Lordi Nat Rothschild, personi që prezantoi Edi Ramën me Jared Kushner në jahtin e tij, ka shprehur mospajtimin me mënyrën se si qeveria shqiptare ka vepruar ndaj Parkut Kombëtar të Butrintit, si edhe me legjislacionin për investimet strategjike.

Ai argumenton se këto veprime janë në kundërshtim me Konventën e Trashëgimisë Botërore të UNESCO-s, me angazhimet e Shqipërisë për anëtarësim në Bashkimin Evropian, si edhe me frymën e mbrojtjeve mjedisore të ndërtuara gjatë tre dekadave të fundit.

“Edi Rama është një politikan unik, dikush që unë e admiroj, dhe ka bërë kaq shumë gjëra të mira për Shqipërinë. Por reduktimi me 800 akra i Parkut Kombëtar të Butrintit në vitin 2022 dhe legjislacioni i vitit 2024 për investimet strategjike, ashtu siç zbatohet për parqet kombëtare dhe zonat e mbrojtura, është në kundërshtim me detyrimet e Shqipërisë sipas Konventës së Trashëgimisë Botërore të UNESCO-s, angazhimet e saj për anëtarësim në Bashkimin Evropian dhe frymën e mbrojtjeve mjedisore që janë ndërtuar me kaq kujdes gjatë tre dekadave të fundit”, thekson Lordi Rothschild. gsh

Kreu i SPAK Klodian Braho në komunikimin e zhvilluar ditën e sotme me gazetarët është ndalur në një sërë çështjes, ndërsa ka bërë edhe bilancin e punës së SPAK nga 1 janari deri më 15 korrik 2026.

Gjatë fjalës së tij, Braho u pyet edhe për “Albanian File”, për të cilën nuk dha shumë detaje, por theksoi se janë dy materiale që kanë mbërritur në Prokurori dhe se janë në fazë verifikimi.

“Ka dy materiale që kanë mbërritur ne prokurori jemi në fazë verifikimi nuk mund te jap më tepër detaje”, tha ai.bw

Ministri i Jashtëm serb, Marko Djuriç, njoftoi të mërkurën se Serbia dhe Shqipëria arritën një marrëveshje në parim për hapjen e zyrave konsullore në Shkodër dhe Bujanoc.

Mbi lajmin ka reaguar ish- ministri Ditmir Bushati, i cili në një postim në rrjetet sociale shkruan se një vendim i tillë është i gabuar në planin strategjik, ndërsa ka shtuar se pesha e pakicës serbe në zonë është shumë e paktë.

“Uroj që lajmi i dhënë nga ministri i jashtëm serb dhe ujdia e pretenduar me homologun shqiptar për hapjen e Konsullatës së Serbisë në Shkodër të mos jetë e vërtetë.

Në planin strategjik do të ishte e gabuar. Një konsullatë e Serbisë në Shkodër nuk reflekton realitetin historik, peshën e pakicës serbe në zonë, dhe vendos padrejtësisht shenja barazimi me shqiptarët që jetojnë në Luginën e Preshevës.

Po aq e gabuar do të ishte edhe në planin taktik, teksa gjuha e zyrtarëve të lartë të Serbisë është në kulmin e ekstremitetit në raport me spastrimin etnik në Kosovë. Dhe një karshillëk ndaj Malit të Zi, kur dihet se Serbia nuk ka hequr dorë nga praktikat asimiluese ndaj pakicës malazeze që jeton në Shqipëri”, shkruan ai. bw

Një ngjarje e rëndë është regjistruar mesditën e së mërkurës në fshatin Domen të Shkodrës, ku një zjarr që përfshiu një banesë i mori jetën një gruaje të re dhe dy fëmijëve të saj të mitur.

Sipas njoftimit të Policisë, rreth orës 13:10 është raportuar një zjarr në banesën në pronësi të shtetasit B. Ç. Menjëherë pas marrjes së njoftimit, në vendngjarje mbërritën shërbimet e Policisë dhe forcat zjarrfikëse.

Nga veprimet e para hetimore dyshohet se si pasojë e flakëve kanë humbur jetën shtetasja B. Ç., 24 vjeçe, si dhe dy fëmijët e saj të mitur, të moshës 3 vjeç dhe 1 vjeç e gjysmë. Grupi hetimor, nën drejtimin e Prokurorisë, vijon punën për të përcaktuar shkakun e rënies së zjarrit dhe për të dokumentuar plotësisht rrethanat e kësaj ngjarjeje tragjike.

Shkodër/Informacion paraprak

Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç.

Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.

Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë.

Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes. bw

Seanca gjyqësore ndaj Ilir Metës në Gjykatën e Posaçme Kundër Korrupsionit dhe Krimit të Organizuar (GJKKO) u shoqërua me akuza të forta të ish-presidentit ndaj SPAK, të cilin e akuzoi për manipulim të provave dhe veprime të qëllimshme kundër tij.

Në seancën gjyqësore në GJKKO, Ilir Meta deklaroi se prokuroria “në mënyrë recidiviste mashtron” lidhur me çështjen dhe përsëriti se mbrojtja ka kërkuar thirrjen e disa dëshmitarëve, mes tyre edhe kryeministrin Edi Rama.

“Jam rrëmbyer më 21 tetor 2024 mbi bazën e një letërporosie të falsifikuar. Kjo çështje është ngritur që në vitin 2018 dhe lidhet me zhvillime që pasuan zgjedhjet në SHBA”, u shpreh Meta.

Ai përmendi edhe ish-zyrtarin e FBI-së, Charles McGonigal, duke pretenduar se ai është i përfshirë në hetimet ndaj tij dhe se kjo, sipas Metës, është konfirmuar nga gjykatat amerikane. Sipas tij, para ardhjes në Shqipëri, McGonigal kishte zhvilluar takime në Vjenë, ku.

Meta deklaroi gjithashtu se pas këtyre zhvillimeve në skenë doli Rome Kara, i cili bëri kallëzimin ndaj tij, ndërsa theksoi se ai ka dhënë shpjegime për këtë çështje dhe se u qëndron deklarimeve të tij.

Ish-presidenti kundërshtoi edhe mënyrën se si janë administruar provat që lidhen me telefonat celularë të sekuestruar gjatë kontrollit në banesën e tij. Ai tha se një prej telefonave është identifikuar prej tij si telefon personal, ndërsa sipas tij, është trajtuar gabimisht si telefon i Fatime Kryemadhit.

“Këto janë veprime të qëllimshme kundër Ilir Metës,” deklaroi ai.

Meta u ndal edhe te çështja që lidhet me Adrian Shatkun, duke mohuar se kishte dijeni për veprimet e tij.

“Nëse do ta dija se çfarë kërkonte të bënte Adrian Shatku, do të reagoja. Do t’i kisha kërkuar ministrit Haxhinasto të ndërmerrte një akt normativ ose do të kisha iniciuar ndryshime ligjore në Kuvend. Nuk kam pasur asnjë interes personal,” tha ai.

Në përfundim, Meta deklaroi se ka qenë gjithmonë kundër monopoleve dhe se çështja po përdoret për të ushqyer, sipas tij, “propagandën dhe gënjeshtrat”, ndërsa shprehu besimin se procesi gjyqësor do të zbardhë të vërtetën.

Në fund të seancës, trupi gjykues vendosi të ndërpresë shqyrtimin e çështjes dhe ta shtyjë atë për 10 shtator, në orën 11:00, kur do të zhvillohet seanca e radhës. bw

Biznesmeni shqiptar Ermal Beqiri, i shpallur në kërkim ndërkombëtar nga autoritetet shqiptare në kuadër të hetimeve të SPAK për dosjen e “AKSHI-t”, është ndaluar në Francë pas një incidenti të pazakontë pranë centralit bërthamor të Penly, në Seine-Maritime.

Ndaj Beqirit, Gjykata e Posaçme kundër Korrupsionit dhe Krimit të Organizuar (GJKKO) kishte caktuar më herët masën e sigurisë “arrest në burg” në mungesë, me kërkesë të Prokurorisë së Posaçme.

Sipas mediave franceze, ndalimi i tij erdhi pasi ai drejtonte një avion të vogël civil që kaloi mbi një zonë të ndaluar ajrore pranë centralit bërthamor të Penly. Avioni po fluturonte në një lartësi rreth 1200 metra, por piloti, vetë Beqiri, uli papritur hundën e mjetit duke zbritur në rreth 1060 metra, duke shkelur kufirin e lejuar për kalimin mbi një objekt strategjik.

Pas sinjalizimit për incidentin, Forcat Ajrore franceze dërguan një mjet për ta shoqëruar avionin deri në aeroportin e Albertit, në Somme. Menjëherë pas uljes, piloti, Ermal Beqiri u ndalua nga policia dhe u mor në pyetje.

Gjatë kontrollit fizik, autoritetet i gjetën tre pajisje gjurmimi “AirTag” të fshehura në veshjet e tij. Hetuesit po verifikojnë arsyet e mbajtjes së këtyre pajisjeve dhe nëse fluturimi mund të ketë qenë i porositur apo i kryer nën ndikimin e një personi tjetër.

Përballë autoriteteve franceze, Beqiri ka deklaruar se kishte gabuar me lartësinë e fluturimit dhe se në momentin kur kaloi mbi central ishte duke folur në telefon me nënën e tij. Megjithatë, shpjegimet e tij janë konsideruar të paqarta nga hetuesit.

Itinerari i fluturimit ka ngritur gjithashtu dyshime, pasi avioni ishte nisur nga Alberti, kishte fluturuar drejt Calais dhe më pas drejt Bretanjës, përpara se të kalonte mbi centralin bërthamor të Penly.

Beqiri u gjobit me 7 mijë euro për fluturim të ndaluar mbi një zonë të mbrojtur dhe më pas iu dorëzua Zyrës Qendrore për Luftën kundër Krimit të Organizuar (OCLCO). Ai pritet t’i nënshtrohet procedurave për ekstradim drejt Shqipërisë.

27 July 2026

Unë vij nga një vend për të cilin do doja të ishte folur në shesh, sepse edhe ai vend meriton të jetë pjesë e zemërimit dhe të drejtave që kërkoni dhe ju sjellin këtu çdo natë: ai vend është Patos-Marinza me fushat e naftës ku kanë punuar breza gjyshërish, prindërish, vëllezërish e motrash. Pasuritë natyrore janë në kontrast me gjendjen e njerëzve, me papunësinë, pensionimin e parakohshëm, pasojë e administrimit të keq të pronës shtetërore. Më të rinjtë pranojnë kushtet e një mesjete moderne nga kompanitë e huaja dhe drejtësia bën sikur heton evazionin fiskal shumëvjeçar të Bankers Petrolium.

Por, jam sot këtu për një tjetër vend, që m’u bë po aq i dashur sa vendlindja: Teatri.

Nuk do merrem me kujtimet, por me pas-teatrin.

Pas Teatrit njerëzit u ndanë në ata që u zgjuan dhe ata që thanë: teatri? e ç’është kjo gjë? Nuk është halli ynë.

Pas Teatrit, në zonat e mbrojtura si qendra historike në Tiranë, Durrës, Vlorë, Korçë morën hov përbindësha betoni për ta nxitur një pakicë të pasurohet më tej dhe turistëve t’u thuhet se bëhet jetë mëse normale në këtë vend, paçka se 80% e popullsisë jeton për mbijetesë, nuk ia del të sigurojë një strehë me kursimet e jetës dhe sa për t’u zbavitur i mjafton një kafe-ujë në ditë.

Pas teatrit u dogjën hektarë pyjesh në Darëzezë dhe Pishë-Poro për t’i bërë gati për resorte për Kushnerët albanezë, ndoshta jo aq luksozë sa projekti i Zvërnecit, por prapë askush e nuk e di çfarë do bëhet me detin, rërën, pishat dhe erën që s’ka kush t’i mbrojë në plazhin tim të fëmijërisë. Kanë shkatërruar pyjet njëlloj si bibliotekat që s’kanë ç’iu duhen më, sepse fëmijët po ikin, do ikin, bashkitë do të shkrihen. Kështu që as varrezave nuk iu dihet. Po për të vdekurit tanë kush do kujdeset?

Pas teatrit, Kinostudioja iu fal mediave që regjimi i ka bërë investitorë strategjik me hektarë tokash në jugun e bukur, mediat që thoni se duhen bojkotuar, por nuk ua zini emrat me gojë atyre klaneve, top kanaleve, neokolonialistëve barezë e të tjerë. Goditini me bojkotin tuaj aty ku i kanë pikat të dobëta: tek plehërat e propagandës që s’ka incenerator t’i djegë; bojkotojuani bigbradherat dhe fermavipët që i duan për vdekjen tuaj mendore, sepse ata besojnë se është injoranca juaj dhe dembelizmi juaj historik që ua xhiron lekun, biznesin, spektaklin, madhështinë, që pastaj të bëjnë biografinë tuaj, të shpifin për ju dhe të thonë se ju nuk meritoni më shumë se një kafe në ditë dhe një ekran telefoni për të vrarë kohën.

Kanë vite që e besojnë këtë dhe ia kanë parë hajrin.

Që ju të mos kërkoni më shumë se një qebaptore në shesh, u krijua Nata e Bardhë (ju kujtohet?), festivali i Dritave, industria e koncerteve që Rama-Veliaj e bënë pjesë të programit politik për kapjen e qytetit dhe mbajtjen e pushtetit. Kanye West ishte thjesht zbavitja e radhës e ofruar më me arrogancë se të tjerat.

Pas teatrit janë artistët që i kishim quajtur ajka e kombit dhe që për një kohë të gjatë do t’i kujtojmë si turpi që duhet t’i mbetet në ballë shoqërisë, sepse besuam se edhe ata ishin shoqëria dhe do ishin në krahun e saj kur politika t’i godiste, korruptonte, zhvishte nga profesioni dhe bënte të papërfillshëm sa për një pjatë supë a një kredi të butë.

Pas teatrit Akademia e Shkencave iu dorëzua ministrit të Ramiz Alisë, Skënder Gjinushit. Në këmbim ai i shiti partinë Tom Doshit që ky të hynte në Parlament dhe historia dihet: e kundërta e elitës ka zënë vend në shkencë, Kuvend, biznes; zaptim tokash me të fortë ka ndodhur; Velipoja ka ndodhur, Baks-Rrjolli ka ndodhur, pasi kishin ndodhur njëherë Kakomeja, Palasa, Porto Palermoja.

Një shoqëri e traumatizuar gjithmonë e zbulon me vonesë lirinë e vërtetë dhe ky shesh po i jep kuptim kësaj lirie që çmimin e ka të lartë dhe joshjen të fortë e të magjishme.

Në mes jush duhet të ketë nga ata që ju flasin për lirinë që një ditë të kërkojnë pushtet mbi ju, por ju tani keni për t’i dalluar, sepse e keni identifikuar më në fund me gjithçka modelin e tridhjetë e pesë viteve. Po e zhvishni gjuhën e demagogut që ka folur pa pushim për lirinë, emancipimin dhe të ardhmen duke i vrarë përditë nga pak të gjitha këto, sepse e ka menduar veten të paprekshëm.

Keni dëgjuar edhe zonjën e tij t’u shpëlajë trutë fëmijëve përmes ekranit kur thotë: Edin, edhe kur të mos jetë më, do ta kujtojnë pensionistët e ardhshëm, turistët që nuk kanë lindur ende, do ta kujtojnë kur të shëtisin lungomares apo nën velierë.

Zero negociim me këtë njeri që nuk njeh respekt për popullin që drejton, zero tolerancë për gjuhën e tij të dhunës dhe moralin e tij që fyen edhe shtazët.

Pas Teatrit vuajtja e shqiptarëve nuk duhet lënë vetëm në dorë të spitaleve, se aty dihet si shkon. Tek ajo që po kërkoni dhe i keni vënë emrin “Shqipëri e re”, duhet hapur vend në radhë të parë në mendimet dhe dëshirat tuaja për bibliotekat, libraritë, skenat, kinematë, galeritë e artit që janë shkatërruar apo që u premtuan dhe nuk u ndërtuan kurrë, sepse udhëhiqemi nga një njeri që merr kënaqësi kur poshtëron tjetrin, nga një njeri që me shpurën e të ngjashmëve si ai, qeveris duke mashtruar, përçmuar kulturën shqiptare, i kapur pas kultit për artistin dhe turistin e huaj. Ringritja e këtyre vendeve që janë edhe shpirtërore mund ta përpunojnë dhimbjen që u është shkaktuar shqiptarëve, si atyre që e kanë ndjerë syhapur këtë dhimbje edhe atyre që nuk e kanë akoma mundësinë të zgjohen. Revolta juaj do t’i zgjojë ata një ditë, zemërimi juaj i drejtë po se po, aq edhe dashuria juaj.

Fjalë e mbajtur në protestën në bulevard, natën kur u përkujtua okupimi kulturor i Teatrit Kombëtar

© 2026 Elsa Demo. Të gjitha të drejtat janë të autorit.

Prokuroria e Posaçme (SPAK) ka zhvilluar kontrolle në ambientet e Bashkisë së Tiranës, në kuadër të hetimeve për dosjen e njohur si “Veliaj 2”.

Gazetarja Klodiana Lala tha për “News24”, se nga ana e SPAK janë kryer kontrolle, por edhe sekuestrime në Bashkinë e Tiranës.

Sipas burimeve, gjatë operacionit janë marrë dhe sekuestruar udhëtime zyrtare të kryetarit të Bashkisë së Tiranës, Erion Veliaj, si dhe dokumentacion që lidhet me dietat.

Mësohet se hetuesit e SPAK kanë kërkuar dokumentet përkatëse si pjesë e veprimeve hetimore, ndërsa materialet e sekuestruara do të analizohen në vijim.

Kontrollet janë kryer në kuadër të hetimit që lidhet me çështjen “Veliaj 2”. gsh

Ish-ministri i Financave, Arben Malaj ka reaguar sërish nërpërmjet një postimi në Facebook për zhvillimet e fundit në vend, duke u ndalur te protesta si edhe deklaratat e kryeministrit Edi Rama.

Ai thotë se kryeministri Rama po përdor një gjuhë që nxit konfliktin, dhe se po provokon me referenca të pavërteta.

Reagimi në Facebook;

Mirëdita, Rama, për të mbijetuar, po nxit urrejtjen politike midis shqiptarëve.

Churchilli keshillonte se nuk fokusohem tek e kaluara sepse nuk dua te humbas tê ardhmen.

Rama provokon me referenca te pa verteta te 1943 ose 63 vite me para.

Asnjë politikanë dhe aq me pak nje kryetar partie, kryeministër dhe kryetarë parlamentit nuk duhet në asnje rast dhe per asnjë sekonde tê ushqej urrejtje brenda popullit te tij.

Mjaftojnë dy rastet e fundit.

1. Rasti me deputetin Agron Shehaj, i cili përfaqëson një parti që është kushtetuese. Rama e krahason marrjen e shpejtuar të një dokumenti pas një shkrese zyrtare me, sipas Ramës: “ballistët që futeshin në kotecin e pulave dhe vidhnin pulat”./Lexoni artikullin.

Ky është një qëndrim i një politikani në panik. Rama beson se shqiptarët janë të gjithë të majtë, ndaj i kthehet retorikës së luftës.

Kjo nxit rritjen e agresivitetit politik në vend, të cilin e provokojnë vetëm politikanët e dështuar dhe që për pushtet deri kriminal i hedh benzinë ndarjeve që historia i ka zbutur.

Rasti i dytë dhe më i madh është etiketimi “agjent rus, iranian etj.”, “pula” dhe “sorra” dhe çdo banalitet ekstrem kundër protestuesve paqësorë dhe atdhetarë.

Duhet masivizim për ta ndalur këtë gjuhë flakëhedhëse të urrejtjes midis shqiptarëve.

Fati politik i Ramës është përcaktuar nga vetë Rama si kriminalizues i ekonomisë dhe politikës shqiptare.

Ditë të mbarë!

bw

TIRANË- Edhe pse tregu i punës në Shqipëri vijoi të përmirësohej gjatë vitit 2025, një pjesë e konsiderueshme e personave me arsim universitar mbeten jashtë tregut edhe pse janë në kërkim të punës. Të dhënat e publikuara në raportin “Tregu i Punës 2025” të INSTAT tregojnë se 17,800 persona me arsim të lartë rezultonin të papunë, ndërsa pesha më e madhe e tyre i përket grup-moshave të reja, duke treguar vështirësitë që hasin të diplomuarit në gjetjen e një vendi pune pas përfundimit të studimeve.

Sipas statistikave, nga 17,800 të papunët me arsim të lartë në kërkim të punës, 5,370 janë të moshës 15-24 vjeç, ndërsa 4,323 i përkasin grup-moshës 25-29 vjeç. Në total, 9.693 persona, ose rreth 55% e të gjithë të papunëve me diplomë universitare, janë nën moshën 30 vjeç. Kjo tregon se sfida më e madhe është hyrjen e të rinjve të diplomuar në tregun e punës.

Grupi më i madh pas të rinjve është ai i moshës 25-54 vjeç, me 11.284 persona, ndërsa numri i të papunëve me arsim universitar mbi 55 vjeç mbetet shumë më i ulët.

Në total, INSTAT vlerëson se gjatë vitit 2025 në Shqipëri kishte 107.548 persona të papunë, nga të cilët 45,764 kishin arsim të mesëm, 43,984 arsim 8/9-vjeçar dhe 17.800 arsim të lartë. Kjo do të thotë se personat me diplomë universitare përbëjnë rreth 16.5% të të gjithë të papunëve në vend që duan të punojnë por nuk gjejnë punë.

Fakti që mbi gjysma e tyre janë të rinj nën 30 vjeç tregon se kalimi nga arsimi i lartë drejt punësimit vazhdon të jetë një nga hallkat më problematike të tregut të punës në Shqipëri, pavarësisht përmirësimit të përgjithshëm të treguesve të punësimit.

Arsyet kryesore lidhen me mospërputhjen mes diplomave dhe kërkesës reale të tregut. Ekonomia shqiptare vijon të gjenerojë më shumë vende pune në sektorë si shërbimet, turizmi, ndërtimi dhe tregtia, ndërsa shumë të diplomuar dalin nga universitetet me profile që nuk përkojnë gjithmonë me nevojat e bizneseve.

Një tjetër faktor është mungesa e përvojës, pasi të rinjtë me arsim të lartë shpesh hyjnë në treg me diplomë, por pa aftësitë teknike, digjitale, gjuhësore apo profesionale që kërkohen nga punëdhënësit.

Po ashtu, një pjesë e të diplomuarve përballen me pritshmëri më të larta për pagën dhe pozicionin, duke mos pranuar punë që nuk lidhen me profesionin apo që ofrojnë paga të ulëta dhe kjo e zgjat periudhën e papunësisë pas diplomimit.

Kryesore mbetet mungesa e lidhjes se arsimit me nevojat e tregut. Praktikat profesionale, orientimi i karrierës dhe bashkëpunimi me kompanitë nuk janë ende të mjaftueshme për ta bërë kalimin nga shkolla në punë më të shpejtë./Monitor.al

Aktivisti Edison Lika ka reaguar pas incidentit të denoncuar gjatë protestës, ku një efektiv i policisë, civil, ka nxjerrë thikën ndaj aktivistit Gent Progni.

Ai tha se për ngjarjen është bërë kallëzim penal dhe ankesë në Agjencinë e Mbikëqyrjes Policore, ndërsa shtoi se personi i dyshuar nuk e ka përdorur thikën vetëm si mjet kërcënimi, por ka tentuar të godasë Prognin.

“Një polic privat, pak para se të fillonte protesta, i ka nxjerrë thikën njërit prej protestuesve. Nuk nxori thjesht thikën për ta kërcënuar, por tentoi t’i binte Gent Prognit me thikë”, tha aktivisti.

Lika bëri të ditur se pas incidentit kanë kërkuar kamerat te biznese pranë vendit të ngjarjes, por ato janë përgjigjur duke thënë “nuk kemi kamera”.

“Më pas, siç do të duhej të ndodhte kudo në botë, shkuam të kërkonim kamerat pranë ambientit ku kjo kishte ndodhur. Tre argjendari, që duhet të jenë bizneset më të mbrojtura në vend, na thanë që nuk kemi kamera. Kjo nuk është heshtje, është bashkëpunim me policinë e krimit.”, u shpreh ai.

Aktivisti Edison Lika: Ne kemi qenë të vetëdijshëm se sa më shumë ata ta kuptojnë që po u vjen fundi, aq më agresivë do të bëhen. A i keni parë protestat e fundit te Parlamenti? Policia ka një lloj agresiviteti të shtuar dhe duket sikur nuk e di më se çfarë po bën. Dhjetëra qytetarë, aktivistë, janë marrë peng nga kjo polici vetëm se po qëndronin në trotuare dhe po filmonin. Të enjten e kaluar, u mora unë vetëm se isha në trotuar dhe po jepja një intervistë, dhe sot u mor Genc Shehu vetëm se po filmonte. Ama ne me këtë nivel ishim mësuar dhe e kemi përballuar me dinjitet dhe me kryelartësi.

Por sot ka ndodhur diçka që nuk e kthen më situatën siç ishte më parë. Një polic privat, pak para se të fillonte protesta, i ka nxjerrë thikën njërit prej protestuesve. Polici i krimit, polici i krimit. E në fakt, ai nuk nxori thjesht thikën për ta kërcënuar, por tentoi t’i binte Gent Prognit me thikë.

Ajo thikë sot nuk i është drejtuar vetëm Gent Prognit, por na është drejtuar të gjithëve ne. Nga ky shesh dua t’ju them që as ju kemi frikë, por as nuk ju falim. Sigurisht, kundër atij polici është bërë kallëzim penal dhe ankesë në AMP. Më pas, siç do të duhej të ndodhte kudo në botë, shkuam të kërkonim kamerat pranë ambientit ku kjo kishte ndodhur. Tre argjendari, që duhet të jenë bizneset më të mbrojtura në vend, na thanë që nuk kemi kamera. Kjo nuk është heshtje, është bashkëpunim me policinë e krimit.

Ndaj, nga ky shesh u bëjmë sot thirrje organeve hetimore të arrestojnë një minutë e më parë policin bandit që nxori thikën ndaj një protestuesi sot.

Një shprehje ka qenë edhe pjesë e kësaj proteste: “Kur polici na drejton thikën, kush duhet të na mbrojë?” Kjo është vijë e kuqe, kjo nuk duhet të ndodhë. Kjo është e pafalshme. Polici i krimit! Ne do t’i qëndrojmë në krah mikut tonë dhe protestuesit që prej ditës së parë, sepse në këtë shesh ne kemi vetëm njëri-tjetrin. Dhe duhet ta dinë: atyre po u vjen fundi. Ju erdhi fundi. gsh

Shefi i Komisariatit Nr. 1 në Tiranë, Ervin Hasrama është shfaqur sërish në protestën e radhës para Kuvendit, pas incidentit të ndodhur pak ditë më parë, ku u godit me vezë.

Sot ai është përballur me protestuesit, ndërsa ata kanë hedhur thirrje kundër ti, duke i thënë se “është turpi i policisë së shtetit”.

“Turp të të vijë, ti ke arrestuar, ti je turpi i policisë së shtetit. Ti e do vezën prapë. Palaço burrë, nuk të mbrojnë dot nga populli këta”, dëgjohen ti thonë protestuesit.

Ndërkohë në momentin që qytetarët hedhin thirrje kundër ti, Hasrama nxjerr nga xhepi një spraj. Panorama

TIRANË- Aktivisti Edison Lika u shpreh se kryeministri Edi Rama duhet të japë dorëheqjen. Duke folur për News 24 para komisariatit 1, Lika theksoi se ishin në dijeni se efektivët ishin të përgatitur për arrestime. Në fund të fjalës së tij, Lika theksoi se kryeministri duhet t’i përgjigjet protestuesve, duke nisur me dorëheqjen

“Ne sot kemi qenë më të qetë dhe jo shumë të armatosur me vezë. E dinim se ishin të përgatitur për të na arrestuar. U përgjodhën dhe janë marrë. Një prej djemve është marrë vetëm sepse po filmonte, bëni sepse thjesht ka kaluar Lanën. Kryeministri duhet ta dintë që para 13 vitesh se kur je kryeministër nuk përfaqëson vetëm 800 mijë për të gjithë vendin. Por sot e di që nuk i ka më ato 800 mijë. Dhe kryeministri duhet t’i përgjigjet protestuesve, dhe duke nisur me dorëheqjen”, tha ai./Dosja.al

TIRANË- Policia ka sulmuar qytetarët me spraj edhe në tubimin e sotëm. Mësohet se pasi policia ka hedhur spraj, një i ri ka shfaqur shqetësime në tubimin para Kuvendit.

Pas tensioneve policia ka hedhur spraj, duke bërë që i riu të shfaqë probleme shëndetësore, ku më pas është shoqëruar me autoambulancë drejt spitalit për të marrë ndihmë mjekësore./Dosja.al

Policia ka shoqëruar Arben Kolën pasi ka tentuar të çajë kordonin e efektivëve.

Protesta vijon para Kuvendit, e cila nisi që prej orës 08:30 të ditës së sotme. Gjithashtu nga policia është shoqëruar edhe një person tjetër. bw

Qytetarët janë mbledhur këtë të hënë përpara Kuvendit të Shqipërisë në ditën e 58-të të protestës, duke vijuar kërkesat e tyre për dorëheqjen e kryeministrit Edi Rama.

Protestuesit kanë shoqëruar tubimin edhe me thirrje kundër klasës politike, duke brohoritur: “Rama në burg, Berisha në burg!”, “Parlament i krimit!” , “Parlament analfabet!”, “Shqipëria e shqiptarëve, vdekje tradhtarëve!”

Ndërkohë, protesta po zhvillohet nën masa të forta sigurie, me prani të shtuar të forcave të policisë përreth godinës së Kuvendit, ku po mbahet seanca e fundit plenare e këtij sesioni parlamentar. bw

Pas vendosjes para Ministrisë së Brendshme, protestuesit tashmë kanë nisur marshimin drejt Rrugës së Elbasanit.

Ndërkohë në një moment ka pasur edhe përplasje mes qytetarëve dhe efektivëve, pasi qytetarët kanë kërkuar që policët të mos marshojnë krah tyre.

Ndërkohë vijon të artikulohet thirrja: “Rama në burg” dhe “Arrestoni Belindën”. bw

Ndërsa kryeministri Edi rama u përgjigjet me arrogancë qytetarëve shqiptarë që protestojnë prej 57-të ditësh në bulevardin para godinës së qeverisë dhe me marshimet e përnatshme në Tiranë, nuk ndalet rezistenca popullore.

Madje në ‘detin’ e thirrjeve, parullave dhe pankartave, spikasin ato më të goditurat.

Një prej tyre është kjo që përmban mesazh të fortë dhe prekës nga një i moshuar që del përnatë në protestën polullore për largimin e qeverisë, kryeministrit Rama dhe ndryshimit të sistemit të vjetër politik.

Me një pankartë që mban në dorë, pensionisti ka shkruar qartë dhe prerë:

“Në protestë do dal deri sa shpirti të më dalë!”.

Në protestë nuk kanë munguar edhe parullat si “I pabesë”, “Ju erdhi fundi”, “Rama në burg”, “Rama jepe dorëheqjen”, “Arrestoni Ramën”, “Rama në burg, Berisha në burg”, “Revolucion”, “Shqipëri e re” dhe të tjera.

Panorama

Kryeministri Edi Rama ka reaguar përmes një postimi në platformën X pas protestave masive që sot ka hyrë në ditën e saj të 57, ndërsa teksa sulmon protesutesit, pohon se nuk do të japë dorëheqjen. Ai tha se nuk ka bërë kontratë me sorrat dhe korbat, por me flamingot.

REAGIMI I RAMES
Më vijnë në rrugë të ndryshme përmes whatsapit, nga miq a të panjohur, muhabete* sorrash e korbash pas fjalës sime për Bulevardin e Flamingove. Një prej tyre, që e kam dëgjuar edhe me audion origjinale nga poshtë dritares së zyrës, do një koment:

Përsërisin që s’duan “dialog”, s’ka “negociata”, s’japin “besë” po duan vetëm dorëheqjen time! Keqkuptim i madh.

Asnjë prej tyre s’më ka dhënë votë, me asnjë prej tyre s’kam kontratë dhe për asnjë prej tyre e as për të tërë ata bashkë s’më ka shkuar asnjëherë ndërmend të prish kontratën me 800 mijë shqiptarë, ndër të cilët edhe plot flamingo!

Fjala ime ishte për mësimet që mora nga flamingot dhe i drejtohej atyre, jo puplave të zeza që mblidhen çdo natë në bulevard pas shtegtimit të flamingove.

Në atë fjalë sorrat e korbat ishin pjesë, sepse janë ana e errët e protestës, po jo se kanë pjesë në ato mësime apo në detyrimet e nxjerra prej atyre mësimeve.

Kështu që sorrat dhe korbat as mos lodhen hiç së refuzuari BESËN sepse BESA jonë s’ka asnjë lidhje me ta, as mos rreshtin së ardhuri poshtë penxheres time me kërkesën për dorëheqje deri në vitin 2029 po të duan! Sepse liria është e njëjtë edhe për ta dhe demokracia funksionon njësoj për të gjithë.

Ndërsa kontrata ime me shqiptarët nuk varet në asnjë pikë të vetme nga ata po është pronë e të gjithë atyre me të cilët e kam nënshkruar, si edhe gur themeli i jetës demokratike🇦🇱🤝🇪🇺

bw

Ish-zëvendësministri i Drejtësisë, Arben Isaraj, ka publikuar një mesazh kritik ndaj kryeministrit Edi Rama, duke vënë theksin te rëndësia e besës, besimit dhe ndershmërisë në qeverisje. Në reagimin e tij, Isaraj shprehet se çdo shoqëri e qytetëruar ndërtohet mbi besimin, të cilin e cilëson si një kapital moral të pazëvendësueshëm.

“Vetëm mbi themelin e së vërtetës, ndershmërisë dhe përgjegjësisë mund të ndërtohen marrëdhënie të qëndrueshme, institucione të besueshme dhe një shoqëri e drejtë. Si qelqi i pastër, besimi duhet të ruhet me kujdes, sepse një çarje e vogël mund të mos zhduket kurrë plotësisht”, përfundon reagimi i tij.

“Besa dhe besimi janë si qelqi: një gënjeshtër i thyen, por nuk i kthen më si ishin”.
Çdo shoqëri e qytetëruar ndërtohet mbi një kapital moral të padukshëm, por të pazëvendësueshëm: besimin.
Institucionet, ekonomia, drejtësia, familja dhe marrëdhëniet ndërpersonale funksionojnë vetëm atëherë kur individët besojnë te fjala, ndershmëria dhe integriteti i njëri-tjetrit.
Në kulturën shqiptare ky besim mishërohet në një nocion të veçantë etik – besën, e cila përfaqëson jo vetëm mbajtjen e fjalës së dhënë, por edhe përgjegjësinë morale për të qenë i vërtetë dhe i besueshëm.
Thënia popullore me natyrë ndërkombëtare: “Besa dhe besimi janë si qelqi: një gënjeshtër i thyen, por nuk i kthen më si ishin” përmbledh një nga të vërtetat më të rëndësishme të etikës njerëzore (Aristoteli, Publilius Syrus, Konfuci, Kanti, Kanuni i Lekë Dukagjinit).
Besimi nuk fitohet me fjalë, por me karakter; nuk ndërtohet brenda një dite, por përmes një historie të gjatë ndershmërie dhe përgjegjësie.
Ndërsa gënjeshtra mund të sjellë një përfitim të përkohshëm, ajo lë plagë të thella në marrëdhëniet njerëzore dhe cenon integritetin moral të individit.
Në një botë ku komunikimi është i menjëhershëm dhe informacioni qarkullon me shpejtësi, ruajtja e besës dhe e besimit mbetet një detyrë etike me rëndësi të veçantë.
Vetëm mbi themelin e së vërtetës, ndershmërisë dhe përgjegjësisë mund të ndërtohen marrëdhënie të qëndrueshme, institucione të besueshme dhe një shoqëri e drejtë.
Si qelqi i pastër, besimi duhet të ruhet me kujdes, sepse një çarje e vogël mund të mos zhduket kurrë plotësisht.”, shkruan Arben Isaraj. bw

Ndërsa kryeministri shqiptar Edi Rama flet për “Besë” dhe administratë që do të ndryshojë, ndryshe janë mendimet e atyre që kanë punuar edhe afër tij ndër vite.

Ai thotë se kjo qeveri ka larguar edhe të rinjtë nga vendi, kurse përgjegjës për “çorbën” është vetëm kryeministri.

“Oooo i Modh! Askujt mos iu anko; ti je përgjegjësi i vetëm për këtë zallamahi e çorbë që ke gatuar nën logon; Administrata Shtetërore …e që mjerë kujt i bie të ketë punë e të zgjidhë hall me të!”, shkruan ai mes të tjerash në postimin e tij në Instagram.

Meko vë në dukje edhe shprehjen e mendimeve dhe objeksioneve të tij për Administratën ndër vite, duke i deklaruar problematikat edhe publikisht:

“Personalisht jam shprehur hapur e prej kohësh se, në historinë 114-vjeçare të shtetit shqiptar, administratë të korruptuar e analfabetë të këtij standardi si kjo e sotmja, as ka patur e as do të ketë! Për hir të së vërtetës s’kishte se si të ishte ndryshe nga një gatesë bajate dhe e pështirë prej brumi të zënë, midis ish-administratës së Berishës, (keqfunksionimi i saj e ndëshkoj Saliun në vitin 2013 me 1 milion vota) dhe peshqesheve sorosjane; llumit G-99 e Mjaftistat që dikur si pelikanët e sotëm ulërinin rrugëve të Tiranës;- Nano ik-PS, ik!”, thotë ai.

Postimi i plotë i Muharrem Mekos:

“Më në fund “i modhi” e paska kuptuar se Administrata na paska qenë shkaktarja e sherrnajës…dhe rebelimit të ‘Pelikanëve’!

Pra s’janë shkaktarët e vërtetë, as korrupsioni marramendës, as ikjet e fëmijve të Shqipërisë, as shitja e trojeve e pronave publike buzë detit nga striptistët , as mungesa e drejtësisë, as mungesa e shëndetësisë…

-Asnjëra, asnjëra prej tyre….përveçse Administrata!

Fatkeqësisht, gjithçka që sot më shumë se kurrë po bëhet së prapthi, apo edhe s’bëhet fare, bëhet keq apo djallëzisht, në dëm të shqiptarëve e deri për interesa të dyshimta në emër të antishqiptarizmit, apo edhe milionave të zeza që djeg e përvëlon zemrat e shqiptarëve, ka pikërisht këtë emër të neveritshëm!

…kur duhet të ishte ndryshe, krejtësisht ndryshe, përderisa përceptimi qytetar për administratën është si ai një fëmijë për prindin; ndërkohë që korrupsioni galopant e kanë ulur tejmase besimin ndaj saj, e meritokracia në kufijte e analfabetizmit ia kanë ulur kokën shqiptarit, të përgjëruar për “prindin” e munguar, si asnjë populli tjetër në Europë!

Personalisht jam shprehur hapur e prej kohësh se, në historinë 114-vjeçare të shtetit shqiptar, administratë të korruptuar e analfabetë të këtij standardi si kjo e sotmja, as ka patur e as do të ketë!

Për hir të së vërtetës s’kishte se si të ishte ndryshe nga një gatesë bajate dhe e pështirë prej brumi të zënë, midis ish-administratës së Berishës, (keqfunksionimi i saj e ndëshkoj Saliun në vitin 2013 me 1 milion vota) dhe peshqesheve sorosjane; llumit G-99 e Mjaftistat që dikur si pelikanët e sotëm ulërinin rrugëve të Tiranës;- Nano ik-PS, ik!

Oooo i Modh !

Askujt mos iu anko; ti je përgjegjësi i vetëm për këtë zallamahi e çorbë që ke gatuar nën logon; Administrata Shtetërore …e që mjerë kujt i bie të ketë punë e të zgjidhë hall me të!

…e për ty personalisht, si koka e saj ??

– S’ mund të them asgjë, përveçse; -të zënçin sytë përpjekjet, mbështetja e qëndresa e atyre mijëra socialistëve të orëve të para, që shkel”.

Një ekspeditë speleologjike në shpellën “Sterra e Kujunxhiut”, brenda Parkut Kombëtar të Llogarasë, ka zbuluar një zgavër me thellësi rreth 70 metra, pothuajse tërësisht vertikale. Hyrja e zgavrës ndodhet ne nje lartesi prej 750 metrash mbi nivelin e detit.

Sipas eksploruesve, në fund të shpellës është gjetur një grumbull i madh gurësh, i cili dyshohet se ka bllokuar vazhdimin e galerisë. Gjatë eksplorimit është konstatuar edhe prania e një numri të madh eshtrash kafshësh të egra, mes tyre të derrit të egër, drerit, ujkut, dhelprës dhe specieve të tjera. Sipas grupit të ekspeditës, zbulimi pritet të nxisë eksplorime dhe studime të mëtejshme, me qëllim përcaktimin nëse shpella ka vazhdim, si edhe dokumentimin e vlerave të saj natyrore dhe speleologjike.

Zgavra e rralle ne parkun kmbetar te llogarisë u zbulua nga Shoqata Speleologjike Shqiptare, e cila thekson se çdo eksplorim zbulon nje pjese te panjohur te trashegimise sone natyrore dhe nenvizon rendesine e studimit, dokumentimit dhe mbrojtjes se shpellave shqiptare. bw

Ish-ministri socialist Arben Malaj ka konfirmuar se do të kandidojë si kandidat i pavarur për kryetar të Bashkisë së Vlorës në zgjedhjet vendore të vitit 2027.

Përmes një postimi në Facebook, Malaj tha se vendimi vjen pas kërkesave dhe mbështetjes së marrë nga qytetarë, miq dhe dashamirës në Vlorë.
“Po! Unë do të kandidoj në 2027 si i pavarur për kryetar i Bashkisë Vlorë. Kjo është përgjigjja për çdo mbështetës dhe dashamirës, por edhe për çdo qytetar që më pyesin gjithnjë e më shumë”, shkroi ai.

Malaj theksoi se kandidimi i pavarur do t’i garantojë liri në vendimmarrje dhe pavarësi nga strukturat partiake.
Sipas tij, një nga avantazhet kryesore është se nuk do të ketë detyrime ndaj “klaneve politike” apo interesave të ngushta, ndërsa vendimet do të merren vetëm në funksion të interesit të qytetarëve të Vlorës.

Ish-ministri premtoi gjithashtu një administratë të bazuar në meritokraci, fundin e favorizimeve politike dhe transparencë në vendimmarrje, duke shtuar se punonjësit e bashkisë nuk do të jenë objekt i presioneve politike.

Në platformën e tij, Malaj shprehet se synon të krijojë një lëvizje qytetare që do të bashkojë intelektualë, aktivistë, bizneset e vogla dhe shoqërinë civile, duke e cilësuar kandidimin si një alternativë ndaj politikës tradicionale.

“Aseti ynë më i madh është kapitali moral dhe liria. Nëse arrijmë ta kthejmë këtë liri në një lëvizje bashkuese qytetare për Vlorën, mund të thyejmë apatinë elektorale dhe ta bëjmë Vlorën qytetin e barazisë së mundësive për çdo banor të saj”, përfundon Malaj në reagimin e tij.

Reagimi në Facebook;

Mirëdita- Po! Unë do të kandidoj në 2027 si i pavarur për kryetar i Bashkisë Vlorë.
Kjo është përgjigjja për çdo mbështetës dhe dashmirës, por edhe për çdo qytetar që më pyesin gjithnjë e më shumë.
I falënderoj të gjithë,
edhe ata që hezitojnë
apo janë të vendosur të votojnë edhe kundër.
Kjo do të jetë demokracia vlonjate.
Ja disa nga avantazhet e kandidimit si i pavarur për Bashkinë e Vlorës:
1. Liria e Plotë dhe Paanësia
Mungesë Raportimi te “Padronët”:
Nuk kam detyrim t’u shërbej interesave të klaneve politike në Tiranë apo të bëj kompromise me emra të korruptuar brenda listave partiake.
Vendimet do të marrin parasysh vetëm interesin e banorëve të Vlorës.
Vendimmarrje e Pavarur: Nuk jam i detyruar të zbatoj urdhrave jo ligjorë nga kryeministrat dhe oligarket, që dëmtojnë komunitetin lokal për llogari të pushtetit të KM.
2. Moraliteti dhe Besueshmëria e Paprekur

Alternativë e Pastër:
Përballë një sistemi të kalbur nga korrupsioni, statusi i të pavarurit më pozicionon si një kandidat të paprekur nga mëkatet e pushtetit apo dështimet e opozitës zyrtare.
Atraksion për Votuesin e Zhgënjyer: Kapitalizoni mbi abstenimin e madh elektorat — qytetarët që nuk duan më të votojnë “të keqen më të vogël” partiake mund te përzgjedhin një opsion dinjitoz.
3. Fleksibilitet dhe Agjilitet në Fushatë.Mesazh Direkt dhe i Sinqertë:
Fushata ime nuk ka nevojë për fjalor agresive dhe banal ; do të respektoj sinqerisht dhe plotësisht cdo kandidat potencial, dotë flas hapur, me emra konkretë, për problemet reale të qytetit (prona, turizmi, infrastruktura, shërbimet).
Bashkim i Komunitetit: Mund të krijojë një koalicion të gjerë qytetar me intelektualë, aktivistë, biznese të vogla dhe shoqërinë civile, pa barrierat e simboleve partiake.
4. Efekti i Sfiduesit të Drejtpërdrejtë
Thyerje e Monopolit:
Si kandidat i pavarur do të shpërbëj ligjërisht patronazhistët abuzues.
Do të ul agresivitetin e qeveritarëve që e kanë më të lehtë të sulmojë një parti kundërshtare tradicionale sesa një figurë lokale me mbështetje organike qytetare.
Zëri i Protestës Qytetare:
Do të kthehem në simbolin e revoltës paqësore ndaj autokracisë dhe “kapjes së shtetit”.
5. Çlirimi i Administratës dhe Barazia e Mundësive
Meritokraci në Administratë:
Punonjësit e aftë të bashkisë do te çlirohen nga presionet politike dhe kërcënimet me vendin e punës për llogari të patronazhistëve.
Asnje kryetar partia apo kryeministër nuk do të urdhëroj shkarkime dhe doreheqje inatçore të drejtuesve dhe punonjësve të bashkisë Vlorë.
Barazi në Shërbime dhe Biznes:
Fund favorizimeve selektive, tenderave të paracaktuar dhe bllokimeve burokratike për qytetarët e thjeshtë dhe sipërmarrësit e ndershëm.
Llogaridhënie Direkte: Transparencë e plotë ku çdo vendim merret në sy të publikut dhe jo në zyrat e mbyllura të partive apo oligarkëve.
Aseti ynë më i madh është “kapitali moral dhe liria”.
Nëse arrijmë ta kthejmë këtë liri në një lëvizje bashkuese qytetare për Vlorën, mund të thyejmë apatinë/abstenimin elektorat dhe ta bëjmë Vlorën qytetin e barazisë së mundësive për çdo banor të saj. bw

Deputetja e pavarur, Marjana Koçeku ka reaguar përmes një postimi në Facebook ndaj deklaratave të kryeministrit Edi Rama, i cili së fundmi u bëri thirrje shqiptarëve t’i japin “besën”.

Në reagimin e saj, Koçeku shprehet se besa është një koncept i shenjtë dhe i lidhur ngushtë me traditën, tokën dhe vendlindjen, duke theksuar se nuk mund të përdoret si slogan politik.

“Flasin për besën njerëz që nuk ia kanë idenë çka asht besa. Së pari, besa asht nji kontratë e pashkrueme mes njerëzish dhe, si e tillë, asht thellësisht natyrore,” shkruan ajo.

Koçeku thekson se të parët e kanë lidhur besën me tokën, malin, gurin dhe vendin ku jetonin, duke i konsideruar ato dëshmitarë të fjalës së dhënë. bw

Deputetja e Partisë Demokratike, Ina Zhupa, reagoi ashpër ndaj deklaratave të kryeministrit Edi Rama për protestën e djeshme ku mori pjesë një nënë me fëmijën e saj me autizëm, duke i cilësuar ato si “kulmi i cinizmit”. Zhupa akuzoi qeverinë se ka braktisur familjet që përballen me autizmin, ndërsa dënoi edhe ndërhyrjen e Policisë së Shtetit ndaj protestuesve, duke theksuar se problemi nuk është protesta, por një qeverisje që, sipas saj, ka humbur ndjeshmërinë ndaj qytetarëve më në nevojë.

Reagimi i plotë i Ina Zhupës:

Kulmi i cinizmit!

Kur një nënë del në protestë me fëmijën e saj me autizëm, nuk e bën për politikë. E bën sepse nuk ia del më të jetojë, sepse shteti e ka lënë vetëm, sepse ndihma nuk mjafton dhe dinjiteti i është mohuar.

Nuk e morën në proteste as korbat e as sorrat. Paratë e saj dhe të mijëra familjeve sot në nevojë, i kanë marrë derrat e majmur të pushtetit, ata që prej vitesh qeverisin pa u interesuar për hallet e qytetarëve. Dhe pasi u kanë vjedhur të ardhmen, tani duan t’u mohojnë edhe të drejtën kushtetuese për të protestuar, duke i dhunuar me polici.

Vetë prania e asaj nëne me fëmijën e saj dëshmoi qartë se protestuesit nuk përbënin asnjë rrezik. Asgjë nuk e justifikon sjelljen brutale dhe të paligjshme të Policisë së Shtetit ndaj qytetarëve që ushtronin një të drejtë demokratike.

Një kryeministër që duhet të mbante përgjegjësi pse një nënë me një fëmijë me autizëm detyrohet të dalë në rrugë për t’u dëgjuar, zgjedh të sulmojë qytetarët që i dhanë mbështetje dhe ta etiketojë atë si të manipuluar. Kjo nuk është vetëm mungesë përgjegjësie; është humbje e plotë e ndjeshmërisë njerëzore.

Detyra e një shteti është të mbrojë më të pambrojturit, jo t’i poshtërojë ata. Kur një nënë me një fëmijë me autizëm ndihet e detyruar të protestojë për të kërkuar minimumin për një jetë me dinjitet, problemi nuk është protesta. Problemi është qeverisja. Problemi është Edi Rama që nuk do ta kuptojë që i ka ardhur fundi”, shkruan ajo. bw

TIRANË– Janë liruar 21 nga 23 personat e shoqëruar nga Policia pas protestës së zhvilluar një ditë më parë para Kuvendit. Sipas informacioneve paraprake, nga 23 protestuesit e shoqëruar vetëm dy persona janë arrestuar, ndërsa 21 të tjerët do të hetohen në gjendje të lirë.

Shoqërimet u kryen gjatë ndërhyrjes së Policisë në protestën e zhvilluar para Kuvendit, ku u regjistruan përplasje dhe tensione mes protestuesve dhe efektivëve. Ndërkohë, për dy personat e arrestuar vijojnë procedurat ligjore, ndërsa pritet zbardhja e plotë e rrethanave dhe veprimeve të ndërmarra gjatë protestës./Dosja.al

The Atlantic

Revista prestigjioze amerikane The Atlantic i ka bërë jehonë protestave masive për dorëheqjen e Edi Ramës. Media shkruan se demonstratat në shkallë të gjerë filluan në Shqipëri në fund të majit, pasi qarkulloi një video e rojeve private të sigurisë që grushtonin dhe zvarrisnin një protestues përgjatë një plazhi në Zvërnec, enklavën bregdetare ku është planifikuar një pjesë e projektit të familjes Trump. “Kjo ishte pika kthese”, tha Ditmir Bushati, një ish-ministër i jashtëm shqiptar. “Filloi si një mosmarrëveshje për aksesin në det dhe aksesin në natyrë, dhe u transformua brenda disa ditësh në një protestë rreth asaj se kush duhet të vendosë për të ardhmen e vendit”.

Mijëra njerëz u mobilizuan në Tiranë, kryeqytetin, me pankarta që shpallnin se kombi nuk ishte në shitje dhe deklaronin, “Nuk e dua Shqipërinë si Dubai”. Rama gjithashtu u ndal, duke lëshuar një deklaratë ku thuhej: “Nuk ka absolutisht asnjë shans që investimi të ndalet për sa kohë që unë jam këtu”. Ndërsa protestat u rritën, ato u bënë një platformë për spekulime të tërbuara dhe teori konspiracioni. Disa protestues panë paralele me mbështetjen e Kushnerit për një “Riviera të Gazës” të propozuar, nga frika se toka shqiptare do të përdorej për të zhvendosur palestinezët. Më tej, komentuesit online e quajtën zhvillimin “një tjetër ishull Epstein”, një referencë për strehimet e ish-sulmuesit seksual Jeffrey Epstein në Ishujt Virgjër të SHBA-së. Një polemikë e veçantë, mbi planet e mbështetura nga qeveria për një koncert të Kanye West jashtë Tiranës, iu shtua pakënaqësisë. Vëmendja erdhi nga të gjitha anët ideologjike. Senatori Bernie Sanders i mirëpriti protestat si një mospajtim kundër “oligarkisë globale”. Alex Jones, teoricieni i konspiracionit të krahut të djathtë, u entuziazmua për një “luftë civile” të afërt.

Kryeministri argumentoi se protestat ishin rrëmbyer nga aktorë të huaj, duke fajësuar “urrejtësit e Trumpit”, si dhe “armiqtë e Izraelit dhe Shqipërisë”. Shqipëria, ku rreth gjysma e popullsisë është myslimane, ka lidhje të forta me Izraelin të rrënjosura në vullnetin e mirë historik. Gjatë Luftës së Dytë Botërore, shqiptarët e motivuar nga një kod i lashtë nderi i quajtur besa, fjalë për fjalë “për të mbajtur premtimin”, fshehën mijëra refugjatë hebrenj; ishte i vetmi vend evropian me më shumë banorë hebrenj pas Holokaustit sesa më parë.

Në këtë shekull, Shqipëria e bëri veten një shënjestër të regjimit iranian kur pranoi, me kërkesë të Shteteve të Bashkuara dhe Kombeve të Bashkuara në vitin 2013, të strehonte anëtarë të mërguar të grupit disident Mujahedin-e-Khalq, ose MEK. Në vitin 2022, Shqipëria dëboi diplomatë iranianë pasi arriti në përfundimin se Teherani ishte pas një vale sulmesh kibernetike që synonin institucionet qeveritare dhe infrastrukturën kritike. Në javët e fundit, Rama e ka akuzuar Iranin se po zhvillon një “luftë hibride” duke përhapur dezinformata në lidhje me zhvillimin dhe duke nxitur kundërshtimin ndaj planeve të qeverisë së tij. Irani i ka mohuar akuzat.

Protestuesit duket se janë të vendosur të vërtetojnë se kryengritja është autentike dhe vendase.

Bushati, ish-ministri i jashtëm, i ka cilësuar protestat si “investimi më i mirë në imazhin tonë si popull dhe në rrugën tonë drejt Bashkimit Evropian”. Ai tha se deri në 200,000 njerëz u mobilizuan gjatë fundjavës së 4 korrikut dhe hodhi poshtë pretendimet për ndërhyrje të huaja. “Irani nuk ka ndikim në Shqipëri”, tha ai. “Ky është një vend që jeton i lumtur në orbitën e SHBA-së”.

Ndikimi iranian vështirë se duket i nevojshëm për të destabilizuar planet e resortit. Toka në të cilën është planifikuar një pjesë e projektit është e kontestuar. Sazani, ishulli, është në pronësi të shtetit, kështu që një kontratë qiraje do të ishte në fund të fundit e nevojshme; konsorciumi i lidhur me Trump aktualisht ka atë që quhet statusi i “investitorit strategjik”, i cili ndihmon në përshpejtimin e lejeve dhe negociatave për një marrëveshje afatgjatë.

Megjithatë, toka bregdetare në Zvërnec është private. Entitetet e lidhura me çiftin Trump e blenë atë nga një biznesmen me bazë në Miami, Artur Shehu, i cili këmbëngul se pretendimi i familjes së tij mbi tokën daton që nga koha osmane. Vendasit në Zvërnec argumentojnë se ata janë pronarët e ligjshëm. Është një pamje e çrregullt sepse toka u rekuizua nga shteti gjatë periudhës komuniste; kur pronat u kthyen në duar private në vitet 1990, pronësia shpesh u kontestua. gsh

Një reagim i fortë ka ardhur nga Partia Demokratike Europiane, e cila ka ngritur shqetësime për trajtimin e protestuesve në Shqipëri gjatë tubimeve kundër projekteve të zhvillimit në zonat bregdetare.

“Pas kësaj përqafimi qëndron një zgjedhje brutale politike: qytetarët që kërkojnë transparencë dhe mbrojtje të mjedisit u përballën me forcë, ndërsa një zhvillim luksoz i lidhur me Jared Kushner mori mbështetje nga qeveria”, thuhet në reagimin e Partisë Demokratike Europiane.

Sipas saj, qeveria e kryeministrit Edi Rama duhet të përballet me kërkesa për më shumë përgjegjshmëri demokratike, hetim të pavarur dhe respekt të plotë për të drejtën e protestës paqësore.

“Një nënë mban në krahë djalin e saj me autizëm pasi spraji me piper i policisë përfshiu protestuesit që mbronin bregdetin e Shqipërisë.
Pas këtij përqafimi qëndron një zgjedhje brutale politike: qytetarët që kërkonin transparencë dhe mbrojtje të mjedisit u përballën me forcë, ndërsa një zhvillim luksoz i lidhur me Jared Kushner mori mbështetjen e qeverisë.

Shqipëria e Edi Ramës meriton llogaridhënie demokratike, kontroll të pavarur dhe respekt të plotë për protestën paqësore”, thuhet në deklaratë. bw

NJOFTIM PËR SHTYP

Drejtësia për Dritan Zaganin merr kthesë. Gjykata Kushtetuese shfuqizon vendimin e Gjykatës së Lartë dhe e kthen dosjen për rigjykim

Më 21 korrik 2026 (mbërritur sot) Gjykata Kushtetuese zbardhi vendimin e saj me të cilin ka pranuar ankimin e Dritan Zaganit, duke shfuqizuar vendimin e datës 18 shkurt 2025, të Kolegjit Penal të Gjykatës së Lartë dhe e ka kthyer çështjen për rishqyrtim.

Ky vendim i Gjykatës Kushtetuese shënon kthesën e parë reale të drejtësisë shqiptare në një nga çështjet më simbolike të persekutimit të një oficeri policie që denoncoi lidhjet e niveleve të larta të pushtetit me krimin e organizuar.

Dritan Zagani, ish-shef i Seksionit të Narkotikëve në Policinë e Fierit, u dënua me 4 vjet e 6 muaj burgim për “shpërdorim detyre” dhe “moskallëzim krimi”. Ai nuk u akuzua kurrë se kishte përfituar nga detyra apo se kishte favorizuar trafikantë. Përkundrazi, episodet e përdorura kundër tij lidhen me operacione të suksesshme që sollën sekuestrimin e 109 kilogramëve kanabis në Shqipëri dhe arrestimin në Itali të një personi me 6 kilogramë kokainë. Megjithatë, gjykatat e dënuan pa identifikuar ndonjë ligj konkret të shkelur, ndonjë dëm të shkaktuar apo ndonjë qëllim kriminal të Zaganit.

Çështja nuk mund të ndahet nga konteksti politik. Zagani kishte denoncuar lidhjet e ish-ministrit të Brendshëm Saimir Tahiri me grupin Habilaj, trafikimin e drogës dhe dekonspirimin e operacioneve policore. Përpara se gjykatat të vendosnin për fajësinë e tij, Kryeministri Edi Rama e shpalli publikisht kriminel dhe bashkëpunëtor të trafikantëve të drogës, si dhe person që dekonspironte operacionet e policisë. Edhe ministri i Brendshëm e sulmoi publikisht dhe i paraqiti denoncimet e tij si shpifje të një personi që kërkonte të fitonte azil politik.

Koha tregoi se denoncimet e Zaganit nuk ishin fantazi. Grupi Habilaj u bë objekt procesesh penale dhe ish-ministri Tahiri u dënua penalisht. Ndërsa Zagani, i shpallur fajtor publikisht nga Kryeministri përpara vendimit të gjykatës, u detyrua të largohej nga vendi dhe sot jeton nën mbrojtjen e azilit politik.

Akuza kryesore lidhej me një operacion në Levan të Fierit. Sipas dëshmive dhe provave të paraqitura në proces, Zagani siguroi informacion të saktë dhe ia raportoi informacionin eprorit të tij të drejtpërdrejtë, Skënder Hita. Operacioni u drejtua nga ky i fundit, me dijeninë e drejtuesve të tjerë të policisë. Sipas prokurorisë, ky operacion solli anomali në një operacion tjetër për arsye se eprorët e Zaganit nuk u koordinuan me qendrën. Për habi të të gjithëve, Dritan Zaganit iu ngarkua një përgjegjësi penale e fabrikuar, ndërsa drejtuesit e operacionit nuk u proceduan kurrë.

Madje, Skënder Hita, ish eprori i Zaganit në atë episod, sot është promovuar në postin e Drejtorit të Përgjithshëm i Policisë së Shtetit më 30 mars 2026. Ky kontrast është tregues i fuqishëm i karakterit selektiv të akuzës. Nëse operacioni në Levan kishte krijuar probleme, përgjegjësia nuk mund të ndalej te oficeri vartës që vetëm solli informacionin e vlefshëm dhe të harroheshin pikërisht eprorët që morët vendimin dhe drejtuan aksionin dhe nuk siguruan koordinimin e duhur me qendrën. Nëse drejtuesit nuk kishin kryer vepër penale, atëherë nuk shpjegohet se si i njëjti veprim u kthye në shpërdorim detyre vetëm për Dritan Zaganin. Kjo forcon bindjen se akuza ishte fabrikuar keq për të diskredituar dhe neutralizuar personin që kishte prekur interesa politike dhe kriminale.

Gjykata e Lartë e mbylli çështjen me një formulë standarde, tipike prej atyre që synojnë të ulin shpejt dhe pa cilësi stokun e dosjeve me qëllim fshehjen e dështimit katastrofik të reformës në drejtësi, pa iu përgjigjur pretendimeve themelore të mbrojtjes në një çështje kaq delikate. Gjykata Kushtetuese konstatoi se kjo e kishte bërë aksesin e Dritan Zaganit në drejtësi vetëm formal dhe kishte cenuar të drejtën e tij për proces të rregullt ligjor.

Tani, pas arsyetimit të Gjykatës Kushtetuese, detyra e Gjykatës së Lartë është që të shpjegojë konkretisht:

• cili ishte ligji i shkelur nga Zagani;

• si mund të përgjigjet penalisht për një operacion të drejtuar dhe kryer nga eprorët e tij;

• cila ishte pasoja reale, kur ai vetëm furnizoi me informacion të vlefshëm eprorët për qarkullimin e lëndëve narkotike;

• përse u shpërfillën provat shfajësuese dhe konteksti i presionit publik të ushtruar nga Kryeministri dhe ministri i Brendshëm.

Vendimi kushtetues më në fund rrëzoi murin procedural që e mbante të paprekur dënimin e tij. Pritshmëria e ligjshme tashmë është që Gjykata e Lartë të zhvillojë një shqyrtim real dhe të përballet me pyetjen që drejtësia shqiptare e ka shmangur për më shumë se një dekadë në këtë çështje: A u përdor procesi penal për të ndëshkuar dhe heshtur një oficer policie që denoncoi lidhjet e pushtetit me krimin?

Çështja Zagani ka rëndësi të drejtpërdrejtë edhe për mbrojtjen e sinjalizuesve. Mbrojtja e tyre duhet të jetë efektive kur denoncimi prek drejtuesit e vetë institucionit ose nivelet politike dhe kur përdorimi i kanaleve të brendshme mund ta ekspozojë sinjalizuesin ndaj hakmarrjes, diskreditimit publik apo ndjekjes penale.

Një reagim i fortë ka ardhur nga deputetja Marjana Koçeku, në lidhje me përfshirjen e zonave të Shalës, Shoshit dhe Pultit në “Paketën e Maleve”. Përmes një postimi në rrjetet sociale drejtuar banorëve të këtyre zonave, ajo ngre shqetësime për mënyrën se si mund të ndikojë kjo nismë në pronësinë dhe identitetin e këtyre trevave.

Sipas Neomalësorjes, “Paketa e Maleve” nuk përbën një zgjidhje për zhvillimin e zonave malore, por rrezikon të sjellë një “tjetërsim” të tokave. Ajo u bën thirrje banorëve që, para se të pranojnë premtime për zhvillim, të kërkojnë garantimin e të drejtave të tyre mbi pronën.

Postimi i plotë:
Të dashtun banorë të Shalës, Shoshit e Pultit,
Përfshimja e zonave tueja në Paketën e Maleve, siç asht ba e ditun këto ditë, nuk asht shpëtimi i atyne trojeve, por fillimi i nji tjetërsimi që pasojat ka me i pasë aq negative sa ju s’keni me mujtë ma me i kontrollue ato toka.
Nëse doni me qenë shërbyes e lypsarë n’tokat tueja, atëherë pranojeni hak Paketën e Maleve, por di me ju thanë se malet tona nuk futen në paketë, dhe se treva jonë ka ditë me e ruejtë identitetin e vet për shekuj me radhë. As nuk asht pushtu e as nuk asht shitë. Dhe ju duhet me e pasë parasysh, secili prej jush, se pushtimet gjithmonë kanë ardhë me maska të reja, që ju të mos i njihni.
Unë e di se, çfarëdo çmimi që ata munden me ju ofru, ju nuk i lëshoni tokat e t’parëve, qoftë edhe veç për faktin pse janë t’parëve… se malsori ka qenë dhe asht zot n’tokë t’vet.
Por tash e vetmja mënyrë me jua marrë, asht tu spekulu përmes ligjit me pretekstin se ju do mundeni ma n’fund me i zhvillue ato toka, a ndërkohë nuk keni as tituj pronësie, as rrugë, as energji e as kushtet e nji infrastrukture që jua siguron nji gram jetë të mirë. S’keni ditë kurrë me i kërkue ato kushte!
Kështu që para se me pranue çfarëdolloj premtimi për “zhvillim”, kërkojeni njiherë atë çka ju asht mohue deri tash: pronën tuej, dhe të drejtën me vendosë vetë se çka bahet me pronën tuej. Zhvillimi që ju nxjerr prej tokës e ju kthen në vasalë e shërbëtorë të dikujt tjetër, nuk ka si me u quejtë zhvillim, përndryshe ju do ishit “zhvillue” me kohë. bw

Deputeti i Partisë Demokratike Gazment Bardhi, njëkohësisht kreu i grupit parlamentar, është përjashtuar nga kryeparlamentari Niko Peleshi gjatë seancës së sotme, teksa votohej për të gjithë pikat e rendit të ditës për shkak të bllokadës së foltores që bëri opozita.

Gjatë momentit të votimit të mazhorancës me procedurë të përshpejtuar dhe pa diskutime, opozita shkaktoi debate, zhurmë duke i rënë tavolinave dhe duke hedhur akuza.

Më aktivi ka qenë deputeti Gazment Bardhi, i cili i ka kërkuar Ramës dorëheqjen në sy, vetëm pak metra larg tij në seancë. Në një moment ai tentoi ta lagte me ujë kryeministrin dhe kjo nuk kaloi pa u ndëshkuar.

Kryeparlamentari Niko Peleshi ndërhyri dhe njoftoi përjashtimin e Bardhit.

“Zoti Bardhi, je i përjashtuar nga seanca, ju përjashtoj, largohuni nga salla”, tha ai.

Gjatë votimit pati përsëri ndërprerje për 5 minuta, pas kërkesës së Taulant Ballës në lidhje me një nga amendamentet e radhës, pasi kërkoi konsultim me grupin. Panorama

TIRANË– Efektivët e policisë janë treguar “të pamëshirshëm” edhe ndaj fëmijëve, duke hedhur ujë me piper me presion. Në disa moment ka përplasje fizike, hedhje uji dhe spraj vetëm se disa protestues tentuan të kalojnë gardhin metalik.

Ndërkohë ujë me presion është hedhur dhe ndaj mediave, të cilët po raportonin kaosin para Parlamentit. Më pas, protestuesit janë kundërpërgjigjur duke hedhur vezë në drejtim të forcave të rendit, ndërsa tensionet vijojnë përpara godinës së Parlamentit./Dosja.al