“Djemtë Krenarë” janë pushtuar nga entuziazmi. Grupi i ekstremit të djathtë vazhdon të festojë që kur Presidenti Donald Trump refuzoi të thotë drejtpërdrejt se ai nuk i mbështet ata dhe një sërë supremacistësh të bardhë gjatë debatit presidencial të martën në mbrëmje, në Klivlend të shtetit të Ohajos.

Zoti Trump, i cili është kritikuar se asnjëherë nuk i ka denoncuar qartë grupet e ekstremit të djathtë, u pyet nga moderatori i debatit Chris Wallace, gazetar i rrjetit televiziv Fox News, nëse ai i dënonte ekstremistët e bardhë.

“Kë do të donit të dënoja?” e pyeti Presidenti Trump gazetarin përpara se rivali i tij demokrat Joe Biden të përmendte emrin e organizatës “Djemtë Krenarë”, një grup i krahut të djathtë pro zotit Trump. “Djemtë krenarë?, pyeti zoti Trump i cili tha më pas: “Sprapsuni dhe qëndroni në gadishmëri”. “Por dua t’u them diçka“, shtoi Presidenti gjatë komentit të tij: “dikush duhet të bëjë diçka lidhur me Antifën e të majtën, sepse ky nuk është një problem i krahut të djathtë, ky është një problem i krahut të majtë“, tha ai.

“Djemtë Krenarë” marrin shpesh pjesë në tubimet e Presidentit Trump. Ndërsa disa nga anëtarët e këtij grupimi i morën komentet e presidentit si mbështetje, udhëheqësi i grupit me bazë në Florida Enrique Tarrio, me origjinë afro-kubaneze, thotë se ai nuk e sheh kështu.

“Megjithëse jam i ngazëllyer që u përmendëm gjatë debatit …nuk po e marr këtë si një mbështetje të drejtpërdrejtë nga Presidenti“, shkruante zoti Tarrio në aplikacionin Telegram.

“Ajo që tha ai se “Djemtë Krenarë” duhet të sprapsen e të qëndrojnë në gatishmëri është ajo që kemi bërë gjithmonë“, shtoi zoti Tarrio. Ai shtoi se “Djemtë Krenarë” nuk i mbështesin “supremacistët e bardhë”, duke i bërë jehonë qëndrimit të kahershëm publik të grupit kundër racizmit, antisemitizmit, nacionalizmit të bardhë e dhunës.

Por Joe Biggs, një tjetër udhëheqës i njohur i grupit, i mori komentet e zotit Trump si një thirrje për veprim.

“Trump në thelb tha shkoni, bjeruni“, shkruante zoti Biggs në llogarinë e tij në Telegram. “Kjo më gëzon shumë“.

Ndryshimi në dukje

Në vazhdën e kritikave të përhapura mbi refuzimin e tij për të denoncuar supremacistët e bardhëve, të mërkurën zoti Trump u duk se ndryshoi qëndrim.

“Nuk e di kush janë “Djemtë Krenarë“, u tha zoti Trump gazetarëve në Shtëpinë e Bardhë. “Kushdo që të jetë, ata duhet të sprapsen“.

I pyetur nëse i dënonte supremacistët e bardhë, zoti Trump tha se ai “gjithmonë ka dënuar çdo formë, që duhet dënuar”.

“Djemtë Krenarë” e prisnin atë çka duket si një ndryshim në pozicionin e zotit Trump, por kjo nuk ka gjasa ta ulë entuziazmin e tyre.

“Mos u habisni nëse ai bën një deklaratë mbi ne në ditët e ardhshme për të qetësuar popullatën“, shkruante zoti Biggs të martën në mbrëmje. “Por ai e di që ne jemi njerëz të mirë“.

Zoti Biden ishte shumë kritik ndaj paraqitjes së zotit Trump në debat. I pyetur nga një gazetar në Ohajo nëse kishte ndonjë këshillë për “Djemtë Krenarë”, ish-Nënpresidenti u përgjigj: Ndaluni menjëherë!”.

Polemikat vijnë ndërsa presidenti Trump vazhdon të fajësojë për dhunën në protestat mbi drejtësinë racore pothuajse vetëm Antifën, duke kundërshtuar vlerësimin e drejtorit të FBI-së, të zgjedhur nga vetë ai, se supremacistët e bardhë të dhunshëm mbeten kërcënimi më i madh i brendshëm për sigurinë kombëtare.

Heidi Beirich, bashkëthemeluese e Projektit Global Kundër Urrejtjes dhe Ekstremizmit, thotë se supremacistët e ekstremit të djathtë janë të entuziazmuar për shkak të asaj që ata e shohin si mbështetje nga ana e zotit Trump për “Djemtë Krenarë”, të cilët po bëjnë para me komentin e zotit Trump duke shitur bluza.

“Dhe e gjithë biseda rrotullohet tek ajo se sa e rëndësishme është kjo gjë dhe se si ata janë të gatshëm ta mbështesin presidentin“, thotë zonja Beirich. “Presidenti Trump në thelb u dha “Djemve Krenarë” një slogan të ri“, shton ajo.

Cilët janë Djemtë Krenarë?

Ata e përshkruajnë veten si një klub të “shovinistëve perëndimorë” që bëhen bashkë për të pirë. Por vëzhguesit e ekstremizmit thonë se ky është vetëm një maskim për atë që qëndron në themelet e këtij grupi me paragjykime të forta ndaj grave, kundër myslimanve dhe emigrantëve. Megjithëse grupi nuk e ka mbrojtur kurrë idenë e një shteti etnikisht të bardhë, që mbështetet nga nacionalistët e bardhë, fanatizmi në radhët e këtij grupimi është po aq ekstrem thotë zonja Beirich.

“Vetë organizata thotë se mbështet shovinizmin perëndimor, ndonjëherë civilizimin perëndimor, të cilat janë fjalë të koduara për lëvizjet e supremacistëve të bardhë“, thotë zonja Beirich.

Në një artikull në internet në vitin 2016 duke njoftuar formimin e grupit “Djemtë Krenarë”, Gavin McInnes, një aktivist kanadez i krahut të djathtë, qasja e të cilit ngjall shumë polemika dhe bashkëthemelues i revistës VICE, e përshkroi grupin si “shovinistë perëndimorë që refuzojnë të kërkojnë falje për krijimin e një bote moderne”.

Kjo frazë u bë pjesë e ceremonisë që shënoi themelimin e grupit. Sot grupi, anëtarët e të cilit shpesh veshin bluza në ngjyrë të zezë e të verdhë, kanë struktura në shumicën e shteteve, sikurse në Australi, Britani dhe Norvegji, sipas organizatës joqeveritare Lidhja Kundër Shpifjes (ADL).

ADL-ja thotë se “Djemtë Krenarë”, megjithëse i takojnë së djathtës së re, një lëvizje politike që e sheh veten të ndarë si nga konservatorizmi i zakonshëm ashtu edhe nga e djathta ekstreme e që refuzon supremacistët e bardhë, kanë “një qasje me bazë urrejtjen” ndryshe nga çfarë përmban premtimi i tyre publik. Nga ana e saj, Qendra Jugore e Ligjit për Varfërinë i ka përcaktuar “Djemtë Krenarë” si një grup që nxit urrejtjen. Megjithëse “Djemtë Krenarë” kanë mes tyre disa anëtarë jo të bardhë, sipas zonjës Beirich, ata kanë lejuar nga ana tjetër në radhët e tyre supremacistë të njohur të bardhë dhe janë shfaqur në tubime të nacionalistëve të bardhë.

