Presidenti amerikan Donald Trump hodhi poshtë akuzat për kaos në Shtëpinë e Bardhë.

Në komentet e bëra sot në Twitter, Presidenti Trump shkruante se tregu i aksioneve është në nivele të papara, shifrat ekonomike janë më të mirat, papunësia është më e ulta në 17 vjet, pagat po rriten dhe kufiri është i sigurtë. “Në Shtëpinë e Bardhë nuk ka kaos,” shkruante ai.

Komentet e zotit Trump u bënë në prag të betimit të shefit të tij të ri të kabinetit, gjeneralit në pension John Kelly, i cili mori detyrën që deri tani mbahej nga Reince Priebus.

Në takimin me shefin e ri të kabinetit, Presidenti Trump tha se zoti Kelly do të bëjë “një punë spektakolare” në detyrën e re.

Gjatë javës së kaluar, drejtori i ri i komunikimit në Shtëpinë e Bardhë, Anthony Scaramucci, sulmoi ashpër zotin Priebus, duke përdorur edhe fjalë të papërshtatshme.

Ndërkohë, vetë zoti Trump u bë objekt kritikash për sulmet e tij publike ndaj Prokurorit të Përgjithshëm Jeff Sessions dhe për dështimin e republikanëve të Senatit për të ndryshuar ligjin e kujdesit shëndetësor.

Sot, Presidenti Trump pati një takim me Prokurorin e Përgjithshëm në Shtëpinë e Bardhë.

Presidenti amerikan Donald Trump njoftoi të premten pasdite me Twitter se kishte emëruar sekretarin e Sigurisë Kombëtare gjeneralin në pension John Kelly si shef kabineti të Shtëpisë së Bardhë, në vend të zotit Reince Priebus.

“Jam i kënaqur t’ju informoj se sapo kam emëruar Gjeneralin/ Sekretarin John Kelly si shef kabinetit të Shtëpisë së Bardhë. Ai është një amerikan i shkëlqyer,” shkruante Presidenti në Twitter.

Vendimi i presidentit Trump vjen pas disa ditë tensionesh publike mes zotit Priebus dhe drejtorit të ri të komunikimit të Shtëpisë së Bardhë Anthony Scaramucchi.

“Reince Priebus është njeri i mirë. Gjeneral Kelly do të bëjë një punë fantastike,” tha zoti Trump pasi zbriti nga avioni presidencial.

Pak ditë më parë, zoti Scaramucchi ndërmori sulme verbale kundër shefit tashmë të shkarkuar të kabinetit, Priebus, zhvillime që u panë si një luftë e hapur brenda stafit në nivelet më të larta të administratës Trump.

Zoti Kelly njihet për mbështetjen që gëzon nga ligjvënësit e të dyja partive.

Rritja vjetore e ekonomisë amerikane për muajt prill, maj dhe qershor, ishte 2.6 për qind, sipas një raport të ri të Departamentit të Tregtisë të botuar të premten.

Të dhënat e prodhimit të brendshëm bruto, tregojnë se shpenzimet e konsumatorëve dhe të bizneseve ndihmuan në nxitjen e rritjes ekonomike. Sara Johnson, ekonomiste në kompaninë IHS Markit, thotë se rritja e ekonomisë amerikane u ndihmua edhe nga ritmet më të shpejta të ekonomisë globale që përmirësuan tregtinë amerikane.

Prodhimi i Brendshëm Bruto llogarit të gjitha mallrat dhe shërbimet e prodhuara në vend, dhe konsiderohet si vlerësimi më i gjerë i gjendjes ekonomike. Ky raport bazohet në të dhënat paraprake dhe mund të rishikohet pasi informacioni më i plotë të bëhet i disponueshëm. Një korrigjim i tillë u bë në raportin mbi nivelin e rritjes së Prodhimit të Brendshëm Bruto për muajt janar, shkurt dhe mars, që tregoi se rritja ekonomike ishte më e ngadaltë se sa ç’ishte menduar më parë.

Presidenti Trump, gjatë fushatës presidenciale premtoi se do të realizonte një rritje ekonomike prej 3 përqindësh ose më të lartë, përmes pakësimit të rregulloreve, taksave dhe programit të kujdesit shëndetësor, ndërkohë që do të rriste shpenzimet për infrastrukturën. Ndërsa ai ka eliminuar disa rregulla, pjesa tjetër e programit ekonomik të presidentit republikan është zvarritur në kongres, megjithëse të dyja dhomat e kongresit kontrollohen nga republikanët.

Një studim tjetër, i kryer nga Universiteti i Miçiganit, thotë se vlerësimi i konsumatorëve për ekonominë në muajin korrik shënoi rënie, por vazhdon të jetë në një nivel “të favorshëm”. Ekonomistët ndjekin me kujdes nivelin e shitjeve pasi shpenzimet e konsumatorëve janë motori i ekonomisë amerikane.

Senati amerikan dështoi të premten herët për të miratuar një shfuqizim të pjesshëm të “Aktit të kujdesit të përballueshëm”, i njohur edhe si Obamacare.

Tre ligjvënësit republikanë – John McCain nga Arizona, Lisa Murkowski nga Alaska dhe Susan Collins nga Maine – votuan me demokratët (51 me 49) duke mundur përpjekjet e republikanëve për shfuqizim.

Presidenti Donald Trump, përdori llogarinë e tij në twitter pak kohë pas votimit, për të qortuar republikanët që u bashkuan me demokratët.

“3 republikanë dhe 48 demokrat i lanë qytetarët amerikanë në baltë…”
shkroi ai.

I ashtuquajturi “shfuqizim i pjesshëm” synonte mes tjerash, t’i jepte fund kërkesës që shumica e amerikanëve të blejnë sigurimet shëndetësore ose të përballen me gjoba dhe që kompanitë me më shumë se 50 punonjës të sigurojnë mbulimin e sigurimeve për punonjësit e tyre.

Shtëpia e Bardhë të enjten nuk përjashtoi mundësinë që Presidenti Donald Trump t’i vërë veton sanksioneve të reja të Kongresit ndaj Rusisë, Iranit dhe Koresë së Veriut, duke nxitur kritika të ashpra nga ligjvënësit e të dyja partive politike të vendit.

