Abbas Gallyamov, ish-përpiluesi i fjalimeve të presidentit rus, Vladimir Putin, është shpallur i dyshuar nga autoritetet ruse për diskreditim të forcave ushtarake ruse.

Autoritetet ruse e kanë përdorur këtë akuzë së fundi për të dënuar personat që e kritikojnë luftën e Rusisë në Ukrainë.

Së fundi, emri i Gallyamovit është shfaqur në regjistrat e Ministrisë së Brendshme ruse, për personat që janë në kërkim.

Gallyamov, 50-vjeçar, është larguar nga shteti dhe tani jeton në Izrael.

Ai ka punuar si tekstshkrues i fjalimeve të Putinit prej vitit 2008 deri më 2010.

Grupi Setevyye Svobody, i cili monitoron të drejtat e gazetarëve që punojnë online, ka thënë më 30 mars se ka siguruar dokumentet zyrtare të hetimeve kundër Gallyamovit, sipas të cilave, akuzat me të cilat përballet, dalin nga intervista e tij me Televizionin ukrainas 1+1 – projekt që transmetohet vetëm një YouTube.

Gallyamov e ka realizuar intervistën më 9 prill 2022, dhe e ka përmendur kryerjen e krimeve të dyshuara të luftës nga trupat ruse në qytetet ukrainase, Buça dhe Kramatorsk.

Setevyye Svobody ka thënë se hetimet kundër Gallyamovit kanë nisur më 18 janar dhe se emri i tij është shtuar në listën e personave në kërkim më 17 shkurt.

Nëse dënohet, Gallyamov përballet me 10 vjet burgim.

Sipas Setevyye Svobody, avokati Alan Gamazov është duke e përfaqësuar Gallyamovin.

Ende nuk dihet nëse ai është emëruar nga autoritetet ruse, apo është zgjedhur nga Gallyamovi që të bëhet përfaqësuesi i tij ligjor.

Më 24 mars, faqja online Mediazona ka thënë të ketë gjetur në Ministrinë e Brendshme ruse njoftimin zyrtar që e shpall Gallyamovin si person në kërkim.

Njoftimi është bërë i ditur një ditë pasi Radio Evropa e Lirë e ka publikuar një intervistë me Gallyamovin.

Përgjatë intervistës, Gallyamov ka sugjeruar që lufta në Ukrainë mund të rezultojë me revolucion në Rusi.

Ai, po ashtu, ka reflektuar për kohën e tij si pjesëtar i ekipit që shkruajnë tekstet për Putinin, pasi ai është bërë kryeministër më 2008.

Ai ka thënë se atëbotë, askush nuk e ka parashikuar “që Rusia do të shndërrohet në shtet fashist, siç është tani”.

Diskreditimi i forcave të armatosura ruse është kthyer në krim, sipas ligjit të ri, që është miratuar në Rusi, pas nisjes së luftës në Ukrainë, në shkurt të vitit 2022.

Muajin e kaluar, Ministria ruse e Drejtësisë e ka shtuar Gallyamovin në regjistrin e “agjentëve të huaj”, duke thënë se ai ka shpërndarë “materiale të përpiluara nga agjentët e huaj, ka shprehur ide kundër operacionit special ushtarak në Ukrainë, dhe ka marrë pjesë si ekspert, ose ka shpërndarë informacionet e platformave që janë prezantuar si entitete të huaja”.

Agjencia më e lartë e sigurisë në Rusi ka deklaruar se është arrestuar një gazetar i mediumit amerikan Wall Street Journal mbi dyshimet për spiunazh. Asnjë dëshmi nuk është dhënë për këto pretendime.

Shërbimi Federal i Sigurisë (FSB) – agjencia ruse për siguri dhe kundërzbulim që e ka pasuar agjencinë KGB të kohës sovjetike – tha të enjten se Evan Gershkovich u arrestua në Yekaterinburg, qytetin e maleve Urale, pasi që dyshohet se po përpiqej të siguronte informacion të klasifikuar.

Gershkovich është gazetari i parë i një mediumi amerikan që arrestohet me akuza për spiunazh në Rusi që nga Lufta e Ftohtë. Arrestimi i tij vjen mes tensioneve të shtuara midis Moskës dhe Uashingtonit shkaku i luftës në Ukrainë.

Shërbimi i sigurisë pretendon se Gershkoviq “po vepronte mbi urdhra amerikane për të mbledhur informacion për aktivitetet e njërës prej ndërmarrjeve të kompleksit industrial ushtarak rus që përbën sekret shtetëror”. FSB-ja nuk ofroi asnjë dëshmi për këto pretendime.

FSB-ja nuk e bëri të ditur se kur ka ndodhur arrestimi.

32-vjeçari Gershkovich, i cili është shtetas i SHBA-së, mund të përballet me 20 vjet burg nëse shpallet fajtor për spiunazh.

Gershkovich raporton për Rusinë dhe Ukrainën si korrespondent në zyrën e Moskës të Wall Street Journal. FSB-ja vuri në dukje se ai kishte akreditim nga Ministria e Jashtme ruse për të punuar si gazetar.

Raporti i tij i fundit nga Moska, i publikuar në fillim të kësaj jave, trajtonte ngadalësimin e ekonomisë së Rusisë pas sanksioneve të vendosura nga shtetet perëndimor pas hyrjes së trupave ruse në Ukrainë vitin e kaluar.

Inteligjenca artificiale mund të zëvendësojë rreth 300 milionë vende të punës me orar të plotë, është thënë në një raport të bankës Goldman Sachs.

Sipas gjetjeve në raport, avancimi teknologjik mund të zëvendësojë një çerek të detyrave të punëtorëve në Shtetet e Bashkuara dhe Evropë, por edhe nënkupton hapjen e vendeve të reja të punës dhe hapësirë të re për produktivitet.

Në raport është thënë, po ashtu, se një zëvendësim i tillë mund të rrisë prodhimin vjetor të mallrave për 7 për qind.

Aty përmendet që aftësia e inteligjencës artificiale që të krijojë përmbajtje të padallueshme nga puna e njeriut, është “avancim i madh”.

Carl Benedikt Frey nga Universiteti i Oksfordit, ka thënë për transmetuesin britanik BBC se, “nuk ekziston një mënyrë për të ditur se sa punë do të zëvendësohen nga inteligjenca artificiale”.

“Shembull, ajo çfarë bën ChatGPT është që u lejon më shumë njerëzve, me pak aftësi për shkrim, që të krijojnë ese dhe artikuj”.

“Prandaj, gazetarët do të përballen me më shumë konkurrencë, çka mund të ndikojë në ulje të pagave, përveç nëse ka rritje të madhe të kërkesës për një punë të tillë”.

Në raporton e Goldman Sachs përmendet se ndikimi i inteligjencës artificiale do të dallojë varësisht prej sektorit – 46 për qind të punëve administrative dhe 44 për qind të punëve në profesionet e lidhura me ligjin, do të mund të automatizohen, mirëpo në sektorin e ndërtimtarisë dhe mirëmbajtjes, një zëvendësim i tillë mund të prekë 6, respektivisht 4 për qind të vendeve të punës.

Sipas raportit, 60 për qind e njerëzve sot kanë pozita të punës që nuk kanë ekzistuar më 1940.

Mirëpo në disa hulumtime tjera është thënë se ndryshimet teknologjike prej viteve 1980, kanë ndikuar në largim të njerëzve nga puna, më shpejt sesa që janë krijuar mundësi të reja punësimi.

Babai i një vajze 12-vjeçare, e cila vizatoi një imazh pro-ukrainas është dënuar me 2 vjet burg. Vizatimi përshkruante rusët duke bombarduar një familje ukrainase.