Ndërthurja

Jason Kessler, ish-anëtar i “Djemve Krenarë”, ishte organizatori kryesor i tubimit të ekstremistëve të djathtë në vitin 2017 të quajtur “Bashkoni të Djathtën” në Sharlotsvill të shtetit të Virxhinias. Tubimi, i cili mblodhi së bashku neo-nazistë, anëtarë të milicisë anti-qeveritare dhe anëtarë të organizatës Ku Klus Klan përfundoi me vdekjen e një protestueseje. Anasjelltas, në vitet e fundit, grupet nacionaliste të ekstremit të djathtë kanë marrë pjesë në tubimet e organizuara nga “Djemtë Krenarë”.

“Ne besojmë se ka rrjedha të supremacistëve dhe nacionalistëve të bardhë në rrënjët e tyre“, thotë Kristen Clarke, presidente dhe drejtore ekzekutive e Komitetit të Avokatëve për të Drejtat Civile Bazuar në Ligj.

Vitin e kaluar, një oficer policie nga Konektikati u detyrua të dilte në pension pasi Komiteti i Avokatëve publikoi të dhëna se ai ishte anëtar i “Djemve Krenarë” thotë zonja Clarke.

Ndërsa publikisht “Djemtë Krenarë” e dënojnë dhunën, anëtarët e tij janë angazhuar në akte të dhunshme gjatë këtyre viteve.

Drejtori i FBI-së Christopher Wray dëshmoi në Kongres javën e kaluar se supremacistët e bardhë dhe ekstremistët anti-qeveritarë kanë qenë përgjegjës për shumicën e sulmeve të fundit me pasoja fatale nga grupet ekstremiste brenda Shteteve të Bashkuara.

Vitin e kaluar, dy anëtarë të grupit “Djemtë Krenarë” u dënuan mbi akuza për sulm e trazira lidhur me rrahjen e aktivistëve të Antifës në qytetin e Nju Jorkut në 2018-n.

Këtë vit, anëtarët e “Djemve Krenarë” kanë marrë pjesë në përleshjet e dhunshme mes aktivistëve të krahut të djathtë e të majtë në Portland të shtetit të Oregonit e në disa qytete të tjera. Më 22 gusht sipas ADL-së “Djemtë Krenarë” u përplasën me protestuesit e krahut të majtë në qytetin e Portlandit, duke u përfshirë në akte të shumta dhune.

UASHINGTON – Zyrtarët amerikanë të sigurisë kanë paralajmëruar se ekstremistë të dhunshëm vendas përbëjnë kërcënim për zgjedhjet presidenciale të muajit tjetër, ndërsa një zyrtar paralajmëron madje për ekzistencën e përbashkët të tensioneve në rritje politike, trazirave civile dhe fushatave të huaja të dezinformimit.

Dokumenta të FBI-së dhe Departamentit të Sigurisë Kombëtare (DHS) thonë se kërcënimi nga ekstremistë vendas ndaj objektivave të lidhura me zgjedhjet pritet të rritet ndërsa afrohen zgjedhjet e 3 nëntorit.

Këto paralajmërime janë bërë deri më tani brenda institucioneve. Por, zyra e sigurisë kombëtare në Nju Xhersi ndërmori hapin e pazakontë për të theksuar publikisht këtë kërcënim në një raport në faqen e saj në internet javën e kaluar.

“Është një përzierje diabolike që nuk ka ndodhur në historinë amerikane. Nëse ka ndodhur, ka qenë dekada më parë, në mos shekuj”, tha Jared Maples, drejtor i Zyrës së Sigurisë Kombëtare dhe Gatishmërisë në New Jersey, e cila publikoi këtë vlerësim të nivel të rrezikut.

Protestat mbarëkombëtare të muajve të fundit për drejtësinë racore dhe ushtrimin e tepruar të dhunës nga policia, kanë qenë përgjithësisht paqësore, por disa prej tyre u pasuan nga përplasje të dhunshme, ndër të tjera edhe mes fraksioneve ekstremiste nga e majta dhe nga e djathta.

Shtetet e Bashkuara po përballen me pandeminë e koronavirusit, papunësinë e lartë dhe zgjedhje të debatueshme presidenciale në një klimë të polarizuar politike.

Presidenti Donald Trump refuzoi javën e kaluar të angazhohej për një transferim paqësor të pushtetit, nëse humbet zgjedhjet përballë rivalit demokrat Joe Biden. Presidenti Trump është përpjekur të hedhë dyshime mbi legjitimitetin e zgjedhjeve për shkak të shqetësimeve të tij për votimin nëpërmjet postës, të inkurajuar nga demokratët gjatë pandemisë së koronavirusit.

Rastet e dokumentuara të manipulimit të votave me postë janë jashtëzakonisht të rralla dhe ekspertët zgjedhorë thonë se do të ishte pothuajse e pamundur që aktorët e huaj të çrregullonin një proces zgjedhor duke dërguar me postë vota false.

Sipas një personi të njohur me përmbajtjen, një dokument i brendshëm i FBI-së paralajmëroi kohët e fundit se ekstremistët vendas të ideologjive të ndryshme kishte gjasa të përbënin rrezik në rritje për objektivat qeveritare dhe ato të lidhura me zgjedhjet, ndërsa afron data e zgjedhjeve. Dokumenti u raportua fillimisht nga Yahoo News.

Një zëdhënëse e FBI-së tha se agjencia “vazhdimisht ndan informacionin me agjencitë partnere të zbatimit të ligjit me qëllim që t’i ndihmojë të mbrojnë komunitetet të cilave u shërbejnë”, por nuk pranoi të komentojë për dokumentin në fjalë.

Një memorandum i Departamentit të Sigurisë Kombëtare (DHS) i datës 17 gusht thotë se ekstremistët e motivuar ideologjikisht dhe aktorë të tjerë “mund të mobilizoheshin me shpejtësi” për t’u angazhuar në akte dhune për zgjedhjet. Dokumenti, gjithashtu i raportuar fillimisht nga Yahoo News, u konfirmua nga agjensia e lajmeve Reuters nga një person që ishte në dijeni.

Dokumenti thotë se supremacistë të bardhë të vetmuar dhe grupe të tjera me “ideologji të personalizuara” përbëjnë rrezikun më të madh për dhunë vdekjeprurëse.

Një zëdhënës i Departamentit të Sigurisë Kombëtare solli në vëmendje deklaratat e bëra në shtatornga Sekretari në detyrë Chad Wolf, ku ai u shpreh se departamenti “ka ndërmarrë masa të pashembullta për të trajtuar të gjitha format e ekstremizmit të dhunshëm, duke përfshirë konkretisht kërcënimin nga sulmues të vetmuar dhe nga grupe të vogla”.

Në qendër të vëmendjes

Presidenti Trump dhe zyrtarët më të lartë nuk kanë theksuar deri më tani publikisht ndonjë rrezik për zgjedhjet nga grupe të dhunshme ekstremiste.

Zyrtarë të administratës Trump kanë vënë në dukje anarkistët e krahut të majtë dhe anti-fashistët gjatë protestave në verë kundër ushtrimit të tepruar të dhunës nga policia dhe kundër racizmit. Por, të dhënat e gjykatave federale ofrojnë pak evidencë se të arrestuarit për akte të dhunshme aderonin në grupe të së majtës së skajshme.

Javën e kaluar, dy zyrtarët më të lartë të Departamentit të Sigurisë Kombëtare pranuan megjithatë gjatë seancave dëgjimore të Kongresit, se supremacistët e bardhë përbënin rrezikun më vdjekjeprurës të brendshëm për Shtetet e Bashkuara gjatë viteve të fundit.

Drejtori i FBI-së Christopher Wray tha gjatë seancave dëgjimore të Kongresit në fillim të këtij muaji se agjencia e tij po kryente hetime ndaj ekstremistëve të dhunshëm të brendshëm, përfshirë supremacistët e bardhë dhe grupet antifashiste. Ai tha se pjesa më e madhe e hetimeve ishin për grupet supremaciste të bardha.

Supremacia e bardhë, antisemitizmi, rrymat kundër qeverisë dhe ideologjitë e lidhura me to, kishin të bënin me 77 përqind të 454 vrasjeve të dyshuara ekstremiste në vend gjatë dekadës së fundit, sipas të dhënave të përpiluara nga Lidhja Anti-Shpifje, një organizatë kundër urrejtjes me seli në qytetin Nju Jork, e prezantuar në një nga seancat dëgjimore të kongresit javën e kaluar.

Zëdhënësi i Këshillit të Sigurisë Kombëtare John Ullyot i tha agjensisë së lajmeve Reuters se përparësia më e lartë e Presidentit Trump është “mbrojtja e Shteteve të Bashkuara nga të gjitha kërcënimet, të huaja dhe të brendshme”, kur u pyet nëse presidenti e kishte përmendur publikisht këtë kërcënim zgjedhor.

Zoti Maples, drejtori i sigurisë kombëtare në Nju Xhersi, tha se agjencia e tij nuk publikoi një vlerësim të kërcënimit parazgjedhor në 2016, por se kjo ishte e nevojshme kësaj here.

“Ne duam që aleatët dhe njerëzit tanë në të gjithë shtetin të pranojnë se duhet të mendojmë për këtë”, tha ai.

Raporti i shtetit Nju Xhersi përshkruan tre skenarë të mundshëm për zgjedhjet e nëntorit: një rezultat i shpejtë i zgjedhjeve; një proces i zgjatur ku përcaktimi i një fituesi merr muaj; dhe një betejë ligjore që përfundimisht shkon në Gjykatën e Lartë.

Secili prej skenarëve mund të çojë në dhunë ekstremiste, me mundësinë e konfrontimeve vdekjeprurëse midis protestuesve dhe dhunës me objektiv oficerët e policisë, përfundon vlerësimi.

Raporti i agjencisë thotë se ekstremistët me siguri do të jenë “anarkistë, antiqeveritarë dhe të motivuar nga raca”, por nuk thotë se cilat grupe paraqesin kërcënimin më të madh.

Kërcënimi ekstremist i brendshëm ka qenë gjithmonë i pranishëm, por po merr më shumë vëmendje këtë vit, thotë Mike Sena, president i Shoqatës Kombëtare të Qendrës së Fuzionit, e cila përfaqëson qendrat koordinuese të drejtuara nga shteti me personel të sigurisë publike nga agjensi federale, shtetërore dhe lokale, të cilët monitorojnë kërcënimet dhe lehtësojnë shkëmbimin e informacionit.

“Ne gjithmonë kemi patur kërcënime gjatë cikleve zgjedhore kombëtare nga ekstremistët e dhunshëm, duke përfshirë organizatat terroriste”, tha ai. “Me ngjarjet aktuale, kjo është më shumë se kurrë në qendër të vëmendjes.”

Qendra për Studime Strategjike dhe Ndërkombëtare me seli në Uashington, një organizatë studimore dypartiake, tha në një raport të qershorit se rezultati i zgjedhjeve mund të nxisë dhunë nga e djathta ekstreme ose e majta ekstreme.

“Nëse Presidenti Trump humb zgjedhjet, disa ekstremistë mund të përdorin dhunë sepse ata besojnë – sado gabim – se kishte manipulim, ose se zgjedhja e kandidatit demokrat Joe Biden do të dëmtojë objektivat e tyre ekstremiste”, thotë raporti. “Në anën tjetër, disa në ekstremin e majtë mund të përdorin terrorizmin nëse Presidenti Trump zgjidhet përsëri”. zëri i amerikës

Presidenti Donald Trump dhe rivali i tij demokrat, ish-nënpresidenti Joe Biden u përballën në një debat të ndezur të martën, që u karakterizua nga sulme të ndërsjellta, shpesh me ndërprerje fjale e në disa raste me ofeza direkte. Dy pretendentët në zgjedhjet presidenciale amerikane u angazhuan në shkëmbime me tone luftarake në debatin e tyre të parë presidencial.

Debati u zhvillua në sallën “Sheila and Eric Samson” në mjediset e universitetit “Case Western” në qytetin Klivland të Ohajos, ndërkohë që mbeten pesë javë deri në zgjedhjet e 3 nëntorit.

Debati u drejtua nga gazetari i kanalit Fox News, Chris Wallace. Këtë radhë, siç ka ndodhur që nga viti 1988, debati po sponsorizohet nga Komisionki i Debateve Presidenciale.

Pak sekonda pas fillimit të debatit, Presidenti Trump ndërpreu rivalin Joe Biden, gjë që u përsërit shpesh gjatë natës, ndërsa nënpresidenti Biden reagonte shpesh me irritim nga ndërprerjet.

COVID-19

“Presidenti nuk ka plan,” tha zoti Biden, duke folur për reagimin e administratës ndaj pandemisë. “Ai e dinte se ishte sëmundje vdekjeprurëse dhe nuk ju informoi ju (popullin amerikan)”.

Por ai shtoi se në aktivitetet e tij vijnë “35 mijë deri në 40 mijë pjesëmarrës,” duke shtuar se rivali i tij Joe Biden zhvillon aktivitete të papërfillshme “ku i vijnë vetëm tre vetë”.

Zoti Biden ka zhvilluar aktivitete më të vogla fushate, ku njerëzit qëndrojnë në distancë fizike nga njeri-tjetri. Duke e cilësuar presidentin “plotësisht të papërgjegjshëm” në ragimin ndaj COVID-19, zoti Biden tha se presidenti “është budalla në këtë temë” dhe shtoi se zoti Trump mendonte për maskë vetëm kur ishte për interes të tij dhe jo të tjerëve.

Gjatë diskutimit lidhur me temën e vendit bosh në Gjykatën e Lartë, debati devijoi tek COVID-19 dhe presidenti tha, pa ofruar prova, se 2 milionë njerëz do të kishin vdekur nëse Joe Biden do të kishte qenë president gjatë pandemisë.

Drejtuesi i debatit, gazetari Chris Wallace iu lut disa herë Presidentit Trump të ndalte komentet për COVID, meqë ajo temë do të diskutohej më pas. Ai e pyeti presidentin nëse do të zëvendësonte planin për kujdes shëndetësor të miratuar gjatë administratës Obama.

Presidenti tha “Së pari, më duket se debatin po e zhvillojmë ne të dy, dhe jo unë e Joe Biden. S’ka problem. Nuk më vjen çudi”.

Zoti Biden shpesh qeshte nën buzë gjatë komenteve të presidentit, por në disa raste dukej qartë i irrituar.

“Fakti është se çdo gjë që thotë ai (presidenti) është thjeshtë gënjeshtër. Nuk kam ardhur këtu për t’u marrë me gënjeshtrat e tij. Të gjithë e dinë se është gënjeshtar”.

Gjatë një tjetër momenti kur presidenti po ndërhynte, zoti Biden pyeti “Ia ka njeri idenë se çfarë po bën ky palaço?”

Trazirat Sociale/ Grupet Ekstremiste

Gjatë diskutimit të trazirave të fundit sociale, i pyetur nga drejtuesi i debatit, Chris Wallace nëse do të dënonte supremacistët e bardhë dhe grupet e tjera ekstremiste, presidenti nuk dha një përgjigje të qartë:

“Do të thoja se thuajse të gjitha problemet që shoh janë shkaktuar nga e majta, jo nga e djathta,” u përgjigj presidenti. “Jam gati të bëj çdo gjë. Dua të shoh paqe”.

Pas ngulmimit të gazetarit Wallace, zoti Trump tha “Si doni ju që t’i quaj. Ma thuaj, më jep një term”.

Më në fund, presidenti tha “Përmbahuni, qëndroni gati “Proud Boys”. Në fakt, duhet të bëjmë diçka në përgjigje të Antifa-s sepse ky nuk është problem i së djathtës, por i së majtës”.

“Proud Boys” është një organizatë e ekstremit të djathtë, ndërsa Antifa është grupim që përfaqëson grupe e individë të kahut të majtë.

Pasuesit e Antifa-s kanë marrë pjesë në protesta me thirrjet kundër racizmit, por nuk ka prova të konsiderueshme që mbështesin pretendimet e republikanëve se anëtarët e Antifa-s kanë qenë pas akteve të dhunshme në protesta.

Vota Afrikano-Amerikane

Dy konkurrentët u përpoqën gjatë debatit të tërheqin votën e komunitetit afrikano-amerikan. Zoti Biden ngriti pyetjen me një ton ironik: “Ky burrë është shpëtimtari i afrikano-amerikanëve? Ai nuk ka bërë praktikisht asgjë”. Ish-nënpresidenti demokrat tha se 1 ndër 1000 afrikano-amerikanë kanë vdekur nga koronavirusi dhe nëse presidenti nuk vepron menjëherë, shifra do të rritet në 1 ndër 1500.

Presidenti e zhvendosi diskutimin nga COVID-19, tek ligji kundër krimit i miratuar në 1994, në të cilin zoti Biden ka qenë i përfshirë drejtpërdrejtë, i cili forconte ndëshkimet për persona që kapeshin me drogë.

Presidenti tha “Unë po i nxjerr njerëzit nga burgu,” duke shtuar se zoti Biden i kishte trajtuar afrikano-amerikanët “më keq se kushdo tjetër në këtë vend”.

Në​ Shenjestë​r Anë​tarë​t e Familjes

Presidenti Donald Trump dhe ish-nënpresidenti Joe Biden nuk kursyen as sulmet që shënjestronin persona të familjes.

Kur zoti Biden po thoshte se marrëveshjet tregtare të administratës Trump me Kinën nuk kishin dhënë rezultatet e dëshiruara, presidenti i preu fjalën duke përmendur pretendimet e ngritura më parë ndaj djalit të rivalit të tij, Hunter Biden dhe kontratave të tij me kompani të huaja.

Presidenti tha se Hunter Biden ka fituar miliona në mënyra të pandershme nga Kina dhe kompani të huaja, duke rigjallëruar akuza që janë diskredituar. “Nuk është e vërtetë,” tha zoti Biden, duke shtuar “Mund të vazhdojmë gjithë natës me gjërat që ka bërë familja e tij”.

Presidenti e ndërpreu duke u përgjgijur se fëmijët e tij kishin lënë punë me fitime të mëdha për të shërbyer në qeveri “që të ndihmojnë popullin” gjë që u pasua nga ndërhyrja e gazetarit që u përpoq të kontrollonte shkëmbimet pa kriter gjatë debatit.

Zoti Biden iu drejtua kamerave me një koment direkt për votuesit, gjë që e bëri disa herë gjatë debatit, duke u shprehur “Këtu nuk bëhet fjalë për familjen time apo të tij (të presidentit). Por për familjet tuaja”.

Taksat e Presidentit Trump

Presidenti Donald Trump nuk pranoi të thoshte nëse do të bënte publike dokumentet fiskale, siç pat premtuar.

Gjatë debatit, presidenti u pyet lidhur me një artikull kohët e fundit nga The New York Times se ai ka paguar vetëm 750 dollarë taksa për të ardhurat vitet e fundit. Megjithë premtimet, presidenti nuk dha një datë specifike për datën e publikimit.

Rivali demokrat e sulmoi presidentin, duke thënë se ka shfrytëzuar kodin fiskal për të paguar taksa më pak se një mësues shkolle. Presidenti tha se të gjithë binzesmenët e bëjnë një gjë të tillë, “veçse nëse janë budallenj”.

Kontrasti në​ Stilin e Debatit

Debati bëri të qartë edhe stilet shumë të ndryshme mes dy rivalëve: Presidenti Trump me një stil agresiv, duke e ndërprerë zotin Biden, gjë që u pasua shpesh me komente dhe kritika nga gazetari Chris Wallace për thyerjen e protokollit të debatit.

Zoti Biden ndoqi një stil më komunikues me shikuesin, duke iu drejtuar kameras disa herë me fjalët “ju që na ndiqni nga shtëpia” me komente për votuesit amerikanë.

Toni i debatit, me ndërprerje, me komente të bëra njëkohësisht nga të dy kandidatët, shpesh duke e bërë të pamundur të kuptohej argumenti i njërit apo tjetrit, bënë që të ngrihej supozimi që ishte e pamundur të bëhet një debat pasues. Por duket se të dyja kampet rivale janë të gatshme për një debat të dytë presidencial.

UASHINGTON – Presidenti republikan Donald Trump dhe rivali i tij demokrat, ish-nënpresidenti Joe Biden, do të debatojnë mbrëmjen e së martës pesë javë përpara zgjedhjeve të 3 nëntorit. Ky është i pari nga tre debatet e planifikuara për t’u zhvilluar gjatë muajit të ardhshëm.

Debati i rëndësishëm që mbahet në qytetin Cleveland, Ohio, vjen ndërsa zoti Biden ka ruajtur prej disa javësh një avantazh me rreth 7 pikë ndaj Presidentit Trump. Nëse humbet në zgjedhje, zoti Trump do të bëhej presidenti i tretë amerikan në katër dekadat e fundit që nuk rizgjidhet për një mandat të dytë në Shtëpinë e Bardhë.

Megjithatë, gara është mjaft e afërt në disa shtete kyçe për betejën elektorale, diçka që paraqet mundësinë që Presidenti Trump mund të humbasë sërish votën popullore – ashtu siç ndodhi përballë demokrates Hillary Clinton në vitin 2016 – duke fituar megjithatë shumicën e votave elektorale të shteteve të rëndësishme që nevojiten për të fituar zgjedhjet.

Mendohet se gati 100 milionë amerikanë do t’i ndjekin dy kandidatët në përballjen prej 90 minutash në një transmetim të drejtpërdrejtë televiziv, moderuar nga gazetari i kanalit Fox News, Chris Wallace, ndërsa në audiencë do të jenë vetëm rreth 100 persona. Deri në këtë moment, dy kandidatët nuk janë shfaqur asnjëherë së bashku.

Zoti Wallace tha se ai do të bëjë pyetje për gjashtë tema në segmente 15 minutëshe: përvoja e kandidatëve; pandemia e koronavirusit që ka shkaktuar vdekjen e një numri rekord botëror prej 205 mijë njerëzish në Shtetet e Bashkuara; emërimi nga Presidentit Trump i juristes konservatore Amy Coney Barrett në Gjykatën e Lartë; ekonomia amerikane që është goditur nga pandemia; integriteti i zgjedhjeve; dhe “raca dhe dhuna” në qytetet amerikane.

Një temë e momentit të fundit është gjithashtu e sigurtë se do të jetë një pikë qendrore – një artikull të dielën i gazetës “The New York Times” se miliarderi Trump pagoi vetëm 750 dollarë në taksa federale për të ardhurat në 2016, vitin kur ai kandidoi për presidencën dhe në 2017, viti i tij i parë në zyrë. Raporti detajonte se si Presidenti Trump, i cili shpesh është mburrur me aftësitë e tij të biznesit, ka raportuar qindra miliona dollarë humbje në biznes.

Presidenti Trump e quajti njoftimin “krejtësisht lajm të rremë”, por fushata e zoti Biden të dielën e theksoi atë për të përforcuar argumentin se Presidenti Trump ka humbur lidhjet me punëtorët amerikanë për të cilët ai pretendon se po lufton. Fushata e zotit Biden filloi të transmetonte një reklamë që tregon se një mësues i shkollës fillore, një zjarrfikës, një menaxher ndërtimi dhe një infermiere paguajnë të gjithë mijëra dollarë taksa në vit ndërsa Presidenti Trump pagoi 750 dollarë.

Debatet në fushatat e kaluara presidenciale herë pas here kanë rezultuar thelbësore për rezultatin, por mbetet për t’u diskutuar nëse është kështu ky vit. Anketimet tregojnë se më shumë se 90% e votuesve thonë se ata tashmë e kanë vendosur në mendjen e tyre dhe se nuk kanë ndërmend ta ndryshojnë zgjedhjen e tyre.

Votimi i hershëm ka filluar në shumë shtete, herë pas here me radhë të gjata njerëzish që presin të hedhin votat e tyre. Miliona të tjerë kanë kërkuar të marrin ose kanë dërguar tashmë fletëvotime me postë për të shmangur takimin ballë për ballë me votuesit e tjerë në Ditën e Zgjedhjeve mes pandemisë së koronavirusit.

Presidenti Trump ka pretenduar, pa prova, se rritja e konsiderueshme e votimit me postë këtë vit do të çojë në një zgjedhje të “manipuluara” kundër tij, dhe ai refuzoi të angazhohej për një tranzicion paqësor të pushtetit në inaugurimin presidencial të janarit nëse zoti Biden fiton.

Temat e zgjedhura nga zoti Wallace për debatin pasqyrojnë lajmet e ditës në Shtetet e Bashkuara, megjithëse kritikët thonë se përshkrimet i tij për racën dhe dhunën në Shtetet e Bashkuara pasqyrojnë pretendimin e Presidentit Trump se protestat mbi abuzimin policor të pakicave në muajt e fundit janë udhëhequr nga “banditë”, rebelë dhe anarkistë.

Demokratët që mbështesin zotin Biden thonë se në vend të kësaj, diskutimi duhet të jetë rreth racizmit sistematik në Shtetet e Bashkuara dhe debatin e brendshëm mbi marrëdhëniet racore të nxjerra në pah nga vdekja në maj e afrikano-amerikanit George Floyd, ndërsa mbahej nga policia në Minneapolis, të shtetit Minesota, dhe vdekjet e njerëzve të tjerë afrikano-amerikanë në duart e policisë.

Përpara përballjes së tyre, Presidenti Trump ka vënë në dyshim mprehtësinë mendore të zotit Biden dhe u përpoq të minimizojë aftësinë e tij si debatues, duke pretenduar pa prova se demokrati duhet të ishte droguar kur doli mirë se zakonisht në debate, pasi një numër i madh kandidatësh për president të demokratëve dolën nga gara, dhe ai po përballej vetëm me senatorin e Vermontit, Bernie Sanders, para se zoti Sanders të pranonte humbjen përballë zotit Biden.

“Do të kërkoj me forcë të testohet për drogë i Përgjumuri Joe Biden para ose pas debatit të martën në mbrëmje”, shkruajti Presidenti Trump në Twitter. “Natyrisht, unë do të pranoj ta bëj edhe vetë. Shfaqjet e tij të debatit kanë qenë në një nivel rekord ÇEKUILIBRI, për ta thënë butë. Vetëm drogat mund ta kishin shkaktuar këtë mospërputhje ??? ”

Fushata e zotit Biden u përgjigj se: “Nënpresidenti Biden synon t’i japë përgjigjet e tij në debat me fjalë. Nëse presidenti mendon se argumenti i tij më i mirë bëhet me urinë, atëherë le të vazhdojë”.

Presidenti Trump shkruajti në Twitter: “Joe Biden sapo njoftoi se nuk do të pranojë një Test Droge. Pyes veten përse?”

Çfarë duhet të kenë parasysh në debat kandidatët

Aaron Kall, trajneri për debat në Universitetin e Miçiganit dhe bashkëautor i librit “Të debatosh me Donaldin”, tha se edhe me ndoshta më pak votues të pavendosur sesa në vitet e kaluara të zgjedhjeve presidenciale, dy kandidatët duhet të shfaqin një kompetencë të caktuar për votuesit.

Zoti Biden, tashmë 77 vjeç, shërbeu për 36 vjet në Senatin amerikan dhe tetë si nënpresident me ish-Presidentin Barack Obama. Zoti Kall tha se zoti Biden “duhet të sigurojë votuesit e pavendosur se ai është fizikisht dhe mendërisht në nivelin e të qenit president, dhe një paraqitje e fortë përballë presidentit aktual për 90 minuta është një mënyrë e shkëlqyer për ta bërë këtë”.

“Biden duhet të nxjerrë në pah kontrastin e përvojës, axhendës dhe vizionit të tij për të ardhmen me Presidentin Trump,” tha zoti Kall.

Ndërkohë, zoti Kall tha se Presidenti Trump, në moshën 74 vjeç, “duhet të argumentojë përse ai duhet të rizgjidhet dhe pse meriton katër vite të tjera në detyrë. Ekonomia përgjithësisht shihet si forca e tij më e madhe në sondazhet e opinioneve dhe ai duhet të ketë një plan të detajuar për të ulur papunësinë dhe për të rritur rritjen ekonomike”.

Me ciklin më të fundit të shpenzimeve për krizën e koronavirusit në Kongres të bllokuar, Presidenti Trump duhet të bëjë të njohur vizionin e tij konkret, thotë zoti Kall. Për më tepër, megjithëse kujdesi shëndetësor nuk është një nga gjashtë temat për debatin e parë, Presidenti Trump “duhet të jetë në gjendje të artikulojë zëvendësimin e tij të dëshiruar për Aktin e Kujdesit të Përballueshëm, pasi kjo ka të ngjarë të dalë gjatë seksionit të Gjykatës Supreme” të debatit, tha zoti Kall.

Trajnuesi për debatet tha se Presidenti Trump “shpreson që Biden të bëjë një gabim të madh skualifikues, por mbështetja te kundërshtari juaj për të bërë një gabim nuk është një strategji e shëndoshë e debatit”.

Trump shpesh ekzagjeron pretendimet në lidhje me lajmet e ditës, por zoti Kall tha se zoti Biden “duhet t’i përzgjedhë betejat e tij në lidhje me të pavërtetat e Presidentit Trump, pasi ato nuk janë krijuar të gjitha të barabarta, dhe ka të ngjarë të ketë shumë prej tyre”.

“Është e pamundur t’i lësh disa gjëra të kalojnë”, tha zoti Kall, “por Biden nuk mund ta kalojë shumicën e kohës së tij të çmuar të të folurit në mbrojtje dhe duke korrigjuar Presidentin Trump. Biden ka deklaruar publikisht se ai synon të kontrollojë faktet e Presidentit Trump në kohë reale, por ky do të ishte një gabim”.

Ai e këshillon Presidentin Trump që të mos vërë në dyshim aftësinë mendore të zotit Biden për presidencën.

“Këto akuza nga Presidenti Trump para debatit tashmë kanë ulur pritshmëritë për Biden-in dhe e kanë bërë akoma më të vështirë debatin për atë që është në pushtet”, tha zoti Kall.

“Presidenti Trump në përgjithësi ka qenë i suksesshëm në shndërrimin e kundërshtarëve të tij politikë në karikatura, por është shumë më e vështirë ta bësh këtë kur dikush tjetër po ndan skenën me ju”, tha zoti Kall. “Presidenti Trump do të ishte më mirë të sulmonte historikun Obama-Biden, duke përmendur dallimet me katër vitet e tij të fundit në detyrë”. zëri i amerikës

UASHINGTON – Administrata Trump ka propozuar të eliminojë “kohëzgjatjen e statusit” për vizat për studentët ndërkombëtarë, vizitorët e programeve të shkëmbimit dhe ata që punojnë në mediat ndërkombëtare. Zyrtarët shpresojnë të vendosin data fikse të përfundimit, në vend që të lejojnë që vizat të jenë të vlefshme për aq kohë sa u duhen atyre për të marrë diplomën ose për të përfunduar një projekt kërkimor.

Aktualisht, një mbajtës i një vize F-1 mund të qëndrojë në vend derisa studenti të përfundojë një program studimi ose nëse studenti vazhdon të plotësojë kërkesat e programit.

Rregullorja e propozuar, prej 256 faqesh, e publikuar të enjten nga Departamenti i Sigurisë Kombëtare të Shteteve të Bashkuara (DHS), do të përcaktonte datat e skadimit 4-vjeçar dhe do të ofronte dy vite për ata që marrin trajnim gjuhësor, me hapësira të kufizuara për të aplikuar për një zgjatje.

Si përcaktohet aktualisht “kohëzgjatja e statusit”?

“Kohëzgjatja e statusit” do të thotë që në vend të një afati të caktuar, një studenti ndërkombëtar i lejohet të qëndrojë në Shtetet e Bashkuara për aq kohë sa i duhet për të marrë diplomën, për sa kohë që regjistrohet me kohë të plotë në kurset mësimore dhe nuk shkel ligjin e emigracionit, për shembull duke punuar në mënyrë të paligjshme.

Kush preket nga udhëzimi i propozuar?

Rregulli do të ndikonte në mbajtësit e vizave në kategoritë F, J dhe I të cilët lejohen të jetojnë përkohësisht në SH.B.A. për të fituar një diplomë të arsimit të lartë, individë me aftësi unike, të cilët janë të aprovuar të marrin pjesë në programe shkëmbimi vizitorësh të bazuar në punë dhe studim, si dhe gazetarë të huaj.

Sipas DHS, shtetasit nga vendet e lidhura me norma të larta të shkeljes së afatit të qëndrimit të vizave – më shumë se 10% – pritet të kenë një periudhë të kufizuar qëndrimi fikse dy-vjeçare.

Vendasit ose shtetasit e vendeve në Listën e Sponsorëve të Terrorizmit të Departamentit të Shtetit gjithashtu do të kufizohen në 2 vjet qëndrimi në SH.B.A.

Çfarë thotë DHS?

DHS (Departamenti i Sigurisë Kombëtare) tha se politika aktuale e kohëzgjatjes së statusit dhe “rritja e konsiderueshme” e numrit të studentëve me viza F, vizitorëve të shkëmbimit me viza J, dhe përfaqësues të mediave të huaja me viza I, paraqesin “një sfidë për aftësinë e Departamentit për të monitoruar dhe mbikëqyrur në mënyrë efikase këto kategori të jo-emigrantëve”.

DHS shton se, “Departamenti në përputhje me rrethanat është i shqetësuar për integritetin e programeve dhe një potencial për rritje të rrezikut për sigurinë kombëtare”.

Botimi në internet “Inside Higher Ed” raporton një rënie prej 15 përqind të regjistrimit të përgjithshëm të studentëve në vitin akademik 2020-2021, duke përfshirë një rënie prej 25% të regjistrimit të studentëve ndërkombëtarë. Gjetjet mund të nënkuptojnë një humbje prej 23 miliardë dollarësh në të ardhura për ekonominë amerikane.

Sarah Spreitzer, drejtoreshë e marrëdhënieve me qeverinë për Këshillin Amerikan të Arsimit, tha se ekziston një “prirje në rënie” në regjistrimin e studentëve ndërkombëtarë gjatë pesë viteve të fundit pas rritjes së një dekade të regjistrimeve ndërkombëtare të studentëve në vend.

“Shumë nga gjërat për të cilat DHS flet në lidhje me vizat studentore, [të tilla si] studentët, ndryshimi i nivelit arsimor, koha e tyre për t’u diplomuar – shumë nga informacionet po gjurmohen tashmë përmes sistemit SEVIS”, tha zonja Spreitzer.

SEVIS është Sistemi Informativ i Studentëve dhe Vizitorëve të Shkëmbimit.

“Institucionet tona po i regjistrojnë të gjitha ato informacione në DHS tashmë përmes atij sistemi, i cili u krijua pas 11 Shtatorit (2001). Dhe kështu është e paqartë se si kjo do t’i japë DHS-së edhe më shumë informacion sesa ata tashmë kanë”, tha ajo.

Çfarë ndodh me ata që janë tashmë në vend?

Stephen Yale-Loehr, një profesor i praktikës së emigracionit në Universitetin Cornell, tha se rregulli i propozuar thotë se studentët ndërkombëtarë aktualisht në Shtetet e Bashkuara do të jenë në gjendje të qëndrojnë sipas rregullave të mëparshme, duke mos kaluar 4 vjet nga data efektive e rregullores përfundimtare.

Zoti Yale-Loehr gjithashtu tha se rregullorja mund të ndalojë zgjatjet për studentët ndërkombëtarë nëse agjensia e emigracionit vendos që një mbajtës i vizave nuk po bën përparim drejt diplomës së tyre.

“Rregulli i propozuar do të kërkonte që shumica e studentëve ndërkombëtarë të mbaronin studimet e tyre në katër vjet, në vend që të zgjasë sa ç’kërkon normalisht. Për shembull, shumë studentëve të doktoraturës zakonisht u duhen më shumë se katër vjet për të marrë diplomën e tyre”, tha zoti Yale-Loehr.

Cilat janë arsyet për një zgjatje?

Rregulli i ri thotë se aplikimet për zgjatjen e vizave mund të aprovohen “nëse koha shtesë e nevojshme është për shkak të një arsyeje akademike bindëse, sëmundjes së dokumentuar mjekësore ose gjendjes mjekësore, ose rrethanave që ishin përtej kontrollit të studentit”.

Kur hyn në fuqi rregulli?

Rregulli është në fazën e propozimit dhe ai nuk do të hyjë në fuqi menjëherë. Publiku do të ketë 30 ditë kohë për të komentuar.

Pas kësaj, agjencia e emigracionit do të duhet të rishikojë të gjitha komentet, të hartojë një rregull përfundimtar dhe ta dërgojë atë në Zyrën e Menaxhimit dhe Buxhetit për shqyrtim përpara se një rregull përfundimtar të mund të hyjë në fuqi.

Duke pasur parasysh të gjitha ato hapa, ekspertët e arsimit thanë se ata nuk presin që një rregullore përfundimtare të hyjë në fuqi para zgjedhjeve presidenciale të nëntorit dhe ndoshta jo para se presidenti të inaugurohet në janar.

Megjithatë, ekspertët e shohin atë si një dekurajim për studentët ndërkombëtarë dhe të tjerët.

“Kjo do të ketë një ndikim të përgjithshëm tronditës dhe të vazhdueshëm për studentët e rinj që po mendojnë të vijnë në SH.B.A. për të studiuar, të cilët mund të kenë zgjedhjen për të studiuar në një nga vendet tona konkurente si Kanadaja, ose Mbretëria e Bashkuar, ose Australia ose Zelanda e Re”, shtoi zonja Spreitzer.

SHTËPIA E BARDHË – Presidenti Donald Trump nuk ka pranuar të konfirmojë nëse do të ishte i gatshëm për një kalim paqësor të pushtetit nëse do të humbiste betejën për t’u rizgjedhur më 3 nëntor përballë kandidatit demokrat për president Joe Biden.

“Do të duhet të shohim se çfarë do të ndodhë”, tha presidenti në përgjigje të pyetjes së një gazetari gjatë një konference për shtyp të Shtëpisë së Bardhë të mërkurën në mbrëmje. “Unë jam ankuar me shumë forcë për fletëvotimet dhe ato janë një katastrofë”.

Pa paraqitur asnjë provë, Presidenti Trump ka folur vazhdimisht për manipulime masive falë dhjetëra miliona fletëvotimeve të dërguara nëpërmjet postës, sistem të cilin demokratët e kanë inkurajuar për shkak të pandemisë së koronavirusit.

“Ne duam të kemi – t’i heqim fletët e votimit”, vazhdoi presidenti, duke shpjeguar se nëse do të krijohej një situatë e atillë “nuk do të ketë një transferim, sinqerisht; do të ketë një vazhdimësi”.

Zoti Biden u pyet t’u përgjigjej komenteve të Presidentit Trump, kur mbërriti në Delauerë të mërkurën në mbrëmje.

“Në cilin vend jemi? Po e them me humor”, tha ish-nënpresidenti. “Thashë, në cilin vend jemi? Shikoni, ai thotë gjërat më të palogjikshme. Nuk di çfarë të them”.

Të paktën një nga kolegët e tjerë republikanë të Presidentit Trump në Senat, u shpreh i alarmuar për komentet e presidentit.

“Thelbësore për demokracinë është kalimi paqësor i pushtetit; pa atë kemi Bjellorusi”, tha në Twitter Senatori Mitt Romney nga shteti Jutah. “Çdo sugjerim që një president mund të mos respektojë këtë garanci kushtetuese është i paimagjinueshëm dhe i papranueshëm”.

Zoti Romney ishte kandidati i partisë së tij për president në 2012-ën dhe ka qenë një nga republikanët e paktë në Senat që herë pas here nuk ka qenë dakort me retorikën dhe veprimet e Presidentit Trump.

“Nuk ka dyshim që ai nënkupton pikërisht atë që tha”, tha ligjvënësi demokrat Adam Schiff, kryetari i Komisionit të Zbulimit të Dhomës së Përfaqësuesve, në kanalin MSNBC rreth komentit të presidentit, duke shtuar se ishte koha që ata që shërbenin në administratën Trump “të jepnin dorëheqjen” në protestë.

Një nga grupet më të vjetra të të drejtave kushtetuese të vendit gjithashtu komentoi.

“Transferimi paqësor i pushtetit është thelbësor për një demokraci funksionale. Kjo deklaratë nga presidenti i Shteteve të Bashkuara duhet të shqetësojë çdo amerikan”, tha David Cole, drejtori kombëtar ligjor i Unionit Amerikan të Lirive Civile.

Më herët të mërkurën, Presidenti Trump tha se ai mendon se zgjedhjet e nëntorit “do të përfundojnë në Gjykatën e Lartë dhe unë mendoj se është shumë e rëndësishme që të kemi nëntë gjyqtarë”.

Presidenti planifikon të shpallë të emëruarën e tij për Gjykatën e Lartë të shtunën që nëse miratohet do të zëvendësonte gjykatësen liberale Ruth Bader Ginsburg, e cila vdiq të premten e kaluar.

Nëse Senati konfirmon kandidaten e presidentit para zgjedhjeve, kjo do t’i jepte krahut konservator një shumicë 6-3 në gjykatë.

“Ky mashtrim që demokratët po bëjnë, është një mashtrim, mashtrimi do të jetë përpara Gjykatës së Lartë të Shteteve të Bashkuara dhe unë mendoj se të kesh një situatë 4-4 nuk është një situatë e mirë”, tha Presidenti Trump.

Presidenti ka shprehur vazhdimisht shqetësimin në lidhje me planet nga një numër shtetesh, duke përfshirë shtetet Kaliforni, Kolorado, Hauai, Nevada, Nju Xhersi, Oregon, Jutah, Vermont dhe Uashington, për të dërguar automatikisht fletëvotime për zgjedhjet të gjithë banorëve të shtetit.

Benjamin Ginsberg, një avokat i njohur për çështjet zgjedhore i cili ka përfaqësuar katër kandidatë republikanë për president, është cituar këtë muaj duke thënë se parashikimi i Presidentit Trump për mashtrim me këto vota nuk ka prova.

“Fjalët e presidentit e bëjnë retorikën e tij dhe të Partisë Republikane të duket më pak si një shqetësim i sinqertë – dhe më shumë si hipokrizi për të siguruar një avantazh elektoral”, shkruajti zoti Ginsberg në një artikull në gazetën Washington Post. “Dhe ata dalin ndërsa republikanët që përpiqen të fitojnë çështjet e tyre në gjykata duhet të përballen me të vërtetën themelore se katër dekada hetimi të dedikuar kanë prodhuar vetëm incidente të izoluara të manipulimit të zgjedhjeve”.

UASHINGTON – Zyrtarët e sigurisë së zgjedhjeve në Shtetet e Bashkuara po përgatisin publikun amerikan për një lloj të ri të skenarit më të keq për zgjedhjet presidenciale të 3 nëntorit – një vërshim dezinformimesh në orët menjëherë pas mbylljes së votimeve, duke hedhur dyshime mbi rezultatet dhe vetë procesin, ndërsa votuesit do të jenë në pritje të mësojnë se kush do të drejtojë vendin për katër vitet e ardhshme.

Zyrtarët paralajmërojnë se sulmet e mundshme do të jenë të përhapura dhe të projektuara për t’i bërë amerikanët dyshues për çdo informacion që marrin, madje edhe nga burime normalisht të besueshme.

“Aktorët e huaj dhe kriminelët kibernetikë mund të krijojnë faqe të reja në internet, të ndryshojnë faqet elektronike ekzistuese dhe të krijojnë ose ndajnë përmbajtje korresponduese të mediave sociale për të përhapur informacion të rremë”, paralajmëroi Byroja Federale e Hetimeve (FBI) dhe Agjencia e Sigurisë dhe Informacionit Kibernetik (CISA) përmes një njoftimi të lëshuar të martën vonë.

“FBI dhe CISA nxisin publikun amerikan të vlerësojë në mënyrë kritike burimet e informacionit që ata konsumojnë dhe të kërkojnë informacione të besueshme dhe të verifikuara nga burime të besuara, të tilla si zyrtarët e zgjedhjeve shtetërore dhe lokale,” thuhet në njoftim. “Publiku duhet të jetë i vetëdijshëm se nëse aktorët e huaj ose kriminelët në internet do të ishin në gjendje të ndryshonin me sukses një faqe elektronike të lidhur me zgjedhjet, të dhënat themelore dhe sistemet e brendshme do të mbeteshin të pakompromentuara.”

Shqetësimet nuk janë të reja. Për muaj me radhë, zyrtarët e sigurisë së zgjedhjeve federale dhe shtetërore janë përpjekur të përgatisin votuesit, duke u thënë atyre se për shkak të një rritjeje të pritshme të fletëvotimeve me postë për shkak të pandemisë së koronavirusit, mund të kalojnë disa ditë para se të shpallet fituesi i zgjedhjeve presidenciale .

Zyrtarët amerikanë të kundërzbulimit kanë paralajmëruar gjithashtu muajt e fundit se vende si Kina, Rusia dhe Irani, si dhe aktorë të tjerë kibernetikë, kanë kryer operacione ndikimi për të “minuar besimin e popullit amerikan në procesin demokratik të SHBA”.

Por paralajmërimi i ri i FBI-së dhe CISA-s shkon më tej, duke dhënë hollësi se si kundërshtarët mund të përpiqen të mashtrojnë publikun amerikan në internet dhe përmes mediave sociale.

Bllokimi i valës së dezinformimit ndërsa zgjedhjet po afrojnë mund të jetë një sfidë e vështirë.

Megjithatë, disa zyrtarë zgjedhorë shohin arsye për shpresë, bazuar në vullnetin që kanë treguar kompanitë e mediave sociale për t’u takuar me ta gjatë disa muajve të fundit për të folur se si mund të shmangen fushatat e dezinformimit. Disa nga këto përpjekje po japin rezultat.

Të martën, Facebook-u hoqi më shumë se 150 llogari, faqe dhe grupe të lidhura me Kinën, disa prej të cilave kishin në shënjestër zgjedhjet amerikane.

Facebook-u dhe Twitter-i gjithashtu kanë njoftuar heqjen e llogarive të lidhura me Agjencinë ruse të Kërkimit në Internet, që merret me dezinformimin online.

Në fillim të këtij muaji, firma Microsoft doli publikisht me informacionin se si hakerat e lidhur me Kinën, Rusinë dhe Iranin kishin vënë aktivisht në shënjestër fushatat e Presidentit Donald Trump dhe rivalit të tij kryesor, Joe Biden.

Disa ekspertë shqetësohen se kjo mund të mos jetë e mjaftueshme.

“Shumë nga platformat kryesore online kanë vendosur të tregohen shumë më aktive,” thotë Emily Fry, drejtoreshë për Integrimin Kibernetik në Korporatën MITRE.

Disa zyrtarë shtetërorë janë po aq të shqetësuar se a do të jenë të aftë një fushatë dezinformuese të përmasave të mëdha.

“Unë shqetësohem për dy ditët e fundit dhe për ditën e zgjedhjeve,” thotë Sekretarja e Shtetit e Pensilvanisë, Kathy Boockvar.

CISA dhe zyrtarët shtetërorë të zgjedhjeve po marrin masa, duke u përpjekur të imunizojnë votuesit ndaj valës së pritshme të dezinformimit, duke i nxitur ata të përgatiten, të marrin pjesë në zgjedhje dhe, veçanërisht, të jenë të durueshëm.

“Ndoshta do të duhet pak më shumë kohë për të bërë numërimin për shkak të rritjes së numrit të fletëvotimeve me postë”, tha Drejtori i CISA-s Christopher Krebs javën e kaluar në Samitin e Sigurisë Kibernetike në Billington. “Kini pak durim. Demokracia nuk është krijuar brenda një dite.”

Shqetësimet nuk janë të reja. Për muaj me radhë, zyrtarët e sigurimit të zgjedhjeve federale dhe shtetërore janë përpjekur të përgatisin votuesit, duke u thënë atyre se për shkak të një rritje të pritshme të përdorimit të fletëvotimeve me postë për shkak të pandemisë së koronavirusit, mund të kalojnë disa ditë para se të shpallet fituesi i zgjedhjeve presidenciale .

Vdekja e anëtares së Gjykatës së Lartë, Ruth Bader Ginsburg i jep Presidentit Donald Trump një mundësi për të emëruar një tjetër konservator në gjykatën më të lartë të vendit dhe për ta zhvendosur edhe më shumë nga e djathta, balancën e saj, vetëm më pak se shtatë javë para zgjedhjeve presidenciale.

Vdekja e saj po ndez një betejë politike lidhur me faktin nëse zoti Trump duhet të emërojë dikë për të zëvendësuar gjykatësen me një seancë konfirmimi në senatin me shumicë republikane, apo ta lërë të paplotësuar vendin e saj, derisa të dalë rezultati i zgjedhjeve.

Aktualisht gjykata ka një shumicë konservatore 5 me 4. Emërimi në Gjykatën e Lartë është i përjetshëm.

Presidenti Trump shkruante të shtunën në Twitter se republikanët kanë detyrimin “të veprojnë pa vonesë”, për të zëvendësuar gjykatësen Ginsburg.

“Ne jemi vendosur në këtë pozicion me pushtet dhe rëndësi për të marrë vendime për njerëzit që me aq krenari na zgjodhën dhe për një kohë të gjatë më i rëndësishmi është konsideruar ai për përzgjedhjen e anëtarëve të Gjykatës së Lartë. E kemi këtë detyrim, (ta bëjmë) pa vonesë”, tha ai.

Udhëheqësi republikan i Senatit, Mitch McConnell tha në një deklaratë të premten se çdo kandidat që mund të caktojë Presidenti Trump “do të marrë një votim votim në senatin amerikan”.

Kandidati demokrat për president, Joe Biden tha i bëri thirrje Senatit që të priste për konfirmimin e dikujt tjetër në postin e gjykatëses, duke thënë se “votuesit duhet të zgjedhin presidentin dhe presidenti duhet të zgjedhë kandidatin që duhet të shqyrtojë Senati”.

Radioja publike NPR njofton se vetëm disa ditë para se të vdiste, gjykatësja Ginsburg i kishte diktuar një deklaratë mbesës së saj, ku shprehej: “Dëshira ime më e zjarrtë është që mos zëvendësohem deri kur të zgjidhte presidenti i ardhshëm”.

Me një shumicë të re edhe më të thellë, forcat konservatore mund të mbizotërojnë për çështje që nga të drejtat e abortit, tek imigracioni dhe deri tek kompetencat ekzekutive. Deri tani zoti Trump ka ruajtur status quo-në, duke caktuar dy gjykatës konservatorë – Neil Gorsuch dhe Brett Kavanaugh – për të zëvendësuar anëtarë të tjerë të emëruar nga republikanët.

Por me vdekjen e gjykatëses Ginsburg, Presidenti Trump mund të bëjë diçka që asnjë president nuk e ka bërë prej dekadash, të zëvendësojë një anëtare demokrate me një anëtar republikan të gjykatës. Hera e fundit që kjo ndodhi ishte në vitin 1991 kur Presidenti republikan, George H.W. Bush emëroi gjykatësin konservator Clarence Thomas për të zëvendësuar ikonën liberale, Thurgood Marshall.

E emëruar në vitin 1993 nga ish-Presidenti Bill Clinton, zonja Ginsburg që vdiq në shtëpinë e saj në Uashington në moshën 87 vjeçare nga kanceri, ishte gjykatësja liberale më e moshuar dhe që kishte shërbyer më gjatë në Gjykatën me nëntë anëtarë.

Për shumë liberale, mundësia e emërimit të një kandidati konservator, materializon diçka të cilës i ishin druajtur prej kohësh.

“Kandidati i ardhshëm, me siguri do të ketë pozicione edhe më të djathta se sa gjykatësit Kavanaugh dhe Gorsuch”, thotë drejtori ekzekutiv i organizatës “Fix the Court”.

Zonja Ginsburg, një zë i fuqishëm për kauza liberale ishte vetëm e dyta grua që bëhej anëtare e Gjykatës së Lartë.“Kombi ynë ka humbur një gjykatëse me një stature historike,” tha përmes një deklarate Kryetari i Gjykatës së Lartë, John Roberts. Zonja Ginsburg, gruaja e dytë që shërbeu në gjykatën më të lartë amerikane, e filloi profesionin në një periudhë kur kishte shumë pak gra juriste. Ajo u përpoq gjatë karrierës së saj të zgjeronte barazinë e grave dhe arriti në statusin e pothuajse një ikone në radhët e qarqeve progresiste.

“Unë kam katër vajza dhe u thashë atyre se kjo grua konsolidoi të drejtat e grave si qenie të barabarta njerëzore”, tha Kimberly Wehle, profesore e së drejtës në Universitetin e Baltimorës.

“Sigurisht ka shumë gra dhe burra që kanë pasur rol në këtë drejtim. Por përsa i takon jurisprudencës, ishte puna e saj si jurist dhe sigurisht si anëtare e Gjykatës së Lartë”, tha ajo.

E nohur si dikush që shprehte atë që mendonte, gjykatësja Ginsburg u përplas me zotin Trump gjatë fushatës presidenciale të vitit 2016, duke thënë se ai ishte dikush që shtirej, duke shkaktuar reagimin e tij që ajo të jepte dorëheqjen.

Presidenti Trump u shpreh në një deklaratë pas vdekjes se “gjykatësja Ginsburg tregoi se mund të mos jesh dakord, pa qenë i pasjellshëm ndaj kolegëve apo këndvështrimeve të ndryshme”.