Ish-presidenti i Francës, Nicolas Sarkozy, po merret në pyetje për të dytën ditë me radhë, në lidhje me akuzat se fushata e tij zgjedhore më 2007 ka marrë fonde nga regjimi i diktatorit të ndjerë libian, Muammar Qaddafi.

Pasi ka kaluar natën në shtëpi, Sarkozy është kthyer në stacionin e policisë në Nanterre, në veriperëndim të Parisit, për t’u marrë në pyetje nga zyrtarët e policisë anti-korrupsion.

Hetimi gjyqësor ka nisur në vitin 2013, pasi ueb-faqja franceze e lajmeve Mediapart ka publikuar akuzat e biznesmenit francezo-libanez, Ziad Takieddine, se ai ka transferuar 5 milionë euro nga ish-shefi i inteligjencës së Qaddafit, Abdullah Senussi, te shefi i fushatës së Sarkozysë.

Sarkozy, 63 vjeç, i cili ka qenë president nga viti 2007 deri më 2012, ka mohuar vazhdimisht çdo keqbërje.

“BE duhet të hapë negociatat me Shqipërinë në qershor.” Thirrja e fortë është bërë nga Shefja e Politikës së Jashtme në Bashkimin Europian, Federica Mogherini duke folur në Parlamentin Europian, ku në qendër të diskutimit është Shqipëria dhe reformat e ndërmarra

Zyrtarja e lartë italiane tha se pret që Komisioni Europian të japë një “rekomandim të pakushtëzuar” për negociatat e pranimit të fillojë në “dy deri në tre muaj” të ardhshëm.

“Aderimi do të ishte i dobishëm jo vetëm për arsye ekonomike, por edhe për “pajtimin” e rajonit të Ballkanit”, tha ajo duke shtuar se “ Shqipëria ende mund të mos jetë gati për t’u bashkuar me bllokun prej 28 anëtarësh, por se ka bërë gjëra të pabesueshme në procesin e reformës në vitin e kaluar apo më shumë.”

“Ajo që unë shoh, megjithatë, është një vendosmëri e madhe dhe përkushtim, një ndjenjë e ‘të qënurit evropiane. Është kjo dëshirë dhe aspirata të jetë pjesë e BE-së, kjo energji Evropa ka nevojë aq shumë, veçanërisht në dritën e tendencave aktuale politike. Ajo na kujton se për çfarë është BE-ja.” theksoi zyrtarja e lartë italiane

Mogherini, gjithashtu foli me entuziazëm për progresin e bërë deri më tani, duke përmendur reformën gjyqësore dhe politikat e punëve të jashtme si shembuj kryesor.

“Sa i përket rezultateve që ka arritur në procesin e reformës, veçanërisht në reformën e drejtësisë dhe në politikën e jashtme, Shqipëria ka bërë gjëra të pabesueshme gjatë vitit të kaluar dhe po ecën në drejtimin e duhur. Ne jemi 100% në të njëjtën anë. ”

Ndërkohë nga ana e tij, Kryeministri Edi Rama, e cilësoi “qesharake” tendencën për ta etiketuar vendin e tij si një “kryeqytet kriminal” rajonal.

Ai pranoi se kishte ende probleme për t’u adresuar në lidhje me krimin e organizuar, korrupsionin dhe ndërtimin e institucioneve, por se vendi tani ishte gati të fillonte bisedimet e pranimit në BE.

“Nuk po themi se jemi gati për pranim sot dhe as nuk kërkojmë ndonjë dhuratë apo kënaqësi që është e pamerituar. Ne po themi vetëm se ka ardhur koha për të hapur bisedimet sepse e meritojmë. Një nga një kemi bërë çfarë na është kërkuar, jo sepse na është kërkuar nga Brukseli, por sepse është e mirë për vendin dhe gjeneratën e ardhshme. Skeptikët duhet të kuptojnë se hapja e bisedimeve nuk do të krijojë probleme të reja potenciale dhe se BE ka nevojë për Ballkanin ashtu siç Ballkani ka nevojë për BE”. u shpreh Kryeministri

Shqipëria është një kandidate zyrtare për anëtarësim në BE që nga qershori 2014 dhe është në axhendën aktuale për zgjerimin e ardhshëm. Shqipëria aplikoi për anëtarësim më 28 prill 2009.

Ndërkohë që Brukseli ka nënvizuar disa herë vendosmërinë për të pranuar Ballkanin në BE, brenda vitit 2025.

Ish-presidenti francez Nikolas Sarkozi ndodhet në paraburgim për t’u marrë në pyetje lidhur me akuzat se ai ka marrë fonde nga udhëheqësi i Libisë, Muammar Gaddafi.

Policia është duke hetuar parregullësitë lidhur me financimin e fushatës së tij presidenciale në vitin 2007. Sarkozi është pyetur edhe më parë në lidhje me këtë çështje. Sipas burimeve gjyqësore shkruan BBC, ish presidenti po ndodhet në Nanterre, një zonë periferike e Parisit perëndimor.

