Europë

Belgjikë: Arrestohen edhe 5 të dyshuar, Abdeslam ende në ikje

Pamje e masave të shtuara të sigurisë në Bruksel

Policia në Bruksel ka ndërmarrë më tepër bastisje, me ç’rast i ka arrestuar edhe pesë persona të dyshuar, derisa po vazhdon kërkimi për një të dyshuar për sulmet në Paris, i cili është ende në ikje.

Autoritetet belge më sot më herët kanë shpallur se i kanë arrestuar 16 vetë në ndërhyrjet në Bruksel dhe qytetin tjetër, Sharlerua, mbrëmë vonë.

Zëdhënësi i Prokurorisë federale të Belgjikës, Eric Van Der Sypt, tha se i dyshuari kryesor në këtë rast, militanti i lindur në Francë, Salah Abdeslam, nuk “është në mesin e të arrestuarve gjatë kërkimeve të mbrëmshme.

Në sulmet terroriste të 13 nëntorit në Paris, janë vrarë 130 vetë dhe janë plagosur qindra të tjerë.

Pas këtyre sulmeve, në pjesën më të madhe të vendeve evropiane janë shtuar masat e sigurisë.

Schengen Fortesa – ja si duket

Qeveria e Holandës thuhet se ka ardhur me nje ide të krijimit të një “mini-Schengen” zone, për të vendosur kontrollin e pasaportave në çdo hyrje të pesë shteteve. Kështu do të dukej kjo iniciativë:

shengeni

Bruksel: 16 arrestime, Salah nuk gjendet

VOAL – BRUKSEL, 23 NËNTOR – I kërkuari numër një Salah Abdeslam nuk është e gjetur, shkruan Voice Of Albanians, voal.ch. Lajmin e jep prokurori federal belg Eric Van der Sypt. Gjashtëmbëdhjetë veta janë arrestuar përgjatë bastisejeve që janë zhvillluar natën e mbrëmshme në Bruksel.

Nuk janë gjetur armë apo lëndë shpërthyese gjatë këtyre bastisjeve. Policia ka bërë 19 bastisje në Bruksel, në lagjet Molenbeek, Anderlecht, Jette, Woluwe-Saint-Lambert e Forest. Tri bastisje të tjera u bënë në Charleroi. ansa

Fotot: Aksion në Bruksel, policia banorëve: Mos dilni në dritare!

Voal – Policia dhe ushtria belge po krehin zonën në qendër të Brukselit gjatë këtyre orëve, duke evakuar hotelet dhe restorantet dhe duke iu bërë thirrje banorëve të qëndrojnë larg dritareve.

Aksioni po kryehet pranë shesheve qëndrore të qytetit.

22-11-2015 22-21-04 22-11-2015 22-21-42 22-11-2015 22-22-36 22-11-2015 22-23-15

Ministri i Brendshëm gjerman tërheq vëmendjen për fenomenin e luftëtarëve të huaj

De Maiziere në një intervistë për gazetën Bild am Sonntag theksoi se pas sulmeve në Paris edhe Gjermania është e rrezikuar nga sulmet terroriste

BERLIN – Ministri i Brendshëm i Gjermanisë, Thomas de Maiziere, ka deklaruar se 70 persona nga 1 e treta e rreth 760 personave të cilët janë nënshtetas të Gjermanisë dhe që janë kthyer në këtë vend pasi kanë marrë pjesë në luftë në Siri dhe Irak kanë marrë kurse të ndryshme ushtarake.

De Maiziere në një intervistë për gazetën Bild am Sonntag theksoi se pas sulmeve në Paris edhe Gjermania është e rrezikuar nga sulmet terroriste.

Ai në fjalën e tij vuri në dukje se instancat e sigurisë së Gjermanisë kanë konstatuar se rreth 760 shtetas gjermanë kanë shkuar në vendet e konflikteve si Siri dhe Irak. Ai vuri në dukje se rreth 120 persona janë kthyer përsëri në Gjermani dhe se 70 prej tyre kanë marrë kurse ushtarake në vendet e konfliktit ose kanë marrë pjesë në mënyrë aktive në konfliktet e armatosura.

Itali, protesta kundër akteve terroriste: “Ne myslimanët nuk njohim ekstremizëm dhe radikalizëm – Jo terrorizmit”

Presidenti Mattarella në mesazhin e tij theksoi se vrasësit e kanë shënjestruar solidaritetin dhe humanizmin, por ata kurrë nuk do të heqin dorë nga këto vlera

ROMË – Myslimanët të cilët jetojnë në Itali protestuan kundër sulmeve terroriste të ndodhura në kryeqytetin francez, Paris, dhe kundër identifikimit të terrorizmit me Islamin.

Myslimanët dhe italianët vendës të cilët e kundërshtojnë “identifikimin e terrorizmit me Islamin” që u mblodhën në Romë, Milano, Gjenova, organizuan një miting të quajtur “Not in my name (Jo në emrin tim)”, për ti dënuar sulmet e ndodhura javën e kaluar në Paris dhe përdorimin e Islamit në këto sulme.

– Porosi mbështetjeje nga presidenti dhe kreu i Senatit-

Mitingu i cili u mbajt në Romë pavarësisht nga shiu i madh ku morën pjesë myslimanë nga vendet e ndryshme, nisi me një minutë heshtje për të nderuar viktimat e sulmeve terroriste në Paris, dhe të vdekurit e sulmeve terroriste.

Në miting u lexuan porositë e mbështetjes të presidentit italian, Sergio Mattarella dhe Presidentit të Senatit të Republikës, Pietro Grasso.

Presidenti Mattarella në mesazhin e tij theksoi se vrasësit e kanë shënjestruar solidaritetin dhe humanizmin, por ata kurrë nuk do të heqin dorë nga këto vlera.

– “Ne myslimanët nuk njohim ekstremizëm dhe radikalizëm. Jo terrorizmit”-

Refugjatët në Evropë: Nuk jemi terroristë

Refugjatët, siç thonë, më herët shumë lehtë kalonin kufijtë e shteteve evropiane, ndërsa sot situata është shumë më ndryshe

VJENË – Mijëra refugjatë me prejardhje nga Siria, Iraku dhe Afganistani, të cilët gjenden në Evropë, pas sulmeve terroriste në Paris më 13 nëntor ku humbën jetën 129 persona, shqetësohen se për shkak të “etiketimit terrorist” mund të kthehen në vendet e tyre.

Refugjatët, siç thonë, më herët shumë lehtë kalonin kufijtë e shteteve evropiane, ndërsa sot situata është shumë më ndryshe. Pas sulmeve terroriste për të cilin përgjegjësinë e mori organizata terroriste ISIS, është ulur numri i kërkesave të aprovuara për azil, por edhe aksionet humanitare dhe ndihmat për refugjatët.

Siriani Ali Ferah, 54 vjeç, në Austri mbërriti me dy vajzat e tij. Siç rrëfen kur erdhën në këtë vend ishin shumë të lumtur, por edhe shumë njerëz u ofronin ndihmë. Megjithatë, pas sulmeve terroriste “komuniteti ndryshoi mendimin ndaj tyre”. aa

Cazaneuve: Traktati i Shengenit de facto është pezulluar, BE-ja të mbyllë kufijtë

Çdo qytetar që rihyn në Europë do të skedohet, teksa vendet e Bashkimit Evropian kanë vendosur që të blindojnë kufijtë e tyre mes frikës për sulme të mundshme terroriste pas masakrës së Parisit dy javë më parë. Mediat italiane shkruajnë se ka një dakordësi që kontrollet të jenë aktive në kufi në muajin Dhjetor, madje edhe më të shumta.

Do të skedohen të gjithë qytetarët që rihyjnë në shtetet e Bashkimit Evropian, edhe pse mund të jene komunitarë si edhe do të futen në bankën e të dhënave të gjitha informacionet për ata që udhëtojnë me avion, ku do të arkivohet kodi i pasagjerit për të paktën një vit.

Sipas “Corriere.it”, ministri i Brendshëm i Francës Bernard Cazaneuve ka nënvizuar: “Duhet jemi në gjendje të dalim nga vonesat, ndryshe do ta humbasim Evropën”.

“Parisi nuk kthehet pas, ka konfirmuar vendosmërinë e tij për të mbajtur kufijtë e mbyllur dhe do të detyrojë edhe BE-në që të bëjë të njëjtën gjë. Nuk ka asnjë deklaratë zyrtare, por traktati i Shengen është pezulluar de facto. Kontrollet në kufi tashmë janë aktive dhe në muajin e ardhshëm do të jenë shumë më tepër”,- tha ai.

Teksa ministri i Brendshëm italian Angelino Alfano ka përsëritur apelin se “shtetet e BE-së duhet të japin udhëzime për autoritetet kombëtare që të ndajnë informacione dhe të zhvillojnë një qasje të përbashkët në mënyrë që unioni të jetë gjithnjë i lidhur, siç kërkohet nga graviteti i situatës”.

Michael Steiner: Dayton ishte i domosdoshëm (Intervista)

Më 21.11.1995, pas diskutimeve trejavore, në bazën ushtarake amerikane të Daytonit (Ohio), u iniciua marrëveshja, përmes së cilës iu dha fund Luftës në Jugosllavi. Nënshkrimi zyrtar u bë më 14 dhjetor 1995 në Paris.

Deutsche Welle: Zoti Steiner, gjendja në Bosnje, edhe 20 vite pas nënshkrimit të marrëveshjes së Dayton-it, vazhdon të jetë shumë e keqe. Në Dayton u vendos ndarja në Republika Srpska nga njëra anë dhe në Federatën boshnjako-kroate nga ana tjetër. Ky vendim duket se është bërë pengesa kryesore për krijimin e një shteti funksional. A nuk mund të parashikohej kjo në 1995-ën në Ohio?

Michael Steiner: Ju duhet të keni parysysh se si ka qenë gjendja atëherë. Asokohe, objektivi kryesor i të gjitha palëve të përfshira – i Bashkësisë Ndërkombëtare, por edhe i njerëzve në Sarajevë – ka qenë paqja. Qëllimi ishte ky: që gjenocidi të marrë fund. Dhe kjo në një kohë, kur nga ana e Bashkësisë Ndërkombëtare kishte njëkohësisht edhe një farë ngurrimi për t’u angazhuar në Bosnje kundër vullnetit të palëve apo qoftë edhe kundër atij të vetëm njërës palë. Bashkësia Ndërkombëtare në këtë kohë nuk ishte e gatshme të ndërhynte me „boots on the ground“, pra me trupa tokësore, kundër vullnetit të palëve.

Ju keni marrë pjesë aktive në bisedat për marrëveshjen e Dayton-it. Luftës iu dha fund, por a nuk kishte asokohe një alternativë tjetër zgjidhjeje përveç asaj të krijimit të dy entiteteve brenda Bosnje-Hercegovinës.

Jo tamam, sepse ne kishim një problem thelbësor. Njëri problem ishin kundërshtitë përsa i përket asaj që donin palët në konflikt dhe deri diku ende edhe sot duan. Boshnjakët donin ta merrnin të gjithë shtetin, këtë donte edhe Bashkësia Ndërkombëtare. Kroatët donin një zgjidhje të ndërmjetme, një autonomi të zgjeruar. Ndërsa serbët donin të dilnin fare, pra donin shkëputjen e një cope mundësisht të madhe të tortës. Ne duhej t’i kapërcenim këto kundërshti, në një kohë, kur ne vareshim nga miratimi i të gjitha palëve. Dhe këto kundërshti mund të zgjidheshin vetëm deri në atë masë sa edhe u arrit me marrëveshjen e Dayton-it. As mua nuk më kanë pëlqyer ato ndërlikimet e tmerrshme, që duhej të ingranonim, megjithatë ne që atëherë kishim këtë përfytyrim: ky është hapi i parë dhe i vetmi i mundshëm për të arritur paqen. Dhe pas kësaj, reformat që do të lejonin një administrim më efektiv të vendit, ishin për mua të vëtëkuptueshme. Por ato nuk u bënë.

Por ndarja në Republika Srpska, nga njëra anë, dhe në Federatën boshnjako-kroate, në anën tjetër, e ka forcuar edhe më shumë ndarjen etnike të vendit.

Ne asokohe duhej të vepronim në botën reale. Cila do të kishte qenë alternativa? Alternativa do të kishte qenë që ky konflikt nuk do të kishte mbaruar kurrë, sepse Bashkësia Ndërkombëtare nuk ishte e gatshme të shkonte në Bosnje pa miratimin e të gjitha palëve, të cilat kishin këto qëndrime diametrikisht të ndryshme. 60.000 ushtarët, të cilët erdhën më pas, në 1996, erdhën vetëm me kushtin e pajtimit të të gjitha palëve në një linjë. Sigurisht, nëse ne do të kishim mundur të thonim: ose ju miratoni një kushtetutë që na pëlqen neve, ose ne vijmë dhe ju detyrojmë ta miratoni – atëherë do të kishim qenë në një situatë tjetër. Por ne nuk e kishim këtë mundësi.

Por unë besoj se thelbi i problemit nuk qëndron këtu. Kryesorja është që ne të palës ndërkombëtare, e ndoshta edhe ata të palës boshnjake, kishim idenë se: Kur të jetë vendosur së pari paqja, dmth, kur të kenë pushuar armët dhe të ketë ardhur demokracia, atëherë gjërat do të zhvillohen vetë në drejtimin e duhur. Ky sigurisht që ishte një gabim. Unë gjithmonë kam qenë i bindur që, që në fillim, në vend të asaj pranie të lehtë civile që ne kishim atje, ne duhej të kishim krijuar – asokohe flitej për një zgjidhje në formën e protektoratit – një administratë të përkohshme me kompetenca të gjera nga ana e Ndërkombëtarëve. Vetëm atëherë do të duhej të kishim ndërmarrë hapin e radhës, atë të organizimit të zgjedhjeve dhe të rikthimit të vetëadministrimit të vendit.

Ka qenë e gabuar të mendosh që më parë ndërtohet demokracia e më pas vjen rregulli, drejtësia dhe siguria – e kundërta funksionon. Ti së pari ke nevojë për një sistem të rregullt, ty të duhet së pari ndjesia e sigurisë së njerëzve dhe vetëm atëherë mund të zgjedhësh – jo anasjelltas.

Për mua dhe Carl Bildt (Përfaqësuesi i parë i Lartë për Bosnjen dhe Hercegovinën, Red.) kjo ishte shumë e qartë, kur luftuam me këmbë e me duar kundër organizimit aq të hershëm të zgjedhjeve. Por ky ishte një udhëzim ndërkombëtar, i cili sigurisht që rezultoi i gabuar. Sikur të gjithë angazhimin, që gjithsesi kemi treguar gjatë 20 viteve të fundit, si edhe shpenzimet, t’i kishim vënë masivisht në përdorim që në fillim, atëherë sot sigurisht që do të ishim një hap më përpara.

Nëse do të kishit në dorë të mund të ndryshonit diçka në Bosnje – çfarë do të bënit ju tani konkretisht?

Unë sigurisht besoj se është në interes të të gjithë njerëzve në Bosnje – pra të serbëve, të kroatëve dhe boshnjakëve – që vendi të ketë një kushtetutë funksionale. Marrëveshja e Dayton-it ishte një mjet për të arritur qëllimin, paqen, sepse nuk kishte mundësi tjetër. Por ajo është tanimë një anakronizëm. Dhe përveç kësaj, ka edhe një detyrim ligjor, pasi Gjykata Evropiane për të Drejtat e Njeriut, në 2009, ka kërkuar ndryshime. Pra është një detyrim ligjor, por edhe një detyrim politik në interes të njerëzve, që kushtetuta t‘i përshtatet asaj çka është e domosdoshme për një shtet, që ai të mund të funksionojë siç duhet. Përveç kësaj duhet gjithashtu, që propaganda ideologjike e jashtëzakonshme, që ekzistonte atëherë, që ka ekzistuar në 20 vitet e fundit dhe që ende ekziston, të ketë përballë, si kundërpeshë, raportimin objektiv në media.

Kush ka dështuar në Bosnje sipas jush? Bashkësia Ndërkombëtare, pasi nuk ka treguar kujdesin e duhur, apo boshnjakët, pasi, siç thuhej shpesh në Bruksel, nuk arrinin të binin dakord?

Secili këtu mban përgjegjësinë e vet. Unë besoj se Bashkësia Ndërkombëtare e di edhe sot, se ishte e gabuar që u përqendruam vetëm tek fundi i luftës dhe që, si të thuash, trajtimin e mëtejshëm e morëm pak lehtë. Por: ka një përgjegjesi vetjake edhe nga ana e njerëzve në Bosnje, nga të gjitha palët. Mentaliteti nacionalist ka dominuar mbi ndjenjën e përgjegjësisë ndaj një mirëqënieje të përbashkët funksionale. Këtu edhe boshnjakët kanë faj. Unë besoj se së bashku do të kishim ecur më përpara nga ku kemi arritur. Por nuk duhet të harrojmë edhe diçka: Në Dayton është siguruar paqja dhe në Dayton është arritur diçka të cilën shumëkush nuk e besonte: që atij horrori të viteve të mëparshme t’i jepej fund. Dhe kjo është një pasuri e çmuar. Natyrisht që duhet të arrihet më shumë, por as kjo nuk duhet nënvlerësuar. Sepse vitet paraardhëse kanë qenë një makth për njerëzit, dhe prandaj kjo asokohe kishte përparësi. Dhe në këtë këndvështrim ka funksionuar: lufta mbaroi.

Diplomati gjerman, Michael Steiner, ka koordinuar angazhimin gjerman në përpjekjet për vënien e paqes në rajonet e ish-Jugosllavisë në kohën e luftrave civile atje. Në këtë funksion ishte ai edhe gjatë bisedimeve për marrëveshjen e paqes së Dayton-it. Gjatë viteve 1996 dhe 1997, ai ka qenë zëvendës i Përfaqësuesit të Lartë të Bashkësisë Ndërkombëtare në Bosnje dhe Hercegovinë.

Një ish-i persekutuar i shkruan Komisionerit Hahn për hapjen e dosjeve dhe Ligjin e Lustracionit: I persekutuar kam qenë – i persekutuar jam

To Mr. Hahn Johannes, Commissioner for European Neighbourhood Policy & Enlargement Negotiations merr

Kerkese drejtuar Komisionit Europian per hapjen e Dosjeve ne Shqiperi dhe venies ne zbatim te Ligjit te Lustracionit

I nderuar Komisioner Hahn,

Unë që po ju shkruaj, jam një shqiptar ne emigrim. Jam ne emigrim qe nga viti 1989, i arrastisur nga Shqiperia para rrezimit te regjimit komunist.

Jam arratisur sepse jeta ime ne Shqiperi ne ate kohe u vu seriozisht ne rrezik nga Sigurimi i Shtetit. Familja ime ne ate kohe ishte e internuar dhe e deklasuar, e denoncuar nga regjimi komunist me titullin „Kulak“.

Gjyshi im nga ana e babait, Ali Cekani ka vdekur ne burg si anti komunist.

Daja im Nezir Muzhaqi i varur ne litar nga regjimi komunist, kur ishte vetem 27 vjeç .

Dy daja te tjere te pushkatuar pa gjyqe, etj.

Nena ime ka qene 5 vjet ne kampin famekeq te internimit në Bençë të Tepelenës ,qe eshte cilësuar si kampi i vdekjes.

Persekutimi komunist ne familjen time vazhdoi perjetesisht, gjë që nuk eshte ndalur edhe sot.

Në Shqipëri si shifra zyrtare nga regjimi komunist janë janë ekzekutuar 5 577 burra dhe 450 gra.

Janë dënuar 26 768 burra dhe 7 367 gra.

Kanë vdekur në burg 1 065 persona.

Kanë humbur aftësinë mendore 408 vetë.

Kanë vdekur në internim 7 022 vetë.

Në 50 vjet diktaturë komuniste, nga kjo shtresë janë kryer 914 000 vite burgu dhe 256 146 vite internim.Mijera te pushkatuar ne vende akoma sekrete nuk ju dihet varri, nuk dime ku janë eshtrat e te pareve tane, ku të paktën te kemi nje varr ku t‘i qajme.

Numri i te pushkatuarve dhe te vdekurve në internuar nuk eshte i sakte, sepse supozohet te jete shume me i larte pasi, pas rrëzimit të komunizmit nuk esht bere asnjehere nje studim i thelluar ne kete aspekt, pasi komunistet kanë penguar studimin e çeshtjes , ngaqë i kemi gjithmonë në pushtet.

Në Shqipëri nuk ka asnjë shenjë për të treguar se jemi populli të cilin diktatura e përçundoi.

Në Shqipëri nuk ka asnjë muzeum të krimeve të komunizmit, nuk ka asnjë ditë të kujtesës, nuk ka asnjë përmendore, ku qytetarët të vendosin lule dhe kurora.

Në Shqipëri nuk ka mbetur asnjë shenjë që të dëshmojë se në këtë vend shqiptarët janë futur në burgje, janë pushkatuar, varur në litar, janë dërguar familjarisht nëpër

Lagerat e diktaturës, ndërsa fëmijët e të dënuarve kanë mbetur pa shkollë, pa të ardhme, duke vuajtur ekskomunikimin nëpër kampe përqëndrimi ku ju mohohej e drejta e jetës.

Në Shqipërinë e tiranisë komuniste që e vrau elitën, dhe shqiptarët i ktheu në armiq të njëri-tjetrit nuk ka kujtesë, nuk ka memorie për të blatuar nderim ndaj viktimave të pafajshme të diktaturës. Janë sheshuar deri burgjet ku të dënuarit kanë vuajtur.

Klasa politike postdiktaturë është përgjegjëse e harresës kolektive për atë që ngjau në Shqipëri.

Në 3 Qershor 2008 me iniciativën e Vaclav Havel dhe Joachim Gauck u nënshkrua Deklarata e Pragës, e cila i bënte thirrje gjithë Europës t’i dënojë krimet e komunizmit. Por Shqipëria nuk e nënshkroi këtë Deklaratë.

Në 25 shkurt 2010 u nënshkrua po në Pragë Deklarata e Krimeve të Komunizmit, Por Shqipëria jo.

23 Gushti njihet si Dita e Memories jo vetëm nga shtete të BE-së por nga shtete jashtë BE siç janë SHBA, Kanadaja dhe Gjeorgjia.

Por jo nga Shqipëria!

Viktimat e komunizmit sot janë dyfish viktima, nga regjimi diktatorial dhe regjimi i tranzicionit postkomunist që nuk e ka dekomunistizuar ende as politikën dhe as shoqërinë.

Shoqëria shqiptare nuk e njeh veten se cila është.

Është pa ID!

Sepse s’ka memorie!

PS është vazhduese e Partisë Komuniste e cila pretendon të reformohet.

Por si mund të refomohet duke mbuluar me harresë atë që ka ndodhur.

E si mund të reformohet duke patur si gazetë të partisë Zërin e Popullit krijuar nga vetë diktatori stalinist.

Viktimat e komunizmit e kishte si obligim t’i kujtonte PD, sepse ky ishte misioni i saj, prandaj u mbështet prej popullit, që me rrëzimin e diktaturës, të rehabilitonte viktimat, të zbardhte krimet dhe të promovonte shtetin e së drejtës.

Ne jemi dëshmitarë sot se drejtësia si vlerë e Perëndimit ndëshkon të inkriminuarit e regjimit nazist, pa marrë parasysh se janë mbi 90 vjeçarë, ndërsa Europa ish-komuniste ndëshkon të inkriminuarit e regjimeve diktatoriale.

Por në Shqipëri jo.

Viktimat e djeshme të diktaturës Hoxhiste tani janë viktima të PS-PD.

Ne institucione kushtetuese, ne sistemin e drejtesise, dhe pista te rendesishme qeveritare, ashtu si edhe ne parlament, sot ka oficere te sigurimit, punetore dhe bashkepuntore te kesaj arme vrasese te se shkuares, e cila kontrollon segmente te rendesishme te pushtetit politik, ekonomik dhe mediatik.

Por kjo histori nuk mund të vazhdojë më i Nderuar Komisioner Hahn,

Demokracia ne Shqiperi eshte e cunguar dhe kjo shihet qarte ne çdo sfere te jetes atje, si me burgosjet pa motiv ,ikjen masive te shqiptareve ,kapjen e shtetit nga mafia komuniste ,kapja e drejtesise nga ish Gjykates e Prokurore nga koha e diktatures.

Ja pra pse e gjykoj se duhen të hapen dosjet e komunizmit; ja pra pse duhet Dekomunistizimi i shtetit ashtu si duhet dhe Dekriminalizimi.

E per kete ndihma Juaj eshte shumë e nevojshme.

Ju dergoj kete leter duke patur shprese dhe besim absolut qe do te na ndihmoni ne prurjen e demokracise ne vendin tim;

Shpresoj te me prisni ne nje takim per te diskutuar nga afer ne lidhje me kete çeshtje .

Edhe nje here Ju falenderoj duke Ju uruar pune te mbare .

Me respekt dhe mirenjohje

Kujtim Cekani

Mediat: terroristi Salah Abdeslam është parë në Bruksel me tjetër identitet

BRUKSEL – Terroristi Salah Abdeslam, i shpallur në kërkim që prej 13 nëntorit, pas kryerjes së sulmeve terroriste në kryeqytetin francez, mendohet se është parë mbrëmjen e djeshme në Anderlecht, 5 kilometra larg Brukselit, me një pamje dhe identitet të ndryshuar.

Mediat kanë publikuar një fotografi të terroristit, me syze dhe kapele, për të siguruar ndihmën e qytetarëve, në rast se ndeshen me të.

Sipas gazetës spanjolle “El Mundo”, terroristi Salah Abdeslam po lëviz me identitetin Yassine Baghli. Ndërkohë sipas “Daily Mail”, xhihadisti po tenton të fshihet edhe nga ISIS, që kërkon ta vrasë sepse ai nuk e ka përmbushur siç duhet misionin e tij në Paris.

Ndërkohë në Bruksel, policia dhe shërbimet sekrete janë mobilizuar dhe po vijojnë punën për të kapur të shumëkërkuarin Salah Abdeslam.

Franca projektrezolutë në KS të OKB-së për luftën kundër ISIS-it

Pas sulmeve terroriste në Paris, Franca e cila i rriti operacionet e saj ndaj objektivave të ISIS-it në Siri, gjithashtu që të fitojë mbështetje diplomatike nga Këshilli i Sigurimit të OKB-së përgatiti projekt rezolutë

OKB – Franca ka paraqitur projekt rezolutën në Këshillin e Sigurimit të OKB-së, në të cilën kërkon që të rritet dhe intensifikohet lufta kundër ISIS-it dhe të veprohet në koordinim.

Në versionin përfundimtar të projekt rezolutës të cilën e paraqiti në Këshill, theksohet se janë dënuar me një gjuhë të saktë sulmet terroriste të ISIS-it në Tunizi, Ankara, Bejrut dhe Paris dhe aksionin për rrëzimin e avionit rus të pasagjerëve.

Në projekt rezolutën të cilën është paraqitur shprehen ngushëllime ndaj të gjithë qeverive dhe popujve të cilët janë dëmtuar nga terrori i ISIS-it, veçanërisht Tunizisë, Turqisë, Rusisë, Libanit dhe Francës. Gjithashtu kërkohet që shtetet anëtare të cilat kanë mundësi dhe kapacitet ti dyfishojnë përpjekjet e tyre dhe të veprojnë në koordinim në luftën kundër ISIS-in në Siri dhe Irak. aa

Francë, rriten sulmet dhe kërcënimet ndaj myslimanëve

Që nga 13 nëntori e këtej, duke përfshirë edhe aktet kundër femrave të mbuluara me shami në qytetet Marseille dhe Toulouse janë kryer 24 kërcënime dhe sulme

PARIS – Njoftohet se pas sulmeve terroriste në Paris, ndaj muslimanëve në Francë janë kryer 24 kërcënime dhe sulme të ndryshme.

Në një deklaratë me shkrim nga Observatorit Kombëtar Kundër Islamofobisë i Francës (CFCM), theksohet se që nga 13 nëntori e këtej, duke përfshirë edhe aktet kundër femrave të mbuluara me shami në qytetet Marseille dhe Toulouse janë kryer 24 kërcënime dhe sulme.

Në deklaratë ndër të tjera theksohet se informacionet në lidhje me sulmet bazohen në të dhënat e Ministrisë së Brendshme dhe në ankimet e bëra në polici.

Ndër të tjera theksohet se ankesat janë kryer për 6 sulmet të ndërmarra ndaj xhamive dhe ndërhyrje fizike ndaj personave, si dhe 18 kërcënime të kryera duke dërguar letër me përmbajtje urrejtjeje dhe duke kryer veprime ofenduese.

Në deklaratë janë përmendur edhe mendimet e kryetarit të CFCM, Abdallah Zekri, i cili ka pohuar se: “Falë Zotit ne nuk jemi në situatën në janar, ku pas sulmeve ndaj ‘Charlie Hebdo’ brenda 5 ditëve u kryen njëkohësisht 50 sulme”. aa

Konfirmohet vrasja e organizatorit të sulmeve të Parisit

Personi i dyshuar si organizatori i sulmeve terroriste të Parisit është vrarë. Hetuesit francezë konfirmuan se Abdelhamid Abaahoud u vra gjatë një sulmi masiv dje në rrethinat e Parisit. Ndërkohë, ligjvënësit francezë votuan sot për të zgjatur gjendjen e emergjencës për tre muaj në përgjigje të sulmeve të së premtes.

Prokurorët francezë kanë konfirmuar se organizatori i dyshuar për sulmet e javës së kaluar në Paris ishte mes të vrarëve në operacionin e policisë të mërkurën.

Zyra e prokurorit të Parisit tha se trupi i Abdelhamid Abaaoud – shtetas belg me origjinë marokene – u gjet brenda apartamentit të sulmuar në përleshjet shtatë orëshe të policisë në Saint-Denis, në periferi të Parisit. Abaaoud, u identifikua nga shenjat e gishtrinjëve.

Të paktën tetë vetë u arrestuan gjatë sulmit. Një grua që u identifikua si kushërirë e Abaaudit, hodhi veten në erë. Tre policë u plagosën dhe u vra një qen i policisë.

Ndërkohë, ligjvënësit francezë votuan sot për të zgjatur gjendjen e emergjencës për tre muaj në përgjigje të sulmeve të së premtes.

Asambleja Kombëtare Franceze e miratoi vendimin, dhe senati pritet të votojë të premten.’

Para votimit, kryeministri Manuel Valls foli para ligjvënësve dhe paralajmëroi për rreziqet me të cilat përballet vendi, përfshi mundësinë e kërcënimit të armëve kimike dhe biologjike.

“Kreativiteti makabër i organizatorëve të tyre është i pafund. Armë luftarake, prerje kokash, bomba njerëzore, të gjitha këto. Dhe sot nuk mund të përjashtojmë asgjë; ekziston një rrezik të mundshëm për armë kimike apo bakteriologjike.”

Presidenti François Hollande tha të mërkurën se zgjatja përfshin një nen që i mundëson autoritetet të mbyllin “çdo grumbullim” që përfshin xhamitë dhe grupet e komunitetit ku njerëzit “glorifikojnë terrorizmin” ose inkurajojnë kryerjen e akteve terroriste. Projektligji është kritikuar nga aktivistët e të drejtave.

Policia franceze tha sot se përsa kohë që është në fuqi gjendja e jashtëzakonshme, oficerët jo në detyrë lejohen të mbajnë armët e tyre për të mbrojtur civilët.

Kreu i agjencisë së koordinimit policor të Bashkimit Europian, Rob Wainwright, gjithashtu theksoi se sulmet në Paris shënojnë “një përshkallëzim shumë serioz” të terrorizmit në Evropë dhe janë një “deklaratë të qartë” e qëllimit të grupit të Shtetit Islamik për të sjellë markën e tij brutale të terrorit në kontinent.

Autoritetet belge nisën sulmet e tyre të enjten në disa pjesë të Brukselit në lidhje me Bilal Hadfin, i cili hodhi veten në erë jashtë stadiumit në Paris.

Kryeministri i Belgjikës, Charles Michel gjithashtu njoftoi një paketë prej 427 milion dollarësh të masave të reja të sigurisë, duke përfshirë edhe planet për të burgosur militantët që kthehen nga Siria, duke ndaluar predikuesit e urrejtjes dhe mbylljen e vendeve të paregjistruara të besimit.

Michel kundërshtoi kritikat për shërbimet e sigurisë të vendit të tij, pasi Presidenti Hollande tha se sulmet e Parisit ishin planifikuar në Belgjikë.

“Unë nuk e pranoj kritikët që kërkojnë të denigrojnë shërbimet tona të sigurisë, të cilët bëjnë një punë të vështirë dhe të rëndë,” tha ai në një fjalim në parlament.

Jemi në luftë – Nga Dominique Moisi

Qartësia e analizës është tani më e nevojshme se kurrë. Ne mezi e njohim armikun tonë, përveç intensitetit të urrejtjes së tij dhe thellësisë së mizorisë së tij. Për të kuptuar strategjinë e tij, duhet ta njohim atë për atë që është: një kundërshtar inteligjent – dhe sipas mënyrë së tij racional. Për një kohë të gjatë, ne e kemi shpërfillur dhe nënvlerësuar atë. Është urgjente që tani ta ndryshojmë mënyrën tonë.

Në këto javët e fundit, strategjia e terrorit të Shtetit Islamik ka sjellë vdekje në rrugët e Ankarasë, Beirutit dhe Parisit dhe në qiellin e Sinait. Identiteti i viktimave nuk lë dyshim për mesazhin. “Kurdë, rusë, shiitë të Libanit, francezë: ju na sulmoni, ne ju vrasim”.

Planifikimi i sulmeve është po aq i rëndësishëm sa kombësia e shënjestrës. Sa më shumë që mundet në terren Shteti Islamik dhe sa më tepër territor të humbasë në Siri dhe Irak, aq më shumë nxitet ta manifestojë luftën për të penguar ndërhyrjen e mëtejshme. Sulmet e sinkronizuara në Paris, për shembull, koinciduan me humbjen e qytetit Sinjar nga Shteti Islamik në Irak.

Sigurisht, qeliza terroriste që goditi Parisin nuk është krijuar tani në humbjet e fundit të betejave të Shtetit Islamik. Ka qenë gati në vend, duke pritur që të aktivizohej (ashtu siç mund të jenë të tjerë në pritje). Kjo tregon freksibilitetin taktik të Shtetit Islamik, pa përmendur mundësinë e njerëzve që janë gati të kryejnë vetëvrasje.

Nëse Shteti Islamik zgjodhi këtë herë, që në Paris të shënjestrojë njerëz që nuk ishin satirikë, policë apo hebrenj, është pikërisht “zakonshmëria” e tyre ajo që i la të pambrojtur. Këtë herë, sulmuesit zgjodhën “sasinë” në vend të “cilësisë” (më falni për një formulim kaq të ashpër). Qëllimi ishte të vriteshin sa më shumë që të ishte e mundur.

Kjo strategji është e mundur sepse territori i kontrolluar nga Shteti Islamik ofron një terren strehues dhe të përshtatshëm për stërvitje. Territoret e kalifatit të vetëshpallur përfaqësojnë grupin që përfaqësonte Al Kaeda për Afganistanin e kontrolluar nga talebanët në vitet 1990.

Është thelbësore të rifitohet kontrolli në këtë terren. Dhe shkatërrimi i “provincës” së Shtetit Islamik në Libi, Sinait, dhe kudo tjetër duhet të bëhet prioriteti numër një i komunitetit ndërkombëtar.

Përtej qartësisë analitike, ekziston edhe një nevojë për unitet, duke filluar në Francë, ku qytetarët nuk do të pranonin që anëtarët e klasës politike të vepronin të ndarë në një pikë të tillë kthese historike.

Uniteti duhet të arrihet edhe brenda Europës. Neve na thuhet vazhdimisht se Europa është në mes të një krize identiteti, në nevojë për një projekt të ri. Edhe tani Europa e ka gjetur një. Të jesh europian do të thotë të përballesh së bashku me barbarizmin, të mbrosh vlerat, mënyrën e jetesës dhe mënyrën e bashkëjetesës pavarësisht diferencave.

Uniteti është gjithashtu i nevojshëm në botën perëndimore si një e tërë. Deklarata e presidentit Barak Obama pas sulmeve në Paris tregon se çfarë e bashkon Europën dhe Shtetet e Bashkuara të Amerikës është më e rëndësishme sesa çfarë na ndan. Ne jemi në të njëjtën varkë, përballë të njëjtit armik. Në këtë kuptim uniteti duhet të shkojë përtej botës europiane dhe perëndimore, sepse Shteti Islamik kërcënon vende si Irani dhe Rusia, pa përmendur Turqinë, po aq – edhe më shumë – sesa perëndimin.

Sigurisht, ne duhet të jemi realistë. Aleanca jonë rrethanore me këto vende nuk do të tejkalojë të gjitha problemet mes nesh dhe atyre. Ndaj, përtej qartësisë dhe unitetit, na duhet vendosmëri, si në përballjen me kërcënimin e ISIS dhe në mbrojtjen e vlerave tona, veçanërisht sundimin e ligjit.

Shteti Islamik pret nga ne një kombinim të frikës dhe reagimit të tepruar. Ambicia e tij është të provokojë një përplasje civilizimi midis botës perëndimore dhe myslimane. Ne nuk duhet të biem pre e kësaj strategjie.

Por qartësia vjen e para. Kur Parisi u sulmua si të premten e shkuar, flitet për luftë. Askush nuk do të përsërisë gabimet e SHBA-së nën presidentin Bush; por t’i përdorësh ato gabime si një alibi për të shmangur përballjen me botën tani do të ishte po njëlloj gabim. Përgjigjja e Europës duhet të jetë e fortë, por nuk duhet të devijojë nga sundimi i ligjit. Ne jemi, mbi të gjitha, të përfshirë në një betejë politike me Shtetin Islamik, një betejë ku dashuria për jetën duhet të dominojë mbi dashurinë e tyre për vdekjen.

Daily Mail: Sulmi i xhihadistit mbi restorantin në Paris, ja si shpëtuan për mrekulli shënjestrat (video)

Publikohen pamjet e tmerrshme të sulmit në një restorant të Parisit nga terroristi me armë automatike AK-47.

Imazhet tregojnë egërsinë e pamëshirshme të vrasësit të Shtetit Islamik, kundrejt trimërisë së jashtëzakonshme dhe instiktit të mbijetesës, që treguan personat të cilët mund të ishin kthyer në viktima nga sulmi i befasishëm.

Gjithçka duket si një film aksion, por janë pamje mëse reale të cilat tregojnë momentet e tmerrshme të sulmit të xhihadistit, pranë një restoranti në Paris.

Në video duket qartë se si një grua i shpëton breshërisë së plumbave të xhihadistit, teksa ai mbante armën mbi kokën e saj, po që fati e deshi që arma të mos shkrepej mbi të. Ajo është personi më me fat që i shpëtoi masakrës nga e cila humbën jetën 129 persona, ndërsa 300 të tjerë mbetën të plagosur, 99 prej tyrte në gjendje kritike.

Videoja është publikuar nga “Daily Mail” i cili dyshon se xhihadisti që hapi zjarr është 26 vjeçari belg, Salah Abdeslam. Ai shenjohet me një rreth të kuq në video dhe qëndron për disa sekonda me armën e drejtuar mbi gruan që ndodhet jashtë lokalit, e cila ngrihet pak pasi terroristi largohet prej saj duke shtrirë me vrap.

Ende nuk dihet fati i “organizatorit” të sulmeve në Paris

Ekspertët francezë janë duke punuar për të përcaktuar nëse organizatori i dyshuar i sulmeve në Paris është në mesin e të vrarëve gjatë bastisjes së policisë në një ndërtesë banimi.

Policia ka thënë se Abdelhamid Abaaoud ka qenë cak i operacionit që është zhvilluar të mërkurën në lagjen Saint Denis të Parisit.

Prkurori i Parisit, Francois Molins, ka thënë se ai nuk është në mesin e tetë personave të arrestuar në banesë, porse mbetjet mortore, të gjetura atje, nuk janë identifikuar ende.

Gjatë operacionit policor, një i dyshuar është vrarë dhe një grua ka hedhur veten në erë.

Sot, ligjvënësit francezë pritet të votojnë për zgjatjen e gjendjes së jashtëzakonshme në vend.

Grupi militant Shteti Islamik, i cili kontrollon pjesë të Sirisë dhe Irakut, ka thënë se ka kryer sulmet e 13 nëntorit në Paris, në të cilat kanë vdekur 129 persona dhe janë plagosur qindra të tjerë.

Kanë qenë këto sulmet më vdekjeprurëse në Evropë që nga bombardimet në Madrid, në vitin 2004.

Presidenti i Francës, Francois Hollande, ka thënë se bastisja në Saint Denis ka vërtetuar se Franca është në “luftë kundër terrorizmit”.

Hollande do të udhëtojë në Uashington dhe Moskë javën e ardhshme, për të diskutuar zgjerimin e luftës.

Dy të vrarë gjatë kërkimeve për organizatorin e sulmeve në Paris

Të shtëna dhe shpërthime janë dëgjuar të mërkurën në Paris, derisa policia ndërmorri një operacion kërkimesh për një militant të Shtetit Islamik, që dyshohet të jetë organizatori i sulmeve të së premtes në kryeqytetin francez.

Autoritetet thanë se po kërkojnë Abdelhamid Abaaoud, nje shtetas belg me prejardhje nga Maroku dhe se disa persona ishin fshehur në një apartament në Saint-Denis.

Të paktën dy të dyshuar janë vrarë në operacionin disaorësh, përfshirë edhe një grua që hodhi veten në erë. Policia arrestoi tre veta, ndërsa të paktën dy pjesëtarë të policisë janë plagosur.

Autoritetet po kërkojnë edhe të dyshuar të tjerë të lidhur me sulmet e 13 nëntorit që lanë pas vetes 129 të vrarë dhe mbi 300 të plagosur.

Tre zyrtarë që folën të martën në kushte anonimiteti meqë nuk janë të autorizuar që të japin hollësi mbi hetimet, thanë se një analizë e sulmeve të së premtes tregon se një person i përfshirë drejtpërdrejt në sulme, është në arrati.

Zyrtarët thanë se i ikuri nuk është identifikuar. Autoritetet franceze dhe ato belge lëshuan një urdhër arresti për një person tjetër, Salah Abdeslam, vëllai i të cilit ishte në mesin e sulmuesve.

Shtatë sulmues u vranë atë natë, tre përreth satdiumit kombëtar, tre brenda sallën së koncerteve Bataclan dhe një gjatë sulmit në një restorant.

Cazeneuve: Shumica e sulmuesve nuk njihen nga shërbimet inteligjente

Ministri i Brendshëm francez Bernard Cazeneuve në lidhje me sulmet terroriste në Paris njoftoi se mbrëmjen e djeshme janë kryer kontrolle në 128 lokacione

PARIS – Ministri i Brendshëm francez Bernard Cazeneuve në lidhje me sulmet terroriste në Paris njoftoi se mbrëmjen e djeshme janë kryer kontrolle në 128 lokacione.

Cazeneuve, gjatë një fjalimi në radion “France Info” tha se shumica e autorëve të sulmit më 13 nëntor nuk njihen nga shërbimet inteligjente. Ai bëri të ditur se mbrëmjen e kaluar në kuadër të gjendjes së jashtëzakonshme janë kryer kontrolle në 128 adresa të përcaktuara që kanë lidhje me terrorizmin.

Ministri Cazeneuve, ka theksuar ndër të tjera se forcat e sigurisë kanë kaluar në veprim në të gjitha qytetet dhe rajonet periferike.

Cazeneuve tha se nuk kanë hezitime në lidhje me propozimin e amendamentit kushtetues i cili përfshin zgjatjen e kohës së gjendjes së jashtëzakonshme nga Presidenti François Hollande.

“I vërej komentet të cilat përfshijnë hezitimet në lidhje me reformën e kushtetutës të qeverisë. Teksa mbrojmë popullin nuk do të hidhen hapa në kundërshtim me parimet e kushtetutës”, deklaroi ministri i Brendshëm francez.

Në sulmin terrorist më 13 nëntor në Paris jetën e humbën 129 persona, ndërsa 352 të tjerë u plagosën. Në këto sulme mbetën të vrarë edhe 7 terroristë të cilët ndërmorën sulmet në shtatë lokacione të ndryshme. Përgjegjësinë për këto sulme e mori përsipër organizata terroriste DAESH.

Franca në luftë – momentet kur Hollande e parlamenti këndojnë “Marsejezën” (video)

Presidenti francez, Francois Hollande ka mbajtur një fjalë në parlament duke kërkuar mbështetjen e tyre për luftën me terrorizmin dhe miratimin e ligjit për të qenë në gjendje emergjence për 3 muajt e ardhshëm.

Pas fjalimit Hollande ka ftuar të gjithë të pranishmit të këndojnë himnin francez, ose siç njihet “Marsejeza”.

Hahn: Mos e ngatërroni terrorizmin me refugjatët

BRUKSEL – Komisioneri për zgjerim në Bashkimin Evropian (BE), Johannes Hahn sot në Bruksel deklaroi se Evropa nuk guxon ta ngatërrojë terrorizmin me krizën e refugjatëve me të cilën po përballet kontinenti.

Nuk guxojmë të ngatërrojmë sulmet terroriste me emigrimin aktual dhe problemin me refugjatët – këto janë dy çështje të ndryshme, theksoi Hahn para një takimi të ministrave të jashtëm të BE-së.

Hahn gjithashtu tha se Evropa “duhet të jetë e patundur dhe e guximshme”, kur të përballet me kërcënimet terroriste në “mënyrën evropiane të jetesës”.

Ky reagim i Komisionerit Evropian vjen pas sulmeve të fundit terroriste në Paris. Sulmet e fundit kanë ngritur spekulimet për refugjatët dhe lidhjet e tyre me terrorizmin sidomos pasi zyrtarët francezë thanë se një nga sulmuesit u transferua në Evropë nëpërmjet valës së refugjatëve nga Lindja e Afërt.

Në unitetin e Evropës bëri thirrje edhe Presidenti i BE-së Jean-Claude Juncker.

“Ata që organizojnë sulme të tilla dhe ata që i kryejnë ato janë ata nga të cilat refugjatët ikin”, tha Juncker gjatë Samitit të G20-ës në Turqi, duke shtuar se “nuk ka nevojë për një rishikim të politikës evropiane ndaj refugjatëve”. aa

Britania e rrit numrin e të punësuarve në sektorin e zbulimit

Pas shtimit të numrit të sulmeve terroriste dhe rritjes së terrorizmit, Britania e Madhe ka vendosur që në sektorin e inteligjencës të punësojë 1 905 punonjës të rinj

LONDËR – Pas shtimit të numrit të sulmeve terroriste dhe rritjen e terrorizmit, Britania e Madhe ka vendosur që në sektorin e inteligjencës të punësojë 1.905 punonjës të rinj, bëri të ditur qeveria britanike.

Qeveria synon të dyfishojë buxhetin e tanishëm prej 14 milionë dollarësh i paraparë për sigurinë e trafikut ajror.

“Siguria ekonomike dhe kombëtare shkon dorë më dorë. Që nga viti 2010, ne kemi sjellë vendime të vështira në mënyrë për të rivendosur fuqinë ekonomike dhe tani ne jemi në mesin e vendeve të zhvilluara, ekonomia e të cilit është në rritje më të shpejtë. Kjo do të thotë se jemi në gjendje për të investuar më shumë në sigurinë kombëtare. Ajo do të jetë lufta e brezit tonë ndaj atyre që ne dhe vlerat tona po përpiqen ti shkatërrojnë. Për këtë luftë ne kemi nevojë për më shumë kuadër”, deklaroi kryeministri britanik David Cameron.

Në agjencinë britanike të inteligjencës MI5, agjencinë e inteligjencës së jashtme MI6 dhe në agjencinë e inteligjencës së qeverisë britanike (GCHQ) aktualisht janë të punësuar 12.700 persona, ndërsa ky numër do të rritet me 15 përqind, gjegjësisht për 1.905 persona.

Qeveria britanike e konsideron të nevojshme rritjen e masave të sigurisë pas sulmeve të shpeshta të organizatës terroriste ISIS, ndër të cilat janë sulmet e fundit terroriste në Paris, ku u vranë 132 vetë dhe u plagosën 349 njerëz si dhe rrëzimi i avionit rus ku humbën jetën të gjithë 217 pasagjerët dhe shtatë anëtarë të ekuipazhit, për të cilat ekziston mundësia se ISIS-i është përgjegjës.

Britania e Madhe synon të ofrojë asistencë për vendet që janë objekt i terroristëve në përmirësimin e sektorit të sigurisë. aa

Franca e gjithë 1 minutë heshtje për viktimat e Parisit (Foto)

Presidenti Francois Hollande, i shoqëruar nga kryeministri Valls dhe zyrtarë të tjerë kanë mbajtur një minutë heshtje në Sorbonë dhe më pas ka kënduar himnin së bashku me kongresin e mbledhur në Versajë.

Ndërkohë, këtë mëngjes në Francë u hapën të gjitha shkollat, të cilat u pasuan nga hapja e muzeve, teatrove dhe objekteve të tjera kulturore, rreth orës 13:00.

16-11-2015 14-47-52

16-11-2015 14-45-53 16-11-2015 14-46-27

Bruksel – Alarmi për bombë në afërsi të institucioneve evropiane

VOAL – BRUKSEL, 16 NËNTOR – Alarmin për bombë në afërsi të institucioneve evropiane e dha televizioni publik belg RTBF, sipas të cilit atje ndodhej një automjet i dyshimtë i parkuar pranë pallatitit të institucioneve evropiane, shkruan Voice Of Albanians – voal.ch.

Sipas agjencisë Belga, automjeti në fjalë është gjetur në rue des Deux Églises, në lagjen ku ndodhen institucionet evropiane, por larg pallateve të institucioneve kryesore. Zjarrfikësit kanë shkuar menjëherë në vend dhe kanë instaluar një perimetër sigurie, bën të ditur policia. Personi që ka krijuar dyshimin ka thënë se automjeti kishte targë franceze. ansa

Kapet në Belgjikë një prej autorëve të sulmeve në Paris

VOAL – BRUKSEL, 16 NËNTOR – I arrestuari gjatë operacionit në vazhdim në lagjen Molenbeek, në kryeqytetin belg, nuk është Salah Abdeslam, i kërkuari për masakrat e Parisit, shkruan Voice Of Albanians – voal.ch. Lajmi i dhënë nga mediat belge, të cilat theksonin se nuk kishin për momentin elemente të mjaftueshme për ta konfirmuar, është i pasaktë.

I arrestuari në Molenbeek nuk është Salah Abdeslam: saktëson gjykata e Brukselit. ansa

Mbi 150 bastisje kundër islamistëve në Francë

Kryeministri i Francës, Manuel Valls

Kryeministri i Francës, Manuel Valls, ka thënë se policia ka kryer më shumë se 150 bastisje kundër islamistëve të dyshuar në mbarë vendin.

Burimet policore thonë se kontrollet kanë çuar në disa arrestime dhe në konfiskimin e një arsenali armësh.

Kërkimet, ndërkaq, vazhdojnë për anëtarët e mbijetuar të grupit islamist, i cili ka vrarë së paku 132 persona të premten në Paris.

Shtatë sulmues të Parisit kanë vdekur, shumica e tyre pasi kanë shpërthyer rripat vetëvrasës.

Valls ka thënë se sulmet në Paris janë planifikuar dhe organizuar nga Siria.

Identifikohen edhe dy sulmues të Parisit

Paris, 16 nëntor 2015

Zyra e Prokurorit të Parisit ka bërë të ditur se edhe dy sulmues të tjerë vetëvrasës, të përfshirë në sulmet vdekjeprurëse në Paris, janë identifikuar.

Prokurorët kanë thënë se një sulmues vetëvrasës që ka hedhur veten në erë në sallën e koncerteve Bataclan, është Samy Amimour, 28 vjeç.

Ai ka qenë shtetas francez, i përfshirë në një hetim për terrorizëm, në vitin 2012.

Ai ka qenë nën mbikëqyrje gjyqësore dhe ka qenë subjekt i një urdhërarresti ndërkombëtar.

Ndërkaq, një sulmues vetëvrasës që ka hedhur veten në erë jashtë stadiumit kombëtar të futbollit, është gjetur me një pasaportë siriane, me emrin Ahmad Al Mohammad.

Ai ka qenë 25 vjeç dhe i lindur në Idlib.

Paris: Ideator i atentateve është kryexhihadisti i Verviers

Abdelhamid Abaaoud kishte shkuar në Siri në janar të këtij viti

VOAL – PARIS, 16 NËNTOR – Prapa atentateve të Parisit është belgu Abdelhamid Abaaoud, truri i celulës së xhihadistëve të neutralizuar nga forcat speciale të policisë belge në Verviers në janar të këtij viti, shkruan Voice Of Albanians – voal.ch.

Lajmin e japin burime zyrtare franceze. Abaaoud duhet të jetë edhe prapa atentateve në trenin Thalys. Ai kishte shkuar në Siri në janarin e këtij viti. ansa

Ironia e fatit në Bataclan – pas këngës ‘Save a Prayer’ spektatorët kërkuan ‘Kiss the Devil’

PARIS – Në një kohë kur kishte vetëm një orë nga nisja e koncertit në teatrin ‘Bataclan’, atmosfera ishte harbuar. Grupi Eagles of Death Metal sapo kishte përfunduar së luajturi këngën “Save a Prayer” –“Ruani një lutje”, spektatorët kërkuan që të këndohej “Kiss The Devil”- “Puth djallin”.

Sipas ‘Dailymail’ këta titujt këngësh sot duken një ironi fati. Zhurma të forta u dëgjuan, krisma armësh, por disa prej të rinjve iu dukën se kjo ishte pjesë e skenografisë së koncertit. Fill pas kësaj, tre persona të armatosur, hynë në derë, ndërsa situata precipitojë me shpejtësi.

Dy anëtarët e grupit u shtrinë përtokë, për t’u mbrojtur nga breshëria e armëve. Ishte pikërisht ora 21:40, kur në sallën e koncerteve, shumë pranë bulevardit ‘Republika’, do të plaste lufta, ndërsa vendi do t’i ngjante ferrit të Dante Aligerit. Sakaq, sulmit të armëve nuk i shpëtuan as personat të ngujuar në karrige me rrota.

Trudeau: Kanadaja deri në janar 2016 do të pranojë 25 mijë refugjatë

Kryeministri kanadez bëri thirrje që me refugjatët të japë mundësinë për të kontribuar në sigurinë dhe stabilitetin

ANTALIA – Deri në janar të vitit 2016 Kanadaja do të pranojë 25.000 refugjatë sirianë, deklaroi kryeministri kanadez, Justin Trudeau.

“Politika jonë është të marrim një pjesë të refugjatëve dhe të kontribuojmë në arritjen e suksesit të përbashkët, në tërësi”, tha Trudeau në sesion e B20 dhe L20 e cila u mbajt në kuadër të Samitit të G20-ës në Antalia, Turqi.

Kryeministri kanadez bëri thirrje që me refugjatët të japë mundësinë për të kontribuar në sigurinë dhe stabilitetin.

“Ne duam që ata ti llogarisim në suksesin tonë”, shtoi kryeministri i Kanadasë.

Trudeau tha se vendet e G20 duhet të bashkojnë forcat dhe të zgjidhin problemet, duke mbajtur llogari se rritja vlen për të gjithë.

Turqia është nikoqir i Samitit të liderëve të vendeve të G20, ekonomikisht shtetet më të fuqishme në botë, i cili mbahet në rajonin veriperëndimor të Antalias sot dhe nesër. Në samitin e dhjetë të G20 diskutohet për sfidat më të mëdha politike dhe të sigurisë në botë, duke përfshirë krizën në Siri dhe migrimin masiv të refugjatëve.

Hakmarrja franceze – sulm ajror mbi bazën më të madhe të ISIS-it në Siri

Ministria e Mbrojtjes franceze ka konfirmuar se Franca ka sulmuar një nga bazat më të mëdha të ISIS-it në Siri. Kjo ka qenë dhe ‘hakmarrja’ e parë e francezëve ndaj ekstremistëve të ISIS.

Sulmi është kryer në Raqqa, që është një nga bazat më të mëdha të ISIS-it në Siri dhe ai është kryer 48 orë pas masakrës së grupit terrorist në Paris.

Sipas informacioneve nga Ministria e Mbrojtjes franceze, që i transmetojnë mediat ndërkombëtare, me këtë rast është shkatërruar një kamp trajnimi i ISIS-it.

Identifikohet terroristi i tetë

Policia franceze ka botuar foton e njërit prej të dyshuarve të larguar pas sulmeve të së premtes në Paris që shkaktuan të paktën 132 viktima. I dyshuari është identifikuar të jetë Abdeslam Salah, një 26-vjeçar i lindur në Bruksel. Në njoftim bëhet thirrje për çdo lloj informacioni për të dyshuarin e tetë, i cili është larguar dhe konsiderohet i rrezikshëm. Ai mendohet se është një ndër tre vëllezër të përfshirë në sulmet terroriste në Paris. Vëllai i tij, Ibrahim Salah, hodhi veten në erë në sallën e koncerteve Bataclan, ndërsa vëllai i tretë njoftohet të jetë arrestuar nga autoritetet belge.

Prokurori i Parisit njoftoi gjithashtu se janë identifikuar dy të tjerë, nga shtatë sulmuesit e vrarë. Ata janë shtetas francezë që jetonin në Belgjikë. Sot, policia franceze mori në pyetje të afërm të Omar Ismail Mostefait, i cili ishte terroristi i parë që u identifikua.

Ndër gjashtë personat e marrë në pyetje ishin edhe babai, vëllai dhe kunata e tij. Franca është në një periudhë zie tre-ditore, të shpallur pas masakrës që tronditi mbarë botën. Mostefai ishte një ndër shtatë sulmuesit, të cilët kishin veshuar jelekë vetëvrasës të mbushur me eksploziv. Të shtatë u vranë gjatë sulmeve; gjashtë prej tyre hodhën veten në erë, ndërsa i shtati u vra gjatë shkëmbimit të zjarrit me policinë. Të paktën tre prej tyre ishin shtetas francezë. Prokurori francez Francois Molins tha se Mostefai njihej prej policisë si kriminel ordiner, por “nuk ishte përfshirë më parë në hetime të ndonjë organizate terroriste”. 29-vjeçari Mostefai jetonte në Chavres, pranë Parisit.

Panik në Memorialin e Parisit

Korrespondenti i Zërit të Amerikës, Daniel Schearf, njofton nga Parisi se një turmë e mbledhur Sheshin e Republikës përjetoi momente paniku të dielën në mbrëmje dhe njerëzit u shpërndanë duke vrapuar. Turma e përbërë prej rreth 2 mijë personash ishin duke bërë homazhe, ndërsa një grup më i vogël këndonte në mënyrë sfiduese. Një klithmë u dëgjua në mesin e turmës, duke u pasuar nga të tjera, dhe sheshi i zbraz në pak sekonda. Sheshi i Republikës është shndërruar në një vend homazhesh, ku njerëzit vijnë për të ndezur qirinj dhe për të gjetur ngushëllim.

Gjenden armë

Policia njoftoi të dielën se tre armë kallashnikovë u gjetën në një makinë të tipit Seat Leon, e cila është përdorur nga sulmuesit që shtinë mbi njerëzit e gjendur në bare dhe restorante. Makina e prodhimit spanjoll u zbulua e parkuar në një rrugë të lagjes periferike Montreuil, kur policia po kërkonte për një person të tetë që mund të ketë ngarë mjetin.

Një makinë e dytë, e tipit Volkswagen Polo, e cila mendohet se është përdorur për sulmin, u gjet pranë sallës së koncerteve Bataclan, ku humbën jetën 89 persona. Autoritetet franceze thonë se pranë trupit të njërit prej sulmuesve u gjet një pasaportë siriane. Greqia informoi se ai pati hyri në Evropë si pjesë e fluksit të emigrantëve që largohen prej luftës civile në Siri. Ministri grek për Mbrojtjen e Qytetarëve, Nikos Toskas, u shpreh se “konfirmojmë që mbajtësi i pasaportës siriane ka hyrë nëpërmjet ishullit grek Leros, më datën 3 tetor, ku edhe u regjistrua në përputhje me rregullat e BE-së.” Autoritetet e Serbisë dhe Kroacisë konfirmuan se personi ka kaluar në ditët pasuese nëpërmjet pikave të tyre kufitare. Një zyrtar belg njoftoi se janë ndaluar shtatë persona të lidhur me sulmet në Paris dhe se dy nga shtatë autorët e sulmeve ishin shtetas francezë me banim në Belgjikë. Njëri prej tyre jetonte në një lagje të quajtur Molenbeek, e cila njihet si enklavë e ekstremizmit fetar dhe pikë kyçe për luftëtarët që shkojnë drejt Sirisë.

Kryeministri Valls: Identifikohen 103 nga 129 viktimat e sulmeve në Paris

PARIS – Kryeministri francez Manuel Valls tha se ekipet kompetente kanë identifikuar 103 nga gjithsej 129 njerëz të vrarë në sulmin terrorist që ndodhi të premten në mbrëmje në Paris.

Kreu i qeverisë franceze sot vizitoi qendrën “Militaire Ecole”, në të cilën të mbijetuarve të sulmit terrorist u ofroi ndihmë psikologjike. Valls, me këtë rast tha se Franca duhet të jetë unike në këto kohë të vështira.

