Dy pjesëtarë të stafit të Ambasadës së Izraelit – një çift i ri që do të fejohej së shpejti – janë vrarë nga një sulmues i vetëm, teksa ata po largoheshin nga një ngjarje e zhvilluar në Muzeun Hebraik në Uashington, në natën e së mërkurës, sipas kohës lokale, kanë bërë të ditur autoritetet në Shtetet e Bashkuara të Amerikës.

Një i dyshuar për vrasjet tashmë është arrestuar, kanë njoftuar zyrtarët amerikanë.

Dy viktimat janë qëlluar dhe janë vrarë në një pjesë të qendrës së Uashingtonit, e cila ndodhet vetëm 2 kilometra larg Shtëpisë së Bardhë, raporton Reuters.

Shefja e Policisë Metropolitane të Uashingtonit, Pamela Smith, ka thënë se një burrë ka shtënë ndaj një grupi prej katër personash me një revole, duke i qëlluar të dyja viktimat. Ai ishte parë duke vrapuar jashtë muzeut, para sulmit.

I dyshuari i vetëm, i identifikuar si Elias Rodriguez, 30-vjeçar, nga Çikagoja, kishte brohoritur “Liri për Palestinën, liri për Palestinën”, para se të arrestohej, ka bërë të ditur ajo.

“Pas të shtënave, i dyshuari është futur në muze dhe është ndaluar nga sigurimi i ngjarjes”, ka thënë Smith.

“Sapo është prangosur, i dyshuari ka treguar se ku e ka hedhur armën, dhe ajo armë është gjetur, dhe ai ka pohuar se ka kryer krimin”, ka njoftuar ajo.

Sipas Smithit, i dyshuari nuk kishte pasur ndonjë kontakt të mëparshëm me Policinë.

Ambasadori i Izraelit në SHBA, Yechiel Leiter, u ka thënë gazetarëve se i riu i vrarë kishte “blerë një unazë këtë javë, me qëllimin t’i propozonte të dashurës së tij javën e ardhshme në Jerusalem”.

Presidenti i Shteteve të Bashkuara të Amerikës, Donald Trump, e ka dënuar sulmin. “Këto vrasje të tmerrshme në Uashington, të nxitura qartas nga antisemitizmi, duhet të ndalen, TANI!”, ka shkruar ai në një mesazh në rrjetet sociale. “Urrejtja dhe radikalizmi nuk kanë vend në SHBA”, ka thënë Trump.

Kryeministri i Izraelit, Benjamin Netanyahu, ka thënë se është i tronditur nga vrasjet.

“Ndiej dhimbje për familjet e burrit dhe gruas së re, jeta e të cilëve u shua nga një vrasës i tmerrshëm antisemit”, ka thënë ai, nëpërmjet një komunikate.

“Unë kam urdhëruar ashpërsimin e sigurisë në misionet izraelite nëpër botë, si dhe sigurinë për përfaqësuesit e shtetit”, ka bërë të ditur Netanyahu.

Presidenti izraelit, Isaac Herzog, dhe sekretari amerikan i Shtetit, Marco Rubio, po ashtu e dënuan sulmin, ndërsa sekretarja për Siguri të Brendshme, Kristi Noem, u zotua në platformën sociale X se përgjegjësi do të sillet para drejtësisë.

Prokurorja e Përgjithshme, Pam Bondi, dhe prokurorja për Distrikin e Kolumbias, Jeanine Pirro, shkuan në vendin e ngjarjes pas vrasjeve.

Zëvendësdrejtori i Byrosë Federale amerikane të Hetimeve (FBI), Dan Bongino, ka thënë se i dyshuari po merret në pyetje nga policia dhe nga FBI-ja.

Ngjarja e mbajtur në Muzeun Hebraik në Uashington ishte organizuar nga Komiteti Hebraik Amerikan, një grup që mbështet Izraelin dhe lufton antisemitizmin, sipas ueb-faqes së tij.

Një ftesë online për ngjarjen e kishte quajtur atë “Pritje për diplomatët e rinj”, duke e përshkruar si bashkim të profesionistëve hebraikë të moshave ndërmjet 22 dhe 45 vjeçe, dhe komunitetit diplomatik të Uashingtonit.

Papa Leoni XIV i ka bërë thirrje të mërkurën Izraelit ta lejojë hyrjen e ndihmave humanitare në Rripin e Gazës, duke e përshkruar gjendjen në enklavën palestineze si “shqetësuese dhe tronditëse”.