Në vitin 2013 në Francë u hap një hetim në lidhje me pohimet se fushata e tij kishte përfituar fonde të paligjshme nga Gadafi, ndërsa Sarkozi i ka mohuar këto akuza. Sipas burimeve në pyetje është marrë edhe një prej ish ministrave të Sarkozi Brice Hortefeux.

Pretendimet erdhën nga një biznesmen francezo-libanez, Ziad Takieddine dhe disa ish zyrtarë të regjimit të Gaddafit./

Burimi: BBC

Ministrat e Jashtëm të Bashkimit Evropian dënuan fuqishëm helmimin e një ish-agjenti rus në Britani dhe thanë se e kanë marrë “shumë seriozisht” vlerësimin e Londrës se Moska qëndron prapa sulmit.

Britania dhe aleatët e saj kanë fajësuar Moskën për sulmin kundër Sergei Skripalit dhe vajzës së tij, Yulia, më 4 mars, në Sallsbëri të Anglisë.

Dy viktimat mbeten në gjendje kritike për jetën.

“Bashkimi Evropian e merr seriozisht vlerësimin e Mbretërisë së Bashkuar se Federata Ruse, sipas të gjitha gjasave, është përgjegjëse”, thanë përmes një deklarate 28 ministrat e Jashtëm të BE-së.

“BE-ja shpreh solidaritet të pakufizuar me Mbretërinë e Bashkuar, përfshirë përpjekjet e saj për t’i sjellë përgjegjësit e këtij krimi para drejtësisë”, thuhet në deklaratë.

Kremlini, në anën tjetër, përsëriti se Britania duhet të dëshmojë përfshirjen e Rusisë në helmimin e Skripalit dhe të vajzës së tij ose të kërkojë falje.

“Herët ose vonë, këto akuza të pabaza do të duhet të marrin përgjigje”, tha zëdhënësi i Kremlinit, Dmitry Peskov.

NATO-ja do të nisë zhvendosjen e selisë së saj në Bruksel, pas disa vonesave të shkaktuara nga problemet teknike.

Zhvendosja e personelit prej rreth 4,000 vetash do të marrë 12 javë kohë, thanë zyrtarët.

Ndërtesa e re është pranë selisë ekzistuese të aleancës, e cila do të vazhdojë të shfrytëzohet gjatë periudhës së tranzicionit.

NATO ka thënë se objekti i ri do të ofrojë hapësirë për 1,500 anëtarë të stafit të aleancës, 1,700 pjesëtarë të stafit ushtarak ndërkombëtar dhe civil, 600 pjesëtarë të agjencive të NATO-s dhe rreth 500 vizitorë në ditë.

Kosotoja fillestare e shpenzimeve për selinë e re ka qenë 750 milionë euro, por shpenzimet aktuale janë rreth 1.17 miliardë euro.

Zhvendosja e selisë ka qenë e paraparë të bëhet në janar, por është shtyrë për shkak të problemeve të lidhura me teknologjinë e internetit.

Policët britanikë qëndrojnë në afërsi të vendit ku ka ndodhur sulmi me agjent nervor ndaj ish-spiunit rus

Ministri i Jashtëm çek Martin Strionicky ka hedhur poshtë sot akuzat e Moskës se agjenti nervor, që është përdorur kundër ish-spiunit rus Sergei Skripal dhe vajzës së tij Yulia në Britani, ka ardhur nga Republika Çeke.

Zëdhënësja e Ministrisë së Jashtme ruse, Maria Zakharova i ka thënë sot televizionit Rossiya 24 se ka shumë gjasa që burimi i agjentit nervor, i tipit Noviçok, të jetë në Britani, Republikën Çeke, Sllovaki, Suedi ose Shtetet e Bashkuara, transmeton agjencia Reuters.

Rusia ka dëbuar 23 diplomatë rusë, në kundërpërgjigje ndaj masave të ndërmarra nga Londra, e cila e akuzon Kremlinin se qëndron prapa sulmit me agjent nervor.

“Ne hedhim poshtë këto pretendime mbi origjinin e agjentit nervor, prentendime këto që nuk qëndrojnë”, ka shkruar ministri Stropnicky në Twitter.

“Kjo është formë standarde e manipulimit të informacionit, përmes mesazheve shumë spekulative të cilat po prezantohen dhe nuk mund të provohen nësa janë të sakta”, ka shkruar tutje ai.

Ndërkaq, ministrja e Mbrojtjes së Çekisë, Karla Slechtova, në një postim në Twitter ka thënë se është “absurde” të mendohet se agjenti nervor, që është përdorur për të helmuar ish-spiunin rus, të ketë origjininë në Republikën Çeke.

Ministri i Brendshëm i Gjermanisë, Horst Seehofer, tha se beson se “Islami nuk i përket” vendit të tij.

Në një intervistë për gazetën Bild, Seehofer tha se Gjermania “është e formësuar nga krishterimi” dhe se ajo nuk duhet të heqë dorë nga traditat e veta.

Seehofer po ashtu premtoi se do të rrisë dëbimet e azilkërkuesve të refuzuar.

Komentet e tij janë në kundërshtim me qëndrimin e kancelares gjermane, Angela Merkel.

Më shumë se një milion emigrantë kanë arritur në Gjermani pasi Merkel ka hapur dyert për azilkërkuesit sirianë në vitin 2015.

Kryeministri hungarez, Viktor Orban në marshin e mbajtur sot në Budapest.

Dhjetëra mijëra mbështetës të kryeministrit të Hungarisë, Viktor Orban kanë marshuar sot në përkrahje të tij, duke shpresuar se ai do ta fitojë edhe një tjetër mandat në zgjedhjet e 8 prillit që mbahen në këtë vend.

Atyre u janë bashkuar edhe mijëra mbështetës të partisë konservatore PiS, që udhëheq në Poloni.

Sikur partia polake ashtu edhe partia Fidesz e Orbanit po përballen me Bashkimin Evropian pasi kanë mendime të ndara për emigrimin si dhe për lëvizjet rreth rritjes së kontrollit në gjykata dhe media.

Organizatorët kanë dërguar me autobusë protestuesit polakë dhe ata hungarezë drejt Budapestit, për të marshuar në ditën e cila përkon edhe me revolucionin e vitit 1848 në këtë shtet.

Orban dhe kryeministri polak, Mateusz Moraëiecki udhëheqin qeveri konservatore, nën presionin e Brukselit për shkak të refuzimit që të pranojnë migrantë sipas sistemit të kuotave.

Mbështetësit e të dyja partive kanë ecur në rrugët e Budapestit duke bartur banerë me slloganet “Hungaria e mbron Evropën” dhe “Ne jemi me ty Viktor”.

Orban ka thënë në marsh se armiqtë, “dëshirojnë të na e marrin shtetin”.

Kryeministri sllovak, Robert Fico ka thënë se ai është i gatshëm për t’u dorëhequr nëse presidenti pranon që koalicioni aktual të vazhdojë qeverisjen pa mbajtur zgjedhje të parakohshme, transmeton BBC.

Fico ka thënë se ai është gati të prezantojë një kandidat për kryeministër nga partia e tij.

Deklarata e tij vjen pas skandalit të shkaktuar nga vrasja e gazetarit sllovak, Jan Kuciak dhe të dashurës së tij, Martina Kusnirova.

Kuciak ishte duke hetuar korrupsionin qeveritar kur është vrarë.

“Sot kam ofruar dorëheqjen time te presidenti i republikës”, ka thënë Fico në një konferencë për media.

“Nëse presidenti pranon, jam i gatshëm të dorëhiqem nesër”, ka shtuar ai. /Rel

Banka Kombëtare e Hungarisë (MNB) ka njoftuar se do të sjellë në shtëpi rreth 3 tonë rezerva ari nga Londra.

Vendimi për riatdhesimin e rezervave të arit, gjithsej me vlerë 33 miliardë forintë hungarezë (130 milionë dollarë amerikanë), u shpjegua për arsye të sigurisë, në rast të ndonjë krize të mundshme gjeopolitike.

Tërheqja e rezervave të arit është një thuajse një tendencë ndërkombëtare, pasi ruajtja jashtë vendit konsiderohet e rrezikshme nga shumë banka qendrore, duke përfshirë ato austriake, gjermane dhe holandeze. Kohët e fundit ata kanë vendosur të riatdhesojnë rezervat e tyre të arit.

Banka qendrore e Hungarisë ka ruajtur rezervat e arit që nga themelimi i saj në 1924. Shuma u rrit vazhdimisht deri në Luftën e Dytë Botërore. Shuma më e madhe e arit të mbajtur ishte rreth 65-70 ton në fillim të viteve 1970.

Banka më pas vendosi të ulë rezervat e arit në nivelin më të ulët të mundshëm dhe të investojë në borxhin sovran të vendit.

Në fillim të vitit 2010, tendenca për të mbajtur rezervat jashtë vendit ka ndryshuar përsëri dhe bankat qendrore kanë filluar të grumbullojnë arin si një përgjigje të mundshme ndaj një krize financiare.

SHBA dhe Gjermania janë aktualisht mbajtësit më të mëdhenj në botë të arit. Hungaria ka një nga sasitë më të vogla të metaleve të çmuara krahasuar me vendet e tjera të Evropës Qendrore. Që nga viti 1992, aktiviteti i Budapestit ka mbetur i qëndrueshëm pasi MNB nuk ka blerë ose shitur asnjë nga rezervat e saj të arit.

Një ish-deputet i Parlamentit të Moldavisë u dënua me 14 vjet burgim, nën akuzat për tradhti dhe spiunim për Rusinë.

Zyra e Prokurorit të Përgjithshëm të Moldavisë tha se Yuri Bolboceanut i është ndaluar edhe shërbimi në zyra publike për katër vjet pasi të lirohet nga burgu.

Bolboceanu është arrestuar më 17 mars të vitit të kaluar.

Inteligjenca e Moldavisë dhe Shërbimi i Sigurisë kanë thënë në atë kohë se ai është kapur në një takim me një spiun rus.

Moldavia, ish-shtet sovjetik, për kohë të gjatë është duke luftuar midis ndikimit rus dhe aspiratave të saj evropiane.

Mbretëria e Bashkuar “do të pendohet” për largimin nga Bashkimi Evropian, tha presidenti i Komisionit Evropian, Jean-Claude Juncker.

Duke iu adresuar Parlamentit Evropian në Strasburg, Juncker tha se negociatat për Brexit-in tashmë janë bërë urgjente.

Ai tha se nuk dëshiron që qytetarët e BE-së “të bien viktimë e Brexit-it” dhe shtoi se është e rëndësishme që të sigurohen të drejtat e tyre.

“Unë do të doja më shumë që Britania të mos kishte vendosur për t’u larguar nga BE-ja, por secili që e lë BE-në duhet të dijë se çfarë do të thotë kjo. Nëse vendosni të ikni, t’i lini prapa rregullat dhe marrëveshjet e përbashkëta, atëherë duhet të pranoni se gjërat nuk mund të mbeten ashtu siç janë”, tha Juncker.

Ai po ashtu i kërkoi kryeministres britanike, Theresa May, të japë “më shumë qartësi se si Mbretëria e Bashkuar e sheh marrëdhënien e saj të ardhshme me BE-në”.

Britania duhet të largohet nga Bashkimi Evropian deri në mars të vitit 2019. Ajo e ka marrë këtë vendim në një referendum të mbajtur në vitin 2016.

Ritmi i negociatave midis Britanisë dhe BE-së ka ngecur për shkak të tregtisë dhe Irlandës Veriore.

VOAL – “Ne nuk do të përsërisim gabimin që kemi bërë me Bernën,” shkruajnë eurodeputetët në një rezolutë mbi marrëdhëniet e ardhshme midis Londrës dhe Brukselit, e cila do të diskutohet të martën (sot) në Parlamentin Evropian dhe do të votohet të mërkurën. “Ne nuk duam – vazhdojnë – që marrëdhëniet të cilat do t’i kemi me Britaninë e Madhe në të ardhmen të bëhen si ato që kemi sot me Zvicrën”. Një tekst që thotë shumë për atë që mendojnë në Bashkimin Evropian për mënyrën dypalëshe.

Janë shtatëmbëdhjetë dosje të nënshkruara nga “Mister Brexit” i Parlamentit Europian – udhëheqësi liberal Guy Verhofstat – dhe nga folësit e tjerë, përfshirë italianin Roberto Gualtieri për grupin socialist. Një dokument jo detyrues, por Parlamenti Europian do të duhet të ratifikojë marrëveshjet e Brexit, prandaj është mirë të merret seriozisht.

Në marrëdhëniet e ardhshme midis Londrës dhe Brukselit, kur divorci dhe madje edhe tranzicioni janë të konsumuar, eurodeputetët shpresojnë jo një marrëveshje të fuqishme të tregtisë së lirë, gjë që është vënë në tryezë nga qeveria britanike dhe udhëheqësit evropianë, por një marrëveshje asociimi, me një mekanizëm solid për zgjidhjen e mosmarrëveshjeve.

Dhe kjo është për shkak se – nënvzojnë ata – duhet të shmangim shumëfishimin e marrëveshjeve dypalëshe dhe mangësitë që karakterizojnë marrëdhëniet e BE-së me Zvicrën. Këtë mënyrë dypalëshe, siç është sot, dihet se nuk e pëlqen Bashkimi Europian i njohur, por gjithmonë synon për ta parë atë të shkruar në të zezë dhe të bardhë.

Ne nuk e dimë se çfarë sjell e ardhmja, thonë në thelb eurodeputetët, por ai me Zvicrën nuk është një model. Duhet thënë, megjithatë, se Londra kurrë nuk ka pohuar të kundërtën. Avokatët e Brexit folën për një model zviceran, siç bëri Nigel Farage para referendumit, por edhe ata gjithashtu prej kohësh nuk e zënë në gojë.

Mbetet një gjetje e pakëndshme (e pakëndshme për Brukselin): pasi alternativat, si p.sh. aderimi apo hapësira ekonomike, në Zvicër nuk i pëlqejnë pothuajse askujt, rruga dypalëshe mbetet e vetmja e zbatueshme. Ose asgjë.rsi

Më pak se një javë pas skandalit të mishit i cili u zbulua në thertoren “Veviba”, në qytetin belg “Bastogne”, industria ushqimore belge është tronditur me zbulimin e ri.

Sipas gazetës flamene “Het Laatste Nieuws”, një kamion ishte larguar nga thertore “Veviba” në shtator të vitit 2016 për ta furnizuar Kosovën me mish të cilin e kishin prodhuar në vitin 2004.

Një profesor i Universitetit të Belgjikës në Ghent ka thënë për gazetën “Het Laatste Nieuws” se “ngrirja e mishit gjatë një periudhe 12-vjeçare nuk është domosdoshmërisht i rrezikshëm për shëndetin”, shkruan Insajderi.

“Por për të shmangur edhe rrezikun më të vogël, asnjë zinxhir i mishit nuk do të duhej të ruhej në mënyrë të qëndrueshme në një temperaturë prej minus 18 gradë Celsius”, ka thënë profesori belg.

Shumica e etiketave të markës “Veviba” i janë hequr nga ambalazhi. Viti 2004 ishte vetëm në disa prej etiketave.

Gazeta holandeze shkruan se Inspektorati i Ushqimit në Kosovë ka paralajmëruar Agjencinë Belge për Sigurinë e Zinxhirit të Ushqimit (Afsca) në kohën e incidentit. Përveç kësaj, disa thertore dhe disa industri tjera të mishit në veri të Belgjikës, në Izegem dhe Harelbeke, janë përfshirë në ngarkimin e këtij kamioni me mish.

Largimi i tij ishte kërkuar nga protestat

VOAL – Bie një kokë tjetër në Sllovaki pas vrasjes së gazetarit Jam Kuciak: ministri i Brendshëm dhe zëvendëskryeministër Robert Kalinak ka dhënë dorëheqjen e kërkuar nga opozita dhe nga manifestuesit e zbritur në sheshe, por edhe nga njëra prej partive të koalicionit qeveritar.

“Ka rëndesi të ruhet stabiliteti, prandaj kam vendosur të largohem nga detyra, ” deklaroi Kalinak gjatë një konference shtypi.

Vendimi i politikanit mund ta shpëtojë pozicionin e kryeministrit Robert Fico, largimi i të cilit është kërkuar gjithashtu me zë të lartë nga protestat.

AFP/Reuters

Liderja e ekstremit të djathtë në Francë, Marine Le Pen ka propozuar ndryshimin e emrit të partisë së saj nga Fronti Kombëtar në Marshi Kombëtar, në tentimet për të përmirësuar imazhin e partisë, transmeton BBC.

Ajo u ka thënë anëtarëve se emri aktual është “ndalesë psikologjike” për votuesit.

Plani për ndërrimin e emrit është miratuar dhe do të votohet sërish për këtë propozim.

Le Pen është mposhtur nga presidenti Emmanuel Macron në zgjedhjet e vitit të kaluar.

Që nga ajo kohë partia ka humbur votuesit dhe Le Pen është përballur me presion nga babai i saj Jean-Marie Le Pen, i cili e ka themeluar partinë më 1972.

Babai i lideres, i ka thënë agjencisë Reuters muajin e kaluar se ndryshimi i emrit do të ishte “vetëvrasje” politike.

Mirëpo liderja shpreson se me ndryshimin e emrit do të ndryshohet edhe qasja ndaj partisë, pasi ajo shpesh lidhet me racizmin dhe anti-semitizmin.

“Për shumë francezë, madje edhe për ata që janë të sinqertë është ndalesë psikologjike”, ka thënë ajo.

“Ne fillimisht kemi qenë parti e protestave. Nuk duhet të ketë dyshim tani se ne mund të jemi parti udhëheqëse”, ka shtuar ajo.

Partia ka thënë se 52 përqind të anëtarëve e kanë përkrahur ndryshimin e emrit të partisë.

Anëtarët e tjerë do të votojnë përmes postës për emrin e ri.

VOAL – Një aparat fotografik Leica (Lajka)  i vitit 1923 u shit në një ankand në Austri për 2.4 milionë euro dje, çmimi më i lartë i paguar ndonjëherë për një aparat fotografik.

Kjo u njoftua nga Muzeu Fotografik i Westlicht në Vjenë, ku u mbajt ankandi.

Çmimi bazë për Leica, një Seri-0 n. 122, ishte 400 mijë euro, por çmimi u rrit për shkak të modelit të rrallë të ofruar dhe gjendjes së tij të përsosur: është në fakt një nga 25 prototipet e prodhuara dy vjet para se kompania të fillojë të tregtojë aparatet fotografike në seri. Një blerës aziatik është fitues i ankandit.

Rekordi i mëparshëm për një Leica të vitit 1923 – Seria-0 n. 116 – ishte 2.16 milion euro paguar për një ankand të Westlicht më 2012.

VOAL – Jean-Marie Le Pen, themelues historik dhe udhëheqës i Frontit Nacional për shumë vite, është jashtë partisë. Pas një beteje të gjatë gjyqësore kundër vajzës së tij, anëtarët e partisë – gjatë kongresit të Lille – votuan 79.9% për statutin e ri.

Rregullat e reja përfshijnë, ndër të tjera, heqjen e zyrës së presidentit të nderit, në të cilin Jean-Marie Le Pen (89 vjeç) u konfirmua nga gjykata pas dëbimit të dekretuar nga Marine.

Marine është rizgjedhur kryetare e partisë, me 100% të votave. Ajo ishte e vetmja kandidate për rizgjedhje. Rezultatet u njoftuan këtë mëngjes.

Marine Le Pen, 49 vjeçe, filloi kështu mandatin e tij të tretë në krye të partisë që çon që, në vitin 2011, ai e pasoi babain e tij.

Shefja e Politikës së Jashtme të Bashkimit Evropian, Federica Mogherini është duke udhëtuar drejt Kievit për të biseduar me zyrtarë të lartë të qeverisë ukrainase, pak para përvjetorit të katërt të aneksimit ilegal të Krimesë nga ana e Rusisë.

Gjatë vizitës së saj dy-ditore, Mogherini do të takohet me presidentin ukrainas, Petro Poroshenko, kryeministrin, Volodymyr Hroysman, ministrin e Jashtëm, Pavlo Klimkin dhe ministrin për territoret e okupuara përkohësisht, Vadym Chernysh.

Zyra e Mogherinit ka thënë se udhëtimi vjen, “në një moment të rëndësishëm për zbatimin e reformave vendimtare” të lidhura me Marrëveshjen e Asociimit që fuqizon marrëdhëniet në mes të Ukrainës dhe Bashkimit Evropian.

Kjo vizitë, “do të jetë mundësi për të konfirmuar përkushtimin afatgjatë të Bashkimit Evrooian për popullin ukrasinas dhe aspiaratat e tyre për të ndërtuar një Ukrainë më të fortë”, është thënë në deklaratë.

Pas largimit nga pozita të mikut të Moskës, ish-presidentit ukrainas, Viktor Yanukovych, nga protestat masive më 2014, mijëra ushtarë rusë të paidentifikuar kanë marrë kontrollin e Krimesë, para se Moska ta aneksonte atë edhe zyrtarisht më 18 mars, 2014.

Rusia po ashtu ka nxitur konflikt në lindje të Ukrianës, nga luftimet e të cilave mes forcae qeveritare dhe separatisëve pro-rusë, kanë vdekur 10,300 persona nga viti 2014.

Në Ukrainë, Mogherini pritet të flasë edhe për zbatimin e marrëveshjeve të Minskut, të mbështetura edhe nga Perëndimi, përmes të cilave është synuar armëpushimi mes dy palëve ne konflikt.

VOAL – “Historia është me ne dhe do të na çojë nga fitorja në fitore.” Kështu tha mbrëmë në Paris Steve Bannon, ish këshilltar i presidentit amerikan Donald Trump, në Kongresin e Frontit Nacional në Lille, ku ai ishte ftuar në mënyrë të papritur.

“Ju – ka thënë Bannon nga tribuna – bëni pjesë në një lëvizje që është më e madhe dhe që shkon përtej Italisë, Polonisë, Hungarisë.”

Bannon, prania e të cilit është shpallur vetëm mbrëmë, ka drejtuar fazën finale të fushatës fitimtare presidenciale të Donald Trumpit para se të bëhej këshiltar i tij në Shtëpinë e Bardhë për 7 muaj.

(ANSA)

Eksperti i mjekësisë ligjore duke kërkuar për të dhëna në vendin ku ka ndodhur sulmi në Vjenë.

Autoritetet austriake kanë thënë se afgani 23 vjeçar ka pranuar therjen me thikë të katër personave në Vjenë, me arsyetimin se “ka qenë shumë i shqetësuar për situatën e jetës së tij”.

Policia ka thënë më 8 mars, se i dyshuari, emri i të cilit nuk është bërë publik, ka pranuar therjet e një 20 vjeçari afgan dhe tre anëtarëve të një familje tjetër.

Emrat e viktimave po ashtu nuk janë bërë të ditur.

I dyshuari është ndaluar shumë pak kohë pasi ka therur një 20 vjeçar në kryeqytetin austriak, ka thënë policia.

Autoritetet kanë thënë se motivet e sulmit ndaj tre anëtarëve të një familje nuk janë bërë të ditura.

Mirëpo ata kanë thënë se i dyshuari e ka njohur burrin afgan, duke thënë se e ka sulmuar pasi “ai e mban atë përgjegjës për varësinë e tij ndaj drogës në të kaluarën”.

I dyshuari po ashtu ka thënë se ai ka qenë në “disponim të keq dhe i shqetësuar për situatën e jetës së tij”, kur ka kryer sulmet, ka njoftuar policia.

Madrid, Spanjë

Shumë shërbime të trenave në Spanjë janë anuluar, pasi punëtorët kanë hyrë në grevë për të nxjerrë në pah pabarazitë gjinore në Ditën Ndërkombëtare të Gruas.

Treqind trena nuk do të operojnë gjatë ditës së sotme, ka bërë të ditur Ministria e Transportit e Spanjës.

Greva 24-orëshe, e thirrur nga dhjetë sindikata, ka qenë temë e shumë debateve.

Grupet feministe po ashtu kanë kërkuar nga gratë të mos shpenzojnë para sot dhe të mos i bëjnë punët e shtëpisë. Por, disa kanë dalë kundër grevës.

Partia në pushtet Partido Popular ka thënë se aksioni është për “elitat feministe dhe jo për gratë me probleme të përditshme”.

Aktorja spanjolle, Penelope Cruz, ka anuluar ngjarjet e planifikuara publike dhe do të hyjë në grevë.

Anëtarja e Komisionit të BE-së përgjegjëse për tregtinë Cecilia Malmström tha se Unioni po përgatitet për masat që do të merren ndaj prodhimeve amerikane

BRUKSEL – Anëtarja e Komisionit të Bashkimit Evropian (BE) përgjegjëse për tregtinë Cecilia Malmström tha se Unioni po përgatitet për masat që do të merren ndaj prodhimeve amerikane.

“Ne jemi në konsultim me vendet anëtare të BE-së dhe së shpejti do të ndajmë me publikun këtë listë të përkohshme të produkteve. Në këtë listë ndodhen produkte të çelikut, industriale dhe bujqësore”, tha ajo.

Malmström ka zhvilluar në Bruksel një konferencë për media në lidhje me tarifat shtesë doganore që SHBA-të planifikojnë të vendosin për eksportet e çelikut dhe aluminit.

Ajo thekson se në këtë çështje strategjia e BE-së është në tri faza. Malmström tha se këto janë zhvillimi i një qasjeje të koordinuar me vendet e tjera brenda rregullave të Organizatës Botërore të Tregtisë (OBT), përgatitjen e masave që duhen marrë në rast se kjo situatë ka një ndikim të rëndësishëm ekonomik dhe marrjen e masave kundër produkteve të tjera të SHBA-ve sipas ndikimit ekonomik.

“Ne dyshojmë se tarifat që SHBA-të planifikojnë t’i zbatojnë janë në përputhje me rregullat e OBT-së”, tha Malmström duke bërë të ditur se nuk i sheh të drejta tarifat doganore që SHBA-të dëshiron t’i zbatojë.

Pasi ka rikujtuar se SHBA-të ende nuk kanë marrë vendim zytar, Malmström potencoi se “Këto tarifa dëmtojnë BE-në. Ndaj këtyre tarifave do të jepet kundërpërgjigje në mënyrë të drejtë dhe propocionale”.

Lidhur me deklaratën e presidentit amerikan Donald Trump për tarifa shtesë ndaj automjeteve evropiane, Malmström tha se “Kompanitë evropiane prodhojnë 2 milionë automjete në SHBA dhe se këto kompani sigurojnë vende pune në SHBA”. aa

Policia italiane ka arrestuar 21 persona në një operacion të madh në Romë, të cilët shpërndanin kokainë në lokalet e natës.

Armë dhe drogë u sekuestrua gjatë operacionit

Ajo quhet Gaia Mogherini, dhe është vajza e vëllait të Federica Mogherini, përfaqësuese e lartë e BE-së për punët e jashtme.

Vajza, 28 vjeçare, është lënë në arrest shtëpiak me akuzën për posedim të lëndëve narkotike. Gaia Mogherini edhe në tetor të vitit 2016 u arrestua për të njëjtën akuzë.

Lideri i Lega, Matteo Salvini ka nje JO te prere. “Më pyesin: a do të shkosh ne qeveri me Di Maio? Përgjigjja është Jo”.

Udhëheqësi i Liga dëshiron të pastrojë çdo keqkuptim të mundshëm: “Kam lexuar hipoteza të çuditshme. Por skuadra është ajo e qendrës së djathtë. E njëjta me te cilen hyme ne ‘loje dhe luajtem”.

Salvini përjashton “qeveri teknike” dhe shton se eshte i detyruar te flase me te gjithe.  “Liga fitoi brenda koalicionit dhe do të mbetet në krye të qendrës së djathtë”-thote ai.

Por me cilin synojë udhëheqësi i Liga të ndërtoje shumicën parlamentare të qeverisë?

“Mos me beni te them emra”, thote ai e shton se “qëllimi është që ekipi i qendrës së djathtë të ofrojë propozimin per qeverine e re”.

Lideri i Lega: S’ka koalicione të çuditshme, Qendra e Djathtë qeveris vendin

“Unë e thashë gjatë fushatës elektorale që do i degjoj te gjithe, do flas me te gjithe, por ekipi qeverises tashme eshte i qendres”. Ka qene i prere Matteo Salvini, lideri i Lega, duke mohuar nje koalicion te mundshem me 5 Yjet.

“Nuk ka koalicione të çuditshme, une jam nje nga ata qe e mbajne fjalen”- thote ai dhe shton se qendra e djathte ka fituar dhe mund te qeverise.

Lega qëndron si partia e parë e koalicionit të qendrës së djathtë, duke prekur në nivel kombëtar 18% të votave.

Dhe edhe pse Salvini pranon se Pesë Yjet janë “padyshim e parë”, duke i dhene urimet, thekson se Lega është rritur 4-18%.

Matteo Renzi, kryetar i Partisë Demokratike në Itali, ka dhënë dorëheqje sot nga drejtimi i partisë, pas disfatës në zgjedhjet parlamentare.

Renzi, 43 vjeçar, gjithashtu ka thënë se beson që partia e tij nuk duhet të bëjë marrëveshje paszgjedhore me “partitë ekstremiste” dhe se duhet të qëndrojë në opozitë këtë mandat, raporton agjencia Reuters.

Sipas rezultateve paraprake të zgjedhjeve parlamentare që u mbajtën të dielën në Itali, asnjë parti nuk ka fituar votat e nevojshme që të qeverisë e vetme.

