Pa praninë e Shteteve të Bashkuara, Danimarka po organizon stërvitjet më të mëdha ushtarake në historinë moderne të Grenlandës, me emrin Arctic Light 2025, në një kohë kur aleatët e NATO-s po forcojnë bashkëpunimin e tyre mbrojtës në Arktik, mes interesit të shtuar amerikan për këtë ishull strategjik.

Komandanti për rajonin Arktik të Danimarkës, Soren Andersen, konfirmoi se edhe pse Sekretari amerikan i Mbrojtjes, Pete Hegseth, ishte ftuar, nuk është kërkuar pjesëmarrja e asnjë njësie të forcave të armatosura amerikane.

“Ne bashkëpunojmë me kolegë nga Baza Hapësinore amerikane në Pituffik, por nuk janë ftuar njësi të përbashkëta në këtë stërvitje,” deklaroi Andersen për Reuters.

Më parë, SHBA kishin marrë pjesë në ushtrime të ngjashme nën drejtimin e Danimarkës në Grenlandë.

Një zëdhënës i Ambasadës amerikane në Kopenhagë theksoi: “Edhe pse nuk marrim pjesë në këtë stërvitje të veçantë, vijojmë bashkëpunimin e fortë ushtarak me Mbretërinë e Danimarkës dhe aleatët tanë në Arktik.”

Mesazh politik nga Kopenhaga përmes stërvitjeve?

Sipas analistit të pavarur ushtarak, Hans Peter Michaelsen, ushtrimet “dërgojnë një sinjal të fuqishëm politik”, duke treguar mbështetjen e Danimarkës për Grenlandën, së bashku me aleatët e NATO-s.

“Këto stërvitje janë dizajnuar për të treguar amerikanëve se Danimarka kujdeset për Grenlandën dhe e bën këtë me ndihmën e vendeve të tjera të fuqishme të NATO-s,” vlerësoi Michaelsen.

Megjithatë, Andersen hodhi poshtë sugjerimet se stërvitjet synojnë të dërgojnë një mesazh të drejtpërdrejtë në drejtim të Uashingtonit.

Danimarka ka rritur ndjeshëm investimet në mbrojtje dhe aktivitetet ushtarake në Grenlandë, rajon gjysmë-autonom, pas komenteve të ipresidentit amerikan Donald Trump për blerjen e ishullit.

Marrëdhëniet mes Kopenhagës dhe Uashingtonit janë përkeqësuar këtë vit, veçanërisht pas refuzimit të Trump për të përjashtuar publikisht mundësinë e një aneksimi me forcë të Grenlandës.

Vetëm muajin e kaluar, Danimarka thirri ambasadorin amerikan për sqarime, pas raportimeve për operacione të fshehta ndikimi nga qytetarë amerikanë në Grenlandë.

Ushtrimet Arctic Light 2025 zhvillohen nga 9 deri më 19 shtator dhe përfshijnë mbi 550 trupa, përfshirë forca speciale nga Danimarka, Franca, Gjermania, Suedia dhe Norvegjia.

Sipas komandantit Andersen, gjatë stërvitjeve analizohen skenarë që përfshijnë rritjen e aktivitetit rus dhe kinez në Arktik, një zhvillim që po shkakton shqetësim në radhët e aleatëve perëndimorë.

Nga ana e saj, ambasada amerikane përshëndeti përpjekjet e aleatëve të NATO-s për të garantuar gatishmërinë për mbrojtjen e rajonit arktik.

gsh

Kancelari gjerman, Friedrich Merz, duke folur në një ceremoni për të shënuar 75-vjetorin e themelimit të Këshillit Qendror të Hebrenjve në Berlin, 17 shtator.

Komisioni Evropian paraqet në Bruksel një paketë masash për Izraelin, 17 shtator.

Në emisionin Log i moderuar nga Endri Xhafo ishte i ftuar analisti Fatos Lubonja i cili diskutoi për seancat plenare që u zhvilluan ditën e sotme. Lubonja u shpreh  me tone kritike ndaj mënyrës se si po trajtohet procesi i integrimit të Shqipërisë në Bashkimin Evropian.

Sipas tij, qeveria shqiptare po përdor integrimin si një iluzion për të mashtruar qytetarët dhe për të zbehur arsyet reale të largimit masiv nga vendi. Lubonja theksoi se Europa është vetë në një nga periudhat më të errëta të historisë së saj.

“Ne duam të hyjmë në Evropë që të bëhemi pak a shumë me standarte evropiane.Të kemi një shtet të së drejtës dhe të kemi një drejtësi të pavarur. Evropa në historinë e saj është në periudhën më të zezë dhe këtu bëhet edhe shkelje e parlamentit. A do ta ngrejnë ata zërin kundrejt kësaj Amerike dhe Evrope? Kjo është thelbi i gjësë. Kjo është një mashtrim i Edi Ramës që ne mos të ikim nga vendi”, tha Lubonja. bw

Komisionerja për Zgjerimin Evropian, Marta Kos, mbajti sot fjalën në Konferencën e 6 Ndërqeveritare mes Shqipërisë dhe Bashkimit Evropian që zhvillohet në Bruksel.

Ajo tha se BE do të ofrojë mbështetje për Shqipërinë, ndërsa kjo e undit duhet të japë rezultate me reformat.

“Shqipëri duhet të japë rezultate me reformat. Duhet të sjellë gjithçka që është e nevojshme. Vizioni i ekipit tuaj është që përmbyllen negociatat në fund të 2027-ës. Ne duhet t’i mbështesim me gjithë fuqinë që kemi ne si BE.”, tha ajo. bw

Presidenti i Ukrainës, Volodymyr Zelenskyy, ka kërkuar publikisht nga Donald Trump një qëndrim të qartë dhe të vendosur në lidhje me një paketë të re sanksionesh ndaj Rusisë dhe dhënien e garancive të sigurisë për Ukrainën, si mënyra e vetme për t’i dhënë fund luftës dhe për të ndalur presidentin rus Vladimir Putin.

Në një intervistë ekskluzive për Sky News, Zelenskyy theksoi se ndalimi i luftës është i mundur vetëm nëse vendosen paraprakisht garanci të mirëfillta sigurie për Kievin, një proces që, sipas tij, kërkon vendosmëri të madhe nga presidenti amerikan.

“Shpresoj shumë që Presidenti Trump të ketë një pozicion të qartë. Për të ndalur Putinin dhe për t’i dhënë fund luftës, ne kemi nevojë për hapa personalë të fortë,” tha Zelenskyy.

Ai shtoi se pret nga kryeministri britanik, Sir Keir Starmer, që gjatë vizitës shtetërore të kësaj jave në Britani, të trajtojë në mënyrë konkrete çështjen e të ardhmes së sigurisë për Ukrainën.

“Para se të përfundojmë luftën, dua të kemi një marrëveshje të plotë – një dokument të mbështetur nga SHBA dhe të gjithë partnerët evropianë. Kjo është shumë e rëndësishme,” theksoi ai.

“Trump mund ta bëjë Putinin të ketë frikë”

Zelenskyy u shpreh gjithashtu se SHBA ka kapacitetin për të forcuar më tej mbrojtjen ajrore të Ukrainës dhe për të goditur rëndë ekonominë ruse përmes sanksioneve të reja.

“Besoj se Donald Trump mund të na sigurojë sistemet e mbrojtjes ajrore që na duhen – SHBA ka sa të duash,” u shpreh ai. “Ai ka forcë të mjaftueshme për ta bërë Putinin të ketë frikë prej tij.”

Zelenskyy përmendi se Bashkimi Evropian ka miratuar tashmë 18 paketa sanksionesh kundër Rusisë, ndërsa pritet që një paketë e fuqishme amerikane të plotësojë përpjekjet për izolimin ekonomik të Kremlinit.

Polonia nuk ka dyshim se dronët që fluturojnë në territorin e saj nuk ishin aksidentale, tha ministri i jashtëm i vendit.

Radoslaw Sikorski u tha gazetarëve se incidenti ishte një sulm i paprecedentë ndaj NATO-s dhe Bashkimit Evropian.

Ai shtoi se kryeministri i Polonisë, Donald Tusk, ka kërkuar mbrojtje ajrore më të fortë.

Kjo vjen pasi ministria e mbrojtjes e Rusisë tha se “nuk ishte planifikuar asnjë objektiv në territorin e Polonisë për t’u goditur”. BW

Kancelari gjerman Friedrich Merz paralajmëroi se “plani imperialist” i Presidentit rus Vladimir Putin “nuk do të përfundojë me pushtimin e Ukrainës, por është vetëm fillimi”.

Duke folur në një konferencë të ambasadorëve gjermanë, Merz deklaroi se “po vuajmë çdo ditë sulme hibride ruse gjithnjë e më intensive, përfshirë edhe infrastrukturën tonë”, dhe theksoi “provokimet” e Moskës në Detin e Veriut dhe Detin Baltik.

Gjermania është vendi më aktiv evropian që po merr masa konkrete në mbrojtje, që nga rekrutimi i ushtarëve, deri tek investimi në armatim. Merz gjithashtu e ka përsëritur disa herë se Rusia duhej ndaluar shumë më herët, që ku sulmoi Gjeorgjinë dhe Krimenë. BW

Për herë të parë që nga fillimi i luftës në Ukrainë, në Bjellorusi po zhvillohen manovra me pjesëmarrjen ruse. Lituania fqinje po përgatitet për shkelje të mundshme kufitare.

Një zonë neutrale vetëm rreth 15 metra e gjerë shënon kufirin midis Lituanisë dhe Bjellorusisë, e cila konsiderohet aleate e Rusisë. Rripi i tokës prej 600 kilometrash kufizohet nga dy gardhe metalike. Ai në anën lituaneze është i kurorëzuar me tela me gjemba. Sipër tij janë kamera mbikëqyrjeje që rrotullohen rregullisht nga e majta në të djathtë me zhurmë. Lituania është e shqetësuar për shkeljet e mundshme kufitare, veçanërisht që nga fillimi i sulmit të Rusisë ndaj Ukrainës në shkurt të vitit 2022. Ky shqetësim tani është përkeqësuar nga të ashtuquajturat manovra “Zapad”. Në shqip, emri do të thotë “perëndim”.

Disa dhjetëra mijëra ushtarë nga Rusia dhe Bjellorusia do të marrin pjesë në to nga 12 deri më 16 shtator. Ata do të stërviten me tanke dhe mitralozë, por edhe me raketën e re ruse supersonike Oreschnik, e cila thuhet se mund të pajiset edhe me koka bërthamore. Edhe pse këto ushtrime të përbashkëta janë mbajtur rregullisht që nga viti 2009, ato janë të parat e këtij lloji që nga fillimi i pushtimit të Ukrainës.

Në përgjigje, rojet kufitare lituaneze kanë marrë trajnime shtesë në javët e fundit dhe do të kryejnë patrullime shtesë gjatë ushtrimeve, shpjegon gjenerali Rustamas Liubajevas i shërbimit të kontrollit kufitar të vendit.

“Që nga lufta në Ukrainë, ne e shohim Rusinë edhe më shumë si një agresor potencial”, tha ai për DW. “Ne presim shkelje kufitare, për shembull, përmes shfrytëzimit të migrantëve, siç ka ndodhur në të kaluarën”. Sipas disa raporteve, Rusia mund të ketë sjellë mijëra migrantë në Bjellorusi në vitin 2022 dhe t’i ketë dërguar ata përtej kufirit në Poloni, ndër vende të tjera. Besohet se Moska dëshiron të destabilizojë vendet evropiane në këtë mënyrë.

Për më tepër, Lituania po përgatitet që ushtarët të jenë në gjendje të kalojnë kufirin pa leje ose të dërgojnë dronë në ditët në vijim, sipas Liubajevas: “Ka pasur tashmë disa sulme të tilla hibride”. Vendet baltike raportojnë vazhdimisht dronë që shkelin hapësirën e tyre ajrore. Në korrik të këtij viti, dy prej tyre fluturuan nga Bjellorusia në Lituani dhe u rrëzuan. Në gusht, një dron që mbante eksplozivë u rrëzua në Poloni.

Lituania riarmatoset
Ndërkohë, Lituania po demonstron gjithashtu forcën e saj ushtarake. Në ditët në vijim, ajo do të zhvillojë stërvitjet e veta ushtarake me Poloninë, Estoninë dhe Letoninë, duke përfshirë deri në 40.000 ushtarë. Për më tepër, Lituania planifikon të rrisë buxhetin ushtarak në më shumë se 5 përqind të produktit të brendshëm bruto (PBB) deri në vitin 2026. Në vitin 2021, buxheti i mbrojtjes ishte ende më pak se 2 përqind e PBB-së.

Linas Kojala, drejtor i Qendrës së Gjeopolitikës dhe Sigurisë, një qendër kërkimore me seli në Vilnius, kryeqytetin lituanez, beson se rreziku është kryesisht afatgjatë. “Rusia na konsideron si territore që duhet të jenë nën kontrollin e Kremlinit”, i tha ai DW. “Edhe pse nuk mendoj se Rusia do ta pushtojë Lituaninë në të ardhmen e afërt, ne do të monitorojmë nga afër nëse trupat e stacionuara aktualisht në Bjellorusi do të mbeten atje pas manovrave dhe nëse Moska ndërton infrastrukturë afatgjatë atje që mund të shërbejë si bazë për një skenar sulmi shtatë ose dhjetë vjet më vonë prej tani.”

Shqetësimi për skenarë të tillë ka qenë i përhapur midis lituanezëve që nga lufta nëUkrainë, thotë Margarita Šešelgytė, drejtoreshë e Institutit të Marrëdhënieve Ndërkombëtare dhe Shkencave Politike në Universitetin e Vilniusit. “Menjëherë pas fillimit të luftës së agresionit rus, shumë donin të emigronin,” i thotë ajo DW. “Disa madje pyesnin veten nëse duhet të largoheshin nga vendi me familjet e tyre gjatë manovrave të ardhshme.”Në fund të fundit, lufta në Ukrainë filloi në një mënyrë të ngjashme. “Së pari, në fund të vitit 2021, Rusia dërgoi trupa në kufirin ukrainas për manovra, dhe më pas nuk i tërhoqi ato, kështu që ata më në fund ishin në gjendje të pushtonin Ukrainën në fillim të shkurtit 2022,” thekson Šešelgytė.

Megjithatë, edhe politilogia beson se rreziku i një pushtimi rus është më afatgjatë. “Për sa kohë që Ukraina nuk humbet ose nuk nënshkruhet një traktat i keq paqeje, ne jemi pak a shumë të sigurt. Megjithatë, nëse lufta në Ukrainë do të mbaronte në një moment, ne mund të ishim në radhë”, beson Šešelgytę.
Shtetet Baltike “janë në të njëjtën barkë”
Vendi fqinj i Bjellorusisë ndan këto shqetësime. Tre shtetet baltike, përfshirë Estoninë, janë “në të njëjtën barkë”. “Ne e konsiderojmë veten një njësi kur bëhet fjalë për Rusinë”, thotë Karlis Bukovskis, drejtor i Institutit të Çështjeve Ndërkombëtare në Riga, kryeqytetin e Letonisë për DW. Bukovskis flet për një “traumë të përbashkët”. “Nëpërmjet Paktit fillimisht sekret Hitler-Stalin të vitit 1939, Gjermania naziste ia la ​​Shtetet Baltike Bashkimit Sovjetik, i cili më vonë pushtoi vendet tona midis viteve 1944 dhe 1991”.

Nëpërmjet kësaj marrëveshjeje, Rajhu Gjerman dhe Bashkimi Sovjetik i ndanë më pas Shtetet Baltike dhe Poloninë në një sferë ndikimi gjermane dhe një ruse. Një pjesë e Polonisë do t’i transferohej Gjermanisë. “Kjo është arsyeja pse këto lloj manovrash ushtarake ruse na shqetësojnë të gjithëve”, thotë Bukovskis.

Megjithatë, sipas politologut, sot ka edhe arsye për optimizëm: “Vlerësohet se më pak trupa do të marrin pjesë në manovra këtë vit sesa në të kaluarën, ndër të tjera sepse ushtria ruse është e angazhuar në Ukrainë. Për më tepër, sot ka mijëra trupa të NATO-s – nga Britania e Madhe, Gjermania dhe madje edhe Franca – të stacionuara në Detin Baltik. Kjo na jep shpresë. Nuk jemi më vetëm!”

Aida dhe Meçislav Tarashkeviçi vazhdojnë të kenë frikë nga stërvitjet e ardhshme ushtarake. Çifti ka jetuar për gati dy dekada në njërën nga shtatë shtëpitë në fshatin lituanez Gulbine, vetëm shtatë kilometra larg kufirit me Bjellorusinë. “Stërvitjet ushtarake janë shumë afër, kështu që të gjithë në fshatin tonë janë shumë të shqetësuar. Edhe më shumë sepse shohim se çfarë po bën Rusia në Ukrainë”, tha për DW Meçislavi, 59 vjeç, i cili, ashtu si gruaja e tij, punon në një fabrikë lokale mishi pule. Gruaja e tij, Aida, shton: “Nuk e kuptoj pse njerëzit duhet të luftojnë. Ne të gjithë duam të bëjmë jetë normale, të bëjmë punët tona dhe të jetojmë në paqe në shtëpitë tona.”/DW

Një foshnjë ishte midis tre personave që vdiqën në sulmet e Rusisë gjatë natës në Kiev, të cilat plagosën 18 persona dhe i vunë flakën dhjetëra ndërtesave në kryeqytet, përfshirë selinë e qeverisë, thanë zyrtarët ukrainas të dielën.

Kryebashkiaku i Kievit, Vitali Klitschko, tha se një zjarr shpërtheu në ndërtesën qeveritare në qendër të qytetit pas sulmit, i cili filloi me dronë që binin poshtë, të ndjekur nga sulme me raketa.

Dëshmitarë të Reuters panë tym të dendur që ngrihej nga ndërtesa në lagjen Pecherskyi të qytetit.

Sulmet me dronë vranë foshnjën dhe një grua të re, tha Klitschko në aplikacionin e mesazheve Telegram, ndërsa një grua shtatzënë ishte midis pesë të plagosurve të shtruar në spital.

Më parë, Klitschko kishte thënë se një grua e moshuar vdiq në një strehë bombash në lagjen me gjethe Darnytskyi në lindje të lumit Dnipro, vendi i dy vdekjeve të tjera.

Zyrtarët e emergjencës shtetërore thanë se një zjarr shpërtheu në dy nga katër katet e një ndërtese banimi në lagjen e goditur nga sulmi me dron, me strukturën e saj të shkatërruar pjesërisht.

Në lagjen perërndimore të Sviatoshynskyi, disa kate të një ndërtese banimi nëntëkatëshe u shkatërruan pjesërisht, thanë Klitschko dhe zyrtarët e emergjencës.

Mbetjet e dronit që binin shkaktuan zjarre në një pallat 16-katësh dhe dy ndërtesa të tjera nëntëkatëshe, shtoi kryebashkiaku.

Tymi dilte nga ndërtesat e apartamenteve, disa me dysheme pjesërisht të shembura dhe fasada të shkatërruara, në fotografitë e postuara në mediat sociale nga zyrtarët e emergjencës.

Rusia “po godiste qëllimisht dhe me vetëdije objektiva civile”, tha në Telegram Timur Tkachenko, kreu i administratës ushtarake të kryeqytetit.

Dhjetëra shpërthime tronditën qytetin qendror të Ukrainës, Kremençuk, duke ndërprerë energjinë elektrike në disa zona, tha kryebashkiaku Vitalii Maletskyi në Telegram.

Sulmet ruse në Krivyi Rih në të njëjtin rajon shënjestruan infrastrukturën e transportit dhe urbane, tha në Telegram Oleksandr Vilkul, kreu i administratës ushtarake, por nuk u raportua për të lënduar.

Në qytetin jugor të Odesës, infrastruktura civile dhe ndërtesat e banimit u dëmtuan, me zjarre që shpërthyen në disa blloqe apartamentesh, tha guvernatori rajonal Oleh Kiper në Telegram.

Moska nuk dha menjëherë komente. Të dyja palët mohojnë se kanë synuar civilët në sulme, por mijëra njerëz kanë vdekur në luftën që Rusia nisi me një pushtim në shkallë të plotë të Ukrainës në shkurt të vitit 2022.

Ndërsa Ukraina perëndimore përballet me kërcënimin e sulmeve ajrore, Polonia aktivizoi avionët e saj dhe të aleatëve për të garantuar sigurinë ajrore, tha komanda operative e forcave të armatosura polake.

Raportimi nga Pavel Polityuk dhe Valentin Ogirenko në Kiev dhe Lidia Kelly në Melbourne; Redaktimi nga William Mallard dhe Clarence Fernandez.

Presidenti i Ukrainës, Volodymyr Zelensky, ka folur për vendimin e tij për të refuzuar ftesën e presidentit rus Vladimir Putin për të udhëtuar në Moskë, ku do të diskutonin një marrëveshje të mundshme paqeje.

Në një intervistë për ABC News, Zelensky tha se nuk e sheh të mundur një takim në këto kushte.

“Nuk mund të shkoj në Moskë kur vendi im sulmohet çdo ditë me raketa dhe bombardime. Nuk mund të shkoj në kryeqytetin e një terroristi”, deklaroi Zelensky. Ai shtoi se, “ai mund të vijë në Kiev”, duke iu referuar presidentit rus. Sipas Zelenskyt, Putin e di shumë mirë këtë.

Gjatë intervistës, presidenti ukrainas theksoi disa herë se Putin nuk ka një interes të vërtetë për të realizuar një takim, duke qenë se lufta në Ukrainë vazhdon ende.

Nga ana tjetër, presidenti rus Vladimir Putin kishte deklaruar më herët se “kurrë nuk ka qenë kundër një takimi me Zelenskyn”.

“Nëse Zelensky është i gatshëm, le të vijë në Moskë”, kishte thënë Putin të mërkurën. “Ky takim do të ndodhë”, kishte shtuar ai.

Në të njëjtën kohë, presidenti amerikan Donald Trump ka vendosur si prioritet të tij një takim mes dy liderëve, në përpjekje për të ndërmjetësuar për një marrëveshje paqeje.

“Në fund, do t’i fus të dy në një dhomë”, kishte deklaruar Trump në gusht për Fox News.

Trump kishte planifikuar organizimin e një takimi trepalësh mes SHBA-së, Rusisë dhe Ukrainës gjatë samitit që zhvilloi muajin e kaluar në Alaskë me presidentin Putin. Ai më pas deklaroi se një takim dypalësh mes Putinit dhe Zelenskyt do të pasonte pasi presidenti ukrainas të vizitonte Shtëpinë e Bardhë.

“Takimi trepalësh do të ndodhë”, theksoi Trump javën e kaluar në një intervistë për The Daily Caller. “Për dypalëshin, nuk jam i sigurt”, shtoi ai. gsh

Një vendim i Gjykatës së Kasacionit hedh dyshime mbi një dispozitë të sponsorizuar nga qeveria. Sipas gjyqtarëve, nëse ndalimi në një qendër nuk vërtetohet, azilkërkuesi duhet të lirohet menjëherë.

Operacioni “Albania” përballet me një tjetër pengesë. Qeveria Italiane është goditur nga një pengesë e madhe në frontin e emigrantëve. Vendimi i një gjyqtari vë në pikëpyetje një nga dispozitat që lejoi rihapjen e qendrave të ngritura sipas protokollit të nënshkruar nga kryeministri shqiptar Edi Rama dhe kryeministrja italiane Giorgia Meloni.

Rregullorja qeveritare që u kritikua ashpër

Një vendim i Gjykatës së Kasacionit ka shënjestruar një nga masat e përfshira në dekretin e miratuar nga Parlamenti Italian në muajt e fundit, i cili lejoi rihapjen e objektit në Gjadër, i cili aktualisht merret me emigrantët e mbajtur në qendrat e paraburgimit të riatdhesimit. Sipas gjyqtarëve, nëse paraburgimi në një qendër nuk vërtetohet, azilkërkuesi duhet të lirohet menjëherë. Prandaj, ai nuk mund të qëndrojë në një qendër deri në 48 orë, siç përcaktohet në dekretin e nënshkruar nga Ministri i Brendshëm Matteo Piantedosi.

Ligji është shqyrtuar nga Gjykata e Kasacionit

E gjitha filloi me një ankesë të paraqitur nga një emigrant i transportuar në qendrën e Gjadrit në Shqipëri dhe më pas, pasi ndalimi i tij nuk u vërtetua, u transferua në qendrën e Barit. Burri qëndroi në objektin në kryeqytetin e Puglias nga 4 deri më 5 korrik, duke shkaktuar kështu një “shkelje të qartë të së drejtës parësore të lirisë personale”.

Referimi në Gjykatën Kushtetuese

Gjyqtarët e Gjykatës së Lartë pretendojnë se janë shkelur gjashtë nene të Kushtetutës dhe synojnë ta sjellin ligjin e qeverisë në vëmendjen e Gjykatës Kushtetuese. Në vendimin e tyre, gjyqtarët e konsiderojnë “çështjen e legjitimitetit kushtetues si relevante dhe jo haptazi të pabazuar”, me referencë të veçantë për masën në lidhje me “mosvleftësimin e urdhrit të ndalimit”. Gjykata e Lartë e Kasacionit e konsideron këtë si një kufizim të lirisë personale të futur me ligj: prandaj ligji do të ishte në kundërshtim me parimet kushtetuese, Konventën Evropiane për të Drejtat e Njeriut dhe normat mbikombëtare.

Meloni në telashe me emigrantët pas vendimit të BE-së: çfarë po ndodh?

Disa parti opozitare nxituan të komentonin mbi vendimin. “Dyshimet e ngritura nga Gjykata Supreme e Kasacionit para Gjykatës Kushtetuese tregojnë, nëse nevojiteshin, se qeveria Meloni është e paaftë për të menaxhuar fenomenin e emigracionit në Itali. Propozimet e miratuara nga Vëllezërit e Italisë, Lidhja dhe Forza Italia prodhojnë rregullore që jo vetëm janë joefektive, siç demonstrohet nga mbërritjet masive dhe në rritje të vazhdueshme, por edhe në kundërshtim me ligjin evropian dhe kombëtar”, denoncoi Alfonso Colucci, kreu i Lëvizjes Pesë Yje në Komitetin e Çështjeve Kushtetuese të Dhomës së Deputetëve. bw

Disa shërbime të gjigantit Google, përfshirë platformën YouTube, nuk kanë qenë të qasshme në Kosovë dhe disa pjesë tjera të Evropës në paraditen e së enjtes.

Edhe kompania IPKO, e cila ofron shërbime të telekomunikimit në Kosovë, i ka njoftuar klientët e saj se kompania Google po përjeton ndërprerje.

Asociacioni për Liri të Shprehjes, që monitoron censurën lokale në internet në Turqi, ka thënë se shërbimet janë ndërprerë prej orës 10:00.

Autoritete turke kanë thënë se kanë kërkuar raport teknik nga kompania Google për të mësuar më shumë.

Portugalia shpalli sot një ditë zie kombëtare, një ditë pasi një teleferik i Lisbonës doli nga shinat në një nga zonat turistike më të njohura të kryeqytetit , duke vrarë 15 persona dhe plagosur 18 të tjerë. Autoritetet kanë hapur një hetim për aksidentin, i cili ndodhi në teleferikun Gloria , i cili lidh sheshin Rossio me distriktet Bairro Alto dhe Principe Real .

Shkaku i aksidentit është ende i panjohur.  Disa metra më poshtë, një tjetër teleferik është ndalur. Kalimtarët shikojnë të tronditur aksidentin që sapo ka ndodhur.

Të gjitha viktimat u nxorën nga rrënojat e përplasjes që ndodhi pak pas orës 18:00  u tha gazetarëve në orët e para të mbrëmjes Thiago Augusto, kreu i shërbimit të ndihmës së shpejtë, duke sqaruar se midis viktimave ka edhe të huaj, pa qenë në gjendje të specifikojë kombësinë e tyre.

Ky teleferik, i cili mund të mbajë rreth 40 pasagjerë (gjysma e të cilëve në këmbë), është një mjet transporti i përdorur nga turistë të shumtë që vizitojnë kryeqytetin portugez.

“Është një tragjedi që nuk ka ndodhur kurrë në qytetin tonë”, tha kryebashkiaku i Lisbonës, Carlos Moedas. bw

Me intensifikimin e tensioneve në Evropë, Republika Çeke po forcon fuqishëm kapacitetet e saj ushtarake, duke porositur 44 tanke Leopard 2A8, të prodhuara në Gjermani, në një marrëveshje që kap vlerën e 1.4 miliardë eurove. Ministrja e Mbrojtjes, Jana Černochova, njoftoi se dërgesat e këtyre tankeve janë të planifikuara të realizohen nga vitet 2028 deri më 2031.

Përveç kësaj, Çekia ka siguruar një opsion për të blerë edhe 14 tanke të tjera Leopard 2A8, një marrëveshje që do të konfirmohet në javët në vijim. Shteti i Evropës Qendrore po ashtu ka kërkuar 19 versionet e specializuara të këtij modeli, duke çuar totalin e mundshëm të tankeve në 77, përfshirë edhe një porosi nga Kroacia për 50 të tillë.

Ky përforcim i forcave të armatosura është pjesë e një plani më të gjerë për modernizimin e ushtrisë, i cili përfshin gjithashtu blerjen e armëve perëndimore si helikopterë dhe radarë. Vitin e kaluar, Çekia kishte miratuar blerjen e tankeve Leopard 2A4 dhe kishte marrë tanket shtesë në kuadër të një marrëveshjeje me Gjermaninë, ku ky i fundit kompensoi për tanket që Praga kishte dërguar në Ukrainë.

Po ashtu, Republika Çeke ka porositur avionë luftarakë amerikanë F-35, si pjesë e përpjekjeve për të avancuar kapacitetet e saj të mbrojtjes.

Ministrja Černochová bëri të ditur gjithashtu se Ministria e Mbrojtjes do të vijojë me planin për të blerë armë të vogla nga prodhuesi çek Česká Zbrojovka, ndërsa vendi do të armatoset edhe me 18 automjete motorike Supacat Extenda, nga kompania çeke LPP. bw

“Takimi i presidentit të Kinës me udhëheqësit e Rusisë, Iranit dhe Koresë së Veriut në Pekin përbën një “sfidë të drejtpërdrejtë ndaj rendit ndërkombëtar.” Kështu tha sot Përfaqësuesja e Lartë e BE-së, Kaja Kallas, gjatë një konference për shtyp në Bruksel.

Duke iu referuar takimit të presidentit Xi me udhëheqësit e Rusisë, Iranit dhe Koresë së Veriut në Pekin, numri njw i diplomacisë evropiane tha se ajo që po shohim është “një aleancë autoritare që kërkon një proces të shpejtë drejt një rendi të ri botëror”, i cili “nuk është vetëm një perspektivë anti-perëndimore, por një sfidë për rendin ndërkombëtar të ndërtuar mbi rregulla”.

Kaja Kallas nuk mungoi të theksonte se Kina e ka mbështetur Rusinë në luftën e saj kundër Ukrainës, duke vënë në dukje se e gjithë kjo është një realitet i ri me të cilin Evropa do të duhet të përballet.

Konkretisht në lidhje me luftën Rusi-Ukrainë, K. Kallas deklaroi se “Rusia nuk dëshiron realisht ta përfundojë këtë luftë”, duke theksuar se për Evropën kjo do të thotë më shumë mbështetje ushtarake, diplomatike dhe ekonomike për Kievin.

Ajo deklaroi gjithashtu se në rast të një armëpushimi, “një Ukrainë e fortë ushtarakisht është garancia më e fortë e sigurisë”. bw

Komisioni Evropian ka konfirmuar se ka pasur ndërhyrje në sinjalin GPS të avionit që transportonte presidenten e Komisionit Evropian, Ursula von der Leyen, gjatë afrimit të tij në aeroportin e Plovdivit në Bullgari.

Zëdhënësja e Komisionit, Arianna Podestà, bëri me dije se sipas autoriteteve bullgare, ndërhyrja ka qenë një akt i qëllimshëm dhe i hapur nga Rusia. Megjithatë, pavarësisht pengesave teknike, avioni u ul në mënyrë të sigurt.

“Konfirmojmë se ka pasur ndërhyrje në sinjalin GPS, por avioni u ul i sigurt në Bullgari. Autoritetet bullgare dyshojnë se bëhet fjalë për një ndërhyrje të hapur nga ana e Rusisë,” deklaroi Podestà, duke konfirmuar raportimin e Financial Times.

Sipas saj, incidenti është pjesë e një strategjie më të gjerë frikësimi.

“Jemi të mësuar me këto lloj kërcënimesh dhe përpjekjesh për frikësim, të cilat përbëjnë element të sjelljes armiqësore të Rusisë. Ky episod forcon më tej vendosmërinë tonë të palëkundur për të forcuar kapacitetet tona mbrojtëse dhe mbështetjen për Ukrainën”, tha ajo.

Komisioni Evropian thekson se vizita e presidentes von der Leyen në vendet që kufizohen me Rusinë dhe Bjellorusinë merr një domethënie edhe më të madhe pas këtij incidenti, duke vënë në dukje rreziqet e përditshme me të cilat përballen ato.

“Bashkimi Evropian do të vazhdojë të investojë në mbrojtje dhe gatishmëri ushtarake, veçanërisht pas këtij incidenti,” shtoi Podestà. Panorama

Policia rrethoi zonën ku u vra Andriy Parubiy në Lviv.

Presidentja e Komisionit Europian, Ursula von der Leyen, ka deklaruar se Bashkimi Europian është duke hartuar plane të qarta për dërgimin e trupave në Ukrainë, si pjesë e garancive të sigurisë pas përfundimit të luftës. Deklarata u bë gjatë një interviste për Financial Times, ku ajo nënvizoi se çështja është “kritike dhe me rëndësi madhore” për të ardhmen e sigurisë europiane.

Sipas saj, ekziston tashmë një “hartë e qartë rruge” dhe një marrëveshje paraprake me Shtëpinë e Bardhë, e cila garanton mbështetjen amerikane në këtë proces.

“Presidenti i SHBA na ka siguruar se do të ketë prezencë amerikane si pjesë e garancive të sigurisë për Ukrainën, dhe kjo është konfirmuar në mënyrë të përsëritur,” deklaroi von der Leyen.

Këto deklarata vijnë në një moment kritik, teksa debati për arkitekturën e sigurisë së Ukrainës pas mbarimit të luftës me Rusinë është intensifikuar. Vendet europiane dhe aleatët perëndimorë janë në diskutime për të shmangur një përsëritje të agresionit rus, dhe për të siguruar një prani ndërkombëtare të qëndrueshme në territorin ukrainas. gsh

Policia thotë se po shqyrton disa hipoteza në lidhje me vrasjen e ish-kryetarit të Parlamentit ukrainas Andriy Parubiy, përfshirë një lidhje ruse.

Në një njoftim të raportuar nga mediat ukrainase, shefi i policisë rajonale të Lvivit, Oleksandr Shlyakhovsky, deklaroi se identiteti i vrasësit nuk është përcaktuar ende.

“Në orën 11:37 të paradites në rrugën Yefremov, vrasësi qëlloi afërsisht tetë herë nga një armë zjarri me tytë të shkurtër. Krimi ishte planifikuar me shumë kujdes”, tha ai.

Shlyakhovsky konfirmoi se policia po kërkon një person që mban rroba të ngjashme me ato të një kalorësi dhe ka mbajtur helmetë.

Trupi i Andriy Parubiy, i cili u vra këtë mëngjes, shtrihet përtokë në Lviv.

Presidenti i Ukrainës, Volodymyr Zelensky, tha se Kievi po kërkon një takim të ri me presidentin e Shteteve të Bashkuara, Donald Trump, dhe aleatët evropianë qysh javën e ardhshme, duke shtuar se Rusia është përgatitur ta nisë një ofensivë të re në lindje të Ukrainës.

“Rusia ka përqendruar atje deri në 100 mijë trupa”, tha Zelensky mbrëmjen e së premtes, duke iu referuar vijave të frontit pranë qytetit tejet strategjik, Pokrovsk.

Pokrovsk, në rajonin jugor të Donjeckut në Ukrainë, kishte një popullsi prej 60.000 banorësh para luftës. Shumica e banorëve kanë ikur, pasi forcat ruse e kanë rrethuar qytetin për muaj të tërë, por nuk kanë arritur t’i thyejnë vijat mbrojtëse dhe ta marrin nën kontroll qytetin.

Pak pasi Zelensky i bëri këto deklarata, kreu i administratës ushtarake rajonale në Dnipropetrovskut tha se rajoni po përballet me “sulm masiv”.

Serhiy Lysak shkroi në Telegram se “po dëgjohen shpërthime. Ka goditje në Dnipro dhe Pavlohrad”.

Autoritetet në Zaporizhja raportuan se edhe ky rajon ishte nën sulm mëngjesin e së shtunës, dhe se mund të ketë viktima.

Ndërkohë, ministri i Mbrojtjes i Rusisë, Andrei Belousov, u mburr me përpjekjet ushtarake të vendit të tij në Ukrainë, pavarësisht se për vite të tëra kanë pësuar humbje të mëdha në njerëz dhe dëme të rënda për ekonominë ruse.

Belousov gjithashtu lavdëroi fushatën e Rusisë me sulme vdekjeprurëse me raketa dhe dronë mbi Ukrainë, të cilat kanë vrarë mijëra civilë dhe janë dënuar gjerësisht nga bashkësia ndërkombëtare.

Ai theksoi se 35 sulme ajrore kundër 146 objektivave strategjikë këtë vit kanë shkaktuar dëme të rënda në infrastrukturën ushtarake të Ukrainës.

Këtë javë, Ukraina vajtoi humbjen e 22 njerëzve, përfshirë katër fëmijëve, vetëm në një ndërtesë që ishte shembur nga një sulm rus në Kiev.

Zelensky tha se zyrtarët ukrainas duan të takohen me Trumpin dhe aleatët evropianë javën e ardhshme, në një kohë kur përpjekjet për një armëpushim dhe përfundimin e luftës – e cila filloi në shkurt të vitit 2022 kur Rusia e nisi pushtimin e plotë – po hasin vështirësi.

Trump, i cili e ka bërë përfundimin e luftës prioritet kryesor të mandatit të tij presidencial, ka shprehur zemërimin e tij ndaj presidentit të Rusisë, Vladimir Putin, i cili nuk po i pranon thirrjet e amerikanëve për bisedime ballë për ballë me Zelenskyn.

Një javë më parë, Trump tha se do të vendoste brenda dy javësh për hapat e ardhshëm nëse nuk do të caktoheshin bisedime të drejtpërdrejta, megjithëse ai më herët ka dhënë afate por është zmbrapsur.

Më 26 gusht, ai ngriti mundësinë e vendosjes së sanksioneve të reja ndaj Moskës.

“Nuk do të jetë një luftë botërore, por do të jetë një luftë ekonomike,” tha Trump. “Një luftë ekonomike do të jetë e keqe, dhe do të jetë e keqe për Rusinë, dhe unë nuk e dua këtë.”

Por, ai shtoi se “as Zelensky nuk është plotësisht i pafajshëm. Unë tani kaloj mirë me të, por kemi një marrëdhënie shumë ndryshe sepse tani nuk po i paguajmë më para Ukrainës”, tha Trump, duke iu referuar një marrëveshjeje në të cilën anëtarët e NATO-s blejnë armë amerikane për t’u përdorur nga Kievi.

Ukraina ka pranuar një propozim të SHBA-së për armëpushim dhe thirrjet për një takim mes Putinit dhe Zelenskyt, por Moska nuk është pajtuar.

Zëdhënësi i Kremlinit, Dmitry Peskov, më 29 gusht përsëriti qëndrimin e Moskës se Putini “nuk e ka përjashtuar” një takim me Zelenskyn, por se takimi mund të ndodhë vetëm pasi të ketë përparim “në nivel ekspertësh”./ REL

Liderët evropianë po diskutojnë krijimin e një zone tampon prej 40 kilometrash mes Ukrainës dhe Rusisë, si pjesë e një nisme më të gjerë për paqe.

Sipas Politico, plani ka marrë mbështetjen e Moskës, por ende nuk është pranuar nga Kievi dhe do të kërkonte angazhim të gjerë ndërkombëtar për mbikëqyrjen e një armëpushimi.

Franca dhe Britania e Madhe pritet të udhëheqin praninë e huaj, ndërsa Polonia dhe Gjermania shfaqen hezituese apo kundërshtuese, nga frika se një hap i tillë mund të dobësojë mbrojtjen e NATO-s në lindje.

Nga ana tjetër, SHBA është distancuar nga ideja, duke mos planifikuar prani të drejtpërdrejtë ushtarake, por vetëm mbështetje të kufizuar në inteligjencë dhe mbulim ajror.

Propozimi pasqyron rritjen e shqetësimeve mes aleatëve teksa lufta hyn në vitin e katërt dhe Rusia vijon agresionin, përfshirë një sulm të fundit me raketa në Kiev. Megjithatë, zyrtarët evropianë paralajmërojnë për rreziqet politike dhe sfidat ushtarake të një zone të tillë, sidomos në kushtet kur Moska nuk jep shenja të vullnetit të sinqertë për negociata dhe Kievi duhet të mbetet palë vendimmarrëse për integritetin e saj territorial. bw

Pasojat e sulmit të madh rus në Kiev në ndërtesat e banimit, 28 gusht.

Italia ka ngritur në ajër 2 avionë luftarakë në ndjekje të një avioni rus.

Komanda ajrore e NATO-s tha se dy avionë italianë F-35 u ngritën në ajër nga Estonia.

Burime të NATO-s thonë se kjo është hera e tretë që avionët janë ngritur në ajër në më pak se dy javë.

Dy avionë luftarakë gjermanë Eurofighter u ngritën dje në ajër për të kapur një avion zbulues rus që fluturonte mbi Detin Baltik.

Dyshohet se Moska përdor avionë të tillë për të mbledhur informacione rreth aktivitetit ushtarak të NATO-s në bregdetin Baltik, veçanërisht në Poloni, Gjermani, Danimarkë dhe Suedi. bw

Qeveria gjermane ka miratuar rregulloret e brendshme të Këshillit të Sigurisë Kombëtare. Sipas Kancelarit Merz, organi i ri do të jetë platforma qendrore për diskutimin e politikës së jashtme dhe të sigurisë së qeverisë.

Një zyrë administrative për Këshillin e Sigurisë Kombëtare është krijuar tashmë në Kancelari. Një organ që do të revolucionarizojë politikën gjermane të sigurisë. Sepse, siç argumentoi Friedrich Merz kur ishte ende kandidat për kancelar: “Strukturat e viteve 1960 nuk janë më mjaftueshëm efektive për të përmbushur kërkesat komplekse të kohës sonë.”

Takime në kohë krize dhe planifikim strategjik

Në parim, Këshilli i Sigurisë Kombëtare do të mbledhë informacion mbi sigurinë e brendshme, të jashtme, digjitale dhe ekonomike. Këshilli i Sigurisë Kombëtare do të mblidhet në rast krize, por gjithashtu do të zhvillojë strategji për situata kërcënimi. Qëllimi është të jetë në gjendje të bashkojë, përpunojë dhe koordinojë më mirë kompetencat dhe njohuritë në të ardhmen, sipas burimeve qeveritare. Kjo do t’i mundësojë qeverisë federale të marrë vendime bazuar në një bazë informacioni gjithëpërfshirëse dhe të fortë.

Një njësi administrative u krijua për këtë qëllim brenda Zyrës Kancelarore, e kryesuar nga Jacob Schrot, shefi i stafit të Merz-it. Fillimisht ajo do të përbëhet nga 13 vende pune dhe do të shërbejë si ndërlidhëse midis Këshillit të mirëfilltë, ministrive, autoriteteve të sigurisë, landeve federale dhe ekspertëve të jashtëm.

CDU/CSU dhe SPD kishin njoftuar krijimin e një Këshilli të Sigurisë Kombëtare që në marrëveshjen e koalicionit. Ndër të tjera, ai do të marrë përsipër funksionet e Këshillit Federal të Sigurisë, i cili mblidhet kryesisht për të diskutuar çështje që lidhen me eksportet e armëve, dhe të Kabinetit të Sigurisë.

Këshilli i Sigurisë Kombëtare do të jetë në gjendje të marrë vendime përfundimtare, përveç rasteve kur Kushtetuta ose një ligj federal kërkon një rezolutë nga qeveria federale.

Kush bën pjesë në Këshillin e Sigurisë Kombëtare?

Kryetari do të jetë Kancelari gjerman Merz, dhe zëvendësi i tij do të jetë Zëvendëskancelari Klingbeil. Anëtarë të tjerë përfshijnë ministrat e Financave, Punëve të Jashtme, Mbrojtjes, Brendshme dhe Drejtësisë, Ekonomisë dhe Energjisë, Bashkëpunimit dhe Zhvillimit Ekonomik, Digjitalizimit dhe Modernizimit të Shtetit, dhe kreun e Kancelarisë Federale. Anëtarë të tjerë të qeverisë federale do të konsultohen sipas nevojës. Përfaqësuesit e autoriteteve gjermane të sigurisë gjithashtu mund të marrin pjesë.

Si një zhvillim i ri, mund të thirren edhe përfaqësues të landeve federale, si dhe përfaqësues të shteteve të tjera, Bashkimit Evropian dhe NATO-s. Përveç një zyre administrative, njësia administratvie përfshin gjithashtu departamente për përgatitjen e një pasqyre të integruar të situatës dhe parashikimit strategjik.

Nuk do të ketë këshilltar sigurie si në SHBA

Nga ana tjetër, nuk do të ketë këshilltar sigurie kombëtare si në SHBA. Megjithatë, Mair, drejtor i Fondacionit të Shkencës dhe Politikës (SWP), foli në favor të krijimit të këtij pozicioni. Krijimi i Këshillit të Sigurisë është vetëm një hap i parë. Në planin afatmesëm, ai beson se është e përshtatshme të ketë një këshilltar sigurie kombëtare në nivelin e ministrit ose sekretarit të shtetit, i tha ai agjencisë së lajmeve Reuters./DW

Kancelari gjerman Friedrich Merz ka deklaruar se Rusia “është dhe do të mbetet” kërcënimi më i madh për sigurinë e Evropës për një kohë të gjatë.

Komentet e tij vijnë pasi kabineti i Gjermanisë miratoi sot një projektligj që do të prezantonte një shërbim ushtarak vullnetar, i cili mund të çonte në rekrutim ushtarak të detyruar nëse nuk arrihen objektivat e rekrutimit.

Projektligji ende duhet të marrë miratimin parlamentar.

Gjermania dëshiron të rrisë numrin e ushtarëve në shërbim nga 180,000 në 260,000 deri në fillim të viteve 2030 për të përmbushur objektivat e reja të forcës së NATO-s dhe për të forcuar mbrojtjen e saj, pjesë e një rritjeje të planifikuar të shpenzimeve ushtarake.bw

Presidenti i Ukrainës Volodymyr Zelensky shprehet se vijon të mbajë kontakte të vazhdueshme me vendet perëndimore, sidomos ato europiane, të cilat mbështesin fuqishëm Kievin – siç tha ai dhe përveç ndihmës, në mënyrë permanente kanë vendosur sanksione kundër Rusisë.

Presidenti ukrainas dhe në takimin e fundit me delegacionin e rrjetit ndërkombëtar parlamentar, kërkoi që asetet e ngrira të Rusisë në të ardhmen të përdoren për rimëkëmbjen e Ukrainës pas luftës.

Zelensky postoi në X, pamje nga takimi ku duken në tavolinën e diskutimit me parlamentarë të vendeve të ndryshme, mes tyre edhe kreu i Partisë Republikane, Fatmir Mediu.

“Sot u takova me delegacionin e rrjetit ndërkombëtar parlamentar ‘Të Bashkuar për Ukrainën’. I falënderova për mbështetjen e tyre të vazhdueshme politike për vendin tonë. Kjo është shumë e rëndësishme tani, gjatë luftës, dhe nuk do të jetë më pak e rëndësishme më pas. Ne të gjithë duam një paqe të drejtë dhe të qëndrueshme.

Diskutuam të ardhmen e Ukrainës, garancitë e sigurisë dhe rezultatet e takimeve në Uashington. Veçmas, u përqendruam edhe në mënyrën se si asetet e ngrira ruse mund të përdoren për rimëkëmbjen e Ukrainës.

Një zë i bashkuar dhe një qëndrim i përbashkët në Evropë janë me rëndësi të veçantë. Jam mirënjohës ndaj parlamentarëve për mbështetjen dhe vizionin e tyre të përbashkët se Ukraina duhet të jetë pjesë e Bashkimit Evropian. bw

Sot në mëngjes, anija turistike hasi një problem elektrik me motorët e saj afërsisht 8 milje detare larg ishullit të Ponzës, por arriti të nisej përsëri pasdite.

VOAL- “MSC World Europa” përjetoi një defekt afërsisht 8 milje detare larg ishullit të Ponzës në orën 7:25 të mëngjesit të sotëm.

Anija turistike, që lundronte nga Gjenova në Napoli me 8,585 persona në bord (6,496 pasagjerë dhe 2,089 anëtarë të ekuipazhit), raportoi se përjetoi një problem elektrik me motorët e saj.

Megjithatë, anija arriti të nisej përsëri pasdite. Sipas raportimeve, teknikët në bord arritën të rifillonin sistemin e shtytjes dhe anija tani po ecën ngadalë por në mënyrë autonome drejt portit të Napolit.

MSC po shoqërohet nga anije patrullimi të Rojës Bregdetare, të cilat janë në kontakt të vazhdueshëm me kapitenin e anijes dhe dy rimorkiatorë nga Napoli dhe Gioia Tauro po mbërrijnë gjithashtu në zonë. Agjencitë/RSI

Ukraina i ka thënë Minskut të qëndrojë larg kufijve të saj gjatë stërvitjeve të përbashkëta ushtarake me Rusinë që do të mbahen në Bjellorusi. Paralajmërimi erdhi përpara stërvitjes ushtarake ‘Zapad-2025’, të planifikuar për 12-16 shtator.

Bjellorusia lejoi forcat ruse të përdorin territorin e saj kur nisi pushtimi ndaj Ukrainës në shkurt 2022. Që atëherë, Presidenti bjellorus Aleksandër Lukashenko ka thënë vazhdimisht se Minsku nuk ka ndërmend të sulmojë Kievin dhe do të përdorë veprime ushtarake vetëm nëse vendi i tij sulmohet.

Në një deklaratë të premten, Ministria e Jashtme e Ukrainës akuzoi Bjellorusinë për ndihmë ndaj Moskës dhe lëshoi ​​një paralajmërim.

“Ne e paralajmërojmë Minskun kundër provokimeve të pamatura dhe e nxisim atë të mbetet i kujdesshëm, të përmbahet nga afrimi i kufijve dhe të shmangë provokimin e Forcave Mbrojtëse të Ukrainës”, tha Ministria e Jashtme e Kievit.

Stërvitjet ushtarake të këtij viti, të cilat përfshijnë operacione kundër-sabotimi, luftë me dronë, skenarë ndërhyrjesh elektronike dhe sulme, do të përfshijnë gjithashtu raketën hipersonike ruse Oreshnik me rreze të mesme veprimi, sipas Ministrit të Mbrojtjes të Bjellorusisë, Viktor Khrenin. E testuar për herë të parë në betejë në nëntor 2024 në një sulm ndaj objektit Yuzhmash të Ukrainës në Dnepr, zyrtarët rusë e kanë krahasuar fuqinë e saj shkatërruese konvencionale me atë të një sulmi bërthamor me rendiment të ulët.

“Ky është një element i rëndësishëm për parandalimin tonë strategjik – siç kërkon kreu i shtetit, ne duhet të jemi të përgatitur për çdo gjë”, tha Khrenin për agjencinë shtetërore të lajmeve Belta. Ai paralajmëroi se NATO po e përdor Zapad-2025 si pretekst për stërvitjet e veta, duke përmendur si shqetësimin kryesor vendosjen e 30,000 trupave të Polonisë pranë Bjellorusisë.

Bjellorusia, një aleat i ngushtë i Rusisë, nënshkroi një traktat dypalësh sigurie me Moskën në dhjetor 2024. Marrëveshja i angazhon të dy vendet të mbrojnë sovranitetin e njëri-tjetrit me të gjitha mjetet në dispozicion. Në vitin 2023, Rusia vendosi armë bërthamore taktike dhe raketa balistike me rreze të shkurtër veprimi në territorin bjellorus, duke përmendur tensionet me Perëndimin. Lukashenko ka bërë thirrje gjithashtu për përshpejtimin e dorëzimit të sistemeve Oreshnik, të cilat mund të vendosen në Bjellorusi para fundit të vitit 2025. bw

Kryetari i Partisë Republikane, Fatmir Mediu, ndodhet në Kiev të Ukrainës, së bashku me 32 deputetë nga vende të ndryshme të Europës si Gjermania, Italia, Suedia, Spanja, Irlanda, Britania, Hungaria, Çekia, Letonia, Estonia e Lituania. Vizita zhvillohet në kuadër të grupit “Friends 4Ukraine”, në mbështetje të luftës së Ukrainës kundër agresionit rus.

Në ditën kombëtare të Ukrainës, Mediu mori pjesë në ceremoninë protokollare të zhvilluar në Sheshin Sofia, ku Presidenti Volodymyr Zelensky dhe Kryeministri i Kanadasë mbajtën fjalimet e tyre. Në këtë aktivitet ishte i pranishëm edhe i dërguari special i ish-Presidentit amerikan Donald Trump, Gjeneral Kellog.

Mediu ka paralajmëruar një sërë takimesh zyrtare në Kiev, përfshirë atë me Kryetarin e Parlamentit, Ruslan Stefanchuk, krerët e komisioneve parlamentare, Ministrin e Jashtëm dhe Ministrin e Mbrojtjes, ndërsa është në pritje të konfirmimit për një takim edhe me Presidentin Zelensky.

Gjithashtu, delegacioni është ftuar në një pritje të organizuar nga Ambasada e Shteteve të Bashkuara në Kiev.bw

Presidenti i Ukrainës, Volodymyr Zelensky, zhvilloi të shtunën (23 gusht) një bisedë telefonike me kryeministrin e Holandës, Dick Schoof, ku diskutuan mbi situatën aktuale në Ukrainë, iniciativat diplomatike dhe mbështetjen ndërkombëtare.

Në një postim në rrjetet sociale, Zelensky falënderoi kryeministrin holandez për “fjalët e ngrohta mbështetëse”, duke vlerësuar ndihmën dhe solidaritetin e vazhdueshëm të Holandës për popullin ukrainas.

Presidenti ukrainas theksoi se biseda përfshiu zhvillimet më të fundit diplomatike, kontaktet në Uashington dhe perspektivën për përfundimin e luftës. Ai përsëriti gatishmërinë e Ukrainës për të ndërmarrë “hapa konstruktivë për paqen”, por vuri në dukje se Rusia “nuk tregon asnjë prirje” dhe vazhdon bombardimet ndaj qyteteve ukrainase.

“Ne i interpretojmë të gjitha sinjalet që vijnë nga Moska në të njëjtën mënyrë. Nevojitet presion për të ndryshuar qëndrimin e saj, si dhe një takim në nivelin më të lartë për të diskutuar të gjitha çështjet,” deklaroi Zelensky.

Një nga temat kryesore të diskutimit ishin garancitë e sigurisë për Ukrainën. Sipas Zelenskyt, ekipet e Ukrainës, Shteteve të Bashkuara dhe partnerëve evropianë po punojnë në ndërtimin e arkitekturës së re të sigurisë, e cila pritet të jetë gati në ditët në vijim.

Gjithashtu, bashkëpunimi në industrinë e mbrojtjes ishte në fokus të bisedës. Zelensky bëri të ditur se janë arritur marrëveshje të rëndësishme në këtë drejtim dhe paralajmëroi një takim të ardhshëm me përfaqësues të qeverisë holandeze për të avancuar më tej bashkëpunimin. Panorama