“Ai mund të nënshkruajë sanksionet ashtu siç i ka propozuar kongresi, mund t’i vërë veton, ose mund të negociojë një marrëveshje për sanksione edhe më të ashpra kundër rusëve”, tha Anthony Scaramucci, drejtor i komunikimit në Shtëpinë e Bardhë, në një intervistë për rrjetin CNN.

Madje thjeshtë ideja e vetos shkaktoi reagim të menjëhershëm nga kongresi.

“Unë mendoj se do të ishte një gabim shumë i keq,” i tha Zëri i Amerikës senatori republikan nga Teksasi, John Cornyn. “Do të ishte më mirë nëse ata [zyrtarët e Shtëpisë së Bardhë] do të punonin me ne për krijimin e legjislacionit për këtë çështje”.

“Projekt-ligji i sanksioneve i jep presidentit një armë më të fortë në diskutimet e tij me [Presidentin Vladimir] Putin,” tha udhëheqësi i demokratëve në Komisionin e Senatit për Marrëdhëniet me Jashtë, Ben Cardin nga Merilendi. “Nëse ai i vë veton projekt-ligjit, kjo do të thotë se ai nuk dëshiron të ketë një dorë më të fortë në diskutimet me zotin Putin”.

“Është e vështirë ta kuptojmë se çfarë del nga Shtëpia e Bardhë,” shtoi senatori Cardin.

“Kongresi ka fuqinë ta anulojë veton”, tha senatori demokrat nga Nju Xhërsi, Bob Menendez.

Udhëheqësi i pakicës në Senat Chuck Schumer hodhi poshtë pohimin “qesharak” të zotit Scaramucci se Presidenti Trump mund të negociojë sanksione edhe më të ashpra kundër Rusisë.

“Edhe unë jam një njujorkez,” tha senatori Schumer duke shtuar, “dhe mund t’i kuptojë idetë jo serioze.”

Dhoma e Përfaqësuesve miratoi projekt-ligjin e sanksioneve të martën me 419 vota pro dhe 3 kundër. Edhe në senat pritet të ketë një mbështetje të ngjashme për këtë projekt-ligji.

Projekt-ligji synon të vendos kosto më të mëdha ekonomike ndaj Moskës, Teheranit dhe Phenianit për një sërë aktivitetesh të këtyre vendeve që kundërshtohen nga Uashingtoni dhe i jep Kongresit fuqinë për të bllokuar çdo masë presidenciale për të pezulluar masat ndëshkuese.

Gjatë negociatave disa javëshe, administrata e Presidentit Trump fillimisht i kundërshtoi këto masa duke i quajtur ato një përpjekje për të kufizuar aftësinë e ekzekutivit për të lehtësuar në mënyrë të njëanshme sanksionet, duke thënë se ato kufizojnë aftësitë e Shteteve të Bashkuara në përpjekjet për të ndryshuar veprimet ruse dhe për të ndërtuar një marrëdhënie më të mirë me Presidentin rus Vladimir Putin.

Shqetësimi për këtë çështje u eliminua në fillim të javës, kur Shtëpia e Bardhë shprehu mbështetjen për projekt-ligjin.

“Presidenti mbështet sanksionet ndaj këtyre vendeve dhe dëshiron të sigurohet që ato të mbeten në fuqi, por në të njëjtën kohë ai dëshiron të sigurohemi që të jemi në gjendje të arrijmë marrëveshje të mira për këto çështje. Këto dy gjëra janë shumë të rëndësishme për presidentin,” u tha gazetarëve të hënën zëdhënësja e Shtëpisë së Bardhë, Sarah Huckabee Sanders.

Zëvendësministri i Jashtëm rus Sergei Ryabkov tha të mërkurën se Moska ka të ngjarë të hakmerret kundër Shteteve të Bashkuara nëse sanksionet hyjnë në fuqi.

Sipas mediave shtetërore ruse, Ryabkov paralajmëroi se sanksionet e reja do të eliminojnë çdo shans për përmirësim të marrëdhënieve mes Moskës dhe Uashingtonit. Ai gjithashtu tha se Rusia e kishte paralajmëruar më parë administratën e Presidentit Trump se do të kundërpërgjigjej nëse ligjvënësit amerikanë miratojnë projekt-ligjin për sanksionet.

Prokurori i Përgjithshëm Jeff Sessions po ndeshet me presion në rritje nga Kongresi dhe nga Shtëpia e Bardhë lidhur me kontaktet me ish-të dërguar rusë në Uashington si dhe me vendimin që mori më pas për t’u shkëputur nga hetimet që po zhvillonte Departamenti i Drejtësisë mbi dyshimet se mund të ketë pasur marrëveshje të fshehta mes ekipit të Presidentit Trump gjatë zgjedhjeve dhe Rusisë.

Dy ditë radhazi Presidenti Trump postoi në Twitter komente ku kritikonte zotin Sessions dhe aludonte se hetimet duhet të përfshinin edhe ish-kandidaten demokrate Hillary Clinton.

“Prokurori i Përgjithshëm Jeff Sessions është treguar shumë i dobët ndaj krimeve të Hillary Clintonit (ku janë emailet dhe serveri i Komitetit Kombëtar të Demokratëve?) si dhe me ata që nxjerrin informata sekrete,” shkruante presidenti. Të hënën ai e cilësonte zotin Sessions si “Prokurori ynë me telashe” dhe pyeste përse ai “nuk kishte hetuar Hillary-n për krime dhe për kontakte me Rusinë?”.

Senatorja Dianne Feinstein i kërkoi zotit Sessions të hënën të dilte para Komisionit të Senatit për Gjyqësorin sa më parë për t’iu përgjigjur pyetjeve për bisedat me ish-ambasadorin rus në Uashington, Sergey Kisliak, gjatë fushatës së 2016. Në atë kohë zoti Sessions ishte këshilltar i ekipit Trump, por edhe anëtar it Senatit.

Gazeta Washington Post njoftoi të premten se Kisliak u kishte thënë eprorëve në Moskë vitin e kaluar se kishte diskutuar çështje të fushatës me Sessions, ndryshe nga deklarimet që bëri Sessions lidhur me këto takime. Gazeta shruante se informatat ishin nxjerrë nga biseda të interceptuara mes Kisliakut dhe Moskës.

((https://www.washingtonpost.com/world/national-security/sessions-discussed-trump-campaign-related-matters-with-russian-ambassador-us-intelligence-intercepts-show/2017/07/21/3e704692-6e44-11e7-9c15-177740635e83_story.html ))

“Kjo është një çështje serioze, dhe Komisioni duhet të dëgjojë shpjegimet e drejtpërdrejta të Prokurorit të Përgjithshëm,” shkruante Senatorja Feinstein në një letër në adresë të kryetarit të Komisionit Chuck Grassley, ku e nxiste atë të thërriste zotin Sessions për të dëshmuar.

Al Franken, një tjetër anëtar demokrat i komisionit dhe kritik i zotit Trump, e cilësoi bisedën e përshkruar në gazetë mes Sessions dhe Kisliakut një “zhvillim shumë shqetësues në marrëdhëniet mes ekipit të zotit Trump dhe Rusisë”.

“Tani është më e qartë se kurrë se Jeff Session duhet të dëshmojë përsëri para komisionit që ne të dimë përgjigjet,” shkruante Senatori Frankel në Facebook të premten. Megjithatë, më pas ai tha në intervistë me rrjetin CNN se kryetari it komisionit nuk do ta thërrasë Sessions për të dëshmuar përsëri.

Një zëdhënës për kryetarin e Komisionit të Senatit për Gjyqësorin, Chuck Grassley tha për Zërin e Amerikës të hënën se zoti Grassley do ta thërrasë Sessions të dëshmojë më vonë, pasi të jetë emëruar gjithë ekipi i Prokurorit të Përgjithshëm. Zëdhënësi, Taylor Foy tha se pakica demokrate në Senat ka “këmbëngulur për të zvarritur emërimet e zyrtarëve për Departamentin e Drejtësisë” dhe se kjo e ka vështirësuar punën mbikqyrëse që kryen komisioni mbi strukturat e drejtësinë.

Komisioni i Senatit për Drejtësinë mbikqyr punën e Departamentit të Drejtësisë dhe është një ndër komisionet e përfshira në hetimet mbi rolin e Rusisë në zgjedhjet presidenciale të 2016.

Në mars, Jeff Sessions u tërhoq nga hetimet mbi Rusinë, pas njoftimeve se ai nuk kishte treguar gjithçka mbi kontaktet e tij me ish-ambasadorin rus Kisliak kur kishte dëshmuar para komisionit në seancën për miratimin e emërimit të tij si Prokuror it Përgjithshëm.

Zoti Sessions ka hedhur poshtë akuzat se ka dhënë dëshmi çorientuese para senatorëve, duke shtuar se tërheqja e tij nga procesi hetimor u bë si rezultat i rolit të tij si këshilltar i ekipit Trump gjatë fushatës.

Presidenti Trump shprehu revoltim në përgjigje të shkëputjes së zotit Sessions nga procesi hetimor dhe më pas ai e fajësoi Prokurorin e Përgjithshëm për emërimin e Robert Muellerit si prokuror special për të drejtuar këto hetime.

Në një intervistë me gazetën New York Times javën e kaluar, Presidenti Trump tha se ai nuk do ta kishte emëruar kurrë Jeff Sessions për prokuror të përgjithshëm po ta kishte ditur se ai do të tërhiqej nga hetimi mbi rolin që ka luajtur Rusia në zgjedhje.

((https://www.nytimes.com/2017/07/20/us/politics/trump-jeff-sessions-attorney-general.html ))

Jared Kushner, dhëndër dhe këshilltar i afërt i Presidentit Donald Trump, thotë se ai nuk ka bashkëpunuar në fshehtësi me asnjë qeveri të huaj dhe se nuk ka patur kontakte të papërshtatshme.

Zoti Kushner bëri publike sot një deklaratë me shkrim, përpara se të paraqitej për t’iu përgjigjur pyetjeve në një seancë me dyer të mbyllura të Komisionit të Senatit për Zbulimin. Gjithashtu, një tjetër seancë dëgjimore është planifikuar për ditën e nesërme tek Komisioni për Zbulimin i Dhomës së Përfaqësuesve, si pjesë e hetimeve për ndërhyrjen e Rusisë në zgjedhjet e vjetshme në Shtetet e Bashkuara.

Zoti Kushner shkruan se: “Dokumentat dhe të dhënat që ofroj provojnë se unë kam patur ndoshta katër herë kontakte me përfaqësues të Rusisë, ndër mijëra kontakte të zhvilluara gjatë fushatës elektorale dhe periudhës së tranzicionit të qeverisë; asnjë nga këto kontakte nuk patën ndikim në asnjë mënyrë tek zgjedhjet apo ndonjë vlerë për t’u mbajtur mend.”

Ai përshkruan në vazhdim disa takime të shkurtra me ambasadorin e Rusisë në Shtetet e Bashkuara, gjatë të cilave ai thotë se diskutuan rreth dëshirës për të përmirësuar marrëdhëniet SHBA – Rusi, por ai mohon raportimet nga mediat se ka patur edhe biseda të mëtejshme telefonike me ambasadorin rus, Sergey Kislyak.

Komisionet e Kongresit pritet të kërkojnë informacion të mëtejshëm për konktatet e zotit Kushner me Rusinë, ndër to edhe për një takim të zhvilluar në muajin qershor të vitit të kaluar me një avokate ruse dhe personazhe të tjera të lidhura me Moskën.

Në kundërpërgjigje të ndërhyrjes në zgjedhjet amerikane, një grup dypartiak udhëheqësish të Kongresit kanë rënë dakort për sanksione të reja për Rusinë, si dhe për miratimin e një neni që do të parandalonte lehtësimin e sanksioneve për Moskën nga Presidenti Donald Trump.

I pyetur nëse Presidenti Trump do ta nënshkruajë legjislacionin e ri, Drejtori i ri i Komunikimeve në Shtëpinë e Bardhë, Anthony Scaramucci, u shpreh për rrjetin CNN, se: “Duhet të pyesni vetë Presidentin Trump. Unë mendoj se ai do të marrë vendimin e duhur”. Në vazhdim të bashkëbisedimit, zoti Scaramucci pasqyroi pikëpamjet e shprehura në të kaluarën nga Presidenti, duke thënë se “afera e Rusisë është diçka fallso dhe e pakuptimtë”.

Zoti Scaramucci, i cili u emërua vetëm dy ditë më parë, tha se Presidenti Trump vazhdon të mos jetë i bindur se ishte Rusia ajo që ndërhyri në serverat e zyrave qendrore të Partisë Demokrate në Uashington, dhe që më vonë bëri të disponueshme nëpërmjet faqes Wikileaks mijëra email-e në dëm të rivales demokrate në garën presidenciale, zonjës Hillary Clinton.

