VOAL

VOAL

Trumpi anulon “procesin e normalizimit” me Kubën

“Është pranë hyrjes së menjëhershme në fuqi, anuloj marrëveshjen e njëanshme që qeveria e mëparshme ka realizuar me Kubën”

WASHINGTON – Presidenti amerikan, Donald Trump, njoftoi se ka anuluar procesin e normalizimit të marrëdhënieve që ish-presidenti Barack Obama e kishte nisur me Kubën.

Në një fjalim të mbajtur në Miami ku jetojnë emigrantët kubanë në SHBA, Trump duke theksuar se SHBA-ja ka ndryshuar politikën e saj për Kubën tha se “Është pranë hyrjes së menjëhershme në fuqi, anuloj marrëveshjen e njëanshme që qeveria e mëparshme ka realizuar me Kubën”.

Trump është shprehur gjithashtu se është vetëm në interes të qeverisë së Kubës vendimi i marrë në fund të vitit 2014 nga qeveria Obama për normalizimin e marrëdhënieve me Kubën, ndaj të cilës që prej 50 vitesh nuk kishte marrëdhënie diplomatike dhe zbatoheshin sanksione.

Pasi ka bërë të ditur se marrëveshja nuk ka në konsideratë interesat e popujve kubanez dhe amerikan Trump tha “Investimet dhe turizmi i kryer në Kubë siguron të ardhura të drejtpërdrejta për ushtrinë. Regjimi merr paratë dhe merr nën kontroll tregun. Si rezultat i dekretit presidencial që ka marrë qeveria e fundit (e SHBA-ve) janë rritur presionet në Kubë dhe sulmet kundër lëvizjeve demokratike dhe paqes”.

“Së shpejti do të kemi një Kubë të lirë”, është shprehur Trump duke shtuar se janë duke ndjekur shkeljet e të drejtave të njeriut në Kubë. Ndër të tjera Trump ka njoftuar se gjatë këtij procesi ambasadat e dy vendeve do të vazhdojnë detyrat e tyre.

SHBA-ja në fund të vitit 2014 mori vendimin për normalizimin e marrëdhënieve me Kubën me të cilën prej 50 vitesh nuk kishte marrëdhënie diplomatike dhe zbatonte sanksione ndaj saj. Vitin e kaluar dy vendet patën rihapur ambasadat. Së fundmi palët nënshkruan marrëveshjen për nisjen e udhëtimeve me avionë në mënyrë të ndërsjellë mes dy vendeve. aa

Prokurori i Posaçëm po heton Presidentin Trump dhe dhëndërin e tij Kushner

Prokurori i posaçëm Robert Mueller, i cili po heton nëse Presidenti Donald Trump u përpoq të pengonte drejtësinë, gjithashtu thuhet se po heton financat dhe marrëveshjet e biznesit të dhëndrit të zotit Trump, Jared Kushner, që shërben si një nga këshilltarët kryesorë të presidentit.

Njoftimin rreth hetimeve ndaj transaksioneve financiare të zotit Kushner e dha dje gazeta “Washington Post”

Në artikujt të mëparshëm gazeta ka përmendur takimet e zoti Kushner me kreun e një banke ruse, pronë shtetërore.

Avokatët e zotit Kushner janë shprehur se do të bashkëpunojë me hetimet. Pas një sërë postimesh në Twitter dje, duke sulmuar njoftimet se prokurori i posçëm po e hetonte presidentin për pengim drejtësie, zoti Trump postoi përsëri në Twitter sot duke kritikuar hetimet që po kryen Kongresi për mundësinë e lidhjeve të këshilltarëve të tij me Rusinë, duke theksuar edhe përbuzjen e tij për shtypin, por nga ana tjetër, përmes postimeve, në një fare mënyre presidenti konfirmoi lajmin se po hetohet për pengim drejtësie. Sipas disa ekspertëve ligjorë, postimet e fundit, mund ta komplikojnë më tej statusin ligjor të presidentit. Zëdhënësja e Shtëpisë së Bardhë, e pyetur rreth postimeve të fundit, i drejtoi gazetarët tek avokati personal i presidetit Trump.

Ekipi hetimor i Prokurorit të Posaçëm zgjerohet me 13 ekspertë të tjerë

Presidenti Donald Trump vazhdoi të premten komentet në Twitter kundër hetimeve mbi lidhjet e mundshme midis ekipit të fushatës së tij zgjedhore dhe Rusisë.

Zoti Trump konfirmoi se ai është nën hetim. “Jam duke u hetuar për shkarkimin e Drejtorit të FBI-së nga njeriu që më tha të shkarkoja drejtorin e FBI-së! Gjueti shtrigash,” shkruante ai në Twitter.

Nuk është e qartë nëse presidenti po i referohej Prokurorit të Posaçëm Robert Mueller apo Zëvendës Prokurorit të Përgjithshëm Rod Rosenstein.

Komentet e tij në Twitter erdhën pas një njoftimi të gazetës “Washington Post” se prokurori Mueller po shqyrton transaksionet financiare të dhëndrit të zotit Trump, Jared Kushner, këshilltar i lartë i presidentit.

Hetimi nga ana e prokurorit Mueller përfshin gjithashtu çështjen nëse zoti Trump është përpjekur të pengojë drejtësinë.

Ekziston një konsensus i gjerë se zoti Trump nuk po i jep vetes asnjë avantazh juridik duke iu referuar në mënyrë të përsëritur kësaj çështjeje me anë të komenteve në Twitter.

REAGOJNË DEMOKRATËT

“Presidenti Trump po i dëmton shanset e tij çdo herë që komenton në Twitter”, tha në rrjetin MSNBC senatori Patrick Leahy, anëtar i Komisionit Juridik të Senatit.

Numri dy i këtij komisioni, senatorja demokrate Dianne Feinstein, tha: “Mesazhi që presidenti po dërgon përmes komenteve në Twitter është se ai beson që sundimi i ligjit nuk vlen për rastin e tij dhe se kushdo që mendon ndryshe shkarkohet”.

“Kjo është jodemokratike dhe një shkelje flagrante e betimit të presidentit,” shtoi zonja Feinstein.

Senatorja nga Kalifornia i bëri gjithashtu jehonë shqetësimit se presidenti mund të përpiqet të shkarkojë prokurorin e posaçëm Mueller dhe zëvendës Prokurorin e Përgjithshëm Rosenstein.

Komiteti Kombëtar Demokrat, në një deklaratë të premten, tha se zoti Rosenstein, i cili ka autoritet mbi zotin Mueller, duhet ta shkëpusë veten nga hetimi për Rusinë dhe se kontrolli i këtij hetimi nuk duhet t’i jepet një zyrtari tjetër të emëruar nga presidenti.

Zëvendës Prokurori i Përgjithshëm Rosenstein bëri të enjten mbrëma një paralajmërim publik të pazakontë lidhur me njoftimet që u atribuohen burimeve anonime.

“Amerikanët duhet të tregojnë kujdes para se të pranojnë si të vërteta shkrimet që u atribuohen zyrtarëve anonimë, veçanërisht kur ata nuk identifikojnë vendin nga ka ardhur lajmi, pa folur pastaj për agjencinë qeveritare nga e kanë marrë,” tha Rosenstein në një deklaratë të shkurtër të publikuar nga Departamenti i Drejtësisë.

“Amerikanët duhet të jenë skeptikë në lidhje me akuzat nga burime anonime. Departamenti i Drejtësisë ka një politikë tradicionale që as i konfirmon dhe as i mohon akuza të tilla”, tha ai.

Është e paqartë se përse pse Rosenstein bëri një paralajmërim të tillë ose nëse dikush e nxiti ta bënte këtë.

ZGJEROHET HETIMI

Prokurori i Posaçëm Robert Mueller, që po heton çështjen e ndërhyrjes ruse në zgjedhjet presidenciale amerikane të vitit të kaluar, e ka shtuar me 13 prokurorë të tjerë ekipin e tij dhe ka në plan të punësojë edhe disa të tjerë, njoftoi të premten zëdhënësi i tij Peter Carr.

Që nga emërimi i tij më 17 maj, zoti Mueller, një ish drejtor i FBI-së, ka rekrutuar një ekip dinamik avokatësh, hetuesish e prokurorësh me përvojë të madhe në fusha që variojnë nga mashtrimet financiare tek e drejta kushtetuese.

Një prej ekspertëve në ekipin e tij ka punuar edhe në çështjen e Watergate.

Zoti Mueller u emërua në detyrën e Prokurorit të Posaçëm nga Zv/ Prokurori i Përgjithshëm Rod Rosenstein, i cili për këtë çështje ka komptencat e Prokurorit të Përgjithshëm, pas tërheqjes nga hetimet për Rusinë të Prokurorit të Përgjithshëm Jeff Sessions.

Mandati i Prokurorit të Posaçëm Mueller është prë të hetuar “përpjekjet e qeverisë ruse për të ndikuar mbi zgjedhjet presidenciale të vitit 2016 si dhe çështje të tjera të lidhura me to”.

Ndër çështje të tjera janë pretendimet nëse njerëz të fushatës së Presidentit Trump kanë bashkëpunuar në mënyrë të fshehtë me Rusinë dhe nëse është kryer ndonjë krim.

Zoti Trump, i cili konfirmoi të premten se po hetohet nga prokurori i posaçëm, i ka cilësuar hetimet si një “gjueti shtrigash” pa asnjë bazë.

Zëdhënësi i zotit Mueller tha se ekipi, i cili ende nuk është kompletuar përfundimisht, ka nisur hetimet dhe intervistat.

“Ky është një hetim aktiv”, tha zëdhënësi Peter Carr. “Zyra e Prokurorit të Posaçëm do të jetë në gjendje të shkojë përpara në hapat e ndërmarra deri tani”, tha ai.

Zyra e Prokurorit të Posaçëm financohet nga një fond i posaçëm, pa afat mbarrimi dhe jo nga Departamenti i Drejtësisë.

Trumpi thotë se është nën hetime

Presidenti i Shteteve të Bashkuara, Donald Trump, pranoi se është nën hetime në rastin e ndërhyrjes së dyshuar të Rusisë në zgjedhjet presidenciale në SHBA, më 2016.

Në një postim në Twitter, presidenti po ashtu duket se akuzoi zëvendësin e prokurorit të përgjithshëm amerikan për “gjueti shtrigash”.

“Po hetohem për shkarkimin e drejtorit të FBI-së nga personi që më ka thënë të shkarkoj drejtorin e FBI-së”, shkroi Trump në Twitter.

Zëvendësi i prokurorit të përgjithshëm, Rod Rosenstein, ka marrë përsipër hetimin e ndërhyrjes së dyshuar të Rusisë në zgjedhjet në SHBA pasi prokurori i përgjithshëm, Jeff Sessions, është tërhequr në muajin mars.

Rosenstein më pas ka emëruar këshilltarin e posaçëm, Robert Mueller, për të udhëhequr hetimet.

 

Shqetësime amerikane për bazën ruse në Serbi si një qendër spiunazhi

Shtetet e Bashkuara kanë shprehur shqetësim për një qendër të emergjencave që Rusia menaxhon në Serbi. Disa grupe perëndimore dhe analistë ushtarakë e perceptojnë si një bazë ushtarake të kamufluar që Kremlini e ka ngritur për të mbikqyrur interesat amerikane në Ballkan.

Zv.Ndihmës Sekretari i Shtetit për Europën dhe Euroazinë, Hoyt Brian Yee, gjaë një dëshmie në Senat këtë javë ngriti çështjen e “të ashtuquajturës qendër humanitare”.

Zoti Yee tha se Shtetet e Bashkuara janë të shqetësuara për bazën ruse në Nish, pranë kufirit të Serbisë me Kosovën, “jo aq për çfarë ajo është tani, por për formën që mund të marrë nëse realizohen kërkesat që Rusia i ka paraqitur Serbisë, për një lloj statusi të veçantë, me mbrojtje diplomatike ose imunitet”, siç u shpreh diplomati amerikan.

Rusia kundërshton afrimin e Ballkanit me Evropën

Duke folur gjatë seancës dëgjimore të mërkurën në Senat për influencat keqdashëse në Evropën juglindore, zoti Yee tha se “ne nuk besojmë se Rusia ka qëllime pozitive, ndërsa ne po përpiqemi ta ndihmojmë Ballkanin të arrijë objektivin e integrimit me Evropën”.

