Kandidati republikan për President Donald Trump bëri thirrje të hënën për “realizëm në politikën e jashtme”, duke u përqendruar tek shkatërrimi i ekstremistëve të Shtetit Islamik dhe grupeve të tjera terroriste jo tek rindërtimi i vendeve të tjera sipas një ideali amerikan.

Në një fjalim për politikën e jashtme në shtetin e Ohajos, zoti Trump tha se Shtetet e Bashkuara duhet të jenë në krah të çdo vendi që do që të mposhtë “terrorizmin radikal islamik”, pavarësisht nga mosmarrëveshjet e mëparshme.

Ai tha se fuqizimi i Shtetit Islamik është “rezultat i drejtpërdrejtë” i politikës së jashtme të Presidentit Barack Obama dhe ish-Sekretares së Shtetit, Hillary Clinton, rivalja e tij në zgjedhjet e nëntorit.

Zoti Trump tha se nëse zgjidhet, ai do të organizojë një konferencë ndërkombëtare me udhëheqës ndërkombëtarë për të hartuar një plan të ri “për të shtypur dhe shkatërruar” terrorizmin islamik. Ai tha se “koha e shtet-ndërtimit” nga Shtetet e Bashkuara “do të marrë fund menjëherë”.

Ai e paraqiti planin e tij për të luftuar terrorizmin pas një jave gjatë së cilës ai deklaroi disa here se Presidenti Obama dhe zonja Clinton kishin krijuar ISIS-in. Më pas ai the se e kishte thënë një gjë të tillë me ironi.

Në fjalimin e tij, zoti Trump paraqiti planet e tij për politikat e imigracionit, përfshirë ndërprerjen e vizave për personat, të dhënat e të cilëve nuk kontrollohen dot paraprakisht.

Zoti Trump bëri thirrje për pezullimin e përkohshëm të vizave për persona që vijnë nga rajone gjeografike me një histori në eksportimin e terrorizmit, në vend që të identifikonte emigrantët nga përkatësia fetare.

Një grup veprimtarësh myslimanë kanë ofruar 10 mijë dollarë shpërblim në përpjekjet për të zbardhur vrasjen e një kleriku mysliman dhe bashkëpunëtorit të tij në Nju Jork. Imami Maulama Akonjee dhe Thara Uddin u qëlluan për vdekje të shtunën në Kuins, ndërsa po ecnin në rrugë pas lutjeve të drekës në xhaminë Al-Furqan Jame.

Këshilli për Marrëdhënie Amerikano-Islame tha se do ta zyrtarizojë sot njoftimin se ka ofruar 10 mijë dollarë shpërblim lidhur me zbardhjen e vrasjeve. Afaf Nasher është me Këshillin për Marrëdhënie Amerikano-Islame në Nju Jork.

“Nuk është e thënë të jesh mysliman apo besimtar, por një njeri me ndërgjegje. Imagjino sikur të kanë vrarë babanë pa asnjë arsye. Ndjesia duhet të jetë motivi që njerëzit të braktisin qetësinë, dhe këtë e them kryesisht për ata që kanë ndikim tek komuniteti e më gjerë. Të gjithë kemi përgjegjësi dhe nuk janë vetëm politikanët por të gjithë ata që kanë ndikim shoqëror. Kur qëndrojmë të heshtur, ne lejojmë që krimet të vazhdojnë të ndodhin.”

Policia ka publikuar një skicë të autorit të armatosur, një burrë me flokë dhe mjekër të zezë dhe me syze. Nuk ka të dhëna lidhur me motovin e vrasjeve. Pjestarët e komunitetit bangladeshas, të cilët i përkasin xhamisë në fjalë, duan që vrasja të trajtohet si një krim urrejtjeje.

Policia e Nju Jorkut është në kërkim të një personi i cili dje qëlloi për vdekje imamin e një xhamie dhe një mik të tij, që po largoheshin pas lutjeve të pasdites.

Ngjarja ka ngjallur frikë dhe ankth mes emigrantëve myslimanë të komunitetit.

Edhe pse policia tha se nuk i ka përcaktuar motivet e vrasjes së Imam Maulama Akonjee dhe mikut të tij Thara Uddin pranë xhamisë Al-Furqan Jame Masjid, pjestarët e komunitetit janë të shqetësuar se vrasjet mund të kenë patur si motiv intolerancën.

Policia tha se personat ishin qëlluar nga prapa kokës, pak pas orës dy pasdite.

Anëtarët e komunitetit bangladeshas që përdorin këtë xhami thanë se kërkojnë që vrasjet të trajtohen si një krim urrejtjeje. Më shumë se 100 njerëz morën pjesë mbrëmë në një tubim me thirrjet “Duam drejtësi!”

Kandidatja demokrate për presidente, Hillary Clinton bëri publike të ardhurat e saj për vitin e kaluar, siç i ka raportuar tek agjencia e taksave,

Në bazë të tyre Hillary Clinton ka patur të ardhura vjetore prej 10.5 milionë dollarësh gjatë vitit 2015 dhe ka paguar 3.5 milionë dollarë taksa, pra rreth 34 për qind të të ardhurave. Ndonëse nuk është e detyruar me ligj, është traditë e hershme që gjithë kandidatët për president i bëjnë publike të ardhurat. Rivali i saj Donald Trump nuk ka pranuar deri tani dhe thotë se nuk do t’i bëjë ato publike meqë të ardhurat e tij janë duke u kontrolluar nga agjencia e taksave. Vetë agjencia e taksave, IRS-i, ka thënë se kontrolli që është duke vazhduar nuk është pengesë për t’I bërë të ardhura publike.

Portali Politico njofton se në vitet ’90, për dy vite Trump ka paguar shumë pak, ose aspak taksa. Një gazetar i ekonomisë shkruante sot në Nju Jork Times se një numër avokatësh taksash mendojnë se kjo mund të jetë ende e vërtetë për zotin Trump.

Nëse bashkëpunimi në mes të Turqisë dhe Rusisë vërtetë e ka për qëllim luftën kundër militantëve të Shtetit Islamik, atëherë Shtetet e Bashkuara të Amerikës do e mirëprisnin bashkëpunimin në mes të Ankarasë dhe Moskës.

Ky është qëndrimi i fundit i Departamentit amerikan të Shtetit rreth përmirësimit të marrëdhënieve në mes të Turqisë dhe Rusisë, e cila u bë përmes vizitës që presidenti turk, Rexhep Tajip Erdogan e bëri në Shën Petërsburg të Rusisë.

Atje, Erdogan u takua me homologun rus, Vladimir Putin, ndërsa të dy u zotuan se do të rrisin bashkëpunimin rreth luftës në Siri.

“Ne kemi të qenë të qartë që nëse Rusia vërtetë është e interesuar të luftojë ISIL (Shteti Islamik), të luftojë kërcënimet terroriste që realisht përfshijnë tërë komunitetin global, ne do e mirëprësnin këtë. E dini, ne kemi pasur dyshimet tona në të kaluarën, por të shohim se ku do të çojë ky bashkëpunim”, ka thënë mbrëmë zëdhënësja e Departamentit amerikan të Shtetit, Elizabeth Trudeau.

Kandidati republikan presidencial në Shtetet e Bashkuara, Donald Trump, ka shkaktuar zemërim të madh, pasi duket se ka sugjeruar që pronarët e armëve mund të përgjigjen në mënyrë të dhunshme ndaj rivales së tij demokrate, Hillary Clinton.

Këto deklarime të zotit Trump në një fushatë të djeshme, ishin të fundit në serinë e komenteve të papritura, me të cilat duket se ka fituar mbështetje në mesin e disa votuesve, por e ka humbur përkrahjen nga republikanët e njohur.

Zoti Trump ka thënë se do të ishte “ditë e tmerrshme” nëse Hillary Clinton do të zgjedhej dhe do të duhej t’i emëronte gjyqtarët e Gjykatës Supreme, që aktualisht e ka një vend të zbrazur, pas vdekjes së një gjyqtari më herët këtë vit. Gjykata Supreme e Shteteve të Bashkuara i ka nëntë anëtarë.

Pastaj Trump i është referuar Amandamentit të Dytë të Kushtetutës së Shteteve të Bashkuara, që ka të bëjë me të drejtën për të pasur armë.

“Nëse ajo (Clinton) i zgjedh gjyqtarët e saj, asgjë ju njerëz nuk mund të bëni”, i tha Trump turmës dhe shtoi se “megjithqë njerëzit e Amandamentit të Dytë, ndoshta ekzistojnë, nuk e dij”.

Fushata e zotit Trump më vonë e ka publikuar një deklaratë ku synohej qartësimi i komenteve, duke thënë se referenca e tij nënkuptonte se si ky amandament i bashkon njerëzit.

Shumë hulumtime kombëtare të opinionit në Shtetet e Bashkuara, tregojnë se zonja Clinton, ish-sekretare amerikane e shtetit, udhëheq kundër rivalit Trump me epërsi të theksuar.

Zgjedhjet kombëtare presidenciale në Shtetet e Bashkuara zhvillohen më 8 nëntor.

Udhëheqësit e partisë republikane janë gjithnjë e më të shqetësuar lidhur me anketat e fundit të opinionit në shtete kyçe, apo në nivel kombëtar, që tregojnë se kandidatja demokrate Hillary Clinton ka një epërsi të madhe ndaj kandidatit republikan Donald Trump. Anketat e reja vijnë pas kuvendit kombëtar të demokratëve javën e kaluar dhe pas një sërë çështjesh polemizuese që kanë në qendër kandidatin Trump e që kanë nxitur disa reagime negative si nga figura të njohura republikanësh edhe demokatësh.

Janë kohë të vështira për republikanin Donald Trump.

Ai këmbëngul se fushata e tij është në rrugën e duhur për të fituar në nëntor.

“Doja t’ju them se fushata po ecën shumë mirë. Nuk kemi qenë asnjëherë kaq të bashkuar.”

Në një anketë të re të CNN-it, Trump është pas demokrates Hillary Clinton me nëntë për qind, ndërsa në një anketë të rrjetit NBC me tetë për qind. Klinton po ashtu kryeson np disa shtete kyçe si Pensilvani dhe Miçigan.

Shifrat e anketave vijnë pas disa debateve që kanë përfshirë fushatën e zotit Trump, përfshi polemikat e tij me Khizr dhe Ghazala Khan, prindërit myslimano-amerikanë të një ushtari të vrarë në luftën në Irak në vitin 2004.

Reagimi konfrontues i Trumpit ndaj familjes Khan u kritikua nga figura të njohura të partisë republikane si kryetari i Dhomës së Përfaqësuesve Paul Ryan dhe senatori nga Arizona, John McCain.

“Ne jo vetëm duhet të respektojmë por t’i duam anëtarët e familjeve që kanë bërë të tilla sakrifica.”

Trump shkaktoi gjithashtu një reagim të ashpër kur refuzoi të mbështesë ligjvenësit Ryan dhe McCain për zgjedhjet e ardhshme për në kongres.

Debatet që kanë përfshirë Trumpin kanë bërë që disa udhëheqës republikanë të jenë të shqetësuar se qasja e tij e padisiplinuar ndaj fushatës po ndihmon Clintonin, thotë analisti në Universitetin e Virxhinias Kyle Kondik.

“Ai duhet të vazhdojë t’i bindë njerëzit se është i kualifikuar për postin e presidentit dhe se ka temperamentin e duhur për të qënë president. Nuk mendoj se debatet si ai me familjen Khan po e ndihmojnë në këtë drejtim.”

Zoti Trump i tha një gazetari në Florida se është i vendosur të ndryshojë fokusin e fushatës së tij.

“Po është e drejtë. Duhet më tepër fokus tek Hillary Clintoni. Ajo është katastrofë kështu që do të përqëdrohemi më shumë tek Hillary Clinton.”

Në një miting në Kolorado, Clinton vazhdoi të kritikonte Trumpin duke theksuar se temperamenti i tij duhet ta skualifikojë atë për t’u bërë president.

“Nuk kam dyshim se Donald Trump nuk është i kualifikuar për të qënë president dhe komandant i përgjithshëm.”

Grupi pro-Clinton, Priorities USA, ka një reklamë të re që tregon repulikanët që kritikojnë Trumpin.

Si Clinton dhe Trump janë të ndërgjegjshëm se anketat tregojnë se amerikanët duan ndryshim; por, ka gjithashtu shqetësim rreth temperamentit të kandidatëve, thotë analisti i gazetës Wall Street Journal, Gerald Seib.

“Ka një dëshirë të madhe për ndryshim dhe kjo e ndihmon Donald Trumpin. Ai është kandidati ndryshe dhe është kandidati për ndryshim; por ka një shqetësim paralel, që është frika e së panjohurës. Pra ku gjendet kjo balancë? Dëshira për ndryshim nga frika e së panjohurës, pasi Donald Trump është një e panjohur e madhe si udhëheqës politik.”

Trump vazhdon të mbetet në një fushatë agresive përfshi mitingjet e fundit në shtetet kyçe të Floridas dhe Virxhinias.

Udhëheqësit republikanë po shpresojnë që zoti Trump të shmangë sistuatat si ato të javëve të fundit dhe të përqëndrohet në mesazhin e tij për të sjell ndryshime politike.

Presidenti i Turqisë, Recep Tayyip Erdogan, ritheksoi sot në një fjalim në televizion se përpjekja e dështuar për grusht shteti muajin e kaluar ishte planifikuar jashtë vendit. Ndërkohë, një grup deputetësh turq ndodhen në Uashington për t’i nxitur zyrtarët amerikanë të plotësojnë kërkesën e Ankarasë për ekstradimin e klerikut Fethullah Gylen, i cili akuzohet se orkestroi përpjekjen për grusht shteti.

Zyrtarë turq thonë se refuzimi për të kthyer Fethullah Gulenin në Turqi do të vështirësonte marrëdhënien ndërmjet të dy vendeve dhe do të kishte një ndikim të drejtpërdrejtë në stabilitetin rajonal.

“Në një kohë kur lufta për pushtet është në kulmin e saj, do të ishte e papranueshme mundësia që personi që organizoi një puç të përgjakshëm të qëndrojë në një vend aleat, duke patur madje edhe mundësinë të largohet drejt vendeve të treta.”

Takimi tek Departamenti i Drejtësisë ishte bashkëpunues, por zyrtarët turq paralajmëruan për pasoja serioze për marrëdhëniet SHBA – Turqi dhe luftën globale kundër terrorizmit, nëse Uashingtoni nuk përmbush kërkesën e Ankarasë.

Zyrtarët amerikanë nuk kanë komentuar për statusin e kërkesës së ekstradimit, duke përmendur se dokumentat e paraqitura nga Turqia janë duke u studiuar në Departamentin e Drejtësisë.

Sipas qeverisë turke, përpjekja për grusht shteti i ka kushtuar deri më tani ekonomisë së Turqisë rreth 100 milionë dollarë.

Ndërkohë, shefi i shtabit të përgjithshëm të ushtrisë amerikane, Gjenerali Joe Dunford, shkoi dje në Turqi për të konfirmuar rëndësinë e partneritetit strategjik ndërmjet të dy vendeve.

Dy kompani kibernetike amerikane kanë thënë se analizat e kryera mbi ndërhyrjet në kompjuterët e Partisë Demokrate amerikane tregojnë se janë kryer nga “hackerë” rusë.

Të dy kompanitë amerikane përmes një komunikate të publikuar mbrëmë thonë se “domenët” e internetit që janë shfrytëzuar për të sulmuar kompjuterët e demokratëve çojnë te një grup rus i quajtur “Fancy Bear”.

Ky grup ka lidhje me shërbimet ruse të inteligjencës.

I njejti grup e ka kryer edhe sulmin mbi kompjuterat e Komitetit Kombëtar Demokrat në muajin qershor, kanë thënë kompanitë, “Fidelis Cybersecurity” dhe “ThreatConnect”.

Komiteti Demokrat e ka drejtuar gishtin ndaj Rusisë që së paku dy javë, duke thënë se publikimi i emailave nga faqja e internetit “Ëikileaks” ka për qëllim që të ndihmohet, Donald Trump, rivali i kandidates demokrate për presidente, Hillary Clinton.

Rusia deri më tash disa herë e ka mohuar se qëndron prapa sulmeve të tilla kibernetike.

Kandidati republikan për president, Donald Trump, ka ndezur sërish debate pasi sugjeroi gjatë një interviste se puna e bërë prej tij për të krijuar mijëra vende pune është një sakrificë, e krahasueshme me humbjen e jetës gjatë luftimeve në Irak të një ushtari amerikan mysliman.

Khizr Khan, babai i ushtarakut të rënë, Kapitenit Humayun Khan, i tha rrjetit CNN se zoti Trump është “plotësisht i papërshtatshëm për të udhëhequr këtë vend”.

Gjatë intervistës së tij për rrjetin ABC News, kandidati Trump u shpreh se mendon që ka bërë sakrifica të shumta dhe se ka punuar shumë për të punësuar mijëra njerëz, për t’i arsimuar ata, etj.

Pengatoni i ka hedhur poshtë në mënyrë kategorike akuzat e presidentit të Turqisë, Recep Tayyip Erdogan, se ushtria e Shteteve të Bashkuara, është e involvuar në të dhe se në çfarëdo mënyrë e ka mbështetur puçin aktual të dështuar në Turqi.

Presidenti i Turqisë, Recep Tayyip Erdogan, dje i ka kritikuar Shtetet e Bashkuara dhe një komandant të lartë ushtarak, i cili kishte shprehur sheqëtsim se grushtshteti mund të ketë ndikim afatgjatë në raportet e Shteteve të Bashkuara me ushtrinë e Turqisë.

Erdogani tha se Uashingtoni po e merr anën e puçistëve.

Zëdhënësi i Pentagonit, Peter Cook, tha se çfarëdo sugjerimi se Shtetet e Bashkuara e kanë mbështetur puçin është absurd.

Ai theksoi se sekretari amerikan i mbrojtjes, Ash Carter, ka marrë siguri nga pala turke se lufta kundër militantëve të Shtetit Islamik nuk do të pengohet.

Shtetet e Bashkuara ndërmarrin sulme ajrore, bëjnë fluturime vëzhguese dhe misione të tjera nga baza ushtarake turke, Incirlik.

Fushata presidenciale e Hillary Clintonit është sulmuar nga hakerët në kuadër të aksionit më të gjërë kibernetitk kundër institutcioneve të Partisë Demokratike në Shtetet e Bashkuara, kanë raportuar mbrëmë mediat amerikane.

Zyrtarët e inteligjencës së Shteteve të Bashkuara dhe ekspertët privatë, besojnë se sulmet kibernetike ishin kryer nga agjentët që punojnë për qeverinë e Rusisë. Sulmuesit kanë lënë gjurmë, të cilat i identifikojnë ata si rusë, dhe kanë përdorë mjete në të cilat kanë qasje vetëm qeveritë.

Disa kanë shqetësim se Rusia ndoshta po përiqet të ndikoj në zgjedhjet presidenciale. Këtë javë presidenti amerikan, Barack Obama, e ka shturar çështjen e një mundësie të tillë.

Qeveria e Rusisë fuqishëm i ka hedhur poshtë akuzat, duke i përshkruar ato si “helmuese” dhe simptom të “paranojës antiruse”, që shpeshherë i përfshinë fushatat presidenciale amerikane.

Hillary Clintoni pranoi të enjten emërimin si kandidate për presidente e Shteteve të Bashkuara, duke hyrë në histori si e para grua që merr emërimin nga një forcë kryesore politike në Shtetet e Bashkuara.

Zonja Clinton foli në fund të katër ditëve të Kuvendit Demokrat, që përfshiu fjalime nga Presidenti Barack Obama, nënpresidenti Joe Biden dhe kandidati për nënpresident Tim Kaine.

“Amerika është në një moment rivlerësimi. Forca të fuqishme po kërcënojnë të na përçajnë. Lidhjet e besimit dhe të respektit po dobësohen. Dhe ashtu si në kohën e atyre që e themeluan vendin, nuk ka garanci Gjithçka varet nga ne. Duhet të vendosim nëse do të punojmë së bashku, që të ngrihemi së bashku”, tha ajo në fjalimin e saj.

“Ne e kemi të qartë se me çfarë përballet vendi ynë, por ne nuk kemi frikë. Ne do të ngrihemi në lartësinë e sfidës, ashtu siç kemi bërë gjithmonë”, tha ajo.

Zonja Clinton e vuri theksin tek përpjekjet që ajo do të ndërmarrë për të përmirësuar jetën e amerikanëve.

“Misioni im kryesor si presidente do të jetë të krijoj më shumë shanse dhe vende të mira pune me rroga në rritje këtu në Shtetet e Bashkuara. Që nda dita ime e parë në detyrë tek e fundit. Veçanërisht për zona që për një kohë të gjatë janë lënë pas dore. Që nga zonat e varfra të qytetit në qytetet e vogla”, tha ajo.

Zonja Clinton dhe përkrahësit e saj e kanë theksuar vazhdimisht aftësinë dhe përvojën e saj në sfida të sigurisë kombëtare. Vetë ish-Sekretarja e Shtetit ia kushtoi një pjesë të mirë fjalimit pikërisht kësaj fushe.

“Ne përballemi me një zgjedhje po aq të vështirë përsa i takon sigurisë kombëtare. Gjithkush që sheh lajmet nuk mund të mos shohë kërcënimet dhe turbullirat me të cilat përballemi. Nga Bagdadi në Kabul, në Nice dhe Paris dhe Bruksel, nga San Bernardino në Orlando, ne përballemi me armiq të betuar që duhet të munden. Prandaj nuk ka dyshim që njerëzit janë në ankth dhe në kërkim të një udhëheqjeje të qëndrueshme”.

Kuvendi kishte si synim ta vinte theksin tek bashkimi mes demokratëve dhe kjo ishte tema e shumë prej folësve në Kuvend, përfshirë vetë zotin Sanders. Dhe për kandidaten Clinton kjo ishte edhe një nga pikat kryesore.

“Çdo brez amerikanësh është bashkuar për bërë vendin tonë më të lirë, më të drejtë dhe më të fuqishëm. Askush nuk mund ta bëjë këtë vetëm. Prandaj jemi më të fortë së bashku”.

Nata e sotme kishte në qendër çështjet që shqetësojnë gratë, sidomdos në drejtim të barazisë dhe pagës në vendin e punës.

Ishte vajza e zonjës Clinton dhe ish-Presidentit Bill Clinton, Chelsea që e prezantoi nënën e saj. Një ndryshim i madh nga viti 2008 kur mamaja e saj kandidoi për herë të parë dhe vetë Chelsea ishte shumë e drojtur.

Por në këtë fushatë ajo është angazhuar më shumë dhe sot ajo u përball me sfidën më të madhe, ta paraqiste nënën e saj në dritën më të mirë para publikut amerikan.

Zonja Clinton, me fjalimin e saj u përpoq të mbyllte defiçitin e besimit, si fillimin e njërës prej sfidave më të mëdha për të, që populli amerikan ta shohë si të besueshme.

Fjalimi i zonjës Clinton përbëri pikën kulmore të një Kuvendi që filloi nën hijen e bërjes publike të emaileve mes zyrtarëve të partisë demokrate, që tregonte se ata kishin favorizuar zonjën Clinton në fushatën brenda partisë ndaj ish-rivalit të saj Bernie Sanders.

Gjatë Kuvendit, synimi i demokratëve ishte që të bënin kontrastin mes republikanit Donald Trump dhe zonjës Clinton, duke theksuar si një temë të përgjithshme që ai nuk është i zoti të drejtojë një vend.

Në një farë mënyre zoti Trump i ndihmoi, sidomos me deklaratat e tij për politikën e jashtme dhe me sugjerimin që Rusia të depërtojë në emailet e zonjës Clinton.

Toni i Kuvendit, si edhe atij republikan më parë sinjalizojnë se do të ketë një fushatë intensive dhe të ashpër për zgjedhjet e nëntorit.

Presidenti i Shteteve të Bashkuara, Barack Obama, thotë se është e mundshme që Rusia ka dorë në rrjedhjen madhore të emailave të Partisë Demokratike, javën e kaluar, dhe kishte për qëllim të ndikojë në zgjedhjet presidenciale amerikane.

“Çdogjë është e mundshme”, tha Obama mbrëmë vonë në intervistën për rrjetin NBC dhe ka shtuar se “ajo që ne e dimë është se rusët kanë depërtuar në sistemet tona, jo vetëm në ato qeveritare por edhe në sistemet private”.

Mëtutje, zoti Obama theksoi se rivali i kandidates demokrate për presidente, Hillary Clinton, republikani, Donald Trump, “në mënyrë të përsëritur ka shprehur admirim për Vladimir Putinin” dhe ka thënë se ai dëshiron të punojë me Rusinë më për së afërti për t’i zgjidhur problemet globale, siç është lufta kundër grupit ekstremist, Shteti Islamik.

“Unë bazohem në atë që e ka thënë vetë Trump dhe mendoj se ai ka pasur raportim mjaft të favorshëm në Rusi”, tha Barack Obama.

Hillary Clintoni hyn në histori si e para grua që zgjidhet zyrtarisht si kandidate për presidente e një prej partive kryesore në Shtetet e Bashkuara.

Ajo e mori kandidimin zyrtarisht sot, kur u numëruan në sallen e Kuvendit Demokrat votat e delegateve të çdo shteti.

Në një shenjë uniteti, ish-rivali i saj Bernie Sanders kërkoi ndërprerjen e numërimit të mëtejshëm, pasi u kalua kufiri i nevojshëm prej 2383 votash nga delegatët dhe bëri thirrje që procedura e votimit të bëhej me zë.

Ajo do të përballet tani me kandidatin republikan për president Donald Trump, në zgjedhjet e nëntorit.