Një sulm ajror izraelit ka goditur palestinezë pranë një qendre mjekësore në Rripin e Gazës të enjten, duke i vrarë 10 fëmijë dhe gjashtë të rritur, sipas zyrtarëve shëndetësorë.

Sulmi ndodhi në një kohë kur nuk duket se do të arrihet së shpejti ndonjë marrëveshje në bisedimet për armëpushim që janë duke u zhvilluar.

Pamjet e verifikuara nga sulmi në Deir al-Balah, në pjesën qendrore të Rripit të Gazës, shfaqin trupat e grave dhe fëmijëve të shtrirë në pellgje gjaku, raporton Reuters.

Një video tjetër shfaq disa fëmijë të palëvizshëm të shtrirë mbi një karrocë gomari.

“Ajo nuk bëri asgjë, ishte e pafajshme, betohem. Ëndrra e saj ishte që lufta të përfundonte dhe që ata të njoftonin sot, në mënyrë që ajo të kthehej në shkollë”, tha Samah al-Nouri, duke qëndruar pranë trupit të vajzës së saj që u vra në sulm.

“Ajo thjesht po merrte trajtim në një qendër mjekësore. Pse i vranë?” tha ajo.

Ushtria izraelite tha se e goditi një militant që kishte marrë pjesë në sulmin e udhëhequr nga Hamasi më 7 tetor 2023 në Izrael, i cili e shkaktoi fillimin e luftës në Gazë.

Hamasi është organizatë e shpallur terroriste nga Shtetet e Bashkuara dhe fuqitë e tjera.

Ushtria izraelite shtoi se është në dijeni të raportimeve për kalimtarë të plagosur dhe theksoi se po e heton këtë incident.

Sulmi me raketë në Deir al-Balah ndodhi ndërsa negociatorët izraelitë dhe të Hamasit po zhvillonin bisedime me ndërmjetësit në Katar për një marrëveshje të propozuar për armëpushim 60-ditor dhe për lirimin e pengjeve.

Një zyrtar i lartë izraelit tha të mërkurën se nuk pritej arritja e ndonjë marrëveshjeje për të paktën një ose dy javë, megjithatë sekretari amerikan i Shtetit, Marco Rubio, tha të enjten se është shpresëplotë për një marrëveshje.

“Mendoj se jemi më pranë, ndoshta më afër se sa kemi qenë prej kohësh”, tha Rubio për gazetarët në samitin e ASEAN-it në Malajzi.

Në disa runde bisedimesh indirekte mes Izraelit dhe grupit militant palestinez Hamas nuk është arritur ndonjë përparim që nga rifillimi i fushatës ushtarake izraelite në mars, pas një armëpushimi të mëparshëm.

Sulmet e përsëritura nga forcat izraelite javët e fundit kanë vrarë qindra banorë të Gazës, shumë prej tyre civilë, dhe kanë plagosur mijëra të tjerë, sipas autoriteteve lokale shëndetësore.

Presidenti amerikan, Donald Trump, u takua këtë javë me kryeministrin izraelit, Benjamin Netanyahu, për të diskutuar situatën në Gazë.

Zyrtari izraelit që ishte në Uashington me Netanyahun tha se, nëse të dyja palët pajtohen për planin e armëpushimit, Izraeli do ta përdorte atë periudhë për të ofruar një marrëveshje për paqe të përhershme që do të kërkonte çarmatosjen e Hamasit.

Nëse Hamasi refuzon, “ne do të vazhdojmë” me operacionet ushtarake në Gazë, tha zyrtari në kushte anonimiteti.

Një zyrtar palestinez tha se bisedimet në Katar janë në krizë dhe se çështjet e diskutueshme, përfshirë nëse Izraeli do të vazhdojë të pushtojë pjesë të Gazës pas një armëpushimi, nuk janë zgjidhur ende.

Lufta nisi pasi Hamasi sulmoi Izraelin më 7 tetor 2023, duke vrarë rreth 1.200 njerëz dhe duke marrë peng 251 të tjerë.

Shumica e pengjeve janë liruar gjatë armëpushimeve të mëparshme.

Ofensiva e Izraelit në Gazë ka vrarë më shumë se 57.000 palestinezë, mbi gjysma e tyre gra dhe fëmijë, sipas Ministrisë së Shëndetësisë në Gazë.

BILD

Zbulim spektakolar në SHBA: Stacioni televiziv amerikan CNN publikoi një regjistrim audio ku Donald Trump tregon sesi i kishte kërcënuar diktatorin rus Vladimir Putin se do ta bombardonte Moskën.

Trump thuhet ta ketë thënë këtë gjatë një takimi me donatorë në fushatën zgjedhore për 2024.

Në regjistrim, Trump thotë: “Putinit i thashë: ‘Nëse ti pushton Ukrainën, do të bombardoj Moskën deri në themel. Po të them, nuk kam tjetër zgjidhje.’”

Trump vijon: “Dhe pastaj [Putin] tha diçka si: ‘Nuk të besoj.’ Por më besoi për 10 përqind.”

Gjithashtu, Trump tha se kishte paralajmëruar me fjalë të ngjashme edhe presidentin e Kinës, Xi Jinping, për një pushtim në Tajvan. Ai kërcënoi se, në atë rast, do të bombardonte Pekinin. “Ai më konsideronte të çmendur,” tha Trump për Xi, dhe shtoi: “Por ne nuk patëm kurrë ndonjë problem.”

“Ai pyeti: ‘Pekinin?’ Unë i thashë: ‘Nuk kam zgjidhje. Duhet t’ju bombardoj,’” tregoi Trump për bisedën me Xi.

Ai theksoi se mjafton që kërcënimet të jenë besueshme vetëm 5 apo 10 përqind për të parandaluar luftërat.

Regjistrimet u bënë në vitin 2024, kur Donald Trump, atëherë ish-president dhe kandidat i republikanëve në zgjedhjet presidenciale, ishte në fushatë. Ato duket se i referohen bisedave që Trump pati si president gjatë mandatit të tij të parë (2017-2021) me udhëheqës të tjerë shtetërorë.

Trump përsërit shpesh se Putini nuk do të kishte pushtuar Ukrainën nëse ai do të ishte president, dhe i bën fajtor paraardhësin e tij, Joe Biden, për luftën.

Përpjekjet e Trump për të arritur një armëpushim apo paqe midis agresorit Rusi dhe Ukrainës deri tani kanë dështuar. Ai gjithashtu refuzon të ashpërsojë sanksionet ndaj Rusisë apo të ushtrojë presion tjetër.

Së fundmi, Trump është shprehur gjithnjë e më i frustruar ndaj diktatorit rus Vladimir Putin. Kremlini po i shërben SHBA-së “një tufë gënjeshtrash”, tha presidenti amerikan. “Nuk jam i kënaqur me Putinin,” tha ai gjatë një mbledhjeje të kabinetit. “Jam shumë i pakënaqur me të.” sn

Sekretari i Jashtëm Britanik, David Lammy, tha të martën se Mbretëria e Bashkuar është e gatshme të vendosë sanksione shtesë ndaj Izraelit nëse një armëpushim në Rripin e Gazës nuk sigurohet brenda disa javësh.

Lammy i tha Komitetit të Punëve të Jashtme të Dhomës së Komunave se qeveria do të “shkojë më tej” në ndërmarrjen e veprimeve kundër Izraelit nëse situata humanitare në Gaza vazhdon të përkeqësohet.

“Nëse nuk e arrijmë armëpushimin për të cilin të gjithë lutemi në javët e ardhshme… a do të shkojë qeveria më tej për të marrë masa kundër Izraelit?” pyeti deputeti laburist Alex Ballinger.

“Po, do ta bëjmë,” u përgjigj Lammy.

Komentet e Lammy-t vijnë pas një lëvizjeje të koordinuar sanksionesh muajin e kaluar nga Mbretëria e Bashkuar, Australia, Kanadaja, Zelanda e Re dhe Norvegjia, që shënjestruan ministrat izraelitë Itamar Ben-Gvir dhe Bezalel Smotrich për atë që Londra e përshkroi si “shkelje të shëmtuara” të të drejtave të njeriut në Gaza, raportoi The Independent.

Sanksionet përfshinin ndalime udhëtimi dhe ngrirje të aseteve.

Ndërsa Mbretëria e Bashkuar është vënë nën presion në rritje, përfshirë nga figura të larta të Partisë Laburiste dhe sindikata, për të njohur zyrtarisht shtetësinë palestineze, Lammy nuk pranoi të zotohej për një afat kohor specifik.

“Nuk do ta lidh veten me një kalendar sepse është i përshtatshëm për një fragment kronik”, tha ai, duke shtuar se negociatat për armëpushim janë delikate dhe çdo veprim njohjeje duhet të vlerësohet në bazë të faktit nëse sjell ndryshime domethënëse në terren.

Ai vuri në dukje se pavarësisht njohjes ndërkombëtare në rritje të Palestinës, përfshirë nga vende të tilla si Irlanda, Spanja dhe Norvegjia, “ajo që kemi parë është aneksim i mëtejshëm në Bregun Perëndimor”, duke sugjeruar se vetëm njohja nuk ka çuar përpara përpjekjet për paqe.SN

BILD

Sulm kinez ndaj avionit gjerman! Qeveria gjermane thërret ambasadorin kinez në Ministrinë e Jashtme!

“Ushtarakët kinezë kanë përdorur lazer ndaj një avioni gjerman në operacionin ASPIDES të BE,” shkruan Ministria e Jashtme në X. “Kërcënimi i jetës së stafit gjerman dhe ndërprerja e misionit janë krejtësisht të papranueshme. Ambasadori kinez është thirrur sot në Ministrinë e Jashtme”.

BILD mësoi nga burime të sigurisë: Nuk është sulmi i parë i Kinës. Ushtria kineze ka përdorur herë pas here lazer ndaj avionëve perëndimorë, duke verbuar pilotët dhe duke prishur elektronikën në avionë.

Që në vitin 2018, nga një bazë ushtarake kineze në Xhibuti dyshohet se janë përdorur lazerë ndaj avionëve ushtarakë amerikanë – disa pilotë u lënduan lehtë. SHBA protestoi zyrtarisht, ndërsa Kina mohoi akuzat.

Këta lazerë “verbues” nuk përdoren për kapjen e objektivit dhe për të lëshuar raketa më pas. Sipas burimeve të sigurisë, ata shërbejnë vetëm për të penguar avionët.

Nga burime diplomatike gjermane, BILD mësoi se takimi me ambasadorin kinez në Berlin u zhvillua të martën në mëngjes.

“Nuk pranojmë që ushtarët gjermanë të rrezikohen. Veprimi kinez ishte krejtësisht i papranueshëm”, thanë për BILD. Kjo i është bërë “krejtësisht e qartë ambasadorit sot”.

Operacioni ASPIDES (nga greqishtja “Mburoja”) është një mision ushtarak detar i BE-së që prej vitit 2024.

Qëllimi: sigurimi i rrugëve të lira detare për anijet – në Detin e Kuq, Gjirin e Adenit, Detin Arabik, Gjirin e Omanit dhe Gjirin Persik.

Forcat e Armatosura gjermane marrin pjesë në këtë mision të BE-së në Detin e Kuq, përfshirë fluturime të rregullta për mbikëqyrje ajrore të hapësirës detare. sn

Shtetet e Bashkuara kanë bërë të ditur të hënën se organizatën Hayat Tahrir al-Sham (HTS), të njohur edhe si Fronti Al-Nusra nuk e konsiderojnë më terroriste.

HTS-ja është grup që dikur kishte lidhje me Al-Kaidën – organizatë terroriste – ndërsa në dhjetor e ka rrëzuar Qeverinë në Siri.

“Në konsultim me Prokurorin e Përgjithshëm dhe Sekretarin e Thesarit, ju njoftoj për heqjen e Frontit Al-Nusrah, të njohur edhe Hay’at Tahrir al-Sham nga lista e organizatave terroriste”, ka thënë Sekretari amerikan i Shtetit, Marco Rubio.

Një koalicion i armatosur, i udhëhequr nga lideri i grupit HTS, Ahmed al-Sharaa, e ka rrëzuar Qeverinë e Bashar al-Assadit, atëbotë president, duke i dhënë fund regjimit brutal që ka zgjatur për gjysmë shekulli nga familja e Assadit.

Sharaa është vetëshpallur president i përkohshëm, vendim që është mirëpritur, por jo me doza të larta entuziazmi, në Uashington, Evropë dhe vende tjera.

Vendimi i Uashingtonit do të nisë së zbatuari të martën dhe vjen pas vendimit të presidentit amerikan, Donald Trump javën e kaluar për shfuqizim të sanksioneve të SHBA-së kundër Sirisë.

Trump ka hequr sanksione tjera kundër Sirisë në maj, duke iu përgjigjur pozitivisht kërkesës së Arabisë Saudite dhe Turqisë për të ndihmuar që shteti i shkatërruar nga lufta të rintegrohet në ekonominë globale.

SHBA-ja e ka hequr nga lista e zezë edhe Sharaan, pasi ai është ngjitur në pushtet.

HTS, që është njohur edhe si Fronti Al-Nusra, ka qenë dikur degë e Al-Kaidës në Siri, mirëpo i ka shkëputur lidhjet me grupin xhihadist më 2016, dhe ka tentuar të krijojë imazh tjetër në publik.

Deri më 2017, HTS-ja ka pasur kontrollin e një pjese të madhe të veriperëndimit të Sirisë dhe ka krijuar administratë civile në atë zonë, mes akuzave për abuzime brutale kundër atyre që dalin kundër regjimit.

Në janar, pas rrëzimit të regjimit të Assadit, autoritetet e reja kanë bërë të ditur për shpërbërje të të gjitha fraksioneve të armatosura dhe të gjitha janë integruar në trupa shtetërore, sikurse është forca e re policore.

Edhe shtetas të Kosovës janë dënuar apo u janë ngritur aktakuzapër pjesëmarrje në Frontin Al-Nusra.

Në korrik të këtij viti, Gjykata Themelore në Prishtinë e ka dënuar shtetasin e Kosovës, Murat Dernjanin me 20 vjet burim për krime kundër njerëzimit në Irak dhe Siri, ndërsa në janar të vitit 2019 ai ishte dënuar me pesë vjet burgim për vepra penale që lidheshin me terrorizëm.

Ai e kishte pranuar fajësinë për veprën penale të organizimit dhe pjesëmarrjes në grupe terroriste.

Të dhënat e mëparshme tregojnë se mbi 350 persona besohet të kenë shkuar në Siri që nga viti 2011, kryesisht për t’iu bashkuar grupit ekstremist, Shteti Islamik.

Kosova ka miratuar Ligjin për ndalimin e pjesëmarrjes në konflikte të armatosura jashtë territorit të Kosovës në vitin 2015, derisa që nga viti 2019 janë organizuar disa operacione riatdhesimi, përmes së cilave janë rikthyer qindra persona.

Kryeministri izraelit Benjamin Netanyahu i tha të hënën (7 korrik 2025) Presidentit Donald Trump se e kishte nominuar atë për Çmimin Nobel për Paqen, duke i dorëzuar zotit Trump një letër nominimi gjatë një takimi në Shtëpinë e Bardhë.

Duke folur me gazetarët në fillim të takimit të tyre, Netanyahu tha se Izraeli po punonte me Shtetet e Bashkuara për të gjetur vende që do t’u jepnin palestinezëve një të ardhme më të mirë.

“Ai po krijon paqe ndërsa flasim, në një vend, në një rajon pas tjetrit”, tha Netanyahu në një darkë me Trump në Shtëpinë e Bardhë.

Trump ka marrë disa nominime për Çmimin Nobel për Paqen nga mbështetës dhe ligjvënës besnikë gjatë viteve dhe nuk e ka fshehur acarimin e tij që nuk e ka marrë çmimin prestigjioz.

Republikani është ankuar se ishte anashkaluar nga Komiteti Norvegjez i Nobelit për rolin e tij ndërmjetësues në konfliktet midis Indisë dhe Pakistanit, si dhe Serbisë dhe Kosovës.

Ai gjithashtu ka kërkuar merita për “ruajtjen e paqes” midis Egjiptit dhe Etiopisë dhe ndërmjetësimin e Marrëveshjeve të Abrahamit, një seri marrëveshjesh që synojnë normalizimin e marrëdhënieve midis Izraelit dhe disa kombeve arabe.

Trump bëri fushatë për postin si një “paqebërës” i cili do të përdorte aftësitë e tij negociuese për t’i dhënë fund shpejt luftërave në Ukrainë dhe Gaza, megjithëse të dy konfliktet ende vazhdojnë më shumë se pesë muaj pas presidencës së tij. sn

Sulmet ajrore izraelite i kanë vrarë të paktën 33 palestinezë në Gazë, thanë zyrtarët shëndetësorë të dielën, ndërsa ushtria izraelite njoftoi se ka goditur mbi 100 objektiva në enklavën e rrënuar nga lufta.

Sulmet ndodhën ndërsa kryeministri i Izraelit, Benjamin Netanyahu, po përgatitej të udhëtonte drejt Uashingtonit për bisedime në Shtëpinë e Bardhë, me qëllim shtyrjen përpara të përpjekjeve për një armëpushim.

Ndërkohë, një zyrtar izraelit tha se kabineti i sigurisë i Izraelit miratoi të shtunën mbrëma dërgimin e ndihmave në pjesën veriore të Gazës, ku civilët po vuajnë nga mungesa e theksuar e ushqimit.
Zyrtari nuk dha më shumë hollësi dhe foli në kushte anonimiteti.

Presidenti i Shteteve të Bashkuara, Donald Trump, ka propozuar një plan për një armëpushim fillestar 60-ditor, që do të përfshinte lirimin e pjesshëm të pengjeve të mbajtura nga Hamasi, në këmbim të shtimit të ndihmave humanitare në Gazë.

Marrëveshja e propozuar parashikon edhe bisedime për përfundimin e plotë të luftës 21-mujore.

Hamasi është i shpallur organizatë terroriste nga SHBA-ja dhe fuqitë e tjera.

Lufta në Gazë nisi kur militantët e udhëhequr nga Hamas sulmuan Izraelin më 7 tetor 2023, duke vrarë 1.200 njerëz dhe duke rrëmbyer 251 të tjerë, sipas zyrtarëve izraelitë.

Ministria e Shëndetësisë në Gazë thotë se lufta izraelite pas 7 tetorit i ka vrarë mbi 57.000 palestinezë.

Izraeli godet dhjetëra objektiva

Sipas drejtorit të Spitalit Shifa, Mohammed Abu Selmia, 20 njerëz u vranë dhe 25 të tjerë u plagosën pasi Izraeli goditi dy shtëpi në qytetin e Gazës.

Në jug të Gazës, 13 palestinezë u vranë nga sulmet në zonën Muvasi, një rajon pranë Mesdheut ku shumë të zhvendosur jetojnë në tenda, sipas zyrtarëve të Spitalit Nasser në qytetin fqinj Han Junis.

Pesë nga të vrarët ishin anëtarë të së njëjtës familje, sipas spitalit.

Ushtria izraelite nuk i komentoi sulmet individuale, por tha se ka goditur 130 objektiva në të gjithë Rripin e Gazës gjatë 24 orëve të fundit.

Ajo deklaroi se objektivat përfshinin struktura komanduese dhe kontrolluese të Hamasit, depo armësh, raketahedhës dhe se ka vrarë disa militantë në veri të Gazës.

Bisedimet për marrëveshjen për armëpushim

Sulmet ndodhën në një kohë kur përpjekjet për arritjen e një marrëveshjeje për armëpushim duket se kanë fituar vrull.

Zyra e kryeministrit Netanyahu tha se Qeveria izraelite do ta dërgojë një ekip negociator për bisedime të tërthorta në Katar të dielën, duke shtuar se Hamasi po kërkon ndryshime të “papranueshme” në propozim.

Bisedimet e planifikuara në Katar vijnë pak para vizitës së planifikuar të Netanyahut të hënën në Uashington, ku do të takohet me presidentin Trump për të diskutuar marrëveshjen.

Nuk është e qartë nëse do të arrihet ndonjë marrëveshje para takimit në Shtëpinë e Bardhë.

Hamasi ka kërkuar garanci që armëpushimi fillestar do të çojë në përfundimin e plotë të luftës dhe tërheqjen e trupave izraelite nga Gaza.

Negociatat e mëparshme janë bllokuar për shkak të kërkesës së Hamasit për garanci që bisedimet do të çojnë në përfundimin e luftës, ndërsa Netanyahu ka këmbëngulur se Izraeli do t’i rinisë luftimet për ta arritur çrrënjosjen e plotë të Hamasit.