Një spiun i dyshuar për Rusinë, i cili punonte si këshilltar i një deputeti gjerman, ka dhënë dorëheqjen pas publikimit të asaj që duket të jetë korrespondencë mes tij dhe një agjenti të Shërbimit Federal të Sigurisë Ruse (FSB) në Moskë.

Vladimir Sergiyenko ishte, deri këtë fundjavë, një strateg politik për një deputet nga partia e ekstremit të djathtë Alternativa për Gjermaninë (AfD). Por Sergiyenko me origjinë ukrainase akuzohet se ka punuar njëkohësisht si “agjent me ndikim” për Rusinë, duke marrë udhëzime nga një agjent i inteligjencës FSB, i cili koordinoi çdo lëvizje të tij dhe i dha financim, sipas një hetimi nga Der Spiegel, revista gjermane e lajmeve dhe The Insider, një faqe ueb e pavarur ruse.

52-vjeçari thuhet se ka luajtur një rol kyç në bindjen e AfD-së për të ngritur një padi kundër Gjykatës Kushtetuese Federale të Gjermanisë për të ndaluar dërgesat e armëve në Ukrainë, duke i thënë shefit të tij se “kjo e bën punën e qeverisë më të vështirë”. Kur u pyet për një raport progresi, ai u përgjigj: “Ne po ndjekim planin. Nuk është e lehtë, por po bëjmë përparim.”

Leja e hyrjes në Bundestag

Ai vizitonte rregullisht Moskën, ku shfaqej në programet e bisedave televizive dhe gjithashtu kishte një leje hyrjeje në Bundestag, parlamenti gjerman. Zotit Sergiyenko iu gjetën 9000 euro në doganë në dy raste kur u kthye nga Rusia, sipas raportit. Shërbimet e inteligjencës perëndimore thuhet se kanë frikë se ai mund t’i kishte dërguar paratë për AfD-në, e cila kundërshton sanksionet ekonomike ndaj Rusisë, si dhe mbështetjen ushtarake gjermane për Ukrainën. Zyrtarët gjetën gjithashtu një pasaportë ruse, të cilën ai nuk e kishte paraqitur kur aplikoi për nënshtetësinë gjermane në fund të vitit 2022, të cilën Berlini tani po përpiqet t’ia heqë.

Sergiyenko i mohon akuzat, duke thënë se ai është viktimë e një hakeri dhe se të gjitha pretendimet për lidhjet e tij me Rusinë janë “fiktive”.

Punëdhënësi i tij i mëparshëm, Eugen Schmidt, një deputet që kryeson grupin parlamentar ruso-gjerman të AfD-së, tha se akuzat ishin të pavërteta dhe rezultat i një fushate anti-AfD./ Telegraph.co.uk-Syri.net