Këshilli Ndërfetar i Shqipërisë, si përfaqësues i pesë komuniteteve fetare të vendit bën apel të fortë për luftën në Gaza.

Përmes një reagimi, Këshilli Ndërfetar kërkon lirimin e menjëhershëm të pengjeve që mbahen në Bregun Perëndimor.

REAGIMI
Këshilli Ndërfetar i Shqipërisë, si përfaqësues i pesë komuniteteve fetare të vendit, ka ndjekur me vëmendje ndër vite çdo shqetësim kombëtar dhe ndërkombëtar, që ka cenuar paqen sociale dhe bashkëjetesën shoqërore. Sot, ne komunitetet fetare në Shqipëri, bashkojmë zërin tonë me thirrjet ndërkombëtare të organizatës Religions for Peace Europe, institucion ku ne bëjmë pjesë, thirrjes së fundit të Patriarkanës Latine dhe asaj Ortodokse të Jeruzalemit, thirrjes së 80 rabinëve ortodoksë nga e gjithë bota, komuniteteve islame dhe të krishtera nga mbarë bota, OKB së dhe institucioneve të tjera ndërkombëtare, ku me apelin e tyre, ata shprehin shqetësimin e thellë
për situatën dramatike humanitare në Gaza dhe Bregun Perëndimor, duke kërkuar përfundimin e menjëhershëm të luftës dhe lirimit të të gjithë pengjeve. KNFSH kërkon ndalimin e dhunës dhe garantimin e mbrojtjes së jetës së civilëve të pafajshëm, veçanërisht grave dhe fëmijëve, të cilët janë viktimat më të mëdha të këtij konflikti.
Shpërngulja e detyruar e popullsisë, pengimi i ndihmës humanitare dhe shkatërrimi i infrastrukturës bazë nuk mund të justifikohen në asnjë mënyrë dhe përbëjnë një shkelje të rëndë të dinjitetit njerëzor.
Në frymën e solidaritetit ndërfetar dhe të përgjegjësisë morale që feja mbart, Këshilli Ndërfetar i Shqipërisë riafirmon se paqja e qëndrueshme mund të ndërtohet vetëm mbi drejtësi, mëshirë dhe respekt të ndërsjellë. Ne u bëjmë thirrje udhëheqësve botërorë, institucioneve ndërkombëtare dhe të gjithë njerëzve të vullnetit të mirë të shtojnë përpjekjet për t’i dhënë fund konfliktit, për të siguruar menjëherë ndihmën e nevojshme humanitare dhe për të hapur rrugën drejt një paqeje të drejtë e të qëndrueshme në Tokën e Shenjtë dhe përreth saj.
Zoti i bekoftë paqendërtuesit!
Bordi i Presidencës

bw

Nga 15 shtatori, qarkullimi në tunelin e Llogarasë nuk do të jetë më falas. Ministria e Infrastrukturës dhe Energjisë, e drejtuar nga Belinda Balluku, ka vendosur të aplikojë një tarifë prej së paku 10 euro vajtje-ardhje për çdo automjet, duke rënduar më tej xhepat e qytetarëve dhe bizneseve që frekuentojnë bregdetin.

Ky vendim ka ngjallur reagime të forta në radhët e qytetarëve, për shkak të tarifës që konsiderohet e lartë në raport me të ardhurat mesatare në Shqipëri, veçanërisht për familjet që udhëtojnë shpesh drejt bregdetit. Kostoja totale e projektit për ndërtimin e tunelit të Llogarasë, sipas të dhënave zyrtare është 150 milionë euro.

INVESTIMI DYFISH

Investimi është prezantuar si një nga veprat më të mëdha infrastrukturore në vend, por edhe një nga më të shtrenjtat në rajon. Kritikat kryesore lidhen me faktin se pavarësisht kësaj shume kolosale, qytetarët do të paguajnë një tarifë shtesë për ta përdorur tunelin. Tuneli, me një gjatësi prej 5.9 kilometrash, është promovuar si një projekt që do të lehtësonte lëvizjen drejt jugut dhe do të kursente kohë, duke e reduktuar udhëtimin nga 45 minuta në vetëm 7 minuta nga Dukati drejt Palasës. Por ky “shërbim”, që u pagua me taksat e qytetarëve dhe u shoqërua me festime propagandistike nga qeveria, tani kthehet në një biznes fitimprurës për shtetin në kurriz të qytetarëve.

Sipas njoftimeve zyrtare, menaxhimi i pagesave dhe i të gjithë procesit do të bëhet nga Enti Kombëtar i Operimit Rrugor, një shoqëri aksionare me kapital shtetëror nën varësinë e Ministrisë së Infrastrukturës dhe Energjisë. Kjo kompani do të mbikëqyrë sistemin e tarifimit, mirëmbajtjen e portave automatike, si dhe shpërndarjen e biletave dhe aboneve mujore. Por, fakti që kjo strukturë kontrollohet direkt nga ministria e Ballukut, shton edhe më shumë dyshimet për abuzime dhe klientelizëm politik. Bashkë me tunelin e Llogarasë shkon në tre numri i segmenteve rrugore në Shqipëri me pagesë. Krahas akseve Milot-Morinë dhe ThumanëKashar tashmë do të jetë me pagesë edhe Dukat-Palasë. Me vendosjen e kësaj tarife, qeveria po e çon vendin drejt rrugëve private me taksa të larta, duke u kthyer në një barrë të re financiare për qytetarët.

AFERA KORRUPTIVE

Ky nuk është i vetmi problem me tunelin e Llogarasë. Ndërtimi i tij ka qenë në qendër të akuzave për korrupsion që prej fillimit. Në gusht 2024, kreu i grupit parlamentar të PD-së, Gazment Bardhi, kallëzoi në SPAK aferën e tunelit të Llogarasë, duke pretenduar se në këtë projekt janë abuzuar të paktën 50 milionë euro. Në prill 2025, SPAK nisi një hetim dhe sekuestroi dokumentet e kompanisë “Hill International NV”, e cila ka qenë e përfshirë në projekt. Ndërsa SPAK po heton abuzimet e mëdha me tenderat, qeveria vazhdon t’u kërkojë qytetarëve të paguajnë tarifa shtesë për një rrugë që është ndërtuar me taksat e tyre. Kjo nuk është vetëm një çështje e tarifës, por një model i qartë i grabitjes së qytetarëve përmes projekteve propagandistike, që në fund përfundojnë në kosto marramendëse për qytetarët.

Ministrja Belinda Balluku, e cila prej kohësh është në qendër të kritikave për mënyrën e menaxhimit të projekteve infrastrukturore po përballet me akuza të reja. Ajo akuzohet se ka shndërruar një vepër publike në mjet për të mbushur arkën e shtetit dhe për të favorizuar klientelën politike. Pavarësisht hetimeve të SPAK, Balluku nuk ka dhënë asnjë shpjegim për akuzat mbi abuzimet dhe nuk ka sqaruar pse qytetarët duhet të paguajnë për një tunel, që është ndërtuar me paratë e tyre. Nga ana tjetër, këta të fundit e konsiderojnë këtë tarifë një grabitje të pastër dhe kanë paralajmëruar reagime në rrjetet sociale. “Paguajmë taksa për rrugë, paguajmë akcizë për karburant, tani edhe 10 euro për një tunel”, – shkruajnë qytetarët e revoltuar./Gazeta Panorama 

Presidenti i Shqipërisë, Bajram Begaj, ka përshëndetur zgjedhjen e deputetit të Lëvizjes Vetëvendosje, Dimal Basha, në krye të Kuvendit të Kosovës, duke e cilësuar një hap të rëndësishëm për tejkalimin e ngërçit disa mujor politik në vend.

Urime, z. Dimal Basha, për zgjedhjen në krye të Kuvendit të Kosovës! Bashkëpunimi politik dhe institucional është një domosdoshmëri që uroj dhe shpresoj të vijojë në të mirë të Kosovës e qytetarëve të saj”, u shpreh kreu i shtetit shqiptar.bw

Deri sa ndodhi ajo që ndodh, në luftën e gjithë-humbur të jetës me vdekjen, kisha përshtypjen mistike apo fëminore se babai im, ndoshta ishte i “pavdekshëm”. Më pëlqente ta besoja këtë, ndonëse tronditjen e parë, thyese të këtij miti, e mora, kur pak muaj përpara Petros, humba Besën, Nanën time të paepur.

Në moshën që jam unë sot, Petro, bënte të paktën çdo fundjavë 40-50 kilometra ecje, pa pushim. Nuk refuzonte me hundën mbledhur asnjë ushqim, por mund të agjëronte si besimtar, edhe disa ditë pa ngrënë. Dhe nuk ankohej kurrë. As edhe njëherë! As edhe në Fund!

Të gjitha këto cilësi, të marrëdhënies së tij të mrekullueshme që Petrushka (edhe kështu i thërrisnim në familje përkëdhelësisht) kishte me trupin e tij, e bënin atë të pangjashëm me të tjerë.

Do kisha shumë për të shkruar për Babanë që më iku dhe më la “jetim”, pavarësisht se në moshën time “jetimët” janë kaq të shumtë, saqë nuk thirren më të tillë…

Por, duart ngecin dhe sillen si të ngrira. Ndoshta sepse janë tejet të përbaltura nga balta që të detyron të përpunosh, e përditshmja dhe gazetaria që përshkruan epopenë, skuthllëqet dhe bëmat e palavdishme por zhurmëmëdha, të horrave tanë udhëheqës.

Më del parasysh galeria e personazheve që janë ushqyer shpirtërisht dhe intelektualisht në divanin e tij, shumë pak prej të cilëve mirënjohës, ndonëse gatuajnë edhe sot në magjen e të përditshmes, miell nga mielli i tij.

Sepse kush e njihte auto-ironinë para viteve ’90 në Shqipëri?

Askush!

Kush i njihte parabolat, metaforat, kalamburet, nënshtresat e fjalëve, tre a më shumë kuptimësinë e fjalëve, të lëshuara me një goditje të vetme?

Askush ose 2 apo 3 veta gjithsej!

Ishte dhe është një lloj arti i madh, të dish të flasësh dhe jo të gërmëzosh, përmes fjalës.

Të dish të shprehësh çdo ngjyrë, çdo nerv, çdo dridhje apo puhizë ajri, që krijon edhe krahë-përplasja e një krahu dallëndysheje dhe që mund të shpërthejë uragane, në oqeanin e thellë të shpirtrave të ndjeshëm… të qenieve që kanë shpirt sigurisht…

Dhe në ato uragane, me shkas krahë-përplasjen, që për miliona të tjerë është e padukshme, e pandjeshme dhe e kurrëndodhur, por që për të Zgjedhurin, janë në të vërtetë rizgjime të brendshme, nga të cilat fillojnë Udhëtime dhe Fillesa Veprash, që e tejkalojnë jetën njerëzore… kalitet një cilësi e re, e rrallë dhe e pranishme vetëm në kombet e mëdha…

Ky dhe ishte një nga pasionet e mëdha të Babait tim, të krijuarit e Kombit tonë, të pangjizur ende.

Përmes kalitjes mendore dhe nxënies së diturive të thella, nga ca pak djem e vajza me dhunti të rralla dhe me dashuri të patradhëtuar, në kohë dhe hapësirë për Dheun tonë…

I gatuar me Biblën, njohës i Kuranit, qëmtues i Budizmit, recitues në gjermanisht i Gëtes që përkthente, rusisht folës me Dostojevskin që shqipëronte apo i vëllazëruar me Servantesin, me Don Kishotin dhe Sançon e të cilit bashkudhëtonte pa reshtur bisedave, por edhe udhëtimeve të vërteta që ndërthureshin me ato imagjinaret … I rritur me Petrarkën dhe Virgjilin, adhurimin më të madh e kishte për Lao Tze, lindur 600 vjet para Krishtit në Henan…

Petro pra, apo “Bushi”, e kultivonte dhe e shpërndante bujarisht Dijen e tij, të vetmen pasuri që kishte, për këdo që i trokiste në derë.

Dhe sot mund të them, se shumica shkonte aty për të vjedhur!

Dhe ja thoja Petros, “vijnë e të vjedhin o Bush! Të vjedhin dhe nuk e kthejnë më kokën pas!”

“Le të vjedhin! Libri dhe Dija vidhen, nuk mësohen! Edhe unë e kam vjedhur nga librat dhe nga njerëzit e mençur që kam takuar në jetë… Dituria është farë, biri im, nuk hahet dhe nuk pihet, herët a vonë ajo mbillet! Dhe kështu e realizon misionin e saj!”

Shumë nga personazhet që qarkullojnë me njëfarë emri sot në Shqipëri, kanë kaluar mjaft seanca nga “divani psikanalitik dhe diturifalës i Petros”.

“Unë besoj se do të vijë shpejt dita që shqiptarët, do të punojnë më së shumti si mësonjës të Gjuhës Shqipe, që herët a vonë, do të jetë shumë e kërkuar nëpër Botë” më thoshte ai.

Dhe uroj që kjo Profeci të bëhet jetë e vërtetë…

Mirëupafshim “Bush”, librat e tu kërkohen dhe lexohen.

Janë të thellë dhe të humnershëm dhe kërkojnë notarë të mirë dhe këta të mirët janë pak.

Por aní, le të jenë pak, pishtarmbajtësit, pak kanë qenë gjithmonë!…

Unioni i Gjyqtarëve ka reaguar ndaj deklaratave të përsëritura të kryeministrit Edi Rama kundër gjyqtarëve Hazbi Balliu dhe Klement Demiri, për shkak të vendimeve të marra prej tyre në çështje të ndryshme.

Kryeministri i ka akuzuar gjyqtarët për keqpërdorim të pavarësisë gjyqësore dhe ka paralajmëruar masa ndëshkuese.

Mirëpo, Unioni e ka dënuar këtë qasje, duke e cilësuar si ndërhyrje në punën e gjyqësorit dhe përpjekje për t’i ekspozuar gjyqtarët në gjyq publik përmes sulmeve personale.

Reagimi i plotë i Unionit të Gjyqtarëve:

Unioni i Gjyqtarëve ka ndjekur me vëmendje pakënaqësitë e shprehura publikisht nga ana e Kryeministrit ndaj disa vendimeve gjyqësore, duke anatemuar personalisht gjyqtarët për vendimmarrjet dhe kthyer ushtrimin e detyrës kushtetuese në një gjyq publik, ku njëra nga palët ndërgjygjëse për shkak të fuqisë, hapësirës mediatike dhe virtuale, jo vetëm denigron figurën e gjyqtarëve individualë, por ushtron presion të hapur ndaj trupës gjyqësore në tërësi, duke përcjellë mesazhin te gjyqtarët se nëse vendimmarrja e tyre nuk do të pëlqehet, do të jenë objektivat e radhës.

Pa dashur për t’u përfshirë në debate virtuale në periudhë pushimesh, dëshirojmë të theksojmë se UGJSH mirëpret dhe inkurajon çdo kritikë ndaj gjyqtarëve dhe punës së tyre, kur këto kritika janë brenda kornizës kushtetuese dhe ligjore, të cilat kanë për qëllim t’i shërbejnë rritjes së besimit të publikut tek gjykatat, forcimit të pavarësisë së gjykatave, të sundimit të ligjit dhe shtetit të së drejtës. Por, nga ana tjetër vërejmë se në mënyrë të përsëritur bëhen deklarata, komente dhe ndërmerren iniciativa, të cilat nuk janë aspak parimore, nuk kanë për qëllim forcimin e pavarësisë së vendimmarrjes së gjykatave dhe parimeve themelore të funksionimit të shtetit ligjor, por cënojnë drejtpërdrejt integritetin e gjyqtarëve, duke i fyer, deformuar dhe keqinterpretuar faktet, çështjet ligjore, apo procedurat e ndjekura, ndërkohë që vendimet jepen “NË EMËR TË REPUBLIKËS” dhe çdo palë që është e pakënaqur, ka të drejtën e ankimit në një gjykatë më të lartë, apo vendosë në lëvizje organet disiplinore për çdo shkelje të ligjit qe pretendon se ka kryer gjyqtari.

Këto deklarata me gjuhë dhe sjellje të papranueshme, të cilat nuk kanë aspak lidhje me shtetin e së drejtës dhe qeverisjen demokratike, vishen nën petkun e reformës së radhës dhe rreshtuar si gjithmonë gjyqtarët në llogoren e antireformës, kur vetë “Sistemi i drejtësisë”, ende nuk është maturuar pas reformës së thellë që kaloi dekadën e fundit!

Republika e Shqipërisë është një republikë parlamentare, ku ndarja e pushteteve e sanksionuar qartësisht në Kushtetute, është një ndër shtyllat kryesore, mbi të cilat është ndërtuar dhe qëndron demokracia jonë parlamentare dhe zhvillohet shoqëria jonë. Në këtë kuadër kushtetues funksionon edhe sistemi gjyqësor dhe ushtrohet vendimmarrja nga gjykatat. Është ky kuadër kushtetues dhe ligjor, sipas të cilit janë përcaktuar saktë subjektet, koha dhe mënyrat e kontrollit të një vendimi gjyqësor, i cili kursesi nuk lejon përfaqësues të pushteteve të tjera të anatemojnë vendimet e gjykatave e aq me keq, të kërkojnë ndëshkimin e gjyqtarëve, kur nuk u pëlqejnë vendimet e tyre.

Çdo veprim i kujtdo qoftë, që shmanget nga kuadri kushtetues dhe ligjor në fuqi në Republikën e Shqipërisë, jo vetëm që nuk i shërben forcimit të shtetit ligjor, por përkundrazi, është një hap prapa për pavarësinë e pushtetit gjyqësor, forcimin e shtetit të së drejtës dhe minon besimin e publikut te drejtësia.

UGJSH dëshiron të theksojë angazhimin maksimal kundër çdo fenomeni antiligjor të vërejtur në punën e përditshme të gjykatave, sikurse dhe angazhimin e plotë në mbrojtje të parimeve kushtetuese të ndarjes së pushteteve, pavarësisë së gjykatave, respektimit të të drejtave dhe lirive themelore të shtetasve dhe forcimit të sundimit të ligjit në vend.

Së fundmi, UGJSH i bën thirrje Këshillit të Lartë Gjyqësor si qeveri e gjyqësorit dhe organi i ngarkuar nga Kushtetuta dhe ligji për të garantuar pavarësinë dhe integritetin e gjyqtarëve, që të reagojë dhe mbajë qëndrim ndaj sulmeve që i’u bëhen gjyqtarëve për shkak të detyrës, pavarësisht se nga vijnë ato. bw

Këshilli i Evropës e cilëson bllokadën policore ndaj News24, një akt që bie ndesh me vendimin e Gjykatës e cila  urdhëroi kthimin e gazetarëve dhe dorëzimin e pajisjeve të tyre.

Në një reagim të saj, përmes platformës FOM (Freedom of Media in the Council of Europe) një mekanizëm që ka për qëllim mbrojtjen e lirisë së medias, KiE ka vlerësuar raportimin e Asociacionit të Gazetarëve të Shqipërisë AGSH-së mbi situatën e krijuar me News24, ku gazetarëve të saj iu privua puna me heqjen e sinjalit të transmetimit.

Gjithashtu, aksesi në godinë dhe moslejimi i tërheqjes së sendeve personale, kompjuterave dhe dosjeve të punës në godinën e rrethuar nga policia ushtarake, megjithëse vendimi i gjykatës ua lejonte këtë të drejtë.

Shprehje mbështetjeje për AGSH-në dhe Myzyrajn erdhën nga Federata Evropiane e Gazetarëve (EFJ), Sekretari i Përgjithshëm i së cilës, Ricardo Gutiérrez, të cilët mbështetën punën e AGSH në intensifikimin e përpjekjeve të saj për të dokumentuar dhe rritur ndërgjegjësimin rreth rastit Fokus Media Group .

“Ky qëndrim i AGSH-së, riafirmon ndihmën për gazetarët, duke inkurajuar ata të luftojnë në mbrojtje të lirisë së shtypit’, thuhet në reagimin e FOM ((Freedom of Media in the Council of Europe). bw

Në pjesën e parë të këtij viti u duk se eksportet po rikuperoheshin, pas tendencës rënëse të dy viteve të kaluara. Të dhënat zyrtare treguan se për 7 mujorin, eksportet në total ishin 238.5 miliardë lekë, me një rritje prej 2.6% në krahasim me të njëjtën periudhë të një viti më parë. Në korrik, eksportet ishin 35.2 miliardë lekë, me zgjerim 5.7%.

Një pjesë e madhe e rikuperimit lidhej me rritjen e fortë të shitjeve drejt Kosovës, të cilat u zgjeruan me 72.5% për 7 mujorin. “Monitor” ka mësuar se nuk kemi të bëjmë me rritje reale, por thjesht me ndryshimin e metodologjisë, pasi që nga 1 janari 2025 tranzitet e karburantit drejt Kosovës raportohen edhe si ri eksporte. Si rrjedhojë, kapitulli “Lëndët djegëse minerale, vajrat minerale dhe produktet e distilimit të tyre” drejt Kosovës ishte 26.4 miliardë lekë në janar-korrik 2025, nga 2.7 miliardë lekë në janar-korrik 2024, me një rritje prej 864%, ose 23.6 miliardë lekë më shumë. Nëse hiqet efekti i tranzitit, rritja do të ishte 12% dhe ky grup do të rezultonte vetëm 3 miliardë lekë.

Nga riklasifikimi i tranzitit edhe si eksporte, eksportet drejt Kosovës janë shtuar edhe me 23.3 miliardë lekë, që në fakt nuk është një rritje reale.

Nëse këtë shumë ia heqim totalit të eksporteve për 7 mujorin (që janë 238.5 miliardë lekë), ato do të zbrisnin në 215.3 miliardë lekë.

Për 7 mujorin 2024, eksportet në total ishin 232 miliardë lekë, sipas INSTAT.

Si rrjedhojë, duke hequr shifrën e tranzitit të karburanteve drejt Kosovës, për janar-korrik 2025, eksportet janë tkurrur me 7.4%, duke vijuar me tendencën negative.

Ndoshta INSTAT, kur raporton të dhënat duhet ta ndajnë, ose të bëjnë një shënim për shifrën e rieksporteve drejt Kosovës, pasi do të krijojë një ide të gabuar për ecurinë reale të shitjeve jashtë vendit, teksa institucionet zyrtare po reklamonin përmirësimin e situatës së eksporteve në vend! bw

Kreu i Asociacionit të Gazetarëve Shqiptarë, Isa Myzyraj, ka reaguar ashpër për situatën e krijuar me bllokadën e godinës së News24, duke paralajmëruar se ky rast do të bëhet objekt i misioneve faktmbledhëse ndërkombëtare.

“Do të kemi misione faktmbledhëse ndërkombëtare, të cilat ndër të tjera do të mbledhin fakte edhe për atë që po ndodh me News24,” tha Myzyraj.

Sipas tij, institucionet shqiptare do të paguajnë koston më të madhe të këtij aksioni, të cilin e cilësoi “kontrovers dhe të paligjshëm”.

“Kjo do të ndikojë drejtpërdrejt në rrugën e integrimit europian dhe do të jetë një sfidë e madhe për t’u tejkaluar, pasi Shqipëria do të duhet t’u përgjigjet institucioneve të huaja se pse ka reaguar në shumë momente në mënyrë banditeske,” shtoi ai.

Myzyraj theksoi se liria e medias po vihet në rrezik, ndërsa veprimet ndaj News24 përbëjnë një sinjal alarmi për gjendjen e demokracisë dhe shtetit të së drejtës në Shqipëri. bw

Postimi i gazetarit Osman Stafa:

SPITALI ONKOLOGJIK, 33 DITË PA BRAKITERAPI! KY ËSHTË ALARM!

Prej 33 ditësh me radhë, pajisja e Brakiterapisë në Spitalin Onkologjik është jashtë funksionit. Shkak është mosbërja e procesit të mirëmbajtjes.

Pse nuk iu bë, dhe pse nuk i bëhet mirëmbajtja e kësaj pajisjeje?

Kush është përgjegjës për mirëmbajtjen e kësaj pajisjeje?

Për shkak të mungesës së mirëmbajtjes teknike, nuk jepet shërbim për gratë që vuajnë nga kanceri gjinekologjik.

Kanceri nuk pret tenderat e ministrisë, nuk njeh burokracitë dhe as paaftësinë kriminale të atyre që e kanë kthyer shëndetësinë në çiflig personal.

Në çdo vend normal, ministri i Shëndetësisë do kishte dhënë dorëheqjen që ditën e parë.

Kjo situatë s’është normale.

Është kriminale.

A kështu ecën karvani përpara?

Turp!

Kreu i Partisë Demokratike, Sali Berisha, ka komentuar samitin e mbajtur në Alaska mes Trump dhe Putin, duke e quajtur takimin historik.

Sipas Berishës, nënkupton se samiti ka shënuar një kthesë të mundshme në rrugën drejt armëpushimit dhe marrëveshjes përfundimtare midis palëve.

Komenti i Berishës:

Miq, samiti i djeshëm në Alaska midis Presidentit të SHBA Donald Trump, njeriut më të fuqishëm të planetit, me Presidentin e Rusisë Vladimir Putin, ishte historik për këtë kohë lufte.

Samiti pas tre orësh bisedime përfundoi pa marrëveshje, por me ‘progres shumë të madh’ deklaroi Presidenti Trump në konferencën e përbashkët për shtyp me Vladimir Putin. Kjo nënkupton se Samiti ka shënuar një kthesë të mundshme në rrugën drejt armëpushimit dhe marrëveshjes përfundimtare midis palëve. bw

Ambasada amerikane në Tiranë ka ndarë në rrjetet sociale mesazhin e presidentit të SHBA Donald Trump, pas përfundimit të takimit në Alaska me presidentin e Rusisë, Vladimir Putin.

“Bëmë një përparim të madh sot… Patëm një takim produktiv dhe duhet të kemi shumë pika”, shkruhet në një postim me foto nga samiti, ndërsa në një postim tjetër “Standardi është gjithmonë paqja”. bw

Tiranë, më 15.08.2025

Ekrem Spahiu ka dhënë një konferencë për mediat, ku ka shprehur qëndrimet e ”Lëvizjes për Zhvillim Kombëtar”:

… ”Lëvizja për Zhvillim Kombëtar” shpreh qëndrimin e saj se, shteti e ka detyrë me ligj për zvogëlimin e riskut nga fatkeqësitë dhe realizimin e mbrojtjes civile për të garantuar mbrojtjen e jetës së njerëzve, të gjësë së gjallë, të pronës, të trashëgimisë kulturore e të mjedisit, nëpërmjet forcimit të sistemit të mbrojtjes civile. Prandaj shteti ka përgjegjësi shumë të madhe …

Deklarata e plotë për media

Shqipëria gjatë kësaj jave, si asnjëherë tjetër më parë është përfshirë nga zjarre masive, ku u dogjën me mijëra hektarë pyje, kullota dhe drufrutorë. Sikur të mos mjaftonte kjo katastrofë mjedisore, humbi jetën dhe një i moshuar, ndërkohë që shumë qytetarë pësuan djegie të shkallëve të ndryshme apo u plagosën. U dogjën shtëpi, objekte, stalla, gjë e gjallë, bletari e çdo gjë që mori zjarri përpara.

Natyrisht që janë edhe pasojat e grohjes globale, ku temperaturat gjatë këtyre viteve të fundit kanë qenë tmerrësisht të larta, si pasojë e të cilave mjafton një shkëndijë për të përfunduar në zjarr masiv. Edhe pakujdesia sjell pasoja shumë të rënda. Por ajo që nuk mund të tolerohet është se shumica dërmuese e tyre, rezultojnë të jenë zjarrvënie të qëllimshme, të organizuara për interesa kriminale, ku nga më kryesoret mund të veçojmë:

• Zjarrvënie për interesa ndërtimore të mafies së pronave, për të hapur rrugë të reja për ndërtime pa leje si vila, resorte, etj, veçanërisht në zonat turistike dhe malore.
• Zjarrvënie për të zgjeruar aktivitetin e nxjerrjes së gurëve apo materialeve ndërtimore.
• Zjarrvënie për ripërtëritje të kullotave.

”Lëvizja për Zhvillim Kombëtar” shpreh qëndrimin e saj se, shteti e ka detyrë me ligj për zvogëlimin e riskut nga fatkeqësitë dhe realizimin e mbrojtjes civile për të garantuar mbrojtjen e jetës së njerëzve, të gjësë së gjallë, të pronës, të trashëgimisë kulturore e të mjedisit, nëpërmjet forcimit të sistemit të mbrojtjes civile. Prandaj shteti ka përgjegjësi shumë të madhe.

”Lëvizja për Zhvillim Kombëtar” sugjeron që të marren këto masa:
• Kreu i shtetit të mbledhë urgjentisht Këshillin e Sigurisë Kombëtare.
• Të vendoset gjendja e fatkeqësisë natyrore në zonat më të prekura.
• Dëmshpërblimin e plotë për gjithshka, sipas ligjit për të gjithë të dëmtuarit nga djegiet.
• Qeveria të informojë Kuvendin e Shqipërisë për situatën e krijuar, rreziqet që paraqiten, masat e marra për menaxhimin e situatës, sidomos për masat rehabilituese për komunitetet e prekura
• Qeveria të informojë Kuvendin, opinionin publik dhe mediat se si po ecet me “Strategjinë kombëtare për zvogëlimin e riskut nga fatkeqësitë”, se ku përfundojnë fondet e alokuara për këtë qëllim, posaçërisht për fatkeqësitë e natyrës së zjarreve masive.
• Mobilizimin maksimal të kapaciteteve të emergjencës dhe mbrojtjes civile.
• Të zhvillohen hetime të thelluara për autorët dhe nxitësit.
• Të ashpërsohet ligji për dënimin e zjarrvënësve dhe nxitësve të tyre.

”Lëvizja për Zhvillim Kombëtar” mendon se shteti nuk duhet të mbetet thjesht apo vetëm te menaxhimi i fatkeqësisë, por të marrë rolin që i takon për të ndërtuar vizione dhe plane veprimi perspektiv që fatkeqësitë të parandalohen në maksimumin e mundshëm, duke këmbëngulur veçanërisht në zbatimin e ligjit “Për Pyjet”, për mbrojtjen e tyre si pasuri me rëndësi të veçantë, për vlerat e mëdha dhe të pazëvendësueshme në mbrojtjen e klimës, të tokës, ruajtjen dhe përmirësimin e potencialeve prodhuese, të ekuilibrave të mjedisit natyror, biodiversitetit, burimeve energjitike dhe regjimit hidrik, si detyrime me interes kombëtar dhe ndërkombëtar.

”Lëvizja për Zhvillim Kombëtar”, shpreh vlerësim e mirënjohje për të gjithë efektivët e Forcave Ushtarake, zjarrfikësit, pilotët si dhe ekipet e Urgjencave, të cilët u përballën me situatat shumë të rënda nga zjarret. Një falenderim të veçante kemi edhe për vendet mike që na ndihmuan me mjete ajrore për fikjen e zjarreve.

Në të njëjten kohë ”Lëvizja për Zhvillim Kombëtar”, nuk mund të hesht dhe të mos shpreh indinjatën e saj për trajtimin çnjerzor që j’u bëhet zjarrëfiksëve, ku pas shumë orëve në luftë me zjarrin, flenë rrugëve në tokë. Ato pamje që po bëjn xhiron e botës na turpërojnë si shtet.

OSBE ka reaguar ashpër në lidhje me sulmin e paprecedentë ndaj Focus Media Group dhe mediave të lidhura me të, News24, Panorama, Gazeta Shqiptare, BalkanWeb dhe Radio RASH.

OSBE shprehet se situata rreth ndëprerjes së papritur të oeracioneve të grupit mediatik është shqetësuese.

The situation surrounding the sudden disruption of operations of the Focus Media Group in #Albania is concerning. Property and business disputes should not lead to abrupt halting of media broadcasting.

— OSCE media freedom (@OSCE_RFoM) August 15, 2025

 

Në reagimin zyrtar OSBE vendos theksin duke u shprehur se mosmarrëveshjet pronësore dhe të biznesit nuk duhet të sjellin ndëprerje të menjëhershme të transmetimit mediatik.

“Situata që lidhet me ndërprerjen e papritur të aktivitetit mediatik të Focus Media Group në Shqipëri është shqetësuese. Mosmarrëveshjet mbi pronësinë dhe biznesin nuk duhet të çojnë në ndalimin e menjëhershëm të transmetimit mediati”, thuhet në reagimin e OSBE. bw

Autori i emisionit investigativ Vetting në News24, Ardian Bushi, ka zbuluar detaje të reja lidhur me ndërhyrjen e autoriteteve në ambientet e uzurpuara të televizionit, duke akuzuar se veprimi ka pasur si synim zhdukjen e materialeve komprometuese për zëvendëskryeministren Belinda Balluku.

Bushi tha se ekipi i tij po investigonte lidhjet familjare të Ballukut me bashkëjetuesen e Arbër Abazit.

“Pjesa dërrmuese e dosjeve që Vetting ka denoncuar me prova janë zhdukur, ndërsa dosjet e reja për Ballukun ishin kryesore. Kjo më bën të besoj se ky ka qenë qëllimi i ndërhyrjes banditeske,” u shpreh Bushi.

“Po investigonim lidhjet familjare të Ballukut me bashkëjetuesin e Arbër Abazit, pasi sipas informacioneve që ne kishim bashkëjetuesja e Abazit ka lidhje familjare me Ballukun. Ndërkohë që Arbër Abazi ka dy fëmijë me të afërmen e Ballukut. Sipas informacioneve zyrtare mësohet se vajza e tezes Ballukut bashkëjeton me Abazit dhe pavarësisht se kanë dy fëmijë ata nuk kanë bërë një martesë ligjore me çertifikat martesore.

Kanë ndërhyrë në kompjutera, ua kemi bërë të qartë edhe përmbaruesve. E them këtë me bindje se nuk është zbatuar ligji, por kanë marrë urdhrat e KAYO-s për të vepruar edhe me gazetarët. Pjesën dërrmuese të dosjes që është denoncuara me fakte e prova që ka denoncuar Vetting janë zhdukur. Dosjet e reja për në shtator dhe në vazhdim për zv/kryeministren Ballukun kishim dosjet kryesore dhe kjo më bën të dyshoj dhe ta theksoj me forcë se ky ka qenë qëllimi i kësaj ndërhyrje në mënyrë banditeske.. Ne do të arrijmë sërish të rindërtojmë këtë dosje dhe të vazhdojmë denoncimin. Ne vëertetë na vranë, por jemi më të bashkuar, më të fortë, më të vendosur…”, u shpreh ai. bw

Me bekimin e Patriarkut të Moskës dhe Gjithë Rusisë, Kirill, Mitropoliti i Volokolamskut Antoni, Kryetar i Departamentit të Marrëdhënieve të Jashtme Kishtare të Patriarkanës së Moskës, mbërriti në Shqipëri më 11 gusht 2025 për një vizitë pune.

Më 12 gusht, ai u prit në rezidencën zyrtare në Tiranë nga Kryepeshkopi i Tiranës, Durrësit dhe Gjithë Shqipërisë, Joan. Mitropoliti Antoni përcolli përshëndetjet vëllazërore të Patriarkut Kirill dhe e uroi Kryepeshkopin Joan për zgjedhjen dhe fronëzimin e tij si Primat i Kishës Ortodokse të Shqipërisë, zhvilluar në mars të këtij viti.

Gjatë takimit u diskutuan çështje të marrëdhënieve ndërortodokse dhe ndërkombëtare, situata e Kishës kanonike në Ukrainë, si dhe perspektivat për forcimin e bashkëpunimit mes Kishës Ortodokse Ruse dhe asaj të Shqipërisë, sipas njoftimit të ambasadës ruse në Shqipëri. bw

Kompania KAYO, e cila prej mëngjesit të së hënës ka zaptuar godinat e News 24 dhe Panorama Group, refuzon të zbatojë vendimin e Gjykatës.

KAYO dhe policia ushtarake kanë mbyllur portën që duke mos lejuar drejtuesit e gazetarët të futen në ambientet e punës në godinën e Panoramës, duke e mbajtur në mënyrë të paligjshme.

Me një vendim të dy ditëve më parë, Gjykata e Tiranës ka vendosur që godina e Panorama të lirohet nga KAYO dhe policia ushtarake, si edhe të lejohen gazetarët të futen brenda ambienteve për të bërë punën e tyre, por kompania që mban uzurpuar ndërtesën refuzon.

Është shuar  në moshën 84-vjeçare Rabie Isuf Xhani, mësuesja e parë e fshatit Gizavesh në rrethin  e Librazhdit dhe një ndër gratë e para që sfidoi realitetin e kohës për t’u bërë pishtare e dijes në zonat rurale të Librazhdit.

E lindur më 16 prill 1941 në Librazhd-Katund, Rabia përfundoi arsimin 7-vjeçar në qytetin e Librazhdit, duke bërë çdo ditë mbi dy orë rrugë më këmbë.

Në vitin 1959 u martua me Hyqmet Xhanin dhe u vendos në fshatin Gizavesh, ku përkushtimi i saj për arsimimin nuk u ndal.

Ajo përfundoi me sukses Shkollën Pedagogjike në Elbasan dhe në vitin 1961 nisi punën si mësuese në shkollën e fshatit, duke hyrë në histori si e para grua mësuese vendase në Gizavesh dhe një nga të parat në gjithë rrethin.

Për 30 vite, Rabie Xhani qëndroi në misionin e saj me përulësi dhe pasion, duke edukuar dhjetëra breza që sot mbajnë me krenari kujtimin e saj si një mësuese shembullore, humane dhe e përkushtuar. Ajo doli në pension në vitin 1991, por mbeti për dekada një figurë tepër e respektuar në komunitetin e zonës. bw

Një zjarr i fuqishëm që nisi nga Bashkia e Delvinës ka përfshirë malin e Sopotit dhe ka hyrë në territorin e Bashkisë Gjirokastër, duke kërcënuar qytetin dhe fshatin Lazarat.

Era dhe thatësira po e përkeqësojnë situatën, ndërsa zjarrfikësit dhe banorët lokalë po luftojnë flakët pa ndalur.

Çdo moment është vendimtar dhe zjarri mbetet jashtë kontrollit. bw

Autori i emisionit “Vetting” në News24, Ardian Bushi, u nxorr sot me forcë nga ambientet e brendshme të godinës së Panoramës dhe News24, ku kishte hyrë të tërhiqte mjetet e tij të punës, sipas vendimit të gjykatës.

Bushi tha se absurditeti ishte kur forcat e KAYO-s i kërkuan që të ishte i zhveshur në ambientet e godinës së Panorama dhe News24. bw

Situata e tensionuar para godinës së News24 ka marrë një tjetër kthesë sot, pasi një prej punonjësve të televizionit, Arkad Bazaiti, i cili ishte futur brenda në kuadër të procedurës për marrjen e sendeve të punës të sekuestruara më herët nga policia ushtarake, është ndjerë keq pas daljes nga ambientet me forcë nga autoritetet.

Menjëherë pas incidentit, para godinës ka mbërritur një mjet i urgjencës për t’i ofruar kujdes shëndetësor dhe ndihmën e parë punonjësit.

Ky zhvillim vjen mes tensioneve të vazhdueshme, ku gazetarët e News24 dhe Panorama vijojnë të mos lejohen të hyjnë lirshëm në vendin e punës, pavarësisht vendimit të gjykatës që u jep të drejtën për të marrë mjetet dhe materialet e tyre. bw

Situata në zonën e Delvinës vazhdon të jetë kritike, me flakë të mëdha që po afrohen shumë pranë shtëpive të banimit, duke rrezikuar seriozisht jetën dhe pronat e banorëve.

Pamje të reja të siguruara nga gazetari Fatjon Gjinaj në orën 10:40 tregojnë përhapjen e zjarrit shumë pranë zonave të banuara, duke nxjerrë në pah rrezikun e madh që po përballen qytetarët.

Syri TV ka publikuar këto pamje, të cilat kundërshtojnë deklaratat zyrtare të qeverisë që minimizon situatën. Sipas raportimeve dhe pamjeve të transmetuara, gjendja është alarmante dhe kërkon ndërhyrje urgjente për të shmangur tragjedi.

Drejtoresha e Përgjitshme e News24, Anila Jole, vlerëson vendimin e sotëm të Gjykatës, teksa vendosi rikthimin në studio dhe redaksi të gazetarëve, duke vendosur si të paligjshëm sekuestrimin e kompjuterave dhe orendive.

Sipas Joles, ishte një mesazh i qartë ky për ata që bënë paligjshmëri dhe për ushtrinë e komentuesve që vollën vrer me të qena e të paqena.

ANILA JOLE: “Ashtu siç e shpreha disa herë publikisht këto ditë, unë e ndieja dhe besoja se ne (News24) kishim të drejtë dhe do ta gjenim atë.

Sot Gjykata vendosi rikthimin tonë në studio dhe redaksi dhe vlerësoi të paligjshëm sekuestrimin e kompjuterave dhe orendive.

Neës24 për pak orë ridel në transmetim dhe për këtë jemi të gjithë shumë të lumtur.

Besova që ka drejtësi, dhe ashtu doli!

Një mesazh i qartë ky për ata që bënë paligjshmëri dhe për ushtrinë e komentuesve që vollën vrer me të qena e të paqena.

Historia e kontratës së godinës sonë është në gjyq, per faj të ministrisë që e dha atë me qira dhe bëri një lëmsh mes qiradhënësve, qiramarrësve dhe pronarëve të tokës, lëmsh që shpresoj të gjendet sërish një gjyqtare me integritet si ajo e sotmja, për t’ia gjetur fillin. Këtë histori, kini durim ta sqarojnë profesionistët në ditët në vijim.

News24 do të vijojë të jetë pranë atyre që e ndjekin dhe duan me besim e sinqeritet! bw

Gazetarja Klodiana Lala ka reaguar në lidhje me vendimin e Gjykatës së Tiranës që “Panorama Group” sh.a të kthehet te ambientet të cilat të shtunën në orët e para të mëngjesit u zaptuan nga Policia e Shtetit dhe KAYO e Ardi Veliut. Gjykata vendosi që gazetarët të aksesohen në mjediset e kompanisë dhe brenda 48 orëve të rikthehen sendet dhe materialet që KAYO mori me kamionë.

Në një postim në rrjetet sociale, gazetarja Lala e quan vendimin e gjykatës si fitore e gazetarisë.

Reagimi:

Gjykata urdheroi KAYON te me ktheje kompjuterin bashke me cdo material qe mu konfiskua nga ushtria ne menyre arbitrare dhe te drejten per te kerkuar deshperblim.
Kjo eshte fitorja e gazetarit! bw

Avokati Marash Logu, ka reaguar pas vendimit të Gjykatës së Tiranës, e cila urdhëroi kthimin e ambienteve dhe pajisjeve të sekuestruara të Panorama Group SHA, duke e cilësuar aksionin e ndërmarrë më 9 gusht ndaj News24 dhe mediave të tjera të grupit si të paligjshëm.

“Gjykata e Tiranës konfirmoi pikërisht atë që kemi thënë prej fillimit të kësaj historie; nxjerrja e gazetarëve nga godina, ndërprerja e sinjalit të transmetimit dhe sekuestrimi i pajisjeve është i paligjshëm, në kushtet që kompania mediatike ka një kontratë të vlefshme qiraje deri në vitin 2033, prona nuk ka qenë objekt shqyrtimi gjyqësor dhe nuk i është kaluar shoqërisë ‘KAYO’ sh.a.” shkruan Logu ne nje postim ne Facebook.

Ai theksoi se vendimi i gjykatës provon paligjshmërinë e veprimeve të shoqërisë “KAYO” sh.a., Policisë së Shtetit dhe Policisë Ushtarake.

“Tani që kjo paligjshmëri u provua me vendim gjyqësor, do të ketë ndonjë reagim nga Prokuroria për ndërprerjen e paligjshme të sinjalit të medias informative më të madhe në vend prej katër ditësh?!” shtoi ai.

Reagimi:

Gjykata e Tiranës konfirmoi pikërisht atë që kemi thënë prej fillimit të kësaj historie; nxjerrja e gazetarëve nga godina, ndërprerja e sinjalit të transmetimit dhe sekuestrimi i pajisjeve është i paligjshëm, në kushtet që kompania mediatike ka një kontratë të vlefshme qiraje deri në vitin 2033, prona nuk ka qenë objekt shqyrtimi gjyqësor dhe nuk i është kaluar shoqërisë “KAYO” sh.a. Tani që paligjshmëria e veprimeve të shoqërisë “KAYO” sh.a., Policisë së Shtetit dhe Policisë Ushtarake u provua me vendim gjyqësor, do të ketë ndonjë reagim nga Prokuroria për ndërprerjen e paligjshme të sinjalit të medias informative më të madhe në vend prej katër ditësh?! bw

Gjykata e Tiranës shpalli të paligjshme veprimet e drejtorit të KAYO, Ardi Veliu, ndaj News24 dhe mediave të “Focus Group”.

Gjykata vendosi që “Panorama Group” sh.a të kthehet te ambientet të cilat të shtunën në orët e para të mëngjesit u zaptuan nga Policia e Shtetit dhe KAYO e Ardi Veliut.

Gjykata vendosi që gazetarët të aksesohen në mjediset e kompanisë dhe brenda 48 orëve të rikthehen sendet dhe materialet që KAYO mori me kamionë.

Gjithashtu, Gjykata e Tiranës vlerëson të paligjshëm ndërhyrjen dhe kufizimin e gazetarëve dhe pengimin e tyre në ushtrimin e detyrës.

Për katër ditë me radhë, News24 u vendos përpara një presioni të paprecedentë, që nisi me bastisjen e zyrave në orët e para të mëngjesit të ditës së shtunë pa një vendim gjykate, nga Policia e Shtetit dhe punonjësit e kompanisë shtetërore KAYO. Televizionit më të madh informativ në vend iu fik sinjali i transmetimit, ndërsa gazetarët, stafi teknik dhe punonjësit e tjerë u nxorën jashtë dhe nuk u lejuan të aksesonin vendet e tyre të punës.

Ndërsa pasditen e djeshme, kompania KAYO kreu akte të tjera të paligjshme ndaj News24, duke shembur përmes IKMT-së objektin ku ruheshin pajisjet e transmetimit. Në orët e vona u plaçkitën zyrat dhe me dhjetëra kamionë u grabitën dosjet dhe materialet e gazetarëve, vendndodhja e të cilave nuk ende nuk dihet.

Një situatë e paprecedentë po zhvillohet në ambientet e televizionit News24, ku forcat e Policisë së Shtetit dhe ushtrisë kanë rrethuar godinën dhe po marrin pajisjet e punës së gazetarëve. Në një reagim në FB, Asociacioni i Gazetarëve të Shqipërisë ka ngritur alarmin për shkelje të rënda të lirive themelore të medias dhe ka shprehur indinjatën dhe shqetësimin e thellë për pasojat e mundshme ndaj lirisë së informimit dhe sigurisë së gazetarëve në vend.

REAGIM URGJENT

Asociacioni i Gazetarëve të Shqipërisë shpreh alarm dhe indinjatë të thellë për situatën e krijuar në ambientet e televizionit News24, tashmë të rrethuar nga forca të Policisë së Shtetit dhe ushtrisë. Sipas raportimeve nga vendngjarja, autoritetet po konfiskojnë dhe po marrin të dhëna nga kompjuterët e gazetarëve, në të cilët ndodhen materiale pune.

Këto veprime përbëjnë një shkelje flagrante të lirisë së medias, të drejtës së informimit dhe mbrojtjes së burimeve konfidenciale të gazetarëve, parime të garantuara nga Kushtetuta e Shqipërisë, Konventa Europiane e të Drejtave të Njeriut dhe praktika e Gjykatës Europiane të të Drejtave të Njeriut.

Marrja e materialeve të tilla jo vetëm që cënon rëndë punën hetimore të redaksisë, por rrezikon drejtpërdrejt jetën dhe sigurinë e gazetarëve dhe burimeve të tyre.

I bëjmë thirrje urgjente:

• Autoriteteve të Përfshira të ndalojnë çdo veprim që cënon punën e gazetarëve.
  • Institucioneve ligjore që të verifikojnë ligjshmërinë e këtyre veprimeve dhe t’i ndalin ato pa vonesë.