Deputeti i PD-së, Gazment Bardhi ka denoncuar një tjetër shkelje të rëndë gjatë procesit farsë të votimit në 11 maj, ku një operatore e PEI ka prishur haptazi sistemin e videomonitorimit dhe sipas tij në 85% të QV, Fier, nuk ka pasur regjistrim video.

‘Në QV 2817, njësia administrative Dushk, Bashkia Lushnjë, vetëm 2 orë pasi ka filluar procesi i votimit dhe ku janë regjistruar shkelje të shumta, punonjësja e KQZ prish sistemin e videomonitorimit, duke ndryshuar dhe pozicionuar kamerën në këndin e ambienteve të jashtme të QV. Ky është një krim elektoral dhe KQZ ka detyrimin ta identifikojë punonjësen e vet dhe ta mbajë përgjegjëse penalisht për shpërdorimin e detyrës’, shkruan Bardhi në Facebook.

Gjithashtu deputeti i PD ka akuzuar Zv. kryeministren Belinda Balluku se ka urdhëruar që sistemi i videomonitorimit të nxirrej jashtë funksionit në pjesën dërrmuese të QV-ve në qarkun Fier dhe se Task Forca e krimeve zgjedhore i ka mbajtur gjallë alibinë Edi Ramës se janë duke punuar e luftuar “fuqishëm” krimet zgjedhore!

Postimi i plotë:

Sipas nenin 22 të Kodit Zgjedhor, KQZ-ja instalon dhe përdorë sisteme videomonitorimi në qendrat e votimit (QV), për të monitoruar dhe provuar rregullshmërinë e procesit në mjediset e brendshme të tyre. Për këtë proces, KQZ-ja ka shpenzuar rreth 5 milionë euro nga paratë e qytetarëve shqiptarë.

Në ato pak QV ku sistemi i videomonitorimit është vënë në punë, nga ana jonë janë evidentuar shkelje të rënda të procesit të votimit dhe haptazi krime të shumëfishta elektorale, të cilat janë bërë apo do të bëhen publike këto ditë.

Në rastin më poshtë 👇 konstatohet sesi një patronazhiste e PS, e kamufluar si punonjëse e KQZ, është shndërruar në terroriste elektorale, duke shpërdoruar detyrën dhe duke prishur haptazi sistemin e videomonitorimit. Në QV 2817, njësia administrative Dushk, Bashkia Lushnjë, vetëm 2 orë pasi ka filluar procesi i votimit dhe ku janë regjistruar shkelje të shumta, punonjësja e KQZ prish sistemin e videomonitorimit, duke ndryshuar dhe pozicionuar kamerën në këndin e ambienteve të jashtme të QV. Ky është një krim elektoral dhe KQZ ka detyrimin ta identifikojë punonjësen e vet dhe ta mbajë përgjegjëse penalisht për shpërdorimin e detyrës.

Ndërkohë, nga të dhënat zyrtare të marra nga vetë KQZ rezulton se në më shumë se 85% të QV të qarkut Fier, regjistrimi me sistem video ka qene jashtë funksionit, duke mos arritur të monitorohet rregullshmëria e procesit. Kjo për shkak se:

❌ Në shumë QV nuk ka regjistrime të procesit me sistem videomonitorimi, sepse kamerat nuk janë ndezur fare apo janë ndezur vetëm pak minuta, sipas sistemit të KQZ. Për këtë KQZ ka paraqitur provat nga sistemi i saj që tregojnë që kamerat nuk kanë regjistruar!

❌ Në shumë QV kamera është vendosur në pozicione të cilat nuk arrijnë të identifikojnë proceset e votimit brenda QV, por filmojnë dyshemenë apo tavanin, duke shmangur detyrimin ligjor. Për këtë KQZ shprehet se ajo i ka udhëzuar punonjësit e saj se si duhet vendosur kamera, por udhëzimet e saj nuk janë zbatuar!

❌ Në shumë QV regjistrimi është pa cilësi që të bëjnë të dallueshme procesin e votimit brenda QV me sistem videomonitorimi; për shkak se kamera është lënë e bllokuar. Për këtë KQZ shprehet se kamera mund të ketë humbur cilësinë e saj apo të jetë dëmtuar gjatë transportit!

❌ Në shumë QV regjistrimi është i pjesshëm që nuk përfshin nisjen apo përfundimin e tij (veçanërisht procesin e sigurimit të kutisë së votimit).

Qartazi kjo tregon se zgjedhjet e 11 Maj nuk përmbushën asnjë garanci për rregullshmërinë e tyre. Operatorët Teknik të KQZ kanë shpërdoruar hapur detyrën. Mirëpo, Belinda Balluku që urdhëroi që sistemi i videomonitorimit të nxirrej jashtë funksionit në pjesën dërrmuese të QV-ve në qarkun Fier, ishte edhe garancia e terroristëve elektoralë, të veshur si punonjës të KQZ-së, që të shkelnin ligjin pa pasoja. Ndërsa Task Forca kundër krimeve zgjedhore ishte e zënë duke bërë foto, që të mbanin gjallë alibinë e Edi Ramës se janë duke punuar e luftuar “fuqishëm” krimet zgjedhore! sn

Edi Rama është i pari kryeministër shqiptar i pas ‘90-ës që ka çuar marrëdhëniet shtetërore Shqipëri-Kosovë në pikën më të ulët të tyre, deri aty sa i ka bërë gjeste publike të ulëta kryeministrit të Kosovës, Albin Kurti, në sy të ish-ministrit të Millosheviçit, vëllait të tij, siç e quan ai, Aleksandër Vuçiç.

Rama është kryeministri i parë që ka futur frymë përçarëse në Kosovë, përkundër kryeministrave të mëparshëm të Shqipërisë që kanë ruajtur ekuilibrat me cilindo kah politik.

Edi Rama është pjesë e skemës për ndarjen e Kosovë, me projektin e famshëm të Soros.

Është gjithashtu kalorësi i Ballkanit të Hapur, projek totalisht serb dhe i dëmshëm për Kosovën.

Dhe ajo që është më kryesorja, kur shihni Edi Ramën që bën kinse i digjet barku për komandantët e UÇK-së, duhet kujtuar se ai personalisht bllokoi për 2 vite rresh një rezolutë të inicuar nga opozita në Parlamentin e Shqipërisë për cilësimin e masakrave serbe në Kosovë si gjenocid.

Dhe sot me reagimin e tij, pas protestës së opozitës së Kosovës dhe veteranëve të UÇK-së, përsëri Rama ka sulmuar indirekt Albin Kurtin dhe ka shtyrë përçarje. Duke bërë përgjegjës Parlamentin e Kosovës për mos reagim ndaj Gjykatës Speciale në Hagë.

A thua se Edi Rama nuk e di që Parlamenti i Kosovës është jo-funksional, gjë për të cilë me siguri është edhe i gëzuar.

Reagimi i plotë i Ramës

“Vazhdoj pyes veten pse Kuvendi i Kosovës nuk e ka ngritur ende zërin përmes një rezolute pa dallime partish, në të cilën të rreshtohen sa e sa shkeljet faktike të normës elementare demokratike të procesit të rregullt ligjor nga ana e Tribunalit të Hagës, ku të drejtat e Hashim Thaçit e shokëve të tij të izoluar nga bota prej vitesh të tëra tanimë, janë shqelmuar si hiçasgjë?!

Natyrisht që në rast se Kuvendi i Kosovës do ta bënte këtë rezolutë të vonuar, ne do ta angazhonim menjëherë Kuvendin e Shqipërisë, për ta votuar të njëjtin tekst dhe për ta përcjellë zërin e krejt shqiptarëve në çdo shtet demokratik që e sponsorizon Tribunalin, e që nuk duhet të tolerojë asnjë cënim e jo më asgjësimin e procesit të rregullt ligjor me kontributin financiar të taksapaguesve të vet.

Po, Liria ka emër dhe nuk është fajtore” sn

Ndërtimi i urës mbi lumin Buna që do të lidhte Velipojën me Ulqinin në Mal të Zi, duke shkurtuar ndjeshëm distancat, nuk është më prioritet i qeverisë.

Tre vite pas prezantimit për herë të parë të idesë, në një takim mes Kryeministrave Rama dhe Abazoviç në kuadër të ‘Ballkanit të Hapur’ në Ohër dhe pas ecejakeve dhe përpjekjeve për të nisur zbatimin e projektit, tashmë ai nuk rezulton fare në listën e projekteve me rëndësi kombëtare.

Në mbledhjen e qeverisë të fundkorrikut është bërë një ndryshim s i përket projekteve me rëndësi kombëtare me status ‘të maturuar’ dhe rezulton se projekti i urës mbi Bunë të jetë hequr.

Madje, ai nuk ishte as te projektet me status ‘pjesërisht të maturuar’ ose ‘i pamaturuar’. Në vendimin e mëparshëm të miratuar në shkurt 2025, ndërtimi i urës mbi lumin Buna ishte në listën e projekteve me status ‘të maturuar’, me një fond indikativ prej 14 milionë eurosh dhe për zbatimin ishte ngarkuar Fondi Shqiptar i Zhvillimit.

Autoritetet në të dy vendet kanë insistuar vazhdimisht se projekti do të realizohet dhe nuk do të mbetet thjesht në 3D. Por me sa duket, ndryshimi i qeverisë në Mal të Zi, me largimin e shqiptarit Abazoviç dhe ardhjen e malazezit Spajiç në tetor 2023, ndryshoi edhe drejtimin e prioriteteve.

Ura, 300 metra e gjatë do të kishte dy korsi, trotuare dhe shtigje biçikletash, dhe një lartësi prej rreth 10 metrash mbi nivelin më të lartë të ujit, duke mundësuar qarkullimin lumor. Ajo parashikohej të ndërtohej me kontributin e përbashkët financiar të dy vendeve. Në momentin e prezantimit, si edhe të nënshkrimit të marrëveshjes për ndërtimin e saj, vlera e projektit llogaritej në total 20 milionë euro.

Ura pritej të përshpejtonte ndjeshëm lidhjen mes dy pikave turistike, duke e reduktuar distancën aktuale prej 73 km në vetëm 1 km dhe duke lidhur rreth 34 km plazhe të frekuentuara nga mbi 500 mijë turistë çdo vit. Gjithashtu, autoritetet kishin në plan ishte një bashkëpunim për operim të përbashkët të lundrimit në liqen dhe zhvillimin e një projekti të përbashkët turistik në të dyja anët e Bunës. /Ekofin.al

Ne një postim në rrjetin social Facebook, kreu i Partisë Demokratike, Sali Berisha, dënon thirrjet antishqiptare të dëgjuara gjatë ndeshjes së basketbollit në Kumanovë më 2 gusht. Lideri i PD-së i cilëson akte nacionalizmi primitiv dhe të papranueshme.

Ai theksoi se këto thirrje janë një dëshmi e racizmit dhe nacionalizmit ekstremist që ka targetuar etninë shqiptare për shekuj e mijëvjeçarë në trojet e saj, si dhe një sfidë ndaj rendit kushtetues të Republikës së Maqedonisë së Veriut.

Partia Demokratike e dënoi fuqishëm këtë incident dhe vlerësoi qëndrimin e forcave politike shqiptare dhe autoriteteve shtetërore të Maqedonisë së Veriut, duke mbështetur angazhimin e tyre për të kundërshtuar çdo formë të diskriminimit.

Postimi:

Thirrjet antishqiptare në Kumanovë, një akt nacionalizmi primitiv.

Partia Demokratike dënon me forcën më të madhe thirrjet barbare primitive antishqiptare në Kumanovë si dëshmi e racizmit dhe nacionalizmit primitiv kundër etnisë shqiptare në shekuj e mijëvjeçarë në trojet e veta, por edhe kundër vetë rendit kushtetues të Republikës së Maqedonisë së Veriut.

Partia Demokratike, duke dënuar me forcën më të madhe këto akte, vlerëson dhe mbështet qëndrimin e forcave politike shqiptare dhe autoriteteve shtetërore të Maqedonisë së Veriut ndaj tyre.

Mediat pranë pushtetit kanë trilluar mesditën e sotme një lajm kisne familja Berisha po ndërton në periferi të Tiranës 140 vila. Kreu i PD ka reaguar menjëherë duke e cilësuar lajmin një gënjeshtër me stampë të shërbëtorëve mediatikë të Edi Ramës, si Bolino, Doçi, Ymer Çorapja (Mero Baze) dhe portalit JOQ, të cilin e quan, “portali i Kreshnik Ryshfetit”.

“Sipas këtyre lëpirësve të Edi Ramës, fajin e ka Saliu, dhe se Edi Rama për të pasuruar Saliun, po kafshon parqet kombëtare duke dhunuar ligje dhe Kushtetutë dhe kthyer Tiranën në kryeqytetin e mafjes së betonit në Europë.”,- shkruan Berisha.

Reagimi i plotë:

Duke u rrjeshtuar me serinë e gënjeshtrave stampë të Bolinos, Doçit dhe Ymer Çorapes, portali JOQ, që i takon të ndërrojë emrin në SHOQ ( Shpifja Osht Qejf) dhe portali i Kreshnik Ryshfetit, për llogari të Edi Ramës dhe karteleve të drogës, kanë hapur me gërma të mëdha lajmin se ‘Familja e Sali Berishës po ndërton 140 vila’.

Ky është një mashtrim publik i turpshëm pa asnjë bazë, i horrave të paguar në funksion dhe për zbatimin e porosive të Edi Ramës dhe për interesa të karteleve të drogës!

Sipas këtyre lëpirësve të Edi Ramës, fajin e ka Saliu, dhe se Edi Rama për të pasuruar Saliun, po kafshon parqet kombëtare duke dhunuar ligje dhe Kushtetutë dhe kthyer Tiranën në kryeqytetin e mafjes së betonit në Europë.

Kujtojmë gjithashtu se më herët ka reaguar edhe Jamarbër Malltezi, i cili i ka sfiduar këto media të provojnë në gjykatë trillimet e tyre, duke nënkuëtuar se do t’i padisë për shpifje. sn

Kodi i ri Penal ka ndezur sërish debatet mbi kufizimin e lirisë së shprehjes në vend, veçanërisht për ndikimin që mund të ketë tek gazetarët dhe komentuesit publikë. Një ndër zërat kritikë ndaj draftit të ri është gazetari shqiptar që jeton në Francë, Genc Burimi, i cili në një intervistë për edicionin e pasdites në SYRI TV, e cilësoi nismën si të rrezikshme dhe të papranueshme.

“Gjykoj se ky është një draft skandaloz, një provokim i rëndë, si nga pikëpamja e formës ashtu edhe e përmbajtjes”, u shpreh Burimi.

Sipas tij, ndryshe nga shumë kolegë të tjerë, problematikat më të mëdha nuk qëndrojnë vetëm në përmbajtjen e nismës, por pikërisht në mënyrën se si është ndërtuar ajo. “Më duket forma më e rëndë se përmbajtja, sepse një draft i tillë nuk është mbështetur në standardet perëndimore”, deklaroi ai.

Gazetari ngriti shqetësime të forta edhe për mënyrën se si është hartuar dokumenti, duke e cilësuar procesin si jotransparent dhe me një përfshirje të dyshimtë.

“Në rastin aktual bëhet një reformë e jashtëzakonshme e një dokumenti të jashtëzakonshëm, që për mua vjen i dyti pas Kushtetutës. Dhe mësojmë nga ekzekutivi, pra nga Ulsi Manja, në një ditë behari, se një person është caktuar, nuk e dimë nga kush, që quhet Arben Rakipi, i cili paska filluar që prej pesë vitesh, që prej COVID-it, punën për një draft të ri”, tha Burimi.

Ai e quajti skandaloze këtë procedurë dhe hodhi dyshime mbi emërimet: “Kush e ka caktuar Arben Rakipin? Ulsi Manja? Kush, Edi Rama? Sepse Ulsi Manja në atë kohë s’ka qenë vetë ministër!?”

Burimi e cilësoi gjithë procesin si një mëkat absolut që cenon themelet e lirisë në vend. Ai tha se përmbajtja e këtij drafti ka krijuar një valë unanimiteti kundërshtues edhe mes gazetarëve dhe analistëve që më herët kanë mbështetur qeverinë.

“Kam në mend gazetarë që deri dje ishin ithtarë të mëdhenj të reformës në drejtësi, janë ithtarë të mëdhenj të asaj mazhorance – është e drejta e tyre – por edhe ata këtë draft e quajnë skandaloz”, përfundoi gazetari Genc Burimi.

Burimi:

Gjykoj se ky është një draft skandaloz, një provokim i rëndë, si nga pikëpamja e formës ashtu edhe e përmbajtjes.
Ndryshe nga shumë kolegë, më duket forma më e rëndë se përmbajtja, sepse një draft i tillë duke u nisur edhe nga eksperiencat perëndimore.

Në rastin aktual bëhet një reformë e jashtëzakonshme e një dokumenti të jashtëzakonshëm, që vjen për mua i dyti në radhë pas Kushtetutës dhe mësojmë nga ekzekutivi, pra nga Ulsi Manja, në një ditë behari që një person është caktuar, nuk e dimë nga kush, që quhet Arben Rakipi, që paska filluar që prej 5 vitesh, që prej COVID pra, punën për një draft të ri.
Po kjo është skandaloze, kush e ka caktuar Arben Rakipin? Ulsi Manja? Kush, Edi Rama? Se Ulsi Manja në atë kohë s’ka qenë vetë ministër!?

Pra gjeneza është një mëkat absolut.

Sa i përket përmbajtjes, rrallë herë si gazetar më është dhënë të shoh në këtë moment, sesa një unanimitet po krijon kundër kësaj, kjo përmbajtje e këtij drafti edhe tek gazetarë, tek analistë të kampit që shpesh mbrojnë qeverinë.

Kam në mend gazetarë që deri dje ishin ithtarë të mëdhenj të reformës në drejtësi, janë ithtarë të mëdhenj të asaj mazhorance, është e drejta e tyre, dhe këtë draft e quajnë skandaloz.

Një ditë pasi kryeprokurori i Përgjithshëm, Olsian Çela, doli kundër draftit të  propozuar për ndryshimet në Kodin Penal, duke e cilësuar atë si një nismë të rrezikshme për sistemin e drejtësisë, ka reaguar sot edhe Dhoma e Avokatisë.

Në një konferencë për mediat, kryetari Maks Haxhia është shprehur se kodi i ri ka dënime më shumë se në kohën e komunizmin, që bie ndesh me parimet e avokatit.

“Drafti i Kodit Penal ka një mal me probleme. Duhet të dilte me një komunikim për të gjithë aktorët, me nevojën që çuan për përgatitjen e këtij drafti për këtë kod. Nuk kemi prezencën e nevojës pse duhet kod i ri. Nuk është si rrjedhojë e nevojës së organeve të drejtësisë.

23 herë është ndryshuar. Është inkuizitor, nuk do ta pranojë Europa. Ka dënime represive më shumë se në kohën e komunizmit. Janë vënë nene diskriminuese.

Bie ndesh me parimet e avokatit. Mjet  të fundit do të kemi kontestim në Gjykatën Kushtetuese”, -është shprehur Haxhia. sn

Artisti dhe këngëtari i njohur Sherif Merdani u nda, muaj më parë, nga jeta në moshën 81-vjeçare, si pasojë e një sëmundje të rëndë.

Por për aq sa jetoi, nuk e pati të lehtë.

Në një intervistë të dhënë një vit para vdekjes ai rrëfeu kalvarin e vuajtjeve të familjes së tij në regjimin komunist.

Ndër të tjera Merdani kujtonte si e dënuan babanë e tij me 15 vjet burg dhe i morën 4 kuintalë e gjysmë flori. Një episod shumë prekës është ai kur Merdani në moshën 10-vjeçare çonte në burg vëllanë e vogël vetëm 6 muajsh, që t’i jepte gji e ëma.

“Mua më quajnë Sherif Merdani, një ish-i burgosur politik. Si personazh jam produkt i dy njerëzve që përfaqësojnë dy kultura të ndryshme në Shqipëri. Babai ishte korçar dhe nëna shkodrane.

Këtë personazh (Enver Hoxhën) familjet Merdani nuk e pranonin të futej në shtëpi. Them se kjo u bë shkak që Qemal Merdanin, babën tim e dënuan 15 vjet.

Ndërkohë që ai bënte gjyqin, fare afër këtu është një fushë, luaja futboll me shokët e mi.

Isha 7-8 vjet, nuk e kuptoja fare se çfarë po ndodhte në jetën tone, familjen tonë. Babën e dënuan dhe i morën 4 kuintalë e gjysmë flori.

Ne na kishte lënë baba një lopë të madhe që e kishte marrë në Shkodër. E shitëm lopën dhe e paguam. Pas një muaji na erdhi përsëri taksa.

Atëherë morën edhe nënën në burg. Këtu kemi një dramë që nuk e besoj ta keni dëgjuar. Vëllai i vogël ishte 6-7 muajsh dhe unë Sherifi 10 vjeç, e merrja të mbështjellë e çoja në burgun e Korçës, i jepte gji nëna në mes të dimrit -10 gradë, dhe e ktheja përsëri në shtëpi”, tregon ai në këtë intervistë biografike të titruar anglisht.

Arkitektura pa rregulla: Tirana si Laboratori i Autokracisë Estetike të Edi Ramës

Tirana nuk po ndërtohet më — ajo po shpiket, model pas modeli, kullë pas kulle, në funksion të një vizioni personal që ngjan më shumë me një instalacion arti sesa me një projekt urban demokratik, shkruan Lucia Tozzi studiuese e politikave urbane dhe gazetare e lirë.

Syri.net ka sjellë të plotë analizën e saj, e cila është një skaner i detajshëm i përçundimit arkitekturor të një qyteti, madje edhe të një vendi të tërë nga një njeri i vetëm.

LEXO ANALIZËN E PLOTË: Luigji XVI i Mel Brooks dhe Tirana e Edi Ramës: Një paralelizëm përçmues i pushtetit dhe urbanizmit

Në krye të këtij transformimi qëndron Edi Rama, artisti i kthyer në autokrat estetik, i cili ka kthyer qytetin në një eksperiment vizual ku ligjet e urbanistikës, konsultimi qytetar dhe trashëgimia urbane zëvendësohen nga ndjesitë plastike të një njeriu të vetëm, thotë autorja.

Me “Ushtrinë e tij të Arkitektëve” dhe retorikën e artit progresiv, Rama ngre një realitet të ri vertikal, ku Tirana merr pamjen e një Dubai europian, por me shpirtin e një republike të sunduar nga imazhi.

Ndërkohë që publikut i shiten rrokaqiej si zhvillim dhe modernitet, në sfond humbet demokracia urbane dhe identiteti i qytetit. A është kjo një vepër arti apo një projekt i pushtetit me ngjyrime autokratike?

Në fund të fundit, më shumë se një njeri i teatrit, Rama është një artist dhe preferon t’i shprehë ndjenjat në mënyrë plastike. Tirana (dhe gjithë Shqipëria) është kanavaca e tij, dhe aty, në transformimin e saj të dhunshëm, mund të lexohen manitë e tij të madhështisë. “Shqipëria prodhon më shumë arkitekturë se gjithë pjesa tjetër e Evropës” ka deklaruar me krenari në hapjen e Festivalit të tij, në qendër të një salle të mbuluar me qilima, i rrethuar nga skuadra e tij e arkitektëve.

Në pak më shumë se dy dekada ai ka arritur të pastrojë një sasi të tillë rregullash urbanistike saqë ka vënë në zbatim të paktën 139 kulla të larta mesatarisht 26 kate (disa deri në 100) vetëm në Tiranë – një qytet me 536 mijë banorë, më pak i populluar se Gjenova.

“Është një gjeni, ka arritur ta shndërrojë Tiranën në një Dubai evropian” më thotë me entuziazëm pronari im i shtëpisë, krenar për pamjen nga horizonti i ri i kullave të Tiranës. Por Edi Rama është i vetëdijshëm se konsensusi i brendshëm i fituar falë ndërtesave luksoze tingëllon keq, shumë keq në ambientet e “coolness” ndërkombëtare. Dubai nuk është demokratik dhe nuk është i gjelbër, është i papranueshëm si model progresi për një vend që po hyn në Evropë në “grupin e të mirëve”. Dhe atëherë ai ka thirrur “Ushtrinë e tij të Arkitektëve” [sic] për të diktuar gjuhën e re.

Alejandro Aravena, i njohur për tërheqjen e tij seksuale jo më pak se për projektet e tij të strehimit social në Kili – dhe, jo më pak, për fitimin e çmimit Pritzker, çmimit ndërkombëtar më të lakmuar nga arkitektët – lavdëron “dijen e rrugës” shqiptare, aftësinë për të ndërtuar nga poshtë, për të prodhuar qytete informale si në të gjitha vendet jo-perëndimore, “jashtë qendrës së perandorisë”. Ndërsa propozon përmbysjen e paradigmës formaliste dhe rregullatore të urbanizimit evropian, Aravena është në prag të ndërtimit të rrokaqiellit të tij të parë në qendër të qytetit, Tirana Society Towers, një gjë modeste prej 100 katesh.

Këto ryshfete dyshohet se i transferoheshin familjes së kryebashkiakut kryesisht nëpërmjet një rrjeti OJF-sh dhe kompanish të kontrolluara nga bashkëshortja e tij, Ajola Xoxa dhe familjarët e saj, nëpërmjet faturave fitktive.

Lekët e Bashkisë që Veliaj ia dha Ajolës

SPAK ka zbardhur dhe transaksionet e kompanive të Elman Abulesë dhe bashkëshortes së tij Marisa Nito për OJF e drejtuara nga Xoxa.

“Pra, vlera e përgjithshme e përfitimeve të parregullta të cilat janë realizuar në mënyrë fiktive përmes faturimit ose dhënies së shërbimeve kryesisht në formën e financimeve dhe sponsorizimeve nga subjekte të lidhura, në një mënyrë apo tjetër, me Bashkinë e Tiranës dhe me interesat private të shtetasve Erion Veliaj dhe Ajola Xoxa, kap shifrën totale prej 115,759,688 lekësh” shkruan SPAK.

Lexo dhe: Me manipulimin e Planit Urban të Tiranës Veliaj rriti vlerën e pronës së Ajolës me 37 mln lekë. Në prokurori e quajtën ‘lapsus’

Të gjithë punonjëset e zyrës së Ajola Xoxes kanë tradhtuar këtë të fundit, kur janë marrë në pyetje në Prokurorinë e Posaçme, duke treguar se veprimet që kanë kryer përmes faturave, kanë qenë të shtyra dhe ndikuara nga Ajola Xoxa.

Thëniet e punonjëseve që dikur shërbenin pranë zyrave të Ajola Xoxës, si Ines Dani, Adela Kondakçiu dhe Greta Domi, kanë kryqëzuar gruan e kryebashkiakut të Tiranës, Erion Veliaj, duke e nxjerrë atë në një rrjet OJF-të, që kishin si synim kapjen e projekteve përmes fondeve publike.

Ajola Xoxa, përmes lidhjeve të saj me kryebashkiakun e Fierit Armando Subashi, arrin të fitojë një tender në bashkinë e Fierit me vlerë prej 24 mijë e 650 euro.

Kjo sasi parash do jepej nga programi “IPA”, i bashkimit Ndërkufitar Itali-Shqipëri, Mali i Zi 2014-2020.

Projekti u fitua me letrat e Ines Danit, e cila ishte një punonjëse e zyrës së Ajola Xoxës dhe kishte hapur nipt si “Person Fizik”.

Dokumenti është firmosur edhe nga shtetasi Armando Subashi, në cilësinë e Kryetarit të Bashkisë Fier, i cili ka miratuar edhe procedurën.

Më datë 12 dhjetor 2019, është lidhur kontrata midis Bashkisë Fier, të përfaqësuar nga Armando Subashi, në cilësinë e kryetarit të Autoritetit Kontraktor, dhe “Ines Dani” si Person Fizik.

Në datën 2 qershor 2021, grupi i punës ka bërë relacion me titull: “Mbi dorëzimin e punës së ekspertizës së jashtme për propozimin ligji për projektin 3C4SME”.

Gjithashtu nga grupi i punës pasqyrohen dhe dorëzimi i punës së kryer në bazë të termave të referencës ku përcaktohen detyrat e përmbushura nga kontraktori Ines Dani dhe stafit të Bashkisë Fier.

Nga komunikimet e administruara ndërmjet Ines Dani dhe financieres Adela Kondakçiu, si dhe nga mesazhet me Ajola Xoxën, e cila kontrollonte faktikisht aktivitetin e Ines Dani si Person Fizik dhe Greta Domi si Person Fizik, rezulton se vetë Ines Dani nuk kishte asnjë dijeni mbi përmbajtjen e kontratës, aktivitetet e projektit apo faturat përkatëse.

Përkundrazi, ajo e konsideronte veten të painformuar dhe deklaronte se “…vetëm emrin ka aty…”, duke i lënë të gjitha vendimmarrjet për menaxhimin e shumave dhe përgatitjen e dokumentacionit, gruas së Erjon Veliaj, Ajola Xoxa.

Ines Dani, ka deklaruar se kontratën e kishte firmosur “…shpejt e shpejt…”, gjatë kohës që ishte me leje lindje dhe nuk mbante mënd detaje. Ajo ka sqaruar se nuk ka marrë pjesë në asnjë takim për projektin, nuk ka përgatitur asnjë raport dhe nuk ka ndjekur zbatimin e kontratës.

Nga ana tjetër, Greta Domi, e cila është e regjistruar si person fizik me të njëjtin objekt veprimtarie si Ines Dani, ka deklaruar se ka kryer fatura për llogari të “Partners Laë” (firma e Ajola Xoxës) dhe është udhëzuar prej saj për çdo veprim financiar.

Ajo ka pranuar se marrëdhënia me Ajola Xoxën ishte e ngushtë dhe se për shumë transaksione nuk kishte dijeni për burimin ose destinacionin final të shumave.

Greta Domi, ka shtuar se ajo vetëm faturonte dhe firmoste sipas kërkesës së Ajola Xoxës, pa ushtruar ndonjë rol real në aktivitetin për të cilin përfitoheshin fondet.

Kryetari i Bashkisë, Armando Subashi, ka deklaruar se nuk ka pasur dijeni për ecurinë e detajuar të projektit pas nënshkrimit të kontratës dhe se procedurat e tenderit dhe përzgjedhjes i janë deleguar plotësisht grupit të ngritur me urdhrin përkatës.

Ai ka thënë se nënshkrimi i kontratës me Ines Danin është bërë bazuar në rekomandimin e Komisionit të Vlerësimit të Ofertave dhe në dokumentacionin që i është paraqitur zyrtarisht.

Ndërkohë dy punonjëset e bashkisë Fier, Erinda Jovani dhe Sibora Kadriu, gjatë marrjes në pyetje në SPAK, kanë deklaruar se nuk kanë qenë të përfshira aktivisht në procedurat e shpalljes së thirrjes apo vlerësimit të ofertave, pasi dokumentet i kanë gjetur të përgatitura dhe të paraqitura në zyrë pa kaluar nga protokolli i bashkisë.

Ato kanë deklaruar se nuk kanë dijeni për mënyrën e përzgjedhjes së fituesit dhe nuk kanë pasur kontakte me subjektet konkurruese.

Shtetasja Romina Tafaj, e thirrur për të dhënë shpjegime në kuadër të procedimit penal nr. 27 të vitit 2024, deklaroi ndër të tjera se se është themeluese dhe drejtuese ekzekutive e një organizate jofitimprurëse të quajtur “Gjenerata e Re”, e krijuar në vitin 2015, e cila angazhohet në organizimin e aktiviteteve kulturore, sportive, sociale dhe të tjera me natyrë komunitare. /Nga Elton Qyno – Ora news/

Ish-kryetari i Bashkisë Shkodër, tani deputeti i zgjedhur, Bardh Spahia ka reaguar pas vendimit të kryebashkiakut Benet Beci, për të shkarkuar aktorin dhe gazetarin Simon Shkreli.

‘Shkarkimi i Simon Shkrelit, aktor, gazetar dhe kryefamiljar model si dhe bashkëshort i gazetares Eliona Shkreli kryetare e PD Shkodër, nuk është gjë tjetër veçse një hakmarrje politike primitive ndaj njerëzve të lirë e paralajmëruar që në fushatën elektorale nga vetë ai që, pasi vodhi zgjedhjet, ka nisur tashmë edhe hakmarrjen personale’, shkruan Spahia në Facebook.

Postimi i plotë:

Në një kohë kur nuk jep asnjë shpjegim për akuzat për korrupsion dhe hetimet që po zhvillohen ndaj tij në SPAK, Benet Beci, me “dy klasë shkollë”, vijon hakmarrjen dhe përçmimin ndaj çdo shkodrani dhe nuk kursen as tempullin e artit, teatrin “Migjeni”.

Pasi i hoqi çdo kompetencë institucionale këtij institucioni, mbasi nxori urdhërin për shkrirjen e Teatrit Migjeni dhe më pas u detyrua ta tërheqë, sot ka nisur shkarkimet ndaj aktorëve, ashtu siç e ka mësuar padroni i tij politik.

Shkarkimi i Simon Shkrelit, aktor, gazetar dhe kryefamiljar model si dhe bashkëshort i gazetares Eliona Shkreli kryetare e PD Shkodër, nuk është gjë tjetër veçse një hakmarrje politike primitive ndaj njerëzve të lirë e paralajmëruar që në fushatën elektorale nga vetë ai që, pasi vodhi zgjedhjet, ka nisur tashmë edhe hakmarrjen personale.

Me një administratë të importuar, çdo ditë po dëshmon se është kundër Shkodrës dhe shkodranëve. Por këtë askush nuk do t’ia falë, as atij e as narko-pushtetit që ka kapur peng vendin.

Në një vend ku zjarret kanë shkatërruar qindra mijëra hektarë tokë në dekadën e fundit, premtimet politike për përforcimin e flotës ajrore me avionë zjarrfikës nuk janë çështje retorike, por çështje jetike.

Megjithatë premtimi i bërë nga kryeministri Edi Rama gjatë fushatës elektorale të vitit 2025, se Shqipëria do të kishte dy avionë zjarrfikës të gatshëm për sezonin veror, rezulton i pambajtur.

“Flota jonë ajrore do të ketë në dispozicion duke filluar nga kjo verë, janë bërë marrëveshjet, dy avionë zjarrfikës në gatishmëri për ne pa pritur që të vijnë nga një vend apo nga një vend tjetër” , tha kryeministri gjatë fushatës elektorale në 29 Mars 2025.

Vera erdhi, zjarret nisën, por Shqipëria ende nuk ka asnjë avion zjarrfikës.

Një kërkesë për informacion që Faktoje i drejtoi Ministrisë së Mbrojtjes konfirmon zyrtarisht se, ndryshe nga sa u premtua, Forcat e Armatosura të Republikës së Shqipërisë nuk disponojnë asnjë avion zjarrfikës. Në përgjigjen e kthyer zyrtarisht, ministria njofton thjesht:

“Ju informojmë se Forcat e Armatosura të Republikës së Shqipërisë (FARSH) aktualisht nuk disponojnë avionë zjarrfikës.”

E në fakt për zjarret aktive në vend avionët zjarrfikës erdhën nga vendet e Bashkimit Europian në kuadër të programit EU Solidarity.

Gjatë ditëve të fundit flakët kanë përfshirë zona të ndryshme të Shqipërisë si Delvina, Bulqiza, Borshi, Lukova, Kanina, Berati dhe Pusteci. Agjencia Kombëtare e Mbrojtjes civile njoftoi më 28 Korrik se “gjatë 24 orëve të fundit janë evidentuar 34 vatra zjarri nga të cilat 17 janë ende aktive, 6 janë nën monitorim dhe 11 janë shuar”.

Mungesa e avionëve zjarrfikës është denoncuar edhe nga kreu i institutit për Bashkitë e Shqipërisë, Agron Haxhimali, sipas të cilit Shqipëria është i vetmi vend në rajon që nuk disponon asnjë avion apo helikopter të dedikuar për shuarjen e zjarreve nga ajri.

Premtimi i ricikluar për avionë zjarrfikës

Premtimi për avionë zjarrfikës nuk është i ri për qeverinë socialiste. Ai është një riciklim i deklaratave të mëparshme.

Në janar të vitit 2023, ministri i atëhershëm i Mbrojtjes, Niko Peleshi, njoftoi publikisht se Shqipëria po përgatiste dokumentacionin për blerjen e dy avionëve shumëfunksionalë, të përshtatshëm për ndërhyrje në raste zjarresh dhe për mbështetje agrokulturore.

“Janë disa mjete më modeste në kosto, më të manovrueshme dhe më të përshtatshme për situatat tona të zjarreve,” u shpreh ministri Peleshi asokohe.

Pyetjet që ngrihen nga kjo mospërputhje mes deklaratave politike dhe realitetit janë disa. Sa ka kushtuar dështimi për të pajisur vendin me avionë zjarrfikës në kohë? Sa sipërfaqe mund të ishte shpëtuar? Sa jetë njerëzish dhe burimesh janë vënë në rrezik për shkak të mungesës së logjistikës ajrore?

Në mungesë të transparencës, publiku nuk ka mundësi të gjykojë nëse vonesat janë për arsye financiare, burokratike apo thjesht për mungesë vullneti politik. Asnjë informacion për tendera, kontrata apo faza të prokurimit nuk është bërë publik deri më sot.

Nisur nga të dhënat, premtimi i bërë gjatë fushatës zgjedhore për vendosjen e dy avionëve zjarrfikës në dispozicion të flotës ajrore shqiptare konsiderohet i pambajtur. Faktoje.al

Në Njësinë Administrative Vergo në fshatin Kalasë, Bashkia Delvinë, zjarri që dyshohet se ka ardhur nga Sasaj, ka përparuar me shpejtësi nga mali drejt fshatit Kalasë, ku rrezikohen edhe banesat.

Sipas burimeve për SYRI-n, një lagje e fshatit, në rreth 20 shtëpi, banorët janë larguar nga banesat. Ka shkuar në ndihmë edhe helikopteri.

Situata e rënduar vijon të jetë edhe në dy vatrat në atë të Kokotrafit dhe në atë të Plakotisë në Markat. Shuarja e zjarrit nga banorët, efektivë të sherbimit zjarrfikës bëhet me pompa uji në krah sn

Një ngjarje e rëndë ka tronditur sot opinionin publik, ku një kamerier i ri është dhunuar nga ish-shefi i qarkullimit Vlorë, ndërsa punonte në një lokal.

Pas ngjarjes, ka ardhur reagimi prekës i mësueses kujdestare të të riut, i cili siç edhe deklaroi vetë në një reagim të mëparshëm ku tregonte rrethant e ngjarjes, sapo kishte mbushur 18 vjeç.

Vali Veshaj, mësuese e të riut, shprehet se 18-vjeçari ishte nxënës i shkëlqyer dhe se punonte për të siguruar shpenzimet e maturës.

“Djali është nxënësi që sapo ka mbaruar klasën e njëmbëdhjetë dhe është me dhjeta. Është me një sjellje model dhe ka pjekurinë dhe kulturën që i mungon personit përballë. Është djalë i mrekullueshëm dhe po punon për shpenzimet e maturës. Unë që po ju shkruaj jam mësuesja kujdestare e tij.”

Ajo bën një apel të drejtpërdrejtë ndaj institucioneve shtetërore, duke theksuar se dhuna ndaj një të riu që përpiqet ndershmërisht të ndërtojë të ardhmen është e papranueshme.

“Shteti të marrë masa se kjo është rinia e cila nuk e gjen veten askund,” përfundon mësuesja Veshaj.

Ngjarja ka ndezur reagime të shumta në rrjetet sociale, ndërsa kërkohet drejtësi për të riun dhe ndëshkim për autorët e dhunës.

Mbi rastin ka reaguar dhe kryeministri Edi Rama, i cili ka kërkuar që autori të dalë përpara drejtësisë. sn

Një ngjarje e rëndë është regjistruar në një hotel në zonën e Skelës, në Vlorë, ku një kamarier 18-vjeçar, Erold Balaj, është dhunuar fizikisht nga një efektiv policie jashtë shërbimit dhe një tjetër person me të kaluar kriminale.

I riu ka treguar për SYRI TV momentet e dhunës, që nisën pas një incidenti banal me një porosi uji.

“Quhem Erold Balaj, jam 18 vjeç. Para gjysmë ore – 1 orë, erdhën dy zotëri, u ulëm në tavolinë. E mori porosinë dikush tjetër dhe mua më thanë thjesht coje në tavolinë. Porosia ishte një shishe ujë e madhe, një bidon ujë i vogël, një makiato. Ja çova në tavolinë. I çoj ujin dhe më tha ‘O vëlla vetëm një ujë sill, se është ai tjetri rrot kri që sjell këtë ujin.’ I thashë ‘O vëlla ta heq unë ujin’. Ai filloi të thoshte rrot kri 3-4 herë.

Shau edhe fjalë të tjera, por s’po i them. Ja hoqa ujin nga tavolina, i thashë ‘Nuk ka nevojë të shash, sepse edhe ai tjetri pa dashje ta ka bërë, se nuk do të ta fusi ty.’ Ja mora ujin e hoqa nga tavolina. Vijnë të dy burrat nga 40 vjeç e sipër, më ndjekin mua në banak. Më kap me dorë dhe më thotë ‘Pse flet me pordhë?’, i them ‘O vëlla të lutem mos më kap me dorë’. Menaxheri im ishte aty. Vjen ai tjetri, më qëllon 3 herë me shuplakë dhe një herë me grusht vetëm se i çova një bidon ujë më tepër. Nuk di çfarë të them. Vetëm për një bidon ujë më qëlloi 3 herë. Edhe syzet m’i hodhi në shesh, mirë që nuk mu thyen. Edhe në qafë më qëlloi.” – u shpreh Balaj.

Mbi 20 vatra zjarri janë shfaqur pasditen e sotme në Bulqizë dhe në Klos të Matit ku siç shihet dhe nga pamjet zjarret e ndihmuar nga era e fortë dhe temperaturat e larta po djegin me qindra hektar pyje me pisha dhe kullota, por jo vetëm.

Zjarret janë ofruar deri tek bizneset duke i rrezikuar ato. Zjarret kanë sjellë probleme serioze edhe për kalimin e automjeteve se dhe tymi ka mbuluar të gjithë zonën e Bulqizës.

Për shuarje e zjarrit janë angazhuar dhjetëra zjarrfikësish, por e kanë të pamundur ndërhyrjen, pasi zjarret kanë marrë përmasa të mëdha, ndërkohë në ndihmë për fikjen e zjarrit janë edhe dy helikopterë. sn

SPAK godet një grup kriminal të trafikut të kokainës nga Amerika Latine drejt vendeve të Bashkimit Europian. 6 nga 7 pjesëtarët e grupit përfunduan në pranga në kuadër të një aksioni të organizuar gjatë të premtes, ndërsa i fundit rezulton të jetë jashtë vendit.

Vëllezërit Artur dhe Klevis Hoxhosman, Ermir Ndreaj pronar i disa kompanive, si dhe Ilir Lloshi u arrestuan përkatësisht në Palasë dhe Elbasan.

Plarent Dervishajt dhe Erion Alibejt, iu komunikuan akuzat në ambientet e paraburgimit, ku mbahen për vepra të tjera të rënda penale, si vrasje dhe atentate mafioze.

Goditja e grupit erdhi pas zbërthimit të qindra komunikimeve në Sky ECC por dhe dëshmisë e të penduarit Erion Alibej, i njohur me nofkën “Krymi”.

Gjatë aksionit, ku u ushtruan kontrolle në Palasë në vila luksoze si dhe në Tiranë u sekuestruan bizhuteri të shtrenjta, orë dhe makina luksoze.

Ndaj të dyshuarve rëndojnë akuzat për “Trafik narkotikësh, grup kriminal, kryerja e veprave nga grupi strukturuar dhe armëmbajtje.

Erion Alibej u përball me debate të forta në një seance Gjykatën e Posaçme me Plarent Dervishajn, ku ky i fundit po gjykohet për atentatin ndaj ish-prokurorit të Durrësit Arjan Ndoj, me 1 nëntor 2019 me një të vrarë e dy të plagosur.

Alibej njihet si kundërshtar i përbetuar i vëllzërve Franc e Hajdar Çopja, të cilët kanë drejtuar një nga organizatat me të rrezikshme kriminale.

Fatos Lubonja në edicionin e 15-të të Green Sofa theksoi se pa një përballje të ndershme me të kaluarën, demokracia shqiptare mbetet e brishtë dhe e rrezikuar nga përsëritja e traumave. Ai kritikoi heshtjen institucionale dhe mungesën e dialogut për Spaçin, duke kërkuar një shoqëri komunikimi që shëron përmes ballafaqimit.

Në edicionin e 15-të të Green Sofa, u soll në qendër të debatit një prej çështjeve më të ndjeshme të kujtesës, Spaçi. Nën temën “Si të përballemi me Spaçin?”, diskutimi u shndërrua në një reflektim mbi historinë, kujtesën dhe mënyrën si shoqëria shqiptare e trajton trashëgiminë e saj të errët. Zëri më i mprehtë dhe më i ndjeshëm kritik ishte ai i Fatos Lubonjës, një nga figurat më të rëndësishme të mendimit dhe një ish-i burgosur politik, i cili e trajtoi çështjen e Spaçit jo vetëm si një objekt fizik të kujtesës, por si simptomë e një dështimi më të gjerë shoqëror për t’u përballur me të kaluarën.

“Ne diktaturën duhet ta njohim mirë në mënyrë që të ndërtojmë mirë demokracinë. Kjo është gjëja kryesore e përballjes që të mos përsërisim historinë.”

Ky pohim i Lubonjës sintetizon nevojën urgjente për një transparencë të thelluar mbi të kaluarën, si parakusht për një të ardhme demokratike reale. Ai theksoi se mënyra si është trajtuar çështja e Spaçit dhe e gjithë trashëgimia e diktaturës në Shqipëri, shpesh e mbyllur brenda heshtjes apo formalitetit institucional, nuk ka ndihmuar në shërimin e traumave, përkundrazi, i ka zgjatur ato.

“Ajo që pamë aty me Spaçin për mua janë në thelbin e vet tregues të një shoqërie të dominimit ku narrativa bllokohet nga ai që merr pushtetin dhe heshtet për gjithë këto gjëra.”

Në analizën e tij, Lubonja ngre alarmin se edhe sot shoqëria shqiptare funksionon ende në trajta të autoritarizmit të heshtur, ku narrativa zyrtare mbizotëron dhe zërat alternativë përjashtohen. Ai e shikon mungesën e debatit për Spaçin si një simptomë të mungesës së një shoqërie komunikimi, ku aktorët të mund të ballafaqohen me të shkuarën.

“Kapërcimi i traumës do të ishte pikërisht nëpërmjet ballafaqimit të të gjithë aktorëve që kanë prodhuar atë.”

Debati, sipas tij, duhet të ndodhë edhe brenda vetë të burgosurve të dikurshëm, në mënyrë që trashëgimia e dhimbjes të mos mbetet e ngrirë në kohë, por të shndërrohet në një instrument edukimi dhe vetëdijësimi.

“Sot ne vazhdojmë të kemi një parti shtet si në kohën e Enver Hoxhës. Edhe ajo duhet të jetë pjesë e një shoqërie të komunikimit ku vendoset.”

Duke zgjeruar kritikën përtej Spaçit, Lubonja e lidh mënyrën si Shqipëria i trajton simbolet e së kaluarës (si Piramida apo shtëpia e Enver Hoxhës) me një kulturë të vazhdueshme të harresës. Për të, mungesa e një debati të thelluar mbi këto simbole përforcon traumat, i bën ato të pashërueshme dhe e pengon shoqërinë shqiptare të ecë përpara.

“Piramida e shumë të tjera dhe shtëpia e Enver Hoxhës janë një lloj harrese e të kaluarës. Është mungesa e debatit mbi të kaluarën. Është përsëritje e traumës mënyra si trajtohen.”

Ndërhyrja e Fatos Lubonjës ishte një kritikë e fortë ndaj heshtjes dhe hipokrizisë shoqërore në raport me trashëgiminë totalitare. Ai ftoi për një proces të sinqertë përballjeje, një komunikim të thelluar mes të mbijetuarve, institucioneve dhe brezit të ri, që historia të mos ripërsëritet, por të kuptohet.

Një zjarr i përmasave të mëdha ka përfshirë pasditen e sotme fshatin Senicë në jug të vendit, duke shkaktuar dëme të konsiderueshme materiale.

Sipas informacioneve nga vendngjarja, flakët kanë djegur disa banesa, ndërsa është shkrumbuar plotësisht edhe Kisha e Shën Dhimitrit, një ndër objektet e kultit më të njohura të zonës.

Fatmirësisht, deri më tani nuk raportohet për banorë të lënduar, ndërsa autoritetet vendore dhe forcat zjarrfikëse ndodhen në terren për të frenuar përhapjen e flakëve. Në operacionin e shuarjes janë angazhuar edhe dy helikopterë të cilët po asistojnë nga ajri, për shkak të terrenit të vështirë dhe përmasave të zjarrit. sn