Televizioni shtetëror italian tha të hënën në mbrëmje se autoritetet po hetonin përshëndetjen masive në demonstratë.

Politikanët e opozitës në Itali të hënën kërkuan që Qeveria, e kryesuar nga kryeministri i ekstremit të djathtë Giorgia Meloni, të shpjegojë se si qindra demonstrues arritën të bënin një përshëndetje të ndaluar fashiste në një tubim në Romë pa asnjë ndërhyrje policore.

Tubimi i së dielës mbrëma në një lagje të klasës punëtore përkujtoi vrasjen në vitin 1978 të dy anëtarëve të një grupi rinor neofashist në një sulm të pretenduar më vonë nga militantët e ekstremit të majtë.

Në një moment të tubimit, pjesëmarrësit ngritën krahun e djathtë në një përshëndetje me krahun  drejt që i referohet diktaturës fashiste të Benito Musolinit.

Sipas legjislacionit të pasluftës, përdorimi i simbolikës fashiste, përfshirë përshëndetjen me krahun drejt të njohur edhe si përshëndetja romane, është e ndaluar.

Shefja e Partisë Demokratike Elly Schlein, e cila kryeson partinë më të madhe opozitare në legjislaturë, ishte ndër ata që kërkuan të hënën që Ministri i Brendshëm i Melonit të paraqitej në Parlament për të shpjeguar pse policia me sa duket nuk bëri asgjë për të ndaluar tubimin.

Elly Schlein dhe të tjerët të indinjuar nga përdorimi i përshëndetjes fashiste në tubim e vunë në dukje këtë muajin e kaluar, kur një shikues në premierë në La Scala bërtiti “Rroftë Italia antifashiste!” Burri u rrethua shpejt nga policia nga skuadra antiterrorizëm e Italisë.

“Nëse bërtisni “Rroftë Italia antifashiste”në një teatër, ju identifikoheni nga policia; nëse shkon në një tubim neofashist me përshëndetje dhe banderola romane, nuk identifikohesh,” tha Schlein në një postim në platformën e mediave sociale X. Më pas ajo shtoi: “Meloni nuk ka asgjë për të thënë?”

Televizioni Shtetëror Rai tha të hënën në mbrëmje se policia italiane po hetonte përshëndetjen masive në tubim.

Zëvendëskryeministri Antoni Tajani, i cili drejton një parti të qendrës së djathtë në koalicionin 14-mujor të Melonit, u mësy nga gazetarët për përshëndetjen fashiste.

“Ne jemi një forcë që sigurisht nuk është fashiste, ne jemi antifashistë,” tha Tajani në një konferencë shtypi për një çështje tjetër.

Tajani, i cili shërben gjithashtu si ministër i Jashtëm, vuri në dukje se sipas ligjit italian, mbështetja e fashizmit është e ndaluar. Të gjitha mitingjet “në mbështetje të diktaturës duhet të dënohen”, tha ai.sn

SYRI TV ka zbardhur se deri më ora 18.00 të datës 11 janar 2024, deputetët e parlamentit italian kanë afat të prezantojnë në format dixhital, propozimet amenduese mbi draft-ligjin “Ratifikimi e ekzekutimi i protokollit mes Qeverisë së Republikës Italiane e Këshillit të Minsitrave të Republikës së Shqipërisë mbi forcimin e bashkëpunimit në fushën e emigracionit firmosur më 6 nëntor 2023 në Romë si dhe normat e koordinimit të sistemit të brendshëm ligjor.”

Prej orës 17.15 të ditës së sotme, 8 janar 2024 e deri më ora 18.00 të datës 11 janar Komisioni i Çështjeve të Jashtme e Çështjeve Komunitare në parlamentin italian, nis një maratonë dëgjesash informale me ekspertët më të mirë të problematikave të së drejtave kushtetuese e humanitare mbi emigracionin, njoftoi gazetarja Alba Kepi nga Italia.

SYRI TV ka mësuar se në dëgjesat informale me komisionin parlamentar është ftuar të flas në lidhje videokonferencë dhe shqiptarja Lea Ypi, profesoreshë e Teorisë Politike në departamentin e qeverisë pranë Shkollës së Ekonomisë në Londër.

Në kalendarin e këtij komisioni, pasditen e sotme parashikohen dëgjesat me katër profesorë universitarë të Universiteteve King’s College Londër, Universiteti  Tuscia, Universitit Roma Tre e Universiteti i Firenzes, dhe me Ambasadorin italian në Tiranë Fabrizio Bucci.

Ditën e dytë të dëgjesave, datë 9 janar 2024, do të referojnë 6 profesorë të tjerë universitarë mes të cilëve dhe shqiptarja Lea Ypi si dhe përfaqësues të organizatës joqeveritare Mediterranea Saving Humans, përfaqësues të Amnesty International, përfaqësues të Organizatës Botërore të Emigrantëve dhe përfaqësues të shoqatës kombëtare italiane Juristët Demokratë.

Komisioni i Çështjeve të Jashtme do të mbyll dëgjesat më ora 18.00 të datës 11 janar me afatin e fundit kohor të dorëzimit të propozimeve amenduese mbi këtë draft ligj.

Nuk është parashikuar hedhja në votë e tij brenda Komisionit të Çështjeve të Jashtme.

Pas analizës në Komision, draft ligji do të merret në diskutim nga Dhoma e Deputetëve e do t’i nënshtrohet votës së parlamentarëve.

Bashkimi Evropian duhet të formojë ushtrinë e tij të përbashkët që mund të luajë një rol paqeruajtës dhe për të parandalojë konflikte, tha ministri i Jashtëm italian, Antonio Tajani.

Në një intervistë për gazetën italiane, La Stampa, Tajani tha se bashkëpunimi më i ngushtë evropian në fushën e mbrojtjes është prioritet i partisë Forza Italia, që ai udhëheq.

“Nëse duam të jemi paqeruajtës në botë na duhet një ushtri evropiane. Ky është një parakusht thelbësor që të jemi në gjendje të kemi një politikë efektive të jashtme evropiane”, tha ai në intervistën që u publikua më 7 janar.

“Në një botë me lojtarë të fuqishëm sikurse Shtetet e Bashkuara, Kina, India, Rusia – me kriza nga Lindja e Mesme e deri në Indo-Paqësor – qytetarët italianë, francezë apo sllovenë mund të mborhen vetëm nga diçka që veçse ekziston, domethënë Bashkimi Evropian”, shtoi ai.

Çështja e bashkëpunimit evropian në fushën e mbrojtjes është ngritur në agjendën politike që kur Rusia nisi pushtimin e Ukrainës pothuajse dy vjet më parë.

Megjithatë, përpjekjet janë përqendruar më shumë në zgjerimin e NATO-s, me Finlandën – anëtaren e BE-së – që iu bashkua aleancës vitin e kaluar dhe me Suedinë që po ashtu është në rrugë që t’i bashkohet NATO-s.

Tajani po ashtu tha se 27 shtetet e BE-së duhet të përmirësojnë udhëheqjen e tyre dhe të krijojnë një presidencë të vetme, e jo sikurse struktura aktuale, ku Këshilli Evropian ka president dhe Komisioni Evropian po ashtu ka president.

Tajani u bë udhëheqës i Forza Italia vitin e kaluar pas vdekjes së Silvio Berlusconit.

Zgjedhjet e Parlamentit Evropian në qershor do të jenë matësi i parë i popullaritetit të partisë, pasi humbi liderin e saj karizmatik, Silvio Berlusconi.rel

Rusia e ka sulmuar Ukrainën me raketa, me të cilat e furnizoi Koreja e Veriut, për herë të parë prej se e nisi pushtimin e saj para dy vjetëve, tha një zyrtar i Kievit të premten, duke i vërtetuar vlerësimet e mëhershme të Shtëpisë së Bardhë.

Ai e tha këtë në rrjetin social X, pasi guvernatori i rajonit verilindor Harkiv, tha se rajoni u sulmua me raketa të shprehur nga Rusia, të cilat nuk ishin prodhim rus.

“Nuk ka më maskim… në luftën e saj prej gjenocidi, Federata ruse për herë të parë e goditi territorin e Ukrainës me raketa që i ka marrë nga Koreja Veriore”, tha zyrtari i lartë i Kievit, Mykhailo Podolyak.

Ai nuk ofroi prova se raketat ishin verikoreane. Në një komunikatë për media të enjten, Uashingtoni i citoi të dhënat e inteligjencës amerikane.

“[Rusia] po i sulmon ukrainasit me raketa që i ka marrë nga një shtet, ku qytetarët torturohen në kampe të koncentrimit, vetëm pse kanë radio të paregjistruar, pse flasim me ndonjë turist, apo pse shikojnë emisione televizive”, tha Podolyak.

Kremlini nuk u është përgjigjur pyetjeve rreth vlerësimeve të SHBA-së se Rusia shkrepi raketa verikoreane me rreze të shkurtra veprimi në Ukrainë.

Kombet e Bashkuara vendosën embargo armësh ndaj Koresë së Veriut në vitin 2006, kur ajo e kreu testimin e parë bërthamor.

Rezolutat e Këshillit të Sigurimit të OKB-së, të miratuara me mbështetjen e Rusisë, ua ndalojnë shteteve të bëjnë tregti armësh, apo pajisjesh tjera ushtarake me Korenë e Veriut.rel

Polonia i ka bërë thirrje Perëndimit që t’i përgjigjet Rusisë, pasi Moska kreu dy sulme masive ajrore në Ukrainë dhe Kievi u kundërpërgjigj me sulme në rajonet kufitare ruse dhe në Krimenë e pushtuar.

Të paktën pesë persona u vranë dhe dhjetëra të tjerë u plagosën në sulmet ruse me dronë dhe raketa në dhe përreth Kievit, por edhe në Harkiv më 2 janar. Ushtria ukrainase kishte raportuar për sulme në shkallë të njëjtë edhe ditë më parë.

Më 3 janar, ministri i Jashtëm i Polonisë, Radoslaw Sikorski, tha e Perëndimi duhet t’u përgjigjet sulmeve “në gjuhën që [presidenti rus, Vladimir] Putin e kupton: ashpërsimin e sanksioneve në mënyrë që ai të mos mund të prodhojë armë të tjera me komponentë të kontrabanduar dhe duke i dhënë Kievit raketa me rreze të gjatë veprimi që do t’i mundësonin të kryente sulme në vendet prej ku Rusia kryen sulme dhe në qendrat e komandimit”.

Ditë më parë, Putin ka thënë se shteti i tij do të “intensifikojë” sulmet ndaj Ukrainës, duke shtyrë ministren e Jashtme gjermane, Annalena Baerbock, të akuzojë Moskën se po kërkon që ta “asgjësojë” Ukrainën.

Gjermania “do të qëndrojë me popullin e Ukrainës për aq kohë sa të jetë e nevojshme”, shkroi ajo në X, që më herët njihej si Twitter.

Rritja e sulmeve vdekjeprurëse, shumica e të cilave kanë për cak zonat e banuara, ka nxitur ambasadorin e Francës në Kombet e Bashkuara, Nicolas de Riviere, të deklarojë se është pesimist për rrjedhën e ngjarjeve në Ukrainë.

Sipas tij, situata në Ukrainë është përkeqësuar jashtëzakonisht shumë.

Më herët gjatë 3 janarit, dronët ukrainas sulmuan Krimenë, gadishullin që Rusia e aneksoi ilegalisht më 2014, dhe dy rajone ruse në kufi me Ukrainën.

Autoritetet ruse nuk kanë raportuar për viktima nga sulmet në rajonet kufitare. Por, javën e kaluar, si pasojë e sulmeve, që Moska ka thënë se janë kryer nga Ukraina, në rajonin rus të Belgorodit u vranë 25 persona.

Ukraina po i bën thirrje aleatëve perëndimorë që të përshpejtojnë dërgesat e sistemeve të mbrojtjes ajrore, të raketave me rreze të gjatë veprimi, dronëve luftarakë, në mënyrë që t’iu kundërpërgjigjet sulmeve ruse.rel

Sekretari i Përgjithshëm i NATO-s, Jens Stoltenberg, bisedoi me presidentin e Polonisë të premten për shenjat se një raketë ruse u fut në hapësirën ajrore polake më 29 dhjetor, gjatë një sulmi të madh me raketa dhe dronë që Moska e kreu në Ukrainë.

Stoltenberg tha se e konsultoi presidentin Andrzej Duda për “incidentin raketor” dhe shkroi në rrjetin social X se “NATO-ja është duke e vëzhguar gjendjen dhe do të mbajë kontakt derisa të zbardhen faktet”.

Forcat e Mbrojtjes së Polonisë thanë të premten se një objekt i panjohur ishte futur në hapësirën ajrore polake nga drejtimi i Ukrainës dhe pastaj ishte zhdukur nga radari.

“Çdo gjë tregon se një raketë ruse u fut në hapësirën ajrore të Polonisë. Ne e vëzhguam atë në radar dhe pastaj ajo u zhduk nga radari. Kjo është e konfirmuar nga radarët dhe nga aleatët tanë në NATO”, tha komandanti i Forcave të Armatosura të Polonisë, gjenerali Wieslaw Kukula.

Forcat e Mbrojtjes së Polonisë thanë se objekti u fut 40 kilometra brenda hapësirës ajrore polake dhe u largua pas më pak se tre minutave.

Kukula tha se janë duke u ndërmarr hapa për t’i vërtetuar gjetjet dhe për ta eliminuar mundësinë e një gabimi teknik.

Polonia e thirri në takim të ngarkuarin e Rusisë me detyrë në Varshavë dhe i kërkoi shpjegim. Agjencia e lajmeve e Rusisë, RIA Novosti, e citoi të ngarkuarin rus me punë në Varshavë të ketë thënë se Polonia nuk dha dëshmi për shkelje kufitare.

Këshilltari amerikan për Siguri Kombëtare, Jake Sullivan, bisedoi me telefon me shefin e zyrës për Siguri Kombëtare të Polonisë, Jacek Siewiera, për t’ia shprehur “solidaritetin e Shteteve të Bashkuara me Poloninë, derisa ajo po merret me raportimet për futjen e një rakete në hapësirën ajrore polake përkohësisht”, tha Shtëpia e Bardhë.

Sullivan u zotua për ndihmë teknike dhe e siguroi Siewieran se presidenti amerikan, Joe Biden, është duke e përcjell me vëmendje këtë incident.

Nuk është e qartë se ku u zhduk objekti nga radari, apo në cilin drejtim ishte duke shkuar. Trupat polake u mobilizuan për ta gjetur atë.

Ukraina e ka cilësuar sulmin raketor rus si më të madhin deri tani në luftën pushtuese që Moska e nisi në shkurt 2022.

Cak i sulmeve ishin kryeqyteti Kiev, si dhe qytetet e mëdha si Odesa, Dnipropetrovski, Harkivi dhe Lvini.

Ministri i Brendshëm i Ukrainës, Ihor Klymenko, tha se 30 njerëz u vranë dhe më shumë se 160 të tjerë u plagosën.rel

Gjenerali Christian Freuding, një këshilltar i ministrit gjerman të Mbrojtjes, Boris Pistorius, tha se Ukraina po arrin sukses ushtarak dhe se Rusia ka pësuar humbje të mëdha.

“80 përqind e Ukrainës është e lirë. Flota ruse e Detit të Zi është zhvendosur de facto në perëndim,” tha Freuding.

Ai iu referua sulmit të Ukrainës ndaj një anije luftarake ruse, çka ka dobësuar aftësinë e Rusisë për të hedhur raketa nga deti.

Duke iu referuar përllogaritjeve të fundit, gjenerali tha se 300 mijë ushtarë rusë janë vrarë ose janë plagosur rëndë.

“Këto humbje janë shumë të mëdha,” tha ai.

Gjenerali shtoi se Rusia do dalë nga lufta e dobësuar. Por ai shtoi se Moskës do i duhen të paktën 5 deri në 8 vite që të rindërtojë forcën e saj ushtarake.

Sipas tij, gjatë kësaj kohe, Perëndimi duhet të mendojë se cili do jetë qëndrimi i tij ndaj Moskës.sn

Një objekt i paidentifikuar ajror ka hyrë në hapësirën ajrore të Polonisë – shtet anëtar i NATO-s – nga drejtimi i kufirit me Ukrainën.

Komanda Operacionale e Ushtrisë polake tha se objekti hyri në territorin e Polonisë mëngjesin e 29 dhjetorit.

“Mëngjesin e sotëm, një objekt i paidentifikuar ajror hyri në hapësirën ajrore të Republikës së Polonisë nga kufiri me Ukrainën. Nga momenti që kaloi kufirin deri kur sinjali i tij u zhduk, objekti u vëzhgua nga radarët e sistemit mbrojtës ajror të shtetit”, tha ushtria polake.

Polonia tha se ka mobilizuar forcat ajrore dhe burimet e tjera, në përputhje me situatën.

Media private polake, TV Republika, raportoi se kërkimet për objektin po zhvillohen afër qytetit Hrubieszov, në jug të Polonisë.

Lajmi për këtë objekt ajror vjen pasi Ukraina u sulmua me 158 dronë dhe raketa ruse gjatë natës. Ky ishte sulmi më i madh ajror i kryer nga Rusia, që kur Moska nisi pushtimin e paprovokuar të Ukrainës në shkurt të vitit 2022.

Kryeministrja italiane Giorgia Meloni ka shtyrë konferencën e saj të fundvitit për në 4 janar, për shkak të gjendjes jo optimale shëndetësore. Sipas mediave italiane, Meloni ka një problem me ‘otolitet’ që e ka detyruar të qëndrojë e shtrirë në shtrat dhe në errësirë për gati dy ditë.

Mbrëmjen e së mërkurës, Meloni u vizitua në shtëpi nga një mjek ORL, i cili diagnostikoi ‘sindromën otolitike’ dhe kreu manovra për zgjidhjen e situatës.

Fillimisht, sqarojnë bashkëpunëtorët e kryeministrit, mendohej se simptomat si humbje ekuilibri dhe marrje mendsh që iu shfaqën Melonit, ishin ‘pasojë e gripit’.

Kryeministrja prej disa ditësh vuante nga të përzierat dhe marrje mendsh, duke bërë që të dyshohej edhe për veshin e mesit.

Në përfundim të vizitës, specialisti i ORL konstatoi se diagnoza për Melonin ishte ‘vertigo beninje paroksizmale pozicionale’.

‘Tashmë sot në mëngjes, pas manovrës dhe me kollaren që pengonte lëvizjet e befasishme, ajo u ngrit dhe po përmirësohet. Do të duhen edhe disa ditë si masë paraprake’, tha mjeku.

Por çfarë janë otolitet?

Ato kryejnë një funksion të rëndësishëm në veshin e brendshëm që është rregullimi i ekuilibrit të trupit. Otolitet janë grimca të vogla, të përbëra nga oksalati dhe karbonati i kalciumit, të zhytura në një substancë xhelatinoze që mbulon organet otolitike të sistemit vestibular: utrikula dhe sakula.

Otolitet, duke qenë më të dendura se xheli që i rrethon, lëvizin në bazë të pozicionit dhe lëvizjes së kokës, duke stimuluar qelizat e qimeve shqisore të veshit. Këto, nga ana tjetër, transmetojnë sinjale në tru që tregojnë ndryshime në përshpejtimin e trupit në hapësirë.

Në disa rrethana, otolitet mund të shkëputen nga matrica xhelatinoze dhe të migrojnë në kanalet gjysmërrethore, të cilat janë përgjegjëse për perceptimin e rrotullimit të kokës. Në këtë mënyrë, kanalet gjysmërrethore marrin informacion të pasaktë dhe bëhen tepër të ndjeshëm ndaj ndryshimeve në pozicionin e kokës që normalisht nuk do të kishin asnjë efekt. Kjo situatë shkakton vertigo beninje pozicionale paroksizmale, e cila manifestohet me episode të shkurtra por intensive marramendjeje.sn

Kulla Eiffel, një prej atraksioneve më të mëdha turistike në botë, u mbyll për publikun më 27 dhjetor, pasi stafi hyri në grevë, njoftoi operatori i Kullës.

Greva përkon me 100-vjetorin e vdekjes së inxhinierit, Gustave Eiffel, që ndërtoi Kullën. Stafi po proteston lidhur “me mënyrën se si po menaxhohet aktualisht” kulla, tha shoqata CGT përmes një deklarate.

Operatori i Kullës, SETE, tha se kjo situatës “është nisur drejt katastrofës”.

Shoqata CGT tha se menaxhmenti po e menaxhon Kullën Eiffel sipas një modeli biznesor që është “shumë ambicioz dh i paqëndrueshëm” dhe që bazohet në një vlerësim të fryrë të numrit të vizitorëve të ardhshëm dhe në të njëjtën kohë nënvlerëson kostot e ndërtimit.

SETE u kërkoi falje vizitorëve, duke i këshilluar të gjithë ata që kishin blerë bileta elektronike për të vizituar Kullën të mërkurën që të shikojnë emailet e tyre për më shumë informacione mbi rezervimin e tyre.

Kulla e Eiffelit – ndërtesa më e famshme e Parisit – tërheq pothuajse 7 milionë vizitorë në vit, rreth tre e katërta e të cilëve janë të huaj, thuhet në ueb-faqen e Kullës.

Gjatë pandemisë së koronavirusit, numri i vizitorëve ra për shkak të mbylljeve dhe kufizimeve të udhëtimit, por shifrat e vizitorëve u rritën në 5.9 milionë më 2022.

Shoqata CGT tha se menaxhmenti i Kullës po e bazon të ardhmen e tij në buxhetin prej 7.4 milionë vizitorësh në vit, “dhe pse ky nivel vizitorësh nuk është arritur kurrë”.

Inxhinieri i Kullës, Gustave Eiffel, vdiq më 27 dhjetor 1923, në moshën 91-vjeçare.rel

Nga Tanja May, BILD

Ai ishte një nga më të mëdhenjtë e politikës gjermane!

Wolfgang Schaeuble ka ndërruar jetë. Legjenda e CDU ndërroi jetë të martën në mbrëmje në moshën 81-vjeçare.

BILD mësoi nga njerëz pranë familjes se ai vdiq paqësisht në gjmë.

Politikani i CDU, që ishte pjesë e Bundestagut prej më shumë se 50 vitesh, lë pas gruan Ingeborg, katër fëmijë dhe katër nipa.

Schaeuble i ka dhënë formës politikës gjermane si asnjë politikan tjetër.

Në vitin 1972, ai u fut në Bundestag për herë të parë për CDU. Suksesin e tij të madh ai e pati në vitet 1990. Si Ministër i Brendshëm i qeverisë së Helmut Kohl, ai negocio traktatin e bashkimit me Gjermaninë Lindore.

Ribashkimi i Gjermanisë mban firmën e tij.

Por ai vuajti një goditje shumë të rëndë më 18 tetor të vitit 1990. Një person i sëmurë mendor e qëlloi politikanin e CDU gjatë një mitingu elektoral. Prej atëherë, ai ka qenë i paralizuar dhe përdorte karrige me rrota.

Por politikani i CDU nuk u zmbraps dhe arriti të bëhej numri dy i shtetit gjerman. Schaeuble u zgjodh President i Bundestagut nga viti 2017 deri në vitin 2021.

Së fundmi, gjërat ishin qetësuar për politikanin. Ai ishte tërhequr dhe pasi gruaja e tij u sëmur rëndë gjatë kësaj vere, ai kërkonte të kalonte më shumë kohë me familjen.

Me ftesë nga Selia e Shenjtë, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla-Schwarz, mori pjesë në meshën e Krishtlindjes, që u mbajt të dielën mbrëma në Bazilikën e Shën Pjetrit në Vatikan dhe në kremten ku Papa Françesku dha mesazhin e tij vjetor të Krishtlindjes “Urbi et Orbi”, që u mbajt sot në sheshin e Shën Pjetrit në Vatikan.

Nga Selia e Shenjtë në Vatikan, Ministrja Gërvalla ka uruar të gjithë besimtarët katolik, duke i dëshiruar paqe dhe dashuri.

“Për shumë mot Gëzuar Krishtlindjet nga Basilika e Shën Pjetrit në Vatikan, ku me ftesë të Selisë së Shenjtë morëm pjesë në meshën në vigjilje të Festës së Krishtlindjes. Paqja dhe dashuria mbretërofshin në vendin tonë dhe të gjitha vatrat tona”, tha Ministrja Gërvalla, duke theksuar se ndihet e nderuar, e prekur dhe krenare që ta përfaqësoj Republikën e Kosovës në kremtimet e Krishtlindjes në Selinë e Shenjtë në Vatikan.

Në mesazhin e tij tradicional të Krishtlindjes në bekimin e mesditës “Urbi et Orbi” në Ditën e Krishtlindjes, Papa Françesku, bëri thirrje që Krishtlindja të sjellë paqe në gjithë botën dhe ta kthejë pikëllimin në gëzim dhe gjithashtu të ndalet dhuna dhe të ndihmohen të gjithë ata që vuajnë.sn

Departamenti amerikan i Shtetit (DASH) u bëri thirrje autoriteteve në Serbi që të bashkëpunojnë me misionin e OSBE-së në hetimin e pretendimeve për parregullsi zgjedhore, transmeton Zëri i Amerikës.

Siç theksoi Departamenti i Shtetit, dhuna ndaj gazetarëve, vëzhguesve dhe zyrtarëve zgjedhorë është “e papranueshme”, si dhe se legjitimiteti i proceseve demokratike varet nga transparenca dhe vullneti i të gjithë pjesëmarrësve për ta pranuar rezultatin e zgjedhjeve.

“Ne jemi të fokusuar, në bashkëpunimin me Serbinë, për forcimin e qeverisë demokratike dhe sundimin e ligjit, përmirësimin e bashkëpunimit rajonal, vazhdimin e rritjes ekonomike dhe përshpejtimin e përparimit të Serbisë në rrugën drejt anëtarësimit në Bashkimin Evropian. E ardhmja e Serbisë qëndron në Perëndim”, thuhet në përgjigjen e DASH-it ndaj pyetjeve të Zërit të Amerikës lidhur me protestat e reja në Beograd.

Në njoftim thuhet se konstatimet shqetësuese të Zyrës së OSBE-së për Institucionet Demokratike dhe të Drejtat e Njeriut (ODIHR) se zgjedhjet u dëmtuan nga gabime të shumta procedurale, presion ndaj zyrtarëve publikë dhe abuzim me burimet publike, dhe se, këta faktorë, së bashku me avantazhet sistematike të partive në pushtet, krijuan kushte të padrejta.

“Shtetet e Bashkuara i kërkojnë Serbisë që të punojë ngushtë me OSBE-në për t’i adresuar këto shqetësime”, shkruan ata, duke shtuar se pretendimet për parregullsi, të raportuara nga ODIHR-ja dhe ekipe të tjera vëzhguese të zgjedhjeve, duhet të hetohen.

Opozita ka protestuar që nga zgjedhjet e 17 dhjetorit, duke akuzuar Partinë Progresive Serbe (SNS) në pushtet për vjedhje zgjedhore, duke përfshirë regjistrimin e votuesve fiktivë nga Serbia dhe jashtë vendit.

Komisioni Republikan i Zgjedhjeve (RKZ) njoftoi më 24 dhjetor se ka kontrolluar listat zgjedhore dhe shtoi se pretendimet e koalicionit “Serbia kundër dhunës” se numri i votuesve me të drejtë vote në zgjedhjet e Beogradit është rritur artificialisht për të ndikuar në rezultatin e zgjedhjeve “nuk janë të vërteta”.

Në të njëjtën ditë, presidenti i Serbisë, Aleksandar Vuçiq, deklaroi se votimi u zhvillua në një atmosferë demokratike dhe se ishin zgjedhjet “më të qeta ndonjëherë në historinë moderne”.

ODIHR-ja më 18 dhjetor njoftoi se zgjedhjet u shënuan me parregullsi të rënda, keqpërdorim të fondeve publike, dominim mediatik të presidentit Vuçiq, fushatë negative dhe përhapje frike.

Një pjesë e eurodeputetëve kërkuan një hetim të pavarur të të gjitha parregullsive të raportuara gjatë zgjedhjeve të mbajtura në Serbi më 17 dhjetor.

Qytetarët serbë votuan më 17 dhjetor në zgjedhjet parlamentare, provinciale dhe lokale në 65 qytete dhe komuna, përfshirë Beogradin. SNS-ja shpalli fitoren në të gjitha nivelet.rel

Holanda do t’ia dërgojë Ukrainës 18 avionë luftarakë F-16, për t’i ndihmuar në betejën kundër pushtimit rus, ka njoftuar qeveria holandeze, të premten.

“Sot kam informuar presidentin [e Ukrainës, Volodymyr] Zelensky për vendimin e qeverisë sonë për të përgatitur 18 avionët e parë luftarakë F-16 për dërgim në Ukrainë”, ka thënë ushtruesi i detyrës së kryeministrit, Mark Rutte, nëpërmjet një shkrimi në platformën sociale X, e njohur më parë si Twitter.

“Dërgimi i F-16-shave është një ndër elementet më të rëndësishme të marrëveshjeve të arritura për mbështetje ushtarake për Ukrainën”, është shprehur ai.

Dërgimi i avionëve luftarakë ende varet nga aprovimi për eksportim nga Ministria e Punëve të Jashtme e Holandës, dhe nga përmbushja e kritereve për stafin dhe infrastrukturën në Ukrainë, ka shtuar Rutte, pa përmendur afate për këto vendime, raporton Reuters.

Por, njoftimi i ndihmës ka bërë të mundshëm rezervimin e fondeve dhe njerëzve për përgatitjen e avionëve për dërgim, ka thënë qeveria holandeze.

“Kam folur me Mark Rutten për ta falënderuar qeverinë holandeze për vendimin e saj për të filluar përgatitjen e 18 avionëve të parë F-16 për dërgim në Ukrainë”, ka thënë presidenti ukrainas, Zelensky, në X.

Holanda ka dërguar F-16-shin e parë, prodhim amerikan, në një qendër të re trajnimi për pilotët dhe stafin ukrainas, në Rumani, muajin e kaluar.

Danimarka, Norvegjia dhe Belgjika, po ashtu, kanë njoftuar se do t’i japin Ukrainës avionë F-16, pasi qeveria e Shteteve të Bashkuara ka aprovuar dërgimin e tyre që Kievi të mbrohet kundër Moskës, sapo të jetë përfunduar trajnimi i pilotëve.

Lufta e plotë e Rusisë në Ukrainë ka nisur më 24 shkurt 2022.

Presidenti rus Vladimir Putin e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.rel

Të shtënat masive shkundën pasditen e 21 dhjetorit njërin nga vendet më të sigurta në botë.

Me katërmbëdhjetë njerëz të vrarë dhe dhjetëra të tjerë të plagosur, Praga e Çekisë u bë kryelajm.

“Kemi menduar gjithmonë se kjo është një gjë që nuk na shqetëson neve”, tha kryetari i kryeqytetit me 1.3 milion banorë, Bohuslav Svoboda.

“Tani duket se, për fat të keq, edhe bota jonë po ndryshon”, tha ai.

Fakulteti i Arteve i Universitetit të Karlit, ku sulmuesi qëlloi me breshëri plumbash, gjendet në zemër të Pragës historike – vetëm pak minuta në këmbë nga sheshi i Qytetit të Vjetër në njërën anë dhe nga Ura ikonë e Karlit në anën tjetër.

Zona është një atraksion i madh turistik, me mijëra vizitorë që në këtë kohë shijojnë tregjet e njohura të Krishtlindjeve.

Të dyshuarin për vrasje në hapësirat e universitetit, policia çeke e identifikoi si 24 vjeç, vetë student në Fakultetin e Arteve, dhe tha se ai u “eliminua”.

Sipas shefit të policisë, Martin Vondrashek, sulmuesi kishte leje armësh dhe posedonte disa të tilla.

Motivi për të shtënat vdekjeprurëse në Fakultetin e Arteve nuk është ende i qartë. Policia tha se ka informacione të pakonfirmuara se i dyshuari – i identifikuar nga mediat si David K. – është frymëzuar nga një incident i ngjashëm në Rusi, por nuk dha detaje të tjera.

Ajo që dihet është se sulmi ishte më fatali në historinë moderne të Çekisë.

Në dhjetor të vitit 2019, një sulm me armë në një spital të qytetit të Ostravës la të vrarë gjashtë veta, përpara se sulmuesi ta kthente armën kundër vetes. Ndërsa, në shkurt të 2015-ës, një person hapi zjarr në një restorant në qytetin Uherski Brod, ku u vranë teta veta.

Të shtënat në një kampus universiteti në Çeki ishin të padëgjuara deri më tash.

Pamje njerëzish që hidheshin nga një parvaz i jashtëm i ndërtesës disa kate lart, për të shpëtuar nga sulmi, do të mbeten gjatë në kujtesën çeke.

Të tjerë që kacavareshin në dritare, po ashtu.

“Një tragjedi, të cilën e zmadhon edhe fakti që ndodhi në një shkollë kushtuar filozofisë dhe diskutimit paqësor”, tha në një prononcim të shkurtër për Radion Evropa e Lirë Tomas Klvana, themelues i Institutit Aspen në Pragë.

Autoritetet shpallën të shtunën e 23 dhjetorit ditë zie në Çeki. Me flamujt që do të ulen në gjysmështizë dhe kambanat që do të bien në të gjithë vendin, do të nderohen dhe do të kujtohen të 14 të vrarët.

Sipas Indeksit Global të Paqes, që Instituti për Ekonomi dhe Paqe nxjerr çdo vit, Çekia është ndër vendet më të sigurta në botë.

Në listën prej 163 vendesh të publikuar këtë vit, ajo është e 12-ta në botë dhe e 8-ta në Evropë.

Pikat më të forta të vendit janë komunitetet e sigurta, shkalla e ulët e krimit dhe ndikimi i ulët i terrorizmit.

Ca pyetje për sulmin e 21 dhjetorit në Pragë, megjithatë, do të duhet të marrin përgjigje, shkruan disa media çeke.

Zyrtarët policorë dhe të pranishmit tjerë në vendin e ngjarjes vepruan me profesionalizëm, shkroi Seznam, porse ndërhyrja e tillë ngre edhe pyetjet e natyrshme: a ka mundur të bëhet më mirë, më shpejt dhe më me efikasitet? Po ashtu, si ka mundur të futet në ndërtesën e universitetit “arsenali i madh i armëve” që përmendi shefi i policisë, shkroi gazeta online çeke.

Por, menjëherë pas sulmit, ngushëllimet dhe thirrjet për solidaritet që bënë si qytetarët e rëndomtë në rrjetet sociale, ashtu edhe udhëheqësit politikë, qoftë në pushtet, apo opozitë, janë vlerat që kanë më së shumti kuptim tash për tash.

Ministria e Punëve të Jashtme e Gjermanisë, ka thënë se parregullsitë në zgjedhjet në Serbi, të raportuara nga misionet vëzhguese ndërkombëtare, janë “të papranueshme”, për një shtet kandidat për anëtarësim në Bashkimin Evropian.

“Serbia ka votuar, por Organizata për Siguri dhe Bashkëpunim në Evropë (OSBE) dhe Zyra për Institucione Demokratike dhe të Drejta të Njeriut (ODIHR) kanë raportuar për abuzime të burimeve publike, frikësim të votuesve dhe raste të blerjes së votave. Kjo është e papranueshme për një shtet që e ka statusin e vendit kandidat për anëtarësim”, ka thënë Ministria gjermane përmes një postimi në X – platformë e njohur më parë si Twitter.

Zyra për Institucione Demokratike dhe të Drejta të Njeriut, ka thënë se zgjedhjet në Serbi janë përcjellë me parregullsi serioze, keqpërdorim të fondeve publike, dominim medial të presidentit të shtetit, Aleksandar Vuçiq, fushata negative dhe përhapje të frikës.

Vëzhguesit ndërkombëtarë dhe misioni i OSBE-së, kanë qenë pjesë e misioneve vëzhguese të zgjedhjeve në Serbi.

“Këto janë probleme serioze që institucionet duhet t’i adresojnë dhe hetojnë seriozisht, në mënyrë që të krijohen kushte për zgjedhje të drejta dhe demokraci më të fortë në Serbi, në të ardhmen”, ka thënë OSBE-ja, në një konferencë për media, të mbajtur më 18 dhjetor.

Sa u përket parregullsive në ditën e zgjedhjeve, ODIHR ka thënë se janë vërejtur votime në grup dhe shkelje të privatësisë së votës.

“Ne kemi parë parregullsi serioze, përfshirë blerje të votës”, kanë thënë përfaqësuesit e vëzhguesve ndërkombëtarë, më 18 dhjetor.

Dyshimeve për parregullsi në zgjedhje u ka bërë jehonë edhe një pjesë e opozitës.

Partitë e koalicionit opozitar “Serbia kundër dhunës”, kanë thënë se në zgjedhjet lokale në Beograd ka pasur shumë parregullsi, dhe se rezultatet nuk e reflektojnë vullnetin e qytetarëve.

Me ftesë të tyre, disa banorë të Beogradit kanë marrë pjesë në një protestë, më 18 dhjetor, duke kërkuar anulimin e zgjedhjeve në kryeqytetin serb.

Partia Përparimtare Serbe (SNS) e presidentit Vuçiq, i ka hedhur poshtë akuzat për rezultati ndryshe prej vullnetit të qytetarëve, dhe parregullsi tjera.

Disa misione vëzhgimi vendore në Serbi, kanë hedhur dyshime edhe për rezultatin e zgjedhjeve parlamentare, duke thënë se janë regjistruar shkelje drastike.

Më 17 dhjetor, Serbia i ka organizuar zgjedhjet parlamentare, lokale dhe krahinore.

Partia e Vuçiqit, SNS, ka shpallur fitore në të gjitha nivelet.rel

Deputeti konservator gjerman nga radhët e CDU-së, Knut Abraham, thotë se ka ardhur koha që Bashkimi Evropian t’i heqë masat ndëshkuese ndaj Kosovës. Ai ka kërkuar që sa më shpejt të dalin rezultatet e hetimeve për ngjarjen në Banjskë.

Abraham e sheh Serbinë si faktor destabilizues në rajonin e Ballkanit Perëndimor. Ai thotë Serbia nuk po e respekton marrëveshjen për normalizimin e raporteve me Kosovën.

Deputeti gjerman konsideron se dialogu mund të dështojë tërësisht nëse vazhdohet me qasjen e njëjtë.

Sipas tij, ka ardhur koha që të ketë ndëshkime serioze për palën që nuk është e gatshme për dialog.

“Siguria në rajonin e Ballkanit Perëndimor duhet të jetë prioritet mbi prioritetet, sidomos në këtë periudhë kohore. Shtimi i trupave te NATO-s në rajon është gjithmonë një opsion sepse sjell më shumë siguri. Problemi kryesor qëndron tek Serbia, e cila nuk po tregon gatishmëri t’i zbatojë marrëveshjeve të cilat i ka marrë përsipër. Sa kohë që Serbia vepron në këtë mënyrë nuk mund të ketë siguri. Nëse nuk respektohet marrëveshje atëherë nënkupton që dialogu me të vërtetë ka dështuar. Besoj se ka ardhur koha që nëse njëra palë nuk i respekton marrëveshjet atëherë duhet të ketë ndëshkime serioze”, ka thënë Abraham për tëvë1.

Deputeti konservator, po kërkon që sa më shpejtë të publikohen rezultatet e investigimeve ndërkombëtare për ngjarjen në Banjskë.

“Skenarë të rrezikshëm si ai në Banjskë mund të përsëriten derisa politikanët në Serbi nuk e pranojnë ekzistencën e Kosovës. Nëse vazhdon kjo frymë në Serbi, radikalizmi nuk do të largohet, sepse ata do ta justifikojnë dhunën. Duhet që sa ma parë të dalin rezultatet e investigimeve për rastin në Banjskë. Duhet të kuptojmë në detaje se si ndodhi ajo ngjarje në veriun e Kosovës, situata me të vërtetë ishte shumë serioze”, deklaroi Abraham.

Tutje, politikani gjerman konsideron se masat ndëshkuese ndaj Kosovës janë të pa arsyeshme, dhe kështu i ka bërë thirrje bllokut evropian që t’i heq ato.

Për më tepër ai ka kërkuar vëmendje më e madhe t’i kushtohet Beogradit, për shkak të deklaratave te krerëve serbë, që thonë se nuk do ta respektojnë marrëveshjen e Brukselit.

“Ka ardhur koha që Bashkimi Evropian t’i largojë masat ndëshkuese ndaj Kosovës, sepse nuk janë të arsyeshme më. Vëmendja duhet të jetë tek ata të cilët haptazi thonë se nuk do ta respektojmë marrëveshjen për normalizimin e raporteve me Kosovën. Bashkimi Evropian duhet të jetë më i hapur me Kosovën, dhe t’i hapë rrugë një procesi më të shpejtë integrues”, u shpreh deputeti gjerman.

Më datën 28 qershor të këtij viti Bashkimi Evropian vendosi masa ndëshkuese ndaj Kosovës si pasojë e tensioneve në veriun e Kosovës.sn

Episodi i “C’è Costa per Te” i drejtuar nga Alessio Marzilli ka ribashkuar momente të ndryshme të Giorgia Melonit dhe Edi Ramës duke krijuar një intervistë ironike mes dy kryeministrave në emisionin “PorpagandaLive” që transmetohet në La7. Duke ironizuar marrëdhënien personale mes dy kryaministrave, moderatori, Alessio Marzilli, ka vënë pah këtë miqësi atipike.

Episodi një version humoristik i patentës “C’è posta per Te”, vë përballë kryeministres Gioragia Meloni, në një zarf që pret të hapet ose jo, kryeministrin shqiptar Edi Rama. Në ballafaqimin e manipuluar pretendohet se dy kryeministrat janë në konflikt mes tyre për marrëveshjen e emigrantëve.

Moderatori: – Giorgia faleminderit që pranuat ftesën, është dikush nga ana tjetër e zarfit që është këtu për të kërkuar falje. Të shohim kush është?

-E prisje të ishte Edi Rama

(Meloni bën një grimasë si e çuditur)

Edi Rama: – Përshëndetje Giorgia!, Dua të them se duke parë ekranin, imazhet janë mjaftueshëm të forta. Jam këtu për këtë çfarë ndodhi, për fat të keq…

Moderatori: – Edi nga 1-10 sa varet nga ty ky pezullim i marrëveshjes së emigrantëve?

Edi Rama: – Zero, asgjë…

Moderatori: – Po përse atëherë i kërkon falje Giorgias?

Edi Rama: – Sepse nuk është një gjë e bukur… Gjithë kjo audiencë po pret nëse ajo do më falë apo jo.

Moderatori: – Giorgia çfarë ndjesie ke për Edin në këtë moment?

Giorgia Meloni: – Jam indiferente

Edi Rama: – Giorgia më thuaj çfarë do; Ministrinë e Jashtme? Ok, e ke!

Moderatori: – Nuk e di sa është e besueshme por po të jep një ministri të tërë. Çfarë mendon?

Giorgia Meloni: – Dua më shumë.

Edi Rama: – Dakord, Ministrinë e Financave, Ministrinë e Arsimit, Ministrinë e Shëndetësisë, pra gjysmën e qeverisë….

Giorgia Meloni: – Dua më shumë.

Edi Rama: – 1.2 miliardë

Giorgia Meloni: – Dua më shumë.

Edi Rama: – 2,5 miliardë

Giorgia Meloni: – Dua më shumë.

Edi Rama:– Po të jap edhe 4 shqiptarë të veshur me Versace…Pak kanabis…

Moderatori: – Giorgia ta hapim zarfin apo do të vazhdojmë kështu deri në infinit….

Giorgia Meloni: – Faleminderit por unë do ta mbyll zarfin…

Moderatori: Mbyllni zarfin, Edi më vjen keq!

Një dokument i hartuar nga Serbia, përmes së cilit ajo është shprehur se nuk e ka ndërmend të zbatojë pjesë të Marrëveshjes për rrugën drejt normalizimit të raporteve me Kosovën, dhe aneksin e zbatimit të saj, ka shkaktuar shqetësim në qarqet diplomatike të vendeve anëtare të Bashkimit Evropian.

Por BE-ja, në reagim ndaj pyetjeve të mediave, është shprehur se Marrëveshja në tërësi mbetet ligjërisht obliguese, dhe se palët ishin pajtuar për këtë në Ohër.

Këtë e ka thënë të premten zëdhënësi i BE-së për politikë të jashtme dhe siguri, Peter Stano.

“Bashkimi Evropian përsërit se marrëveshja është ligjërisht obliguese, në tërësi, për të dyja palët: Zbatimi i saj do të jetë pjesë integrale e rrugëtimit përkatës evropian”, ka thënë Stano.

Sipas tij, Marrëveshja dhe aneksi për zbatim “janë bërë ligjërisht obliguese përmes komunikatës me shkrim të përfaqësuesit të lartë të BE-së [Josep Borrell], më 18 mars 2023”.

“Ky ka qenë qëndrim i vazhdueshëm i BE-së, i cili ka qenë i komunikuar publikisht në disa raste”, ka thënë Stano.

Burimet e BE-së kanë sqaruar se vlerësimet për natyrën obliguese të marrëveshjes janë në përputhje me nenin 11 të Konventës së Vjenës për ligjin rreth traktateve, i cili thotë se “pajtimi i një shteti që të obligohet me një marrëveshje mund të shprehet me nënshkrim, shkëmbim të instrumenteve që përbëjnë marrëveshje, ratifikim, pranim, miratim apo me çfarëdo mjeti tjetër, nëse ashtu pajtohen”.

Të njëjtat burime kanë thënë se palëve në Ohër u ishte sqaruar hollësisht kjo mënyrë e dhënies së pëlqimit, dhe të dyja palët janë pajtuan dhe nuk kanë kundërshtuar, në praninë e përfaqësuesit të lartë, Borrell, dhe të dërguarit për dialog, Mirosllav Lajçak.

Përfaqësuesit e BE-së kanë thënë se kishin propozuar disa rrugë tjera për të shprehur pëlqimin e palëve për marrëveshje, por ato ishin refuzuar dhe vazhdojnë të refuzohen nga të dyja palët.

Në qëndrimin e Serbisë, përmes së cilës Beogradi ka shprehur rezerva për Deklaratën e samitit BE-Ballkani Perëndimor, që e ka parë Radio Evropa e lirë, thuhet se ajo, “në përgjithësi, me rezerva, përshtatet me Deklaratën e samitit BE-Ballkani Perëndimor” si një deklarate politike dhe dokument jo obligues ligjor.

Më tej, bëhet e qartë se kjo ka të bëjë me pjesën e obligimeve për zbatimin e Marrëveshjes me Kosovën.

“Marrëveshja për rrugën drejt normalizimit të raporteve dhe Aneksi i zbatimit, siç u referohen në këtë deklaratë, konsiderohen të pranueshme vetëm në kontekstin në të cilin nuk përfshin de facto apo de jure njohjen e Kosovës”, thuhet në pozicionin e Serbisë.

“Republika e Serbisë nënvizon se kjo përshtatje nuk përfshin pranimin e anëtarësimit të Kosovës në Organizatën e Kombeve të Bashkuara, në sistemin e organizatave dhe agjencive të OKB-së, e as të ashtuquajturin integritet territorial të Kosovës”, thuhet më tej në letrën e Serbisë, ku deklarata konsiderohet si ligjërisht joobliguese, dhe se nuk e ka peshën e marrëveshjes ndërkombëtare, sipas së drejtës ndërkombëtare.

Serbia është shprehur, po ashtu, se “Kosova është pjesë integrale e Republikës së Serbisë, nën administrim ndërkombëtar, në përputhje me rezolutën 1244 të Këshillit të Sigurimit të OKB-së”.

Ky qëndrim i Serbisë e vë në dyshim edhe pranimin nga ana e saj të obligimeve që dalin nga Marrëveshja për rrugën drejt normalizimit të raporteve dhe aneksit të saj, pasi në to përfshihet edhe moskundërshtimi për anëtarësimin e Kosovës në çfarëdo organizate ndërkombëtare, dhe respektimi i integritetit territorial të saj.

Në Deklaratën e miratuar të mërkurën mbrëma në Bruksel nga liderët e BE-së dhe Ballkanit Perëndimor u bëhet thirrje Kosovës dhe Serbisë që të zbatojnë pa parakushte dhe në tërësi këtë marrëveshje.

“U bëjmë ftesë të dyja palëve që në tërësi të zbatojnë Marrëveshjen për rrugën drejt normalizimit të raporteve dhe aneksin e saj, si dhe të gjitha marrëveshjet nga e kaluara, pa asnjë vonesë të re dhe pa parakushte”, thuhet në pjesën që i kushtohet raporteve mes Kosovës dhe Serbisë.

Normalizimi i marrëdhënieve ndërmjet Kosovës dhe Serbisë, sanksionet ndaj Rusisë për shkak të agresionit të saj në Ukrainë, përballja me pasojat e këtij agresioni dhe ardhmëria evropiane e Ballkanit Perëndimor, pritet të jenë çështjet kryesore të diskutimeve në takimin e ndërmjet udhëheqësve të gjashtë vendeve të rajonit dhe Bashkimit Evropian që do të mbahet sot pasdite në Bruksel.

Në një njoftim të BE-së thuhet se takimi është një mundësi për të riafirmuar perspektivën e integrimit të Ballkanit Perëndimor, si dhe nevojën për përmbushje të qëndrueshme dhe të pakthyeshme të reformave nga vendet partnere të mbështetura nga vlerat dhe parimet e BE-së. Temat kryesore të diskutimit, thuhet në një njoftim të BE-së, do të jenë: thellimi i angazhimit politik me Ballkanin Perëndimor, afrimi me BE-në dhe avancimi i integrimit gradual, ndërtimi i bazës ekonomike për të ardhmen, zbutja e ndikimit të agresionit të Rusisë kundër Ukrainës dhe përforcimi i sigurisë dhe ndërtimi i qëndrueshmërisë.

Normalizimi i marrëdhënieve ndërmjet Kosovës dhe Serbisë pritet të jetë një prej çështjeve kryesore të diskutimeve, meqë ato vlerësohen thelbësore për qëndrueshmërinë e rajonit.

Në takim pritet të miratohet një deklaratë e përbashkët që është hartuar nga zyrtarët e BE-së dhe të cilën e ka parë Zëri i Amerikës.

“Ne vazhdojmë të mbështesim përpjekjet e përfaqësuesit të lartë të BE-së dhe përfaqësuesit të posaçëm për bisedimet ndërmjet Beogradit dhe Prishtinës, thuhet në projekt deklaratë në të cilën theksohet se nga palët pritet “angazhim konstruktiv për të arritur përparim të shpejtë në normalizimin e marrëdhënieve që është thelbësore për sigurinë dhe qëndrueshmërinë e gjithë rajonit dhe për të siguruar përparimin e të dyja palëve në rrugëtimin e tyre përkatës evropian”.

Më tej u bëhet thirrje të dyja palëve që në tërësi të zbatojnë marrëveshjen e arritur më herët gjatë këtij viti në Bruksel dhe në Ohër si dhe të gjitha marrëveshjet nga e kaluara, “pa asnjë vonesë të re dhe pa parakushte”.

Në tekstin e deklaratës theksohet thirrja për uljen e tensioneve në veri të Kosovës në përputhje me kërkesat e BE-së dhe “të përmbahen nga veprimet e njëanshme dhe të pa bashkërenduara që mund të çojnë në tensione të reja dhe dhunë, si dhe të përmbahen nga retorika e cila nuk është në përputhje me normalizimin e marrëdhënieve.

Duke theksuar rëndësinë e forcimit të marrëdhënieve fqinjësore, projekt deklarata bën thirrje për zgjidhjeve të qëndrueshme të mosmarrëveshjeve dypalëshe dhe çështjet e rrënjosura në trashëgiminë e së shkuarës. BE-ja u bën thirrje gjithashtu për garantimin e të drejtat dhe trajtimin e barabartë të pjesëtarëve të pakicave.

Në projekt deklaratë thuhet se qëndrimi përkrah BE-së është një shenjë e qartë e orientimit strategjik të partnerëve, tani më shumë se kurrë, në dritën e agresionit të Rusisë kundër Ukrainës dhe sfidave të tjera të sigurisë.

BE-ja, thuhet më tej, do të vazhdojë të investojë në multilateralizëm dhe do të bashkëpunojë me partnerët për të mbrojtur dhe mbështetur rendin ndërkombëtar.

“Një vizion i përbashkët i së ardhmes përfshin vlera dhe përgjegjësi të përbashkëta. Ndërsa thellojmë bashkëpunimin tonë me partnerët, ne i nxisim ata të bëjnë përparim të shpejtë dhe të qëndrueshëm drejt përafrimit të plotë me Politikën e Përbashkët të Jashtme dhe të Sigurisë së BE-së, duke përfshirë masat kufizuese të BE-së dhe të veprojnë në përputhje me rrethanat. Ne përgëzojmë ata partnerë të Ballkanit Perëndimor që tashmë po demonstrojnë angazhimin e tyre strategjik duke u përafruar plotësisht me politikën e Jashtme të BE-së dhe inkurajojmë ata që nuk e kanë bërë ende këtë të ndjekin këtë shembull”, thuhet në projekt deklaratë, në të cilën kërkohet përmirësimi i zbatimit të masave kufizuese dhe parandalimi i anashkalimit të tyre.

Serbia është i vetmi vend në Ballkanin Perëndimor që nuk u është bashkuar sanksioneve kundër Rusisë, në radhë të parë për shkak të mbështetjes së Kremlinit ndaj pretendimeve të Beogradit mbi Kosovën.

Në projekt deklaratë theksohet angazhimi i BE-së për të zbutur ndikimin agresionit të Rusisë kundër Ukrainës te vendet e Ballkanit Perëndimor.

Duke theksuar se mjedisi gjeo-strategjik gjithnjë e më i ndërlikuar, i dominuar nga agresioni rus në Ukrainë dhe prekur rëndë nga kriza në Lindjen e Mesme, vazhdon të rrezikojë sigurinë evropiane dhe globale, projekt deklarata nënvizon rëndësinë e unitetit brenda familjes evropiane dhe partneritetit strategjik midis BE-së dhe rajonit të Ballkanit Perëndimor.

“BE-ja rikonfirmon angazhimin e plotë dhe të qartë ndaj perspektivës së anëtarësimit të Ballkanit Perëndimor në Bashkimin Evropian dhe bën thirrje për përshpejtimin e procesit të anëtarësimit, bazuar në reformat e besueshme dhe parimin e meritave, që është në ne interes i ndërsjellë. Zgjerimi është një investim gjeostrategjik për paqen, sigurinë, qëndrueshmërinë dhe përparimin”, thuhet në projekt deklaratë.

Çështja e zgjerimit pritet të jetë temë diskutimesh në takimin e udhëheqësve të vendeve anëtare të BE-së i cili do t’i zhvillojë punimet të enjten dhe të premten.

Parlamenti i Polonisë i ka dhënë Donald Tuskut mandatin ta formojë një koalicion të ri qeverisës, raporton “BBC”.

Administrata e re do të betohet në pallatin presidencial të mërkurën.

Me këtë ka marrë fund qeverisja tetëvjeçare e partisë populist Ligj dhe Drejtësi (PiS), që vazhdimisht është përplasur me autoritetet e BE-së në Bruksel.

Koalicioni i Tusk fitoi më tepër ulëse në zgjedhjet në tetor, por nuk ishte në gjendje të betohej.

PiS, e drejtuar nga Mateusz Morawiecki, doli partia me më shumë vota, por partitë tjera refuzuan të bashkëpunojnë me të dhe kështu nuk ishte në gjendje ta formonte një shumicë parlamentare.

Tusk kishte qenë kryeministër i Polonisë mes vitit 2007 dhe 2014, ndërsa më vonë u bë president i Këshillit Evropian.

Në zgjedhjet e tetorit koalicioni i tij fitoi më shume ulëse, ndërsa pati një dalje rekorde prej mbi 70 për qind. Koalicioni i Tusk përbëhet nga tri parti./ dita

Kryeministri i Kosovës, Albin Kurti, ka marrë pjesë në Kongresin e Partisë Socialdemokrate të Gjermanisë (SPD), në Berlin ku ka takuar kancelarin e Gjermanisë, Olaf Scholz.

Përmes një postimi në platformën sociale, X, Kurti ka bërë të ditur se me Scholz ka diskutuar për forcën e marrëdhënieve dypalëshe në mes të Kosovës dhe Gjermanisë.

“Kënaqësi të marr pjesë në kongresin e partisë SPD të këtij viti, ku pata një takim të frytshëm kancelarin e Bundestagut, duke nënvizuar fuqinë e marrëdhënieve tona dypalëshe dhe vizionin tonë të përbashkët si socialdemokratë që nxisin drejtësinë, përparimin dhe prosperitetin për qytetarët tanë”, shkruan Kurti.

Vendet e Bashkimit Evropian i kanë futur në listën e terroristëve dy komandantë të Hamasit, pas sulmeve të grupit militant në Izrael, më 7 tetor.

Hamasi, grup palestinez që kontrollon Rripin e Gazës, është shpallur organizatë terroriste prej Shteteve të Bashkuara dhe Bashkimit Evropian.

Dy individët janë Mohammed Deif, komandant i përgjithshëm i krahut ushtarak të Hamasit dhe zëvendësi i tij, Marwan Issa, ka thënë të premten BE-ja.

Duke nisur prej të premtes, dy komandantëve iu ngrihen të gjitha fondet dhe astetet tjera financiare në vendet e BE-së, derisa operatorët e bllokut evropian nuk mund të ofrojnë fonde dhe burime ekonomike për ta.

Militantët e Hamasit e kanë nxitur luftën me Izraelin, pas sulmit që kanë kryer në territorin e tij më 7 tetor, duke vrarë mbi 1.200 njerëz dhe duke marrë peng 240 të tjerë.

Për pasojë, Izraeli ka nisur ofensivë tokësore dhe ajrore në Gazën me 2.3 milionë banorë.

Sipas autoriteteve shëndetësore palestineze, mbi 17.000 njerëz kanë vdekur si pasojë e sulmeve izraelite.

Ushtria izraelite, në anën tjetër, i vë fajin Hamasit për vrasjet, duke e akuzuar se po operon në zonat e dendura me civilë.rel

Robert Cooper, ish-ndërmjetës në dialogun teknik ndërmjet Kosovës dhe Serbisë, thotë se me kundërshtimin e Marrëveshjen e Ohrit [Kosovën] dhe aneksin e saj për t’u bërë pjesë e kapitullit 35 të negociatave, Serbia po mbyll derën e anëtarësimit në Bashkimin Evropian.

Ai tha se “ideja për ta futur Serbinë në Bashkimin Evropian, ndërkohë që refuzon të njohë pavarësinë e fqinjit të saj dhe ta pranojë atë si një shtet sovran, nuk është në thelb të BE-së”.

Me këtë qëndrim diplomati britanik në pension reagoi ndaj pretendimit të presidentit serb, Aleksandar Vuçiq, se përfshirja e dokumenteve të dakorduara nga Kosova dhe Serbia në gjysmën e parë të vitit 2023 në kornizën e negociatave do të nënkuptonte se Bashkimi Evropian po ia mbyll derën Serbisë.

Përndryshe, kapitulli 35 i negociatave për anëtarësim të Serbisë përfshin marrëdhëniet fqinjësore – pra rregullimin e marrëdhënieve me Kosovën, e cila shpalli pavarësinë në vitin 2008.

“Bashkimi Evropian nuk dëshiron të jetë pjesë e problemit, por ta zgjidhë atë. Misioni i tij është që të gjithë anëtarët e unionit të kenë një lloj marrëdhënieje, jo normale, por supernormale me fqinjët e tyre”, tha Cooper për Zërin e Amerikës (edicioni në gjuhën serbe), i cili ndërmjetësoi dialogun teknik ndërmjet Kosovës dhe Serbisë në periudhën 2011-2012.

Bisedimet mes dy palëve filluan pasi Gjykata Ndërkombëtare e Drejtësisë, me kërkesë të Serbisë, në vitin 2010 vendosi se shpallja e pavarësisë së Kosovës nuk e shkel të drejtën ndërkombëtare.

“Ideja për ta futur Serbinë në Bashkimin Evropian, ndërkohë që refuzon të njohë pavarësinë e fqinjit të saj dhe ta pranojë atë si një shtet sovran, nuk është në thelb të Bashkimit. Kjo do të forconte ndarjet ndërmjet Serbisë dhe Kosovës. Ajo që duam është që ato ndarje të zhduken”, tha Cooper.

Në samitin e liderëve evropianë në fund të javës së ardhshme, Këshilli Evropian duhet të deklarohet për konkluzionet e tij për zgjerimin – një dokument që përfshin Malin e Zi, Serbinë, Maqedoninë e Veriut, Shqipërinë, Bosnje dhe Hercegovinën, Kosovën, Turqinë, Moldavinë dhe Gjorgjinë.

Në draftin e konkluzioneve, rekomandohet që Marrëveshja e Ohrit dhe aneksi i saj, i cili përcaktohen hapat në rrugën e normalizimit të marrëdhënieve ndërmjet Kosovës dhe Serbisë, të përfshihen edhe pritjet dhe detyrimet e të dyja palëve.

“Është e qartë se këtu dominon ndjenja e urgjencës. Askush nuk e mban mend se kur të dyja palët arritën ndonjë përparim të rëndësishëm në bisedime”, vëren Cooper – duke kujtuar zgjedhjet e ardhshme për përbërjen e Parlamentit Evropian, të cilat do të mbahen në qershor 2024.

Fillimi i vitit dhe arritja e Marrëveshjes së Ohrit futi një dozë optimizmi se në dialogun më shumë se dhjetëvjeçar ndërmjet Kosovës dhe Serbisë, me arritje jashtëzakonisht të ndryshueshme, mund të ketë rezultate.

Megjithatë, në vend të kësaj, u mbajtën disa takime të pasuksesshme dhe u shkëmbye retorikë e ashpër. Një hije e errët mbi të gjitha përpjekjet e hodhi sulmi i armatosur i serbëve ndaj policëve të Kosovës në fshatin Banjskë, në veri të Kosovës. Sipas të dhënave zyrtare, ka pasur gjithsej katër viktima, tre në anën e sulmuesve dhe një pjesëtar i policisë së Kosovës.

Tonet e deritanishme nga Beogradi kanë ngritur edhe dyshimin nëse Aleksandar Vuçiq për herë të parë publikisht e ka shprehur mundësinë apo vullnetin e Serbisë për të ndërprerë apo pezulluar negociatat me BE-në për anëtarësim – të cilat kanë nisur qysh në janar të vitit 2014.

“Është absolutisht e qartë se gjërat nuk po shkojnë askund. Por nuk do të mund të flisja për mundësitë e një pushimi të plotë. Megjithatë, një ngadalësim shtesë është i mundur, si në rastin e Turqisë”, thotë diplomati në pension Robert Cooper, duke përkujtuar se Turqia i filloi negociatat e anëtarësimit me Bashkimin në vitin 1987 – pa pothuajse asnjë rezultat të prekshëm.

Dy ukrainas të akuzuar për bashkëpunim me autoritetet ruse janë vrarë, njëri nga të shtënat në afërsi të Moskës dhe tjetri nga një bombë në makinë në Luhansk të Ukrainës-pjesë e pushtuar nga Rusia.

Burime ukrainase të zbatimit të ligjit i thanë Radios Evropa e Lirë se Shërbimi i Sigurisë së Ukrainës (SBU) “likuidoi” ish-deputetin ukrainas Illya Kyva duke e qëlluar për vdekje në një operacion special më 6 dhjetor.

Raportet e mediave në Rusi thanë më herët se Kyva u gjet i vdekur pranë Moskës.

Kyva ishte i njohur për qëndrimin e tij pro-rus. Në muajin nëntor, një gjykatë në qytetin perëndimor të Ukrainës, Lviv, e dënoi atë në mungesë me 14 vjet burg, pasi e shpalli fajtor për tradhti të lartë.

Pasi Rusia nisi pushtimin e saj, të vazhdueshëm, të paprovokuar të Ukrainës në shkurt 2022, Kyva u transferua në Rusi ku mori pjesë në shfaqje televizive pro-Kremlinit dhe në tryeza të rrumbullakëta.

Vdekja e Oleh Popov, një ish-deputet de facto në një pjesë të rajonit të Luhanskut të Ukrainës të pushtuar nga Rusia, u raportua gjithashtu më 6 dhjetor. Popov u vra nga një mjet që shpërtheu në makinën e tij në qytetin e Luhansk.

Komiteti Hetimor tha në një deklaratë se filloi një hetim për vdekjen e Popov.

Popov kryesoi komitetin qeveritar të instaluar nga Rusia për sigurinë dhe mbrojtjen e shtetit, agjencitë e zbatimit të ligjit, sistemin gjyqësor dhe mbrojtjen e të drejtave të njeriut.

Yury Yorov, një anëtar i parlamentit de fakto në Luhansk, u citua nga Interfax të ketë thënë se në shtator të vitit 2022 u bë një tentativë për vrasjen e Popovit që ai tha se ishte organizuar nga SBU.

Disa shtetas ukrainas, të akuzuar për bashkëpunim me autoritetet okupuese ruse, janë vënë në shënjestër vitet e fundit dhe disa prej tyre janë vrarë.

Së fundmi, një ligjvënës de fakto i asamblesë rajonale të instaluar nga Rusia në Luhansk, Mykhaylo Filiponenko, u vra muajin e kaluar në një bombë me makinë. Përgjegjësinë për atë vrasje e mori drejtoria kryesore e Inteligjencës e Ukrainës.

Rusia ka akuzuar shërbimet speciale ukrainase për organizimin e atentateve. Kievi rrallë merr përgjegjësinë për sulmet.

Disa ditë përpara se Rusia të fillonte pushtimin e saj të vazhdueshëm, udhëheqësit separatistë të disa pjesëve të mbështetura nga Kremlini, të rajoneve të Luhanskut dhe Donetskut të Ukrainës i kërkuan presidentit rus Vladimir Putin të njohë pavarësinë e dy rajoneve nga Ukraina.

Ligjvënësit rusë në mesin e shkurtit 2022 gjithashtu i bënë thirrje Putinit të njohë Luhanskun dhe Donetskun- pjesët e kontrolluara nga separatistët, si shtete të pavarura dhe ratifikuan dokumentet përkatëse pasi Putini i nënshkroi ato.

Moska përdori dokumentet për të justifikuar pushtimin e saj të paprovokuar të Ukrainës, i nisur më 24 shkurt 2022.