VOAL

VOAL

Copyright © 2022

VOAL

Rajon

E diela, afati i fundit për Greqinë

Udhëheqësit europianë, mbyllën takimin e mbrëmshëm të nivelit të lartë, ende pa ndonjë rezultat, ndërsa kryeministri grek Aleksis Tsipras, nuk paraqiti një plan konkret reformash, i cili do të duhet të dorëzohet brenda ditës së nesërme. Dita e dielë do të jetë afati i fundit për gjetjen e një zgjidhjeje. Presidenti i Këshillit europian Donald Tusk deklaroi mbrëmë se “realiteti kokëfortë është se kemi vetëm 5 ditë për të arritur një marrëveshje. Deri tani kam evituar të flas për afate. Por sonte dua të them me zë të lartë dhe të qartë se afati i fundit skadon këtë javë. Ne të gjithë jemi përgjegjës për krizën dhe të gjithë kemi përgjegjësinë për ta zgjidhur atë”, nënvizoi Tusk.

Të dielën propozimet e pritshme greke do të duhet të diskutohen në takimin e nivelit të lartë ku siç njoftoi kancelarja Merkel “do të marrin pjesë të 28 vendet anëtare të Bashkimit europian, jo vetëm ata të eurozonës, ndërkohë që Banka qendrore europiane, deri atëherë do të mbajë në jetë bankat greke”.

Presidenti i Komisionit europian Jean Claude Juncker nënvizoi se “jemi të përgatitur për të gjithë skenarët, për Grexit, për ndihma humanitare ndaj Greqisë si dhe për qëndrimin e Greqisë në euro, i cili është dhe skenari që preferoj”, tha ai. Kryeministri grek Tsipras u mundua të qetësojë. “Propozimi i ri përfshin reforma të besueshme. Diskutimi ka qenë pozitiv dhe do të duhet të përmbyllim gjithçka brenda së dielës”, u shpreh ai.

NJË DITË BISEDIMESH INTENSIVE

Të martën, ministrat evropianë të financave u mblodhën në Bruksel për një takim të ngutshëm, ku qeveria greke pritej të bënte propozime të reja për të siguruar një marrëveshje ndihme dhe për të shmangur daljen e vendit nga Eurozona.

Eurogrupi ishte mbledhja përgatitore për një takim të krerëve të vendeve të Eurozonës, i planifikuar për sonte, në të cilën Kryeministri grek Aleksis Tsipras duhet të bindë të 18 udhëheqësit e tjerë.

Shumë prej këtyre udhëheqësve janë të lodhur me pesë vitet e krizës greke, për të autorizuar një kredi të re shpëtimi. Përballja e sotme mund të përcaktojë gjithashtu nëse bankat greke do të rihapen gjatë kësaj jave, apo do të vazhdojnë të qëndrojnë të mbyllura.

Kreu i Eurodrupit Jeroen Dijsselbloem tha se tani për tani nuk ka pasur propozime të reja nga ministri grek, dhe hapi i parë do të jetë që qeveria greke t’i dërgojë Eurogrupit një kërkesë të re.

Trysnia mbi Athinën është rritur, ndërkohë që një nga huadhënësit e saj kryesorë, Banka Qendrore Evropiane, ka vendosur të mos e rrisë sasinë e fondeve emergjente për bankat greke. Pa ndihmë nga jashtë, këto banka pritet të mos kenë më para të mërkurën, në një kohë që Greqia përsëri nuk do të jetë në gjendje të shlyejë pagesën ndaj kreditorëve evropianë këtë muaj.

Në deklaratat e tyre ministrat e financave ishin të ndarë lidhur me qëndrimin që duhet të mbajnë ndaj Greqisë.

Ministri gjerman, Wolfgang Scheuble:

“Pa një program, nuk është e mundur të ndihmohet Greqia në kuadrin e Eurozonës. Sigurisht BE-ja ka detyrime për ta ndihmuar Greqinë, por ajo që ne po presim me padurim është një vendim nga qeveria greke.”

Ministri finlandez, Alexander Stubb:

“Jo, nuk jemi të gatshëm ta lehtësojmë borxhin grek. E bëmë këtë në vitin 2011 dhe përsëri në 2012. Mendoj se koha po mbaron, afati i fundit është 20 korriku.”

Presidenti i Komisionit Evropian, Jean-Claude Juncker i tha sot Parlamentit Evropian se qeveria greke duhet të dalë me propozime për të zgjidhur krizën e borxhit.

“Topi është në fushën e qeverisë greke dhe qeveria greke duhet të shpjegojë në Bruksel sot, se si e sheh daljen nga kjo gjendje. Presidenti i Komisionit Evropian dhe Komisioni Evropian janë të gatshëm të bëjnë çdo gjë që të nevojshme në një afat kohor të arsyeshëm për të arritur një marrëveshje.”

Zoti Juncker tha se është kundër atyre të cilët bëjnë thirrje që Greqia të detyrohet të dalë nga Eurozona, por kritikoi gjithashtu autoritetet e Athinës për retorikën që kanë përdorur.

“Nxjerrja e Greqisë nga bashkimi monetar madje nga Bashkimi Evropian nuk është diçka që ne e dëshirojmë. Komisioni Evropian do të vazhdojë të punojë për një hapje të vërtetë negociatash me Greqinë,” tha zoti Juncker.

Komisioneri i BE-së për ekonominë, Pierre Moskovici tha se një dalje e Greqisë nga Euroja do të ishte një dështim i tmerrshëm, kolektiv.

“Presioni është sidomos mbi grekët, bankat janë të mbyllura dhe situata është e vështirë. Mendoj se qeveria greke ka interes të dalë sa më shpejt me zgjidhje serioze dhe të besueshme.”

Bankat greke qëndruan sot të mbyllura për të nëntën ditë. Disa njerëz të intervistuar në rrugët e Athinës thonë se do të përpiqen të jenë të durueshëm, ndërsa kryeministri i tyre negocion për një marrëveshje në Bruksel.

“Do të ishte një mrekulli nëse bankat hapen për dy ditë. Nuk besoj se kjo do të ndodhë. Duhet një periudhë kalimtare në mënyrë që bankat të mund të rifitojnë besimin e popullit, që njerëzit të mos vërsulen për të kërkuar paratë,” thotë inxhinieri Pavlos Kristou.

“Nuk dua të them diçka të keqe. Unë e dua vendin tim. Për fat të keq qeveria e ka sjellë vendin në prag të shkatërrimit. Të shkretët të rinjë që jetojnë me pensionet e prindërve. Çfarë do të ndodhë me këta fëmijë të varfër?” thotë Nikos.

Nëse bankat greke mbeten pa para dhe vendit do t’i duhet të shtypë monedhën e vet, kjo mund të çojë në daljen e Greqisë nga Euroja dhe ajo do të ishte vendi i parë që do ta bënte këtë duke krijuar një precedent dhe duke ngritur dyshime në lidhje me qëndrueshmërinë afatgjatë të bashkimit monetar evropian.

Pas referendumit Putini i telefonon Ciprasit – Më ke mua

 

UPDATE/Presidenti grek Aleksis Cipras ka pritur një telefonatë nga presidenti rus Vladimir Putin. Mediat greke raportojnë se telefonata ka qenë kërkesë e Putinit dhe është mbajtur në pushim të takimit të sotëm të Cipras në Bruksel.

Pjesë e bisedës, si referojnë mediat, por edhe konfirmuar nga Kremlini, ka qenë rezultati i referendumit grek.

Sipas të njëjtave burim, Putin i shprehu Csiprasit mbështetjen për popullin grek “për kapërcimin e vështirësive.”

Nuk thuhet asgjë nëse pjesë e bisedës të ketë qenë mundësia lidhur me ndonjë ndihmë financiare nga Rusia.

Më herët mediat folen për nënshkrimin e një marrëveshje të mundshme të energjisë në mes të dy vendeve.

Me heret Cipras vizitoi Moskën ku foli me Putin mbi krizën greke dhe pjesëmarrjen e të dy vendeve në projektin e gazsjellesit rus ne Evropë nëpërmjet Turqisë.

ora 12.30 

Porta mbetet ende e hapur, por pas rezultatit të referendumit “per momentin nuk ka alternativa të reha për programin e ndihmës”. Kështu ka deklaruar zëdhënësi i kancelares gjermane Angela Merkel, Steffen Seibert, gjatë një konference për shtyp nga Berlini.

Një ditë pas JO pa hezitim të grekëve, fjalë të rënda vijnë edhe nga anëtari  bordit të BQE-së, Christian Noyer.

06:30 
Ministri i Financave të Greqisë, Yanis Varoufakis ka njoftuar dorëheqjen e tij të parevokueshme nga posti që mbante. Vendimi vjen vetëm disa orë pasi populli grek i tha prerë e qartë JO masave shtrënguese të kreditorëve, përmes referendumit të 5 korrikut.


Lajmin e ka bërë me dije vetë Ministri përmes twitterit, ku shkruan: “ Sot po lë Ministrinë e Financave greke”.

Sipas tij, dorëheqja mendon do t’i shërbejë arritjes së një marrëveshje me Eurogrupin, duke qenë se vetë kreu i financave ka pohuar se prania e tij në takime nuk ka qenë shumë e dëshiruar.

Dorëhiqet kreu i opozitës, Antonis Samaras. Rreth 60 % e grekëve votuan ‘Jo’ ndaj masave të kreditorëve 

UPDATE/ Pas mbylljes së votimit për referendumin, grekët duket se i kanë thënë “Jo” masave shtrënguese të kreditorëve dhe kërkojnë një tjetër marrëveshje.

Ora 23:00
Me publikimin e rezultateve të para, lideri i opozitës në Greqi, Antonis Samaras, dha dorëheqjen. Para votimit të së dielës, Samaras kishte kërkuar që grekët të votonin për “Po”, ndaj masave shtrënguese të kreditorëve.

Ora 21:00
Mediat ndërkombëtare thonë se sipas rezultateve të para, rreth 60 për qind e grekëve ka votuar për “Jo” në referendumin e së dielës, ndërsa zyrtarët e Qeverisë janë gati për të kërkuar para për bankat e tyre. Mësohet se përfaqësues të qeverisë greke kanë thënë se janë gati për një marrëveshje edhe brenda 48 orëve. Po sipas mediave ndërkombëtare, kancelaria gjermane, Merkel pritet të zhvillojë një takim ditën e hënë me presidentin francez, Holande, ku në fokus të bisedimeve do të jetë situata në Greqi pas votimit.

Ora 19:00
Ka përfunduar orari zyrtar i votimit për referendumin e së dielës në Greqi. Sipas sondazheve të publikuara në televizionet greke, votat për “Jo” ndaj masave shtrënguese janë në avantazh ndaj atyre grekëve që kanë votuar me “Pro”.

Sipas televizionit ATN1, rezulton se 51 për qind e grekëve është shprehur për “Jo”, ndërsa 37 për qind janë thënë “PO”. Po kështu televizioni “Mega” thotë se me “Jo” janë shprehur 51.5 për qind e votuesve, ndërsa me “JO”, vetëm 48.5 për qind.

Një tjetër sondazh i kryer nga “Skai” thuhet se 52 për qind mbështesin “Jo”, dhe 48 “Po”.

Sipas mediave në Greqi, pjesëmarrja në votime ka qenë rreth 65 për qind, mëse e vlefshme për të kaluar kuotën 40 %, që referendumi të quhet i vlefshëm.

Kryeministri grek duke votuar

Ora 10:00

Miliona grekë janë drejtuar ditën e sotme drejt kutive të votimit në referendumin që pritet të përcaktojë të ardhmen e Greqisë dhe krizës së saj.
Qendrat e votimit janë hapur në orën 07:00 të mëngjesit me orën lokale dhe do të mbyllen pasdite. Qeveria greke ka bërë edhe sot thirrje për të votuar kundër propozimeve të kreditorëve.

Por opozita greke thotë se një votë kundër propozimeve do të thotë votë kundër BE-së, çka do ta nxjerrë Greqinë nga Eurozona dhe BE-ja.

E veçanta e këtij referendumi është se grekët vetë janë të ndarë mes votës kundër dhe pro. Diferenca është e ngushtë dhe këtë e tregojnë edhe sondazhet.

Ciprasi është parë të votojë në një nga qendrat e votimit në Athinë, po ashtu edhe Presidenti grek.  Liderët e qeverisë së SYRIZA-s i kanë kritikuar kushtet e ndihmës financiare duke i cilësuar si poshtëruese.

Ata refuzojnë që të ndërmarrin masa shtrënguese. Por nga ana tjetër, kreditorët paralajmërojnë se një votë kundër propozimeve të tyre do ta çojë Greqinë në kolaps, pasi do të ndërpriten financimet emergjente të bankave greke, çka e nxjerr Greqinë nga Eurozona.

Ndërkohë ministri gjerman I financave Uolfgang Shojble, një prej kritikëve më të ashpër ndaj Greqisë tha dje se nëse do të vendoset për largim nga eurozona, kjo do të jetë e përkohshme. Gjithsesi, sipas tij, vetëm grekët mund ti përgjigjen kësaj pyetje.

Merkel: Fjalë inkurajuese në prag të vizitës në Ballkan

Kancelarja gjermane Angela Merkel (CDU) e sheh perspektivën e të gjitha vendeve të Ballkanit Perëndimor në BE. «Megjithë vështirësitë, që ende kemi, ka përparime», tha Merkel katër ditë para udhëtimit të saj dyditor për në Shqipëri, Serbi dhe Bosnjë-Hercegovinë në një mesazh të shkurtër në video. Vetëm perspektiva e pranimit mund të sjellë zgjidhjen e konflikteve mes vendeve të rajonit.

Shqipëria ka ende shumë për të bërë

Edhe Shqipëria ka ende shumë për të bërë, por gjithsesi vendi ka statusin e vendit kandidat për BE. “Në përgjithësi mund të thuhet se kemi bërë progres, por ka akoma shumë, shumë probleme të mëdha”, pohoi Merkel.

Edi Rama dhe Angela Merkel Edi Rama dhe Angela Merkel

Kjo gjë mund të thuhet veçanërisht për Bosnjë-Hercegovinën, e cila nuk ka paraqitur ende kërkesën për anëtarësim, për shkak të stanjacionit të situatës politike. Kroacia dhe Sllovenia janë dy shtete të ish Jugosllavisë të anëtarësuar tashmë në BE, “ku gjithçka ecën me shumë sukses”, tha Merkel.

Kusht raportet e Serbisë dhe Kosovës

Me Serbinë janë hapur disa kapituj të bisedimeve për pranim, por jemi akoma në fillimet. Për kancelaren zgjerimi i bisedimeve varet edhe nga përparimet në raportet e Serbisë dhe Kosovës. “Ne përfshijmë këtu edhe masat në lidhje me Kosovën, me qëllim që të dyja palët të përpiqen me të vërtetë për të ecur përpara”, theksoi Merkel. “Ka akoma jashtëzakonisht shumë për të bërë, por ka me të vërtetë shenja të kënaqshme. Dhe ne insistojmë që ky proces të përshpejtohet.”

Fluksi i refugjatëve nga Ballkani

Temë e vizitës së Merkelit do të jetë edhe fluksi i pandërprerë i refugjatëve nga Ballkani për në Gjermani. Kancelarja bëri të ditur se ajo do të prekë edhe gjendjen e vështirë të romëve në Serbi. Serbia ka ndërmarrë një sërë masash, “që zbusin si të thuash diskriminimin e romëve, edhe pse duhet thënë qartë, se ka ende diskriminim.”

Merkel mbrojti edhe kategorizimin e Serbisë si shtet të sigurtë origjine. Për këtë flet ndër të tjera fakti, se në Gjermani nuk pranohet gati asnjë kërkesë për azil nga Serbia. Edhe Britania e Madhe, Franca dhe shtete të tjera evropiane e kanë shpallur Serbinë shtet të sigurtë origjine.

Arminka Heliq, Baronesha që po e tmerron Serbinë

Baronesha me prejardhje boshnjake dhe njëra nga shtatë baroneshat e vetme në Dhomën e Lordës , po konsiderohet si iniciatorja e rezolutës për gjenocidin e Srebrenicës, e cila pritet të sillet për votim në KS të OKB-së, së shpejti. Nëse ajo miratohet, vaj halli për Serbinë. Heliq di shumë për Bosnjën dhe Ballkanin, ndërsa ka këshilluar William Haguen kur ku ka qenë minsitër i jashtëm dhe kur është marrë me rajonin tonë. Ajo i ka dhënë shumë leksione edhe Angelina Joelit kur kjo e bëri filmin e saj për luftën e Bosnjës. Për krejt këto, Heliq po llogaritet si gruaja e cila është duke e tmerruar Serbinë

arminka_heliq

 

Serbia është duke u dridhur nga frika këto ditë. Dhe nuk janë vetëm bisedimet e vështira me Prishtinën në Bruksel, që mbahen nesër, e ku Beogradit pritet t’i kërkohet të lëshojë pe në shumë gjëra, arsye për këtë.

Ndoshta më e rëndë se çështja e Kosovës, për Serbinë, është rezoluta për gjenocidin e Srebrenicës, që pritet të sillet në Këshillin e Sigurimit të OKB-së, nga Britania e Madhe, së shpejti.

Nëse ajo kalon, atëherë Serbia dhe serbët do të identifikohen si shteti dhe kombi që kryen gjenocid, duke e bërë vetën epiqendër të imazhit më të keq të mundshëm ndërkombëtar, për shkak të autorësisë së krimeve më të rënda të mundshme të luftës, ndaj boshnjakëve myslimanë.

E kjo rezolutë, ka për iniciatore një autore të fshehtë, emri i të cilës nuk u bë i ditur deri dje.

Newsweek e Beogradit pretendon se e gjeti atë. Bëhet fjalë për Arminka Helicq një baroneshë misterioze me prejardhje boshnjake. Ajo është vetëm njëra nga gjithsej shtatë femrat në dhomën e lordëve të parlamentit britanik.

Ajo besohet se pati ndikim të madh pse Londra vendosi ta propozojë rezolutën për gjenocid të Srebrenicës.

Heliq ka njohuri të shumta për luftën e Bosnjës dhe masakrën e Srebrenicës, duke qenë se ka qenë e përfshirë në disa forma në këtë luftë.

Për shkak të njohurive  të saj, ajo, më 1998, u angazhua nga konservativët si eksperte e Ballkanit. Më vonë arriti të shndërrohet në “njërën nga ekspertët me impresivë të politikës së jashtme në qeveri”.

Për shkak të angazhimit të madh, por diskret, kryeministri David Cameron e nominoi atë për Dhomën e Lordëve. Më 2014 Heliq u emërua baroneshë (pa të drejtë trashëgimie familjare), nga mbretëresha Elizabetë, për shërbimet e shumta ndaj mbretërisë. Kjo i mundësoi asaj që me 24 nëntor 2014 të bëhet pjesë e Dhomës së Lordëve, si e treta femër myslimane që mbërrin këtu nga kampi konservativ.

Heliq aktualisht është duke e këshilluar liderin e Dhomës së Përfaqësuesve në parlamentin britanik, Willuam Hague. Për të, më herët ka punuar edhe si shefe e kabinetit, derisa ai ishte sekretar shteti.

Ajo njihet edhe si bashkëpunëtore e ngushtë e aktores Angelina Jolie. Kjo e fundit, që bëri edhe film për luftën e Bosnjës, e ka quajtur Heliqin si mentore të saj, duke qenë se i ndihmoi shumë për ta kuptuar situatën në Bosnjë. /Klan Kosova

Në Greqi turizmi i tronditur nga situata kaotike

Turizmi duket se është prekur nga situata kaotike financiare në Greqi. Ndërkohë vetë grekët janë të zemëruar me politikanët që e kanë çuar vendin në këtë situatë.

Sheshi Monastiraki në Athinë, është një destinacion i njohur për turistët. Por disa ditë pas mospagimit të borxhit nga Greqia, pronarët e bizneseve në Athinë po vërejnë ndryshim.

“Fatkeqësisht gjatë ditëve të fundit numri i turistëve ka rënë. Është si në janar. Nuk ka shumë njerëz në rrugë. Duket si dimër. Ajo që dëgjojmë nga fqinjët dhe pronarët e hoteleve është se rezervimet janë anuluar për javët në vazhdim. Duke se ky sezon ka qënë i varfër.”

Të martën, Greqia nuk pagoi këstin e borxhit ndaj Fondit Monetar Ndërkombëtar.

Qeveria vendosi kontrolle mbi kapitalin duke kufizuar tërheqjet nga banka deri në 60 euro në ditë.

Kjo, thotë pronari i restorantit Spiros Bairaktaris, po i mban larg klientët.

“Sapo filloi sezoni, bankat u mbyllën dhe më pas ndodhi gjithë kjo kështu që numri i turistëve ka rënë. Klientët hezitojnë. Të gjithë duket se presin të ndodh diçka.”

Disa turistë të huaj e njohin mirë kontrollin e kapitalit.

Argjentina u detyrua ta vendoste atë në vitin 2002 dhe përsëri një dekadë më pas.

Këta argjentinas që po vizitojnë Athinën janë të detyruar të përdorin dollarë në vend të monedhës së tyre.

“Ne jemi mësuar me këtë në Argjentinë. Kemi kaluar këto momente të tmerrshme. Më duket se njerëzit këtu nuk janë aq të friksuar sa ç’jemi ndjerë ne.”

“Ne ishim tre vjet pa banka. Nuk mund të tërhiqje paratë e tua, asgjë.”

Turistët ende shkojnë në Greqi.

Ata që janë tashmë aty thonë se nuk janë prekur shumë nga kriza e tanishme ende.

“Nuk kemi patur probleme. Erdhëm sot në Athinë dhe nuk jemi përballur me asnjë problem.”

Greqia ende shpreson për një kompromis. Shpresat u rritën të mërkurën për një marrëveshje, vetëm për t’u shuar përsëri.

Kryeministri Alexis Tsipras po bën fushatë për një votë JO për kushtet e shpëtimit të propozuara nga kreditorët në referendumin e të djelës.

“‘JO’ do të thotë presion i fuqishëm për një marrëveshje ekonomike të qëndrueshme që jep zgjidhje për borxhin tonë dhe nuk e rrit atë duke minuar përpjekjet tona për të ndihmuar në ngritjen e ekonomisë dhe shoqërisë greke.”

Kryetari i Eurogrupit, Jeroen Dijsselbloem, foli pas një telekonference me  ministrat e financave të BE-së.

“Duke pasur parasysh situatën politike, refuzimin e propozimeve të mëparshme, referendumin i cili do të mbahet të dielën dhe këshillën e qeverisë greke për një votë “JO”, ne nuk shohim asnjë bazë për bisedime të mëtejshme në këtë pikë.”

Greqia dhe kreditorët janë po aq larg marrëveshjes sa ç’ishin në fillim të negociatave. Një JO në referendum pritet komplikojë më tej dhe jo ta lehtësojë situatën.

Greqia, propozim të minutës së fundit

Greqia e zhytur në borxhe bëri një propozim të minutës së fundit tek kreditorët ndërkombëtarë të martën për të mënjanuar falimentimin.  Ministrat e financave të Eurozonës  thanë se do ta shqyrtojnë propozimin në një tele-konferencë në mbrëmje.

Athina e bëri ofertën vetëm disa orë para skadimit të paketës së ndihmave në mesnatë, edhe pasi qeveria kishte thënë paraprakisht se nuk do të bënte pagesën e këstit prej 1.8 miliardë dollarësh tek Fondi Monetar Ndërkombëtar të martën.

Hollësitë e ofertës së re janë të paqarta, por zyra e kryeministrit Alexis Tsipras tha se qevera po propozon një marrëveshje dy vjeçare që do të përmbushë të gjitha nevojat financiare të vendit “duke pakësuar në të njetën kohë edhe borxhin”.

Shefi i Eurozonës Jeroen Dijsselbloem tha se ministrat e financave të bllokut prej 19 vendesh anëtare do të diskutojnë propozimin grek gjatë një telekonference të martën në mbrëmje.

Nuk është e qartë sesi do të reagojnë miminstrat e financave ndaj planit grek.

Në Uashington, presidenti Barack Obama tha se kriza financiare e Greqisë “është një çështje shumë shqetësuese” por më shumë për Evropën sesa për Shtetet e Bashkuara. Zoti Obama tha se Shtetet e Bashkuara nuk besojnë se trazirat financiare do të rezultojnë në një tronditje të madhe të ekonomisë amerikane, më e madhja në botë.

Greqia dhe kreditorët e saj janë angazhuar në negociata disa javore, me bisedimet që përfunduan fundjavën e kaluar kur zoti Tsipras shpalli mbajtjen e një referendum për të lejuar popullin të vendosë nëse do t’i pranojë apo jo kërkesat e fundit të masave shtrënguese në këmbim të huave të reja.

Zoti Tsipras bëri thirrje për një votë “JO” , megjithëse udhëheqësit evropianë thanë se kjo do të çonte në tërheqjen e Greqisë nga Eurozona dhe drejt një divorci politik me Evropën.

Deri në momentin që Athina bëri një ofertë të minutës së fundit, dukej se ajo po shkonte drejt një mospagimi të këstit të FMN-së.  Bankat greke vazhduan të jenë të mbyllura të marten ashtu si edhe tregu i aksioneve.

Ndërsa e ardhmja financiare e vendit duket e pasigurtë, ministria greke e financave tha se do të hapë gati 1 mijë banka në mbarë vendin për të lejuar pensionistët pa karta krediti të tërheqin para të mjaftueshme për një javë.

BANKA BOTËRORE – GREQIA RREZIK PËR VENDET E RAJONIT

Banka Botërore ngre shqetësimin e infektimit të ekonomive të Shqipërisë dhe rajonit te Ballkanit nga kriza greke.

Në raportin e Perspektivës Globale, publikuar së fundmi, Banka Botërore thekson se “presioni ekonomik e financiar në Greqi paraqet një rrezik shtesë për parashikimet e rajonit, pavarësisht se ekspozimi i vendeve të tjera të Eurozonës është ulur që nga viti 2010“.

Sipas raportit, sistemi Bankar në Shqipëri, Bullgari, Maqedoni, Serbi dhe Rumani, mbetet i pambrojtur përmes degëve të konsiderueshme të bankave greke.

Mes këtyre vendeve, raporti dallon Shqipërinë dhe Bullgarinë ku bankat me kapital grek përbëjnë 18% të totalit të bankave dhe 23%, duke paraqitur rrezikun e përhapjes së ndikimit të sistemit financiar grek edhe në këto vende.

Pas Bankave, raporti përmend remitancat [të ardhurat nga emigrantët] si një faktor në rrezik, duke saktësuar se Shqipëria merr dërgesa nga emigrantët në Greqi sa 3.7% e prodhimit te brendshëm bruto.

Por Banka e Qendrore e Shqipërisë përjashton mundësinë e transmetimit të krizës greke përmes sistemit bankar.

Klodian Shehu, drejtor i Departamentit te Stabilitetit Financar pranë Bankës së Shqipërisë, thotë se bankat me kapital grek në vend kanë mbyllur pothuajse tërësisht dy kanalet e mundshme të transmetimit të krizës: së pari, ato nuk marrin hua nga bankat greke dhe së dyti, nuk po financojnë borxhin grek.

Por zoti Shehu nuk përjashton mundësinë e ndikimit, e cila sipas tij do të duket tek tregtia e investimet.

Ndërsa, në një njoftim për mediat, Shoqata Shqiptare e Bankave siguroi se zhvillimet në vendin fqinj nuk ndikojnë në stabilitetin dhe funksionimin normal të bankave në Shqipëri.

Sistemi bankar shqiptar, ku përfshihen edhe bankat me kapital grek, është financiarisht i pavarur nga sistemet bankare në vende të tjera, shpjegon shoqata.

Në një njoftim për shtyp, theksohet se “të gjitha bankat tregtare operojnë në Shqipëri si njësi të pavarura ligjore. Asnjë nga bankat tregtare në Shqipëri nuk është degë e një banke të huaj”.

Shoqata përjashton mundësinë që masat e marra nga qeveria apo banka qendrore Greke të kenë ndonjë efekt ligjor në Shqipëri.

Bankat greke do të qëndrojnë të mbyllura deri në datën 5 korrik. Në këtë datë grekët do të vendosin me referendum nëse pranojnë ose jo, paketën e shpëtimit të kreditorëve ndërkombëtarë.

Afati i pagimit të këstit të radhës së Greqisë ndaj kreditorëve, përfundon sot, në 30 qershor. rel

Xhihadistët e ISIS kanë arritur në Serbi, këto janë qytetet objektiv i tyre

Çdo tubim masiv i njerëzve mund të jetë një objektiv. Këtu, kryesisht duke iu referuar ngjarjeve të ndryshme, sportive, argëtues e të tjera, ku do të kishte përqendrim të madh të njerëzve, thonë ekspertë të sigurisë në Serbi.

Ministria e Punëve të Brendshme të Serbisë ka vendosur dje që të rris nivelin e sigurisë në pikën më të lartë, bazuar nga të dhënat operative të mbledhura nga shërbimet e sigurisë, të cilat kanë ngritur alarmin për mundësinë e sulmeve terroriste në këtë vend, transmeton lajmi.net.

Sipas këtyre të dhënave, terroristët kanë mbërritur tashmë në Serbi dhe rreziku i sulmeve është shumë i madh, sidomos në tubime të mëdha publike, siq janë festivalet muzikore, panairet apo tubime të tjera, në qytetet e mëdha, si Beograd, Novi Sad dhe Nish.

Analisti ushtarak Aleksandar Radiq i ka thënë gazetës serbe “Kurir” se ISIS zhvillon një fushatë të zgjeruar, më shumë me qëllime të një lufte propagandistike, dhe ky qëllim është konfirmuar edhe nga Miroslav Lazansky i cili thotë se tubimet publike lehtë mund të bëhet një objektiv i terroristëve.

“Çdo tubim masiv i njerëzve mund të jetë një objektiv. Këtu, kryesisht duke iu referuar ngjarjeve të ndryshme, sportive dhe ngjarje argëtuese, ku ka një përqendrim të madh të njerëzve”, ka thënë ai.

Policia serbe ka rritur shkallën e sigurisë, jo vetëm në rrugë, por edhe pranë pallatit të Presidentit, ndërtesave të qeverisë dhe edhe te Prokuroria Speciale, ku shihen policë që bëjnë roje me pushkë të gjata.

Serbia zbulon monumentin e terroristit Gavrilo Princip

VOAL – BEOGRAD – Serbia ka zbuluar monumentin e Gavrilo Princip, vrasësit të princit të kurorës së Astro-Hungarisë, Franz Ferdinand në Sarajevë, ngjarje kjo që ndihmoi në fillimin e Luftës së Parë Botërore.

Princip, një nacionalist serb i Bosnjes, akoma provokon kundërthënie në Ballkanin e ndarë etnikisht.

Qindra serbë morrën pjesë në ceremoninë e zbulimit të këtij monumenti, e cila u mbajt në Beograd më 28 qershor, pikërisht në datën e njëjtë kur ndodhi vrasja më 1914.

Në këtë ditë është edhe festa kombëtare e serbëve, Vidovdani.

Presidenti i Serbisë, Tomislav Nikoliq e ka përshkruar Princip si një hero. Ndërkaq jashtë shtetit serb, Princip cilësohet si terrorist.

Ai tha se “Princip është një simbol i idesë së lirisë”.

S&P – GREQIA I FUNDOS EDHE VENDET E TJERA TË EVROPËS JUGLINDORE

VOAL – Standard and Poor’s paralajmëroi të mërkurën se ajo mund të zhvlerësojë renditjen e kredisë së Bullgarisë, Maqedonisë, Shqipërisë, Rumanisë dhe Serbisë në rast se telashet e Greqisë do të përhapen në sistemin e tyre bankar, shkruan Reuters.

Bankat greke zotërojnë banka të rëndësishme në këto shtete të Europës Juglindore dhe shqetësimi është se në rast se Athina do të detyrohet të dalë nga eurozona, huadhënësit e saj mund të falimentojnë, me një efekt domino në degët e tyre.

Në rast se qeverive të ndryshme do të duhet tu shpëtojnë ato, kjo do të dëmtonte financat kombëtare dhe perspektivën afatgjatë të rritjes.

“Ne nuk e përjashtojmë mundësinë e mbështetjes së qeverisë për bankat,” tha S&P në një raport. “Në rast se një mbështetje e tillë do të dobësojë parametrat fiskalë dhe të borxhit të qeverisë, kjo mund të ndikojë negativisht në renditjen e tyre kombëtare.”

Banka greke Alpha Bank ka përhapjen më të madhe gjeografike në rajon, me degë në Rumani, Bullgari, Serbi, Shqipëri dhe Maqedoni. Eurobank Ergasias dhe Piraeus Bank janë të dyja në Rumani dhe Bullgari dhe e fundit është gjithashtu në Serbi dhe Shqipëri.

S&P tha se bankat mund të kontrollojnë degët e tyre për asetet e tyre më të mira, në një përpjekje për mbijetesë dhe përpjekjet e bankës qendrore për të ngritur kontrolle mund të jenë të pamjaftueshme për të ndaluar largimin e depozitave.

S&P aktualisht e rendit Bullgarinë me BB+ me panoramë të qëndrueshme, Rumania BBB- stabël, Maqedonia BB- stabël, Shqipëria B pozitive dhe Serbia BB- me panoramë negative.

Opozita në Slloveni do shkarkimin e ministres për shkak të ndalimit të Haradinajt

Partia Demokratike e Sllovenisë (SDS) në opozitë ka dorëzuar një mocion për largimin nga detyra të ministres së Punëve të Brendshme të këtij shteti, Vesna Gyorkos Znidar, për shkak të ndalimit të kryetarit të Aleancës për Ardhmërinë e Kosovës Ramush Haradinaj javën e kaluar, nga autoritetet sllovene, raporton Arta TV.

Partia e drejtuar nga ish kryeministri slloven Janez Jansha, akuzon ministren Znidar si përgjegjësen e drejtpërdrejtë, ose së paku me përgjegjësi subjektive dhe objektive me rastin e ndalimit të ish kryeministrit të Kosovës, raportojnë mediat sllovene.

Haradinaj qe ndaluar të mërkurën e kaluar në Aeroportin e Lubjanës përderisa po kthehej nga një vizitë zyrtare në Berlin.

Ndalimi i tij qe bërë në bazë të një urdhër-arresti të lëshuar nga autoritetet serbe në vitin 2004, e të qarkulluar në Interpol.

Grupi i deputetëve të kësaj partie ka vlerësuar se ndalimi i Haradinajt “ka shkaktuar një dëmtim vështirë të riparueshëm të marrëdhënieve me Republikën e Kosovës, të cilat kanë qenë shembullore deri para kësaj ngjarjeje”.

“Komplikimi i marrëdhënieve (me Kosovën) do të ketë ndikim negativ në bashkëpunimin ekonomik ndërmjet Republikës së Kosovës dhe Republikës së Sllovenisë, gjë e cila do t’i shkaktojë dëme të mëdha ekonomisë sllovene”, thuhet në kërkesën për interpelancë për ministren e Punëve të Brendshme, përcjell koha.net. “Ajo ka humbur besimin publik dhe më nuk mund të jetë përgjegjëse për t’i ushtruar funksionet për të cilat është emëruar”, thuhet në kërkesë.

Haradinaj qe liruar tri ditë më vonë.

NISMË PËR FORMIMIN E RAJONIT TË SANXHAKUT

Iniciatorët për konstituimin e rajonit jashtëkufitar të Sanxhakut do t’u dërgojnë ftesë qeverive të Serbisë e të Malit të Zi për formimin e këtij rajoni, shkruan sot e përditshmja e Podgoricës, ‘Vijesti’.

Njëri nga nismëtarët e këtij peticioni, Zaim Çelebiqin, transmeton Koha.net Rožaje free press, ka deklaruar se atë e kanë nënshkruar disa mijëra qytetarë boshnjakë e të tjerë.

“Në Sanxhak mbretëron interesim i jashtëzakonshëm për projektin e rajonit jashtëkufitar të Sanxhakut, sipas modelit të rajoneve evropiane”, thotë Çelebiq. Sipas tij krijimi i këtij rajoni do të kontribuonte për krijimin e ambientit të favorshëm afarist përmes zonave të përziera industriale dhe projekteve të përbashkëta.

“BE bashkëpunimin ndërkufitar e vendos si një detyrë parësore për të gjitha vendet anëtare dhe kandidate”, thotë Çelebiq.

Rajoni jashtëkufitar do të përfshinte komunat: Novi Pazar, Tutin, Nova Varosh, Priboj, Sjenicë, Rozhajë, Prijepole, Plevle, Bijellopole, Berane dhe Plavë.

RAUNDI I RI I BISEDIMEVE KOSOVË-SERBI, REND DITE I NGJESHUR

VOAL – BRUKSEL –Telekomi, energjia, liria e lëvizjes dhe asociacioni i komunave me shumicë serbe janë temat kryesore të bisedimeve të sotme për normalizimin e marrëdhënieve ndërmjet të dyja palëve.

Në Bruksel filloi raundi i ri i bisedimeve ndërmjet Kosovës dhe Serbisë të ndërmjetësuara nga Bashkimi Evropian. Në raundin e sotëm do të trajtohen çështje që kanë të bëjnë me energjinë, telekomunikimet, lëvizjen e lirë në veriun e Kosovës dhe krijimin e asociacionit të komunave me shumicë serbe.

Prishtina pohon se Kosova do ta marrë kodin e saj telefonik 383 drejtpërdrejt nga Unioni Ndërkombëtar i Telekomunikimeve dhe se kërkesa në emër të Kosovës do të bëhet nga ana e Austrisë. Por Beogradi mohon të ketë një marrëveshje të tillë.

Qëndrime të kundërta kanë përshkuar edhe debatet rreth energjisë për shkak të refuzimit të Serbisë që të lërë nën kontrollin e qeverisë së Kosovës të liqenit të Gazivodës që shtrihet përgjatë kufirit verior të Kosovës dhe Serbisë në rajonin e Zubin Potokut, një nga komunat me shumicë serbe ne veri të Kosovës. Ky liqen vlerësohet me rëndësi thelbësore për prodhimin e energjisë elektrike, pos tjerash për faktin se Termocentralet e Kosovës varen nga furnizimi me ujë prej tij. Beogradi ka pohuar se ka ofruar ndarjen e pronësisë 50 me 50 për qind, por Prishtina këtë nuk e ka pranuar.

Qëndrimet janë kundërthënëse edhe për lëvizjen e lirë në veri, përkatësisht largimin e pengesave nga ura kryesore mbi lumin Ibër që shënon edhe vijën ndarëse të Mitrovicës në veriun me shumicë serbe dhe jugun me shumicë shqiptare.

Pjesë e vështirë e bisedimeve pritet të jetë edhe Asociacioni i komunave me shumicë serbe. Prishtina ngulë këmbë se ky asociacion nuk do të ketë pushtet ligjvënës e as ekzekutiv, ndërsa Beogradi kërkon më shumë autonomi të asaj që ai e quan Bashkësia e komunave serbe.

Gjatë ditës pritet të diskutohet edhe shkalla e zbatimit të marrëveshjeve të arritura deri tash. Nga ky zbatim varet edhe ritmi i hapjes së kapitujve të negociatave për anëtarësim të Serbisë në Bashkimin Evropian. Beogradi parasheh takim të vështirë edhe për shkak të pohimeve të diplomatëve evropian se bisedimet 23 qershorit mund të kenë “ndikim vendimtar” për hapjen e këtyre kapitujve. Në fillim të korrikut ne Beograd pritet të qëndrojë edhe kancelarja gjermane Angela Merkel, e cila ngulë këmbë në qëndrimin se hapja e kapitujve të negociatave për anëtarësim duhet të pasojë një marrëveshje gjithëpërfshirëse dhe detyruese për normalizimin e marrëdhënieve ndërmjet Kosovës dhe Serbisë.

Serbia përfitoi hapjen e negociatave për anëtarësim në Bashkimin Evropian pas marrëveshjeve për normalizimin e marrëdhënieve me Kosovën me gjithë kundërshtimin e saj ndaj pavarësisë së Kosovës të shpallur në shkurt të vitit 2008. za

Izetbegoviq: Respekt ndaj viktimave, pastaj pajtimi

VOAL Serbia duhet të pranojë se në Srebrenicë ka ndodhur gjenocid dhe duhet të pranojë sovranitetin e gjykatave në Bosnjë e Hercegovinë, ka thënë anëtari i Presidencës së Bosnjës Bakir Izetbegoviq.

Izetbegoviq për Al Jazera ka thënë se kryeministri serb Aleksandër Vuçiq po tregon gatishmëri që të përmirësojë marrëdhëniet mes Serbisë dhe Bosnjës.

“Për fat të keq ngjarja e fundit me arrestimin e Naser Oriqit në Zvizër janë në kundërshtim me mënyrat dhe fjalët e mira të Vuçiqit. Oriq është për herë të tretë mbrojtës i Srebrenicës, hero i Srebrenicës në burg. Dhe shteti serb kërkon ekstradimin e tij”, ka thënë Izetbegoviq.

Ai ka thënë se ai është në kundërhstim me deklaratat për marrëdhëniet mes serbëve dhe boshnjakëve.

“Duhet t’i pranojë gjyqet, tribunalin e Hagës, ku atje është dëshmuar se në Srebrenicë ka ndodhur gjenocidi. Dhe duhet me këtë të pajtohet, me atë qka kanë bërë Skorpionët”.

Izetbegoviq ka thënë se duhet të shikohen xhirimet e vrasjeve të djemve dhe ta kuptojë se kjo ka ndodhur 8372 herë.

Serbia akuzon Slloveninë dhe BE-në për arrestimin e Haradinajt

 

Kryeministri serb Aleksandar Vuçiq beson se arrestimi i ish-kryeministrit kosovar Ramush Haradinajt nga Sllovenia në bazë të një urdhër-arresti të vjetër të Serbisë është bërë për të shkaktuar probleme për qeverinë serbe gjatë bisedimeve të saj me Kosovën të ndërmjetësuara nga BE-ja, njofton agjencia dtt-net.

“Disa gjëra të çuditshme po ndodhin”, ka thënë Vuçiq për mediat lokale duke komentuar arrestimin e Haradinajt në Slloveni të mërkurën.

Vuçiq pyeti pse Haradinaj u arrestua pikërisht tani dhe jo më parë, kur ai kishte përdorur aeroportin e Lubjanës dhjetëra herë pavarësisht urdhër-arrestit nga Beogradi.

Kryeministri tha për Radion B92 se ish-komandanti i UÇK-së udhëtoi për të “50-ten herë”, duke përdorur të njëjtën pasaportë diplomatike në vendet e BE-së, “dhe tani u arrestua vetëm disa ditë para negociatave (Serbi-Kosovë) në Bruksel”.

Vuçiq tha se në bisedimet e javës se ardhshme me homologun kosovar, Isa Mustafa, “do të ketë presion mbi Serbinë (nga BE)”, i bindur se rasti i arrestimit të Haradinajt është një rast i ri në listë nga ana e BE-së kundër Qeverisë serbe, transmeton kp.

“… Por ne jemi në gjendje t’i përballojmë disa ditë edhe më të vështira. Ne do të shkojmë në Bruksel për të arritur një marrëveshje, dhe nëse do ta arrijmë këtë, ne do të shohim, duhet vullnet nga të dy palët”, tha kryeministri serb.

Haradinaj u arrestua të mërkurën në aeroportin e Lubjanës në kthimin e tij në Kosovë nga Berlini.

Pasaporta e tij është konfiskuar dhe është në pritje të një vendimi përfundimtar nëse ai duhet të ekstradohet në Serbi apo të lirohet për t’u kthyer në Kosovë.

Qeveria sllovene ka premtuar se ish-kryeministri kosovar nuk do t’i dorëzohet autoriteteve të Beogradit, por do të lirohet.

MBYLLJA E KUFIRIT – SERBIA E SHOKUAR NGA PLANI I HUNGARISË

VOAL – BEOGRAD – Kryeministri i Serbisë, Aleksandar Vuçiq, tha se është “i befasuar dhe i shokuar” me planin e qeverisë së Hungarisë, për ta mbyllur kufirin me Serbinë dhe për ndërtimin e një rrethoje përgjatë kufirit për ta ndalur hyrjen e imigrantëve ilegalë.

“Jam i befasuar dhe i shokuar”, tha Vuçiq dhe ka shtuar se “do të diskutojmë për këtë vendim me kolegët hungarezë”.

Këto komente ai i bëri në Televizionin shtetëror të Serbisë nga Osloja, ku gjendet për vizitë.

Dje, më herët gjatë ditës, ministri i jashtëm i Hungarisë, Peter Szijjarto, tha se qeveria kishte kërkuar nga ministria e brendshme që t’i “filloj punët përgatitore për një rrethojë të lartë katër metra përgjatë kufirit”, prej 175 kilometrash.

“Emigrimi është njëri prej problemeve më serioze me të cilat sot ballafaqohet Bashkimi Evropian”, tha Szijjarto, dhe ka shtuar se “shtetet e BE-së janë duke kërkuar zgjidhje, por Hungaria nuk mund të pres më shumë”.

Numri i emigrantëve dhe azilkërkuesve, që po hyjnë në Hungari, shumica duke kaluar kufirin jugor me Serbinë, është rritur shumë prej gjysmës së dytë të vitit 2014.

Zyrtarët thonë se deri tash këtë vit afro 54,000 imigrantë kanë hyrë në Hungari. rel

ARDIAN GJINI PËR RTV 21: SLLOVENIA DUHET TË KËRKOKË FALJE

VOAL – Nënkryetari i Aleancës për Ardhmërinë e Kosovës, Ardian Gjini në emisionin “CLIK” të RTV21, ka deklaruar se shteti slloven, duhet t’i kërkoj falje Republikës së Kosovës për arrestimin e Haradinajt.

Gjini ka theksuar se nëse Sllovenia konsideron Kosovën një shtet me raporte të mira atëherë nevojitet kërkim falje.

” Pas kthimit të Ramush Haradinaj, Sllovenia duhet t’i kërkojë falje Republikës së Kosovës dhe Kuvendit të saj për arrestimin e Haradinajt” ka thënë Gjini duke shtuar se kërkim falje duhet bërë në emër të raporteve të Kosovës me Sllovenin.

Vuçiq: Haradinaj u arrestuar për t’i bërë presion Serbisë para bisedimeve në Bruksel

VOAL – Kryeministri i Serbisë, Aleaksandër Vuçiq, me rastin e arrestimit të liderit të AAK-së, Ramush Haradinaj në Slloveni, ka thënë se dikujt i ndodhin gjëra të çuditshme.

Vuçiq, në një deklaratë për B92, ka thënë se ky është rasti i 50-të që Haradinaj udhëton me të njëjtën pasaportë diplomatike, ndërsa sot, pikërisht pak ditë para bisedimeve në Bruksel, e arrestojnë.

“Me siguri se do të ketë presion ndaj Serbisë, por ne jemi të gatshëm të përballojmë situata edhe më të rënda. Do të shkojmë në Bruksel për t’u dakorduar, por se a do ta arrijmë këtë, mbetet të shohim. Për të luajtur tango nevojiten dy persona”, ka thënë Vuçiq.

Vuçiq ka thënë se, ju mbetet brenga e madhe ta ruajnë stabilitetin, prandaj nuk guxojnë të reagojnë padurueshëm, mirëpo as të lejojnë që dikush të diskreditojë, nënçmojë dhe shkelë.

“Nuk më pëlqejnë teoritë e konspiracionit, por në vendin tonë janë nxitur pasionet politike para ardhjes së zonjës Merkel, para dialogut në Bruksel, para Srebrenicës dhe para vendimit të FMN-së”./Zëri

BUJANOC – XHANDARMËRIA SERBE RRETHOI DOBROSININ

Forca të mëdha të Xhandarmërisë serbe kanë hyrë mbrëmë në fshatin kufitar Dobrosin të Bujanocit, duke shqetësuar banorët e zonës kufitare.

Xhandarmëria nga mesnata është koncentruar në disa lagje të fshatit, si dhe ka patrulluar deri në afërsi të fshatit Stublinë të Komunës së Gjilanit, raporton Zëri.

Banorët i druajnë ndonjë skenari të mundshëm të autoriteteve në Beograd, që do të ishte me pasoja për shqiptarët e këtij lokaliteti.

Ata kërkojnë nga faktori politik dhe institucional në Luginë, që të informohen për këtë prani të xhandarëve serb në trojet shqiptare të mbetura në Serbi.

Lidhur me gjendjen e tensionuar në fshatrat e rripit kufitar, ka reaguar edhe kryetari i Këshillit Kombëtar të Shqiptarëve në Luginën e Preshevës, Jonuz Musliu.

“Qëllimi kryesor është ajo që ka deklaruar edhe vet gjenerali serb, që paralajmëroi se në vijim do të ketë masa të shtuara në Luginë të Preshevës. Serbia ende po ia tregon muskujt shqiptarëve”, deklaroi Musliu, ish udhëheqës politik UÇPMB-së.

Ndryshe, Dobrosini është fshati i parë kufitar i banuar me shqiptarë në Malësinë e Karadakut të Bujanocit.

15 vjet më parë ky fshat ka qenë bastioni dhe vendlindja e ish-Ushtrisë Çlirimtare për Preshevë, Medvegjë dhe Bujanoc (UÇPMB). /Zëri

Radio Evropa e Lirë – Heshtja e Serbisë ndaj gjenocidit në Srebrenicë

Autoritetet e Serbisë janë të shqetësuara për shkak të rezolutës së paralajmëruar për Srebrenicën, të cilën Britania e Madhe po ia propozon Këshillit të Sigurimit të Kombeve të Bashkuara, në prag të 20 vjetorit të gjenocidit.

Kur misioni i Britanisë së Madhe në Kombet e Bashkuara ia dorëzoi Serbisë propozimin për rezolutën për Srebërnicën, për të cilën Këshilli i Sigurimit të Kombeve të Bashkuara do të duhej të diskutonte në mbledhjen e 7 korrikut, ministri i Punëve të Jashtme i Serbisë, Ivica Daçiq, tha se Beogradi do ta shqyrtojë me kujdes përmbajtjen e tekstit.

Më parë, kryeministri i Serbisë, Aleksandar Vuçiq, duke folur për këtë rezolutë, theksonte se rrethi që po krijohet është i vështirë dhe i rrezikshëm..

Por, Zharko Koraq, politikan dhe psikolog, i tha Radios Evropa e Lirë se politika e Beogradit ndaj Srebrenicës ka qenë gjithmonë që të shtihet kinse ajo ngjarje nuk ekziston fare dhe se nuk ka ndodhur.

“Kjo është një politikë, të cilën unë do ta quaja ashtu siç tradicionalisht quhet, politikë e strucit, do të thotë ta fusësh kokën në rërë dhe të shtiheni kinse asgjë nuk ka ndodhur”.

“Në fakt, rezoluta angleze ia përkujton Serbisë faktin që ajo është dashur të jetë nismëtare morale e rezolutës ose ndonjë deklaratë për Srebrenicën, por ajo e ka humbur këtë rast dhe tashmë është në pozicion që të reagojë lidhur me atë që të tjerët dëshirojnë të deklarojnë dhe mënyrës se si dëshirojnë ta shënojnë këtë ngjarje të tmerrshme”, tha Koraq.

Ndërkohë, mediet tashmë raportojnë se rezoluta për Srebrenicën parasheh që fëmijët në të ardhmen në shkolla të mësojnë për gjenocidin dhe se dënohet çdo mohim i gjenocidit.

Në anën tjetër, një gjë e tillë po ndodhë nga disa adresa të caktuara politike.

Kryetari i Serbisë, Tomisllav Nikoliq, kohë më parë mohoi të ketë pasur gjenocid në Srebrenicë.

“Në Srebrenicë nuk ka pasur gjenocid. Është shumë e vështirë të akuzosh në gjykatë dhe të dëshmosh se ka pasur formë të gjenocidit”, ka thënë Nikoliq.

Ndërkaq, ministri i jashtëm serb, Daçiq, thekson se e ka lexuar propozimin e rezolutës.

“Në atë tekst, 20 herë përmendet gjenocidi dhe vetëm një herë pajtimi”, ka theksuar Daçiq.

Profesori i të drejtës ndërkombëtare në Universitetin e Nontingemit, Marko Milanoviq, nuk beson se Këshilli i Sigurimit të Kombeve të Bashkuara do ta sjellë rezolutën për Srebrenicën me formulim ligjor obligues, për shkak se për çfarëdo dokumenti që sjellë ky mekanizëm, është i nevojshëm pajtimi i të gjithë anëtareve, pra edhe i Rusisë.

Por, sipas tij, fuqia e rezolutës së Kombeve të Bashkuara është politike, ashtu siç ka qenë edhe rezoluta që dënoi gjenocidin në Ruandë.

“Rëndësia e rezolutës, para së gjithash është simbolike. Për këtë shkak kjo edhe po i pengon autoritetet në Serbi, sepse kjo do t’ju krijojë problem politik. Kurdo që do të takohen me ndonjë zyrtarë të lartë ndërkombëtarë, mund t’i pyesin se ‘a keni vepruar sipas rekomandimeve ose vendimeve të Këshillit të Sigurimit dhe çka ju po bëni lidhur me gjenocidin në Srebërnicë”, tha Milanoviq.

Ai shtoi se në qoftë se një rezolutë e Këshillit të Sigurimit rekomandon që 11 qershori të konsiderohet si ditë e përkujtimit të gjenocidit, Serbia mund ta refuzojë këtë në aspektin ligjor, por në aspektin politik kjo do të ishte e dëmshme për të.

Presidenti Nikoliq e anuloi vizitën në Bosnjë

Presidenti i Serbisë, Tomisllav Nikoliq, sot e ka anuluar vizitën e tij në Bosnjë, pasi një anëtar i presidencës tripalëshe të Bosnjë Hercegovinës, e kundërshtoi udhtëimin e tij, për shkak të arrestimit të ish-komandantit të myslimanëve të Bosnjës, lidhur me akuzat për krime lufte nga Serbia.

Vizita e Nikolliqit është dashur të realizohet nesër dhe do të ishte vizita e parë zyrtare e tij, prej vitit 2012.

Por Bakir Izetbegoviq, anëtar mysliman i presidencës së Bosnjë Hercegovinës, sot ka bërë thirrje që Nikoliq ta shtyjë vizitën e tij për shkak se në Zvicër është arrestuar, Naser Oriq, komandant i myslimanëve të Bosnjës në Srebrenicë, gjatë luftës ndëretnike në këtë vend në periudhën 1992-95.

Oriq është arrestuar në Zvicër më 11 qershor.

Srebrenica është qytet, ku forcat serbe të Bosnjës i kanë vrarë afro 8 mijë burra e djem myslimanë, në korrik të vitit 1995, që ishte masakra më mizore në tokën evropiane prej Luftës së Dytë Botërore.

Zyra e Nikolliqit tha se ai ishte detyruar t’i ndryshoj planet dhe do ta vizitoj Bosnjë Hercegovinën “kur të tre anëtarët e presidencës do të tregojnë unitet dhe gatishmëri”. rel

SERBIA KA MARRË TEKSTIN E PROJEKTREZOLUTËS PËR SREBRENICËN NGA BRITANIA

 VOAL – NJU JORK – Misioni i Britanisë në Kombet e Bashkuara ia ka dorëzuar Serbisë propozimin e rezolutës për Srebrenicën, e cila me gjasë do të shqyrtohet në mbledhjen e Këshillit të Sigurimit më 7 korrik, ka deklaruar sot ministri i jashtëm i Serbisë, Ivica Daçiq.

“Thuhet se qëllimi i rezolutës është pajtimi, por në atë tekst në 20 vende përmendet gjenocidi dhe vetëm një herë pajtimi”, tha Daçiq.

Ai mëtutje është shprehur se “Serbia tashnë ka treguar përkushtim për dënimin e krimeve të luftës, por qeveria e Serbisë do të udhëhiqet me interesat shtetërore e kombëtare kur kemi të bëjmë me këtë temë”, tha Daçiq në konferencën e rregullt me gazetarë në Beograd.

Sipas tij, ende nuk janë kryer konsultimet me shtetet e tjera anëtare të Këshillit të Sigurimit dhe se pritet që ato të mbahen gjatë javës së ardhshme.

Ivica Daçiq tha se rezoluta për Srebrenicën, të cilën e përgatit Britania, përmbanë pjesë të përgjithshme, të cilat direkt kanë të bëjnë me krimet në Srebrenicë. rel

Bosnje – Protestë për lirimin e Naser Oriqit

VOAL – SARAJEVË – Disa qindra veteranë të luftës në Bosnje dhe Hercegovinë protestuan kundër arrestimit të një komandanti mysliman të luftës.

Autoritetet zvicerane kanë arrestuar Naser Oriqin më 10 qershor, me kërkesë të Serbisë.

Beogradi e akuzon atë për vrasjen e nëntë civilëve serbë në vitin 1992, në një qytet pranë Srebrenicës.

Protestuesit në Sarajevë kërkuan lirimin e menjëhershëm të tij. Oriq është liruar nga Tribunali i Hagës në vitin 2008. Ai ka thënë se ai nuk ka komanduar forcat që kanë kryer krime lufte. rel

VËRSHIMI I EMIGRANTËVE – HUNGARIA MUND TA MBYLLË KUFIRIN ME SERBINË

Hungaria mund të mbyllë plotësisht kufirin me Serbinë, për të ndaluar fluksin e emigrantëve në territorin e saj, ka paralajmëruar kryeministri hungarez, Viktor Orban.

“Nuk është e drejtë të na dërgojnë emigrantë. Duhet t’i ndalojnë në territorin serb”, ka thënë Orban, transmeton Shërbimi i Ballkanit i Radios Evropa e Lirë.

Ai po ashtu ka thënë se është planifikuar një takim me autoritetet serbe në fillim të muajit korrik.

“Po i shqyrtojmë të gjitha mundësitë, përfshirë edhe mbylljen komplete të kufirit”, ka thënë Orban, duke shtuar se vendimi do të merret më 17 qershor.

Sipas të dhënave të Qeverisë hungareze, 95 për qind e emigrantëve arrijnë në Hungari përmes Serbisë, e cila nuk është anëtare e Bashkimit Evropian.

Rreth 75 për qind e tyre janë nga Siria, Iraku dhe Afganistani, të cilët ikin nga konfliktet në vendet e tyre.

Në janar dhe shkurt të këtij viti, në Hungari po ashtu ka hyrë numër i madh i shtetasve kosovarë, të cilët janë larguar për shkak të situatës ekonomike. rel

TERRORISTËT NË BALLKAN

Vendet e Ballkanit po përballen gjithnjë e më shumë me problemin e xhihadistëve. Organizatat ekstremiste gjejnë truall të përshtatshëm kryesisht në vendet e traumatizuara nga lufta si Bosnje-Hercegovina dhe Kosova.

Ka shumë ditë që në internet po qarkullullon një video ku mund të shihet “një mesazh” për banorët e vendeve të Evropës Juglindore. Në videon e prodhuar nga Shteit Islamik, në Qendrën e tyre për media Hayat, janë dërguar edhe kërcënime të shumta. “Nëse ke mundësi vendose një lëndë shpërthyese nën makinat e tyre”, thërret një mjekrrosh me emrin Salahuddin, sipas të gjitha gjasave nga Bosnja. Ai thërret që të “helmohen të pafetë” dhe “të vriten kudo që janë: në Bosnje, në Serbi, në Sanxhak.”

Video-propaganda dëshmon ndryshimin e strategjisë së Shtetit Islamik. A do të hapet tani edhe një front në Ballkan – me ndihmën e atentatorëve individualë? Eksperti për terrorizëm, Peter Neumann nga Londoner King´s College mendon: “Ata po i bëjnë ftesë individëve që të kryejnë aksione të këtilla të tmerrshme.”

Kërkesat për bashkëpunim

Një sulm terrorist tronditi shumë banorët e qytetit boshnjak Zvornik, në fund të prillit. Një burrë i armatosur thirri “Allahu akbar” dhe qëlloi për vdekje një polic. Sulmuesi, sipas burimeve të policisë, ka pasur kontakte intensive me një të kthyer nga lufta e Sirisë. Ministri i Jashtëm i Austrisë, Sebastian Kurz, kërkon angazhimin e përbashkët të kolegëve në rajon dhe paralajmëron: “Pasi lëvizjet nga Evropa në Irak apo Siri kalojnë para së gjithash nëpër Ballkan, dhe këto vende për fat të keq ende ofrojnë truall të volitshëm për radikalizma, siguria jonë varet shumë edhe prej stabilitetit të Ballkanit.”

Terrorismus Zvornik Bosnien und Herzegowina Sulmi në Zvornik, 27.04.2015

Vendet e Ballkanit deri tani janë trajtuar vetëm si vende tranzit dhe vendstrehim për xhihadistët. Por predikukesit salafistë janë duke rekrutuar luftëtarë në veçanti në Bosnje dhe në Kosovë. Vetëm nga Kosova kanë shkuar në luftë, sipas vlerësimeve të organeve të sigurisë, rreth 250 luftëtarë. Edhe në Bosnje ka fshatra të tëra të rrezikuara nga ekstremistët. Politologu boshnjak Vedran Xhihiq nga Universiteti i Vjenës thekson: “Kur shikon shifrat e personave të rekrutuar nga vendet e Evropës, atëherë mund të konstatosh se vendet e Ballkanit janë ndër të parat. Do të thotë: Bosnja dhe Kosova janë në vendet e para. Të rrezikukara janë e gjithë Bosnja, Kosova, disa pjesë të Maqedonisë dhe Serbisë. Në Sanxhak të Serbisë ka pasur prej dekadash elemente dhe tendenca radikale. Ekziston rreziku që këto tendenca të shtohen.” Ballkani mbetet edhe një zonë tranziti për xhihadistët. Tani IS i ka cënuar edhe këto vende.

IS-Flagge in Gornja Maoca, Bosnien Flamuri i IS valëvitet në Gornja Moaca në Bosnje

Kërcënimet e reja

Në videon e fundit të IS, ata llogarisin me frikën e njerëzve. Xhihadistët paralajmërojnë për masakra të reja në Srebrenicë, Mostar apo Gorazhdë. Shteti Islamik premton se do t’i ndihmojë këto vende, me shpresë se do të fitojë simpati dhe mbështetje atje. Por çfarë po bëhet kundër xhihadistëve? Të gjitha vendet e Ballkanit i kanë ashpërsuar rregullat ligjore. Janë shtuar edhe përndjejkjet dhe arrestimet. Eksperti për terrorizmin Peter Neumann thotë se duhen nxjerrë mësime nga strategjia e përdorur në futboll. “Me rëndësi është që këtyre personave t’u merren pasaportat, para se të udhëtojnë. Për këtë duhet të ketë baza ligjore. Në Britaninë e Madhe për shembull, ekzistojnë rregullat që janë nxjerrë për të luftuar huliganizmin në stadiume. Këto mund të aplikohen edhe tani, sepse prioriteti kryesor është që të evitohet udhëtimi i këtyre personave.” dw

VDIQ DRAGOLJUB TODOROVIC – AVOKATI I KOSOVËS NË BEOGRAD – NË KOSOVË ASKUSH NUK E THA NJË FJALË PËR TË

VOAL – Më 14 maj në Beograd vdiq Dragoljub Todorović-i, avokat i të mbijetuarve të masakrave serbe mbi familjet Bogujevci (Podujevë) e Berisha (Suharekë) – dhe përfaqësues juridik i vëllezërve Bytyqi, po ashtu të vrarë nga forcat serbe. Dragoljub Todorović-i ishte avokat, publicist, kronist, kulturolog, humanist, enciklopedi e gjallë, mik i madh i shqiptarëve, dashnori më i madh i Sarajevës dhe europiani ndoshta më i madh në Beograd.

Në Kosovë askush nuk e regjistroi me ASNJË fjalë vdekjen e tij. Ai ishte avokat i Kosovës në Beograd./koha.net

Vuçiç – Bisedimet me Kosovën do të jenë të vështira

Kryeministri i Serbisë, Aleksandër Vuçiç, tha të enjten në Beograd se bisedimet me Kosovën për normalizimin e marrëdhënieve, të parapara të mbahen me 23 qershor, do të jenë shumë të vështira

Raundi i ri i bisedimeve pritet të trajtojë çështje që kanë të bëjnë me energjinë, telekomunikimet dhe lëvizjen e lirë të njerëzve e mallrave në veriun e Kosovës, përkatësisht hapjen e urës kryesore mbi lumin Ibër që shënon vijën ndarëse të Mitrovicës, në veriun e banuar me shumicë serbe dhe jugun me shumicë shqiptare.

Po, ashtu në këto bisedime pritet të diskutohet edhe shkalla e zbatimit të marrëveshjeve të arritura deri tash ndërmjet të dyja palëve. Nga ky zbatim varet edhe ritmi i hapjes  së kapitujve të negociatave për anëtarësim të Serbisë në Bashkimin Evropian.

Të hënën, raportuesi për Serbinë në Parlamentin Evropian, David McAllister, tha se bisedimet e 23 qershorit mund të kenë “ndikim vendimtar” për hapjen e këtyre kapitujve.

Kryeministri serb për këtë arsye radhiti ne mesin e vështirësive që e presin Serbinë gjatë ditëve të vazhdim edhe vizitën e paralajmëruar për në fillim të korrikut ne Beograd të kancelares gjermane Angela Merkel, e cila ngul këmbë në qëndrimin se hapja e kapitujve të negociatave për anëtarësim duhet të pasojë një marrëveshje gjithëpërfshirëse dhe detyruese për normalizimin e marrëdhënieve ndërmjet Kosovës dhe Serbisë.

Serbia përfitoi hapjen e negociatave për anëtarësim në Bashkimin Evropian pas marrëveshjeve për normalizimin e marrëdhënieve me Kosovën e cila shpalli pavarësinë e saj në vitin 2008. za

EKSPERTËT – MAQEDONIA KA ÇËSHTJE TË HAPURA ME TË GJITHË FQINJËT

Njohësit e marrëdhënieve ndërkombëtare konsiderojnë se kriza politike në Maqedoni, e cila siç theksojnë, po zgjat me vite, ka thelluar edhe më shumë problemet që ka Maqedonia me fqinjët e saj.

Megjithatë, ata nuk pajtohen rreth asaj se kriza në Maqedoni vjen nga brenda apo jashtë saj.

Ish-diplomati Risto Nikovski konsideron se problemet e Maqedonisë me fqinjët kanë karakter shekullor, por siç shprehet ai, për momentin këto probleme arrijnë amplituda më të theksuara si rrjedhojë e zhvillimeve të brendshme në vend.

“E gjithë kjo që është duke ndodhur në Maqedoni, afera Puçi, përgjimet, të gjitha këto janë vepra të shërbimeve të huaja të ndihmuara nga politikanë të papërgjegjshëm, të cilët veprojnë në vend. Në një situatë kur janë të dukshme pretendimet e grupeve të caktuara, të cilat veprojnë në fqinjësi të Maqedonisë, është e kuptueshme se Maqedonia, si shtet, ndodhet në një situatë të ndjeshme edhe në raportet e saj zyrtare me fqinjët”, vlerëson Nikovski.

Por, me këtë qëndrim nuk pajtohet Ylber Sela, ligjërues i marrëdhënieve ndërkombëtare në Universitetin e Evropës Juglindore në Tetovë. Sipas Selës, pikërisht politikat e gabuara të Qeverisë Gruevski që nga 2006-a, janë ato që në vazhdimësi acarojnë raportet e Maqedonisë si shtet me fqinjët e saj.

“Pra, është politika e brendshme e Maqedonisë ajo e cila reflektohet edhe në raportet me fqinjët e saj. Maqedoninë tashmë disa vite e tangojnë disa çështje të brendshme, siç është çështja e emrit, regjistrimi i popullatës, projekti ‘Shkupi 2014’, kohë pas kohe edhe skenarët e ndryshëm në aspektin e tensionimit të raporteve ndëretnike, së fundmi dhe rasti i Kumanovës, të gjitha këto është e kuptueshme që ndikojnë në përkeqësimin e raporteve ndërfqinjësore që paraqet shtyllën kryesore të bashkëpunimit rajonal dhe atij evropian”, nënvizon Sela.

Nga ana tjetër, ish-diplomati maqedonas Denko Malevski konsideron se Maqedonia si shtet i ri në Ballkan është e kuptueshme që të ketë çështje të hapura me fqinjët e saj, të cilat probleme, rrënjët kryesisht i kanë në aspektin historik.

Por, siç shprehet ai, në funksion të procesit të integrimeve, elitat udhëheqëse duhet me delikatesë të shmangin historinë dhe të përcaktohen për realizimin e interesave që kanë të bëjnë me të ardhmen e Maqedonisë si shtet.

“Ashtu si të gjitha vendet tjera të rajonit, ne, si shtet, për t`i realizuar qëllimet tona strategjike, që të bëhemi pjesë e strukturave euroatlantike, patjetër duhet të ballafaqohemi me faktin se është e domosdoshme t`i zgjidhim çështjet e hapura me fqinjët tanë”.

“Këtu nuk ka asnjë filozofi të paqartë, pra duhet të shohim se çka është ajo që nxit shqetësim te fqinjët tonë dhe njëkohësisht në mënyrë delikate t`u shmangemi çështjeve historike duke u orientuar kah e ardhmja, pa e dëmtuar trungun e Maqedonisë si shtet”, vlerëson Malevski.

Ndryshe, Maqedonia në rrugëtimin e saj euroatlantik duhet të zgjidhë kontestin që ka me fqinjin e saj jugor, Greqinë, për çështjen e emrit, përderisa me Bullgarinë ka ngritur si problem çështjen e gjuhës, me Serbinë nga shkëputja e Maqedonisë nga ish-Federata Jugosllave mbetet çështja e kishës, së fundmi edhe Tirana zyrtare ka theksuar se Maqedonia mund të përballet me veto gjatë anëtarësimit në NATO nëse nuk realizon Marrëveshjen e Ohrit. rel

DASH – SERBIA TA ZGJIDHË ÇËSHTJEN E VËLLEZËRVE BYTYÇI

Zëvendës Sekretari amerikan i Shtetit, Anthony Blinken e siguroi Kryeministrin e Serbisë Aleksandar Vuçiç se SHBA mbështesin pranimin e Serbisë në Bashkimin Evropian si dhe vazhdimin e përparimit në dialogun me Kosovën.

Gjatë një takimi mbrëmë në Uashington, zoti Blinken vlerësoi reformat ekonomike, politike dhe juridike të ndërmarra nga Kryeministri Vuçiç dhe e inkurajoi qeverinë serbe që të vazhdojë të përqendrohet në këto aspekte.

Ai gjithashtu nguli këmbë për zgjidhjen e çështjes së vrasjes së vëllezërve Bytyçi me shtetësi amerikane dhe me origjinë nga Kosova.

Zoti Vuçiç u takua edhe me Ndihmës Sekretaren e Shtetit për Eurazinë, Victoria Nuland. Ata diskutuan mbi çështjen e anëtarësimit të Serbisë në Bashkimin Evropian, përparimin në dialogun me Kosovën, masat kundër korrupsionit si dhe çështjen e diversifikimit të burimeve energjetike të Serbisë.

Kryeministri serb i dha fund vizitës në Uashington. za

DËNOHEN KËRCËNIMET E ISIS-it KUNDËR BALLKANIT

 

Në Shqipëri dhe në Kosovë, përfaqësues të komunitetit mysliman dhe të shoqërisë civile, dënuan kërcënimet e shfaqura në një video të grupit Shteti Islamik.

Një video e shfaqur nga seksioni i medias i grupit Shteti islamik përmban kërcënime të luftëtarëve të tij ndaj Ballkanit, ndërsa dy prej tyre, Abu Muqatil (Al Kosovi) dhe Abu Bilqis (Al Albani) duke folur shqip paralajmërojnë hakmarrje, siç thuhet  “ndaj atyre që kanë poshtëruar myslimanët” ndërsa thonë se “armiqtë e Allahut po kërkojnë t’i përçajnë”.

Mediat vendase i identifikuan folësit në gjuhën shqipe si Ridvan Haqifi nga rajoni i Gjilanit në Kosovën lindore që kishte shkuar në Siri në vitin 2012 dhe Almir Daci nga fshati Leshnic i Pogradecit në Shqipëri.

Forumi Intelektual Mysliman Shqiptar reagoi dukë theksuar se në fjalët e shfaqura në video nuk ka asgjë njerëzore. Ata nuk përfaqësojnë asnjë lloj feje, pavarësisht se flasin në emër të saj. Duke marrë shkas nga kjo video, e cila është në gjuhën shqipe, Forumi Intelektual Mysliman i bën thirrje organeve përgjegjëse që të reagojnë dhe të marrin masat e duhura ndaj këtyre kërcënimeve.

Në Kosovë, zëdhënësi i Bashkësisë Islame, Ahmet Sadria, duke i dënuar thirrjet e tilla të grupit Shteti Islamik, tha se ato nuk kanë të bëjnë asgjë me Islamin.

​​“Fatbardhësisht, të gjitha institucionet botërore relevante islame, e kontestojnë një gjë të tillë. Por, normalisht që na shqetëson fakti sepse, kjo është në vazhdën e propagandës së tyre që po e shihni se është bukur e fuqishme dhe normalisht që edhe ne e presim më shqetësim dhe bëjmë apel tek të gjithë qytetarët tanë që të mos bien pre e propagandave të tilla të cilat mund të na shqetësojnë, por gjithmonë duke pasur parasysh që rreziku mund të jetë permanent edhe nga paraqitjet e tilla”, tha zoti Sadria.

Skënder Perteshi nga Qendra e Kosovës për Studime të Sigurisë, tha së gjuha e shfaqur në video paraqet kërcënime tashmë të dëgjuara.

“Mendoj që shteti duhet të zbatojë planet operacionale që i parasheh policia e Kosovës dhe institucionet tjera të sigurisë, planet që parashohin parandalimin e terrorizimit. Nuk besoj që duhet të ketë ndonjë rritje të gatishmërisë vetëm për këto deklarata. Planet duhet të jenë afatgjate, duhet të jenë shumë serioze dhe të koordinueshme edhe me bashkësinë ndërkombëtare dhe mekanizmat rajonal të sigurisë, por edhe me aktorë të tjerë shtetëror dhe jo shtetëror në Kosovë, siç është Bashkësia Islame, komunat, qeveria dhe institucione të tjera”, tha zoti Perteshi.

Zoti Sadria thotë se në prag të muajit të Ramazanit janë zhvilluar e po zhvillohen takime me imamët në terren për të diskutuar edhe qasjen ndaj propagandës agresive të grupit Shteti Islamik.

“Dhe ndër temat që janë trajtuar ka qenë edhe kjo ku është bërë apel tek imamët, që gjatë muajit të madhërishëm të Ramazanit, ku prezenca e xhematit është shumë më e madhe nëpër xhami që të trajtohet dhe të thirret xhemati që të rinjtë tanë të mos bien pre e propagandave të tilla”, tha ai.

Zoti Perteshi tha se videoja është pjesë metodave të rekrutimit që i përdor Shteti Islamik që nëpërmjet tyre synon të shndërrohet në pjesë të ligjërimit të përditshëm.

​​“Unë mendoj që nëse ne në Kosovë i kushtojmë një rëndësi shumë të madhe këtyre videove dhe i kushtojmë një rëndësi të madhe diskutimit rreth këtyre videove, rreth këtyre deklarimeve, vetëm sa u japim një hapësirë më të madhe, propagandës së Shtetit Islamik dhe strategjisë së tyre të komunikimit”, tha ai.

Kosova është përballur me sfidën e pengimit të përfshirjes së qytetarëve të saj në luftërat në Lindjen e mesme. Sipas një raporti të qendrës për studime të sigurisë, deri në muajin janar të këtij viti, 232 qytetarë të Kosovës kanë shkuar në Siri dhe Irak për të luftuar. Deri tash rreth 30 veta kanë humbur jetën në ato luftëra. Muajin e kaluar ministri i jashtëm i Kosovës, Hashim Thaçi, tha në Këshillin e Sigurimit të Kombeve të Bashkuara se aktualisht atje mund të jenë rreth 50 shtetas të Kosovës.

Në muajin mars, parlamenti i Kosovës miratoi ligjin që parasheh dënime prej 6 muaj deri në 15 vjet heqje lirie për të gjitha ata që marrin pjesë, nxisin apo ndihmojnë përfshirjen në luftërat e huaja.

Aktualisht qeveria është duke hartuar një strategji për luftën kundër ekstremizmit pjesë e hartimit të së cilës janë edhe Bashkësia Islame  e Kosovës dhe shoqëria civile.

Strategjia është diskutuar të enjten edhe me të dërguarin e posaçëm amerikan për Koalicionin Global në luftën kundër Shtetit Islamik, gjeneralin John Allen, i cili po qëndron në rajon për diskutime mbi bashkërendimin e përpjekjeve kundër Shtetit Islamik.

Ai tha të mërkurën në Doha të Katarit ku foli në Forumin mes Shteteve të Bashkuara dhe Botës Islame se kjo do të jetë një fushatë e gjatë. Disa aspekte të saj si mposhtja e ideologjisë së ISIS-it mund të zgjasin për një brez të tërë, ose më shumë, tha ai duke kërkuar një vëmendje të veçantë ndaj përpjekjeve për të bllokuar qasjen e rrjeteve terroriste në sistemin financiar global. Ai tha se lufta kundër një ideologjie dhe organizate terroriste duhet shoqëruar me një aspekt njerëzor, në reagimin ndaj të rekrutuarve. za

Vuçiç në Uashington, takim me Këshilltaren e Sigurisë Kombëtare

 

Kryeministri i Serbisë, Aleksandar Vuçiç komentoi sot pas takimit që pati në Shtëpinë e Bardhë me këshilltaren a sigurisë kombëtare të SHBA, Susan Rice.

“Jam i kënaqur me bisedimet që zhvilluam më zonjën Susan Rice. Unë dhe ministri Vujoviç, paraqitëm atë që ka bërë Serbia në rrafshin politik dhe ekonomik. Mendoj se mikpritësit tanë, përfaqësuesit e SHBA-së janë të kënaqur me qëndrueshmërinë politike në gjithë rajonin ku Serbia ka gjithsesi ndikim, i respektojnë reformat ekonomike që ka bërë Serbia, prandaj jam i kënaqur që patëm mundësinë që t’i paraqesim këto rezultate. Kemi biseduar dhe u jemi lutur atyre për mbështetje më të madhe amerikane në rrugën evropiane të Serbisë dhe mendoj se do të kemi një mbështetje të mirë të miqve tanë amerikanë për hapjen e kapitujve të parë sa më shpejt që të jetë e mundur. Ne jemi shumë të kënaqur dhe e falënderojmë sërish zonjën Rice që pas tragjedisë që goditi familjen Biden, gjeti kohë për të na pritur.”

“Biseduam për marrëdhëniet që ka Serbia në rajon, për raportet që kemi me Prishtinën, më Shqipërinë, me Bosnje-Hercegovinën. Unë e vura theksin tek vizitat dhe rezultatet e vizitave në Sarajevë e në Tiranë kohë më parë. Theksova orientimin e fuqishëm të Serbsië që të ndikojë në ruajtjen e paqes dhe qëndrueshmërisë në rajon, i bindur plotësisht se kjo është rruga e vetme përpara për të gjitha vendet e rajonit të Ballkanit perëndimor.”

Lidhur me Maqedoninë, biseduam shumë shkurt, tha zoti Vuçiç.

“Unë thashë se jam krenar dhe i kënaqur që Serbia nuk ka ndikuar aspak në krijimin apo thellimin e krizës në Maqedoni. Ne e vlerësojmë Maqedoninë si fqinjë miqësore dhe gjithmonë do të kemi një qasje të tillë. Në asnjë mënyrë nuk duam të përzihemi në punët e brendshme të Maqedonisë. Mendoj se ky është një qëndrim i drejtë, korrekt dhe  i ndershëm.”

Zoti Vuçiç tha se gjatë bisedimeve ishte diskutuar edhe çështja e diversikimit të burimeve të energjisë për Serbinë.

“Detyra ime si Kryeministër është të siguroj gaz të mjaftueshëm për Serbinë për vitet 2019 dhe 2020 dhe këtë po bëj edhe këtu. Shpresoj se do të marrim shumë mbështetje nga SHBA, jo vetëm përsa i përket rrugës sonë drejt Bashkimit Evropian por edhe diversifikimit të mundshëm të burimeve të gazit për Serbinë dhe për vetë Ballkanin Perëndimor,” tha kryeministri serb, Aleksandar Vuçiç.

Liberalët serbë: Platforma e Nikoliqit do t’i komplikojë gjërat në Kosovë

VOAL – Partia Liberale Demokratike e Serbisë (LDP) e Çedomir Jovanoviqit, ka kërkuar sot nga presidenti i Serbisë, Tomislav Nikoliq, që të heqë dorë nga platforma e tij për Kosovën.

Përmes një letre drejtuar Nikoliqit, ky subjekt politik ka thënë se kjo platformë ka për qëllim ta komplikojë situatën në Kosovë, në kohën kur po zhvillohen bisedimet në Bruksel.

“Sot në vitin 2015, në kohën kur Kosova dhe Serbia po zhvillojnë negociata në Bruksel të cilat ende nuk kanë përfunduar, ndërsa marrëveshja që është arritur, ende nuk ka arritur të zbatohet, besojmë që rezoluta juaj pamundëson një ujdi e cila është e nevojshme për të gjithë që jetojnë në Serbi dhe për shqiptarët e serbët që jetojnë në Kosovë”, thuhet në këtë letër./Zëri

Radio Evropa e Lirë – LOJË POLITIKE E VUÇIÇIT ME RASTIN E VËLLEZËRVE BYTYÇI (?)

Edhe 16 vjet pas vrasjes në Serbi të tre vëllezërve, Agron,Yll dhe Mehmet Bytyçi, shtetas amerikanë me origjinë nga Kosova, përgjegjësit për vrasjen e tyre nuk janë vënë para drejtësisë.

Trupat e tyre të pajetë janë gjetur në vitin 2001, në varrezën masive në Petrovo Sello, në Serbi.

Kryeministri i Serbisë, Aleksandar Vuçiq ka thënë se ka kërkuar nga Veran Matiq, shefi i Komisionit për hetimin e vrasjes së gazetarëve, që të përfshihet në hetimet që kanë të bëjnë me vrasjen e vëllezërve Bytyçi në vitin 1999.

Vuçiq ka thënë ta ketë angazhuar zotin Matiq, për shkak të “rezultateve që ai ka treguar në rastin e gazetarit të vrarë, Slavko Çuruvija”.

Fatos Bytyçi, të cilit pjesëtarët e Policisë serbe ia kanë vrarë tre vëllezërit në Serbi, thotë se çelësi për zbardhjen e vrasjes së vëllezërve të tij është në duart e Qeverisë së Serbisë dhe kryeministrit serb Aleksandar Vuçiq.

Në bisedën që Shërbimi i Ballkanit i Radios Evropa e Lirë e ka bërë me Fatos Bytyçin, ku i fundit ka theksuar se edhe pas 16 vjetësh vendnumërimi për sa i përket zbardhjes së vrasjes së vëllezërve Bytyçi, paralajmërimi për formimin e një komisioni për zbardhjen e të vërtetës për këtë rast, në krye me Veran Matiqin, nuk ngjallë shumë optimizëm.

“Kam marrë një shkrim përmes postës elektronike nga Matiqi lidhur me rastin dhe në njëfarë mënyre jam tronditur, sepse kjo nuk do të sjellë rezultate. Nuk mundet ai që t’i marrë dokumentet nga Sigurimi i shtetit apo organet tjera të shtetit”, ka thënën Fatos Bytyçi.

Ai ka shtuar se nuk beson që mund të ketë rezultate pozitive nga kjo nismë. Sipas tij, e gjithë kjo është vetëm një hap politik i kryeministrit serb, Vuçiq, në prag të vizitës së tij në shtetet e Bashkuara të Amerikës.

“Tash ai vjen në Washington dhe e gjithë kjo do të tingëllojë, siç themi ne, vetëm sikur një ‘më fal” dhe të thotë që ‘ja ka filluar komisioni’. Për premtimet që i ka dhënë ai nuk ka bërë asgjë. Ka pasur mjaft kohë që të merren me këtë çështje, por kanë fjetur”, theksoi Fatos Bytyçi.

Por, kush po e frenon vërtetimin e përgjegjësive për vrasjen e tre vëllezërve Bytyçi, si dhe faktet se kush dhe si i ka vrarë? Fatos Bytyçi, shpreh bindjen se çelësi për këtë është Goran Radosavljeviq Guri, ish-oficer i policisë serbe.

“Unë ia kam dhënë atij dokumentet dhe gjithashtu edhe ish-kryeministrit Ivica Daçiq, se si Gri jep urdhër që vëllezërit e mi të likuidohen në Petrovo Selo. Unë ua dhashë atyre dokumentet e ata u shtangën. Autoritetet në Serbi e dinë se kush janë vrasësit e vëllezërve të mi”.

“Kanë mjaft argumente. Ka edhe mjaft dëshmitarë që dëshirojnë të dëshmojnë për këtë rast, por ata njerëz po marrin kërcënime nga Goran Radosavljeviq Guri. Këtë e dinë edhe Prokuroria për krime lufte, por edhe edhe ata kanë frikë që ta tregojnë gjithë historinë e rastit të vëllezërve Bytyçi dhe mund ta thonë se ku është problemi”, tha Fatos Bytyçi.

Ai nuk beson që vizita e paralajmëruar e kryeministrit Serb në Shtetet e Bashkuara të Amerikës, do të mund t’i ndryshoj gjërat. Sipas tij, po të donte Vuçiq që ky rast të zgjidhej, kjo edhe do të ndodhte, sepse siç thotë ai, “Vuçiqi e ka në dorë Agjencinë Informative të Sigurisë (BIA) dhe krejt Serbinë”.

“Në qoftë se Vuçiq dëshiron ta japë ‘dritën e gjelbër’, ky rast do të zgjidhej deri më tash. Nuk do t’i hyjmë tash politikës, por tash, po bëjnë kinse ‘hajt ta formojmë komisionin’. Ky e kë bërë këtë veprim, si lojë politike, në mënyrë që të thotë diçka në Uashington, se po bëjmë diçka dhe kemi filluar të punojmë për rastin e vëllezërve Bytyçi”, tha Fatos Bytyçi.

Ndryshe, ditë më parë, kryeministri serb Vuiçiq, ka theksuar se rasti i vëllezërve Bytyçi është një nga “çështjet e hapura që vazhdon të rëndojë marrëdhëniet amerikano-serbe”.

Për vrasjen e vëllezërve Bytyçi kanë qenë të akuzuar policët Sreten Popoviq dhe Millosh Stojanoviq, të cilët pas dy gjykimeve janë liruar.

Për këtë rast, më 22 tetor të vitit 2013, edhe Dhoma e Përfaqësuesve në Shtetet e Bashkuara, kishte iniciuar një rezolutë, përmes së cilës kërkoheshin hapa të mëtejmë nga autoritetet në Serbi për të vënë para drejtësisë përgjegjësit për vrasjen e vëllezërve Bytyçi.

HRW – SERBIA TË TRAJTOJË KRIMET E LUFTËS DHE TË DREJTAT E NJERIUT

 

Organizata për të drejtat e njeriut Human Rights Watch, tha se SHBA, duhet të kërkojnë nga Serbia hetimin dhe ndjekjen e krimeve të luftës dhe të shkeljes së të drejtave të njeriut

Organizata ndërkombëtare për të drejtat e njeriut, Human Rights Watch, tha të hënën se Shtetet e Bashkuara mund të luajnë një rol thelbësor në nxitjen e autoriteteve serbe për të trajtuar shqetësimet serioze dhe të vazhdueshme për të drejtat e njeriut.

Kërkesa drejtuar nënpresidentit amerikan Joe Biden, u bë në prag të vizitës në Washington të kryeministrit të Serbisë, Aleksandër Vuçiç, që fillon të martën.

Në një letër të nënshkruar nga Hugh Williamson, drejtor i kësaj organizate për Evropën dhe Azinë, tërhiqet vëmendja në mosndëshkimin e krimeve të luftës, ndjekja e të cilave në Serbi është penguar nga mungesa e vullnetit politik, mekanizmave të dobët për mbrojtjen e dëshmitarëve dhe në atë që duket të jetë mbrojtje e zyrtarëve të lartë të përfshirë në krime të rënda.

Që nga viti 2003, kur është ngritur dhoma e posaçme për krime lufte në Gjykatën e lartë të Serbisë dhe zyra e prokurorit për krime lufte, vetëm 68 persona janë dënuar për krime në Kroaci, Bosnjë e Hercegovinë dhe Kosovë, pothuajse të gjithë zyrtarë të rangut të ulët.

Gjykata për krime lufte në ish Jugosllavi, ka gjykuar dhe dënuar zyrtarë të lartë serbë, ndërsa gjykata serbe përveç tri rasteve të zyrtarëve të mesëm, nuk ka akuzuar asnjë zyrtarë të lartë ushtarak apo policor dhe asnjë zyrtar qeveritar, me gjithë dyshimet e besueshme ndaj disa individëve.

Organizata thekson se ndër rastet më të rënda është dërgimi i mbi 900 trupave të shqiptarëve nga Kosova në Serbi dhe rivarrimi i tyre në varreza masive, përfshirë edhe qendrat e stërvitjes së policisë. Disa nga personat e dyshuar si të përfshirë në këtë krim janë përmendur edhe në Hagë gjatë procesit gjyqësor kundër shefit të policisë serbe Vlastimir Gjorgjeviç, por, deri tash asnjë nuk është akuzuar.

Organizata vë theksin tek hetimi i vrasjes së vëllezërve Bytyçi, tre shtetasve  amerikan me prejardhje nga Kosova, që u ekzekutuan në vitin 1999. Ylli, Agron dhe Mehmet Bytyçi, ishin pjesëtarë të ish Ushtrisë Çlirimtare të Kosovës, përkatësisht të batalionit Atlantiku i përbërë nga shqiptarë që jetonin në Shtetet e Bashkuara, e të cilët ju bashkuan luftës në Kosovë.

Në përfundim të luftës ata janë arrestuar në rrethana të panjohura nga forcat serbe në afërsi të vendkalimit kufitar ndërmjet Kosovës dhe Serbisë në Merdarë. Një gjykatë në qytetin e Prokuples në Serbi, i kishte dënuar me nga 15 ditë heqje lirie nën akuzat për siç është thënë, kalim të paligjshëm të kufirit të ish Jugosllavisë.

Katër ditë para skadimit të dënimit, ata janë marrë nga burgu dhe janë dërguar në Petrovo Selo ku janë vrarë nga afërsia. Trupat janë gjetur në varrezë masive me duar të lidhura me tela.

Që nga viti 2006, janë zhvilluar dy procese gjyqësore në lidhje me rastin e vëllezërve Byrtyçi  ndaj dy ish-policëve serbë, të cilët më pas janë lënë të lirë. Zhvillimi i proceseve u përcoll me shumë reagime të veprimtarëve humanitarë të cilët janë shprehur të pakënaqur me mënyrën e trajtimit të çështjes.

Sandra Orloviç, nga Qendra për të Drejtën Humanitare në Beograd, shkruante javën e kaluar se dëshmitë flasin që vrasja e vëllezërve Bytyçi është urdhëruar nga qarqe të larta të qeverisë jugosllave dhe nëpërmjet Goran  Radosaljeviçit, i njohur me nofkën Guri, një ish gjeneral i policisë serbe. Aktualisht ai është në Këshillin Drejtues të Partisë Përparimtare serbe të kryeministrit Vuçiç.

Para nisjes për në Shtetet e Bashkuara, kryeministrit serb kërkoi ndriçimin e vrasjes së vëllezërve Bytyçi duke e cilësuar këtë rast si një nga pengesat kryesore në marrëdhëniet ndërmjet Serbisë dhe Shteteve të Bashkuara.

Por, Human Rights Watch, thekson se me gjithë zotimet e kryeministrit Vuçiç, askush nuk është vënë para drejtësisë për këtë krim dhe se autoritetet serbe të ndjekjes duhet të mbeten të përfshira dhe të kenë mbështetjen e plotë për hetimin e thellë e të pavarur të këtij rasti.

Organizata thekson se dyshimet e besueshme të hedhura nga Qendra për të Drejtën Humanitare me seli në Beograd, për përfshirjen në krime lufte të shefit të shtatmadhorisë serbe Lubisha Dikoviç, janë një shqetësim tjetër duke pasur parasysh ndihmën amerikane për ushtrinë serbe. Dyshimet përfshijnë vrasjen e civilëve në fshatrat Rrezallë dhe Çikatovë e vjetër të rajonit të Drenicës në Kosovën Qendrore, trupat e të cilëve janë fshehur në një varrezë masive në Rashkë, në Serbinë jugperëndimore

Së këndejmi, Human Rights Watch, thekson se Shtetet e Bashkuara duhet të nxisin hetimin e plotë të këtyre çështjeve, përfshirë edhe trajtimin e migruesve dhe strehimkërkuesve.

Organizata tha se në nëntor të vitit 2014 ka dokumentuar keqtrajtimin dhe shkeljen e të drejtave të njeriut të migruesve dhe strehimkërkuesve në Serbi, shumica e të cilëve sirian dhe afgan. Organizata tha se të intervistuarit kanë folur për sulme të dhunshme, kërcënime, ofendime, trysni, mohim të mbrojtjes së posaçme për fëmijët e pashoqëruar dhe kthim prapa në Maqedoni. Disa familje dhe fëmijë të pashoqëruar thanë se ata janë kthyer prapa kur kanë provuar të regjistrohen si strehimkërkues dhe kanë fjetur pastaj jashtë në të ftohtë.

Në prill të vitit 2015 Ministria e brendshme serbe kishte mohuar njoftimet e Human Rights Watch, por pa ofruar asnjë informatë nëse po hetohen këto çështje.

Kërkimet e Human Rights Watch, dëshmojnë po ashtu se punonjësit e medias në Serbi, veprojnë në një mjedis armiqësor. Organizata ka intervistuar 28 gazetarë ndërmjet tetorit të vitit 2014 dhe marsit të vitit 2015, të cilët flasin për sulme fizike e kërcënime, përfshirë edhe kërcënimet me vdekje, si rrjedhojë e raportimeve për krimet e luftës dhe korrupsionin qeveritar.

Gazetarët përballen edhe me ndërhyrje politike në punën e tyre, me sulme kibernetike në faqet e internetit dhe deri tash nuk ka pasur raste të ndjekjes së autorëve. Organizata thekson se Shtetet e bashkuara duhet të nxisin qeverinë serbe që të hetojë këto raste, të dënojë sulmet mbi mediat dhe të sigurojë që zyrtarët e saj do të përmbahen nga veprimet kundër gazetarëve. za

MUAJI I FUNDIT I GREQISË NË EUROZONË? – koment

Muaji i fundit i Greqisë në eurozonë?

Greqia rrezikon seriozisht daljen nga eurozona. Ndërkohë që Tsipras filozofon në media mbi teori komplotesh, partnerët ndërkombëtarë presin premtime të qarta për reforma. Athina duhet të veprojë, mendon Bernd Riegert.

 

Qershori mund të jetë muaji i fundit i Greqisë në eurozonë, po qe se koalicioni i majtë me radikalët e djathtë nuk bën ndonjë lëvizje përpara për ta zhbllokuar gjendjen e krijuar. Kërcënimi për vështirësi në pagesat që i duhen bërë FMN-së shoqërohet nga një kakofoni zërash që nga njëra anë paralajmërojnë falimentimin, nga ana tjetër flasin për një sukses të sekondës së fundit në negociata. Vështirë të përgjithësosh e po kaq të vështirë e ka edhe trupa radikale që qeveris në Greqi. Në vend që t’i çojë përpara negociatat me propozime konkrete, të llogaritura mirë, kreu i qeverisë greke, Aleksis Tsipras vazhdon me fajësime. Ai flet për një komplot neoliberal në BE që e rëndon Greqinë me kërkesa absurde, dhe do ta bëjë shembull.

Por absurde janë tezat ideologjike që Tsipras ofron në gazetën franceze “Le Monde”. Ai ankohet se fajin e kanë europianët e këqinj dhe FMN-ja. Le të kujtojmë se më 20 shkurt Greqia bëri të ditur se brenda pak ditësh do të ofrohet një listë e qartë me reforma, që do të mundësonte pagesat e tjera në prill. Kjo listë nuk është gati. Qeveria greka ka ofruar vetëm një listë me reforma në administratën tatimore dhe të tvsh-së. Këto propozime synojnë zgjerimin e bazës së tatimit dhe të ardhura më të larta nga tatimet. Ky vërtet mund të cilësohet si fillimi, por propozimet nuk mjaftojnë aspak.

Tsipras më mirë të veprojë e jo të ankohet

Ministri fatkeq Janis Varoufakis ka humbur shumë kohë me shoun personal. Tani ditët po ikin. Më 30 qershor mbaron afati për dhënien e ndihmave të tjera Greqisë. Deri në mesin e qershorit duhet të kemi një ujdi me kreditorët, për të mundësuar teknikisht pagesat. Krahas kësaj duhet edhe miratimi i ministrave të Financave dhe disa parlamenteve në eurozonë. Parlamenti grek duhet së paku të miratojë disa ligje për reformat e parashikuara, por kjo do të jetë e vështirë për shkak të rezistencës së krahut radikal majtist brenda Syrizas.

Riegert Bernd Kommentarbild App Koment i Bernd Riegert

Por çfarë bën Aleksis Tsipras? Në vend që të ndjekë procedurën e qartë në eurozonë, ai po kthehet në shërbim telefonik. Gati çdo ditë ai telefonon me kancelaren Merkel dhe presidentin Hollande, me synimin e “zgjidhjes politike” në nivele të larta. Megjithëse shumë herë në samite është bërë e qartë, se nuk mungon vullneti politik për të mbajtur Greqinë në eurozonë. Ajo që mungon janë premtimet e qarta të Athinës për plotësimin e kushteve për kredi të tjera. Sigurisht duhet biseduar për kursin e rimëkëmbjes së mëtejshme të Greqisë, por ajo që duhet të dijë Aleksis Tsipras është të zgjidhë krizën urgjente financiare të Greqisë, që mund ta hedhë vendin brenda disa javësh jashtë eurozonës.

Besimi i shkatërruar

Tsipras mund të takohet sa herë të dojë me Merkelin, por vendimet i merr eurogrupi, 19 anëtarë të tij, madje njëzëri. Fajin për këtë situatë të krijuar e mban në një masë të madhe trupa qeverisëse në Athinë, që me sa duket nuk mundet ose nuk di më mirë se kaq. Me pasoja: Ekonomia greke nga shkurt ka rënë rishtazi në recesion. Shtimet buxhetore janë kthyer në deficite tanimë, besimi i investitorëve është rrënuar, prenotimet e turistëve kanë rënë. Për të kryer pagesat e nevojshme, qeveria greke po merr ku mundet fonde- tek sigurimet publike, universitete dhe spitalet. Bankat greke marrin vetëm serum nga Banka Qendrore Europiane, ndërkohë që grekët vazhdojnë të tërheqin kursimet e t’i çojnë jashtë. Kështu nuk vazhdohet më.

Greqia dhe Europa kanë nevojë tani për vendime të guximshme nga Athina. Ose qeveria e Athinës duhet t’i hapë vendin një qeverie tjetër. Deri më tani Syriza ka dështuar. Edhe sikur të arrihet në minutën e fundit qëndrimi i mëtejshëm i Greqisë në eurozonë, është e paqartë se ç’do të bëhet më tej. Besimi tek qeveria greke si nga ana e europianëve ashtu edhe investitorëve ka pësuar kaq goditje, sa do të jetë e vështirë rikuperimi. Kush do ta negociojë nga korriku paketën e tretë të nevojshme të ndihmës për Greqinë?

ZAEV NË SOFJE – KRYEMINISTRI BULLGAR: JEMI TË SHQETËSUAR PËR KRIZËN E RËNDË NË KUFIRIN TONË

29.05.2015

Kryeministri i Bullgarisë, Boyko Borisov, ka thënë se është i shqetësuar me krizën politike në Maqedoni dhe i ka bërë thirrje liderit opozitar të Maqedonisë, Zoran Zaev, i cili ka qëndruar të premten në Sofje, të hapë dialogun me qeverinë.

“Pa dashur të përzihemi në punë të brendshme (të Maqedonisë), jemi të shqetësuar për krizën politike në kufirin tonë”, ka thënë Borisov.

“Ne insistojmë që qeveria dhe opozita të nisin të flasin me njëra-tjetrën, siç kërkon edhe Evropa”, ka shtuar ai.

Kriza politike në Maqedoni zgjat për disa muaj. Opozita e qendrës së majtë akuzon kryeministrin Nikolla Gruevski për korrupsion dhe keqbërje të tjera. rel

KROACIA DËMSHPËRBLEN VIKTIMAT E PËRDHUNIMEVE TË VITEVE 1991-1995

 

VOAL – ZAGREB, 29 MAJ – Kroacia ka miratuar një ligj që dëmshpërblen viktimat e përdhunimeve gjatë kofliktit 1991-95. Kjo parashikon një dëmshpërblim me para në dorë 13 mijë euro, një pension i përhershëm dhe ndihmës mjekësore, psikologjike e ligjore falas.

Ligji u miratua me 86 vota e 3 abstenime. ansa

KRYEMINISTRI I SERBISË PËR NDRIÇIMIN E VRASJES SË VËLLEZËRVE BYTYÇI

Vuçiç, në prag të vizitës në SHBA, kërkon ndriçimin e vrasjes së tre shtetasve amerikanë me prejardhje shqiptare

Kryeministri i Serbisë, Aleksandër Vuçiç, tha të premten në Beograd se ka kërkuar nga shefi i Komisionit për hetimin e vrasjes së gazetarëve, Veran Matiç, të përfshihet në hetimet që kanë të bëjnë me vrasjen e tre shtetasve amerikan me prejardhje nga Kosova në vitin 1999.

Ylli, Agron dhe Mehmet Bytyçi, ishin pjesëtarë të ish Ushtrisë Çlirimtare të Kosovës, përkatësisht të batalionit Atlantiku i përbërë nga shqiptarë që jetonin në Shtetet e Bashkuara e të cilët ju bashkuan luftës në Kosovë.

Në përfundim të luftës në Kosovë, ata janë arrestuar në rrethana të panjohura nga forcat serbe në afërsi të vendkalimit kufitar ndërmjet Kosovës dhe Serbisë në Merdarë. Një gjykatë në qytetin e Prokuples në Serbi, i kishte dënuar me nga 15 ditë heqje lirie nën akuzat për siç është thënë, kalim të paligjshëm të kufirit të ish Jugosllavisë.

Katër ditë para skadimit të dënimit, ata janë marrë nga burgu dhe janë dërguar në Petrovo Selo ku janë vrarë nga afërsia. Trupat janë gjetur në varrezë masive me duar të lidhura me tela.

Kryeministrit serb, tha të premten se rasti i vëllezërve Bytyçi është një nga “çështjet e hapura që vazhdon të rëndojë marrëdhëniet amerikano-serbe”.

“Do të ishte mirë që çështja të zgjidhet, por vështirë që mund të bëhet para shkuarjes sime në Shtetet e Bashkuara”, tha ai. Kryeministri serb do të udhëtojë për në Washington më 1 qershor me ftesë të nënpresidentit amerikan Joe Biden.

Në tetor të vitit 2013, ligjvënësit amerikanë Eliot Engel dhe Michael Grimm paraqitën në Kongres një rezolutë me të cilën kërkohej që Beogradi të ndjekë autorët e vrasjes, duke nënvizuar se përparimi në zgjidhjen e këtij rasti, apo mungesa e tij, duhet të jetë faktor thelbësor në vendosjen e marrëdhënieve të mëtejshme ndërmjet Shteteve të Bashkuara dhe Serbisë.

Që nga viti 2006, janë zhvilluar dy procese gjyqësore në lidhje me rastin e vëllezërve Byrtyçi  ndaj dy ish-policëve serbë, të cilët më pas janë lënë të lirë. Zhvillimi i proceseve u përcoll me shumë reagime të veprimtarëve humanitarë të cilët janë shprehur të pakënaqur me mënyrën e trajtimit të çështjes.

Sandra Orloviç, nga Qendra për të Drejtën Humanitare në Beograd, shkruan se dëshmitë flasin që vrasja e vëllezërve Bytyçi është urdhëruar nga qarqe të larta të qeverisë jugosllave dhe nëpërmjet Goran  Radosaljeviçit, i njohur me nofkën Guri, një ish gjeneral i policisë serbe. Aktualisht ai është në Këshillin Drejtues të Partisë Përparimtare serbe të kryeministrit Vuçiç.

Zonja Orloviç, e angazhuar në rastin e vëllezërve Bytyçi, shkruan se as Guri e as shefi aktual i Shtatmadhorisë serbe Lubisha Dikoviç, i dyshuar për krime lufte në Kosovë, nuk janë hetuar si duhet nga autoritetet. Pozitat aktuale u ofrojnë atyre mundësi që të bllokojnë hetimet.

“Për shembull në një kabllogram diplomatik, që ka rrjedhur në opinion, shfaqet shqetësimi se Goran Radosavleviç frikëson dëshmitarët dhe ndërhynë në rastin Bytyçi”, shkruan ajo duke nënvizuar se kryeministri serb nuk duhet të ofrojë strehë për personat që kanë lidhje të qarta me krime masive të luftës si Lubisha Dikoviç and Goran Radosavleviç. za

DEMPARTAMENTI AMERIKAN I SHTETIT – VIZITË HISTORIKE E KRYEMINISTRIT TË SERBISË NË TIRANË

Departamenti Amerikan i Shtetit ka mirëpritur atë që e quajti vizitë “historike” të kryeministrit serb, i cili vizitoi Shqipërinë, duke përgëzuar gatishmërinë e zyrtareve të të dy vendeve për bashkëpunim të ndërsjellë dhe kontribut për paqen dhe stabilitetin në rajonin e Ballkanit Perëndimor.

“Shtetet e Bashkuara urojnë kryeministrin serb, Aleksandar Vuçiq dhe kryeministrin shqiptar, Edi Rama, për vizitën e parë zyrtare nga një kryeministër serb në Tiranë, më 27 maj. Vizita historike Vuçiqit vjen gjashtë muaj pasi kryeministri Rama ka vizituar Beogradin në vizitën e parë të tillë nga një kryeministër shqiptar në gati 70 vjet. Ne përgëzojmë këta liderë për riafirmimin e angazhimit të tyre të përbashkët për forcimin e bashkëpunimit midis dy vendeve të tyre, duke kontribuar për paqen, prosperitetin dhe stabilitetin në rajonin e Ballkanit “, tha drejtori i shërbimit për shtyp të Departamentit të Shtetit të SHBA-ve.

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend