Gjatë një interviste në rrjetin televiziv NBC, presidenti Donald Trump tha se do ta kishte shkarkuar shefin e FBI-së James Comey edhe në qoftë se zyrtarët e Departamentit të Drejtësisë nuk do t’ia kishin rekomanduar, duke thënë se ai donte të dukej.

“Ai do që të bjerë në sy. Është pompoz. kërkon të duket. FBI-ja ka qenë e përfshirë në amulli prej tij”, i tha zoti Trump rrjetit televiziv në intervistën e tij të parë që prej shkarkimit të papritur ditën e martë të zotit Comey.

Ish kreu i FBI-së po drejtonte një hetim mbi lidhjet mes zyrtarëve të fushatës zgjedhore të presidentit Trump dhe zyrtarëve rusë, së bashku me ndërhyrjen e mundshme ruse në zgjedhje e vitit të kaluar.

“Do ta pushoja vetë Comey-n” tha Trump. “Do ta kisha pushuar pavarësisht pavarësisht nga rekomandimi i zëvendës Prokurorit të Përgjithshëm Rod Rosenstein”.

Të enjten Shtëpia e Bardhë mbrojti sërish mënyrën se si e shkarkoi drejtorin e Byrosë Federale të Hetimit, në një periudhë kur po hetohen lidhjet e njerëzve të fushatës zgjedhore të presidentit dhe zyrtarëve rusë.

Marrëdhënia e ndërlikuar e Presidentit Trump me ish-drejtorin e FBI-së

Shkarkimi i drejtorit të FBI-së, James Comey nga Presidenti Donald Trump ishte pika kulmore e një marrëdhënieje të vështirë njëvjeçare mes tyre. Korrespondenti i Zërit të Amerikës, Bill Gallo i hedh një vështrim zhvillimeve të muajve të fundit.

Trump: “Oh, and there’s James. He’s become more famous than me.”

Edhe në momentet më të mira, për Donald Trumpin ishte një marrëdhënie e dyfishtë dashuri-urrejtje.

Armiqësia e presidentit me drejtorin e FBI-së, James Comey filloi gjatë fushatës … kur zoti Comey nuk pranoi të ngrinte akuza kundër rivales së zotit Trump, Hillary Clinton, për përdorimin e një serveri privat emailesh, kur ishte Sekretare Shteti.

“Nuk kemi prova që të mund të mbështesnin ngritjen e akuzave”.

Kandidati i atëhershëm Trump u indinjua, duke argumentuar se zonja Clinton duhet të ishte futur në burg për emailet.

Por qëndrimi i zotit Trump ndryshoi vetëm 11 ditë para zgjedhjeve, kur zoti Comey njoftoi se FBI-ja po analizonte një grup tjetër emailesh të zonjës Clinton, një deklaratë që shumë demokratë thonë se kontribuoi në fitoren e zotit Trump.

“E respektoj faktin që drejtori Comey arriti të bënte një kthesë pas veprimit të tij të mëparshëm. E respektoj këtë jashtë mase”.

“Ai e rifitoi reputacionin e tij, e rifitoi.”

“FBI-ja po bën punë të mirë.”

Por kur mori detyrën, toni i tij ndryshoi përsëri. Veçanërisht pasi zoti Comey konfirmoi se po drejtonte një hetim për të zbuluar nëse zyrtarët e fushatës së zotit Trump kishin bashkëpunuar me Rusinë për të ndërhyrë në zgjedhje.

Zyrtarët e Shtëpisë së Bardhë thonë se shkarkimi i zotit Comey nuk ka të bëjë fare me hetimin. Ata përmendin një letër të Departamentit të Drejtësisë, ku kritikohet mënyra se si e trajtoi ai çështjen e emaileve të zonjës Clinton.

Por shumë ligjvënës nuk e besojnë këtë arsyetim, duke shtruar pyetjen se pse Presidenti Trump do ta shkarkonte zotin Comey për të njëjtat veprime që më parë i kishte përshëndetur.

“Pyetja e parë së cilës duhet t’i përgjigjet administrata është: ‘pse tani?’”, thotë senatori demokrat, Chuck Schumer.

Por zoti Trump nuk është penduar. I pyetur dje se pse e shkarkoi zotin Comey, ai u përgjigj.

“Sepse nuk po bënte punë të mirë. Është e thjeshtë. Nuk po bënte punë të mirë”.

Sekretari amerikan i Mbrojtjes James Mattis ripërsëriti qëndrimin për të mbrojtur Turqinë.

Deklarata vjen në një kohë kur autoritetet turke kanë kundërshtuar një vendim të kohëve të fundit të Shteteve të Bashkuara për të armatosur luftëtarët sirianë kurdë, në një përpjekje për të rrëzuar militantët e Shtetit Islamik në Raka

Zoti Mattis ritheksoi angazhimin e Shteteve të Bashkuara ndaj aleatit të saj të NATO-s pas një takimi të enjten me kryeministrin turk Binali Yildirim. Këto janë bisedimet e para të nivelit të lartë mes të dy vendeve që kur Uashingtoni shpalli të martën planin për t’u siguruar armë kurdëve sirianë të mbështetur nga SHBA, të njohur edhe si YPG.

Turqia e ka kundërshtuar fuqimisht vendimin dhe ka bërë thirrje për anulimin e tij. Ajo beson se YPG është një grup terrorist, pjesë e Partisë së jashtëligjshme të Punëtorëve të Kurdistanit (PKK), që konsiderohet si një grup terrorist nga Turqia, Shtetet e Bashkuara dhe Evropa.

Të mërkurën, kryeministri Yildirim kritikoi publikisht vendimin dhe tha se SHBA nuk mund të përdorë një grup terrorist për të luftuar një tjetër.

Zoti Yildirim dhe zoti Mattis u takuan të enjten përpara fillimit të një konference ndërkombëtare në Londër për çështje të sigurisë dhe humanitare në Somali.

Një zyrtar i lartë amerikan që nuk u identifikua tha të enjten se Shtetet e Bashkuara do të rrisin bashkëpunimin me Turqinë në shkëmbim të informacioneve të zbulimit, për ta ndihmuar vendin për një goditje më efikase të terroristëve.

Zyrtarët amerikane shpresojnë që kjo lëvizje të ndihmojë në zbutjen e shqetësimeve turke se armët do të përfundojnë në duart e armiqve të saj.

Ata thanë gjithashtu se armët nuk u janë dërguar ende kurdëve. Të mërkurën koloneli amerikan Xhon Dorrian tha se megjithatë, dërgesa e parë është e gati dhe se mund mund t’u shkojë kurdëve “shumë shpejt”.

Presidenti turk Rexhep Tajip Erdogan, i cili i ka kërkuar SHBA-së të anulojë vendimin, pritet të vizitojë Uashingtonin të martën e ardhshme. Zoti Erdogan ka thënë se ai do ta diskutojë këtë çështje me presidentin amerikan Donald Trump kur të takohen.

Shkarkimi i drejtorit të FBI-së James Comey ka shkaktuar reagime të forta në Uashington. Shumë nga ata që e kanë kritikuar shkarkimin kanë vënë në pikëpyetje motivet e presidentit, duke ngritur tezën se kjo masë mund të ketë lidhje me hetimet mbi rolin e Rusisë në zgjedhjet presidenciale të nëntorit. Tani anëtarë të Kongresit dhe analistë të pavarur në Uashington po pyesin si do të evolojë ky proces hetimor pas largimit të zotit Comey.

Reagimet e forta jo vetëm nga demokratë, por edhe anëtarë të partisë së tij, e kanë vënë Presidentin Trump në pozitë mbrojtëse. Sot në një numër postimesh në Twitter, ai i doli në mbrojtje vendimit për ta pushuar zotin Comey duke thënë se pasi të qetësohen gjakrat “njerëzit do ta falenderojnë për këtë veprim”.

Presidenti iu kundërpërgjigj kritikave të demokratëve, duke thënë në një postim në Twitter se ata vetë “kanë thënë gjëra nga më të këqiat për James Comey-n, përfshirë edhe nevojën që ai të pushohet nga detyra, por tani bëjnë sikur janë mërzitur”.

James Comey u bë objekt kritikash të forta nga demokratët kur rihapi hetimet mbi kandidaten Hillary Clinton, pak ditë para zgjedhjeve. Shumë demokratë kërkuan largimin e tij, pasi kishte shkelur rregullën e neutralitetit të FBI-së në periudhë zgjedhjesh që të mos ndikohet opinioni publik.

Por nuk është vetë shkarkimi i zotit Comey që ka ngritur pikëpyetje, aq sa momenti i zgjedhur për këtë vendim:

“Mendoj se në politikë thuajse gjithmonë momenti i vendimit ka rëndësi. Pyetja është përse u zgjodh ky moment? Konteksti me Rusinë mund të ketë qenë faktor; ndoshta pas dëshmisë së zotit Comey, presidenti mendoi se ishte politikisht e përshtatshme,” thotë profesori i drejtësisë Sam Erman.

Spekulimet mbi motivet përqëndrohen tek pyetja: sa thellë kanë shkuar hetimet, çfarë po rezulton prej tyre dhe si reflektojnë këto hetime tek administrata Trump?

“Nuk është diçka e zakontë të pushosh nga puna dikë që është në mes të hetimeve, qoftë edhe nëse hetimet nuk janë të fokusuara tek vetë presidenti, por tek njerëz të afërt me të”, thotë profesori Erman.

Rrjeti televiziv CNN njoftoi mbrëmë se prokurorët federalë kanë thirrur për t’u paraqitur para jurisë së madhe ish-këshilltarin e presidentit për sigurinë kombëtare, Michael Flynn. Atij i kërkohet të paraqesë dokumente financiare për të analizuar çfarë lidhjesh kishte ai me zyrtarë rusë në kuadër të hetimeve mbi rolin e Rusisë në zgjedhjet presidenciale.

Drejtorët e FBI-së emërohen për një mandat 10-vjeçar në detyrë dhe shërbejnë nën disa presidentë, pra ky rol shihet si një post mbi përkatësitë partiake. Për këtë arsye, pushimi i zotit Comey i cili ende nuk ka mbushur katër vjet në detyrë, momenti kur u bë shkarkimi, gjuha e përdorur në letrën e presidentit dhe pikëpyetjet mbi hetimet për ndërhyrjet ruse kanë zgjuar shumë mëdyshje në Uashington.

Vendimi i Presidentit Trump ka lënë të shtangur edhe shumë republikanë. Senatori Jeff Flake u shpreh përmes një postimi në Twitter: “për orë të tëra po përpiqem të gjej një argument të arsyeshëm për shkarkimin e Comeyt, por nuk kam gjetur gjë”.

Demokratët në Kongres kanë kërkuar emërimin e një prokurori të posaçëm për të vazhduar hetimet mbi kontaktet që mund të ketë pasur vjet Rusia me individë të afërt me fushatën e zotit Trump. Këtyre thirrjeve u janë bashkuar edhe disa republikanë.

Ligjvënësi Justin Amash tha përmes një postimi në Twitter se po analizon kornizën ligjore “për të ngritur një komision të pavarur mbi Rusinë”.

Në SHBA, një hetim i FBI-së si dhe hetimet e Kongresit rreth kontakteve të fushatës së zotit Trump me Rusinë nuk po i ndahen administratës, megjithëse kanë kaluar rreth katër muaj nga fillim i presidencës Trump.

Presidenti Trump në mënyrë të përsëritur e ka hedhur poshtë këtë histori si “lajm të rremë”, por hetimet nuk po japin shenja se mund të përfundojnë shpejt.

Një nënkomision Juridik i Senatit dëgjoi të hënën ish-prokuroren e përgjithshme Sally Yates, e cila u shkarkua në ditët e para të administratës Trump, si dhe ish-drejtorin e zbulimit kombëtar James Clapper, në kohën e Presidencës Obama.

Zonja Yates tregoi për bisedën e saj më 26 janar me Shtëpinë e Bardhë, të cilën e paralajmëroi për kontaktet e këshilltarit të sigurimit kombëtar Michael Flynn me ambasadorin rus në Uashington Sergej Kislyak.

Ajo tha se kishte patur dy takime dhe një telefonatë me këshilltarin juridik të Shtëpisë së Bardhë, Don McGahn lidhur me shqetësimet se ish-këshilltari i sigurimit kombëtar Michael Flynn mund të bëhej objekt shantazhi nga rusët.

Zonja Yates tregoi se i kishte thënë zotit McGahn se rusët ishin në dijeni për atë që kishte bërë zoti Flynn dhe se rusët e dinin që gjenerali Flynn kishte mashtruar nënpresidentin dhe të tjerët për atë që kishte bërë. Zonja Yates nuk specifikoi se për çfarë konkretisht ishte fjala.

Ajo tha se ia kishte dhënë këtë informacion Shtëpisë së Bardhë të Presidentit Donald Trump në mënyrë që ai të mund të ndërmerrte veprimet e duhura.

Zonja Yates tha se ishte shqetësues fakti që rusët kishin ndikim tek zoti Flynn.

Gjithashtu të hënën, tre ish-zyrtarë të administratës Obama thanë se ish Presidenti e kishte paralajmëruar zotin Trumpin që të mos e merrte si këshilltar zotin Flynn. Paralajmërimi ishte bërë gjatë një takimi që ajo pati me të në Zyrën Ovale menjëherë pas zgjedhjeve të nëntorit.

Ish-zyrtarët thonë se zoti Obama ngriti pranë zotit Trump shqetësimet e përgjithshme rreth gjeneralit Flynn dhe i tha presidentit të ardhshëm se mund të gjendeshin njerëz më të mirë për postin e këshilltarit të sigurimit kombëtar.

Ekonomisë amerikane iu shtuan 211 000 vende të reja pune gjatë muajit prill.

Kjo shihet si një shenjë bindëse se rënia ekonomike në tre muajt e parë të vitit mund të jetë e përkohshme.

Sipas Departamentit të Punës, shkalla e papunësisë u ul në 4.4 për qind, pika më të ulët në një dekadë, nga 4.5 për qind që ishte në muajin mars.

Gjatë këtij viti, mesatarisht janë shtuar 185,000 vende të reja pune në muaj, duke përkuar me ritmin e fortë të vitit të kaluar.

Ky është një tregues se deri më tani zhvillimi i tregut të punës nën Presidentin Donald Trump ngjan shumë me atë të vitin 2016 nën presidentin Barack Obama.

Shefi i FBI-së James Comey tha se nëse dikush mendon se agjencia e tij mund të ketë pasur ndikim te fitorja e Donald Trumpit në zgjedhjet presidenciale të 2016-s, kjo e bën të ndjejë një farë neverie.

Disa ditë përpara votimeve, FBI-ja rihapi një hetim rreth përdorimit të një serveri privat nga kandidatja demokrate Hillary Clinton kur ishte sekretare e shtetit.

Zoti Comey, drejtor i Byrosë Federale të Hetimeve, agjencia kryesore ligjzbatuese e vendit, tha përpara një komisioni të Senatit se kishte qenë në një dilemë të madhe para se ta bënte publik rihapjen e hetimit.

Hetimi rihapej ndërkohë që vetëm disa muaj më parë hetuesit kishin deklaruar se zonja Clinton nuk kishte bërë asgjë të paligjshme. Por zoti Comey tha se do të kishte qenë “katastrofike” nëse nuk do ta bënte publik informacionin.

“Ishte një zgjedhje e vështirë, por unë ende besoj se ishte e drejtë,” tha shefi i FBI-së. “Të fshihje këtë hetim, kjo do të kishte qenë vdekje për FBI-në”, tha ai.

FBI-ja normalisht përpiqet të mos i bëjë publike hetimet rreth kandidatëve përpara zgjedhjeve, në mënyrë që të mos ndikojë në rezultatin e votimit.

Por zoti Comey tha se “për asnjë çast të vetëm” nuk kishte menduar se rihapja e hetimit mund ta ndihmonte zotin Trump të fitonte në zgjedhjet e nëntorit.

Të martën, zonja Clinton fajësoi pjesërisht zotin Comey për humbjen në zgjedhje. Ajo tha se ishte duke fituar, kur vetëm 11 ditë përpara votimeve, zoti Comey bëri publik hetimin e ri.

Hetimi erdhi pasi FBI-ja zbuloi në një kompjuter mijëra e-maile të zonjës Clinton, të kohës kur ajo kishte qenë sekretare e shtetit.

Kompjuteri i përkiste ish-kongresmenit Anthony Weiner, bashkëshorti i ndarë i zonjës Huma Abedin, ndihmëse kryesore e zonjës Clinton.

Zyrtarë të lartë francezë thonë se sulmi i së enjtes në Paris dhe një tjetër sulm që po planifikohej, por që u zbulua nga policia në Marsejë në fillim të javës, janë pjesë e një përpjekjeje të radikalëve islamikë për të ndikuar tek rezultati i zgjedhjeve në Francë.

Autoritetet druhen se mund të jenë duke u planifikuar edhe sulme të tjera terroriste, përfshirë ndoshta edhe një sulm ditën e votimeve.

“Ata duan të ndikojnë tek jeta politike në Francë, përmes ndikimit të drejtpërdejrë tek ecuria e votimeve, madje edhe tek organizimi i tyre”, i tha gazetës “Le Figaro” Thibault de Montbrial, ish kryetar i Qendrës për Analiza dhe Parashikime në Ministrinë e Jashtme të Francës.

Autoritetet franceze thonë se personi i armatosur, u identifikua menjëherë pas sulmit nga grupi terrorist Shteti Islamik përmes agjencisë së lajmeve Amaq të vetë grupit terrorist, si Abu Yousif al-Bajiki shtetas belg. Ai hapi zjarr ndaj një makine të policisë të parkuar në bulevardin Champs-Élysées, duke goditur tre policë dhe një turist gjatë sulmit jashtë një dyqani veshjesh të firmës “Marks and Spencer”.

Ai ishte armatosur me një pushkë Kalashnikov dhe e vranë ndërsa përpiqej të largohej nga vendi i ngjarjes. Njëri prej policëve të qëlluar me armë vdiq në vendin e ngjarjes. Fillimisht dëshmitarët thanë se polici ishte vrarë kur ishte brenda në makinë, e cila ishte e parkuar tek semaforët. Dëshmitarët thanë se autori i sulmit doli nga një tjetër makinë dhe filloi të qëllonte me armë pa asnjë lloj hezitimi.

Një zëdhënës i Ministrisë së Brendshme të Francës tha se në këtë sulm mund të jenë përfshirë më tepër se sa një person dhe konfirmoi se në shënjestër “ishte vënë qëllimisht policia”. Një tjetër person i dyshuar iu dorëzua vetë policisë të premten në qytetin Antuerp të Belgjikës.

Presidenti francez François Hollande zhvilloi të premten një takim urgjent me këshilltarët e tij kryesorë dhe me shefat e sigurisë, për të diskutuar mbi masat e sigurisë që duhen marrë të dielën, ditën e zgjedhjeve.

“Policit që u vra në një mënyrë prej frikacakësh do t’i bëhen homazhe në nivel kombëtar”, – u tha gazetarëve udhëheqësi francez.

Eksperti britanik i anti-terrorizmit, Olivier Guitta, i tha Zërit të Amerikës se marrja e menjëhershme e përgjegjësisë nga ISIS, diçka e pazakontë, tregon se sulmi jo vetëm që ishte “frymëzuar” nga grupi terrorist, por gjithashtu ishte planifikuar prej tij.

“Është shumë e madhe mundësia që të ketë sulme terroiste në zgjedhjet presidenciale të Francës,”- tha ai. “Xhihadistët do të përpiqen të ndikojnë tek votimet”, shtoi Guitta, drejtues i firmës konsulente për sigurinë, GlobalStrat, me seli në Londër.

Sulmi me armë i së enjtes ndodhi ndërsa 11 kandidatë zyrtarë të votimeve ishin duke zhvilluar një debat që po transmetohej drejtpëdrejt në televizionin francez.

Disa komentatorë politikë thanë se sulmi mund të shtojë përkrahjen për Marine Le Pen, kandidaten populiste të së djathës ekstreme, e cila thotë se imigracioni përbën kërcënim për sigurinë dhe kulturën e Francës.

Kundërshtarët e zonjës Le Pen thonë se xhihadistët duan që ajo të fitojë, duke thënë se politikat e vijës së ashpër që propozon ajo kundër imigracionit, do të ndihmonin grupet militante si Shteti Islamik që të shtonin rekrutimet; por përkrahësit e zonjës Le Pen e kundërshtojnë këtë pretendim.

Gjatë debatit, Le Pen, e cila sipas anketave kryeson raundin e parë të zgjedhjeve të së dielës, por që ka humbur terren ditët e fundit, theksoi përsëri thirrjen e saj që Franca të largohet nga zona e lëvizjes së lirë, e Shengenit dhe të vendosë kontrolle më të mëdha në kufi.

“Përballë nesh ndodhet fluksi i imigrantëve. Duhet të kontrollojmë kufijtë, përndryshe ne nuk kemi për ta ndalur dot këtë valë!” – tha ajo.

Me të mësuar lajmin për sulmin në Paris, kandidatët i shtuan sipas mënyrës së vet propozimet për masa të forta për ta mbrojtur Francën nga terrorizmi.

“Mjaft më me butësinë dhe me naivitetin”, – deklaroi Le Pen. Kandidati konservator François Fillon propozoi arrestimin e qindra të dyshuarve si militantë, të përfshirë në listën e terroristëve, sikurse ishte edhe autori i sulmit të së enjtes.

Anketuesit thonë prej javësh se gara presidenciale po zhvillohet tepër e ngushtë mes të katër kandidatëve: Le Pen, Fillon, kandidatit të qendrës dhe pro-BE-së Emmanuel Macron dhe atij të majtë Jean-Luc Melenchon. Analistët kanë thënë se një ngjarje e minutës së fundit mund ta ndryshojë prirjen e deritanishme të fushatës zgjedhore.

Macron, i cili ka qenë ministër i ekonomisë dhe që ka pak eksperiencë për çështjet e sigurisë, pati një ton më të përmbajtur se sa Le Pen dhe Fillon në debatin e së enjtes, duke paralajmëruar se Francës do t’i duhet të jetojë me terrorizmin për shumë vite me radhë. Në një anketë në mes të javës, Macron doli se kishte më tepër mbështetje se sa zonja Le Pen.

Të martën, policia në Marsejë arrestoi dy të dyshuar për plane immediate për sulm terrorist në Francë.

Policia tha se kishte gjetur lëndë shpërthyese dhe armë në një apartament me lidhje me të dyshuarit. Kandidatët presidencialë u paralajmëruan nga shefat e sigurisë të rrisnin masat e veta të sigurisë.

Shefi i zbulimit i Francës, tha se dy personat e arrestuar, të dy rreth të njëzetave, të lindur në Francë, dyshohet se po planifikonin një sulm për ditën e zgjedhjeve.

Dy vjet më parë, Partia Fronti Kombëtar i Le Penit doli e para në raundin e parë të zgjedhjeve rajonale, disa javë pas sulmeve terroriste në Paris në vitin 2015, ku humbën jetën 130 persona. Por në raundin e dytë mbështetja për këtë parti ra dhe ajo nuk arriti të sigurojë kontroll politik në asnjërin prej rajoneve.

Kryeprokurori i Shteteve të Bashkuara, Jeff Sessions, thotë se arrestimi i Julian Assange është një përparësi. Komentet nga kreu i Departamentit amerikan të Drejtësisë u bënë ndërsa në media qarkullojnë njoftime se qeveria amerikane po përgatit akuza ndaj shtetasit australian.

Duke folur nga Teksasi, zoti Sessions tha dje se Departamenti i Drejtësisë po i shton përpjekjet për të ngritur akuza ndaj personave që rrjedhin informacion të klasifikuar në media:

“Ne po i rrisim përpjekjet kundër rrjedhjes së informacionit. Kjo ka marrë përmasa më të mëdha se çdo gjë tjetër. Kemi njerëz profesionistë të sektorit të sigurisë në SHBA që tronditen prej volumit të madh të informacionit të nxjerrë, një pjesë e të cilit është serioz. Pra, është përparësi që ta luftojmë.”

Deklarata bëhet vetëm një muaj pasi Wikileaks botoi rreth 8 mijë dokumente që pretendohet se hedhin dritë rreth mjeteve dhe programeve sekrete të CIA-s për të ndërhyrë në kompjutera, celularë dhe madje në televizorët inteligjentë.

Wikileaks kishte publikuar më parë 250 mijë kabllograme të Departamentit të Shtetit, si dhe qindra mijëra materiale të ushtrisë amerikane në Irak dhe Afganistan.

Departamenti amerikan i Drejtësisë e ka hetuar zotin Assange të paktën që nga viti 2010, kur Wikileaks publikoi mijëra dokumente sigurie të vjedhura nga qeveria amerikane.

Akuzat që mund të ngrihen ndaj zotit Assange përfshijnë konspiracionin, vjedhjen e pronësisë qeveritare dhe shkelje të Ligjit të Spiunazhit. Akuzat do të duhet të miratohen nga zyrtarë të lartë të Departamentit të Drejtësisë.

Gjatë një fjalimi javën e kaluar në Uashington, drejtori i CIA-s, Mike Pompeo, tha se Wikileaks instruktoi një analist të zbulimit ushtarak amerikan të gërmonte për “informacione sekrete të caktuara” të Shteteve të Bashkuara.

Departamenti amerikan i Shtetit u bëri thirrje të gjitha partive politike në Shqipëri të marrin pjesë në zgjedhjet e ardhshme parlamentare.

Në një deklaratë të lëshuar të enjten, thuhet se Nënsekretari amerikan i Shtetit për Çështjet Politike, Ambasador Thomas A. Shannon, u takua me ministrin e Jashtëm të Shqipërisë Ditmir Bushati, për të folur mbi interesat e përbashkëta në marrëdhëniet dypalëshe dhe në rajon.

Nënsekretari Shannon, thuhet në deklaratën e Departamentit të Shtetit, riafirmoi partneritetin e ngushtë midis Shteteve të Bashkuara dhe Shqipërisë, mbështetjen e fortë të SHBA ndaj përpjekjeve të Shqipërisë për reformën e gjyqësorit dhe angazhimin e përbashkët ndaj vlerave demokratike, sundimit të ligjit dhe respektimit të të drejtave të njeriut.

Nënsekretari Shannon, thuhet në deklaratë, theksoi gjithashtu rëndësinë që të gjitha partitë politike në Shqipëri të marrin pjesë në zgjedhjet e ardhshme parlamentare.