“Ripërtërij thirrjen time të zjarrtë për të lejuar hyrjen e ndihmës së drejtë humanitare dhe për t’i dhënë fund armiqësive, çmimin shkatërrues të të cilave po e paguajnë fëmijët, të moshuarit dhe të sëmurët”, tha papa i ri në sheshin e Shën Pjetrit.

Leoni – i cili u zgjodh papë më 8 maj duke pasuar të ndjerin Papa Françesku – e ka përmendur luftën në Gazë disa herë në javët e para të papatit të tij.

Ai e bëri këtë lutje në fund të fjalimit para audiencës, duke shtuar disa fjalë përtej tekstit të përgatitur.

Në mesazhin e tij të parë të së dielës më 11 maj, Papa Leoni bëri thirrje për armëpushim të menjëhershëm në Gazë dhe për lirimin e të gjithë pengjeve izraelite që po mbahen nga grupi militant Hamas – i cili është i shpallur organizatë terroriste nga SHBA-ja dhe BE-ja.

Izraeli tha të hënën se do ta lejojë hyrjen e ndihmave në Gazë pas një bllokade 11-javore ndaj enklavës, por Kombet e Bashkuara thanë se deri të martën nuk është shpërndarë asnjë ndihmë.

Kritikat e Françeskut për Izraelin

Françesku, i cili vdiq më 21 prill, i kishte shtuar kritikat ndaj fushatës ushtarake të Izraelit në Gazë gjatë muajve para vdekjes së tij.

Ai e quajti situatën në enklavë “shumë serioze dhe të turpshme” në janar, dy muaj pasi tha se komuniteti ndërkombëtar duhet të hetojë nëse ka ndodhur gjenocid ndaj popullit palestinez.

Duke pasqyruar ftohjen e marrëdhënieve mes Vatikanit dhe Izraelit pas kritikave të Françeskut, Izraeli, ndryshe nga shumë shtete të tjera, nuk dërgoi zyrtar të lartë në varrimin e papës së ndjerë, por vetëm ambasadorin e tij në Vatikan.

Si shenjë e mundshme për një rivendosje marrëdhëniesh me papën e ri, presidenti izraelit, Isaac Herzog, mori pjesë në meshën inauguruese të Leonit në sheshin e Shën Pjetrit të dielën.

Ushtria izraelite e rifilloi ofensivën në mars, duke e prishur armëpushimin që kishte mundësuar lirimin e më shumë se 30 pengjeve.

Lufta në Gazë filloi kur militantë të udhëhequr nga Hamasi sulmuan Izraelin jugor, duke vrarë 1.200 njerëz dhe duke marrë rreth 250 pengje. Izraeli thotë se 59 pengje mbeten në Gaza, megjithëse besohet se rreth 35 prej tyre janë të vdekur.

Lufta e Izraelit i ka vrarë më shumë se 53.000 njerëz në Gazë, shumë prej tyre gra dhe fëmijë, sipas zyrtarëve shëndetësorë palestinezë.

Ish-kryeministri izraelit, Ehud Olmert ka thënë se ajo që Izraeli “po bën tani në Gaza është shumë afër një krimi lufte”, gjatë një interviste me BBC-në.

Olmert, i cili ishte kryeministër nga viti 2006 deri në vitin 2009, i tha BBC-së se qeveria e Benjamin Netanyahut po zhvillonte “një luftë pa qëllim – një luftë pa shans, për të arritur diçka që mund të shpëtojë jetën e pengjeve”.

Ai tha se “pamja e dukshme” e fushatës ishte se Izraeli po vriste shumë palestinezë dhe se “nga çdo këndvështrim, kjo është e bezdisshme dhe skandaloze”.

Ai tha se qeveria izraelite duhej të ishte më e qartë se po “luftonte vrasësit e Hamasit,  ne nuk po luftonim civilë të pafajshëm”.

Nga ana tjetër Mjekët pa Kufi akuzojnë Izraelin se po përdor furnizimin me ndihmë ‘qesharake të pamjaftueshme’ ,si një ‘perde tymi’ për të pretenduar se rrethimi i Gazës është hequr.

‘Sasia e ndihmës që Izraeli ka filluar të lejojë në Rripin e Gazës nuk është aspak e mjaftueshme dhe është “një perde tymi për të pretenduar se rrethimi ka mbaruar”, tha grupi i ndihmës MSF të mërkurën.

AFP raporton se Pascale Coissard , koordinatore e emergjencës së Mjekëve Pa Kufi në Khan Younis të Gazës, tha: “Vendimi i autoriteteve izraelite për të lejuar një sasi qesharake të pamjaftueshme ndihme në Gaza pas muajsh të tërë rrethimi hermetic, sinjalizon qëllimin e tyre për të shmangur akuzat për njerëz të uritur në Gaza, ndërkohë që në fakt i mbajnë ata që mezi mbijetojnë.”

Gjatë natës, agjencia shtetërore e lajmeve në UAW tha në një telefonatë midis zyrtarëve të Emirateve të Bashkuara Arabe dhe Izraelit, se ky i fundit kishte rënë dakord të lejonte hyrjen e ndihmës humanitare që do të furnizonte 15,000 njerëz. Popullsia e Gazës vlerësohej të ishte rreth dy milionë, para se të fillonte fushata ushtarake e Izraelit./ The Guardian.

Më shumë se 28,000 gra dhe vajza janë vrarë në Gaza që nga fillimi i luftës në Gaza në tetor 2023, sipas UN Women.

Shifra do të thotë që mesatarisht një grua dhe një vajzë vriten çdo orë në sulmet e forcave izraelite, tha UN Women në një njoftim për shtyp.

Midis të vrarëve, mijëra ishin nëna, duke lënë pas fëmijë, familje dhe komunitete të shkatërruara, tha organi i OKB-së për barazi gjinore dhe fuqizimin e grave, duke vënë në dukje se shifrat nënvizojnë numrin shkatërrues të viktimave njerëzore të konfliktit.

Që prej prishjes së armëpushimit në mars, kushtet janë përkeqësuar më tej në Gaza, të përkeqësuara nga gati nëntë javë bllokadë e vazhdueshme ndaj ndihmës humanitare, tha agjencia.

E gjithë popullsia në Gaza po i mbarojnë me shpejtësi ushqimet dhe furnizimet thelbësore, me rreziqe në rritje të urisë, që do të thotë se çdo grua dhe vajzë po përballet me nivele katastrofike urie. Ato janë të bllokuara, përballen me zhvendosje, rritje të shkallës së vdekshmërisë së nënave dhe një mungesë të rëndë të mekanizmave të sigurisë dhe mbrojtjes, tha raporti.

Agjencia tha se pavarësisht këtyre rrethanave të tmerrshme, UN Women vazhdon të punojë me organizatat e shoqërisë civile të udhëhequra nga gratë në Gaza, duke u përpjekur të ofrojë shërbime dhe mbështetje thelbësore për popullatat e prekura, por shkalla e vuajtjeve tejkalon shumë kapacitetin ose burimet aktuale.

Pa një rritje të menjëhershme dhe të ndjeshme të aksesit në ndihmë, mbështetje dhe financim humanitar, jetë të panumërta varen në fije të perit, paralajmëroi UN Women.

Agjencia bëri thirrje për një armëpushim të menjëhershëm, rivendosjen e menjëhershme të aksesit të papenguar humanitar dhe lirimin pa kushte të të gjithë pengjeve dhe atyre të ndaluar në mënyrë arbitrare . sn

Britania e Madhe i ka pezulluar të martën bisedimet për tregti të lirë me Izraelin, e ka thirrur ambasadorin izraelit në takim protestues dhe ka vendosur sanksione të reja ndaj kolonëve izraelitë në Bregun Perëndimor, për shkak të ofensivës së re ushtarake të ushtrisë izraelite në Rripin e Gazës.

Ushtria izraelite njoftoi javën e kaluar fillimin e një operacioni të ri dhe kryeministri izraelit, Benjamin Netanyahu, tha se Izraeli do të marrë nën kontroll të gjithë Gazën.

Izraeli e ka ndaluar hyrjen e furnizimeve mjekësore, ushqimore dhe të karburantit në Gazë që nga fillimi i marsit, dhe ekspertë ndërkombëtarë kanë paralajmëruar për rrezikun e urisë masive si pasojë.

Sekretari i Jashtëm britanik, David Lammy, tha se ofensiva nuk është mënyra për t’i kthyer pengjet e mbetura në Gazë, bëri thirrje për t’i dhënë fund bllokadës ndaj ndihmave dhe dënoi atë që e quajti “ekstremizëm” në disa departamente të Qeverisë izraelite.

“Nuk mund të qëndrojmë duarkryq përballë këtij përkeqësimi të ri. Kjo bie ndesh me parimet që qëndrojnë në themel të marrëdhënieve tonë dypalëshe”, tha Lammy para ligjvënësve.

“Sinqerisht, kjo është fyerje ndaj vlerave të popullit britanik. Prandaj, sot po njoftoj se kemi pezulluar bisedimet me këtë Qeveri izraelite për një marrëveshje të re tregtare”, shtoi ai.

Britania, në një komunikatë të përbashkët me Francën dhe Kanadanë të hënën, dënoi zgjerimin e operacioneve ushtarake të Izraelit në Gazë dhe kërkoi që të hiqen kufizimet ndaj ndihmës humanitare.

Këto tri vende thanë se do të ndërmarrin “veprime të tjera konkrete” nëse ofensiva e re e Izraelit nuk ndalet.

“Dua të deklaroj sot se jemi të tmerruar nga përshkallëzimi nga ana e Izraelit”, tha kryeministri britanik, Keir Starmer, në martën në Parlament.

“Ne përsërisim kërkesën tonë për një armëpushim si mënyra e vetme për t’i liruar pengjet; përsërisim kundërshtimin tonë ndaj vendbanimeve në Bregun Perëndimor dhe përsërisim kërkesën për një rritje masive të ndihmës humanitare në Gazë”, shtoi Starmer.

Britania gjithashtu sanksionoi disa individë dhe grupe në Bregun Perëndimor, për të cilët tha se ishin përfshirë në veprime të dhunshme ndaj palestinezëve.

Në vitin 2024, Britania vendosi sanksione ndaj një numri kolonësh dhe organizatash kolonësh, duke shënjestruar individë dhe grupe që sipas saj kishin sponsorizuar dhunën kundër komuniteteve palestineze në Bregun Perëndimor.

Shumica e vendeve i konsiderojnë të paligjshme vendbanimet hebraike të ndërtuara në tokat e pushtuara nga Izraeli gjatë luftës së Lindjes së Mesme në vitin 1967, dhe zgjerimi i tyre prej dekadash është një nga çështjet më të diskutueshme mes Izraelit, palestinezëve dhe komunitetit ndërkombëtar.

“Ne po tregojmë përsëri se do të vazhdojmë të veprojmë kundër atyre që kryejnë shkelje të rënda të të drejtave të njeriut”, tha Lammy.

Lufta tokësore dhe ajrore e Izraelit ka shkatërruar Gazën, duke zhvendosur pothuajse të gjithë popullsinë prej 2.3 milionësh dhe duke vrarë më shumë se 53.000 njerëz, sipas autoriteteve shëndetësore të Gazës.

Netanyahu ka thënë se vendi i tij është i përfshirë në një “luftë të civilizimit kundër barbarisë” dhe është zotuar se do të “vazhdojë të mbrohet me mjete të drejta deri në fitoren e përgjithshme”.

“Nuk dua të shoh një koalicion të të gatshmëve që kthehet në një koalicion të pritësve”, tha Rasmussen, duke iu referuar një plani të shpallur nga kryeministri britanik, Keir Starmer, në Londër, më 2 mars.

Që atëherë ka pasur një sërë takimesh në nivele të ndryshme. Megjithatë, pyetjet kyç për mandatin e misionit, rregullat e angazhimit dhe se cilat vende do të dërgojnë trupa, ende nuk kanë marrë përgjigje publikisht.

“Në parim, në Evropë, shpenzojmë shumë kohë duke diskutuar e folur, dhe përpjekjet për veprim janë të pakta”, tha Rasmussen.

“Megjithatë, shpresoj që sulmi i [presidentit rus, Vladimir] Putin ndaj Ukrainës dhe zgjedhja e [Donald] Trumpit [president në Shtetet e Bashkuara të Amerikës] të shërbejnë si thirrje zgjimi që t’u tregojnë evropianëve se duhet të veprojmë shpejt”, shtoi ai.

Rasmussen foli në një intervistë të gjerë mbi çështjet ushtarake, sigurinë ekonomike dhe komentet e përsëritura të presidentit amerikan, Trump, për marrjen e Grenlandës nga Danimarka.

Ai ishte kryeministër i Danimarkës përpara se të shërbente si sekretar i përgjithshëm i NATO-s, nga viti 2009 deri më 2014.

“Është e turpshme ta kërcënosh Danimarkën, një aleate të ngushtë, me mjete ushtarake për ta pushtuar Grenlandën”, tha Rasmussen.

“Nuk mendoj se do të ndodhë. Por, në mënyrë të qartë, ekziston potenciali për të krijuar një ndarje brenda NATO-s kur kërcënon një aleat”, tha ai.

Që prej largimit nga roli në NATO, Rasmussen ka krijuar organizatën jofitimprurëse Aleanca për Demokracitë, e cila synon të kundërshtojë atë që e përshkruan si ngritje globale të “autokratëve dhe diktatorëve”.

Javën e kaluar, grupi shpalli një plan me pesë pika për mbrojtjen evropiane që përfshin një thirrje për rritjen e buxheteve të mbrojtjes në katër për qind të Prodhimit të Brendshëm Bruto (PBB) deri në vitin 2028.

Kjo pason lëvizjet e Bashkimit Evropian dhe fuqive të mëdha ushtarake të Evropës – Britania, Franca dhe Gjermania – për të rritur shpenzimet e mbrojtjes në vitet e ardhshme, por shkon përtej planeve të shpallura deri më tani.

“Investimi i Rusisë në mbrojtje tani është më i madh se investimi i kombinuar i mbrojtjes në pjesën tjetër të Evropës. Kështu që, duhet të përshpejtojmë. Duhet të dyfishojmë të paktën investimin evropian në mbrojtje”, i tha Rasmussen Radios Evropa e Lirë.

“Për një kohë të gjatë, kemi mbështetur një model që nuk funksionon më — një kombinim i energjisë së lirë nga Rusia, mallrave të lira nga Kina dhe sigurisë së lirë nga SHBA”, shtoi ai.

Tema si çështjet e sigurisë dhe ekonomisë ishte temë kryesore në një konferencë që Rasmussen organizoi javën e kaluar në Kopenhagë, ku u diskutua edhe plani me pesë pika.

Veterani 72-vjeçar i politikës dhe diplomacisë veçon tarifat globale të administratës Trump si një rrezik të ri që ka krijuar nevojën për një lloj “NATO-je ekonomike”.

“Administrata Trump shpalli një luftë tregtare kundër të gjithë botës, përveç Rusisë dhe Koresë së Veriut”, tha ai.

“Do ta sugjeroja krijimin e asaj që e quajmë D7, shtatë demokracitë e botës: Bashkimi Evropian, Mbretëria e Bashkuar, Kanadaja, Australia, Koreja e Jugut, Japonia dhe Zelanda e Re. Dhe, mendoj se shtylla kurrizore e kësaj do të ishte ajo që do ta quanim një Nen 5 ekonomik. Ne do ta konsideronim një sulm ose shtrëngim ndaj njërit prej atyre shtatë vendeve si një sulm ndaj të gjithve, dhe do të përgjigjeshim në mënyrë kolektive”, shtoi ai.

Është e habitshme të dëgjosh një ish-shef të NATO-s që përjashton Shtetet e Bashkuara nga një listë e demokracive globale.

“Po, por Shtetet e Bashkuara kanë zgjedhur izolimin… Nuk shoh një gatishmëri amerikane për të ushtruar udhëheqjen globale të botës së lirë. Kështu që, për këtë arsye, SHBA-ja është përjashtuar nga kjo D7”, tha Rasmussen.

Qeveritë në të gjithë botën po përballen me sfidën se si të reagojnë ndaj tarifave të Trumpit. Bashkëpunimi më i ngushtë dhe tregtia me partnerë të tjerë janë, pa dyshim, pjesë e përllogaritjeve të tyre.

Por, ashtu si me shpenzimet e mbrojtjes, propozimet e Rasmussenit shkojnë shumë përtej asaj që po konsiderohet në shumicën e kryeqyteteve.

Për shembull, marrëveshja e shumëpërfolur e tregtisë së lirë e Bashkimit Evropian me katër shtete të Amerikës së Jugut në grupin Mercosur është përmendur si pjesë e përgjigjes kolektive të BE-së ndaj një mjedisi të ri, por Franca ende është shumë e kujdesshme për ta ratifikuar atë.

Ndërkohë, BE-ja dhe vendet individuale kanë reaguar veçmas ndaj tarifave të SHBA-së, duke kërkuar të negociojnë me Uashingtonin në vend se të formojnë një front të përbashkët.

Rasmussen nuk ofron përgjigje të thjeshta për zgjidhjen e rrjetit kompleks të interesave që e bëjnë të vështirë për shumë vende të krijojnë struktura të reja globale. Por, ai thotë se kjo është sfida që duhet kapërcyer.

“Për të 19-tin vit radhazi, kemi parë një rënie të lirisë dhe demokracisë globale. Kështu që tani është koha për të krijuar një bashkëpunim më të fortë”, tha ai.

“E di nga përvoja me Putinin dhe autokratë të tjerë se ata respektojnë vetëm forcën, unitetin dhe një qëndrim të vendosur… Nëse veprojmë së bashku, nëse veprojmë të bashkuar, atëherë mund të kundërshtojmë autokracitë që po përparojnë”, përfundoi ai.

Radio Evropa e Lirë

Përgatiti: Doruntina Baftiu

Franca është “e vendosur” ta njohë një shtet palestinez, ka thënë të martën ministri i saj i Jashtëm, teksa ka dënuar Izraelin për situatën e “pajustifikueshme” në Gazë, të krijuar nga fushata ushtarake dhe nga bllokada e saj humanitare.

Kryediplomati francez, Jean-Noel Barrot, ka thënë, po ashtu, se Parisi mbështet një iniciativë të udhëhequr nga Holanda për një rishikim të marrëveshjes së bashkëpunimit ndërmjet Bashkimit Evropian dhe Izraelit, që mund t’i prekë marrëdhëniet politike dhe ekonomike, raporton AFP.

Presidenti i Francës, Emmanuel Macron, e ka lënë të hapur mundësinë që Franca të bëhet vendi evropian i radhës që njeh një shtet palestinez, gjatë një konference të Organizatës së Kombeve të Bashkuara, në qershor.

“Ne nuk mund t’ua lëmë fëmijëve të Gazës një trashëgimi dhune dhe urrejtjeje. Prandaj, e gjithë kjo duhet të ndalet, dhe pikërisht për këtë arsye ne jemi të vendosur ta njohim një shtet palestinez”, ka thënë Barrot për radiostacionin France Inter.

“Dhe, unë jam duke punuar aktivisht për këtë, sepse ne duam të kontribuojmë për një zgjidhje politike në interes të palestinezëve, por edhe për sigurinë e Izraelit”, ka shtuar ai.

Barrot ka folur pasi Macron iu bashkua kryeministrit britanik, Keir Starmer, dhe atij kanadez, Mark Carney, në një komunikatë të rrallë të përbashkët, e cila zemëroi Izraelin.

Komunikata tha se “ne nuk do të rrimë duarkryq”, kërcënoi “veprime të mëtejme konkrete” nëse Izraeli vazhdon bllokimin e ndihmave, dhe tha se “jemi të vendosur për njohjen e një shteti palestinez”.

I pyetur se çfarë do të mund të përfshinin këto veprime, Barrot përsëri i bëri thirrje BE-së për aprovim të kërkesës holandeze për rishikimin e marrëveshjes ndërmjet Izraelit dhe bllokut dhe, në veçanti, për hetimin e shkeljeve të mundshme të marrëveshjes nga ana e Izraelit.

Kryeministri izraelit, Benjamin Netanyahu, ka autorizuar një sasi të kufizuar të ndihmave humanitare, pas mbi dy muajsh e gjysmë bllokade totale të territorit palestinez, i cili po përballet me situatë katastrofike humanitare.

Por, Barrot ka thënë se kjo është “absolutisht e pamjaftueshme”.

Situata në Gazë është e “pajustifikueshme për shkak të dhunës pa dallim, dhe bllokimi u ndihmës humanitare nga qeveria izraelite e ka shndërruar Gazën në një kurth vdekjeje, nëse jo një varrezë”.

“Kur mbjell dhunë, korr dhunë”, ka shtuar ai, duke paralajmëruar Izraelin.

Lufta në Gazë nisi kur militantët e udhëhequr nga Hamasi sulmuan jugun e Izraelit, duke vrarë rreth 1.200 persona, kryesisht civilë, dhe duke marrë peng 251 të tjerë. Pjesëtarët e Hamasit janë ende duke i mbajtur 58 pengje që besohet të jenë gjallë, pasi shumica e pjesës tjetër janë liruar në kuadër të marrëveshjeve për armëpushim dhe të tjera.

Ofensiva hakmarrëse e Izraelit, e cila ka shkatërruar pjesë të mëdha të Gazës, ka vrarë mbi 53.000 palestinezë, kryesisht gra dhe fëmijë, sipas Ministrisë së Shëndetësisë në Gazë, e cila nuk bën dallimin ndërmjet civilëve dhe luftëtarëve në llogaritjet e saj.

Lufta ka zhvendosur rreth 90 për qind të popullatës së Gazës, shumicën prej tyre disa herë.