Protestuesit në kryeqytetin polak, Varshavë kanë vazhduar demonstratat kundër planit të partisë në pushtet për kufizimin e qasjes së mediave në parlament, ndërsa liderët opozitarë janë zotuar se do të vazhdojnë bllokimin e hollit kryesor të parlamentit.

Ditën e dytë të demonstratës, rreth 2 mijë protestues janë mbledhur para pallatit presidencial kundrejt një pranie të madhe policore. Më pas ata kanë marshuar drejt ndërtesës së parlamentit ku politikanët opozitarë janë ulur brenda objektit në shenjë proteste.

Në një deklaratë dhënë për një televizion, kryeministrja e Polonisë Beata Szydlo, veprimin e opozitës e ka quajtur “skandaloz”.

Opozita e ka kritkuar përpjekjen e qeverisë për të kufizuar numrin e gazetarëve që e mbulojnë parlamentin, duke thënë se kjo e sulmon lirinë e mediave.

Presidenti i Këshillit të BE-së, Donald Tusk, ish kryeministër i Polonisë ka kërkuar nga partia qeveritare që të “respektojë popullin, parimet kushtetuese dhe moralin”.

Liderët e Bashkimit Evropian janë pajtuar mbrëmë për zgjatjen e sanksioneve ekonomike kundër Rusisë për shkak të ndërhyrjes në Ukrainë, deri në mes të vitit 2017, megjithqë disa kërkuan periudhë më të gjatë të sanksioneve për shkak të shqetësimeve se presidenti i zgjedhur amerikan, Donald Trump, do ta zbusë presionin ndaj Moskës.

Tash pritet vendimi dhe procesi formal për zgjatjen e sanksioneve kundër Rusisë në sektorët e mbrojtjes, energjisë dhe atë të financave. Vendimi pritet javën e ardhshme, raporton agjencia Reuters nga Brukseli.

“Disa nga kolegët tanë do të dëshironin ndoshta 12 muaj, por ajo që është e mundshme për ta mbajtur formatin tonë aktual, nënkupton gjashtë muaj”, tha presidenti i Bashkimit Evropian, Donald Tusk.

Sanksionet kundër Rusisë janë imponuar për shkak të aneksimit ilegal të Krimesë së Ukrainës në vitin 2014 dhe për shkak të mbështetjes për separatistët në pjesën lindore të Ukrainës.

Siç ishte vendosur më 30 nëntor, këtë javë Beogradi dhe Prishtina, kanë ndërmarrë hapa finalë për implementim të plotë të Marrëveshjes për sistemin e drejtësisë, thuhet në një kumtesë të mbrëmshme të Zyrës për media të Bashkimit Evropian

“Njoftimi nga Serbia më 9 dhjetor për përfundimin e punësimit të gjyqtarëve, prokurorëve dhe personelit adiministrativ, prej 10 janarit të vitit 2017, lejon integrimin e tyre po atë ditë në sistemin e drejtësisë së Kosovës”, thuhet në deklaratën dërguar mediave.

Mëtutje, kjo zyrë thotë se “emërimet e gjyqtarëve, të prokurorëve dhe stafit administrativ, më 10 janar, do të mundësoj sistem të përmirësuar të drejtësisë në gjithë Kosovën”.

Bashkimi Evropian thotë se “i lavdëron palët për këtë arritje të rëndësishme”.

Mediat franceze raportojnë se kryeministri, Maunel Valls pritet të njoftojë se do të garojë në zgjedhjet presidenciale që mbahen vitin e ardhshëm.

Zyra e Valls e ka publikuar një deklaratë zyrtare ku thuhet se ai do e bëjë të ditur këtë gjatë ditës së sotme, por nuk ka dhënë ndonjë detaj tjetër.

Njoftimi bëhet i ditur pasi ish kryeministri, Francois Fillon e ka siguruar një fitore të për tu bërë kandidati presidencial i qëndrës së djathtë.

Socialistët që janë në pushtet pritet të organizojnë garën e brendshme partiake në janar për të zgjedhur kandidatin e tyre. Sondazhet momentalisht tregojnë se socialistët gjenden më poshtë me përkrahje popullore se sa Republikanët e qendrës së djathtë dhe partitë e ekstremit të djathtë të Frontit Kombëtar.

