Dy email-e të dërguara nga biznesmeni Alban Eftimi në adresë të ish-zv.kryeministres Belinda Balluku janë bërë pjesë e dosjes së SPAK, në kuadër të hetimeve për vilën luksoze në Palasë, për të cilën prokuroria dyshon se është përfituar si ryshfet në këmbim të tenderave publikë.

Sipas SPAK, e-maili i parë tregon komunikimin e drejtpërdrejtë të Eftimit me Ballukun për detaje të projektimit dhe arredimit të vilës, në një kohë kur objekti ishte ende në ndërtim.

Në një email të datës 14 shtator 2020, Eftimi i dërgon Ballukut një sërë detajesh për punimet në vilë, duke përshkruar edhe elementë të veçantë të projektit, nga pishina dhe vaskat hidromasazhi, te materialet e përdorura dhe mënyra e organizimit të ambienteve.

“Një pjesë e mirë e ambienteve rreth pishinës janë veshur me ‘teak’ për një ‘feeling’ pak më të ngrohtë e pak si jaht”, shkruan Eftimi në email.

Në të njëjtin komunikim ai përmend edhe mundësinë që vila të jepet me qira në të ardhmen, duke diskutuar për mënyrën se si ambientet duhet të krijonin ndjesinë e një hoteli luksoz.

“Shkallët mes 2 godinave kanë gjelbërim kacavjerrës në të dy muret anësore”, shkruan biznesmeni, ndërsa vijon me detaje për pishinën “infinity”, tavolinën e ngrënies në nivel me ujin dhe hapësirat e parashikuara për vendosjen e gotave e pjatave.

Eftimi përshkruan gjithashtu dy vaska hidromasazhi të vendosura në krahët anësorë të vilave, si dhe përdorimin e materialeve prej “teak” për të krijuar një atmosferë të ngrohtë, të ngjashme me një jaht.

“Po të dërgoj një rishikim. Kemi idenë që edhe nëse një ditë vendos të japësh me qira, përdoruesit të mund të ndihen të llastuar njësoj si në hotel. Shkallët mes 2 godinave kanë gjelbërim kacavjerrës në të dy muret anësore. Në një krah të pishinës zbritet me shkallë dhe ka një tavolinë ngrënieje në një nivel me ujin që të shijohet në maksimum “infinity pool”. Pishina në skajin drejt detit ka po ashtu një plan për të vendosur gota e ndonjë pjatë.

Në 2 krahët anësore të shtëpive në nivelin e hyrjes dhe suitave janë bërë 2 vaska hidromasazhi (shih hotel Roccabella në Santorini).
Suitat do i punojmë akoma me variante. Ndarjet e kuzhinës me soggiornon dhe të garderobës tek “master bedroom” janë fizarmonikë. Një pjesë e mirë e ambienteve rreth pishinës janë veshur me “teak” për një “feeling” pak më të ngrohtë e pak si jaht. Shihe si alternativë kur të përfundojmë dhe renderat dhe nëse s’të ngjit, kthehemi tek mermerët blu”, thuhet në email.

Katër ditë më vonë, më 18 shtator 2020, Eftimi i dërgon sërish Ballukut një dokument me emërtimin “Vilat binjake Palasë”. Dokumenti përbëhet nga 11 faqe dhe përmban planimetri dhe projekte të sipërfaqeve të dy vilave.

Sipas hetimeve të SPAK, vila me numër 188/1 në Palasë ishte ndërtuar deri në fazën e karabinasë me investimin e ish-futbollistit Igli Tare. Më pas, punimet e tjera të objektit dyshohet se janë marrë përsipër dhe financuar nga biznesmeni Arbër Abazi, pronar i kompanisë “Alko Impex General Construction”.

Kjo kompani, së bashku me operatorë të tjerë ekonomikë, ka fituar tenderin për ndërtimin e lotit 7 të Unazës së Madhe të Tiranës.

SPAK e konsideron me rëndësi edhe lidhjen familjare mes Abazit dhe Ballukut. Sipas të dhënave të bëra publike nga hetimi, Abazi bashkëjeton me një të afërme të ish-zv.kryeministres.

Në kuadër të hetimeve, SPAK ka vendosur sekuestrimin e vilës në Palasë, ndërsa emri i Belinda Ballukut është regjistruar si person nën hetim për veprat penale të korrupsionit, pastrimit të parave dhe fshehjes së pasurisë.

Balluku është gjithashtu e pandehur në një tjetër çështje penale që lidhet me tenderat publikë, konkretisht për procedurat për ndërtimin e tunelit të Llogarasë dhe lotet e Unazës së Jashtme të Tiranës.

Hetimi për vilën në Palasë dhe komunikimet e zbuluara tashmë janë pjesë e një tjetër piste të SPAK, duke thelluar hetimet dhe rënduar akuzat ndaj ish-numrit dy të qeverisë Rama.

Kur një ish-zyrtar i lartë akuzohet për shpërdorim detyre, abuzim me tendera dhe përvetësim të miliona eurove, normalisht pret të gjesh në dosje kontrata, llogari bankare dhe prova financiare.

Por në Shqipëri, sipas asaj që del nga dosja e publikuar, historia ka një trajtë tjetër. Në qendër janë vilat luksoze, pishinat infinity, jacuzzi-t, teak-u dhe shqetësimi nëse prona duhet të ketë “feeling” si jaht.

Në një email të 14 shtatorit 2020, arkitekti Alban Eftimi i shkruan Belinda Ballukut për detajet e vilës në Palasë, për pishinën, suitat, vaskat hidromasazhuese, veshjen me teak dhe mënyrën se si përdoruesit do të ndiheshin “të llastuar njësoj si në hotel”. Teaku rreth pishinës duhej t’i jepte pronës “një feeling pak më të ngrohtë e pak si jaht”. Dhe për model merrej Roccabella në Santorini (në foto).

Pra, Santorini ishte frymëzimi, Roccabella ishte modeli, ndërsa Palasa duhej të bëhej versioni shqiptar: e njëjta pamje, i njëjti luks, i njëjti “feeling” me detin Jon përpara.

Në pamje të parë, mund të duken si detaje të zakonshme arkitekture. Por kur në të njëjtën histori shfaqet një zyrtare e lartë shteti dhe një vilë luksoze në bregdet, pyetja bëhet shumë më pak romantike se një “infinity vieë”: Kush e pagoi këtë luks dhe me ç’para?

Nëse dyshimet e SPAK-ut për shpërdorim detyre e përvetësim parash provohen, atëherë vila e Palasës nuk do të jetë thjesht historia e një prone luksoze. Do të jetë historia e një skeme ku tenderi publik ka prodhuar përfitim privat.

Kur në dosje dalin emaile për vilën, përshkrime të luksit, referenca konkrete arkitekturore dhe gjurmë që duhen hetuar për të kuptuar lidhjen mes pasurisë private dhe parave publike, a nuk është pikërisht ky momenti kur hetimi duhet të shkojë deri në fund?

Sepse Roccabella mund të jetë frymëzim. Teaku mund të jetë thjesht teak. Jacuzzi mund të jetë thjesht jacuzzi. Edhe “feeling-u pak si jaht” mund të jetë një zgjedhje arkitekturore. Por nëse pas gjithë këtij luksi fshihet paraja e tenderave publikë, atëherë nuk kemi më të bëjmë me arkitekturë. Kemi të bëjmë me prova që kërkojnë përgjigje.

Dhe nëse SPAK-u i ka këto prova përpara, pyetja është e thjeshtë: Çfarë tjetër po pret?

© BalkanWeb

Një plantacion i madh kanabisi i zbuluar në një pallat banimi të periudhës së ish-Gjermanisë Lindore ka çuar në bankën e të akuzuarve tre persona në Gjermani, ndërsa në gjykatën e Stendalit ka nisur procesi ndaj tyre.

“Shqipëria konsiderohet prodhuesi më i madh i kanabisit në Evropë. Por mafia shqiptare po e zhvendos gjithnjë e më shumë prodhimin në vendet ku vepron. Një plantacion i brendshëm (indoor) i zbuluar në fund të shkurtit 2026 në Gjermani, tashmë është në qendër të një çështjeje që po shqyrtohet nga Gjykata Rajonale e Stendalit. Të pandehur janë dy shqiptarë dhe një gjerman,” shkruan gazeta gjermane Volksstimme.

Sipas saj, në një ndërtesë banimi në qarkun Stendal, në landin Saksonia-Anhalt, policia zbuloi rreth 800 bimë kanabisi, së bashku me pajisje teknike të përdorura për kultivimin në ambiente të mbyllura. Zbulimi u bë gjatë një ndërhyrjeje të policisë në godinë.

Në çështjen që po shqyrtohet nga gjykata në Stendal janë të përfshirë dy shtetas shqiptarë dhe një shtetas gjerman, sipas raportimit të Volksstimme. Ata përballen me akuza që lidhen me kultivimin dhe tregtimin e paligjshëm të kanabisit.

Rasti ka tërhequr vëmendje për shkak të përmasave të plantacionit dhe mënyrës së organizimit të tij. Policia kishte konstatuar një sistem të pajisur me mjete teknike për prodhim në ambiente të mbyllura.

Hetimet gjermane kanë trajtuar rastin si veprimtari të organizuar të kultivimit dhe tregtimit të lëndëve narkotike. Në një tjetër operacion të zhvilluar në landin Saksonia-Anhalt, autoritetet kanë raportuar se plantacione të tilla mund të përfshijnë qindra bimë dhe pajisje të specializuara për kultivim.

Procesi gjyqësor në Stendal pritet të hedhë dritë mbi rolin konkret të secilit prej të akuzuarve, mënyrën e funksionimit të plantacionit dhe destinacionin e kanabisit të prodhuar. sn

Audio përgjimi që dëgjuam dje, tregoi se korrupsioni i zakonshëm administrativ që thyen rregullat është tejkaluar, në shtetin aktual shqiptar, rregullat i rishkruan Roni.

Audio përgjimi tregoi se ne operojmë në ‘Shtetin e Ronit’ ku menaxhimi i pronës publike riorganizohet në mënyrë të tillë që shfrytëzimi i saj të kanalizohet vetëm në duar e Ronit edhe sojit të tij , duke anashkaluar rregullat e transparencës edhe llogaridhënies.

Audio përgjimi i djeshëm ishte prova më e pastër sesi ligji përdoret si instrument nxitës i njëanshëm për transferimin e parave pa procedura garuese, pa transparencë, e pa llogaridhënie, nga buxheti tek Roni, i cili haptazi thotë se është i panginjur edhe dëshiron të bëj më shumë para .

Në ‘shtetin e Ronin’ i cili ka filluar të ngrihet që më 2018 shtrembërimi i procedurave të prokurimit kryhet lehtësisht me anë të ndërmarrjeve shtetërore (NSH) të cilat përdoren si instrument për legjitimimin e korrupsionit. ‘Modeli Kayo’ edhe rrjeti i kompanive të krijuara nën të, nuk është gjë tjetër veçse një variant më i përsosur i vjedhjes që filloi po me Ronin në 2018 me krijimin e AIR Albanias, sot të falimentuar.

Modeli Kayo që po replikohet tek një tjetër kompani tregtare e cila do të zotërojë milionat që menaxhonte AKSHI, apo tek kompania e barnave, janë shembuj ekselent të përdorimit të ndërmarrjeve shtetërore si tuba për të transferuar prona dhe para publike pa procedurë, pa tendera e pa garë, pa kontroll, nën kujdesin e Ramës tek soji i Ronit të cilët e shuajnë etjen për para tek buxheti i shtetit më të varfër në Europë .

Në shtetin e Ronin, Roni qeveris, Rama administron, korrupsioni legjitimon, presioni blen heshtjen. Sa më shumë konsolidohet kjo mënyrë qeverisjeje aq më shumë dëmet janë të pakthyeshme. Besa, Pasqyrat, e Prania Besnike janë thjesht manovra për të maskuar dhimbjet e degradimit .

Për dhëmbët me faceta të Ronit, shteti lipset ti dorëzohet arrë e qëruar. Për këtë nevojitet Ermal Nufi i cili ka ambicie që nga zëvendës sekretar në Kryeministri të bëhet ministër. Ermali e di mirë që Rama promovon vetëm ata që qërojnë dardha, kumbulla, e arra për të edhe për Ronin, ndaj për të kënaqur ambicien nuk heziton të shërbejë duke bërë skeletet e nevojshme në dollap.

Por as ai i vetëm nuk mjafton. Që shteti të drejtohet si kompani private e Ronit me administrator Kryeministrin, duhen që në Kuvend partia socialiste të çojë mercenarë, të gatshëm të certifikojnë çdo ditë ligjet që i shërbejnë vetëm Ronit. Ndaj me kujdes zgjidhen njerëz, që nevoja, ambicia, a ligësia i ka zhveshur nga skrupujt, edhe janë të gatshëm ti ofrojnë opinionin publik kornizën ideologjike që justifikon përdorimin e institucioneve shtetërore për t’i shërbyer interesave të ngushta të Ronit .

Por që Roni jo vetëm të pasurohet, por të duket i zoti edhe i mençur nuk mjafton Taulanti, Ulsiu, Zeqineja , Sara, Zamira, apo edhe Bajram Bega, nevojitet edhe përfshirja e avokatëve, ekspertëve që hartojnë legjislacione ose transaksione që favorizojnë transferimin e burimeve publike në duar e Ronit .

Me pjesëmarrjen aktive të një armate shpirtshitur, shqiptarët e gjejnë veten duke jetuar në një shtet që duket si demokraci në letër, por në realitet funksionon si kartel.

Ky është shteti i Ronit që administrohet nga Kryeministri! bw