Presidenti i Bjellorusisë, Alyaksandr Llukashenko, e ka kritikuar Rusinë, gjatë një konference të sotme për gazetarë në Minsk, duke e akuzuar se nuk po i respekton marrëveshjet ndërmjet dy vendeve fqinje dhe se e përdorë furnizimin me gaz për ta “kapë për fyti” Bjellorusinë.

Duke folur para afro 50 gazetarëve vendës dhe të jashtëm, Llukashenko tha se Rusia e kishte “kaluar kufirin” e marrëveshjeve me Bjellorusinë me një “lëvizje të lapsit”.

Ai i është referuar veprimit të Rusisë për të ndërmarrë kontroll të ashpër në kufirin e përbashkët, derisa Bjellorusia përgatitet, që prej 9 shkurtit, ta zbatojë regjimin e lëvizjes pa viza për udhëtime të shkurtëra me afro 80 vende.

Llukashenko ka sugjeruar se Rusia është përpjekur ta forcojë ndikimin e saj ndaj shteteve të vogla duke synuar kontroll të gazsjellësve të gazit dhe duke e përdorë gazin dhe naftën si mjet force

Presidenti i Bjellorusisë tha se “pavarësia nuk mund të krahasohet me naftë” dhe se vendi i tij, që për një kohë të gjatë ishte i varur nga furnizimet e subvencionuara të energjisë ruse, do të gjejë burime të tjera të naftës dhe gazit, nëse paraqitet e nevojshme.

Një ushtar francez qëlloi dhe plagosi një person të armatosur me thikë derisa po përpiqej të hynte ne muzeun e Louvrit në Paris. Policia tha se ai brohoriti “Allahu Akbar (Zoti është i madh) dhe sulmoi një ushtar tjetër para se të qëllohej në hyrje të dyqanit të muzeut. Një person tjetër u arrestua meqë kishte sjellje të dyshimtë.

Sulmuesi është plagosur rëndë, tha shefi i policisë së Parisit, Michel Cadot, sipas të cilit në çantat e tij nuk është gjetur ndonjë mjet shpërthyes.

Prokuroria ka hapur një hetim “anti terrorist”. Ende nuk janë dhënë hollësi rreth identitetit dhe përkatësisë së personit.

Franca është goditur nga një seri sulmesh të militantëve islamik gjatë dy viteve të fundit në të cilat u vranë mbi 230 persona dhe përgjegjësia për të cilët u mor nga grupi militant Shteti Islamik.

Vendi është vetëm te muaj larg zgjedhjeve presidenciale dhe siguri e frika nga terrorizimi janë çështje kryesore. Franca po jeton nën masa të jashtëzakonshme që nga nëntori i vitit 2015.

Parisi po planifikon që të konkurrojë për të qenë mikpritës u Lojërave Olimpike të vitit 2024.

Policia ka rrethuar të premten muzeun e Louvrit dhe ka evakuuar vizitorët që ndodheshin brenda tij.

Presidenti i Rusisë, Vladimir Putin, e viziton Hungarinë, për të dytën herë brenda dy vitesh dhe ky zhvillim nga shumë vetë në Bashkimin Evropian shihet me shqetësim.

Kryeministri i Hungarisë, Viktor Orban, takon të enjten Putinin, në periudhën e shqetësimeve të rritura brenda Bashkimit Evropian për pikëpamjet e presidentit të ri amerikan, Donald Trump, i cili në një mënyrë, ka shprehur anashkalim për Bashkimin Evropian dhe dëshirë për raporte më të afërta me Moskën.

“Ne jemi të shqetësuar për vizitën atje dhe nuk ka dyshim për këtë”, i tha Radios Evropa e Lirë një zyrtar i BE-së, që ka dashur të mbetet anonim.

Ai tha se “ky është viti i Putinit. Ai po përpiqet ta përçajë Evropën, derisa Katërshi i Vishegradit, ku bëjnë pjesë Republika Çeke, Hungaria, Polonia dhe Sllovakia, e veçanërisht Hungaria, po shkaktojnë më tepër përçarje, për shkak të aksioneve siç është ky i ftesës së Putinit për vizitë në Budapest, dhe Shtetet e Bashkuara, që për të parën herë nuk japin kundërbalancë ndaj Putinit”.

Vizita e Putinit, me ç’rast ai për të tretën herë do të takohet me kryeminitsrin hungarez, Viktor Orban, brenda dy vitesh, do të fokusohet, para se gjithash, në çështjet ekonomike, përfshirë edhe projektin kundërthënës për centralin atomik, për të cilin Rusia e ka nënshkruar kontratën për ndërtim dhe për marrëveshje të tjera për blerje të gazit natyror.

Putin i ka pranuar pak ftesa në vendet e Bashkimit Evropian, prej aneksimit ilegal të Krimesë së Ukrainës në vitin 2014, dhe imponimit të sanksioneve kundër Moskës për shkak të ndërhyrjes në Ukrainë.

Analistët thonë se kjo vizitë paraqet mundësi për Putinin për inkurajimin e Hungarisë në përpjekjet e saj që sanksionet kundër Rusisë të tërhiqen.

“Nuk jam i befasuar që zoti Putin e viziton Hungarinë kaq shpesh dhe vizita e tij e tashme në Hungari është vetëm një ilustrim se Putini është i interesuar në mbajtjen e presionit ndaj Bashkimit Evropian. Jam i sigurt se është përpjekje për shkatërrim të solidaritetit tonë. Zoti Orban është promovues aktiv i politikave kundër sanksioneve ndaj Rusisë. Tërheqja e sanksioneve është diçka që Rusisë i duhet shumë, por ajo e thyen parimin e solidaritetit brenda BE-së. Mendoj se përgjigja e Hungarisë është krejtësisht e gabuar”, i tha Radios Evropa e Lirë, Petras Austrevicius, anëtar i Parlamentit Evropian nga Lituania.

Ministri i jashtëm i Hungarisë, Peter Szijjarto, në fund të muajit të kaluar, është shprehur kundër sanksioneve ndaj Rusisë, duke thënë se ato kanë dështuar ta ndryshojnë involvimin e Rusisë në Ukrainë dhe e kanë goditur rëndë ekonominë e Hungarisë.

“Nuk mendoj se duhet të festojmë se ne e kemi goditur ekonominë ruse, pasi ky është lajm i keq për Evropën, po ashtu”, tha ministri i jashtëm hungarez, duke pretenduar se Hungaria i ka humbur 6.5 miliardë dollarë në eksporte në Rusi, për shkak të sanksioneve dhe kundër sanksioneve të imponuara nga ana e Moskës.

Analisti Peter Kreko, drejtor i Institutit Politik Capital me seli në Budapest, i tha gazetës Moscoë Times, se të dhënat e qeverisë hungareze për humbje ekonomike për shkak të sanksioneve, janë “thjeshtë të falsifikuara” dhe qëllimisht të rritura.

Nga ana e saj, Moska ka thënë se tregtia ndërmjet dy vendeve ka rënë për 50% gjatë tri viteve të kaluara, dhe ka arritur në 3.9 miliardë dollarë.

Vlerësimet e ministrit të jashtëm të Hungarisë, Peter Szijjarto, lidhur me sanksionet kundër Rusisë, janë mbështetur nga kryeministri i Sllovakisë, Robert Fico dhe presidenti i Çekisë, Milos Zeman, i cili në gusht të vitit të kaluar, ka bërë thirrje për tërheqje të sanksioneve kundër Rusisë.

Përgatiti: Fatmir Bujupi

Sekretari i përgjithshëm i NATO-s, Jens Stoltenberg, pritet që sot, gjatë vizitës së tij në Sarajevë, të flasë lidhur me rrugën e Bosnjë Hercegovinës për anëtarësim në aleancë.

Gjatë qëndrimit të tij në kryeqytetin e Bosnjë Hercegovinës, pritet që zoti Stoltenberg të takohet me kryesuesin e presidencës trianëtarëshe të Bosnjë Hercegovinës, Mlladen Ivaniq, me kryeministrin, Denis Zvizdiq, dhe me zyrtarë të tjerë të lartë të këtij vendi.

Ai, po ashtu, do ta mbajnë një fjalim në Shtëpinë e Armatës në Sarajevë.

Në vitin 2006, Bosnjë Hercegovina është pranuar në programin e NATO-s, Partneriteti për paqe, dhe ishte e angazhuar në dialog me aleancën për pranim prej vitit 2008.

Presidenti i Bashkimit Evropian, Donald Tusk, tha se Kina, Rusia dhe administrata e re e Presidentit Trump janë ndër kërcënimet kryesore të jashtme me të cilat përballet blloku.

Ai i bëri komentet në një letër drejtuar 27 udhëheqësve të BE-së në prag të një samiti që mbahet të premten në Maltë. Ndryshimi në Uashington e vë Bashkimin Evropian në një situatë të vështirë,” tha zoti Tusk.

Presidenti Trump po kërkon zbatimin e politikave që vënë Amerikën në plan të parë dhe ka ngritur pikëpyetje nëse anëtarët e NATO-s po kontribuojnë aq sa u takon për aleancën.

Zoti Tusk tha se Bashkimi Evropian kurrë nuk është përballur me sfida më të rrezikshme dhe se Evropa ka nevojë për “guxim, vendosmëri dhe solidaritet politik.”

Ai tha se BE-ja duhet të mbrojë dinjitetin e saj në bisedimet me SHBA, Rusinë, Kinën apo Turqinë, dhe nuk duhet të bëjë lëshime përballë argumenteve populiste apo ndjenjave ksenofobe që shkojnë kundër integrimit evropian.

Presidenti i Këshillit të BE-së, Donald Tusk, ka thënë se “deklarimet shqetësuese” të administratës së presidentit amerikan, Donald Trump janë pjesë e një kërcënimi të jashtëm me të cilat përballet Bashkimi Evropian.

Në një letër dërguar shefave të shteteve dhe qeverive anëtare të BE-së më 31 janar, pak para një samiti të 3 shkurtit, Tusk ka bërë thirrje për unitet në përballjen me këto sfida.

Tusk i konsideron këto sfida si “më të rrezikshmet ndonjëherë” në historinë e bllokut evropian.

Ai ka përmendur tri kërcënime, përfshirë atë të jashtëm që ai vlerëson se “ka të bëjë me situatën e re gjeopolitike në botë dhe përreth Evropës”.

Tusk ka thënë se një Kinë më kategorike, “politika agresive e Rusisë drejt Ukrainës dhe fqinjëve të saj, luftërat, terrori, anarkia në Lindje të Mesme dhe Afrikë, aty ku luan rol të madh Islami radikal, si dhe deklarimet shqetësuese të administratës së re amerikane, të gjithë përbëjnë një të ardhme të pa-parashikueshme”.

“Ne nuk duhet të dorëzohemi para atyre që duan të dobësojnë apo t’ia humbasin rëndësinë lidhjes transatlantike, pa të cilën rregulli botëror dhe paqja nuk mund të mbijetojnë”, ka thënë ai.

“Ne duhet t’ia kujtojmë miqëve tanë amerikanë moton e tyre: Së bashku qëndrojmë, të ndarë ne dështojmë”, vlerëson më tej Tusk.

Nënkryetarja e Parlamentit Evropian dhe raportuesja e këtij institucioni për Kosovën, Ulrike Lunacek, tha se shumica në Serbi është e vetëdijshme se pavarësia e Kosovës është e pakthyeshme.

“Persepktiva e Serbisë dhe e Kosovës për mua është e qartë: pajtimi në rajon dhe integrimi në BE”, tha Lunacek për Shërbimin e Ballkanit të Radios Evropa e Lirë.

“Normalizim do të thotë se çdo gjë, për të cilën është rënë dakord, duhet të zbatohet, pa përjashtim. Këtë duhet ta bëjnë të dyja palët dhe jo të presin njëra-tjetrën”.

“Shumica e njerëzve në Serbi e di se Kosova nuk do të jetë kurrë më pjesë e Serbisë. Edhe Qeveria e Serbisë e di – edhe pse anëtarët e saj përpiqen ta injorojnë këtë fakt – se Bashkimi Evropian, pas Qipros, nuk do të pranojë edhe një vend, kufijtë e të cilit nuk janë të definuar qartë”, tha Lunacek.

Ajo po ashtu tha se është optimiste se dialogu do t’i mundësojë Serbisë të normalizojë marrëdhëniet me Kosovën dhe se kjo, në fund, do të thotë pranim.

Kancelarja gjermane, Angela Merkel, e ka kritikuar ashpër udhërin e presidentit amerikan, Donald Trump, për ndaljen e përkohshme të hyrjes në Shtetet e Bashkuara të shtetasve të 7 vendeve me popullatë shumicë myslimane, duke thënë se përpjekjet për luftimin e terrorizmit nuk e arsyetojnë marrjen në shënjestër të një religjioni specifik.

Mëtutje zonja Merkel, sot ka theksuar se lufta kundër terrorizmit është “esenciale” dhe duhet të jetë “e vendosur”.

Por, sipas saj, kjo “në asnjë mënyrë nuk e arsyeton dyshimin e përgjithshëm kundër popullit të një religjioni specifik, në këtë rast të popullit me fe myslimane ose njerëzit me prejardhje të caktuar”.

“Unë mendoj se ky akt shkon kundër parimeve bazike të ndihmës ndërkombëtare për refugjatët dhe për bashkëpunimin ndërkombëtar”, tha Angela Merkel, dhe ka shtuar se “qartazi, ne do të kemi konsultime të afërta me partnerët tanë evropianë për këtë çështje në tërësi”.

Kryetari i qytetit të Berlinit, Michael Mueller, i ka bërë thirrje presidentit amerikan, Donald Trump, që të mos ndërtojë mur përgjatë kufirit me Meksikën, dhe në këtë kuadër ia ka përkujtuar ish-presidentin republikan, Ronald Reagan, i cili kishte ftuar për shkatërrim të mureve të ndërtuara gjatë Luftës së Ftohtë.

“Ta keni parasysh paraardhësin tuaj Ronald Reagan. Duhet t’i mbani mend fjalët e tij: “rrënojeni këtë mur”. Prandaj ju them: zoti president mos e ndërtoni këtë mur”, tha mbrëmë Michael Mueller.

Berlini ishte i ndarë nga muri famëkeq nga viti 1961 e dei në vitin 1989, që ishte ndërtuar nga diktatura komuniste në ish-Gjermaninë Lindore, për t’i penguar shtetasit e vet që të kalojnë në pjesën perëndimore të Berlinit.

Ky ishte një simbol i shtypjes, të cilin Reagan synonte ta ndalte.

“Ne qytetarët e Berlinit e dime më së miri sa sa vuajtje dhe ndarje të kontinentit, i çimentuar nga telat me gjemba dhe betoni, ka shkaktuar muri”, tha Mueller.

Tash, kur Berlini është bërë simbol i Evropës së lirë, e jo i asaj të ndarë, “ne thjeshtë nuk duhet të pranojmë që e gjithë kjo përvojë historike e jona, të eliminohet nga amerikanët, atyre që në masë të madhe ua kemi borxh lirinë tonë”, tha Mueller.

Franca ka shprehur shqetësim lidhur me vendimin e presidentit amerikan, Donald Trump, për ta suspenduar emigrimin nga disa vende me popullatë shumicë myslimane.

“Kjo vetëm mund të na brengosë neve”, tha sot ministri i jashtëm i Francës Jean-Marc Ayraul.

“Mirëpritja e refugjatëve të cilët lagohen nga lufta dhe shtypja është pjesë e detyrës sonë”, tha ministri francez në Paris, gjatë një konference të përbashkët për gazetarë me zyrtarin e lartë gjerman, Sigmar Gabriel.

Mbrëmë, zoti Trump i ka nënshkruar disa urdhëra ekzekutivë, me të cilët refugjatëve nga Siria u ndalohet hyrja në Shtetet e Bashkuara dhe suspendohen vizitat e shtetasve nga 7 vende me popullatë shumicë myslimane.

Ministri i jashtëm i Gjermanisë, Frank-Walter Steinmeier, thotë se vendi i tij duhet të jetë i gatshëm për kohë “të trazuara” gjatë mandatit të presidentit amerikan, Donald Trump.

Në një shkrim të tij të djeshëm në gazetën gjermane, Bild, zoti Steinmeier tha se megjithqë Gjermania duhet të përgatitet për “paparashikueshmëri dhe paqartësi” me administratën Trump, ai beson se Berlini do të gjejë “dëgjues të kujdesshëm” në Uashington, të cilë e dinë se edhe “vendeve të mëdha u duhen partnerët në këtë botë”.

Kancelarja e Gjermanisë, Angela Merkel, të cilën Trumpi e ka kritikuar për lejimin e më tepër se një milioni të emigrantëve të hyjnë në Gjermani, prej vitit 2015, ka thënë se ajo do të shikojë të gjejë kompromis me Trumpin, në çështjet siç janë tregtia dhe shpenzimet ushtarake.

Zëvendëskancelari gjerman, Sigmar Gabriel, tha para disa ditësh se Gjermania duhet të përgatititet për “udhëtim të ashpër” me administratën Donald Trump, dhe se ndoshta Evropa do të dëshirojë të krijoj politikë të re ekonomike, nëse zoti Trump i zhvillon praktikat protekcioniste tregtare.

Zyrtarët gjermanë, po ashtu, janë të brengosur me deklarimet e presidentit Trump për NATO-n, se është e “vjetëruar” dhe e ka kritikuar aleancën se nuk ka bërë sa duhet për luftimin e terrorizmit.

Ministrja e mbrojtjes e Gjermanisë, Ursula von der Leyen, në një intervistë të publikuar sot në gazetën Handelsblatt, tha se “NATO-ja nuk është marrëveshje biznesore dhe se ju nuk mund ta bleni besimin”.

Ekipet italiane të shpëtimit thonë se kanë gjetur dhjetë vetë gjallë në hotelin e mbuluar nga orteku që goditi një zonë malore në qendër të vendit.

Ekipet thonë se kanë komunikuar me personat e bllokuar dhe se vazhdojnë përpjekjet për t’i nxjerrë.

Punonjësit e ndihmave vazhduan të hiqnin borën dhe mbetjet gjatë gjithë natës në kërkim të 30 personave që figuronin të zhdukur, ndër të cilët edhe katër fëmijë, që ishin në hotelin luksoz në momentin kur ra orteku.

Mendohet që orteku që goditi hotelin Rigopiano në Farindole të mërkurën u shkaktua nga një seri tërmetesh të fuqishme qç tronditën rajonin e Abrucos në fillim të ditës.

Pamjet televizive tregojnë pirgje me borë në mjediset e hotelit. Zyrtarët kanë konfirmuar se kanë gjetur trupat e dy viktimave, ndërsa media njofton për gjetjen edhe të dy trupave të tjerë gjatë natës.

Autoritetet në Itali thanë se rreth 30 njerëz janë zhdukur, pasi një ortek bore ka goditur një hotel.

Agjencia e lajmeve ANSA citoi një punëtor shpëtimi të ketë thënë se ka viktima, por nuk dha më shumë detaje.

Media italiane citoi kreun e Departamentit të Mbrojtjes Civile të Italisë, Fabrizio Curcio, të ketë thënë se rreth 30 mysafirë dhe punëtorë në hotelin Rigopiano në Farindola, rajoni i Abruzos, janë zhdukur.

Përpjekjet për shpëtim janë vështirësuar nga dendësia e borës që arrin në pesë metra.

Nuk është e qartë nëse disa tërmete që kanë goditur zonën më 18 janar, kanë shkaktuar ortekun.

Pjesa qendrore e Italisë është goditur nga disa tërmete në muajt e fundit.

Një tërmet në muajin gusht ka lënë të vdekur afro 300 njerëz.

Dy shtetet baltike, Estonia dhe Lituania më 17 janar kanë marrë vendim për rritje të bashkëpunimit ushtarak me Shtetet e Bashkuara të Amerikës pak para inaugurimit të presidentit të zgjedhur, amerikan, Donald Trump.

Ato kanë nënshkruar marrëveshje bilaterale të mbrojtjes me Uashingtonin për të formalizuar praninë e trupave amerikane në vendet e tyre, njoftojnë ministritë e mbrojtjes së Estonisë dhe Lituanisë.

Letonia e ka nënshkruar një marrëveshje të ngjajshme gjatë javës së kaluar.

Marrëveshjet e lehtësojnë vendosjen e trupave amerikane në këto shtete duke mundësuar edhe ushtrime të përbashkëta dhe trajnime.

“Ne jemi të interesuar në praninë e vazhdueshme të trupave amerikane në Lituani, pasi kjo është një nga elementet kyçe të sigurisë sonë”, ka thënë ministri i mbrojtjes, Raimundas Karoblis.

Presidenti i zgjedhur amerikan, Donald Trump, i cili inaugurohet të premtën, ka vlerësuar se NATO-ja, aleanca ku bëjnë pjesë edhe këto vende baltike, është e “vjetëruar”. Këto komente kanë shqetësuar këto tri shtete që janë fqinjë me Rusinë.

Lituania thotë se do ta filloj ndërtimin e barrierës prej 80 miljesh në kufirin e vet me rajonin e Kaliningradit, që është enklavë ruse në kufi me Lituaninë.

Ministri i brendshëm i Lituanisë, Eimutis Misiunas, tha mbrëmë se kjo barrierë do të kushtoj afro 3.85 milionë dollarë dhe do të përfundojë deri në fund të këtij viti.

Ministri Misiunas ka pranuar se ky objekt nuk do të sigurojë mbrojtje të madhe kundër ndonjë sulmi masiv ushtarak, por theksoi se me këtë tregohet shqetësimi i vedit të tij për këmbëngulësinë në rritje të Rusisë, e cila i ka vendosur mijëra ushtarë në këtë rajon.

Lituania, që është anëtare e Bashkimit Evropian dhe e NATO-s, ndërtimin e barrierës e ka arsyetuar edhe me reduktimin e kontrabandës.

“Ne duhet ta parandalojmë kontrabandën dhe t’i forcojmë kufijtë e jashtëm të Bashkimit Evropian”, tha Misiunas, dhe ka shtuar se “ne e dimë mirë se çka po ndodh brenda enklavës ruse”.

Masat kundër terrorizmit, që janë miratuar në Evropë pas sulmeve vdekjeprurëse terroriste, po shkatërrojnë të drejtat e njeriut nën maskën e mbrojtjes së tyre, thotë Amnesty International.

Në raportin e publikuar sot, organizata për të drejtat e njeriut analizon legjislacionin anti-terrorizëm, të miratuar nga 14 vende të Bashkimit Evropian gjatë dy vjetëve të kaluar, dhe thotë se ai po e çon Evropën në “gjendje të rrezikshme të sigurisë”.

Sipas Amnesty International, ligjet shpesh zgjerojnë pushtetin e qeverisë për të rritur mbikëqyrjen dhe për të kufizuar lirinë e shprehjes.

“Masat diskriminuese kanë pasur ndikim të shpërpjestuar dhe thellësisht negativ te myslimanët, shtetasit e huaj ose njerëzit e perceptuar si myslimanë apo si të huaj”, thuhet në raport.

Kritikat e presidentit të zgjedhur amerikan, Donald Trump, ndaj Bashkimit Evropian kanë shërbyer vetëm për të fuqizuar stabilitetin brenda bllokut, ka thënë ministri i financave të Francës.

Gjatë një interviste të publikuar më 15 janar, Trump ka thënë se largimi nga Bashkimi Evropian do të jetë një gjë e mirë për Britaninë e madhe, ndërsa ka parashikuar se edhe vende të tjera do të largohen nga blloku evropian.

Ai gjithashtu ka thënë se kancelarja gjermane, Angela Merkel, ka bërë “gabim katastrofal” duke pranuar emigrantët.

Merkel ka reaguar duke thënë se “evropianët e kanë fatin tonë në duart e tyre”, ndërsa presidenti francez, Francois Hollande, ka thënë se BE “nuk ka nevojë për këshilla nga jashtë” në çështjet e saj.

Gjatë deklarimit më 17 janar, ministri i financave të Francës, Michel Sapin, ka thënë se “sa më shumë që Trump bënë deklarime të tilla, aq më shumë evropianët përafrojnë qëndrimet e tyre”.

“Minimi i kancelares nuk është diçka që ne e pranojmë”, ka shtuar ai.

Shefja e politikës së jashtme të BE-së ka thënë se Bashkimi Evropian do e përkrahë marrëveshjen me Iranin duke e kundërshtuar presidentin e zgjedhur amerikan, Donald Trump i cili e ka kundërshtuar marrëveshjen.

Federica Mogherini më 16 janar ka thënë se marrëveshja i shërben sigurisë së Evropës dhe ajo është “dëshmi se diplomacia funksionon dhe ofron zgjidhje”.

Gjatë takimit të njëjtë të ministrave të BE-së, kryediplomati britanik, Boris Johnson, iu ka thënë gazetarëve se marrëveshja duhet të ruhet.

Trump, rregullisht e ka kritikuar marrëveshjen me Iranin gjatë kësaj jave duke e konsideruar si “një marrëveshjet më të këqija që është bërë ndonjëherë”.

Marrëveshja është nënshkruar nga Irani, SHBA-ja, Kina, Rusia, Britania, Franca dhe Gjermania në korrik të vitit 2015, duke vendosur kufizime në programin bërthamor të Iranit në këmbim të lehtësimit të sanksioneve ndaj republikës islamike.

Presidenti amerikan, Barack Obama më 16 janar e ka shënuar një vjetorin e heqjes së sanksioneve, duke kujtuar përfitimet nga marrëveshja, duke përmendur veçnaërisht “rezultatet konkrete dhe të rëndësishme në bërjen më të sigurt të SHBA-së dhe botës”.

Përfaqësuesja e lartë e Bashkimit Evropian për politikë të jashtme dhe siguri, Federica Mogherini, ka kërkuar që Kosova dhe Serbia “ta evitojnë përshkallëzimin”, pas tensioneve që janë shkaktuar me trenin e nisur të shtunën nga Beogradi për një pjesën veriore të Kosovës.

“Mesazhi im për palët ishte që të evitohet përshkallëzimi, që të përpiqen të përmbahen nga aktet dhe retorika dhe të përpiqen të shohin angazhim të përbashkët nëpërmjet dialogut, si diçka që u ndihmon të dy palëve – jo domosdoshmërisht shumë për institucionet e të dy vendeve, por për të dy popujt – pasi hapat që ne i kemi marrë me Beogradin dhe Prishtinën, vitin e kaluar, janë disi historikë”, tha sot Federica Mogherini, në konferencën për media në Bruksel.

Mëtutje, ajo ka theksuar se “ne ia dolëm të lëvizim shumë larg për perspektivën në BE për gjithë rajonin, pasi arritëm ta ndërtojmë dialogun pozitiv ndërmjet Beogradit dhe Prishtinës”.

Në këtë kuadër ajo tha se sheh “ te të dy palët përkushtim për vazhdim të dialogut”.

Kancelarja gjermane Angela Merkel deklaroi sot se do të kërkojë të arrijë në marrëveshje me presidentin e zgjedhur të Shteteve të Bashkuara Donald Trump pas betimit të tij, por këmbënguli se Evropa do të ndjekë rrugën e saj pavarësisht diferencave me udhëheqësin e ri amerikan.

Komentet e zonjës Merkel ishin në përgjigje të një interviste që zoti Trump dha në fundjavë, duke alarmuar disa udhëheqës evropianë me përsëritjen që i bëri kritikës së vjetër lidhur me NATO-n si dhe kur e quajti gabim historik përgjigjen që Gjemania i dha krizës së emigrantëve.

“Mendoj se në evropianët e kemi fatin tonë në duart tona dhe do të mbështesja fort mendimin se ne qëndrojmë të bashkuar”, u tha zonja Merkel 27 udhëheqësve të Bashkimit Evropian.

Duke folur gjatë një konference për shtyp në Berlin ajo tha se anëtarët e BE-së do të punojnë bashkë për të “luftuar terrorizmin, për të siguruar kufijtë e unionit, për të garantuar sigurinë e brendëshme, për të punuar sëbashku për një treg të vetëm si dhe për të krijuar vende pune”.

Ajo shtoi se qëndrimet e zotit Trump mbi Evropën janë të njohura. “Presidenti i zgjedhur i ka nënvizuar pikëpamjet e tij. Sapo të marrë detyrën ne natyrisht do të bashkëpunojmë me administratën e re dhe do të shohim se çfarë lloj marrëveshje mund të arrijmë”.

Duke folur të dielën për revistën “Times” të Londrës dhe gazetën gjermane “Bild” zoti Trump tha se “NATO është vjetëruar pasi është projektua shumë vite përpara”. Ai përsëriti një nga ankesat e tij të bëra edhe në fushatë se “vendet e aleancës nuk po paguajnë aq sa duhet për mbrotjen e tyre”.

Më herët gjatë ditës, ministri i jashtëm gjerman Frank-Walter Steinmeier tha se komentet e zotit Trump shkaktuan “surprizë dhe ankth” mes vendeve anëtare të NATO-s. “Ne duhet të presim dhe të shohim se cilat do të jenë pasojat e politikes amerikane”, tha ai.

Sekretari i përgjithsëm i NATO-s Jens Stoltenberg nëpërmjet një deklarate lexuar nga zëdhënësi i tij, u shpreh se po pret të bashkëpunojë me zotin Trump. “Ai është absolutisht i bindur se administrata e re do t’i mbetet angazhimit në kuadër të Nato-s”, thuhet në deklaratë. “Një NATO e fortë është diçka e mirë për Shtetet e Bashkuara ashtu si dhe për Evropën”, tha zoti Stoltenberg.

Rusia tha të hënën se është tepër herët për të komentuar mbi propozimet e presidentit të zgjedhur Donald Trump, i cili sugjeroi në intervistë se do të mbështesë heqjen e sanksioneve ndaj Rusisë në këmbim të një marrëveshjeje për të pakësuar arsenalin e saj bërthamor.

“Le të presim deri sa zoti Trump të marë detyrën para se ne të japin vlerësimin tonë për çdo nismë të tij”, tha zëdhënësi i presidentit rus, Dmitri Peskov, në një konferencë shtypi.

Presidenti i zgjedhur amerikan kritikoi ndërhyrjen e Rusisë në Siri dhe përsëriti kritikat ndaj NATO-s, duke thënë se kjo aleancë është e vjetëruar dhe shumë vende anëtare të saj nuk paguajnë pjesën që u takon. Por ai tha gjithashtu se “NATO-ja është shumë e rëndësishme për mua”.

Deklarata e presidentit të zgjedhur të Shteteve të Bashkuara, Donald Trump, se NATO-ja është “vjetruar”, ka shkaktuar “shqetësim” tek aleanca, tha ministri i Jashtëm i Gjermanisë, Frank-Walter Steinmeier.

Ai i bëri këto komente për gazetarët në Bruksel, në prag të takimit të ministrave të Jashtëm të BE-së.

“Po vi pas një bisede që pata me sekretarin e përgjithshëm të NATO-s, Jens Stoltenberg. Në NATO, sidomos, janë pritur me shqetësim deklaratat e bëra nga president i zgjedhur, Trump – deklarata e tij se NATO është vjetruar. Mbi të gjitha, kjo është në kundërshtim me deklaratat që ka bërë sekretari i nominuar i Mbrojtjes pak ditë më parë. Duhet të shohim se çfarë do të thotë kjo për strukturën politike amerikane”, tha Steinmeier.

Në seancën dëgjimore në Senat, i zgjedhuri i Trumpit për sekretar të Mbrojtjes, James Mattis, ka thënë se NATO është në qendër të mbrojtjes amerikane.

Ai po ashtu ka akuzuar presidentin rus, Vladimir Putin, se po bën përpjekje ta përçajë aleancën.

Në një intervistë për disa gazeta evropiane, Trump ka thënë se NATO është vjetruar sepse nuk e ka trajtuar terrorizmin.