VALENTINA MADANI/ Ish-kryeministri Sali Berisha do të paraqitet nesër në SPAK ndërkohë që demokratët do të mblidhen në protestë.

Z.Berisha është thirrur në Prokurorinë e Posaçme (SPAK) ku në orën 12:00 pritet t’i komunikohet akuza në lidhje me hetimet për privatizimin e ish-kompleksit “Partizani”. Po këtë ditë, pritet që PD-ja të nisë protestat.

Në SPAK do të paraqitet dhe dhëndri i tij, Jamambër Malltezi, ku edhe ai do të njihet me akuzën lidhur me aferën e privatizimit të ishkompleksit “Partizani”. SPAK pa pasur afat ligjor deri në 2 tetor për të përfunduar hetimet, por prokurorët i kanë mbyllur hetimet para afatit ligjor. Seanca për aferën e dyshuar korruptive ku nën hetim është ish-kryeministri Sali Berisha dhe dhëndri i tij Jamarbër Malltezi, është shtyrë.

Dje pritej të bëhej bilanci 2 mujor i hetimeve të SPAK për dosjen e privatizimit të ish-klubit sportiv “Partizani”. Por seanca u shty pasi sipas gjykatës Berisha dhe Malltezi nuk rezultojnë të kenë marrë njoftim për procesin. Avokati i Berishës tha zvarritjet janë të qëllimshme. “Afatet ata i kanë 6 mujore, dhe mund të marrin zgjatje. Nuk e dimë, por seanca pasardhëse është regjistruar në 11 korrik. Nuk ishim vënë në dijeni më parë, pasi këta veprojnë si kokë autonome dhe veprojnë kur të duan, sipas direktivës. Ne kemi kërkuar ndryshim të masës dhe do të kërkojmë”,-tha avokati Genc Gjokutaj.

Ndërkohë pritet që në seancën e radhës Prokuroria e Posaçme të kërkojë shtyrjen me 3 muaj të tjerë të hetimeve, vendim që do të merret nga trupi gjykues pas dorëzimit të kërkesës nga organi i hetimit. Ndaj Malltezit Gjykata e Posaçme ka vendosur masën e sigurisë “Arrest shtëpie”. Ndërkohë edhe për Berishën, Gjykata e Posaçme ka vendosur masën e sigurisë “Arrest shtëpie”. Sipas vendimit, Berisha nuk duhet të largohet nga banesa dhe të mos komunikojë me persona të tjerë përveç atyre që bashkëjetojnë në të njëjtën shtëpi me të.

PROTESTA

Por ndërsa pritet që Berishës t’i komunikohet zyrtarisht akuza, në PD ka nisur mobilizimi i anëtarëve të Kryesisë dhe drejtuesve të strukturave të PD-së. Përmes një mesazhi, sekretari i përgjithshëm Flamur Noka u kërkon anëtarëve organizimin e një proteste, para godinës së SPAK. Në mesazhin drejtuar anëtarëve të Kryesisë dhe Këshillit Kombëtar, Noka bën thirrje për protestë të fuqishme “në solidaritet me të drejtën, të vërtetën dhe kundër narkodrejtësisë”. “Të dashur miq. Ditën e mërkurë në ora 12:00 kryetari i PD Prof Dr Sali Berisha do shkojë pranë organizatës kriminale të SKAP. Të mobilizohemi të gjithë maksimalisht për protestë të fuqishme solidariteti me të drejtën, me të vërtetën, kundër narkodrejtësisë”,-thuhet në mesazhin që Flamur Noka ua drejton anëtarëve të Kryesisë dhe drejtuesve të strukturave të PD-së. Që prej muajit dhjetor kur SPAK e la në arrest shtëpie, mbështetës të PD-së kanë protestuar poshtë ballkonit të Berishës, aty ku ky i fundit ka mbajtur në mënyrë të vazhdueshme fjalimet e tij, ku nuk kanë munguar as akuzat ndaj qeverisë.

REAGIMET

Deputeti i Partisë Demokratike, Titan Shehu, reagoi pas njoftimit të Prokurorisë së Posaçme për thirrjen e ish-kryeministrit Sali Berisha dhe dhëndrit të tij ditën e mërkurë në SPAK. Përmes një reagimi në rrjetet sociale, Shehu e cilësoi Berishën si të pandehur politik, ndërsa shton se procesi gjyqësor sipas tij, është i pilotuar.

“Në 9 muaj “hetim” nën arrest shtëpie ai është thirrur në SPAK vetëm një herë, për rreth 20 minuta, në fillim të atij procesi politik”, shkruan deputeti demokrat.

Më tej, ndalur te mbyllja e hetimeve, Shehu pyet se pse “Berisha u mbajt i izoluar pa u pyetur, duke shkelur edhe mbi të drejtat e njeriut, të deputetit, mbi vetë Kuvendin tonë”. “Një hetim i tillë politik nuk mund të mos prodhojë veçse një dosje politike”, shprehet deputeti Tritan Shehu.

Po dje reagoi edhe koordinatorit rajonal për Tiranën në PD, Klevis Balliu pasi ish-kryeministri Sali Berisha është thirrur në SPAK ditën e mërkurë, pasi do t’i komunikohet akuza lidhur me hetimet për privatizimin e ish-kompleksit “Partizani”. Balliu shprehet se Berishës duhet vetëm t’i kërkohet ndjesë pasi është mbajtur për 10 muaj në arrest shtëpie ka akuzë.

“E vetmja gjë që duhet të bëjnë të mërkurën është të kërkojnë ndjesë. Kryetarit të opozitës dhe opozitës gjithë Shqipërisë! 10 muaj nën masë arresti dhe SPAK akoma nuk ka ngritur akuzë. Tani pas 10 muajsh dhe pas 4 vite hetime të dala bosh pa asnjë provë dhe asnjë fakt drejtësia Rama thotë se do të ngrejë akuzë”, – shprehet z.Balliu./Gazeta Panorama

Administrata e Presidentit Joe Biden i ka dërguar Kongresit një raport të klasifikuar mbi strategjinë e saj për luftën në Ukrainë, thanë të hënën tre burime.

Një zyrtar në Kongres tha se raporti kishte mbërritur tek ligjvënësit të hënën dhe se ata nuk kanë patur ende mundësi ta shqyrtojë atë. Dy burime të tjera, të cilat nuk pranuan të identifikohen, konfirmuan dorëzimin e raportit. Shtëpia e Bardhë nuk iu përgjigj menjëherë një kërkese për koment.

Kongresi ka miratuar afro 175 miliardë dollarë ndihmë për Ukrainën dhe vendet aleate që kur Rusia nisi agresionin ndaj Kievit.

Pas muajsh të tëra vonese, Dhoma e Përfaqësuesve e udhëhequr nga republikanët miratoi në prill projektligjin prej 95 miliardë dollarësh që përfshinte 61 miliardë dollarë financime për Ukrainën, si dhe miliarda dollarë ndihmë për Izraelin, civilët në zonat e konfliktit në mbarë botën dhe për vendet e rajonit Indo-Paqësor që përballen me rrezikun e Kinës.

Si pjesë e projektligjit, Kongresi i kërkoi administratës së Presidentit Biden të paraqiste një strategji të detajuar për Ukrainën deri në fillim të qershorit.

Mbështetja e Presidentit Biden për Ukrainën përkrahet nga demokratët dhe shumë republikanë në Kongres. Megjithatë, disa republikanë kanë kritikuar administratën e tij për kufizimin e mënyrës sesi Ukraina mund të përdorë armatimet amerikane, si për shembull refuzimin për dërguar armë që mund të godasin objektiva thellë brenda Rusisë, nga shqetësimi se një gjë e tillë mund të çonte në përshkallëzim të konfliktit.

Pasi kaluan disa javë dhe raporti nuk u dërgua në Kongres, disa anëtarë të Kongresit thanë se ishin zemëruar dhe se do të shqyrtonin edhe idenë e bllokimit të fondeve të mëtejshme.

Lideri i opozitës thirret në SPAK këtë javë

Kreu i Partisë Demokratike, Sali Berisha, është thirrur për t’u paraqitur këtë të mërkurë në SPAK, sa i përket hetimeve ndaj tij për dosjen ‘Partizani’.

Berisha ndodhet në arrest politik prej 30 dhjetorit të vitit 2023.

Ndaj tij ka më shumë se katër vite që hetohet dhe drejtësia nuk ka mundur dot të ngrejë asnjë akuzë pasi nuk ka gjetur fakte.

Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga qeveria.sn

Numri i fëmijëve në shkolla do të reduktohet me shpejtësi sipas të dhënave të zbuluara në censin e vitit 2023.

Përveç rënies së lindjeve, numri i fëmijëve në parashkollor po pakësohet ndjeshëm nga fenomeni i emigracionit me familje.

Sipas të dhënave nga cens 2023, numri i fëmijëve në moshën 6 vjeç ishte 24,812. Duke marrë në konsideratë numrin e fëmijëve të lindur në vitin 2017 që janë 6-vjeçarët e vitit 2023, shihet se ka një tkurrje të ndjeshme.

Numri i fëmijëve që lindën në vitin 2017 ishte rreth 31 mijë, por fëmijët që i korrespondonin këtij viti ishin vetëm 24,812 kur u zhvillua censi.

Sipas të dhënave nga cens, këtë vit hyjnë në klasën e parë jo më shumë se 24 mijë fëmijë në të gjithë vendin. Gjithsej fëmijët e grupmoshës 0-6 vjeç janë 160,719 sipas cens 2023, nga më shumë se 260 mijë që ishin në vitin 2011.

Duke krahasuar numrin e foshnjave të lindura nga viti 2017 deri në vitin 2023, dhe atyre që ka gjetur cens, rezulton një numër më i ulët fëmijësh. Diferencat janë deri në 20% që është një tregues i pastër i emigrimit të fëmijëve me familjet.

INSTAT ka raportuar se në vitin 2022 në të gjithë vendin kishin lindur 24,688 foshnja, por nga numërimi i Cens ishin vetëm 21 mijë foshnja të moshës 1 vjeç.

Në dy vitet e fundit ka një zbutje emigrimit si azilkërkues, por ka një fenomen në rritje të punonjësve me kontrata të rregullta pune drejt vendeve të BE sidomos drejt Gjermanisë. Fillimisht si punonjës sezonalë, tani ky kontingjent ka siguruar kontrata dhe po merr edhe familjet e fëmijët.

Gjithashtu të dhënat e Cens 2023 kanë zbuluar se numri individëve +6 vjeç që ndjekin arsimin parauniversitar ishte 317,213 nxënës, teksa në të njëjtin vit shkollor (2023-2024) INSTAT, referuar Ministrisë së Arsimit, raportoi se arsimin parauniversitar +6 vjeç e ndiqnin 349,827 nxënës.

Numri i nxënësve që ndjekin arsimin nga klasa e parë deri në përfundim të shkollës së mesme ishte rreth 27 mijë nxënës më pak ose 9.3% më i ulët se sa shifra zyrtare që është referuar në fillimin e vitit akademik.

Të dhënat e Cens 2023 kanë treguar rënie drastike të numrit të nxënësve në shkolla. P.sh., INSTAT referoi se në vitin akademik 2023-2024 e ndiqnin arsimin 9-vjeçar mbi 258 mijë nxënës, ndërsa sipas Cenc 2023 ky nivel arsimor ndiqej nga rreth 231 mijë nxënës.

Gjithashtu Cens referoi se në momentin kur u krye anketa, vetëm 86 mijë persona ishin duke ndjekur arsimin e mesëm, ndërsa sipas të dhënave zyrtare, në vitin akademik 2023-2024 ishin regjistruar në arsimin e mesëm 91 mijë nxënës, ose rreh 5 mijë më pak se të dhënat zyrtare të regjistrimit./MONITOR

Deputetja e Partisë Demokratike Ina Zhupa ka reaguar me nisjen e vitit të ri shkollor. Ajo në një mesazh ne facebook shkruan se janë mbyllur në të gjithë vendin 295 shkolla.

“Aftësitë e nxënësve tanë janë kthyer mbrapa, në vitet 2000 dhe është thelluar analfabetizmi funksional”, shkruan ajo.

Postimi i plotë:

Vit të mbarë shkollor për nxënësit dhe mësuesit!

2024 nis si një vit shkollor me rekorde të zeza të arsimit parauniversitar.

Shqipëria e fundit në Testin Pisa duke lënë pas edhe Palestinën që është në luftë.

Aftësitë e nxënësve tanë janë kthyer mbrapa, në vitet 2000 dhe është thelluar analfabetizmi funksional.

Ky vit rregjistron me të dhëna zyrtare mbylljen e 295 shkollave 9-vjeçare gjatë qeverisjes Rama.

Ministria e Arsimit Manastirliu, ose zonja Abuzimi , po bën centralizimin dhe burokratizimin e arsimit, duke shtuar patronazhist dhe facebokist për fushatë por jo punë dhe para për cilësinë e arsimit. Ngelemi vendi me 2.1% të GDP-së për arsimin, më e ulta në rajon.

47% e fëmijëve do shkojnë në shkollë me barkun bosh, ose të kequshqyer, duke pasur në duart disa libra të përdorur që vetëm dije nuk dhurojnë dot.

Mësuesit në rrethe numërojnë nxënësit që ikin, me shpresën që nuk do ju bjer ngarkesa dhe nuk do shkarkohen si të panevojshëm, sidomos ata që bindjet politike i kanë të ndryshme nga drejtorët politik patronazhist.

Mësuesit e dinë që detyra themelore për këtë vit shkollor do jenë listat e zgjedhësve që do cojnë si votues të Partisë Socialiste sesa lista e notave dhe e librave për nxënësit e tyre.

Në 2024 ende do bëhet mësim me turne, edhe në mes të Tiranës, ende do ketë klasa të mbipopulluara dhe mungesë infrastrukture dhe mjete didaktike.

Klasat digjitale dhe fjalimet pompoze me to nuk janë realitete të prekshme ku në 50% të shkollave rurale as nuk ka internet fare.

Panorama e 2024 është e zymtë por detyra jonë është që të luftojmë së bashku për ndryshimin, për përmirësimin dhe për shkuljen e të keqes.

Si kryetare e komisionit të Edukimit do shfrytëzoj cdo mjet parlamentar që arsimi të jetë në qëndër të vendimarrjes dhe llogaridhënia të jetë detyrim. sn

Zona veriore e Shqipërisë ofron pasuri të shumta natyrore për zhvillimin e turizmit, kryesisht atij malor. Një prej tyre është edhe Lugina e Drinit, e cila përshkohet mes Alpeve, ku gjatë dy-tre vitet e fundit kanë nisur aktivitetin në fushën e turizmit rreth 70 biznese, kryesisht nga banorët vendas. Por, siç njofton Zërit i Amerikës, problem mbetet gjendja e rrugës automobilistike që shkon drejt Komanit dhe mbeturinat që derdhen në liqen.

Lugina e Drinit, me tre liqenet e saj dhe majat e Alpeve, ofron një potencial turistik që sa ka nisur të shfrytëzohet nga operatorët turistik privat, por edhe banorë të zonës, të cilët kanë hapur bujtinat dhe qendrat e para turistike për vizitorët vendas dhe të huaj.

Por, krahas tyre, në zonë janë shfaqur edhe problematikat e para, siç janë vështirësitë e udhëtimit dhe mbeturinat, të cilat shfaqen herëpashere mbi sipërfaqen e ujit, sidomos në Liqenin e Komanit.

Rruga e Komanit, me një gjatësi prej rreth 36 kilometrash, e cila nis nga qyteza e Laçit në Vau Dejës për të përfunduar në tunelin e Komanit, është një nga rrugët më të dëmtuara në Shqipëri, e cila nuk ofron siguri rrugore për dhjetëra automjete që lëvizin çdo ditë nëpër këtë aks të rëndësishëm rrugor duke transportuar banorë të zonës së Alpeve, por edhe turistë që shkojnë drejt pikave turistike si ajo e Lumit të Shalës, Valbonës si dhe qytetit Bajram Curri e deri në Gjakovë.

Shqetësimin për gjendjen e rrugës e kanë paraqitur disa herë përmes protestave banorët e zonës, operatorët turistik që veprojnë në Luginën e Drinit, por edhe organizatat joqeveritare.

Mirsad Basha i shoqatës “Eko Mendje” thotë se rruga e Komanit nuk është vetëm një rrugë e keqe, por ajo është me rrezikshmëri të lartë për jetën për shkak të shumë kthesave, humnerave, erozionit.

“Ndaj, duhet një vëmendje më e madhe për atë zonë. Megjithëse janë organizuar shumë protesta nga shoqëria civile dhe nga operatorët turistik të zonës, situata nuk ka ndryshuar”, thotë ai.

Kryetari i Bashkisë “Vau Dejës”, Kristian Shkreli, thotë ndërkohë se rruga ka degraduar plotësisht për shkak të automjeteve të tonazhit të rëndë që punojnë për nevojat e hidrocentralit të Komanit, por edhe numrit të lartë të automjeteve që shkojnë drejt pikave turistike të zonës.

“Është një rrugë ku prej 30 vitesh askush nuk ka vënë dorë dhe për këtë shkak ka ardhur edhe degradimi i saj. Por, ne si bashki nuk e kemi në ngarkim, pasi kjo rrugë është në inventarin e ARSH-së. Edhe po të ishte e Bashkisë Vau Dejës ne do ta kishim të pamundur investimin në atë rrugë, sepse është një investim shumë i madh. Por, kryeministri na ka premtu që, shumë shpejt, do të nisin punimet për rrugën Vau Dejës-Koman”, thotë ai.

Në qershor të vitit 2021, KESH-i paraqiti një plan për zhvillimin e zonës dhe rikonstruksionin e rrugës së Komanit, por në fund të vitit Ministria e Infrastrukturës dhe Energjisë deklaroi se “rruga e Komanit nuk është parashikuar në buxhetin e vitit 2022 dhe as buxhetin afatmesëm”.

Biologia Aurora Piroviç, një eksploruese e pasionuar e Veriut të Shqipërisë dhe udhërrëfyese e grupeve turistike në këtë zonë, veçon nevojën e një vëmendje më të madhe ndaj kësaj zone, e cila po tërheq me shpejtësi flukse turistike nga shumë vende të botës.

“Eksplorimi i Lumit të Shalës dhe Valbonës si dhe udhëtimi me motovarka apo me traget nëpër tre liqenet e luginës janë një nga përvojat më mbresëlënëse për vizitorët vendas dhe të huaj, thotë Aurora, por mbeturinat, që shfaqen herëpashere në ujërat e liqeneve, e dëmtojnë turizmin në këtë zonë.

“Gjatë të gjithë vitit në këtë basen problematike është ndotja, ndotja plastike që kryesisht vjen nga hedhja e mbeturinave në përrenj, lumenj, si mënyra më e shkurtër për të hedhur mbeturinat, por që është edhe rruga më e gabuar, e cila nuk po gjen zgjidhje. Duhet ndërgjegjësim, përmirësim i infrastukturës dhe hapësira për venddepozitimet e mbetjeve”, thotë ajo.

Pothuajse çdo vit, Korporata Elektroenergjitike, së bashku me vullnetarët e shoqatës mjedisore “Eko Mendje”, ndërmarrin aksione për pastrimin e Liqenit të Komanit nga mbeturinat. Megjithatë, sipas drejtuesit të kësaj shoqate, Mirsad Bashës, është përgjegjësi e bashkive mbrojtja e zonës nga ndotja prej mbeturinave.

Në pikën turistike të Lumit të Shalës, sipas kryetarit të Bashkisë Vau Dejës, Kristian Shkreli, aktualisht operojnë rreth 70 subjekte private në funksion të turizmit, të cilët paguajnë taksat në Bashkinë e Shkodrës, ndërsa pastrimin e zonës e bën Bashkia Vau Dejës, një bashki me fonde të pakta për të menaxhuar një territor kaq të gjërë.

“Këtë vit kemi pasur jashtëzakonisht shumë mbetje që na kanë sjellur shumë probleme. Sivjet ja kemi dalë, por shpresojmë që për vitin tjetër të bëjmë ndonjë kontratë me Bashkinë e Shkodrës për t’a patur sa më të lehtë pastrimin e tyre, sepse Bashkia e Shkodrës, për shkak të largësisë me Liqenin e Komanit, e ka të pamundur të bëjë pastrimin e mbeturinave që hidhen në liqen”, thotë ai.

Megjithë potencialin e madh për një zhvillim të turizmit malor të qëndrueshëm dhe gjithëvjetor, Lugina e Drinit, ashtu si e gjithë zona Veriore e Shqipërisë përballet me problematika, të cilat kanë ardhur nga një mungesë e gjatë ndër vite e vëmendjes ndaj kësaj zone, shoqëruar me investime të pakta në krahasim me zonat e tjera të Shqipërisë.