Presidenti i SHBA, Donald Trump sulmoi sot besueshmërinë e aktores së filmave për të rritur, Stormy Daniels.

Zonja Daniels po qarkullon një skicë të një personi që ajo thotë se e kërcënoi, duke i kërkuar që të mos fliste për marrëdhënien e dyshuar seksuale me zotin Trump.

Në një koment në Twitter, Presidenti Trump e quajti skicën “një trillim” për një njeri që nuk ekziston.

Avokati i zonjës Daniels, Michael Avenatti, ka ofruar një shpërblim prej 131,000 dollarësh për informacione që mund të çonin në identifikimin e personit.

Sipas zonjës Daniels, personi në skicë i ishte afruar në një parkim të Las Vegasit dhe e kishte kërcënuar. Ajo thotë se në vitin 2006 kishte patur një takim intim me zotin Trump.

Avokati i Presidentit Trump, Michael Cohen, i pagoi zonjës Daniels 130 mijë dollarë për të mos folur, nga frika se kjo çështje mund të dëmtonte shanset e zotit Trump për të fituar zgjedhjet e vitit 2016.

Disa ekspertë ligjorë thonë se pagesa mund të interpretohet si një kontribut i paligjshëm i fushatës së zotit Trump.

Presidenti Trump mohon të ketë patur dijeni për mpagesën. Ai gjithashtu ka mohuar se ka patur marrëdhënie me zonjën Daniels.

U nda nga jeta në moshën 92-vjeçare Barbara Bush, bashkëshortja e një presidenti amerikan dhe nëna e një tjetri.

Njoftimin e dha zyra e bashkëshortit të saj, ish presidentit George H.W. Bush, pa bërë të ditur shkakun e vdekjes.

Ish zonja e parë ishte mjaft e sëmurë kohët e fundit dhe kishte hequr dorë nga trajtimi i mëtejshëm mjekësor. Sipas njoftimeve, ajo vuante nga zemra dhe një sëmundje kronike pulmonare.​

Barbara Pierce Bush ishte zonja e parë e Shteteve të Bashkuara në fillim të viteve 1990 kur bashkëshorti i saj ishte presidenti i 41-të i vendit. Ajo më pas u bë nëna e një presidenti, kur një nga gjashtë fëmijët e saj, George W. Bush, u zgjodh në vitin 2000.

“Kam pasur probleme kur isha e martuar me presidentin. Dhe tani tek shoh të njëjtën fytyrë që dikur e shëtisja me makinë për ta çuar nëpër ndeshje sportive dhe i bërtisja të pastronte dhomën, pra kur e shoh president, kjo është vërtet e mahnitshme,” ishte shprehur ajo.

Zonja Bush njihej për besnikërinë e saj të pashtershme.

“Nuk më pëlqente kur dikush kritikonte burrin tim të shkëlqyer dhe inatosesha kur më kritikonin djalin,” thoshte ajo.

Shpesh e cilësuar si e përulur, trashëgimia e saj më e madhe është avancimi i arsimimit, thotë profesorja e historisë në Universitetin e Hjustonit, Nancy Beck Young.

“Ajo argumentoi rëndësinë e leximit dhe të shkrimit dhe që secilit t’i jepen këto mundësi. Ajo argumentoi në shumë raste në Shtëpinë e Bardhë se aftësia për të lexuar dhe shkruar përcakton suksesin e çdo individi në shoqëri.”

Fondacioni Barbara Bush për Arsimimin Familjar që ajo themeloi tre dekada më parë ka grumbulluar më shumë se 110 milionë dollarë për të krijuar dhe zgjeruar programe arsimore në mbarë Shtetet e Bashkuara. Ajo ka botuar edhe libra.

“Ndërsa ishte në Shtëpinë e Bardhë ajo shkroi librin “Millie’s Book” historia e treguar nga vështrimi i qenit të saj Millie për jetën në Shtëpinë e Bardhë. Ajo i dhuroi të ardhurat nga libri që ishin gati një milion dollarë për programet arsimore”, thotë Nancy Beck Young.

Ajo ishte e drejtpërdrejtë, thotë zonja Young.

“Ajo kurrë nuk u përpoq të dilte jashtë vetes. Gjithmonë ka qenë e vërtetë me veten. Ajo ia u shpjegoi këtë sekretarëve të shtypit se çdo gjë që ajo thotë është e vërtetë. Ajo thoshte nëse e thashë, e thashë”

Barbara Bush lindi më 8 qershor 1925. Ajo qëndroi e martuar për 73 vjet me njeriun, me të cilin u fejua para se ai të nisej për në luftë.

“Qëndroja aty dhe shihja qiellin e zbrazët, dhe mendoja për miqtë që kam humbur, për vendin e dua dhe një vajzë me emrin Barbara”, kujton presidenti George H.W.Bush.

Ajo u përball me tragjedinë kur një nga dy vajzat e saj vdiq nga leuçemia në moshën 3 vjeçare. Një nga mbesat e saj tha se bota është një vend më i mirë për shkak të zonjës Barbara Bush.

Ndërsa filloi të shitet sot në libraritë amerikane libri i ish-drejtorit të FBI-së, James Comey, Shtëpia e Bardhë vazhdoi ofensivën, vetëm një ditë pasi zoti Comey e përshkroi Presidentin si “moralisht të papërshtatshëm” për postin, siç u shpreh ai gjatë një interviste me kanalin ABC News. Siç njofton korrespondenti i Zërit të Amerikës, Jim Malone, administrata është hedhur në kundërsulm ndaj zotit Comey, përmes Twitter-it dhe përfaqësuesve të Shtëpisë së Bardhë.

Presidenti Trump ishte dje në Florida ku vuri në dukje shkurtimin që u bëri taksave, si dhe duke paralajmëruar se demokratët do të mundohen t’i zhbëjnë arritjet.

“Duan t’jua rrisin prapë taksat, por ne nuk do ta lejojmë këtë, pasi vendi dhe bizneset po rimëkëmben mirë. Gjithçka po ecën shkëlqyeshëm”, deklaroi Presidenti Trump.

Presidenti vazhdoi ofensivën në Twitter kundër ish-drejtorit të FBI-së që ai e shkarkoi vitin e kaluar.

Zoti Comey i tha kanalit ABC se Presidenti mund të ketë penguar drejtësinë kur i kërkoi të favorizonte ish-këshilltarin e tij të sigurisë kombëtare, Michael Flynn.

“Po më kërkonte të pushonim një hetim penal të këshilltarit të tij të sigurisë kombëtare… Unë e mora si një udhëzim. Ai më tha: shpresoj se do ta lësh këtë çështje të kalojë”, tha zoti Comey.

Zoti Comey i tha kanalit ABC se Presidenti Trump nuk është i përshtatshëm për postin. Ai e përsëriti këtë disa herë gjatë intervistës një-orëshe me “USA Today”.

“Nuk mendoj se është mendërisht i papërshtatshëm… Duket si një person me inteligjencë mbi mesataren. Dmth ndjek dhe analizon bisedat, etj. Nuk e kam për këtë aspekt. Mendoj se ai është moralisht i papërshtatshëm për të qenë president”, tha zoti Comey.

Ndër personat që po mbrojnë Presidentin dhe po sulmojnë kredibilitetin e zotit Comey është këshilltarja e Shtëpisë së Bardhë, Kellyanne Conway.

“Ai po jep një version të ndryshuar të historisë. Presidenti as nuk arriti ta njohë si person”, tha zonja Conway.

Kundërsulmi i Shtëpisë së Bardhë ndaj zotit Comey ka ngjallur shqetësime mes demokratëve dhe disa republikanëve se Presidenti mund të jetë pranë shkarkimit të prokurorit të posaçëm Robert Mueller, që drejton hetimet për Rusinë.

Disa ligjvënës duan që Kongresi ta mbrojë prokurorin Mueller.

“Nëse Presidenti do të ndërmerrte ndonjë veprim për të ndërhyrë apo dëmtuar hetimin që po zhvillon prokurori i posaçëm, do të dukej si dikush që e di se është fajtor dhe se nuk mund të përballet me një hetim të ndershëm”, tha ligjvënësi demokrat Jerrold Nadler.

Analistët thonë se ndëmarrja e ndonjë veprimi kundër prokurorit Mueller mund të shkaktojë një furtunë politike.

“Ka sigurisht argumente ligjore që Presidenti mund ta bëjë këtë gjë. Por, mendoj se ai gjendet në një situatë kur edhe anëtarët e partisë së tij, shumica e ligjvënësve, do ta këshillonin të mos ndërmarrë ndonjë hap. Nëse do ta bënte, mendoj se do të shkaktohej një krizë”, thotë analisti John Fortier, i Qendrës për Politikat Dypartiake.

Anketimet e fundit tregojnë se një shumicë e konsiderueshme e amerikanëve dëshirojnë që prokurori Mueller ta përmbushë hetimin e tij për bashkëpunimin e anëtarëve të ekipit elektoral Trump me Rusinë, për të ndikuar tek zgjedhjet e vitit 2016.

Një jurist në Nju Jork ka zbuluar faktin se avokati personal i Presidentit Trump, Michael Cohen, i cili është nën hetim penal për çështje të bizneseve të tij, ka ofruar në mënyrë të fshehtë këshilla ligjore për personalitetin e njohur televiziv dhe mbështetësin e zotit Trump, Sean Hannity.

Ky fakt u zbulua të hënën nga avokati i zotit Cohen gjatë një seance në gjykatën federale të Nju Jorkut.

Seanca u mbajt sepse avokatët që përfaqësojnë zotin Cohen dhe Presidentin Trump, i kishin kërkuar gjykatëses leje për të parë dokumentet që agjentët e FBI-së sekuestruan javën e kaluar nga zyra, shtëpia dhe dhoma e hotelit e zotit Cohen, si pjesë e hetimit që po i bëjnë financave të tij.

Hetimi lidhet me akuzat se Cohen mund të ketë paguar aktoren e filmave pornografikë Stormy Daniels dhe modelen Karen McDougal që ato të mos flisnin për marrëdhëniet intime me zotin Trump.

Avokati i zonjës Daniels, Michael Avenatti, komentoi kështu për nxjerrjen në seancë të emrit të zotit Hannity:

“Mendoj se kjo flet shumë. Sean Hannity u la në baltë nga avokati i zotit Michael Cohen, i cili është më i shqetësuar për mbrojtjen e presidentit sesa për mbrojtjen e zotit Hannity, por ata le t’i zgjidhin vetë punët er tyre.”

Menjëherë pas largimit të zotit Cohen nga gjykata, Sean Hannity u vu nën kritika për faktin që nuk i kishte zbuluar marrëdhëniet e tij me avokatin Cohen. Ndërkaq, në emisionet e tij në radio dhe televizion, ai kritikoi ashpër FBI-në për bastisjen që i bëri zyrave të avokatit Cohen.

Hannity, i cili ka një emision mjaft të ndjekur në televizionin Fox News, tha se nuk ishte klient i zotit Cohen, por se ky i fundit thjesht i kishte dhënë këshilla për disa çështje ligjore.

Avokati i zotit Cohen i ka quajtur bastisjet një incident i pashembullt. Ai nuk ka pranuar që materialet e konfiskuara të shqyrtohen nga një grup i veçantë prokurorësh për të vendosur se cilat mund të përdoren nga hetuesit dhe cilat hyjnë në kategorinë e privilegjit avokat-klient.

Por gjykatësja e hodhi poshtë kërkesën. Prokurorët do t’i vendosin dokumentet në një bazë të dhënash, pa i lexuar ato, por ku mund të kërkosh sipas fjalëve kyçe. Kjo bazë të dhënash do të ndahet me avokatët e zotit Cohen dhe të presidentit.

Ndërkaq, palët do të kthehen në gjykatë pas disa javësh.

Shtetet e Bashkuara, Britania dhe Franca të shtunën kryen sulme ushtarake kundër qeverisë së presidentit Asad për shkak të përdormit të armëve kimike nga Siria kundër banorëve të saj. Sulmet kishin objektiv reduktimin e aftësisë së Sirisë për përdorimin e armëve kimike në të ardhmen. Korrespondentja e Zërit të Amerikës Jill Craig bisedoi me banorë dhe turistë në Uashington, për të mësuar se çfarë mendojnë rreth sulmeve.

Grupe njerëzish u mblodhën dje para Shtëpisë së Bardhë për të protestuar kundër sulmeve ushtarake amerikane, britanike dhe franceze që goditën godinat e armëve kimike siriane.

“Unë mendoj se ky sulm ndaj Sirisë është thjeshtë pjesë e trashëgimisë së imperializmit amerikan, e bindjes se ne mund të diktojmë dhe kontrollojmë ato që ndodhin në mbarë botën. Dhe kjo, në mënyrë të pashmangshme, gjithmonë rrit mundësinë e konfliktit, shkatërrimit, vuajtje dhe humbje jete” thotë Michael Pappas, një student i mjekësisë.

Të tjerë thonë se mbrojtja e civilëve duhet të jetë prioritet.

“Për sa u përket goditjeve dhe shkatërrimit të armëve kimike, e shoh si diçka pozitive, nëse këto armë po lëndojnë civilët sirianë. Por shqetësohem nëse në këto sulme u plagosën ose u vranë civilë sirianë në terren. Nëse kjo ndodh, është e tmerrshme” thotë Zach Jones.

…dhe ai nuk është i vetmi banor i Uashingtonit që ndihet në mëdyshje…

“Kam mendime kontradiktore në lidhje me këtë. Mendoj se është e nevojshme, jam e kënaqur që po përpiqemi të bëjmë diçka për të mbrojtur njerëzit që jetojnë në Siri, por jam edhe e shqetësuar, sepse bombardimi nuk është domosdoshmërisht zgjedhja ime e parë,” thotë Beth.

Ndërsa të tjerë këtu në Uashington besojnë se veprimi ushtarak ishte i domosdoshëm ndaj presidentit sirian Assad.

“Dikush duhet të përpiqet të mbrojë popullin e Sirisë, sepse sulmet me gaz helmues kanë vranë shumë fëmijë dhe mendoj se është veprimi i duhur” thotë një turist nga Karolina e Veriut.

Sekretari i Mbrojtjes i Shteteve të Bashkuara Jim Mattis tha se këto sulme nuk do të përsëriten, nëse Presidenti Assad nuk do të përdorë më armë kimike.

Shumë njerëz shpresojnë se kjo është e vërtetë.

“Epo, ishte një surprizë e madhe e të premtes mbrëma. Shpresa ime tani është se gjërat nuk do të përshkallëzohen deri në atë pikë ku zhvillimet nuk diktohen më nga njerëzit e matur”.

Presidenti Trump akuzoi Rusinë dhe Iranin, dy nga aleatët kryesorë të Sirisë, se kanë mbështetur “diktatorë vrasës” dhe i kërkoi Moskës të ndryshonte drejtim. Ambasadori i Rusisë në Shtetet e Bashkuara foli kundër sulmeve dhe paralajmëroi se do të ketë pasoja.

Shtetet e Bashkuara, Britania dhe Franca thonë se sulmi i tyre ajror ndaj objekteve të programit të armëve kimike të Sirisë ishte i bazuar në ligjin ndërkombëtar. Duke folur gjatë takimit të jashtëzakonshëm të Këshillit të Sigurimit, të kërkuar nga Rusia, përfaqësuesit e tre vendeve aleate thanë se sulmi ishte i nevojshëm për të parandaluar përdorimin e mëtejshëm të armëve luftarake të paligjshme dhe çnjerëzore. Korrespondentja e Zërit të Amerikës, Margaret Besheer, njofton nga selia e Kombeve të Bashkuara.

Ambasadori i Rusisë në OKB shprehu revoltimin e Moskës për sulmin e koordinuar ndaj depove të armëve kimike të Sirisë dhe të qendrave të saj kërkimore.

“Kërkojmë të ndalojë menjëherë agresioni dhe të hiqet dorë nga përdorimi i forcës së paligjshme në të ardhmen”, tha ambasadori rus në OKB, Vassily Nebenzia.

Dje, një ekip inspektorësh i Organizatës për Ndalimin e Armëve Kimike mbërriti në Damask për të hetuar në qytetin Douma. Zoti Nebenzia kritikoi tre fuqitë perëndimore për kryerjen e sulmeve ajrore përpara se ekipi i inspektorëve të përmbushte detyrën dhe të nxirrte konkluzionet.

“Kështu i doni të zhvillohen tashmë marrëdhëniet ndërkombëtare? Ky është huliganizëm në marrëdhëniet ndërkombëtare, dhe jo huliganizëm i vogël, pasi bëhet fjalë për fuqi kryesore bërthamore”, deklaroi ambasadori rus.

Tre fuqitë perëndimore iu përmbajtën pikëpamjes se sulmet ishin të justifikuara, legjitime dhe proporcionale.

“Mbrëmë, goditëm me sukses në zemër të sistemit të armëve kimike të Sirisë dhe jemi të sigurtë se kemi dëmtuar programin sirian të armëve kimike. Jemi të gatshëm ta ruajmë këtë presion, nëse regjimi sirian do të testojë me pamendësi vullnetin tonë”, tha ambasadorja e Shteteve të Bashkuara në OKB, Nikki Haley.

Rusia u shpreh gjithashtu se sulmet bien në kundërshtim me ligjin ndërkombëtar dhe Kartën e OKB-së. Ambasadori i Francës nuk ra dakord.

“Do ju kujtoja se ajo kartë nuk u hartua për të mbrojtur kriminelë”, tha ambasadori francez në OKB, Francois Delattre.

Ambasadorja e Britanisë tha se veprimi ushtarak ishte i kufizuar dhe shmangu viktimat në radhët e civilëve.

“Mbretëria e Bashkuar mendon se ishte e drejtë dhe e ligjshme ndërmarrja e veprimit ushtarak, së bashku me aleatët tanë më të afërt, për të lehtësuar vuajtjet e mëtejshme njerëzore duke degraduar aftësitë e regjimit sirian për armë kimike dhe duke parandaluar përdorimin e tyre”, tha ambasadorja e Britanisë në OKB, Karen Pierce.

Rusia dështoi në përpjekjen për të miratuar një rezolutë që do të dënonte sulmin, duke marrë vetëm 3 vota pro, nga 15 vendet anëtare të Këshillit të Sigurimit.

Këshilli i Sigurimit i Kombeve të Bashkuara po zhvillon një takim urgjent të thirrur nga Rusia, e cila ka propozuar një rezolutë ku dënohen goditjet e ndërmarra sot në mëngjes nga tre aleatë perëndimorë ndaj objektivave siriane.

Ambasadorja amerikane në OKB, Nikki Haley tha se Shtetet e Bashkuara janë të gatshme të vazhdojnë presionin ndaj regjimit sirian, nëse Siria bën marrëzinë të kryejë sulme të tjera me armë kimike. “Koha e fjalëve mbaroi mbrëmë. Amerika qëndron në gatishmëri. Kur presidenti ynë cakton vijën e kuqe, ai e zbaton”.

Ambasadori rus në OKB akuzoi Shtetet e Bashkuara për huliganizëm në politikën e jashtme dhe për shkelje të rëndë të ligjit ndërkombëtar.

Pentagoni deklaroi se operacioni i ndërmarrë në Siri ka goditur me sukses objektivat e synuara me qëllimin për të dobësuar kapacitetet e armëve kimike të regjimit

Shtetet e Bashkuara, Franca dhe Britania ndërmorën sulme ajrore të shtunën në mëngjes, duke lëshuar 105 raketa mbi tre objekte siriane të armëve kimike, një në Damask, dy të tjerë pranë Homsit në afërsi të kufirit me Libanin.

Zyrtarët ushtarkë amerikanë thanë se të gjitha raketat goditën objektivat pak minuta njëra pas tjetrës, duke i shkatërruar objektet.

“Kemi goditur zemrën e programit sirian të armëve kimike,” tha Gjeneral Lejtnanti në një konferencë për shtyp të shtunën në Pentagon.

Presidenti Donald Trump vlerësoi rolin e Britanisë dhe Francës për angazhimin në operacionet e bashkërenduara ajrore mbi Siri. Zoti Trump postoi para pak orësh një koment në Twitter ku shkruan se u realizua një goditje e ekzekutuar në mënyrë perfekte dhe falenderon dy vendet aleate si dhe forcat e armatosura amerikane. Presidenti kishte paralajmëruar se Shtetet e Bashkuara do të përgjigjeshin ndaj sulmit me armë kimike të javës së kaluar në Siri. Mbrëmë Donald Trump iu drejtua amerikanëve me një fjalim të drejtpërdrejtë ku njoftoi vendimin për të goditur objektiva të ushtrisë siriane:

“Pak më parë u dhashë urdhër forcave të armatosura të Shteteve të Bashkuara të ndërmarrin goditje të përqëndruara tek objektiva që kanë lidhje me kapacitetet për sulme kimike të Presidentit sirian Bashar al-Asad,” tha Presidenti Trump.

Presidenti Trump iu drejtua vendit mbrëmë me një fjalim të transmetuar përmes televizionit dhe medias sociale, pak sekonda para se të fillonin goditjet ajrore, që tronditën me shpërthime dhe gjëmime të zhurmshme Damaskun.

Administrata i prezantoi goditjet si një veprim që synon t’i jepë një mesazh të qartë regjimit të Presidentit sirian Bashar al-Assad për sulmin me armë kimike ndaj civilëve të zhvilluar javën e kaluar, si dhe për të parandaluar sulme të tilla në të ardhmen.

“Është e qartë se regjimi i Assadit nuk e mori mesazhin vitin e kaluar. Këtë radhë, ne dhe aleatët goditëm më fort. Së bashku i dërguam një mesazh të qartë Assadit dhe ithtarëve të tij vrastarë se nuk duhet të zhvillojnë të tjera sulme kimike, për të cilat do të mbajnë përgjegjësi”, tha Sekretari Mattis.

Sekretari Mattis, i cili dha një konferencë për shtyp pak pas fillimit të sulmit, tha se objektivat u përzgjodhën për të shkaktuar degradim afatgjatë dhe dëm maksimal ndaj rezervave të armëve kimike të Sirisë, si dhe shtoi se gjatë sulmeve ajrore, Shtetet e Bashkuara dhe aleatët bënë të pamundurën për të shmangur viktima në radhët e civilëve dhe shtetasve të huaj.

Sekretari Mattis tha se u përdor gaz klorin gjatë sulmit kimik në qytetin Douma javën e kaluar që la pas të paktën 40 viktima dhe qindra të tjerë në gjendje të rëndë shëndetësore. Siria mohon me forcë këto akuza.

“Jam i sigurtë se regjimi sirian kreu një sulm kimik ndaj njerëzve të pafajshëm javën e kaluar. Kemi gjithashtu edhe nivelin e duhur të të dhënave të besueshme të zbulimit për goditjen ajrore”, tha Sekretari Matties.

Gjenerali Joseph Dunford, shefi i shtabit amerikan, tha se më shumë detaje për sulmin ajror do të bëheshin të ditura në vazhdim.

Presidenti Donald Trump ishte shprehur paraprakisht se Shtetet e Bashkuara janë të gatshme të ruajnë presionin ndaj Assadit derisa ai t’i japë fund, asaj që Presidenti Trump e quajti një vazhdimësi kriminale e vrasjes së popullit të tij me armë kimike të ndaluara nga ligji ndërkombëtar.

Presidenti Trump fajësoi dy nga vendet që mbështesin Sirinë, Rusinë dhe Iranin, se nuk ndaluan përdorimin nga regjimi sirian të këtyre armëve të ndaluara.

“Në vitin 2013, Presidenti Putin dhe qeveria e tij i premtuan botës se do të garantonin eliminimin e armëve kimike të Sirisë. Sulmi më i fundit i Assadit dhe kundërpërgjigja e sotshme janë rezultat i drejtpërdrejt i dështimit të Rusisë për ta mbajtur fjalën. Rusia duhet të vendosë nëse do të vazhdojë në këtë rrugëtim të errët, apo nëse do t’u bashkohet kombeve të civilizuara si një forcë stabiliteti dhe paqeje”, deklaroi Presidenti Trump.

Rusia njoftoi se sistemet siriane të mbrojtjes ajrore, të prodhuara gjatë epokës sovjetike, rrëzuan 71 nga 103 reketat e lëshuara nga aleatët. Rusia thotë se ka monitoruar me radarët e saj sulmet. Zëdhënës të forcave ruse thonë se nuk ka pasur lëndime në personelin ushtarak sirian dhe se dëmet materiale kanë qenë minimale:

“Sistemet tona mbrojtëse në bazat ushtarake në Khmeimim dhe Tartus pikasën dhe i kishim nën vëzhgim të gjitha raketat e lëshuara nga mjetet detare dhe ajrore të Shteteve të Bashkuara dhe të Mbretërisë së Bashkuar. Pjesëmarrja e reklamuar e Francës nuk u evidentua”, tha Gjeneral Sergey Rudskoy, shef i operacioneve në shtabin qendror të Rusisë.

Kryeministri italian Paolo Gentilioni përshëndeti sot sulmet ajrore të aleatëve.

“Operacioni ishte një përgjigje e motivuar nga përdorimi i armëve kimike në Douma dhe fatkeqësisht nuk është hera e parë që regjimi sirian përdor armë kimike gjatë këtij konflikti. Besoj se një shekull pas Luftës së Parë Botërore nuk mundemi të pranojmë idenë e përdorimit të armëve kimike gjatë konflikteve të tanishme”, tha Kryeministri Gentilioni.

Mesazhe mbështesëse u dhanë gjithashtu nga Kanadaja, Japonia, Turqia…..

Sipas agjensisë franceze të lajmeve AFP, shpërthime të shumta u dëgjuan menjëherë në kryeqytetin sirian, ndërkohë që Presidenti amerikan Donald Trump po njoftonte për sulmin ajror.

Sipas Observatorit Sirian për të Drejtat e Njeriut, me seli në Britani, u godit një laborator kërkimor në Damask, si dhe një sërë bazash ushtarake siriane përreth kryeqytetit.

Në SHBA, prokurorët federalë zbuluan të premten se avokati privat i Presidentit Donald Trump është nën hetim kriminal.

Cohen ndodhet nën hetim prej muajsh, thanë prokurorët gjatë një paraqitjeje në gjykatën federale të Manhatanit në Nju Jork.

Prokurorët thanë se hetimi përqendrohet tek marrëdhëniet e tij personale të biznesit “dhe jo te puna si avokat”.

Ata i bënë komentet si përgjigje ndaj përpjekjes së zotit Cohen për të mos lejuar prokurorët të shqyrtojnë dokumentet që ata sekuestruan gjatë bastisjes së shtëpisë dhe zyrës së tij ditën e hënë.

Anëtarë të Kongresit nga të dyja partitë po bëjnë përpjekje të reja për të mbrojtur nga shkarkimi prokurorin special Robert Mueller. Zoti Mueller drejton procesin hetimor lidhur me rolin e Rusisë në zgjedhjet presidenciale të 2016. Në Uashington po shtohet shqetësimi mbi të ardhmen e tij, pasi presidenti shprehu kritika të forta për bastisjen që urdhëroi këtë javë prokurori special Mueller tek zyra dhe banesa e avokatit të tij personal, Michael Cohen.

Presidenti Trump sulmoi hetimet mbi Rusinë, pasi FBI-ja bastisi shtëpinë, zyrën dhe dhomën e hotelit të avokatit të tij personal, Michael Cohen:

“Është e turpshme, vërtetë e turpshme. Është sulm ndaj vendit tonë në kuptimin e plotë të fjalës; sulm ndaj parimeve që mbrojmë”.

Siç njoftohet, hetuesit po analizojnë se çfarë roli ka luajtur avokati i presidentit në pagesat që morën dy gra, aktorja e filmave pornografikë, Stormy Daniels dhe modelja e revistës erotike Playboy, Karen McDougal, të cilat kanë thënë se kanë pasur marrëdhënie intime me zotin Trump para se ai të bëhej president.

Shtëpia e Bardhë po ndjek trajektoren që po merr hetimi, tha zëdhënësja Sarah Huckabee Sanders:

“Presidenti e ka thënë qartë se është shumë i shqetësuar nga drejtimi që po merr hetimi i prokurorit special”.

Presidenti u revoltua nga bastisja e zyrës dhe banesës së avokatit të tij Cohen, thotë Jonathan Lemire i agjencisë së lajmeve Associated Press.

Jonathan Lemire, Agjencia e Lajmeve Associated Press

“Mund të themi ndoshta se që kur u bë president, zoti Trump nuk ka qenë kurrë më i revoltuar se në këtë rast. Bastisjet në banesën e zyrën e Michael Cohen e zemëruan shumë”.

Njerëz të afërt me presidentin si ish-guvernatori Chris Christie po e nxisin të tregojë maturi:

“Presidenti është shumë i revoltuar nga këto zhvillime, këtë e ka shprehur vetë. Por nuk mund ta shkarkojë prokurorin special”.

Disa demokratë dhe disa republikanë, ndër ta udhëheqësi i demokratëve në Senat, Chuck Schumer, po mbështesin një projektligj për ta mbrojtur zotin Mueller.​

“Kongresi duhet të shprehet qartë dhe prerazi, me një zë të vetëm duke miratuar ligjin për të garantuar se presidenti nuk do të arrijë të shkarkojë prokurorin special Mueller, apo Zëvendës Prokurorin e Përgjithshëm Rosenstein”.

Shkarkimi i Muellerit nuk do të thotë përfundimi i hetimeve mbi Rusinë, thotë Chris Edelson, profesor në Universitetin Amerikan.

“Nuk mendoj se Donald Trumpi mund të ndalë kollaj procesin që ka arritur deri në këtë pikë. Janë ngritur padi ndaj një numër njerëzish, disa prej tyre kanë pranuar fajësinë. Procesi do të vazhdojë. Nuk do të ndalet me shkarkimin e Muellerit”.

Pasojat politike për presidentin do të ishin serioze thotë analisti John Fortier.

“Kongresi do të ishte shumë i pakënaqur, sidomos demokratët. Pa diskutim që do të çonte në pasoja më të rënda sepse mendoj që Kongresi do të reagonte me forcë kundër një veprimi të tillë”.

Shtëpia e Bardhë e Presidentit Trump tani po përgatitet për nxjerrjen në treg javën e ardhshme të librit të ish-drejtorit të FBI-së James Comey. Shkarkimi i zotit Comey vjet nga Presidenti Trump u bë shkas për emërimin e prokurorit special, Mueller.

Mbështetësit e Presidentit të SHBA, Donald Trump kanë filluar një fushatë në internet për të diskredituar një libër me kujtime të ish-drejtorit të FBI-së James Comey, që pritet të botohet së shpejti.

Libri me titull “Një besnikëri më e lartë: Të vërtetat, gënjeshtrat dhe lidershipi”, pritet të dalë në qarkullim më 17 prill.

Siç njofton agjencia e lajmeve Associated Press, në libër zoti Comey nuk i kursen sulmet e ashpra në drejtim të Presidenti Trump.

“Ai e quan presidentin ‘joetik’ dhe të shkëputur nga e vërteta. Comey e përshkruan stilin e tij të udhëheqjes si diçka të shtyrë nga allishverishet dhe nga egoja, diçka që lidhet me besnikërinë ndaj tij.Kjo temë përshkon gjithë librin, kur autori na jep takimet e tij me presidentin e zgjedhur në Kullën Trump, pastaj më vonë disa herë në Shtëpinë e Bardhë dhe më pas në telefon kur Comey ishte akoma në postin e tij. Ai shpesh e krahason zotin Trump me atë të një bosi mafioz, duke thënë se presidenti në një farë mënyre dukej sikur po drejtonte një familje krimi në Nju Jork”, thotë Jonathan Lemire, gazetar i agjencisë së lajmeve Associated Press.

Libri me kujtime premton të japë një vështrim të thellë në marrëdhënien e tensionuar të zotit Comey me presidentin Trump, i cili e shkarkoi, duke e akuzuar për ndërhyrje në pavarësinë e FBI-së.

Presidenti Trump reagoi sot në Twitter, duke e quajtur ish-drejtorin e FBI-së një “rrjedhës informacioni dhe gënjeshtar të provuar”.

“Thuajse çdo njeri në Uashington mendonte se ai duhej shkarkuar për punën e tmerrshme që kishte bërë, deri sa në fakt u shkarkua. Ai nxori informacione sekrete, gjë për të cilën duhet të ndiqet penalisht. Ai gënjeu para Kongresit nën betim,” shkruan Presidenti Trump në komentin e tij në Twitter, ku mes të tjerash e quan zotin Comey të “neveritshëm.”

Publikimi i librit vjen në një moment veçanërisht të ndjeshëm për zotin Trump dhe Shtëpinë e Bardhë. Zyrtarë në Shtëpinë e Bardhë thonë se ai është zemëruar së tepërmi për një bastisje të ndërmarrë kohët e fundit nga FBI-ja në shtëpinë dhe zyrën e avokatit të tij personal, duke shtruar mundësinë që ai të shkarkojë nga detyra zëvendës Prokurorin e Përgjithshëm Rod Rosenstein, i cili emëroi njeriun që kryen hetime rreth lidhjeve të mundshme të fushatës Trump me Rusinë, Robert Mueller, ose që të përpiqet t’i japë fund hetimit të zotit Mueller.

Komiteti Kombëtar Republikan hapi të enjten një faqe të re në internet me titull Lyin’Comey.com, që përmban citime nga demokratë të njohur që kanë kritikuar ish-drejtorin e FBI-së në të kaluarën.

Fox News njofton se Partia Republikane ka në plan të bëjë një verifikim të fakteve që parashtrohen në librin e zotit Comey dhe ta përdorë këtë faqe interneti si një mjet të kundërpërgjigjes së shpejtë për vënë në dukje “keqinterpretimet” apo “kontradiktat”, siç i quan ajo.

Aleatët e Amerikës deklaruan se do t’i bashkohen një reagimi të mundshëm ushtarak ndaj sulmit me armë kimike në Siri që dyshohet se është ndërmarrë nga forcat besnike të Presidentit Bashar Al-Assad.

Por ata po i kërkojnë Uashingtonit të shmangë një kundërpërgjigje të nxituar, duke thënë se para se të nisë ndëshkimi, nevojiten më shumë prova se sulmi kimik vërtet është kryer nga qeveria siriane.

Me fjalë mjaft të drejtpërdrejta, Presidenti i SHBA Donald Trump paralajmëroi në Twitter të mërkurën se reagimi ushtarak po vjen.

Ai shkruante: “Rusia ka deklaruar se do të qëllojë çdo raketë që do të hidhej kundër Sirisë. Përgatitu Rusi, sepse ato do të vijnë, të bukura, të reja dhe ‘inteligjente’!” Ju nuk duhet të jeni partnerë me një kafshë që vret popullin e vet me gaz dhe kënaqet duke e bërë këtë!”

Zyrtarët rusë nuk vonuan të përgjigjen, duke thënë se nëse do të ketë një goditje amerikane, atëherë Rusia do t’i rrëzojë raketat dhe do të vërë në shënjestër pozicionet nga ku ato janë lëshuar.

“Raketat inteligjente duhet të fluturojnë drejt terroristëve, jo drejt qeverisë së ligjshme që lufton terrorizmin ndërkombëtar prej disa vitesh në territorin e saj”, tha zëdhënësja e Ministrisë së Jashtme ruse Maria Zakharova në Facebook.

Zëdhënësi i Kremlinit Dmitri Peskov tha të mërkurën se të gjitha palët e përfshira në Siri duhet të përmbahen nga veprimet që mund të destabilizojnë rajonin.

Në klimën e shkëmbimeve të nxehta në mediat sociale, me kërcënime dhe paralajmërime, ku flitet për një konfrontim ushtarak mes SHBA dhe Rusisë, Britania, Franca dhe Australia kanë ofruar mbështetje për një sulm amerikan me raketa, por duke e kushtëzuar mbështetjen e tyre.

Ata po vënë në pikëpyetje efektin parandalues të sulmeve me raketa, duke theksuar se kundërpërgjigjja ushtarake amerikane një vit më parë ndaj një sulmi me gaz sarin në provincën veriore siriane të Idlibit, nuk e ka ndalur Assadin të ndërmarrë sulme të tjera kimike, kryesisht me bomba thërrmuese me klor, të hedhura nga helikopterët e regjimit sirian.

Në një bisedë telefonike me Presidentin Trump të martën vonë, kryeministrja britanike Theresa May ofroi mbështetjen e saj, por sipas zyrtarëve britanikë, u shpreh se Britania kërkon më shumë dëshmi se kush fshihet pas sulmit të dyshuar kimik të shtunën në një zonë në periferi të Damaskut që mbahet nga kryengritësit. Sulmi ka lënë të paktën 40 të vdekur dhe deri në 500 të plagosur.

Inspektorët e Organizatës për Ndalimin e Armëve Kimike (OPCW) përgatiten të vizitojnë periferinë e Doumës, ku ndodhi sulmi, aleatët e tjerë perëndimorë thanë se nuk duhet të ndërmerren veprime pa u sqaruar fakte të tjera.

Presidenti francez Emmanuel Macron ka thënë se Franca është gati të angazhohet për veprime ndëshkuese, nëse konfirmohet se Presidenti Assad ka kaluar vijën e kuqe dhe ka përdorur armë kimike. Por duket se ai dëshiron që goditjet e kundërpërgjigjes të kufizohen vetëm ndaj objekteve siriane të armëve kimike.

Ndërkohë që SHBA dhe aleatët e tyre perëndimorë po sinjalizojnë një përgjigje të mundshme ushtarake, analistët thonë se është humbur elementi i befasisë dhe se qeverisë siriane dhe mbështetësve të saj ushtarakë, Rusisë dhe Iranit, po u jepet kohë e mjaftueshme për t’u përgatitur.

“Sigurisht, problemi është se efekti i befasisë është plotësisht i humbur. Gjithashtu, regjimit sirian, Rusisë dhe Iranit i është dhënë kohë e mjaftueshme për t’u përgatitur me bateri kundër-ajrore dhe për të zbrazur objektivat e mundshme”, thotë Olivier Guitta, drejtor menaxhues në GlobalStrat, një firmë konsulence për sigurinë dhe rrezikun gjeopolitik.

Ai thotë se situata tani është ndryshe nga viti 2013, kur paraardhësi i zotit Trump, Barak Obama kërcënoi të godiste Assadin për një sulm kimik ndaj kryengritësve dhe civilëve në një periferi të Damaskut.

“Në atë kohë, pasojat do të kishin qenë shumë më të vogla, sepse Irani dhe Rusia ishin fare pak të pranishëm në Siri”, thotë ai. “Megjithëse një goditje kundër Assadit është më se e vonuar që nga viti 2013, tani ekziston rreziku i shpërthimit, shkallëzimit dhe luftimeve të para reale mes Rusisë dhe Perëndimit duke i hapur derën një konflikti më të gjatë,” paralajmëron ai.

Kjo frikë mesa duket po ndikon te qeveritë europiane aleate me Shtetet e Bashkuara, përfshirë disa anëtarë të Partisë Konservatore në pushtet të Kryeministres Theresa May, të cilët shqetësohen se administrata Trump nuk ka një strategji të përgjithshme për Sirinë.

Presidenti francez Emmanuel Macron tha se një vendim do të merrej “në ditët e ardhshme” dhe se çdo sulm ajror do të synonte objektet kimike të qeverisë siriane.

Ministrja e Jashtme australiane Julie Bishop bëri të ditur sot mbështetjen e vendit të saj për çdo veprim ushtarak që “do të ketë një objektiv të përcaktuar, do të jetë i kalibruar dhe proporcional.”

Organizata Botërore e Shëndetësisë tha të mërkurën se sipas raporteve nga partnerët e saj, 500 njerëz që kërkuan trajtim mjeksor të shtunën shfaqën shenja dhe simptoma të ekspozimit ndaj kimikateve toksike. Organizata shprehu zemërim për përdorimin e dyshuar të armëve kimike dhe kërkoi qasje të menjëhershme në zonë për të ofruar kujdes shëndetësor.

Të martën në Këshillin e Sigurimit të OKB-së, Rusia i vuri veton një plani të hartuar nga Shtetet e Bashkuara që parashikonte ngritjen e një komisioni për të hetuar dhe përcaktuar përgjegjësinë e sulmit me armë kimike.

Situata në Siri është tensionuar më shumë pas një sulmi të dyshuar me armë kimike të shtunën në Gutën lindore, ku u vranë të paktën 40 vetë.

Shtetet e Bashkuara dhe disa aleatë të tyre kanë fajësuar forcat siriane për sulmin, ndërsa Siria dhe Rusia i kanë mohuar akuzat se sulmi me armë kimike është ndërmarrë nga ushtria e presidentit Bashar al-Asad.

Ambasadori i Rusisë në Liban, Alexander Zasypkin, paralajmëroi mbrëmë në televizionin al-Manar të Hezbollahut, se një goditje amerikane ndaj Sirisë do të shkaktonte një shkallëzim të madh të luftës atje.

Më herët, Presidenti Trump paralajmëroi se personat përgjegjës do të paguanin një “çmim të lartë” dhe bisedoi disa herë në telefon me homologët e tij britanikë dhe francezë për një përgjigje të mundshme ndaj sulmit kimik.

“Jemi duke kërkuar një përgjigje të koordinuar, pavarësisht se cila mund të jetë kjo përgjigje,” tha të martën zëdhënësja e Departamentit të Shtetit Heather Nauert.

Përveç fajësimit të Sirisë, Presidenti Trump fajësoi më tej përkrahësit e Asadit në Iran dhe Rusi për sulmin në Ghoutan lindore. Një organizatë ndërkombëtare për mbikëqyrjen e armëve kimike tha se do të dërgojë një ekip për të hetuar incidentin.

“NUK KA ZGJIDHJE TË LEHTË”

sipas analistëve, një reagim tepër i fuqishëm ndaj sulmit të fundit kimik rrezikon shkallëzimin e luftës civile në Siri dhe shtimin e tensioneve ushtarake midis fuqive të mëdha botërore, të cilat kanë të gjitha aleatë në terren.

“Këtu nuk ka asnjë përgjigje të lehtë,” i tha Zërit të Amerikës admirali në pension Michael Mullen. “Është delikate dhe e rrezikshme. Jam i shqetësuar se kjo mund të zgjerohet mjaft shpejt”, shtoi ai.

Rusia ka paralajmëruar për “pasoja të rënda” nëse Shtetet e Bashkuara sulmojnë Asadin.

Shtëpia e Bardhë tha se zoti Trump anuloi një udhëtim në Amerikën Latine, që ishte planifikuar të premten, në mënyrë që të “mbikqyrte përgjigjen amerikane ndaj Sirisë”. Sekretari i Mbrojtjes Jim Mattis gjithashtu anuloi planet e udhëtimit brenda vendit.

Zyrtarët e Shtëpisë së Bardhë refuzuan të thoshin nëse këto lëvizje pasqyronin mundësinë e veprimeve të zgjatura ushtarake në Siri, ose nëse ky veprim do të përbënte më shumë se një sulm të vetëm ajror.

Në Siri ndodhen më shumë se dy mijë trupa amerikane. Një koalicion i udhëhequr nga Shtetet e Bashkuara ndërmori mijëra sulme ajrore, kryesisht ndaj Shtetit Islamik dhe kryengritësve të tjerë ekstremistë.

Pothuajse një vit më parë, SHBA lëshoi 59 raketa kruz Tomahawk ndaj një baze ajrore siriane si kundërpërgjigje ndaj një sulmi tjetër me armë kimike.

Shtëpia e Bardhë thotë se Presidenti Donald Trump mendon se mund ta shkarkojë prokurorin e posaçëm Robert Mueller, por nuk do ta ndërmarrë këtë hap tani.

Kjo sipas sekretares së shtypit Sarah Huckabee Sanders, e cila u tha të martën gazetarëve në Shtëpinë e Bardhë se zoti Trump “sigurisht që beson se e ka kompetencën ”për ta shkarkuar zotin Mueller”, i cili po heton për një bashkëpunim të mundshëm të fshehtë të fushatës së zotit Trump me Rusinë dhe rreth ndërhyrjes ruse në zgjedhjet presidenciale të 2016-s.

Zonja Sanders tha se Presidenti beson se hetimi i prokurorit të posaçëm Mueller “ka shkuar tepër larg” pas bastisjes nga agjentët federalë të zyrave të avokatit të tij personal Michael Cohen. Bastisja u krye të paktën pjesërisht bazuar në një referim që ekipi i zotit Mueller i dërgoi një prokurori federal në Nju Jork.

Sipas rregulloreve të Departamentit të Drejtësisë, vetëm Zëvendës Prokurori i Përgjithshëm Rod Rosenstein, i cili mbikëqyr hetimin për Rusinë, mund ta shkarkojë zotin Mueller.

Numri dy i republikanëve të Senatit, John Cornyn i Teksasit, thotë se është i bindur se Presidenti Donald Trump nuk do ta shkarkojë prokurorin e posaçëm Robert Mueller.

Ai tha se ligjvënësit i kanë lënë të kuptohet Shtëpisë së Bardhë se shkarkimi i zotit Mueller do të ishte gabim. Senatori Cornyn thotë se pret që zoti Mueller do të jetë në gjendje ta përfundojë hetimin e tij rreth ndërhyrjes së Rusisë në zgjedhjet e vitit 2016 dhe se shkarkimi i tij “do të kishte pasoja”, që as presidenti nuk mund t’i parashikonte dot.”

Kryetari i Komisionit Juridik të Senatit Chuck Grassley tha se do të ishte “vetëvrasje” politike për presidentin Donald Trump nëse e shkakron prokurorin e posaçëm.

PRESIDENTI, I ZEMËRUAR ME PROKURORIN E POSAÇËM

Mueller shkaktoi zemërimin e Presidentit me nxjerrjen e një autorizimi nga gjykata për të kontrolluar zyrën e avokatit personal të zotit Trump, Michael Cohen. Të hënën, gjatë bastisjes së zyrës së tij FBI-ja konfiskoi dokumente, përfshirë ato që lidhen me marrëdhënien e dyshuar të zotit Trump me një aktore filmash pornografikë.

Zoti Trump e quajti bastisjen me miratimin e zotit Mueller, në zyrën e avokatit Michael Cohen, “një situatë të turpshme, sulm ndaj vendit dhe një nivel të ri ku ka arritur padrejtësia“.

“Përse nuk e shkarkoj Mueller-in? Mendoj se është një turp ajo që po ndodh. Është me të vërtetë një situatë e trishtuar kur sheh se çfarë po ndodh. Shumë njerëz më kanë thënë se duhet ta shkarkoj. E përsëris, ata nuk gjetën asgjë ”, tha Presidenti Donald Trump.

Por hetimi vazhdon dhe Prokurori i Posaçëm nuk ka bërë komente publike ndaj zotit Trump, sa i takon hetimit mbi ndërhyrjen e Rusisë në zgjedhje.

Sipas gazetës “The Washington Post” të hënën vonë, zoti Cohen “ndodhet nën hetim federal për mashtrim të mundshëm bankar, transferta elektronike të paligjshme si dhe shkelje të ligjit për financimin e fushatës, bazuar tek të dhënat e marra nga një person që ka dijeni mbi çështjen“.

FBI-ja bastisi dje zyrën e zotit Cohen në Nju Jork dhe konfiskoi dokumente, përfshirë ato që lidhen me marrëdhënien e dyshuar të zotit Trump me një yll filmash për të rritur.

Ditë përpara zgjedhjeve presidenciale të vitit 2016, zoti Cohen i pagoi aktores Stormy Daniels 130 mijë dollarë me qëllim garantimin e heshtjes së saj për një lidhje të dyshuar me zotin Trump në vitin 2006. Por presidenti Trump thotë se nuk ishte në dijeni të pagesës.

Gazetari: A ishit në dijeni të pagesën prej 130 mijë dollarësh për Stormy Daniels?

Zoti Trump: Jo!

Gazetari: Atëherë pse e pagoi Michael Cohen atë shumë, nëse akuzat nuk janë të vërteta?

Zoti Trump: Duhet të pyesni Michael Cohen-in. Michael është avokati im. Duhet të pyesni atë!

Disa ekspertë ligjorë besojnë se pagesa e bërë nga zoti Cohen mund të ketë qenë një kontribut i paligjshëm për fushatën me qëllimin për të garantuar heshtjen e Stormy Daniels-it, komentet e së cilës ndoshta mund të shkatërronin shanset e zotit Trump për t’u zgjedhur./ za

Tom Bossert, këshilltari i lartë i Presidentit Trump për Sigurinë e Vendit, dha dorëheqjen papritmas të martën, një tjetër zyrtar i lartë që i shtohet listës së gjatë të atyre që largohen nga administrata Trump.

Nuk është dhënë asnjë arsye për dorëheqjen e tij, por ajo vjen një ditë pas fillimit të detyrës së konservatorit John Bolton në postin e këshilltarit të sigurisë kombëtare, i treti që merr këtë post gjatë 15 muajve të presidencës Trump. Si Bloomberg News ashtu edhe CNN njoftojnë se Bossert largohet me kërkesë të zotit Bolton.

Bossert, 43-vjeçar, shërbente në Shtëpinë e Bardhë të zotit Trump që nga inaugurimi i tij. Ai ishte një këshilltar kryesor i presidentit për sigurinë kibernetike. Bossert u dallua gjithashtu për trajtimin e përgjigjes së qeverisë ndaj uraganeve shkatërruese në Teksas, Porto Riko dhe Ishujt Virgin vitin e kaluar.

Ai është shfaqur shpesh në emisionet televizive të lajmeve për të përfaqësuar pikëpamjen e administratës Trump mbi kërcënimet e terrorizmit.

Por kandidatura e tij për t’u bërë këshilltar i sigurimit kombëtar u la mënjanë në favor të zotit Bolton, ish-ambasador në Kombet e Bashkuara, i cili i zë vendin gjeneralit H.R. McMaster që u largua nga kjo detyrë./za

Një organizatë ndërkombëtare për mbikëqyrjen e armëve kimike tha të martën se do të dërgojë një ekip në qytetin sirian të Dumës për të hetuar një sulm të dyshuar me gaz helmues që vrau dhjetra njerëz fundjavën e kaluar pranë Damaskut.

Organizata për ndalimin e armëve kimike (OPCW) tha se do të shkojë në Duma pas kërkesave për të hetuar rreth incidentit të dyshuar.

“Kjo përkon me kërkesën e Republikës Arabe të Sirisë dhe Federatës Ruse për të hetuar mbi akuzat për përdorimin e armëve kimike në Duma,” tha organizata. “Ekipi është duke u përgatitur për shkuar në Siri së shpejti.”

Shtëpia e Bardhë njoftoi të martën se presidenti Donald Trump do të anulojë një udhëtim të planifikuar në Amerikën Latine dhe do të qëndrojë në SHBA për të “mbikqyrur përgjigjen amerikane ndaj Sirisë”.

Zoti Trump tha se administrata e tij ka gjasa të njoftojë “pas faktit” se si ka vendosur t’i përgjigjet sulmit të dyshuar kimik.

“(Sulmi) do të marrë përgjigje dhe do të marrë përgjigje të fortë,” tha zoti Trump para takimit me udhëheqësit e lartë ushtarakë të hënën mbrëma.

Ai vuri në dukje fuqinë e SHBA për të ndalur mizoritë si sulmi i së shtunës në Ghoutan lindore të mbajtur nga kryengritësit, ku u vranë së paku 40 vetë.

“Ne kemi shumë alternativa ushtarake,” tha ai, duke mos dhënë hollësi. Vitin e kaluar, ai urdhëroi sulme ajrore ndaj një aeroporti sirian që u përdor për të ndërmarrë një sulm tjetër kimik.

SHBA kishin kërkuar gjithashtu që Këshilli i Sigurimit i OKB-së të hidhte në votë të martën pasdite një rezolutë që bën thirrje për një hetim të ri rreth përdorimit të armëve kimike në Siri. Për miratimin e një rezolute do të duheshin nëntë vota dhe asnjë abstenim nga Rusia, Britania, Kina apo SHBA. Rusia thotë se nuk është dakord me draftin e paraqitur nga SHBA.

Ndërkohë, Sekretari i Përgjithshëm i OKB-së, Antonio Guterres tha se është i indinjuar nga njoftimet e vazhdueshme për sulme me armë kimike në Siri. Ai bëri thirrje për një hetim të paanshëm me OPCW duke i lejuar organizatës qasje të plotë.

Ministri i Jashtëm rus Sergej Lavrov tha të martën se Rusia do të paraqiste një rezolutë në Këshillin e Sigurimit me propozimin për dërgimin e hetuesve në Siri.

Kjo pason komentet e emisarit të Moskës Vassily Nebenzia, i cili tha se ekspertët rusë kanë vizituar tashmë vendin, kanë mbledhur mostrat e tokës, kanë intervistuar dëshmitarët dhe personelin mjekësor dhe se nuk ka pasur ndonjë sulm me armë kimike.

Ambasadorja e SHBA Nikki Haley i tha Këshillit të Sigurimit të hënën se Rusia dhe Irani mund ta ndalin “shkatërrimin vrasës” të qeverisë siriane, duke shtuar se duart e Moskës janë “të lyera me gjakun e fëmijëve sirianë”.

Britania thotë se Sekretari i Jashtëm Boris Xhonson foli në telefon me ndihmës sekretarin amerikan të shtetit, John Sullivan dhe të dy “ranë dakord se, bazuar në raportet e medias dhe raportet nga terreni, ky sulm mban shenja të sulmeve të mëparshme kimike nga ana e regjimit të Asadit.”

Presidenti francez Emmanuel Macron ka folur në telefon disa herë me zotin Trump për të koordinuar reagimin e tyre ndaj sulmit të së shtunës.

Agjentët e Byrosë Federale të Hetimeve, të pajisur me autorizime të gjykatës, konfiskuan dokumente të avokatit personal të presidentit Donald Trump, Michael Cohen, në zyrën e tij në Mahatan të Nju Jorkut.

Kjo u bë e ditur në një deklaratë të avokatit të zotit Cohen, Stephen Ryan.

Ai tha se urdhrat për kërkimin e dokumenteve u ekzekutuan nga zyra e avokatit amerikan për qarkun jugor të Nju Jorkut, por ato kanë lidhje vetëm “pjesërisht” me hetimet e prokurorit të posaçëm Robert Mueller.

Presidenti Trump reagoi mbrëmjen e së hënës, duke thënë se “kjo është një situatë e turpshme, është një sulm kundër vendit tonë”.

Ai i bëri komentet gjatë një takimi të këshillit të sigurisë kombëtare të mbledhur për të diskutuar mbi reagimin e SHBA ndaj sulmit me armë kimike në Siri.

Presidenti Trump tha se “kjo është një gjueti e pastër shtrigash”, duke iu referuar tërthorazi punës së prokurorit të posaçëm Robert Mueller, i cili po heton rreth një bashkëpunimi të mundshëm të fshehtë të fushatës Trump me Rusinë.

Presidenti Trump tha se deri tani nuk është gjetur asnjë bashkëpunim i tillë i fshehtë.

I pyetur nëse do ta shkarkonte zotin Mueller, ai nuk u përgjigj drejtpërsëdrejti por tha se “këtë do ta shohim”.

Ai u ankua se ndërkaq nuk ka patur asnjë hetim rreth rivales së tij në zgjedhje, Hillary Clinton, duke iu referuar “33 mijë emaileve të saj të zhdukura”.

Avokati i zotit Cohen tha më herët të hënën se agjentët e FBI-së konfiskuan “komunikime klient-avokat që mbrohen me ligj,” por nuk dha hollësi mbi përmbajtjen e tyre. Ai shtoi se përdorimi i mandateve të kërkimit ishte “krejtësisht i papërshtatshëm dhe i panevojshëm”.

Michael Cohen, avokati personal i zotit Trump, muajt e fundit është vënë nën vëzhgimin e pandërprerë të medias, për shkak të një pagese prej 130 mijë dollarësh që i ka bërë aktores së filmave pornografikë Stormy Daniels, e cila pretendon se ka pasur lidhje intime me zotin Trump në mesin e viteve 2000.

Presidenti Trump thotë se nuk ka qenë në dijeni të pagesës, për të cilën disa ekspertë ligjorë thonë se mund të jetë nxjerrë nga kontributet për fushatën e tij zgjedhore dhe si rrjedhojë ka qenë e paligjshme.

Presidenti i SHBA, Donald Trump, dënoi sulmin e dyshuar kimik në Siri dhe tha se do të marrë “vendime të rëndësishme” brenda 24 deri 48 orëve të ardhshme për mënyrën se si do të reagojnë Shtetet e Bashkuara.

Gjatë një takimi në Shtëpinë e Bardhë, zoti Trump i tha kabinetit se SHBA do të gjejnë se kush është përgjegjës për sulmin: Siria, Rusia, Irani apo “të gjithë bashkë”.

“Po e shikojmë këtë çështje shumë fort, shumë seriozisht,” tha ai.

Presidenti amerikan e quajti sulmin “monstruoz”.

Po të hënën, Sekretari amerikan i Mbrojtjes Jim Mattis thotë se Shtetet e Bashkuara nuk përjashtojnë një veprim ushtarak kundër Sirisë, pas komenteve të Presidentit Donald Trump se ata që ndërmorën sulmin kimik të së shtunës do të paguanin një çmim të lartë.

“Gjëja e parë që duhet të shqyrtojmë është se përse ende përdoren armë kimike kur Rusia ishte garantuesi për heqjen e të gjitha armëve kimike”, tha zoti Mattis sot gjatë një takimi në Pentagon me sheikun e Katarit al-Thani.

Ai u tha gazetarëve se SHBA po “punojnë me aleatët dhe partnerët nga NATO-ja në Katar dhe gjetkë për ta trajtuar këtë çështje”.

Mbrëmë vonë, Shtëpia e Bardhë tha se Presidenti Trump dhe Presidenti francez Emmanuel Macron dënuan ashpër sulmet kimike në Siri dhe ranë dakord se qeveria siriane e Presidentit Bashar al-Assad duhet “të mbahet përgjegjëse për abuzimet e vazhdueshme me të drejtat e njeriut”. “Ata ranë dakord të shkëmbejnë informacion mbi natyrën e sulmeve dhe të koordinojnë një përgjigje të fortë dhe të përbashkët,” tha Shtëpia e Bardhë në një deklaratë rreth telefonatës midis dy udhëheqësve.

Këshilli i Sigurimit i Kombeve të Bashkuara do të takohet sot rreth sulmit të supozuar, pasi shumë vende kërkuan një seancë urgjente.

SIRIA DHE RUSIA AKUZOJNË IZRAELIN PËR SULM AJROR

Ndërkohë, Siria dhe Rusia thonë se dy aeroplanë luftarakë izraelitë që vepronin në hapësirën ajrore libaneze kryen sot në mëngjes një sulm kundër një baze ajrore në Sirinë qendrore.

Ushtria izraelite nuk e komentoi sulmin në bazën e njohur si T4 në provincën Homs.

Vëzhguesi sirian për të Drejtat e Njeriut me seli në Londër, tha se 14 veta janë vrarë, në mesin e tyre edhe pjesëtarë të forcave iraniane.

Në muajin shkurt Izraeli akuzoi forcat iraniane se po shfrytëzojnë bazën për të dërguar avionë pa pilotë në territorin e Izraelit.

Fillimisht mediet shtetërore siriane thanë se një sulm me raketa ka ndodhur të hënën në një bazë ajrore në provincën e Homsit në Siri, duke lënë një numër viktimash.

Zyrtarët amerikanë thanë se Shtetet e Bashkuara nuk kanë kryer sulm në Siri.

“Megjithatë, po vazhdojmë ta ndjekim nga afër situatën dhe të mbështesim përpjekjet diplomatike për t’i mbajtur përgjegjës ata në Siri dhe gjetiu për përdorimin e armëve kimike”, tha në një deklaratë zëdhënësi i Pentagonit, Christopher Sherwood.

Siria vazhdimisht ka mohuar përdorimin e armëve kimike gjatë konfliktit që filloi në vitin 2011, përfshirë edhe sulmin e fundit të dyshuar të së shtunës në para lagjet e Damaskut të kontrolluara nga kryengritësit, që la pas vetes 40 të vrarë.

Presidenti Trump përdori rrjetin Twitter të dielën për të thënë se “do të ketë një çmim të lartë për t’u paguar”, për atë që ai e quajti “sulm të çmendur kimik” të shtunën.

Në një akt të rrallë kritikash të forta në adresë të udhëheqësit rus, presidenti amerikan deklaroi se “Presidenti Putin, Rusia dhe Irani janë përgjegjës” për mbështetjen që i japin “kafshës Asad”.

Ai kërkoi më tej nga Siria hapjen e zonës për personelin mjekësor dhe verifikues.

Ministria e Jashtme ruse hodhi poshtë pohimet për sulm kimik duke theksuar se “përhapja e tregimeve të rreme për përdorimin e klorit dhe substancave të tjera helmuese nga forcat qeveritare (siriane) vazhdon”.

“Ne kemi paralajmëruar disa herë së fundmi për provokime të tilla të rrezikshme”, thuhet në deklaratën e Moskës. “Qëllimi i një spekulimi të tillë mashtrues, pa asnjë argument, është mbrojtja e terroristëve dhe përpjekje për të justifikuar përdorimin e forcës nga jashtë”.

Irani tha se pretendimet e Shteteve të Bashkuara, synojnë arsyetimin e veprimeve të reja ushtarake amerikane.

Një vit më parë, pas një sulmi me armë kimike në Siri, presidenti Trump urdhëroi goditjen më 59 raketa Tomahawk në Siri, duke vënë në shënjestër një bazë ushtarake prej nga ishin ngritur avionët që kishin kryer sulmin kimik.

Presidenti Trump nuk tha se si do të përgjigjet Amerika pas sulmit të së shtunës. Por këshilltari për sigurinë kombëtare Thomas Bossert tha për rrjetin ABC News, se “asnjë opsion nuk mund të përjashtohet”.