“Besojmë se Rusia po përpiqet ta pengojë këtë rrugëtim”, tha zoti Yee në përgjigje të një pyetjeje të Senatorit Chris Murphy, të shtetit Connecticut.

Shtetet e Bashkuara dhe Bashkimi Evropian kanë punuar për vite me radhë për të sjellë paqe të qëndrueshme dhe për ta integruar rajonin në komunitetit e vendeve Euro-Atlantike. Të gjitha vendet përqark Serbisë janë aktualisht vende anëtare të NATO-s, ose dëshirojnë që të anëtarësohen në këtë aleancë të Perëndimit.

Qendra ruse në qytetin Nish në Serbinë jugore që u çel fillimisht në vitin 2012, gjendet relativisht pranë forcës paqeruajtëse prej 4 mijë trupash në Kosovë. Pjesë e forcave ndërkombëtare në Kosovë janë edhe 600 ushtarë amerikanë.

Qendër humanitare apo qendër spiunazhi?

Shqetësimet për bazën ruse pranë kufirit me Kosovën kanë të bëjnë me faktin se Kremlini mund ta shndërrojë atë në një stacioni spiunazhi dhe në qendër komande të përpjekjeve të Rusisë kundër zgjerimit të BE-së dhe NATO-s në rajon. Rusia ka mbështetur gjithnjë refuzimin e Serbisë për njohjen e Kosovës si një shtet i pavarur.

Zoti Yee tha se Shtetet e Bashkuara janë kundër dhënies së statusit diplomatik, ose një statusi të ngjashëm, për rusët që ndodhen në Nish.

Zoti Yee tha se “ne mendojmë se është e rëndësishme, dhe ja kemi transmetuar këtë qeverisë serbe, që Serbia të ketë kontroll të plotë mbi territorin dhe strukturat e ngritura. Nëse do t’i lejojë Rusisë të krijojë një lloj qendre të posaçme për spiunazh dhe aktivitete të tjera keqdashëse, atëherë Serbia do të humbasë kontrollin mbi territorin e saj”.

Rusia ka mohuar se synon të ngrejë një bazë ushtarake në Serbi.

Dakortësi dypartiake amerikane rreth rolit të Rusisë

Demokratët dhe republikanët në Senatin amerikan kundërshtojnë bashkarisht përpjekjet e Rusisë për të rritur ndikimin në Ballkan.

Senatori republikan Ron Johnson, i tha shërbimit në gjuhën serbe të Zërit të Amerikës se beson se Moska “po bën gjithçka që mundet për të destabilizuar vendet në rajon dhe për t’i penguar ato” në marrjen e pozicioneve pro-perëndimore.

Senatori Johnson përmendi Malin e Zi, vendin më të ri anëtar të NATO-s dhe Maqedoninë, që ka kufi të përbashkët me Kosovën, si një shembull të ndërhyrjes ruse.

Prokurorët në Podgoricë kanë akuzuar Rusinë dhe agjentët e saj për financimin e një komploti, që do të ekzekutohej tetorin e kaluar, ditën e zgjedhjeve në Mal të Zi. Sipas autoriteteve malazese, plani ishte që të anëtarët e komplotit të vrisnin Kryeministrin Milo Gjukanoviç duke synuar pengimin e anëtarësimit të Malit të Zi në NATO.

U shmang një akt lufte

Njëzet persona të dyshuar për pjesëmarrje në këtë komplot u arrestuan vitin e kaluar gjatë mbrëmjes përpara ditës së zgjedhjeve. Fuqitë perëndimore dhe agjensitë e zbulimit janë shprehur se përfshirja e Rusisë në përpjekjen për rrëzimin e qeverisë së Malit të Zi ishte e qartë. Madje edhe vetë zoti Gjukanoviç, një socialist që u dorëhoq nga posti i kryeministrit dhjetë ditë përpara zgjedhjeve, tha se ekzistonte “një lidhje e fortë ndërmjet një faktori të huaj” dhe zhvillimeve politike në vend. Kremlini i ka quajtur “absurde” të gjitha këto akuza.

Prokurorët në kryeqytetin malazez thanë se Rusia “bëri shumë më tepër se sa thjesht ndërhyrje” në zgjedhje. Nëse plani i Moskës do të kishte rezultuar i suksesshëm, ata thanë se ai do të përbënte “një akt lufte”.

Senatori Johnson, kryetar i nënkomisionit të Senatit për Evropën, tha se Shtetet e Bashkuara dhe Bashkimi Evropian duhet t’u kushtojnë më shumë vëmendje vendeve të Ballkanit.

Senatori Johnson tha se “kemi një mundësi të mrekullueshme për t’i integruar këto vende me BE-në dhe demokracitë perëndimore. Nëse nuk luajmë rol udhëheqës, nëse nuk i kushtojmë vëmendje, këto vende mund të rrëshkasin lehtësisht nën dominimin e Rusisë”.

Ligjvënësi nga shteti Wisconsin ishte vetëm njëri prej 98 senatorëve që votuan këtë javë pro shtimit të sanksioneve ndaj Rusisë. Senatori Johnson dhe Senatori Murphy deklaruan këtë javë se shkurtimet e ndjeshme të planifikuara për buxhetin e Departamentit të Shtetit do të lihen mënjanë derisa të bihet dakort për një plan shpenzimesh të qeverisë amerikane.

Senatori Johnson tha se “duhet t’i dërgojmë një sinjal shumë të qartë Rusisë, se nuk mundet të vazhdojë me agresionin, përpjekjet për destabilizim, ndërhyrjet në zgjedhjet demokratike në mbarë botën, përfshirë këtu edhe Amerikën”.

Pence angazhon avokat rreth hetimeve ndaj tij për Rusinë

Nënpresidenti i SHBA-ve, Mike Pence, ka angazhuar një avokat për të mbikqyrur përgjigjet e tij ndaj pyetjeve rreth marrëveshjes së mundshme midis Rusisë dhe fushatës së Presidentit Donald Trump në 2016.

Zyra e Pence njoftoi rreth vendimit për të angazhuar Richard Cullen, kryetar i firmës ligjore McGuireWoods LLP.

Cullen është i njohur për përfaqësimin e klientëve të profilit të lartë si dhe ka qenë i përfshirë në hetimet Iran-Contra dhe Watergate.

Ky lajm erdhi pasi mediat raportuan se Trump ishte duke u hetuar nga avokati special Robert Mueller, për pengimin të mundshëm në fushën e drejtësisë.

Mueller po mbikëqyr një hetim të FBI-së për ndërhyrjet e supozuara ruse në zgjedhjet presidenciale dhe nëse kanë pasur ndonjë bashkëpunim me fushatën e presidentit Trump.

Trump, ka mohuar ndonjë bashkëpunim me Rusinë, duke thënë përmes Twitterit, se hetimet ndaj tij ishin të bazuara në “lajme të rreme”.

Trump po ashtu, ka punësuar avokatin e tij muajin e kaluar rreth këtyre hetimeve.

Zoti Mark Gjonaj mohon kategorikisht autorësinë e shkrimit dhe e quan të pavërtetë dhe parafabrikat!

Asambleisti i New Yorkut zoti Mark Gjonaj mohon kategorikisht autorësinë e shkrimit të botuar një ditë më parë nga portali jonë, titulluar”Rusia ka blerë një televizion dhe tri portale në Tiranë”. Në një letër drejtuar editorëve, ai e konsideron shkrimin të pavërtetë dhe parafabrikat.

Voal.ch e ribotoi shkrimin, duke e huazuar nga gazeta Dita.

Voal.ch i kërkon ndjesë Z.Mark Gjonaj dhe menjëherë e heq shkrimin nga botimi online dhe rrjetet sociale.

Më poshtë po ju sjellim mesazhin e Z.Mark Gjonaj:

“E nderuar Znj. Bucpapaj,

Ne pamundesi te gjetjets se nje email per t’ju kontaktuar, ju lutem pranoni kete mesazh per te komunikuar me ju nga Zyra e Asambleistit te New Yorkut Mark Gjonaj per nje artikel te botuar nga mediumi juaj qe eshte totalisht i fabrikat dhe i pavertete.
Mark Gjonaj
Bronx, NY, 10461

15 Qershor, 2017

Drejtuar Editoreve/Botuesve te VOAL:

Po ju shkruaj ne lidhje me nje artikull te botuar ose ribotuar diteve te fundit ne portalin tuaj: https://www.voal.ch/rusia-ka-blere-nje-televizion-dhe-tre-portale-ne-tirane-nga-mark-gjonaj/  me 15 Qershor, 2017 ku identifikohem si Asambleist i Shtetit te New Yorkut.

Dua te bej te ditur publikisht dhe kategorikisht se as une dhe as dikush ne emrin tim, nga zyra ime e Asamblese apo e Fushates, nuk ka shkruar nje artikull te tille, nuk ka dhene interviste dhe as ka komentuar ne lidhje me kete ceshtje.

Si rrjedhoje, kerkoj qe menjehere ky artikull i fabrikuar te hiqet nga faqja juaj ne internet dhe te ndalohet shperndarja dhe botimi i ketyre lajmeve te fabrikuara dhe te rreme dhe gjithashtu kerkoj qe te botoni nje pergenjeshtrim te ketyre deklaratave.

Ju lutem konfirmoni qe e keni marre kete korrespondence dhe kerkoj reagimin tuaj te shpejte dhe konfirmimin tuaj qe do te veproni ne perputhshmeri me kerkesat qe ju jane bere ne kete email. Ne pamundesi te dergimit nepermjet emailit ne faqen tuaj, ju lutem pranoni kete mesazh ne Facebook.

Sinqerisht,

Mark Gjonaj
Asambleist i Shtetit te New Yorkut.”

SHBA: Juria e bllokuar për rastin “Cosby”

Anëtarët e jurisë në procesin gjyqësor të komedianit të famshëm Bill Cosby i thanë gjykatësit se janë të bllokuar lidhur me akuzat se ai kishte droguar dhe ngacmuar seksualisht një grua në vitin 2004.

Juria po debatonte për akuzat ndaj zotit Cosby që nga e hëna dhe here pas here anëtarët e saj dukeshin se po e humbisnin durimin, kur pyesnin herë pas here gjykatësin për sqarime të provave ose për të dëgjuar përsëri pjesë nga dëshmitë.

Gjykatësi Steven O’Neill u tha anëtarëve të jurisë se gjykatës të tjerë nuk do t’ua kishin pranuar gjashtë kërkesat për të për të rishikuar provat nga procesi, por shtoi se meqë ua kishte pranuar kërkesën e parë, ndjehej i detyruar t’ua pranonte edhe të tjerat, sepse nuk donte që ata të mendonin se disa të dhëna ishin më të rëndësishme se të tjerat.

Zoti O’Neill u tha anëtarëve të jurisë të vazhdonin të shqyrtonin akuzat, pasi ata i thanë se nuk mund të binin dakord nëse Cosby ishte fajtor apo jo.

79 vjeçari Cosby akuzohet se ka droguar dhe ngacmuar Andrea Constandin dhe se i kishte dhënë ilaçe që ia kishin bërë të pamundur të lëvizte apo të kundërshtonte kur filloi ta prekte në shtëpinë e tij në Filadelfia.

Nëse shpallet fajtor, Cosby mund të burgoset për jetë.

Mbi 50 gra kanë thënë se ai i ka sulmuar seksualisht në incidente që nga vitet 1960. Shumë nga incidentet, nëse kanë ndodhur, kanë ndodhur shumë kohë më parë dhe nuk mund të trajtohen më si raste penale.

Ligjvënësi Scalise vazhdon të jetë në gjendje kritike

Gjendja shëndetësore e ligjvënësit republikan Steve Scalise mbetet kritike edhe pas operacionit. Sipas autoriteteve ai do të ketë nevojë për të tjera ndërhyrje.

Mbrëmë, presidenti Trump vizitoi qendrën spitalore “MedStar” në Washington së bashku me gruan Melania, për të parë nga afër ligjvënësin Scalise dhe familjen e tij.

Më vonë presidenti shkroi në Twitter se gjendja shëndetsore e ligjvënësit është kritike por Scalice është “një luftëtar i vërtetë”.

Ndërkohë ndeshja e bejsbollit e përfaqësuesve të kongresit amerikan do të zhvillohet sot sipas planifikimit, pavarësisht sulmit të papritur ndaj ligjvënësve republikanë gjatë stërvitjes, ku dhe mbeti i plagosur Scalise.

Presidenti Donald Trump nuk do të marrë pjesë në ndeshje edhe pse ai dëshironte të ishte i pranishëm, siç tha zëdhënësi i tij Sean Spicer, dhe kjo për arsye sigurie.

Trumpi viziton kongresistin e plagosur, i cili mbetet në gjendje kritike

Presidenti i Shteteve të Bashkuara, Donald Trump, vizitoi kongresistin amerikan, i cili u plagos të mërkurën në një sulm me armë.

Personi i armatosur, i cili qëlloi të mërkurën kongresistin republikan, Steve Scalise, dhe disa njerëz të tjerë, të cilët po ushtronin bejsboll jashtë Uashingtonit, ka pasur histori të gjatë të mosdurimit të republikanëve.

James Hodgkinsin, 66 vjeç, i cili është vrarë nga policia në vendin e ngjarjes, ka qenë pjesë e një grupi të quajtur “Shkarkoni Partinë Republikane”.

Presidenti Trump dhe Zonja e Parë Melania ka kanë kaluar rreth gjysëm ore me kongresistin Scalise, i cili mbetet në gjendje kritike në një spital në Virxhinia.

Trump u bëri thirrje amerikanëve që të lënë mënjanë dallimet politike.

“Jemi më të fuqishëm kur jemi të bashkuar dhe kur punojmë bashkë për të mirën e përbashkët”, tha Trump.

Media: Hodgkinson ishte kritik i ashpër i Presidentit Trump

Personi që hapi zjarr ndaj ligjvënësve republikanë, gjatë një stërvitjeje bejzbolli në Aleksandria të shtetit Virxhinia, ishte një kritik i ashpër i Presidentit Donald Trump, sipas njoftimeve të mediave sociale. Në mediat amerikane gjithashtu thuhet se vitin e kaluar ai ishte vullnetar në fushatën e senatorit nga Vermonti, Bernie Sanders.

James Hodgkinson, 66 vjeç, nga qyteti Belleville i Ilinoit, plagosi katër vetë, duke përfshirë ligjvënësin Steve Scalise, dy policë të Uashingtonit dhe një anëtar të personelit të një ligjvënësi tjetër të Dhomës së Përfaqësuesve. Përmes një deklarate për mediat, Presidenti Trump njoftoi se Hodgkinson vdiq nga plagët.

Hodgkinson, i cili ishte pronar i një biznesi për inspektimin e shtëpive, kishte një histori problemesh me autoritetet. Sipas të dhënave publike të policisë, në vitin 2006 ai u arrestua për dhunë në familje. Ai gjithashtu duket se ka qenë një mbështetës aktiv i fushatës për president të senatorit Bernie Sanders.

REAGON SENATORI SANDERS

Në një deklaratë nga salla e Senatit, Senatori Sanders tha se ishte informuar se Hodgkinson është “dikush që mesa duket ka bërë punë vullnetare në fushatën time presidenciale”.

“Jam i trishtuar nga ky akt”, tha senatori Sanders. “Dhe më lejoni të jem i qartë. Dhuna e çdo lloji është e papranueshme në shoqërinë tonë dhe e dënoj këtë veprim në termat më të forta”.

Dy profile të Facebook-ut që thuhet se i përkisnin James Hodgkinsonit ishin të mbushura me postime pasionante dhe nganjëherë të zemëruara. Fotoja e profilit për njërën nga llogaritë në Facebook e përshkruan senatorin Sanders si njeri të qeverisë. Në profilin tjetër ai thotë se “Socializmi demokratik mund të përmblidhet me këto fjalë: Ne populli”, duke iu referuar preambulës së kushtetutës amerikane.

Pothuaj çdo ditë në profilet e tij në Facebook ai kritikonte presidentin Trump, shpesh duke përdorur gjuhë vulgare.

“Trump është fajtor dhe duhet të shkojë në burg për tradhti”, thuhet në një nga postimet në faqen e Hodgkinsonit të publikuar në fillim të këtij muaji.

Në disa postime të tjera, Hodgkinson kritikonte edhe ish kandidaten demokrate për president, Hillary Clinton.

Pasi zyrtarët e zbatimit të ligjit njoftuan se ata besonin se Hodgkinson ishte autori i sulmit, profilet e Facebookut u konvertuan në një hapësirë të improvizuar për debate politike.

TRUMP DËNON ASHPËR INCIDENTIN

Presidenti Donald Trump e dënoi plagosjen e ligjvënësit të lartë republikan, duke e quajtur një “sulm shumë, shumë brutal” dhe bëri thirrje që të gjithë amerikanët të lënë mënjanë dallimet dhe të luten për shërimin e viktimave.

Presidenti Trump tha se “shumë jetë do të ishin humbur pa ndërhyrjen heroike” të Policisë së Kapitolit.

“Ne mund të kemi dallimet tona, por ia dalim mirë në momente si këto… sepse mbi të gjitha e duam vendin tonë”, tha zoti Trump duke folur nga Shtëpia e Bardhë.

Zoti Trump e quajti kongresmenin Scalise një mik shumë të mirë dhe patriot.

Ishte hera e parë që zoti Trump komentonte si president pas një incidenti me armë zjarri.

Por ndryshe nga fjalimet e shumta të ish-Presidentit Barak Obama në raste të tilla, zoti Trump nuk përmendi rregullat për armët.

Yee: Roli amerikan, i nevojshëm për stabilitetin dhe për zmbrapsjen e ndikimit rus në Ballkan

Një zyrtar i lartë i Departamentit të Shtetit tha të mërkurën se Ballkani Perëndimor përballet me sfidat më serioze që nga viti 1990. Zëvendës Ndihmës Sekretari amerikan i Shtetit, Hoyt Brian Yee foli në një seancë për rajonin në Senat, ku senatorë dhe ekspertë bënë thirrje për vazhdimin e angazhimit amerikan në Ballkan për të zmbrapsur ndikimin rus dhe për të shmangur përshkallëzimin e krizave, si edhe për të mbështetur reformat dhe stabilitetin. Keida Kostreci e Zërit të Amerikës, ndoqi seancën.

Në një ditë kur një anëtar i Kongresit dhe disa persona të tjerë u plagosën pranë Uashingtonit, zoti Yee e filloi seancën duke shprehur keqardhjen dhe solidaritetin e kolegëve të Departamentit të Shtetit, në seancën e Nënkomisionit për Evropën dhe Bashkëpunimin për Siguri Rajonale.

Zoti Yee tha se nëse kërcënimet e jashtme dhe të brendshme, nuk marrin përgjigje, ato mund të kenë pasoja serioze për Ballkanin Perëndimor, Evropën dhe Shtetet e Bashkuara.

“Ballkani Perëndimor përballet me një numër kërcënimesh: Institucione të brishta, mangësi në shtetin ligjor dhe media jo e lirë, i kanë hapur rrugën një korrupsioni të rrënjosur thellë. Ky korrupsion vë në rrezik këto demokraci të reja dhe u hap rrugën aktorëve destabilizues, përfshirë ekstremistë të dhunshëm, grupe të krimit të organizuar dhe vende që duan të ushtrojnë ndikim keqdashës”, tha ai.

Zoti Yee tha se problemet e brendshme, u kanë hapur rrugën kërcënimeve të jashtme si Rusia që synon të frenojë përpjekjet e vendeve të rajonit për të ndjekur një rruhë euro-atlantike.

Zyrtari i Departamentit të Shtetit, përmendi disa përparime të arritura me mbështetjen amerikane, përfshirë zbatimin e reformës në drejtësi në Shqipëri.

“Me angazhimin tonë dhe të Evropës, gjatë muajit të kaluar, kemi parë disa suksese reale, me hyrjen e Malit të Zin ë NATO, sigurisht me ndihmën e Senatit, udhëheqësit e Maqedonisë bashkëpunuan për të formuar një qeveri të re, opozita e Shqipërisë ra dakord që t’i jape fund bojkotit dhe të marrë pjesë në zgjedhje më 25 qershor dhe Serbia pritet të hapë dy kapituj të ri me Bashkimin Evropian këtë muaj”.

Ai gjithashtu theksoi nevojën e vazhdimit të dialogut mes Kosovës dhe Serbisë.

Kryetari republikan i nënkomisionit Ron Johnson, që sapo ka bërë një vizitë në rajon, tha se mesazhi i atyre vendeve është i qartë:

“Udhëheqja amerikane është e nevojshme në Evropën juglindore. Kur tërhiqen Shtetet e Bashkuara, vakuumi i ndikimit mbushet nga vende me synime të dëmshme”, tha ai duke iu referuar ndikimit rus, një nga shqetësimet më të mëdha që u shprehën në seanca.

Senatori Johnson tha se është në interesin e Shteteve të Bashkuara të ketë stabilitet në Ballkan.

Edhe nënkryetari i nënkomisionit, demokrati Chris Murphy theksoi se Shtetet e Bashkuara duhet t’i kushtojnë më shumë vëmendje Ballkanit, duke shprehur rëndësinë e rajonit në arenën ndërkombëtare.

“Tre nga sfidat më të mëdha me të cilat përballet politika e jashtme amerikane, gërshetohen në Ballkan. Së pari, sfida e maskuar dhe e hapur e ndikimit rus që minon mbështetjen e instutucioneve perëndimore dhe gërryen më tej, qeverisjen demokratike; së dyti korrupsioni i rrënjosur që frenon përparimin ekonomik dhe i destabilizon qeveritë në gjithë rajonin dhe së treti radikalizimi në rritje i të rinjve myslimanë dhe numri relativisht i atyre që kanë shkuar në Siri nga ky rajon që të luftojnë me ISIS-in”.

… por senatori demokrat shprehu pakënaqësinë për mesazhin që përçon administrata aktuale amerikane e drejtuar nga republikani Donald Trump.

“Ka një mospërputhje totale mes ekspozesë që bëni ju dhe sfidave të shumta që kanë nevojë për shtimin e burimeve dhe buxhetit që është paraqitur”, iu drejtua ai zotit Yee.

Zoti Murphy i referohej projekt-buxhetit të Shtëpisë së Bardhë për politikën e jashtme që sapo është prezantuar në Kongres dhe që ai tha se parashikon shkurtime të mëdha për Ballkanin. Ai tha se sipas mendimit të tij, ato shkurtime nuk kanë asnjë shans për t’u miratuar.

Zoti Murphy foli për përshtypjet që merr kur takohet me udhëheqësit e Ballkanit.

“Ata janë të shqetësuar se ne po dërgojmë një mesazh me këto shkurtime, me mungesën e mbështetjes për NATO-n, me kritikat ndaj aleatëve të BE-së, se ne nuk jemi më të interesuar për rajonin”.

Si senatorët ashtu edhe zoti Yee dhe ekspertët, në shumë raste theksuan shqetësimin për rritjen e interesit dhe aktivitetit rus në Ballkanin Perëndimor dhe thanë se po punojnë me vendet e Ballkanit për t’u përballur me ndikimin keqdashës të Moskës. Ata thanë se dobësitë e brendhshme dhe presionet e Rusisë, ekspozohen në mungesë të politikave të qarta të BE-së dhe Shteteve të Bashkuara.

Argumenti i tyre ishte se mungesa e vëmendjes mund t’i kthejë problemet që janë të zgjidhshme, në situata të rrezikshme.

“Mesazhi im qendror është se paqartësia e vazhdueshme e mesazhit amerikan sot, mund të shkaktojë një krizë nesër, që nga ana tjetër do të kërkonte një angazhim shumë më të madh amerikan sesa do të ishte dashur për shmangien e krizës që pa filluar”, tha Damon Wilson, zëvendës president ekzekutiv i Këshillit të Atlantikut.

Plagoset kongresmeni Steve Scalise

Ligjvenësi Stephen Scalise, republikan nga shtetit të Luizianës, u plagos sot me armë zjarri ndërsa ishte duke luajtur bejsboll në një fushë në Aleksandria, shumë pranë Uashingtonit.

Sipas njoftimeve në vendin e ngjarjes është shtënë disa herë me armë.

Sipas punonjësve të ndihmës së shpejtë zoti Scaliese është plagosur në këmbë. Ai ishte duke luajtur bejsboll me një grup tjetër ligjvenësish.

Ligjvenësi Scaliese është një prej drejtuesve të grupit të ligjvenësve republikanë në Dhomën e Përfaqësuesve që kanë shumicën.

Ka njoftime se mund të ketë edhe të plagosur të tjerë.

Zëdhënësi i Shtëpisë së Bardhë Sean Spicer tha se Presidenti Trump dhe nënpresidenti Pence janë vënë në dijeni të situatës.

Presidenti Trump mbështet rritjen e numrit të trupave ushtarakë në Afganistan

Presidenti i Shteteve të Bashkuara, Donald Trump, e ka mbështetur rritjen e trupave ushtarake amerikane në Afganistan. Kështu ai i ka dhënë autoritet Ministrit të Mbrojtjes, Jim Mattis për të vendosur rreth nivelit të trupave në Afganistan, kanë raportuar mediat.

Gjenerali i ushtrisë, John Nicholson, i cili udhëheq forcat ushtarake në Afganistan, ka thënë se i nevojiten “disa mijëra” trupa të tjerë. Momentalisht atje janë 8,400 persona të forcave ushtarake amerikane.

Në Pentagon është diskutuar për 3000 deri në 5000 forca shtesë, disa prej të cilave mund të dërgohen nga aleatët e SHBA-ve dhe do të përbëhen kryesisht nga ekipe dhe trajnerë ajrorë për të mbështetur forcat afgane.

Vendimi i Trumpit për të zgjeruar ushtrinë në luftën 15-vjeçare në Afganistan, vjen pas dhënies së kompetencave nga ana e tij, kundrejt gjeneralëve të SHBA-së, që drejtojnë forcat amerikane në Irak dhe Siri.

Mattis e ka paralajmëruar Kongresin se forcat afgane të mbështetura nga SHBA-të, nuk po fitojnë luftën kundër talibanëve.

Disa zyrtarë amerikanë kanë vënë në pikëpyetje nëse një rritje e tillë modeste, do të ishte e mjaftueshme për ta ndryshuar rrjedhën e luftës.

Mattis: Shtetet e Bashkuara po humbin në Afganistan

Sekretari amerikan i Mbrojtjes, Jim Mattis, i ka thënë Kongresit se Shtetet e Bashkuara nuk janë duke fituar në Afganistan dhe se gjatë muajit korrik do të prezantojnë një strategji të re duke synuar ndryshimin e situatës.

Mattis gjithashtu ka thënë në dëshminë e Komitetit të Senatit për Shërbimet e Armatosura, se goditjet e fundit kundër forcave qeveritare siriane kanë qenë në vetëmbrojtje, pasi sipas tij Shtetet e Bashkuara kanë ndërmarrur të gjitha masat e nevojshme për të mbrojtur ushtarët e saj në terren.

“Ne nuk jemi duke fituar tani në Afganistan. Do ta korrigjojmë këtë sa më shpejt që të jetë e mundur”, ka thënë ai duke shtuar se Pentagoni ka gjasa të kërkojë një rritje prej 3-5 për qind të buxhetit të saj nga 2019 deri në vitin 2023.

Në Shtetet e Bashkuara, mediat kanë raportuar se Mattis do të rekomandojë dërgimin e 3,000 deri në 5,000 trupave amerikane për të shkatërruar, atë që ai e quajti “bllokadë” midis forcave të mbështetura nga SHBA-të dhe talibanëve.

Javën e kaluar, Shtetet e Bashkuara kanë rrëzuar një dron të armatosur të qeverisë siriane i cili kishte sulmuar forcat e mbështetura nga SHBA-të, në Siri. Në po të njejtën ditë, këto forca të mbështetura nga SHBA-të, sulmuan dy kamionë të qeverisë siriane afër qytetit jugor, At Tanf.

Rusia në anën tjetër ka thënë më 10 maj, se i konsideron të papranueshme sulmet e Shteteve të Bashkuara kundrejt forcave qeveritare në Siri.

Rosenstein: nuk do të zbatoj urdhëra për shkarkimin Prokurorit Mueller

Zëvendës Prokurori i Përgjithshëm Rod Rosenstein, i cili emëroi ish drejtorin e FBI-së Robert Mueller për të drejtuar hetimin lidhur me mundësinë e ndërhyrjes ruse në zgjedhjet presidenciale të Shteteve të Bashkuara, për ta ndihmuar zotin Trump që t’i fitojë zgjedhjet, i siguroi ligjvënësit se pa një arsye të fortë, ose të ligjshme, nuk do t’i zbatonte urdhërat nga Presidenti Trump ose kushdo tjetër, për shkarkimin nga detyra të prokurorit special, Robert Mueller.

Këto komente ai i bëri gjatë një seance dëshmish në Senat. Zoti Rosenstein tha se ai nuk ka parë ndonjë provë ose arsye për të pushuar Prokurorin e Posaçëm Mueller, i cili është duke hetuar ndërhyrjen e mundshme ruse në zgjedhjet amerikane dhe lidhjet e mundshme të këshilltarëve të president Trump me rusët.

Komentet pasuan pyetjet nga ligjvënësit lidhur me njoftimet e shtypit se Presidenti Trump po mendonte ta shkarkonte Prokurorin e Posaçëm. Prokurori i Përgjithshëm ka autoritetin për shkarkimin e Porkurorit të Posaçëm, por meqë Jess Sessions është tërhequr nga hetimet për Rusinë, për shkak të mbështetjes së tij të fuqishme për zotin Trump gjatë fushatës dhe më pas të zbulimeve se ai ishte takuar dy herë me ambasadorin rus në Uashington, zyrtari që mund ta pushojë atë është zëvendësi i tij, Rosenstein.

Mediat cituan të hënën aleatë republikanë të zotit Trump të kishin thënë se ai ka lënë të kuptohet se po shqyrton mundësinë për ta pushuar zotin Mueller, emërimi i të cilit muajin e kaluar u vlerësua gjerërisht si nga republikanët, edhe nga demokratët e opozitës.

Megjithatë, disa republikanë janë duke sugjeruar se Mueller duhet të shkarkohet, pasi në grupin e preokurorëve që ka ngritur ka përfshirë edhe prokurorë, të cilët kanë bërë donacione për rivalen e zotit Trump në zgjedhje, ish Sekretaren e Shtetit, Hillary Clinton.

Një nga mbështetësit kryesorë të zotit Trump, ish kryetari i Dhomës së Përfaqësuesve Newt Gingrich, tha se “republikanët ushqejnë iluzione kur mendojnë se Prokurori Special ka për të qenë i drejtë dhe i paanshëm.

Megjithatë, një tjetër republikan, kryetari aktual i Dhomës së Përfaqësuesve, Paul Ryan, u tha gazetarëve se “Më e mira për Presidentin është të lejojë që hetimi të vazhdojë me drejtësi dhe në mënyrë të pavarur. Mendoj se këshilla më e mirë për të do të jetë që ta lejojë zotin Robert Mueller të bëjë punën e tij si Prokuror i Posaçëm.”

Senatorja demokrate e Kalifornisë Dianne Feinstein i tha zotit Rosenstein, se “do të ishte katastrofike në se presidenti Trump e pushon nga puna zotin Mueller si kryesues i komisionit hetimor”.

Zëvendës Prokurori i Përgjithshëm Rod Rosenstein e siguroi zonjën Feinstein se nuk ka për të ndodhur pushimi i zotit Mueller, pa pëlqimin e tij.

Sessions: akuzat për bashkëpunim me rusët, “gënjeshtra të neveritshme”

Prokurori i Përgjithshëm Jeff Sessions dëshmoi në një seancë të hapur para Komisionit të Senatit që po heton lidhjet e dyshuara mes zyrtarëve të fushatës presidenciale të Donald Trumpit dhe ndërhyrjes së Kremlinit në zgjedhjet amerikane.

Ai tha se akuzat ndaj tij lidhur me disa takime private me zyrtarë rusë në Hotelin Mayflower, me synimin për të ndërhyrë në zgjedhjet amerikane, janë “gënjeshtra të neveritshme”.

Ai pranoi se është takuar me ambasadorin rus, por se asgjë e papërshtatshme nuk ka ndodhur në ato takime. Ai shtoi se nuk ka patur njohuri për biseda të zyrtarëve të fushatës së zotit Trump me zyrtarë rusë.

Zoti Sessiosn tha se ai ishte tërhequr nga hetimet për Rusinë, jo ngaqë kishte bërë diçka të papërshtatshme, por sepse kjo kishte qenë kërkesa e Departamentit të Drejtësisë dhe se këtë proces tani po e mbikqyrte zëvendësi i tij, Zëvendës Prokurori i Përgjithshëm, Rosenstein.

Ai shprehu përkushtimin e tij për t’i shërbyer vendit me ndershmëri, një gjë që e “kam bërë, – tha ai, për 35 vjet me radhë”.

Zoti Sessions, që ka qenë senator për 20 vjet, kërkoi vetë të dëshmonte para Komisionit të Zbulimit, pasi ish drejtori i FBI-së James Comey, la të kuptohej në seancën e dëshmisë së tij javën e kaluar, se mund të ketë pasur më shumë se një arsye që Prokurori i Përgjithshëm vendosi të tërhiqej nga drejtimi i hetimit për Rusinë.

Zoti Sessions e shmangu veten nga hetimi për Rusinë në Mars, pasi u zbulua se kishte pasur disa takime me ambasadorin e Moskës në Uashington gjatë fushatës presidenciale.

Megjithatë, paraqitja e tij para Komisionit të Zbulimit e ekspozon atë ndaj pyetjeve të tjera lidhur me bashkëpunimin e mundshëm mes zyrtarëve të fushatës së zotit Trump dhe Rusisë, si edhe për rolin që mund të ketë patur në shkarkimin e zotit Comey, në një kohë kur ish drejtori i FBI-së drejtonte hetimin për Rusinë.

Sekretari i Shtypit, Sean Spicer tha të hënën se presidenti është “në dijeni të faktit” që zoti Sessions do të dëshmojë dhe se ai pret me padurim fundin e hetimit për ndërhyrjen e Rusisë, që siç tha ai, ka tërhequr vëmendjen nga çështjet e tjera me të cilat përballet vendi.

Trumpi do të shkarkojë këshilltarin e posaçëm që heton lidhjet me Rusinë?!

Robert Mueller

 

Një bashkëpunëtor i afërt i presidentit të Shteteve të Bashkuara, Donald Trump, tha se ky i fundit po shqyrton shkarkimin e këshilltarit të posaçëm, Robert Mueller, të cilin Departamenti i Drejtësisë e emëroi muajin e kaluar, për të hetuar lidhjet e Rusisë me fushatën e Trumpit.

“Mendoj se ai është duke shqyrtuar ndoshta shkarkimin e këshilltarit të posaçëm. Mendoj se po e mat këtë opsion”, tha Christopher Ruddy, shef ekzekutiv i Newsmax Media-s dhe mik i Trumpit, për PBS NewsHour.

“Mendoj se është shumë e qartë nga ajo që tha njëri prej avokatëve të tij së voni”, tha Ruddy, me sa duket duke iu referuar avokatit të Trumpit, Marc Kasowitz, i cili ka thënë se Trump është “shfajësuar” me dëshminë e ish-drejtorit të FBI-së, James Comey, javën e kaluar.

Në këtë dëshmi, Comey ka thënë se Trump personalisht nuk ka bashkëpunuar me Rusinë.

“Unë personalisht mendoj se do të ishte gabim shumë i madh shkarkimi i Muellerit”, shtoi ai.

Ruddy po ashtu tha se Mueller ishte në shqyrtim për postin e drejtorit të FBI-së para se të emërohej këshilltar i posaçëm.

Zëdhënësi i Shtëpisë së Bardhë, Sean Spicer, tha më vonë se Ruddy “nuk ka folur kurrë me presidentin për këtë çështje”.

Trumpi paditet për “pranim pagesash nga qeveritë e huaja”

Zyrtarët në Merilend dhe Uashington ngritën padi kundër presidentit amerikan, Donald Trump, për, siç thanë, pranim të pagesave nga qeveritë e huaja përmes perandorisë së tij të biznesit.

Paditë citojnë një nen të Kushtetutës, i cili thotë se asnjë zyrtar federal nuk duhet të pranojë dhuratë ose pagesë nga një qeveri e huaj.

Padia, e cila u ngrit nga prokurorët e përgjithshëm të Uashingtonit dhe Merilendit, Karl Racine and Brian Frosh, pretendon se Trump “është duke shkelur në mënyrë flagrante Kushtetutën”.

“Asnjëherë në historinë e këtij vendi nuk kemi pasur president me këtë lloj ngatërresash biznesore ose president që nuk pranon të distancohet në mënyrë adekuate nga pronat e tij”, tha prokurori Racine.

Shtëpia e Bardhë i mohoi pretendimet.

Prokurorët Racine dhe Frosh po përpiqen të nxjerrin një urdhër nga Gjykata e Qarkut në Merilend që do të ndalojë Trumpin të marrë pagesa qeveritare përtej pagës së tij.

A ka regjistrime të bisedave Trump-Comey?

Ligjvënës republikanë po i kërkojnë Shtëpisë së Bardhë të publikojë regjistrimet e bisedave kryesore që kanë patur Presidenti Donald Trump me drejtorin e shkarkuar të FBI-së James Comey, nëse ato eksiztojnë.

Në qoftë se ekzistojnë, kasetat me bisedat e regjistruara mund të sqarojnë çështjen nëse gjatë darkës në Shtëpinë e Bardhë në muajin shkurt, zoti Trump i ka kërkuar zotit Comey, i cili në atë kohë drejtonte hetimin e FBI-së për mundësinë e ndërhyrjes së Rusisë në zgjedhjet presidenciale, të hiqte dorë nga hetimi ndaj Këshilltarit të Sigurisë Kombëtare Michael Flynn.

Presidenti Trump e kishte shkarkuar zotin Flynn pasi doli se ai kishte gënjyer nënpresidentin Pence lidhur me kontaktet e tij me ambasadorin rus në Uashington.

Në një dëshmi dramatike para ligjvënësve javën e kaluar, zoti Comey tha se kishte ndjerë se Presidenti Trump i kishte sugjeruar të mos e vazhdonte hetimin ndaj zotit Flynn.

Zoti Comey po ashtu dëshmoi se presidenti Trump i kishte kërkuar të tregonte bensikëri ndaj tij, gjë që ish drejtori i FBI-së nuk pranoi ta bënte, si dhe të “largonte renë” e krijuar lidhur me hetimin ndaj ndërhyrjes ruse.

Ekspertët ligjorë thanë se rrjedhja e informacionit prej zotit Comey lidhur me bisedën që ai kishte patur më 14 shkurt me Presidentin, tek një mik i tij, i cili ia dha atë gazetës “The New York Times”, mund të mos ketë qenë diçka e paligjshme, pasi informacioni nuk ishte sekret.

Urdhri i Trumpit për udhëtimin pëson tjetër disfatë

Një gjykatë e apelit në Shtetet e Bashkuara mbajti në fuqi vendimin e një gjykate më të ulët, i cili bllokon urdhrin ekzekutiv të presidentit Donald Trump për udhëtimin.

Ky urdhër u ndalon përkohësisht hyrjen në SHBA shtetasve nga gjashtë vende me shumicë myslimane.

Tre gjykatës të Gjykatës së Apelit të Qarkut 9 thanë se nuk do të shfuqizojnë vendimin që ka lëshuar një gjykatë në Havaje, në muajin mars, për pezullimin e urdhrit të presidentit.

Gjykatësit thanë se urdhri i presidentit është motivuar nga “një paragjykim anti-mysliman”.

Administrata Trump thotë se ndalimi i përkohshëm i udhëtimit, që prek shtetasit e Iranit, Sirisë, Sudanit, Libisë, Somalisë dhe Jemenit, ka të bëjë me shqetësimet për sigurinë kombëtare.

“Konstatojmë se presidenti, me lëshimin e urdhrit ekzekutiv, ka tejkaluar autoritetin që i është dhënë nga Kongresi”, thanë gjyqtarë në vendimin e shkruar.

Urdhri i pezulluar, i nënshkruar më 6 mars, ka qenë rishikim i urdhrit fillestar të Trumpit, të nënshkruar më 27 janar, i cili u ka ndaluar hyrjen në SHBA shtetasve të shtatë vendeve me shumicë myslimane, përfshirë Irakun.

Porto-Riko: Votim për tu bërë shtet i SHBA-ve në referendumin joobligues

Banorët në Porto-Riko kanë votuar për të qenë shtet në Shtetet e Bashkuara në referendumin joobligues, i cili është përshkruar me dalje të vogël për shkak të bojkotit nga ana e disa grupeve.

Rezultatet e referendumit të djeshëm tregojnë se 97.2% kanë votuar për shtetësi, 1.5% e kanë mbështetur pavarësinë, ndërsa 1.3% nuk kanë dëshiruar kurrfarë ndryshimi në statusin e këtij ishulli në Karaibe.

Megjithqë më se 480 mijë votues janë përcaktuar për shtet, dalja në referendum ishte afro 23%, prej 2.2 milionë votuesve të regjistruar.

Kjo pjesëmarrje e ulët është pritur pas thirrjes nga partitë opozitare për ta bojkotuar referendumin, duke e quajtur atë “ngjarje të parëndësishme” dhe “cirk”.

Në përgjithësi, ata që kanë bojktuar, nuk kanë mbështetur ndryshim të statusit ose pavarësi.

Pavarësisht nga kjo, guvernatori i Porto-Rikos, Ricardo Rossello, është angazhuar për lëvizje, që ky ishull të bëhet shteti i 51-të amerikan.

“Ne do të shkojmë para forumeve ndërkombëtare për ta mbrojtur argumentin e rëndësisë që Porto-Riko të jetë shteti i parë hispanik në Shtetet e Bashkuara”, tha Rosello.

Ky referendum koincidoi me 100 vjetorin, që Shtetet e Bashkuara u kanë garantuar shtetësi banorëve të këtij ishulli.

Megjithatë, këta banorë nuk lejohen të votojnë në zgjedhjet presidenciale amerikane dhe kanë përfaqësim të kufizuar në Kongresin e Shteteve të Bashkuara.

Përkundër referendumit, i takon Kongresit amerikan, që të bëjë çfarëdo vendimi lidhur me ndryshimin e statusit politik të këtij territori.

Edhe Sessions do të dëshmojë për “ndërhyrjen ruse” në SHBA

Prokurori i përgjithshëm i Shteteve të Bashkuara, Jeff Sessions, do të dëshmojë para një komiteti të Senatit që po heton ndërhyrjen e Rusisë në zgjedhjet presidenciale në SHBA, më 2016.

Në një letër të parë nga agjencitë e lajmeve, thuhet se Sessions ka vendosur të dalë para Komitetit të Senatt për Inteligjencë pas dëshmisë që ka dhënë ish-drejtori i FBI-së, James Comey, para të njëjtit panel.

FBI po kryen po ashtu hetime të ndara të ndërhyrjes ruse.

Sessions është detyruar të tërhiqet nga hetimet e FBI-së për shkak të kontakteve të tij me ambasadorin rus në SHBA, gjatë fushatës presidenciale.

Sessions do të japë dëshminë e tij të martën.

Hetuesit amerikanë kërkojnë prova nga biseda Trump – Comey

Hetuesit e Kongresit amerikan janë duke kërkuar dokumentimin e bisedave në mes të presidentit amerikan Donald Trump dhe ish drejtorit të FBI-së, James Comey. Të dy palët akuzojnë njëri – tjetrin për gënjeshtra rreth bisedave që kanë pasur me herët.

Komisioni i Inteligjencës i kërkoi Shtëpisë së Bardhë të rikthejë çdo material që dokumenton bisedën Trump – Comey gjatë një darke, në shkurt të këtij viti.

Gjatë kësaj bisede dyshohet se Trump ka kërkuar besnikërinë e Comey-it dhe e ka shtyer atë t’i jap fund hetimeve të FBI-së për lidhjet e ish-ndihmësit Michael Flynn me Rusinë.

Komiteti i Shtëpisë së Bardhë ka thënë se ka kërkuar nga Comey të paraqesë të dhënat e tij nga biseda me Trumpin.

Në anën tjetër Comey ka deklaruar se ai i pati treguar të dhënat e tij një shoku, që është profesor i juridikut në Universitetin e Kolumbias, Daniel Richman.

Comey ka shtuar se nuk ka kopje të atyre të dhënave, por ai do ta lejonte Richman-in t’i publikonte ato. Kjo deklaratë bëri që Komiteti Gjyqësor i Senatit të kërkojë nga Richman të dhënat e përmendura nga Comey.

Trump ndërkaq ka këmbëngulur, se ai është i sinqertë dhe se ai është “100 për qind” i gatshëm të dëshmojë nën betim.

Presidenti Trump: nuk pati asnjë bashkëveprim me Rusinë

Presidenti Donald Trump u shfaq sfidues pas dëshmisë në Senat të ish-drejtorit të FBI-së, James Comey. Ligjvënës demokratë shprehen të bindur se ekzistojnë bazat për të ngritur akuza për pengim të drejtësisë, ndërsa republikanët mendojnë se krahas elementëve të mungesës së eksperiencës politike nga ana e presidentit, nga kjo dëshmi gjithashtu u vërtetuan deklaratat e mëparshme të zotit Trump. Sidoqoftë, nuk ka gjasa që republikanët të fillojnë një proces për ngritje akuzash ndaj Presidentit, ndërkohë që edhe vetë udhëheqësit demokratë u përpoqën të përmbajnë thirrje të tilla nga radhët e ligjvënësve demokratë.

Nga Shtëpia e Bardhë, Presidenti Donald Trump u shfaq dje sfidues përkrah Presidentit të Rumanisë, duke shfrytëzuar mundësinë për t’iu kundërpërgjigjur akuzave prej dëshmisë së James Comey-it.

“Nuk ka patur bashkëveprim (me rusët), as pengim drejtësie. Ai vetë i ka nxjerrë të dhënat. Por, le t’i kthehemi punës së qeverisjes së vendit”, tha Presidenti Trump.

Presidenti mohoi deklaratat e zotit Comey se i pati kërkuar të ndalonte hetimin për ish-këshilltarin e sigurisë kombëtare, Michael Flynn, gjë për të cilën tha se është i gatshëm të dëshmojë nën betim.

“Nuk e kam thënë diçka të tillë. Sërish, nuk do të kishte qenë diçka e gabuar, por që nuk e kam thënë”, tha ai.

Presidenti Trump tha gjithashtu se së shpejti do të njoftojë nëse ekzistojnë regjistrime të bisedave me zotin Comey.

Gjatë seancës dëgjimore në komisionin e zbulimit të Senatit, zoti Comey tha se kishte patur ndjesinë që kërkesa për të braktisur hetimin e zotit Flynn, kishte përmasat e një urdhëri të drejtpërdrejtë.

“E mora si një udhëzim. Ishte Presidenti i SHBA-së që të thotë veçmas se ‘shpresoj të bëhet kështu’. E mora si vullnetin e tij. Nuk iu binda, por të tillë e perceptova”, tha zoti Comey.

Nëse është e vërtetë, kjo mund ta rrezikojë ligjërisht Presidentin Trump.

“Këto veprime të marra së bashku, mund të përbëjnë pengim drejtësie, por sigurisht kjo mbetet të përcaktohet nga prokurori special Robert Mueller”, thotë Paul Schiff Berman, i Universitetit George Washington.

Gjatë seancës, zoti Comey sulmoi edhe besueshmërinë e Presidentit Trump, gjë që mund të ketë efekte politike.

“Si rifitohet besueshmëria pasi e humb? Mendoj se kjo është e vështirë për një president dhe administratën e tij”, thotë Chris Edelson, i Universitetit Amerikan.

Sidoqoftë, republikanët për momentin mbështesin Presidentin, duke ulur kështu shanset për ngritje akuzash.

“Mendoj se balanca është pozitive për Presidentin. Nëse ia heq gjithë dramacitetin, konkluzioni është se Presidenti Trump nuk ka qenë ndonjëherë nën hetim”, tha Ligjvënësi republikan Peter King.

Në anën tjetër, demokratët vazhdojnë të jenë të shqetësuar.

“Në këtë vend kemi një vijë ndarëse ndërmjet organeve ligjzbatuese dhe ndërhyrjes politike dhe Presidenti e shkeli këtë vijë”, tha Senatori demokrat Chris Van Hollen.

Hetimi për ndërhyrjen ruse nga prokurori special Mueller për momentin mbetet me kohëzgjatje të paparashikueshme.

Trump: “100 për qind” gati të dëshmoj nën betim për bisedat me ish-shefin e FBI-së

Presidenti Donald Trump tha se është “100 për qind” i gatshëm të dëshmojë nën betim për bisedat e tij me drejtorin e shkarkuar të FBI-së James Comey.

Ai i bëri komentet të premten pasdite në një konferencë shtypi me presidentin e Rumanisë në Shtëpinë e Bardhë.

Zoti Trump këmbënguli se ish-kreu i FBI-së gënjeu në disa pjesë të dëshmisë që dha të enjten në komisionin e Senatit për Zbulimin.

Presidenti tha se ai kurrë nuk i kishte kërkuar zotit Comey t’i shprehte besnikërinë dhe asnjëherë nuk i kishte thënë atij se shpresonte që ta mbyllte hetimin për ish-këshilltarin e sigurimit kombëtar Michael Flynn.

Presidenti Trump nuk e përjashtoi pohimin e tij të mëparshëm se mund të ekzistojnë regjistrime të bisedave të tij me zotin Comey.

“Ndoshta do t’jua them këtë në një të ardhme shumë të afërt,” u deklaroi ai gazetarëve.

Gjatë konferencës për shtyp, Presidenti Trump më në fund konfirmoi publikisht angazhimin e tij ndaj klauzolës së NATO-s për mbrojtjen e përbashkët.

Kur zoti Trump foli në takimin e aleancës në Belgjikë muajin e kaluar, ai nuk iu referua kësaj klauzole, të njohur si Neni 5.

Por të premten ai tha se ishte “i angazhuar ndaj nenit 5 të Aleancës.

I vetmi rast në të cilin anëtarët e NATO-s përdorën nenin 5 ishin ditët menjëherë pas sulmeve të 11 shtatorit 2001 në Shtetet e Bashkuara.

REPLIKAT ME ISH-SHEFIN E SHKARKUAR TË FBI-SË

Presidenti Donald Trump theu heshtjen në Twitter, pas dëshmisë së djeshme të drejtorit të shkarkuar të FBI-së James Comey, duke deklaruar se ajo ishte “një hakmarrje e vërtetë”.

Trump, i cili nuk kishte postuar në Twitter, që kur zoti Comey e akuzoi administratën për përhapjen e “gënjeshtrave”, u kundërpërgjigj me një koment herët në mëngjes, ku thoshte “Çudi, Comey paska nxjerrë sekrete”. Sot zoti Trump takohet në Shtëpinë e Bardhë me Presidentin e Rumanisë, Klaus Iohannis dhe më pas të dy pritet të kenë një konferencë të përbashkët për shtyp.

Në paraqitjen e tij të parë para Kongresit që pas shkarkimit të papritur muajin e kaluar, zoti Comey foli për mungesën e besimit të Presidentit ndaj tij, duke thënë hapur se Presidenti e kishte shkarkuar me synimin për të ndërhyrë në hetimin mbi lidhjet e zyrtarëve të fushatës së zotit Trump me Rusinë.

Ndërsa Presidenti e karakterizoi dëshminë e zotit Comey si një hakmarrje për shkarkimin e tij, përshtypja e përgjithshme për përgjigjet e tij ndaj pyetjeve të senatorëve nuk ishte se ishin të pavërteta.

Senatorja Susan Collins, një Republikane e moderuar, tha se Kongresi duhet të njihet me regjistrimet e bisedave me ish drejtorin e FBI-së që mund të ketë Presidenti. Ajo tha se zoti Comey është “një njeri i nderuar” dhe në një intervistë ajo u shpreh se ai “Ishte i besueshëm, i sinqertë dhe i drejtpërdrejtë” në dëshminë e tij.

Trump: dëshmia e Comey-it, hakmarrje e vërtetë

Presidenti Donald Trump të premten e theu heshtjen në Twitter, pas dëshmisë së fuqishme të drejtorit të shkarkuar të FBI-së James Comey, duke deklaruar se ajo ishte “një hakmarrje e vërtetë”.

Trump, i cili nuk kishte postuar si zakonisht në Twitter, që kur Comey e akuzoi administratën për përhapjen e “gënjeshtrave”, u kundërpërgjigj me një tweet herët në mëngjes, ku thonte “Wow, Comey ka zbuluar sekretet”.

Sot Presidenti Trump takohet me Presidentin e Rumanisë, Klaus Iohannis dhe më pas të dy ata do të kenë një konferencë të përbashkët për shtyp.

Në paraqitjen e tij të parë para Kongresit që pas shkarkimit të papritur muajin e kaluar, në dëshminë e tij dje, zoti Comey foli për mungesën e besimit të Presidentit ndaj tij, duke thënë hapur se ai e kishte shkarkuar nga puna me synimin për të ndërhyrë tek hetimi që po zhvillohet mbi lidhjet e zyrtarëve të fushatës së zotit Trump me Rusinë.

SHBA e kanë rrëzuar një fluturake pa ekuipazh të Hezbollahut në Siri

Një aeroplan luftarak amerikan i tipit F-22 Raptor

 

Një fluturake pa ekuipazh, për të cilën zyrtarët amerikanë thonë se ishte dhuruar nga Irani për forcat e Hezbollahut, në pjesën jugore të Sirisë, kishte shtënë kundër trupave aleate të Shteteve të Bashkuara, prandaj ishte rrëzuar dje nga një aeroplan luftarak amerikan.

Zyrtarët amerikanë thanë se armatimi i hedhur nga kjo fluturake nuk kishte eksploduar, prandaj askush nuk ishte dëmtuar.

Por, koleneli i armatës amerikane, Ryan Dillon, tha se ajo ishte kërcënim direkt për trupat e Shteteve të Bashkuara dhe forcat lokale, që stërviten për të luftuar kundër grupit ekstremist, Shteti Islamik, në rajon.

Sulmi i fluturakes pa ekupiazh është bërë pas kërcënimit të Hezbollahut se do t’i sulmoj forcat amerikane dhe u bë disa orë pasi Shtetet e Bashkuara i kanë bombarduar trupat e Qeverisë së Sirisë dhe aleatët e saj, brenda një zone të mbrojtur në këtë hapësirë.

Kjo ishte hera e tretë që koalicioni i udhëhequr nga Shtetet e Bashkuara i ka sulmuar trupat në zonën e mbrojtur.

Shtëpia e Bardhë: Presidenti Trump “nuk është gënjeshtar”

Sarah Huckabee Sanders

 

Zëdhënësja e Shtëpisë së Bardhë tha se presidenti, Donald Trump, “nuk është gënjeshtar”, pasi ish-drejtori i agjencisë FBI, James Comey i tha sot një komiteti të Senatit amerikan, se ishte diskredituar nga “gënjeshtrat” e administratës.

E pyetur për dëshminë e zotit Comey, zëdhënësja, Sarah Huckabee Sanders, tha sot se “mund të them se presidenti nuk është gënjeshtar”.

Ajo foli në një takim me gazetarët pa kamera televizive.

Comey dëshmon: Administrata Trump përhapi “gënjeshtra” dhe më “diskreditoi mua dhe FBI-në”

Drejtori i shkarkuar i FBI-së, James Comey tha sot në dëshminë e tij se administrata e Presidentit Donald Trump përhapi “gënjeshtra për të” dhe “e diskreditoi” atë dhe FBI-në.

Ish-drejtori i FBI-së e hapi seancën e shumëpritur në Senat, duke thënë se motivacioni i administratës për shkarkimin e tij, e kishte bërë konfuz dhe e kishte shqetësuar.

Zoti Comey tha se kishte mbajtur shënime pas çdo kontakti me Presidentit Trump, sepse e dinte se mund të vinte një ditë që mund t’i duhet të vetëmbrohej.

Ai tha se nuk kishte ndjerë një nevojë të tillë me ish-Presidentin Obama.

“Shpresoj që të ketë kaseta”, tha zoti Comey duke iu referuar sugjerimit të zotit Trump se ai mund t’i kishte inçizuar bisedat e tyre.

Zoti Trump kishte në plan ta ndiqte seancën në Shtepinë e Bardhë me ekipin e tij ligjor dhe këshilltarët e afërt.

Zoti Comey tha se e kishte intepretuar “udhëzimin” e Presidentit Trump se shpresonte që ish-drejtori i FBI-së, të hiqte dorë nga një hetim për ish-Këshilltarin e Sigurisë Kombëtare, Michael Flynn.

Senatori republikan James Risch pyeti nëse zoti Comey ishte në dijeni të ndonjë personi që ishte akuzuar për pengim të drejtësisë, vetëm sepse kishte shprehur shpresën për një përfundim të caktuar. Zoti Comey thotë se nuk dinte ndonjë rast të tillë. .

Por ai shtoi më seancën në Senat se “e kishte interpretuar si udhëzim” dhe vuri në dukje se komenti ishte bërë në një takim kokë kokë me Presidentin e Shteteve të Bashkuara.

Zoti Comey tha se në një darkë në janar me Presidentin se ai “donte të siguronte diçka” në këmbim të mbajtjes së tij në detyrën e Drejtorit të FBI-së.

Zoti Comey tha për Presidentin Trump se “i besonte fjalës së tij” se ishte shkarkuar për shkak të hetimit të FBI-së për Rusinë.

Comey tha se komuniteti i zbulimit “ka bindje të fortë” se Rusia ndërhyri në fushatën e zgjedhjeve për të ndihmuar zotin Trump të fitonte ndaj rivales demokrate Hillary Clinton.

Në deklaratën e shkruar që i dorëzoi Komisionit të Senatit për Çështjet e Zbulimit, zoti Comey tha se Presidenti Donald Trump i ka kërkuar atij besnikëri gjatë bisedave që të dy ata kanë patur në Shtëpinë e Bardhë lidhur me hetimet e kësaj agjencie për disa zyrtarë të tanishëm dhe të mëparshëm të administratës. Dje pasdite, Komisioni publikoi paraprakisht një kopje të deklaratës prej shtatë faqesh që zoti Comey do të paraqesë në hapje të një seance të shumëpritur të Komisionit. ((https://www.intelligence.senate.gov/sites/default/files/documents/os-jcomey-060817.pdf)).

Deklarata u bë publike dje pasdite, pak orë pas një seance të mëparshme të Komisionit të Zbulimit, në të cilën Drejtori i Zbulimit Kombëtar dhe zyrtarë të tjerë të lartë të Inteligjencës refuzuan t’u përgjigjen pyetjeve të senatorëve rreth zotit Comey dhe hetimeve për Rusinë.

Në deklaratën e tij, zoti Comey jep hollësi befasuese për pesë biseda që ai ka patur me Presidentin Trump. Mes të tjerash ai lë të kuptohet se Presidenti i ka kërkuar të ndryshojë rrjedhën e hetimeve të FBI-së për ndërhyrjen e Rusisë në zgjedhjet presidenciale amerikane.

Trump: “Pres besnikëri nga ju”

Siç tregon zoti Comey, në një bisedë në Shtëpinë e Bardhë, Presidenti i tha: “Unë kam nevojë për besnikëri, pres besnikëri nga ju”. “Nuk lëviza, nuk fola dhe as ndryshova shprehjen e fytyrës gjatë heshtjes së vështirë që pasoi,” shkruan ish-shefi i FBI-së. “Ne thjesht nisëm të shihnim njëri-tjetrin në heshtje”.

Në deklaratën e tij me shkrim, zoti Comey tregon se i kishte thënë tri herë Presidentit se ai nuk ishte objekt i hetimit të FBI-së, që synonte të sqaronte nëse bashkëpunëtorët e zotit Trump kishin patur kontakte të papërshtatshme me zyrtarët e qeverisë ruse.

Në një pasazh tjetër, zoti Comey dëshmon se Presidenti Trump i kishte kërkuar më 14 shkurt të hiqte dorë nga hetimi për gjeneralin Michael Flynn, i cili ishte shkarkuar si këshilltar i sigurisë kombëtare një ditë më parë. “Shpresoj se ju mund të gjeni mënyrën për të hequr dorë nga kjo, për ta lënë çështjen Flynn,” i kishte thënë Presidenti, gjithnjë sipas deklaratës së zotit Comey. “Ai është njeri i mirë. Shpresoj se mund ta kaloni çështjen e tij.”

Muajin e kaluar, Presidenti Trump mohoi kategorikisht se i kishte bërë presion ish-shefit të FBI-së që të mbyllte çështjen Flynn ose të hiqte dorë nga hetimi i saj. Presidenti hodhi poshtë gjithashtu pohimet se bashkëpunëtorët e tij janë marrë vesh me Rusinë që ajo të ndikonte në rezultatin e zgjedhjeve presidenciale të nëntorit, duke e quajtur këtë një “gjueti shtrigash”.

Komentojnë përkrahësit e zotit Trump

Pas publikimit të deklaratës së zotit Comey, mbështetësit e Presidentit Trump thanë se aty nuk kishte asgjë që lë të kuptohet se Presidenti ka bërë ndonjë shkelje.

Avokati Marc Kasowitz, këshilltar privat i zotit Trump për hetimin e çështjes së Rusisë tha se presidenti “ndihet plotësisht i shfajësuar”.

“Presidenti, – tha zoti Kasowitz, – është i kënaqur që zoti Comey më në fund ka konfirmuar publikisht se presidenti nuk është nën hetime, në asnjërin prej hetimeve rreth Rusisë.” “Ai mezi pret të vazhdojë punën për të vënë në jetë axhendën e tij si president”.

Kryetarja e Komitetit Kombëtar Republikan Ronna McDaniel theksonte të njëjtën gjë në një deklaratë në faqen e internetit të këtij Komiteti: “Presidenti Trump kishte të drejtë. Deklarata e drejtorit Comey rikonfirmoi atë që presidenti ka thënë gjatë gjithë kohës, se ai kurrë nuk ka qenë nën hetime”.

Demokratët e shohin ndryshe çështjen

Demokratët në Kongres e shohin ndryshe rëndësinë e dëshmisë së zotit Comey.

Kongresmeni Adam Schiff, demokrat i lartë në Komisionin për Inteligjencën në Dhomën e Përfaqësuesve, i quajti “shqetësuese” akuzat e zotit Comey. Në një deklaratë, zoti Schiff tha se bisedat e presidentit me zotin Comey “përfaqësojnë një tjetër përpjekje të papërshtatshme për të detyruar agjencitë e inteligjencës të shërbejnë si mjete të Shtëpisë së Bardhë për marrëdhëniet me publikun dhe për të minuar pavarësinë apo integritetin e komunitetit të inteligjencës”.

Disa kritikë të tjerë të zotit Trump thanë se pohimet e zotit Comey tregojnë se presidenti është përpjekur të ndërhyjë në mënyrë të papërshtatshme dhe se kjo mund të përbëjë pengim të drejtësisë.

Një ish-zyrtar i vjetër i FBI-së, i cili nuk deshi të identifikohej, i tha Zërit të Amerikës se “Zoti Comey ka vepruar korrekt për gjithçka.” Kjo ngjarje thjesht flet për një president që nuk e kupton se si funksionon qeveria dhe se e trajton qeverinë sikur të ishte një biznes.”

Kreu i FBI-së u shkarkua në muajin maj

Presidenti Trump e shkarkoi zotin Comey muajin e kaluar. Shtëpia e Bardhë në fillim lëshoi një deklaratë duke thënë se shkarkimi ishte bërë me rekomandimin e Zëvendës Prokurorit të Përgjithshëm Rod Rosenstein, i cili kishte dërguar një memo ku kritikonte mënyrën se si zoti Comey i trajtoi hetimet rreth çështjes së emailave të kandidates demokrate për presidente, Hillary Clinton.

Më vonë, vetë zoti Trump e hodhi poshtë këtë version. Ai i tha një gazetari se kur shkarkoi zotin Comey “kishte në mendje punën e Rusisë”.

Studiuesit e presidencës thonë se, nëse versioni i ngjarjeve i treguar nga zoti Comey konfirmohet, kjo do të paraqiste një sfidë të rëndësishme ndaj barrierave tradicionale që synojnë të ruajnë pavarësinë e institucioneve ligjzbatuese në SHBA.

“Mendoj se një nivel të tillë shqetësues ndërveprimi mes presidentit dhe FBI-së nuk e kemi parë që nga koha e Uotërgejtit,” thotë Dan Mahaffee, drejtor ekzekutiv i Qendrës për Studimin e Presidencës dhe Kongresit.

Të mërkurën, dy zyrtarë të lartë i thanë Komisionit të Senatit për Zbulimin se nuk kishin ndjerë ndonjë trysni të papërshtatshme nga presidenti për të deklaruar publikisht se nuk ka patur ndonjë koordinim të mundshëm mes ndihmësve të zotit Trump dhe Rusisë në zgjedhjet e vitit të kaluar.

Drejtori i Zbulimit Kombëtar Dan Coats dhe Drejtori i Agjencisë së Sigurisë Kombëtare Michael Rogers u thanë anëtarëve të Komisionit se nuk mund të flisnin publikisht mbi hollësitë e takimeve të tyre me Presidentin Trump në muajt e fundit. Ata refuzuan t’u përgjigjen pyetjeve nëse zoti Trump u kishte kërkuar të ndërhynin për të frenuar hetimet rreth ndikimit rus në fushatën presidenciale të 2016s.

James Comey: Telefonatat dhe takimet e mia me Trumpin (pasazhet kryesore)

Ish-drejtori i FBI-së, James Comey i cili flet të enjten para komisionit hetimor të senatit amerikan ka dhënë një deklaratë me shkrim më parë. Pasazhet kryesore:

27 Janar

“Presidenti më telefonoi rreth mesditës dhe më ftoi për një darkë…aty doli se vetëm ne të dy ishim pjesë, në një tavolinë të vogël ovale. Presidenti e filloi bisedën me pyetjen, nëse unë dua ta mbaj postin e drejtorit të FBI-së. M’u duk e çuditshme, sepse më kishte thënë dy herë më parë, se ai shpreson që do të qëndroj në detyrë…. i thashë se e dua punën dhe mendoj të përmbush mandatin prej 10 vjetësh…. Disa momente më vonë presidenti më tha ‘Unë dua besnikëri, pres besnikëri’. Nuk lëviza, nuk fola, nuk ndryshova shprehjen e fytyrës përgjatë heshtjes së pakëndshme që pasoi…… Në fund të darkës presidenti përmendi edhe njëherë postin… Ai tha: ‘dua besnikëri’. Unë iu përgjigja: ‘Gjithmonë do të keni ndershmërinë time.'”

14 shkurt

“Më 14 shkurt isha për një takim të shkurtër me presidentin në Oval Office… Në fund presidenti i sinjalizoi grupit se do të flasë vetëm me mua… “Dua të flas për Mike Flynn… tha se “ai është një djalë i mirë, ka përballuar shumë… pastaj tha se ‘shpresoj të gjeni një rrugë të lirë, ta lini këtë, ta lini Flynn. Është djalë i mirë. Shpresoj ta lini…. nuk e kuptova këtë sikur presidenti po fliste për hetimet kundër Rusisë në kuptimin më të gjerë apo për lidhje të mundshme me ekipin e tij zgjedhor… sido që të jetë ishte e shqetësuese, për shkak të rolit të FBI-së si autoritet i pavarur hetimor.”

30 mars

“Presidenti më thirri në FBI. Ai i përshkroi hetimet për Rusinë si “re” që kufizon mundësitë e tij të punojë në të mirë të vendit, ai tha se nuk ka të bëjë me Rusinë dhe aspak me prostituta në Rusi… Më pyeti se ç’mund të bëja për ta çarë “këtë re”. I thashë se ne po hetojmë sa më shpejt të jetë e mundur. Ai tha se shpreson që unë të gjej një mënyrë, që të bëj publike, se nuk po hetojmë personalisht kundër tij.”

11 prill

“Në mëngjesin e 11 prillit presidenti më telefonoi dhe më pyeti, se çfarë kisha bërë lidhur me lutjen e tij, të bëja publike që ai nuk është objekt i hetimeve. Iu përgjigja, se kërkesën e kisha transferuar tek ministri i Drejtësisë. Ai tha: ‘kam qenë shumë luajal me ju, shumë luajal…. e kishim këtë gjë, ju e dini.’ Nuk u përgjigja dhe nuk e pyeta, se ç’kishte parasysh me ‘këtë gjë’. Kjo ishte hera e fundit që fola me presidentin Trump.”

Ish-kreu i CIA: Skandali i Trumpit, më keq se Watergate

Ish-kreu i CIA-s, James Clapper, ka deklaruar se kontradiktat që rrethojnë Presidentin aktual amerikan, Donald Trump, në lidhje me Rusinë, janë më keq se skandali i përgjimeve “Watergate”, i cili rrëzoi nga pushteti ishPresidentin amerikan Richard Nixon.

“Watergate” përfshinte një sërë aktivitetesh të fshehta dhe ndonjëherë të paligjshme të ndërmarra nga anëtarët e administratës së atëhershme të presidentit Nixon, duke çuar në dorëheqjen e tij në vitin 1974. Clapper, drejtori i CIA-s në administratën e ish-presidentit Obama, gjatë një fjalimi në “National Press Club” në Kanberra, tha se Trump ka nisur një sulm ndaj Shteteve të Bashkuara dhe institucioneve të tyre. Ai e quajti shkarkimin e drejtorit të FBI-së, James Comey, si të egër dhe të pafalshëm. Clapper tha se Trumpi i kërkoi Comey të hidhte poshtë publikisht argumentet mbi lidhjet e tij të dyshuara me Rusinë. Comey pritet të dëshmojë sot në një seancë të Senatit amerikan, si pjesë e një hetimi nëse në fushatën e Trump fshihen zyrtarët rusë, dhe nëse ka pasur ndërhyrje ruse në zgjedhjet presidenciale në SHBA.

SHBA arreston dhjetëra pjesëtarë të një bande ruse

Ilustrim

 

Autoritetet amerikane arrestuan dhe akuzuan dhjetëra pjesëtarë të një, siç u tha, “sindikate ruse të krimit të organizuar” që punonte jashtë qytetit të Nju Jorkut.

Zyra e prokurorit në Nju Jork tha se të dyshuarit kanë vepruar ndërkombëtarisht dhe anembanë SHBA-së, duke trafikuar drogë dhe mallra të vjedhura, si cigare dhe çokollata.

Sipas prokurorëce, të dyshuarit kanë qenë të angazhuar edhe në zhvatje, vrasje me pagesë dhe mashtrim me karta krediti.

Shumica e 33 të pandehurve janë udhëhequr nga Razhden Shulaya dhe Zurab Dzhanashvili, kanë lindur në ish-Bashkimin Sovjetik dhe kanë pasur lidhje të fuqishme me Ukrainën, Gjeorgjinë dhe Rusinë, thanë prokurorët federalë.

Grupi, mes tjerash, akuzohet për komplot për të vjedhur viktimat, duke i joshur dhe droguar me kloroform, dhe për përdorim të pajisjeve elektronike për të pirateruar makinat e kazinove.

Flet ish-shefi i FBI-së: Trumpi më kërkoi dorëheqjen nga hetimi i Flynn

James Comey, ish-drejtori i FBI-së, konfirmoi në një deklaratë të shkruar në Kongres, të publikuar sot, se Donald Trump i kërkoi të braktisë hetimin mbi Michael Flynn, ish-këshilltar i tij i përzier në aferën e ndërhyrjeve ruse në zgjedhje.

Duke treguar për një takim të 14 shkurtit në Zyrën Ovale, Comey shkruan se Trump i foli për hetimin mbi Michael Flynn, ish-këshilltari i tij për sigurinë kombëtare.

“Shpresoj se ju mund të gjeni një mënyrë për ta braktisur këtë, të lironi Flynn. Është një njeri i mirë”, deklaroi Comey duke cituar fjalë që sipas tij ia kishte thënë presidenti amerikan.

“Në një darkë ballë për ballë të 27 janarit, Donald Trump më tha se kishte nevojë për besnikëri”, deklaroi Comey.

“Pres besnikëri!”, sipas ish-drejtorit të FBI-së./Express

SHBA, dy zyrtarë të lartë të zbulimit dëshmuan sot para Senatit

Në SHBA, një ditë para dëshmisë së parë publike që ish-shefi i FBI-së James Comey para një komisioni të Senatit rreth shkarkimit të tij dramatik nga Presidenti Donald Trump, ligjvënësit morën në pyetje zyrtarët më të lartë të ekipit të sigurisë kombëtare të vendit.

Por Drejtori i Zbulimit Kombëtar Dan Coats dhe Drejtori i Agjencisë së Sigurisë Kombëtare Michael Rogers nuk pranuan t’u përgjigjen publikisht pyetjeve për këtë çështje; ata gjithashtu nuk dhanë hollësi lidhur me takimet e tyre në Shtëpinë e Bardhë me zotin Trump.

“Nuk kam ndjerë asnjëherë presion për të ndërhyrë, me synimin për të manipuluar të dhënat e zbulimit për t’u dhënë atyre nuanca të caktuara politike”, tha zoti Coats. “…Ose në lidhje me një hetim që është duke vazhduar”, – shtoi ai.

Gazeta “Washington Post” shkruante sot se në mars, më pak se një javë pasi Senati e konfirmoi zotin Coats në postin e Drejtorit të Zbulimit Kombëtar, për të mbikqyrur 17 agjenci amerikane të zbulimit, Presidenti Trump i kishte kërkuar atij të ndërhynte tek drejtori i atëhershëm i FBI-së James Comey për të zbrapsur një hetim ndaj Këshilltarit për Sigurinë Kombëtare Michael Flynn, të cilin Trump e shkarkoi vetëm 24 orë pasi e emëroi në atë post, ngaqë kishte gënjyer nënpresidentin Mike Pence lidhur me kontaktet e tij me ambasadorin e Rusisë në Uashington.

Por zoti Coats tha se ishte e papërshtatshme që ai të diskutonte në pulbik për bisedime e tij në Shtëpinë e Bardhë me Presidentin Trump.

Edhe Michael Rogers mbajti të njëjtin qëndrim, duke mos pranuar të bënte publike bisedat e tij me Presidentin; ai gjithashtu mohoi se ndaj tij ishte ushtruar presion nga ana e Presidentit, për të minimizuar lidhjet e zyrtarëve të fushatës së zotit Trump me zyrtarët rusë.

Seanca zhvillohet ndërkohë që Shtëpia e Bardhë përpiqet të zbusë efektet që ka sjellë shkarkimi i ish-shefit të FBI-së, Comey, gjë që çoi në emërimin e një prokurori të posaçëm, për të marrë përsipër hetimet rreth ndërhyrjes ruse në zgjedhje.

Të enjten, zoti Comey, të cilin Presidenti e pushoi nga puna, ndërsa ai ishte duke drejtuar hetimin e FBI-së për Rusinë, do të dëshmojë para të njëjtit Komision të Senatit. Sipas njoftimit të mediave, ndihmës të paidentifikuar të zotit Comey thonë se Presidenti i kishte kërkuar ish drejtorit të FBI-së besnikëri ndaj tij dhe më pas, ditën pasi Trump shkarkoi zotin Flynn, që të zbrapste hetimin e FBI-së për lidhje të mundshme mes tij dhe rusëve.

Dëshmia e dy zyrtarëve të lartë të zbulimit vjen ndërsa një anketë e ditëve të fundit e gazetës “Washington Post” dhe televizionit “ABC News”, arrin në përfundimin se 56 për qind e amerikanëve në moshë madhore mendojnë se Presidenti Trump po ndërhyn tek disa hetime që janë duke u zhvilluar ndaj Rusisë, ndërsa 61 për qind e tyre mendojnë se Trump e shkarkoi Comey-n për të mbrojtur veten dhe jo për të mirën e vendit.

Dëshmia e James Comey-t në Senat, ja çfarë pritet

Ish drejtori i FBI-së James Comey, i cili u shkarkua gati një muaj më parë nga Presidenti Donald Trump, do të dëshmojë të enjten përpara Komisionit të Zbulimit të Senatit. Ky komision po heton mbi ndërhyrjen ruse në zgjedhjet e vitit të kaluar si dhe çdo lidhje të dyshuar mes Moskës dhe rrethit të ngushtë të zotit Trump.

Kjo është dalja e parë publike për zotin Comey që kur presidenti Trump e shkarkoi pa pritur më 9 maj.

Në atë kohë zoti Comey po drejtonte hetimin e FBI-së mbi ndërhyrjen ruse në fushatën presidenciale të vitit të kaluar dhe bashkëpunimin e mundshëm mes ndihmësve të fushatës Trump dhe zyrtarëve rusë. Ndërhyrje që synonin të ndihmonin zotin Trump të fitonte ndaj sfidantes demokrate, ish Sekretares së Shtetit Hillary Clinton.

Pas shkarkimit presidenti e cilësoi zotin Comey “si njeri që kërkon të duket” dhe “pompoz”

Pak ditë nga shkarkimi, bashkëpunëtorët e zotit Comey thanë se ish shefi i FBI-së kishte mbajtur shënime të detajuara për takimet e tij me zotin Trump në Shtëpinë e Bardhë.

Seanca dëgjimore e zotit Comey përpara komisionit të Senatit për zbulimin, është caktuar për nesër në orën 10 me orën lokale të Uashingtonit.

I pyetur mbi dëshminë e pritshme të zotit Comey presidenti Trump tha: “I uroj fat.”

Presidenti ka një axhendë të ngjeshur ditën e enjte”, njoftoi sekretari i shtypit në Shtëpinë e Bardhë Sean Spicer. Ai shtoi se zoti Trump ka takime dhe një fjalim gjatë kohës që zoti Comey do të dëshmojë përpara senatit.

Por cilat janë disa nga pyetjet që ka gjasë t’i bëhen ish kreut i FBI-së?

  1. A i ka kërkuar presidenti Trump zotit Comey të jetë besnik ndaj tij?

Sipas njoftimeve në shtyp, burimet pranë ish shefit të FBI-së thonë se gjatë një darke në Shtëpinë e Bardhë zoti Trump i kërkoi zotit Comey, të zotohet se do të jetë besnik ndaj tij.

Gjatë një intervistë për rrjetin NBC News, presidenti Trump e përshkroi ndryshe diskutimin gjatë darkës. Ai tha se ishte zoti Comey ai që i kërkoi të takohen, sepse siç tha, drejtori i FBI-së donte të mbante vendin e punës. Presidenti nuk përmendi ndonjë kërkesë për “zotim për besnikëri”.

  1. A i kërkoi zoti Trump zotit Comey të heqë dorë nga hetimet ndaj ish-këshilltarit të sigurisë kombëtare Michael Flynn?

Sipas shtypit, zoti Comey kishte njoftuar anëtarët e rrethit të tij të ngushtë se presidenti Trump i kishte thënë se shpresonte që zoti Comey të hiqte dorë nga hetimi i zotit Flynn dhe kontakteve të tij me agjentët rusë.

Shpresoj se mund të shihni qartë mundësitë për ta lënë këtë gjë dhe Flynnin” shkruante “Times” që citonte atë që zoti Trump i kishte thënë drejtorit të FBI-së, në takimin privat me të në Zyrën Ovale. “Ai është një njeri i mirë. Shpresoj të mos merreni më me të“.

  1. A mendon zoti Comey se veprimet e zotit Trump ishin një përpjekje për të penguar hetimet ndaj Rusisë?

Nuk ka gjasa që zoti Comey t’i japë një përgjigje përfundimtare kësaj pyetjeje. Ai pritet t’i përmbahet përshkrimit të ngjarjeve dhe të lerë të tjerët të analizojnë implikimet ligjore të tyre.

  1. A i ka thënë zoti Comey zotit Trump, disa here, se presidenti nuk ishte nën hetim?

Në një letër, ku informonte zotin Comey për arsyet e shkarkimit të tij nga FBI-ja, presidenti Trump shkruante: “E vlerësoj shumë që më keni informuar në tre raste të veçanta, se unë nuk jam nën hetim, lidhur me Rusinë.

  1. A mundet që zoti Comey të sjellë ndonjë provë të bashkëpunimit të fshehtë mes rrethit të ngushtë të zotit Trump dhe zyrtarëve rusë?

Nëse dikush nga rrethi i ngushtë i presidentit Trump ka bashkëpunuar apo jo në mënyrë të fshehtë me Rusinë në komplotin për të dëmtuar fushatën presidenciale të Hillary Clintonit kjo përbën fokusin e hetimit federal dhe të Kongresit. Zoti Comey nuk ka gjasa të japë ndonjë përgjigje përfundimtare.

Trumpi do të emërojë avokatin Christopher Wray shef të FBI-së

Presidenti Donald Trump tha se do të emërojë një ish-zyrtar të Departamentit të Drejtësisë si drejtor të Byrosë Federale të Hetimeve.

Zoti Trump tha me anë të një komenti në Twitter se personi që do të emërojë në këtë post, avokati Christopher Wray, ka kredenciale të shkëlqyera, por nuk dha hollësi të tjera.

Christopher Wray është pjesë e një liste ish-prokurorësh, politikanësh dhe zyrtarësh ligjzbatues të intervistuar nga zoti Trump, që kur presidenti shkarkoi drejtorin e FBI-së James Comey muajin e kaluar.

Avokati Wray ka përfaqësuar guvernatorin e Nju Xhersit Chris Christie gjatë hetimeve rreth çështjes së mbylljes së korsive në Urën George Washington. Dy ish-ndihmës të zotit Christie u shpallën fajtorë se ishin përpjekur të mbyllnin korsitë e urës për të ndëshkuar një kryebashkiak demokrat.

Zoti Wray ka punuar për Departamentin e Drejtësisë nën presidentin Xhorxh W. Bush.

SHBA-ja mbështetë anëtarësimin e Maqedonisë në NATO

Qeveria e Maqedonisë

 

Shtetet e Bashkuara të Amerikës mbështesin një zgjidhje të pranueshme mes Maqedonisë dhe Greqisë për kontestin e emrit, ka deklaruar ambasadori amerikan në Shkup, Jess Baily pa saktësuar se cila do të mund të ishte ajo zgjidhje për çështjen e emrit që po e mban të bllokuar procesin e integrimit të Maqedonisë në NATO dhe Bashkimin Evropian.

“Është mirë që Maqedonia zhvillon negociata me Greqisë dhe me vendet tjera fqinje. SHBA-të gjithmonë e kanë mbështetur dhe do ta mbështesin Maqedoninë në rrugën drejt NATO-s dhe BE-së”, ka deklaruar Baily, i pyetur nëse Uashingtoni mbështetë anëtarësimin e Maqedonisë me shkurtesën IRJM.

“Duhet biseduar me Qeverinë e re si dhe me gjithë faktorët tjerë në shoqëri edhe me opozitën për hapat që duhet të merren. Ky është një proces që përfshinë gjithë shoqërinë dhe shtetin në përgjithësi. Pra, i gjithë shteti duhet bashkohet rreth kësaj që të arrihet zgjidhje”, ka thënë Baily.

Ambasadori amerikan gjithashtu ka thënë se procesi i reformave në gjyqësi dhe në sfera tjera është shumë i rëndësishëm për të ardhmen e vendit.

Lidhur me çështjen e emrit, kryeministri Zoran Zaev ka zhvilluar një bisedë telefonike me kryeministrin grek, Aleksis Cipras. Detaje nga kjo bisedë nuk janë dhënë përveç asaj se dy kryeministrat kanë biseduar edhe për perspektivën euroatlantike të Maqedonisë dhe mundësinë e një takimi të nivelit të lartë gjatë këtij muaji në Athinë.

Mediat amerikane – Trumpit: Largohu nga rrjetet sociale, po turpëron veten dhe shtetin

Mediat dhe një pjesë e konsiderueshme e publikut amerikan po kërkojnë që Presidenti i tyre Donald Trump të mbyllë llogarinë e tij në rrjetin social Twitter dhe të mos përdorë rrjete sociale për komunikim me publikun.

Në një editorial të publikuar nga USA Today, thuhet se ‘sa herë që përdor Twitterin, Trump turpëron veten dhe shtetin’. Trump ka qenë në gjendje të prodhojë gafa të shumta gjatë Presidencës, duke përfshirë rastin kur shkroi ‘covfefe’ në Twitter, fjalë kjo e pakuptueshme në asnjë gjuhë.

Në një manual të publikuar nga instituti Cato, thuhet se Presidenti amerikan nuk guxon të komunikojë drejtpërsëdrejti me publikun, gjë që Trump e bën shpesh përmes Twitterit. Së fundi, Trump shkroi se edhe pse mediat po kërkojnë që ai të largohet nga rrjetet sociale, ai nuk do ta bëjë një gjë të tillë pasi po të dëgjonte këto media, ai nuk do të mund të bëhej President.

Publiku amerikan është gjithnjë e më pak i entuziazmuar me ardhjen e Trump në Shtëpinë e Bardhë, më shumë për shkak të disa vendimeve skandaloze, por edhe për faktin se nuk është i mirë në komunikim me publikun.


Send this to a friend