, që është 33 për qind më shumë se viti i kaluar dhe 109 për qind më shumë sesa viti 2019 dhe 89 për qind më shumë se mesatarja e investimeve të huaja të dekadës 2010- 2020. Që nga shpallja e pavarësisë, sivjet në gjashtëmujorin e parë kemi numrin më të madh të investimeve të huaja dhe vlerën më të madhe të tyre në Kosovë.
Radio Evropa e Lirë: Do të doja të kalonim pak në një prej krizave ose krizën më të madhe në të cilën po kalon Kosova, por edhe bota – pandeminë e koronavirusit. Nëse e marrim me numrin e përgjithshëm të popullsisë në Kosovë, vaksinimi arrin diku pak më shumë se 40 për qind të popullsisë së vaksinuar. Si mendoni që të arrini cakun e vaksinimit të shumicës së popullsisë dhe si mendoni që t’i bindni qytetarët që hezitojnë për vaksinim?
Albin Kurti: Tashmë ne kemi hequr obligimin për caktim termini për vaksinim dhe kemi krijuar mundësinë edhe për vaksinim të fëmijëve nga mosha 12 deri në 15 vjeç. Nëse shikojmë popullsinë mbi moshën 16-vjeçare, me së paku një dozë të vaksinës anti-COVID janë të vaksinuar 64 për qind e popullsisë, ndërkaq me dy doza 56 për qind e popullsisë – gjithnjë e popullsisë mbi 16-vjeçare. I jemi afruar shifrës prej 1.6 milion dozave të administruara. Po bëjmë gjithçka që është e mundur që kjo të rritet. Në 30 ditët e fundit, përgjithësisht, kemi numër njëshifror të vdekjeve. Në dy javët e fundit ka rënë me dy të tretat numri i infeksioneve dhe besoj se këto janë lajme të mira për Kosovën, e cila është në krye të Ballkanit Perëndimor sa i përket menaxhimit me pandeminë, duke mos harruar se kur kam ardhur këtu në zyrë, më datën 23 mars të këtij viti, ka pasur zero vaksina, zero kontrata për vaksina dhe zero negociata për kontrata.
Radio Evropa e Lirë: Megjithatë, jemi dëshmitarë të asaj që për shkak të hezitimit për marrjen e vaksinës dhe teorive konspirative që janë përhapur, shumë vaksina kanë shkuar dëm, për shkak që qytetarët nuk kanë pranuar t’i marrin. A mendoni se keni bërë mjaftueshëm në fushatë për bindje të qytetarëve për vaksinim dhe për largimin e teorive për dëme nga vaksinat?
Albin Kurti: Ne kemi bërë krejt çfarë mundemi e dimë. Duhet të gjejmë ndoshta edhe forma të reja për t’i vetëdijesuar qytetarët për këtë gjë, mirëpo nuk do të mund ta kemi shkallën e vaksinimit si në të kaluarën edhe për shkak të një lloj ngopjeje që ekziston, por edhe për shkak se një numër i konsiderueshëm i qytetarëve të Republikës së Kosovës nuk janë banorë të Republikës së Kosovës. Pra, kur flasim për statistika, Kosova vazhdon të ketë moshë të re të popullsisë, por në të njëjtën kohë vazhdon ta ketë edhe emigrimin e vazhdueshëm, paçka se u çliruam, e u shpall pavarësia. Prandaj, kur flasim për përqindjen e popullsisë, ngjashëm pak sikur përqindja e daljes në zgjedhje, ajo është realisht më e lartë sesa shifra para përqindjes.
Radio Evropa e Lirë: Përtej vaksinimit jemi dëshmitarë të rritjes së numrave me COVID-19 nëpër rajon. Megjithëse Kosova tani qëndron mirë, ekspertët shëndetësorë kanë paralajmëruar që kjo situatë mund të importohet edhe në Kosovë. Cilat janë planet e juaja tani, sidomos në prag të sezonit të dimrit, për të evituar një valë më të rëndë të COVID-19?
Albin Kurti: Ne do të kemi tani ministër të Shëndetësisë, me të cilin do të ulemi bashkë dhe do ta bëjmë një plan të ri për rrugën përpara, sidomos për stinën e dimrit dhe, në këtë mënyrë, besoj se do të vazhdojmë të jemi në krye të detyrës, t’i mbajmë shifrat e ulëta të infeksioneve të reja, t’i mbajmë gjithnjë më të larta shifrat e vaksinimeve të reja. Nëse vjen një valë tjetër në rajon dhe Evropën Perëndimore, është e pritshme që edhe ne do të mund të kemi vështirësi. Por, me vullnetin dhe dijen që kemi dhe me përvojën që tashmë posedojmë, jam optimist.
Radio Evropa e Lirë: Në shtetet e Evropës, për shembull, në Austri janë vendosur disa masa drastike për personat e pavaksinuar, si përpjekje për t’i ulur numrat gjithnjë e në rritje. A planifikoni ju si qeveri që në të ardhmen të ketë masa të veçanta për personat jo të vaksinuar, si për shembull izolimi?
