VOAL

Maqedoni

Kontesti me Bullgarinë rrezikon nisjen e bisedimeve mes Maqedonisë së Veriut dhe BE-së

Maqedonia e Veriut mund të mos nisë bisedimet e anëtarësimit me Bashkimin Evropian në nëntor, në rast se nuk arrihet marrëveshje me Bullgarinë, e cila këtë çështje e ka kushtëzuar me zgjidhjen e dallimeve për emrin e shtetit, gjuhën maqedonase dhe definimin e prejardhjes etnike të disa personaliteteve historike.

Kështu ka deklaruar ministri i Punëve të Jashtme në Qeverinë e Maqedonisë së Veriut, Bujar Osmani duke theksuar se vendimi duhet të merret nga të gjitha 27 shtetet anëtare të unionit.

“Natyrisht se parakusht për të hapur këtë mbledhje të parë ndërqeveritare, apo për nisjen e bisedimeve duhet të ketë konsensus për tekstin e bisedimeve, për të cilin Bullgaria ka vërejtjet e saja ku edhe i ka ngritur. Nuk është sekret e Bullgaria gjatë debatit në Bruksel ka kontesuar emrin e shkurtër të vendit dhe gjuhën. Ne po bëjmë gjithçka që është e mundur për të arritur një gjuhë të përbashkët, natyrisht në kuadër të kornizës që e ka paracaktuar marrëveshja, që për çështjet historike vendimi të merret nga komisioni i historianëve”, ka deklaruar Osmani.

Drejtuesit e institucioneve shtetërore, “shpëtimin” nga gjendja e krijuar me mundësinë e bllokimit të bisedimeve e shohin në nënshkrimin e një aneksi në kuadër të Marrëveshjes për fqinjësi të mirë (që Shkupi dhe Sofja kanë arritur më 2017) apo edhe të një deklarate në të cilët do të konfirmohet se “Republika e Maqedonisë së Veriut” është emri i vërtetë i shtetit dhe se “Maqedonia e Veriut” është emri i shkurtër kushtetues dhe se ky emër ka të bëjë vetëm se me territorin aktual të shtetit i cili nuk ka pretendime territorial ndaj asnjë vendi fqinj.

Kryeministri maqedonas Zoran Zaev gjithashtu ka shprehur gatishmërinë që të vërtetojë atë që qëndron në kushtetutë për mospërzirje në punët e brendshme të Bullgarisë.

Por, sa i përket gjuhës maqedonase, drejtuesit shtetërorë kanë thënë se kompromis për këtë çështje nuk do të ketë. Pala bullgare pretendon se gjuha maqedonase, sikur edhe shteti maqedonas, janë formuar pas Luftës së Dytë Botërore.

Njohësit e çështjeve politike, thonë se mosmarrëveshjet mes dy shteteve janë pasojë e moszgjidhjes me kohë të dallimeve, e të cilat, siç thotë analisti Albert Musliu kanë ekzistuar edhe para pavarësimit të Maqedonisë së Veriut nga ish-Jugosllavia.

“Nuk i është dhënë shumë vëmendje kapërcimit të mosmarrëveshjeve, kështu që do të jetë një proces pak më i gjatë. Nga ana tjetër mendoj se janë dy faktorë të cilët e ndihmojnë procesin; njëri është interesi i faktorit ndërkombëtar, veçanërisht i lojtarëve më të mëdhenj të faktorit ndërkombëtar, këtu mendoj në Gjermaninë, e cila edhe kryeson me BE-në dhe faktori i dytë është afërsia mes dy kryeministrave, Bojko Borisov dhe Zoran Zaev, të cilit ishin të parët e zhbllokuan procesin. Unë jam optimist se pavarësisht se si do të zhvillohet narrativi në Bullgari e cila është në një fushatë zgjedhore, mendoj se nuk do të bllokohet procesi”, thotë Musliu.

Duke marrë parasysh qëndrimet me dy shteteve, Simonida Kacarska nga Qendra për Politika Evropiane, thotë se nuk sheh shumë hapësirë për koncesione nga pala maqedonase.

“Unë mendoj se qeveria e Bojko Borisovir duhet të tregojë nëse i ka premtuar diçka publikut të saj nga ato kërkesa maksimaliste që kishte. Konsideroj se kërkesat e ndjeshme nuk mund të pritet të jenë pjesë e këtij dokumenti që po diskutohet,” tha Kacarska.

Ajo megjithatë vlerëson se deklarata e fundit të zyrtarëve të lartë bullgarë janë më tepër për fushatë zgjedhore.

“Ministri bullgar i mbrojtjes Krasimir Karakaçanov dhe eurodeputeti Andreja Kovaçev janë zërat e kërkesave maksimaliste, por mendoj se çdo kërkesë e tyre mund të interpretohet në kontekst të zgjedhjeve. Për ne është me rëndësi se të dimë qëndrimet e kryeministrit Borisov dhe të shefes së diplomacisë, Ekaretina Zaharievës”, ka deklaruar Kacarska.

Bullgaria, përmes një memorandumi gjashtë faqesh, i ka kërkuar vendeve anëtare të BE-së, që në kuadër të kornizës negociuese me Shkupin, të fusin edhe Marrëveshjen për fqinjësi të mirë, që Sofja dhe Shkupi kanë arritur më 2017.

Në këtë memorandum, Bullgaria ka argumentuar se me Maqedoninë e Veriut ende nuk kanë zgjidhur kontestet rreth gjuhës, historisë së përbashkët dhe pakicave. Po ashtu, Sofja zyrtare ka paralajmëruar se mund të vendosë edhe veto për anëtarësimin e Shkupit në BE.

Maqedonia e Veriut dhe Bullgaria, në gusht të vitit 2017 nënshkruan Marrëveshjen për fqinjësi të mirë. Kjo marrëveshje ka për synim zgjidhjen e kontesteve mes dy vendeve fqinje, që kanë të bëjnë kontestimin e gjuhës maqedonase nga ana e Bullgarisë si dhe kontesteve rreth ngjarjeve historike deri në vitin 1944, përkatësisht prejardhjen e heroit të dy vendeve, Goce Dellçev, rolin e VMRO-së (organizata e brendshme revolucionare maqedonase) dhe Kuvendin e Ilindenit, që kishte shpallur pavarësinë e shtetit të parë maqedonas, më 2 gusht të vitit 1903.

Maqedoni e Veriut, 22 të vdekur nga koronavirusi brenda një dite

Në Maqedoninë e Veriut 22 persona humbën jetën si pasojë e koronavirusit, brenda një dite të vetme. Gjendja po përkeqësohet nga dita në ditë për shkak të mos respektimit në tërësi të masave dhe protokolleve të vendosura nga autoritetet. Brenda 24 orëve të fundit u regjistruan 561 raste të reja me COVID-19 nga 1901 testime të kryera nga e shtuna deri të dielën.

Situata në Maqedoninë e Veriut paraqitet mjaft e keqe për nga shifrat e viktimave dhe të të prekurve nga virusi vdekjeprurës. Që nga shpërthimi i pandemisë deri tani kanë humbur jetën 919 persona; janë regjistruar 26954 të infektuar, prej të cilave 7408 mbeten aktive, ndërsa 18627 rezultojnë të shëruar.

Viktimat e ditës së fundit janë të moshës nga 55 në 88 vjeç. 7 prej tyre janë nga Shkupi, 2 nga Dibra, 2 nga Gostivari, 2 nga Manastiri, 2 nga Velesi, 2 nga Kriva Pallanka dhe nga 1 në Strugë, Kumanovë, Koçanë dhe Dellçevë. Vetëm dy prej tyre humbën jetën jashtë spitalit.

Spitalet që trajtojnë pacientët me koronavirus pothuaj se janë të mbushura. Rastet më të rënda nga i gjithë vendi dërgohen në tre spitale të Shkupit.

Autoritetet shëndetësore bëjnë thirrje për respektimin e masave, që janë mbajtja e maskave, ruajtjes së distancës fizike dhe higjienës personale. Parlamenti pritet të marrë vendim për të imponuar një sërë masash të reja kufizuese. Autoritetet nuk e përjashtojnë mundësinë e vendosjes së orës policore nëse gjendja vazhdon të përkeqësohet.

”Shqiptar i vdekur, shqiptar i mirë”, arrestohen 16 të rinj në Maqedoninë e Veriut për koret raciste në Shkup

Ministria e Punëve të Brendshme e Maqedonisë së Veriut ka njoftuar për ndalimin e 16 të rinjve maqedonas, të dyshuar për fyerje ndaj shqiptarëve, në lagjen Gjorçe Petrov, në dalje të Shkupit në drejtim të Tetovës.

Aksioni i policisë erdhi pas një videoje të publikuar në Facebook ku shiheshin një grup të rinjsh duke brohoritur thirrje të rënda ndaj komunitetit shqiptar si “shqiptar i vdekur, shqiptar i mirë”.

Brohoritjet kishin ndodhur derisa rrugës po kalonte një kolonë makinash e dasmorëve shqiptar; të stolisur me flamuj kombëtarë.

Thirrjet e të rinjve kishin provokuar dasmorët të cilët kanë ndaluar makinat dhe janë nisur në drejtim të grupit maqedons, por nuk ka pasur përplasje fizike meqë grupi është shpërndarë.

“Janë thirrur në bisedë informative, janë zhvilluar biseda me ta. Konkretisht për rastin e të shtunës, janë ndaluar 16 persona dhe po merren të gjitha masat me qëllim që të zbardhet rasti. MPB-ja do të ketë zero tolerancë për veprime të këtilla, kështu që do të punohet në mënyrë intensive deri sa të sanksionohen të njëjtit“, ka deklaruar zëdhënësja e MPB-së, Suzana Praniq.

Të rinjtë besohet të jenë tifozë të klubit të futbollit “Vardari” të njohur si “Komitët”

Tifozët e njëjtë edhe një javë të parë kishin marshuar sheshit të Shkupit me brohoritje të tilla derisa në stadiumin e qytetit po luante ndeshje Shkupi-Vardari.

Ky akt ka shkaktuar reagime të shumta në rrjetet sociale duke kërkuar masa nga institucionet për parandalimin e veprimet të tilla.

“Sjelljet e Komitëve burimin e kanë tek sistemi, që u jep fuqi dhe përkrahje, pavarësisht kush është në pushtet. Për sa kohë sistemi nuk i dërgon prapa grillave këto huligan, fenomene të këtilla s’do të kenë të ndalur”, kështu ka reaguar Ziadin Sela nga partia Aleanca për Shqiptarët.

Edhe pse me Kodin Penal, gjuha e urrejtjes është e dënueshme nga një deri në pesë vite burg, deri tani askush nuk është ndëshkuar për gjuhë të urrejtjes e cila në Maqedoninë e Veriut është e pranishme në të gjitha manifestimet sportive, por edhe në tubime e protesta të partive.

/REL

Andov: Bëmë gabime ndaj shqiptarëve, nuk duhej të ndodhte lufta më 2001

Garda e Nderit ngreh flamurin kombëtar në Ditën e Pavarësisë së Maqedonisë së Veriut. Shkup, 8 shtator, 2020.

Maqedonia e Veriut gjatë 29 vjetëve të pavarësisë, ka bërë përparime të mëdha, por edhe gabime të cilat i kanë kushtuar humbje kohe për arritjen e synimeve të saja kryesore: anëtarësimin në NATO dhe Bashkimin Evropian.

Kështu thotë për Radion Evropa e Lirë, Stojan Andov, kryetar i parë i Kuvendit të Maqedonisë së Veriut. Ai ka drejtuar institucionin ligjvënës në vitin 1991 kur vendi shpalli pavarësinë nga ish-Jugosllavia. Sikur në atë kohë të mos bëheshin disa gabime, thotë Andov, vendi mund të ishte shumë më herët pjesë e strukturave euroatlantike, ndërsa nuk do të ndodhte edhe konflikti në vitin 2001.

Gabimet, sipas tij, janë bërë në raportet me shqiptarët, të cilët bojkotuan referendumin për pavarësi si dhe miratimin e Kushtetutës së parë, e cila Maqedoninë e atëhershme e definonte si shtet ekskluzivisht të maqedonasve.

“Sigurisht që kishte gabime. Nuk duhej që të vinim deri te konflikti në vitin 2001, pasi disa çështje mund të zgjidheshin më herët, por ja që u vonuam. E dimë se në referendumin për pavarësi nuk dolën votuesit shqiptarë… Qysh atëherë gjërat mund të vendoseshin më ndryshe. Siç edhe e dimë, deputetët shqiptarë nuk e votuan as Kushtetutën e parë në vitin 1991. E gjithë kjo duhet të shërbente si mësim, por ja që u veprua pak me kokëfortësi. Mendonim se mund të bëhemi pjesë e NATO-s me disa operacione që zhvilluam brenda shtetit në vitin 1993. Ne e donim Perëndimin, por nuk kishin përvojë, kështu që na u ngatërruan punët dhe u vonuam”, thotë ish-kryetari i kuvendit, Stojan Andov.

Drejtuesit e institucioneve, si të arriturën më të madhe të vendit që nga shpallja e pavarësisë, kanë theksuar anëtarësimin në NATO dhe pritjet për nisjen e bisedimeve për anëtarësim në BE, mbylljen e kontesteve me fqinjët, zgjidhjen e problemeve të brendshme ndëretnike përmes Marrëveshjes së Ohrit, por edhe përballjen me sfida tjera.

Shpëtim Pollozhani, kryetari i shoqatës së ish të përndjekurve dhe të dënuarve politikë shqiptarë, të cilët që në kohën e monizmin u angazhuan për barabarësinë e shqiptarëve, nuk është i kënaqur me të arriturat gjatë kësaj periudhe pavarësie.

Ai thotë për Radion Evropa e Lirë se shumë kërkesa ende nuk kanë gjetur zgjidhjen e plotë, si zyrtarizimi i gjuhës shqipe, përdorimi i simboleve kombëtare e përfaqësimi i drejtë në institucione, ndërsa flet edhe për vlerësimet lidhur me anëtarësimin e shtetit në NATO.

“NATO-ja e ka projektin e vet dhe kështu e ka futur në gjirin e saj. Pra, mendoj se më tepër është meritë e NATO-s për anëtarësim e saj në këtë aleancë sesa meritë e klasës politike të Maqedonisë së Veriut. Nuk mendoj se gjërat kanë ndryshuar për të mirë, pasi sikur të ndryshonte për të mirë, atëherë do të zvogëlohej numri i atyre që e lënë vendin dhe ikin. Puna tregon se dukuritë ndryshojnë për të keq. Kjo i detyron të gjithë kuadrot që nuk tregojnë serivilitet ndaj partisë në pushtet, kuadro që janë me dinjitet, që janë profesionist, që janë të ngritur, që kanë një qëllim, që kanë një ëndërr, ata largohen”, thekson Pollozhani.

Ai thotë se ky shtet mund të ketë sukses vetëm nëse hiqen paragjykimet mes njerëzve.

“Nëse nuk ndryshon mentaliteti politik se ‘shqiptari i ndershëm është shqiptar i manipulueshëm’, do të mbytemi në të njëjtën anije, të dy palët, edhe ne edhe maqedonasit. Nëse ata ndryshojnë mentalitetin hegjemon ndaj shqiptarëve, edhe ata do të ndryshojnë mentalitetin ndaj vetvetes, atëherë mendoj se punët mund të lëvizin”, shprehet Pollozhani.

Temelko Ristevski, profesor i së Drejtës Kushtetuese thotë për Radion Evropa e Lirë se të arritura janë shënuar, por jo edhe ngritje e vetëdijes për përgjegjësitë ndaj shtetit.

“Mendoj se kemi arritur shumë. Për herë të parë në historinë tonë maqedonase kemi shtet të pavarur, demokratik, sovran, shtet maqedon. Kemi arritur të bëhemi pjesë e NATO-s, ndërsa presin edhe nisjen e bisedimeve për anëtarësim në Bashkimin Evropian. Por, kemi edhe dobësitë tona të sjelljes ndaj shtetit, ende nuk kemi vetëdije të lartë për përgjegjësitë që duhet të kemi ndaj shtetit në përgjithësi. Te ne ende ka korrupsion të lartë, ende nuk kemi shkallë të lartë të përgjegjësisë, ende kemi të theksuar individualizmin duke lënë anash interesat shoqërore e shtetërore. Këto janë disa faktorë që po pengojnë rrugën tonë drejtim zhvillimit dhe përparimit, të shtetit dhe shoqërisë”, thotë Ristevski.

Opozita maqedonase kritikon heshtjen shtetërore për marrëveshjen Prishtinë-Beograd

Flamuri i Kosovës dhe ai i Serbisë.

Partia opozitare maqedonase, VMRO-DPMNE, ka kritikuar institucionet shtetërore dhe partitë politike në pushtet, të cilat, siç thuhet, tashmë tri ditë po heshtin lidhur me marrëveshjen e nënshkruar në Uashington mes Kosovës dhe Serbisë, në prani të presidentit amerikan Donald Trump.

“Vendi ynë u prononcua për Venezuelën, Korenë e Veriut, demokracinë në Poloni, por jo për çështjet që lidhen me Serbinë dhe Kosovën – dy fqinjët tanë me të cilët kemi bashkëpunimin dhe shkëmbim ekonomik më të zhvilluar…”, ka deklaruar Ilija Dimovski ish-deputet dhe zyrtar i VMRO-DPMNE-së, duke theksuar më tej se çfarë sipas tij do të ishte me rëndësi për pozicionin shtetëror të Maqedonisë së Veriut.

“Ne nuk duhet ta shikojmë këtë çështje përmes prizmit të ndjenjës për cilindo palë, por ekskluzivisht përmes prizmit të interesit të Republikës së Maqedonisë (v.j. së Veriut) dhe interesit të të gjithë qytetarëve të saj. Interesi ynë në rajon është që të kemi stabilitet afatgjatë. Në interes të Republikës së Maqedonisë është që mosmarrëveshjet të mos zgjidhen përmes ndryshimit të kufijve. Është në interesin tonë të mos kemi konflikte ushtarake në asnjë prej kufijve tanë për shkak të rrezikut të përhapjes së konfliktit drejt nesh. Është në interes të Republikës së Maqedonisë (v.j. së Veriut) që të investohet në infrastrukturë, transport, tregti dhe ekonomi kudo në shtetet fqinje”, ka theksuar Dimovski.

Lidhur me marrëveshjen e Uashingtonit kishte reaguar në Facebook, kryetari i Bashkimit Demokratik për Integrim, Ali Ahmeti duke e vlerësuar marrëveshjen “lajm të mirë nga djepi i demokracisë, nga vendi që bën ndryshim, nga vendi që promovon paqe, siguri dhe stabilitet, nga Shtetet e Bashkuara të Amerikës”.

“U arrit Marrëveshja historike në mes dy shteteve sovrane, Kosovës dhe Serbisë, dhe kjo është një hap kolosal drejt marrëveshjes finale dypalëshe dhe Ballkanit në paqe e prosperitet ekonomik. Miqësia shqiptaro-amerikane dhe bashkëpunimi ynë strategjik janë sa shekullore aq edhe të përjetshme”, ka theksuar Ahmeti.

Më 4 shtator në Shtëpinë e Bardhë, kryeministri i Kosovës, Avdullah Hoti dhe presidenti serb, Aleksandar Vuçiq kanë nënshkruar një marrëveshje për normalizimin ekonomik, në prani të presidentit të Shteteve të Bashkuara, Donald Trump. rel

Përfundon intervistimi i Ali Ahmetit nga prokurorët e Gjykatës Speciale

Kryetari i partisë Bashkimi Demokratik për Integrim (BDI) në Maqedoninë e Veriut, Ali Ahmeti, është intervistuar nga prokurorët e specializuar të Gjykatës Speciale.

Pas intervistimit në cilësinë e dëshmitarit, Ahmeti tha se nuk e ka të lejuar të japë detaje rreth procesit.

“Deri në përfundim të këtij procesi, nuk mund të ndajë asnjë informacion me opinionin sepse kështu e përcakton ligji dhe dua që ta respektoj ligjin. Në përfundim të këtij procesi, atëherë mund të flasim. Sot ka marrë fund procesi i intervistimit tim. Kam qenë në cilësi të dëshmitarit”, tha Ahmeti para gazetarëve.

I pyetur se cili është mendimi i tij për këtë gjykatë, Ahmeti tha shkurt se “është vendim i Kuvendit të Kosovës dhe ky vendim është ekzekutuar”.

Intervistimi i sotëm (3 shtator) i Ahmetit ka qenë vazhdimësi e intervistimit të ditës së djeshme që zgjati rreth 8 orë.

Ahmeti ka qenë një nga themeluesit e Ushtrisë Çlirimtare të Kosovës dhe anëtar i Shtabit të Përgjithshëm.

Që nga viti 2019 qindra ish-ushtarë të Ushtrisë Çlirimtare të Kosovës kanë udhëtuar drejt Hagës, për t’u intervistuar nga prokurorët ndërkombëtarë të Dhomave të Specializuara, qoftë si dëshmitarë apo si të dyshuar.

Më 24 qershor, Zyra e Prokurorit të Specializuar në Hagë ka njoftuar se më 24 prill ka paraqitur një aktakuzë për krime lufte dhe krime kundër njerëzimit kundër presidentit Thaçi, kryetarit të Partisë Demokratike të Kosovës, Kadri Veseli, dhe disa të tjerëve, emrat e të cilëve nuk janë bërë publikë.

Gjykata Speciale, e përbërë nga Dhomat e Specializuara dhe Zyra e Prokurorit të Specializuar e Prokurorisë në Hagë u formua nga autoritetet në Kosovë pas insistimit të bashkësisë ndërkombëtare.

Gjykata është themeluar pas raportit të Këshillit të Evropës, të vitit 2011, në të cilin senatori zviceran Dick Marty flet për krimet e pretenduara “të pjesëtarëve të Ushtrisë Çlirimtare të Kosovës ndaj pakicave etnike dhe rivalëve politikë“, që nga janari i vitit 1998 e deri në dhjetor të vitit 2000.

Për formimin e kësaj gjykate u deshën edhe ndryshime kushtetuese, që u miratuan nga deputetët e Kuvendit të Kosovës. rel

Shkup, shënohet 110 vjetori i lindjes së shenjtores Nënë Tereza

Të mërkurën në Shkup, në vendlindjen e shenjtores Nënë Tereza u shënua 110 vjetori i lindjes së saj. Instituti për Ruajtjen e Trashëgimisë Shpirtërore dhe Kulturore të Shqiptarëve dhe Shoqata “Shkupjania Nënë Tereza” përuruan pllakën përkujtimore të shkruar në maqedonisht, shqip dhe anglisht në sheshin qendror të Shkupit, ku ka qenë shtëpia e Gonxhe Bojaxhiut.

Në të vërtetë, për vite me radhë në këtë vend ka pasur një pllakë në maqedonisht dhe anglisht por jo dhe në gjuhën shqipe, që indinjonte komunitetin shqiptar.

Një nga folësit, Talat Xhaferi, Kryetar i Parlamentit të Maqedonisë së Veriut foli me mburrje për shenjtoren Nënë Tereza si “simbol i humanizmit të pafund, simbol i dashurisë ndaj njeriut, kujdesit dhe ndjeshmërisë ndaj të sëmurëve, martirëve dhe të pafatëve në jetë”, siç tha z. Xhaferi.

Skënder Hasani, drejtor i Institutit për Trashëgiminë Shpirtërore dhe Kulturore të Shqiptarëve tha se me themelimin e Departamentit për Trashëgiminë e Gonxhe Bojaxhiut brenda Institutit, “personaliteti i Nënë Terezës ka edhe një përkujdesje shkencore, që në mënyrë studioze do ta ndriçojë figurën e saj, do t’i pasurojë informacionet për të dhe gjithnjë do ta begatojë personalitetin e madh të Nënës Terezë në mjedisin tonë”.

Gonxhe Bojaxhiu – Nënë Tereza ishte larguar nga vendlindja në moshën 18 vjeçe për t’iu bashkuar misionit të bamirësisë dhe ajo kishte arritur ta vizitojë Shkupin katër herë, ndërsa e ëma, motra dhe i vëllai jetonin në Tiranë.

Sot në Shkup jeton një komunitet i vogël katolikësh shqiptarë. Shumë prej tyre janë shpërngulur, sidomos në Kroaci. Në Shkup ka një kishë të vetme katolike në të cilën meshat nuk bëhën në gjuhën shqipe dhe as nuk ka një prift shqiptar.

Shtëpia e shenjtores në kryeqytet ishte rrëzuar me urdhër të autoriteteve komuniste të kohës pas tërmetit të vitit 1963, me vlerësimin se kishte pësuar dëme serioze.

Në Shkup, disa qindra metra larg shtëpisë së lindjes është ngritur një shtëpi – muze për nder të Nënë Terezës të cilën e vizitojnë qindra njerëz nga mbarë bota. zëri i amerikës

Ali Ahmeti nuk do të jetë në votimin e qeverisë së re, thirret në Hagë për dosjen ndaj UÇK-së

Kreu i BDI-së Ali Ahmeti nuk do të jetë prezent në seancën e votimit të qeverisë së re të Maqedonisë së Veriut, pasi është kërkuar nga prokurorët e Gjykatës Speciale të Kosovës, që të dëshmojë për dy ditë në kuadër të dosjes ndaj ish-krerëve të lartë të Ushtrisë Çlirimtare të Kosovës. Ahmeti ka qenë anëtar i Shtabit të Përgjithshëm të UÇK-së.

Seanca e votimit të qeverisë së re të koalicionit LSDM-BDI mbahet më 2 shtator, kurse prokurorët i kanë kërkuar Ahmetit të jetë në dispozicion për dy ditë për të dëshmuar.

Zëdhënësi Prokurorisë Speciale për krime të luftës në Kosovë, Christopher Bennett është shprehur për mediat se ndërsa nuk është ngritur aktakuza, nuk mund të thuhet pse dhe në çfarë cilësie është thirrur kreu i BDI.

Sipas tij, Prokuroria Speciale e Kosovës dhe gjykata nuk kanë dhënë detaje në publik deri në një vendimin përfundimtar, as nuk dihet kush është akuzuar dhe kush është dëshmitar, ndërsa theksoi se “ky rregull vlen edhe për Ahmetin”.

“Ne nuk japim detaje në lidhje me asgjë që lidhet me hetimin tonë. Informacioni që po thoni (se ai u thirr për të dëshmuar) mendoj se vjen nga vetë Ahmeti”, tha Bennett.

Lideri i BDI-së konfirmoi se ai ishte thirrur të dëshmojë para prokurorëve të Prokurorisë Speciale në Kosovë më 2 dhe 3 shtator. Ndërkaq, në mediat shqiptare dhe maqedonase në Shkup është folur edhe për një mundësi të dorëheqjes së Ahmetit nga kreu i BDI-së e largim nga politika, nëse zyrtarizohet ndonjë akuzë ndaj tij.

Kurse nga BDI, këto zëra i kanë quajtur të pabaza dhe të rreme. Drejtues të BDI-së kanë thënë se Ahmeti është në Hagë për të dëshmuar dhe se nuk ka fare lidhje me ndonjë dosje ndaj tij./ dita

Deputeti i Bashkimit Demokratik për Integrim jep dorëheqjen pas përplasjeve me kreun e partisë

“Mbetem parimor dhe rrjedhimisht dorëhiqem nga mandati i deputetit të popullit për të evituar konflikt të mundshëm të interesit me votën time në kuvend”.

I tillë ka qenë vendimi i papritur, i deputetit shqiptar në Kuvendin e Maqedonisë së Veriut, pak ditë pas zgjedhjeve.

I sapo zgjedhur nga radhët e Bashkimit Demokratik për Integrim, Florin Besimi bëri të ditur se do të jep dorëheqje nga posti i deputetit.

Ai thotë se për të është nder t’i përfaqësojë qytetarët në Kuvend dhe se rrethanat imponojnë të merr një vendim tjetër.

“Jam shumë krenar që vota juaj kontribuoi në arritjen e marrëveshjes më të mirë koalicionuese që kemi arritur ndonjëherë në të kaluarën, përfshirë edhe kryeministrin e parë shqiptar të vendit. Marrëveshje, e cila u vlerësua si historike nga të gjithë figurat relevante politike shqiptare”.

“Duke qëndruar stoik në parimet për barazi, drejtësi, mundësi për të gjithë dhe duke respektuar në tërësi dhe pa asnjë hezitim ligjin dhe vullnetin e popullit, unë ju njoftoj se mbetem parimor dhe rrjedhimisht dorëhiqem nga mandati i deputetit të popullit për të evituar konflikt të mundshëm të interesit me votën time në kuvend”, tha Florin Besimi.

Ai thotë se ky vendim vjen në pajtueshmëri me kryetarin e BDI-së, Ali Ahmeti dhe në ditën kur janë shpallur kandidatët për ministra të rinj.

“Marrëveshjet e mëdha historike e tejkalojnë mandatin tim të deputetit. Rikthehem në shërbim të popullit, aty ku mund të kontribuoj më së shumti, në profesionin tim dhe në qytetin tim. Zoti ju bekoftë dhe na priftë e mbara, gjithmonë bashkë dhe përherë për të mirën e përbashkët. Ju falenderoj nga zemra për mbështetjen dhe besimin e dhënë”, shkruan Besimi.

Ndryshe, gjatë ditës së djeshme, kryetarja e Komisionit Anti-korrupsion, Biljana Ivanovska tha se Florin Besimi nuk do të mund të votojë për Qeverinë e re dhe për vëllanë e tij për ministër të Financave për shkak se kjo përbën konflikt interesi.

Pritet dorëheqja: Ali Ahmeti thirret në Hagë pak ditë pas arritjes së marrëveshjes historike për qeverinë e re në Shkup

Ali Ahmeti, kryetari i Bashkimit Demokratik për Integrim, BDI, në Maqedoninë e Veriut, i cili ka qenë edhe luftëtar në luftën e Kosovës 1998-1999, tha të mërkurën në mbrëmje se Zyra e Prokurorit të Specializuar të Kosovës me seli në Hagë ka kërkuar ta marrë atë në pyetje.

Ahmeti konfirmoi se ka pranuar “pa asnjë hezitim” kërkesën e prokurorëve që po hetojnë krimet e kohës së luftës dhe pasluftës nga luftëtarët e Ushtrisë Çlirimtare të Kosovës, UÇK.

“Gjithmonë kam qenë ithtar i drejtësisë joselektive dhe jam në dispozicion të tërësishëm të organeve të drejtësisë për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb të Millosheviçit”, shkroi Ahmeti në Facebook.

Zyra e Prokurorit të Specializuar nuk pranoi të japë informacione se përse është thirrur në Hagë Ahmeti.

“Zyra e Prokurorit të Specializuar nuk jep informacione për hetimin e tij, kështu që unë nuk mundem as të konfirmoj dhe as të mohoj asgjë”, u përgjigj Chris Bennett nga Zyra e Prokurorit të Specializuar për gazetën Nezavisen të Maqedonisë së Veriut.

Ahmeti shërbeu në UÇK, e cila luftoi për pavarësinë e Kosovës nga Serbia, dhe më pas edhe në Ushtrinë Çlirimtare Kombëtare, e cila luftoi kundër forcave të sigurisë së Maqedonisë së Veriut gjatë një konflikti të armatosur jetëshkurtër në vitin 2001.

Pasi konflikti përfundoi me një marrëveshje paqeje që u dha shqiptarëve etnikë më shumë të drejta, në vitin 2002 Ahmeti dhe ish-liderët e drejtuesit e Ushtrisë Çlirimtare kombëtare formuan partinë BDI.

Që atëherë, BDI-ja ka mbetur partia më e madhe etnike shqiptare në Maqedoninë e Veriut dhe ka qenë në disa qeveri, përfshirë edhe atë të fundit, të udhëhequr nga social demokratët.

Ftesa për Ahmetin erdhi një javë pasi prokurorët e Hagës përfunduan marrjen në pyetje katër-ditore të presidentit të Kosovës, Hashim Thaçi.

Zyra e Prokurorit të Specializuar njoftoi më 24 qershor se akuzon Thaçin, si dhe politikanin e lartë të Kosovës Kadri Veseli dhe ish-luftëtarë të tjerë të Ushtrisë Çlirimtare të Kosovës për krime lufte dhe krime kundër njerëzimit.

Zyra e Prokurorit të Specializuar dhe Dhomat e Specializuara të Kosovës, ku do të gjykohen të dyshuarit, janë pjesë e sistemit të drejtësisë së Kosovës, por janë të vendosura në Holandë dhe përbëhen nga staf ndërkombëtar.

Ato u ngritën nën presionin e aleatëve perëndimorë të Kosovës, të cilët druheshin se sistemi i drejtësisë i Kosovës nuk ishte aq i fortë sa të gjykonte raste kaq të ndjeshme.

E ashtuquajtura “gjykatë speciale” është kundërshtuar gjerësisht nga shqiptarët e Kosovës që e shohin atë si një fyerje për luftën e UÇK-së për çlirimin nga sundimi serb.

Ftesa e Ahmetit vjen gjithashtu vetëm disa ditë pas zgjedhjeve të parakohshme në Maqedoninë e Veriut të 15 korrikut, ku BDI-ja e tij i përforcoi pozicionet e saj si partia më e madhe shqiptare në vend, duke fituar 15 vende në parlamentin e përbërë nga 120 vende, duke bërë që ajo të ketë përsëri rolin kryesor gjatë bisedimeve të ardhshme për formimin e qeverisë së ardhshme.

Sipas mediave në Shkup, thirrja në Hagë mund të pasohet nga dorëheqja e Ahmetit si kryetar i BDI. Artan Grubi, i cili në qeverinë e re do jetë zv.kryeministër, mund të jetë zëvendësuesi i tij në rast dorëheqje.dita

Talat Xhaferi rizgjidhet Kryetar i Parlamentit të Maqedonisë së Veriut

Parlamenti i ri i Maqedonisë së Veriut e rizgjodhi Talat Xhaferin si kryetar të të tij. 62 ligjvënës të partive të shumicës së re parlamentare votuan pro, 43 deputetë të VMRO-DPMNE-së kundër, ndërsa deputetët e opozitës shqiptare “Aleanca për Shqiptarët dhe Alternativa” u larguan nga seanca para aktit të votimit.

Seanca u zhvillua mes kritikave të shumta të deputetëve opozitarë maqedonas të cilët thanë se nuk do ta votonin zotin Xhaferi për shkak të aleancës së partisë së tij me LSDM-në, drejtuesit e së cilës i konsiderojnë si njerëz të përfshirë në vepra kriminale dhe manipulime të tjera.

Zoti Xhaferi falënderoi deputetët për besimin e dhënë, përfshirë ata të opozitës për debatin konstruktiv, përfshirë ata që u larguan nga salla para se të fillonte votimi. “Do të jem në funksion të ligjeve të Kushtetutës dhe rregulloreve”, tha kryetari i sapozgjedhur i parlamentit.

VMRO-ja u përpoq të bindte BDI-në që të mos hynte në koalicion me LSDM-në për shkak të, siç tha ajo, ofendimeve dhe nënçmimeve që anëtarët e LSDM-së kishin bërë gjatë fushatës së fundit zgjedhore nda BDI-së dhe shqiptarëve.

Ish-kryetari i grupit të deputetëve të opozitës, Nikolla Micevski kritikoi shumicën për “mënyrën e turpshme të drejtimit të seancave, duke mos respektuar të drejtat e deputetëve dhe duke keqpërdorur rregulloren e parlamentit.”

Ndërkohë, deputeti i koalicionit “Aleanca për Shqiptarët – Alternativa” Skender Rexhepi theksoi “vjedhjen e votave”, sipas tij, në zgjedhjet e fundit “që vranë shpresën e shqiptarëve për demokraci”. “Nuk do të marrim pjesë në një akt të turpshëm historik të votimit”, tha deputeti Rexhepi.

Talat Xhaferi ishte Kryetar i Parlamentit gjatë mandatit të kaluar, respektivisht nga 27 prilli i vitit 2017, kur ndodhën sulmet e dhunshme nga përkrahës të VMRO-së ndaj ligjvënësve brenda parlamentit. Ai ka qenë deputet edhe në përbërje të kaluara dhe Ministër i Mbrojtjes në Qeverinë e Maqedonisë së Veriut. Me profesion është ushtarak, ka ndjekur studimet në Akademinë ushtarake në Beograd dhe ka qenë oficer i ushtrisë jugosllave. Më vonë ai u angazhua në Ushtrinë Çlirimtare Kombëtare, e cilia organizoi një kryengritje kundër forcave policore dhe ushtarake në vitin 2001 në Maqedoninë e Veriut për të drejta më të mëdha të shqiptarëve në këtë vend.

Shumica e re parlamentare i ka 62 deputetë, prej të cilave 46 të LSDM-së, 4 të Lëvizjes Besa, 15 të BDI-së dhe 1 të Partisë Demokratike Shqiptare, të mjaftueshëm për ta votuar edhe kabinetin e ri qeveritar, i cili do të drejtohet nga udhëheqësi i LSDM-së, Zoran Zaev.

Sela-Gashi: BDI nuk ka legjitimitet në Qeverinë e dakorduar

Shkup

Kryetari i Aleancës për Shqiptarët, Zijadin Sela dhe kryetari i Alternativës, Afrim Gashi deklaruan se Qeveria e dakorduar mes Lidhjes Social Demokrate të Maqedonisë (LSDM) dhe koalicionit “Mundemi” dhe Bashkimit Demokratik për Integrim (BDI) nuk ka legjitimitet dhe se kjo parti që nga dita e parë nuk e mbajti premtimin për kryeministrin shqiptar, raporton Anadolu Agency (AA).

Para Kuvendit kryetari i Aleancës për Shqiptarët, Zijadin Sela tha se marrëveshja e djeshme mes LSDM-së dhe BDI-së për formimin e Qeverisë së re “është jolegjitime dhe nuk është shprehje e vullnetit të qytetarëve”.

“Kur jemi te ai legjitimitet, oponenti ynë BDI nuk e ka atë legjitimitet, sepse ata, të gjithë qytetarët janë dëshmitarë, se vullnetin e qytetarëve e kanë keqpërdorur, e vodhën, e blejtën me para dhe e frikësuan”, theksoi Sela.

Mes tjerash, Sela tha se ende presin përgjigje nga Prokuroria për parregullistë zgjedhore në zgjedhjet parlamentare që u mbajtën më 15 korrik të këtij viti.

Kryetari i Alternativës, Afrim Gashi tha se premtimi kryesor i BDI-së para zgjedhjeve ishte kryeministri shqiptar dhe këtë premtim e shkelën që në ditën e parë dhe për këtë shkak këtu nuk mund të ketë legjitimitet.

“Humb çdo legjitimitet sepse kanë mbledhur vota mbi këtë premtim. Nëse nuk e kthejmë këtë komponentë në demokraci do të humb kuptimi i fjalës së dhënë, fjalës së dhënë publike”, tha Gashi.

Liderët e LSDM-së dhe BDI-së, Zoran Zaev dhe Ali Ahmeti, dje mbajtën takim pas të cilit e njoftuan opinionin se kanë arritur marrëveshje koalicionimi për formimin e shumicës parlamentare. Ata paralajmëruan se pjesë e koalicionit qeveritar do të jetë edhe Partia Demokratike Shqiptare (PDSH).

Sipas procedurave, pas marrëveshjes për qeveri të re, kryeparlamentari Talat Xhaferi pritet të caktojë vazhdimin e seancës konstituive në të cilën do të zgjidhet kryetari i Kuvendit. Pastaj, kryeparlamentari duhet të thërrasë një seancë të re në të cilën duhet të zgjidhet qeveria e re.

Kujtojmë se presidenti i Maqedonisë së Veriut, Stevo Pendarovski, më 13 gusht i dorëzoi mandatin për formimin e qeverisë së re kreut të LSDM-së, Zoran Zaev i cili udhëheq koalicionin “Mundemi” që fitoi më shumë vota në zgjedhjet e parakohshme parlamentare të mbajtura më 15 korrik.

Në këto zgjedhje, sipas rezultateve përfundimtare të Komisionit Shtetëror Zgjedhor (KSHZ), koalicioni “Mundemi” fitoi 46 deputetë, VMRO-DPMNE-je 44 deputetë, BDI-ja 15 deputetë, koalicioni Aleanca për Shqiptarët dhe Alternativa 12 deptuetë, E Majta 2 deputetë dhe Partia Demoratike Shqiptare (PDSH) 1 deputet.

LSDM dhe BDI vazhdojnë qeverisjen, kryeministër shqiptar në 100 ditët e fundit të mandatit

Lidhja Social-Demokrate dhe Bashkimi Demokratik për Integrim kanë njoftuar arritjen e marrëveshjes për formimin e Qeverisë së re të Maqedonisë së Veriut.

Marrëveshje u bë e ditur nga liderët e dy partive, Zoran Zaev dhe Ali Ahmeti. Kreu i LSDM-së, Zaev tha se do të jetë kryeministër me mandat të plotë katërvjeçar, duke bërë kështu të ditur se ky post nuk do të ndahet në rrotacion me BDI-në, e cila këtë post e kishte moto kryesore të fushatës zgjedhore.

Dy liderët nuk prezantuan planet e tyre për ndarjen e posteve qeveritare. Por Zaev njoftoi se kryetar i kuvendit do të vazhdojë të jetë Talat Xhaferi nga BDI-ja.

Zaev tha se me BDI-në janë pajtuar që gjatë mandatit katërvjeçar bashkërisht të punojnë në ndarjen e përgjegjësive sikur dhe përbërjes së qeverisë së re.

“Lufta kundër koronavirusit do të jetë prioritet në punën e qeverisë, sikur edhe standardi ekonomik, rritja e pagave, lufta kundër krimit të organizuar dhe korrupsionit. Jemi pajtuar për forcimin e sistemit të drejtësisë, hetimin e pasurisë së funksionarëve dhe të kaluarën e tyre”, ka deklaruar kryetari i LSDM-së, Zoran Zaev.

Sa i përket postin të kryeministrit, kryetari i BDI-së, Ali Ahmeti nuk iu përgjigj pyetjes së gazetarëve se si BDI-ja do të arsyetojë heqjen dorë nga kjo kërkesë me të cilën udhëhoqi fushatën zgjedhore.

“Ky vendim që është marrë të martën, pritej nga të gjithë qytetarët e vendit dhe partnerët ndërkombëtarë për vazhdimin e proceseve integrues. Ne kemi dalë me kandidat (për kryeministër) si e drejt e jona legjitime dhe nëse do të barrikadohemi, asnjëherë nuk do të arrijmë zgjidhje për të mirën e qytetarëve. Mendoj se qëllimi është arritur që të përçojmë mesazhin te të gjithë qytetarët”, deklaroi Ahmeti, duke theksuar se beson se ky partnerit i radhës së me LSDM-së, do të jetë më i suksesshëm deri më tani.

Por, Zoran Zaev tha se me BDI-në janë pajtuar që 100 ditë e fundit të qeverisë, kryeministri do të propozohet nga BDI-ja.

“Qeveria e Përzhinës më nuk do të funksionojë për shkak të problemeve në të kaluarën. Por, kur vinë zgjedhjet, të gjitha partitë duhet të ndjehen të barabarta, kështu që LSDM-ja do të pranojë që 100 ditë para zgjedhjeve, me propozim të BDI-së, të zgjidhet një kryeministër i ri”, tha Zaev.

Në zgjedhjet e 15 korrikut, LSDM-ja e Zoran Zaevit ka fituar 46 ulëse në kuvend, BDI-ja 15, opozita shqiptare 12, PDSH-ja 1. Në rast se brenda 20 ditëve LSDM-ja nuk arrin ta formojë qeverinë, atëherë mandati duhet t’i kalojë partisë së dytë fituese, VMRO- DPMNE-së e cila ka 44 ulëse në kuvend.

Sipas Kushtetutës, Qeveria e re e Maqedonisë së Veriut duhet të marrë minimum 61 vota të deputetëve.

Certifikohen rezultatet, shqiptarët me 32 mandate në Kuvendin e Maqedonisë së Veriut

Komisioni Shtetëror i Zgjedhjeve ne Maqedoninë e Veriut ka miratuar vendimin për shpalljen e rezultateve zyrtare të zgjedhjeve parlamentare të 15 korrikut.

Gjatë seancës së hapur, kreu i KSHZ-së Oliver Derkovski njoftoi se janë certifikuar rezultatet e përbërjes së re parlamentare prej 120 deputetësh.

LSDM 46 mandate
VMRO-DPMNE 44 mandate

BDI 15 mandate
ASH-AA 12 mandate
E majta 2 mandate
PDSH 1 mandat

Gjatë këtij mandati katërvjeçar në godinën ligjvënëse, shqiptarët do të përfaqësohen nga gjithsej 32 deputetë shqiptarë nëpër parti dhe koalicione të ndryshme. Pa mandate mbeten Integra, GDU, Moro, Glas za Makedonija, E vetmja Makedonia, SDU, Tvoja prtija, Demokratët dhe Partia popullore rome.

Pendarovski flet me Lajçak për bisedimet Kosovë- Serbi: kufijtë s’duhen prekur

Presidenti i Maqedonisë së Veriut, Stevo Pendarovski, sot ka zhvilluar një bisedë me emisarin e BE’së, për dialogun Kosovë-Serbi, Miroslav Lajcak, me të cilin kanë diskutuar për zhvillimet e fundit në rajon.

Pendarovski në fjalët që i ka thënë Lajçak ka thënë se kontributi i BE’së është i nevojshëm për gjetjen e një zgjidhje që është e pranueshme dhe që forcon stabilitetin e rajonit, duke aluduar kështu që kufijtë s’duhet preken.

“Me Miroslav Lajcak, Përfaqësuesin Special të BE’së për dialogun Beograd Prishtinë, folëm për zhvillimet e fundit në rajon. Kontributi i BE’së është i nevojshëm me qëllim të gjetjes së një zgjidhje të pranueshme dhe forcimit të stabilitetit në rajon”, ka thënë Pendarovski.

Edhe Lajçak ka njoftuar në profilin e tij për bisedën me Pendarovskin, duke treguar se e ka informuar presidentin maqedonas për dialogun mes Prishtinës dhe Beogradit dhe se kanë folur edhe për krijimin e qeverisë në Maqedoninë e Veriut në kontekstin e rinisjes së negociatave për anëtarësim”.

Shkup, Talat Xhaferi shtrohet në spital

Kryetari i Parlamentit të Maqedonisë së Veriut, Talat Xhaferi është shtruar të premten në Klinikën e Sëmundjeve Infektive në Shkup, por nuk është bërë e qartë nëse bëhet fjalë për infektim nga koronavirusi. Zoti Xhaferi kishte përjetuar probleme shëndetësore gjatë disa ditëve të fundit, thanë bashkëpunëtorë të tij.

Ndërkohë, parlamenti i ri i dalë pas zgjedhjeve të 15 korrikut duhet të mblidhet në fillim të muajit gusht dhe këtë seancë e thërret kryetari në largim i parlamentit, që është vetë z. Xhaferi.

Sipas rregullores së parlamentit, kryetari i tij cakton seancën themeluese të përbërjes së re parlamentare, njëzet ditë pasi të jenë zyrtarizuar rezultatet e zgjedhjeve parlamentare. Nëse ai/ajo nuk është në gjendje të jetë i pranishëm në seancë, atëherë atë e drejton deputeti më i vjetër në moshë. Në seancën e parë zgjidhet gjithashtu kryetari i ri i parlamentit.

Dy zyrtarë të tjerë të Bashkimit Demokratik për Integrim kanë njoftuar se kanë rezultuar pozitivë në testet për COVID-19: Arbër Ademi, i cili është Ministër aktual i Arsimit dhe deputet në parlamentin e ri, si dhe Kreshnik Bekteshi, Ministër i Ekonomisë, të cilët kanë qenë aktivë gjatë fushatës parazgjedhore gjatë të cilës jo gjithmonë zbatoheshin protokollet dhe masat e mbrojtjes nga koronavirusi.

Situata e koronavirusit nuk është përmirësuar në Maqedoninë e Veriut që prej disa javësh, duke marrë çdo ditë disa jetë njerëzish. Vetëm në 24 orët e fundit janë raportuar 6 viktima dhe 129 raste të reja. Pesë nga viktimat janë nga Shkupi dhe një nga Struga. Brenda këtij intervali kohor janë bërë 1.535 teste, ndërsa 109 persona kanë rezultuar të shëruar nga virusi. Që nga shpërthimi i pandemisë janë regjistruar 451 raste vdekjesh nga 9.797 të prekur gjithsej, prej të cilëve 4.092 mbeten raste aktive dhe 5.254 të shëruar.

Ali Ahmeti sqaron thirrjen nga Haga: Jam ftuar si dëshmitar nga prokuroria speciale e Kosovës

Kreu i BDI, Ali Ahmeti sqaron se është ftuar si dëshmitar nga Prokuroria Speciale e Kosovës, e njëjta që ngriti akuzën për krime lufte ndaj Thaçit e Veselit.

Ahmeti thotë se është ftuar si dëshmitar pasi ka qenë themelues i UÇK-së dhe anëtar i shtabit të përgjithshëm.

Ai shton se është në dispozicion të tregojë çiltërsinë e luftës çlirimtare të popullit shqiptar përballë gjenocidit të regjimit të Millosheviçit. Por ndërkohë që për Thaçin e Veselin ka një aktakuzë të ngritur nga kjo Prokurori për rreth 100 vrasje të cilësuara si krime lufte gjatë luftës në Kosovë, për Ahmetin nuk bëhet ende me dije asgjë madje edhe nëse kjo thirrje është në vazhdën e ‘dosjes’ së Thaçit e Veselit me disa ish- luftëtarë të tjerë të UÇK-së.

STATUSI NGA ALI AHMETI

Të nderuar qytetarë,

sundimi i ligjit dhe arritja e drejtësisë së mirëfilltë joselektive, vendore dhe ndërkombëtare, janë synim dhe detyrim i imi i përhershëm në të gjithë veprimtarinë time.

Andaj, ju njoftoj që Dhomat e specializuara të Republikës së Kosovës, gjegjësisht prokuroria speciale e Kosovës, si një nga themeluesit e UÇK dhe anëtar i shtabit të përgjithshëm, më ka ftuar në cilësinë e dëshmitarit dhe pa hamendje kam pranuar ftesën si dhe kam vendosur kontakt konstruktiv dhe bashkëpunues me zyrtarët në Hagë.

Gjithëmonë kam qenë ithtar i drejtësisë joselektive dhe jam në dispozicion të tërësishëm të organeve të drejtësisë për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb të Millosheviçit.

Maqedonia e Veriut raporton 127 raste të reja me COVID-19 dhe 8 vdekje

Shkup

Maqedonia e Veriut gjatë 24 orëve ka regjistruar 127 raste të reja të koronavirusit të ri (COVID-19), transmeton Anadolu Agency (AA)

Me këtë, numri i përgjithshëm i rasteve të regjistruara në vend është rritur në 9.153.

Ministria e Shëndetësisë njoftoi se gjatë ditës së fundit po ashtu janë raportuar 8 vdekje të reja nga COVID-19, me çka numri i përgjithshëm i vdekjeve është rritur në 422.

Maqedonia e Veriut deri më tani ka kryer 85.829 teste të dyshuara për COVID-19, përfshirë 904 teste të kryera gjatë ditës së fundit.

Numri i pacientëve të shëruar nga koronavirusi në vend është 4.810, prej të cilëve 83 në 24 orët e fundit, ndërsa numri i rasteve aktive 3.921.

Maqedoni e Veriut: A do bashkohen shqiptarët për ta bërë kryeministrin e parë shqiptar?

Në Parlamentin e Maqedonisë së Veriut, për herë të parë në histori do të ulen 33 shqiptarë. Rezultatet e zgjedhjeve të fundit parlamentare të mbajtura më 15 korrik nxorën fitimtare partinë e Ali Ahmetit, BDI-në me 15 deputetë, e ndjekur nga koalicioni mes Aleancës për Shqiptarët dhe Alternativës me 12 deputetë, PDSH-ja e Menduh Thaçit 1 mandat ndërsa koalicioni “Mundemi” gëzon 5 deputetë shqiptarë, 1 i LSDM-së dhe 4 të Lëvizjes Besa.

BDI-ja morri besimin e mbi 100 mijë shqiptarëve të Maqedonisë pasi që ngriti kauzën për kryeministrin e parë shqiptar në Maqedoni të Veriut, pozitë kjo e paprekur asnjëherë më parë nga një shqiptar.

Kryetari i Bashkimit Demokratik për Integrim Ali Ahmeti, kujton se nuk ka qenë e lehtë që të thyhen tabutë e të merren pozicionet kyçe në shtet (Kryeparlamentari, Ministri i Mbrojtjes, Ministri i Punëve të Brendshme etj) por thotë se me insistimin e duhur dhe me bashkimin e forcave politike mund të jetësohet edhe ëndrra për kryeministrin e parë shqiptar në Maqedoni.

Ditëve në vijim, sipas informatave që ka siguruar Gazeta Express në Maqedoni, pritet që të takohen krerët e partive politike shqiptare, edhe atë si vend takim mësohet të jetë Kalaja e Shkupit.

Kreu i BDI-së një ditë pas zgjedhjeve ka kontaktuar me të gjithë liderët e partive të tjera politike. Nuk dihet saktë se për çfarë kanë biseduar konkretisht, megjithatë, jo zyrtarisht mësohet se janë koordinuar për takimin që pritet të mbahet.

Kreu i LSDM-së Zoran Zaev para zgjedhjeve tha se nuk do të pranojë kushte të tilla nga BDI-ja (pra kërkesën për kryeministrin e parë shqiptar) dhe se do të kërkonte deputetët e VMRO-DPMNE-së nëse do të ishte nevoja për të bërë qeverinë.

Tani të dy partitë maqedonase, edhe VMRO-DPMNE-ja por edhe LSDM-ja nuk kanë numra të mjaftueshëm për të bërë shumicën prej 61 mandatesh. Të dyja ndajnë nga 46 deputet (LSDM+BESA=46 dhe VMRO-DPMNE + E MJATA=46) dhe në çdo kombinim të mundshëm nuk mund të bëjnë shumicë pa BDI-në nëse nuk shkëmbejnë deputet me njëra-tjetrën, me të vetmin qëllim që mos jetësohet ëndrra për kryeministrin e parë shqiptar.

Në një emision debativ, Ali Ahmeti pak sa me cinizëm tha se nëse partitë maqedonase bëhen bashkë për të mos lejuar një kryeministër shqiptar, atëherë edhe partitë shqiptare do të bëhen bashkë për të marr atë që u takon, duke lënë shumë gjëra për të nënkuptuar!

Partitë politike shqiptare ende nuk kanë reflektuar në kërkesën e Ali Ahmetit për tu bërë bashkë, megjithatë pritet që ditëve të bëhen të qarta vendimet e tyre.

Pasi të kalojnë afatet ligjore që parashihen në Kodin Zgjedhor, Presidenti i Maqedonisë së Veriut Stevo Pendarovski do t’i japë mandatin kreut të LSDM-së Zoran Zaev për formimin e shumicës parlamentare për formimin e qeverisë. E nëse Zaev dështon që të bëjë mbi 61 deputet në afat 20 ditorë, atëherë mandati i kalon partisë së dytë që në këtë rast është VMRO-DPMNE-ja.

Në opinion qarkullojnë skenarë të ndryshëm për ecurinë e ngjarjeve në Maqedoni, disa prej të cilave edhe jo të këndshme për tu dëgjuar, megjithatë mbetet të shihet se si do të reagojnë liderët dhe partitë e tyre në momente të caktuara, që pritet të jenë jo të lehta për të dy palët.

Sipas burimeve jozyrtare, në opsion mbetet edhe pozita e kryeministrit me rotacion, nga 6-18 muaj për partnerin shqiptar ndërsa pjese e mbetur e mandatit t’i takojë palës maqedonase.

Shqiptarët në Maqedoni të Veriut për herë të parë fitojnë 33 deputetë në Kuvend

Për herë të parë në Maqedoninë e Veriut, paritë shqiptare kanë fituar 33 mandate në Kuvend.

Ka disa palë zgjedhje që garojnë.

Por, për herë të parë partitë shqiptare në Maqedoninë e Veriut, kanë arritur të fitojnë 33 ulëse në Kuvend.

Më së shumit deputetë ka fituar Bashkimi Demokratit për Integrim, të cilën e drejton Ali Ahmeti.

Kjo parti ka fituar 15 mandate.

Pas saj me 12 deputet rendite koalicioni Aleanca për Shqiptarët dhe Alternativa, të cilën e kryeson Zijadin Sela.

Ndërkohë, katër ulëse në kuvend ka fituar edhe Lëvizja Besa, që hyri në koalicion me LSDM-në.

E një deputet ka fituar edhe Partia Demokratike Shqiptare, që udhëhiqet nga Menduh Thaci.

Ndërkohë, suksesi i këtyre zgjedhjeve po shihet si pozicion i mirë i shqiptarëve në Maqedoninë e Veriut.

Sipas profesorit Nuri Bexhetit kjo situatë ka ardhur për shkak se shqiptarët atje kanë rritur potencialin e tyre. Sipas tij tashmë qeveria e re patjetër do të varet nga shqiptarët.

Nga certifikimi i rezultateve fillon rrjedhja e afateve kushtetuese për konstituimin e Kuvendit, me të edhe bisedimet për koalicione.

Ndërkohë, zgjedhjet në Maqedoninë e Veriut i ka fituar LSDM e Zoran Zaevit.

Zgjedhjet parlamentare në Maqedoninë e Veriut, dalin rezultatet paraprake

Komisioni Shtetëror Zgjedhor (KSHZ) i Maqedonisë së Veriut njoftoi se nga 93,96 për qind e të dhënave të vendvotimeve të përpunuara në mbarë territorin e vendit, koalicioni “Mundemi” i udhëhequr nga Lidhja Social-Demokrate e Maqedonisë (LSDM) kryeson në zgjedhjet e parakohshme parlamentare me 36,13 për qind të votave, raporton Anadolu Agency (AA).

Siç njoftoi zëdhënësi i KSHZ-së, Admir Shabani, pas koalicionit të udhëhequr nga LSDM, me një rezultat të ngushtë pason koalicioni VMRO-DPMNE, i cili sipas rezultateve fillestare fitoi 34,65 për qind të votave.

Shabani tha se Bashkimi Demokratik për Integrim (BDI) ka fituar 11.57 për qind t votave, Aleanca për Shqiptarët dhe Alternativa 8.97 për qind, partia politike E Majta 3,96 për qind, Partia Demokratike Shqiptare (PDSH) 1,48 për qind dhe Integra 1.33 për qind të votave.

I pyetur nga gazetarët lidhur me mosqasjen në faqen zyrtare të KSHZ-së për monitorimin e rezultateve të zgjedhjeve, Shabani tha se bëhet fjalë për “një sulm të jashtëm të hakerave në platformën ku rezultatet tregohen për publikun”. Mbi këtë çështje, tha ai, më shumë informacione do të njoftojnë në periudhën e ardhshme.

Sipas Listës Zgjedhore të KSHZ-së, të drejtë vote kishin 1.814.263 qytetarë për të zgjedhur 120 ulëse në Kuvendin e Maqedonisë së Veriut, ku në garë morën pjesë 15 koalicione dhe parti politike me 1.560 kandidatë.

Zgjedhjet e parakohshme parlamentare u hapën në ora 07:00 dhe u mbyllën në orën 21:00. Sipas rezultateve të fundit nga KSHZ, deri në orën 20:45 jehona e votuesve ishte 50,86 për qind apo 830.370 qytetarë shfrytëzuan të drejtën e tyre të votës.

Procesi i votimit në këto zgjedhje të parakohshme parlamentare për herë të parë u zhvillua tri ditë për shkak të pandemisë së koronavirusit të ri (COVID-19).

Në dy ditët e kaluara, më 13 dhe 14 korrik, votuan personat e infektuar me COVID-19 dhe ato në vetizolim, si dhe personat e sëmurë dhe të pafuqishëm, personat në shtëpi pleqsh, të burgosurit dhe personat e zhvendosur në Qendrën e Personave të Zhvendosur.

Zaev: Rruga përpara u konfirmua

Kreu i LSDM-së, Zoran Zaev, që udhëhoqi me koalicionin “Mundemi”, shpalli fitore në zgjedhjet e parakohshme parlamentare të mbajtura më 15 korrik.

Në fjalimin e tij para shumë simpatizantëve partiakë, Zaev u zotua se do të vazhdojë edhe më fuqishëm në zbatimin e reformave.

“Qytetarët votuan për një të ardhme të sigurt, për unitet dhe solidaritet, për patriotizëm ekonomik, për rregull dhe drejtësi, dhe kjo është arsyeja pse qytetarët zgjodhën një të sotme më të mirë dhe një të nesërme më të mirë. Rruga përpara është konfirmuar, rrezikut i kemi thënë qartë jo”, theksoi Zaev.

Ai gjithashtu tha se zgjedhjet ishin të qeta, të lira dhe demokratike, “siç i ngjajnë një vendi anëtar të NATO-s dhe i cili hapëron drejt Bashkimit Evropian (BE)”.

“Vijon mbrojtja edhe më e mirë e shëndetit tuaj, shëndetit tonë, shëndetit publik. Vijojnë negociatat me BE-në dhe më në fund, populli im, vijon drejtësia”, tha ai.

Zaev nuk komentoi në lidhje me partnerin e mundshëm të koalicionit për formimin e qeverisë së re, duke shtuar se do të presë deri në shpalljen e rezultateve përfundimtare dhe konfirmimin e mandateve.

Nga ana tjetër, sekretari i përgjithshëm i VMRO-DPMNE-së, Igor Janushev, theksoi se partia e tij hyn në garë për të formuar një shumicë parlamentare për një qeveri të re.

“VMRO-DPMNE po hyn në një garë për të formuar një shumicë për një qeveri të re, sepse qeveria aktuale është e lodhur dhe është koha për ndryshime”, tha Janushev.

Ai tha se sipas rezultateve nga partia e tij, VMRO-DPMNE kryeson në shumicën e qyteteve dhe vendbanimeve, por theksoi se për shkak të modelit proporcional në gjashtë njësi zgjedhore (modeli Dontov) do të presin deri në mëngjes.

Përsa i përket bllokut të partive shqiptare, kreu i BDI-së, Ali Ahmeti, shpalli fitoren duke deklaruar se partia e tij është “fituese absolute” në të gjitha zonat zgjedhore. Ai tha se “kanë fituar shqiptarët, nuk ka humbur askush”.

Po ashtu edhe koalicioni Aleanca për Shqiptarët dhe Alternativa shpalli fitore në bllokun shqiptar, ndërkohë Ziadin Sela, i cili përshëndeti dhe uroi aktivistët e koalicionit të tij, theksoi se në disa vendvotime ka ndodhur “fenomeni i mbushjes së kutive” dhe se do t’i ankimojnë këto rezultate.

Intervista – Ziadin Sela: Shqiptarët kanë nevojë për ndryshim

Në Maqedoninë e Veriut, kryetari i Aleancës për Shqiptarët, Ziadin Sela thotë në një intervistë për Zërin e Amerikës se shqiptarët në këtë vend kanë nevojë për ndryshim dhe se padrejtësitë e diskriminimi kundër tyre duhet të marrin fund. Ai thotë se koalicioni me partinë Alternativa nuk do të hyjë në qeverinë e re pa plotësimin e kushteve që dalin nga programi i tyre. Me zotin Sela bisedoi korrespondenti ynë Isak Ramadani.

ZËRI I AMERIKËS: 15 korriku po afrohet, cilat janë pritshmëritë tuaja, duke qenë se zgjedhjet zhvillohen në rrethana të një krize shëndetësore me koronavirusin që po vjen duke u përhapur edhe më shumë?

ZIADIN SELA: E vërtetë që ne po mbajmë zgjedhje në një situatë të jashtëzakonshme; kuptohet që qytetarët janë të shqetësuar edhe për shëndetin, por paralelisht me këtë është i rëndësishëm edhe shëndeti i sistemit. E shëndeti i sistemit varet nga zgjedhjet dhe nga institucionet kryesore që do të duhet të jenë në një shtet dhe gjithçka nis nga konsolidimi i parlamentit dhe themelimi i institucioneve të shtetit, të cilat kanë legjitimitetin e qytetarëve. Kuptohet, këto zgjedhje kanë një simbolikë dhe janë të rëndësishme sidomos për shqiptarët këtu në Maqedoininë e Veriut, sepse pritshmëritë tona janë që përfundimisht të vijë demokracia brenda përbrenda shqiptarëve, për shkak se ka 18 vjet që shqiptarët jetojnë në monizëm, për shkak se nuk ka pasur ndërrim pushteti te ta dhe me këtë ne presim që të ndodhë ndryshimi dhe të kthehet shpresa tek qytetarët për një jetë më të mirë.

ZËRI I AMERIKËS: Cila është oferta juaj për elektoratin shqiptar?

ZIADIN SELA: Programi ynë i koalicionit Aleanca-Alternativa është i titulluar “Shtet për të gjithë” në të cilin janë të parashikuara gjashtë shtylla kryesore dhe mbi 200 masa imediate të cilat duhet të merren. Shtylla e parë është barazia e plotë, kuptohet që ne jemi duke punuar që t’i heqim edhe ato mbetjet diskriminuese të Kushtetutës dhe disa definicione për të drejta për të cilat kanë për qëllim që shqiptarët t’i bëjnë të përkohshëm këtu në trojet e tyre. Fjalën e kam për definicionin për ligjin për gjuhë shqipe, që është skandaloz dhe pas zgjedhjeve ne gjuhës shqipe do t’i themi gjuhë shqipe dhe jo “gjuha të cilën e flasin mbi 20% e popullatës dhe e ndryshme nga maqedonishtja”. Kuptohet, një ndër masat është ruajtja e kapitalit njerëzor. Ne synojmë që t’u japim fund kësaj pabarazie dhe diskriminimit që po na bëhet dhe që po na merren vendet e punës vetëm me një deklaratë që politikisht është e orkestruar nga ana e partisë që është në pushtet e me mijëra vende pune u zihen shqiptarëve.

ZËRI I AMERIKËS: Si do të arrini t’i realizoni këto? Ndryshimi i terminologjisë që gjuhën shqipe në kushtetutë e përcakton si “gjuha të cilën e flasin mbi 20% e popullatës…” kërkon ndryshime kushtetuese, apo jo?

ZIADIN SELA: S’ka pasur disponim për ta sjellë ligjin e gjuhëve as kur ishim ne brenda atyre 100 ditëve në qeveri. Në momentin që legjitimohet programi ynë, atëherë natyrisht që do të ketë kushte për krijimin e qeverisë. Aq më tepër që politikanët maqedonas do të duhet të jenë të vetëdijësuar, sepse sjellja e tyre ndaj gjuhës sonë është e njëjtë siç është sjellja e, bile akoma më keq, e Bullgarisë ndaj gjuhës së tyre, kur u thotë që gjuha maqedone duhet të quhet “gjuhë zyrtare” dhe gjuhë maqedone. Sjellja ndaj gjuhës shqipe është akoma më skandaloze e politikanit maqedonas.

ZËRI I AMERIKËS: Jo vetëm me fillimin zyrtar të fushatës por edhe shumë më herët duket sikur çështje kryesore e keni si ta rrëzoni BDI-në nga pushteti dhe kësaj i kushtoni një hapësirë të madhe në paraqitjet tuaja. A prisni që kjo retorikë të dalë me sukses?

ZIADIN SELA: Nuk është e vërtetë që një ndër çështjet kryesore e kemi se si ta rrëzojmë BDI-në, por nga ana tjetër, e vërteta është që BDI-së i duhet pak opozita sepse besojmë që kanë menaxhuar keq me verdiktin e shqiptarëve këto 18 vjet sa kanë qenë në qeveri dhe si të tillë do të duhet të shkojnë në opozitë. Por, ne nuk e kemi atë motivin kryesor; ne duam t’i çlirojmë shqiptarët, sepse këto janë shndërruar në të njejtën kohë në ata të cilët shantazhojnë, kërcënojnë, u hyjnë me dhunë në shtëpi shqiptarëve duke i kërcënuar me vende pune.

ZËRI I AMERIKËS: Sipas analizave tuaja, sa deputetë do të fitoni në koalicion me Alternativën?

ZIADIN SELA: Kjo është çështje e verdiktit të qytetarëve shqiptarë, të cilët do ta përkrahin këtë koalicion. Pa dashur që të spekuloj, ne do të jemi mbi dhjetë deputetë.

ZËRI I AMERIKËS: Si do t’i bëni reformat në drejtësi, në këtë shtet ku shkalla e korrupsionit sipas organizatave ndërkomnbëtare është mjaft e lartë?

ZIADIN SELA: Duke krijuar kushte, në mënyrë që të dahet gjyqësi, e jo të politizohet dhe etnizohet gjyqësia. Brenda 100 ditëve qeveria e Maqedonisë së Veriut do t’i drejtohet BE-së për të sjellë grup monitorues gjykatësisht dhe prokurorësh të cilët do t’i hapin lëndët tashmë të mbyllura; pastaj, monitorimi i përhershëm në Gjykatën për krim të organizuar këtu në Shkup i çdo seance gjyqësore që në të ardhmen të mos ndikojë politika si pasojë e monitorimit ndërkombëtar në vendimet e gjykatës këtu; Pastaj vetingu, i cili duhet të ndodhë patjetër dhe sa më shpejtë në kuadër të sistemit gjyqësor në Maqedoninë e Veriut dhe e para nga të gjitha këto është ndryshimi. Një shoqëri është demokratike dhe më e avancuar kur sa më shpesh ndryshohet partia politike që qeverisë, sepse llogaridhënia për formën se si ke qeverisur jepet pasi shkon në opozitë.

ZËRI I AMERIKËS: A shikoni reforma në partinë VMRO-DPMNE pas largimit të Nikolla Gruevskit dhe a jeni të gatshëm të hyni në koalicionin qeverisës me të nëse ajo i fiton zgjedhjet?

ZIADIN SELA: Jo që s’shoh reforma atje, por kam përshtypjen se edhe këto të tjerët po gruevizohen dal-ngadalë, këta të LSDM-së… dhe një ndër problemet kryesore që ka qenë me VMRO-në që nisi orientimi i tyre nga Lindja ishte fakti që ata u shndërruan në oligarkë dhe oligarku e kërkon strehën tek oligarku më i madh i botës që është Putini dhe Rusia. Dhe unë kam shqetësimin se në të njëjtin drejtim po lëvizë edhe LSDM-ja. Për t’iu përgjigjur pyetjes: ditën që ne marrim vota, ne nuk jemi më emra e mbiemra të përveçëm por jemi premtimi, programi që kanë votuar shqiptarët dhe që duhet të realizohet.

ZËRI I AMERIKËS: Si i shikoni debatet lidhur me mundësinë e ofrimit të disa deputetëve nga partitë maqedonase njëra-tjetrës në mënyrë që të mos ndjehen të kushtëzuara dhe shantazhuara, siç thonë vetë, nga shqiptarët, për të arritur numrin e nevojshëm për formimin e qeverisë?

ZIADIN SELA: E rrezikshme. Lojë politike, teatër në sytë e qytetarëve për të marrë ndonjë votë më tepër. Kjo lojë politike, në qoftë se do të ishte e njëmendtë, do të ishte e rrezikshme. A nga ana tjetër, për çka kushtëzojmë ne? Për një të drejtë që na takon me kushtetutë, për një të drejtë, e cila na takon edhe ne si të gjithë të tjerëve dhe nuk po kërkojmë diku tjetër t’i marrim dhe po mbajmë balancën e Maqedonisë (së Veriut) që të mos lëvizë drejt krijimit të një shteti monoetnik. Sepse ka një realitet binacional dhe shumëetnik. Në qoftë se do të bëjnë diçka të tillë, ata i përjashtojnë shqiptarët nga sistemi. Dhe kur dikush të përjashton nga sistemi është legjitime që ti ta bojkotosh atë sistem dhe atëherë imponohet ideja që të bësh sistem paralel. Këtë e dinë shumë mirë edher zoti Zaev edhe zoti Mickovski, por thjesht janë lojra politike që të marrin ndonjë votë më tepër, por janë lojra politike të rrezikshme.

ZËRI I AMERIKËS: A keni preferenca lidhur me partnerin qeveritar maqedonas pas 15 korrikut?

ZIADIN SELA: Perëndimin. NATO-n dhe BE-në. Gjithsecili që afrohet në derën tonë dhe synon t’i kthejë prapa disa dokumente që e kanë çuar vendin përpara, natyrisht që as nuk do të ulemi për të biseduar me ta.

Pendarovski: Srebrenica, kujtim i një virusi të rrezikshëm të intolerancës ndaj të ndryshmëve

Srebrenicë

Presidenti i Maqedonisë së Veriut, Stevo Pendarovski në një video-mesazh në përkujtimin e sotëm me rastin e 25-vjetorit të gjenocidit të Srebrenicës tha se ngjarjet e korrikut të vitit 1995 janë një kujtim i një virusi të rrezikshëm të intolerancës ndaj të ndryshmëve, raporton Anadolu Agency (AA).

“Përpara 25 vitesh ndodhi gjenocidi në Srebrenicë, kur më shumë se 8.000 njerëz, kryesisht burra dhe djem, u vranë sistematikisht vetëm sepse ata ishin boshnjakë. Kjo është pa dyshim një nga ngjarjet më të errëta në historinë moderne evropiane për të cilën nuk ka asnjë arsyetim racional. Disa nga kriminelët tashmë janë përballur me drejtësinë përpara Gjykatës Ndërkombëtare të Drejtësisë. Disa nga të mbijetuarit mblodhën guximin për të parë në sytë e ekzekutuesve të tyre dhe për të falur ata që u penduan për krimet e tyre. Por shumë njerëz akoma jetojnë me trauma të tmerrshme, duke shtuar këtu edhe mohimin dhe relativizimin e së vërtetës për krimet”, tha Pendarovski dhe vazhdoi:

“Qendra memoriale dhe nënat e Srebrenicës me mesazh të qartë na ballafaqojnë me të kaluarën kolektive dhe ndërgjegjen e gjeneratës sonë. Ata nuk nxisin urrejtje dhe as kërkojnë hakmarrje, sepse kjo thellon padrejtësinë. Ata kërkojnë të vërtetën dhe drejtësinë vetëm si parakusht për paqen”.

Pendarosvki theksoi se historia, jo vetëm në Ballkan, na mëson se idetë rreth territoreve të pastra etnike gjithmonë çojnë në tragjedi dhe se luftërat e fundit ballkanike kanë treguar se gjenocidi mund të përsëritet edhe pas holokaustit.

“Nëse një gjeneratë nuk flet, gjenerata tjetër do të harrojë, gjë që krijon tokë pjellore për konflikte të reja. Përveç kujtimeve, alternativat bëhen përmes edukimit që promovon solidaritetin dhe dhembshurinë për të tjerët. Duke respektuar dinjitetin e lindur të secilit person, uniteti i diversitetit mbrohet nga mekanizmat që luftojnë padrejtësinë sistemike. 25-vjetori i gjenocidit të Srebrenicës vjen në një kohë të pandemisë së COVID-19, e cila po vret mijëra njerëz në të gjithë botën çdo ditë”, tha Pendarovski duke shtuar se:

“Srebrenica është një kujtim i një virusi të rrezikshëm të intolerance ndaj të ndryshmëve. Të ndërtojmë shoqëri në të cilat do të ketë vende për secilin nga ne, të ndërtojmë një shtëpi ku ne mund të pranojmë njëri-tjetrin pavarësisht nga dallimet tona, sepse ne të gjithë jemi qenie njerëzore”.

Kujtojmë se më shumë se 8.000 meshkuj myslimanë boshnjakë u vranë pasi forcat serbe sulmuan “zonën e sigurt” të Srebrenicës në korrik të vitit 1995, pavarësisht pranisë së trupave holandeze të ngarkuara për të vepruar si paqeruajtës ndërkombëtarë.

Vdes në Shkup nga COVID-19 mjeku specialist Arifikmet Deari nga Tetova

Në Maqedonisë e Veriut ka vdekur mjeku i parë i diagnostikuar me sëmundjen COVID-19. Bëhet fjalë për mjekun specialist Arifikmet Deari nga Tetova.

Ministri i Shëndetësisë Venko Filipçe ka njoftuar se Deari para 15 ditëve ishte shtruar në spitalin e Shkupit për shkak të probleme neurologjike, por se i njëjti ka qenë pozitiv edhe me COVID-19.

Maqedonia e Veriut të dielën gjithashtu ka njoftuar edhe për shtatë persona të vdekur nga koronavirusi i ri, që shkakton sëmundjen COVID-19 dhe 115 të infektuar.

“Mjeku Deari, i cili kishte vetëm edhe disa muaj deri në pension, është mjeku i parë që ka vdekur nga komplikimet e ka shkaktuara koronavirusi. Shpreh keqardhjen time të thellë për familjen e tij. I bëj thirrje të gjithë punonjësve shëndetësorë që të ruhet dhe mbrohen në vendet e tyre të punë bazuar në protokollet në fuqi, por edhe jashtë institucioneve shëndetësore. I bëjë thirrje edhe qytetarëve që të respektojnë masat, të mbrojnë veten e tyre, punonjësit shëndetësor dhe të gjithë të tjetër”, thuhet në reagimin e Ministrit të Shëndetësisë, Venko Filipçe.

Që nga fillimi i pandemisë, në Maqedoninë e Veriut me koronavirus janë infektuar 540 mjekë apo 9 për qind e të gjithë të infektuarve me koronavirus.

Nga testimi i 66,133 mostrave, të infektuar me koronavirus janë 6,932 persona, prej tyre 334 kanë ndërruar jetë, 3,611 janë ende aktivë, ndërsa 2,987 persona janë shëruar. rel

Fillon fushata zgjedhore, BDI garon me idenë për kryeministër shqiptar

Partia shqiptare në pushtet në Maqedoninë e Veriut, Bashkimi Demokratik për Integrim, fushatën për zgjedhjet e parakohshme parlamentare e ka filluar në Prespë, qytet ky në jug të Maqedonisë së Veriut, duke vënë theksin në idenë e madhe, siç e kanë quajtur, për zgjedhjen e kryeministrit të parë shqiptar, përmes promovimit të Naser Ziberit si kandidat për këtë post.

Kandidati për kryeministër shqiptar, Naser Ziberi, në konventën promovuese të Bashkimit Demokratik për Integrim në Prespë, të mërkurën ka theksuar se në këtë moment “i gjithë vendi po flet, por jo vetëm vendi, po flet rajoni, po flet komuniteti ndërkombëtar për një ide e cila mund të behet realitet”.

“I thash po kandidaturës (për kryeministër shqiptar) se kjo ide është më e madhe se sa unë, kjo ide është më e madhe se vetë BDI (Bashkimi Demokratik për Integrim). Unë nuk do ta kisha pranuar këtë propozim sikur të mos bindesha se ky është një projekt kombëtar. Sikur të mos bindesha se përmes kësaj ideje do ta faktorizojmë popullin shqiptar në Republikën e Maqedonisë së Veriut edhe më tepër”.

“Këto janë arsyet se pse jam i gatshëm dhe përgjegjës të angazhohem në këtë kauzë, të kandidojë për kryeministër në emër të komunitetit shqiptar të Maqedonisë së Veriut“, ka theksuar Ziberi.

Por, paraprakisht, duke komentuar idenë e Bashkimit Demokratik për Integrim për kryeministër shqiptar, Naser Ziberi ish-deputet i partisë për Prosperitet Demokratik e cila parti është shuar, për Radion Evropa e Lirë tha se kjo ide që është promovuar si ide e madhe që duhet mbështetur nga të gjithë shqiptarët në asnjë mënyre nuk është ide e madhe që do të bëjë kthesë për sa i përket interesave të votuesve shqiptarë.

“Unë mendoj se ide të mëdha Maqedonia nuk ka në dispozicion dhe ofertat e ideve të mëdha kanë mbaruar, siç ishin euro-integrimet, zgjedhja e kontestit të emrit. Oferta, slogani për kryeministër shqiptar nuk është ide e madhe, e dhe ajo nuk mund të jetë atraktive për të bërë ndonjë kthesë radikale në dispononim e votuesit dhe sidomos votuesit shqiptar, prandaj nuk pres ndonjë kthesë të rëndësishme në këtë drejtim”.

“Përkundrazi, një numër i madh i qytetarëve veç më e kanë të formuar bindjen e tyre, aq më tepër kur kjo fushatë zgjedhore nuk do të jetë në stilin e tubimeve, tribunave, mitingjeve të mëdha ku do të mund të krijohet një dispononim momental për të animuar votuesin për zgjedhje”, kishte deklaruar vetëm katër ditë më parë për Radion Evropa e Lirë, Naser Ziberi.

Përderisa koalicioni Aleanca për Shqiptarët dhe Alternativa nën moton “tash është koha” konventën promovuese e kanë caktuar për të enjten në Tetovë.

Partia maqedonase në pushtet, Lidhja Social-Demokrate e Maqedonisë me sloganin “Shkojmë në fitore” fushatën e ka filluar duke vendosur theksin në të arriturat e kësaj partie gjatë qeverisjes 3-vjeçare, përkatësisht anëtarësimet e vendit në NATO dhe procesin e fillimit të bisedimeve për anëtarësim në BE, pa lënë anash dhe rritjen e standardit jetësor.

Përderisa partia maqedonase VMRO DPMNE në zgjedhje futet me sloganin për “ripërtërije” pasi siç theksojnë shteti gjatë qeverisjes së socialdemokrateve ka humbur dinjitetin si në rrafshin e brendshëm dhe atë ndërkombëtarë. VMRO-DPMNE në fokus të fushatës zgjedhore ka vendosur realizimin e ë shumë projekteve kapitale, uljen e papunësisë dhe ripërtëritjen ekonomike.

Presidenti i Maqedonisë, Stevo Pendarovski, me rastin e fillimit të fushatës për zgjedhjet e parakohshme parlamentare të mërkurën u ka bërë thirrje të gjitha palëve që janë futur në garë të angazhohen për mbajtjen e zgjedhjeve parlamentare sipas standardeve dhe kritereve të larta, duke e pasur parasysh gjithnjë perspektivën euroatlantike të shtetit.

“Pres të gjitha partitë politike të organizojnë fushatë në të cilën pjesëmarrja do të jetë e sigurt për të gjithë, edhe për kandidatët, edhe për qytetarët. Pres nga të gjitha partitë politike fushatë dinjitoze, me nivel të lartë të kulturës politike, pa diskreditime”, ka theksuar presidenti i shtetit, Stevo Pendarovski.

Dënohet me 7 vite burg ish-kryeprokurorja speciale Janeva

Shkup

Gjykata në Maqedoninë e Veriut sot i shpalli fajtorë të akuzuarit në rastin “Zhvatja” Bojan Jovanovski dhe ish prokuroren speciale Katica Janeva, transmeton Anadolu Agency (AA).

I akuzuari i parë Jovanovski u dënua me burg prej 9 vitesh ndërsa Janeva u dënua me 7 vite burg.

Gjykata e shpalli fajtor Bojan Jovanovskin për veprat e kryera penale “marrje të shpërblimit për ndikim të jashtëligjshëm” dhe për “larje parash”, ndërsa Katica Janeva për “keqpërdorim të pozitës zyrtare dhe autorizimeve”. Janeva nuk ishte e pranishme në leximin e dënimit. Ajo dorëzoi njoftim se nuk mund të marrë pjesë për arsye familjare.

Në përshkrimin e aktit të aktakuzës të ngritur nga Prokuroria për luftë kundër krimit të organizuar dhe korrupsionit, thuhej se i akuzuari Jovanovski, ka ndikuar tek e akuzuara Janeva, që ajo të sjellë masa më të buta kundër një biznesmeni, i akuzuar në rastin “Perandoria”, i filluar nga ish-Prokuroria Speciale Publike.

Janeva dhe Jovanovski në fjalitë e tyre përmbyllëse para gjykatës mohuan akuzat dhe theksuan se nuk e kanë kryer veprën. Prokuroria, sipas tyre, “nuk ka dhënë dëshmi për veprën për të cilën i ngarkoi dhe tërë aktakuza është e bazuar në rrëfimin e një dëshmitari, që është i dëmtuar në rastin”.

Gjykimi për rastin “Zhvatja” filloi në nëntor të vitit të kaluar. Aktakuza ishte për tre persona. Në seancën e parë për këtë rast i akuzuari Zoran Milevski-Kiçeec e pranoi fajin dhe u dënua me 3 vite burg.

Kujtojmë se Prokuroria speciale është themeluar si institucion në bazë të marrëveshjes politike të arritur në vitin 2015 mes katër partive politike dhe me ndërmjetësimin e komunitetit ndërkombëtar. Kompetencë e kësaj Prokurorie është hetimi bisedave të përgjuara, në bazë të cilave ka indikacione se funksionarë të lartë të shtetit janë të përfshirë në më shumë afera korruptive dhe keqpërdorim të proceseve zgjedhore.

Grupi i Kumanovës nga burgu: Ambasada e Kosovës nuk na vizitoi kurrë (video)

N’Kosovë Show në emisionin e kësaj jave sjell bisedën me të burgosurit e rastit të Kumanovës.

Biseda është zhvilluar me Genti Sefaj, Muhamet Krasniqi, Fatmir Reçica, Mirsad Qerimi, Sylemjan Osmani, Betim Kabashi, Naser Bardhaliu, Fejzullah Rushiti, Fadil Fejzullahu dhe Bajram Elshani.

Sefaj ka treguar se ata i mban uniteti derisa të gjithë të burgosurit të këtij grupi në burg janë të ndarë në tre sektorë të ndryshëm.

“Jemi bërë si familje këtu”, thotë Sefaj.

“Ne gatuajmë me rend, nuk pranojmë ushqimin e burgut”, theksoi ai.

Ata ankohen se nuk kanë përkrahje nga institucionet e Kosovës. Ata kërkojnë unitet politik në Kosovë.

“Ambasada e Kosovës këtu gjatë gjithë kohës për pesë vjet, me kërkesat tona e prapë nuk vjen me na vizitu. Nuk na shërbejnë me dokumente pasi disa kanë nevojë për letërnjoftime, që u ka dalë afati dhe u duhet për martesë ose diçka tjetër. Nuk kujdeset ambasada e shtetit të Kosovës. Nuk e di pse kanë frikë”, thonë ata.

“Do të donim që shqiptarët të ishin më solidarë, jo vetëm në ditët e Bajramit, në veçanti për ata në nevojë. Shqiptarët të jenë më shumë në harmoni me njëri-tjetrin”, theksojnë të burgosurit.

Gjykata Themelore e Shkupit më 2017 ka dënuar me gjithsej 746 vjet burg pjesëtarët e grupit të Kumanovës, të akuzuar për terrorizëm për ngjarjet e 9 dhe 10 majit të vitit 2015.

Ndryshe, në përleshjet dyditëshe më 9 dhe 10maj të vitit 2015, janë vrarë 8 pjesëtarë të forcave policore dhe 10 pjesëtarë të grupit të armatosur.

Grupi kishte deklaruar se vendosja e tij në Kumanovë ishte bërë për shkak të shkeljes së të drejtave të shqiptarëve në Maqedoni.

Presidenti i Maqedonisë së Veriut: Prekja e kufijve është e rrezikshme, dëmton gjithçka që është arritur

Presidenti i Maqedonisë së Veriut, Stevo Pendarovski, është kundër idesë së korrigjimit të kufijve mes Kosovës dhe Serbisë. Sipas tij, një zgjidhje që mund të vijë përmes një ideje të tillë do të ketë efekte të dëmshme për rajonin dhe do të vërë në rrezik gjithë progresin që është bërë në 20 vjetët e fundit. Pendarovski ndërkohë mbështet përpjekjet e SHBA-së dhe BE-së në raport me dialogun Kosovë-Serbi dhe thotë se është për një marrëveshje kompromisi mes Prishtinës dhe Beogradit që ka garancinë e fortë ndërkombëtare dhe që i kontribuon stabilitetit.

Tema e korrigjimit të kufijve dhe e shkëmbimit të territoreve është rikthyer përsëri në qendër të vëmendjes pas një interviste të Përfaqësuesit të Lartë të BE-së, Josep Borell, i cili shfaqi qëndrimin e tij jokundërshtues ndaj një ideje të tillë. Sipas tij, janë Kosova dhe Serbia ato që vendosin se për çfarë merren vesh dhe jo Brukseli.

Në Kosovë në mënyrë konstante i gjithë faktori politik e ka kundërshtuar një nismë që do të çonte në ndryshimin e kufijve mes Kosovës dhe Serbisë.

Kundër prekjes së kufijve janë edhe udhëheqësit në shtetet fqinje. Presidenti i Maqedonisë së Veriut, Stevo Pendarovski, thotë se një ide e tillë mund të ketë efekt të dëmshëm dhe të minojë gjithë përpjekjet që janë bërë për rimëkëmbjen e Ballkanit Perëndimor dhe për krijimin e shoqërive shumetnike në rajon.

Kështu kanë thënë ekskluzivisht për Gazetën Express nga zyra për media e Presidencës së Maqedonisë së Veriut.

“Presidenti Pendarovski beson se zgjidhjet që mund të çojnë në korrigjimin e kufijve dhe shkëmbimin e tokës dhe njerëzve mund të kenë ndikim të pafavorshëm në rajon dhe efekt të dëmshëm për përpjekjet gjithëpërfshirëse të bëra në rimëkëmbjen pas konfliktit të rajonit dhe në ndërtimin e shoqërive të qëndrueshme multi-etnike”, ka thënë për Gazetën Express, Biljana Radeva.

Radeva ka thënë se presidenti Pendarovski ndjek në vazhdimësi zhvillimet lidhur me dialogun mes Prishtinës dhe Beogradit dhe se mbështet plotësisht përpjekjet e Shteteve të Bashkuara të Amerikës dhe Bashkimit Evropian për rinisjen e dialogut në të ardhmen.

Gjithashtu kreu i shtetit maqedonas thotë se është në interes ta rajonit dhe të Evropës në përgjithësi që të gjendet një zgjidhje që do të ishte në të mirën e Kosovës dhe Serbisë.

“ Presidenti Pendarovski beson fuqimisht se është në interes të rajonit të Ballkanit Perëndimor dhe kontinentit Evropian në tërësi që çështja midis fqinjëve tanë veriorë zgjidhet në interesin më të mirë të dy palëve. Prandaj, ne do të jemi mbështetës për një zgjidhje mes Kosovës dhe Serbisë, e cila ka garanci të forta ndërkombëtare dhe forcon stabilitetin dhe sigurinë rajonale, kështu, duke i hapur rrugën bashkëpunimit të zgjeruar rajonal”, ka thënë Radeva për Gazetën Express.

Në fund, nga zyra për media e presidencës maqedonase thonë se Pendarovski e kupton faktin se mund të ketë pikëpamje të ndryshme rreth asaj se si duhet të zgjidhet problemi mes Kosovës dhe Serbisë, dhe fton palët e përfshira në proces që të ndërtojnë besim të ndërsjellë dhe të ulin tensionet në mënyrë që të ecet përpara drejt një kompromisi mes Kosovës dhe Serbisë.

“Ndërsa kuptojmë se mund të ketë pikëpamje të ndryshme për të zgjidhur këtë çështje afatgjatë dhe komplekse, besojmë se palët e përfshira në proces duhet të përqendrohen në ndërtimin e besimit të ndërsjellë dhe uljen e tensionit si një parakusht esencial drejt hapjes së diskutimeve thelbësore që përfundimisht do të çojnë tek kompromisi midis Kosovës dhe Serbisë”, thuhet ndër të tjera në përgjigje.

Kundër idesë së korrigjimit të kufijve është deklaruar edhe Ministri i Punëve të Jashtme të Gjermanisë, Heiko Mass. Në një debat të mbajtur në Bungestag gjatë së mërkurës, Mass ka thënë se një ide e tillë prolongon edhe më tej gjetjen e një zgjidhje për dialogun mes Kosovës dhe Serbisë dhe sipas tij lëvizja e kufijve apo shkëmbimi i territoreve çon në një rrugë qorre.

Se korrigjimi i kufijve mes Kosovës dhe Serbisë nuk i kontribuon stabilitetit të rajonit edhe ka thënë edhe emisari i BE’së, Miroslav Lajçak. Gjithashtu njohës të rajonit dhe ekspert të huaj kanë ngritur shqetësimet e tyre në mënyrë të vazhdueshme se një ide e tillë është e rrezikshme dhe se mund të krijojë një efekt zinxhir të destabilitetit në të gjithë rajonin.

Publikisht për idenë e korrigjimit të kufijve për herë të parë kishin folur në vitin 2018, presidenti i Kosovës, Hashim Thaçi, dhe ai i Serbisë, Aleksander Vuçiq, gjatë një forumi në Alpabach të Austrisë.

Kancelarja gjermane, Angela Merkel, e kishte kundërshtuar ashpër një ide të tillë, derisa kishte organizuar edhe një Samit në Berlin, që thuhej se ishte bërë për të bindur edhe presidentin francez, Emannuel Macron për të pasur qëndrim të ngjashëm për një ide të tillë.

Ekspertë të ndryshëm kishin thënë se një ide e tillë ishte varrosur në atë Samit, megjithatë zhvillimet aktuale vërtetojnë deklaratën e ekspertit amerikan, Daniel Serwer, të dhënë për Gazetën Express kohë më parë se “ideja e korrigjimit të kufijve s’ka vdekur dhe se është si një kufomë që po vazhdon të endet vërdallë”.

Zaev përfundon dëshminë për rastin “Monstra”

Ish-kryeministri dhe drejtuesi aktual i LSDM-së, Zoran Zaev, dëshmoi sot në gjykatë se çfarë materialesh kishte dëgjuar për çështjen “Monstra” dhe ku janë ato aktualisht.

“Të gjitha dëshmitë audio dhe transkriptimet që kisha për këtë rast, në fund të vitit 2015, ia dorëzova Prokurorisë Speciale. Unë kam pasur një milion apo më shumë biseda dhe mesazhe me tekst që nga regjistrimi, disa prej tyre kanë qenë edhe në këtë rast, këto janë ndarë me publikun, por është një pjesë e vogël. Pashë biseda në formën e transkriptimeve, të cilat ishin pjesë e materialit, dhe u identifikuan me emrin dhe mbiemrin e disa prej personave të dënuar të atëhershëm, të njohur për publikun dhe aktgjykimin, rreth 180 faqe. Verdikti ishte gjithashtu i disponueshëm për mua dhe prej andej pashë emrat e të dënuarve, gjatë seancave dëgjimore, dëshmitarëve dhe të ngjashme. Askush nuk mund të bëjë një përzgjedhje, por kur shohim një transkriptim të një bisede midis, për shembull, Z. Fejzi Aziri dhe një personi tjetër, ju e dini që ky është personi i dënuar atëherë me një aktgjykim të shkallës së parë ”, tha Zaev në sallën e gjyqit.

I pyetur nga prokurori Fatime Fetai nëse ai ishte takuar me familjet e viktimave dhe për çfarë po flisnin, ai tha se ishte takuar me prindërit disa herë me kërkesën e tyre.

“Ata donin të merrnin më shumë informacione për atë që ndodhi, duke ditur që ne kishim “bomba”, gjë që për mua është logjike të kërkoj të vërtetën. Në njërën nga ato takime, disa prindër shprehën dyshime se sistemi i drejtësisë po fsheh të dhëna të caktuara prej tyre. Konkretisht, ka pasur 4 ose 5 komunikime midis personave të dënuar në atë kohë, për të cilat njëri nga bashkëbiseduesit ishte fshehur në biseda të tilla për shkak të sekretit zyrtar ose mbrojtjes së të dhënave personale. Kjo u shkaktoi atyre dyshime dhe dyshime serioze. Duke pasur parasysh që ata mund të tregojnë se kush është ky, unë i nxora ato komunikime dhe i paraqita në praninë time, pa u dhënë atyre një kopje, “dëshmoi Zaev.

Ai sqaroi se ata morën një përgjigje të menjëhershme, dhe takimet u zhvilluan në një kohë kur disa nga ato materiale ishin në dispozicion të publikut, d.m.th në vitin 2015 dhe serinë e konferencave për shtyp të LSDM-së së atëhershme opozitare./GazetaExpress/

Më 24 janar 1948 lindi politikani shqiptar Arbën Xhaferi

Arbën Xhaferi ka lindur më 24 janar 1948 në Tetovë. Shkollën fillore dhe gjimnazin e ka kryer në vendlindje. Ka vazhduar studimet në degën e Filozofisë në Beograd ku ka mbaruar me sukses.

Nga viti 1975 deri në vitin 1990 punon në Televizionin e Prishtinës si redaktor përgjegjës dhe komentator i programit të kulturës. Nga mesi i viteve 1990 është ndër të parët që përjashtohet nga Televizioni nga regjimi i Milosheviçit. Pas kësaj periudhe punon si analist në të përjavshmen “Koha” me editor Veton Surroin, në “Forum” që drejtohej nga Adem Demaçi dhe në disa media të tjera shqiptare përfshirë dhe shumë gazeta prestigjioze në botë.

Do të vijë viti 1993 kur Arbën Xhaferi do të kthehet në vendlindje, tashmë jo si analist, por si politikan. Në vitin 1994 zgjidhet kryetar partie.

PDSH e udhëhequr nga Xhaferi arriti të fitojnë zgjedhjet parlamentare të vitit 1998. Erdhi në pushtet me një strategji krejtësisht te re. Xhaferi njihet si ndërtuesi i platformës për demokraci konsensuale, si një parakusht për parandalimin e tendencave margjinalizuese të aplikuara në atë kohë kundrejt shqiptarëve, por dhe si mjet që mund të ishte efikas kundër ndarjeve territoriale që sot e kësaj dite i kanosen Maqedonisë.

Gjatë konfliktit të armatosur të vitit 2001, Xhaferi investohet tek faktori ndërkombëtar që motivet e luftës të mos kërkohen atje ku nuk ekzistonin, pra në Kosovë apo te animet gjenetike të shqiptarëve për rebelim, ashtu siç pretendonin faktorët maqedonas, por te koncepti i shtetit i cili nuk përputhej me realitetin.

Qasja e Xhaferit në atë kohë turbullirash u përkrah më në fund nga faktori ndërkombëtar, duke bërë të mundur legjitimimin e luftës së shqiptarëve, duke nisur kështu maratona e Ohrit, që përfundoi me një marrëveshje për ndërrimin e konceptit etnocentrik të shtetit.

Në zgjedhjet e 15 shtatorit të vitit 2002 Xhaferi kalon në opozitë. Ai mbajti postin e kryetarit të partisë deri në vitin 2007, kur u zëvendësua nga Menduh Thaçi.

Në atë periudhë të zymtë parazgjedhore, analistë të ndryshëm patën vlerësuar se shqiptarët do të përfshihen në një konflikt të paevitueshëm brenda tyre. Në opozitë, Xhaferi që në fillim dha sinjale se qeveria e re, po devijon nga përcaktimet e marrëveshjes së Ohrit. Madje ai i drejtoi publikisht një letër kryetarit të shtetit Boris Trajkovski, duke refuzuar pjesëmarrjen në bisedime me të.

Arbën Xhaferi ka publikuar dy vepra, “PDSH-ja jo në letër”, dhe “Sfidat e Demokracisë në Shtetet Multietnike”.

Arben Xhaferi ka ndërruar jetë me 15 gusht 2012, rreth orës 16:00, si pasojë e hemorragjisë cerebrale të pësuar një javë më parë.

Angelov pyet ministrin e brendshëm: E ke ditur “Lagjen e trimave”?

Kryetari i partisë “Dinjiteti” dhe ish-gjenerali policor, Stojançe Angelov i ka parashtruar disa pyetje ministrit të brendshëm të Qeverisë teknike, Naqe Çulev. Ai ndër të tjera e ka pyetur se a e ka qenë i informuar për rastin e “Lagjes së Trimave” në Kumanovë dhe për 27 prillin e vitit 2017 në Kuvendin e Maqedonisë, përcjell INA.

“Goshinca, Lagja e Trimave dhe 27 prilli janë ngjarje që assesi nuk kanë mundur apo nuk kanë guxuar të kalojnë të pavërejtura nga shërbimet tona të zbulimit dhe kundërzbulimit, shërbime që ti udhëhiqje në ate periudhë. Sidomos nëse merret parashysh se operativi juaj Shenasiu ka pasur rol aktiv në disa prej tyre. Megjithatë, një shpresë më jep fakti se një muaj para ngjarjes së 27 prillit ke arritur që të largohesh nga pozita e drejtorit të Agjencisë për Kundërzbulim, megjithatë ke ngelur shumë afër drejtorit të ri, si ndihmës – drejtor. Një ndihmës – drejtor që më parë ka qenë drejtor për pesë vite, besoj se ka ditur më shumë se nga vetë drejtori i ri”, ka shkruar ndër të tjera në letrën e tij, Stojançe Angelov./GazetaExpress/

Shkup, parlamenti miraton kabinetin e qeverisë së re teknike

Parlamenti i Maqedonisë së Veriut e votoi të premten kabinetin e Kryeministrit të ri të qeverisë teknike, Oliver Spasovski. 101 deputetë votuan pro dhe asnjë nuk pati kundër. Më herët, në mëngjes zoti Zoran Zaev dha dorëheqjen nga detyra.

Presidenti Stevo Pendarovski ia dorëzoi mandatin për formimin e qeverisë kalimtare Oliver Spasovskit, i cili deri sot ishte Ministër i Brendshëm në qeverinë e zotit Zaev.

Kjo vjen si rezultat i Marrëveshjes së Përzhinës sipas së cilës Kryeministri jep dorëheqjen 100 ditë para zgjedhjeve. Qeveria e re teknike, në të cilën merr pjesë edhe opozita, organizon zgjedhjet.

Në qeverinë e zotit Spasovski do të ketë dy ministra nga radhët e opozitës VMRO-DPMNE.

Zoran Zaev kërkoi zhvillimin e zgjedhjeve të reja i zhgënjyer nga Bashkimi Evropian që nuk i dha datën Maqedonisë së Veriut për fillimin e bisedimeve për anëtarësim. zëri i amerikës

Arrestohet ish kryetari i komunës së Tetovës, Sadi Bexheti

Me urdhër të Prokurorisë për krim të organizuar dhe korrupsion, pesë punonjës të Komunës së Tetovës janë arrestuar sot në mëngjes, ndërsa Departamenti për krim të organizuar në MPB po e kërkon anëtarin e Këshillit gjyqësor Zoran Teofillovski, transmeton Portalb.mk.

Sipas burimeve të Portalb, është arrestuar një ish kryetar i Komunës së Tetovës dhe disa persona të tjetë të njohur për opinionin. Jo zyrtarisht janë arrestuar personat S B, I K, B N dhe S P.

Zoran Teofillovski
“Është e vërtetë që pesë persona nga komuna e Tetovës janë arr estuar këtë mëngjes, ndërsa policia ende nuk mund ta gjejë edhe një person. Kërkimi për personin e gjashtë për të cilin është lëshuar urdhër hetimi vazhdon. Bëhet fjalë për legalizim të paligjshëm dhe privatizim të tokës tërheqëse “, tha për SDK, Villma Ruskovska./GazetaExpress/

Maqedonia e Veriut: Gazetarët bëjnë vetërregullimin e miediave online

Organizatat e medias në Maqedoninë e Veriut hartuan regjistrin e medias online dhe ky regjistër përfshin 72 anëtare. Përfaqësuesit e organizatave “Këshilli për Etikë në Media” dhe Shoqata e Gazetarëve të Maqedonisë (SHGM) të cilat e kanë përpiluar atë thonë se regjistri pason debatet për nevojën e adresimit të problemit nga puna e medias online. Organizatat vlerësojnë se vetërregullimi për nxitjen e profesionalizmit në media është një zgjidhje e fuqishme dhe se regjistri është bërë sipas kritereve të aritura midis Këshillit për Etikë dhe SHGM-së në bazë të praktikave në shoqëritë e zhvilluara demokratike dhe Këshillit të Evropës dhe se është dëgjuar po ashtu edhe komuniteti i gazetarëve, medias e biznesit në Maqedoninë e Veriut.

Përfaqësuesi i OSBE-së për lirinë e medias, Harlem Desir, ka shprehur mbështetjen e tij për regjistrin e vetë-rregullimit të medias online në Maqedoninë e Veriut, që u njoftua të mërkuren nga Këshilli për Etikë në Media së bashku me Shoqatën e Gazetarëve të Maqedonisë dhe Odën Ekonmike.

“Vetë-rregullimi i medias është një mekanizëm i dobishëm për promovimin e cilësisë së informimit, ruajtjen e lirisë editoriale dhe fuqizimin e bësueshmërisë së medias” është shprehur Desir.

Nisma kërkon promovimin e vetërregullimit të medias online përmes fondeve transparente, mes tjerash; zotimin e medias online për respektimin e Kodit të Gazetarëve dhe publikimin e vendimeve nga Këshilli për Etikë në Media.

“Shpresoj se kjo punë e përbashkët nga disa organizata në Maqedoninë e Veriut do të jetë e dobishme për platformat e medias online si dhe për vetë komunitetin e gjerë të medias”, thuhet në komunikatën e përfaqësuesit të OSBE-së për lirinë e medias, Harlem Desir.

Shoqatat mediatike të cilat hartuan regjistrin thonë se “publiku do të ketë mundësi të shohë se kush i respekton standardet dhe kush përhapë lajme të rreme; kujt t’i besojnë dhe shkrimet e kujt duhet marrë me rezervë”.

Lista e plotë e medias online do të pubkohet në janar të vitit 2020.

Pendarovski: Ligjin për gjuhën shqipe është kushtetues

Presidenti i Maqedonisë së Veriut, Stevo Pendarovski ka mbrojtur të mërkurën ligjin për përdorimin e gjuhëve për të cilin raporti i Komisionit të Venecias kishte vërejtje të shumta.

Në fjalimin e fundvitit të Kuvendit maqedonas, Pendarovski tha se megjithatë Komisioni i Venecias nuk ka dalë me qëndrimin se ligji është antikushtetues dhe se dispozitat e tij madje janë më të larta se ato të konventave ndërkombëtare për të drejtat dhe liritë e njeriut.

Por ai ka tërhequr vërejtjet nga vështirësitë që mund të dalin në zbatimin e tij në praktikë, në veçanti në gjyqësor, që ishte edhe një nga vërejtjet kryesore të Komisionit të Venecias.

“Juristët e lartë evropianë me të drejtë thonë se shteti ynë në këtë moment nuk ka kapacitet dhe resurse që t’i zbatojë këto standarde në proceset gjyqësore dhe drejtuese. Me fjalë të tjera, çfarë fitohet nga ligji nëse dispozitat e tij mbeten vetëm në letër”, ka deklaruar presidenti Pendarovski.

Ai ka kritikuar edhe zhvillimet në gjyqësor duke kërkuar përgjegjësi për secilin që me pagë shtetërore ka arritur të bëhet milioner.

“Thuajse tri dekada jemi shtet i pavarur, por ende asnjë politikan i lartë apo afarist i pasuruar brenda një nate nuk ka përfunduar pas grillave, kurse aty duhej të përfundonin më shumë se një. Perceptimi te qytetarët është se vetëm të varfërit dhe njerëzit që janë në margjina pa ndonjë relacion me ndonjë pushtet mbajnë përgjegjësi madje edhe për vepra penale për asgjë”, ka theksuar Pendarovski.

Kreu i këtij shteti ka kërkuar nga të gjitha institucionet shtetërore por edhe faktorë të tjerë që bashkërisht të punojnë për arritjen e synimit kryesor të vendit, anëtarësimin në Bashkimin Evropian.

Ligji për gjuhën shqipe pritet ta dominojë fushatën zgjedhore

Kryeministri i Maqedonisë së Veriut, Zoran Zaev ka paralajmëruar fillimin e bisedimeve me të gjitha institucionet dhe partitë politike për të gjetur një zgjidhje të pranueshme, lidhur me raportin e Komisionit të Venecias për Ligjin e gjuhëve.

Vërejtjet e ekspertëve të këtij Komisioni kanë të bëjnë, me siç thuhet, “vështirësitë që do të shkaktojnë dispozitat e tij në procedurat gjyqësore”, por edhe në komunikimin ndërinstitucional dhe të brendshëm mes shërbyesve administrativë dhe atyre civilë, duke rekomanduar që gjuha shqipe të kufizohet në komunikim zyrtar të shkruar.

“Deri në fund të javës do të realizoj takime mes institucioneve adekuate që të mund të harmonizojmë qëndrimet lidhur me vërejtjet e Komisionit të Venecias…Duhet të punojmë për forcimin e kapaciteteve të institucioneve që zgjidhja vërtetë të marrë formën bazuar në rekomandimet e Komisionit”, ka deklaruar kryeministri Zoran Zaev, duke komentuar më pas edhe paralajmërimin e opozitës për dorëzimin e amendamenteve për ndryshimin e Ligjit për gjuhët në përputhje me vërejtjet e Komisionit të Venecias.

“Opozita është një korrektues i rëndësishëm i proceseve. Nëse vërejtjet e tyre janë në drejtim të avancimit të projektit ‘Një shoqëri për të gjithë’, atëherë unë konsideroj se mund të debatojmë dhe të marrim parasysh vërejtjet e sugjerimet që mund të vijnë nga ana e tyre”, është shprehur kryeministri Zaev.

Bashkimi Demokratik për Integrim (BDI) fillimisht doli me qëndrimin se Ligji për gjuhët nuk mund të ndryshojë, pasi sipas kësaj partie, që është pjesë e qeverisë, Maqedonia e Veriut do të kthehej në periudhën e para Marrëveshjes së Ohrit apo para konfliktit të vitit 2001ë. Por, tani nga kjo parti beson që përmes konsensusit ta kapërcejnë edhe këtë sfidë.

“Besoj se edhe në këtë fushë ne do të ndërtojmë një konsensus të përbashkët, të pranueshëm për të gjithë, një zgjidhje kjo që do të na bëjë me të fortë dhe krenar. Me këtë ne do të bëhemi shembull për zgjidhjen e problemeve përmes bisedimeve, kompromiseve dhe qasjeve pozitive”, ka deklaruar Bujar Osmani nga Bashkimi Demokratik për Integrim.

Raporti i Komisionit të Venecias ndërkohë ka nxitur reagime e opinione të ndryshme, që sipas disa njohësve të çështjeve politike, ka ardhur në kohën që ndoshta partive më së shumti i konvenon për shkak të shfrytëzimit të tij për fushatë parazgjedhore.

Analisti Petar Arsovski thotë se pavarësisht se partitë tani shprehin gatishmëri për të nisur konsultimet, kjo çështje nuk do të zgjidhet, por e gjithë periudha deri në ditën e zgjedhjeve më 12 prill do të shfrytëzohet për përplasje politike dhe rrjedhimisht për fitimin e poenëve politikë.

“Unë mendoj se nuk do të ketë një zgjidhje të shpejtë të kësaj çështjeje. Partitë nuk do të heqin dorë nga qëndrimet e tyre. Tensionet do të vazhdojnë me atë se secila parti do të mbrojë qëndrimin e saj. Kështu do të ndodhë deri pas zgjedhjeve, që problemi t’i lihet për zgjidhje koalicionit të ardhshëm qeveritar. Pra, raporti i Komisionit të Venecias do të shfrytëzohet deri në maksimum nga partitë tani në prag të zgjedhjeve”, thotë Arsovski.

Ligji për përdorimin e gjuhëve, me të cilin rregullohet përdorimi zyrtar i gjuhës shqipe, është miratuar më 14 mars të vitit 2018 dhe me të parashihet përdorimi i plotë të gjuhës shqipe, apo siç thuhet i gjuhës që e flasin më shumë se 20 për qind e popullatës, ndryshe nga maqedonishtja, si në qeveri, kuvend, organet e pushtetit gjyqësor dhe administratën publike, si në të folur ashtu edhe në të shkruar, që nënkupton të gjitha tabelat dhe mbishkrimet do të jenë në dy gjuhë.

KUVENDI I REPUBLIKËS SË MAQEDONISË SË VERIUT NDAN “MIRËNJOHJE” PËR UNIONIN ARTISTIK TË KOMBIT SHQIPTAR

Në kryeqytetin Shkup, u organizua një ceremoni solemne për të nderuar Unionin Artistik të Kombit Shqiptar “Kalorës i Urdhrit të Skënderbeut” me President Mjeshtrin e Madh Azgan HAKLAJ, artist, ish-deputet i Kuvendit të Shqipërisë, autor i disa librave me interes kombëtar, i vlerësuar me çmime kombëtare e ndërkombëtare.

Kryetari i Kuvendit të Republikës së Maqedonisë së Veriut, mr. Talat XHAFERI, ndau “MIRËNJOHJE” për Unionin Artistik tëq Kombit Shqiptar, me motivacionin: “ Në shenjë mirënjohje për promovimin e këngëve dhe valleve shqiptare në skenat kombëtare e ndërkomëtare për ruajtjen e lartësimin dhe përçimin tek brezat e rinj të vlerave të rralla e të çmuara të thesareve tona folklorike, kulturore, artistike në mbarë trojet etnike të kombit shqiptar”.

Në këtë event ceremonial në Kuvendin e Republikës së Maqedonisë së Veriut, në këtë Mirënjohje, thuhet tekstualisht: “Kuvendi i Republikës së Maqedonisë së Veriut dhe Kryetari i Kuvendit, z. Talat Xhaferi, ju falenderon dhe e vlerëson lart misionin tuaj fisnik”, duke iu drejtuar Unionit Artistik të Kombit Shqiptar e Presidentit të saj Azgan Haklaj- Mjeshtër i Madh.

Unioni Artistik i Kombit Shqiptar e presidenti i tij janë nderuar me dekorata, tituj e mirënjohje nga Presidenti i Shqipërisë – i maparshmi Bujar Nishani e aktuali Ilir Meta; nga Kryeministri i Kosovës, Ramush Haradinaj dhe, tani së fundit, në dhjetor 2019, edhe nga mr. Talat Xhaferi, Kryetari i Kuvendit të Republikës së Maqedonisë së Veriut.

Basri LLESHI

VMRO përsëri kundërshton Ligjin për gjuhën shqipe, paralajmëron amendamente

Pavarësisht se pretendojnë votat shqiptare dhe po afrohen zgjedhjet, VMRO-DPMNE-ja edhe një herë ka nxjerr në pah kundërshtimet ndaj Ligjit për përdorimin e gjuhëve.

VMRO DPMNE-ja ka paralajmëruar një sërë amendamente për Ligjin për përdorimin e gjuhëve. Sipas kryetarit të kësaj partie, Hristjan Mickoski, amendamentet do të jenë në pajtim me Kushtetutën e Maqedonisë dhe me rekomandimet e Komisionit të Venecias. Mickoski thotë se me këto ndryshime asnjë komunitet tjetër nuk do të diskriminohet, duke aluduar në që ligji aktual për ka qenë privilegj vetëm për Shqiptarët.

Ai pret që partitë në pushtet do t’i mbështesin amendamentet e VMRO-DPMNE-së me.

Ndryshe, Ligji për përdorimin e gjuhëve nuk e avancon vetëm gjuhën shqipe, por edhe gjuhet e tjera ku komuniteti i caktuar përbën më shumë se 20% të popullsisë në atë komunë. Komuna e parë në botë ku gjuha rome është zyrtare, është Komuna e Shuto Orizares, edhe atë, falë ligjit aktual për përdorimin e gjuhëve.

Ligji për gjuhët u miratua në Kuvend në një atmosferë mjaftë të tensionuar. Aso kohe VMRO-DPMNE-ja kishte sjell 35 mijë amendamente me qëllim që të bllokojë procedurën, por kryeparlamentari Talat Xhaferi i pati hedhur poshtë.

Mickoski ka paralajmëruar amendamente për ndryshim të tjera ligjore, përfshirë edhe mandatimin për kryeministër, ku VMRO-DPMNE-ja e sheh të arsyeshme që të mandatohet vetëm fitimtari i zgjedhjeve, e jo i dyti nëse i pari nuk arin që të bëj koalicion.

Bexheti: Ligji i përdorimit të gjuhës nuk duhet të ndryshohet (video)

Në një intervistë për Zërin e Amerikës, zëdhënësi i partisë Aleanca për Shqiptarët në Maqedoninë e Veriut, Flakron Bexheti foli për ndikimin që do të ketë opinioni i Komisionit të Venecias mbi përdorimin e dygjuhësisë dhe prespektivën e alencave të partive shqiptare në zgjedhjet e parakohshme.

Opinioni Komisionit të Venecias krijon një situatë të re politike, tha zëdhënësi i partisë Aleanca për Shqiptarët, Flakron Bexheti. Megjithatë partia e tij mendon se ky është vetëm një opinion dhe vlerësim dhe nuk është detyrim. Ligji për përdorimin e gjuhëve, që nuk është vetëm për gjuhën shqipe, tha ai u soll në vitin 2018 dhe ishte parakushti kryesor që kryeministri Zaev të arrinte të bënte një koalicion qeveritar. Ky ligj është cilësuar si një e arritur që ka të bëjë me avancimin e gjuhës shqipe dhe një ndër arsyet kryesore për post Marrëveshjes së Prespës ku Maqedonia e Veriut e ndërroi emrin e saj, sjella e ligjit të gjuhëve e ka ndihmuar jashtëzakonisht shumë Maqedoninë që të bëhet pjesë e Natos. Aleanca për Shqiptarët, sipas tij nuk do të pranonte ndryshimin e ligjit.

Faqja 6 prej 28« Fillimi ‹ Prapa 2 3 4 567 8 9 10 Para ›Fundi »

Shkup

Shkup

Srebrenicë

Shkup

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL