Në dhjetor të vitit 2018, qeveria e Togos nënshkroi një kontratë zhvillimi prone për ambasadën e saj pranë Kombeve të Bashkuara në New York me një kompani të quajtur 40-th Development LLC, e cila zotërohej nga tre persona. Ata ishin Ron Yeffet, Isaac Yeffet dhe Adam Gordon.

Sipas kontratës, qeveria e Togos fillimisht do t’i transferonte pronësinë e pronës kompanisë 40-th Development. Kjo e fundit do të shkatërronte ndërtesën ekzistuese ku qëndronte misioni i përhershëm i Togos në OKB për të ndërtuar aty dy kulla të reja. Njëra prej tyre do të shërbente si ambasada e re e Togos në OKB, ndërsa tjetra do të shitej për qëllime banimi.

Pas nënshkrimit të kontratës, qeveria e Togos ja transferoi pronësinë kompanisë dhe e lëvizi misionin e saj përkohësisht në një tjetër ambient, derisa të përfundonte ndërtimi i selisë së re nga 40-th Development LLC, që sipas marrëveshjes duhej të ndërtohej për 18-24 muaj.

Por sipas qeverisë së Togos, e gjitha rezultoi një mashtrim. 40-th Development LLC pasi e shkatërroi godinën ekzistuese e vuri pronën peng në bankë për të marrë kredi dhe nuk i ndërtoi asnjëherë dy godinat e reja.

Historia vazhdoi për disa kohë, derisa në nëntor të vitit 2024 qeveria e Togos paditi Ron Yeffet, Isaac Yeffet dhe Adam Gordonin në gjykatën e New Yorkut duke kërkuar kompesimin e dëmeve dhe rikthimin e pronës.

Skema nisi nga Ron Yeffet

Dokumentat e fundit publik të gjyqit, i përkasin qershorit të vitit të kaluar. Në 8 qershor, Ron Yeffet, Isaac Yeffet dhe Adam Gordon iu përgjigjën padisë me prapësimet e tyre duke u justifikuar se ndërtimi i kullave u vonua nga pandemia e Covid 19 si dhe disa pengesa të tjera, jo në dorën e tyre.

Nga ai moment nuk dihet më se si ka shkuar fati i gjyqit për ambasadën e Togos në OKB. Por fatmirësisht për shqiptarët, ambasada e Shqipërisë në Neë York shpëtoi. Përpara golit togolez, Edi Rama ra dakord që t’i jepte Yeffet ambasadën e Shqipërisë në SHBA për kulla. Plani dështoi pasi u kundërshtua nga ministri i Jashtëm i kohës, Ditmir Bushati, i cili nuk pranoi të firmoste.

Ndërkohë një tjetër gjyq, po për mashtrim kundër Ron Yeffet, zbulon një detaj shumë interesant.

Gol Kasowitzit të Veliajt

Mark Faist është një pensionist amerikan, i cili ka punuar në fushën e tregtimit të energjisë. Në fillim të muajit të kaluar, ai depozitoi një padi për mashtrim me pasoja të rënda kundër Ron Yeffet, në gjykatën e Miamit.

Sipas padisë, Ron Yeffet i ka marrë 8.6 milionë dollarë Mark Faistit duke e mashtruar se do të investonin në pasuri të paluajtshme dhe do të fitonin shumë para. Por pasi kaluan disa vite, Yeffet jo vetëm që nuk i dha asnjë fitim Faist, por nuk i kthehu as shumën e investuar prej 8.6 milionë dollarësh.

“Historia pas kësaj padie është një tradhti e llogaritur,” shkruan Faist në padinë e tij.

Yeffet përdori njohjen me kryeministrin e Shqipërisë, Edi Rama për të mashtruar Faist. Në padi, ky i fundit shkruan se Yeffet e mori në disa udhëtime në Shqipëri, ku për t’i treguar se ishte njeri i rëndësishëm, e shëtiste me autokolonë të armatosur.

Pasi Faist e kuptoi mashtrimin dhe e paditi në gjykatë, Yeffet e pranoi borxhin dhe tentoi ta zgjidhë çështjen me marrëveshje para gjykatës. Në shtator të vitit të kaluar, Yeffet dhe Faist lidhin një marrëveshje ku izraeliti i natyralizuar si shqiptar, pranoi të shlyente borxhin brenda datës 26 shkurt të këtij viti.

Por nga 8.6 milionë Yeffet kaloi në llogarinë e Faist vetëm 1 milionë dollarë. Rrjedhimisht pensionisti iu drejtua sërish gjykatës në fillim të marsit. Zoti Yeffet kërkoi 30 ditë shtyrje kohe për t’u përgjigjur padisë. Por avokatët e Faist i kërkuan gjykatës të vepronte me shpejtësi duke zbuluar një tjetër bëmë të mikut të kryeministrit.

Në gjyqin me ambasadën e Togos ai mashtroi studion e njohur avokatore Kasowitz, duke mos i paguar paratë e mbrojtjes.

“Paditësi nuk pranon një zgjatje të mëtejshme duke marrë parasysh gjendjen financiare të përkeqësuar të të paditurit dhe shqetësimet në lidhje me aftësinë e Yeffet për të shlyer borxhin e papaguar. Shqetësimet e Paditësit rrjedhin nga dosjet e fundit në çështjen The Republic of Togo kundër 40th Dev. LLC, e cila zbulon se firma ligjore Kasoëitz LLP kërkoi të tërhiqej si avokat i Yeffet për mospagim të faturave të tyre ligjore gjatë së njëjtës periudhë kohore të marrëveshjes. Me fjalë të tjera, Yeffet nuk arriti t’i paguante avokatët e tij gjatë të njëjtës dritare kohore kur ishte i detyruar t’i paguante Paditësit mbi 7.6 milionë dollarë,” thuhet në një dokument që avokatët e Faist i dorëzuan gjykatës së Miamit vetëm 4 ditë më parë.

 

 

Gol Kasowitzit

Kasowitz është një nga studiot më të njohura ligjore. Ajo është kompania e pajtuar nga Erion Veliaj për të lobuar pranë qeverisë amerikane për burgosjen e kryebashkiakut të Tiranës nga SPAK dhe GJKKO.

Borxhlinjtë në radhë
Por Mark Faist, qeveria e Togos dhe Kasowitz nuk janë të vetmit që presin me dëshpërim të marrin paratë e tyre nga Ron Yeffet. Padia e Faist zbulon se radha e kreditorëve është e gjatë dhe e larmishme.

“Ka edhe kreditorë të tjerë që kërkojnë të mbledhin shumat e papaguara nga Yeffet. Shih Naval Logistic, Inc. kundër A 50’ Nortech Vessel, me numër identifikimi Hull AOV50021E898, nr. 25- cv-23774, 2026 LX 86046, në *1 (S.D. Fla. 21 gusht 2025). Në thelb, çdo vonesë në zgjidhjen e kësaj mosmarrëveshjeje rrit rrezikun që nuk do të mbetet asgjë për t’u mbledhur deri në kohën kur të jepet një vendim përfundimtar,” thuhet në prapësimin e Faist, të cilin nevoja e ka shtyrë të gërrmojë thellë në gjendjen financiare të Yeffet dhe bëmat e tij.

Ron Yeffet njihet si një mik i ngushtë i Edi Ramës. Ai është njeriu, i cili ka marrë monopolin e mjeteve të ushtrisë, policisë, zjarrëfikses dhe gjithë strukturave të ngjashme të shtetit shqiptar. Paralelisht, ai ka marrë nga qeveria edhe të drejtën e prodhimit të dronëve dhe mjeteve të tjera luftarake ajrore për llogari të forcave të armatosura.

Edi Rama dhe Ron Yeffet

Kur kohë më parë, Edi Rama tha se në samitin e Natos që pritet të mbahet në Tiranë vitin tjetër, udhëheqësit e vendeve më të fuqishme të botës do të mbrohen nga dronë të prodhuar në Shqipëri, e kishte fjalën pikërisht për dronët që do të prodhojë Ron Yeffet me Arjeta Pucan nga Lezha. /Kapitali.al