Në një bashkëbisedim tjetër me kanalin ABC News, Sekretarja e re e Shtypit e Shtëpisë së Bardhë, Sarah Huckabee, tha se “Shtëpia e Bardhë mbështet legjislacionin aktual”.

Fillimisht ishte paraqitur një projektligj në Dhomën e Përfaqësuesve për sanksione ndaj Iranit, të cilave më vonë iu shtuan edhe sanksionet për Korenë e Veriut. Të martën, Dhoma e Përfaqësuesve do të votojë legjislacionin që do të përfshijë sanksione për të tre vendet: Rusinë, Iranin dhe Korenë e Veriut.

Shtëpia e Bardhë ka kundërshtuar paragrafin ku përcaktohet se do të duhet miratim i Kongresit për çdo rishikim të sanksioneve nga Presidenti Trump. Ligjvënës nga të dyja kahet e politikës e kërkuan një masë të tillë për shkak të përpjekjeve të vazhdueshme të Presidentit Trump për marrëdhënie më të ngrohta me Rusinë. Sipas ligjit të ri, Presidentit Trump do t’i duhet të paraqesë një raport në Kongres, ku do të shpjegojë arsyet për heqjen e sanksioneve. Kongresi do të ketë në vazhdim 30 ditë për të zhvilluar seanca dëgjimore dhe për të votuar propozimin.

Shtypi amerikan njofton se ndihmësit e presidentit Trump po hetojnë ekipin e prokurorit të posaçëm Robert Mueller, në një përpjekje për të diskretituar hetimet e tij lidhur me përfshirjen e Rusisë në zgjedhjet presidenciale të kaluar. Gjithashtu sipas shtypit, presidenti është irrituar nga ideja se hetimi i zotit Mueller mund të arrijë tek financat e tij dhe të familjes së tij.

Administrata e presidentit Trump duket se po rrit sulmin ndaj hetimit kriminal lidhur mbi ndërhyrjen ruse në zgjedhjet presidenciale të vitit të kaluar.

Sipas njoftimeve, ndihmësit e presidentit Donald Trump po hetojnë ekipin e prokurorit të posaçëm Robert Mueller, në një përpjekje për të gjetur mënyra për të diskretituar hetimin e tij.

Ekipi me emra të njohur prokurorësh që ka krijuar zoti Muellerit po shqyrton nëse ndonjë nga këshilltarët e zotit Trump bashkëpunoi me Rusisë për të ndikuar në zgjedhjet presidenciale.

Dje zëdhënësja e Shtëpisë së Bardhë duket se nuk la asnjë dyshim se Prokurori i Posaçëm ishte në vëmendjen e presidentit Trump.

“Unë nuk mund të parashikoj se ç’do të ndodhë në të ardhmen, se çfarë Prokurori i Posaçëm Robert Mueller mund të bëjë, që do të ishte e pamundur të mos veproje. Nuk dua të flas në mënyrë hipotetike, mund të flas vetëm për atë që ndodh sot”, tha Sarah Saunders.

Në shtyp u publikuan njoftime referuar disa burimeve sipas të cilave presidenti është irrituar nga ideja se hetimi i zotit Mueller mund të arrijë tek financat e tij dhe të familjes së tij.

Në intervistën dhënë për New York Times, zoti Trump vendosi një “vijë të kuqe” për hetimet e zotit Mueller, duke thënë se ai nuk duhet të shikojë financat e familjes së tij që nuk kanë lidhje me Rusinë, një koment që shumë e vlerësuan si të papërshtatshëm.

Peter Zeidenberg, që ka qënë pjesë e ekipit të një pokurori të posaçëm në kohën e presidentit George W. Bush, thotë se komentet e zotit Trump do të kenë pak ndikim tek zoti Mueller dhe ekipi i tij.

“Ata nuk i kushtojnë vëmendje, është thjesht zhurmë në sfond për ta. Ata s’mund të bëjnë asgjë lidhur me këtë dhe jam i sigurt se nuk po shpenzojnë kohë duke menduar për të”.

Ndryshe nga çfarë do të dëshironte, problemi rus nuk do të largohet shpejt për zotin Trump.

Sipas gazetës “Washington Post” presidenti ka pyetur këshilltarët e tij rreth kompetencave që ai ka për të falur ndihmësit, anëtarët e familjes e madje edhe veten, në lidhje me hetimin për Rusinë.

Ndërkohë, në një zhvillim të lidhur me këtë çështje, djali i madh i zotit Trump, Donald Trump Jr, ish këshilltari presidentit gjatë fushatës Paul Manafort dhe Jared Kushner, këshilltar i lartë në Shtëpinë e Bardhë, gjithashtu dhëndri i zotit Trump, do të dëshmojnë javën e ardhshme lidhur mbi takimin e tyre vitin e kaluar me një avokate ruse. Ajo pretendonte se kishte informacione që mund të dëmtonin kandidaten demokrate Hillary Clinton dhe ndihmonin fushatën e zotit Trump për president. Vetë avokatja ka thënë se është e gatshme të rrëfejë përpara ligjvënësve amerikane gjithshka lidhur me takimin.

Presidenti Donald Trump, i tha gazetës “The New York Times” se nëse prokurori i posaçëm do të përfshinte në hetime edhe financat e familjes Trump, që nuk kanë lidhje me Rusinë, atëherë kjo do të kapërcente kufirin e të pranueshmes. Prokurori Robert Mueller po heton influencën e Rusisë në zgjedhje dhe bashkëpunimin e mundshëm me anëtarët e ekipit elektoral të zotit Trump.

I pyetur nëse kjo do të përfaqësonte një vijë të kuqe për të, Presidenti Trump u përgjigj se: “Do të thoja ‘po’. Unë nuk kam të ardhura nga Rusia. Nuk bëj biznes me Rusinë”.

Në një intervistë të zgjeruar, Presidenti Trump shprehu gjithashtu zhgënjim për vendimin e Prokurorit të Përgjithshëm Jeff Sessions për t’u vetëtërhequr nga hetimet për Rusinë. Presidenti shtoi se nëse do ta kishte ditur paraprakisht këtë synim të zotit Sessions, atëherë do të kishte “përzgjedhur dikë tjetër”.

“Zoti Sessions nuk duhet të ishte vetëtërhequr kurrë, dhe nëse do ta kishte patur ndër mend një gjë të tillë, duhet të më kishte informuar përpara se ta pranonte postin”, tha Presidenti Trump.

Presidenti sugjeroi në vazhdim se ish-Drejtori i FBI-së, James Comey, i pati treguar një dosje me materiale dhe aludime të pakonfirmuara, kompromentuese për Presidentin, me qëllimin për të fituar influencë ndaj tij.

“Për mendimin tim, ai ma tregoi në mënyrë që unë të mendoja se ai mund ta bënte publike”, i tha gazetës Presidenti Trump, i cili e shkarkoi zotin Comey në muajin maj.

Zoti Comey u shpreh në dëshminë e tij përpara një komisioni të Senatit në muajin qershor, se ai e pati informuar privatisht për dosjen në muajin janar, pasi besonte se materialet do të publikoheshin dhe se komuniteti i zbulimit nuk duhet ta privojë Presidentin e zgjedhur nga të dhënat që disponon.

Pasi Prokurori i Përgjithshëm Sessions u vetëtërhoq nga hetimet, zëvendësi i tij, zoti Rod Rosenstein, caktoi një tjetër ish-drejtor të FBI-së, zotin Robert Mueller, në detyrën e prokurorit të posaçëm që do të drejtonte hetimet për Rusinë. Gjithashtu, komisione të Senatit dhe Dhomës së Përfaqësuesve po zhvillojnë hetimet e tyre.

Presidenti Trump ka këmbëngulur vazhdimisht se këto nuk janë të lidhura.

“Nuk kam bërë asgjë të gabuar. Nuk duhet të ishte caktuar fare një prokuror special për këtë çështje”, i tha ai gazetës “The New York Times”.

Donald Trump Jr., djali i madh i Presidentit, dhëndri i tij Jared Kushner, tashmë këshilltari i lartë në Shtëpinë e Bardhë, si dhe ish-drejtori i fushatës elektorale Paul Manafort, u takuan vitin e kaluar me një juriste ruse që kishte thënë se dispononte material dëmtues për kundërshtaren demokrate të zotit Trump në garën presidenciale, zonjën Hillary Clinton.

Gjatë intervistës, Presidenti Trump nuk i dha rëndësi takimit, duke e emërtuar si “gjëra standarte politike”, si dhe përsëriti mendimin e tij se shumica e politikanëve do ta kishin pranuar një takim të tillë.

Donald Trump Jr. ka thënë se juristja ruse nuk pati ndonjë informacion me vlerë rreth zonjës Clinton dhe se takimi përfundoi shpejt.

Kur u pyet nga gazeta, Presidenti Trump tha se “duhet të ketë qenë ndonjë takim vërtet i parëndësishëm, pasi mua nuk ma përmendën fare”.

Vetëm pak orë pas këtij takimi të zhvilluar në muajin qershor 2016, zoti Trump pati deklaruar se do të mbante një fjalim të rëndësishëm të fokusuar tek zonja Clinton. Gjatë intervistës për gazetën “The New York Times”, ai e refuzoi idenë se këto dy ngjarje mund të jenë të ndërlidhura, duke thënë se ai “pati mbajtur disa fjalime të tilla”.

“Nuk kishte më tepër që mund të thosha për Hillary Clintonin, nga ç’pata thënë gjithnjë”, u shpreh Presidenti Trump.

Megjithëse intervista u përqëndrua më shumë tek çështja e Rusisë dhe fushata elektorale, Presidenti Trump foli edhe për çështje të tjera të presidencës së tij dhe tha se vendi “po ecën mirë”.

Ai pati premtuar gjatë fushatës se do të reformonte sistemin e kujdesit shëndetësor. Pasi Senati i udhëhequr nga republikanët pati disa dështime javët e fundit për të anulluar dhe zëvendësuar sistemin e kujdesit shëndetësor të Presidentit Barack Obama, Presidenti Trump organizoi të mërkurën në Shtëpinë e Bardhë një takim me ligjvënësit.

“Nëse nuk e përfundojmë këtë punë, do të shohim se si do të rrënohet ‘Obamacare’ dhe pastaj do të fajësojmë demokratët. Pastaj, ata do të vijnë dhe do të thonë ‘na ndihmoni’,” u shpreh Presidenti Trump.

Ai shtoi se sipas planit republikan, amerikanët do të përjetojnë “shkurtime të mëdha të taksave dhe reforma”, të cilat ai tha se do të jenë si një “dhuratë për vendin”.

Zyra jopartiake për Buxhetin në Kongres, ka shqyrtuar disa versione të projektligjeve republikane për kujdesin shëndetësor me dallime të vogla ndërmjet tyre, për të cilat u konkludua se do t’i kursenin qeverisë miliarda dollarë për rreth një dekadë, por dhe do të linin miliona njerëz pa sigurim shëndetësor.

Për sa i përket çështjeve ndërkombëtare, Presidenti Trump kritikoi ish-Presidentin Obama për mosveprimin për Ukrainën, Korenë e Veriut dhe Sirinë.

Presidenti Trump tha se kur Rusia aneksoi Krimenë, ish-Presidenti Obama “e la t’ja hidhte paq”.

“Ai nuk përdori gjuhë të ashpër ndaj Koresë së Veriut. Dhe siç e dini, ne kemi një problem të madh me Korenë e Veriut. Shumë të madh”, tha Presidenti Trump.

Në vitin 2013, ish-Presidenti Obama kërcënoi se do të përdorte forcën ndaj qeverisë siriane, nëse ajo do të kryente sulme me armë kimike. Por ai nuk e vuri në jetë këtë kërcënim, ndërsa administrata e tij bashkëpunoi me Rusinë për të negociuar një marrëveshje sipas të cilës Siria do të largonte rezervat e armëve të saj kimike nga vendi. Pas një sulmi kimik në muajin prill, për të cilin u fajësuan forcat siriane, Presidenti Trump urdhëroi sulme ajrore ndaj një aerodromi sirian.

“Ai nuk sulmoi. Unë i sulmova”, tha Presidenti Trump.

Jon Huntsman, ish- governator në Utah, është nominuar nga presidenti i Shteteve të Bashkuara, Donald Trump, për ambasador në Rusi.

Kjo pozitë do të testojë nëse ai do të përdor përvojën diplomatike dhe njohuritë në biznes, për përfaqësimin e interesave të SHBA-së në Moskë.

Nëse aprovohet nga Senati, pozita e tij si ambasador ka mbrapa vetes disa sfida, pas supozimeve se Kremlini ka ndërhyrë në zgjedhjet presidenciale të vitit 2016 në SHBA.

Rusia i mohon këto deklarata.

Hutsman, është diplomat veteran, i cili ka shërbyer në administratën e pesë presidentëve të SHBA-së.

Në vitin 2012 ai ishte kandidat për president, i nominuar nga republikanët.

Por përvoja e tij është e kufizuar kur bëhet fjalë për Rusinë.

Huntsman, ka qenë i dërguari special i SHBA-së në Kinë, gjatë periudhës së udhëheqjes së ish-presidentit amerikan, Barack Obama, për të menaxhuar sfidat e Uashingtonit në marrëdhëniet me Pekinin.

Miliarderi 57-vjeçar, ka shërbyer edhe si ambasador i SHBA-së në Singapor, gjatë udhëheqjes së ish-presidentit George H. W. Bush.

Për muaj të tërë është diskutuar se Trump “ka rezervuar” kohë më parë këtë pozitë për Huntsman, ndonëse ky i fundit ka qenë kritik në të kaluarën për presidentin e tij të ardhshëm.

Gjatë fushatës presidenciale më 2016 në SHBA, ai i pati kërkuar Trumpit të largohej nga kandidatura për president, pas publikimit të një videoje, në të cilin protagonist ishte presidenti i tanishëm Trump, duke bërë komente vulgare për disa gra.

James Collins, i cili ka shërbyer si ambasador i SHBA-së në Moskë, në periudhën 1997-2001, kur Bill Clinton udhëhiqte shtetin amerikan, ka folur për perspektivën e Huntsmanit në Moskë.

“Zoti Huntsman do të shihet si zgjedhje e duhur për atë post, si person i rëndësishëm politikisht”, ka thënë ai.

“Mendoj që një vendim i tillë, do të interpretohet si sinjal se Trump ka përzgjedhur një njeri me përvojë”, ka shtuar tutje Collins.

Në rast se Huntsman merr postin, ai do ta kryejë detyrën e tij në Moskë, i përcjellur nga një situatë e tensionuar në mes të dy superfuqive.

Trump ka treguar gatishmëri për të rregulluar marrëdhëniet me Rusinë, të cilat janë lëkundur pas konflikteve në Ukrainë dhe Siri.

Presidenti amerikan, Donald Trump është takuar dy herë me homologun e tij rus, Vladimir Putin, gjatë punimeve të samitit G20 në Hamburg të Gjermanisë.

Para kamerave ata i kanë zgjatur dorën njëri- tjetrit dhe kanë dhënë përshtypjen se janë të gatshëm për të krijuar një atmosferë më të ngrohtë mes dy vendeve.

Mirëpo larg buzëqeshjeve, presioni mes dy palëve vazhdon të rritet pas njoftimit se bashkëpunëtorët e Trumpit dhe zyrtarë rusë, janë takuar mes vete para mbajtjes së zgjedhjeve në SHBA.

Sidoqoftë, ambasadorët e fundit amerikanë në Rusi janë përballur me vështirësi gjatë kryerjes së detyrës.

John Tefft, ambasadori në largim i SHBA-së që ka shërbyer në Rusi është akuzuar disa herë nga përfaqësues të Kremlinit se ka tentuar të nxisë mosmarrëveshje në këtë vend.

Në ditën e tij të dytë të punës, gjatë vitit 2012, një moderator në NTV (televizion i cili kontrollohet nga gjiganti shtetëror Gazprom), e ka akuzuar ambasadorin Tefft, se është dërguar në Rusi për të nxitur revolucion.

Sidoqoftë, Kremlini u tregua i kujdesshëm kur në mars u njoftua për mundësinë që Huntsman të marrë detyrën e ambasadorit në Rusi.

“Do të mirëpresim secilin ambasador amerikan në Rusi, i cili do të jetë mbështetës i palëkundur i idesë së zhvillimit të dialogut në mes të dy vendeve”, pati thënë Dmitry Peskov, zëdhënës i presidentit rus, Vladimir Putin.

‘Politika Potemkin’

Hutsman, një i martuar me shtatë fëmijë, përfshirë edhe dy fëmijë të adoptuar, rrjedh nga një familje e pasur nga Utah, kapital i cili është ndërtuar nga prodhimet kimike.

Kompania e familjes së tij ka disa ndërtesa biznesore në Rusi, shumica prej tyre janë fabrika që prodhojnë substanca të ndryshme kimike për përdorim shtëpiak dhe industrial.

Disa kritikë kanë dyshuar në mundësinë që Huntsman të negociojë me Moskën në mënyrën të paanshme, marrë parasysh interesat e kompanisë së familjes së tij në Rusi.

Huntsman ka një ulëse edhe në bordin e drejtorëve të kompanisë amerikane të automjeteve Ford, e cila ka një numër të fabrikave në Rusi.

Ai është edhe anëtar i kishës Mormone, e cila është vetëm njëra nga objektet fetare që i janë nënshtruar presionit në rritje nga autoritetet ruse.

Sa i përket çështjes së Rusisë, Huntsman është i njohur për disa deklarata që i ka bërë më 2012, kur sfidonte ish-presidentin Barack Obama, i cili po kandidonte për mandatin e dytë si president i SHBA-së.

Huntsman ishte deklaruar rreth çështjeve të SHBA-së me Rusinë, pasi presidenti i atëhershëm Barack Obama, bënte përpjekje për rregullimin e marrëdhënieve mes dy vendeve.

“Kjo është politikë Potemkin”, pati thënë ai përmes një deklarate.

“Ne kemi nevojë për përmirësim të marrëdhënieve me Rusinë, mirëpo ne nuk duhet të bëjmë marrëveshje që pasqyron politikën e njohur si ‘Fshati Potemkin’, përmes së cilës, ne sillemi sikur kemi bashkëpunim me Kremlinin, më shumë se sa në realitet, sikur Kremlini është më demokrat sesa në të vërtetë është, apo ta pasqyrojmë Rusinë si më pak të rrezikshme për fqinjët e saj se sa është tani”, thuhej ndër të tjera në deklaratën e Huntsman.

Kjo deklaratë nuk është e qasshme në faqen ku ishte publikuar për herë të parë, mirëpo gjendet në arkivat e tjera gjatë hulumtimit në internet.

Përgatiti: Krenare Cubolli

Departamenti amerikan i Shtetit në raportin vjetor për terrorizmin, tha se me gjithë faktin që sulmet terroriste dhe pasojat në njerëz nga terrorizmi kanë shënuar rënie në nivel botëror në vitin 2016, grupet terroriste vazhduan të shfrytëzojnë territoret pa pushtet dhe konfliktet për të zgjeruar shtrirjen e tyre dhe për të drejtuar e frymëzuar sulme gjithandej nëpër botë.

Shteti Islamik i Irakut dhe Sirisë (ISIS) mbeti kërcënimi më i madh terrorist në shkallë globale, me tetë degë të njohura dhe një numër rrjetesh të panjohura që veprojnë përtej qendrës së grupit në Irak dhe Siri.

Al-Qa’ida dhe partnerët e saj rajonal mbeten kërcënim për sigurinë amerikane dhe interesat e Shteteve të Bashkuara, përkundër trysnisë kundër terroriste nga partnerët e Shteteve të Bashkuara dhe shtimin e përpjekjeve ndërkombëtare për të luftuar ideologjinë e dhunshme islamike.

Shqipëria

Shqipëria ishte mbështetëse e fuqishme e përpjekjeve kundër terroriste në vitin 2016 dhe ka vazhduar pjesëmarrjen në koalicionin global për mposhtjen e ISIS-it, duke bërë dhurime të konsiderueshme më armë dhe municione.

Më 4 dhe 5 nëntor të vitit 2016 një operacion i bashkërenduar rajonal kundër terrorizmit çoi në arrestimin e katër vetave në Shqipëri. Operacioni parandaloi një sulm të mundshëm në ndeshjen e futbollit ndërmjet Shqipërisë dhe Izraelit që duhej të mbahej në Shkodër më 12 nëntor. Të arrestuarit u akuzuan për mbështetje financiare e logjistike të ISIS-it, duke rekrutuar njerëz në emër të tij dhe duke nxitur gjuhë të urrejtjes.

Në raport vlerësohet se Shqipëria ka penalizuar të gjitha veprimtaritë që kanë të bëjnë me terrorizmin, nxitjen dhe financimin e tij, rekrutimin e pjesëmarrjen në organizata terroriste. Në vitin 2016, nëntë të akuzuar ne lidhje më veprime të tilla, u shpallën fajtor dhe u dënuan me nga 7 deri në 18 vjet heqje lirie. Një gjykatë e apelit në muajin nëntor, zbuti dënimet për pesë veta.

Në raport thuhet se Shqipëria ka shtuar përpjekjet për kundërvënie ndaj kërcënimeve terroriste. Në këtë kuadër përmendet bashkëpunimi i ngushtë i Njësisë së zgjeruar Kundër Terroriste të Policisë së shtetit me Departamentin amerikan të Drejtësisë dhe Programin Mbështetës Trajnues të Hetimit të Krimit Ndërkombëtarë ICITAP. Në bashkëpunim me Bashkimin Evropian dhe financimin e Departamentit amerikan të shtetit, ICITAP-i ka siguruar pajisje dhe trajnime për qeverinë shqiptare, për mbledhjen e gjurmëve të gishtërinjve në vendkalimet kufitare. Kjo ka shtuar mundësitë e policisë shqiptare që të mbledhë të dhënat biometrike për individë të caktuar në vendkalimet kufitare.

Departamenti amerikan i Drejtësisë me programin e tij të vendosur në Tiranë, ka vazhduar të ofrojë mbështetje dhe trajnim për prokurorët, zyrtarët e sundimit të ligjit dhe hetuesit financiar, analistët e zbulimit dhe gjykatësit nga Shqipëria, Bosnja, Kosova, Maqedonia dhe Serbia që punojnë me rastet e luftëtarëve të huaj dhe rastet e lidhura me terrorizmin.

Në raport thuhet se korrupsioni i shoqëruar edhe me funksionimin e dobët të sistemit të drejtësisë ka vazhduar të pengojë përpjekjet për sundimin e ligjit në të gjitha nivelet në Shqipëri.

Shqipëria është pjesë e organizatave që luftojnë financimin e terrorizimit dhe që nga qershori i vitit 2012, ajo ka punuar në adresimin e dobësive në këtë fushë duke shënuar përparime të konsiderueshme.

Në vitin 2015 qeveria shqiptare hartoi dhe miratoi strategjinë kombëtare për luftë kundër ekstremizmit të dhunshëm. Në vitin 2016, qeveria emëroi bashkërenduesin kombëtar për luftës kundër ekstremizmit të dhunshëm që është i ngarkuar me mbikëqyrjen e zbatimit të strategjisë kombëtare. Ajo në shtator të vitit 2016, ishte mikpritëse e një tryeze dyditëshe mbi radikalizmin dhe rekrutimin e luftëtarëve të huaj. Qeveria shqiptare ishte bashkorganizatore e një ngjarjeje në New York me temën “luftimi i ekstremizmit të dhunshëm nëpërmjet arsimimit” për të veçuar rolin që ka arsimi në nxitjen e tolerancës dhe gjithëpërfshirjes në mesin e të rinjve. Qeveria shqiptare ka zhvilluar një program sprovë për të trajnuar mësimdhënësit që të zbatojnë plan-programet arsimore mbi tolerancën fetare në shkolla.

Kosova

Raporti theksin se kërcënimi nga ekstremizmi i dhunshëm islamik ishte në rritje në Kosovë, i mbështetur pjesërisht nga fondet e organizatave të huaja që predikonin ideologji ekstremiste dhe grupet e dhunshme ekstremiste që shfrytëzuan mediet sociale për të përhapur propagandë dhe për të rekrutuar mbështetës.

Afërisht 315 luftëtarë të huaj terrorist nga Kosova udhëtuan për në Siri dhe Irak për të luftuar për ISIS-in apo Frontin al‑Nusrah Front, nga të cilët rreth 58 janë vrarë. Qeveria e Kosovës po zbaton një strategji gjithëpërfshirëse dhe një plan veprimi kundër ekstremizmit të dhunshëm. Drejtoria kundër terrorizmit e policisë së Kosovës po shton mundësitë e saj duke shtuar personelin dhe duke zhvilluar njësinë e kundër terrorizimit kibernetik. Qeveria e Kosovës ka vazhduar bashkëpunimin e saj në këtë fushë me Shtetet e Bashkuara të cilat ndihmuan forcat e ligjit dhe institucionet e drejtësisë në rastet e që kanë të bëjnë me kundër terrorizmin.

Në raport thuhet se për shkak që situata politike dhe e sigurisë në veriun e Kosovës ka vazhduar të kufizojë mundësitë e qeverisë për të ushtruar autoritetin e saj të plotë në të zonë, trupat e NATO-s dhe ato të EULEX-it, kanë vazhduar të punojnë me policinë e Kosovës për ruajtjen e një mjedisi të sigurt dhe forcimin e sundimit të ligjit përfshirë edhe kufijtë. Ndonëse Kosova dhe Serbia fqinje nuk bashkëpunojnë zakonisht në çështjet e kundër terrorizmit. qeveritë kanë një plan të Menaxhimit të Integruar të kufirit që nga viti 2013 dhe kanë marrë pjesë ne trajnimet e financuara nga Shtetet e Bashkuara.

Kosova është anëtare e Koalicionit Global për Mposhtjen e ISIS-it dhe ka ndërmarrë hapa në shumë linja për brenda kufijve të mundësive të saj. Ajo është përqendruar pikë së pari në ndërprerjen e valës së luftëtarëve të huaj terrorist dhe pengimin e financimit të grupeve terroriste. Kosova nuk është anëtare e OKB-së por është zotuar të zbatojë rezolutën 2178 të Këshilli të Sigurimit të OKB-së.

Raporti përmend sulmin e 4 gushtit në ndërtesën e parlamentit të Kosovës që kaloi pa dëme në njerëz.

Raporti thekson se Kosova ka një kuadër ligjor gjithëpërfshirës mbi të gjitha aspektet që kanë të bëjnë me terrorizmin dhe u ofron autoriteteve mjetet e domosdoshme për të luftuar çdo formë të terrorizmit. Në këtë kuadër raporti përmend edhe ligjin që ndalon përfshirjen e qytetarëve të saj në ushtritë e huaja, policitë apo formacionet paraushtarake jashtë territorit të Kosovës duke paraparë dënime deri në 15 vjet heqje lirie për rastet e tilla.

Raporti vë në pah edhe sfidat që mbesin në rrugën e forcimit të mundësive të autoriteteve për t’u përballur me terrorizmin përfshirë edhe faktin që Kosova nuk është anëtare e INTERPOL-it dhe EUROPOL-it.

Në vitin 2016, policia kufitare e Kosovës në bashkëpunim me vendet e rajonit dhe Turqinë, identifikoi dhe ndaloi të paktën pesë veta që të udhëtojnë për në Siri dhe një qytetar u arrestua pas kthimit nga zona e konfliktit. Megjithatë, të paktën pesë veta arritën në Siri.

Më mbështetjen amerikane, policia kufitare po trajnohet për të qenë në gjendje që të identifikojë më herët personat që kanë lidhje me terrorizmin. Për më tepër Shtetet e Bashkuara kanë ofruar mundësi trajnimi për të gjitha aspektet e kundër terrorizmit nëpërmjet zyrave të ndryshme të institucioneve amerikane.

Në raport thuhet se po vazhdojnë proceset gjyqësore për disa nga 59 të dyshuarit e arrestuar në gusht të vitit 2014 gjatë operacionit më të madh kundër terrorist të qeverisë së Kosovës. Hetimet po vazhdojnë ndaj një duzinë të dyshuarish, përfshirë edhe disa imamë.

Gjatë vitit 2016, autoritetet e Kosovës arrestuan 32 veta nën akuzat që lidhen me terrorizmin, përfshirë 18 veta në muajin nëntor. Autoritetet shpallën dënime në disa raste të profilit të lartë, përfshirë dënimin e shtatë vetave më 42 vjet heqje lirie në muajin maj dhe katër vetave me 49 vjet në muajin qershor për përfshirje në ISIS. Po ashtu autoritetet pezulluan veprimtaritë e 21 Organizatave Joqeveritare të dyshuara për mbështetje të ekstremizmit të dhunshëm.

Kosova, thuhet në raport, ka dëshmuar vullnet politik për t’u përballur me kërcënimet nga terrorizmi dhe shteti ka kuadër ligjor për ta bërë këtë. Institucionet kombëtare kanë forcuar mundësitë e tyre për hetimin dhe përndjekjen e rasteve, por mundësitë, burimet dhe përvoja e kufizuar, ka vazhduar të kufizojë aftësinë e tyre për t’u përballur në mënyrë më të frytshme me rastet e terrorizmit.

Raporti thekson se Kosova ka miratuar ligjin që sanksionin financimin e terrorizmit, por ka vështirësi në përndjekjen dhe ngrirjen dhe konfiskimin e pasurive të individëve.

Një nga synimet kryesore të strategjisë së qeverisë për luftën kundër ekstremizmit të dhunshëm është parandalimi i këtij ekstremizmi dhe radikalizmit. Kjo përfshinë ngritjen e vetëdijes mbi radikalizmin në komunitete dhe shtimin e mundësive për luftën kundër tij. Ministria e Punëve të Brendshme po teston një mekanizëm në komunën e Gjilanit që mbledh së bashku zyrtarët lokal, udhëheqësit fetarë dhe shoqërinë civile për të diskutuar shqetësimet mbi radikalizmin që çon në dhunë. Strategjia e Kosovës përfshinë edhe përgatitjen dhe promovimin e kundër-rrëfimeve që dobësojnë peshën e mesazheve ekstremiste. Strategjia po ashtu përfshinë de radikalizimin dhe ri integrimin e personave të radikalizuar. Kjo përfshinë edhe mbështetjen për individët e radikalizuar që të braktisin ideologjitë ekstremiste, vlerësimin e rrezikut nga individët e kthyer nga konfliktet dhe ndërgjegjësimin e sistemit korrektues për rreziqet nga terroristët e burgosur.

Raporti tërheq vërejtjen se anëtarësimi i Kosovës në shumë organizata rajonale e ndërkombëtare, përshirë Kombet e Bashkuara është bllokuar nga vendet që nuk e njohin pavarësinë e saj dhe kjo dëmton bashkëpunimin në shumë çështje, përfshirë edhe kundër terrorizmin.