Ndërkaq, në epërsi ka dalë koalicioni i krahut të djathtë i ish-kryeministrit Silvio Berluskoni. Formimi i Qeverisë së re në Itali, pritet të marrë disa javë kohë.

Lideri italian, Silvio Berlusconi duke folur në një organizim parazgjedhor në Milano, foto nga arkivi

Italianët kanë nisur të votojnë sot në zgjedhjet parlamentare.

Në garë janë partitë e ekstremit të djathtë dhe ato populiste, duke përshirë koalicionin e Silvio Berlusconit, që ka shërbyer si kryeministër për tri mandate dhe aleancën e qendrës së majtë e cila kërkon fitojë të drejtën për krijimin e qeverisë së re.

Sipas analistëve votat mund të ndahen në mes të Lëvizjes Pesë Yjet, asaj kundër migrimit Partia e Lidhjes, partisë së Berlusconit Forza Italia dhe Partisë Demokratike.

Rezultatet preliminare pritet të bëhen të ditura më 5 mars.

Berlusconi, 81 vjeçar e ka të ndaluar kandidimin për shkak të një dënimi për mashtrim me taksa. Mirëpo ai pritet të ketë një rol kyç në qeverinë e ardhshme, mbrapa të nominuarit për kryeministër, Antonio Tajani.

Në rast se asnjëra nga partitë nuk i fiton votat e mjaftueshme, partitë mund të tentojnë të krijojnë koalicion me njëra-tjetrën, apo presidenti, Sergio Mattarella, mund të formojë një qeveri të përkohshme dhe të kërkojë zgjedhje të reja.

Në sondazhet e bëra para zgjedhjeve, koalicioni i Berlusconit ka fitur rreth 37 përqind.

Fushata është karakterizuar me përplasjet në mes të së djathtës ekstreme dhe aktivistëve antifashistë.

Fushata për të shënuar shtëpitë e kundershtarëve në Pavia na i kujton shkrimet famëkeqe naziste në dyqane e hebrejve

VOAL – “Këtu banon një antifashist”: ky është shkrimi që shfaqet në hyrjet e shtëpive, shtypur me shkronja të përdorurua nga formacionet neofashiste e neonaziste, vendosur nëpër dyert e atye që janë kundër fashizimit dhe racizmit në Pavia të Italisë.

Fushata e shënimit të shtëpive të kundërshtarëve në Pavia na i kujton shkrimet famëkqe naziste e fashiste me të cilat, në vitet ’30, pasuesit e Hitlerit dhe Mussolinit damkosnin dyqanet e hebrejve. Episodi i ndodhur në Pavia ka shkaktuar indinjatë në rrjetet sociale

Parullë e publikuar nga shoqata e partizanëve (ANPI Pavia/Facebook)

Laura Boldrini, presidente e Dhomës së Deputetëve, ka telefonuar Giacomo Galazzon, përgjegjës i kulturës i komunës së Pavia, për t’i shprehur solidaritet atij dhe të gjithë banorëve të Pavias.

Ecco cosa succede quando si lasciano i neofascisti liberi di aprire sedi, fare manifestazioni e presentarsi alle elezioni, lasciando impunite le loro aggressioni squadriste. Sciogliere subito CasaPound e Forza Nuova.

— Alessandro Caiani (@ale_caiani) 3 marzo 2018

“Ja çfarë ndodh kur i lënë neofashistët të lirë për të hapur seli të partive, për të bërë manifestime dhe për t’u paraqitur në zgjedhje, duke i lënë të üandëshkuara agresionet e tyre skuadriste. Të shpërndahen menjëherë CasaPound e Forza Nuova”, ka postuar njëri prej aktivistëve, Alessandro Caiani, në përgjigje të një akti përfrikësues ndaj tij.

Polonia pretendon se Gjermania i detyrohet 850 miliardë dollarë dëme si pjesë e reparacioneve të Luftës së Dytë Botërore.

Pretendimin e polakëve e ka shprehur Arkadiusz Mularczyk i partisë në pushtet, Ligj dhe Drejtësi.

Ai drejton një ekip parlametar që u ngrit në muajin shtator për të vlerësuar dëmshpërbliminn që Gjermania duhet të japë si pasojë e pushtimit që kreu në vitin 1939.

“Po flasim për shuma të mëdha. Kjo është arsyeja pse Gjermania po ndjek një politikë që sfidon çdo pretendim dhe po e ndjek këtë politikë në të gjithë botën”, citohet ai në një deklaratë që tregon se Varshava po ngre çështjen e dëmshpërblimeve si kundërpeshë ndaj presionit të Berlinit në Bruksel.

Për Gjermaninë kjo çështje është zgjidhur në vitin 1953 përmes një rezolute të qeverisë komuniste të Polonisë që deklaronte se Gjermania kishte përmbushur detyrimet e veta dhe se nuk do të kërkohej më kompensim.

Sipas konservatorëve polakë, ai vendim nuk ka vlerë sepse u mor nën presionin sovjetik.