Prokuroria e Posaçme kundër Korrupsionit dhe Krimit të Organizuar ka dërguar për gjykim dosjen në ngarkim të ish-drejtoreshës së Hipotekës së Durrësit Rajmonda Dashi dhe tre personave të tjerë, Besjan Ramaj, Leonard Ramaj dhe Ardjan Malasi. 

Njoftimi: 

Prokuroria e Posaçme kundër Korrupsionit dhe Krimit të Organizuar ka përcjellë në datën 23.10.2024 pranë Gjykatës së Posaçme të Shkallës së Parë për Korrupsionin dhe Krimin e Organizuar “Kërkesën për dërgimin e çështjes penale për gjykim” të procedimit penal nr.18/2023, në ngarkim të të pandehurve: Besjan Ramaj, Leonard Ramaj, Ardjan Malasi duke i akuzuar për kryerjen e veprave penale “Pastrim i produkteve të veprës penale ose veprimtarisë kriminale”, kryer në formën e bashkëpunimit të veçantë, atë të grupit të strukturuar kriminal parashikuar nga neni 287/1 dhe 28/4; “Grupi i strukturuar kriminal” parashikuar nga neni 333/a/1/2 dhe “Kryerja e veprave penale në kuadër të grupit të strukturuar kriminal”, parashikuar nga neni 334/1 të Kodit Penal; si dhe të pandehurën Rajmonda Dashi duke e akuzuar atë për kryerjen e veprës penale “Pastrim i produkteve të veprës penale ose veprimtarisë kriminale” kryer në bashkëpunim parashikuar nga neni 287/2 të Kodit Penal.

Sipas akteve të dërguar nga autoritetet e drejtësisë belge, përmes letërporosisë dhe nga hetimet e kryera në lidhje me të dhënat e përftuara nga këto akte rezulton se të pandehurit, Besjan Ramaj dhe Leonard Ramaj, vëllezër mes tyre janë dënuar nga autoritetet belge në vitin 2021 për vepra penale të lidhura me narkotikët, ndërsa i pandehuri Besjan Ramaj rezulton të jetë dënuar për vepra të njëjta penale në vitin 2012, nga autoritetet e drejtësisë norvegjeze.

Përgjatë hetimeve të kryera, rezulton se i pandehuri Besjan Ramaj, të paktën prej vitit 2010 në bashkëpunim të veçantë me të pandehurin Leonard Ramaj (vëllai i tij), Ardjan Malasi (i njohuri i tij) kanë kryer veprime sistematike, të vazhdueshme të kundërligjshme me qëllim pastrimin e të ardhurave që kanë përfituar nga kryerja e aktivitetit kriminal, përmes investimit në pasuri të paluajtshme, kryerjes së veprimeve për shitblerje dhe transferim në vazhdimësi të pronësisë,  si dhe përmes lëshimit të faturave fiktive nga shoqëritë tregtare të tyre për qëllime të justifikimit të burimit të ligjshëm. Kjo veprimtari kriminale rezulton të ketë vazhduar nga viti 2010 e në vijim deri në vitin 2023.

Ndërsa e pandehura Rajmonda Dashi është përfshirë në disa veprime të kryera pas vitit 2018, në bashkëpunim me të pandehurit Besjan Ramaj dhe Ardjan Malasi, e cila për shkak të kohës së përfshirjes në këtë veprimtari, rolit dhe veprimeve të kryera prej saj, rezulton se ka vepruar në kuadër të bashkëpunimit të thjeshtë dhe jo atij të veçantë.

Veprimet e tyre kanë konsistuar kryesisht a) në transferimin e pasurisë me qëllim fshehjen e origjinës së paligjshme; b) fshehjes ose mbulimit të pronësisë ose të drejtave në lidhje me pasurinë, duke ditur që kjo pasuri është produkt i veprës penale ose i veprimtarisë kriminale; c) fitimit të pronësisë, duke e ditur në çastin e marrjes në dorëzim të saj, që kjo pasuri është produkt i veprës penale ose i veprimtarisë kriminale; ç) kryerjes së veprimeve financiare ose transaksioneve të copëzuara për shmangien nga raportimi, sipas legjislacionit për parandalimin e pastrimit të parave; d) investimit në veprimtari ekonomike ose financiare të parave a sendeve, duke ditur se janë produkte të veprës penale ose veprimtarisë kriminale dh) përdorimit të shoqërive tregtare, përmes lëshimit të faturave fiktive për të transferuar lehtësisht paratë.

Përgjatë kësaj veprimtarie kriminale rezulton të jetë përdorur kryesisht paraja në dorë, e cila është integruar në shoqërinë “Ledio 04” sh.p.k me ortak dhe administrator, të pandehurin  Ardjan Malasi, për t’u investuar më pas në pasuri të paluajtshme, e shoqëruar me kryerje të veprimeve dhe transferimeve të shumta bankare të vlerave monetare nga llogaritë e shoqërisë tregtare në atë personale dhe anasjelltas, duke u përfshirë në kryerje të veprimeve fiktive juridike, si huadhënie, shitblerje të pasurive të paluajtshme, apo transferim të këtyre pasurive, Shuma e parave të përfshira në veprimtarinë kriminale të pastrimit të produkteve të veprës penale rezulton të jetë afro një milion e dyqind e pesëdhjetë mijë euro dhe nëntëmilion lekë.

 Të gjitha këto fakte në tërësinë e tyre tregojnë se të pandehurit kanë paramenduar mënyrën e të vepruarit, kanë patur vazhdimësi në veprimtarinë e tyre, duke u përfshirë në kryerje të veprimeve të shumta juridike dhe transaksioneve financiare, duke vepruar kështu në kuadër të një bashkëpunimi të vecantë, atë të grupit të strukturuar kriminal, me qëllim përfitimin material.

 Dijenia e tyre mbi origjinën e paligjshme të pasurive dhe të të ardhurave rezulton e provuar për të pandehurit Besjan dhe Leonard Ramaj si të përfshirë edhe në aktivitetin kriminal të trafikimit të narkotikëve, ku janë gjeneruar të ardhurat e kundërligjshme dhe për të pandehurin Ardjan Malasi dhe Rajmonda Dashi nga rrethanat faktike, si përfshirje të tyre në kryerje të veprimeve juridike haptazi fiktive, si dhe në veprime të tjera të kryera gjatë investimit në pasuri të paluajtshme të të ardhurave që dihet që kanë origjinë të paligjshme apo veprime të tjera juridike të kryera në lidhje me to.

Në kuadër të këtij procedimi janë sekuestruar më herët dhe është kërkuar konfiskimi në Gjykatën e Posacme të Shkallës së Parë Për Korrupsionin dhe Krimin e Organizuar për:

1.                  12 (dymbëdhjetë) apartamente në qytetin e Fierit;

2.                  1 (një) dyqan prej 300m 2 në qytetin e Fierit;

3.                  1 (një) pasuri e paluajtshme, ullishte, me sipërfaqe 5.200 m, ndodhur në Mallakastër;

4.                  4 (katër) apartamente në qytetin e Tiranës;

5.                  3 (tre) ambiente me funksion garazh në qytetin e Tiranës;

6.                  1 (një) shoqëri tregëtare;

7.                  2 (dy) automjete;

Në lidhje me këtë hetim është bashkëpunuar me autoritetet e drejtësisë së shtetit të Belgjikës dhe të Norvegjisë. Panorama

Ka vijuar vizita zyrtare e Grupit Parlamentar të PD, në Parlamentin Europian. Deputetët Gazment Bardhi, Flamur Noka, Jorida Tabaku, Agron Gjekmarkaj dhe Albana Vokshi, kanë zhvilluar një takim me eurodeputetin Marco TARQUINIO, Kryetar i Komitetit të Stabilizim Asociimit BE- Shqipëri dhe përfaqësues i grupit parlamentar “Progressive Alliance of Socialists and Democrats”.

Përmes një postimi në rrjetin e tij social Facebook, kreu i Grupit Parlamentar i PD, Gazment Bardhi tha se deputetët e opozitës informuan Kryetarin Tarquinio e paraprakisht edhe për qëndrimin e tyre për mbledhjen e javës së ardhshme të SAPC në Tiranë, ku opozita do të marrë pjesë, me propozime konkrete që ndihmojnë Shqipërinë dhe të ardhmen e saj europiane.

Më poshtë reagimi i plotë:

Vizita në Parlamentin Europian ishte një mundësi edhe për t’u njohur dhe për t’i uruar suksese në detyrën e re eurodeputetit Marco TARQUINIO, Kryetar i Komitetit të Stabilizim Asociimit BE- Shqipëri dhe përfaqësues i grupit parlamentar “Progressive Alliance of Socialists and Democrats”.

Informimi me fakte e prova për situatën e rëndë që po kalon Shqipëria, është e vetmja mënyrë për të ndihmuar për të çliruar Shqipërinë nga një qeverisje e kriminalizuar dhe e korruptuar, që synon asgjësimin e opozitës përmes burgosjes politike të liderit të saj, apo kërcënimin e çdo kundërshtari politik që i shërben interesit publik dhe denoncon korrupsionin dhe krimin e organizuar.

Kryetarin Tarquinio e informuam paraprakisht edhe për qëndrimin tonë për mbledhjen e javës së ardhshme të SAPC në Tiranë, ku opozita do të marrë pjesë, me propozime konkrete që ndihmojnë Shqipërinë dhe të ardhmen e saj europiane.

Shqipëria europiane është projekti i çdo shqiptari të ndershëm dhe kjo kërkon angazhimin e cilitdo për t’i dhënë fund keqqeverisjes 12-vjeçare së Edi Ramës, si dhe ndërmarrjen e reformave të nevojshme që garantojnë zgjedhjet e lira e të ndershme, luftën efikase kundër krimit të organizuar dhe korrupsionit, si dhe shkëputjen e lidhjeve mes Qeverisë dhe krimit të organizuar. gsh

Avokati Sokol Mëngjesi është rikthyer në punë pas periudhës së vështirë të kaluar nga ngjarja e ndodhur më 29 maj, ku u dhunua në zonën e ish-Bllokut.

Mëngjesi është paraqitur sot në Gjykatën e Posaçme, ku po zhvillohet seanca paraprake në lidhje me dosjen “Partizani”, subjekt i të cilës janë edhe klientët e tij, ish-kryeministrit Sali Berisha dhe dhëndri Jamarbër Malltezi.

Kujtojmë se avokati ishte për 16 ditë në gjendje kome si shkak i dhunës.

Ndërkohë më 25 shtator, përmes një deklarate noteriale ai vuri në dijeni Gjykatën e Tiranës se ka rregulluar marrëdhëniet me Dritan Nanon, personin e dyshuar se ka porositur aktin.

Trupa e gjykimit nuk e mori parasysh kërkesën, duke lënë në fuqi masën e sigurisë vendosur ndaj Nanos. bw

Grupi Parlamentar i Partisë Demokratike ka vijuar vizitën zyrtare në Parlamentin Europian.

Deputetët Gazment Bardhi, Flamur Noka, Jorida Tabaku, Agron Gjekmarkaj dhe Albana Vokshi, janë takuar me eurodeputetët e grupit parlamentar të “Konservatorëve dhe Reformatorëve Europian” (ECR).

Lajmi është bërë i ditur nga një njoftim për shtyp i Grupit Parlamentar.

Reagimi i plotë:

Gjatë vizitës në Parlamentin Europian patëm mundësinë për një seancë dëgjimore me përfaqësues të grupit parlamentar të “Konservatorëve dhe Reformatorëve Europian” (ECR). Ky takim ishte një mundësi e shkëlqyer për t’i informuar mbi të gjitha shqetësimet tona për gjendjen e demokracisë në vend, duke theksuar sfidat madhore që duhen kapërcyer në rrugën e integrimit në BE.

Shqipëria, si vend kandidat për në BE, e ka jetike të respektojë parimet themelore në qeverisje. Cënimi i zgjedhjeve të lira dhe të ndershme, përmes keqpërdorimit të burimeve shtetërore nga partia në pushtet, përdorimi i parave të korrupsionit, bashkëpunimi me krimin e organizuar deri në pikën e caktimit prej tij të kandidatëve për deputetë, tentativa për asgjësimin e opozitës përmes burgosjes politike të lidershipit, mosrespekimi i vendimeve të Gjykatës Kushtetuese, e largojnë edhe më shumë Shqipërinë nga rruga europiane.

Me miqtë europianë bashkëndamë qëndrimin se është emergjente që Shqipëria të përqëndrohet në reformat kritike të nevojshme për anëtarësimin e Shqipërisë në BE, duke përfshirë sigurimin e zgjedhjeve të lira dhe të ndershme, forcimin e institucioneve demokratike dhe sundimin e ligjit, dhe luftën ndaj korrupsionit dhe krimit të organizuar. bw

Ish-kryeministri Sali Berisha, dhëndri i tij Jamarbër maltezi dhe tre të pandehurit e dosjes “Partizani”, biznesmeni Fatmir Bektashi, Xhimi Begeja dhe financierja Andia Pustina, do të përballen sot me drejtësinë në seancën paraprake në GJKKO.

Do të jetë gjykatësja paraprake Flojera Davidhi ajo që do të vendosë mbi fatin e çështjes.
Tre janë mundësitë, ose do të nisë gjykimi i çështjes, ose do të kthehet pas, ose çështja pushohet.

Kujtojmë se kreu i Partisë Demokratike Sali Berisha akuzohet për “Korrupsion pasiv”, Bektashi akuzohet për “Korrupsion aktiv”, ndërsa Begeja për “Pastrim parash”.

Sa i përket financieres Andia Pustina, edhe ajo përballet me akuzën “Pastrim parash”.

Akuzat:

Sali Berisha, akuzuar: Për kryerjen e veprës penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, parashikuar nga neni 260 e 25 i Kodit Penal;

Jamarbër Malltezi, akuzuar për kryerjen e veprave “Korrupsioni pasiv i funksionarëve të lartë shtetërorë ose i të zgjedhurve vendorë”, parashikuar nga neni 260 e 25 i Kodit Penal si dhe “Pastrimi i produkteve të veprës penale ose veprimtarisë kriminale” kryer në bashkëpunim, parashikuar nga neni 287 paragrafi i dytë i Kodit Penal;

Fatmir Bektashi, akuzuar për kryerjen e veprave penale “Korrupsioni aktiv i funksionarëve të lartë shtetërorë ose i të zgjedhurve vendorë”, parashikuar nga neni 245 i Kodit Penal dhe “Pastrimi të produkteve të veprës penale ose veprimtarisë kriminale” kryer në bashkëpunim, parashikuar nga neni 287 paragrafi i dytë i Kodit Penal;

Xhimi Begeja, akuzuar për kryerjen e veprës penale “Pastrimi i produkteve të veprës penale ose veprimtarisë kriminale”, kryer në bashkëpunim, parashikuar nga neni 287 paragrafi i dytë i Kodit Penal;

Andia Pustina, akuzuar për kryerjen e veprës penale “Pastrimi i produkteve të veprës penale ose veprimtarisë kriminale”, kryer në bashkëpunim, gjatë ushtrimit të një veprimtarie profesionale, parashikuar nga neni 287 paragrafi i dytë i Kodit Penal;

Subjekti juridik, shoqëria tregtare, Studio Pustina sh.p.k. akuzuar për kryerjen e veprës penale “Pastrimi i produkteve të veprës penale ose veprimtarisë kriminale”, gjatë ushtrimit të një veprimtarie profesionale, parashikuar nga neni 287 paragrafi i dytë i Kodit Penal;

Subjekti juridik, shoqëria tregtare, Homeplan sh.p.k., akuzuar për kryerjen e veprës penale “Pastrimi i produkteve të veprës penale ose veprimtarisë kriminale”, parashikuar nga neni 287 paragrafi i parë i Kodit Penal;

Subjekti juridik, shoqëria tregtare, Kontakt sh.p.k., akuzuar për kryerjen e veprës penale “Pastrimi i produkteve të veprës penale ose veprimtarisë kriminale”, parashikuar nga neni 287 paragrafi i parë i Kodit Penal.bw

Seanca gjyqësore për kreun e Partisë së Lirisë, Ilir Meta, dhe ish-bashkëshorten e tij, Monika Kryemadhi është në vijimësi e sipër, ndërkohë kreu i SPAK, Altin Dumani është larguar nga salla.

Burime bëjnë me dije kreu i SPAK doli nga salla, për shkak të një takimi. Mësohet se Dumani është takuar me përfaqësues të ambasadës britanike.

Në sallë kanë mbetur prokurorët Arben Kraja dhe Sotir Kllapi. gsh

Analisti Ben Andoni i ftuar në rubrikën “Opinion” në News24, u shpreh se shumë shpejt Prokuroria e Posaçme do të godasë shumë afër kryeministrit Edi Rama.

“Nuk besoj që drejtësia është në dorën e zotit Rama sepse besoj që shumë shpejt edhe ai do të ketë probleme me drejtësinë. Drejtësia po mundohet të kalojë një cak. Habitem si politikanët shkojnë në SPAK e dalin duke qeshur”, tha analisti.

Në vijim ai tha se ky është momenti që opozita të ringrihet.

Ben Andoni: Nuk besoj që drejtësia është në dorën e zotit Rama sepse besoj që shumë shpejt edhe ai do të ketë probleme me drejtësinë. Drejtësia po mundohet të kalojë një cak. Habitem si politikanët shkojnë në SPAK e dalin duke qeshur.

Shumë shpejt besoj nga premisa logjike, jo nga informacione. Mazhoranca është vetë e frikësuar, edhe vetë Rama. Çuditem pse kanë pritur kaq kohë, shumë shpejt do të trokasin edhe tek Rama. Sa kohë mazhoranca ia bën punën të vështirë SPAK-ut, kupton që tek kryeministri diçka po frikësohet. Momenti që opozita duhet të ngrihet.

Tek Meta më çuditi që ndryshe nga ne nga përvoja e gjatë, duhej të përgatitej për këtë moment.

Meta duhet të përgatitet për një rrugë pa kthim, që do të tregojë dinjitetin e tij dhe politikën që ka përfaqësuar.bw

Biznesmeni shqiptaro-amerikan Adrian Shatku mohon akuzat e SPAK në adresë të tij, lidhur me dosjen hetimore ndaj Ilir Metës, Monika Kryemadhit, Pirro Xhixhos e Ema Çokut. Në një deklaratë të shpërndarë për mediat, Shatku deklaron se SPAK nuk e ka kontaktuar kurrë për çështjen në hetim.

Ai thekson se deputetja e PL, Monika Kryemadhi dhe Ema Çoku janë kushërira të tij me të cilat mban marrëdhënie të forta, por siç shprehet pa përfshirë çështjet e biznesit.

Biznesmeni thotë se as nuk ka kërkuar favore apo mbështetje në çështjet e biznesit duke shtuar se ndërveprimet me Ilir Metën kanë qenë të kufizuara.

Shatku paralajmëron se për akuzat e ngritura nga SPAK do të ndjekë rrugët ligjore dhe do t’i drejtohet gjykatave amerikane për shpifje.

Reagim për publikim të menjëhershëm në të gjitha mediat shqiptare:

UNIFI mohon kategorikisht akuzat e rreme dhe shpifëse që qarkullojnë për aktivitetet tona të mëparshme në Shqipëri.

Këto pretendime janë të pabaza, duke nënkuptuar korrupsion serioz, ryshfet dhe shfrytëzim të marrëdhënieve personale përfitim i paligjshëm.

Insinuata se UNIFI ose përfaqësuesit e tij po shkelin rregulloret ose nuk e meritojnë partneritetet e biznesit janë tërësisht të rreme dhe përbëjnë shpifje të rëndë, duke dëmtuar integritetin e UNIFI-t, personalitetin tim dhe reputacionin profesional. Për të qenë sa më të qartë, po ju sqarojmë se:

1. Biznesi i Ndërlidhjes së UNIFI-t në Shqipëri:

UNIFI operon si një transportues ndërkombëtar i licencuar nga USA FÇ 214, duke u lidhur me mbi 800 operatorë globalë, duke përfshirë ofruesit kryesorë të telekomit si Vodafone OPCO globalisht (26 prej tyre), ish-AMC Albania, OTE Globe (ish-shoqëria e saj mëmë), ish-AlbTelecom dhe operatorë të tjerë në Shqipëri. Të gjitha operacionet tona janë në përputhje me standardet ndërkombëtare të ITU.

UNIFI mohon kategorikisht çdo pretendim për ndikim politik në aktivitetet tona.

2. Projekti i UNIFI-t BIN dhe BIX Shqiptar i Fibrave Optike:

UNIFI ka kohë që është angazhuar për të pozicionuar Shqipërinë si një qendër e infrastrukturës dixhitale për Ballkanin. Aktualisht ne zotërojmë kabllon nëndetëse IG-1 që lidh Italinë dhe Greqinë, e që shtrihet në Jug të Shqipërisë.

Ne njohëm potencialin e Shqipërisë në qendrën e Ballkanit dixhital në kërkesën e ardhshme të Ai revolucion në fillim, duke investuar 3.2 milionë dollarë në studimet e projektit, duke përfshirë vlerësimet e ndikimit mjedisor, detar sondazhet, negociatat e shitësve dhe planifikimi financiar për të mbështetur investimet në një infrastrukturë të tillë kritike.

UNIFI ka kundërshtuar gjithmonë monopolet dhe mbetet e përkushtuar ndaj demokratizimit të lidhjes dhe aksesit në internet. Për shkak të gjobave të padrejta dhe të paprecedentë, si rezultat i veprimeve zhvatëse të ish-të emëruarit të Partisë Socialiste, Ilir Zela, ne u detyruam të dilnim nga ky projekt kritik i infrastrukturës së tranzitit dixhital për Shqipërinë dhe që atëherë ajo që kemi ndjekur janë veprimet ligjore.

Mjerisht, Shqipëria vazhdon të humbasë mundësitë për lidhje të demokratizuar dhe mundësitë e një revolucioni si AI.

3. Marrëdhëniet e UNIFI me JPM dhe GSIS:

Marrëdhënia jonë e gjatë me JPM bazohet në mbështetjen e tyre në ofrimi i hulumtimit, analitikës dhe raportimit të të dhënave të tregut global, duke përfshirë madhësinë dhe kërkesën e tregut në Ballkan si dhe kapacitetet.

GSIS ka shërbyer si konsulent i besuar i UNIFI-t për sigurinë kibernetike dhe kërcënimet kibernetike. Marrëdhëniet tona me subjektet GSIS mbeten aktive në rajone të ndryshme botërore ku operon UNIFI.

4. Marrëdhëniet personale me familjen Meta:

Ndërsa Monika dhe Ema Çoku janë të kushërinj të largët, dhe si çdo familje ne mbajmë marrëdhënie të aferta, këto marrëdhënie personale nuk kanë ndikuar kurrë në asnjë biznes timin dhe as në vendime.

As nuk kam kërkuar favore apo mbështetje në çështjet e biznesit. Ndërveprimet e mia me Ilir Metën kanë qenë të kufizuara. Edhe pse e respektoj përvojën dhe përkushtimin e tij për Shqipërinë, diskutimet tona nuk kanë përfshirë asnjëherë biznesin, pasi fokusi im primar është tek infrastruktura dhe teknologjia dixhitale, jo tek politika.

5. Lidhur me SPAK-un:

Asnjëherë nuk jemi kontaktuar nga SPAK-u për ndonjë çështje. Si një kompani amerikane dhe një qytetar amerikan, detyrimet e mia janë ndaj vendit tim dhe jam plotësisht i përkushtuar ndaj drejtësisë, barazisë dhe mbrojtjes së standardeve më të larta ligjore kudo që ne operojmë. Që nga dita e parë, të gjitha aktivitetet tona në Shqipëri janë zhvilluar, komunikuar në mënyrë transparente dhe të rregullt në Ambasadën e SHBA-së në Tiranë.

UNIFI mbetet i palëkundur në angazhimin e tij për transparencë, konkurrencë të ndershme, respektim të ligjit dhe avancimi i marrëdhënieve të Shqipërisë me kompanitë amerikane si dhe ngritjen e infrastrukturës dixhitale të Shqipërisë në linjë me iniciativën e teknologjisë së pastër të SHBA-së dhe politikat dhe normat e Standardeve të Atlantikut të Veriut.

UNIFI rezervon të drejtën për ndjekjen ligjore të akuzës për shpifje në gjykatat e SHBA-së. bw

Shtyhet seanca për vlerësimin e masës së sigurisë ndaj presidentit të PL, Ilir Meta në Gjykatën e Posaçme.

BalkanWeb mëson se shtyrja është bërë pas përplasjes së ashpër të Metës me prokurorët e SPAK.

I pranishëm në seancën ndaj kreut të PL është edhe kreu i Prokurorisë së Posaçme, Altin Dumani.

Meta i është drejtuar me akuza prokurorëve Altin Dumani, Arben Kraja dhe Sotir Kllapi.

Mësohet se seanca do të vijojë në orën 13:30, pasi avokatët dhe të dyshuarit duan kohë të njihen me aktet.

Sekretari i Përgjithshëm i Partisë së Lirisë, Tedi Blushi, një ditë pas arrestimit të Ilir Metës me urdhër të SPAK i ka quajtur efektivët e policisë të cilët ekzekutuan urdhrin e arrestimit, banditë.

Sipas tij, dy prej efektivëve janë me precedent të mëparshëm kriminalë dhe i bëri thirrje ministrit të Brendshëm, Ervin Hoxha që të përgënjeshtrojë lajmin nëse nuk është i vërtetë.

Blushi gjithashtu hodhi akuza të forta dhe tha se ditën e djeshme ka pasur një plan për eliminimin fizik të Presidentit të PL-së, Ilir Meta.

Tedi Blushi: Është fakt që narkoregjimi së bashku me narkodrejtësinë kanë ndërmarrë një aksion jo vetëm për eliminimin politik të drejtuesve kryesorë të opozitës, siç është Ilir Meta dhe Sali Berisha, por për fat të keq ka pasur edhe një përpjekje që dështoi për eliminimin fizik të Presidentit të PL-së, për llogari të armiqve të kombit tonë.

Dihet se çfarë beteja të mëdha ka bërë Meta për mbrojtjen e sovranitetit të Shqipërisë, për mbrojtjen e kufijve të Kosovës, për çështjen e detit ku është implikuar edhe Lulzim Basha dhe për llogari të mafies ndërkombëtare. Nuk ekziston asnjë fakt kundër tij për shkelje të ligjit. Ai është i arrestuar politik. SPAK dhe GJKKO dy struktura kamikazë janë të kundërta me faktet konkrete.

Nuk ka asnjë provë, asnjë dëshmi që e implikon zotin Meta në një shkelje sado minimale të ligjit. Janë dëshira të këtij regjimi kriminal, që nëpërmjet terroristëve si Altin Dumani kanë marrë përsipër të shkatërrojnë pluralizmin politik dhe t’i imponojnë vendit zgjidhje që nuk janë ligjore dhe kushtetuese, por janë kriminale.

Pjesë e grupit terrorist që guxoi të rrëmbente dhe të dhunonte Presidentin e PL-së, nuk kanë qenë gjë tjetër veç banditë policie. Sipas informacioneve një nga gjasme oficerët e ngarkuar në detyrë që duhet të bënte prezantimin e mandatit të arrestit, gjë që nuk ndodhi kurrë, është një djalë, emrin e të cilit nuk do ta them, i moshës 27 vjeç, pa eksperiencë në strukturat e policisë, i cili jo vetëm ka guxuar, por ka shërbyer aty edhe si roje trafiku.

Sa i përket horrave që u përpoqën të tërhiqnin forcërisht Presidentin e PL-së nga automjeti pa u identifikuar, kemi evidentuar dy persona me precedent penal, të cilët është e paqartë se si kanë hyrë në policinë e shtetit. Janë të lidhur me bandat në zonën e Durrësit. Sfidoj ministrin e Brendshëm që nëse ky fakt nuk është i vërtetë le ta përgënjeshtrojë.

Në një nga automjet civile pa asnjë logo policie, ka dalë një bandit dhe ka kërcënuar me armë qytetarët që filmonin skenën e ngjarjes. Ky automjet prej dy vitesh qarkullon në rrugët e Shqipërisë pa asnjë dokument identifikues. sn

Monika Kryemadhi dha një deklaratë për shtyp nga selia e Kuvendit.

Kryemadhi: Dje mora materialin për vendimin e masës së sigurisë për mua, duhej ta lexoja, nuk isha shumë e qetë mendërisht dhe shpirtërisht ta lexoja me detaje. Në thirrjen në SPK jam pyetur për kallëzimin penal ndaj Veliajt.

I kam dërguar prokurorit të çështjes mbi 5 mijë faqe prova të vërtetuara, të miat, masë dhe familjarëve të mi.

Unë kisha rreth 5 mijë faqe, mamaja rreth 3 mijë.

Nuk kishte përfshirje të tyre në kërkesën e prokurorisë për gjykatën. Që në nisje ishte një proces politik që nisi nga denoncimi im për inceneratorët.

Indinjata ime dje erdhi pas deklaratës së SPAK pasi mendoja se qoftë edhe për shkak të këtij ambienti mosbesues do të ishin korrekt në marrëdhënien e çështjes sonë.

U thirrën për orë të tëra, janë rrëmbyer nëpër aeroporte miq të mi, të huaj e shqiptarë, u kanë kërkuar të bëjnë dëshmi të rreme dhe janë intimiduar, por nuk kemi folur sepse kemi besuar tek reforma për të cilën aleatët tonë kanë paguar.

Deklarata dje ka shkelur nenin për dekretin hetimor.

Ish-kryeministri Sali Berisha ka reaguar sërish në lidhje me arrestimin e kryetarit të Partisë së Lirisë, Ilir Meta.

Me anë të një postimi në Facebook, të cilin Berisha e ka shkruar në shqip dhe anglisht thotë se “kriminelët me uniformë rrëmbyen dhe goditën pas koke ish presidentin, ish kryeministrin dhe ish kreun e Parlamentit.

“Kriminelë me uniformë rrëmbejnë dhe godasin mbas koke publikisht, me porosi të Edi Ramës ish- Presidentin, ish- Kryeministrin dhe ish-Kryetarin e Parlamentit Ilir Meta!

Dënoj me forcën më të madhe aktin e tyre monstruoz!

The Albanian Police (criminals in uniform), folloëing the orders of Edi Rama, abducted and punched in the head, in public the former President, former Prime Minister, and former Speaker of Parliament, Ilir Meta.

I strongly condemn their monstrous act!”, shkruan Berisha. Panorama

Të tjera detaje janë zbardhur në lidhje me arrestimin e kryetarit të Partisë së Lirisë, Ilir Meta. Gazetari Igli Çelmeta raporton se masë sigurie “detyrim paraqitje” është dhënë edhe për ish bashkëshorten e tij, Monika Kryemadhi. 

Ndërkohë mësohet se masa janë dhënë edhe për disa bashkëpunëtorë të Ilir Metës, por ende nuk ka detaje të hollësishme.

Ilir Meta u vu në pranga mesditën e kësaj të hëne (21 tetor) në hyrje të Tiranës, kur kreu i PL po shkonte drejt selisë për të mbajtur një konferencë.

Kreu i PL u arrestua nga agjentë të BKH të asistuar edhe nga punonjës policie, ndërsa ishte nën shoqërinë e shoferit.

Nderkohe ne nje reagim, sekretari i pergjithshem i PL, Tedi Blushi u shpreh se Meta u rrëmbye në mes të ditës, ndërsa shtoi se nuk ka asnjë informacion se ku ndodhet.

“Kemi të bëjmë me një pengmarrje kriminale, të një strukture kriminele që guxon të rrëmbejë në mes të ditës ish presidentin, ish-kryeministrin dhe ish kryetarin e parlamentit. Nuk e di ku ndodhet aktualisht, kjo është një fatkeqësi dhe gjendje skandaloze. Akt i rëndë kriminal që do marrë përgjigje shembullore”, tha Blushi. Panorama

Gjatë kohës që po mbante konferencën për mediat, kryetari i PD-së, Sali Berisha ka komentuar edhe lajmin e arrestimit të presidentit të Partisë së Lirisë, Ilir Meta.

Sipas Berishës, ky është një persekutim publik dhe Edi Rama është përjekur edhe për eliminimin e tij fizik.

‘Çdo gjë ndaj tij është politike.

Persekutimi politik i Ilir Metës është politik, politik dhe vetëm politik.

Nuk kanë publikuar asnjë fakt, asnjë dokument, por kanë zbatuar urdhrat e Edi Ramës, i cili është përpjekur me të gjitha mënyrat për eliminimin politik, e ndoshta edhe fizik të Ilir Metës.

Edi Rama është, siç denoncova edhe në herët e kaluara, i implikuar në zhdukje të personave në mënyrë ekstraligjore, antikushtetuese.

Iu kam informuar unë këtu ju, se Dumani fle mbi një dosje në të cilën bisedohet për eliminimin e një politikani të afërt me Edi Ramën.

E kuptoni se a do mund të guxonin bandat shtetërore të eliminonin një politikan të afërt me Edi Ramën, pa porosinë e Edi Ramës?

Pra, Edi Rama është një me krimin’, tha Berisha. sn

Arrestohet Presidenti i Partisë së Lirisë, Ilir Meta.

Burime jo zyrtare nga policia konfirmojnë ekzekutimin e masës së sigurisë lëshuar nga spak për kreun e PL Ilir Meta.

Kreu i PL-së është paraqitur disa herë në Prokurorinë e Posaçme për t’u marrë në pyetje për çështjen CEZ-DIA.

SYRI TV mëson se kreu i PL-së u arrestua pranë Casa Italia-s në kryeqytet.

Jurgis Çyrbja është arrestuar sot me urdhër të Prokurorisë së Posaçme kundër Korrupsionit dhe Krimit të Organizuar.

Çyrbja u dorëhoq nga mandati i deputetit më 9 Tetor, vetëm pak ditë pasi u paraqit në SPAK, por sipas ish-deputetit, kjo nuk kishte lidhje me vendimin e tij.

Ai ka deklaruar se nuk ka asnjë shqetësim të natyrës ligjore, por që ka nevojë të kujdeset për shëndetin.

Jurgis Çyrbja u paraqit sërish në SPAK një ditë pasi dorëzoi mandatin dhe u mor i pandehur për “shpërdorim detyre”.

Ish-deputeti socialisit akuzohet për shpërdorim detyre në kohën kur ishte drejtues i Hipotekës së Durrësit.

Pas dorëheqjes së tij, KQZ i dha mandatin e deputetit Erjon Mekajt.Panorama

“Shqipëria dhe Kosova duhet të kenë një strategji të përbashkët të mbrojtjes”, thotë ish-presidenti shqiptar, Alfred Moisiu.

Ai thekson se dy vendet duhet të kenë bashkëpunim më të madh edhe ndërmjet shtabeve të ushtrive pasi që vetëm në këtë mënyrë, sipas tij, mund të përballohet çfarëdo lloj aventure e Serbisë.

Në një intervistë për KosovaPress, Moisiu thotë se presidenti i Serbisë, Aleksandar Vuçiç, është ideatori kryesor i agresionit ndaj Kosovës, përmes sulmit terrorist në Banjskë.

Sulmi ndaj Policisë së Kosovës në Banjskë të Zveçanit kishte ndodhur më 24 shtator të vitit të kaluar, nga një grup i serbëve të armatosur.

Përgjegjësinë për sulmin terrorist e ka marrë ish-nënkryetari i Listës Serbe, Millan Radoiçiq, parti kjo e cila ka mbështetjen e Beogradit zyrtar.

Megjithatë, ish-presidenti i Shqipërisë thekson se dialogu Kosovë-Serbi duhet të vazhdojë derisa kërkon nga autoritetet kosovare koordinim më të madh me aleatët, veçmas me Shtetet e Bashkuara.

“Kam kritikuar edhe qeverinë në Shqipëri dhe atë të Kosovës, pasi duhet të koordinojmë më shumë dhe më mirë. Të kenë një strategji mbrojtjeje të përbashkët si komb. Duhet të bashkëpunojnë dhe ministritë e mbrojtjes dhe shtabet e përgjithshme, të ushtrisë shqiptare dhe të Forcave të Sigurisë së Kosovës. Në këtë mënyrë ne do të jemi më solid dhe të gatshëm për të përballuar çdo lloj aventure”, thotë ai.

Sipas tij, është e pa imagjinueshme që presidenti serb të mos ketë qenë i kyçur në sulmin terrorist në Banjskë.

“Ai [Vuçiq] është kryetar i shtetit serb. Unë nuk mund të imagjinoj dot se një shtet si Serbia, që është një shtet diktatorial me të thënë të drejtën, se vepron dikush pa e ditur kryetari i shtetit. Unë këtë nuk e imagjinoj dot. Mund të thuhet çkado, por unë nuk e besoj dot. Ai ka qenë brenda dhe ka dorë në këto gjëra [sulmin terrorist në Banjskë]. Kjo është shqetësuese”, deklaron ish-presidenti shqiptar.

Moisiu përmend ambiciet hegjemoniste të Serbisë mbi Kosovën, megjithatë thekson se dialogu i Brukselit duhet të vazhdojë për arritjen e një marrëveshjeje përfundimtare.

“Dialogu do të vazhdojë, ajo dihet. Por ata [zyrtarët e Serbisë] kanë qëllimet e veta dhe s’heqin dorë nga ato qëllime. Kam treguar një rast, në vitin 2002, para se të jem president i Shqipërisë kam qenë në Beograd i ftuar në një konferencë. Atje kam takuar një gjeneral të ushtrisë serbe, duke biseduar me të i thash: Çka keni ju, ç’është kjo ‘Kosovë-metohi’? S’ka metohi, kjo është Kosovë. Ai më tha: Zotëri Moisiu, ne tani jemi larguar në kufi me juve, por avash avash po të afrohemi. Shiko çfarë mentaliteti kanë ata. Ata kanë ëndërr akoma se Kosova është djepi i Serbisë. Këto janë vërtet ëndrra, të cilat ata i ushqejnë dhe i mbajnë gjallë”, thotë ai.

Ish-presidenti i Shqipërisë thekson nevojën që udhëheqësit në Kosovë të koordinohen me aleatët, veçmas me Shtetet e Bashkuara, për veprimet në veri.

“Veprimet, politikanët e Kosovës duhet t’i koordinojnë me aleatët tanë, në mënyrë të veçantë me Shtetet e Bashkuara të Amerikës por edhe Bashkimin Evropian. Në fund të fundit, ata na duan pasi ata na ndihmuan që të krijojmë shtetin e Kosovës. Nuk e krijuan shtetin për ta copëtuar, sigurisht. Por edhe ne duhet të dimë si të sillemi. Duhet të koordinojmë veprimet. Kjo nuk do të thotë se do të lëshojmë çdo gjë.

Jo, por duhet të bisedojmë sepse çdo kryeneçësi është në dëmin tonë më shumë. Qeveria e Kosovës ka të drejtë të shqetësohet por pikërisht unë kritikova jo shqetësimin e saj por mënyrën e veprimit. Duhet të bashkëpunojmë me aleatë tanë. Duhet të merremi vesh me Shtetet e Bashkuara të Amerikës se si t’i zgjidhim gjërat më mirë. Kjo nuk zgjidhet menjëherë, por këtu duhet organizim për të gjetur rrugën e bashkëpunimit”, përfundon ai.

Qeveria e Kosovës është kritikuar edhe nga Shtetet e Bashkuara për veprime që ata i kanë konsideruar të njëanshme.

Këtë vit, autoritetet kosovare kanë ndërmarrë disa veprime në pjesën veriore të vendit të banuar me shumicë serbe – në mesin e tyre mbylljen e strukturave paralele serbe si dhe ndalimin e përdorimit të dinarit serb.

Kreu i Grupit Parlament të PD-së Gazment Bardhi, i është përgjigjur deputetit të PS-së Plarent Ndrecën, pas paralajmërimit të këtij të fundit se do të padiste për shpifje në SPAK, Belind Këlliçin.

Bardhi, duke publikuar disa pjesë nga dosja hetimore e SPAK, shkruan se Ndreca është nën hetim për shkelje të barazisë në tendera, të kryer në bashkëpunim, me abuzim miliona euro për rikonstruksionin e disa godinave të Komisariateve (Komisariatet nr.4 Tiranë, Vlorë, Mirditë dhe Pogradec).

Sipas tij, SPAK ka dalë në konkluzionin që si Sekretar i Përgjithshëm i Ministrisë së Brendshme, ai ka shkelur ligjin duke paracaktuar kompaninë fituese dhe rritur fiktivisht vlerat e prokurimit, duke sjellë dëm të rëndë financiar për Buxhetin e Shtetit.

“Nëse Plarent Ndreca mendon që për shkak se është një deputet periferik dhe jashtë fokusit të opinionit publik, mund të amnistohet nga SPAK, gabohet rëndë! Lidhur me këtë çështje, Grupi Parlamentar i PD-së po pret që SPAK të bëjë detyrën e vet, duke e ndjekur nga afër të gjithë procesin dhe duke disponuar të gjitha faktet që provojnë shkeljen e rëndë të ligjit dhe përgjegjësinë penale për deputetin e Edi Ramës”, shprehet Bardhi.

Reagimi i plotë:

Sot një deputet periferik i Edi Ramës paska sulmuar me gjuhën e gënjeshtrave të Erion Veliajt kolegun Belind Këlliçi. Është i njëjti deputet i PS që gënjeu të enjten publikisht në emisionin “Opinion” kur tha që s’ka asnjë problem në SPAK.

E vërteta është që Plarent Ndreca, deputeti i Edi Ramës, është nën hetim në procedimin penal nr. 240/2021, bazuar në një Referim (kallëzim/informacion) të bërë nga Kontrolli i Lartë i Shtetit, akuzuar për shkelje të barazisë në tendera, të kryer në bashkëpunim, me abuzim miliona euro për rikonstruksionin e disa godinave të Komisariateve (Komisariatet nr.4 Tiranë, Vlorë, Mirditë dhe Pogradec).

Ndryshe nga balta që ai hedh me gënjeshtra ndaj kujtdo që i thotë të vërtetën në sy, që ai është një shkelës recidivist i ligjit, për Plarent Ndrecën qartësisht sipas dokumenteve zyrtare, SPAK ka dalë në konkluzionin që si Sekretar i Përgjithshëm i Ministrisë së Brendshme, ai ka shkelur ligjin duke paracaktuar kompaninë fituese dhe rritur fiktivisht vlerat e prokurimit, duke sjellë dëm të rëndë financiar për Buxhetin e Shtetit.

Nga hetimi i deritanishëm janë konstatuar një sërë shkeljesh të kryera në kundërshtim me dispozitat ligjore në fuqi mbi prokurimin publik, duke cënuar barazinë e pjesëmarrësve në këto procedura prokurimi dhe që kanë krijuar rritje të paargumentuar të vlerës së kostove të ndërtimit dhe kostove të projektimit.

Nëse Plarent Ndreca mendon që për shkak se është një deputet periferik dhe jashtë fokusit të opinionit publik, mund të amnistohet nga SPAK, gabohet rëndë! Lidhur me këtë çështje, Grupi Parlamentar i PD-së po pret që SPAK të bëjë detyrën e vet, duke e ndjekur nga afër të gjithë procesin dhe duke disponuar të gjitha faktet që provojnë shkeljen e rëndë të ligjit dhe përgjegjësinë penale për deputetin e Edi Ramës!

Bashkëlidhur pjesë nga dosja hetimore nr. 240/2021 të SPAK!

Panorama

Partitë Popullore Evropiane kanë njohur zyrtarisht Sali Berishën si kryetar të Partisë Demokratike.

Gazetari Osman Stafa raporton se në letrën drejtuar Sali Berishës, Presidenti i Partive Popullore Evropiane Manfred Weber, i shkruan Berishës që t’i nominoj kandidaturat për në Asamblenë Politike të Partive Popullore Evropiane.

Situata e krijuar në PD në tre vitet e fundit, pas  përçarjeve të vazhdueshme, bënë që Partitë Popullore Evropiane, të pezullonin Partinë Demokratike, nga aktivitet e saj.

Krijimi i situatës në Shqipëri, ku Lulzim Basha pretendonte se drejtonte PD-në e nga ana tjetër Berisha shprehej se PD-ja e vërtetë është ai, bën që PPE, të mos mbante anë, por të linte që konflikti të mbaronte.

Me vendimin e Gjykatës së Apelit për vulën e PD-së, duket se PPE, tashmë ka hequr pezullimin për Partinë Demokratike duke njohur Sali Berishën si kryetar të saj.

Një anije italiane e rojës bregdetare ka mbërritur në Portin e Shëngjinit mëngjesin e sotëm, për të marrë 12 emigrantët që pak ditë më parë ishin akomoduar në qendrën e Gjadrit.

Pas vendimit të Gjykatës së Romës, të 12 emigrantët nga Egjipti dhe Bangladeshi do të zhvendosen në Itali, ndoshta në Bari, dhe më pas në një qendër pritjeje, ku do të jenë në pritje të procedurave. sn

Në një shkresë drejtuar Komisionit Qendror të Zgjedhjeve, PD shprehet kundër propozimit për të implementuar votimin elektronik në zgjedhjet e ardhshme parlamentare, në dy qarqe, Elbasan dhe Durrës.

Balkanëeb sguron shkresën e PD-së drejtuar institucionit të administrimit të zgjedhjeve e cila mban firmën e Ivi Kasos, Sekretar për Çështjet Zgjedhore në PD. Demokratët argumentojnë se në zgjedhjet lokale të 14 majit 2023 ku në dy bashki Elbasan dhe Kamëz u përdor teknologjia në votimin dhe numërimin u konstatuan parregullsi.

“Implementimi i pjesshëm i këtij projekti, krahas disa avantazheve dhe suksesit të pjesshëm solli edhe një seri problematikash të cilat jo vetëm e cënuan rëndë procesin, por edhe minuan në mënyrë serioze besimin e publikut dhe të forcave politike në të. Pamjet filmike të operatorëve të sistemit të cilët përkundër kujdesit për mbarëvajtjen teknike të makinerive të votimit elektronik shkelën ligjin për të mbivendosur interesin partiak, duke votuar vetë në emër dhe për llogari të zgjedhësve të cilët nuk ishin aty ndërkohë që kjo përbën shkelje të Kodit Zgjedhor dhe vepër penale, dëshmojnë veprime që u konsumuan në prezencë të komisioneve të qendrave të votimit dhe ende sot mbeten të pahetuara si nga ana juaj ashtu edhe nga ana e organeve të drejtësisë të cilët duhet të vigjëlojnë mbi procesin zgjedhor.

Mungesa në zbatim e garancive që ligji u jep zgjedhësve për të verifikuar votën dhe anuluar atë, mungesa e mekanizmave që garantojnë verifikim të thelluar dhe transparencë, gjithashtu minuan besimin e zgjedhësve, subjekteve zgjedhore dhe publikut në një proes që kërkon besim”, thuhet në shkresën e PD.

Deputeti demokrat Dashnor Sula dogji sot xhaketën e tij në ambientet e jashtme të Parlamentit në kuadër të reagimit të ligjvënësve opozitarë.

Sula tërhoqi vëmendjen me veprimin e tij, ndërsa disa orë pas këtij veprimi, u shfaq në studion e rubrikës “Opinion” në News24, ku ka shpjeguar pse e dogji xhaketën.

Sula u shpreh se djegia e xhaketës sot në oborrin e Kuvendit, erdhi si pasojë e irritimit me gjithçka që po ndodhte. Ai tha se gjithë kjo që po bën opozita bëhet për qytetarët.

“Kam parë më parë vuvuzela, përmbysje karrigeje, më gjeni një deputet që është dënuar më shumë se 10 ditë dhe nuk lejohej të hynte në Kuvend, flas për opozitën e atëhershme. Kishte edhe tek ne koka të nxehta në mbledhje të grupit, por Berisha thoshte opozita është në hall, Duhet t’i lejohet hapësirë të shprehet. Këta duan të marrin para edhe nga karriget”, tha ai. bw

Kryetari i partisë “Mundësia”, Agron Shehaj në fjalën e tij për mediat pasi u largua nga seanca plenare ku nuk u zhvillua interpelanca e thirrur me ministren e Kulturës dhe Turizmit, Mirela Kumbaro, u shpreh se mosbindja civile nuk mjafton më.

Ai kërkoi nga opozita që të fokusohet te rikthimi i besimit të saj te qytetarët. Shehaj tha se veprimet e deritanishme nuk kanë rritur mbështetjen, ndërsa shtoi se në Parlament duhet të diskutohet duke denoncuar shkeljet dhe abuzimet dhe shpalosur alternativën në mënyrë që nesër vendi të ketë një qeveri të pakorruptuar.

Gjithashtu, Shehaj denoncoi veprimet e mazhorancës duke rrethuar Kuvendin me gardistë, por edhe arrestimin e deputetit të PD, Ervin Salianji, përpjekje këto sipas tij nga ana e shumicës parlamentare, për të frikësuar zërat kundër.

“Parlamenti është i vetmi vend ku mund të shprehemi. Unë mendoj që duhet një mënyrë tjetër, nuk mjafton mosbindja civile. Opozita është me shpatulla pas murit. Një përfaqësues i opozitës është në burg se tha një të vërtetë, tha vëllai i ministrit të Brendshëm i cili duhet të kapë ata që janë në kërkim nga Italia është i lirë dhe ministri duhet të kapë të vëllanë. Kjo gjë nuk shkon, për këtë arsye ai është në burg. Unë nuk ndaj të njëjtin mendim për formën e protestës së opozitës. Thjesht nuk mjafton.

Unë mendoj se ne nuk duhet të ndalojmë së komunikuari, së foluri me elektoratin. Opozita duhet të fitojë besueshmërinë e qytetarëve. Duhet të vrasim mendjen, kjo që po bëjmë a na sjell mbështetjen e qytetarëve? Po apo jo? Çdo veprim që bëjmë dhe disa veprime që janë bërë nuk na çojnë në atë drejtim. Opinioni publik duhet të dëgjojë për korrupsionin, ne duhet të vazhdojmë, duhet të ngulim këmbë se kështu fitojmë besueshmërinë që nesër do t’i sjellim vendit një qeveri të pakorruptuar. Nuk ka zgjidhje tjetër.

Në një demokraci zgjidhje është vota e qytetarëve. Dhe lufta e opozitës duhet të jetë si të fitojë besimin e qytetarëve, votën e qytetarëve. Këtë bën opozita. Kështu funksionon një demokraci. Kushtet në të cilat veprojmë janë jashtëzakonisht të vështira. Frika është elementi i ri i shtuar nga mazhoranca dhe Rama. Këto shfaqje në Parlament, të rrethuar nga Garda kanë këtë synim, frikën, të trembin njerëzit. Sot kam folur me një qytetar që pati kurajon të denonconte live se si djali i tij vdiq se si iu ndërpre kura me ilacce. Unë fola me të dhe i kërkova të vazhdojë këtë betejë, por ajo që kërkova ishte se zotëria ishte i ndrojtur, kishte frikë. Kjo po ndodh në Shqipëri, paratë dhe frika janë instrumentet e kësaj mazhorancë. Problemi në çdo demokraci është mazhoranca, qeveria, jo opozita”, tha ai.

Kryetari i partisë “Mundësia”, Agron Shehaj është tërhequr nga interpelanca e kërkuar me ministren e Turizmit, Mirela Kumbaro.

Në fjalën e tij në Kuvend, Shehaj tha se është e pamundur të zhvillohet seanca, për shkak të trajtimit që po i bëhet deputetëve të opozitës në sallën e Kuvendit dhe jashtë saj.

“Do të doja shumë ta bëja këtë interpelancë, ministrja duhet të japë përgjigje, por në një vend normal ministrja duhet të japë përgjigje në Prokurori por kjo nuk ndodh në Shqipëri. Zonja kryetare është e pamundur të bëjmë detyrën në këto kushte dhe është detyra juaj. Lejoni deputetët të futen në Kuvend”, u shpreh Shehaj.bw