Zgjedhjet e ardhshme presidenciale mbahen në dy raunde, njëri në muajin prill e tjetri në maj të vitit 2017.

Italianët i thanë jo reformave kushtetuese të propozuara nga kryeministri Matteo Renzi, të cilat parashikonin forcimin e kompetencave të kryeministrit, që sipas përkrahësve do t’i sillnin qëndrueshmëri politike Italisë.

Propozimi përfshinte shkurtimin e pushtetit të Senatit, duke pakësuar numrin e senatorëve nga 315 në 100, si dhe zvogëlimin e pushtetit të autoriteteve rajonale.

Kryeministri Renzi pohonte se reformat do të përshpejtonin procesin ligjvënës në Itali, një vend që ka ndërruar 60 qeveri që nga viti 1948.

Por, kundërshtarët thanë se reformat nënkuptonin më shumë pushtet në duart e kryeministrit.

Duke iu drejtuar vendit pas referendumit kryeministri tha se “qeveria ime përfundon këtu”. Anketat e para pas votimit tregonin se ai mund ta ketë humbur referendumin me 20 për qind.

Fushata kundër reformave të propozuara nga zoti Renzi u drejtua nga partia kryesore e opozitës, Lëvizja e Pesë Yjeve e udhëhequr nga Beppe Grillo, i cili kërkon referendum nëse Italia duhet të përdorë monedhën e përbashkët evropiane euro.

Humbja e kryeministrit Renzi mund të forcojë partitë populiste përfshirë Lëvizjen e Pesë Yjeve dhe Ligën e Veriut që ka qasje kundër emigrantëve.

Referendumi në Itali pasoi votën britanike për dalje nga Bashkimi Evropian, ndërsa përkon më ngritjen e Fronit Kombëtar francez me frymë kundër emigrantëve dhe partive tjera populiste në Evropë.

Drejtuesja e Frontit Kombëtar në Francë Marine Le Pen, shkroi në twiter se “italianët kanë refuzuar Bashkimin Evropian dhe Renzin. Duhet të dëgjojmë këtë etje për lirinë e kombeve”.

Në një prej komisioneve të parlamentit evropian ka nisur debati lidhur me të ardhmen e bashkëpunimit ekonomik me Britaninë pas vendimit të saj për largim. Holandezët nëpërmjet ministrit të tyre të financave kanë mbajtur një qëndrim të ashpër duke kërkuar që Londra të mos jetë më qendra kryesore financiare e eurozonës. Diskutimet vijnë në një kohë kur Bashkimi Evropian po përpiqet të zbatojë politika financiare që i japin përgjigje euroskepticizmit, duke stimuluar punësimin dhe rritjen ekonomike të vendeve anëtare.

Presidenti i Eurogrupit dhe Ministri i Financave të Holandës, Jeroen Dijsselbloem deklaroi se Bashkimi Evropian nuk duhet të lejojë më që Londra të jetë qendra kryesore financiare e eurozonës. Eurogrupi është forumi i ministrave të financave të vendeve të eurozonës. Duke folur sot në parlamentin evropian, ai theksoi se BE-ja duhet të mbajë një qëndrim të fortë ndaj Londrës.

“Ne nuk mund ë lejojmë që qendra kryesore finaciare për Evropën dhe eurozonën të jenë jashtë Evropës dhe të ndjekë rrugën e vet përsa i takon rregullave dhe kërkesave. Thjesht nuk mund ta lejojmë këtë që të ndodhë. Duhet të mbajmë një qëndrim të fortë për këtë. Nuk ka asnjë alternativë tjetër”, u shpreh sot zoti Dijsselbloem duke dëshmuar në një prej komisioneve të parlamentit evropian.

Ministri holandez i financave tha se nuk pret që Britania pas largimit të zbatojë rregullat e Bashkimit Evropian.

“Nuk mund të lejojmë një vend të tretë të ketë qasje të plotë në tregjet financiare evropiane, nëse në të njëjtën kohë ne i lejojmë këtij vendi t’u shmanget rregullave tona për standartet kryesore, kërkesat, mbrotjes së konsumatorit e të tjera. Nuk mendoj se kjo është e mundur. Ata po shohin për një model norvegjez për shërbimet financiare, por kjo nuk ka kuptim në rastin e Britanisë, pasi ata vendosën të dalin nga BE-ja pikërisht për arsye sovraniteti”.

Vetëm disa ditë para takimit të ministrave të financave të eurozonës, zoti Dijsselbloem u bëri thirrje udhëheqësve europianë të jenë realistë me objektivat fiskalë për Greqinë pas vitit 2018, kur përfundon edhe programi i ndihmës financiare për këtë vend.

Komentet e tij bëhen në një kohë kur Komisioni Evropian, krahu ekzekutiv i Bashkimit Europian, propozoi në fillim të nëntorit një politikë më të lirë buxhetore për 19 vendet e euro zonës. Kjo sygjeron që deficiti buxhetor të ngrihet nga norma e tanishme prej 3% në 3.5% të Prodhimit të Brendëshëm Bruto për vitin që vjen, si një përgjigje ndaj euroskepticizmit në rritje pas vitesh ulje të vazhdueshme ekonomike dhe papunësie.

Ministrat e jashtëm të Francës, Gjermanisë, Rusisë dhe Ukrainës, javën e ardhshme takohen në Bruksel për të diskutuar për implementimin e marrëveshjes së armëpushimit në pjesën lindore të Ukrainës.

Zëdhënësi i Ministrisë së jashtme të Francës, Alexandre Giorgini, mbrëmë po ashtu, tha se takimi më 29 nëntor do të mundësojë “të shihet se çka është bërë dhe çka nuk është kryer prej takimit në Berlin në muajin tetor”.

Në takimin në Berlin presidenti i Rusisë, Vladimir Putin, dhe ai i Ukrainës, Petro Poroshenko, thanë se synonin zgjidhjen e rrugës pa krye në konfliktin në Ukrainë, deri në muajin nëntor.

Qeveria e Ukrainës dhe separatistët prorusë në pjesën lindore të Ukrainës, kanë dështuar që marrëveshjet e Minskut t’i implementojnë në tërës dhe lufta në këtë rajon ka vazhduar.

Nga ky konflikt deri tash janë vrarë më se 9,600 vetë.

Presidenti i Parlamentit Evropian, Martin Schulz, tha të enjten se nuk do të kërkojë mandat të ri, porse do të kthehet në politikën kombëtare të Gjermanisë, ku do të garojë për parlamentin federal në Berlin, vitin e ardhshëm.

Schulz, socialdemokrat, nuk dha detaje të tjera në konferencën për media.

Partia e tij është aktualisht partner i koalicionit të kancelares Angela Merkel.

Mbetet e paqartë nëse Schulz do të jetë kandidati kryesor për kryetarin e Partisë Social-Demokrate.

Aktualisht në krye të saj është zëvendëskancelari, Sigmar Gabriel.

Emri i Schulzit ka qarkulluar edhe si zëvendësim potencial për ministrin e Jashtëm të Gjermanisë, Frank-Walter Steinmeier, i cili pritet të largohet nga posti në fillim të vitit të ardhshëm, pasi është nominuar për president.

Sekretari i Përgjithshëm i NATO-s, Jens Stoltenberg, tha të mërkurën se beson në bashkëpunimin ndërmjet NATO-s dhe Serbisë në përballjen me sfidat e përbashkëta të sigurisë, duke respektuar qëndrimin e saj për paanësi ushtarake.

Pas takimit më kryeministrin serb, Aleksandër Vuçiç në Bruksel ai tha se Serbia është pjesë e familjes evropiane me të cilën ndahen vlera të përbashkëta të të drejtave të njeriut, demokracisë dhe sundimit të ligjit, ndërsa shfaqi besimin në bashkëpunimin ndërmjet NATO-s dhe Serbisë.

“Ne mund të kujtojmë të kaluarën, por të shohim drejt së ardhmes. Sikundër e kam thënë gjatë vizitës në Beograd, qëllimi i fushatës ajrore në vitin 1999 ishte mbrojtja e civilëve. Dhe ne e bëmë këtë. Humbja e jetëve të pafajshme ishte tragjedi dhe ndjejë keqardhje të thellë. Sot përballemi me sfida të përbashkëta të sigurisë, po punojmë së bashku në mënyra të ndryshme dhe unë e mirëpres bashkëpunimin pragmatik që jemi duke e zhvilluar ndërmjet NATO-s dhe Serbisë“, tha sekretari Stoltenberg.

Kryeministri serb tha se bashkëpunimi me NATO-n është në funksion të paqes e qëndrueshmërisë në rajon.

“Ne jemi të rrethuar me vendet e NATO-s ose me ato që duan të jenë anëtare të NATO-s. Njerëzit në Serbi duhet ta dinë që nëse duam paqe, qëndrueshmëri, zhvillim ekonomik, standard me të mirë jetese, njerëz më të kamur në Serbi, jam tërësisht i bindur që kusht kryesor është të kemi paqe e qëndrueshmëri dhe të ndërtojmë marrëdhënie të mira me NATO-n. Serbia është ushtarakisht e paanshme dhe e respekton vendimin e parlamentit të saj, por Serbisë, pikërisht për shkak të arsyeve që i përmenda dhe shkaqeve tjera të arsyeshme, për shkak të shikimit drejt së ardhmes , dëshiron të zgjerojë bashkëpunimin e saj me NATO-n“, tha ai.

Kryeministri serb e vlerësoi me shumë rëndësi praninë e KFOR-it në Kosovë, në të cilin siç tha, serbët e Kosovës mbështeten shumë.

Bombardimet e vitit 1999 të drejtuara nga Shtetet e Bashkuara, i kanë kthyer serbët kundër perëndimit dhe drejt Rusisë e cila po ashtu kundërshton pavarësinë e Kosovës që u shpall në vitin 2008, me mbështetjen e Shteteve të Bashkuara dhe Evropës perëndimore.

Rusia kundërshton fuqishëm anëtarësimin e mundshëm të Serbisë në NATO, ndërsa është thellësisht e pakënaqur që Mali i Zi tashmë ka marrë ftesën për anëtarësim në aleancë.

Ish-presidenti i Francës, Nicolas Sarkozy, e ka pranuar disfatën në raundin e parë të zgjedhjeve të Partisë Konservatore, për zgjedhjet presidenciale në vitin 2017.

“Nuk ia dola t’i bindi votuesit”, tha Sarkozy gjatë fjalimit të mbrëmshëm në Paris para mbështetësve të tij, pasi doli i treti në këtë garë.

Para tij u renditën ish-kryeministrat, Francois Fillon dhe Alain Jupe, të cilët do të ballafaqohen me njëri-tjetrin javën e ardhshme.

Zoti Sarkozy tha se do ta mbështes zotin Fillon, i cili ishte kryeministër i Francës në periudhën 2007-2012.

Rezultatet e pjesërishme të këtyre votimeve tregojnë se Fillon kishte gati 44%, Juppe afro 28%, ndërsa Sarkozy kishte mbledhur 21% të votave.

Koordinatori kundër terrorizmit në Holandë, ka vlerësuar se organizata terroriste Shteti Islamik ka ndërmjet 60 dhe 80 operatorë në Evropë për të përgatitur dhe kryer sulme terroriste

Në një intervistë ekskluzive me AP, Koordinatori Kombëtar I Kundër terrorizmit dhe Sigurisë në Holandë Dick Schoof tha se IS ju ka thënë mbështetësve në Evropë “që të mos vijnë në Siri, por të bëhen gati për sulme në Evropë”.

Ai tha se Evropa ka pasur sukses në uljen e numrit të luftëtarëve të mundshëm të IS-it që udhëtojnë në Lindjen e Mesme, në vitet e fundit, por “kjo nuk do të thotë se kërcënimi i mundshëm i atyre që do të mund të udhëtonin është zhdukur”.

Mbi të gjitha, ai paralajëmroi se suksesi në çrrënjosjen e luftëtarëve të IS-it në Irak dhe Siri po i shpërndan militantët gjithandej botës.

Ai vlerësoi se rreth 4 mijë deri në 5 mijë evropianë aktualisht luftojnë me IS-in në këto dy shtete.(REL)

Presidenti amerikan, Barack Obama, i ka bërë thirrje pasardhësit të tij, Donald Trump, që t’i kundërvihet Rusisë kur ajo tu shmanget “vlerave tona dhe normave ndërkombëtare”.

Këto komente ai i ka bërë sot në Berlin, gjatë konferencës së përbashkët për shtyp, me kancelaren gjermane, Angela Merkel.

Zoti Trump, i cili e merr presidencën amerikane më 20 janar, potencialisht ka sinjalizuar më tepër qasje pajtuese me Moskën.

Në vitet e fundit, lidhjet e Moskës me Uashigntonin kanë rënë në nivelin më të ulët prej periudhës së Luftës së Ftohtë, për shkak se Shtetet e Bashkuara dhe Rusia kanë përplasje lidhur me Ukrainën, Sirinë dhe çështjet e tjera.

Obama u tha reporterëve se shpreson se Trump është “i gatshëm t’i kundërviheet Rusisë, kur ajo të shmanget nga vlerat tona dhe normat ndërkombëtare”.

Pas një bisede telefonike me presidentin e Rusisë, Vladimir Putin, më 14 nëntor, zoti Trump ka thënë se ai pret që “të ketë marrëdhënie të fuqishme dhe të qëndrueshme me Rusinë dhe popullin e Rusisë”.

Megjithatë, disa republikanë të njohur në Kongresin e Shteteve të Bashkuara, përfshirë senatorin John McCain, i kanë tërhequr vërejtjen Trumpit kundër përpjekjes për zbutjen e lidhjeve me Kremlinin.

Danimarka është e gatshme të rrisë shpenzimet ushtarake, tha kryeministri Lars Lokke Rasmussen, pas bisedës që zhvilloi me presidentin e zgjedhur të SHBA-së, Donald Trump.

Trump, gjatë fushatës, ka kritikuar vazhdimisht aleatët e NATO-s, duke thënë se nuk paguajnë mjaftueshëm për mbrojtjen e tyre.

Danimarka shpenzon në mbrojtje rreth 1.2 përqind të prodhimit të saj ekonomik, ashtu si edhe shumë vende të tjera të NATO-s.

Por, kjo shifër është larg objektivit prej 2% të vendosur nga NATO-ja.

Rasmussen tha se qeveria e tij po përgatitet për rritjen e shpenzimeve për ushtrinë dhe sigurinë kombëtare.

Pas zgjedhjes së Trumpit, shenja të ngjashëm kanë dhënë edhe Polonia dhe vende të tjera të Evropës.

Udhëheqësja e partisë së ekstremit të djathtë në Francë, Marie Le Pen tha të mërkurën se zgjedhja e saj presidente vitin e ardhshëm mund të krijojë një treshe të liderëve botërorë me presidentin e zgjedhur amerikan, Donald Trump dhe presidentin rus, Vladimir Putin që do të ”ishte mirë për paqen në botë”.

Duke inauguruar selinë e fushatës së saj për zgjedhjet në Francë më 2017, më pak se 2 kilometra nga pallati presidencial Elysee, Le Pen tha se zyrat ishin “një ndalesë në rrugën e saj drejt destinacionit përfundimtar”.

Anti Evropë dhe anti emigracion, Le Pen 48 vjeçare ishte e vetmja politikane franceze e cila mbështeti Trumpin në zgjedhjet e SHBA-së.

Partia e saj Fronti Kombëtar është nxitur nga fitorja e Trump dhe nga vota e Britanisë për t’u larguar nga BE-ja, me shpresën për të filluar një valë të ngjashme anti – establishment në Francë drejt fitores në zgjedhjet e e ardhshme

“Ka një lëvizje gjithandej në botë. Një lëvizje në botë që kundërshton globalizmin e pakontrolluar, ultra-liberalizmin destruktiv… eleminimin e shteteve kombe dhe zhdukjen e kufijve”, tha Le Pen, transmeton AP.

Shefi i inteligjencës gjermane, BfV, Hans-Georg Maassen, sot ka shprehur shqetësim se Rusia mund të përpiqet të ndërhyjë në zgjedhjet e përgjithshme të Gjrmanisë, në vitin e ardhshëm.

Në këtë kuadër, në intervistën për agjencinë Reuters, zoti Maassen e ka përmendur rastin e vitit të kaluar, të një femre ruse nga Berlini, për të cilën mediat ruse thonin se ishte rrëmbyer dhe dhunuar nga emigrantët. Por ky pretendim më vonë ishte hedhur poshtë nga qeveria gjermane.

“Kjo mund të ndodhë përsëri vitin e ardhshëm dhe ne jemi të alarmuar”, thsa Maassen.

Mëtutje, ai ka theksuar se “kemi ndjenjën se kjo është pjesë e kërcënimit hibrid, që synon ndikim në opinionin publik dhe në proceset e politikëbërjes”.

Javën e kaluar kancelarja e Gjermanisë, Angela Merkel, tha se ka shenja të sulmeve në Internet dhe fushata të dezinformimit nga Rusia.

Zyrtarët amerikanë të inteligjencës kanë tërhequr vëretjen para zgjedhjeve presidenciale në Shtetet e Bashkuara këtë muaj, për fushatën e shkatërrimit të besueshmërisë së votimeve, që ata besojnë se ishte mbështetur nga Moska.

Policia në Gjermani ka zhvilluar bastisje heret në mëngjes në xhami, apartamente dhe zyra në dhjetë zona të Gjermanisë, ndërkohë që Qeveria ka ndaluar një grup të cilin e akuzon për përpjekje të rekrutimit të luftëtarëve për grupin militant Shteti Islamik, ka bërë të ditur ministria e brendshme.

Një zëdhënëse e ministrisë e përshkroi organizatën “Feja e vërtetë” si një rrjet mobilizues për grupin militant Shteti Islamik, megjtihëse tha se nuk ka shenja se vetë po planifikonte sulme, njofton AP.

Ministri i brendshëm Thomas de Maiziere beson se grupi po nxiste urrjetje, tha ajo. Ministri do të bëjë një deklaratë më vonë gjatë ditës edhe për arrestimet dhe për ndalesën. (REL)

Bullgaria po përballet me paqartësi politike me dorëheqjen e kryeminstrit të vendit pas rezultatit të zgjedhjeve që tregojnë se partia e tij ka humbur rëndë në raundin e dytë në zgjedhjet presidenciale.

Dorëheqja e Boiko Borisovit, kryeministër i vendit, erdhi pikërisht në kohën kur rezultatet treguan se kandidati socialist pro Moskës, Rumen Radev, një ish komandant i forcave ajrore, pa një përvojë politike, i fitoi zgjedhjet.

“E pranojmë vullnetin e qytetarëve dhe i urojmë ata që kanë fituar mbështetjen e shumicës së votuesve”, tha Borisov pak orë pas mbylljes së vendvotimeve.

Me zgjedhjet e përfunduara dhe votat e numëruara, Radev udhëheqë me mbi 59 për qind, ndërkohë kandidatja e partisë GERB në pushtet, Tsetska Tsacheva, ka marrë mbi 36 për qind.

GERB ka dominuar në politikën bullgare gjatë një dekade dhe Borisov u rizgjodh në dy mandate.

Radev e cilësoi rezultatin si “një votë negative për qeverinë që çon drejt një situate të re politike”.

Analistët thonë se Radev arriti që të marrë votat e bullgarëve të zemëruar me korrupsionin në mesin e klasës politike në vend.

Ai bëri thirrje për masa të ashpra për të ndaluar hyrjen e migrantëve gjatë një vale të euroskepticizmit gjithandej Evropës Qendrore dhe Lindore.

Gjatë fushatës së tij zgjedhore, Radev bëri thirrje për lidhje më të mira me Rusinë, duke e vënë gjendjen në Detin e Zi në kundërshtim me aleatët e saj të NATO-s dhe BE-së.

Radev, që dikur ka studiuar në Kolegjin Ajror të SHBA-së në Alabama, është zotuar që ta mbajë vendin e Bullgarisë në NATO, por ka thënë gjithashtu se “pro-europianizmi nuk do të thotë të jesh anti-Rus”.

Radev ka bërë thirrje për heqjen e sanksioneve ndaj Rusisë, të vendosura për shkak të veprimeve të Kremlinit në Ukrainë, përfshirë edhe mbështetjen për separatistët atje, dhe aneksimin e Krimesë, gjë që ka shqetësuar shumë analistët me faktin nëse “Bullgaria tani do të afrohet më shumë me Moskën”.

Njëkohësisht me zgjedhjet në Bullgari janë zhvilluar edhe zgjedhjet në Moldavi, një shtet që ka patur synime për anëtarësim në BE. Në zgjedhje, sipas rezultateve pothuaj përfundimtare, ka fituar kandidati pro-rus Igor Dodon, në raundin e dytë.

Dodon udhëheqë me mbi 52 për qind të votave ndaj kandidates pro evropiane, Maia Sandu që ka marrë mbi 47 për qind të votave.

Dodon, udhëheqës i partisë Socialiste, më heret tha në një konferencë me gazetarë se do të jetë president i të gjithë moldavëve “edhe i atyre që mbështesin bashkimin me BE-në, por edhe i atyre që duan lidhje më të ngushta me Rusinë”.

Ai kërkoi nga kundërkandidatja e tij që të ndihmojë “të qetësohet” shoqëria.

Probleme me votimet u shfaqën në ambasada dhe konsullata jashtë vendit, në Londër, Bukuresht, Bolgna, Moskë dhe në qytete të tjera, për shkak se zyrtarët e zgjedhjeve nuk dërguan fletvotime të mjaftueshme.

Dodon dëshiron që të ndryshojë lëvizjen e vendit drejt integrimeve evropiane, që përfshinë edhe marrëveshjen historike për bashkim të nënshkruar më 2014, përkundër kundërshtimit të fortë nga Rusia.

Ai është kritikuar në Ukrainë për shkak të deklarimit të tij se Krimea, e aneksuar nga Rusia më 2014, është territor rus.

Në një intervistë telefonike me transmetuesin rus, Rossiya 24, Dodon tha se “votuesit janë të bashkuar dhe votuan për miqësinë me Rusinë, për neutralitet dhe për ortodoksinë tonë e bashkimin e vendit”.

Ai tha se angazhohet për zgjedhje të jashtëzakonshme parlamentare vitin e ardhshëm, dhe nuk do të pres deri në vitin 2018, për ta larguar qeverinë aktuale që favorizon lidhjet me BE-në.

Kryeministri aktual, Pavel Filip, tha se qeveria dhe presidenti i ri do të duhet të punojnë së bashku për interesa më të mira të vendit, duke shtuar se rruga drejt integrimit në BE “nuk mund të kthehet prapa”.

Moska, ndërkaq, druan nga një lëvizje e Moldavisë më afër BE-së, e ngjashme me atë që ndodhi në Ukrainë më 2014.

Rusia ka rreth 1,000 trupa të saj të stacionuara në territorin e kundërthënshëm të Transdniester, kryesisht të populluar me rus-folës, që u shkëput nga Modavia pas një lufte të shkurtër, me ç’rast u vranë disa qindra njerëz.

Moldavia është një nga vendet më të varfëra evropiane dhe kushtet ekonomike në vend janë përkeqësuar që prej trazirave që shpërthyen gjatë vitit 2014, kur afro 1 miliard dollarë – rreth 10 për qind e GDP (të ardhurave për kokë të banorit) së vendit – u zhdukën nga tri banka.

Gjatë kësaj jave, Fondi Monetar Ndërkombëtar aprovoi rreth 180 milionë dollarë kredi për mbështetje të Moldavisë – duke thënë se reformat qeveritare dhe një ekonomi më e fortë e kanë forcuar sektorin bankar. (REL)

Përgatiti: Arbër Vllahiu