Kur krahason mesazhin politik të Kryetarit të Grupit Parlamentar të Partisë Socialiste Taulant Balla që etiketon mijëra protestuesit e 22 Dhjetorit përpara kryeministrisë me shprehjen “Ne nuk do të lëmë ta djegësh Shqipërinë”, ku ai qëllimshëm bashkon Berishën me çdo hije “non-grata propagandistike” të mundshme ku më të pakënaqurit me Berishën të mos shohin më as bëmat e korrupsionit të Ramës, Ballukut e të tjerëve në këta 12 vite të Rilindjes Socialiste, me thelbin e asaj që kishte në vetvete protesta të bën të kuptosh se sa varfër mendimi i tij si tregtar-politik ka mbetur i pa zhvilluar.

Rastësisht në 80 sekonda media Euronews (Shqipëria në BE 2030), e përshkroi me tre katër pika qëllimin e protestës e drejtë të opozitës, Ballukun që mban postin e zv/kryeministres megjithëse është e pandehur, Berishën në foltore, mijëra pjesëmarrësit, madje edhe molotovët e hedhur dhe disa arrestime të cilat ishin që në krye të lajmit.

A e kupton Balla se si bëhet lajmi?

Këtë nuk dimë ta themi me siguri.

Por në vijueshmëri  Taulant Balla, nga frëngjitë e ish Komitetit Qendror ndihet i qetë të vështrojë grumbullimet e protestave përpara kryeministrisë, të japë numrin e saktë të pjesëmarrësve dhe të demoralizojë sa të mundet lirinë e njerëzve për të ushtruar një nga liritë e tyre, të drejtën e protestës.

Kur këto mbeten të pamjaftueshme, Balla përmes propagandës zyrtare ATSH-n, hedh shkëndijat e veta ideologjike që nuk e ndezin dot as socialistët dhe as patronazhistët e trembur nga përmasat e korrupsionit shtetëror dhe deri ku ka arritur ai.

Jo më larg se sot, 26 Dhjetor, 2025 deputetë të PD i janë drejtuar Kryetarit të Kuvendit Niko Peleshi. Zhvillimi të ditës së sotme ishte lajmi mbi thirrjen në orën 11:00 mbledhjes së Këshillit për Rregulloren, Mandatet dhe Imunitetin, për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar, për heqjen e imunitetit të deputetes Belinda Balluku. Një thirrje e cila pas heshtjes së gjatë dhe kyçjes së mjediseve kuptohet që është bërë e panegociueshme.

Një ndër përfaqësuesit e këtij komisioni nga ana e mazhorancës është edhe Z. Taulant Balla.

Që t’i kthehemi idesë :- Përse Balla flet në shumës (?), i fshehur pas shprehjes “Ne nuk do të lëmë ta djegësh  Shqipërinë” kuptimi i vërtetë i saj në shumës do të thotë  se vetë Balla është pjesë e një grupi që tani për tani ndjehet i paprekshëm, mbase edhe i fortë përpara drejtësisë e cila  shumë shpejtë do t’i ketë në konsideratë kërcënime të tilla.

Njerëzit kanë të drejtë të protestojnë dhe askush pas shpine të mos përpiqet t’i provokojë.