Ministria e Jashtme e Kosovës njoftoi të enjten mbrëma se zëvendës drejtori i policisë së Kosovës, Dejan Jankoviç është liruar nga autoritetet serbe.
Ministrja e Jashtme e Kosovës Donika Gërvalla shkroi në rrjetet sociale se pas trysnisë së madhe ndërkombëtare, “Dejan Jankoviç sapo është liruar dhe ndodhet rrugës për në Kosovë”.
Ministrja Gërvalla tha se “ky arrestim ishte vetëm një prej akteve të dëshpëruara hakmarrëse të Serbisë pas votës masive të Asamblesë Parlamentare të Këshillit të Evropës për anëtarësim të Kosovës në këtë organizatë nga më të rëndësishmet ndërkombëtare”, shkroi ministrja Gërvalla.
Zëvendës drejtori i policisë së Kosovës, Dejan Jankoviç dhe nëntë pjesëtarë tjerë të policisë së Kosovës ishin ndaluar të mërkurën në raste të ndryshme nga Serbia.
Të gjithë pjesëtarët e policisë tashmë janë liruar ndërsa sipas ministrisë së Brendshme të Kosovës, oficerët e përkatësisë kombëtare shqiptare dhe serbe “ishin ndaluar në vendkalimet kufitare Merdar, Jarinjë, Dheu i Bardhë dhe në kufirin mes Kroacisë dhe Serbisë”.
Të njejtën ditë të paktën gjashtë autobusë nga Kosova u ndaluan për orë të tëra nga policia serbe në vendkalimet kufitare me Kroacinë dhe Hungarinë.
Autoritetet në Prishtinë thanë se afër 1 mijë e 500 qytetarë të Kosovës janë ndaluar, disa janë arrestuar dhe janë marrë në pyetje lidhur me kaluarën e tyre dhe lidhjet e tyre me ish Ushtrinë Çlirimtare të Kosovës.
Autoritetet serbe mohuan të kenë bllokuar udhëtarët nga Kosova, por thanë se shtimi i kontrollit të sigurisë mund të ketë shkaktuar vonesa.
Bashkimi Evropian tha se ndalimi i udhëtarëve “paraqet shkelje të marrëveshjes për Lirinë e Lëvizjes të arritur në dialog”.
Ngjarjet e së mërkurës ngjallën reagime të ashpra në Kosovë ku autoritetet vendase akuzuan Serbinë për akt të ultë hakmarrjeje ndaj suksesit të Kosovës në rrugën drejt anëtarësimit në Këshillin e Evropës.
Kryetarja e parlamentit serb, Ana Bërnabiç, tha të enjten se ndalimet janë pjesë e veprimeve për të mbrojtur rendin kushtetues të Serbisë. Javën e kaluar presidenti serb Aleksandar Vuçiç tha se Serbia do të arrestojë këdo që prek rendin kushtetues të saj, pak pasi policia e Kosovës arrestoi një qytetar serb në veri të vendit nën dyshimet për përfshirje në cenimin e rendit kushtetues të Kosovës.
Serbia u shpreh e zhgënjyer me votimin e së martës në Asamblenë Parlamentare të Këshillit të Evropës që i dha dritën jeshile anëtarësimit të Kosovës në këtë mekanizëm. Beogradi ka paralajmëruar se do të vazhdojë luftën kundër anëtarësimit të Kosovës, ndonëse sipas marrëveshjes për normalizimin e marrëdhënieve për të cilën të dyja vendet janë pajtuar vitin e kaluar, palët nuk duhet të pengojnë njëra tjetër në proceset integruese.
Çfarë flet A.Vuqiqi, unë nuk i besoj, sepse nuk e di çfarë mendon e punon, ai? Jo qeveria sllovene,por populli slloven në vitet 1990-ta i ka bojkotuar mallrat serbe, pse këtë se bënën shqiptarët qe 20 vite?! Mendimi im personal: Vendimi i qeverisë Haradinaj në lidhje me bojkotimin e mallrave serbe, si masë ndëshkue është i gabuar dhe i pasuksesshëm… Reciprociti është diçka tjetër…Tarifa nuk ka pasur kurfarë vlere. Si duket është bërë pa menduar mirë, apo me ndikimin e ndonjë vendi të huaj…, për prishjen e Kosovës me Amerikën dhe Perëndimin! Kjo nuk besoj të ketë qenë ide e shqiptarëve, sikur që nuk ishte as Ballkania e Adem Demaçit, e as Shëngeni i Hashim Thaçit e Edi Ramës…! Serbia as 3%ind të eksportit të saj të përgjithshëm jashtë vendit të vet, nuk i eksporton në Kosovë. Dhe, merrni me mend sa naiv jemi neve shqiptarët, duke menduar se kaq lehtë mund ta detyrojmë Serbinë ta njohin Pavarësinë e Kosovës!!! Edhe 100 vjet nëse Amerika dhe Perëndimi nuk mund ta detyrojnë Serbinë për njohjen e Kosovës, sapër taksën Serbia nuk lodhet fare…! Taksa i ka pasuruar disa biznesmen cilët ilegalisht kanë bashkëpunuar me Serbinë, duke sjellur mallra serbe në Kosovë..!