“Në sulme u vranë 129 persona, nga të cilët deri më tani janë identifikuar 103. Në rrjedhë është procedura për identifikimin e viktimave të mbetura”, tha Valls.

Paralelisht, institucioni kompetent francez do të kontrollojë rrjetet sociale përmes të cilave të afërmit kanë publikuar fotografi dhe informacione të personave me të cilët pas sulmit nuk kanë mundur të vendosin kontakt.

Në Francë është shpallur gjendje e jashtëzakonshme dhe tri ditë zie pas sulmeve terroriste në Paris që vranë 129 persona, ndërsa 352 të tjerë plagosën. Përgjegjësinë për sulmet që ndodhën në disa lokacione të Parisit e mori përsipër organizata terroriste ISIS.

Francë, arrestohen 6 persona me lidhje me njërin nga terrorisët

Policia franceze ka arrestuar gjashtë persona të cilët kishin lidhje me njërin nga terroristët që mori pjesë në sulmet e së premtes në Paris. Në mesin e të ndaluarve ishin tre të afërm të njërit prej terroristëve.

Policia franceze tha sot se një makinë e përdorur nga persona të armatosur të cilët qëlluan mbi njerëzit në restorante gjatë sulmeve të së premtes u gjet në lagjen Montreuil në Parisin lindor.

Sot Franca është në ditën e dytë të një zie kombëtare, që pasoi sulmet terroriste në Paris, në të cilat u vranë të paktën 129 persona. Më shumë se 300 të tjerë u plagosën, 99 prej tyre në gjendje kritike.

Njerëzit ngushëlluan njëri-tjetrin në një vigjilje mbrëmë vonë në kryeqytetin francez, ndërsa kujtonin viktimat.

Chloe Guy, banor i Parisit:

“Kemi rastin për të treguar solidaritetin që e kemi patur gjithmonë. Për t’u siguruar se ne nuk e braktisim njëri-tjetrin, nuk paralizohemi nga frika ose paniku dhe nuk veprojmë në mënyrë arbitrare. Ne duhet të tregojmë se jemi të fortë”.

Prokurori i Parisit, Francois Molins tha se shtatë sulmuesit janë vrarë gjatë sulmeve.

Presidenti francez Francois Hollande tha se sulmet, për të cilat Shtetit Islamik ka marrë përgjegjësinë, janë një “akt lufte” kundër vendit të tij, dhe se ekziston rreziku që terroristët të planifikojnë sulme të tjera.

Alain Joyandet, anëtar i Parlamentit francez:

“Nëse ne heqim dorë, kjo do të thotë se ata fitojnë. Kështu që jeta duhet të vazhdojë, Republika duhet të vazhdojë. Ne duhet të sigurohemi që të ketë më shumë dashuri në këtë shoqërinë tonë”.

Një zyrtar francez i kundërterrorizmit tha se autoritetet janë ende duke u përpjekur të kuptojnë nëse sulmuesit që mbetën të vrarë ishin banorë francezë. Ndërkohë, masat e sigurisë janë shtuar për të mbrojtur vendin nga dhuna e mëtejshme.

Dje, policia në Belgjikë arrestoi disa persona gjatë kontrolleve në një lagje të Brukselit.

Zyra e prokurorisë belge tha se një makinë e marrë me qira në Belgjikë është gjetur pranë sallës së koncerteve Bataclan në Paris, ku u vranë 89 njerëz.

Organizimi i sulmeve në Paris – Terroristët komunikuan me chatin e ‘Play Station’

Ministri i Brendshëm belg ka zbuluar se terroristët kanë përdorur chatin e Playstation 4 për të komunikuar mes tyre.
Ata mendohet se kanë zgjedhur këtë kanal komunikimi pasi është shumë i vështirë për t’u përgjuar.

Gjatë konferencës për shtyp, ministri Jan Jambon tha se xhihadistët kanë shkëmbyer mesazhe zanore dhe pamore me anë të chatit të lojës elektronike.“Komunikimi me mesazhe apo WhatsApp mund të përgjohet ndërsa ai në chatin e PS4 është më i vështirë, ndaj kanë zgjedhur atë”, tha Jambon.

Gjithashtu ai shtoi se xhihadistët mund të simulonin skena sulmi apo shpërthime armësh pa krijuar dyshime pasi janë pjesë e lojërave të PS4.

Pasaporta siriane e gjetur tek një kamikaz mund të jetë false

Me shumë mundësi, pasaporta siriane e gjetur pranë njërit prej kamikazëve në stadiumin “Stade de France”, mund të jetë false. Këtë e ka bërë të ditur një burim nga shërbimet sekrete të SHBA-së, cituar nga CBS.

“Dokumenti nuk mban numrat korrent për një pasaportë të rregullt dhe fotoja nuk i përket emrit”, ka thënë burimi i shërbimit sekret për CBS.

Poloni – Shqiptarët cilësohen si terroristë, në protestën kundër refugjatëve

Gjatë një proteste në Poloni kundër refugjatëve sirianë në një nga banerët që protestuesit mbanin në dorë vërehet edhe flamuri shqiptar dhe disa figura terroristësh nën të.

Sipas banerit shqiptarët paraqiten si terroristë ndërsa ata luftohen nga forcat polake në anën tjetër.

Baneri është publikuar në Russia Today, një agjenci lajmesh dhe televizion rus, njofton Klan Kosova.

Përndryshe ministri polak i çështjeve të Europës, Konrad Szymanki, pas ngjarjes tragjike që goditi Francën, ka thënë se qeveria e tij s’do t’i pranojë vendimet që merr Bashkimi Europian për refugjatët.

Szymanski, është ministri i sapoemëruar në qeverinë e Polonisë – si pjesë e qeverisë konservative në krye të vendit – që do të fillojë me mandatin e tij në Ministrinë për Çështje të Europës në Poloni.

Ai është shprehur se kabineti i tij s’është në pajtim me përkushtimin e qeverisë paraardhëse për të marrë pjesë në vendimet e BE-së karshi zgjidhjes së krizës s refugjatëve nga vatrave e luftës.

Tani, “të ndodhur përballë të gjitha ngjarjeve tragjike në Paris, ne nuk e shohim të arsyeshme të jemi pjesë e zgjidhjeve politike”, ka thënë ai, transmeton Klan Kosova.

Polonia i ishte bashkuar grupit të shteteve që e kishin mbështetur planin e Brukselit që t’i ndanin përgjegjësitë mbi fluksin e azilkërkuesve nga Lindja e Mesme dhe Afrika Veriore, njofton Klan Kosova.

Në Paris brenda një ore u kryen gjashtë sulme terroriste

ANKARA – Në një deklaratë të publikuar në rrjetet sociale, në të cilën merr përgjegjësinë për sulmet në Paris, organizata terroriste ISIS ka pranuar se tetë pjestarë të saj janë përgjegjës për sulmet terroriste në disa lokacione të ndryshme në Paris.

“Disa prej tyre kishin aktivizuar mjete shpërthyese që mbanin në trup, kurse disa kanë kryer sulme me armë zjarri në Paris, në zemër të Francës”, thuhet në deklaratë. Më tej shtohet se sulmet kanë ndodhur në vendet si “Stade de France”, i cili ishte një nga objektivat e sulmeve terroriste, dhe një sallë koncertesh.

Sulmet u kryen pothuajse brenda një ore.

Këtë mëngjes, presidenti francez, Francois Hollande në një fjalim publik fajësoi ISIS-in për sulmet.

Sipas shifrave zyrtare, në sulmet terroriste natën e kaluar u vranë 128 persona, ndërsa 250 të tjerë u plagosën, prej të cilëve rreth njëqind prej tyre janë në rrezik jete.

Sulmet janë kryer në gjashtë lokacione të ndryshme, gjatë së cilës u vranë tetë terroristë. Shtatë terroristë mbanin rripa me pajisje shpërthyese, të cilat i aktivizuan.

Autoritetet franceze kanë shprehur frikën se numri i të vdekurve mund të rritet.

Në Francë nisin protestat anti-islamike

Turmat e protestuesve të krahut të djathtë ekstrem janë përzier me marshimin e solidaritetit në Francë, pas lajmit se të paktën një nga përgjegjësit e sulmeve terroriste në Paris ishte refugjat sirian.

Demonstrata paqësore u mbajt në qendër të Lille, në veri të Francës, por u ndërpre nga ekstremistët e krahut të djathtë të Frontit Kombëtar.

Faqja 88 prej 93« Fillimi ‹ Prapa 84 85 86 878889 90 91 92 Para ›Fundi »

Voal – Franca “ndalon”, 1 minutë heshtje për viktimat e Parisit E gjithë Franca është ndalur për një minutë mesditën e kësaj të hëne, në nderim të 129 viktimave të sulmeve terroriste të së premtes mbrëma në Paris.

Gjatë një proteste në Poloni kundër refugjatëve sirianë në një nga banerët që protestuesit mbanin në dorë vërehet edhe flamuri shqiptar dhe disa figura terroristësh nën të.

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL