Ishte viti 1979, viti kur Çmimi prestigjoz Nobel për Paqë iu dorëzua në Oslo të Norvegjisë, Nënë Terezës, sot Shën Nënë Tereza – e para dhe e vetmja figurë shqiptare në histori me një Çmim Nobel për paqë, një njohje botërore dhe shpërblim për veprat dhe veprimtarinë e saj jetësore, për paqë në botë dhe për kujdesin ndaj më të varfërve.
Për paqë në botë dhe për paqë e pajtim, edhe “për popullin tem Shqiptar”. “Që paqja e Zotit të vijë në zemrat tona, në të gjitha familjet tona”, është shprehur Shenjtja Nenë Tereza ndërsa po dilte nga manifestimi solemn i pranimit të Çmimit Nobel për Paqë, 45 vjetë më parë (1979). Pasi iu dorëzua Çmimi Nobel, në një foto portret të saj, Nënë Tereza ka shkruar këto fjalë: “Unë gjithmonë e kam në zemër popullin tem Shqiptar. Shumë luti Zotin që paqja e Tij të vij në zemrat tona, në gjitha familjet tona, në gjithë botën”, sipas biografit të njohur të jetës dhe veprimtarisë së Nenë Terezës, Dom Lush Gjergji.
Po e kujtoj këtë 45-vjetor të dhënjes së Çmimit Nobel Për Paqë, sidomos fjalët e Nenë Terezës për paqë “në familjet tona”, drejtuar shqiptarëve në atë kohë, si një rast reflektimi sot, pasi bota shqiptare ka aq shumë nevojë sot për paqë, për paqë me njëri tjetrin. “Familja shqiptare” nuk ka sot paqë, paqë me veten e paqë me të tjerët. Unë nuk besoj që shoqëria shqiptare në përgjithsi dhe politika shqiptare në veçanti, të ketë qenë ndonjëherë — në këto pothuaj 35-vite tranzicion të ashtuquajtur “post-komunist” — më konfliktuale, më e acaruar dhe me mungesë respekti e dashurie për njëri tjetrin, se ç’është sot. Thirrjen e Nenë Terezës për paqë e pajtim 45-vite më parë– po e kujtoj dhe si një pjestar i komunitetit shqiptaro-amerikan — prej më shumë se gjysëm shekulli në Amerikë – modestësisht – duke shfaqur nevojën për reflektim në këtë përvjetor, për gjëndjen e krijuar plot konflikte e në çdo nivel, por edhe mungesës së diskursit normal publik me njëri tjetrin, jo vetëm në Shqipëri, por edhe në diasporën e shpërndarë anë e mbanë botës edhe në mbarë trojet shqiptare, sikur bota shqiptare është në luftë me vet-eveten. Sidomos, diskursi politik, jo vetëm që është keqësuar, por duket se ka vdekur vitet e fundit.
Po përdori rastin e 45-vjetorit të dhënjes së Çmimit Nobel për Paqë Nenë Terezes dhe thirrjes së saj për paqë, dashuri, e pajtim ndër shqiptarët – duke i kujtuar lexuesit se në të vërtetë ishte mrekullia e Nenë Terezës, ajo që 14-vite më parë, për herë të parë, këto tre dekada, që bashkoi politikën shqiptare në një ceremoni të shkurtër në Tiranë në kujtim të lumturimit të saj. Ishte viti 2010 kur është inauguruar e ashtuquajtuara “Rrugë e Paqës”, në Tiranë, simbol i nderimit për Nenë Terezën me rastin e 7-vjetorit të lumturimit të saj – e njohur si, “Rruga e Milleniumit të Paqës”, në hyrje të Liqenit Artificial në kryeqytetin shqiptar.
Me atë rast, afër 30-udhëheqës botërorë i janë përgjigjur thirrjes së Presidentit të atëherëshëm të Shqipërisë, Z. Bamir Topi që të merrnin pjesë në ceremoninë e inaugurimit të Rrugës së Paqës në Tiranë. Një numër i madh liderësh botërorë iu përgjigjën thirrjes së Presidentit shqiptar. Por gjëja më e rëndësishme ishte pjesëmarrja në atë ceremoni e të gjithë përfaqësuesve politikë shqiptarë të asaj kohe, por dhe sot, përfshir ish-Presidentin Topi, ish-Kryeministrin Sali Berisha dhe ish-Kryetarin e Bashkisë Tiranë, njëherësh edhe kryetar i Partisë Socialiste, sot Kryeministër Edi Rama. Për ata që e mbajnë mend, ishte një ecje e lirë e të gjithë liderve politikë shqiptarë së bashku me qytetarë të Tiranës në rrugën që besoj edhe sot mban emrin “Rruga e Milleniumit për Paqën”. Një foto historike kjo që ndoshta ia vlen të nxirret nga arkivat si një simbol paqeje e bashkimi, për të parë – sidomos në rrethanat e sotme të konflikteve aktuale politike në Shqipëri — se çfarë është e mundur, me vullnet të mirë: bashkimi simbolik i politikës shqiptare për një rast me rëndësi për të gjithë — megjithse merita e bashkimit të tyre qoftë edhe për një kohë të shkurtër, ishte meritë e kujtimit të Nenë Terezës.
Siç dihet, “Rruga e Milleniumit për Paqën”, kushtuar Nenë Terezës, është ndër rrugët më të veçanta në kryeqytetin shqiptar, sepse aty gjënden të vendosura në rrugë pllaka me nënshkrime të nja 28 udhëheqësve botërorë kushtuar paqës – duke nderuar, në këtë mënyrë, jetën dhe veprimtarinë e Shënjtores shqiptare, Nenë Terezës, por edhe shqiptarët, në përgjithësi. Ishte një gjest simbolik, por shumë domethënës. Në të vërtetë, ishte në ceremoni natyrale, spontane, asgjë e jashtzakonshme, në nderim të Nënë Terezës, për në një botë normale, ku udhëheqsit politikë të një vendi, pa marrë parsysh ndryhimet politike mdis tyre – kanë gjëra dhe kauza të përbashkëta që mund dhe duhej t’i bashkonin.
Në këtë mënyrë, ky ishte një mesazh simbolik që iu është dhënë edhe qytetarëve shqiptarë në përvjetorin e shtatë të Lumturimit të Nënë Terezës, 14 vjetë më parë. Ishte një rast me të vertetë i bukur dhe i mirëseardhur, megjithse i jashtzakonshëm dhe ndoshta i papritur kur të merren parasysh konfliktet dhe antagonizmat politike midis politikanëve deri në ditët e sotme, midis pozitës dhe opozitës në Shqipëri. Por, megjithkëtë ishte një ditë e bukur, një fotografi simbolike që i mungon shumë sot jetës politike shqiptare. Ishtë një fotografi e politikanëve kryesorë të Shqipërisë, duke i shtërnguar dorën njëri tjetrit, një akt që i pelqen syrit dhe disi qetëson edhe zemrat e shqiptarëve kur shohin politikanët e tyre të merren vesh me njëri tjetrin. Për fat të keq, në këndvështrimin e sotëm të zhvillimeve politike në Shqipëri, por edhe kudo tjetër midis shqiptarëve, paqa për të cilën kishte bërë thirrje Nenë Tereza 45 vite më parë në Oslo, “në të gjitha familjet tona” — pikërisht aty ku e donte Nënë Tereza paqën, midis shqiptarëve, në familjet tona — është vështirë të identifikohet ose të dallohet paqa si e tillë sot në jetën publike dhe politike në marrëdhëniet midis shqiptarëve në nivele të ndryshme. “Rruga e Milleniumit për Paqën” ndoshta e mban gjithnjë emrin dhe na kujton thirrjen për paqë midis nesh të Nenë Terezës, por në jetën e përditshme, të gjithë e dijmë se, kryesisht, nuk ka paqë as dashuri midis njëri tjetrit, ndërkohë që në sallat e qeverisë e të shtetit – aty ku do duhej të ushtrohej respekti dhe paqa midis shqiptarëve për hir të shqiptarëve – aty mbetëron vetëm konflikti, urrejtja dhe mos respekti për njëri tjetrin, e nganjëherë edhe dhuna.
Në fjalimin e tij me rastin e emërimit, “Rruga e Milleniumit për Paqën”, në Tiranë, kushtuar Nenë Terezës, në vitin 2010, Presidenti i atëhershëm Bamir Topi ka folur për modelin e paqës së Nenë Terezes, për një paqe që ndërtohet e kultivohet çdo ditë e çdo kund dhe nga cdo kush. Në një referencë drejtuar klasës politike shqiptare në atë kohë, Presidenti Topi ka thekësuar me atë rast, paqën shoqërore, që sipas tij, është një “detyrë themelore e një shteti demokratik…e që duhet të jetë gjithashtu objektiv parësor i politikës, si fuqi lëndore e demokracisë. Për t’a ruajtur e për ta persosur atë metej, në perputhje me standardet evropiane, duhet angazhim i thellë i të gjithëve”, ka theksuar ish-presidenti Topi, duke nënvijuar “bashkpunimin, bashkjetesën, e tolerancën”, si, “forca morale e kulturore, në dispozicion të së sotmes dhe të ardhmes… në shërbim ndaj demokracisë dhe shtetit.”
Për fatin e keq, ai rast fotografik paqeje më 2010 midis udhëheqsve më të lartë politikë të shqiptarëve, në vend që të kishte simbolizuar një fillim të ri të zhvillimeve paqësore në Shqipëri, konfrontimet politike kanë ardhur duke u shtuar dhe vazhdojne gjithnjë edhe sot, madje janë edhe më të thekësuara se kurrë më parë. Kriza politike nepër të cilën po kalon Shqipëria dhe Kombi shqiptar është një
krizë e madhe morale – një trashëgimi e gjysëm shekulli komunizëm – me besimin se kundërshtari politik është armik dhe si i tillë duhet të zhduket me çdo kusht.
Në ketë periudhë kritike për Kombin shqiptar, vazhdimi i një sistemi të polarizuar politik, jasht kontrolli, dhe dështimi i klasës politike për t’u marrë seriozisht, me problemet madhore të vendit e të Kombit — në të gjithë botën shqiptare pa përjashtim — do të ketë pasoja tragjike afatgjatë për të gjithë shqiptarët. Abraham Lincolni citohet të ketë thenë se, “Një shtëpi e ndarë dhe e perçarë kundër vetvetes nuk mund të qendrojë në këmbë pa u shembur”.
Thuhet se “politika është arti i kompromisit”. Prandaj të ulurit në tryezë me ata që kanë pikepamje të ndryshme për të biseduar, me qellim të mirë dhe në paqe për zgjidhjen e problemeve të përbashkëta, nuk duhet të shikohet si një dobësi, si diçka që nuk është burrënore. Nuk është burrëri as nuk janë burrshtetas ata që interesat partiake e personale i venë mbi përparimin dhe interesat e Kombit, ndërkohë që konfliktin e vendosin mbi kompromisin, në kurriz të paqës në shoqëri dhe në familjen e madhe të shqiptarëve.
U kërkoj falje atyre që këto fjalë mund t’i shikojnë si një predikim apo një pontifikim moral. Por shumë politikanë shqiptarë konsiderojnë se pozita politike që kanë tani është e drejtë e tyre dhe askujt tjetër dhe nuk e shikojne atë –për atë që në të vërtetë është — një përgjegjësi e privilegj qe ua ka besuar atyre, përkohësisht, votuesi shqiptar. Në të njëjtën kohë, edhe elektorati duhet të jetë më i përgjegjëshëm e të perkrahë kandidatë/e për poste politike ata të cilët flasin me respekt e dinjitet për kundërshtarët e tyre politikë dhe qnedrimet e tyre dhe të cilët kanë parasysh, mbi të gjitha, interesin e vendit e të Kombit. Thomas Jeffersoni do tu bënte thirrje udhëheqsve politikë shqiptarë të gjitha ngjyrave, “Ejani e na ndihmoni me talentet tuaja si edhe me peshën e karakterit tuaj, të punojmë së bashku, drejtë vendosjes së demokracisë.” Kombi shqiptar gjendet para një kthese historike dhe është një detyrë urgjente morale dhe kombëtare e këtij brezi politikanësh që t’i japin rrugën e duhur, “Rrugën e Paqës”, fatit të shqiptarizmit dhe shpresës për pranvera të reja për Kombin shqiptar, ashtuqë që shqiptarët të gjejnë sigurinë, paqën dhe rehatinë e vet, në vendin e vet, me bashkombasit e vet.
Momente të tilla si përurimi i “Rrugës së Milleniumit Për Paqën”, në nder të Nenë Terezës në Tiranë në 2010 — një ngjarje kjo që bashkoi klasën politike shqiptare të asaj kohe — do të bënin që të huajt, sidomos miqtë e Kombit shqiptarë të thonin sot — ah sa burra të mirë qenkan këta shqiptarët, kur bashkohen për të mirën e përbashkët. Për fat të keq, duke marrë parasysh zhvillimet aktuale politike dhe shoqërore në marrëdhëniet e politikanëve shqiptarë, me njëri tjetrin, kam drojë se nuk gjëndet kush të pohojë sot një gjë të tillë – pasi duket se është harruar mesazhi i Nenë Terezës i 45-viteve më parë në Oslo të Norvegjisë: Paqë në familjet tona, si parakusht i paqës dhe bashkimit në familjen e madhe shqiptare të përhapur anë e mbanë botës.
Nga Frank Shkreli
Pasi iu dorëzua Çmimi Nobel, në një foto portret të saj, Nënë Tereza ka shkruar këto fjalë: “Unë gjithmonë e kam në zemër popullin tem Shqiptar. Shumë luti Zotin që paqja e Tij të vij në zemrat tona, në gjitha familjet tona, në gjithë botën”, pohon biografi i njohur i jetës dhe veprimtarisë së Nenë Terezës, Dom Lush Gjergji.
“Një shtëpi e ndarë dhe e perçarë kundër vetvetes nuk mund të qendrojë në këmbë, pa u shembur”.
“Nëqoftse nuk kemi paqe, kjo ndodh sepse kemi harruar se i përkasim njëri tjetrit”.
Presidenti i Shteteve të Bashkuara, Ronald Reagan duke i dorëzuar Nenë Terezës Medaljen Presidenciale të Lirisë (1985), dekorata më e lartë që jep Presidenti i Shteteve të Bashkuara.
Perle e vertete. Kallamata eshte nje nga penat me te pelqyera dhe inteligjente te gazetarise se mirefillte shqiptare.
Ju lumte VOAL qe e sillni per lexuesin shqiptar
Beni Uroj te jesh mire Ne nuk ikem na perzuri llymi se nuk ishim llym as te paafte ikem se nuk duronim llymin ikem jo se nuk donim atdheun por se na mungonte liria Ajo ishte bere prone e llymit Te flisje ishe armik te prekje llymin shkoje ne burg te digjnin makinen te hapnin dosje si dikur kekronin te gjenin dicka ndryshe nga te tjeret per te versulur masen kunder teje ndersa llymi kenaqej me rrumpallen e mbjelle Je shume te drejte kur thua Mos i fut hundet ne punet e mia Atdheun e duam ndoshta Me shume se ata qe jane atje por nuk duam llymin qe per 25 vjet Me radhe nuk e lejon ujin te kullohet Sa shume balte bloze dhe llym ne ate vend
Beni Uroj te jesh mire Ne nuk ikem na perzuri llymi se nuk ishim llym as te paafte ikem se nuk duronim llymin ikem jo se nuk donim atdheun por se na mungonte liria Ajo ishte bere prone e llymit Te flisje ishe armik te prekje llymin shkoje ne burg te digjnin makinen te hapnin dosje si dikur kekronin te gjenin dicka ndryshe nga te tjeret per te versulur masen kunder teje ndersa llymi kenaqej me rrumpallen e mbjelle Je shume te drejte kur thua Mos i fut hundet ne punet e mia Atdheun e duam ndoshta Me shume se ata qe jane atje por nuk duam llymin qe per 25 vjet Me radhe nuk e lejon ujin te kullohet Sa shume balte bloze dhe llym ne ate vend
Kryevepër…..!
Kjo nuk eshte vetem pergjigja e juaj por dhe e jona ndaj llumit qe mbyt ate vend, eshte zeri i Shqiperise se emigruar.
Kam te njejtin mendim meju
Panorame e vertete e politikes shqiptare, qe per fat te keq vazhdon e mbas 27-vite demokraci,,,politikane te korruptuar me pasuri marramendese ne parlamentin shqiptar , qe vazhdojne te zgjidhen , gjoja nga populli, gjyqtare, njerez pa moral..qe vazhdojne te pasurohen …populli vazhdon te vegjetoje , mijra te rinj me endrra te coptuara largohen cdo dite, per nje jete me te mire…deri kur do vazhdoje keshtu…
Nuk gjej fjale per ta komplimentuar autorin e ketij shkrimi… por dua ta falenderoj se me ka perfaqesuar edhe mua edhe shume njerez qe une kam rreth dhe qe fatkeqesisht ndjejme se si po na “thith llumi” dhe po na asfikson, sepse akoma nuk e kemi ndare mendjen te ikim… vetem se femijeve tane u them ikni ikni ikni dhe mos e ktheni koken mbrapa…. Ky vend nuk behet… llumi eshte ngritur aq lart sa nuk ikem me.
nje realitet i hidhur por me se i vertete . ju uroj shendet !
por diçka duhet bere , se nuk mjafton vetem fjala!
Urime! Shkrim i vertete! Shkrim qe sjell shpresen prane se gazetaria e mirefillte ekziston
Prsh. Pena jote eshte e shkelqyer more Arben, por si tja bejme ne qe mbetem ketu bashke me femijet….? Ju qe jeni andej, jeni pakica dhe ai llumi ku une jetoj nuk me mbyt dhe nuk me ben pis sepse jemi shumica. Gjejeni ilacin ju qe jeni andej, per te folur eshte lehte………cila eshte rruga e zgjidhjes?
Mik i nderuar shikoj qe ne shum raste na jane versulur neve emigrantve,faktikishte une jetoj ne Kanada,kete shanc e pata qe ne vitin 1991,sepse baba im ishte shtetas Kanadez .Ne te vertete ne saj te punes kuptohet mbas vitit 1991 harrita e ndoqa nje fakultet te shkelqyer te cilin ma kishte mohuar regjimi mbas shkolles se mesme me mesatare 9.8.te mos zgjatem fillova nje pune te mire,pa asnje perkrahje,thjeshte si fillim kur erdhi P.D-ja na u dhane ca mundesira thjesht per kompesim moral politik e public.Time shoqe e morra me shkolle te larte te mbaruar ne nje shtet fqinje me Shqiperine,dhe me grad shkencore dhe u punesua ne nje sektor delikat,por pa dobi sepse ndeshi me nje drejtor militant ordiner,pijanc,dhe perdorues droge,dhe me gruan e tije qe ishte shefe kryesore,cka beri qe te largohej me vullnet nga instuticioni.Po ashtu edhe une ndesha me nje bande kriminale qe ishte e licensuar nga vete shteti.As pyeste njeri per njohuri dhe per dije,thjeshte bindje partije,dhe leke nese kishe(po une si pata keto te fundit).Meqense per vete nuk beja dot gje,sepse varesha nga ministri nje sakat ne ate kohe qe nuk denioi te me priste ne takim,dhe pse njiheshim personalishte dhe kohet e fundit ishim shum miqesor ,edhe me vone ne presidence.Vajta dhe i kerkova gjasme llogari drejtorit qe mbulonte punen e time shoqeje,dhe ngela i befasuar kur i thashe se ka grade shkencore kur me tha se kujt i hyne ne pune grada.Na lane pa pune,dhe detyrimishte u larguam ketej,dhe jam dakort me Arbenin,ketej pamvarsishte cfare je,nga je ku je,po pate merita te vleresojne ne maksimum.
Cdo fiale e shkrume ma Shume se è vertete ,por aj /llum/ ka vjet e shekuj qe Po e mut at vend.
Perle!!!!
Me se e vertet dhe keshtu pa nje emer akoma më mire sepse personazhi ne fjale( per fate te keq) eshte me shoke shume
……..rruga e zgjidhjes eshte ,po a do te bashkohen 1000 shqiptare (jo mercenar) ne nje mendje ?!
Ky llum ka ardhur ne pushtet nga viti 1945 duke vrar masakruar …. dhe djemt nipat e tyre drejtoj sot ne te njeten menyr ..
PËSHPËRIMË ME PSHERËTIMË…
Më bije ndër mend një varg që thotë: Kujt t’i flasësh sot?… Dhe pyetja që lind nga kjo është: Për çfarë të flasim sot? Pyetja nxjerr pyetjen, dhe pyetjet presin përgjigje nëse kjo është e mundur… Le të flasim për pëshpërimat e ne njerëzve, të vendit tonë. Përshpërima të shoqëruara pothuajse pandashëm me psherëtima. Atdheu është atdhe edhe atëherë kur llafazanëria e kakofonia ka kohë që na kanë mbetur e po i bartim si litare në fyt…
Njëherë ne patëm dëgjuar një plak që gjatë një mbledhjeje ku politikanë kërkonin mbështetje (nga rrethi e shoqëria për platforma, programe a vota për vete…) se ne s’mbetem gati kend pa e provu, a po i shihni këta të rinj e të reja si bredhin pa parë perspektivë me sy, me ëndrra të plagosura rëndë, shumë prej tyre korrupcioni e faqet e zeza, pos tjerash, disave ua ka shtyrë edhe martesat, pat psherëtirë i moshuari.
E sillu kah të sillesh, bredh kahdo që të bredhësh parulla : ” Punëtorë e të papunë të shtypur me dhunë” e përmbledh njërën nga dukuritë që vazhdon të jetë në fuqi në çdo regjim e në çdo qeveri.
Ende vazhdojmë te jemi tmerrësisht te ndrydhur e të shtrydhur në të gjitha anët e në çdo fushëveprimtari. Probleme e pyetje pafund e përgjigjje e ndryshime askund…
Jetojmë ecim e bredhim, here në ndonjë cak a kuturu hapat e fjalët diku do t’i hedhim.
Çka i duhet një stafi të tërë të një ndërrmarrjeje publike, a një stafi të një ministrie, institucioni arsimor, a çkadoqoftë të mbajnë sytë katër e me shumë të interesohen se cila parti do të fitojë, e ç ‘bord do të vijë sesa te merren me punët që u takojnë. Kjo është nëjra nga ato përçarjet që sundimi e bashkë me të edhe banaliteti të`vazhdoj. Bletët aterojnë nga lulja në lule e ne nga rrëmuja në rrëmujë.
E te ne vijon kjo gjendje faktike e mjerë që ka kohë që shihet edhe nga aeroplanat por kjo shihet më shumë në stresin dhe mllefin tonë të vazhdueshëm, gërryes e te panevojshëm. Ky shënimth edhe nëse u bije në sy, nuk është e thënë as t’i hidhni sy e as ta lexoni. Ka kohë që te ne ka zënë vend sindromi i mosdëgjueshmërisë së njëri tjetrit, ne flasim me njeri tjetrin ama veten e dëgjojmë (dhe mbase kjo e nxitur edhe nga debatet e tejnumërta televizive që ndonëse kanë prodhuar kotësira banale ato me kokëfortesi vazhdojnë mbase veç për të na bindur se budalllakia s’ka skaj).
Pse të mos e përmendim edhe njëherë terrin, dritën, fillimin, mesin a fundin e tunelit.
E të kthehemi përsëri te pëshpërimat dhe psherëtimat te shkallët e përçudnisë marramendëse në atdheun tonë. Nëse u ndodh të e lexoni kete pjesëz që as vet s’po di pse po e hedh “në tregun e madh zhurmues”, nga ju pres edhe pyetjen: ” Hë mo, ku e ke hallin ti?”…
Kush unë?
Hallin te halli im, te hallet tona…e kurdoherë po vonohemi, po na zë e vona…
Me pëshpërima e psherëtima i mbushur vendi ynë, e gati sa s’po na ndalet fryma . Për gjithçka. Edhe për (pas)zgjedhjet e 11 e 25 qershorit në këtë mesgusht. Ndonjëherë më mirë të dëgjojmë fëshfërimat e gjetheve dhe të hasim e të shikojmë ketrat nëpër Gërmi që enden drunjëve dhe s’donë t’ia dijnë për asgjë…
Por…
S’di ç’të themi e ç’të bëjmë tjetër, vazhdon avazi i vjetër.
Disa vargje të poezisë së Carl Sundburg, “Të hollat, politika, dashuria dhe lavdia” thonë:
Ç’është kjo rrahje krahësh të hutuar
pa mbarim
dhe pa dobi në këto shufra,
dyer, në këtë kafaz?
Këtij shkrimi që ia nisa sikurse një lojë, megjithatë edhe njëherë me një “klik” po e dërgoj…
E qysh more po vazhdon kështu jetën si lojë, si hajgare e hiq, s’po të vjen marre…