Albin Kurti: Ne nuk e kemi parashikuar një masë të tillë drastike dhe gjendja epidemiologjike në vendin tonë, rekomandimet e Institutit Kombëtar të Shëndetit Publik nuk na japin mundësinë që të shkojmë në drejtim të një rreptësie të tillë. Nuk mund të parashikoj se si do të jetë në të ardhmen. Mund të ndryshojë kjo. Por, duhet ta keni parasysh që vendimet tona si qeveri edhe kur janë politike e kanë një substancë shkencore për brenda. Pra Instituti Kombëtar i Shëndetit Publik i cili në masë të konsiderueshme u jep drejtim e rreze veprimi vendimeve që i merr qeveria e Kosovës.
Partia Demokratike lajmëroi shkarkimin e dy këshilltarëve të saj në Durrës, Arlind Boshku dhe Dritan Burgija, pasi ishin krah Salianjit në takimet me demokratët e Durrësit. Dritan Burgija, i ftuar në emisionin”Të Paekspozuarit” në MCN T,m u shpreh se nuk dinte akoma pse ishte shkarkuar dhe se lajmin e mori vesh nga mediat.
“Ka dy ditë që po përpiqem ta gjej se çfarë ka ndodhur, që faktet për shkarkimin tim dhe të Arlind Boshkun të bëhen publike. Unë u njoha nga mediat që ka dalë një shkresë për shkarkimin. U surprizova dhe nuk jam i qartë. Ata i janë referuar nenit 24 për thyerjen e disiplinës së brendshme, ndërmarrja e veprimeve që dëmtojnë interesat elektorale etj. Minimalisht për thyerje disipline bëhet një procedurë për anëtarëin dhe jo më për mua që kam qenë drejtues dege nga 2021. Isha kryetar i këshilltarëve të grupit.
Doktori ka bërë disa deklarata pas takimeve të Salianjit që salla u mbush nga Ani Dyrmishi, njerëz të PD-së që kanë punuar për Ani Dyrmishin, me aludime.
Unë jam për herë të dytë agjent. Unë dola edhe herën e parë kur dola kundër Lulit. Në kohën e Bashës u dënova dhe më tha po këto fjalë, por nuk nxorri akte dhe shkresa.
Tani mund të vijë edhe Luli atje, se unë atëherë isha drejtuesi i Foltores në Durrës tre vite.
Unë kam qenë me PD-në që 17 vjeç kur filluan revoltat. Ne pastaj ikëm me eksodin e vitit 1991. Jemi kthyer dhe u angazhuam në fillim si anëtar dhe derisa u bëra kryetar. Jam i persekutuar” –tha Burgija.
Deklarata e Komisioneres për Zgjerim, Marta Kos, se korrupsioni në Shqipëri është i pranuar nga shoqëria, ka shkaktuar polemika të shumta.
Në emisionin “Të Paekspozuarit” në MCN TV, analisti Andi Bushati deklaroi se deklaratat e Kos janë në një linjë me Edi Ramën dhe janë manipulative.
Debati në studio:
Ylli Rakipi: Dakord, Marta Kos thotë një fenomen që është kulturor dhe shoqëror në Shqipëri.
Andi Bushati: Ajo e përdor për manipulim.
Ylli Rakipi: Ç’faj ka Marta Kosi, kur doktori bërtet kundër korrupsionit dhe denoncon Marta Kosin për racizëm, kur është i pandehur në SPAK për korrupsion? Pra këtë luftën kundër korrupsionit e bëjnë të korruptuarit? Duhet të dalin Berisha dhe Rama për këtë?
Andi Bushati: Berisha, Rama, Meta i ziu, gënjejnë. Ne kujtojmë se këta i kemi arbitër, por arbitri në këtë rast është bërë palë. Arbitri përsërit tezën e Ramës.
Ylli Rakipi: Jemi shoqëri e korruptuar padyshim. Dhe tani të dalë Rama dhe Berisha, dhe këta të na ç’korruptojnë? Dhe paska faj Marta Kosi?
Andi Bushati: Në 21 Janar, po të ishte Marta Kos dhe ti thoshin a janë të pranueshme për ty vrasjet politike dhe Marta Kos e asaj kohe të thoshte kjo është shoqëri që vjen nga vrasje politike të panumërta. Relativizon krimin aktual. Atë ka bërë ajo.
Ylli Rakipi: A thua për 21 Janarin? Hiq emrin e Marta Kosit, ambasadori amerikan tha “Berisha burrë shteti”.
Andi Bushati: Ti dhe unë kemi qenë kundra kur ai palaço tha ashtu. Edhe kjo palaço bëri të njëjtën gjë.
Ylli Rakipi: Tani janë ngritur këta që janë akuzuar në SPAK për të korruptuar dhe duan të ç’korruptojnë këtë vend.
Andi Bushati: Ti po na pyet ne a është normale deklarata e Marta Kos? Është një deklaratë prej mercenare. Si e bën Rama dhe si e interpreton Saliu…
Ylli Rakipi: Ti ke të njejtin mendim që ka Saliu për këtë, mercenare, se Saliu me Gazi Bardhin thanë këtë që the ti.
Andi Bushati: Saliu e çoi në racizëm, por ajo thjesht ka përsëritur të njëjtën tezë të Ramës.
Italianët iu drejtuan këtë të diel kutive të votimit në një referendum të rëndësishëm për të ardhmen e sistemit gjyqësor, një nismë e propozuar nga kryeministrja Giorgia Meloni.
Ky votim shihet si një provë kyçe për qeverinë e saj, në prag të zgjedhjeve të përgjithshme të vitit të ardhshëm.
Qytetarët po vendosin nëse do të miratojnë ndryshimet kushtetuese që parashikojnë ndarjen e karrierave të gjyqtarëve dhe prokurorëve, si dhe ndarjen e organit vetëqeverisës të drejtësisë në dy struktura të veçanta. Kjo çështje ka qenë prej kohësh burim debatesh të forta në politikën italiane.
Referendumi vjen pas një fushate të nxehtë politike. Kampi “po”, i udhëhequr nga qeveria, përballet me kundërshtimin e fortë të opozitës së qendrës së majtë, përfshirë Partia Demokratike dhe Lëvizja 5 Yje.
Opozita paralajmëron se reforma mund të minojë pavarësinë e gjyqësorit dhe të rrisë ndikimin politik mbi drejtësinë. Sipas tyre, ndryshimet mund t’i japin më shumë kontroll qeverisë mbi sistemin gjyqësor.
Nga ana tjetër, qeveria i hedh poshtë këto akuza, duke argumentuar se reforma është e nevojshme për të luftuar politizimin brenda sistemit dhe për të shmangur skandalet që kanë shoqëruar emërimet e prokurorëve të lartë.
Analistët vlerësojnë se një fitore e kampit “po” do t’i japë një shtysë të fortë politike Giorgia Melonit, ndërsa një rezultat në favor të “jo”-së do të forconte opozitën dhe përpjekjet e saj për të krijuar një front të bashkuar kundër qeverisë.
Qendrat e votimit do të qëndrojnë të hapura deri të hënën pasdite, ndërsa rezultatet pritet të përcaktojnë drejtimin politik të vendit në muajt në vijim.
Ministrja e Drejtësisë e Kosovës, Donika Gërvalla, ka kritikuar kryeministrin e Shqipërisë, Edi Rama, lidhur me një editorial të përbashkët që ai ka publikuar me presidentin e Serbisë, Aleksandar Vuçiç, në gazetën gjermane FAZ.
Ajo tha se qytetarët e Kosovës nuk kanë për t’ia falur këtë artikull kryeministrit Rama.
Ndërsa shtoi se nuk duhet të ketë për Shqipërinë alternativa me Serbinë që nuk kalojnë nëpër Kosovë.
“Nga ana e kryeministrit Rama, i cili i tejkalon edhe ato kur kemi mbyllur njërin sy në të kaluarën, është artikulli i fundit i publikuar së bashku me Vuçiçin në gazetën prestigjioze gjermane. Unë mendoj që qytetarët e Kosovës nuk kanë për t’ia falur atë artikull kryeministrit Rama, sepse krijohet përshtypja herë pas herë që gjithmonë atëherë kur Vuçiqin BE-ja, Europa e mbështet me shpatulla për muri, del Edi Rama dhe e nxjerr nga ajo situatë”.
“Nuk duhet të ketë për Shqipërinë alternativa me Serbinë që nuk kalojnë nëpër Kosovë. Rruga nga Tirana për Beograd çon nëpër Prishtinë, edhe gjeografikisht, edhe ekonomikisht, edhe në çdo aspekt. Kështu, secili kryeministër apo president shqiptar që e harron këtë ta dini që në afatgjatë ka për të bërë gabime të mëdha që kanë për ta dëmtuar kombin tonë më shumë” – tha ajo në RTK.
Kjo deklaratë e Gërvallës vjen pas një editoriali të përbashkët të kryeministrit shqiptar Edi Rama dhe presidentit serb Aleksandar Vuçiq të publikuar në gazetën gjermane Frankfurter Allgemeine Zeitung.
Sipas saj, problem i artikullit është propozimi që Serbia dhe Shqipëria të hyjnë së bashku në Bashkimin Europian.
“Problemi i artikullit nuk është pse Rama me Vuçiçin shkruajnë një artikull të përbashkët, por problem i atij artikulli është që propozimi është që Serbia dhe Shqipëria të hyjnë së bashku në Bashkimin Europian, duke mos përmendur në asnjë rrokje të vetme, pozicionin që ka Serbia në raport me Perëndimin, Rusinë, Kinën, Venezuelën, Iranin dhe forcat botërore që bien ndesh në çdo aspekt me përcaktimet tona për BE dhe NATO por edhe me përcaktimet e Shqipërisë”- ka thënë ajo.
Në përvjetorin e Epopesë së Ushtrisë Çlirimtare të Kosovës, si çdo vit më pushtojnë emocione të forta – emocione që marrin kuptim kur e di se janë ndarë dhe përjetuar nga mbarë kombi shqiptar.
Sot e nisa ditën në odën e familjes, ashtu si dikur.
Por sot aty nuk e gjeta babushin tim, siç e gjeja çdoherë… atë që më mbushte me forcë shpirtërore, që më dëgjonte e më këshillonte, atë që më jepte vetëbesim.
Në vend të tij, aty gjeta mixhën Rifatin.
