VOAL

VOAL

Please Wait ...
0%

Abdeslami do të ekstradohet në Francë

Një gjykatë në Bruksel ka vendosur të lejojë ekstradimin në Francë të Salah Abdeslamit, i dyshuar për sulmet terroriste në Paris, që kanë ndodhur nëntorin e kaluar.

Abdeslami është arrestuar këtë muaj në qendër të Brukselit, ku dyshohet se është fshehur për më shumë se katër muaj.

Arrestimi i tij në një operacion të madh policor është bërë katër ditë përpara sulmeve me bomba në Bruksel, që kanë lënë të vrarë 35 veta.

Autoritetet belge dhe franceze do të diskutojnë tani se si të realizohet ekstradimi, ka thënë Zyra e prokurorit belg.

Megjithatë, transferimi mund të marrë disa javë kohë, pasi Abdeslami po merret në pyetje edhe për sulmet në Bruksel që kanë ndodhur më 22 mars.

Pas arrestimit, Abdeslami është marrë në pyetje për rolin e tij të dyshuar në sulmet në Paris.

Por, pas sulmeve vetëvrasëse në Bruksel, ai ka përdorur të drejtën e tij për të heshtur.

Ulrike Lunaçek: Serbia s’mund të hyjë në BE pa e njohur pavarësinë e Kosovës

“Serbia nuk do të mund të bëhet pjesë e Bashkimit Evropian pa njohur pavarësinë e Kosovës, i pëlqeu kjo dikujt apo jo”.

Kështu ka deklaruar Zëvendëspresidentja e Parlamentit Evropian Ulrike Lunaçek në një diskutim podiumi në Berlin, organizuar nga Fondacioni Hajnrih Bël me temën “Zhvillimi i marrëdhënieve midis Serbisë dhe Kosovës”, ku kanë marrë pjesë edhe Bodo Veber nga Këshilli për politika demokratike, si dhe kryetari i Prishtinës Shpend Ahmeti.

Lunaçek ka deklaruar se “vazhdimisht angazhohet dhe kërkon që edhe pesë vendet e BE-së ta njohin pavarësinë e Kosovës dhe sipas saj, kjo duhet të ndodhë.

Ndërkaq, Bodo Veber tha se “nuk do të lejohet anëtarësimi i Serbisë në BE para Kosovës, pasi askush nuk mund të garantojë që më pas Serbia nuk do ta bllokonte anëtarësimin e Kosovës në BE”.

Nga ana e tij kryetari i Prishtinës Shpend Ahmeti ka deklaruar se “Vetëvendosje nuk është në parim kundër dialogut me Serbinë, por është kundër dialogut pa parime”, transmeton RTK. Ai në fjalimin e tij ka deklaruar se “Serbia nuk po e trajton Kosovën si partner të barabartë në bisedime dhe se deri më tani nuk e ka marrë përgjegjësinë për krimet që ka kryer gjatë vitit 1999 në Kosovë”./RTK

Belgjikë, lirohet një nga të dyshuarit për sulm

Një person, i cili është njoftuar se ishte i dyshuari kryesor për sulmet terroriste të javës së kaluar në Bruksel, u lirua për shkak të mungesës së fakteve.

Prokurori Federal i Belgjikës tha sot se autoritetet nuk kishin justifikime për ta mbajtur të ndaluar burrin në fjalë, i cili u identifikua vetëm si Faycal C. Para se të lirohej, ai u ndesh fillimisht me akuzat “për pjesëmarrje në një grup terrorist, në vrasje terroriste dhe përpjekje për vrasje terroriste”.

Sipas mediave, emri i plotë i burrit të dyshuar është Faycal Cheffou dhe ai mendohej të ishte personi i tretë që u dallua tek video e filmuar nga kamerat e sigurisë në aeroport, krahas me dy burrat e tjerë, të cilët kryen sulm vetëvrasës.

Nuk është e qartë, në se hetuesit mendojnë që ai të ketë qenë burri në fotografinë e paqartë të kamerave të sigurisë, që u mor disa momente para shpërthimit.

Presidenti Obama: Ekipi i FBI-së ndodhet në Belgjikë

Presidenti amerikan Barak Obama tha se i ka ofruar kryeministrit të Belgjikës një “arsenal të plotë” të mbështetjes amerikane për të nxjerrë para drejtësisë çdo terrorist të përfshirë në planifikimin apo që ka ndihmuar në “sulmet e paimagjinueshme ndaj burrave, grave dhe fëmijëve të pafajshëm” në Bruksel.

Në fjalimin e tij të përjavshëm, Presidenti Obama tha sot se Belgjika është një mike dhe aleate e ngushtë e SH.B.A. “Kur është fjala për miqtë tanë, – tha ai, – Amerika i mbron ata, sidomos tani që jemi duke luftuar kundër plagës së terrorizmit.”

Sipas presidentit, një ekip agjentësh nga Byroja Federale e Hetimeve ndodhet tashmë në Belgjikë për të mbështetur hetimet rreth sulmeve terroriste.

“Ne, tha zoti Obama, –  do të vazhdojmë të çrrënjosim dhe të mposhtim ISIL-in,” “Ne vazhdojmë të godasim udhëheqjen e ISIL-it dhe këtë javë, arritëm të eliminojmë përfundimisht njërin prej udhëheqësve të tyre kryesorë në fushën e betejës,” tha ai.

Papa Françesku: Deti Egje dhe krejt Mesdheu është kthyer në një varrezë të heshtur

ROMË – Papa Françesku në ritualin e të premtes së bekuar “Rruga e Kryqit (Via Crucis)” të organizuar në Romë, tha se deti Egje dhe krejt Mesdheu është kthyer në një varrezë të heshtur.

Kryqin i cili nënkuptonte vuajtjet e Krishtiti cili pasi u arrestua, shkoi drejt kryqëzimit dhe më pas u dënua me vdekje, këtë herë u mbajt nga besimtarë të ardhur nga Afrika qendrore, Siria, Rusia, Bosnjë Hercegovina, Paraguai dhe Kina.
Papa në fjalën e tij tha se kryqin e Jezuit sot e shohin tek ata njerëz të cilët lënë shtëpitë dhe vendet e tyre për shkak të luftërave.

”Egjeu dhe Mesdheu janë kthyer në një varrezë të heshtur. Kjo është pamja e ndërgjegjes tonë të pandjeshme dhe të ngrirë” tha Papa dhe në vijim të fjalës së tij duke i’u referuar tregtarëve të armëve shtoi: ”Ata ushqejnë çdo ditë fëmijët e tyre me bukë të lyer me gjak”.

kryqi2

Belgjikë, vritet roje e sigurisë në centralin bërthamor, i vidhet karta

Një roje sigurise në një central bërthamor belg është vrarë gjatë natës së të enjtes në Charleroi, afër Brukselit. Karta e tij për aksesin në impiantin bërthamor është zhdukur. Këtë e bën të ditur e përditshmja belge “Derniere Heure”.

Dihet tashmë që centralet bërthamore ishin survejuar nga terroristët dhe kanë qenë shënjestër e sulmeve të mundshme. Ata kishin përgjuar biseda telefonike dhe dyshohet se brenda centralit mund të kenë patur bashkëpunëtorë.

Ndërkohë mediat greke shkruajnë se si është gjetur harta e aeroportit të Brukselit në një kompjuter të marrë në apartamentin në Athinë ku ka jetuar Abdelhamid Abaaoud, një prej autorëve të masakrës së Parisit.

Autoritetet greke, gjithmonë sipas mediave lokale, ndërkohë kanë shprehur pakënaqësinë e tyre për sa i përket bashkëpunimit me kolegët belgë. Shkëmbimi i informacioneve mes Athinës dhe Brukseli po bëhet në mënyrë problematike.

Ndërkohë alarmi në Belgjikë mbetet shumë i lartë. Në 2 video, ISIS ka festuar sërish atentatet e Brukselit dhe ka bërë kërcënime të tjera duke ofruar një armëpushim në shkëmbim të ndalimit të sulmeve ajrore.

Dalja e Britanisë nga BE e rrit kërcënimin nga terrorizmi

Ish-ministrja e sigurisë, Pauline Neville-Jones ka thënë se Britania do të mbetet më e ekspozuar ndaj terroristëve të huaj, nëse votuesit zgjedhin që Britania të largohet nga Bashkimi Evropian.

Në një intervistë për “The Guardian”, Neville-Jones, konfronton argumentin e avokatëve të lartë të idesë “Brexit”-it se anëtarësimi në BE është një kërcënim për sigurinë kombëtare, pasi sipas tyre, kjo nënkupton që kufijtë e Britanisë duhet t’i kenë “dyert e hapura”.

Sipas saj, ky argument është i pakuptimtë, pasi lëvizja e lirë nënkupton që qytetarët e BE-së mund të punojnë në Britani dhe do të kalojnë përmes kontrollit kufitar, transmeton KosovaPress.

“Për shkak se ne nuk do t`i bashkohemi më zonës Shengen, pa pasaporta, kontrolli i kufijve tanë do të mbetet përgjegjësi kombëtare. Që nga viti 2010, Britania e Madhe i ka penguar rreth 6,000 shtetas evropianë për të hyrë në vendin tonë, për arsye të sigurisë”, ka thënë ajo.

Neville-Jones beson se nëse Britania largohet nga BE-ja, organet e sigurisë dhe të inteligjencës, në mënyrë të përbashkët, do të rrezikohen. Dhe kjo, ka thënë ajo, do të bëj të pamundur që të kryhen kontrolle kufitare jashtë shtetit, siç është Parisi.

Dy shpërthime gjatë operacioneve të policisë në Bruksel

Televizioni shtetëror belg në gjuhën frënge ka thënë se janë dëgjuar dy shpërthime në lagjen Schaerbeek të Brukselit gjatë një operacioni policor. Në operacion thuhet se është arrestuar një person

BRUKSEL – Njoftohet për dy shpërthime gjatë një operacioni policor anti-terror në Bruksel.

Televizioni shtetëror belg në gjuhën frënge ka thënë se janë dëgjuar dy shpërthime në lagjen Schaerbeek të Brukselit gjatë një operacioni policor. Në operacion thuhet se është arrestuar një person.

Duke u se një shpërthim është dëgjuar gjatë nisjes së operacionit thuhet se janë dëgjuar edhe të shtëna armësh.

Ndërkohë nuk janë dhënë detaje nëse operacioni ka të bëjë me sulmin terrorist të ndodhur më 22 mars në të cilin humbën jetën 31 persona. Në operacionet e mëparshme pas sulmeve të organizuar nga policia belge në këtë lagje thuhet se është sekuestruar lëndë shpërthyese e përzier me gozhdë, si dhe flamuj të DAESH-it (ISIS-it).

Në sulmet ndaj aeroportit “Zaventem” dhe një stacioni metroje në Maelbeek, humbën jetën 31 dhe u plagosën rreth 300 persona. Ndërkohë për shkak të gjendjes së vështirë të disa të plagosurve thuhet se numri i të vdekurve mund të rritet. Pas sulmit të marrë përsipër nga DAESH-i Belgjika rriti në maksimum gjendjen e alarmit. Ndërkohë alarmi në këtë shtet nga niveli katër që ishte ditën e djeshme u ul në nivelin tre.

Mesha in Coena Domini. Papa emigrantëve: jemi të ndryshëm, por vëllezër e duam të jetojmë në paqe!

Papa Françesku hapi, Treditëshin e Pashkëve, duke kremtuar, nga ora 17.00, Meshën in Coena Domini, me 892 emigrantë dhe refugjatë të strehuar në Qendrën Cara të Castelnuovo di Porto. Françesku shkeli përsëri në periferi të Romës, në këtë qendër, një nga më të rëndësishmet e Italisë për refugjatë, drejtuar, që nga viti 2014, nga  kooperativa shoqërore Auxilium.

Homelia e Papës, me tingëllim tejet aktual, jehoi si bisedë e ngrohtë me emigrantët. Sepse gjestet flasin më shumë e më mirë sesa fjalët e figurat. E pikërisht këtë u kujtoi Papa,  duke u ndaluar tek komenti i Fjalës së Zotit, në të cilën  binin në sy dy gjeste. I pari, gjesti i larjes së këmbëve nga ana e Jezusit. Ai, që ishte kreu, lan këmbë. Këmbët e më të vegjëlve. E gjesti i dytë, ai i Judës, që shkon e shitet tek armiqtë, tek ata, që nuk duan paqe me Jezusin. Shkon të marrë 30 asprat, për të cilat e ka shitur Mësuesin.

Me këto fjalë Papa e nisi ritin e larjes së këmbëve në kopshtin e Cara të Castelnuovo di Porto. Këtu, shtoi, jemi myslimanë, hinduistë, koptë, katolikë, ungjillorë, të gjithë vëllezër, bij të të njëjtit Zot e duam të jetojmë në paqe, të integruar. Ky, theksoi para se të gjunjëzohej para 12 prej tyre për t’u larë këmbët, është gjesti, që po përgatitem të bëj. Secili nga ne ka historinë e vet, kryqin e vet, dhimbjen e ëndrrat e veta, por edhe një zemër të hapur, plot etje për vëllazërim. E unë uroj që vetë zemra e njerëzimit të rrahë me këtë ritëm.

Uroj që njeriu të mos shitet më për 30 kacidhe, por të jetojë si vëlla ndërmjet vëllezërve.

Më pas, kujtimi i gjestit të luftës dhe shkatërrimit në një qytet të Evropës, shkaktuar nga njerëz, që nuk duan të jetojnë në paqe.

Por prapa këtij gjesti, kujtoi me dhimbje Papa, ishin njerëz të tjerë. Ashtu si pas Judës ishin ata, që i dhanë paratë, pas këtij gjesti janë fabrikantët e armëve, të cilët nuk e duan paqen, por luftën, nuk e duana vëllazërimin, por urrejtjen. Të mjerët ata, që blejnë armë kundër paqes!

Ky, denoncimi i fuqishëm, që Papa e bëri duke folur lirisht në homelinë e mbajtur para 800 e ca emigrantëve e refugjatëve të Castel Nuovo-s:

“Këtu, theksoi me forcë, të gjithë ne po bëjmë gjestin e vëllazërimit, e të gjithë ne themi: ‘Jemi të ndryshëm, por jemi edhe vëllezër e duam të jetojmë në paqe’”.

Këto fjalë Papa ua drejtoi rreth një mijë vetëve, pjesa më e madhe afrikanë myslimanë, por edhe katolikë, pentekostalë e edhe ndonjë hinduist. Shumë zemrave, por që sot u bënë një zemër e vetme, e ngarkuar me emocion të jashtëzakonshëm e të papërsëritshëm. Kështu e pritën Papën banorët e Qendrës së strehimit, ndërmjet të cilëve Françesku kremtoi Meshën in Coena Domini të së Enjtes së Madhe.

E pamë përsëri  në këtë Vit Shenjt Françeskun, pranë e pranë me më të varfërit e më të pambrojturit. Për të takuar, përmes tyre, një milion të tjerë, të shpëndarë andej e këndej, në kërkim të jetës së re. Njerëz, që e nisin ditë për ditë shtegtimin, me shpresë se do t’i zgjojnë ndërgjegjet e atyre që u kanë në dorë fatin, nga dremitja e indiferenca. Papa shkoi t’u lajë këmbët e lodhura nga udha e gjatë,  ende e pacak. Shenjë simbolike, që i kujton mbarë botës se dikush duhet ta marrë mbi vete përgjegjësinë për fatin e këtyre njerëzve, të ikur nga strehët e tyre, në kërkim të një strehe më të  mirë për vete e për të vetët. Sigurisht nuk kërkojnë strehë, si kjo ku janë tani, në pritje, që megjithatë, u shndërrua sot në një strehë të paharrueshme për jetën e tyre. Këmbët e emigrantëve do të vihen rishtas për udhë, duke u kujtuar vazhdimisht se një ditë ua lau baltën e rrugëve të gjata dora, të cilën e kanë për nder ta shtrëngojnë pikërisht ata, që duhet t’ua  pastrojnë udhët, për të arritur tek caku.

Papa Françesku u lan këmbët refugjatëve

Entuziazëm në Qendrën e Castelnuovo di Porto, pranë Romës

Papa Françesku hap sot pasdite Treditëshin e Pashkëve duke kremtuar në ora 17.00 Meshën in Coena Domini me 892 emigrantë dhe refugjatë të strehuar pranë Qendrës Cara në Castelnuovo di Porto, në periferi të Romës, një nga qendra më të rëndësishme të Italisë për refugjatë.

Katër nigerianë katolikë, tri gra eritrease kopte, tre myslimanë me kombësi të ndryshme, një indian hinduist, një veprimtare italiane: këtyre u lan këmbët sot Papa Françesku, gjatë kremtimit të meshës së Darkës së Mbrame, në Castelnuovo di Porto, pranë Romës. Qendra e refugjatëve, ku shkon Ati i Shenjtë për të përkujtuar së bashku me rreth 900 azilkërkuesit, shumica myslimanë, çastin kur Jezu Krishti themeloi Eukaristinë, është një nga më të mëdhatë në Itali. Drejtori i saj tashmë është edhe ai i huaj, Akram Zubaydi, palestinez. Të dëgjojmë Angelo Chiorazzo, themelues i “Auxilium”, kooperativës që, nga prilli i vitit 2014, administron strukturën:

Në Qendër, sot, jetojnë 892 vetë, prej të cilëve 554 myslimanë, 239 të krishterë (shumica koptë), 2 hinduistë dhe 98 pentekostalë. Përsa i përket prejardhjes, kemi 281 të rinj nga Eritrea, 135 nga Mali, 78 nga Senegali, 92 nga Nigeria e pastaj, me radhë, njerëz nga 26 kombe të ndryshme. Të gjithë kanë histori shumë të rënda për të treguar. Histori udhëtimesh, që në rastin më të mirë, kanë zgjatur një vit, mes njëmijë vështirësish. Shumë kanë qenë në burgjet e Libisë. Të gjithë kanë shpresë për të ardhmen, këtë kërkojnë.

Në përgjithësi, sa kohë ndalen e cili është destinacioni i tyre?

Këtu hapet një problem i vërtetë, sepse tani, me rishpërndarjen, ata që vijnë nga Siria, nga Eritrea dhe nga Iraku, në kohë të arsyeshme, dërgohen në vende të tjera evropiane. Periudha e vlerësimit të kërkesës për strehim zgjat pak a shumë gjashtë muaj. Problemi është se kur u mohohet strehimi, kanë të drejtë të bëjnë apel në një gjykatë të zakonshme. E pikërisht këtu është çështja: kohët e gjykatave të zakonshme janë tepër të gjata, deri në dy vjet. Në fund, 85% e personave të Qendrës arrijnë të marrin së paku një leje qëndrimi për arsye humanitare. Problemi është se faktikisht, duke i lënë në pritje për dy vjet, është njëlloj sikur t’i kesh dënuar me dy vjet heqje lirie.

Si e pritën lajmin e ardhjes së Papës?

Pati mosbesim të madh në fillim: mendonin se po talleshim me ta. Por, kur e kuptuan se ishte e vërtetë, shpërthyen në gëzim e pamë sy plot lot. Për të mos folur për 12 personat, që u zgjodhën për larjen e këmbëve. Njëri prej tyre, mysliman, më tha: “Po më duket vetja më i madh se Obama, që Papa, njeriu më i rëndësishëm i botës, njeriu më i mirë i botës, vjen të më lajë këmbët!”. Edhe myslimanët e Qendrës janë të lumtur për meshën me Papën, sepse kanë një devocion të veçantë për të. E kanë shprehur shpesh. Për shembull, më 17 janar, me rastin e Jubileut të emigrantëve, erdhën me ne në Lutjen e Engjëllit të Tënzot edhe 200 të rinj myslimanë, kaluan Portën Shenjte e morën pjesë në meshë me emocion. Myslimanë janë edhe të rinjtë pakistanezë, që bënë një flamur shumë të bukur me të gjithë flamujt e kombeve të pranishme në Qendër e me shkrimin: “Faleminderit Papa Françesku”.

Bruksel – Gjendet i vdekur në aeroport “terroristi i zhdukur” (fotot)

Najim Laachraoui

Najim Laachraoui është personi i dytë që hodhi veten në erë në aeroportin e Brukselit. Gazeta belge “De Standaard” shkruan se terroristi është gjetur mes viktimave dhe lajmin e konfirmojnë familjarë të tij. Por, lajmi nuk konfirmohet nga hetuesit.

Laachraoui i njohur edhe si Soufiane Kayal, ishte një nga të dyshuarit për pjesëmarrje në sulmet e Parisit. Me një kartë identiteti false me emrin “Soufiane Kayal”, ai kaloi kufirin Hungari-Austri, shtatorin e vitit të kaluar bashkë me Saleh Abdeslam.

Belgian police release image of Paris terror suspect

Najim Laachraoui

Ai gjithashtu ka marrë me qira një shtëpi për terroristët duke përdorur emrin Namur Auvelais. AND-ja e tij është gjetur në disa bomba të përdorura në sulmet e 13 nëntorit në Francë.

terr3

Laachraoui (majtas) me vëllezërit El Bakraoui

Laachraoui është personi në të majtë në foton e shpërndarë nga policia belge për të dyshuarit e sulmit në aeroportin Zaventem. 24-vjeçari mund të ketë shkuar në Siri në vitin 2013 dhe më pas është rikthyer sërish në Belgjikë.

terr4

Dy vëllezërit El Bakraoui që hodhë veten në erë bashkë me Laachraoui

(Foto) Historia e një jetë të prerë në mes – Viktima e parë e identifikuar nga tragjedia në Bruksel Adelma nga Peruja

Voal -Voal.ch shkruan se tashmë viktima e parë nga sulmet terroriste në Bruksel është identifikuar. Ky konfirmim është bërë nga ministria e punëve të jashtëme të Perusë. Një emër, një datë lindje, një jetë e coptuar. Adelma Marina Tapia Ruiz. Gruaja 37 vjeçare, peruvjane ishte rezidente prej 6 vjetësh në Bruksel, ku jetonte me bashkëshortin dhe dy vajzat binjake. Kur ndodhi sulmi, ajo gjendej në hollin e aeroportit bashkë me bashkëshortin belg Christopher Delcambe dhe natyrisht binjaket e tyre të adhuruara. Njëra prej vajzave ka mbetur e lënduar nga ciflat, ashtu edhe i shoqi.

Vëllai i Ruiz, Fernando Tapia Coral, ka treguar se pak para shpërthimit të dyja vajzat kishin dalë jashtë për të luajtur. Dhe pikërisht ky largim prej disa sekondash ua ka shpëtuar jetën. Edhe i jati që i ka ndjekur për t’i pasur nën kujdes, edhe ky prandaj mbeti i gjallë, dhe pikërisht gjatë këtyre sekondave ndodhi shpërthimi. Ai u turr brënda të gjejë të shoqen e tij, në atë kaos, tym të zi dhe ulërima të pafund. Por nuk mundi dot që ta gjente. Sipas informacioneve, e gjithë familja po nisej në Lima për pushimet e Pashkëve dhe për të marrë pjesë në një martesë të të afërmëve. Ato gjendeshin në aeroportin e Brukselit Zaventem me të shoqin belg, dhe dhe binjaket katër vjeçare, Maureen e Alondra. Në fillim do të shkonin në New York ku Adelma kishte dy motrat e saj.

Sikur t’i kishin ndjekur të dy vajzat, të dy bashkë, do të kishin shpëtuar të katërt, por duket Adelma është kujdesur për bagazhet si ndodh në këto raste, kur njëri bashkëshort kujdeset për fëmijët dhe tjetri për plaçkat.

Ishin një familje e lumtur. Një çift i dashuruar me binjaket e tyre që ishin për ta mrekullia e Zotit.

Por gjithçka u pre në mes, pa asnjë lloj kuptimi, pa asnjë lloj sensi.

Adelma Tapia Ruiz, 37 vjeça është njëra nga 34 viktimat që humbën jetën gjatë sulmeve terroriste në aeroportin e Brukselit  Zaventem dhe në metronë Maelbeek, ku janë plagosur gjithashtu edhe 250 persona të tjerë./Përktheu E.B.

2016-03-23_12-20-382016-03-23_12-20-212016-03-23_12-19-162016-03-23_12-21-012016-03-23_12-47-38

Spanjë, në aksidentin e djeshëm 7 nga 13 studentet që humbën jetën ishin italiane

Kryeminstri italian Matteo Renzi nëpërmjet rrjeteve sociale tha se pjesa më e madhe e viktimave janë italiane

ROMË – Ministria e Punëve të Jashtme të Italisë bëri të ditur se në aksidentin që ndodhi dje në lindje të Spanjës, jetën e humbën shtatë studente nga Italia.

Në deklaratë sqarohet se në aksident mbetën të vdekur gjithsej 13 studente, pas së cilës në Itali u formua shtabi i emergjencës. Kryeminstri italian Matteo Renzi nëpërmjet rrjeteve sociale tha se pjesa më e madhe e viktimave janë italianë.

“Zemra më është këputur për italianet që u vranë në aksident, si dhe për të rejat të cilave iu shkatërrua jeta”, thuhet në mesazhin e Renzit.

Autobusi, i cili po qarkullonte nga Valencia për në Barcelonë, të dielën rreth orës gjashtë të mëngjesit në autostradën AP-7 u përplas me një makinë. Në aksident u jetën e humbën 13 persona ndërsa 50 të tjerë u plagosën. Në autobus ndodheshin 61 pasagjerë, kurse në makinë dy persona. Në autobus kishte studentë nga 19 vende që kanë marrë pjesë në programin e këmbimit “Erasmus”.

Papa Françesku: Refugjatët po vuajnë si Krishti

Papa Françesku, gjatë ceremonisë të meshës të së dielës së palmave, i ka krahasuar vuajtjet e emigrantëve me ato që ka ndjerë Krishti në kryq.

“Jezusit iu mohua çdo e drejtë dhe e provoi në lëkurën e tij edhe indiferencën. Dhe më vijnë në mendje shumë të vobektë, shumë refugjatë dhe emigrantë për të cilët askush nuk dëshiron të marë përsipër përgjegjësinë për të ardhmen e tyre”, tha Papa në Sheshin e Shën Pjterit përpara mijëra besimtarëve.

Kapet në Belgjikë i dyshuari për sulmet në Paris

I dyshuari kryesor për lidhjet me sulmin terrorist në Paris më 13 nëntor të vitit të kaluar, është arrestuar në Belgjikë.

Sipas njoftimeve, Salah Abdeslam, u arrestua nga policia belge gjatë një bastisjeje të premten në rajonin Molenbeek në Bruksel.

Prefekti i Molenbeekut, Francois Schepmans, tha se Abdeslam dhe një person tjetër janë plagosur gjatë operacionit. Mediet raportojnë se Abdeslam është plagosur në këmbë.

Autoritetet belge gjetën gjurmët e gishtërinjve gjatë një bastisjeje në një apartament më herët gjatë javës në një lagje tjetër të Brukselit.

Abdeslem ishte personi më i kërkuar në një ndjekje të të dyshuarve dhe bashkëpunëtorëve të militantëve që kryen sulmet që lanë pas vetes 130 të vrarë në Paris katër muaj më parë.

Sulmet ishin përgatitur dhe bashkërenduar pjesërisht në Bruksel. Që nga mesi i nëntorit 11 veta janë arrestuar dhe akuzuar në Belgjikë në lidhje me vrasjet. Tetë prej tyre janë ende në burg.

Francë, pushohen 27 punonjës të shkollave për abuzim seksual të fëmijëve

PARIS – Ministrja franceze e Arsimit Najat Vallaud-Belkacem deklaroi se vitin e kaluar 27 anëtarë të stafit të shkollës në institucionet arsimore fillore dhe të mesme të vendit u pushuan nga puna për shkak të veprave penale që lidhen me pedofili.

Duke folur për Radion franceze RTL, Vallaud-Belkacem, tha se shumica e edukatorëve të pushuar nga puna ishin meshkuj. Ministrja franceze nuk ka saktësuar nëse bëhet fjalë për arsimtarët ose personelin administrativ, e as kur janë kryer veprat penale.

“Ne besojmë se një mësonjës, person i rritur apo punonjës administrativ nuk mund të punojë me fëmijët, nëse më herët ka qenë i akuzuar për një vepër të rëndë penale si pedofilia apo pornografia e fëmijëve”, ka thënë ministrja franceze Vallau-Belkacem.

Franca vitin e kaluar u trondit nga skandali i drejtorit të një shkolle i cili ishte dënuar për përdhunimin e disa nga studentët e tij. Ai u emërua drejtor pavarësisht një dënimi të mëparshëm për posedim të pornografisë së fëmijëve.

Identifikohet terroristi i dyshuar i vrarë në Bruksel

Bruksel, 15 mars 2016

Terroristi i dyshuar, i cili është vrarë gjatë një bastisjeje të policsë, të martën në Bruksel, është identifikuar si Mohammed Belkaid, shtetas i Algjerisë.

Ai është qëlluar për vdekje me snajper, derisa ka bërë përpjekje t’i ikë policisë nga dritarja e një apartamenti në lagjen Forest.

Disa policë janë plagosur gjatë bastisjes, ndërsa autoritetet janë ende në kërkim të dy të dyshuarve të tjerë, që kanë qenë në apartament.

Bastisja ka lidhje me hetimet që po bëhen për sulmet terroriste në Paris, të cilat kanë ndodhur nëntorin e kaluar dhe kanë lënë të vrarë 130 veta.

Grupi militant Shteti Islamik (IS) e ka marrë përgjegjësinë për këto sulme.

Sipas një zëdhënësi të prokurorëve belgë, një flamur i Shtetit Islamik është gjetur në apartamentin e bastisur të martën, së bashku me literaturë salafiste dhe municion.

Zëdhënsi ka thënë se Belkaid ka lindur në vitin 1980 dhe se në Belgjikë ka jetuar ilegalisht.

Policia franceze po ashtu ka marrë pjesë në operacionin e së martës në Bruksel.

Shpërthen në Berlin makina bombë, nuk përjashtohet sulmi terrorist

Voal – Një makinë bombë shpërtheu sot në Berlin, ku mbeti i vdekur drejtuesi i saj. Shpërthimi ka ndodhur në pikun e trafikut në Bismarckstrake, një nga rrugët kryesore në qendër të Berlinit. Ka ende pak të dhëna për ngjarjen, mediat flasin se mund të ketë qenë sulm terrorist.
Mediat në mbarë botën janë duke shkruar për një makinë që shpërtheu në ecje në mes të Berlinit, duke hedhur dyshime edhe për një sulm terrorist. Shoferi i atuomjetit që shpërtheu në rrugë, mbeti vdekur. Dyshohet se në makinë ishte vendosur një bombë që shkaktoi shpërthimin e mjetit në rrugë. Ky sulm mund të jetë edhe presion për Gjermaninë që mbylli rrugët e refugjatëve të luftës që kërkojnë të shkojnë në perendim, shkruajnë mediat e huaja.

Sipas telegraph.co.uk britanik, mendohet se shpërthimi lidhet edhe me krimin e organizuar, dmth mafien.

Sonda ExoMars fillon udhëtimin në Mars – do të zbulojë Alienët ?

 

Voal – Agjencia Evropiane e Hapësirës dhe ajo ruse, Roscosmos kanë bashkëpunuar për dërgimin e një anijeje hapësinore në Mars.

Sonda “ExoMars Trace Gas” u nis sot nga nga aerodromi Baikonur i Kazakistanit mbi një raketë Protoni. ExoMars pritet të arrijë në Planetin e Kuq në tetor, pas një udhëtimi prej 496 millionë kilometrash.

Agjencia Evropiane e Hapësirës tha se synimi i këtij misioni është të përcaktojë “në se në Mars ka jetë”. Sonda mendohet se mund të zgjidhë misterin e burimit të gazit metan në Mars.

Ky gaz, i përbërë nga karboni dhe hidrogjeni, krijohet kryesisht nga mikrobet e gjalla dhe ai prodhohet me shumicë në Tokë nëpër moçale, gropa me mbeturian dhe tek depozitat e lëndëve djegëse fosile.

Ka shumë evidenca të forta që në Mars ka jatë, dhe kur themi jetë, fjala është për  alienët, që pritet t’i zbulojë kur të arrijë, nëse gjithçka shkon si pritet më 19 Mars./ ZA, The Guardian

3 milionë emigrantë presin “dritën jeshile” për të kaluar detin Egje, ja si binden nga trafikantët

Rreth 3 milionë emigrantë që ndodhen në Turqi presin nga trafikantët të ndizet “drita jeshile” për të kaluar detin Egje dhe të arrijnë në Greqi.

Pavarsisht situatës e tashme në Greqi dhe në Idomeni, 3 milion emigrantë janë në pritje për të nisur udhëtimin e tyre me destinacion shtetet e Europës. Numri i sirianëve në turqi është 2.587.000 ndërsa bashkë me shtetasit nga Afganistani, Irani dhe Pakistani numri shkon në 3 milionë, raporton gazeta turke Hurriyet.

Sipas artikullit të gazetës turke, trafikantët u thonë emigrantëve se “Një ditë do të rrini në ishullin grek Hios, ose në Mitilini. Pastaj dy ditë në Athinë dhe që ajte do të niseni me tren në Gjërmani”. Sipas gazetës, emigrantët nuk kanë besim tek asnjë njeri, përveç trafikantit që i drejton ata dhe i ndihmon për të shkuar në Europë.

‘Super e diela’ gjermane, në test politika e kancelares Angele Merkel mbi refugjatët

Në tre rajone federale të Gjermanisë sot mbahen zgjedhjet parlamentare, rezultatet nga të cilat pritet të ndikojnë jo vetëm mbi politikën lokale, por edhe në atë në nivel federal

BERLIN – Në tre rajone federale të Gjermanisë sot mbahen zgjedhjet parlamentare, rezultatet nga të cilat pritet të ndikojnë jo vetëm mbi politikën lokale, por edhe në atë në nivel federal.

Rreth 13 milionë qytetarë do të votojnë në Baden-Wurttemberg, Rheinland-Pfalz dhe Sachsen-Anhalt.

Këto janë zgjedhjet e para të tilla në Gjermani që prej kur Evropa u përfshi nga kriza me refugjatët, të cilat në të njëjtën kohë paraqesin test për politikën e kancelares Angele Merkel mbi refugjatët.

Në fushatat parazgjedhore tema kryesore ka qenë politika e sigurisë dhe ajo e refugjatëve.

Politika e dyerve të hapura të cilën vitin e kaluar e promovonte Merkel ka shkaktuar reagime negative te shumë politikanë lokal, madje e njëjta ka qenë e kritikuar edhe nga pjesëtarë të partisë CDU, lider i së cilës është vet Merkel, mirëpo për këtë të fundit nuk flitet shumë në opinion.

Nga ana tjetër, partia e Unitetit Kristian Social (CSU) i është kundërvënë hapur politikës të cilën e zbaton Merkel, ndërkohë që disa kërcënuan se do ti drejtohen gjykatës Kushtetuese. aa

(video) Martin Schulz përjashtoi deputetin racist Eleftherios Synadinos nga mbledhje e Unionit Europian

Në mbledhjen e pardjeshme të Parlamentit Europian kryesuesi i saj gjerman Martin Schulz përjashtoi deputetin racist Eleftherios Synadinos nga mbledhje e Unionit.

Deputeti grek i partisë naziste “Agimi i Artë”, i shau turqit si racë barbare, duke thënë: “Siç kanë shkruar shkenctarët osmanë: Turqit janë barbarë në frymë, të mallkuar nga Zoti, mashtrues dhe të ndyrë. Turku është si qeni, i cili luan të egrin, mirëpo kur i duhet të luftojë me armikun ikë. E vetmja mënyrë për ta trajtuar turkun mbetet vendosmëria dhe grushti”.

Këtë deklaratë të nazistit Eleftherios Synadinos nuk e duruan kampet tjera të partive në europiane.

Gjë që çoi deri në vendimin e atypëratyshëm të kryesuesit, Martin Schulz duke përjashtuar ekstremistin grek me arsyetimin: “Vazhdimisht ka tendenca që këtu racizmi të bëhet i lejueshëm dhe salonik. Jo me mua. Jo këtu”, kështu vota kategorike e parlamentarit gjerman.

Po aq ashpër dhe me komente reaguan edhe mediat e sferës perëndimore, të cilët riaktualizuan dilemën e kamotshme karshi PE se pse lejon, legalizon pjesëmarrjen edhe të partive naziste brenda tij kur dihet se ato as që mund të prodhojnë retorikë tjetër.

“Kësaj çështjeje duhet t’i qaset PE sa më seriozisht”, reaguan mediat gjermane.

Ndërsa Ansa shkruan se deputeti grek u largua nga salla vetëm kur e larguan pasi nuk plotësoi për të katërtën herë kërkesën që të largohej nga aula e Parlamentit Europian.

Largimi i Eleftherios Synadinos nga salla u shoqërua me duartrokitje.

Arrestohet një gjerman te Ambasada Amerikane në Berlin; thoshte se ka bombë

Një gjerman 23 vjeçar po mbahet nën masën e arrestit, pasi rrejshëm ka deklaruar se ka me vete një bombë të vendosur në çantën e tij dhe se po përpiqej që ta çonte atë në Ambasadën Amerikane në Berlin, njoftoi sot policia.

Incidenti ndodhi rreth orës 7 të mëngjesit, në kohën kur djali u largua nga dera e Ambasadës, e cila ndodhet në qendër të qytetit, në afërsi të Portës së Brandenburgut.

Personeli i sigurisë i Ambasadës e kishte larguar të dyshuarin, ka njoftuar zëdhënësi i Policisë, Jens Berger.

Policia e ka identifikuar të riun si shtetas gjerman, por Ambasada Amerikane, përmes një deklarate, tha se i riu i është paraqitur personelit të sigurisë së Ambasadës me një pasaportë amerikane, duke thënë se dëshiron që ta zgjasë afatin e saj.

Më pas, ai e kishte grushtuar rojen, kur ky i fundit i kishte thënë se ai duhej të shkonte në një lokacion tjetër për ripërtritjen e pasaportës, njofton ambasada.

Në kohën kur ai po arrestohej nga policia, Berger tha se ai u kishte thënë atyre se kishte një bombë në çantën e tij, e cila ndodhej para hyrjes së ambasadës.

Sipas Berger, “ka shumë indikacione që ai mund të ketë probleme psiqike”, duke shtuar se hetimet janë duke vazhduar.

Refugjati nga Siria në kampin Calais: ‘Pyes veten çfarë Evrope qenka kjo’

“Nuk e kam menduar asnjëherë kështu Francën. Jetojmë brenda një mjerimi në të ftohtë dhe në baltë. Qëllimi im kryesor është të kaloj në Britani”, thotë turkmeni Muhammed nga Alepi

CALAIS – Vazhdon evakuimi dhe prishja e një pjese të kampit të refugjatëve në qytetin port francez Calais i cilësuar ndryshe si “xhungël”. Kampi ndodhet në qytetin francez Calais në afërsi të bregut të Detit La Mansh. Ky det ndodhet në rrugën kryesore të kalimit të refugjatëve drejt Britanisë së Madhe.

Ekipi i AA-së i cili ndodhet në Calais ka ndjekur procesin e evakuimit dhe të prishjes së pjesshme të kampit nga makineritë e punës të cilat punojnë nën sigurinë e policisë ku refugjatët e evakuuar nga pjesa jugore e kampit të cilët janë vendosur nëpër kontejnerë kanë theksuar se këtu nuk dëshirojnë të qëndrojnë për një kohë të gjatë.

Në pjesën jugore të kampit ku me vështirësi lëvizet për shkak të baltës, motit me shi dhe të ftohtit vërehet se sërish çadrat dhe tendat e ngritura nga organizatat humanitare britanike po ngarkohen në mjete nga punonjësit humanitar dhe refugjatët.

Turkmeni nga Halepi 59 vjeçari Muhammed thotë se në pjesën e kampit të evakuuar ka qëndruar për 5 vite.

Muhammed edhe pse shpreh se kontejnerët në krahasim me çadrat janë më të mirë thekson se asnjë refugjat nuk e ka ndërmend të qëndrojë në Francë.

“Nuk e kam menduar asnjëherë kështu Francën. Jetojmë brenda një mjerimi në të ftohtë dhe në baltë. Qëllimi im kryesor është të kaloj në Britani dhe të shpëtoj familjen time. E kam provuar 5 herë duke u fshehur në tuba por qentë e policisë na nuhatën dhe na gjetën”, thotë Muhammed dhe ka shtuar se brenda disa ditësh do ta provojë sërish shansin.

Muhammed i cili pasi është larguar nga Halepi dhe ka lënë familjen e tij në kampin në Liban ka shpjeguar se i vetëm ka vajtur në Izmir të Turqisë dhe më pas me gomonet e trafikantëve ka kaluar në Greqi.

Ai thotë se ende e sheh në ëndërr udhëtimin me gomone, Muhammed ato momente i përshkruan me fjalët: “Në mes të detit na mbaroi karburanti. Në një gomone me kapacitet prej 10 personash ndodheshim 50 persona. Në mendje më erdhën fëmijët dhe nëna. Mendova, nëse mbytemi a do ta gjejnë trupin. Por patëm fatin e mirë që një barkë greke na dha karburant dhe arritëm në breg”.

Kiev: Protestuesit e sulmuan Ambasadën e Rusisë

Pamje e aktivistëve që kanë protestuar para Ambasadës së Rusisë në Kiev të Ukrainës

Qindra protestues janë mbledhur dje afër Ambasadës së Rusisë në kryeqytetin Kiev për të kërkuar lirimin e pilotes urkainase, Nadia Savchenko.

Protestuesit kanë hedhur vezë dhe gurë ndaj ndërtesës, duke i thyer disa dritare, shkatërruar disa makina dhe e kanë djegur flamurin rus.

Oficerët policorë në vendin e ngjarjes nuk kanë intervenuar.

Një zëdhënës i ambasadës tha se ndërtesa ishte “sulmuar” gjatë natës dhe se njerëz me shkopinj të bejzbollit i kanë dëmtuar veturat e ambasadës dhe kanë hedhur bomba tymi në territorin e ambasadës.

Pitotja ukrainase, Nadia Savchenko, ishte arrestuar në Ukrainë në korrik të vitit 2014, dhe ishte dërguar në Rusi kundër vullnetit të saj për proces gjyqësor lidhur me vrasjen e dy gazetarëve rusë që raportonin për luftimet në pjesën lindore të Ukrainës.

Sllovakia mban zgjedhjet, nazistët hyjnë në Parlament

Janë zhvilluar zgjedhjet e përgjithshmë në Sllovaki dhe fituese është shpallur partia e majtë e drejtuar nga kryeministri Robert Fico. Smer ka fituar 28.4 përqind të votave, ose 49 vende në parlamentin 150 anëtarësh.

Parti e dytë është renditur “Liri dhe solidaritet” që ka siguruar 12.1% të votave, ose ndryshe 21 deputetë.

Por në Parlamentin sllovak ka hyrë edhe partia naziste “Sllovakia Jonë”. Ajo ka siguruar një numër të konsiderueshëm votash, 8%, ose 14 deputetë. Kjo parti e konsideron NATO-n si organizatë terroriste dhe sulmon vazhdimisht Bashkimin Europian.

Sllovakia ndodhet në qendër të Europës dhe është pjesë e NATO-s, BE-së dhe zonës Shengen. Ajo së bashku me 4 shtete të tjera të BE-së, nuk e ka njohur ende pavarësinë e Kosovës.

Papa Françesku: Mëkati të qërron, tundimet të verbojnë shpirtin

Papa rrëfehet në Shën Pjetër – ANSA

Sot mbasdite, Papa kryesoi, në Bazilikën e Vatikanit, kremtimin pendestar kushtuar nismës “24 orë për Zotin”. Nisma për zbulimin e Sakramentit të Pajtimit gjatë Kreshmëve, u ndoq nga mbarë bota. Papa u rrëfye vetë i pari e, më pas, rrëfeu edhe disa besimtarë. Me këtë rast, shumë kisha ishin të hapura pa asnjë ndërprerje, për t’u kujtuar besimtarëve mundësinë e rrëfimit.“Ma kthe, o Zot, dritën e syve!” (MK 10.51) – ky, lajtmotivi i homelisë që mbajti Papa gjatë kremtimit pendestar, duke pasur parasysh figurën ungjillore të Bartimeut të verbër, të cilit Krishti ia ktheu dritën e syve.  E kjo edhe kërkesa, që duam t’i drejtojmë Zotit, shtoi Papa, ne, njerëz me sy e pa sy. Të shikojmë përsëri, pasi mëkatet tona na bëjnë të mos e shikojmë të mirën e na shkëpusin nga bukuria e thirrjes sonë, duke na shtyrë të ravgojmë larg cakut.

Papa shpjegoi kuptimin simbolik të këtij fragmenti ungjillor, me që secili nga ne ndodhet pak a shumë në gjendjen e Bartimeut. Atë e kishte verbuar sëmundja, ne, mëkati, që të varfëron e të izolon më keq se vetë verbëria. Është verbëria e shpirtit, e cila të pengon të shikosh themeloren e t’ia ngulësh sytë dashurisë, që jep jetë. Sa tundime t’i errësojnë sytë e zemrës e ta bëjnë miope. E sa e gabuar është të mendosh se jeta varet nga gjërat që ke, nga suksesi, admirimi; se ekonomia varet vetëm nga fitimi e konsumi, se dëshirat vetjake duhet të kenë epërsi mbi përgjegjësitë shoqërore. Duke parë vetëm veten, bëhemi të verbër, mbyllemi në vete, humbasim gëzimin  e harrojmë ç’është liria e vërtetë, tha Papa Françesku.

Ta ndjekim Zotin  si dishepuj besnikë, për t’i bërë të gjithë ata, të cilët i takojmë, pjesëtarë të gëzimit të Tij e të dashurisë së Tij.

Nisma “24 orë për Zotin” në Romë, u kryesua nga vetë Papa, i cili, që në edicionin e parë, deshi  të rrëfehej vetë i pari, si dëshni për gjithë të tjerët. E pastaj edhe të rrëfente disa besimtarë. Sivjet, edhe një nismë e re romake, që duhet pasur parasysh: shumë besimtarë laikë dolën rrugëve për t’i ftuar pendestarët, por edhe njerëzit që kalonin andej pari rastësisht e që ishin të interesuar për këtë kremtim Pajtimi me Zotin. Shenjë, kjo, e thjeshtësisë, e guximit dhe e besimit në propozimin e Sakramentit të Pajtimit, me të cilin shumëkush rifillon rrugën drejt Zotit.

Politikani gjerman jep dorëheqje pasi iu zbulua një sasi droge

Gazeta “Bild” thekson se Beck ka dhënë dorëheqje pasi tek ai është gjetur droga

Politikani i njohur gjerman i Partisë së Gjelbër dhe përfaqësues shumëvjeçarë në Bundestag, Volker Beck, është tërhequr nga të gjitha funksionet politike në Parlament pasi tek ai është gjetur drogë, metamfetamin.

Gazeta “Bild” thekson se Beck ka dhënë dorëheqje pasi tek ai është gjetur droga. “Mund të them vetëm se gjithmonë jam përpjekur për një politikë liberale ndaj drogave. Për akuzat kundër meje avokati im do të prononcohet në kohën e duhur”, theksoi Beck në njoftimin e shkurtër në faqen e tij të internetit.

Politikanin gjerman, siç pretendohet, të martën mbrëma në Berlin e ka ndaluar policia, ku tek ai gjetën 0.6 gramë drogë metamfetamin.

Pasaporta gjermane më e forta në botë – ja renditja

Të kesh pasaportë gjermane, ke privilegjin të shkosh në 177 vende nëpër botë pa pasur nevojë të marrësh vizë. Ndërsa me atë të Kosovës mund të shkosh në 38 vende pa pasur nevojë për vizë.

Me pasaportën e Shqipërisë, ai që e ka mund të udhëtojë pa vizë në 98 shtete. Shqipëria renditet e 53-ta për këtë mundësi.

Sipas “Henley and Partners” rezulton se gjermanët kanë pasaportën më të fuqishme në botë. Ata që e kanë këtë dokument mund të udhëtojnë pa viza në 177 shtete nga 218 të mundshme. Në vendin e dytë renditet pasaporta suedeze, me një vend më pak, ndërsa me 175 vende të lejuara pa pasur nevojën e një vize, vendin e tretë e ndajnë Finlanda, Franca, Italia, Spanja dhe Britania.

Mbajtësit e pasaportës amerikane mund të lëvizin në 174 shtete, njësoj si ata me pasaportë të Belgjikës, Danimarkës dhe Holandës.

Ndër vendet e rajonit, më së miri renditet Serbia, e 43-ta, e cila ndiqet nga Maqedonia e 45-ta, Mali i Zi i 47-ti, kurse BeH është e 52-ta.

Renditja e bërë nga firma e konsultimeve globale “Henley and Partners”, e cila është e specializuar në planifikimet e çështjeve rezidenciale dhe të shtetësisë, mbyllet me Afganistanit, shtetasit e të cilit mund të lëvizin lirshëm vetëm në 25 shtete në botë.

Renditja, vendi, udhëtimi pa viza:

  • 1. Gjermania, 177
  • 2. Suedia, 176
  • 3. Finlanda, Franca, Italia, Spanja, Britania, 175
  • 4. Belgjika, Danimarka, Hollanda, SHBA 174
  • 5. Austria, Japonia, Singapori, 173
  • 6. Kanadaja, Irlanda (Republic of), Korea (Republic of, South), Luksemburgu, Norvegjia, Portugalia, Zvicra, 172
  • 7. Greqia, Zelanda, 171
  • 8. Australia, 169
  • 9. Malta, 168
  • 10. Hungaria, Czech Republic, Islanda, 167

Alarm në aeroportin e Gjermanisë, anulohen të gjitha fluturimet

Një alarm sigurie është dhënë në aeroportin ndërkombëtar të Këlnit në Gjermani. Autoritetet kanë udhëzuar pasagjerët që të anulojnë fluturimet për shkak të një alarmi sigurie.

Nuk dihen ende detaje të sakta rreth kësaj ngjarje, ndërkohë që një helikopter policie po patrullon mbi aeroport. Autoritetet mbyllën terminalin A dhe B të aeroportit dhe më pas nisën kontrollet. Këto terminale u hapën sërish më vonë, megjithatë disa fluturime u shtynë e të tjera u anuluan. Nuk ka një deklaratë zyrtare se çfarë ka ndodhur.

Cameron: Referendumi britanik për BE-në organizohet më 23 qeshor

David Cameron në fund të takimit të mbrëmshëm me liderët e BE-së në Bruksel

Kryeministri i Britanisë, David Cameron, tha sot se referendumi historik për anëtarësinë e Britanisë në Bashkimin Evropian, do të organizohet më 23 qershor të këtij viti. Kjo deklaratë u bë vetëm një ditë pas përfundimit të një samiti me liderët e BE-së për reforma në Bruksel.

Zoti Cameron tha se votimi “do të jetë njëri nga vendimet më të mëdha që ky vend do të ballafaqohet gjatë jetës sonë”.

Pas një takimi të sotëm të qeverisë britanike, u miratua qëndrimi me të cilin rekomandohet që Britania të mbetet në Bashkimin Evropian të reformuar.

David Cameron tha se Britania do të jetë më e sigurt dhe e fuqishme brenda BE-së së reformuar.

Pas dy ditëve të negociatave të gjata e intensive, mbrëmë vonë Cameron e ka arritur marrëveshjen me liderët e BE-së për parandalimin e daljes së Britanisë nga Bashkimi Evropian, duke e fuqizuar një “status special” për vete.

Por, fati i Britanisë në BE do të përcaktohet në referendum.

Arrihet marrëveshja mes Britanisë dhe BE-së

Në Samitin e Liderëve të BE-së që ka përfunduar diskutimi kryesor ka qenë për reformat e Unionit që kishte kërkuar Britania për qëndrimin e saj në BE, ku si pasojë e diskutimeve të gjata negociatat rezultuan me marrëveshje

BRUKSEL – Presidenti i Këshillit Evropian, Donald Tusk, ka njoftuar se kanë arritur një marrëveshje e cila forcon “statusin e veçantë” të Britanisë.

Theksohet se në Samitin e Liderëve të BE-së që ka përfunduar diskutimi kryesor ka qenë për reformat e Unionit që kishte kërkuar Britania për qëndrimin e saj në BE, ku si pasojë e diskutimeve të gjata negociatat rezultuan me marrëveshje.

Presidenti i Këshillit Evropian, Donald Tusk, në një fjalim në fund të Samitit tha se marrëveshja e arritur nuk trondit vlerat e BE-së dhe gjithashtu plotëson shqetësimet e Britanisë së Madhe. Tusk ndër të tjera ka transmetuar se marrëveshja është arritur me miratimin e 28 anëtarëve dhe se kjo marrëveshje forcon “statusin e veçantë” dhe është ligjërisht e detyrueshme. Ai ka vënë në dukje se ata kanë diskutuar deri në detajin më të vogël.

“Besoj thellësisht se Britania për BE-në dhe BE-ja për Britaninë kanë nevojë për njëra-tjetrën. Thyerja e kësaj lidhjeje do të jetë plotësisht në kundërshtim me interesat tona të përbashkëta. Tani rradhën për të vendosur e ka populli britanik”- u shpreh Tusk.

Duke iu referuar shprehjes së fjalimit të Kryeministri britanik Cameron “Nuk e dua Brukselin, dua Britaninë”, Tusk fjalimin tij e përfundoi me shprehjen “E dua Brukselin, e dua Britaninë”.

Ndërsa Presidenti i Komisionit Evropian, Jean-Claude Juncker fjalimin tij e ka nisur me shprehjen “E dua Brukselin më shumë se pjesët e tjera të Europës”. Ai duke vënë në dukje se sot kanë ardhur në fundin e një udhëtimi të gjatë u shpreh: “Kjo marrëveshje e arritur është një marrëveshje e drejtë. Një marrëveshje e drejtë për Britaninë, për vendet e tjera anëtare dhe për BE-në. Marrëveshja në njëjtën kohë i përgjigjet shqetësimeve të Britanisë dhe në të njëjtën kohë respekton edhe principet e themelore të bashkimit tonë. Marrëveshja nuk thellon krizat në bashkimin tonë, përkundrazi ndërton ura. Që të gjithë kanë treguar besim të mirë dhe fleksibilitet”.

Italia shënon natalitetin e saj më të ulët në histori

Ilustrim

Në vitin 2015, në Itali kanë lindur më pak foshnja se kurrë, prejse është themeluar shteti modern 154 vjet më parë.

Të dhënat e fundit po asht tregojnë se popullsia është tkurrur për herë të parë në tri dekada, ndërsa numri i vdekjeve është rritur më shumë se 9 përqind.

“Me rënien e ekonomisë, rënia e produktivitetit ka prekur gjithnjë e më shumë prindërit eventualë”, ka thënë zyra e statistikave kombëtare ISTAT.

Italia ka dalë nga recesioni vitin e kaluar, por normat e rritjes mbeten të dobëta dhe papunësia e lartë.

Numri i lindjeve ka rënë në 488,000 në vitin 2015 – 3 përqind më pak se në vitin paraprak.

Shpërthim i fuqishëm godet Asociacionin kulturor turk në Stokholm

Shpërthimi ndodhi në të njejtën ditë me sulmin terrorist mbi automjetet ushtarake në Ankara

BRUKSEL – Media lokale suedeze informojnë se një shpërthim i fuqishëm ka goditur Asociacionin kulturor turk në Stokholm.

E përditshmja suedeze Aftonbladet shkruan se të gjitha dritaret e ndërtesës ishin thyer.

Lidhur me shpërthimin policia ishte njoftuar në ora 21:35 minuta sipas kohës lokale, ndërkohë që në vendin e ngjarjes kishin shkuar disa vetura të ndihmës së shpejtë dhe ekipe zjarrfikësish.

Nuk janë raportuar dëmtime në njerëz, ndërkohë policia po heton shpërthimin. aa

Cameroni në Bruksel për bisedime lidhur me reformat në BE

Kryeministri i Britanisë, David Cameron, sot në Bruksel do të bisedojë me zyrtarët e lartë të Parlamentit Evropian dhe me presidentin e Komisionit Evropian, Jean-Claude Juncker, duke shpresuar se do të fitojë mbështetje për kërkesën e tij për reforma të Bashkimit Evropian.

Zoti Cameron ka thënë se reformat do t’i mundësonin atij që të bënte fushatë në Britani për mbetjen e vendit të tij në BE, para referendumit i cili pritet të organizohet në fund të vitit 2017.

Presidenti i Bashkimit Evropian, Donald Tusk, dje ka tërhequr vërejtjen se rreziku i shkatërrimit të bllokut prej 28 shteteve, “është real”.

Zoti Tusk tha se samiti i ardhshëm i BE-së, që fillon pasnesër do t’i trajtojë “dy sfidat në të mëdha për të ardhmen e BE-së: mbetjen e Britanisë në BE dhe krizën e migrimit”.

Një avion detyrohet të kthehet në Heathrow pas incidentit me lazer

Avioni me 267 pasagjerë pa problem zbriti në Heathrow, ndërsa pasagjerët janë vendosur në hotel dhe për në New York do të duhet të nisen me fluturim të ri sot pasdite

LONDËR – Një avion pasagjerësh i kompanisë Virgin Atlantic për shkak të incidentit me lazer u detyrua të kthehej në aeroportin londinez Heathrow, menjëherë pas ngritjes për në New York.

BBC-ja raporton se ekuipazhi i avionit me rastin e fluturimit të mbrëmshëm mbi brigjet perëndimore irlandeze lajmëroi kullën e kontrollit se njëri nga anëtarët e ekuipazhit nuk ndjehet mirë pasi vërejti një dritë lazeri në avion dhe më pas avioni u kthye në aeroportin në Londër.

Jens Stoltenberg: Rusia po destabilizon Evropën

Sekretari i përgjithshëm i NATO-s, Jens Stoltenberg, ka thënë se Rusia është duke destabilizuar Evropën dhe se retorika e Moskës për fuqinë e saj bërthamore ka për qëllim të frikësojë fqinjët e saj.

Duke folur në Konferencën e Sigurisë në Mynih, Stoltenberg ka thënë se NATO nuk do “konfrontim me Rusinë” apo Luftë të Ftohtë të re, porse përgjigjja duhet të jetë e fuqishme.

Ai ka thënë se vendimi i NATO-s për të forcuar mbrojtjen në krahun e saj lindor nuk synon të nisë luftë, por të parandalojë luftë.

Stoltenberg po ashtu ka thënë se deklaratat e Moskës për fuqinë e saj bërthamore janë shqetësuese.

Ai ka thënë se askush nuk duhet të mendojë se armatimi bërthamor mund të përdoret në një luftë konvencionale.

Rusia ka pushtuar dhe ka marrë kontrollin e Krimesë nga Ukraina në vitin 2014.

Ajo po ashtu vazhdon t’iu japë mbështetje separatistëve pro-rusë në lindje të Ukrainës.

Ish roja i Aushvicit del para drejtësisë

Në Gjermani një ish-roje 94-vjeçar i kampit më famëkeq të përqëndrimit në Evropë doli përpara gjyqit, ku ai përballet me akuza për vrasje.

Reinhold Hanning tha se ka shërbyer në kampin e Aushvicit si SS 20 vjeçar, por këmbëngul se ai ka shërbyer në një pjesë të kampit ku ka ka patur shfarosje me gaz.

Auschwitz është kampi famëkeq, ku u bë shfarosja me gaz e shumicës së hebrenjve, romëve, polakëve, homoseksualëve dhe të burgosurve të tjerë në kampet e përqendrimit. Më shumë se një milion njerëz besohet të jenë vrarë në Aushvic gjatë Luftës së Dytë Botërore.

Ministër i Jashtëm i Francës u emërua Ayrault

Jean-Marc Ayrault Derisa ishte kryeministër i Francës

Presidenti i Francës, Francosi Hollande, e ka emëruar ish-kryeministrin, Jean-Marc Ayrault, për ministër të jashtëm, pasi ky post mbeti i zbrazët me largimin e ministrit të deritashëm, Laurent Fabius, i cili është zgjedhur shef i Këshillit Kushtetues të Francës.

Ky zëvendësim u bë në kuadër të ndryshimeve në qeveri nga ana e presidentit, Francois Hollande.

Postet e tjera kryesore qeveritare kanë mbetur të pandryshuara, përfshirë ministrin e mbrojtjes, Jean-Yves Le Drian, atë të financave, Michel Sapin, dhe minsitrin e ekonomisë, Emmanuel Macron.

Ministri i ri i jashtëm, Jean-Marc Ayrault, 66 vjeçar, ishte kryeminsitër i Francës në periudhën 2012 – 2014.