VOAL

Shqipëri

Arben Frroku u arratis nga Shqipëria 10 ditë para dënimit me burgim të përjetshëm – nuk u regjistrua në kufi

I akuzuari për vrasjen e komisar Dritan Lamajt është i dënuar me burgim të përjetshëm në datën 29 qershor 2015, por Arben Frroku u arratis nga Shqipëria në datë 19 qershor 2015. Por këtë ditë ai u ndalua në kufirin mes Malit të Zi dhe Kroacisë, pasi rezultonte në kërkim në bazë të urdhër-arrestit të parë të lëshuar nga gjykata. Arben Frroku nuk ishte regjistruar as në dalje e as në hyrje të kufirit shqiptar.

Në datën 29 qershor 2015, Gjykata e Apelit për Krime të Rënda e dënoi Arben Frrokun me burgim të përjetshëm, por ai ishte larguar nga Shqipëria 10 ditë para se të dënohej. Në fakt, një gjë e tillë nuk do ishte marrë vesh nëse autoritetet malazeze nuk do ndalonin Frrokun në kufi me Kroacinë, pasi ndaj tij kishte një urdhër-arresti ndërkombëtar për akuzën e vrasjes. Ky urdhër edhe pse u rrëzua nga gjykata e shkallës së parë me dhënien e pafajësisë ndaj Frrokut, figuronte ende në sistem për shkak të mosrifreskimit të vendimit të gjykatës. Më datë 19 qershor autoritetet shqiptare njoftohen nga homologët e tyre malazezë se në kufi me Kroacinë ishte ndaluar shtetasi shqiptar Arben Frroku.

Sipas të dhënave të Interpolit rezultonte se ky shtetas ishte shpallur në kërkim për akuzën e vrasjes ndaj punonjësit të policisë me një masë sigurimi të caktuar nga Gjykata e Krimeve të Rënda në Tiranë. Pas marrjes së këtij informacioni, Interpol Tirana ka nisur verifikimet dhe pasi është njohur me urdhër-arrestin ndërkombëtar ka konstatuar se ai i përkiste muajit shkurt të vitit 2013, kohë në të cilën Arben Frroku u shpall në kërkim si autor i dyshuar i vrasjes së oficerit të policisë, Dritan Lamaj.

Pas verifikimit të informacionit, Interpol Tirana ka komunikuar me kolegët malazezë, të cilët pas verifikimeve kanë lënë të lirë Frrokun, që ishte në proces gjyqësor në Gjykatën e Apelit për Krime të Rënda. Nisur nga ky informacion, autoritetet shqiptare kanë kryer verifikime mbi kohën e daljes së të pandehurit nga territori i Republikës së Shqipërisë. Por nga verifikimet në sistemin TIMS nuk rezulton që Arben Frroku të ketë dalë nga Shqipëria.

Partia Demokratike akuzoi se Arben Frroku ka udhëhequr fushatën e Partisë Socialiste për zgjedhjet lokale të 2015 në rrethin e Pukës. Pavarësisht këtyre qëndrimeve, vendimi i Apelit është i formës së prerë dhe tani duhet të ekzekutohet nga policia, e cila tani e ka gjetur Arben Frrokun.

Provat që dënojnë përjetësisht Frrokun

Gjykata e Apelit për Krime të Rënda dënoi me burgim të përjetshëm biznesmenin Arben Frroku, i akuzuar për vrasjen e komisar Dritan Lamajt në shkurt të vitit 2013. Vendimi i Apelit vjen pas pafajësisë që Frroku mori në shkallën e parë me një vendim shumë të debatuar, i cili në thelb rrëzoi dy nga provat kryesore: dëshminë e dëshmitarit të mbrojtur dhe eksperimentin hetimor.

Por në argumentet e saj, Prokuroria e Apelit interpreton kuptimin e të gjitha provave në harmoni me njëra-tjetrën, që kanë bindur trupin gjykues të dënojë me burgim të përjetshëm Arben Frrokun. Për prokurorinë, vendimi i Gjykatës së Shkallës së Parë për Krime të Rënda duhet të ndryshohet përsa i përket deklarimit të pafajshëm të të pandehurit Arben Frroku, pasi ky vendim nuk është i arsyetuar drejt dhe vjen si rezultat i një analize dhe interpretimi të njëanshëm dhe me mungesë objektiviteti të provave, të cilat i janë nënshtruar shqyrtimit gjyqësor.

“Gjykata në mungesë të një transparence, jashtë seancës gjyqësore ka arritur në konkluzione, të cilat do të duhej të diskutoheshin gjatë debatit gjyqësor, mbi kërkesën e palëve apo dhe kryesisht, lidhur me këqyrjen e CD-ve që lidhen me pamjet e vendit të ngjarjes dhe rrugëve rreth saj. Gjithashtu, në këtë gjykim nga ana e gjykatës është refuzuar që të merren prova mbi kërkesën tonë, prova të cilat lidheshin me dëshmitarin e mbrojtur Arben Ndoka dhe që kishin të bënim mbi kërcënimet që i bëheshin familjes së tij, para dhënies së dëshmisë në gjykatë apo dhe me dekonspirimin e identiteteve të tij të bëra prezent nga i pandehuri në një intervistë televizive”, thotë prokuroria.

Sipas akuzës janë të paktën pesë arsye përse i pandehuri duhet të kthehet në qeli. “Së pari, identifikuam motivin i cili ka shërbyer për të pandehurin në kryerjen e vrasjes me armë të viktimës. Së dyti, provuam mekanizimin e kryerjes së kësaj vrasjeje, si numrin e personave, mjetet e përdorura, itinerarin e ndjekur prej tyre. Së treti, provuam praninë e të pandehurit në vendin e ngjarjes, e konkretisht në rolin e ekzekutorit.

Së katërti, rrëzuam alibinë e tij lidhur me qëllimin e vajtjes së tij të menjëhershme në Greqi natën e ngjarjes. Së pesti, provuam mundësinë e largimit nga vendi i ngjarjes pas krimit deri në momentin e kalimit të tij në pikën e kalimit kufitarë Kapshticë-Korçë”, argumenton prokuroria. Sipas akuzës, gjykata në pjesën arsyetuese të vendimit është ndalur kryesisht, duke zhvlerësuar provat e paraqitura nga prokuroria e duke marrë në konsideratë të çmuar, si dhe duke iu dhënë vlerë të paracaktuar provave të paraqitura nga ana mbrojtjes, të cilave nuk iu ka bërë të njëjtën analizë të hollësishme në kuptimin e vërtetësisë së tyre, pra duke përdorur një standard ndryshe.

Po ashtu sipas prokurorisë, gjykata ka refuzuar marrjen e një sërë provash të prokurorisë duke nisur nga kallëzimi i bërë nga familjarët e dëshmitarit të mbrojtur Arben Ndoka, të cilët janë kërcënuar me jetën e tyre para dhënies së dëshmisë së dëshmitarit të mbrojtur para Gjykatës së Shkallës së Parë për Krime të Rënda Tiranë. Sipas akuzës, gjykata ka refuzuar të marrë si provë edhe një CD-i me regjistrimin e një bisede telefonike që i pandehuri Arben Frroku ka zhvilluar nga dhomat e paraburgimit me një gazetar mbi identifikimin e dëshmitarit të mbrojtur, si dhe të dhëna të tjera që lidhen me njohjen midis tyre.

Arben Frroku fshihej në Holandë me dokumente greke, me identitet të rremë

Arben Frroku është arrestuar në Amsterdam, Holandë. Fillimisht ishte ish-kryeministri Sali Berisha ai i cili 3 ditë më parë tha se Frroku ishte arrestuar në Holandë, ndërsa sot Policia e Shtetit ka konfirmuar arrestimin e tij.

Ai ishte ndaluar para pak ditësh me dokumente greke, me identitetin e rremë Renato Xhepa. Autoritetet vendase dyshojnë se ky është pikërisht i kërkuari i drejtësisë shqiptare, për vrasjen e ish-Kryekomisarit Dritan Lamaj, në Shkurt të vitit 2012.

Ai është ndaluar në provincën Shiphol të Amsterdamit dhe është akuzuar për vënie në përdorim të dokumenteve dhe identiteteve të falsifikuara.

Pas deklaratës së Berishës, se Frroku ishte arrestuar në Holandë, Policia Shqiptare ka kërkuar informacion nga Zyra Qendrore Interpolit dhe Europolit për këtë çështje.

Fillimisht Zyra e Interpolit ka sjellë një përgjigje negative, ndërsa këtë të enjte, zyrtarisht është dhënë informacion për ndalimin e Renato Xhepa, i dyshuar se është Arben Frroku.

Nishani takim me Stoltenbergun

Presidenti shqiptar Bujar Nishani u takua sot në selinë e Natos në Bruksel me Sekretarin e Përgjithshëm të Aleancës Jens Stoltenberg, në kuadër të përgatitjeve të Takimit të Nivelit të Lartë të Varshavës korrikun e ardhshëm.

Sekretari Stoltenberg, vlerësoi “angazhimin e fortë në Nato” dhe kontributin e Shqipërisë në misionet dhe operacionet e saj, vecanërisht vazhdimin e përfshirjes së saj në misionet në Afganistan dhe në Kosovë. Zoti Stoltenberg çmoi “rolin e rëndësishëm – siç tha ai – në luftë kundër ISIS-it, dhe kontributin me pajime ushtarake dhe trajnime për forcat special në Irak”, si dhe faktin se Shqipëria ka rritur për këtë vit shpenzimet e saj për mbrojtjen.

Nga ana e tij presidenti Bujar Nishani deklaroi se “Shqipëria do të mbështesë çdo iniciativë dhe përpjekje të Aleancës për t’u modernizuar dhe përshtatur me ndryshimet e ambientit të sigurisë”. Kreu i Shtetit shqiptar ritheksoi “mbështetjen pa rezerva për vijimin e politikës së Dyerve të Hapura të NATO-s” duke konfirmuar “mbështetjen e Shqipërisë për pranimin e Malit të Zi dhe të Maqedonisë në Aleancë, në interesin më të mirë të forcimit të paqes dhe sigurisë në rajonin e Evropës Juglindore dhe të Ballkanit Perëndimor”, u shpreh zoti Nishani, i cili gjatë takimit me zotin Stoltenberg ka “inkurajuar dhe rritjen e nivelit të bashkëpunimit ndërmjet NATO-s dhe Kosovës, si një garanci e shtuar në dobi të paqes në rajon.

Mali i Zi ka marrë ftesën për t’u anëtarësuar në Nato, dhe Sekretari i Përgjithshëm Stoltenebrg deklaroi se “muajin e ardhshëm do të ndërmerret një hap i rëndësishëm me firmën e Protokollit të Anëtarësimit të Malit të Zi. Pasi të gjitha vendet anëtare ta kenë ratifikuar këtë protokoll, Mali i Zi, do të bëhet anëtari i 29 i Aleancës”, shpjegoi zoti Stoltenberg.

Koni e Kule: Nuk e njohim dhe nuk e dimë Shullazin

Për më shumë se dy orë, Rektori i sapo zgjedhur i Universitetit të Tiranës, Mynyr Koni dhe ish – Rektori Dhori Kule janë pyetur në Prokurorinë për Krimet e Rënda. Ata kanë deponuan në lidhje me kërcënimin që morën gjatë procesit zgjedhor për postin e rektorit.

Të dy akademikët janë paraqitur rreth orës 10:00 dhe janë marrë në pyetje nga dy oficerë të Policisë Gjyqësore.

Mësohet se, Kule ka thënë se është kërcënuar nga disa persona pranë Rektoratit. Por ka sqaruar se nuk i njihte këta individë dhe për këtë arsye nuk ka bërë kallëzim. Ai është shprehur se këta persona i kanë thënë se nuk duhet të mbështeste kandidaturën e Mynyr Konit, për postin e rektorit të ri.

