TË RËNDOMTËN E MISHTË PO T`I MBANIM…

Dashuria na mban lart,

Në ajër,në qiell, në yje,

Tërthoren  e saj prej rrezesh të ngrohta

Dehim me buzëqeshje.

Asnjëherë s`e dimë ç`do qe ajo pa ëndrrën,

Pa atë trill qielli dhe reje,

Pa të ardhmen që e josh me dredhi;

Se po t` i mbanim vetëm brengën

Të rëndomtën e mishtë po t` i mbanim,

Pa atë që është lart,

Dashurinë si urrejtjen do shanim…

VEGIM

Si me shaminë e nënës

U mbështolla me hijen e lisit.

Kujtimi sytë m`i rrëmbush

Duart e kujtimit, krahët e shpresës

Këtë shami s`e ngrenë dot,

Në një udhëkryq të kujtesës

Ku nëna thahet si një pikë lot…

Megjithatë vetëm një çast

U shtri hije e lisit si shami,

Zgjata dorën ta marr , lisi u drodh

Hija u fshi…

PEIZAZH I ASHPËR

Me grinë nën mjekër u ngritën përpjetë

Thikat e shkrepave,

Për të çarë boshësinë e një qielli të etur.

Ka shekuj e kohë që thërmon qelnajën

E këtij qielli të tharë nga ftohtësia,

E mbi shkrepa s`bie

Asnjë thërrime prej xhami,

Asnjë dënesë e penduar,

Asnjë vringëllimë,

Vetëm kjo ngërdheshje thikash gris rroben e heshtjes,

Heshtja lakuriq mbërdhin…

MËKATI

Se si  shkova në fund të mëkatit

Duke qenë e mosqenë dikush,

Ia pashë gjëmën të ngratit

Kur arsyen ma zbrazi në prush.

Desha të bëhem fillestar

Të largoj dashurinë,

Për mëkatin s`e dua të më thotë:udhë e mbarë,

Ai fshehtas,  përpara, në të, prin….

HKËNDIJA MIGJENIANE

Shkëndijen migjeniane të gjithë e urojnë

Por shumica  zjarrit i tremben;

Flakët e tij të pafajshmin  shkrumbojnë

Pastaj me keqardhje ngrohin duart

Të mbeturit…

MENDO

Kur mali shkrihet me qiellin në mbrëmje

Mbrëmja humb në lehtësim të ajrit joshës,

Ne të dy hyjmë tek njëri tjetri,

Si në misteret e botës.

Sërish kërkojmë atë që humbet me nge,

Dhe kaq e lehtë s`paska qenë,

Të kthehemi, shtigjet drithëruese na trembin,

Pa sjellë gjë të re;

Mendo sa  mund të lodhen,

Mali me qiellin

Dhe mbrëmja tre…