TIRANË- Një protetsues ka deklaruar se turma po proteston kundër dyshes Rama-Berisha që sipas tyre, kanë marrë peng vendin.

Gjatë grumbullimit të protestës së 12-të kundër politikave në vend, qytetari tha se ka pasur shantazhe dhe kërcënime nga njerëz afër opozitës.

“Që nga dita e parë që ka nisur kjo protestë dhe i kam prijë, dua të them që problemet e 35 viteve nuk zgjidhjet për 10. Jemi kundër dyshes që kanë marrë peng vendin, jemi kundër dyshes, Rama-Berisha. A keni parë ndonjëherë tubime kaq të sinkronizuar, në të gjithë botën ku ka shqiptarë. Po të dihej se kush është këta do e kishin kapur, por duke qenë se është vullnet popullor nuk kanë çfarë të bëjnë, Por shantazhet dhe kërcënimet më të mëdha vijnë nga njerëzit pranë opozitës…”, u shpreh protestuesi./Dosja.al

Ndërsa kryeqyteti përgatitet për protestën e 12-të radhazi të thirrur kundër qeverisë së Edi Ramës, analisti Edvin Kulluri, i ftuar në programin e drekës në News24, ka bërë një bilanc të shifrave dhe frymës së kësaj kryengritjeje qytetare.

Sipas Kullurit, pjesëmarrja në marshimet e fundit ka qenë historike, duke prekur shifra që i kalojnë parashikimet, ndërsa theksoi se këtë herë në shesh ka dalë pjesa më vitale dhe e ndershme e shoqërisë.

Analisti deklaroi se ndryshe nga protestat e zakonshme politike, kjo e sotme ka një shtrirje të gjerë sociale që buron nga pamundësia ekonomike dhe revolta ndaj sistemit.

“Po e them me rezervë, kanë qenë të paktën 40 mijë njerëz në marshimin pas protestës. Ka dalë shtresa e mesme, punëtorët, njerëz që punojnë me nder në këtë vend,” u shpreh Kulluri në News24.

Kulluri u ndal gjatë te kriza e thellë ekonomike dhe sociale që po kalon rinia shqiptare, duke e vënë theksin te pamundësia për të përballuar jetesën në Tiranë dhe rritjen galopante të çmimeve të pronave.

“Ka dalë një rini që nuk ka alternativë përpos se të largohet ose të nënshtrohet. Është brezi i parë që nuk ka mundësi të blejë një shtëpi në këto 35 vite. Në Tiranë sot nuk paguajnë dot as qiranë. Kemi mijëra prindër që përcjellin me lot fëmijët e tyre përditë drejt emigrimit.”

Në analizën e tij, Kulluri bëri edhe një krahasim të fortë historik, duke e cilësuar këtë lëvizje si një moment kthese për vendin, madje më të fuqishëm se trazirat e vitit 1997.

Ish-deputetja dhe ish-ministrja Ermelinda Meksi ka reaguar lidhur me deklaratat e bëra nga Petro Koçi, i cili një ditë më parë kishte cilësuar Belinda Balluku si “themeluese të korrupsionit”.

Meksi thekson se qëndrimi i Koçit nuk duhet parë thjesht si një debat mes individësh, por si një sinjal për reflektim mbi drejtimin dhe transformimet e Partisë Socialiste ndër vite.

Sipas saj, çështjet e ngritura në atë deklaratë meritojnë vëmendje më të gjerë, pasi lidhen me mënyrën se si partia ka evoluar në krahasim me parimet dhe frymën e viteve të saj të para.

REAGIMI I MEKSIT
Në 35-vjetorin e Partisë Socialiste, shkrimi i Petro Koçit ngre disa çështje që meritojnë reflektim.

Më shumë se debat mes individësh, e lexoj atë si një shqetësim për mënyrën se si ka evoluar Partia Socialiste në raport me frymën e viteve të para të saj.

PS e fillimviteve ’90 u përpoq të fitonte besimin e shoqërisë përmes debatit të ideve, përfshirjes së intelektualëve, demokracisë së brendshme dhe hapjes ndaj mendimit ndryshe. Shumë prej nesh u angazhuam në PS pikërisht për këto vlera.

Për këtë arsye ky shkrim më preku, aq më shumë që me qarkun e Fierit më lidh një nga betejat më të rëndësishme elektorale të jetës sime politike. Në vitin 2009, pas pesë mandatesh si deputete e Tiranës,Partia Socialiste më besoi, së bashku me mallakastriotin Piro Lutaj, një nga sfidat më të vështira elektorale në qarkun e Fierit. Kandidova plot dëshire në Mallakastër, vendlindjen e tim eti, një zonë ku gjithë pushtetii lokal qe i dominuar nga Partia Demokratike. Falë punës së socialistëve dhe mbështetjes së mallakastriotëve kudo që jetonin, arritëm fitoren qe ndryshooi ekuilibrat politikë të zonës.

Kur dëgjoj sot diskutime mbi përqendrimin e vendimmarrjes, dobësimin e debatit të brendshëm apo largimin e figurave me kontribute, mendoj se përgjigjja nuk duhet të jetë mohimi i problemit, por reflektimi mbi të.

Një parti që qëndron gjatë në pushtet përballet natyrshëm me sfidën e ruajtjes së dinamizmit, pluralizmit te mendimit dhe aftësisë për vetëkorrigjim.

Kjo është çështja më e rëndësishme që ngre ky shkrim, veçanërisht në një moment kur besimi publik dhe aftësia për të dëgjuar zërat kritikë po bëhen gjithnjë e më të rëndësishme për të ardhmen e PS.

Në këtë përvjetor, u shpreh mirënjohjen të gjithë socialistët që ndërtuan dhe mbështetën Partinë Socialiste në vitet më të vështira te opozites si dhe në ato të qeverisjes.

Gëzuar 35-vjetorin, me urimin që PS të ruajë gjithmonë aftësinë për të dëgjuar, reflektuar dhe rinovuar veten.

Elton Qyno – Syri.net/

Një shërbim mjekësor si terapia hormonale po synohet të futet si aksesor i ri pranë Qendrës Spitalore “Nënë Tereza”, ku Ministria e Shëndetësisë ka ngarkuar drejtorinë spitalore për të ngritur dhe ofruar në të ardhmen këtë shërbim mjekësor pranë pavijonit të Endokrinologjisë.

Që nga periudha e fillimit të muajit maj 2026 e deri më sot, janë regjistruar mbi 80 kërkesa pranë këtij pavijoni me qëllim futjen në skemën e terapisë hormonale.

Një mjek pranë këtij shërbimi tha për gazetarin e “Syri.net”, Elton Qyno, se çështja është shumë problematike, pasi ende pa u ofruar si shërbim, numri i kërkesave është i madh, ku vetëm në 1 muaj janë paraqitur mbi 80 raste për të marrë shërbimin hormonal.

“…jemi në kushtet kur vetë mjekët e shërbimit nuk duan ta ofrojnë terapinë hormonale, pasi më mirë se kushdo ata e dinë se çfarë efekti ka kjo për fëmijët dhe më tej shoqërinë. Ka një diskutim të brendshëm mes bluzave të bardha për sabotimin e këtij shërbimi, përmes rrugëve të protestës, por ende nuk është marrë asnjë masë veprimi deri më tani. Fakti që brenda 1 muaji, në pavijonin e Endokrinologjisë janë depozituar mbi 80 kërkesa për të marrë terapinë hormonale, kjo është një shifër shqetësuese…” – thotë një nga mjekët e këtij pavijoni.

Dhe të mendosh që kjo situatë statistikore vjen në një kohë kur shërbimi ende nuk është vënë në punë, por është hedhur si udhëzim nga Ministria e Shëndetësisë për ta implementuar pranë Qendrës Spitalore “Nënë Tereza” në Tiranë.

Futja e këtij shërbimi ka sjellë reagime të forta nga shoqëria civile që mbron familjen dhe shoqërinë shqiptare. Por njëherësh, reagime kundër terapisë hormonale kanë bërë edhe 5 komunitetet fetare në Shqipëri, të cilat e kanë quajtur këtë nismë si aktin më të rëndë që i bëhet familjes shqiptare.

Kjo nismë është kundërshtuar edhe në protestat 10-ditore të zhvilluara në Tiranë dhe qytete të tjera të vendit.

Udhëzimi i Ministrisë së Shëndetësisë përcakton kriteret mjekësore, procedurat klinike dhe monitorimin për terapinë hormonale, e cila do të ofrohet në QSUT dhe do të mbulohet nga fondet publike.

Protokolli parashikon trajtim për të rriturit, por edhe për adoleshentët nga 16 vjeç, kur vlerësohet nga mjekët dhe ka miratimin e familjes.

Për shkak të mungesës së njohjes ligjore dhe të kujdesit të duhur shëndetësor, deri më tani kanë qenë të shumtë shqiptarët transgjinorë, të cilët janë detyruar të marrin terapi hormonale jashtë vendit ose ndonjëherë edhe në farmaci vendase nën dorë, duke shtuar ndjeshëm kostot dhe rrezikun shëndetësor, duke qenë jashtë monitorimit të mjekut specialist.

Por një urdhër i Ministrisë së Shëndetësisë, i miratuar më 28 prill dhe i firmosur nga zv.ministrja Eugena Tomnini, synon t’i japë zgjidhje kësaj situate.

Tashmë të gjithë ata persona që duan të ndryshojnë trupin përmes hormoneve për t’iu përshtatur identitetit gjinor (që jo domosdoshmërisht përputhet me seksin biologjik) do të kenë të drejtë ta marrin këtë trajtim në Qendrën Spitalore Universitare në Tiranë.

Ministria e Shëndetësisë ka miratuar për herë të parë një protokoll zyrtar për trajtimin hormonal të personave transgjinorë, duke e futur këtë shërbim në sistemin publik shëndetësor në Shqipëri.

Urdhri përcakton kriteret mjekësore, procedurat klinike dhe mënyrën e monitorimit për tranzicionin hormonal që do të kryhet në shërbimin e endokrinologjisë në QSUT.

Trajtimi do të jetë i aksesueshëm për burrat transgjinorë që kalojnë nga vajzë në burrë përmes hormonit të testosteronit, si dhe për gratë transgjinore që kalojnë nga burrë në grua përmes estrogjenit dhe anti-androgjenëve.

Si rregull, terapia mund të nisë nga mosha 16 vjeç, ndërsa në raste të veçanta, dhe vetëm me vlerësim të specializuar, mund të konsiderohet edhe nga mosha 14 vjeç.

RJOLL- Banorët e Rrjollit kanë thirrur një protestë ditën e shtunës, pasi biznesmeni Bashkim Ulaj ka rrethuar me tela me gjemba kantierin ku po ndërton resortin ‘Blu Borgo’ në Velipojë. Banorët e Rrjollit akuzojnë biznesmenin dhe qeverinë për grabitje pronash dhe ndërtim të paligjshëm.

Për këta arsyeje ata kanë protestuar dhjetëra herë që prej shkurtit të këtij viti, periudhë e cila lidhet edhe me nisjen e investimit. Protesta do të zhvillohet të shtunën, më 13 qershor në orën 11:00 në Rrjoll./Dosja.al

Konferenca Ipeshkvnore e Shqipërisë ka reaguar përmes një deklarate publike lidhur me protestat e zhvilluara në Tiranë, qytete të tjera të vendit dhe në diasporë, duke theksuar se zëri i qytetarëve duhet të dëgjohet dhe të trajtohet me seriozitet nga institucionet dhe politika.

Në deklaratën e saj, Kisha Katolike shpreh mbështetje për të drejtën demokratike të protestës, ndërsa u bën thirrje forcave politike të gjejnë rrugën e dialogut dhe të japin përgjigje konkrete ndaj shqetësimeve të qytetarëve.

Sipas Ipeshkvijve, pakënaqësia e shfaqur në protestat e fundit nuk mund të neglizhohet dhe kërkon zgjidhje brenda kornizave demokratike dhe europiane.

DEKLARATË PËR SHTYP

Të dëgjohet zëri i njerëzve e të gjenden zgjidhje politike brenda kornizave të demokracisë

Konferenca Ipeshkvore e Shqipërisë po ndjek me kujdes zhvillimet shoqërore në vendin tonë, veçanërisht protestat që po zhvillohen në qytetin e Tiranës, në qytete të tjera të Shqipërisë e në diasporë. Shkak për këto protesta kanë qenë disa projekte që prekin zona natyrore të mbrojtura apo kundërshtohen problemet të premtuese, për të ndërtuar në to objekte që synojnë zhvillimin e një turizmi elitar.

Nga ana jonë si Ipeshkvij të Kishës katolike, vlerësojmë se zhvillimi i vendit duhet të ketë parasysh mbrojtjen e ambientit, por edhe respektimin e pronës së gjithkujt. Papa Françesku, në Letrën e tij Enciklike Laudato si’, thotë: «Parashikimi i impaktit ambiental të sjelljes dhe të projekteve kërkon procese politike transparente dhe që i nënshtrohen dialogut, ndërsa korrupsioni, që fsheh impaktin e vërtetë ambiental të një projekti, në këmbim të favoreve, shpesh çon drejt marrëveshjeve të paqarta që i lënë detyrimet për t’u informuar dhe në debat të thelluar» (LS 182).

Në këtë kuptim vlerësojmë, konsultimi dhe përfshirja e komuniteteve lokale që jetojnë aty dhe i agjencive që merren me mbrojtjen e ambientit është më se i domosdoshëm. Për ne, kjo gjë quhet zhvillim integral që duhet të marrë parasysh të gjitha dimensionet e jetës njerëzore si ato individuale ashtu edhe ato komunitare. Sikurse thotë Shën Pali VI, ky zhvillim duhet të përfshijë «të gjithë njeriun dhe krejt njeriun» (Populorum Progressio, 42). Kjo është pjesë e Doktrinës shoqërore të Kishës dhe ne ftojmë që çdo projekt zhvillimi të bëhet duke marrë parasysh, jo vetëm krijimin e strukturave e gjallimin e vetvetes, por të ketë në qendër njeriun me nevojat dhe të drejtat e tij private dhe komunitare.

Protestat e këtyre ditëve dhe pjesëmarrja e shumtë të rinjve dhe familjeve në to kanë nxjerrë në pah edhe një pakënaqësi ndaj sistemit politik aktual. Kjo pakënaqësi është vërejtur në pjesëmarrjen dhe në artikulimin e shumicës protestuese. Kisha nuk ka për detyrë të gjykojë zgjedhjet politike, por të orientojë ndërgjegjet. Ne jemi të bindur se zëri i njerëzve duhet të dëgjohet dhe të lexohet. I takon politikës të gjejë zgjidhje brenda kuadrit politik dhe demokratik. Këto janë rregullat e demokracisë evropiane ku ne aspirojmë të shkojmë. Nuk mund të injorohet zëri i shumicës së njerëzve që kanë të drejtën e pakundërshtueshme të shprehin mendimin e tyre dhe të kërkojnë ndryshime.

Ne ftojmë përfaqësuesit e politikës, që të gjejnë tryezën e dialogut, të japin përgjigjet e duhura ndaj qytetarëve të thjeshtë të popullit tonë që kërkojnë të mos anashkalohen, të dëgjojnë zërin e të rinjve që kanë të drejtë të ndërtojnë jetën e tyre këtu, pa iu nënshtruar fatalisht humbjes së shpresës dhe rrugës së emigrimit, plagë e cila në vitet e fundit ka emrin shpopullim i vendit.

Ne i lutemi Hyjit për popullin tonë, për politikanët dhe për të gjithë njerëzit vullnetmirë të këtij vendi, që të gjejnë, bashkë me rrugën e dialogut politik dhe shoqëror, edhe zgjidhjet e duhura brenda kornizave politike dhe demokratike të një vendi që ka si synim integrimin evropian.

Zoti e bekoftë Shqipërinë!

Konferenca Ipeshkvore e Shqipërisë

Dita e nëntë e ka gjetur protestën qytetare në bulevardin para kryeministrisë me një pjesëmarrje më masive nga ditët e tjera, ku kanë ardhur shqiptarë nga të gjitha trojet, duke iu bashkuar kauzës kundër qeverisë, politikës 35-vjeçare dhe kundër skandaleve abuzive.
Mes thirrjeve të shumta ranë në sy edhe ato për patronazhistët që kërkojnë përçarjen e qytetarëve në shesh, por edhe të opozitës që e cilësuan “të shitur”.

“Opozita jemi ne, opozita e shitur”, “Atdheu jemi ne”, “Rama jep dorëheqjen”, “Rama në burg, Berisha në burg”.

Organizatorët thanë se do kishte pak fjalime nga intelektualë dhe më shumë parulla dhe mesazhe me një kërkesë të vetme: Dorëheqje.

“Pas fjalimeve të shkurtra sheshi është i qytetarëve, paqësisht marshoni, në paqe në të gjithë qytetet e rrugët. Të bëhemi 1 mln shqiptarë, të kërkojmë dorëheqjen e më antishqiptarit që ka njohur Shqipëria, Edi Rama. Nuk i duam militantët e partive këtu me ne, edhe pse edhe ata janë vëllezërit dhe motrat tona, por sheshi është i yni”, thanë ata.

Mijëra qytetarë u mblodhën fillimisht në Sheshin Skënderbej dhe më pas marshuan drejt godinës së Kryeministrisë, ku bulevardi u mbush me pankarta, flamuj dhe thirrje kundër qeverisë dhe klasës politike në tërësi.

Atmosfera para Kryeministrisë u karakterizua nga slogane të forta si “Rama jep dorëheqjen”, “Mos u përçani! Poshtë patronazhistët”, “Rama ik”, si dhe thirrje që kërkonin largimin e elitës politike që ka dominuar jetën publike shqiptare prej dekadash.

Ndërkohë, kryeministri Edi Rama dhe përfaqësues të mazhorancës kanë vijuar të minimizojnë protestën, duke e lidhur atë me dezinformimin, interesa politike apo ndikime të jashtme. Në deklaratat e fundit, Rama ka ironizuar protestuesit dhe ka sulmuar figura publike që kanë shprehur mbështetje për revoltën qytetare.

Ajo që nisi në Zvërnec si një kundërshtim ndaj një projekti të caktuar, tashmë po merr përmasa më të gjera, duke u shndërruar në një shprehje të pakënaqësisë ndaj të gjithë klasës politike.

Këtë e dëshmojnë edhe mesazhet që dominuan tubimin para Kryeministrisë. “Rama në burg, Berisha në burg”, “Poshtë kasta politike” dhe “Mos u përçani! Poshtë patronazhistët” ishin ndër thirrjet më të dëgjuara gjatë protestës, duke reflektuar zhgënjimin e një pjese të qytetarëve jo vetëm ndaj qeverisë aktuale, por ndaj gjithë sistemit politik.

Me thirrje kundër klasës politike dhe elemente të forta patriotike ka nisur protesta para Kryeministrisë. Në shesh janë dëgjuar Himni Kombëtar dhe kënga patriotike “Xhamadani Vija-Vija”, ndërsa protestuesit kanë valëvitur flamuj kombëtarë.

Protestuesit kanë shigjetuar me thirrje dhe ironi si kryeministrin Edi Rama, ashtu edhe kreun e PD-së Sali Berisha, duke kërkuar burgosjen e tyre. “Rama n’burg, Berisha n’burg”, kanë thirrur njëzëri pjesëmarrësit.

Të rinj, të reja, fëmijë dhe të moshuar janë bërë bashkë në këtë protestë, e cila po tërheq vëmendje edhe ndërkombëtare përmes transmetimit live të Reuters. Sipas organizatorëve dhe pjesëmarrësve, kjo është një kauzë që nuk do të ndalet deri në dëgjimin e kërkesave të tyre. gsh

Ndërsa pritej të festohej 35-vjetori i partisë Socialiste, në turin e shpallur në çdo qark, kryeministri Edi Rama është pritur me protesta ditën e sotme në Shkodër (8 qershor), teksa do të marrë pjesë në eventin e organizuar.

Dhjetëra qytetarë janë mbledhur poshtë Kalasë Rozafa duke protestuar kundër ndërtimit të resortit në Zvërnec të Vlorës, kundër ndërtimit të resortit në Rrjoll.

Ndërsa makinat e eskortës kalonin me sirena dhe Policia ishte vendosur në kordon, dhjetëra qytetarë me flamuj, thirrje e pankarta janë rreshtuar anash rrugës.

Në vendin ku po zhvillohet protesta ndodhen të pranishme dhjetëra forca policie, në afërsi të kalasë Rozafa.

bw

Deputeti i Partisë Demokratike, Tomor Alizoti, ka reaguar pas përmendjes së emrit të tij nga kryeministri Edi Rama gjatë aktivitetit të organizuar në Elbasan me rastin e 35-vjetorit të Partisë Socialiste.

Përmes një reagimi në rrjetet sociale, Alizoti akuzoi Ramën për arrogancë politike dhe për përpjekje për ta lidhur fatin e tij politik me fatin e Shqipërisë, duke argumentuar se askush nuk mund të identifikohet me interesin e vendit apo të qytetarëve. Deputeti demokrat u shpreh se protestat dhe zhvillimet e fundit në vend janë rezultat i drejtpërdrejtë i mënyrës së qeverisjes së kryeministrit dhe jo pasojë e veprimtarisë së opozitës apo faktorëve të tjerë politikë.

Sipas Alizotit, pakënaqësia qytetare po bëhet gjithnjë e më e dukshme, ndërsa mijëra shqiptarë po zgjedhin të shprehin kundërshtimin e tyre ndaj qeverisë përmes protestave në rrugë dhe sheshe. Ai theksoi se Shqipëria po kalon një moment të rëndësishëm politik, ku qytetarët po kërkojnë më shumë përgjegjshmëri, llogaridhënie dhe ndryshim, duke e konsideruar reagimin qytetar si një sinjal të qartë të pakënaqësisë ndaj modelit aktual të qeverisjes.

Postimi i plotë:
Që e ke humbur fare duket qartë. S’ka nevojë për psikologë e psikiatër. Bashkon fjalë dhe kujton se bën fjali. Më paske përmendur edhe mua si deputet, në ligjëratën e lodhshme para të tutëvëve. Ty të pëlqen të vetëkënaqesh para skllevërve të tu nëpër salla.

Po ky sot është problemi më i vogël që ke ti dhe duartrokitësit e tu. Tani po të jap një leksion historie, se ti, si i shkolluar nga kinostudio, e ke diapazonin mendor sa ekrani i një televizori Iliria. Po të tregoj që, që nga koha e faraonëve e deri te sivëllai yt, Stalini, të gjithë diktatorët e bashkojnë kombin me veten. Njësoj si ti, po fiks fare si ti, e quajnë fundin e vet si fund të kombit. Por, po të shkollohesh me televizor Iliria, babëzia ta errëson gjykimin.

Këto që po ndodhin këto ditë në Shqipëri janë rezultat i qeverisjes tënde. Mund të bësh kllounin sa të duash, të thërrasësh në ndihmë kë të duash; suksesi i protestës është fundi yt.

Unë jam deputet dhe në politikë ka finale të mira e të këqija politike. Por ti s’je më përballë meje si deputet, as përballë nesh si politikanë. Ndaj mos u përgjëro kot. Fundi i pushtetit tënd duket qartë që s’do të jetë më politik. Do të jetë në shesh, aty ku rrëzohen të gjithë ata që qeverisin si ti. Dhe unë i falënderoj dhe i mbështes nga zemra të gjithë ata që po ta afrojnë këtë fund, që e meriton totalisht. Kjo ishte përgjigjja politike. Sa për mbiemrin tim, më vjen keq. Jemi kaq të ndryshëm, sa s’ta kthej dot përgjigjen. Nuk ma lejon edukata familjare të debatoj me sojin tënd. bw

Një lajm i rëndësishëm për Shqipërinë dhe veçanërisht për rajonin e Shkodrës vjen nga UNESCO.

Në kuadër të Ditës Botërore të Mjedisit, organizata ndërkombëtare ka shpallur zyrtarisht Liqenin e Shkodrës si një nga 14 rezervat e reja të biosferës në botë për vitin 2026.

Me këtë vendim, Liqeni i Shkodrës bëhet pjesë e Rrjetit Botëror të Rezervave të Biosferës të UNESCO-s, i cili tashmë numëron 797 zona të mbrojtura në 145 vende të botës.

UNESCO vlerëson rezervat e biosferës si territore me vlera të jashtëzakonshme ekologjike, ku ruajtja e natyrës ecën paralelisht me zhvillimin e qëndrueshëm dhe mirëqenien e komuniteteve lokale. Përzgjedhja e Liqenit të Shkodrës konsiderohet një njohje ndërkombëtare për pasurinë e tij natyrore, biodiversitetin unik dhe rëndësinë që ka për ekosistemin e rajonit.

Drejtori i Përgjithshëm i UNESCO-s, Khaled El-Enany, deklaroi se rezervat e biosferës dëshmojnë çdo ditë se mbrojtja e natyrës dhe përmirësimi i jetës së njerëzve nuk janë qëllime në kundërshtim me njëra-tjetrën.

Për Shkodrën, ky status i ri pritet të sjellë më shumë vëmendje ndërkombëtare, mundësi për zhvillimin e turizmit të qëndrueshëm, projekte mjedisore dhe promovimin e një prej pasurive më të rëndësishme natyrore të Ballkanit.

Liqeni i Shkodrës ishte një nga 14 zonat e reja të shpallura këtë vit nga UNESCO, krahas rezervave të reja në vende si Kanadaja, Portugalia, Mongolia, Filipinet dhe Vietnami.

Dy turistë italianë që ndodheshin në Tiranë i janë bashkuar simbolikisht protestës së zhvilluar përpara Kryeministrisë, duke reaguar ndaj deklaratave të kryeministrit Edi Rama, i cili sot ka deklaruar se protestat mund të trembin turistët dhe të dëmtojnë sezonin turistik.

Turistja italiane tha se ajo dhe të tjerët që janë me të nuk ndihen të frikësuar nga protestat dhe e konsiderojnë të rëndësishme që qytetarët të ngrenë zërin e tyre për të drejtat dhe transparencën e qeverisë.

“Përshëndetje, ne jemi nga Italia. Jemi të lumtur që jemi këtu me ju, si turistë në vendin tuaj. Vëllezër dhe motra shqiptarë, ne nuk jemi të frikësuar. Protesta juaj nuk na frikëson. Është e rëndësishme të ngrini zërin për të drejtat tuaja, për transparencën e qeverisë. Faleminderit që ishit kaq mikpritës”, tha ajo.

Një tjetër turist italian tha se gjatë qëndrimit të tij në Shqipëri ka parë një popull krenar që, sipas tij, nuk përkulet përballë parasë.

“Këto ditë që kam qenë këtu, kam parë një popull krenar! Kam parë një popull që nuk përkulet përballë lekëve. Mendojnë se mund t’ju blejnë, por nuk është kështu. Shqipëria ka shqiptarët. Vazhdoni kështu! Forca, Shqipëria”, tha ai. Panorama