Edhe profesor Koni mësohet të ketë mbajtur të njëjtin qëndrim, duke pranuar se është kërcënuar nga disa persona në rrugën “Fortuzi” pranë banesës së tij, por nuk ka mundur të njohë asnjë nga ata.

Burime nga grupi hetimor thonë se, të dy akadamikët nuk kanë identifikuar si kërcënues Emiljano Shullazin apo dy bashkëpunëtorët e tij, Gilmado Danin dhe Blerim Shullazin.

Për këtë çështje, Prokuroria po shqyrton edhe kamerat e sigurisë së disa bizneseve pranë vendeve ku kanë ndodhur kërcënimet.Tv Klan

Rrëzimi i helikopterit në Shkodër, mbyllet hetimi, dalin përfundimet

Mbyllet hetimi administrativ i urdhëruar nga Ministri i Mbrojtjes për rrëzimin e helikopterit të Forcës Ajrore me numër anësor 637 të tipit EC 145, të ndodhur në datën 6 prill 2016. Ministri i Mbrojtjes në përputhje me kompetencat që i njeh legjislacioni në fuqi, në datën 7 prill 2016 urdhëroi ngritjen e grupit të punës për hetimin administrativ me objekt: “Rrëzimi i Helikopterit EC-145” më datën 6 prill 2016 me afat përfundimtar të mbylljes së hetimit administrativ, datën 22 prill 2016.

Grupi i punës, gjatë procesit hetimor administrativ, mblodhi të gjitha provat shkresore dhe jo shkresore, dëgjoi dëshmitarët, palët e interesuara dhe në dijeni të ngjarjes, verifikoi në vend provat, në praninë e Prokurorisë të rrethit Shkodër këqyri vendin e ngjarjes, thirri, dëgjoi ekspertë të brendshëm dhe të huaj, si dhe krahasoi dhe analizoi provat e marra.

Në përfundim të këtij hetimi administrativ, grupi i punës doli në përfundimin se: planizimi, organizimi dhe drejtimi i fluturimit stërvitor të Helikopterit FA-637 në datën 6 prill 2016, është bërë në përputhje me aktet ligjore dhe nënligjore në fuqi, që rregullojnë veprimtarinë e Forcave të Armatosura.

Forca Ajrore, Baza Ajrore e Farkës dhe strukturat e tyre, kanë planizuar dhe drejtuar fluturime stërvitore në përputhje me rregullat e sigurimit të fluturimit ajror. Ekuipazhi i helikopterit ishte duke kryer një stërvitje fluturimi vizual në përputhje me planin stërvitor të Forcës Ajrore.

Ministria e Mbrojtjes falënderon Prokurorinë për bashkëpunimin dhe ndihmën e dhënë në këtë hetim administrativ si dhe institucione të tjera me të cilat kemi bashkëpunuar. Gjithashtu falënderon ekspertët amerikanë dhe Ambasadën e SHBA-ve në vendin tonë, për asistencën e ofruar prej tyre.

The Telegraph: Për në Siri Xhihadisti John kaloi nga Tirana dhe Korça

Terroristi më i tmerrshëm i Shtetit Islamik, Xhihadisti John, ka qëndruar në Shqipëri për dy javë. Gazeta britanike “The Telegraph”, duke cituar një tjetër terrorist që pretendon se ka bërë rrugën bashkë me Xhihadisti John për në Siri, shkruan se ata kanë qëndruar në Tiranë dhe kanë kaluar më pas nga Korça për të shkuar në Greqi.

Në rrëfimin e tij, terroristi tjetër tregon se kanë kaluar në aeroportin e Rinasit pa asnjë problem.

“Qëndrimi i “Xhihadistit John” në Shqipëri ka qenë transit pasi synimi ishte vijimi i rrugës drejt Sirisë, duke kaluar nëpërmjet Kosturit në Greqi dhe më pas ka marrë një autobus për në qytetin port të Selanikut. Nga aty është nisur me varkë për në Turqi, ku edhe ka takuar ndërmjetës të ISIS për të shkuar më pas në Siri. Xhihadisti ka arritur të udhëtojë nëpër Evropë me pasaportë britanike, duke vënë në lojë në një far mënyre shërbimet e sigurisë”, shkruan “The Telegraph”.

rruga

Pasi kishin qëndruar 2 javë në Tiranë, ata kishin udhëtuar në mënyrë ilegale deri në Kastoria, Greqi e më pas në Selanik dhe që andej, përmes një varke kishin mbërritur në Turqi.

Xhelati i Shtetit Islamik, emri i vërtetë i të cilit ishte Mohamed Emwazi, është vrarë në një sulm amerikan kundër xhihadistëve në Raka, në Siri, 13 nëntorin e shkuar sipas burimeve nga Britania dhe Pentagoni.

Ai ishte një nga njerëzit më të kërkuar në botë, që kur u shfaq për herë të parë në video në gusht 2014 për të njoftuar ekzekutimin me prerje të kokës të gazetarit amerikan James Foley.

Më pas vijuan video me vrasjen makabre të një tjetër gazetari amerikan, Steven Sotloff, e punonjësit amerikan Abdul-Rahman Kassig, e britanikëve David Haines e Alan Henning dhe të gazetarit japonez Kenji Goto./tvklan.al

TV Klan: Mashtrimi me vizat, arrestohet Luli Makashi dhe vajza e saj

Dy ditë pasi është shpallur në kërkim është arrestuar Luli Makashi, 51-vjeçarja që ka mashtruar qindra persona për viza pune dhe studimi në Kanada, Australi dhe Angli.

Në pranga ka përfunduar gjithashtu edhe vajza e saj, Adelia Makashi. Arrestimi i tyre është bërë në kohë rekord, falë bashkëpunimit mes dy policive asaj shqiptare dhe kanadeze. 51-vjeçarja dhe vajza e saj janë riatdhesuar në Shqipëri.

Luli Makashi bashkë me vajzën kanë mbërritur në Shqipëri mbrëmë rreth orës 23: 50 minuta ku janë zhvendosur rreth orës 00:40 minuta në Drejtorinë e Policisë Tiranë.

Ndalimi i tyre nga policia kanadeze është bërë vetëm me anë të një kërkesë (raporti) policor të Sektorit të Krimit Ekonomik dhe Interpol Tiranës.

Sipas një njoftimi zyrtar nga organi i akuzës, thuhet se grupi i hetimit u vu në lëvizje nga të paktën 26 kallëzime në Policinë e Tiranës, që akuzonin nënë e bijë për mashtrim, pasi nuk kishin përfituar vizën, megjithëse kishin kryer pagesa në shumë të mëdha, që varionin në mijëra dollarë. Ata thanë se kanë kryer edhe takime në hotele të ndryshme me persona të huaj, që u kishin premtuar vizat.

Prokuroria thotë se denoncuesit kanë rrëfyer se, në datën 26 Prill, ata janë paraqitur pranë zyrave të kompanisë “Ande LM” në rrugën “Ismail Qemali”, por drejtueset e saj ishin larguar jashtë shtetit.

Në krye të kompanisë ishte vënë Klevis Rreshka, i cili kishte blerë pikërisht një ditë më parë rreth orës 18.00 kompaninë “Ande LM”, për vetëm 1 euro. Ai ka pranuar përpara prokurorëve se Lutfije Makashi dhe vajza e saj kishin treguar për problemet me klientët e tyre. Prokuroria tha se ka sekuestruar dokumente të shumtë në zyrat e kompanisë dhe se vijon hetimet për akuzën penale të mashtrimit. /tvklan.al

Papa Françesku autorizoi botimin e dekretit që shpall 38 martirët, viktima të komunizmit në Shqipëri

Ditë e shënuar, kjo e 27 prillit 2016, për Kishën dhe për mbarë popullin. 38 martirët e parë shqiptarë, vrarë gjatë komunizmit, ndërmjet viteve 1945-1974, për të cilët prej vitesh ishte hapur çështja e kanonizimit kishtar, tani njihen nga Papa dhe Selia e Shenjtë të Lum, martirë për shkak të fesë në Krishtin. Kjo do të thotë se pas procesit kanonik në nivelin dioqezan për vërtetimin e martirizimit të tyre, përfundoi edhe procesi pranë Kongregatës së Selisë së Shenjtë për Çështjet e Shenjtorëve, në Vatikan.

Vërtet, dje, më 26 prill, pikërisht në festën e Zojës së Këshillit të Mirë, Pajtores Qiellore të mbarë popullit shqiptar, e njohur edhe si Zoja e Shkodrës, Papa Françesku u takua me Prefektin e Kongregatës së Vatikanit për Çështjet e Shenjtorëve, kardinalin Angelo Amato, të cilin e autorizoi të botojë dekretet, që kanë të bëjnë me njohjen e një sërë mrekullish, virtytesh heroike dhe martirizimi. Ndër ta, njihet

– martirizimi i Shërbëtorëve të Zotit, Vinçenc Prennushi, i Urdhrit të Fretërve të Vegjël, kryeipeshkëv i Durrësit, dhe i 37 shokëve të tij, vrarë ndërmjet 1945-ës dhe 1974-ës.

Festa e Zojës do të marrë edhe domethënie të tjera për Shqipërinë, popullin e Kishën shqiptare. E pikërisht në solemnitetin e Nënës së Zotit, Nënës së Këshillit të Mirë, janë shqyrtuar dokumentet e dëshmitë, që i dhuruan popullit e Kishës shqiptare martirët e parë, të periudhës së regjimit komunist 1945-1974-ë, të cilët i nderonte si të tillë që më parë.

Së bashku me ta, Ati i Shenjtë Bergoglio autorizoi publikimin e dekreteve edhe për dy mrekulli, katër martirizime të tjera dhe 8 virtyte heroike, që u njihen njerëzve të denjë për t’u konsideruar ndjekës të vërtetë të Krishtit e dëshmitarë të Tij në këtë botë. Së bashku me martirët shqiptarë hyjnë në plejadën e shenjtorëve e të Lumëve, pranë Hyjit të Gjithëpushtetshëm./RV

Milena Harito, ministrja me llogari bankare dhe prona në Francë

Ministrja e Inovacionit Milena Harito ka prona të paluajtshme në Francë. Sipas deklaratës së saj të pasurisë depozituar në ILDKPKI, Harito ka familjen në Francë dhe jeton aty prej 20 vitesh.

Paga e ministres Harito është 1.6 milionë Lekë të reja në vit, ndërsa bashkëshorti i saj që jeton dhe punon në Francë fiton 116.530 Euro si nëpunës i ‘Agricole Paris’.

Harito dhe bashkëshorti i saj deklarojnë llogari bankare 23 mijë Euro, por edhe të ardhurat që marrin nga qira nga një shtëpi dhe studio në Francë, prej 12 mijë Eurosh.

Në deklarimin e saj, ministrja e Inovacionit Milena Harito disponon shtëpi në Francë 210 metër katrorë, e cila ka kushtuar 905 mijë Euro, ndërsa kanë ende për të paguar dy kredi në Francë, vlera e të cilave shkon në 333 mijë Euro.

Shumë shpejt edhe Shqipëria shihet në “Street View”

Prej 29 Prillit, Google do të nisë udhëtimin nëpër Shqipëri për fotografimin e rrugëve, me qëllim përmirësimin e shërbimit “Street View”, (Pamje e rrugëve), një hartë e kompanisë që mundëson eksplorimin e çdo vendi nga kompjuteri.

Lajmi është bërë i ditur nga vetë drejtuesit e Google me anë të një deklarate për shtyp.

“Duke nisur nga 29 Prilli, Google do të nisë udhëtimin për fotografimin 360° të qyteteve më të mëdha të Shqipërisë, si Tirana, Durrësi, Saranda dhe disa prej zonave turistike dhe historike në vend”.

“Street View” u prezantua në 2007 -ën dhe ofrohet në 76 shtete të ndryshme të botës.

Puna për fotografimin e rrugëve të Shqipërisë do të nisë nga Tirana dhe do të vijojë nëpër qytete të tjera. Shërbimi do të jetë i përdorshëm disa muaj pas këtij procesi. /tvklan.al

Mashtruan qytetarët për në Kanada kundrejt 20 mijë euro, 1 në pranga, 2 në kërkim

VOAL – Një 25-vjeçar është arrestuar nga policia e Tiranës, ndërsa dy persona të tjerë janë shpallur në kërkim. Në pranga ka përfunduar Klevis Rreshka, ndërsa janë shpallur në kërkim Lule Makashi 52 vjeç dhe Adeila Makashi 28 vjeç.

Nga hetimet ka rezultuar se këta tre persona mashtronin qytetarët me dokumente false duke u premtuar punësim dhe studim në Kanada.

Në grackën e mashtrimit kanë rënë rreth 30 persona, ndërsa “letrat” kushtonin nga 18-20 mijë euro. Lule Makashi është gruaja e ish drejtorit të policisë së Durrësit, Edmond Makashi. që i dha fund jetës përmes vetëvrasjes. /tvklan.al

Kjo është pasuria që deklarojnë Edi dhe Lindita Rama

Zbardhet deklarimi i pasurisë së Kryeministrit Edi Rama dhe familjes së tij për vitin 2015.

Sipas të dhënave të publikuara nga “Open Data Albania”, mësohet se vila e Kryeministrit Rama në fshatin e Surrelit, në komunën Dajt është deklaruar me një vlerë prej 39,607,741 lekësh ose rreth 395 mijë dollarë.

“Bashkëpronar me 50%, e ku 50% të tjera pjesë e regjimit martesor me bashkëshorten Lindita Rama, shtëpi banimi me sipërfaqe të padeklaruar, përcaktuar një kat, me vlerë ndërtimi 39,607,741 lekë, vendndodhja e shtëpisë në fshatin Surrel, komuna Dajt, pasuri që justifikohet me dokument leje ndërtimi, momenti i deklarimit pa titull pronësie”, thuhet në deklaratën e pasurisë së Kryeministrit Rama, raporton “Panorama”.

Ndërkohë që në kategorinë e detyrimeve të papaguara thuhet se kreu i qeverisë ka si “detyrim të papaguar ndaj subjektit ndërtues të ‘shtëpisë së banimit në Surrel’, me vlerë – 12 056 241 lekë, detyrim si pjesë e regjimit martesor 50 me 50 me bashkëshorten”.

Apartamente

Gjithashtu, në deklaratën e vitit 2015 Kryeministri është regjistruar si pronar i dy apartamenteve të Tiranë, një banesë e privatizuar dhe e rivlerësuar në vitin 2012 me vlerë 5,422,100 lekë, me sipërfaqe 59 m². Po ashtu, pronar i një studioje artisti me sipërfaqe 65 m², në Tiranë, e trashëguar nga babai, me vlerë 2,500,000 lekë të rinj.

Në kategorinë e pasurive të paluajtshme, bashkëshortja e Kryeministrit, Lindita Rama, ka deklaruar blerjen e një apartamenti në të cilin figuron pronare 100% në Tiranë, banesë me sipërfaqe 146.15 m2 + verandë 68 m2 + garazh 17 m2, blerë me pjesë në 2009-n dhe 2015-n. Në listën e pasurive të paluajtshme Lindita Rama rezulton pronare e truallit të blerë në Surrel, me sipërfaqe 4 483 m2.

Pikturat

Për herë të parë, Kryeministri Rama ka deklaruar edhe fitimin që ka marrë nga shitja e pikturave, edhe pse në deklaratën zyrtare nuk i ka ndarë veçmas të ardhurat e fituara nga libri “Kurban” me një vlerë prej 26 mijë dollarësh.

“Të ardhura nga krijimtaria artistike: shitje e librit ‘Kurban’, shitje punë artistike vlera neto me detyrime tatimore të zbritura 2,694,009 (dy milionë e gjashtëqind e nëntëdhjetë e katër mijë e nëntë) lekë”, thuhet në deklaratën e kreut të qeverisë.

Në deklaratën e pasurisë së Kryeministrit është shtuar dhe djali, Gregori, se ka fituar nga shitja e veprave të artit. Në deklaratën e vitit 2015 thuhet se Gregor Rama ka ftuar 3400 euro nga shitja e pikturave. Ndërkohë që Gregori ka pakësuar llogarinë bankare me minus 197,626 lekë.

Lindita Rama

Bashkëshortja e Kryeministrit, Lindita Rama, ka shtuar në llogaritë e saj personale gjatë vitit 2015 një shumë prej 3,004,470 lekësh të rinj. Ajo ka deklaruar nga paga e saj si eksperte shumën prej 1,929,676 lekësh.

Ndërsa 1,936,237 lekë janë shtuar si të ardhura nga qiraja e apartamentit në pronësi të saj. Në deklaratën e vitit 2015, thuhet se Lindita Rama ka dhënë hua një shumë prej 70 mijë eurosh pa interes, e përcaktuar me datën e huadhënies. Në kategorinë e likuiditeteve dhe kategorive kesh, thuhet se:

“Bashkëshortja Lindita Rama zotëron gjendje llogari bankare më 10.09.2013 në vlerën 6 206 644.3 lekë, deklarohet 100% pjesëtare”.

Në deklaratën e pasurisë thuhet se çifti kryeministror nuk zotërojnë automjete, ndërkohë që thuhet se: “kanë paguar bashkërisht me zonjën Rama, gjatë 2015¬s, detyrimin në vlerën 7 099 (shtatë mijë e nëntëdhjetë e nëntë) euro për kredinë e marrë në një bankë të nivelit të dytë, aktivizuar kredia më 22.10.2013 me vlerë 80 000 euro, afat shlyerjeje 10 vjet. Shuma e mbetur pa paguar pas datës 31 dhjetor 2015 është 64 923 EU”.

Vrau më 2000, ekstradohet nga Greqia

Një i shpallur në kërkim për vrasje është ekstraduar nga Greqia drejt vendit tonë.

Viktor Ymeraj 33 – vjeç banues në fshatin Fratar, Mallakastër akuzohet pasi në Mars të vitit 2000, në fshatin Fratar, Mallakastër, ka vrarë me armë zjarri shtetasin K.K si dhe ka plagosur shtetasin me iniciale M.S.

Gjykata e Fierit e kishte dënuar me 25 vjet burg për veprat penale “vrasje me dashje”, “vrasje me paramendim” e mbetur në tentativë dhe “prodhimi dhe mbajtja pa leje e armëve luftarake dhe e municionit.”

33 – vjeçari është kapur nga Interpol Tirana në bashkëpunim me Interpol Athina pas marrjes së informacioneve që dispononte Sektori për Krimet e Rënda në Policinë e Fierit, të cilët bënë të mundur lokalizimin, kapjen dhe ekstradimin e këtij shtetasi nga shteti grek./tvklan.al

I dënuar me 10 vjet burg, ekstradohet nga Bullgaria

Një 23-vjeçar është ekstraduar nga Bullgaria drejt Tiranës. Interpol Tirana ka bërë të mundur ekstradimin e Islam Xhetanit nga Burreli.

I riu ishte shpallur në kërkim ndërkombëtar pasi Gjykata e Rrethit Gjyqësor Mat në vitin 2013 e ka dënuar me 10 vjet burg.

Xhetani është gjetur fajtor për tentativë vrasjeje e kryer në bashkëpunim si dhe armëmbajtje pa leje. /tvklan.al

The Times: Rama – ministrit Britanik: Absurde të tërheqësh Shqipërinë në betejën për “Brexit”

Fushata kundër daljes së Britanisë nga Bashkimi Europian prej ditësh ka nisur duke marrë si shembull Shqipërinë, për të cilët britanikët pretendojnë se do bëhen si vendi ynë, nëse dalin nga Unioni. Pak ditë më parë, Sekretari britanik i Drejtësisë, Michael Gove me ironi krahasonte Britaninë jashtë BE-së, si Shqipërinë. Por kësaj deklarate i ka kthyer përgjigje kryeministri Edi Rama në një shkrim në revistën “The Times”, ku mes të tjerash thekson se “vendi i tij nuk duhet të shërbejë si model për jetën jashtë BE”.

Shkrimi i plotë i Edi Ramës:

Ndoshta duhet të kënaqemi me faktin që Shqipëria e vogël është vënë në qendër të debatit europian të Britanisë. Por, kur lexova titullin e artikullit të Michael Gove që sugjeronte se Britania mund të braktiste partneritetin e saj me Gjermaninë, Francën dhe vendet e tjera të Europës e ta zëvendësonte atë me një partneritet jashtë BE-së me Shqipërinë, Kosovën, Serbinë dhe Bosnjë-Hercegovinën, reagimi im i menjëhershëm ishte: “duket pak e çuditshme”.

Unë jam një shqiptar dhe një ballkanas krenar, por nuk mund të pretendoj se kemi fuqinë politike dhe ekonomike për të qenë rivalë të BE-së, që ka ndihmuar me vendosjen e paqes dhe sjelljen e begatisë në shumë vende, prej shumë kohësh tanimë. Nuk mund ta rivalizojmë këtë bllok me këtë treg të vetëm, që është një nga organizimet më mbresëlënëse tregtare në botë, jo vetëm tani, por përgjatë gjithë periudhave të historisë së njerëzimit.

Kështu që, dëshiroj të falënderoj zotin Gove për dozën e mirë të publicitetit, që përkon me hapjen e fushatës turistike para verës për të tërhequr pushuesit britanikë në qytetet tona historike dhe plazhet e bukura. E ndërkohë që ne ftojmë investitorë të vijnë dhe të eksplorojnë mundësitë e mëdha që vendi ynë ofron për investime, britanikët që do të vijnë në Shqipëri, do të kenë mundësi të ndjekin bashkë me shqiptarët fatin e ekipit tonë kombëtar që merr pjesë për herë të parë në një kampionat madhor, finalet e Kampionatit Europian në Francë. Është vërtetë kohë e bukur për të qenë shqiptar.

Por, nuk jam i sigurt nëse krijimi i kësaj BBC-je (British-Balkan Confederation), Konfederate Britaniko-Ballkanike të re do t’i vinte për shtat nevojave tona dhe të Britanisë së shekullit XXI, apo nëse do të ishte e drejtë që Britania të hidhte sytë nga Shqipëria si model i marrëdhënieve me BE-në. Në fakt, jam i bindur që do të ishte e gabuar nëse Britania do të vepronte kështu.

Ka diçka tejet të çuditshme në komentet e zotit Gove, të cilat vijnë ndërkohë që në Shqipëri qeveria dhe opozita punojnë bashkërisht për reformën historike në drejtësi, që na përafron me sistemin e BE-së që e admirojmë kaq shumë. Ndërkohë që ai dhe britanikë të tjerë i hedhin sytë jashtë kufijve të BE-së, ne të tjerët jashtë saj duam të anëtarësohemi një orë e më parë, sepse i dimë përfitimet e mëdha të të qenurit pjesë.

Në këto kushte, edhe më e çuditshme është se zoti Gove e sheh Shqipërinë si model për sistemin ekonomik britanik pas largimit të saj nga Bashkimi. Dhe akoma më e çuditshme është që ai dëshiron të largohet vullnetarisht nga një bashkim që i ka dhënë aq shumë Britanisë.

Më lejoni të shpjegoj përse mendoj kështu. Edhe pa Shqipërinë si anëtare të BE-së, Bashkimi ka ndikim pozitiv në vendin tim dhe në të gjitha vendet që zoti Gove ka veçuar si aleatë të mundshëm jashtë BE-së për Britaninë pas daljes nga Bashkimi.

Jo vetëm që BE-ja ka ideale dhe vlera që edhe ne aspirojmë t’i kemi, por aspirata për anëtarësim në BE e të gjithë rajonit e ka bërë të pamundurën të mundur. Për shkak të këtyre aspiratave ne kemi ndryshuar historinë tonë të gjatë të luftërave dhe konflikteve të përgjakura e kemi hyrë në një epokë të re paqeje dhe bashkëpunimi. Është për shkak të këtyre aspiratave për t’u bërë anëtarë të BE-së, që unë shkova në Beograd në vitin 2014, në vizitën e parë të një kryeministri shqiptar në këtë vend në gjashtëdhjetë e tetë vjet. Dhe ishte po e njëjta aspiratë që e solli Kryeministrin Aleksandar Vuçiç në Tiranë, në atë që ishte vizita e parë e një kryeministri serb në Shqipëri.

Ne duam të ecim përpara dhe po punojmë për anëtarësim pa patur asnjë nga të mirat që kanë vendet anëtare të BE. Të mira që Britania do t’i humbiste, nëse del nga ky Bashkim. Dhe bëhet fjalë për përfitime shumë të rëndësishme, si për shembull shërbimet e ofruara nga tregu europian në të cilat ne kemi akses të kufizuar, ndërsa nuk kemi mundësinë e shërbimeve financiare. Një ndër to, bankat tona nuk operojnë dot në BE ashtu si bankat britanike dhe bankat me qendër në Britani.

Lehtësi tjetër shumë e madhe është bashkimi doganor. Për ne që nuk jemi pjesë e tij kjo përkthehet në burokraci e kosto të shtuara për bizneset eksportuese të mallrave të origjinës. Nga ana tjetër, duke krijuar një lehtësi të ngjashme me anëtarët e saj, BE na heq tarifat dhe detyrime doganore të mallrave industriale, por na kufizon në një pikë shumë të fortë, në prodhimin vendas. Një seri prodhimesh bujqësore e blegtorale, veçanërisht mishi, janë ndër më të mirët në botë, por tarifat e vendit të favorizuar për shumë prodhime bujqësore dhe kuotat për shumë produkte të peshkimit na kufizojnë eksportin drejt BE-së.

Natyrshëm, kjo nuk ndodh me vendet anëtare. Vende të cilat kanë përfitime të rëndësishme dhe nga marrëveshjet e tregtisë së jashtme. Me Korenë e Jugut, për shembull, BE ka marrëveshje shumë të mira për të dyja palët. Shqipëria, vend joanëtar, nuk përfiton nga ky sistem marrëveshjesh. Britania, në marrëdhënie tregtare me vendet e Ballkanit, por jashtë Europës, nuk do të kishte asnjë prej këtyre përfitimeve. Kurse brenda Bashkimit Europian, Britania dhe Ballkani mund të kenë edhe bashkëpunimin e ngushtë, edhe këto avantazhe.

Si një vend që aspiron të anëtarësohet në Bashkimin Europian, na duhet të implementojmë të gjithë rregullat e BE, por në ndërkohë pa patur asnjë zë në kapitull kur këto rregulla krijohen dhe votohen. Si një vend ende jo anëtar i BE-së, na duhet të përafrojmë legjislacionin në një sërë fushash si konkurrenca, pronësia intelektuale, industriale e tregtare, prokurimi publik, standardet dhe certifikimi, transporti detar, shoqëritë tregtare, mbrojtja e konsumatorit, mbrojtja e të dhënave, shëndeti dhe siguria në punë. Lista është edhe më e gjatë se kjo.

Dhe Shqipëria është e gatshme t’i pranojë të gjitha këto vështirësi dhe pengesa, pasi ne besojmë se në partneritet me Bashkimin Europian, dhe vendeve kryesore të BE si Britania, ne mund të zhvillojmë vendin tonë dhe të përmirësojmë të ardhmen e qytetarëve tanë. Falë reformave të mbështetura nga Bashkimi Europian, vendet e Ballkanit nuk janë duke përjetuar thjesht dhe vetëm marrëdhënie diplomatike më të mira mes tyre, por çka më e rëndësishmja, janë duke përmirësuar standardet e jetesës për qytetarët dhe brezin e ri. Dhe ne shpresojmë se ky trend pozitiv do të vazhdojë.

Së fundi, duhet të dini se janë dashur plot gjashtë vjet negociata që Shqipëria të arrinte stadin aktual të marrëdhënieve tregtare me Bashkimin Europian. Natyrshëm Britania do ta niste procesin nga një tjetër pikë krahasuar me Shqipërinë, nëse do të dilte nga BE. Por, duke folur nga pozicioni i dikujt që ka negociuar me Bashkimin Europian nga jashtë, mund t’ju them se ky proces negociatash mes Britanisë dhe BE-së mund të zvarritet lehtësisht për shumë kohë. Edhe pse zoti Gove pretendon se kjo çështje do të zgjidhet lehtësisht brenda dy vitesh, unë besoj se ky parashikim nuk është aspak realist.

Jam i bindur se vendi im ka përpara një të ardhme frymëzuese për shkak të nismave që po ndërmarrim me mbështetjen dhe nxitjen e Bashkimit Europian. Në këtë rrugëtim tonin, mbështetja e Mbretërisë së Bashkuar, ka qenë e mirëpritur dhe ndihmesë thelbësore në zbatimin e reformave, më e rëndësishmja ajo në drejtësi ku ne kemi përfituar nga bashkëpunimi me shumë ekspertë britanikë. Por nga ana tjetër, nuk mund të jem veçse i habitur që Britania të shohë si model bashkëpunimi me Bashkimin Europian marrëdhënien e sotme mes Shqipërisë dhe BE. Nëse ne që e kemi provuar duam ta ndryshojmë këtë model dhe të anëtarësohemi në BE, përse ju doni të dilni jashtë Bashkimit?

Sigurisht që në fund të fundit gjykimi mbetet i juaji. Do të jenë britanikët ata që do të zgjedhin për të qëndruar pjesë e Bashkimit Europian, apo për të dalë nga ky Bashkim. Por ky vendim sigurisht që do të ketë një impakt më të gjerë se vetëm Britania e Bashkuar. Si një mik dhe dashamirës i Britanisë, unë shpresoj sinqerisht se ju do të votoni për të qëndruar pjesë e Bashkimit Europian.

Nuk ka dhe as nuk mund të ketë një konfederatë Britaniko – Ballkanike jashtë Bashkimit Europian. Për aq kohë sa ne duam t’i tejkalojmë marrëdhëniet aktuale mes Shqipërisë dhe Bashkimit Europian e të bëhemi vend anëtar i BE, modeli ynë i tanishëm nuk mund të jetë modeli që synon Britania.

Jam plotësisht i bindur se qëndrimi i Britanisë në Bashkimin Europian është gjëja më e mirë për Europën, por edhe për Shqipërinë. E ndërkohë jam po aq i bindur se ky vendim do të ishte më i miri edhe për Britaninë dhe miliona njerëzit e tjerë në Europë e më gjerë, që sot i bëjnë thirrje popullit britanik: ju lutem mos u largoni

Reagon aktorja: Une jam Ema Andrea!! Une jam djersa ime!

VOAL – Në një postim të sotëm aktorja Ema Andrea, e cila ndodhet këto ditë në qendër të sulmeve politike nga media të ndryshme, reagon me një shënim të cilin e shoqëron edhe me një foto të saj, ku dikush po përpiqet të mos e lejojë të flasë.

Ja postimi:

Une jam Ema Andrea!!

Une jam djersa ime!

Une jam mendje,trup dhe shpirt unik si cdo femer,nènè,grua apo bije!

Kaq kisha per momentin!!

Shkëlzen Berisha ia përmend marijuanën Andreas dhe e quan kurtizane

Edhe pse nuk ja ka përmendur emrin, duke u treguar i kujdeshëm për të shmangur ndonjë telash gjyqësor, kuptohet qartë që Shkëlzen Berisha e ka patur për aktoren Ema Andrea postimin e tij më të fundit në Facebook.

Gjithçka nisi, pasi Andrea sulmoi ashpër Sali Berishën për thirrjen e ëktij të fundit ndaj popullit, që të armatoset kundër qeverisë.

Ajo iu drejtua ish-kryeministrit duke i thënë se duhej të kishte turp.

Mirëpo deklaratat e saj nuk i ka kapërdirë Shkëlzen Berisha, i cili prej dy ditësh debaton inderekt me aktoren nëpër rrjetetet sociale.

“Paralelisht me nr e viktimave rritet dhe nr i fanseve te Shullazit. Vajzat anonime qe kerkonin lirimin e heroit te Rilindjes tashme kane nje cheerleader. Drejtimin e klubit e ka marre ne dore nje ikone nderkombetare e antifashizmit dhe artit,” shkroi Shkëlzen Berisha në FB dje.

Andreai iu përgjigj sot, ku ndër të tjera i thoshte: “Per ata qe duan te behen te famshem duke perdorur emrin tim!! Zotni, mos fyej fjalen e lire dhe mos u perpiq te perdoresh emrin tim as per pislleqet politike e as per per delire!! Une kam thene dhe do ta them ate qe mendoj e jam perpjekur te mos fyej babain e askujt!! Nuk i perkas asnje lloj tifozerie e as partie (edhe pse eshte e njejta gje per juve)! Kam jetuar dhune ne kete vend aq sa te jem kunder cdo thirrjeje per dhune e arme, pavaresisht se kush i ben!!”.

Por debati ka kulmuar me vargjet e sotme me të cilat replikoi Shkëlzen Berisha ndaj Ema Andreas.

“E mbushi oborrin

Që të dëfrejë mbretin

Me lolo e gaztorë

Që gajasin miletin”, shkruante ai.

Berisha vijonte më tej duke shtuar: “Homazh per artistë me famë, kurtizanë të rilindjes”.

“P.S paqja qofte me ty dhe te fala dyfleteshit”, e mbyllte ai komentin, duke aluduar për përdorimin e mundshëm të marijuanës nga ana e aktores.

Shkelzen

Dokument: Ja si e ndiqte Sigurimi ambasadorin amerikan në Tiranë – Nga Kastriot Dervishi

Ambasadori i parë amerikan në Shqipëri i periudhës së demokracisë, Uilliam Rajërson, në intervistën e para dy ditëve pohoi ndjekjen që i bënte ditët e para Sigurimi i Shtetit. Ai është parë prej Sigurimit si përfaqësues i “imperializmit amerikan”, si “armik”, por edhe si “kuadër zbulues”. Kjo ndjekje, nga e cila është dokumentuar ajo e periudhës prill-qershor 1991 përfshinte lëvizjet e tij si dhe përgjimet telefonike. Këtë informacion ai e ka bazuar në një publikim që kam bërë para disa vitesh. Kur e kam lexuar për herë të parë jam habitur.

Disa dokumente mbanin shënime të llojit “të asgjësohet”, gjë që na jep të kuptojmë një shpëtim të rastësishëm dhe se fare pak prej këtyre dokumenteve kanë mbërritur në ditët tona. Përgjimi i z.Rajërson më është dukur një veprim i pabesë, tipik komunist i frymëzuar nga tradita komuniste dhe nga lidhjet lindore ruso-serbe. Dokumentet përkojnë me fazën e fundit të aktivitetit të Sigurimit të Shtetit, një institucion i degraduar, thellësisht politik dhe pa parime kombëtare, i cili i shihte amerikanët me syrin e Partisë së Punës që shquhej për retorikën e saj antiamerikane. Z.Rajërson ishte i drejtpërdrejtë në atë kohë me qëndrimin që duhej mbajtur ndaj komunizmit, kësaj të keqe të madhe që i shkaktoi pasoja të rënda Shqipërisë. Kështu që nuk kishin asnjë vlerë gjurmimet e Sigurimit.

Çdo shtet ka platforma në lidhje me veprimet agjenturore-operative që ndërmerr, me objektet e punës, etj. Por në radhë të parë nga këto veprime përjashtohen shtetet aleate, këtë rast sigurisht shteti nr.1 ishte SHBA. Shtetet e Bashkuara të Amerikës janë miku dhe aleati më i madh i kombit dhe shtetit shqiptar. Dokumentet në fjalë tregojnë se komunistët nuk e cilësonin vend aleat Amerikën në vitin 1991, pavarësisht se ishte një kohë kur ishte pranuar pluralizmi politik.

Në analizën e fakteve historike për mua si studiues i fushës së historisë tre janë ngjarjet më të mëdha të kësaj kohe: nisja e procesit të destalinizimit të Shqipërisë, dalja nga ndikimi ruso-serb si dhe futja e saj nën ndikimin amerikan e Atlantik.

Bashkëlidhur dokumente në të cilat përshkruhen aktivitete të zakonshme ditore të z.Rajërson në atë kohë.

PD-ja vetëdënohet me 10 ditë jashtë Kuvendit

Demokratët do të bojkotojnë për 10 – ditë punimet e kuvendit në shenjë proteste ndaj vendimit që mori byroja për të përjashtuar nga parlamenti ish – Kryeministrin Berisha për të njëjtën periudhë kohore, pas thirrjes së këtij të fundit për armatosje të popullatës përmes një ligji të ngjashëm si ai në Shtetet e Bashkuara. Pas mbledhjes jashtë rradhe të grupit parlamentar, kryetari i Partisë Demokratike, Lulzim Basha e cilësoi hakmarrje të kryeministrit pas denoncimeve që ish kreu i qeverisë Berisha i bëri lidhjeve të Ramës me Shullazin.

Basha akuzoi kryeministrin se po bën avokatin e Shullazit dhe se ky qëndrim i tij po frikëson disa nga dëshmitarët.

Basha paralajmëroi se Partia Demokratike do bëjë gjithçka, në rrugë institucionale, që kjo pikë kthese e shënuar nga prokurorët të shndërrohet në aktin e parë të Reformës në Drejtësi dhe se do të dëshmojë arsyet dy vjeçare të bllokimit të këtij procesi nga ana e Kryeministrit Rama.

Gjykata e Lartë mbyll ’21 Janarin’, hedh poshtë rekursin e Prokurorisë

Gjykata e Lartë ka rrëzuar rekursin e Prokurorisë për dosjen e “21 Janarit”. Togat e zeza e kanë zgjidhur çështjen me mospranim kërkesën, duke lënë në fuqi vendimin e gjykatës së Apelit të Tiranës.

Kjo gjykatë në shtator të 2013 dënoi me e vendim të formës së prerë me 1 vit burg, ish-kreun e Gardës Ndrea Prendi dhe 3 vite burg Agim Llupon ,ish-gardist.

Rekursi i Prokurorisë kishte rreth 3 vite që ishte bërë dhe Kolegji Penal i përbërë gjyqtarët Edmond Islamaj, Artan Zeneli, Aleksandër Muskaj, Guxim Zenelaj dhe Shkëlzen Selim la në fuqi vendimin e Apelit.

Me këtë vendim mbyllet një ndër proceset më të debatuar në Shqipëri.

Prokuroria e Tiranës pas protestës së opozitës së atëhershme ngriti akuzën e vrasjes me dashje për dy të pandehurit. U kërkua dënimi me 23 vite për Prendin dhe 25 për Llupon . Gjykata e Tiranës i shpalli fajtor ata, por duke ndryshuar akuzën në vrasje nga pakujdesia. Në përfundim shkalla e parë dënoi me një vit burg ish-drejtuesin e gardës dhe 3 vite Agim Llupon.

Por ata u lanë të lirë pasi periudha e dënimin ishin shlyer nga qëndrimi në ambientet e paraburgimit. Këta dy persona akuzoheshin për vrasjen e Ziver Veizit, Hekuran Dedës dhe Faik Myrtajt. Ndërsa për të vrarin e katërt të “21 Janarit” ende nuk ka një autor dhe vazhdojnë hetimet.

Tv Klan

Zyrtare: Iu shitet kinezëve Aeroporti i Rinasit

Kompania kineze “China Everbright Limited” (CEL) ka njoftuar zyrtarisht blerjen e Aeroportit Ndërkombëtar Nënë Tereza. Sipas njoftimit zyrtar, janë dy kompani pjesë të “China Everbright”, “Keen Dynamics Limited” (KDL) së bashku me “Friedmann Pacific Assets Management Limited”, që fokusohet në investimet globale në aeroporte, ka nënshkruar marrëveshjen me koncesionarin dhe operatorin e Aeroportit të Rinasit.

KDL pritet që ta marrë koncesionin e TIA deri në vitin 2025, me dy vite zgjatje të afatit, në varësi të aprovimit të qeverisë shqiptare.

Kompania kineze, me bazë në Hong Kong, vlerëson se Aeroporti Ndërkombëtar i Tiranës është një ndër aeroportet në rritje në Europë.

Sipas saj, numri i pasagjerëve është rritur nga 600 mijë që ishte në 2005 – ën, në 2 milionë në 2015 – ën. Kjo për drejtuesit e “China Everbright Limited” është një tregues i rritjes së shpejtë ekonomike të Shqipërisë.

Chen Shuang, drejtuesi ekzekutiv i kompanisë kineze tha: “CEL është në proces investimi në infrastrukturës jashtë vendit dhe blerja e Aeroportit Ndërkombëtar të Tiranës është hapi i parë. Me përmbylljen e marrëveshjes, KDL do të marrë totalisht në dorë TIA – an”. /tvklan.al

Pit Bullët lëvizin lirshëm në kryeqytet, asnjë i pajisur me maskë

Kafshimi që i bëri një qen i rracës Pit Bull një gruaje, bëri që një i afërm i saj të marrë automatikun dhe të qëllojë me breshëri mbi të, në rrugën “Sitki Çiço”, në Tiranë. Nga plumbat u plagos 19 – vjeçari Vehbi Rrijolli. Autori është Denis Lala. Dëshmitarë thonë se qeni lëvizte lirshëm nëpër lagje dhe banorët i frikësoheshin.

Të tillë qen të rrezikshëm, lëvizin po ashtu lirisht nëpër parqe, sheshe e rrugë të Tiranës. Disa janë ndër racat më të rrezikshme, që nëpër vende të ndryshme të botës, nuk lejohet të lëvizin pa maska. Në Shqipëri i gjen kudo nëpër ambiente publike, pa asnjë masë mbrojtëse. Edhe në zona ku ka tabela detyruese që qentë të mbajnë maska, ky rregull nuk respektohet. Madje shkelet edhe në prani të policisë.

Kafshimet nga qentë janë bërë të zakonshme edhe për mjekët. Vetëm në Shërbimin Infektiv në QSUT paraqiten mesatarisht 7 persona, të cilët janë sulmuar nga qen endacakë apo shtëpiakë. Në Ministrinë e Bujqësisë është një zyrë e posaçme që kontrrollon mënyrën se si duhen mbajtur qentë në publik.

Drejtuesit e saj, të kontaktuar nga Televizioni Klan thonë se veprojnë vetëm në rastet kur Bashkia i sinjalizon për shqetësimet që kanë banorët. Në raste të tilla, ata ndërhyjnë duke ia marrë qenin pronarit. Por deri tani nuk raportohet të ketë ndodhur ndonjë rast i tillë, edhe pse qentë e rrezikshëm lëvizin çdo ditë pa maska në rrugë, duke sulmuar shpeshherë qytetarët.

Tv Klan

Pistoletën në kokë gruas në sy të fëmijëve – parandalohet në kohë

KRUJË – Policia e Krujës ka parandaluar një krim në familje. Në pranga ka përfunduar Ibrahim Lika 53 vjeç, banues në fshatin Shkretë. Pasi e ka dhunuar barbarisht bashkëshorten, 47-vjeçaren A.Lika, ai i ka vënë pistoletën në kokë. Gjithçka ka ndodhur në sy të fëmijëve të çiftit. Pas dhunës e kërcënimit, 53-vjeçari është larguar, për tu arrestuar më pas nga policia.

Gjatë arrestimit Likës iu gjet dhe iu sekuestrua një armë zjarri pistoletë, tipi “TT” si dhe një krehër me 6 fishekë model 54, të kalibrit 7.62 mm. 53-vjeçari ka qenë i dënuar më parë dhe ka kryer 4 vite burg për veprën tentativë vrasjeje e kryer në bashkëpunim./ tvklan.al

Tre në pranga – Dhunuan motrën, nënën dhe ish – nusen

TIRANË – Dhuna në familje vijon të mbetet ende një fenomen shqetësues. Në kryeqytet janë raportuar tre raste të reja, si dhe janë vënë në pranga tre persona.

Policia ka arrestuar shtetasin Ilia H., 40 – vjeç, banues në Tiranë, pasi në banesën e tij ka ushtruar dhunë psikologjike ndaj së motrës A. Xh., 31- vjeçe.

Për 31-vjeçaren është dhënë urdhër mbrojtje. Gjithashtu është bërë arrestimi i 21- vjeçares A.S, pasi dyshohet se ka kanosur dhe ushtruar dhunë fizike sistematikisht ndaj nënës së saj, 56 – vjeçares F. S..

Nga ana tjetër edhe 41 – vjeçarja L. Q., ka marrë urdhër mbrojtjeje, pasi ish – vjehrri i saj A. B., ka ushtruar dhunë fizike e psikologjike ndaj saj. /tvklan.al

Denoncim të riut: U fut në banesë, më ngacmoi seksualisht vajzën

CËRRIK – Një person është arrestuar nga policia pasi dyshohet se ka ngacmuar seksualisht një 18 – vjeçare. Specialistët për Krimet në Komisariatin e Policisë Cërrik, bënë ndalimin e 26 – vjeçarit Halit Mëhalla, banues në fshatin Klos, Cërrik. Ky shtetas, u ndalua nga efektivët e policisë, pasi dyshohet të jetë futur në banesën e shtetasit F.S, 51- vjeç dhe të ketë ngacmuar seksualisht vajzën e këtij të fundit, 18 – vjeçaren me iniciale E.S.

Materialet i kaluan Prokurorisë së Rrethit Gjyqësor Elbasan për veprime të mëtejshme, për veprën penale “vepra të turpshme” dhe “dhunimi i banesës” ./tvklan.al

Tritol makinës së biznesmenit

Një shpërthim me tritol ka ndodhur gjatë orëve të para të mëngjesit në Bulqizë. Lënda eksplozive i ishte vendosur një automjeti, në pronësi të biznesmenit Rexhep Losha. Gjatë momentit të shpërthimit, makina ishte e parkuar përpara banesës, ndërsa fatmirësisht nuk ka persona të lënduar.

Nga shpërthimi ka vetëm dëme materiale, kurse policia ka nisur hetimet për të identifikuar dhe arrestuar autorit. Uniformat blu do të marrin në pyetje edhe biznesmenin që iu vendos tritol për të zbuluar nëse ka konflikte me persona të tjerë./tvklan.al

Vlonjatët kapin peshkaqenin 4 metërsh

Si të mos mjaftonte masakra që vlonjatët po i bëjnë pyllit të Sodës dhe vijës së mrekullueshme bregdetare duke e betonizuar të gjithën, ata duket se janë “në gjak” edhe me detin.

Nuk janë të pakta rastet kur peshkatarët vlonjat shihen në foto ose në video duke kapur specie të rralla peshqish apo duke masakruar faunën detare, si në rastet me breshkat e detitit ose me peshkaqenët.

Edhe këyë herë një peshkaqen me përmasa të pazakonta ka rënë në rrjetën e disa peshkatarëve në Vlorë. Peshkaqeni prej më tepër se 400 kilogramë dhe 4 metra i gjatë u kap mëngjesin e sotëm rreth 200 metra larg gjirit të Gramës.

Sipas peshkatarëve, përmasat e tij kanë bërë që të hasnin vështirësi për ta hipur në varkë.

Sipas gazetarit, Enrik Mehmeti të “News 24”, peshkaqeni është ndër më të mëdhenjtë që është kapur deri tani në brigjet e Vlorës.

Lirohet biznesmeni Nikollaq Neranxi

Pas më shumë se 5 orësh në komisariatin e policisë numër 6, rreth orës 23:00 tw mbrëmjes së djeshme, është liruar biznesmeni i njohur shqiptar Nikollaq Neranxi.

Ai u shoqërua pasi sipas policisë kundërshtoi dhe ofendoi efektivët blu, të cilët gjobitën disa makina të parkuara gabim pranë kompanisë së tij në një rrugë dytësore në autostradën Tiranë-Durrës.

Bashkë me biznesmenin, u liruan edhe disa punonjës të tij që u shoqëruan bashkë me të. Në momentin që u shoqërua nga policia, Nikollaq Neranxi ndodhej në ambientet e kompanisë së tij ku organizohej panairi i kulinarisë 2016. /tvklan.al

Rilindja e krimit, ringjallja e Sokratit shqiptar dhe keqpërdorimi i presidentit të Republikës – Opinion nga Enver Bytyçi

“Edhe presidenti e ka quajtur të papranueshme këtë çështje dhe kur flet presidenti, kjo çështje s’ka më vend për diskutim kur e dënon dhe ai. Duhet lexuar siç e thotë presidenti”. Ky nuk është një pohim nga të djathtët. Përkundrazi, po perifrazoj deputetin ekstremist të majtë, ose ekstremistin oligark të rilindjes, Taulant Balla. Ai ka përdorur presidentin e Republikës me qëllim që të bëjë një diversion në “përligjje” të vendimit për ta përjashtuar Dr. Berishën nga seancat parlemntare të dhjetë ditëve të ardhshme. Dmth ka përdorur një prononcim të zotit Nishani, me qëllim që “t’i japë vetes të drejtën” për votën kundër pjesmarrjes së ish-kryeministrit në seancat e parlamentit. Madje Balla, duke perifrazuar presidentin ka dashur t’i kundërvihet gjithashtu kreut të parlamentit, pasiqë nuk i ka pëlqyer abstenimi i tij në vendimmarrjen antiBerisha të kryesisë së Kuvendit. Mendja e ngushtë e Taulantit ka dashur të godasë me një gur tre politikanët më me ndikim në këtë vend: Kryetarin e Shtetit, Kreun e Parlamentit dhe liderin historik të së djathtës, duke menduar se këta tre politikanë klasi na qenkan adoleshentë në politikë. Ndërkaq zëdhënësin e zellshëm të kryeministrit, zotin Balla, e kanë tradhëtuar dhe e tradhëtojnë vazhdimisht kolegët e tij ministra si dhe kryetari i Bashkisë së Tiranës, Erion Velia. Vetëm të dëgjojmë diskursin antipresident të Veliajt, ministrit Tahiri ose vetë kryeministrit të vendit dhe vetëmjaftohemi me faktet se si sillet ekzekutivi ndaj institucionit të Presidentit. Kur arrin kryetari i Bashkisë dhe urdhëron “Mos e lini presidentin të vizitojë vendin e krimit të betonit!”, nuk ka nevojë që të sillet ndonjë argument tjetër sesa destriktuivë dhe antiinstitucionalë janë rilindasit tanë. Rekord për Gines. Kurrë nuk ka ndodhur që një zyyrtar i cilitdo vend në botë të japë urdhër për të ndaluar presidentin e vendit në misionin e punën e tij. Ka ndodhur vetëm në kryeqytetin e paradokseve dhe qeverisjes nga fëmijët politikanë të rilindjes së diktaturës komuniste në Shqipëri, në Tiranën tonë, të cilën po e braktisin të gjithë kundërshtarët politikë të kryetarit të Bashkisë, ministrit të Brendshëm, kryeministrit të vendit dhe zëdhënësit të tij të zellshëm, Taulant Balla. I fundmi ishte Zirkon Disha, i njohur për sakrificën e tij në mbrojtje të lirisë për të marrë frymë pa kundragazin e ofruar nga kreu i Bashkisë. Ndërkaq shkak i keqpërdorimit të një prononcimi korrekt të presidentit të Republikës, zotit Nishani, ishte diskutimi për marrjen e vendimit për ta përjashtuar nga punimet e Kuvendit të vetmin zë të lirisë në këtë vend, zërin e pakompromis të Dr. Sali Berisha. Shkurt, presidentin po e përdorin si me sharje, si me diversion për ta vrarë lirinë e këtij vendi, për ta fundosur Shqipërinë në humnerën ku e ka degdisur e ashtuquajtura rilindje. Rilindje i thënçin, ndonëse në këto afër tri vite ajo ka dëshmuar se në një drejtim është dhe mbetet rilindje: Rilindje e metodave arrogante të diktaturës komuniste në drejtimin e shtetit e të vendit, rilindja e bashkëpunimit me bandat e krimit, rilindja e mafies, trafikut dhe korrupsionit në çdo qelizë të shoqërisë, rilindje e luftës së egër e të dhunshme politike kundër atyre që besojnë te liria, rilindje e luftës kundër tregut të lirë, kundër pronës provate, kundër “armiqve të brendshëm të partisë”. Rilindja e pretenduar e Ramës, Ballës, Veliajt është rilindje e metodave fashiste dhe komuniste në drejtimin shtetëror, është rilindje e manipulimit të opinionit publik, është rilindje imponimit të mendimit të njëshit të rilindjes. Nëse Sali Berisha denoncon krimin e lidhur me rilindjen, atëherë ai shpallet “armik”. Nëse dikush tjetër proteston, si Nikollaq Neranxi, i vihen prangat. Nëse dikush futet në një garë zgjedhore pa lejen e padishahut, atëherë vihen në veprim bandat e krimit për ta ndaluar atë. Kjo është rilindja. Kush e denoncon atë duhet të ndëshkohet, duhet të dënohet, duhet të hetohet për t’i gjetur një cen në biografi, me qëllim denigrimin, dhunimin, arrestimin, heqjen e lirisë për të vepruar i lirë. Kjo është praktika e revolucionit rilindas, me të cilën fatkeqësisht ka ende shqiptarë, me të cilën mburren. Kundër kësaj rilindje janë ngritur të gjithë, opozita po e po, Sali Berisha që ditën e parë të saj, presidenti Nishani gjithashtu, partneri i qeverisjes dhe kreu i Kuvendit. Rilindja ka përfunduar në rivarrimin e këtij vendi. Duhet thjesht të organizohet ceremonia mortore dhe arkivoli të çohet te varrezat. Në këtë kuptim deklaratën e Dr. Sali Berishës për t’u armatosur e shoh si një deklaratë dëshprimi. Në dëshprim janë të gjithë shqiptarët, janë ata që ikin çdo ditë nga ky vend. Janë ata që për shkak të mendimit të lirë dhe protestës së lirë të aplikuar që në shekullin e katërt para Krishtit, sot në këtë vend dhunohen, tërhiqen zvarrë e përfundojnë në pranga. Të dëshpruar janë studentët, janë të rinjtë, janë bizneset, të cilat shkojnë drejt falimentit të garantuar thjesht për shkak të fobisë që kanë rilindasit ndaj pasurisë së shqiptarëve. Rilindja pasurinë e do të tërën për veten e saj. Të tjerët, jorilindasit, kundërrilindasit le të vdesin nga uria, papunësia, mjerimi dhe varfëria. Kjo devizë e bën Dr. Berishën të denoncojë lidhjet e rilindjes me krimin e bandat e krimit, me fakte, me emra, me sms, me data, me orë, minuta. Eshtë zëri i vetëm të cilit i besojnë shqiptarët, edhe ata që marrin një rrogë te rilindja e për këtë arësye përbuzen e trajtohen si njerëz të dorës së dytë e të tretë. Të gjithë ata që ndjehen keq nga kjo lloj rilindje i besojnë institucionit Berisha. Prandaj rilindasit janë tërbuar dhe kanë mbipopulluar burgjet e dhomat e paraburgimit si asnjë regjim tjetër në botë. As Koreja e Veriut nuk vuan nga ky lloj popullimi i burgjeve, që ka sjellë rilindja në Shqipëri. Ndërkaq rilindja ka prodhuar një Sokrat të ri, sokratin shqiptar të shekullit të XXI me emrin Sali Berisha. Shiheni dhe krahasoni shfaqjen e monodramës “Apologjia e Sokratit” nga Nderi i Kombit, Mirush Kabashi me shfaqjen e polidramës parlamentare shqiptare dhe do të kuptoni se rilindasit janë vënë në rolin e gjykatësit dhe prokurorit që dënuan Sokratin, ndërsa Dr. Berishën duan ta kryqëzojnë siç ndodhi këtu e 2400 vite më parë në Athinën e Lashtë. Kjo është rilindja e rilindjes së krimit, kriminelëve, korrupsionit dhe korrupsionistëve.

HEC Banjë – mbyllen portat e digës dhe nis mbushja e rezervuarit

Ka nisur mbushja e rezervuarit të HEC Banjë. Mbyllja e portave dhe përfundimi i fazës së përmbytjes, konsiderohet si faza më e rëndësishme për vendosjen në funksion të këtij hidrocentrali.

Drejtuesit e kompanisë e quajtën një fazë shumë të rëndësishme, ndërkohë që ministri Gjiknuri e cilësoi një ëndërr tashmë të realizuar për të gjithë banorët e dy bashkive Gramsh dhe Cërrik.

Autoritetet vendore garantuan se do të mbrojnë interesat e banorëve sa i përket shpronësimeve, rrugëve, por edhe vaditjes. Rezervuari i Banjës është mbi 16 km i gjatë dhe në përfundim të mbushjes do të vërë në funksion dy turbina me kapacitet 66 MW dhe një turbinë me 7 mw.

Parashikimi i prodhimit të energjisë është menduar 255 GWh. Nga përmbytja e digës preken 130 familje në zonën e Drizës nga të cilat, 9 ende nuk kanë pranuar asnjë formë kompensimi.

Tv Klan

Deklarata militariste e Berishës – Nga FERDINAND XHAFERRI

Seanca e Kuvendit e kësaj jave u la tërësisht në hije si pasojë e deklaratës së Berishës, i cili nga foltorja e Kuvendit theksonte se shteti ka dështuar dhe ofronte si zgjidhje ftesën për armatosje të qytetarëve. Retorika e Berishës kishte brenda saj edhe problematikën e kapjes apo dështimit të shtetit, edhe zgjidhjen ekstreme të propozuar nga ai. Vetë z. Berisha orë më mbrapa reflektoi për zgjidhjen e ofruar dhe moderoi gjuhën duke u kthyer përsëri te teza e domosdoshmërisë së revolucionit demokratik (por duhet pranuar se opozita nuk po është në gjendje të mobilizojë masivisht revolucionarë demokratë). Po kështu, edhe presidenti Nishani dhe ish-kryetarja e Kuvendit, zj. Topalli u investuan për të rrumbullakosur deklaratën e z. Berisha. Që z. Berisha shkoi përtej normales në deklarimin e tij, kjo s’do shumë për t’u kuptuar, sepse u vetëkorrigjua nga vetë Berisha. Por, që kemi një shtet të dështuar që provokon në çdo sjellje të tij riaktivizimin e kulturës së dhunës, kjo po shtjellohet nga vetë krerët e së majtës. Themi kështu sepse, një ditë mbas deklarimit të Berishës, kreu i Kuvendit, z. Meta dhe një nga eksponentët e spikatur të së majtës, z. Majko, në prezencë të kreut të Bundestagut gjerman, z. Lamert, jepnin opinionet e tyre në konferencën: 25 Vite Parlamentarizëm Demokratik.
Ish-kryeministri Majko në fjalën e tij do të qartësonte në mënyrë shteruese hamendësimet për pandershmërinë e votës në Shqipëri duke evidentuar edhe bursën e votës për zgjedhjet e vitit 2013. Sipas opsionit të deklaruar nga z. Majko, në prezencë të z. Lamert, në zgjedhjet e fundit politike vota është shkëmbyer me 50 euro. Ndërsa z. Meta theksonte se kjo legjislaturë ka kaluar një ligj shumë të ashpër për dekriminalizimin. Pra, z. Meta dhe z. Majko na bënë me dije se Kuvendi i prodhuar me vota 50-euroshe natyrshëm ka qenë i dominuar nga prezenca e krimit në përmasat që kërkonin një ligj të ashpër për dekriminalizimin. Por, Kuvendi është pushteti nga ku burojnë të gjitha pushtetet e tjera, dhe kjo ka sjellë që situata të degjenerojë në përmasat ku bota e krimit po investohet deri në përcaktimin e edukatorëve të rinisë së sotme. Kujtojmë se më herët kemi qenë dëshmitarë të deklaratave të Ramës dhe Tahirit që na informonin se kanë koordinuar së bashku se ku do të takojnë me elementë të spikatur të krimit të organizuar. Të gjitha këto dëshmojnë se jemi në kushtet e një shteti që është vështirë të përcaktohet nëse është i kapur apo i dështuar, sepse është edhe i kapur edhe i dështuar. Sidoqoftë, zgjidhja e propozuar nga z. Berisha del jashtë kornizës që propozon struktura demokratike.
Por, dhe këtu është një ‘por’ i madh; studiues të ndryshëm të shkencave politike argumentojnë mundësitë për përfshirje në dhunë politike të shoqërive në tranzicion demokratik. Këta studiues theksojnë se tendenca për t’u përfshirë në dhunë politike rritet kur kemi një vlerësim të unifikuar negativ për një autoritet politik dhe strukturën e krijuar nga ai. Për më qartë, analistët theksojnë se motivimi i shoqërisë për t’u përfshirë në dhunë politike mund të shtohet nëse rënies së legjitimitetit të qeverisë i shtohen edhe mundësitë e zbehta që ofron e ardhmja për rotacion demokratik të pushtetit. Pra, sa më i pakët të jetë besimi tek autoriteti politik dhe sa më pak mundësi të ndjejë opozita për rotacionin demokratik, aq më të mëdha janë mundësitë që të provokohet dhunë politike.
Shqipëria, që po shkon drejt zgjedhjeve të 2017-ës, ofron një model të mundshëm për t’u përfshirë në dhunë politike. Kjo sepse besimi në autoritetin politik të Ramës është duke u ulur vazhdimisht. Deri tani qytetarët shqiptarë kanë parë vetëm autoritetin e forcës së qeverisë. Qeveria ka shkuar dhunshëm te qytetari për dritat, ujin dhe taksat, por nuk ka bërë asgjë për t’i shërbyer atij. Dihet se autoriteti politik formësohet nga dy burime kryesore: forca ose pajtimi. Natyrisht që, në demokraci, i vetmi autoritet politik legjitim me të cilin shoqëria mund të qeveriset, është ai që buron nga pajtimi dhe jo nga forca. Ne kemi parë një qeveri që ka përdorur në mënyrë sistematike vetëm logjikën e forcës ndaj qytetarëve të saj. Për më keq, kemi parë edhe një qeveri që është investuar për manipulimin e zgjedhjeve. Zgjedhjet në Korçë, në fund të 2013-ës, dhe zgjedhjet lokale të 2015-ës certifikuan probleme të rënda të blerjes së votës. Pra, opozita mund të priret të nxisë dhunën politike sepse ajo ka filluar të ndjejë se kjo qeveri po qep një strukturë institucionale të ‘konkurrimit demokratik’, e cila nuk e lejon opozitën që të realizojë aspiratat e saj. Në përfundim, duket kumbuese shprehja e presidentit të 35-të të Shteteve të Bashkuara të Amerikës, John F. Kennedy kur deklaronte se: Ata që e bëjnë revolucionin paqësor të pamundur, bëjnë të paevitueshëm revolucionin e dhunshëm.

Ja 7 femrat e kryesisë së PS-së, Leskaj më pak e votuara

Ka përfunduar numërimi i votave për anëtaret e Kryesisë së Partisë Socialiste për sa i përket kandidateve gra.

Mes anëtareve të zgjedhura më e votuara është Eglantina Gjermeni, kurse nënkryetarja e Parlamentit Leskaj ka qenë më pak e pëlqyra nga lista prej 7 anëtaresh.

Lista

Englantina Gjermeni 226 vota

Mimi Kodheli 219 vota

Vasilika Hysi 197 vota

Lindita Nikolla 177 vota

Evis Kushi, 167 vota

Olta Xhaçka, 166 vota

Valentina Leskaj, 163 vota

Arta Dade tërhiqet nga Kryesia e PS: Parimet e mia bien ndesh me udhëheqjen e partisë

Rama ka prezantuar të parën në radhën e anëtarëve të Kryesisë së Partisë Socialiste, por Arta Dade dorëhiqet nga ky post.

‘’Parimet e mia bien ndesh me drejtimin e PS-së’’, ka thënë Dade.

E njohur për kundërshtimin e saj për mënyrën se si po drejtohet Partia Socialiste, duket se Dade ka pritur momentin pasi Rama e ka prezantuar si anëtarë për një nga postet më të larta të partisë. Ndërkohë që Ben Blushi dhe Mimoza Hafizi nuk janë propozuar nga Rama në këto poste.

Rama përjashton Kokëdhimën nga gara për Sekretar të Përgjithshëm – Ruçi pa rival

Kryetari i PS-së, Edi Rama, ka përjashtuar sot deputetin Koço Kokëdhima nga gara për postin e Sekretarit të Përgjithshëm duke deklaruar se kandidati i vetëm për postin është Gramoz Ruçi.

Deklarata është bërë sot në mbledhjen e Asamblesë së PS-së, ku Rama lexoi njerin pas tjetrit, emrat e kandidatëve për vendet në strukturat drejtuese.

Rama lexoi edhe emrat që kandidojnë për postet drejtuese të PS-së, sipas rendit alfabetik:

“Për kryesinë ka dy lista, një për burrat dhe djemtë dhe një për gratë dhe vajzat, – tha ai. –Djem nuk më rezultojnë, por vetëm burra. Janë 18 kandidatë për 13 vende: Arben Ahmeti, Armando Subashi, Besnik Bare, Blendi Klosi, Damian Gjiknuri, Ditmir Bushati, Eduard Shalsi, Erion Braçe, Erion Veliaj, Fatmir Xhafaj, Namik Dokle, Niko Peleshi, Pandeli Majko, Qazim Sejdini, Saimir Tahiri, Taulant Balla, Vangjush Dako dhe Ulsi Manja.

Përsa i përket grave dhe vajzave, janë 12 kandidate për 7 vende: Arta Dade, Anila Shehu, Eglantina Gjermeni, Ermonela Felaj, Evis Kushi, Klotilda Ferhati, Lindita Nikolla, Mimi Kodheli, Olgerta Manastirliu, Olta Xhakça, Vasilika Hysi dhe Valentina Leskaj.

Edi Rama: I thosha Dan Klosit se do përfundosh duke e vrarë veten!

Ardian Klosi nuk na tha Lamtumirë por na tha “Ik pirdhuni”!

Voal – Është promovuar këtë të premte në sallën COD në kryeministri libri i autorit Oliver Schmit ”Për Ardian Klosin, gjermanin nga Shqiperia”.

Po ashtu familjes së tij iu dorëzua edhe çmimi “Ardian Klosi”, për librin më të mirë publicistik të vitit 2015, financuar nga fondacioni “S. Fischer”.

Në promovimin e librit për publicistin Klosi, mbajti një fjalë edhe kryeministri Edi Rama, i cili vlerësoi atë si një shpirt të trazuar duke shtuar se “për Ardianin intelektuali jeton vetëm me të vërtetën”.

Deklaratat e plota të Ramës për Klosin – “Arsyeja pse përkthente ishte nevoja për higjienë.

Nëse nuk do kishte atë trazim të madh që i vinte së brendshmi por që agravohej nga injoranca dhe pisllëku nuk do kishte përkthyer.

Për shkak të nevojës për të bashkëjetuar, pra përkthimi ishte mundësi për të bashkëjetuar në një shoqëri me të tjerë që i zgjidhte vetë, komunikonte me ta ishte një lloj rruge në arrati, ashtu sikurse ishte një lloj flirti me të vdekurit.

Vdekja ishte një fuqi që tek Ardiani vepronte në mënyrë të pavetëdijshme, e kishte me vete, nuk e shmangte atë.

Në flirt me të vdekurit që i zgjidhte vetë trazimi i tij rritej, mendja e mprehtë që kishte ia rëndonte trazimin.

I përkiste një lloj shkolle që nuk e pranonte intelektualin si koncept jashtë angazhimit. Për Ardianin intelektuali ishte ai që rron me të vërtetën.

Gjithmonë ia thosha që do përfundosh duke vrarë veten dhe pasonte e qeshura…

Kur ndërtonte shtëpinë tek liqeni, thoshte do bej papafingo lart.

Kur shkoja ta takoja ndonjë natë, i thosha pak a shumë në këtë orë këtu lart do të ndihej një krismë e thatë …i madhi Ardian Klosi nuk na tha Lamtumirë por na tha “Ik pirdhuni”!

Nuk merrem me k**va”, fyerja ndaj gazetares i kushton 100 milionë lekë drejtorit të RTSH?

Një konflikt në 2014-ën e shtyu moderatoren e sportit Enkeleida Zeko të padiste drejtorin e Radio Televizionit Publik shqiptar, Martin Leka.

Të enjten e 21 prillit 2016, ajo shpërndau një status në Facebook ku shkruante: Mos mendoni se nuk ka drejtesi ne Shqiperi…! Për mua sot drejtësia u bë realitet. Po e shijoj…’

Në media u raportua se moderatorja ka fituar gjyqin ndaj ishdrejtuesit të saj, i cili do të gjobitet me 100 milionë lekë dëmshpërblim për ‘fyerje dhe denigrim të figurës morale e publike’ të Zekos. E kontaktuar nga Anabel.al, Enkeleida Zeko nuk e mohoi lajmin, por u shpreh se nuk mund të jepte asnjë deklaratë lidhur me këtë pa miratimin e avokatit të saj.

Në 2014-ën, ajo botoi një shkrim në median e shkruar ku akuzonte drejtpërdrejt drejtorin se kishte vjedhur fonde dhe thoshte se ishte hequr nga puna. Një status i drejtorit, Martin Leka, në Facebookun e tij pas këtij shkrimi u përkthye si një përgjigje ndaj moderatores: ‘Nuk merrem me k***a (të sponsorizuara nga k***at). Kaq ishte reagimi im për sot’, shkroi ai.

Menjëherë pas kësaj erdhi edhe padia, siç është raportuar, me të cilën moderatorja i kërkonte ta dëmshpërblente me një shumë prej 100 milionë lekësh për dëmtim të imazhit të saj.

Vetë drejtori në fuqi i Radio Televizionit Shqiptar deklaroi asokohe se statusi i tij në Facebook nuk kishte kurrfarë lidhje me Enkeleda Zekon: ‘Qenka interesante gjithë kjo idiotësi. Ma kishin thënë po e mora për budallallëk. Unë nuk i kam thënë kujt k**vë, ma provoni dhe jam gati të paguaj 130 miliardë euro. Botë çudirash, edhe skuthash’.

Leka gjithashtu u shpreh se moderatorja nuk ishte pushuar kurrë nga puna: “U pushua nga puna pak ditë më parë”thonë! As është pushuar, madje as ndonjë masë tjetër ndaj saj nuk është marrë.’ Zeko më pas nisi të moderonte në News 24, ndërsa në RTSH aktualisht emisionet e sportit i moderon Hygerta Sako.

Ish Hotel Vollga – hetim 3 gjykatësve

Në Shqipëri Prokuroria njoftoi sot nisjen e hetimeve ndaj tre gjyqtarëve të Gjykatës së Durrësit të cilët dyshohen se kanë kryer veorime të paligjshme në përcaktimin e pronësisë së ish Hotel Vollgës një kompanie të huaj e cila më pas rezulton t’I ketë kaluar në formë dhurimi, 30 përqind të pronës Emiljano Shullazit. Ndërkohë, arrestimi i Shullazit vazhdon të jetë në qendër të polemikave politike. Kryeministri Edi Rama tha sot se pararendësi i tij Sali Berisha duhet të hetohej për deklaratat e djeshme në parlament, ndërsa kreu i opozitës Lulzim Basha e akuzoi sërish për lidhjet e tij me Shullazin. Ndaj zotit Berisha parlamenti mori masë disiplinore duke e përjashtur 10 ditë.

Pasi pak ditë më parë vendosi sekuestron preventive mbi ish Hotel Vollgën, në qendër të Durrësit, për shkak të dyshimeve mbi njohejn e pronësisë mbi të, Prokuroria njoftoi sot se ka nisur hetimet dhe ndaj tre gjyqtarëve të cilët në shkurt të vitit 2013 i njohën pronësinë një kompanie të huaj. Mbi këtë pronë ka patur një proces të gjatë civil i cili kishte përfudnuar deri në Gjykatën e Lartë, por ndërsa po zhvillohej gjyqi në këtë gjykatë, gjyqtarët e Durrësit kanë marrë një vendim në favor të kompanisë së huaj. Sipas prokurorisë, ky vendim “është marrë në kundërshtim të hapur e flagrant me ligjin, pasi nuk referohet në asnjë bazë ligjore dhe në dijeni të plotë të ekzistencës së një gjykimi paralel, i cili ndodhej në Gjykatën e Lartë”. Hetimet për këtë rast nisën pas arrestimit të Emiljano Shullazit, i cili rezulton të ketë marrë në formë dhurimi 30 përqind të ish Hotel Vollgës, nga kompania e huaj e cila u shpall pronare nga Gjykata e Durrësit.

Cështja Shullazi ndërkohë vazhdon të trazojë politikën shqiptare. Pas deklaratës së djeshme në parlament të ish kryeministrit Sali Berisha dhe thirrjes drejtuar qytetarëve që të armatosen për mbrojtjen personale, sot kreu aktual i qeverisë Edi Rama tha se ai do të duhej të përgjigjej para drejtësisë: “Ka disa arsye për të hetuar Sali Berishën si ish-kryeministër i vendit. Kjo e thirrjes së popullit për t’u armatosur, është vetëm një arsye më shumë. Në një vend normal, sot tellalli i kryengritjes së armatosur, do të ishte përpara prokurorëve. Kështu e thotë edhe ligji ynë i shkruar normalisht, për një vend normal. Por Shqipëria s’mund të jetë një vend tërësisht normal, për sa kohë çka shkruhet në ligj nuk vlen njësoj për të gjithë. Për sa kohë nuk shpëton nga zgjedha e pandëshkueshmërisë së politikanëve, prokurorëve, gjyqtarëve”.

Pikërisht për shkak të kësaj situate, sipas zotit Rama, reforma në Drejtësi është mëse e nevojshme, porse sipas tij zoti Berisha dhe opozita po bëjnë cmos për ta penguar. 24 orë pas deklaratave në parlament, në zyrën e zotit Berisha ishte sot ambasadori amerikan Donald Lu i cili më pas u takua dhe me kreun e opozitës Lulzim Basha. Për temat e diskutuara nuk ka patur një deklaratë zyrtare.

Në një dalje për shtypin, zoti Basha ripërsëriti sulmet ndaj zotit Rama për lidhjet që sipas tij ai kishte me Shullazin, duke e cilësuar shkurtimisht, deklaratën e zotit Berisha jo si një vendim, por si propozim ndaj situatës së rëndë të sigurisë: “I ka lënë Emiliano Shullazit territore të tëra në dispozicion për të mbjellë hashash, i ka ofruar postet kyçe në polici e dogana dhe sot kapet pas një deklarate, një qëndrimi që nuk është as vendim dhe as nisëm, por është një propozim për gjendjen e tmerrshme kriminale me shpresën që do të fshijë Shullazin nga memoria e njerëzve”

Po sot Byroja e parlamentit, vendosi të ndëshkojë me përjashtimin për 10 ditë nga parlamenti ish kryeministrin Sali Berisha për deklaratën në parlament një ditë më parë. Kërkesa për masën displinore ndaj tij ishte paraqitur zyrtarisht që dje nga grupi socialist.

Tiranë – Sondazh i qytetarëve për politikën: Këta deputetë nuk na përfaqësojnë

Instituti për Demokraci e Ndërmjetësim dhe Instituti Demokratik Amerikan publikuan sot në Tiranë një studim mbi shkallën e angazhimit politik të qytetarëve në proceset demokratike të Shqipërisë.

Studimi zbuloi një zhgënjim në rritje të qytetarëve nga partitë politike si dhe një pakënaqësi të konsiderueshme ndaj parlamentit, qeverisë, dhe opozitës.

Ky studim mbi angazhimin politik i përgatitur nga Instituti për Demokraci e Ndërmjetësim dhe nga Instituti Kombëtar Demokratik Amerikan është i pari i këtij lloji, që mat gadishmërinë e qytetarëve për të marrë pjesë në zhvillimin e demokracisë.

Mbi 22 për qind e të anketuarve deklaruan prerë se nuk do të votonin në zgjedhje nëse ato mbahen tani, rreth 30 për qind janë të pavendosur, nëse do të votonin apo jo dhe afro gjysma e të amketuarve pohuan që janë gati marrin pjesë.

Studiuesit pohuan se një pjesë e madhe e atyre që kanë prirje të votojnë janë punonjës administrate, anëtarë partie dhe veprimtarë të shoqatave.

Mosbesues dhe të zhgënjyer nga politika tradicionale e partive, sondazhi zbuloi se qytetarët janë gati të shtojnë pjesëmarrjen e tyre në protesta dhe veprimtari të shoqërisë civile, apo në takimet e këshillit bashkiak për çështje të caktuara konkrete dhe jo për pikëpamje të përgjithshme.

Afro gjysma e tyre janë gati të përfshihen në veprimtari të nivelit vendor dhe vetëm 10 për qind e tyre janë gati të angazhohen në nivel kombëtar.

Sipas sondazhit, një ndër 2 të anketuar është i pakënaqur me punën e parlamentit dhe të qeverisë aktuale, ndërsa 2 nga 3 pjesëmarrës nuk janë të kënaqur me punën e opozitës aktuale.

Gjysma e të anketuarve pohuan se parlamenti nuk është transparent dhe nuk punon mbi baza etike qytetare.

Po ashtu 2 në 3 qytetarë nuk janë dakord se parlamenti përbëhet nga përfaqësues të respektuar.

Më shumë se 2 në 3 të anketuar, gati treçereku i tyre mendojnë se deputetët nuk i përfaqësojnë ata dhe familjet e tyre.

Shumica e të anketuarve dëshirojnë t’i përfaqësojë një deputet i përgjegjshëm dhe i ndershëm, deputet me arsim të mirë dhe që të kuptojë varfërinë dhe problemet e popullit.

Të anketuarit pohuan se nuk kanë ndërmarrë asnjë nismë me karakter social e politik, sepse; 40 për qind e tyre besojnë se asnjë njeri nuk i dëgjon, 40 për qind të tjerë pohuan se politikant mendojnë vetëm për veten e tyre dhe rreth 20 për qind pohuan se politikanët nuk mendojnë për njerëz të thjeshtë si ne.

Mbi 80 për qind e qytetarëve pohuan se ata janë gati të angazhohen në procese politike për interesa personale, familjare dhe komunitare.

Ndërsa 65 për qind pohuan se janë të gatshëm të angazhohen në çështjet që besojnë, por që nuk lidhet me ata personalisht.

Gjysma e tyre pohuan se situata mund të ndryshojë duke tërhequr vëmendjen e mediave dhe gjysma tjetër me votim në zgjedhje.

Një masë po aq e madhe qytetarësh thanë se gjendja mund të ndryshojë duke marrë pjesë në veprimtari për të ushtruar presion ndaj vendim-marrësve.

Por vetëm 20 për qind e tyre pohuan se do ti bashkoheshin një partie politike për të ndryshuar situatën aktuale.

Treçereku i të anketuarve pohuan se nuk janë anëtarë e as mbështetës të ndonjë partie politike dhe as të ndonjë shoqate.

Vetëm një në 5 pjesëmarrës mendon se mund të angazhohet politikisht pa qenë pjesë e një partie politike.

Pjesa tjetër mendojnë se e vetmja mënyrë të angazhohen në politikë është të bëhen anëtarë të partie politike.

Nga sondazhi doli se 2 në 3 të anketuar pohuan se vota e tyre nuk ka asnjë ndikim në vendim-marrjen kombëare.

Një në 2 pjesëmarrës pohojnë se nuk kanë asnjë ndikim në vendim-marrjen vendore, ndaj ata kërkojnë shtimin e takimeve të drejtpërdrejta me deputetët dhe bashkiakët, dhe detyrimin që ata tu përgjigjen me shkrim kërkesave të tyre jetike.

Sondazhi vlerësoi se njohuritë e qytetarëve për institucionet demokratike janë të pamjaftueshme.

Ata shprehën interesim më të lartë për qeverisjen vendore. 2 nga 3 të anketuar theksuan se nuk u intereson fare roli i deputetëve.

Vetëm një e treta e qytetarëve tha se ishte gati të përfshihej në vendimmarrjen në nivel kombëtar dhe një në 2 është gati të angazhohet në çështje të nivelit vendor.

Renea vret të shumë kërkuarin Petrit Dushi

Forcat speciale Renea vranë sot një person shumë të kërkuar gjatë një operacioni policor për kapjen e tij në fshatin Gziq të Lezhës. Sipas burimeve policore, 45 vjeçari Petrit Dushi iu përgjigj policisë me të shtëna.

Edhe në shtator të vitit të kaluar, forcat RENEA kryen një operacion, të mbështetur edhe nga ajri, në një nga zonat më malore të Mirditës, por pa mundur ta arrestojnë Dushin, i cili qëlloi me armë ndaj forcave policore duke arritur t’i shpëtojë arrestimit. Policia dyshon se ai u plagos.

Prej më shumë se 10 vitesh, Petrit Dushi jetonte në arrati, në zonën e thellë malore të Mirditës. Për policinë, ai ishte person me rrezikshmëri të lartë.

Gjykata e kishte dënuar në mungesë me 17 vite burgim me akuzën e vrasjes për motive pronësie të një bashkëfshatari nga fshati Kaçinar i Mirditës si dhe me 3 vjet burgim për falsifikim të dokumenteve.

Ai ishte gjithashtu në gjykim si i dyshuar për vrasjen e një të afërmi të tij në fshatin Ungrej të Lezhës ku, për një periudhë kohe, ishte strehuar gjatë kohës që qendronte në arrati.

Faqja 203 prej 233« Fillimi ‹ Prapa 199 200 201 202203204 205 206 207 Para ›Fundi »

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL