Bashkimi Evropian ka thënë se është thelbësore për Kosovën ta formojë sa më shpejt Qeverinë e re, pasi vendi ka ngecur në përpjekje për formimin e institucioneve të reja më shumë se dy muaj pas zgjedhjeve parlamentare.

“Formimi i shpejtë i Qeverisë është thelbësor për Kosovën për t’i çuar përpara reformat e rëndësishme në të gjithë sektorët, të cilat do ta përmirësojnë cilësinë dhe kushtet e jetës për popullin e Kosovës”, tha Zyra e BE-së në Prishtinë në një përgjigje të shkruar për Radion Evropa e Lirë të premten.

Ajo tha se BE-ja po i ndjek nga afër zhvillimet lidhur me konstituimin e Kuvendit dhe formimin e Qeverisë, dhe shpreson se ky proces do të përfundojë së shpejti.

Kosova dështoi ta konstituojë Kuvendin e ri dy herë brenda kësaj jave, për shkak të mosmarrëveshjeve procedurale mes partive politike që siguruan ulëse në zgjedhjet parlamentare të 9 shkurtit.

Nuk është e qartë nëse mosmarrëveshjet mes partive parlamentare do të zgjidhet para mbajtjes së vazhdimit të seancës së ndërprerë të enjten, e caktuar për të shtunën e 19 prillit.

Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK) këmbëngulin që anëtarët e Qeverisë, të cilët janë zgjedhur deputetë, të japin dorëheqje, përndryshe nuk do ta votojnë raportin për verifikimin e mandateve të deputetëve, hap që duhet të kalohet për vazhdimin e konstituimit të Kuvendit dhe formimin e Qeverisë së re.

Por, kreu i LVV-së dhe kryeministri në detyrë, Albin Kurti, thekson se një akt i tillë formal është i panevojshëm, për shkak se ekzekutivi është në detyrë, apo dorëheqje që nga 23 marsi.

Të enjten, ambasadorët e Britanisë së Madhe dhe Gjermanisë në Prishtinë u bënë thirrje partive politike të bashkëpunojnë për tejkalimin e pengesave për formimin e institucioneve të reja të Kosovës.

PDK, LDK dhe AAK fajësuan LVV-në se me ndërprerjen e seancave po tenton “të blejë kohë për pazare politike”, pasi sipas tyre, partia e Albin Kurtit nuk i ka votat për të zgjedhur kryeparlamentarin e as Qeverinë.

Vetëvendosje i fitoi zgjedhjet e 9 shkurtit, me rreth 42 për qind të votave, apo 48 ulëse nga 120 sa i ka Kuvendi i Kosovës.

Por, asaj i nevojitën të paktën 61 ulëse për ta formuar qeverinë e re.

Pas LVV-së më së shumti vota fitoi PDK, me 24 ulëse, e pastaj LDK-ja me 20 sosh.

AAK dhe Nisma i fituan tetë ulëse, prej të cilave tri i takojnë kësaj të fundit.

Kreu i Nismës, Fatmir Limaj, ka qenë i vetmi që e ka lënë të hapur mundësinë për bashkëpunim me Kurtin nga partitë tjera shqiptare.

Kurti i kishte takuar javën e kaluar edhe liderët e 10 partive të pakicave joserbe në përpjekje për t’i siguruar votat e nevojshme për formimin e Qeverisë së re, por nuk është e qartë ende nëse e ka mbështetjen e të gjitha atyre.

Zyra e BE-së tha se blloku është i gatshëm për të punuar ngushtë me qeverinë e ardhshme, sapo të formohet ajo, dhe për të vazhduar mbështetjen e Kosovës në rrugën e saj drejt integrimit evropian./ REL

Edhe pse vazhdimisht flitet për paqe të mundshme, luftimet në Ukrainë vazhdojnë. Për të mbrojtur më mirë vendin nga sulmet ruse, Gjermania planifikon të dërgojë një furnizim të ri të madh me armë.

Ministri në detyrë i Mbrojtjes Boris Pistorius (SPD) njoftoi një tjetër paketë furnizimesh me armë për Ukrainën nga Gjermania në një takim të Grupit të Kontaktit të Ukrainës në Bruksel (11.04.). Nuk ka asnjë provë për ndonjë rënie të luftimeve, tha Pistorius. Prandaj është plotësisht e qartë se duhet një Ukrainë e fortë ushtarakisht dhe që të ketë mbështetje. Vetëm atëherë do të hapet rruga për një zgjidhje paqësore.

Sipas informacioneve në media, Gjermania do të dërgojë brenda këtij viti në Ukrainë katër sisteme të tjera armatimi “IRIS-T” dhe 300 raketa, dhe 100 radarë vëzhgimi tokësor. Priten furnizime me dronë zbulimi, automjete luftarake këmbësorie Marder, sisteme artilerie etj.

Probleme me armët gjermane në Ukrainë?
Pasi SPD dhe Unioni ranë dakord për marrëveshjen e koalicionit, Pistorius foli për një fuqizim masiv të Bundeswehr-it. “Jemi në fillim të një epoke të re dhe do të duhet ta dëshmojmë veten në vitet e ardhshme”, tha ai. “Varet nëse do të arrijmë të bëhemi të aftë për parandalim dhe mbrojtje – dhe ta bëjmë këtë në unitet e në një kohë të shkurtër.”

Pistorius shprehu po ashtu habi për raportimet se ka probleme me armët gjermane në Ukrainë. “I lexova me habi raportet”, tha ai në margjinat e takimit në Bruksel. Ai shtoi se ishte në kontakte të rregullta me partnerët ukrainas dhe “nuk kam marrë asnjë raport si ky apo ankesa për materialet tona”. NDR, WDR dhe Süddeutsche Zeitung kishin raportuar, duke cituar një dokument të brendshëm të Bundeswehr-it, se ushtria ukrainase kishte probleme të mëdha me pajisjet ushtarake gjermane./DW

Presidenti ukrainas, Voldymyr Zelensky, thotë se dyshon se Kina është përfshirë në luftën Rusi-Ukrainë.

Dy shtetas kinezë u kapën gjatë luftimeve në Ukrainën lindore, tha sot Volodymyr Zelensky.

Forcat e Ukrainës luftuan me gjashtë ushtarë kinezë, me dy prej tyre që u morën peng, shtoi ai.

Për rrjedhojë Zelensky ka urdhëruar zyrtarët që të marrin një shpjegim nga Pekini.

Zelensky i bëri këto deklarata në një konferencë të përbashkët për shtyp me kryeministrin belg Bart de Wever, duke theksuar nevojën për mobilizim të menjëhershëm ndërkombëtar dhe një rivlerësim të situatës nga partnerët perëndimorë të Ukrainës.

“Betejat u regjistruan në rajonin e Donetskut, në dy zona. Ushtarët ukrainas u përleshën me gjashtë ushtarë kinezë dhe kapën dy prej tyre. Ne kemi pasaporta, dokumente, madje edhe karta krediti në duart tona. Ata janë shtetas kinezë. Unë mendoj se ky është një element me rëndësi të madhe ,” tha presidenti ukrainas.

Zelensky theksoi se përfshirja e dukshme e Kinës në luftë në emër të Rusisë, krahas vendeve si Koreja e Veriut dhe Irani , përbën një fakt të ri gjeopolitik, i cili duhet t’i shtyjë aleatët e Ukrainës të rishqyrtojnë qëndrimin dhe mbështetjen e tyre.

“Koreanët e Veriut po na luftonin në Kursk. Tani, kinezët po luftojnë në tokën ukrainase. Dhe kjo është diçka që duhet diskutuar urgjentisht me partnerët tanë. Ne jemi një vend i fortë, por nuk mund të luftojmë me shumë vende në të njëjtën kohë, të gjitha me objektiva në Ukrainë ,” vuri në dukje ai.

Presidenti ukrainas shprehu shpresën se ky zhvillim do të çojë në përfshirje më aktive të Shteteve të Bashkuara në bisedimet me Kievin, ndërsa kërkoi një përgjigje zyrtare nga Pekini .

“Kam udhëzuar ministrat e jashtëm dhe të mbrojtjes që të kontaktojnë homologët e tyre kinezë, duke kërkuar një shpjegim zyrtar për këto veprime”, tha Zelensky. gsh

Lideri i Opozitës, Sali Berisha, ka denoncuar para grupit konservator të KE-së faktin se Qeveria shqiptare ka instaluar pajisje DPI për të kontrolluar internetin pikërisht në prag të zgjedhjeve.

Denoncimi i Berishës:

“Ne kemi zgjedhje. Vëzhgimi juaj është shumë i rëndësishëm.

Tani, thashë diçka, por mediat janë 80%, më shumë se 80% të kontrolluara nga qeveria.

Në fund, njësoj si Habibullah-u i Kabulit, ai bllokoi TikTok-un. Dhe tani ka instaluar, ai kishte instaluar pajisje DPI për të kontrolluar gjithashtu internetin.

Kjo është e vërtetë. Kjo është e vërtetë! Sapo të rinjtë filluan ta kritikojnë në TikTok, ai e ndaloi dhe e bllokoi TikTok-un dy javë më parë. Ai bën gjithçka për të kufizuar komunikimin tonë me njerëzit.” bw

Lideri i Opozitës, Sali Berisha, në takimin me grupin konservator të KE-së, u ka kërkuar një mision vëzhgues në Shqipëri, ku do të dëgjojnë dhe shohin gjëra të pabesueshme.

Fjala e Sali Berishës:

“Së pari, më vjen shumë keq t’i them publikut se të paktën Ambasadori Amerikan ka ndihmuar shumë Edi Ramën në instalimin e shtetit narkotik. Në vitin 2015, kur e gjithë Shqipëria ishte mbuluar me kanabis, ai shkoi dhe lavdëroi policinë, duke u thënë: ‘Ju përgëzoj për punën e jashtëzakonshme kundër kanabisit, kundër drogës.’

Unë shkova dhe e takova. I thashë: ‘Zotëri, kjo është mbështetje. Çfarë është ky teatër që po ndodh?’ Ai më tha: ‘Ne nuk shqetësohemi për drogërat e buta.’ Por unë i thashë: ‘Shikoni, këto drogëra të buta mund të kenë pasoja të tmerrshme për kombin tim. Kjo është krim, sepse kudo ka njerëz që ruajnë parcelat dhe bien pre e tundimeve.’ Dhe kjo është të paktën një shkelje e plotë.

Por Edi Rama ka qenë lideri më i mbrojtur, më i investuar nga George Soros. Dhe problemi im me miliarderin George Soros është i vjetër. Kam qenë shumë konfrontues me të. Prej vitesh kam kërkuar që të ndalohet veprimtaria e tij politike në Europë.

Kam kërkuar që Parlamenti Europian t’ia ndalojë, sepse ai blen politikanë kudo, etj., etj. Ai ka një agjendë ekstreme të majtë. Ai e rikthen modelin e monizmit, duke marrë të gjitha OJQ-të dhe duke i vënë nën ombrellën e Partisë së vjetër Komuniste.

Përplasja ime me të u bë më e madhe kur ai u përfshi në politikën e Ballkanit. Ai u bë faktori kryesor në politikën e jashtme për Ballkanin. Ai deshi ndarjen e Kosovës, një projekt i Millosheviçit, që më është sjellë përmes ndërmjetësve disa herë gjatë kohës që isha President i Republikës. Tani George Soros e vulosi dhe e firmosi projektin si të tijin. Sigurisht që unë e kundërshtova. Dhe ai ishte shumë i pakënaqur.

Një ditë Edi Rama më tha në Parlament: ‘Sali, a e kalon dot Atlantikun?’ I thashë: ‘Po, e kaloj.’ Ai s’e di. ‘Ke marrë një mesazh,’ më tha. ‘S’kam marrë asnjë mesazh,’ i thashë. Por ai u tha njerëzve të tij që Saliu u sanksionua për konspiracion kundër politikës amerikane. Unë nuk kam konspiruar kurrë. Kam qenë gjithmonë publik. Por ata dështuan.

Derisa ishte Sekretari Pompeo në detyrë, nuk dërguan asgjë. Sapo u largua Presidenti Trump nga pushteti, tre javë pas zgjedhjeve, unë u sanksionova për korrupsion dhe minimin e demokracisë nga një njeri që më kishte lavdëruar më shumë se kushdo tjetër për sukseset në luftën kundër korrupsionit kur ishte këshilltari kryesor i Joe Biden. Ky ishte Anthony Blinken, një njeri shumë i afërt me George Sorosin.

I shkrova një letër. I thashë: ‘Zoti Sekretar, sapo të gjeni një provë të vetme të korrupsionit tim, unë tërhiqem përgjithmonë nga politika. Por vendimin e morët mbi bazën e një lobimi të korruptuar nga Edi Rama dhe George Soros.’ Së treti, unë e padita atë në gjykatë, sepse ai plagosi dinjitetin tim dhe unë po mbroj dinjitetin tim dhe e kam paditur. Ata u zemëruan për këtë dhe tentuan, por dështuan. Unë vazhdova betejën time, dhe është një histori e gjatë. Nuk dua t’ju marr kohë, por ata kanë luajtur një rol shumë negativ. Kjo është përgjigjja ime për këtë.

Sa për Sorosin, siç ju thashë më parë: nëse më pyesni çfarë është Shqipëria sot, Shqipëria është një republikë e George Soros. Po.

Për ta ilustruar, zoti President, kryetari i Bashkisë së Tiranës është arrestuar për korrupsion. Para disa ditësh, disa javësh, i dha një udhëzim gruas së tij: ‘Mos shko në Ambasadën Amerikane, pushteti ka ndryshuar atje, prit derisa të vijë Alex dhe gjërat do të ndryshojnë.’ Ishte fjala për Alex Sorosin. Askush nuk ka reaguar, sepse pas kësaj beteje, Departamenti i Shtetit, nën drejtimin e Anthony Blinken, bëri gjithçka për të më izoluar dhe për të kontrolluar çdo kontakt timin, me partinë time. Kjo është e vërtetë. Prandaj njerëzit nuk ishin shumë të prirur të merren me këto çështje.

Po, ju mund të na ndihmoni shumë. Mund të na ndihmoni. Së pari, dërgoni një mision verifikimi, sepse do të dëgjoni gjëra të pabesueshme. Dhe kur të prekni realitetin atje, atëherë mund të gjeni një mënyrë për të ndihmuar kombin tim, për të ndihmuar vendin tim të çlirohet nga kjo narkodiktaturë. Ne do të luftojmë dhe do të vazhdojmë të luftojmë, por na duhet edhe ndihma e njerëzve të lirë, kudo që janë. Dhe nga qeveritë europiane dhe miqtë tanë kudo. Faleminderit shumë!”bw

Kreu i PD-së, Sali Berisha, ishte në një takim me grupin konservator në KE, ku deklaroi se Shqipëria është një narkodiktaturë, ku paratë e drogës dhe krimi po përdoren në zgjedhje

Fjala e Sali Berishës:

Zonja dhe zotërinj, anëtarë të nderuar të Parlamentit Europian. Dua të ju falënderoj nga zemra ime për këtë nder të madh që më keni bërë, të ju prezantoj në këtë seancë, situatën aktuale në Shqipëri.

Kam qenë këtu më shumë se në çdo institucion tjetër.  Kam ardhur si presidenti i vendit. Kam ardhur si lideri i opozitës, për 8 vite me radhë. Kam ardhur si kryeministër.

Por sot pothuajse në 30 vite pas anëtarësimit të Shqipërisë në Këshillin e Europës, fatkeqësisht vendi im është i pari dhe i vetmi shtet narkodikatur në Shqipëri.

Shqipëria në këtë 30 vjetor është një vend i cili para zgjedhjeve, kryeministri synon mandatin e 4-të, duke arrestuar tre liderët kryesorë të opozitës shqiptare.

Më arrestoi mua për 330 ditë pa asnjë fakt penale. Ata më akuzuan për korrupsion pasiv dhe për një faturë për një javë pushime për arsye shëndetësore.

Dhëndëri im për 440 ditë ndodhet në ‘arrest shtëpie’ për një pronë prej 110 metrash që i është lënë trashëgim nga gjyshërit e tij, çdo gjë e dokumentuar me dokumente zyrtare që i përket familjarëve të tij.

Lideri tjetër i partisë së dytë opozita, ish-presidenti, ish-kryeministri i vendit, Ilir Meta, ndërsa po hynte në Tiranë u arrestua në mënyrë brutale, duke u tërhequr zvarrë nga makina dhe pa ju treguar dokumentet identifikuese.

Edhe pse është person nën hetim, ai gjendet në burg, edhe pse nuk ka akuzë ndaj tij. Lideri i tretë i partisë tjetër opozitare është Fatmir Mediu, ish-ministri i Mbrojtjes gjatë kohës së anëtarësimit të Shqipërisë në NATO, dhe po gjykohet për një çështje që është mbyllur 15 vite më parë pa asnjë fakt konkret.

Gjithashtu edhe Fredi Beleri, deputet i parlamentit Europian u fut në burg pasi, Edi Rama kërkonte të merrte mijëra metra katrorë tokë pranë detit.

Gjithashtu Ervin Salianji, një tjetër deputet u arrestua sepse denoncoi vëllain e ish-ministrit të Brendshëm, pasi ishte dënuar në Itali, për arsye se drejtonte trafikun e drogës nga Vlora.

Tani nëse merreni në konsideratë popullsinë e Shqipërisë, vendi humbi edhe të drejtën e pafajësisë, kjo ka ndodhur me drejtësinë. Shqipëria është bërë një narkoshtet, i vetmi vend në Europë. Në 2015 Edi Rama e mbushi Shqipërinë me kanabis, dhe duke implikuar dhe policinë në mbjelljen e kanabisit.

Rreth 12 miliardë euro u krijuan nga trafikantët e kanabisit dhe më pas këta u lidhën me trafikantët Amerikano-latin dhe tani janë shumë të fuqishëm me lidhjet e tyre në kartelet, si psh, ai i Sinaloas.

Të nderuar anëtarë, vetë Edi Rama është i lodhur me këto organizata.

Në zyrën e tij ka një këshilltar, i cili koordinon aktivitete e këtyre organizatave. Ai ka pritur në zyrën e tij, bosin shqiptar të Sinaloas dhe i ka dhënë leje për kazino dhe një hotel me 5 yje.

Krimi i organizuar është shumë i famshëm dhe shumë i përfshirë në zgjedhje.

Autoritet franceze, belge dhe holandeze kanë dorëzuar mijëra e mijëra faqe të mesazheve të krimit të organizuar, të marra nga telefonat e enkriptuar.

Komunikimi arrin deri tek Edi Rama dhe ministrat e tij.

U zbulua se gjysma e komunikimeve ishin të lidhura dhe me dhunimin e zgjedhjeve dhe ne tani jemi në zgjedhjet elektorale.

Kryeministri është duke shpërndarë dhurata për pensionistët, duke u dhënë 100 euro për çdo person, për të siguruar votën e tyre.

Janë mbi 700 shqiptar. Është një vendim i qeverisë për të siguruar bonus pensionesh për votë.

Por janë edhe dhjetëra e qindra miliona euro të kanabisit që janë përdor për të blerë vota, e gjithashtu edhe kërcënimi i mafias ndaj njerëzve që të votojnë për ta.

Shqipëria është në një situatë të dëshpëruar.

Nga 2014-2023, 1 milionë e 99 mijë shqiptarë kanë lënë vendin duke ikur drejt zonës Shengen.

Ekonomia dhe prodhimi industrial po bie.

Eksportet si pasojë e eurove të narkotrafikut është zhvleftësuar me 35% dhe eksportet kanë rënë me 32% dhe mijëra shqiptarë po humbin vendet e tyre të punës.

Një kryeministër që Europa nuk e ka parë kurrë, që drejton një shtet si diktator dhe një narkodiktator.

Ju nuk e kuptoni dot se çfarë ndodh, prandaj dhe unë jam këtu që të ju tregoj të vërtetat e të ju siguroj se njerëzit nuk kanë zgjidhje tjetër, përveç se të luftojnë narkodiktarorin.

Jam i bindur se ai nuk do të ketë të ardhme.

Narkoshteti nuk është i rrezikshëm, por është i rrezikshëm për të gjithë kontinentin  e Europës  dhe ju falënderoj për vëmendjen tuaj.” bw