Tek ai e shoh dhe e ndiej një pjesë të babushit tim. Besoj se edhe ai tek unë e sheh dhe e ndien vëllaun e tij, Hamzën – ndoshta edhe diçka më shumë.
Ne e kemi të vështirë ta përmbushim mixhën Rifatin për mungesën e madhe që bart në zemër, për mallin e pashuar për familjen.
Më kujtohet janari i vitit 1996, kur mixha Rifat erdhi ilegalisht në Kosovë dhe qëndronte në shtëpinë e pabanuar të familjes.
Ne fëmijët, duke luajtur në oborr, kishim vërejtur se në “shtëpinë e dytë” ishte një njeri “i huaj”, i cili herë pas here dilte në dritare dhe na shikonte.
Derisa në një moment ai “i huaji” doli nga shtëpia dhe erdhi tek ne… dhe e pamë se ishte mixha Rifati.
Sot, pas tri dekadash, e kujtoj atë moment dhe i kuptoj më thellë emocionet e tij.
Atëherë ai po çmallej duke i parë fëmijët e vet nga larg, pa pasur mundësi t’i përqafonte.
Sot, pas gjithë këtyre viteve, ai po çmallet me nipat e mbesat e tij… duke përmbushur mungesën e gjatë të përqafimeve.
Skandali i zhdukjes së shisheve të shtrenjta të verës që u zbuluan në një qilar në një resort në pronësi të Ergys Agasit po hetohet nga SPAK.
Burime pranë këtij institucioni thanë se kanë pranuar dosjen që iu përcoll për kompetencë nga prokurori Bledar Valikaj, i cili ka arritur në konkluzionin se vera është produkt i veprimtarisë kriminale ku është përfshirë Agasi.
Vera u sekuestrua nga SPAK në kuadër të kontrolleve që u kryen në pronat e Ergys Agasit, kur ai u shpall në kërkim bashkë me Ermal Beqirin si të dyshuar si krerët e një grupi kriminal që rrëmbente biznesmenëve dhe i detyronin të tërhiqeshin nga tenderat e Agjencisë Kombëtare të Shoqërisë së Informacionit.
Malli i sekuestruar iu la në ruajtje kushëririt të të shumëkërkuarit, por kur të nesërmen autoritetet doganore shkuan për ta marrë dhe magazinuar, konstatuan se vera ishte zhdukur.
Kushëriri i Agasit, po hetohet nga prokuroria e kryeqytetit për veprime që pengojë zbardhje e së vërtetës, pasi nuk tregon se ku i dërgoi shishet e verës.
Sipas aktit të ekspertimit, rezulton që vlera të jetë 1.4 mln euro, por kjo vlerë e verës rritet me të paktën dyfish nëse do të shitej me shishe.
Ergys Agasi, është në kërkim ndërkombëtar bashkë me Ermal Beqirin, për akuzat e konkurrencës së paligjshme përmes heqjes së paligjshme të lirisë e grupit kriminal.
SPAK po i heton nën dyshimet se urdhëruan rrëmbimin e biznesmenit Gerond Meçe dhe e detyruan të tërhiqte ankesat për tenderat e AKSHI-t.
Nën masën e arrestit në shtëpi janë ish-drejtoresha e AKSHIT Mirlinda Karçanaj dhe ish-zv.drejtoresha Hava Delibashi, ndërsa masa ma të lehta janë firmosur ndaj disa biznesmenëve dhe një zyrtari policie. bw
Pasojat e situatës kaotike dhe katastrofike me infrastrukturën rrugore në vend, e cila është dëmtuar me akse që shemben njëri pas tjetrit dhe që janë ndërtuar vitet e fundit nën drejtimin e ministrisë së Belinda Ballukut, po i vuajnë qytetarët shqiptarë dhe veçanërisht juglindja e izoluar prej ditësh.
Kështu u shpreh sot në studion e “News 24” inxhinieri Romeo Nazarko. Ai analizoi situatën më të fundit të krijuar në vend nga lajmet dhe dëmtimi i segmenteve, kryesisht në qarkun e Elbasanit dhe Korçës.
“Të gjithë problematikat i vuajnë qytetarët, shqetësimin e kësaj situate e vuajnë ata. Kemi parë në media edhe nga ata që u ka rënë të fikët nga pritja e gjerë. Është punuar keq gjithë këto vite dhe kemi këtë situatë katastrofike me rrugët. Mungojnë studimet gjeologjike, mungojnë inxhinierët në terren, kontrollet dhe cilësia, duke shtuar edhe shkeljet me tenderët”, shpjegoi ai mes të tjerash.
Sipas Nazarkos, fakti që Autoriteti Rrugor Shqiptar (ARRSH) nuk ka një afat të qartë për nisjen dhe përfundimin e punimeve tregon mungesë kontrolli mbi situatën.
“Nëse nuk dihet kur do hapet rruga për udhëtarët drejt juglindjes, do të thotë se nuk ka njohuri të mjaftueshme mbi strukturën e nëntokës në atë zonë”, u shpreh ai.
Ai vuri në dukje mungesën e studimeve gjeologjike nga specialistë të fushës, që të përllogaritej edhe punimi, edhe koha, sikurse edhe cilësia e ndërtimit të ri.
Nazarko nënvizoi se para ndërtimit të çdo rruge duhet të zbatohet një protokoll i qartë teknik, që nis me studimin gjeologjik të terrenit dhe më pas me projektimin e veprave përkatëse si mure mbajtëse, tunele apo vepra arti të tjera. Sipas tij, problematikat aktuale tregojnë se këto procedura nuk janë ndjekur siç duhet.
“Në zona me ujëra nëntokësore, ky mur bëhet i rëndë, ushtron presion mbi murin mbajtës dhe përfundon duke u rrëzuar. Mund të ndërtosh edhe rrugë e tunele pa hekur dhe vetëm me beton, por më pas merr një situatë problematike si kjo”, shpjegoi Nazarko.
Sipas tij, një situatë e ngjashme ka ndodhur edhe me urën e shembur në rrugën Korçë–Kolonjë, që ai ka denoncuar vazhdimisht. Por edhe gërryerjet e papërgjegjshme në rrjedhat e lumenjve dhe veçanërisht në Shkumbin, kanë shkak shembjet që po ndodhin.
Ai e ka cilësuar gjendjen alarmante dhe me pasoja të rënda për infrastrukturën kombëtare dhe vuri në dukje mungesën e mobilizimit të qeverisë.
“Kemi rreth një javë që ka ndodhur rrëshqitja e rrugëve dhe nuk ka asgjë. Nëse do të ishin mobilizuar të gjitha makineritë, situata do të ishte tjetër”, u shpreh Nazarko.
Ai shprehu shqetësim edhe për rëndësinë strategjike të Korridorit Tetë, për vonesat dhe mosreagimin që mund të dëmtojnë një nga arteriet kryesore të vendit.
Ai theksoi se qeveria duhet të përqendrojë gjithë vëmendjen për finalizimin e këtij korridori, duke paralajmëruar për pasoja në raport me Bashkimin Europian.
“Nëse situata zvarritet, BE mund të tërheqë fondet e zhvillimit, ashtu si ndodhi me fondet IPARD pas zbulimit të abuzimeve”, deklaroi inxhinieri.
Shpesh debati publik ndalet te ndotja plastike, te mbetjet që shihen me sy dhe që fotografohen lehtë. Por drama e vërtetë mjedisore ndodh më thellë, atje ku nuk ka etiketa dhe as alarme publike.
Sot, kërcënimi më i madh për rrjedhën e lumit Shkumbin nuk janë qeset apo mbeturinat e përditshme, por ndërhyrjet masive infrastrukturore që po i ndryshojnë rrjedhën natyrale dhe po shkatërrojnë shtratin e tij në mënyrë të pakthyeshme.
Prej vitesh, në emër të zhvillimit dhe projekteve madhore infrastrukturore sikurse është Korirdori Tetë , rrjedha e lumit Shkumbin nga Peqini deri në Hotolisht të Librazhdit është kthyer në një kantier të hapur shfrytëzimi.
Kompanitë fituese për ndërtimin e lotëve të Korridorit Tetë kanë marrë e do marrin miliona metra kub inerte direkt nga shtrati i lumit duke e gërryer atë pa kriter dhe pa asnjë respekt për ekuilibrin natyror. Ajo që po ndodh nuk është thjesht një ndërhyrje teknike, por një masakër e mirëfilltë mjedisore.
Ky shkatërrim i shtratit të lumit Shkumbin sjell pasoja të rënda dhe afatgjata ,prishje të rrjedhës natyrale, rritje të rrezikut nga përmbytjet, zhdukje të biodiversitetit, degradim të tokave bujqësore dhe rrezikim të drejtpërdrejtë për komunitetet përgjatë gjithë luginës së rrjedhës së Shkumbinit.
Lumi, që për shekuj ka qenë burim jete dhe zhvillimi, sot po trajtohet si një minierë e hapur inertesh për interesa afatshkurtra ekonomike.
Edhe më alarmuese është fakti se kjo masakër kryhet me bekimin institucional. Në heshtje nga shfrytëzimi barbar i rrjedhës së Shkumbinit, miliona euro përfundojnë në xhepat e kompanive ndërtuese të Korridorit Tetë , ndërsa kostoja reale paguhet nga mjedisi dhe nga brezat e ardhshëm. Asnjë transparencë, asnjë llogaridhënie, asnjë studim serioz mbi pasojat akumulative të këtij shfrytëzimi barbar.
Shkatërrimi i lumit Shkumbin nuk është thjesht një problem mjedisor, por një krim ndaj interesit publik. Zhvillimi nuk mund dhe nuk duhet të ndërtohet mbi rrënimin dhe shkatërrimin e natyrës. Nëse sot heshtim për Shkumbinin, nesër do të përballemi me pasoja që nuk riparohen dot me asnjë projekt e asnjë fond.
Është koha që e vërteta të thuhet hapur. Shkumbini po shkatërrohet jo nga papërgjegjshmëria e qytetarëve, por nga vendime të gabuara dhe interesa të fuqishme mafioze që po e trajtojnë lumin si plaçkë, jo si pasuri kombëtare. bw
Bashkimi Europian do të marrë pjesë si vëzhguese në mbledhjen e parë të “Këshillit të Paqes” të ngritur nga Donald Trump. Megjithatë, Brukseli thekson se kjo nuk nënkupton anëtarësim të BE-së në këtë strukturë të re.
Rolin e përfaqësimit do ta marrë Dubravka Šuica, Komisionere për Mesdheun, e cila do të udhëtojë drejt Washington për takimin që do të zhvillohet të enjten (19/2). Sipas njoftimit zyrtar, qëllimi i pjesëmarrjes është që “të dëgjohet qëndrimi evropian mbi situatën në Gaza”.
Zëdhënësi i BE-së, Guillaume Mercier, deklaroi se komisionerja do të marrë pjesë vetëm në pjesën e veçantë të mbledhjes që i kushtohet Gazës.
“Dua të theksoj se Komisioni Evropian nuk bëhet anëtar i Këshillit të Paqes”, u shpreh ai.
Gjatë një konference për shtyp, zyrtarët në Bruksel nënvizuan se BE-ja ka pasur “një sërë pyetjesh” lidhur me këtë organ të ri, veçanërisht për sa i përket fushëveprimit të tij, mënyrës së qeverisjes dhe menaxhimit, si dhe përputhshmërisë me Kartën e Kombeve të Bashkuara.
Në një intervistë në edicionin informativ të lajmeve në Syri TV, gazetari Vudi Xhymshiti foli mbi zhvillimet e fundit politike mes Tiranës dhe Kosovë, ku u shpreh se veprimet e kryeministrit të Shqipërisë, Edi Rama, përbëjnë një strategji të qartë politike që, cënon interesat shtetërore të Kosovës dhe favorizon Serbinë.
Ai përmendi emërimin e Vlora Hysenit në krye të SHISH-it, vizitën e saj të parë në Beograd, qëndrimet ndaj dialogut rajonal dhe komentet mbi proceset gjyqësore në Prishtinë, si veprime që interpretohen si ndërhyrje të Tiranës në punët e brendshme të Kosovës.
Xhymshiti bëri thirrje që çdo vizitë e Ramës në Prishtinë të pritet me protesta masive, duke nënvizuar se sovraniteti i Kosovës nuk është i negociueshëm dhe çdo veprim që e cenon atë duhet të marrë reagim publik.
Edi Rama është një ndër kryeministrat e parë të Republikës së Shqipërisë, i cili ka filluar një operacion të plotë duke përdorur të gjithë aparatin shtetëror të Republikës së Shqipërisë për ta çmontuar Republikën e Kosovës. Në radhë të parë, ai kërcënoi sigurinë kombëtare të Republikës së Kosovës duke emëruar si këshilltare për siguri të shkarkuarën nga Agjencia Kosovare e Inteligjencës, e cila ishte zëvendësdrejtoreshë e atëhershme, duke qenë se ajo kishte qenë e dyshuar për tregtimin e sekreteve shtetërore të Republikës së Kosovës me shtetin armik, Serbinë.
Pas përpjekjeve të Kosovës për të kërkuar ekstradimin e saj dhe për të mundësuar kthimin e saj në Kosovë në mënyrë që të hetohej lidhur me dyshimet e bazuara se kishte tregtuar sekrete shtetërore me Serbinë, Edi Rama e emëroi zonjën Vlora Hyseni drejtoreshë të Shërbimit Informativ të Shqipërisë. Me këtë rast, pas emërimit të saj si drejtoreshë e Shërbimit Informativ Shqiptar, vizita e saj e parë zyrtare ishte në Beograd; nuk ishte në Prishtinë, as në Londër e as në Uashington.
Ekspertët e sigurisë, si në Londër ashtu edhe në Uashington, e komentojnë një veprim të tillë si akt tregues se ndaj kujt është besnike Shqipëria zyrtare. Pra, vizita e parë e një drejtori të sapoemëruar të Shërbimit Informativ Kombëtar në një shtet është treguese e besnikërisë ndaj atij shteti. Besnikëria politike dhe e sigurisë kombëtare që, sipas këtij qëndrimi, ka treguar zoti Rama duke e dërguar zonjën Vlora Hyseni në Beograd, shihet si e orientuar drejt Beogradit dhe jo drejt Prishtinës, Londrës apo Uashingtonit.
Tutje, zoti Rama ka qenë një prej mbështetësve të flaktë të idesë së Ballkanit të Hapur, pa e kushtëzuar Serbinë që ta njihte Kosovën. Madje, duke e lënë Kosovën anash dhe duke i quajtur të paditur e arrogantë kundërshtarët e projektit, ndonëse arsyet pse Republika e Kosovës refuzonte t’i bashkohej projektit ishin krejtësisht legjitime dhe të drejta — diçka që Tirana zyrtare do të duhej ta mbështeste në vend se ta anashkalonte.
Më tej, Tirana zyrtare ka qenë ndër mbështetëset dhe avokatet kryesore të asaj që u quajt “shkëmbim territoresh” me Serbinë, një ide që, sipas këtij qëndrimi, është mbështetur nga Edi Rama.
Në fakt, emërtimi “shkëmbim territoresh” konsiderohej si plan operativ i mbështetur nga Shqipëria zyrtare për t’ia dhënë një pjesë të territorit të Republikës së Kosovës në duart e presidentit të Serbisë, Aleksandër Vuçiç. Me dështimin e një veprimtarie të tillë, Vuçiçi, sipas këtij interpretimi, u inkurajua aq shumë nga Shqipëria zyrtare saqë ndërmori një veprim agresiv paraushtarak për ta aneksuar veriun e Kosovës më 24 shtator 2023, ku forcat paraushtarake serbe vranë një polic, Afrim Bunjakun, në territorin e Kosovës.
Në këtë rast, përgjigjja e Tiranës, në vend që të dërgonte forca ushtarake apo policore shqiptare në mbështetje të forcave të Kosovës për ta mbrojtur territorin, ishte propozimi i një procesi ndërkombëtar paqeje ku, sipas Edi Ramës, Kosova do të duhej ta njihte një realitet të ri. Sipas këtij qëndrimi, realiteti i ri do të ishte një marrëveshje me Vuçiçin për aneksimin e veriut të Kosovës, në stilin e aneksimit të Krimesë nga Rusia në vitin 2014.
Rama, më pas, sipas këtij interpretimi, përshkallëzoi përdorimin e aparatit shtetëror dhe mediatik të Shqipërisë kundër Kosovës, në favor të Serbisë, duke sulmuar qëndrimet politike të lidershipit kosovar, i cili synonte konsolidimin e Republikës së Kosovës dhe çmontimin e operacioneve serbe të instaluara gjatë periudhës 20-vjeçare të pasluftës.
Sipas këtij qëndrimi, këto veprime janë skandaloze. Pretendohet se zoti Rama ka shkelur vazhdimisht mbi sakrificën e dëshmorëve të kombit shqiptar dhe mbi çdo sakrificë që populli shqiptar i Kosovës ka dhënë për ndërtimin e shtetit të Kosovës.
Sikur zoti Rama të ishte, sipas këtij argumentimi, një patriot i vërtetë, ai dhe parlamenti i tij do ta kishin njohur gjenocidin serb në Kosovë, një rezolutë që është hedhur poshtë disa herë gjatë vitit të kaluar.
Deklarata e tij se presidentja e Republikës së Kosovës kishte refuzuar prokurorët e Hagës për të marrë informacione në zyrën e presidentit konsiderohet si dhunim i sovranitetit institucional, pasi bëhet fjalë për publikimin e asaj që ka ndodhur brenda zyrës së presidentit të një shteti tjetër. Sipas këtij qëndrimi, Rama e trajton Kosovën si provincë dhe jo si shtet sovran, duke uzurpuar të drejtën e institucioneve të Kosovës për të informuar qytetarët e tyre në mënyrë zyrtare dhe sipas vlerësimit të tyre.
Kjo konsiderohet si ndërhyrje në drejtësi, përmes komentimit të veprimeve të një prokurorie të Republikës së Kosovës, të autorizuar nga Kuvendi i Kosovës. Sipas këtij argumentimi, ai ka shkelur parimin e mosndërhyrjes në procese ligjore aktive, duke politizuar çështjen në mënyrë që mund të dëmtojë mbrojtjen e të akuzuarve.
Në përfundim, sipas këtij qëndrimi, zoti Rama duhet të merret me çështjet e drejtësisë në Tiranë dhe jo me drejtësinë e Kosovës. Drejtësia e Kosovës ka institucionet e saj, parlamentin e saj dhe autoritetin e saj për të vepruar në përputhje me mandatin që i është dhënë.
Lufta kundër trafikut të drogës, niveli i lartë i korrupsionit zyrtar dhe mungesa e zgjedhjeve të lira kanë qenë shqetësimet kryesore jo vetëm të opozitës shqiptare, por edhe të partnerëve amerikanë gjatë diskutimeve të mbajtura në takimet e delegacionit të opozitës në Uashington ditë më parë.
Një prej përfaqësuesve dhe drejtuesve të delegacionit shqiptar, deputeti Fatmir Mediu, ka rrëfyer edhe detaje nga këto takime dhe se çfarë u bisedua më në brendësi të shqetësimeve të shfaqura para kongresmenëve dhe senatorëve.
Mediu konfirmoi se temat kryesore të diskutuara ishin ato që përbëjnë edhe shqetësimin parësor të Shteteve të Bashkuara: lufta kundër trafikut të drogës, krimit të organizuar, korrupsionit qeveritar dhe lidhjeve me kartelet e drogës.
“Po ju them që ishim më tepër se ç’duhet në Uashington. Sepse zëri i opozitës mjafton të përfaqësohet nga një grup. Megjithatë kjo është çështje e gjithsecilit që domethënë kërkon të merret edhe me politikën e jashtme. E dyta, mendoj që narrativa ka qenë në të njëjtën linjë me atë që ka opozita shqiptare. Shqetësimin e parë dhe kryesor Shtetet e Bashkuara të Amerikës e kanë luftën kundër trafiqeve të drogës, krimit të organizuar, korrupsionit qeveritar dhe lidhjet me kartelet e drogës. Dhe kjo ka qenë pjesë e diskutimit dhe narratives në të gjitha takimet që ne kemi bërë”, tha Mediu, në një intervistë për “Syri TV”.
Kreu republikan theksoi se qëndrimi i SHBA-së mbetet i qartë dhe i pandryshuar. Ai përmendi si provë Aktin e Autorizimit të Mbrojtjes Kombëtare (National Defense Authorization Act), i miratuar nën Presidentin Trump, i cili e përcakton qartësisht korrupsionin si një element problematik për sigurinë dhe adreson ndikimet e huaja malinje.
Më tej ai foli edhe për takimet që mbajtën me NDI në Uashington.
“Ishin dy takime, një takim me Institutin Republikan Amerikan dhe Institutin Demokratik Amerikan. Qëllimi i këtyre dy takimeve ishte, në mënyrë të padiskutueshme marrëdhënia e opozitës në kuadër të organizimit të saj politik dhe elektoral me Institutin Republikan Amerikan, i cili ka qenë që në fillimet e viteve ’90, instituti i cili ka mbështetur Partinë Demokratike dhe Partinë Republikane në organizimin e saj politik, por edhe në sfidat elektorale. Dhe rikthimi i kësaj marrëdhënieje dhe dakordësia për t’u rikthyer në këtë marrëdhënie është jashtëzakonisht e vlefshme duke pasur parasysh edhe nismën e forumit për dialog, për të pasur një opozitë të bashkuar”, vijoi deputeti opozitar.
Ai tha gjithashtu se Instituti Republikan Amerikan ka pasur politika në shumë vende, ka arritur që të unifikojë opozitën dhe të krijojë një strategji pozitive, fituese dhe shpresoj që kjo t’i shërbejë apo të fillojë të zbulohet edhe në Shqipëri.
“Po e njëjta gjë dhe me Institutin Demokratik Amerikan, i cili në mënyrë të vazhdueshme merret me parlamentin dhe parlamentarët. Ky ishte sfondi i diskutimeve, pa lënë jashtë diskutimit atë çka parashtruat ju si çështje. Se dua të jem tërësisht korrekt, me takimet që u zhvilluan, për të mos vendosur gjëra të cilat nuk janë diskutuar sipas dëshirës tonë. Pastaj, mendoj një takim shumë i rëndësishëm ka qenë takimi në Departamentin e Shtetit. E zhvilluar në nivelin politik, pastaj edhe në nivelin e luftës kundër trafikut. Dy takime me kolegë të opozitës”, shpjegoi kreu i Republikanëve shqiptarë.
Kurse në lidhje me partneritetin e opozitës me administratën e Trump dhe marrëdhëniet me konsulentin e PD, Chris LaCivita, ai shpjegoi se:
“Tani do merremi me fjalët e pazarit të njerëzve të Edi Ramës nëpër media apo do merremi me realitetin? Në qoftë se flasim me realitetin, realiteti është ai që përcillet. Se për të lozur mediatikisht, për të paguar analistë e gazetarë, për të bërë të zezën të bardhë e të bardhën të zezë, domethënë kjo ndodh në Shqipëri. I ka të gjitha burimet dhe kontrollin mbi median Edi Rama. Kurse qëndrimi i Departamentit Amerikan të Shtetit, Departamentit të Drejtësisë ka qenë i qartë. Luftë kundër korrupsionit, luftë kundër trafiqeve edhe lidhje me kartelet e drogës. Kjo është e përcaktuar në çdo qëndrim të Shteteve të Bashkuara të Amerikës, si kur kanë vajtur autoritete shqiptare në Amerikë, ashtu edhe kur kanë ardhur përfaqësues të Shteteve të Bashkuara këtu. Ky mesazh ka qenë më se i qartë dhe vazhdon të jetë i qartë”.
Mediu vuri në dukje se Shqipëria nuk është qendra e botës në SHBA, por amerikanët janë të shqetësuar për problematikat kryesore që po dëmtojnë vendin, që ishin tre shtyllat e mësipërme që shpjegoi.
Ai shtoi se Rama nuk është me të drejtë më kryeministër i vendit, edhe pse e ka statusin dhe mund të bëjë takime zyrtare, deri edhe me Trump, sepse janë protokolle të pashmnagshme. Por ai theksoi se Rama tashmë njihet edhe si manipuluesi i zgjedhjeve të 11 majit.
“Pra, po ta shikosh në kompleks, qëndrimi i Shteteve të Bashkuara të Amerikës është i prerë në raport me politikën shqiptare. Por ajo që dua të them këtu pa u fshehur është, Shqipëria nuk është qendra e botës për Shtetet e Bashkuara të Amerikës dhe këtu duhet të jemi pak më të vëmendshëm. Domethënë, unë nuk lidhem fare me faktin se kë takoi Rama, si e takoi Ramën. Rama sot është pa të drejtë kryeministri i vendit, për shkak të manipulimit të zgjedhjeve, por prapë ka statusin e kryeministrit të vendit. Dhe në një mënyrë apo në një mënyrë tjetër, do gjendet një moment ku edhe mund të takohet me Presidentin Trump, sepse ka samite, ka takime të vazhdueshme në të cilat përfaqësohen drejtues të shteteve. Dhe në këtë pikëpamje është gjithmonë një oportunitet për të bërë një foto”, nënvizoi Mediu.
Komentet