Alexei Moskalyov, prindi i së miturës, u dënua sot për diskreditim të forcave të armatosura, sipas grupit të të drejtave OVD-Info. Ai është ndarë nga vajza e tij, Maria, që kur u vendos në arrest shtëpiak dhe ajo u dërgua në një strehë shtetërore muajin e kaluar.

Sipas mediave të huaja, Moskalyov u dënua për komentet që ai kishte postuar në internet për luftën në Ukrainë. Por hetimi gjatë prillit të kaluar, kur Maria, një nxënëse e klasës së gjashtë, refuzoi të merrte pjesë në një klasë patriotike në shkollën e saj dhe bëri disa vizatime që tregonin raketa që hidheshin mbi një familje që qëndronte nën një flamur ukrainas dhe një tjetër që thoshte “Lavdi Ukrainës!”

Zyrtarët e shkollës thirrën policinë, e cila mori në pyetje vajzën dhe kërcënoi të atin. Moskalyov më pas u gjobit me rreth 350 paund për një postim në internet në të cilin ai e karakterizonte ushtrinë ruse si “përdhunues”. Vërejtjet erdhën që nga zbulimi i krimeve të supozuara të luftës të kryera kundër civilëve në Ukrainë.

Rasti ka provokuar një protestë në mesin e aktivistëve rusë të të drejtave të njeriut dhe ka ndezur një fushatë në internet për të ribashkuar babanë dhe vajzën. Grupi i të drejtave të ndaluara Memorial tha se e konsideronte Moskalyov si të burgosur politik.syri.net

Zemërimi global për luftën e Rusisë në Ukrainë, vitin e kaluar, vetëm sa i ka shpërfaqur “standardet e dyfishta” të Perëndimit ndaj abuzimeve në fushën e të drejtave të njeriut në botë, ka thënë organizata ndërkombëtare për të drejta të njeriut, Amnesty International.

Në raportin vjetor për vitin 2022, Amnesty është përqendruar tek ajo që e ka përshkruar si heshtje të Perëndimit ndaj shkeljeve të të drejtave të njeriut në Arabinë Saudite, shtypjes në Egjipt dhe trajtimit të palestinezëve në Izrael.

“Përgjigjja e Perëndimit ndaj luftës së Rusisë në Ukrainë, ka vënë në pah standardet e dyfishta, duke ekspozuar se sa të parëndësishme kanë qenë reagimet e këtyre vendeve për shkeljet tjera të Kartës së OKB-së”, ka thënë Sekretarja e Përgjithshme e Amnestyt, Agnes Callmard, teksa e ka prezantuar raportin vjetor në Paris.

Sulmet e Rusisë, që kanë nisur më 24 shkurt 2022, “na kanë ofruar një pamje të rrallë të asaj që është e mundshme kur ka vullnet politik” marrë parasysh mbështetjen e Perëndimit ndaj Ukrainës, ka shtuar ajo.

Shumë shtete e kanë sanksionuar Moskën dhe i kanë hapur kufijtë për refugjatët ukrainas, pas nisjes së luftës, derisa Gjykata Ndërkombëtare Penale ka nisur hetime për krime të luftës në Ukrainë.

Mirëpo, Amnesty ka thënë se konflikti ka vënë dritë rreth reagimeve që janë bërë për abuzimet në pjesët tjera të globit.

Në veçanti janë përmendur shkeljet e të drejtave të njeriut në Arabinë Saudite, mosveprimi në Egjipt dhe refuzimi i përballjes me sistemin e Izraelit “për aparteidin kundër palestinezëve”.

Amnesty, organizata tjetër për të drejta të njeriut, Human Rights Watch dhe raportuesi special i OKB-së, kanë ardhur në përfundim që trajtimi i Izraelit ndaj palestinezëve përbën aparteid, akuzë të cilën e mohon Izraeli.

Aparteidi ka qenë sistem i ndasive me baza racore, që ka ekzistuar në disa rajone afrikane nga viti 1948 deri më 1990

Vitin e kaluar “Qeveritë izraelite kanë marrë masa duke detyruar largimin e më shumë palestinezëve nga shtëpitë e tyre, zgjerimin e territoreve të pushtuara dhe legalizimin e më shumë vendbanimeve në Bregun e pushtuar Perëndimor”, ka thënë Amnesty.

Mirëpo, pavarësisht kësaj, kombet e Perëndimit kanë dështuar t’i japin fund atij “sistemi shtypës”.

“Pa plan konkret”

Në Arabinë Saudite, aktivistët për të drejta të njeriut vazhdojnë të jenë nëpër burgje, njerëzit janë burgosur për qëndrimet e tyre, 81 burra janë dënuar me vdekje brenda një dite, si dhe migrantët kanë vdekur sa kanë qenë në mbajtje.

Amensty ka thënë se në Egjipt mijëra mbrojtës të të drejtave të njeriut, gazetarë, protestues dhe disidentë të dyshuar, vazhdojnë të jenë nëpër burgje dhe “tortura është e vazhdueshme”.

Ndonëse disa shtete evropiane mirëpresin refugjatët ukrainas, ato nuk e kanë treguar shenjën e njëjtë të mirësisë ndaj njerëzve që u kanë ikur luftërave në Siri, Afganistan dhe Libi, ka thënë Amnesty.

Callamard ka thënë se në Iran, “gratë kanë vdekur pse kanë kërcyer, pse kanë vallëzuar, dhe pse nuk kanë vendosur mbulesën në kokë”, teksa janë mbajtur protesta kundër sistemit islamik të shtetit.

Amnesty e ka përmendur edhe atë që e ka konsideruar dështim të institucioneve globale për t’u përgjigjur në mënyrë adekuate ndaj konflikteve, duke lënë të vdekur mijëra njerëz, përfshirë ata në Etiopi, Mianmar dhe Jemen”.

Sipas organizatës, lufta në Ukrainë “ka tërhequr vëmendjen dhe burimet nga kriza klimatike dhe konfliktet tjera afatgjate”.

“Më 2022, ne nuk kemi gjetur dëshmi që përgjigjja ndërkombëtare ndaj krizës në Ukrainë do të jetë plan veprimi për konfliktet dhe krizat tjera”, ka thënë ndër tjerash Callamard.

Përgatiti: Krenare Cubolli

Në Rusi një tjetër politikane që kundërshton Vladimir Putinin dyshohet se është helmuar. Mediat ndërkombëtare shkruajnë se pas ngjarjes mund të jenë shërbimet sekrete të Vladimir Putin.

Një nga kundërshtaret e Vladimir Putinit është sëmurur në mënyrë të papritur. Opozitarja Elvira Vikhareva ka pasur probleme me stomakun, mpirje të gjymtyrëve, të fikët dhe rënie të flokëve.

Analizat mjekësore kanë treguar se në gjakun e saj kishte element të substancave të rrezikshme kancerogjene dhe shumë toksike.

Situata e pazakontë shëndetësore e politikanes ka krijuar dyshime se kemi të bëjmë me një tjetër rast të eliminimit të kundërshtarëve politikë. Në një mënyrë të ngjashme, disa kohë më parë është helmuar dhe opozitari Aleksi Navalni.

Vikhareva tha se analiza e para i ka kryer në muajin dhjetor. Në rrjetet sociale ruse ajo ka bërë një postim të gjatë ku flet për rrezikun e jetës së saj nga regjimi që drejton Presidenti Vladimir Putin.

Ajo thotë se pavarësisht situatës shëndetësore nuk do të heq dorë nga lufta për më shumë të drejta të qytetarëve rusë. Politikania ruse thotë se Vladimir Putin po qeverisë më anë të frikës dhe sulmi ndaj saj synon trembjen e qytetarëve dhe kundërshtarëve të tjerë që nuk mendojnë njëlloj si Presidenti rus. syri.net