Kreu i LIBRA-s, Ben Blushi ka shpjeguar sot arsyet që e pengojnë LSI-në, sipas tij, që të hyjë në koalicion me PS për zgjedhjet parlamentare të 18 qershorit. Në rubrikën “Opinion” në “News24”, deputeti Blushi tha se LSI i druhet një procesi zgjedhor në të cilin nuk merr pjesë PD, pasi në këtë mënyrë do të ishin automakisht të humbur.

Sipas Blushit, nëse PD nuk merr pjesë në zgjedhjet e 18 qershorit, atëherë LSI ose detyrohet të jetë opozita, ose nuk i duhet Rilindjes për qeverinë, pasi kjo e fundit do t’i ketë mandatet e nevojshme, që vijnë si rezultat i mospjesëmarrjes së PD në zgjedhje.

Pse mendoni ju se Meta do të bëhet president?
Unë nuk e kam thënë këtë gjë, sepse nuk e di. Por kam lexuar veprime amatoreske të Ramës dhe Metës. Dhe më keq se kaq, brutale dhe arbitrare. Këto janë në dëm të procesit. Raundi i parë i presidentit u dogj. Po kështu edhe raundi i sotëm u zgjodh. As solemnitet dhe prestigj nuk i dhanë këtij momenti. Kur një president zgjidhjet njëherë në 5 vite. As nuk shkova fare. Një shumicë që thotë se ka votat nuk ka aftësinë t’i japë prestigj çështjes së presidentit. Të prezantojnë një kandidat e t’ia paraqesin njerëzve. Jo se nuk kanë një kandidat, po kërkojnë këtë ta lidhin me krizën e zgjedhjeve, gjejnë argumenti banal se po presin opozitën. dhe në këtë mënyrë, heqim mundësinë që kërkesa e PD të bjerë. Nëse shkohet në zgjedhje të parakohshme s’ka vlerë kërkesa e PD. E gjithë kjo krizë është e brendshme në mazhorancë. Ato nuk po merren vesh për koalicionin. Kush i pengonte të regjistroheshin dje. Nëse i kërkojnë PD të respektojë kushtetutën dhe kodin zgjedhor, le ta respektojnë vetë. E kanë shkelur me konsensus ligjin. LSI druan, apo ka frikë të hyjë në zgjedhje në kushtet që PD nuk hyn, se është në opozitë vetë. Rilindja është më e madhe se LSI. Në kushtet ku mungon PD, mandatet e tyre do jenë më shumë. LSI druan se nëse hyn pa PD do të jetë vetë në opozitë, ose do të jetë totalisht e panevojshme se Rilindja do t’i ketë votat vetë.

Masat e ftohta ajrore rikthyen reshjet e borës gjatë mbrëmjes dhe mëngjesit të sotëm në zonat malore.

Alfred Peza dhe bashkëshortja e tij Mirela Ndini gëzojnë një pasuri qindra milione lekë, para këto që ata pretendojnë se i kanë vënë falë punës së tyre disa vjeçare, ku njëri ka shërbyer në tregun mediatik dhe tjetri pjesë e aministratës së Ministrisë së Jashtme.

Në Shqipëri parlamenti dështoi sonte të zgjidhte në votimin e parë, presidentin e ri të vendit.

Asnjë nga forcat politike nuk propozoi ndonjë kandidaturë.

“Raundi i parë i zgjedhjes së presidentit quhet i ezauruar. Kjo procedurë është shprehje e vullnetit, që të afrohet edhe opozita për një figurë konsensuale” – tha kryetari i parlamentit, Ilir Meta.

Kryeministri Edi Rama tha menjëherë pas seancës se “socialistët i kanë numrat për ta zgjedhur Presidentin e Republikës, por po mundohemi t’i japim një shans opozitës për të gjetur një figurë sa më shumë përfaqësuese dhe sa më shumë gjithëpërfshirëse”.

“Ne duam t’i japim atij institucion dinjitetin dhe autoritetin për të qëndruar mbi palët. Më mirë një president pak ditë më vonë se sa një president i zgjedhur në një sallë të boshatisur nga krahu i opozitës që nuk vjen në punë” – tha zoti Rama.

Fundjavën e shkuar shumica në pushtet deklaroi se nuk do të paraqiste asnjë emër e nuk do të mbështeste asnjë kandidaturë për president, në përpjekje për të dialoguar dhe për të kërkuar edhe konsensusin e opozitës, e cila ndërkohë ka bojkotuar parlamentin.

Sipas Kushtetutës shqiptare, për zgjedhjen e presidentit të vendit zhvillohen deri 5 raunde votimi.

Në tre të parat kërkohet një shumicë e cilësuar prej 84 votash, ndërsa në raundin e katërt dhe të pestë presidenti mund të zgjidhet dhe më shumicën e thjeshtë prej 70+1 deputetësh.

E majta, i ka edhe e vetme 84 votat e nevojshme për të zgjedhur kreun e ri të Shtetit në dy raundet e ardhshme. Votimi i radhës duhet të zhvillohet brenda 7 ditëve.

TIRANE– Avokati Spartak Ngjela teksa ka komentuar situatën politike në vend, pohoi se opozita ka gjetur rrugën e gabuar të vetëlikuidimit të saj.

Për këtë arsye sipas Ngjelës, kryetari i Partisë Demokratike, Lulzim Basha dhe Sali Berisha duhet të dorëhiqen.

Ngjela theksoi se ata duhet të zëvendësohen me lidership të ri dhe të papërlyer nga balta korruptive e pushtetit.

MESAZHI I NGJELËS
Asnjë rrugë nuk të çon dot në prishjen e zgjedhjeve:
as bojkotimi i procesit zgjedhor nga Partia Demokratike;
as destabilizimi i rendit shoqëror në Shqipëri nga krerët e çadrës.
Shqipëria nuk mund ta ndryshojë rrugën e saj antiruse në Ballkanin Perëndimor.
Pardje foli zv. kancelari gjerman Gabriel. Në, prima facie, ai tha se ishte kundër qëndrimit të opozitës.
Kurse Çadra hesht. Por politika e lartë perëndimore e deklaroi që “gjithçka dhe çdo akt i opozitës është frikë kundrejt Reformës në Drejtësi”.
Në fakt kjo është e vërteta, e cila ka krijuar opinionin e politikës perëndimore.Të njëjtën gjë do të thotë edhe politika e lartë amerikane këto ditë, patjetër.
Po opozita çdo të bëjë?
Në fakt opozita gjeti rrugën e gabuar të vetëlikuidimit të saj, dhe, pikerisht për këtë duhet te reformohet domosdoshmërisht.
Tani nuk ka më asnjë shpresë me këtë rrugë, por jane shtresat e saj shoqërore që nuk duhet ta vuajnë mungesën e përfaqësimit.
Politika amerikanë dhe europiano-perëndimore është e vendosur kundër korrupsionit.
Lidërshipi i ngushtë i Partisë Demokratike nuk ka më të ardhme politike në Shqipëri. Por jo Partia Demokratike.
Atëherë, cila është Rruga?
Duhet të japin menjëherë dorëheqjen Basha dhe Berisha e sekretarët; dhe të zgjidhet menjëherë lidershipi i ri i papërlyer nga balta korruptive e pushtetit.
Kjo është e vetmja rrugë politike favorizuese.
Por a ka kohë lidërshipi i ri për përgatitjen elektorale?
Kjo duhet parë. Por në fakt, edhe nëse nuk a ka atë aftësia, sepse ka me vete forcën politike të entuziazmit të reformimit të PD që i jep mundësinë politikë të barazimit të situatës elektorale.
Çdo rrugë tjetër është falimentim tërësor politik i Partisë Demokratike, sepse reforma shqiptare është ingredienti kryesor i gjeopolitikës amerikane dhe perëndimore në përgjithësi, në lidhje me Ballkanin Perëndimor. Lidërshipi i PD-së me shenja korruptive, ose do te likuidohet ndërkombëtarisht me anë të Reformës në Drejtësi, ose me zhvillimin e zgjedhjeve pa pjesëmarrjen e PD, akt ky, që për politikën perëndimore në veprim, është i barazvlefshëm me Reformën në Drejtësi.

Kryeministri Edi Rama ka deklaruar 1.2 milionë lekë të ardhura për vitin 2016 nga shitja e pikturave. Në formularin e deklarimit të pasurive, thuhet se kreu i Qeverisë ka pasur rrogë vjetore për 2016 në shumën 2 milionë lekë, ndërkohë që të ardhurat nga honorarët ishin 204 mijë lekë. Për një vit Rama ka shlyer 35 mijë euro të një kredie të marrë në vitin 2013 në shumën 80 mijë euro. Atij i kanë ngelur pa shlyer edhe 30 mijë euro.

Ndërsa bashkëshortja, Lindita Rama ka deklaruar pakësimin e një llogarie bankare me 600 mijë lekë, ndërsa të ardhurat nga paga dhe puna si eksperte i ka pasur 3.1 milionë lekë. Ajo ka deklaruar gjithashtu të ardhura nga qiraja e një apartamenti në shumën 2 milionë lekë si dhe të ardhura nga honorarë në shumën 814 mijë lekë.

Djali i kryeministrit Gregor Rama ka deklaruar shtesë llogarie 14 mijë euro. Të ardhurat e tij nga shitja e veprave të artit për vitin 2016 kanë qenë 25 mijë euro. Gregor Rama ka deklaruar te kategoria e detyrimeve dhe një kontratë qeraje 2 vjeçare, për të cilën duhet të paguajë 432 mijë lekë.

Fëmijët e kryeministrit Berisha kanë deklaruar shuma të mëdha kryesisht nga mësimdhënia dhe konsulenca juridike. Panorama Online ka siguruar sot deklarimin e pasurisë së familjes së ish kryeministrit Berisha për vitin 2016, ku si çdo vit tjetër kanë deklaruar pasurinë e tyre edhe Shkëlzeni dhe Argita Malltezi.

Ish kryeministri Berisha ka deklaruar një shtesë llogarie prej 1 milion lekë të reja, ndërkohë që pagën vjetore si deputet dhe shpërblimet e ka pasur 1.3 milionë lekë. Ndërsa të ardhurat nga ish pozicioni si kryeministër, Berisha i ka 647 mijë lekë.

Argita Malltezi, ndër të tjera ka deklaruar shtesa në katër llogari me 34 mijë euro, 15 mijë euro, 659 mijë lekë dhe 1.3 milion lekë. Të ardhurat nga rroga neto në fakultet për Argita Berishën kanë qenë 1 milion lekë, ndërsa të ardhurat nga mësimdhënia në fakultete private ishte 1.1 milion lekë. Ajo ka përfituar gjithashtu të ardhura nga qiratë në shumën 34 mijë euro si dhe honorarë dhe shpërblime në shumën 642 mijë lekë.

Shkëlzen Berisha ka deklaruar pakësimin e një llogarie me 174 mijë euro si dhe në një llogari në lekë, ka shtuar 2.1 milionë. Ai ka krijuar 600 mijë euro të ardhura nga shitja e një pasurie të paluajtshme. Në formularin e të ardhurave për vitin 2016, Shkëlzen Berisha ka deklaruar të ardhura nga konsulenca 3 milionë lekë, të ardhura nga punësimi 961 mijë lekë si dhe të ardhura nga qiraja 47.956 euro. Në ditët e fundit të 2016 ai ka mbyllur kredinë 252 mijë euro si dhe ka shlyer 12 mijë euro kredi të cilën e ka marrë për blerjen e një makine.

Kryetari i Kuvendit, Ilir Meta dhe bashkëshortja e tij, Monika Kryemadhi kanë shitur katër apartamente vitin e kaluar. Sipas deklarimit të pasurisë, të cilin po e publikon sot Panorama Online, rezulton se tre apartamente në total kapin shumën e 204 mijë eurove, ndërsa apartamenti tjetër 345 mijë euro, nga të cilat 100 mijë janë arkëtuar në vitin 2016, ndërsa 245 mijë në vitet e ardhshme. Por blerësi i këtij apartamenti ka marrë përsipër edhe shlyerjen e një kredie prej 155 mijë euro të familjes Meta. Të ardhurat e kreut të Kuvendit vitin e kaluar kanë qenë 1.9 milionë lekë, po aq sa të deputetes Kryemadh

Tashmë tre partitë më të mëdha në Shqipëri, PD, LSI dhe së fundmi PS, kanë kontrata me kompanitë lobiste përkatëse në Shtetet e Bashkuara të Amerikës.

Newsbomb.al ka mësuar se Partia Socialiste ka nënshkruar së fundmi kontratë me firmën Ballard Partners, që njihet për lidhjet me presidentin Donald Trump.

Kontrata me firmën me bazë në Florida është për “udhëzim, këshillim dhe ndihmë për diplomacinë e jashtme në komunikimin me zyrtarët e qeverisë amerikane”, që lidhet me rritjen e marrëdhënieve dypalëshe të Shqipërisë me Shtetet e Bashkuara.

Kontrata e Partisë Socialiste me firmën e njohur lobuese amerikane vjen në një kohë kur Shqipëria është në një krizë të thellë politike, ndërkohë që raundi i parë i votimit të presidentit të ri mbahet këtë javë. Nga ana tjetër partitë opozitare refuzojnë të kthehen në parlament dhe kanë deklaruar se do të bojkotojnë zgjedhjet.

Detaje lidhur me kohëzgjatjen e kontratës mes PD dhe Ballard Partners, apo sesa e PD e paguan firmën nuk janë bërë të ditura.

Brian Ballard, themeluesi i firmës, ka lobuar për Organizatën Trump dhe ka shërbyer si kryetar i financave në Florida gjatë fushatës së Trump. Ai më pas shërbeu si zyrtar lartë për mbledhjen e fondeve për të ndihmuar në mabjtjen e inagurimit presidentit të zgjedhur, transmeton Newsbomb.al.

Kreu i PD-së, Lulzim Basha, gjatë vizitës së tij në SHBA, më 22 mars nënshkroi kontratë tre mujore me firmën lobuese “Stonington Strategies,” të cilën e paguan 25 mijë dollarë në muaj.

Poashtu Lëvizja Socialiste për Integrim ka nënshkruar një kontratë gjashtë mujore me firmën McKeon Group. Kontrata e LSI është nënshkruar në janar dhe përfundon në korrik. /Newsbomb.al

Kryeministri Edi Rama i ka dhënë mesazh të prerë PD-së, teksa ka folur për zgjedhjet vendore në Kavajë. Nga emisioni DritaremeRudinën, në Vizion Plus, Rama paralajmëroi se ky qytet nuk do të bëhet sheshi ku PD do të rrëzojë shtetin.

Rama tha se në 7 maj, nuk do të ndodhë asgjë, përveçse se zgjedhje. Sipas tij PD, duhet të heqë dorë nga këto provokime, pasi i ka shumë borxhe këtij qyteti.

“Kavaja nuk do të bëhet sheshi ku PD do të bëjë përsheshin e ’97 dhe as sheshi ku do të rrëzojë shtetin që ne po ndërtojmë. Dhe as shteti ku PD do të pengojë qytetarët e një qyteti, të cilit PD i ka borxhe shumë të mëdha dhe që duhet t’ia kursejë këto provokime dhe duhet t’ia kursejë këto lloj shfaqjesh të cilat trembin dhe fusin ankthin tek njerëzit e zakonshëm. E kam thënë dhe përsëris, ky vend ka zot dhe zot është populli sovran. Nuk mund të bëjë askush lodra me popullin dhe mbi të gjitha ne nuk do të lejojmë kurrë që Shqipëria të kthehet mbrapa dhe që ky vend të destabilizohet, vetëm se disa në PD janë të tmerruar nga Vettingu dhe nga reforma në drejtësi. Nëse kanë arsyet e tyre të tmerrohen le të gjejnë një mënyrë tjetër, por nuk mund të marrin peng popullin që të mos shkojnë para drejtësisë. Do të shikoni se në Kavajë nuk do të ndodhë asgjë dhe do të ndodhin zgjedhje”, tha kryeministri, transmeton dritare.net.

PD ka njoftuar se do të mbajë një protestë masive në Kavajë më 7 maj, për të pamundësuar zhvillimin e zgjedhjeve.

Nga ana tjetër, PS ka zyrtarizuar kandidatin e saj për Kavajën, Klodian Shehi, i cili është aktualisht nënkryetar i kësaj bashkie.

Analisti Andi Bushati shkruan sot se rruga që po ndjek opozita për tiu përgjigjur zërave që vijnë nga Perëndimi nuk është ajo e duhura.

Në një shkrim të botuar në lapsi.al, Bushati thotë se opozita tani është e rrethuar dhe në dukje Basha nuk ka rrugëdalje.

“Në këtë betejë propogande ajo ka zgjedhur rrugën më të gabuar për të qenë bindëse. Kur flasin ambasadorët gjithmonë del dikush që thotë se ata punojnë për Ramën. Kur flasin kancelaritë perendimore, ngrihet Lulzim Basha dhe pretendon se ato janë influencuar nga lobistët që ushqehen me paratë e kanabisit. Madje edhe kur numri dy i qeverisë gjermane, Ministri i jashtëm i Gabriel, zbarkon në Tiranë për të folur troç, shpërndahen zëra se ai nuk qenkesh i partisë së Merkelit, por një i majtë social demokrat më afër Ramës dhe Metës”, shkruan Bushati.

Sipas tij “Faktet duhen pranuar ashtu sikurse janë dhe PD-ja nëse do të ketë sukses, duhet të zgjedhë një rrugë tjetër. Jo mohimin e tyre, por përballjen me to. Lulzim Basha dhe njerëzit e tij nuk mund të sillen sot sikur nuk janë të rethuar, por duhet të tregojnë se si kanë ndërmend ta çajnë këtë rrethim. Pra, kur shefi i diplomacisë gjermane zbarkon në Tiranë, dënon ashpër bojkotin, i bën thirrje pakicës që të pranojë shumicën, bën apel që politikanët të shkojnë në zgjedhje dhe aty t’i shpalosin obsionet dhe kritikat e tyre, këto mendime nuk mund të anashkalohen. Përkundrazi mbi ato duhet debatuar”.

Bushati thotë se opozita duhet të përballet me faktet, të pranojë për momentin që nuk e ka mbështetjen e ndërkombëtarëve dhe të thotë se ajo po lufton për të larguar një sozi të Gruevskit.

“Në vendin që drejton Edi Rama, ku mediat i ka kullufitur, ku oligarkët që po i nginj me kulla financojnë drejtëpërdrejtë atë, ku kriminelët janë në paradhomë të politikës dhe ku partia në pushtet është partia e klientëve të kryeministrit, duket qartë që zemra nuk mund të punojë normalisht pa u furnizuar me gjak. Prandaj, vetëm zgjedhjet nuk janë zgjidhje. Por për të treguar të gjithë këtë histori duhet një rrugë e gjatë. Duhen së pari argumenta, pastaj rrezistencë dhe forcë. Këto janë sfidat reale të Bashës dhe PD-së sot. Synimi i tyre duhet të jetë t’i tregojnë perëndimit se këtu po krijohet një model tjetër Gruevski.  Ndoshta më i sofistikuar në propogandë, por po aq i rrezikshëm në zhdukjen e lirive dhe hapsirave demokratike. Por, kjo rrugë e vështirë, e cila mban mbi vete edhe riskun e një hara-kiri, që mund të hajë edhe kokën e Bashës, është rrugë me një kalim. Ajo e detyron opozitën të përballet me faktet. Ti pranojë publikut dhe vetes se ajo aktualisht nuk ka përkrahjen perendimore. Por se ajo po lufton, po përpiqet, madje është e gatshme edhe të sakrifikojë për të treguar se në Tiranë po skicohet një sozi vetëm estetikisht e ndryshme me satrapin maqdon. T’i bindë se pikërisht për këtë, këtu vlejnë më shumë recetat e Shkupit sesa ato të vendeve normale”, vijon më tej Bushati.

TIRANE– Kryetari i Partisë Demokratike Lulzim Basha deklaroi sot se opozita do të heqë dorë nga bojkoti kur kryeministri Edi Rama të kthejë sërish në Kuvend paktin që ka shkelur, duke votuar kështu dhe 6 ligjet për reformën në drejtësi.

Pas takimit me ministrin e Jashtëm gjerman Sigmark Gabriel, i cili i bëri thirrje opozitës të rikthehet në Kuvend, Basha tha se ky do të jetë kushti i vetëm. Ndër të tjera ai tha se vettingu do të bëhet sipas ligjit dhe Kushtetutës.

“Shqipëria është bërë shpërndarësi kryesor i drogave. Injorimi i tonelatave të drogës është ndëshkim për Shqipërinë, është inkurajim për të dëmtuar vendin. Ne bëjmë gjithë këtë lëvizje për fatin e Shqipërisë, për vlerat europiane. Diskutuam për reformën në drejtësi dhe çmontova gënjeshtrën e Rasmës se ne nuk duam vettingun. I thash se ne e duam vettingun siç e votuam në korrik. Vettingu nuk do bëhet siç do Rama, apo Nëna Terezë, por siç e do ligji. Pata rastin ta çmontojë gënjeshtrën e Ramës dhe kjo me gënjeshtra, PD do të kthehet për të votuar 6 ligjet kur Rama të c’thyejë paktin. Ne do t’i votojmë të 6 ligjet kur marrëveshja e shkelur të rikthehet dhe këto ligje të mbrojnë qytetarët ”, nënvizoi lideri i PD-së.

Nga ana tjetër ai i qëndroi strikt vendimin të tij se opozita nuk do të marrë pjesë në zgjedhje nëse nuk krijohet qeveria teknike dhe nuk sigurohen standarde. “Ky është një vendim që e kanë marrë shqiptarët. Zgjedhje pa qeveri teknike, pa luftuar drogën dhe pa reformë zgjedhore, zgjedhje fasadë të dituara nga krimi, në Shqipëri nuk ka për të pasur, pasi do sillnin situatë eksplozive në Shqipëri”, tha ai.

TIRANE– Ministri i Jashtëm gjerman, Sigmar Gabriel, ka përcjellë mesazhe të forta ditën e sotme për opozitën dhe politikën shqiptare në tërësi. Gjatë një konference të përbashkët me homologun shqiptar Ditmir Bushati, i dërguari i Merkel është shprehur kundër bojkotit të opozitës.
Gabriel thotë se opozita duhet t’i bashkohet Kuvendit për të vijuar me reformën në drejtësi, ndërsa shton se pjesëmarrja në zgjedhje është për të mirën e Shqipërisë dhe shqiptarëve.

Në të kundërt, sipas tij rrezikohet e ardhmja e shqiptarëve dhe integrimi i vendit në BE.

“Nëse Parlamenti vijon të bllokohet dhe po kështu reforma në drejtësi, atëherë rruga drejt BE po të vështirësohet, dhe edhe jeta e qytetarëve shqiptarë do të bëhet me i vështirë. Interesi kombëtar i një opozite nuk duhet të jetë kaosi i vendit. Kreu i opozitës mund të bëjë propozimet e tij për zgjedhje të lira e të ndershme. Por bojkoti nuk është zgjidhje”, tha ministri gjerman.

Sakaq, ministri i Jashtëm shqiptar, duke u ndalur tek reforma në drejtësi, tha se ajo u votua me unanimitet nga të gjitha palët politike. Për Bushatin, realizimi i zgjedhjeve të lira e të ndershme sipas rekomandimeve të OSBE/ODIHR është jo vetëm një kusht për integrimin e vendit, por edhe një çështje me rëndësi për vetë shqiptarët.

“Më 21 korrik të vitit ët kaluar të gjithë aktorët politikë përfshi PD kemi votuar në Parlament paketën e ndryshmeve kushtetuese me unanimitet të plotë. Kjo paketë i ka hapur rrugë reformimit të drejtësisë shqiptare, ngritjes së institucioneve të reja, përmirësimit të institucioneve ekzistuesve, verifikimit të gjyqtarëve dhe prokurorëve, dhe krijimit të një prokurorie të posaçme për të gjurmuar rastet e korrupsion mes zyrtarëve të lartë. Investimi që kanë bërë ndërkombëtarët për këtë proces të rëndësishëm, është momenti që ne ta vlerësojmë dhe t’ua shpërblejmë. Reforma në drejtësi ka një rol kyç edhe për reformat e tjera, dhe për çështjet e sigurisë në një rajon që sot për fat të keq ndihet më i trazuar.

Për zgjedhjet e 18 qershorit përsëris qëndrimin e kryeministrit Rama, se ne jemi të gatshëm të zbatojmë rekomandimet e OSBE/ODIHR për të krijuar një infrastrukturë zgjedhore sa më të besueshëm që do të mundësonte mbajtjen e zgjedhjeve të lira e të ndershme”, tha ministri Bushati.

Massafra: Dy familje falin gjakun. Shembull politikës që të dialogojnë

E ndërsa dy familja falën gjakun mes tyre, në hasmëri prej vitesh, Kreu i Konferencës Ipeshkvnore Shqiptare Imzot Angelo Massafra i kërkoi politkanëve shqiptarë se shembujt e pajtimit dhe dialogut i gjejnë mes popullit të tyre. Ai i kërkoi politikë të marrë nga Pashka dritën e munguar për të gjetur gjuhën e bashkëpunimit.

Dy familje në hasmëri prej vitesh mes njëra tjetrës zgjodhën meshën e të dielës së Pashkëve për të falur gjakun dhe përqafuar pajtimin. Nisur prej kësaj situate, Kreu i Konferencës Ipeshkvnore Shqiptare imzot Angelo Massafra, nuk mundi ta shmangë shqetësimin që buron prej politikës duke iu kujtuar se shembujt e pajtimi ata i gjejnë mes popullit të tyre. Ai kërkoi që edhe politika shqiptare nga Pashka të marrë dritën e munguar, për të gjetur gjuhën e dialogut që sjell bashkëpunimin.

Imzot Angelo Massafra, kreu i Konferences Ipeshkvnore: Pajtimi është një gjë e mundshme, sepse ata që janë vrarë nuk kthehen, janë te zoti. Për Krishtin e kryqëzuar njeriu ka thënë unë fal. Shpresoj që politikanët tanë të bëjnë si këto dy fise, duke respektuar vlerat, duke pajtuar, duke gjetur gjuhën e konsensusit. Dialogu bëhet bashkë dhe bëhet me marrëveshje pajtimi, pajtimi bëhet për të mirën e kombit tonë.

Pashka simbolizon triumfin e jetës mbi vdekjen, prandaj e mira del gjithmonë fitimtare mbylli fjalën e tij arqipeshkevi i Shkodrës.

Drama politike e Edi Ramës tashmë ka hyrë në aktin e fundit të saj.

Me antimitingun e organizuar në ditën e 55 të Protestës së Opozitës dëshmoj publikisht dhe para faktorit ndërkombëtar se çfarë mund të bëjnë despotët për të mbajtur pushtetin. Me përpjekjen për të përtërirë një ujdi të re politike me Metën dhe LSI-në në prag të Pashkëve, ai demonstroj se sëbashku me ortakun e tij të krimit dhe korrupsionit është i gatshëm të bëjë krejtësisht të kundërten e rrugëtimit të popullit hebre në ditën e shenjtë të Pashkëve.

Moisiu 3.000 vjet më parë e nxori popullin e tij nga skllavëria dhe tirania e faraonit dhe i priu drejt Tokës së Premtuar.

Binomi Rama-Meta ju bëjnë thirrje shqiptarëve të lirë t’i ndjekin me bindje e përulje për t’i skllavëruar edhe katër vjet të tjerë si punëtorë me mëditje në plantacionet e tyre të drogës dhe Kullën e Babelit që po ngrejnë së fundmi në ortakëri dhe për interes të mafjes ndërkombëtare të pastrimit të parave të familjeve të tyre dhe dishepullit të Sorosit, Erjon Velija.

Katër vjet më parë Rama ju drejtua Opozitës:Ju po largoheni nga Parlamenti me pretekstin se ne paskemi ushtruar dhunë?

S’keni parë asgjë akoma!

Ashtu si Kasandra e Trojës së lashtë ai e paralajmëroj katastrofën që do t’i shkaktonte Shqipërisë.

Opozita dhe shqiptarët kanë parë vërtetë shumë në këto katër vjet të qeverisjes tuaj!

Ata nuk do ta harrojnë kurrë atë që i bëtë Shqipërisë duke e kthyer në vendin kryesor të Europës që eksporton në Perëndimin që duam të shkojmë vetēm drogë e refugjatë duke u renditur të dytët pas Sirisë së diktatorit Asad.

Ju e keni shpallur Opozitën armike pikërisht pēr faktin se ajo ēshtē pengesa e pakapērcyeshme në rrugën tuaj për ta kthyer Shqipërinë në vitin e largët dhe tē mbrapshtë ‘45 ku diktatori Hoxha i dërgonte njerëzit nën forcën e bajonetave në qendrat e votimit.

Hoxha, ashtu si ju, pasi kishte bërë një propagandë shurdhuese duke e cilësuar vetëm organizatën e frontit si patriote e progresiste dhe kundërshtarët e saj nacionalistë e antikomunistë si heretikë dhe armiqë të Shqipërisë ju la votuesve vetëm një alternativë: Të hidhnin kokrrën në kutinë teneqe të frontit ose të përfundonin nē burg dhe familjet e tyre të internoheshin.

Ëndrra juaj për pushkatimin politik tē Opozitës dhe eliminimin e kreut të saj z. Basha nuk do të ndodhë kurrë z Rama.

Diktatori Hoxha, megjithëse ishte despoti më i madh i Europës, nuk guxoj të hynte në zgjedhje pa Opozitën.

Kurse ju sot jo vetëm e ndërmorët një hap të tillë fatal, por përpiqeni të emroni Opozitën fasadë. Në jubileun e 100 vjetorit të Revolucionit Bolshevik, i cili nē 70 vjet shkaktoj 100 miljonë viktima, guxoni t’i riktheni zonjës sē zezē të diktatorit vilën ku ka jetuar dhe sunduar Drakula shqiptar, Enver Hoxha.

Ai ka pushkatuar deputetët e Opozitës, ka pushkatuar 5.700 burra dhe gra të këtij vendi, ka burgosur, internuar dhe skllavëruar nëpër gulagēt e ndërtuar në të katër anët e vendit një të katērtën e popullsisë.

Në “kualicionin” tuaj, me të cilin ju ëndërroni të qeverisni edhe një mandat të dytë, keni jo rastësisht katër parti komuniste.

Etja juaj e shfrenuar për të kapur shtetin e për të kontrolluar të gjitha institucionet e tij na kujton parullën e Leninit dhe të Trockit: Të gjithë pushtetin sovjetëve.

Ju jeni në një mëdyshje të madhe.

I urryer dhe i papranuar nga shqiptarët që u shkaktuat kaq dhimbje e fatkeqsi, i çoroditur në politikën e jashtme jeni krejtësisht i papranueshëm për Europën Perëndimore dhe nuk mund të ndërtoni një shtet sipas modelit të saj.

Ju ëndrroni të ndërtoni Republikën e Sovjetëve apo Rajhun e Tretë sipas modelit nacional-socialist-Hitlerian.

Kjo ëndërr e çmendur është varrosur njëherë e përgjithmonë me shpërbërjen e Perandorisë së Kuqe dhe shembjen e Murit tē Berlinit.

Shkoni drejt zgjidhjes tuaj sëbashku me Metën, me aleatët tuaj komunistë dhe me ata që ju frymëzojnë për të futur ashtu si Odiseu me Kalin e Trojës aventurierë të të gjitha llojeve se mbase do të arrish të shkatërrosh shtëpinë e socialistëve, por edhe për këtë veprim kriminal do të mbani përgjegjësi historike.

Ju mund ta shkatërroni partinë, në të cilën hyjtë nga dritarja, por kurrë Partinë Demokratike, Opozitën rreth saj, dhe shtëpinë tonē tē përbashkët: Shqipërinë.

Jubileu i 100-vjetorit të Revolucionit të zi të Tetorit, në vigjilje të të cilit ju rehabilitoni simbolet e diktaturës dhe bijtë e tyre, e bën të shenjtë dhe madhështore Kauzën e Opozitës dhe betejën e saj të gjatë dhe të vendosur për t’i kthyer pushtetin atij që i takon: Popullit sovran dhe të lirë, për të zgjedhur me vullnetin e tij, me votë tē lirē dhë të ndershme Parlamentin dhe qeverinë, e cila do të jetē shërbëtorja e tyre.

Me Republikën e Re që po lind nga Tenda e Lirisë ju vërtet nuk do të jeni ma sundimtarë, por njē qytetarë krejt i lirë dhe jam i bindur se kështu do të ndiheni ma mirë duke lanë pas si një ëndërr të keqe kohën kur ju e qeverisët vendin tuaj nē një mënyrë të papërgjegjshmë si askush tjetër në historinë e shtetit shqiptar.

Ju e takuat senatorin amerikan Xhon Mekejn dhe u shprehët se kaluat dy orë të paharrueshme.

Vetëm ju mund ta dini se si jeni ndjerë përballë atij burri të shquar,
kombi i të cilit ka patur në krye të vendit korifej të tillë si Washingtonin, Xhafersonin, Franklinin, Abraham Linkolnin, Xhon Kenedin dhe Reganin.

Nuk e di nëse i kërkuat ndjesë për fyerjet ndaj Presidentit Trump, fitoren e të cilit e cilësuat “fatkeqsi për njerëzimin”!.

Nëse, ne, Opozita e Bashkuar dhe Populli Shqiptar nuk do t’ju themi troç atë shprehjen e famshme shqiptare: -ndalu beg se ka hendek, nuk është fare çudi që ju pas një viti, ashtu si miqtë tuaj Vuçiç dhe Erdogan, ta çonit prapë Shqipërinë në kthetrat e përgjakura të Lindjes ku ajo vuajti pēr 6 shekuj.

Ne jemi këtu për të thënë solemnisht: Dorëzohu pa kushte, ashtu siç i thanë liderët e Botës së Lirë, Hitlerit, Sadamit dhe Millosheviçit.

Rama ik.

Tashmë jeni kthyer në një kufomë politike.

Bastija juaj e krimit ka rënë.

Rajshtagu juaj (parlamenti i krimit) po bié

Qeverinë Teknike, me bazë të gjërë politike, me mandat kushtetues për të garantuar Votën e Lirë nuk e shmang dot.

Republika e Re po lind…

Ministria e Energjisë dhe Industrisë do te nxjerrë thirrjen për 3 blloqe në Detin Adriatik, të cilat më parë administroheshin nga kompania Emanuelle Energy dhe dy të tjera në rajonin e Vlorës : Gorisht – Kocul dhe Cakran – Mollaj.

Një laborator droge modern është zbuluar ditën e djeshme nga Policia e Fierit, ku në lidhje me këtë ngjarje janë arrestuar 10 persona.

Asambleja Parlamentare e Këshillit të Europës ka refuzuar për herë të dytë tre kandidaturat e paraqitura nga Qeveria shqiptare për gjykatën europiane të njeriut në Strasburg.

Pasi janë intervistuar nga komisioni me datën 6 prill të tre kandidatët e propozuar nga qeveria shqiptare, Aurela Anastasit, Sokol Berberit dhe Aleksandër Muskajt, ata janë refuzuar.

Në argumentin e paraqitur nga asambleja thuhet se këta tre emra nuk janë mjaftueshëm të kualifikuar për të zëvendësuar gjyqtarin shqiptar në Gjykatën e të Drejtave të Njeriut, Ledi Bianku.

Kjo është hera e dytë brenda disa muajve që Këshilli i Europës i kthen mbrapsht qeverisë shqiptarë e propozimet e saj për në Strasburg, ndërsa i kërkon sërish të paraqesë një listë të re kandidatësh.

Por emri i Sokol Berberit refuzohet për herë të dytë, pasi edhe në refuzimin e parë të këtij emri nga asambleja por edhe të ish kryeprokurores Ina Rama dhe të konstitucionlistit Gent Ibrahimi as nuk janë marrë farë në intervistë nga komiteti duke i refuzuar ata në bllok.

Arsyeja e refuzimit herën e parë nuk kishte lidhje me aftësitë e tyre por me procedurat e ndjekura nga qeveria shqiptare ne përzgjedhjen e tyre.

Në këto kushte qeveria shqiptare duhet të rinisë procedurën e saj për përzgjedhjen e kandidaturave që do ti dërgojë asamblesë për zëvendësimin e Ledi Bjankut në gjykatën e Strasburgut të cilit prej disa muajsh tashmë i ka përfunduar mandati.

Është miratuar ditën e sotme në Kuvend projektvendimi i qeverisë, që i hap rrugë ndërtimit të kullës më të lartë në Tiranë.

VOAL – Refuzohen sërish kandidaturat e Shqipërisë për në Gjykatën e Strasburgut.

Komisioni i GJEDNJ i intervistoi tre kandidatët e dërguar nga Shqipëria më 6 prill 2017 dhe i refuzoi të tre, duke kërkuar kandidatura të reja nga Shqipëria për në Gjykatën e Strasburgut.

Tre kandidatët e rrëzuar janë A. Muska, A. Anastasi dhe S. Berberi.

“Kandidaturat nuk janë mjaft mirë të kualifikuara,” thuhet në përgjigjen e Komisionit të Posaçëm.

Në Shqipëri parlamenti mblidhet sot në një seancë të veçantë për të votuar anëtarët e Komisionit të posaçëm i cili do të duhet të bëjë përzgjedhjen e anëtarëve të strukturave për rivlerësimin e gjyqtarëve dhe prokurorëve.

Në seancë pritet të miratohen vetëm emrat e anëtarëve të shumicës, dy nga Partia socialiste dhe një nga Lëvizja socialiste për Integrim. Tre anëtarët e tjerë i përkasin opozitës, e cila prej disa javësh ka bojkotur parlamentin, paralelisht me protestën për të kërkuar një qeveri teknike që të garantojë zgjedhje të lira e të ndershme më 18 qershor.

Për pasojë, funksionimi i Komisionit të posaçëm bëhet i pamundur, dhe i gjithë procesi i rivlerësimit mbetet i bllokuar. Pa ecur më tej me këtë fazë, edhe zbatimi i mëtejshëm i Reformës në Drejtësi kalon në ngërç, pasi nuk mund të ngrihen as institucionet e reja të parashikuara prej saj. Ligji për rivlerësimin e gjykatësve dhe prokurorëve ka qenë ndër më të debatuarit.

Ai u kundërshtua me forcë nga opozita e cila bëri ankimim edhe në Gjykatën kushtetuese. Çështja shkoi në Komisionin e Venecias, i cili solli një vlerësim pozitiv, e më pas dhe Gjykata Kushtetuese rrëzoi pretendimet e opozitës.

Në foto: Azgan Haklaj duke folur në mikrofon tek Shtëpia e Lirisë, tek Çadra e Protestës.

Zhan Zhak Rusoi, filozofi dhe iluministi i madh francez i ka lanë si testament njerëzimit veprën e vet monumentale “Kontratën Sociale”, ku shpjegon qartë se shteti është një kontratë sociale, juridike, morale e shoqërore mes qytetarëve të lirë dhe atyre që i qeverisin. Të drejtat hyjnore natyrale të njeriut: liria, siguria e jetës, e pronës dhe barazia para ligjit janë të panegociueshme e të padhunueshme, na mëson filozofi i madh.

E bëra këtë hyrje për faktin e thjeshtë e të hidhur se Rama megjithë dekoratën e “Legjionit të Nderit” (dekoratë, thjesht politike) që ia dha para disa ditësh Presidenti i Francës nuk ka mësuar asgjë nga Franca, Tempulli i Lirisë e Simbol i Republikës, sepse në të kundërt ai duhet të mendonte: A mund të jem Legjionar i Francës unë, kryeministri i Shqipërisë, kur mijëra qytetarë, protestojnë para zyrës time ditë-natë, protestojnë para godinës së mbuluar me ferexhe, para qeverisë maskë dhe kërkojnē dorëheqjen time për shkak se kam shkelur kontratën sociale me popullin tim.

Dua të bëj një vepër për Atdheun tim pastaj le të vdes, të bëhem Kurban, thoshte shkrimtari, publicisti, politikani brilant, Viktor Hygo.Po ju a e keni bërë këtë z. Rama, që keni pranuar të dekoroheni?! Sigurisht vepra juaj ēshtē e shëmtuar, publikisht keni deklaruar se Opozita është e lirë të varë vehten. Pra, ju, kërkoni asgjësimin fizik të Opozitës njëres shtyllë të demokracisë.

Edi Rama, sëbashku me ortakun e tij – Ilir Meta, vrasës dhe persekutorë të Opozitës, mendojnë se mund të qeverisin Shqipërinë si konsuj të Romës së lashtë!

Është e pamundur të analizosh në një shkrim të vetëm “bëmat e Ramës”, për këtë duhen analiza e libra shumë voluminozē.

Nuk më ka habit aspak fakti se ky Don Kishot i politikēs është përpjekur të luaj me Kartën e Nacionalizmit, por këtë mantel e zhveshi dhe doli si dikur lakuriq në Francë.

Pasi e bëri vëlla Erdoganin, kërcënoj se do ta privatizojë Akropolin e Athinës dhe i tregoj vendin në Beograd mikut të tij Vuçiç, duke u mburrur për këtë, por nuk pati guximin e burrërinë të fliste dy fjalë për shqiptarin e madh, emblemën e patriotizmit të qëndresës e njëherësh të nacionalizmit modern shqiptar, z. Ramush Haradinaj, i cili mbahet peng në Francë për t’i bërē qejfin mikut të tij Vuçiç, politikanëve në Kosovë tē lidhur me Beogradin.

Kur z. Rama u dekorua m’u rikujtua njē sentencë e Perandorit të Francës, Napoleon Bonaparti, që pata cituar tek një shkrim për Kalorësin e Lirisë, Ramush Haradinaj: Dekorata më e madhe që merr njeriu në jetë është një plagë në shërbim të Atdheut. Ramush Haradinaj e ka tejkaluar këtë sentence, sepse ka disa plagë në trup dhe se ka vënë kurban në themelet e Kosovës vëllezërit e tij: Luanin, Shkëlzenin, Enverin. Ramush Haradinaj shkoj dy herë në Hagë si dorëzan i Kosovës. Pas një beteje të gjatë gati një dekadë u kthye triumfues duke e çertifikuar kauzën e shenjtë të UÇK-së, luftën e saj për çlirimin e Kosovës.

Simbolikat e Ramës janē aq naive sa janë edhe zhgarravinat e tij , pikturat me tē cilat shetit nëpër Evropë ashtu si serbët me eshtrat e Car Llazarit. Këtë e ban me paratë tona, sigurisht, në një kohë kur shtëpia ku lindi Homeri Shqiptar, Gjergj Fishta, akademiku gjenial i kulturës, patriotizmit, konstruktori i Shqipërisē Evropiane është shembur për dhé.

Edi Rama proklamon atë të cilës nuk i beson as vetë ai: Unë jam kryeministēr i Rilindjes, arkitekt i shtetit të ri dhe vizionar i madh Evropian. Sa për opozitën që ka mbi 50 ditë, mbi 1.200 orë, që proteston në Shtëpinë e Lirisë, me qytetari, me kurajo të pashoqe e që i thotë në protestēn më e madhe në historinē shqiptare: “Ik”!, ai nuk don të ja dijë.

Por nē ditën e 50-të të kësaj Proteste, Lideri i Opozitës së Bashkuar, arkitekti i Republikës së Re, z. Lulzim Basha, i tha qartē: Tiranitë që nuk dorëzohen përmbysen. Nuk do të ketë zgjedhje farsë me Ty, as Qeveri fasadë për të shpëtuar klanin tand kleptokratik.

Rama ka ëndērruar se “protestuesit mjeranë” apo “çadristë të ngujuar”, siç i quan ai, t’i vinin flakën Kryeministrisë, institucioneve e mbarë Shqipërisë për t’i treguar botës se PD dhe Opozita, të cilën ai e përbuzë me neveri dhe e ka shpallur “të keqen e madhe të këtij vendi”, protestuesit i cilëson se “janë tribalë, vandalē, janë talebanët e Evropës” dhe vetëvehten e tij “shpëtimtari i qytetrimit Evropian”(!)….

Tomas Hobs ka një maksimë: E Drejta Morale është burim i të gjitha të drejtave. Ju keni humbur të drejtën morale z. Rama, sepse keni dhunuar Kontratën Sociale me popullin tend, ndaj Opozita e Bashkuar, shqiptarët, do të të flakin të bindur thellēsisht se nuk vlen për Kryeministër dhe as për kurban.

Midis qindra e mijëra protestuesve tē varfëruar e tē poshtëruar nga Rama, mes njerëzve që ai dhe sekserët e tij u zhvatën pronat dhe u rrafshuan shtëpitë, mes qindra biznesmenëve që qeveria u falimentoj bizneset e sipërmarrjet vetëm se ishin mbështetës të PD-së, mes qindra të rinjëve dhe të rejave që u shkatërroj ëndrrën ka padyshim koka të nxehta, të cilët duan ta bajnë kurban z Rama. Edhe vetë z. Rama, ndoshta ëndërron të bëhet kurban e të muroset në Sheshin “Skënderbej” dhe, ashtu si prifti shovinist Sebastianos që u varros në Konicë, të mbetet në histori.

Ai nuk do të ketë kurrë këtë fat për tē qënē kurban i Republikēs së Re dhe i Shqipërisē sē Nesërme Evropiane. Legjenda e Rozafës nuk mund tē përseritet. Kurbani është simbol i shenjtë për Njerëzimin.

Kur Profeti Abraham doli në Kodrat e Sinait dhe në shenjë besnikërie ndaj Zotit deshti të bante kurban djalin e tij, Krijuesi i Gjithësisë e zbriti nga Qielli një dash e i tha Profetit: T’i tregove besnikërinë ndaj Meje, por nuk dua kurbanë njerëzish.
Kurbani, z. Rama, duhet të jetë i shëndetshëm, pa sëmundje, i pastër dhe i taksur për t’u sakrifikuar në Ditën e Shenjtë.

Fati i shqiptarëve ështē në duart e tyre

Ju nuk vleni as për Kryeministër, as për Kurban.

Ikni, ikni, ikni, që tē mos gjykoheni…

Filozofi i lashtë Konfuci na ka lanë një fjalë të urtë: Diellit që perëndon e burrit që bié i mbyllet dera. Ju keni rënë z. Rama e shqiptarët njëzëri, solemnisht, do t’ua mbyllin derën.

Tiranë, 9 prill 2017

Këshilli i Europës dhe Bashkimi Europian, në bashkëpunim me ministrinë e arsimit, publikuan sot studimin e parë kombëtar mbi bullizmin dhe ekstremizmin në shkollat e Shqipërisë.

Studiuesit shqiptarë dhe europianë intervistuan disa mijëra nxënës, mësues dhe prindër në 141 shkolla publike e private në të gjithë qarqet e vendit për të matur shpeshtësinë e kësaj dukurie dhe tiparet e saj në realitetin shqiptar.

Studimi zbuloi që 1 në 5 nxënës nga klasa 4 deri në klasën e 12 pohuan se janë prekur nga dukuria e bullizmit në shkollë. Afro gjysma e të prekurve vuajnë nga bullizmi psikologjik, rreth 35 për qind nga ai verbal dhe dhe pjesa tjetër nga bullizmi fizik.

Pjesa më e madhe e nxënësve të prekur nga bullizmi janë djemtë.

Po ashtu 1 në 5 nxënës dhe 1 në 8 mësues përdorin terma ekstremiste dhe gjuhën e urrejtjes.

Bullizmi është më shumë i pranishëm në klasat e 5 dhe të 11 dhe vendi ku ndodhin më shumë sjellje të tilla është klasa, kur mungon mësuesja 40 për qind, oborri i shkollës 40 për qind, madje rreth 20 për qind edhe në prani të mësuesve.

Mësuesit e anketuar mendojnë se nxënësit bien pre e bullizmit mbi 70 për qind prej pamjes së jashtme, mbipesha, të dytët nxënësit me vështirësi në të folur dhe të tretërt janë ata që janë më të dobët se sa të tjerët.

Gjysma e mësuesve të marrë në studim pohuan se nuk ekziston një politikë specifike kundër bullizmit në shkolla dhe pjesa dërrmuese e tyre mbi 70 për qind e tyre nuk kanë marrë ndonjë trajnim se si të sillen me këtë dukuri.