Profesori Lush Susaj, në protestën e 80-të para kryeministrisë, tha se qytetarët duhet të reagojnë ndaj asaj që e konsideron padrejtësi, ndërsa e cilësoi protestën si një “shkollë politike” dhe si një betejë për rikthimin e pluralizmit.

Ai gjithashtu, kërkoi ndihmoi nga ambasadori që do vijë në Shqipëri.

Aktivisti dhe eksperti i IT-së, Gent Progni iu bëri thirrje qytetarëve që të dalin të gjithë në shesh për të kërkuar largimin e Edi Ramës.

Në mesazhin e tij, aktivisti theksoi se emancipimi i një shoqërie tregohet atëherë kur qytetarët nuk kanë më frikë dhe kanë kurajon që të mos ulin kokën përballë padrejtësive që iu janë bërë ndër vite nga pushteti.

Progni theksoi gjithashtu se ndryshimi i pushtetit nis nga qytetarët, kur ata thyejnë heshtjen dhe frikën për të kërkuar llogari nga tyre.

“Emancipimi i një shoqërie nuk matet me kullat që ndërton, kullat që lyen apo propagandën që prodhon. Matet sesa qytetarë kanë kurajon të mos ulin kokën përballë padrejtësisë. Për shumë vite na kanë mësuar të përsërisim të njëjtat fjali, çfarë do të ndryshojë, të gjithë janë njësoj, shiko punën tënde.

Dhe këtu fillon problemi. Sepse një shoqëri nuk mbahet peng nga ata që abuzojnë me pushtetin, mbahet peng edhe nga momenti kur njerëzit e mirë binden se nuk ia vlen të reagojnë, ndaj kjo protestë duhet të jetë më shumë sesa zemërim, por rizgjim kombëtar, Shqipëria po shitet. Të kërkosh institucione që të shërbejnë, drejtësi që të mos vonojë, shëndetësi ku nuk duhet të njihësh dikë, polici që të mbrojë, arsim ku fiton ai që meriton, një shtet ku ligji nuk ndryshon sipas emrit që ke. Këto nuk janë kërkesa luksi, por minimumi i një repblike normale.

Mos prisni gjithmonë që dikush tjetër të dalë përpara. Një demokraci e shëndetshme nuk ka nevojë për heronj, por ka nevojë për qytetarë që kërkojnë llogari, që nuk shitet, që nuk tremben nga pushteti. Sot thirrja ime është për atë që në dëgjon e shikon, ti je ndryshimi. Një protestë e madhe bëhet kur secili prej nesh vendos, sot do të jem edhe unë aty.

Ejani jo për mua. Ejani për veten tuaj, familjet, fëmijët tuaj, e dinjitetin tuaj. Shqipëria nuk ka nevojë vetëm për ndryshim pushteti, por ndryshim të standardit që ne qytetarët pranojmë nga pushteti. Ai ndryshim fillon nga ne, kur nuk heshtim, kur nuk kemi frikë të kërkojmë llogari. Fillon me secilin prej nesh.”, tha ai. Panorama

Gazetarja Klodiana Lala ka analizuar ecurinë e disa dosjeve më të rëndësishme që po hetohen nga SPAK, duke nisur hetimet ndaj ish-zëvendëskryeministres dhe ish ministres Belinda Balluku, afera e AKSHI-t, dhe dosja Aruba.

Gazetarja tha se pozita e Ballukut është rënduar për shkak se tashmë është marrë e pandehur për të gjitha lotet e tjera të Unazës së madhe, krahas Tunelit të Llogarasë, ndërsa po dyshohet gjithashtu për korrupsion e pastrim parash.

Në kuadër të hetimeve, janë ushtruar kontrolle në disa vila në jug të vendit si dhe te kompania “Atelier 4”, e cila dyshohet se ka dizenjuar këto vila që mund të jenë pasuri të fshehura të saj.

Po ashtu, ajo bëri me dije se gjykata ka autorizuar kontrolle edhe në 53 telefona të tjerë, krahas të tjerëve që u kontrolluan më herët.

“Është rënduar ndjeshëm pozita e saj në raport me ligjin për shkak se nuk është më e pandehur vetëm për tunelin e Llogarasë, por janë ngritur akuza edhe për lotet e tjera të Unazës së Madhe. Ka pasur kontrolle, disa vila në jug të vendit, kompania që dyshohet se ka bërë dizajnin e brendshëm të këtyre vilave, që sipas prokurorëve ka dyshime se janë pasuri të fshehura të Ballukut. Nëse provohet dhe nëse shkohet drejt një sekuestrimi të mundshëm, kjo e rëndon ndjeshëm pozitën e saj. Po hetohet edhe për korrupsion dhe pastrim parash. Kontrollet e reja janë bërë edhe në një arkitekt në Vlorë dhe që duhet parë se çfarë janë të dhënat e reja. Janë  marrë  celularë, janë marrë dëshmitarë. Janë edhe 53 celularë që po kqyren aktualisht nga 80 e ca. Gjykata ka miratuar edhe pjesën tjetër të celularëve për kontroll.”, tha ajo.

Sa i përket dosjes Aruba ajo bëri me dije se priten zhvillime të tjera.

“Mendoj se dhe dosja Aruba do të ketë zhvillime se janë bërë vetëm goditjet e para. Bëhet fjalë për një sërë takimesh jo vetëm në Aruba, por edhe në Majorca e vende të tjera.”, shtoi gazetarja.

Ndërkohë sa i përket hetimeve për organizatën e Shpëtim Aliut, gazetarja tha se po verifikohet roli i një ish ministreje të PS-së në lidhje me disa transferta jashtë vendit.

“Në organizatën e Shpëtim Aliut, edhe aty po vijojnë hetimet për pastrim parash. Në radhët e zyrtarëve të lartë është një ish ministre e PS që po shikohet roli i saj për disa transferta jashtë vendit. Por për sa kohë nuk ka rezultat konkret ende nuk mund të flas me emër.”, shtoi Lala. Panorama

Protesta qytetare kundër qeverisë dhe kryeministrit Edi Rama vijon prej 79 ditësh, ndërsa pjesëmarrësit thonë se lëvizja po merr gjithnjë e më shumë mbështetje, veçanërisht nga të rinjtë.

I ftuar në News24, Ilir Xhemalaj foli për arsyet që kanë mbajtur të bashkuar protestuesit dhe për atë që e konsideron si rezultatet e deritanishme të kësaj lëvizjeje.

Sipas Xhemalajt, protestuesit i bashkon fillimisht “atdhedashuria” dhe më pas kërkesa për ndryshim politik.

“Na bashkon qëllimi i përbashkët, e para atdhedashuria qe kemi për vendin dhe e dyta është rrëzimi i qeverisë aktuale dhe e gjithë sistemit që ka mbajtur të bllokuar energjinë e të rinjve. Kjo energji është derdhur në shesh dhe populli më në fund kërkon ndryshim.  Ajo që i bashkon njerëzit janë hallet dhe problematikat, që i  kanë të njëjtat. Ne aty e konsiderojmë vetën një familje të madhe, sheshi na ka bërë bashkë dhe ta çojmë përpara këtë protestë. Ne luftën e kemi vetëm me qeverinë dhe sistemin”, tha Ilir Xhemalaj.

Xhemalaj tha se kjo protesta ka shumë arritje, por renditi tre më madhoret:

“E para, 79 ditë protestë, ka parë ndonjëherë Shqipëria kaq ditë protesta? Jo. Jemi në një moment që duhet të bëjmë ndryshimin. Nuk ka parë ndonjëherë Shqipëria këto protesta

E dyta, është ardhja e të rinjve në shesh. Të rinjtë rrinin në kafe ose largoheshin, ndërsa sot janë në shesh dhe po luftojnë dhëmbë për dhëmbë me këtë sistem, sepse duan që të rrinë në këtë vend

E treta, më në fund bota e pa mbretin lakuriq, pa realitetin kush është Kryeministri i Shqipërisë. E panë që ishte një kryeministër i kohëve të shkuara. Është një kryeministër që nuk ka më vend në Shqipëri. Sot kemi nevojë për djem e vajza të rinj që ti japin Shqipërisë atë që duan. Unë kam 36 që pres që Shqipëria të bëhet Evropë. Këta duhet të japin dorëheqjen dhe ti lënë rrugën rinisë”, deklaroi Xhemalaj.

Kryeministri Edi Rama në periudhën që ishte në opozitë denonconte vazhdimisht me zë të lartë anomalitë e pushtetit të kohës, por tashmë që është në pushtet të gjitha probelmatikat për të cilat ishte kundër duket se po e përndjekin.

Në një deklaratë të 15 viteve më parë Rama shprehej se është e papranueshme që në vitin 2011 të ketë fëmijë që nuk lagin dot buzën me qumësht për shkak të varfërisë, e ndërkohë në qeverisjen e tij statistikat kokforta tregojnë se situata nuk ka ndryshuar.

“Nuk mund të ketë në Shqipërinë e vitit 2011 fëmijë që nuk lagin dot buzën me qumësht, për shkak të varfërisë, e patolerueshme, e pafalshme”, shprehej Rama.

Në maj 2026 Eurostat publikoi një raport ku tregohej se gati 45% e familjeve, që kanë fëmijë në varësi në Shqipëri janë në rrezik varfërie, përballen me privim të rëndë material dhe social, ose jetojnë në një familje me intensitet shumë të ulët pune.

“Varfëria e familjeve shqiptare me fëmijë është shumë e lartë se e rajonit. Në Mal të Zi, në rrezik varfërie janë 34.8% e familjeve me fëmijë, e dyta më e lartë në Europë, pas Shqipërisë. Në Serbi, vetëm 21.4% e familjeve me fëmijë janë në rrezik varfërie”, thuhet në raport. bw

Një ngjarje e rëndë është regjistruar në orët e para të mëngjesit të sotëm, 16 gusht, në qytetin e Sarandës, ku është dhunuar shefi i Hetimit të Krimeve, Mateo Bakalli.

Sipas informacioneve paraprake, zyrtari i policisë është përfshirë në një konflikt fizik me disa persona, të cilët ende nuk janë identifikuar. Situata më pas ka përshkallëzuar në dhunë ndaj Bakallit.

Si pasojë e goditjeve të marra gjatë përplasjes, shefi i Hetimit të Krimeve ka pësuar dëmtime të shumta në trup dhe në fytyrë.

Nis hetimi për zbardhjen e ngjarjes

Menjëherë pas incidentit, strukturat e Policisë së Shtetit kanë nisur hetimet për të zbardhur rrethanat e plota të ngjarjes dhe motivin e konfliktit.

Grupi hetimor po punon për identifikimin dhe lokalizimin e personave të përfshirë, si dhe për dokumentimin e plotë të dinamikës së ngjarjes.

Deri në këto momente, autorët e dyshuar mbeten të paidentifikuar, ndërsa hetimet vijojnë.

Policia e Vlorës ka dalë me një njoftim zyrtar paraprak lidhur me zjarrin e rënë në orët e para të mëngjesit në hotelin në lagjen “10 Korriku”, në pronësi të shtetases M. A. Nga veprimet hetimore të kryera, ekspertët kanë zbardhur edhe shkakun e përhapjes së flakëve.

Sipas njoftimit të policisë, zjarri ka rënë rreth orës 04:05 në ambientet e brendshme të godinës. Nga këqyrja e pamjeve të kamerave të sigurisë dhe veprimet hetimore në vendngjarje, rezultoi se zjarri ka qenë aksidental, i shkaktuar nga djegia e prizës elektrike të frigoriferit që ndodhej në ambientet e restorantit.

Si pasojë e ngjarjes kanë mbetur të lënduar 6 pushues, nga të cilët 5 janë shtetas nga Kosova dhe 1 shtetas nga Rrësheni. Pesë nga të lënduarit janë transportuar për mjekim të specializuar në Spitalin e Djegieve në Tiranë, ku dy prej tyre kanë pësuar djegie të konsiderueshme trupore. Ndërkohë, një prej pacientëve po merr ndihmë mjekësore në Spitalin Rajonal të Vlorës.

Përveç të lënduarve, ngjarja ka shkaktuar edhe dëme të konsiderueshme materiale në ambientet e hotelit. Grupi hetimor, nën drejtimin e Prokurorisë, po vijon veprimet procedurale për dokumentimin e plotë ligjor të rrethanave të ngjarjes. BW

Një avion luftarak spanjoll F-18 në një mision policimi ajror të NATO-s rrëzoi një dron që kishte shkelur ilegalisht hapësirën ajrore kombëtare rumune, avioni i katërt pa pilot që vendi rrëzon këtë vit, tha të dielën ministria e mbrojtjes e Rumanisë.

Shteti anëtar i NATO-s ndan një kufi tokësor prej 614 km (382 milje) me Ukrainën dhe ka parë dronë rusë të shkelin vazhdimisht hapësirën ajrore të saj gjatë katër viteve të fundit, si dhe mina që lundrojnë në Detin e Zi përgjatë rrugëve kryesore tregtare dhe të energjisë.

Ministria nuk specifikoi origjinën e dronit, duke thënë se radarët e saj e zbuluan atë duke hyrë në vend nga Moldavia fqinje, rreth 24 km (15 milje) në veri të qytetit juglindor rumun të Galatit.

Avioni ajror F-18 “bëri kontakt me radarin me objektivin dhe mori leje për ta sulmuar atë”, tha ministria në një deklaratë. “Droni u rrëzua në mënyrë të sigurt në orën 05:01 të mëngjesit.”

Ministria tha se fragmentet duket se kanë rënë në një zonë të pabanuar midis dy fshatrave.

Në korrik, pilotët e avionëve luftarakë rumunë F-16 rrëzuan tre dronë rusë që shkelën hapësirën ajrore kombëtare për herë të parë pas dhjetëra ndërhyrjeve të tilla në më shumë se katër vitet e pushtimit të Ukrainës nga Moska.

Më herët gjatë vitit, një dron rus u rrëzua në një bllok apartamentesh në qytetin e Galatit gjatë një sulmi gjatë natës në Ukrainën fqinje, duke plagosur dy persona. BW

Shefi i Reanimacionit në Spitalin Rajonal të Vlorës, Edmond Breshanaj, ka dhënë detaje mbi gjendjen shëndetësore të personave të lënduar nga zjarri i rëndë që përfshiu hotel “Brooklyn” në zonën e Lungomares gjatë orëve të para të mëngjesit.

Mjeku shpjegoi se stafi spitalor u vendos në gatishmëri të plotë rreth orës 04:30 të mëngjesit, kur në urgjencë mbërritën gjashtë pacientë të moshave të reja (25-30 vjeç), me origjinë nga Prishtina, Lipjani dhe Rrësheni:

“Ishte situatë shumë emergjente, ishin 6 pacientë të dëmtuar nga ekspozimi. Ishin në katin e dytë. 3 ishin të djegur rëndë dhe 2 ishin hedhur nga kati i dytë, kishin pësuar fraktura të kolonës.”

Sipas Breshanajt, gjendja e një prej pacienteve paraqitet mjaft kritike për jetën për shkak të shkallës ekstreme të djegieve:

“Një paciente që rrezikon jetën ishte djegur pothuajse 100%, një tjetër 50%. Dy prej tyre i nisëm në Qendrën e Traumës sepse s’kishin djegie, ndërsa tre të tjerë u dërguan në repartin e djegieve plastike në Tiranë.”

Ngjarja e rëndë ndodhi në një godinë ku në katin e parë funksiononte një lokal, ndërsa kati i dytë shërbente si hotel. Për shkak të përhapjes me shpejtësi të flakëve dhe tymit të dendur që bllokoi rrugëdaljet, disa prej pushuesve u detyruan të kërcejnë nga dritaret e dhomave për t’i shpëtuar zjarrit. BW

VLORA- Një ngjarje e rëndë ka ndodhur në qytetin e Vlorës, ku një hotel është përfshirë nga flakët, në zonën e  Lungomares. Flakët kanë nisur në katin e parë të godinës dhe më pas janë shpërndarë në katin e dytë dhe  fasadën e tij.

Si pasojë e kësaj janë plagosur 7 persona, të cilët janë transportuar për në spital. Bëhet me dije se tre prej tyre paraqiten në gjendje më të rëndë dhe janë transportuar drejt Tiranës për trajtim më të specializuar mjeksore.  Ndërsa katër të tjerë ndodhen në sallën e operacionit.

Në mënyrë që t’ju shpëtonin fflakëve dhe tymit, një pjesë e personave që ndodheshin në godinë janë hedhur nga dritarja. Sipas informacioneve paraprake, gjashtë prej të dëmtuarve janë shqiptarë të Kosovës, ndërsa një tjetër është nga Rrësheni. Policia ka shkuar menjëherë në vendngjarje dhe ka nisur hetimet për të mësuar më shumë mbi shkaqet dhe rrethanat e rënies së zjarrit./Dosja.al

Pamjet magjike të flamingove, që janë bërë simbol i “Revolucionit të Flamingove” dhe protestave të shqiptarëve që kërkojnë dorëheqjen e Edi Ramës, vijnë nga lagunat e Karavastasë në Divjakë.

Të pranishëm në peizazhin e lagunës, flamingot janë kthyer në një nga simbolet më të veçanta të protestave, duke përfaqësuar paqen, qëndresën dhe kërkesën për ndryshim. bw

Unioni Mbarkombëtar Integrimit të Burgosurve dhe të Përndjekurve Politikë të Shqipërisë me tronditje të thellë muarëm lajmin e ndarjes nga jeta, të Gjygjtarit, intelektualit, dhe ish të burgosurit politikë të regjimit komunistë Skënder Haluci.

Skënder Haluci i përket atyre qëndrestarve të viteteve 80 që si gjimnazista, por dhe si biri i Muharrem Halucit që ishte i burgosur politikë i vdekur nga torturat në burgun famkeq politikë të Burrelit, një burg që në hyrje të tije diktatura komuniste kishte shkruar:

“Këtu i thonë Burrel, hyn dhe nuk del!” Ishte ndër të parët që nuk u pajtua me propagandën e diktaturës, dhe pse e kishte të ndaluar arsimimin si biri i ”armikut të klasës!”

Sigurimi i shtetit  të diktaturës i përgatiti dosjen si biri i një dënuari politikë që kishte ndrrua jetë në burgun politikë të Burrel, dhe sot ai nuk ka një varr! Në moshën më të bukur të rinisë ku ai i gëzohej jetës, moshës, natyrës së bukur të bjeshkëve të Malsisë Gjakovës, ata e arrestuan me një akuzë sa qesharake dhe tragjike, Akuzohehej se kishte marrë pjesë në atentatin kundra diktatorit të fundit komunistë Ramiz Alisë kur kishte zhvilluar një vizitë në Tropojë, para 6 muajsh se të arrestonin Skënderin me gjithë kushririn e tije Isuf Halucin!

Kur Europa juglindore shembte muret e ngritura ideologjike të sistemeve totalitare, regjimi komunistë i Ramiz Alisë vazhdonte dënimin me vdekje ndaj të rinjve shqiptare pa asnjë bazë ligjore dhe fakte, vetëm me dosje të falsifikuar të xhelatëve që e kishin katandisur këtë shoqëri në një robotë ideologjikë, duke e xhveshur nga  morali, dhe ndenja njerzore.

Skënderi në gjurmët e babait tij trim e të pamposhtur ndaj xhelatëve i përballoi me stojcizëm trimërie, torturat çnjerzore të atij regjimi gjakatar. Vendimet e gjykatave komuniste të tre shkallëve e denuan Skënderin me pushkatim, por Presidjumi i Kuvendit Popullor ja kthej dënimin nga pushkatimi me dënim të përjetshëm. Dhe kështu deshti Zoti që Skënderi të arrinte të shihte rrëzimin e sistemit formal komunistë në vitet 90. Mbas lirimit nga burgu ai do të i drejtohej arsimimit , ku mbaroi Fakultetin e Drejtsisë dhe filloi punë në Gjykatën e Tiranës, ku dha kontributin e tij, por dhe një mësim për drejtsinë e viteteve 90, se nuk do të merte pjesë në gjykimin e diktatorit Ramiz Alisë, jo siç e trumbetuan partia e Ramiz Alisë, se ja fali jetën Ramiz Alia, por kodi i procedurës penale nuk e lejonte të ishte pjesëmarrës.

Erdhi viti i zi i 1997 ai nuk pranoi të bëhej vegël e asaj partie që e kishte denuar, por dënoi me forcë revolucjonin e komunistëve të këthyer në socjalista për prishjen e ekuilibrave të shoqërisë duke ardhur në pushtet një parti që e kishte denuar si kundërshtar politikë. 

Mbas rikthimit në normalitet të politikës në vitete 2005 ai u rikthye në detyrën e gjygjtarit dhe për punë të mirë dhe aspak me ndenjën e hakmarrjes ai mori drejtimin e Gjykatës së Vlorës deri në vitin 2021 kur partia e komunistëve shqiptar shpiku një veting, vetëm të largonte nga drejtësia ata që kishin qënë kundërshtar të regjimit kriminal komunistë!

Dhe filloi profesionin e Avokatit deri në minutata e fundit të jetës së tije.

Skënder i dashur ti u largova nga kjo jetë në një kohë që Shqipëria po kalon momentet më të vështira nga rikthimi i bjëve të ekzekutorve të dënimit tënd, të humbjes së jetës të babit tënd, të bashkëvuajtve tuaj që kaluan kalvarin e Burrelit, Spaçit, Qaf-Barit dhe kampeve të përqendrimit të humbjeve të jetëve njerzore. 

Ti po e len Shqipërinë në një moment kur Rinia shqiptare ka marë përsipër të ndërtoi “Shqipërinë e re” ishin caste të paharrueshme kur më the në bulevard në një natë proteste ajo që nuk u bë në 90 jam i sigurte se do të realizohet tani. 

Unioni të Burgosurve Politikë humbi Antarin e devotshëm, Drejtsia humbi një gjygjtar të ndershëm, familja humbi bashkëshortin, vajza babain e tyre të dashur, Tropoja birin e saj antikomunistë. 

Lamtumire miku, bashkëvuajtsi, i im, amanetin dhe qëndresën tënde për një Shqipëri të re do të realizohet përballë bijëve të ekzekutorve që kan marrë peng lirinë e shqiptarve.

Pushofsh i qetë në tokën tënde, në atdheun tënd që e deshe aq shumë!

Besim Ndregjoni

President i Unionit të Burgosurve dhe të Përndjekurve Politikë.

Lideri i opozitës, Sali Berisha përcolli sot një mesazh ngushëllimi për ndarjen nga jeta të ish-kryetar i Gjykatës së Vlorës intelektualit, dhe ish të burgosurit politikë të regjimit komunistë Skënder Haluci.

Nderim për Skënder Halucin

Miq, Skënder Haluci, një i mbijetuar i genocidit komunist, ish-kryetar i Gjykatës së Vlorës, bashkëshort, prind dhe qytetar shembullor, mbylli parakohe sytë përgjithmonë.

Pasardhës i një familjeje atdhetare e antikomuniste, i mekuar me vlerat dhe virtytet më të mira njerëzore, Skënder Haluci që në rini të tij të hershme për shkak të origjinës familjare u përball me përsekutimin më të egër politik: arrestimin brutal, torturat më çnjerëzore dhe dënimin kapital me vdekje, e më pas me 25 vite burg, për një krim që nuk e kishte kryer kurrë.

Pasi la 10 vite të rinisë së tij në burgjet më të zeza të diktaturës hoxhiste, ai u lirua së bashku me të burgosurit e fundit politikë të regjimit komunist. Ai u bashkua, si mijëra bashkëvuajtës të tij, me Lëvizjen Demokratike dhe dha një kontribut të çmuar në përmbysjen e diktaturës më të egër në Evropë.

Vitet e rënda të burgut jo vetëm që nuk ia kishin mekur Skënderit ëndrrën universitare, por e kishin bërë atë edhe më të fuqishme. Pas diplomimit, ai u emërua në detyra të rëndësishme në sistemin gjyqësor, deri si Kryetar i Gjykatës së Vlorës, të cilat i kreu me ndershmëri, aftësi dhe dinjitet. Mirëpo, e njëjta parti që në rini e dënoi me vdekje, e largoi nga detyra në kulmin e aftësive, përvojës dhe përkushtimit të tij.

Duke shprehur nderimin më të madh dhe mirënjohjen më të thellë për kontributin e çmuar të Skënder Halucit, i shpreh ngushëllimet e mia më të ndjera familjes së tij të nderuar, miqve e të afërmve. Ndaj me ta dhimbjen e thellë e zinë për njeriun e tyre të dashur dhe i lutem Zotit që shpirti i mirë i Skënder Halucit të gjejë paqen e merituar! Ngushëllime gsh

Është ndarë nga jeta në moshën 63-vjeçare, studiuesi i njohur Albert Riska.

Lajmin e ka ndarë Universiteti i Elbasanit ku përmes një njoftimi ka shprehur ngushëllimet për largimin nga kjo jetë të gjuhëtarit të njohur.

Një pjesë e rëndësishme e veprimtarisë së tij shkencore iu kushtua gjuhës arumune dhe marrëdhënieve arumuno-shqiptare. Këto studime u trajtuan edhe në monografinë “Arumunët — shënime për gjuhën dhe kulturën”, botuar në vitin 2005.

Më 13 gusht 2026, gjuhësia shqiptare humbi një nga studiuesit e saj të përkushtuar, Prof. as. dr. Albert Riskën, i cili u nda nga jeta në moshën 62-vjeçare, duke lënë pas një veprimtari të gjerë në fushën e gjuhësisë historike, etimologjisë, onomastikës dhe studimeve arumune.

Albert Riska lindi më 8 shtator 1963. Studimet për Gjuhë-Letërsi i kreu në Universitetin “Aleksandër Xhuvani” të Elbasanit, institucion me të cilin lidhi gjithë karrierën e tij akademike. Pas një përvoje të shkurtër si mësues, nisi punën si pedagog dhe për më shumë se tri dekada iu përkushtua mësimdhënies dhe kërkimit shkencor, veçanërisht në fushën e historisë së gjuhës shqipe.

Në vitin 2004 fitoi gradën shkencore “Doktor i shkencave”, ndërsa në vitin 2013 mori titullin “Profesor i Asociuar”. Për afro dy dekada mbajti edhe detyra drejtuese në Universitetin e Elbasanit, ndërsa gjatë viteve 2016–2022 shërbeu si dekan i Fakultetit të Shkencave Humane.

Riska ishte gjithashtu sekretar i Këshillit Botues dhe redaktor i Buletinit Shkencor të Universitetit të Elbasanit, duke dhënë një kontribut të rëndësishëm edhe në promovimin dhe publikimin e kërkimit akademik.

Një pjesë e rëndësishme e veprimtarisë së tij shkencore iu kushtua gjuhës arumune dhe marrëdhënieve arumuno-shqiptare. Këto studime u trajtuan edhe në monografinë “Arumunët — shënime për gjuhën dhe kulturën”, botuar në vitin 2005.

Me veprën “Shqipja dhe krishterimi” (2012), ai u përqendrua në historinë e leksikut të besimit dhe toponimisë, ndërsa studimet e tij mbi apofoninë u kurorëzuan me monografinë “Gjurmë të apofonisë indoevropiane në gjuhën shqipe”, botuar në vitin 2022.

Krahas kërkimit shkencor dhe veprimtarisë akademike, Prof. Riska ishte bashkautor i teksteve shkollore, përkthyes dhe redaktor. Në vitin 2018 botoi “Shqipja e qeshur”, një vepër përmes së cilës solli një tjetër dimension të marrëdhënies së tij me gjuhën, duke ndërthurur humorin e hollë me vështrimin e studiuesit.

Për kolegët dhe studentët, Albert Riska do të kujtohet jo vetëm për kontributin e tij në gjuhësinë shqiptare, por edhe për përkushtimin ndaj Universitetit të Elbasanit dhe brezave të studentëve që u formuan nën drejtimin e tij akademik.

Vepra e tij mbetet një trashëgimi e çmuar për gjuhësinë shqiptare dhe një kontribut që do të vijojë të jetë pjesë e studimeve mbi historinë, zhvillimin dhe pasurinë e gjuhës shqipe.

Në këto çaste të dhimbshme, Universiteti i Elbasanit “Aleksandër Xhuvani” u ka shprehur ngushëllimet më të ndjera familjarëve, të afërmve, kolegëve, studentëve dhe të gjithë atyre që patën fatin ta njihnin dhe të punonin me Prof. as. dr. Albert Riskën.

I paharruar qoftë kujtimi dhe vepra e Prof. as. dr. Albert Riskës! bw

Agron Jemini, i riu që çdo ditë del në protestë kundër kryeministrit Rama dhe valëvit flamurin shqiptar ka treguar se ka marrë edhe kërcënime dhe kanë tentuar ta largojnë nga protesta, por nuk ia kanë dalë.

I ftuar në studion e News24, Jemini thotë se “do të dalë në protestë çdo ditë, deri në largimin e kryeministrit Edi Rama”.

Ai thotë se tek flamuri shqiptar ka gjetur vetëvetën, ndërsa i bëri thirrje të gjithë qytetarëve që ti bashkohen protestës.

“Te flamuri kam gjetur vetëveten. Sa shkon ora 6 e pasdites unë fluturoj, shkoj aty te sheshi. Sot është dita e 75.

Janë marrë edhe me mua, unë ndikoj pak me flamurin. Kam shumë frymë tek sheshi, te marshimi, të podiumi. Disa herë janë përpjekur të më largojnë por nuk ja kanë dalë. Unë aty do shkoj derisa të kem fryme”, deklaroi Jemini.

I pyetur për kërcënimet qe ka marre ai tha: “Kur ishte diaspora para një orë, më erdhën dy vajza më thanë ‘leje betejën se gjyshi jonë ka vdek nga tre plumba. Kështu qe lere betejën, po lufton kot’. Janë përpjekur të gjejnë edhe disa çështje personale, por nuk ia kanë dalë. Unë nuk kam çfarë të humb, vetëm babin kam në shtëpi. Unë për veten time do të jem i qetë. Unë nuk merrem me politike, por ndikohem vetëm nga flamuri”.

Ministria e Mbrojtjes informon se, deri në orën 14:00 të datës 12 gusht 2026, në territorin e vendit 9 vatra zjarri mbeten aktive, në qarqet Tiranë, Fier, Durrës, Gjirokastër, Dibër dhe Korçë.

Vatrat kryesore aktive dhe angazhimi:

* Dajt, Tiranë – Në zonën mbi tunelet e Qafë-Mollës vijon operacioni me 22 forca të MZSH dhe ADZM, të mbështetura nga 2 helikopterë të Forcës Ajrore. Në Priskë të Madhe po operojnë 15 efektivë dhe 4 automjete zjarrfikëse. Në të dyja rastet nuk ka rrezik për zonat e banuara.

* Drenie, Patos – Vijon puna për shuarjen e riaktivizimit të zjarrit. Forcat operacionale po mbështeten sot edhe nga 30 efektivë të FA-së dhe 1 autoambulancë, pas një angazhimi të konsiderueshëm të MZSH-së, Policisë, shërbimit pyjor dhe vullnetarëve.

* Krujë – Në lagjen Abaze operacioni vijon. Aktualisht nuk ka rrezik për zonat e banuara. Në lagjen Bojë, ku janë evidentuar dy vatra, forcat zjarrfikëse janë pozicionuar edhe pranë banesave dhe 1 helikopter i FA-së po operon nga ajri, me fokus mbrojtjen e tyre.

* Përmet – Në malin e Nëmerçkës dhe në Malin Dhëmbel vijon angazhimi. Në të dyja zonat nuk ka rrezik për banesat.

* Gurë-Lurë, Dibër – Një nga operacionet me angazhimin më të madh: mbi 220 forca nga MZSH, bashkia, vullnetarët, Policia, shërbimi pyjor, ADZM, AKMC, strukturat e emergjencave civile dhe FA. Nga ajri po operojnë 2 avionë Air Tractor. Forcat zjarrfikëse janë pozicionuar pranë banesave që mund të ekspozohen ndaj zjarrit.

Mali i Moravës, Devoll – Vatra është izoluar dhe mbahet nën monitorim nga strukturat operacionale. Nuk ka rrezik për zonat e banuara.

“Në tërësi, mbi 450 forca rezultojnë të angazhuara vetëm në vatrat ku raporti jep shifra të plota për personelin, ndërsa kapacitetet ajrore të raportuara përfshijnë 3 helikopterë dhe 2 avionë Air Tractor”

Është depozituar në SPAK një kallëzim penal ndaj kryeministrit Edi Rama, lidhur me pretendimet për shkelje të legjislacionit në fushën e planifikimit dhe zhvillimit të territorit.

Arkitektja dhe aktivistja Entela Koja deklaroi se kallëzimi penal është pjesa kryesore e një nisme qytetare, e cila shoqëroi edhe dorëzimin e një kopjeje të librit rozë “Albania Files” me firma nga qytetarët.

Sipas Kojës, kallëzimi nuk përmban vetëm konstatime për shkelje të pretenduara, por kërkon edhe nisjen e ndjekjes penale për dëmet që janë shkaktuar nga planet e zhvillimit.

“Kallëzimi penal është pjesa e rëndësishme e këtij dorëzimi. Kallëzimi shoqëron atë aktin qytetar që u bë të dorëzimit të një kopje me firma nga sheshi. Por ai kërkonte një argumentim të qartë ligjor dhe jo vetëm gjetjet e shkeljeve, por edhe futjen në ndjekje penale për dëmin që kanë shkaktuar planet e tilla. Në të gjitha planet e zhvillimit kemi shkelje të rënda që gjenden jo vetëm në ligjin e planifikimit të territorit, por edhe shumë ligje të tjera. Këto janë të anashkaluar me disa vendime që merren nga KKTU dhe nga kryeministri. Rama firmos lejet e ndërtimit, një rast i paprecedent nga vendet e tjera dhe anashkalimi i planeve rregullues dhe i ligjeve shqiptare“, tha Koja.

E ftuar në News24, Koja u shpreh se janë duke u marrë me punën e kryeministrit dhe jo me aktin administrativ, ndërsa theksoi se janë të përgatitur, pasi SPAK-ut do ti duhet shumë kohë.

“SPAK që të nxjerrë një produkt me kaq shumë shkelje i duhet kohë dhe ne jemi të përgatitura për këtë. Në këtë akuzë janë përfshirë të gjitha shkeljet në “Albania Files”. Ne japim tre shembuj, janë Rrjolli, Zvërenci dhe Divjaka. Rasti i Rrjollit, na rezulton se punimet kanë filluar  një vit para se të nxirrej leja. Për këtë duhet të shkojnë në ndjekje penale të gjitha ata që kanë lejuar të ndodhë kjo, përfshi edhe Ramën. Në Divjakë kemi të bëjmë me zona të mbrojtura. Kryeministri bën show me arkitektë të huaj”, tha ndër të tjera arkitektja.

Dirigjenti i shquar Mastro Bujar Llapaj ka reaguar në rrjetin social:

Lutje drejtuar organizatorëve të Flamingo Revolution:

Ju lutem hiqni mikrofonin Mithat Havarit dhe sojit të tij!

Pse:

Në tetor 1999 artistët e Teatrit të Operas dhe Baletit ishin ngritur në protestë kundër Edi Ramës dhe projektligjit të tij famëkeq “Për Teatrin” dhe protestën e parë publike “Koncert Protestë” vendosën ta bëjnë në shkallët para TOB në sheshin Skënderbej në 15 tetor 1999 ora 18 .

Në kohën që do të fillonte koncerti u rrethuam nga policia e lajmëruar nga ish-drejtoresha Zana Çela.

Ne filluam me Hymnin Kombëtar drejtuar nga prof. Rifat Teqja (RIP) dhe të policët ndaluan në respekt të Hymnit, biles njërit prej tyre, Bedriut (RIP), po i rridhnin lotët çurg kur po këndohej Hymni.

Në radion e policisë dëgjohej një zë i çjerrë që jepte urdhër : «Çfarë bëni, pse nuk po i hiqni nga sheshi? Shef po këndojnë Hymnin, i përgjigjet Lad Nano. ” Merrini zvarrë ata horra! urdhëronte Mithat Havari, ish-drejtori i policisë të Tiranës që tani jep “leksione” demokracie në protestën tuaj.

Mos u mashtroni nga këta morra-horra, mbajini larg se do t’ju helmojnë çdo gjë të bukur dhe të pastër!

Rama shprehet se lumi Ibër është një sistem ujor ndërkufitar dhe se Serbia duhet të respektojë të drejtën ndërkombëtare për çdo projekt që mund të ndikojë në Kosovë, ndërkohë thekson se Shqipëria nuk ka pretendime territoriale ndaj Serbisë.

TIRANË- Kryeministri Edi Rama iu është përgjigjur deklaratave të Beogradit lidhur me mundësinë e ndryshimit të rrjedhës së lumit Ibër. Me anë të një postimi në platformën “X”, Rama thekson se Kosova është një shtet sovran dhe se Shqipëria nuk ka nevojë për konceptin e “Shqipërisë së Madhe” për ta mbështetur atë.

Rama shprehet se lumi Ibër është një sistem ujor ndërkufitar dhe se Serbia duhet të respektojë të drejtën ndërkombëtare për çdo projekt që mund të ndikojë në Kosovë, ndërkohë thekson se Shqipëria nuk ka pretendime territoriale ndaj Serbisë.

Rama ndalet edhe te të drejtat e komunitetit serb në Kosovë, duke deklaruar se siguria, prona, gjuha dhe trashëgimia kulturore e fetare e tyre duhet të mbrohen. Sipas tij, qëndrimi i Shqipërisë ndaj Serbisë mbetet i pandryshuar: Respekt, marrëdhënie të mira fqinjësore dhe integrimi i të gjithë rajonit në Evropë. Në fund të postimit të tij, Rama shkruan se Ibri do të vazhdojë të rrjedhë sipas gjeografisë dhe jo sipas folklorit.

Reagimi i kryeminsitrit Edi Rama në rrjetin X:

Një shkëmbim shumë interesant veror mes ministrave tanë të Jashtëm. Edhe pse prisja një përgjigje për lumin Ibër, disi udhëtuam nga hidrologjia te e drejta ndërkombëtare, bëmë ndalesën e detyrueshme te “Shqipëria e Madhe”, kaluam nga “Kosova dhe Metohia” dhe përfunduam në muzeun e njohur të ankthit historik serb.

Në Beograd ekziston një lloj folklori politik që duket se është imun ndaj kohës: sa herë që Shqipëria flet për Kosovën, menjëherë thirret në skenë “Shqipëria e Madhe”, sikur përsëritja ta shndërrojë një fantazmë të vjetër në një argument të vlefshëm.

Nuk do të ndodhë.

Shqipëria nuk ka asnjë pretendim ndaj territorit të Serbisë dhe nuk ka nevojë të shpikë një të tillë. Po ashtu, nuk kemi nevojë për një “Shqipëri të Madhe” për të qëndruar pranë Kosovës.

Kosova është një shtet më vete. Shqiptarët e Kosovës janë pikërisht kjo: shqiptarë të Kosovës. Ata kanë Republikën e tyre, institucionet e tyre dhe të drejtën për të vendosur vetë për të ardhmen e tyre. Shqipëria do të qëndrojë gjithmonë në mbështetje të kësaj të drejte.

Serbia e humbi Kosovën. Përsëritja se nuk e ka humbur ndoshta mund ta shndërrojë humbjen në fitore në gjeografinë e imagjinatës politike, por fatkeqësisht hartat janë më pak të gatshme të përshtaten. Territori i Republikës së Kosovës nuk është territor serb dhe burimet natyrore që ndodhen në të nuk janë burime të Republikës së Serbisë. Miqtë tanë serbë e dinë shumë mirë këtë, përfshirë edhe kur ulemi së bashku në tryezat evropiane.

Pra, le t’i rikthehemi lumit.

Çështja fillestare mbetet pikërisht aty ku e la Shqipëria: Ibri është një sistem ujor ndërkufitar. Serbia është plotësisht e lirë të menaxhojë burimet brenda juridiksionit të saj. Ajo që nuk mund të pretendojë në mënyrë të arsyeshme është se pasojat e mundshme për një vend tjetër ndalojnë në mënyrë magjike te kufiri serb.

Në fund të fundit, pikërisht për këtë ekziston e drejta ndërkombëtare e ujërave. Lumenjtë kanë zakonin e pakëndshëm të ndjekin gjeografinë dhe jo deklaratat diplomatike.

Është përmendur gjithashtu edhe situata e komunitetit serb në Kosovë. Të drejtat e tyre kanë rëndësi. Siguria e tyre ka rëndësi. Prona, gjuha, trashëgimia kulturore dhe fetare e tyre duhet të mbrohen. Shqipëria nuk ka pasur kurrë vështirësi ta thotë këtë, sepse kjo është thjesht ajo që një shtet demokratik u detyrohet qytetarëve të tij.

Dhe këtu arrijmë ndoshta te akrobacia më interesante e këtij shkëmbimi: të paralajmërosh Shqipërinë kundër zgjerimit etnik, ndërsa në të njëjtën deklaratë i referohesh territorit të një shteti tjetër sovran sikur të ishte ende territor serb. Kjo është vërtet një kontradiktë e vështirë për t’u mbajtur.

Ndoshta kjo funksionon brenda një flluske politike në Serbi. Jashtë saj, gjeometria është më pak falëse.

Dhe po, jam plotësisht dakord që e ardhmja e rajonit tonë duhet të jetë një e ardhme ku kufijtë humbasin gradualisht fuqinë për të na ndarë. Absolutisht.

Por ekziston një kusht i vogël përpara se kufijtë të bëhen më pak të rëndësishëm: të pranohen kufijtë që ekzistojnë tashmë. Pikërisht ky ishte gjenialiteti i projektit evropian: ndarja e përkatësisë kombëtare nga ambicia territoriale.

Shqiptarët e Kosovës janë shqiptarë të Kosovës. Shqipëria do të qëndrojë pranë tyre dhe pranë Republikës së tyre, sepse ndajmë histori, gjuhë, familje dhe një të ardhme të përbashkët, por mbi të gjitha sepse një Kosovë e lirë, demokratike dhe e sigurt është një shtet legjitim evropian dhe një pjesë e domosdoshme e stabilitetit të rajonit tonë.

Në këtë qëndrim nuk ka asgjë të fshehtë. Nuk ka pasur kurrë. As harta sekrete. As kufij të fshehur. Asnjë “Shqipëri të Madhe” apo çfarëdo “të Madhe” tjetër nuk nevojitet. Prandaj, qëndrimi i Shqipërisë do të mbetet i njëjtë, si në publik ashtu edhe në biseda private: ne e respektojmë Serbinë, duam marrëdhënie të mira fqinjësore me Serbinë dhe duam që i gjithë rajoni të jetë pjesë e Evropës – përfshirë edhe Serbinë.

Por fqinjësia e mirë nuk mund të nënkuptojë që çdo fqinj i Serbisë të detyrohet të jetojë përgjithmonë sipas versionit serb të historisë. Ballkani ka paguar tashmë shumë shtrenjtë, me gjak dhe me kohë të humbur, për këtë mënyrë të të menduarit. Ndërkohë, Ibri, krejtësisht i pavetëdijshëm për të gjitha hartat tona historike, do të vazhdojë të rrjedhë sipas gjeografisë dhe jo sipas folklorit.

Reagimi i kryeministrit vjen pas replikave të shkëmbyera me ministrin e Jashtëm të Serbisë, Marko Gjuriç dhe atij të Shqipërisë, Ferid Hoxha lidhur me lumin Ibër dhe statusin e Kosovës./Dosja.al

DURRËS- Një masakër mjedisore u rregjistrua ditën e djeshme në Durrës, ku ujërat e zeza po derdheshin drejtpërdrejt në det. Pamjet e publikuara në rrjetet sociale tregonin ndotjen e bregdetit në një prej zonave më të frekuentuara nga pushuesit, ndërsa ky veprim erdhi në kulmin e sezonit turistik.

Pas publikimit të këtyre pamjeve, situata ka marrë një rrjedhë tjetër. Pranë vendit ku ndodhi ndotja mjedisore, në zonën e kanalit shkarkues pranë Valamari është parë një skrept, i cili ka ndërhyrë për ta bllokuar atë. Kjo ndërhyrje e shpejtë ka ardhur menjëherë pas publikimit të pamjeve në rrjetet sociale, ndërsa ende nuk dihet nëse rrjedhja është ndalur plotësisht dhe cilat do të jenë masat ndaj ndotjes së shkaktuar./Dosja.al

Protesta e mbrëmshme në bulevardin “Dëshmorët e Kombit” pati edhe një moment të veçantë, teksa një grup qytetarësh marshoi në drejtim të ambasadave të Serbisë dhe Ukrainës.

Dy përfaqësitë diplomatike ndodhen pranë njëra-tjetrës, në rrugën që pas nisjes së luftës së Rusisë ndaj Ukrainës mori emrin “Ukraina e lirë”.

Protestuesit, duke iu referuar deklaratave të fundit të presidentit ukrainas Volodymyr Zelensky, i cili rikonfirmoi se Ukraina nuk e njeh pavarësinë e Kosovës, e kundërshtuan simbolikisht këtë emërtim.

Gjatë marshimit, ata e quajtën rrugën “Dardania e lirë”, duke e lidhur këtë emërtim me identitetin dhe historinë e Kosovës.

Përpara ambasadave, qytetarët brohoritën në kor në mbështetje të Ushtrisë Çlirimtare të Kosovës, ndërsa përcollën edhe mesazhe kundër qëndrimit të Serbisë dhe mosnjohjes së Kosovës nga Ukraina.

Nëpërmjet një video të publikuar në rrjete, Aulon Kalaja, qenë në terren pranë banorëve, duke parë nga afër situatën dhe pasojat e zjarrit.

Pas një nate të vështirë për shkak të zjarreve, banorët e zonave të rrezikuara në Krujë janë rikthyer mëngjesin e sotëm pranë banesave të tyre.

Kalaja ka ndjekur nga afër situatën në një prej banesave që ishte kërcënuar drejtpërdrejt nga flakët. Banorët treguan se, falë ndërhyrjes së zjarrfikësve, banesa u shpëtua nga përfshirja prej zjarrit.

Ai tha se zjarrfikësit kishin hyrë brenda saj për të frenuar flakët dhe për të shmangur përhapjen e zjarrit.

Banorët shprehën lehtësimin dhe gëzimin që banesat e tyre u shpëtuan.

Reagimi i Aulon Kalasë:

Aulon Kalaja: Në këtë moment, banorët kthehen në shtëpitë e veta. Kanë qëndruar gjithë natën duke luftuar, duke ndjekur flakët. Shikojmë pjesën tjetër.

Banor: Lëre aman se jemi…

Kalaja: Tani do shohim shtëpinë, se si është situata te shtëpia.

Banor: Shtëpia është e komshies, Romelës.

Banor: Po, është e shpëtuar, e shpëtuar.

Kalaja: Apo jo?

Banor: E shpëtuar, shyqyr Zotit!

Kalaja: Ja ku e kemi. Të shohim këtu mbrapa, të shohim. Kjo është situata. Kjo ishte shtëpia për të cilën u luftua. Këtu kanë hyrë zjarrfikësit. Pra, siç e shikoni, dera është hapur aty. Kanë hyrë edhe zjarrfikësit për të shuar flakët dhe kanë shpëtuar këtë shtëpi. Si është ara aty?

Banor: Shumë mirë, shumë mirë. Faleminderit Zotit, u shpëtuan shtëpitë.

Banor: Janë shpëtuar, të shpëtuara.

Kalaja: Jeni të gjithë të lumtur, apo jo?

Banor: Ooo, të lumtur! O ba, ba, ba, ba!

Kalaja: Shumë, shumë mirë. Shikojmë tani pjesën tjetër të malit, ku ka ende një farë flake më sipër, por nuk është e dallueshme nga këtu. Ka tym dhe këtu ndihet aroma e rëndë. Është ora 6 pa 20 e mëngjesit. Jemi në Krujë. Kjo është shtëpia për të cilën u luftua. Nuk është vetëm kjo, janë edhe dy-tre shtëpi të tjera, por kjo ka qenë pika kryesore e rrezikut. bw

Në kuadër të hetimeve për ish-zv.kryeministren Belinda Balluku SPAK ka ushtruar kontroll në kompaninë “Atelier 4” të vëllezërve Eftimi.

Burimet konfirmojnë për gazetaren Klodiana Lala se është sekuestruar projekti i arredimit që lidhet me një vilë luksoze në zonën më ekskluzive në jug të vendit, që është pasuri e fshehur e Belinda Ballukut, ish-ministre e Infrastrukturës dhe Energjisë.

Prokurorët e posaçëm janë duke analizuar të dhënat e siguruara nga kontrollet në harmoni me provat e tjera, të siguruara gjatë hetimit.

Ish-numri dy i qeverisë, është e pandehur për tenderin për ndertimin e tuenlit të Llogarasë dhe lotët e Unazës së jashtme të Tiranës dhe nën hetim për korrupsion e pastrim parash, ku i është sekuestruar një vilë në Dhërmi që dyshohet se është pasuri e fshehur e saj.

10 ditë më parë, Balluku u paraqit në SPAK ku iu komunikuan akuzat e reja, si dhe zgjatja e afatit të hetimeve edhe me 3 muaj të tjerë. bw

Një zjarr i përmasave të mëdha përfshiu gjatë mbrëmjes së të shtunës zonën mes fshatrave Andon Poçi dhe Hundëkuq, në Gjirokastër, duke paraqitur rrezik për përhapjen e flakëve drejt zonave të banuara.

Zjarri është përqendruar në dy vatra aktive, me një perimetër të përgjithshëm prej rreth 4 kilometrash. Terreni i thyer dhe bimësia e dendur po e vështirësojnë ndjeshëm ndërhyrjen e forcave zjarrfikëse dhe afrimin e mjeteve në vatrat e zjarrit.

Sipas autoriteteve, në të njëjtën zonë janë evidentuar edhe tre vatra zjarri rreth një javë më parë, duke ngritur shqetësime për situatën e përsëritur.

I gjithë shërbimi zjarrfikës i Drejtorisë së MZSH-së Gjirokastër ndodhet në terren, ku po vijon puna për shuarjen e flakëve dhe monitorimin e situatës.

Për forcimin e operacionit priten të mbërrijnë forca shtesë zjarrfikëse, zjarrfikës vullnetarë dhe trupa të Forcave të Armatosura, të cilat do të angazhohen në përpjekjet për vënien nën kontroll të zjarrit.

Situata vijon të jetë e vështirë dhe dinamike, ndërsa ekipet në terren po punojnë për të frenuar përhapjen e flakëve dhe për të mbrojtur zonat e banuara që ndodhen pranë vatrave aktive. bw

Situata e zjarrit në Krujë vijon të mbetet e vështirë, ndërsa mbi 280 efektivë dhe forca operacionale janë angazhuar në terren për përballimin e flakëve dhe mbrojtjen e banorëve dhe pronave.

Në operacion janë përfshirë mbi 200 efektivë të strukturave të emergjencave civile dhe Forcave të Armatosura, si dhe 80 efektivë të Mbrojtjes nga Zjarri dhe Shpëtimit.

Ndërhyrja u zhvillua në tokë dhe nga ajri. Në operacion janë angazhuar 21 mjete zjarrfikëse, 3 helikopterë, droni Bayraktar TB2 dhe 2 dronë me kamera termike të AKMC-së. Në dispozicion të forcave ndodhen gjithashtu një autobot uji, një autoambulancë dhe Qendra Operacionale e Lëvizshme e AKMC-së, e vendosur në zonë për të koordinuar ndërhyrjen.

Operacioni vijon pa ndërprerje, ndërsa pritet që në ndihmë të mbërrijnë edhe mjete dhe forca zjarrfikëse nga bashki të tjera.

Njoftimi i Ministrisë së Mbrojtjes:

Mbi 280 efektivë dhe forca operacionale janë angazhuar deri tani në menaxhimin e situatës së zjarrit në Krujë.

Në operacion po marrin pjesë mbi 200 efektivë të strukturave të emergjencave civile dhe Forcave të Armatosura, si dhe 80 efektivë të Mbrojtjes nga Zjarri dhe Shpëtimi.

Në terren dhe nga ajri janë angazhuar 21 mjete zjarrfikëse, 3 helikopterë, droni Bayraktar TB2, 2 dronë me kamera termike të AKMC-së, 1 autobot uji, 1 autoambulancë, si dhe Qendra Operacionale e Lëvizshme e AKMC-së, e dislokuar në zonë për të mbështetur koordinimin dhe ndjekjen e operacionit në terren.

Operacioni vijon pa ndërprerje, ndërsa pritet edhe mbështetje shtesë me mjete dhe efektivë zjarrfikës nga bashki të tjera.

Të gjitha strukturat po punojnë të koordinuara për kufizimin e përhapjes së flakëve, mbrojtjen e qytetarëve, banesave, bizneseve dhe mjedisit, deri në vënien e plotë të situatës nën kontroll.

Mirënjohje për çdo efektiv dhe punonjës të angazhuar në këtë operacion, për përkushtimin dhe sakrificën në shërbim të qytetarëve. bw

Sot bëhet një vit nga 9 gushti 2025, dita kur redaksia e televizionit News24 u nxor me forcë nga ambientet ku ushtronte misionin e vet mediatik që prej krijimit.

Mbushet një vit nga dita kur një prej mediave më të rëndësishme në vend u përball me një ndërhyrje të paprecedentë, kur gazetarët dhe stafi u penguan të hynin në vendin e tyre të punës, transmetimi u ndërpre dhe ambientet e televizionit u rrethuan nga forca të shumta policie dhe ushtrie.

Prej vitesh, News24 ka raportuar dhe denoncuar korrupsionin në qeveri, abuzimin me pushtetin dhe shkeljen e ligjit nga njerëz me pushtet. Ka nxjerrë në dritë të vërteta që shumë të tjerë i kanë shmangur dhe ka mbajtur një qëndrim të pakompromis përballë pushtetit. Ky qëndrim ishte edhe arsyeja pse, një vit më parë, ndaj televizionit u ndërmor një sulm i tillë.

Në orët e para të mëngjesit të 9 gushtit 2025, gazetarët dhe punonjësit u nxorën nga godina dhe nuk u lejuan të merrnin mjetet e tyre të punës, kompjuterët, dokumentet dhe materialet profesionale. Arkiva dhe materiale të rëndësishme mbetën të bllokuara brenda godinës dhe u zhvendosën me kamionë të ushtrisë.

Një goditje që preku drejtpërdrejt punën e qindra punonjësve të News24, por edhe të drejtën e publikut për t’u informuar.

News24 pësoi një nga goditjet më të rënda që ka përjetuar një media në Shqipëri, por ajo ditë dëshmoi edhe diçka tjetër, se një televizion mund të nxirret nga godina, por nuk mund t’i nxirret nga shpirti misioni për të informuar.

Pas kësaj goditjeje erdhi ringritja. Brenda një kohe shumë të shkurtër, botuesi i Focus Media News, z. Irfan Hysenbelliu, riorganizoi stafin dhe News24 rifilloi transmetimin.

Në kushte të jashtëzakonshme, në ambiente të improvizuara dhe me mjete minimale, gazetarët dolën në transmetim dhe vazhduan të informonin publikun.

Një vit më pas, News24 nuk është thjesht një televizion që ka mbijetuar. Është një televizion që vazhdon të bëjë atë që bëri edhe në ditët më të vështira, të jetë në terren dhe t’iu japë zë qytetarëve.

Kjo është veçanërisht e dukshme sot, kur prej 70 ditësh, në vend zhvillohet një protestë e pandërprerë, ku kërkohet dorëheqja e kryeministrit Edi Rama dhe e qeverisë së tij.

News24 ka qenë aty. Ka ndjekur protestën ditë pas dite, ka transmetuar drejtpërdrejt nga terreni, ka intervistuar protestuesit, organizatorët dhe qytetarët, ka përcjellë kërkesat e tyre dhe ka pasqyruar zhvillimet e saj.

News24 ka zgjedhur t’i japë hapësirë zërit të qytetarëve që protestojnë dhe nga që kërkojnë ndryshim.

Një vit më parë u mbyllën dyert e një godine. Por nuk u mbyll misioni i News24.

Sepse News24 nuk është godina ku punon, nuk janë vetëm studiot, kamerat apo pajisjet teknike. News24 janë gazetarët, operatorët, teknikët dhe të gjithë njerëzit që, edhe në kushtet më të vështira, kanë zgjedhur të vazhdojnë të bëjnë gazetari.

Një vit pas 9 gushtit 2025, News24 vazhdon të transmetojë. Dhe vazhdon të jetë aty ku duhet të jetë një media, pranë qytetarëve, në terren dhe përballë pushtetit.

Sepse fjala e lirë nuk shuhet me forcë. Gazetaria nuk ndalohet duke mbyllur një derë.

Një vit pas sulmit, News24 është ende aty, në terren me qytetarin, me të vërtetën. Misioni vazhdon!

Shqipëria ka një nga nivelet më të ulëta në Europë për lidhjen e popullsisë me sistemet e trajtimit të ujërave të ndotura.

Në vitin 2024, vetëm 12.6% e popullsisë rezultonte e lidhur me impiante që ofrojnë të paktën trajtim dytësor të ujërave të ndotura, sipas të dhënave të Eurostat. Treguesi mat pjesën e popullsisë së lidhur me sisteme ku ujërat e ndotura i nënshtrohen të paktën trajtimit biologjik, përpara se të shkarkohen në mjedis.

Të dhënat tregojnë gjithashtu një përkeqësim të fortë të treguesit në vitet e fundit. Përqindja për Shqipërinë ishte 33.6% në vitin 2018, ra në 30.9% në vitin 2020 dhe më pas zbriti në 12.6 % në vitin 2024.

Krahasuar me vitin 2018, pjesa e popullsisë së mbuluar nga trajtimi i ujërave të ndotura është reduktuar me 21 pikë përqindjeje, ose me rreth 63%.

Edhe në krahasim me vendet e rajonit, Shqipëria renditet në nivelet më të ulëta. Në vitin 2024, Serbia e kishte treguesin në rreth 15.5%, rreth 3 pikë përqindjeje më të lartë se Shqipëria.

Bosnjë-Hercegovina raportonte një mbulim prej 36.5%, ndërsa në Turqi rreth 61.1% e popullsisë ishte e lidhur me sisteme trajtimi të paktën dytësor.

Diferenca është edhe më e madhe me vendet e Bashkimit Europian. Mesatarja e BE-së arriti në 80.7% në vitin 2023, ose rreth gjashtë herë më shumë se niveli i Shqipërisë në të njëjtin vit.

Në Greqi, treguesi ishte mbi 95%, ndërsa në Gjermani, Holandë, Austri dhe Danimarkë pothuajse e gjithë popullsia është e lidhur me sisteme që kryejnë të paktën trajtim dytësor.

Të dhënat nxjerrin në pah mangësitë e mëdha të Shqipërisë në infrastrukturën e kanalizimeve dhe të përpunimit të ujërave të ndotura. Kapacitetet ekzistuese të impianteve vlerësohen të pamjaftueshme për të mbuluar popullsinë urbane, ndërsa një pjesë e tyre kanë funksionuar nën kapacitet ose kanë qenë jashtë pune.

Kjo rrit rrezikun që një pjesë e madhe e ujërave të përdorura të shkarkohet pa trajtimin e nevojshëm, duke shtuar presionin mbi lumenjtë, liqenet dhe zonat bregdetare.

Për vite me radhë, investimet publike në nivel qendror dhe vendor janë orientuar kryesisht drejt projekteve me efekte të menjëhershme vizuale, si sheshe, fasada, apo rrugë urbane, ndërsa investimet nën tokë, tek rrjetet e kanalizimeve dhe impiantet e pastrimit janë konsideruar nga pushteti qendror dhe vendor si projekte që nuk duken dhe nuk sjellin përfitime të shpejta elektorale.

Në të shumtën e rasteve janë investuar miliona euro për asfaltimin e rrugëve apo hapjen e blloqeve të reja banimi, pa u shoqëruar njëkohësisht me shtrimin e rrjeteve të ujësjellës-kanalizimeve. Kjo ka sjellë situatën absurde ku rrugët e reja ribëhen copë-copë pak vite më vonë vetëm për të kaluar tubacionet e ujërave të zeza./ B.Hoxha, Monitor/

Studenti Kleidi Memo, i ftuar sot në televizionin News24, ka bërë një analizë të protestës dhe lëvizjes së rinisë shqiptare, e quajtur edhe “Gjenerata Z”, për rrëzimin e qeverisë, dorëheqjen e kryeministrit Edi Rama dhe ndryshimin e klasës politike.

Ai tha se protesta që reziston në mënyrë historike në sheshet e Tiranës prej 66 ditësh i ka futur frikën dhe panikun kryeministrit, ndërsa ata nuk do largohen nga sheshi pa arritur qëllimet e tyre.

Teksa foli në emër të grupit studentor ku dhe bën pjesë, i riu theksoi se protestat kanë shkatërruar fasadën e mashtrimit të ndërtuar ndër vite nga politika.

Memo u ndal te reagimi i kreut të qeverisë ndaj protestave, duke e akuzuar se është munduar fillimisht t’i minimizojë përmes ironisë dhe aludimeve për faktorë të jashtëm, në një kohë që realiteti tregon të kundërtën.

“Protesta e ka vënë Ramën në panik. Filloi duke e ironizuar, duke thënë se ka forca të jashtme që e organizojnë, etj. Çdo herë ai përpiqet të krijojë një fasadë sikur çdo gjë është në rregull. Këtë ka bërë që nga viti 2013, duke tentuar të thotë se çdo gjë është në rregull. Kjo protestë e ka shembur fasadën që Edi Rama dhe PS, por edhe PD kanë ngritur më parë,” u shpreh ai.

Sipas Memos, rinia përfaqëson katalizatorin e vërtetë të ndryshimit dhe nuk mund të pranojë më një klasë politike që synon vetëm përfitimet personale. Ai njoftoi se studentët janë bashkuar në një front të përbashkët qëndrese.

“Gjenerata Z është gati të bëjë ndryshim sepse rinia është katalizator i ndryshimit në çdo vend. Unë jam pjesë e një grupi studentor që përfaqëson edhe studentët në protestë dhe kemi krijuar një qëndresë për studentët ku çdo student mund të na bashkohet për të luftuar këtë klasë politike të vjetër që është aty vetëm për interesat e tyre personale.”

Në përfundim, ai evidentoi se qytetarët dhe studentët ballafaqohen çdo ditë me mungesa të theksuara dhe se aksionet simbolike të rinisë do të vijojnë.

“Kemi shumë pakënaqësi, ka shumë kërkesa, si për arsimin, shëndetësinë që duhen përmirësuar. Kjo qeveri ka uzurpuar çdo aspekt të jetës së përditshme të shqiptarëve. Ne si studentë kemi bërë shumë aksione, ku një prej tyre ka qenë shpalosja e një banderole të madhe në Universitetin Politeknik”, tha ai.

Pas paralajmërimit të biznesmenit Behgjet Pacolli se çështja e Aeroportit të Vlorës do të përfundojë në arbitrazh ndërkombëtar, natyrshëm lind pyetja se sa është ‘gjoba’ që kompania koncesionare mund të kërkojë si dëmshpërblim nga shteti shqiptar.

Biznesmeni dhe ish-presidenti i Kosovës, Pacolli ka deklaruar se do të kërkojë kompensim maksimal në arbitrazh, pas vendimit të Ministrisë së Infrastrukturës dhe Energjisë për nisjen e procedurave për shtetëzimin e aeroportit, pas konfliktit të krijuar mes aksionerëve të shoqërisë koncesionare.

“MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroporti”, shkruan ai ndër të tjera në reagimin e tij.

Një tjetër element që mund të ndikojë në vlerën e kërkesës së investitorit është plani financiar i koncesionit.

Sipas të dhënave të bëra publike, gjatë periudhës 35-vjeçare të koncesionit, Aeroporti i Vlorës ishte parashikuar të gjeneronte rreth 720 milionë euro të ardhura.

Kjo shumë, së bashku me pretendimet për investimet e kryera dhe dëmet ekonomike të shkaktuara nga ndërprerja e kontratës, mund të jetë pjesë e argumentimit financiar që Mabco mund të paraqesë përpara një trupi arbitrazhi.

Megjithatë, shuma përfundimtare që Shqipëria mund të detyrohet të paguajë nuk është e përcaktuar dhe do të varet nga vlerësimi i arbitrazhit ndërkombëtar, provat e paraqitura nga palët, si dhe interpretimi i kontratës së koncesionit.

Në rast se arbitrazhi do të pranonte pjesërisht ose plotësisht pretendimet e investitorit, fatura do të paguhej nga buxheti i shtetit, duke e kthyer konfliktin për Aeroportin e Vlorës në një çështje me kosto potencialisht të lartë për taksapaguesit shqiptarë.

Konflikti i zgjatur mes aksionerëve të Aeroportit të Vlorës që ka sjellë vonesa disamujore për mbarimin e veprës infrastrukturore duket se do të përfundojnë me zgjidhjen e kontratës në mënyrë të njëanshme nga Ministria e Infrastrukturës dhe Energjisë.

Projekti, i cili ka nisur punimet në vitin 2021 dhe duhet të përfundonte brenda tri viteve, është shtyrë vazhdimisht pas konflikteve midis aksionerëve Behgjet Pacolli dhe Valon Ademi mbi ndarjen e aksioneve. Ndërsa aeroporti duhej të ishte bërë operacional brenda vitit 2025 dhe punimet ende nuk kanë përfunduar, qeveria ka menduar si zgjidhje prishjen e njëanshme të kontratës për të zhbllokuar punimet.

Sipërmarrësi Behgjet Pacolli ka reaguar pas lajmit se Ministria e Infrastrukturës dhe Energjisë ka nisur procedurën për zgjidhjen e kontratës së koncesionit për Aeroportin Ndërkombëtar të Vlorës, duke paralajmëruar arbitrazh ndërkombëtar nëse vendimi konfirmohet.

Sipas Pacollit, kompania MABCO Constructions SA nuk është njoftuar zyrtarisht nga autoritetet shqiptare dhe e ka mësuar lajmin përmes mediave.
“Për një investim strategjik të kësaj rëndësie, është e papranueshme që investitori të informohet nga mediat dhe jo nga institucionet e shtetit”, deklaroi ai.

Pacolli pretendon se MABCO është ekspozuar financiarisht me mbi 320 milionë euro dhe se në muajin maj kishte përmbushur pothuajse të gjitha detyrimet kontraktore, duke qenë pranë certifikimit të aeroportit, por punimet u penguan.

Ai akuzoi shtetin shqiptar për neglizhencë dhe veprime të kundërligjshme, ndërsa tha se pengesat institucionale kanë sjellë vonesa dhe dëme financiare.
“Paradoksi është i qartë: nga njëra anë institucionet penguan përfundimin e projektit, ndërsa nga ana tjetër përpiqen ta përdorin pikërisht këtë pengesë si arsye për zgjidhjen e kontratës”, u shpreh Pacolli.
Ai paralajmëroi se në rast të zyrtarizimit të procedurës për prishjen e kontratës, MABCO do të ndjekë të gjitha rrugët ligjore, përfshirë arbitrazhin tregtar dhe atë ndërkombëtar kundër Republikës së Shqipërisë.
“Arbitrazhi nuk është kërcënim, është realiteti i krijuar si pasojë juridike e veprimeve të kundërligjshme dhe mosveprimeve të atyre që kishin detyrimin të mbronin ligjin, investimin dhe interesin publik”, tha Pacolli.

Sipas tij, çdo faturë financiare që mund të lindë nga një proces i tillë do të rëndojë mbi taksapaguesit shqiptarë, bizneset dhe shtetin.

Reagimi i plotë:

Sot u bë publik lajmi se Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik të kësaj rëndësie, është e papranueshme që investitori të informohet nga mediat dhe jo nga institucionet e shtetit.

Nëse ky lajm rezulton i vërtetë, atëherë shteti shqiptar ka vendosur të ndjekë rrugën e arbitrazhit ndërkombëtar.
MABCO ka bërë çdo përpjekje për ta shmangur këtë skenar, duke kërkuar dialog, zgjidhje institucionale dhe zbatim të ligjit. Fatkeqësisht, këto përpjekje janë penguar nga neglizhenca, papërgjegjshmëria, veprimet e kundërligjshme të disa zyrtarëve, nga elementë që kanë vepruar dhe veprojnë jashtë ligjit, nën mbrojtje institucionale dhe nga dështimi i një sistemi të drejtësie, të ndikuar për të garantuar mbrojtjen e investitorit.

MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Mabco që në Maj kishte përmbushur pothuajse të gjitha detyrimet kontraktore dhe ndodhej para certifikimit të aeroportit, kur u pengua të vazhdonte punimet.
Edhe pas vendimit të Gjykatës së Lartë, MABCO u mbajt për muaj të tërë jashtë kantierit, në prani të Policisë së Shtetit. Gjatë kësaj periudhe u dëmtuan dhe u shkatërruan pajisje me vlerë, ndërsa një pjesë e tyre u vodhën.

Paradoksi është i qartë: nga njëra anë institucionet penguan përfundimin e projektit, ndërsa nga ana tjetër përpiqen ta përdorin pikërisht këtë pengesë si arsye për zgjidhjen e kontratës. Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë, si dhe me parimin themelor të së drejtës se askush nuk mund të përfitojë nga sjellja e vet e paligjshme.

Nëse procedura konfirmohet, MABCO do të përdorë të gjitha mjetet juridike dhe të gjitha provat që disponon për të kërkuar përgjegjësi ndaj kujtdo që ka kontribuar në këtë situatë, përfshirë arbitrazhin tregtar dhe arbitrazhin ndërkombëtar kundër Republikës së Shqipërisë.

Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të kundërligjshme të disa zyrtarëve. Megjithatë, ata vazhdojnë të sillen me indiferencë, sikur të mos kishte asnjë rëndësi nëse Aeroporti Ndërkombëtar i Vlorës vihet në funksion me muaj apo vite vonesë dhe sikur dëmi ekonomik të mos rëndonte mbi qytetarët.

Përfaqësuesit e lartë të institucioneve sillën sikurse nuk mbajnë asnjë përgjegjësi personale, sepse e dinë se nuk do të paguajnë asgjë nga xhepi i tyre. Faturën do ta paguajnë qytetarët shqiptarë, bizneset dhe vetë shteti. Kjo kulturë pandëshkueshmërie po dëmton rëndë interesin publik, besimin tek institucionet dhe klimën e investimeve në Shqipëri.

ARBITRAZHI nuk është një kërcënim, është realiteti i krijuar si pasojë juridike e veprimeve të kundërligjshme dhe mosveprimeve të atyre që kishin detyrimin të punojnë NDERSHËM, të mbronin ligjin, të mbronin investimin dhe interesin publik.

MABCO GJITHMONË KA FUNKSIONUAR DHE VAZHDON TE FUNKSIONOJE VETEM KONFORM LIGJIT DUKE RRESPEKTUAR ATË , PA KOMPROMIS! BW

Nga Kreshnik Kuçaj-Scan TV

Ministria e Infrastrukturës dhe Energjisë ka nisur procedurat për zgjidhjen e kontratës koncesionare të Aeroportit Ndërkombëtar të Vlorës. Procedura është iniciuar gjatë ditës së sotme, me synimin për të zhbllokuar situatën e krijuar pas vonesave në përfundimin e një prej projekteve më të mëdha infrastrukturore në vend.

Ky zhvillim vjen pas paralajmërimeve të bëra nga ministria gjatë muajve maj dhe qershor, kur u la të kuptohej se shteti ishte i gatshëm të ndërhynte për të zgjidhur ngërçin dhe për të garantuar funksionalizimin e aeroportit.

Në muajin maj, Ministria e Infrastrukturës dhe Energjisë deklaroi se Aeroporti Ndërkombëtar i Vlorës përbën një infrastrukturë me rëndësi strategjike për vendin dhe se funksionimi i tij është çështje e interesit publik e shtetëror, e jo thjesht një marrëdhënie biznesi mes palëve private. Më pas, në fillim të muajit qershor, ministria bëri të ditur se kompanive u ishte lënë një afat prej 30 ditësh për të zgjidhur mosmarrëveshjet tregtare.

Sipas informacioneve me nisjen e kësaj procedure qeveria ka kaluar në fazën e radhës të mekanizmave kontraktorë për zgjidhjen e situatës së krijuar.

Punimet për ndërtimin e Aeroportit Ndërkombëtar të Vlorës nisën zyrtarisht në nëntor të vitit 2021. Sipas kontratës koncesionare dhe planit fillestar të investimit, aeroporti duhej të përfundonte brenda rreth tre viteve dhe të niste operimet gjatë vitit 2025. Megjithatë, afatet nuk u respektuan dhe aeroporti ende nuk është bërë operacional.

Mosfunksionalizimi i aeroportit është lidhur me konfliktin e zgjatur mes aksionarëve të shoqërisë koncesionare, i cili ka sjellë procese gjyqësore, bllokim të vendimmarrjes dhe vonesa në realizimin e projektit.

Aeroporti Ndërkombëtar i Vlorës konsiderohet një investim strategjik për zhvillimin ekonomik të vendit. Vënia e tij në operim pritet të rrisë lidhjet ajrore me destinacione europiane dhe rajonale, të zgjasë sezonin turistik, të shtojë fluksin e vizitorëve dhe të nxisë investimet e huaja në jug të Shqipërisë.

Procedura e aktivizuar nga qeveria pritet të përcaktojë fatin e mëtejshëm të kontratës koncesionare dhe të vetë projektit, i cili konsiderohet një nga investimet infrastrukturore më të rëndësishme të viteve të fundit në Shqipëri.

Ministria e Infrastrukturës dhe Energjisë ka nisur procedurat për zgjidhjen e kontratës koncesionare të Aeroportit Ndërkombëtar të Vlorës. Mësohet nga burime të besueshme se procedura është iniciuar gjatë ditës së sotme, me synimin për të zhbllokuar situatën e krijuar pas vonesave në përfundimin e një prej projekteve më të mëdha infrastrukturore në vend.

Në muajin maj, Ministria e Infrastrukturës dhe Energjisë deklaroi se Aeroporti Ndërkombëtar i Vlorës përbën një infrastrukturë me rëndësi strategjike për vendin dhe se funksionimi i tij është çështje e interesit publik e shtetëror, e jo thjesht një marrëdhënie biznesi mes palëve private.

Më pas, në fillim të muajit qershor, ministria bëri të ditur se kompanive u ishte lënë një afat prej 30 ditësh për të zgjidhur mosmarrëveshjet tregtare.

Me nisjen e kësaj procedure qeveria ka kaluar në fazën e radhës të mekanizmave kontraktorë për zgjidhjen e situatës së krijuar.

Punimet për ndërtimin e Aeroportit Ndërkombëtar të Vlorës nisën zyrtarisht në nëntor të vitit 2021.

Sipas kontratës koncesionare dhe planit fillestar të investimit, aeroporti duhej të përfundonte brenda rreth tre viteve dhe të niste operimet gjatë vitit 2025. Megjithatë, afatet nuk u respektuan dhe aeroporti ende nuk është bërë operacional.

Mosfunksionalizimi i aeroportit është lidhur me konfliktin e zgjatur mes aksionarëve të shoqërisë koncesionare, i cili ka sjellë procese gjyqësore, bllokim të vendimmarrjes dhe vonesa në realizimin e projektit.

Aeroporti Ndërkombëtar i Vlorës konsiderohet një investim strategjik për zhvillimin ekonomik të vendit. Vënia e tij në operim pritet të rrisë lidhjet ajrore me destinacione europiane dhe rajonale, të zgjasë sezonin turistik, të shtojë fluksin e vizitorëve dhe të nxisë investimet e huaja në jug të Shqipërisë.

Procedura e aktivizuar nga qeveria pritet të përcaktojë fatin e mëtejshëm të kontratës koncesionare dhe të vetë projektit, i cili konsiderohet një nga investimet infrastrukturore më të rëndësishme të viteve të fundit në Shqipëri. gsh

Kryetari i Partisë Mundësia, Agron Shehaj, ka ironizuar kryeministrin Edi Rama dhe Taulant Ballën, duke deklaruar se përpjekjet për t’i shpëtuar drejtësisë janë të kota.

Në një video të publikuar në rrjetet sociale, Shehaj shprehet se Rama dhe Balla kanë “një problem shumë të madh”: nuk mund të mbeten shtatzënë, duke iu referuar justifikimit për t’iu shmangur drejtësisë nga gratë e mazhorancës socialiste në vitet e fundit.

“Edi Rama dhe Taulant Balla kanë një problem shumë të madh. Nuk mbeten dot shtatzënë. Ej, po lini nam. Nuk i shpëtoni dot drejtësisë. Kot e keni”, deklaron Shehaj në video.

Kreu i Mundësia akuzon mazhorancën se për vite me radhë ka vepruar sikur ishte mbi ligjin dhe se tashmë, përballë drejtësisë, po përpiqet të përdorë çdo mënyrë për t’iu shmangur përgjegjësisë.

“Vodhën pa limit sepse mendonin se ishin mbi ligjin. Tani nuk dinë nga t’ia mbajnë dhe po përdorin gjithçka për t’i shpëtuar drejtësisë”, shkruan Shehaj në postimin që shoqëron videon. bw

Analisti i njohur Fatos Lubonja, i ftuar në studion e News24, ka bërë një analizë të ashpër të situatës politike në vend dhe valës së protestave masive kundër kryeministrit Edi Rama dhe qeverisë së tij.

“Po të ishim në një shtet demokratik normal, kryeministri duhet të kishte dhënë dorëheqjen disa herë dhe partia e tij duhet ta kishte përjashtuar për të gjitha ato gjëra që kanë dalë, duke filluar nga skandalet me radhë, nga inceneratorët, Ahmetaj, Balluku, AKSHI, deri te Aruba, etj., etj.,” u shpreh Lubonja. Megjithatë, ai theksoi se mungesa e përgjegjshmërisë dhe pandëshkueshmëria dëshmojnë se Shqipëria ndodhet nën një “regjim kriminal”.

Duke u ndalur te lëvizja qytetare dhe protestat që vijojnë, analisti parashikoi një dinamikë të re në ditët në vijim. Sipas tij, me rritjen e pakënaqësive popullore, këto energji duhet të orientohen drejt këtij “lumi proteste”, i cili do të zgjerohet më tej përballë krizës ekzistenciale që po kalon vendi, ku emergjenca kryesore mbetet shpopullimi masiv i Shqipërisë.

Aktivisti Erikleo Çepa, i cili është një nga pjesëmarrësit në protestën qytetarë kundër qeverisë thotë se protestat kanë ngjallur frikë dhe mos besim tek vetë politika.

I ftuar në News24, Çepa iu referua disa informacioneve të brendshme paralajmëroi se ka deputetë që po përgatisin deklaratat e dorëheqjes, ndërsa solli edhe shembullin e Marjana Koçekut.

“Ka ngjallur frikë mes tyre, një mosbesim te njëri-tjetri. Kemi parë këto kohët e fundit që disa deputetë po përgatisin deklaratat për të dalë deputetë të pavarur. Një nga ata është edhe zonja Koçeku. Ka informacione të brendshme se mund të jenë bërë gati për të dhënë dorëheqje”, tha ai.

Ndërkohë i ndalur në debatet dhe përplasjet brenda Partisë Socialiste, aktivisti deklaroi se “nëse përçarja zmadhohen do ta shkatërrojë vetë kryeministrin dhe patronazhistët”.

Ai tha se protesta nuk ka një drejtues, duke sqaruar se qytetarët dalin në shesh për flamurin shqiptar.

“Kokë politike nuk besoj se do ketë. Për momentin jo, unë përfaqësoj flamurin shqiptar”, tha ai.

Shoqëria aksionere publike që menaxhonte hapësirën ajrore të Shqipërisë, ka pushuar së ekzistuari. Dy javë më parë, ministria e Ekonomisë në cilësinë e aksionerit të vetëm, ka miratuar çregjistrimin e Albcontrol sha.

Ministria e Ekonomisë dhe Inovacionit vendosi prishjen pa kaluar në likujdim të shoqërisë Albcontrol sh.a në zbatim të nenit 21 të ligjit Për Ofruesin e Shërbimeve të Lundrimit Ajror” Albcontrol,” thuhet në vendimin e asamblesë së përgjithshme të aksionarit.

Sipas vendimit, të drejtat dhe detyrimet e Albcontrol sh.a tashmë do të kalojnë tek Enti Publik Albcontrol, i cili do të jetë një ent jobuxhetor.

Mbyllja e shoqërisë publike Albcontrol dhe zëvendësimi i saj me një Ent Publik Jobuxhetor u sanksionua me një ligj të posaçëm dy vjet më parë, si një përpjekje për të shpëtuar paratë e gjobës Becchetti.

Por me sa duket kjo ishte një tentativë e dështuar, pasi të gjitha paratë që ka gjeneruar hapësira ajrore e Shqipërisë prej vitit 2020 mbahen të bllokuara në Bruksel dhe një pjesë e tyre madje janë konfiskuar përfundimisht nga biznesmeni italian.

Sipas të dhënave nga bilanci zyrtar i Albcontrol, deri në fund të vitit të kaluar, shuma e bllokuar në llogaritë e Albcontrol tek Eurocontroli në Bruksel arriti në 18.3 miliardë lekë ose mbi 193 milionë euro.

Edhe pse tashmë kjo shumë ka kaluar detyrimin e gjobës Becchetti, sërish paratë mbeten aty dhe shteti shqiptar nuk mund të tërheqë dot asnjë qindarkë.

Bllokimi i miliardave në Bruksel e detyroi qeverinë të ndërhynte me paratë e qytetarëve për të bërë të mundur mbajtjen hapur të hapësirës ajrore dhe fluturimeve në Shqipëri.

Fillimisht qeveria dha disa kredi për Albpetrol përmes ministrisë së Financave dhe kompanive të tjera shtetërore, por në fillim të këtij viti, Këshilli i Ministrave detyroi Ministrinë e Infrastrukturës dhe Energjisë të kalojë 7 miliardë lekë tek Albcontrol, jo si hua, por si injektim kapitali.

Me pak fjalë, përmës këtij operacioni qytetarët shqiptarët paguan drejtëpërdrejtë paratë e gjobës 130 milionë euro të Becchettit, që erdhi pas sherreve personale të kryeministrit Edi Rama dhe oborrit të tij me biznesmenin italian./ Kapitali

Kryeministri Edi Rama ka reaguar në lidhje me protestat që janë zhvilluar në disa bashki të vendit kundër propozimit për hartën e re territoriale.

Përmes një postimi në rrjetet sociale, kreu i qeverisë e ka konsideruar reagimin e qytetarëve si diçka krejtësisht normale dhe të mirëseardhur, por u shpreh ashpër ndaj socialistëve që dogjën kartat e anëtarësisë së PS-së.

Rama shtoi se dokumenti i reformës territoriale ndodhet aktualisht në fazën e konsultimit publik prej 60 ditësh dhe se çdo bashki apo qytetar ka të gjithë hapësirën ligjore për të shprehur opinionin e tij përpara se drafti të kalojë për votim në Kuvend.

Reagimi i plotë:

Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, pse tanimë po protestohet edhe “brenda PS” dhe kjo qenka një shenjë tmerrsisht e keqe për “regjimin”

Në fakt jo, përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë apo ndonjë rast kur deputetë tanët kanë bërë “tribunin e vegjëlisë” pa ditur tamam çfarë thonë, gjithçka tjetër është jo vetëm normale po edhe e mirëseardhur

Një, sepse dokumenti i reformës së propozuar është pikërisht në fazën e vet të konsultimit publik ligjor prej 60 ditësh dhe kjo fazë do të thotë pikërisht, bujrum gjithkush të shprehet lirisht për propozimin

Dy, sepse sipas ligjit kryetarët e bashkive e këshillat bashkiakë duhet të shprehen me shkrim për qëndrimet e tyre dhe është krejt e kuptueshme që ata që janë kundër të shprehen edhe me forma të tjera paqësore – për sa kohë nuk bllokojnë rrugë e nuk pengojnë të tjerët të bëjnë jetën e tyre, duke u futur vetë në konflikt me ligjin dhe me PS bashkë

Tre, sepse as në Shqipëri nuk ka regjim, as në PS nuk ka dhe nuk do të ketë asnjë vendim për të shkurajuar askënd që të shprehë opinionin e vet për këtë reformë, për të cilën sigurisht do të vendosë parlamenti, por deri atëherë të gjithë do të dëgjohen, përfshirë edhe bashkitë që mund të duan të integrojnë tek vetja bashki më të vogla që në propozimin aktual mbeten siç janë

Nga ana tjetër të gjithë do të informohen shumë më tepër përgjatë këtyre 60 ditëve lidhur me arsyet logjike të propozimeve – ku nuk ka pasur si të merren parasysh reputacioni i zonës bashkiake që nga koha e antikitetit, numri i të rënëve në luftrat e 2000 vjetëve të fundit apo të tjera të dhëna e gojëdhana të kësaj natyre, të cilat s’kanë qenë dhe s’mund të jenë farë argumenta në këtë debat. bw