Presidenti Ilir Meta ka folur sërish për marrëveshjen e detit me Gerqinë. 

Në një intervistë për Fax News, Meta thotë se ka qenë i hapur dhe bashkëpunues për një zgjidhje në respekt të Kushtetutës dhe vendimit të Gjykatës Kushtetuese.

Meta deklaroi se i ka thënë kryeministrit Edi Rama kur ishte edhe ministër i jashtëm të kërkojë një autorizim në rast se vendos të pranojë kërkesën e palës greke për një qasje politike.

“Është një çështje e ezauruar shumë qartë nga Institucioni i Presidencës. Presidenti ka qenë shumë i hapur dhe bashkëpunues për një zgjidhje në respekt të Kushtetutës tonë dhe vendimit të Gjykatës Kushtetuese, për këtë qëllim kemi dhënë edhe autorizimin për negociatat.

Me pas janë zhvilluar disa raunde negociatash dhe është kërkuar nga pala greke që të ketë një qasje politike, e cila nuk mund të bëhej nga negociatorët, sepse ata janë të mandatuar pikërisht për të zbatuar ligjin vendas dhe atë ndërkombëtar, si dhe për të negociuar në raport me ligjin.

Në këtë situatë unë i kam thënë zotit Rama, i cili ka qenë dhe ministër i Jashtëm, që nëse dëshiron ta zgjidhësh në këtë mënyrë, hajde kërko autorizimin dhe ta marrësh përsipër, sepse negociatorët nuk mund të bëjnë veprime të paligjshme.

Së dyti, ata nuk kanë ndonjë vullnet politik, përveç detyrës për të zbatuar ligjin dhe për t’iu referuar të Drejtës Ndërkombëtare dhe të drejtës tonë. Sepse në fund, ti je udhëheqësi i maxhorancës, ajo që do të negociohet do të shkoj në Parlament që të votohet. Por nesër mund të shkoj përsëri edhe në Gjykatë Kushtetuese, nëse dikush ankohet”, – tha Meta.

Megjithatë Meta deklaroi se Rama nuk kërkoi asnjëherë autrorizim edhe pse theksoi se ka kryer veprime që dalin në pah nga intervistat që ngrenë dyshime serioze mbi integritetin dhe qëllimet në raport me interesat e Shqipërisë.

“Dhe padyshim duhet ta marr përsipër Qeveria që ta mbroj këtë gjë. Ai asnjëherë nuk kërkoi një autorizim, kur është e qartë që ka bërë veprime, ato që marrim vesh më shumë nga pala greke nga intervistat që jepen, të paautorizuara, të cilat ngrenë dyshime serioze mbi integritetin dhe qëllimet e kësaj sjellje në raport me interesat e Shqipërisë.

Unë kam qenë dhe jam për një zgjidhje të ndershme, për një zgjidhje të drejtë, larg lojërave të dyfishta. Por kjo nuk mund të ndodhë kurrë jashtë transparencës dhe duke shkelur Kushtetutën e Shqipërisë”, – tha Meta.

Partia Demokratike me anë të deputetit Belind Këlliçi ka përkujtuar 31 vjetorin e vizitës historike të Sekretarit Amerikan të Shtetit, James Baker.

Gjatë deklaratës, Këlliçi u shpreh se, 31 vite pas kësaj vizite historike, liria funksionon vetëm për Edi Ramën dhe miqtë e tij.

Deklaratë e PD-së, Deputeti Belind Këlliçi:

31 vite më parë, Sekretari amerikan, James Baker, bëhej i pari zyrtar i lartë amerikan që shkelte në Shqipëri.

Vizita e tij mbetet e papërsëritshme, por mesazhi i saj jehon ende: Liria funksionon!

Liria që frymëzon Amerika, dhe theksoi sekretari, funksionoi për Shqipërinë, që njohu, në vetëm katër vjet, integrim shembullor në strukturat euroatlantike.

Shqipëria nënshkroi Marrëveshjen e Stabilizim- Asocimit në vitin 2006.

U anëtarësua në NATO në vitin 2009.

Mori liberalizimin e vizave në vitin 2010.

Këta hapa gjigantë drejt integrimit, të hedhur gjatë katër viteve intensivë, ndodhën për faktin se liria funksionoi.

Por liria nuk punon dot e vetme.

Këta 10 vjet të qeverisjes së Ramës, dëshmojnë se liria duhet shoqëruar me vullnet politik dhe me dashuri për Shqipërinë dhe kombin.

Janë 10 vite të qindra ekskursioneve dhe gallatave qeveritare nëpër botë, pa asnjë rezultat.

E dëshmon edhe ky 22 qershor, 31 vite pas vizitës së sekretarit Baker.

Edhe sot, në këtë datë të parë të integrimit të Shqipërisë, që shenjon përvjetorin e asaj vizite, Rama e refuzon integrimin. 

Pasi deklaron se nuk do të shkojë në Bruksel, thotë se do të shkojë, por do të lexojë fjalimin që kishte gati, edhe pse nuk do të shkonte.

31 vite më vonë liria po funksionon për shqiptarët. Por, fatkeqësisht, është liria e ikjes nga vendi. Amerika, ju që e donit këtu iu mohohet prej 10 vitesh. 

Për shkak se Rama me 10 vetë, në kurriz të shqiptarëve, jetojnë ‘Eldoradon’e tyre.

Liria duhet të funksionojë për të gjithë.

syri.net

Në promovimin e librit ‘Kurrë mos harro’ për gjenocidin serb në Kosovë, kryetari i PD, Sali Berisha tha se qëllimi i Ballkanit të Hapur është asgjësimi i shtetit kosovar.

“Nëse ka një gjë që duhet të ndajë njeriun e qytetëruar nga njeriu primitiv, është qëndrimi ndaj genocidit. Nuk ka asgjë më themelore. Atëherë më thoni ju mua, nga ndryshon udhëheqësi në Tiranë me udhëheqësin e Beogradit? Kjo është e vërteta.

Por nëse në vitin 45, projekti ishte siç i shkruan Enver Hoxha, Stalinit, se Kosovën e lamë se është më e sigurt me Jugosllavinë dhe tani edhe ne do shkojmë drejt saj, çfarë po ndodh tani? Çfarë është Ballkani i Hapur? Është asgjësimi i shtetit të Kosovës. Diktatorët nuk shesin asgjë. Të shiturit thonë atë që u thonë padronët e tyre. Lexoni fjalimin e Vladimit Putinit në Davos. Problemi ishte se të tjerët nuk i besuan.

A po i fsheh Vuçiçi qëllimet e tij? Absolutisht jo! A deklaroi ai në Kosovë se Serbia do bëhet më e madhe. Do merrte Kosovën. A patëm reagim nga plebenjtë e politikës shqiptare?,” tha Berisha.

Sipas tij, shqiptarët janë sërish para një rreziku ekzistencial.

“Koha i fton shqiptarët se ndodhen para një rreziku shumë të madh. Para një rreziku ekzistencial. Para një rreziku të devijimit të nordit të tyre drejt Bashkimit Europian dhe gllabërimit nga Rusia e vogël dhe ajo e madhe.

Prandaj thirrja ime është për çdo shqiptar kudo që është, që të ngrihemi në lartësinë, t’u përgjigjemi thirrjeve të miliona shqiptarëve që ranë në mënyrë që ne të mbijetojmë. Ne nuk duhet të kemi komplekse. Asnjë lloj kompleksi nga askush.

Ne duhet të zgjidhim probleme tona, se me klika në pushtet si Edi Rama, me vasalë të Beogradit, shqiptarët do i kenë kohërat shumë të vështira.

Megjithatë, unë jam optimist se edhe ky agresion i pashpallur i serbëve ndaj shqiptarëve, do të dështojë,” tha Berisha.

syri.net

Kryetari demokrat, Sali Berisha, prezantoi sot gazetarin e njohur Alfred Lela si drejtorin e zyrës së shtypit të PD-së.

“Së pari, kam kënaqësinë të paraqes para jush, drejtorin e zyrës së shtypit dhe komunikimit në PD, publicistin, gazetarin, polemistin e mirënjohur, zotin Alfred Lela.

Alfredi, siç e dini ju, ka një karrierë të suksesshme në fushën e gazetarisë.

Pas përfundimit të studimeve, ai ka bërë një vit kualifikimi në Boston, SHBA. Ka kompletuar doktoratën me një libër më interesantin e jetës së tij, e dini vetë ju. Do shkruajë edhe libra të tjerë, por si ai nuk mund të shkruajë një të dytë.

Do të drejtojë këtë sektor jashtëzakonisht të rëndësishëm për partinë dhe publikun me qëllimet më të mira për të vendosur standardet më të mira të transparencës, etikës, profesionalizmit të komunikimit të PD-së,” tha Berisha.

“Faleminderit zoti Berisha edhe për ftesën, edhe për fjalët e mira,” tha Lela.

“Ne që bëjmë analizën politike, kemi folur deri në monotoni për hapjen, por tani është momentin që jo vetëm të flasim për hapjen, por edhe të jetojmë atë,” tha Lela.

“Unë kam dashur të dal përtej kësaj hipokrizie që vetëm flasim për hapjen, por nuk bëhemi pjesë,” theksoi Lela.

syri.net

Publicisti i njohur, Kim Mehmeti, ka folur me tone të ashpra dhe kritike ndaj klasës politike shqiptare. Në foltorja e Kuvendit të Shqipërisë ku u zhvillua një aktivitet në kuadër të Javës Çame, Mehmeti u shpreh se ndihet keq kur dëgjon që në këtë foltore shpërndahen mesazhe grindjeje dhe jo bashkimi.

Sipas tij është e turpshme që të ulesh në një tryezë me Presidentin e Serbisë dhe të mos i thuash që nuk kam asnjë projekt me ty, derisa të kërkosh falje.

Po ashtu Mehmeti u shpreh se Serbia po bën tregti me viktimat shqiptare, duke theksuar se ata e dinë ku ndodhet varret e shqiptareve të Kosovës, por nuk i tregojnë.

“Të heshtësh për gjenocidin çam, atë të Kosovës apo të Srebrenicës, tregon se çfarë njeriu je. Nuk i lejohet këtij tempulli, i lejohet një kafeneje. Si mund të lodhësh duke i numëruar varret e shqiptarëve. Duhet t’i numërojmë deri në fund. Të tjerët vijnë i mbledhin eshtrat e ushtarëve të vet.

Serbia nuk i tregon ku janë varret masive. Ajo bën tregti me viktimat shqiptare. Prandaj them nuk është shqiptare, apo pak shqiptare. Është e turpshme. Të jesh burrështetas shqiptar dhe mos guxosh kolegut tënd grek t’i thuash që pa çuar deri në fund çështjen çame, nuk mund të shkojmë me tej.

Është e turpshme të ulesh me Presidentin serb dhe mos t’i thuash derisa të kërkosh falje, unë nuk kam asnjë projekt me ty. Kur e di që ai është i dalë nga kapota e Millosheviçit”, the Mehmeti.

Deklaratat e tij u bënë gjatë një aktivitetit të organizuar nga Kuvendi me rastin e Javës Çame.

syri.net

Motra e Nuredin Dumanit, personit të arrestuar për dhjetëra vrasje me pagesë në vend ditët e fundit, Xhuljana Dumani rezulton se është pajisur edhe me certifikatë sigurie pasi punon në zyrën e marrëdhënieve me NATO-n në dikasterin e diplomacisë. Pas lajmit të bërë publik dje, vjen reagimi nga Ministria për Europën dhe Punët e Jashtme.

Sipas MEPJ, motra e Dumanit ka qenë pjesë e listës që kanë aplikuar për këtë program sjellë në MEPJ nga Ministria e Arsimit. Sa i përket dëshmisë së penalitetit për motrën e Dumanit, MEPJ thotë se ajo ka rezultuar e pastër.

DEKLARATË PËR SHTYP MINISTRIA PËR EVROPËN DHE PUNËT E JASHTME

Ditën e djeshme në një numër mediash janë publikuar raportime mbi punësimin në MEPJ dhe pajisjen me çertifikate sigurie të motrës së të penduarit të drejtësisë Nuredin Dumani, znj. Xh. D.

Nisur nga interesimi që natyrshëm ka ngjallur ky rast, por edhe nga nevoja për të korrigjuar disa pasaktësi në raportimet mediatike, duam të informojmë opinionin publik si më poshtë vijon:

Znj. Xh.D, është përzgjedhur për të kryer praktikën 3-mujore në MEPJ. (thirrja VI, Programi Kombëtar i Praktikave të Punes, te Ministrisë se Arsimit, në zbatim te VKM nr. 395, datë 29.04.2015, “Për miratimin e programit kombëtar të praktikave të punës në administratën shtetërore dhe institucionet e tjera publike” e ndryshuar.)

Emri i znj. Xh.D ka qenë pjesë e listës që kanë aplikuar për këtë program sjellë në MEPJ nga Ministria e Arsimit. Pas marrjes së listës, ngrihet një komision që bën përzgjedhjen e studentëve, bazuar në metodologjinë e përcaktuar në VKM përkatëse dhe më tej, bazuar tek buxheti dhe kërkesat e drejtorive përkatëse të MEPJ, përzgjidhen një numer i caktuar studentësh, për të cilët lidhen kontratat e punës me afat të caktuar 1 vjeçar. Emrat e praktikantëve sugjerohen nga drejtoritë përkatëse ku ata kanë kryer praktikat e punës.

Pra, znj. Xh.D ka hyrë në MEPJ si pjesë e një programi, ku përzgjedhja bazohet vetëm në rezultatet e studentëve dhe që synon krijimin e hapësirave për studentët më të mirë në administratën publike.

Znj. Xh.D e ka kryer praktikën në gusht 2021 dhe në perfundim të praktikës, për shkak të vlerësimit të performancës së saj nga drejtoria, është lidhur kontrata e punës me afat të paracaktuar 1 vjecar deri ne 31.12.2022, si specialiste në Drejtorinë e Shërbimeve të Brendshme, Sektori i Shërbimeve. Znj. Xh.D nuk ka qenë për asnjë moment e punësuar në Kabinetin e MEPJ.

Për punësimin e znj. Xh.D është kërkuar sipas ligjit, dëshmia e penalitetit nga autoritetet përkatëse e cila ka rezultuar e pastër. Në përputhje me ligjin, ashtu si për çdo punonjës tjetër të MEPJ, edhe për znj. Xh.D është kërkuar certifikata e sigurisë nga DSIK. Kjo certifikatë është, pas dëshmisë së penalitetit, një tjetër filtër nëpër të cilin kalon çdo punonjës i MEPJ.

Duam të sigurojmë publikun por edhe mediat e interesuara, që në asnjë moment zonja në fjalë nuk ka pasur akses në informacion të klasifikuar e aq më pak në informacion të klasifikuar të NATO. Informacionet e klasifikuara në MEPJ trajtohen me rregulla e procedura të posaçme dhe vetëm një numër i kufizuar punonjësish kanë akses në to.

syri.net

Të tjera detaje janë bërë publike me skandalin për Xhuljana Agim Dumani, motra e Nuredin Agim Dumanit, e cila ka qenë pjesë e kabinetit të Olta Xhaçkës, gjatë kohës që ka qenë e deleguar e PS në Dibër.

Pasi Nuredin Dumani është arrestuar me 29 mars 2022 dhe pas rreth një muaji që ai ka nisur rrëfimin për dhjetra vrasje mafioze, Xhuljana Dumanin e kanë lëvizur nga pozicioni i saj në Ministrinë e Jashtme, për të fshehur gjurmët.

Ndërkohë pas kësaj lëvizjeje të fshehur, po në të njëjtën mënyrë, Xhuljana Agim Dumanin e kanë pajisur me certifikatë sigurie të NATO-s.

Pavarësisht se problemi nuk është vetë Xhuljana Dumani, por e njëjta sot nuk duhej të ishte pjesë e zyrës ku kalonjnë të gjitha sekretet e Ministrisë së Jashtme, informacionet nga NATO, Abasadat etj.m

Nga Vettingu janë shkarkuar dhjetra gjyqtarë e prokurorë vetëm se kanë pirë kafe me një person të inkriminuar dhe e njëjta linjë duhej të ishte ndjekur edhe për Xhuljana Dumanin, mund të mos hiqej nga puna, por jo në një strukturë të tillë.

Thelbi është i qartë, motra e një vrasësi me pagesë, ka në duar sekrete që lidhen me sigurinë ndërkombëtare të NATO-s dhe institucioneve të tjera ligjzbatuese.

Motra një vrasësi me pagesë ka qenë pjesë e kabinetit të Ministres së Jashtme, Olta Xhaçka e cila duket se ka bërë një “qokë” kriminale.

Në kohën kur vëllai i saj Nuredin Dumani, mbi të cilin rëndojnë 17 akuza ka qenë në kërkim, Xhuljana Dumani punonte në Ministrinë e Jashtme tek zyra kryesore e informacioneve të sigurisë.

Nuredin Dumani, i akuzuar për vrasjes me pagesë është emri më i lakuar sot për sot,  pasi ka zbardhur në SPAK, dhjetra vrasje mafioze.

Ndërkohë e motra, në kulmin e rrëfimeve të të vëllait për krimet makabër, është pajisur me certifikatë sigurie të NATO-s nga DSIK. Në skandal janë përfshirë she disa institucione të tjera të shtetit.

Mbi ministren Olta Xhaçka ngrihen dyshime se ka punësuar motrën e Dumanit, për mbështetje politike në qarkun e Dibrës ku ajo ishte e deleguar./ cna/

Gazetari Elton Qyno komentoi në emisionin ‘Task Force’ në Syri Tv kërcënimin e SPAK ndaj gazetarëve me 5 vite burg nëse publikojnë dëshmitë e Nuredin Dumanit.

Qyno tha se në dëshmitë e Dumanit përmenden rreth 100 emra, që janë emra periferikë, që kanë një pozicion lokal, në pushtetin lokal dhe emra të njohur të botës së krimit.

“Kemi të bëjmë me një dëshmi me 100 emra të përmendur, janë emra të njohur të botës së krimit, emra periferikë, që kanë një pozicion në pushtetin lokal. Pritet një valë e dytë arrestimesh. “-tha Qyno.

Avokati Dorian Matlija komentoi në emisionin ‘Task Force’ në Syri Tv kërcënimin e SPAK ndaj gazetarëve me 5 vite burg nëse publikojnë dëshmitë e Nuredin Dumanit.

Matlija tha se problemi nuk janë mediat dhe gazetarët por duhet të nisin hetimet mbi prokurorët dhe oficerët e policisë gjyqësorë që administrojnë dosjen.

“Gazetari s’ka shans ta dijë çfarë ka ndodhur në një dosje nëse ata persona që kujdesen për dosjen nuk do ishin treguar më të kujdesshëm. Hetimet duhet të orientohen drejt të gjitha burimeve të tjera e vetëm në rrethana të posaçme të shkojnë tek gazetari.

Duhet t’i ruajnë ata dosjet. SPAK ka tentuar të paralajmërojë gazetarët për të plotësuar kushtin ligjor që nesër t’i mbajë në përgjegjësi penale.

Problemi kryesor nuk janë gazetarët por rrjedhja e informacionit nga prokurorët dhe oficerët e policisë gjyqësore, aty duhet të fillojë hetimi.“-tha Matlija.

Deputeti demokrat Dashnor Sula ka bërë një deklaratë të fortë. Nga foltorja e Kuvendit, deputeti Sula hodhi dyshime të forta se në kafenë e Kuvendit pihet dhe hashash.

“Këtu, te kafja ngjitur vjen era puro që pijnë pasanikët e pushtetarët, mos them ndonjë gjë tjetër që vjen edhe era hashash.

Ky është realiteti zonja kryetare. Po kadillaku i kryeministrit e di sa benzinë e naftë harxhon? Apo i ministrave të tjerë? Po e dini se çmimi i naftës është jashtëzakonisht i lartë.

Unë nuk e kam për turp dhe jam krenar që jam fshatar, dhe që përfaqësoj gjithë ata fshatarët e bujqit. Dilni e shikoni njëherë nëpër fshatra, është gjendja katastrofike.”-tha Dashnor Sula.

Pas fjalës së deputetit Sula, ka reaguar kryeparlamentarja Lindita Nikolla, e cila e cilësoi si fyerje deklaratën në fjalë dhe tha se ai duhet të kërkojë falje.

“Është fyerje e madhe që i bëhet institucionit, kolegëve deputetë, duke thënë një të vërtetë të madhe. Ju kërkoj të kërkoni falje.”-tha Lindita Nikolla.

Ndërsa deputeti Sula tha se “nuk akuzova askënd. Unë nuk pi as duhan, dhe mund ta ngatërroj, por aty vjen era puro e të mbyt.”

syri.net

Deutsche Welle: Ju e keni titulluar librin “Të lirë” – të rritesh në fund të historisë – A janë vërtet shqiptarët sot të lirë dhe “të rritur”, se në fund të historisë – këtë nuk mund ta thuash më sot pas luftës në Ukrainë…

Lea Ypi: Shqiptarët kanë kaluar nga një fazë kur problemet e Shqipërisë ishin vetëm problemet e Shqipërisë në një fazë kur problemet e Shqipërisë reflektojnë edhe problemet e botës. Pra krizat që janë kriza globale ndjehen edhe në Shqipëri, ndoshta veçanërisht në Shqipëri, e vende të tjera me histori të ngjashme, ku procesi i ndërtimit të shtetit është ende i papërfunduar. Mendoj që liria mbetet ideal kudo në botë. Ne kemi kaluar nga forma shtypjeje të drejtpërdrejta nga partia, nga shteti, nga kulti i individit, në forma shtypjeje anonime, nga tregjet, nga globalizimi, nga kriza, për të cilat është shumë e vështirë të përcaktosh përgjegjësi individuale, por që gjithsesi i kufizojnë liritë e të gjithëve. Premtimi i një shoqërie të lirë tingëllon disi i zbrazët, nëse nuk përmbushet për të gjithë. Nuk mund të jetë i lirë dikush që është i papunë.

Deutsche Welle:  Pse ishte e rëndësishme për ju të shkruanit një libër autobiografik-filozofik, një “nonfiction”?

Lea Ypi:Ishte një lloj autobiografie intelektuale dhe një mënyrë për të kuptuar më mirë nga vija unë si profil filozofik. Libri filloi me një përpjekje për të analizuar idetë e lirisë në traditat liberale dhe socialiste të mendimit politik dhe gradualisht u kthye në rrëfim autobiografik. Për mua ishte interesant zbulimi pothuajse psikoanalitik se çdo gjë që unë besoja nga ana filozofike i kishte rrënjët në përvojat e një vajze të vogël të rritur në Shqipërinë e viteve 80-90-të, që nisi të zgjohej dalëngadalë në faqet e librit.

Deutsche Welle:  Ajo vajzë e vogël është maturuar, por a ka arritur në fund të zbulimit?

Lea Ypi: Kërkimi i vetvetes është një proces që nuk besoj se njeriu arrin ta përmbyllë asnjëherë, ai na shoqëron në çdo fazë të jetës. Ne ballafaqohemi vazhdimisht me të shkuarën, por nga ana tjetër edhe perceptimi i të shkuarës ndryshon në varësi të eksperiencave që bëjmë në të tashmen dhe mënyrës si e shohim veten në të ardhmen.

Deutsche Welle:  Një përmbysje e tillë kaq e madhe pas rrëzimit të diktaturës sjell me vete edhe një krizë identiteti. Sa e vështirë është sot gjetja e identitetit për ata që u rritën në komunizëm, për një brez që ishte në moshë të re, e ku të gjitha përfytyrimet, jo vetëm ato për lirinë për lirinë u shkërmoqën brenda natës?

Lea Ypi: Për brezin tonë ka qenë veçanërisht e vështirë për arsye se ai është bërë mbartës i të gjitha idealeve që prindërit e tyre nuk i realizuan dot, por duke përjetuar në të njëjtën kohë edhe zhgënjimet tona specifike. Fëmijët që janë rritur „në fund të historisë” kanë vetëm kujtime fëmijërie nga periudha komuniste dhe fëmijëria është një fazë e jetës që shihet gjithnjë me një lloj nostalgjie, sidomos nëse fëmijët janë rritur në një mjedis familjar të rrethuar me dashuri. Për brezin tonë realiteti tragjik i Shqipërisë në periudhën komuniste ka qenë i filtruar nga prindërit dhe zbulimi i të vërtetës ka ardhur jo si pasojë e rrugëtimit individual por si pasojë e çarjes historike të shkaktuar nga ndryshimi i sistemit. Për këtë arsye ky brez ka patur një përballim me të tashmen që ishte shumë i ngarkuar nga përvojat e prindërve dhe sidomos nga fakti që të gjitha pamundësitë, të gjitha pengesat, gjithë shtypja e brezit të prindërve të gjyshërve u bë barrë dhe përgjegjësi për brezin e ri që të realizonte atë që paraardhësit nuk e kishin realizuar dot. Kjo sigurisht ishte një mundësi e jashtëzakonshme, por edhe një peshë e padiskutueshme.

Deutsche Welle:  Lea, libri juaj është pritur me entuziazëm jashtë, në Shqipëri ka pasur edhe kritika duke e konsideruar librin si një falje për komunizmin – mendoni se ka qenë një keqkuptim?

Lea Ypi: Njerëz të ndryshëm kanë pasur kritika të ndryshme, por nuk besoj se mund t’i quajmë të gjitha keqkuptime. Shumë kritika burojnë nga bindje të ndryshme filozofike, metodologjike ose nga një analizë e historisë në këndvështrim tjetër. Në përgjithësi kritikat e publikut shqiptar janë përqëndruar sidomos tek pjesa e parë e librit, që në fakt përbën më pak se gjysmën e tij ndërkohë që tematika kryesore që ai trajton është ajo e tranzicionit, konceptimit të lirisë dhe dallimit të saj nga propaganda apo ideologjia. Nuk besoj se libri ka ndonjë qasje shfajësuese ndaj komunizmit në Shqipëri, ai është kritik si ndaj periudhës socialiste, ashtu edhe ndaj periudhës që e ka pasuar atë. Disa nga kritikat në Shqipëri janë të kuptueshme, pasi një libër që bën shumë jehonë në botë, duket sikur rrezikon të bëhet përfaqësues i një populli të tërë, por në fakt asnjë libër nuk mund ta përfaqësojë një popull. Çdo autor ka eksperiencat e tij dhe çdo eksperiencë përcillet në mënyrë të ndryshme. Me siguri po të kishte më shumë autorë, më shumë letërsi shqiptare të përkthyer, dhe sikur historia e vendit tonë të njihej më mirë jashtë tij atëherë barra e përfaqësimit nuk do të binte thjesht mbi një apo dy autorë dhe kritikat do të merrnin formë tjetër.

Deutsche Welle:  Shqipëria kaloi një nga diktaturat më të egra lindore, e megjithatë përballja me të shkuarën ishte shumë më e vështirë se të gjitha vendet lindore, hapja e dosjeve u shty me vite, viktimat ndjehen ende sot të denigruar, kurse shumë nga ata që ishin përgjegjës të asaj kohe jo vetëm nuk reflektuan, por justifikoheshin me fjalët, ashtu ishte koha…mendoni se Shqipëria sot është një vend që e ka bërë përballjen me të shkuarën e rëndë?

Lea Ypi: Përballja me të shkuarën është një proces i gjatë dhe i ndërlikuar dhe askush nuk e ka monopolin se si kryhet ajo më mirë. Kërkimi i të vërtetës nga ana e viktimave është po aq i rëndësishëm sa pajtimi kombëtar, por ndërsa e vërteta është individuale, pajtimi kryhet bashkarisht. Ky është një proces në të cilin të gjitha familjet shqiptare kontribuojnë me historitë e tyre, me përvojat e tyre dhe nga kërkimi i të vërtetave, nga koha që kalon, nga debati që ndizet nëpërmjet këtyre përvojave të ndryshme ndoshta arrihet përballja me pasojat e diktaturës. Por nuk është bardhë e zi, nuk bëhet thjesht për të thënë që u bë, dhe nuk janë hapa që mund të pritet të hidhen nxitimthi nga e sotmja në të nesërmen.

Deutsche Welle: Ju nuk jeni vetëm shkrimtare, por edhe profesore e teorisë politike, e zhvillimet në Shqipëri i shikoni nga fokusi i studiueses, parë nga kjo anë, si e shikoni Shqipërinë sot…një vend ku klasa politike nuk del dot ngërçi polemizues e bllokues, kurse njerëzit e thjeshtë duan të largohen…

Lea Ypi: Mendoj se politika e Shqipërisë duhet të kthehet tek një politikë e idealeve, një politikë e vizioneve, politikë e platformave të partive që ballafaqohen me programe shoqërore të ndryshme, dhe që shpjegojnë se si dhe pse secili nga këto programe çon në vendimet e duhura dhe realizon vlerat që duhet të kemi si shoqëri. Politika sot kudo është politikë e interesave individuale dhe personalizimit të pushtetit, trampolinë për t’u fuqizuar në kurriz të të tjerëve dhe jo urë lidhëse mes qytetarëve me bindje të ndryshme. Pushteti ekonomik kushtëzon atë politik në mënyrë jashtëzakonisht problematike. Në Shqipëri politika duhet të shkojë përtej akuzave individuale e t’u japë mundësi qytetarëve të orientohen me programet e partive të ndryshme dhe të gjejnë në to bindjet e tyre. Përndryshe demokracia do të mbetet thjesht një parullë e zbrazët.

Deutsche Welle: Si e shpjegon sot dëshirën e pashuar të shqiptarëve për largim nga vendi, sidomos të rinjve edhe të atyre që kanë pak a shumë një jetesë të mirë…Pse nuk e ofron Shqipëria sot dot këtë strehë, që njerëzit të duan të qëndrojnë, a lidhet kjo edhe me një krizë identiteti të shoqërisë shqiptare që e lidh shpëtimin vetëm me largimin drejt perëndimit?

Lea Ypi: Them se ka të bëjë me traumën historike që ne kemi kapërcyer, ku populli e ka parë veten gjithnjë si viktimë, viktimë e fuqive të mëdha, viktimë e diktaturës dhe ku kjo e kaluar shtypjeje na ka bërë të humbim besimin tek vetja dhe të dyshojmë se mund t’ia dalim të ndërtojmë institucionet tona, shtetin tonë. Trishtohem shumë kur kthehem në Shqipëri, dhe dëgjoj shprehje të natyrës se shqiptarët nuk e bëjnë dot këtë, ose ne shqiptarët jemi të tmerrshëm, ose ne jemi shumë të këqinj për njëri-tjetrin, sepse është një formë esencializmi dhe mosbesimi tek aftësitë tona të përbashkëta që nuk i shërben të ardhmes.

Deutsche Welle: Krizë identiteti?

Lea Ypi: E gjithë bota është në krizë në këtë periudhë. Nuk mendoj se Shqipëria është në ndonjë krizë më të thellë se sa vende të tjera. Natyrisht kriza në Shqipëria ka veçoritë e saj historike që reflektohen në institucionet që kemi trashëguar dhe mënyrën se si kërkojmë zgjidhje. Por mendoj se ka ardhur koha ta shohim Shqipërinë nga pikëpamja globale dhe jo botën nga pikëpamja e Shqipërisë. Kjo ndoshta i mungon shoqërisë shqiptare, çdo problem shihet nga brenda jashtë dhe jo nga jashtë brenda. Sikur të zgjerojmë këndvështrimin e rolit të Shqipërisë në Europë përtej analizave të tipit na pranojnë apo nuk na pranojnë në BE, do të kuptojmë më mirë edhe kontributin që Shqipëria mund të japë në Ballkan e më gjerë në zgjidhjen e krizave. Atëherë ndoshta do t’i shohim vështirësitë që kemi kapërcyer jo thjesht si arsye për ta konsideruar veten si humbës të historisë por si një mundësi për të kontribuar në një politikë globale të zgjidhjes së krizave që arrin ta kthejë eksperiencën traumatike në mësim edhe për të tjerët…

Deutsche Welle: A është kjo karakteristikë e vendeve të vogla, që merren më shumë veten dhe nuk e shohin veten në kontekstin global?

Lea Ypi: Është një problem i historisë, një histori që është përcaktuar gjithmonë nga fuqitë e mëdha. Kur një shtet është formuar dhe ekziston thjesht si pasojë e vullnetit të fuqive të mëdha është shumë e vështirë për qytetarët e atij shteti që të kenë besim se vërtet mund të arrijnë autonominë e premtuar. Kjo reflektohet më tej edhe në dinamikat e marrëdhënieve me botën e jashtme. Ka shumë rëndësi që Shqipëria të bashkëveprojë me vendet jashtë Shqipërisë, me Ballkanin, me BE, me SHBA duke treguar në radhë të parë respekt për veten, për vendimet e saj, eksperiencat e saj, dhe personalitetin e saj si shtet. Shqiptarët duhet të dëshmojnë se e vlerësojnë veten para se të kërkojnë aprovimin e të tjerëve.

Deutsche Welle: Diçka personale…mendon, se për një femër, shqiptare, me barrën e një vendi të panjohur për Europën është shumë më e vështirë të mbërrijë aty ku keni mbërritur ju, apo ecja përpara është njësoj e vështirë si për këdo tjetër…

Lea Ypi: Po, mendoj se të gjithë autorët apo akademikët që vijnë nga vende të vogla e kanë këtë problem përfaqësimi, për të cilin fola më parë pasi interesi si politik dhe mediatik ndaj vendeve të vogla kur nuk kapërcejnë luftëra apo tragjedi të ngjashme është shumë i kufizuar. Sigurisht që është më e vështirë të përfaqësohesh jashtë nëse vjen nga një vend i vogël. Por ka edhe dinamika të tjera, dinamika të ndarjeve etnike, gjinore apo klasore, që përjetohen njësoj kudo.

Deutsche Welle: A do të vijë një libër tjetër pas librit “Të lirë”?

Lea Ypi: Po punoj për një roman me karakter historik-filozofik që do të ketë si bosht jetën e gjyshes sime, e cila është edhe personazh në librin “Të lirë”. Ai ambientohet në Shqipërinë e viteve 20-të 30-të, pra në vitet e para të formimit të shtetit shqiptar dhe shtron pyetjen se çfarë do të thotë të kesh dinjitet – si individ dhe si komb.

Lea Ypi (lindur 1979) është shkrimtare dhe filozofe shqiptaro-britanike, profesore e teorisë politike në London School of Economics. Libri i saj “Të lirë – të rritesh në fund të historisë” ka gjetur jehonë të madhe si në Britaninë e Madhe edhe në Gjermani. Biseda me Lea Ypin u zhvillua në kuadër të prezantimit të saj në Festivalin e Filozofisë, phil.cologne në Köln, ku ajo foli për atë që e mban të bashkuar një shoqëri të hapur në kohë krizash.

Me Lea Ypin bisedoi Lindita Arapi

Mjekja kirurge, Lida Shosha, ngriti alarmin për largimin e bluzave të bardha, jo vetëm mjekët, por gjithnjë e më shumë edhe infermierët. 

Në tryezën e organizuar nga kryetari i Partisë Demokratike, Sali Berisha, me profesionistët e shëndetësisë, Shosha tregoi se nga spitali ku ajo punon aktualisht brenda 1 jave janë larguar nga Shqipëria 70 infermierë.

Sipas saj, ky është një moment dramatik dhe kambanë alarmi për të ardhmen e sistemit shëndetësor në vend.

“Jam kirurge e përgjithshme. Prej më shumn se çerekshekulli kam shërbyer në spitalin e Traumës dhe së fundmi jam në një spital privat. Prej vitesh kemi parë se si sistemi shëndetësor dhe se si armata e shquar e mjekëve është përpjekurt me mish dhe shpirt t’;i gjendet popullit në ditët e tij më të vështira, t’i gjendet qytetarit në sfidat e mëdha që ka kaluar ky tranzicion i zgjatur. 

Nuk ka qenë e lehtë, ka qenë e vështirë, por mendoj që armata mjekësore ka qenë stoike. Ku jemi sot? Sot jemi përballë sfidave të jashtëzakonzhme të cilat do të kenë një kosto drastike në shëndetin e popullatës dhe kjo ka të bëjë me situatën aktuale të sistemit shëndetësor dhe largimin masiv të bluzave të bardha dhe jo vetëm të mjekëve, por edhe të infermierëve, teknicienëve, kanë ikur edhe staf të administratës nga spitalet. 

Brenda 1 jave, nga spitali ku unë punoj u larguan 70 infermierë brenda një jave. Kjo është dramë. Megjithatë, shpeshherë e kam ngritur zërin dhe kam folur për problematikat e sistemit shëndetësor. As e ka vënë kush ujin në zjarr. Jemi baltosur, kanë hedhur topa balte ndaj nesh“, tha mjekja Shosha.

Nisi sot greva katërditore e avokatëve në vend, të cilët kundërshtojnë hartën e re gjyqësore të propozuar nga KLGJ dhe Ministria e Drejtësisë. Më shumë se 600 seanca gjyqësore nuk u zhvilluan këtë të martë, ndërsa me mijëra procese pritet të dështojnë në ditët në vijim për shkak të grevës. Avokatët e cilësojnë hartën e re gjyqësore si anti-kushtetuese, pasi largon drejtësinë nga qytetarët. Ata thonë se me hartën e re gjyqësore, qeveria po kap sistemin, ndërsa shtojnë se kjo nismë konfirmon dështimin e reformës në drejtësi

SYRI TV

Më shumë se 600 seanca gjyqësore të parashikuara për t`u zhvilluar këtë të martë në të gjitha hallkat e sistemit të Drejtësisë, nuk u mbajtën. Avokatët në të gjithë vendin nisën grevën katër ditore, duke futur në kolaps të gjitha gjykatat në vend.

Dhoma e Avokatisë, me të gjitha degët e saj në rrethe, kundërshton miratimin e hartës së re gjyqësore nga Këshilli i Lartë Gjyqësor, që parashikon përgjysmimin e numrit të gjykatave në vend, ku nga 22 rrethe gjyqësore parashikohen të mbeten vetëm 13 të tillë.

Kreu i dhomës së avokatisë Korçë, Arben Lena duke e cilësuar antikushtetues vendimin e KLGJ, kërkon rishikim të tijin, ndërsa avokati Ervis Goxhaj në Fier propozon krijimin e tre gjykatave të apelit.

Për Elton Laskën, që drejton Dhomën e Avokatisë në Lezhë, harta e re gjyqësore e propozuar nga KLGJ është shpërfillje për qytetarët. Ndërkohë, Albens Tabaku në Korçë, tregon se harata e re gjyqësore do të largojë drejtësinë nga qytetarët.

Në këtë linjë, avokati Albens Tabaku thotë se drejtësia, do të përfundojë në vetëgjyqësi.

Arsyet se pse nuk duhet të shkrihen disa gjykata apeli, i tregon Kreu i dhomës së avokatisë Durrës, Lorval Petani.

Avokati Arenc Berati, e sheh këtë hartë si dështim të vettingut dhe kapjes së drejtësisë nga qeveria.

Greva e avokatëve në të gjithë vendin do të zgjasë deri ditën e premte. Në rast se Ministria e Drejtësisë dhe KLGJ nuk do të tërhiqen nga harta e re gjyqësore, ata paralajmërojnë  përshkallëzim të protestave, duke u bërë thirrje edhe qytetarëve të reagojnë.

Në Shqipëri, Dhoma e Avokatisë njoftoi se nga sot, për katër ditë me radhë, do të bojkotohen seancat gjyqësore në shenjë proteste ndaj hartës së re gjyqësore të miratuar të premten nga Këshilli i Lartë Gjyqësor. Kryetari i Dhomës së Avokatisë Maksim Haxhia, deklaroi se me hartën e re cënohet rëndë qasja në drejtësi e individëve dhe personave juridikë si dhe rriten kostot dhe shpenzimet.

Sipas vendimit të Këshillit të Lartë Gjyqësor, nga 22 gjykata të shkallës së parë do të mbeten vetëm 13 të tilla, nga 6 gjykata administrative vetëm dy, ndërsa për të gjthë vendin do të funksionojë vetëm një gjykatë Apeli në Tiranë. Këshilli i Lartë deklaron nga ana e tij se “propozimi mbi “Hartën e Re Gjyqësore” është hartuar duke u bazuar në standardet më të mira ndërkombëtare” dhe se “riorganizimi i rretheve gjyqësore krijon një qasje novatore që rrit efiçencën e sistemit gjyqësor për qytetarët, realizon shpërndarjen e drejtë të ngarkesës së punës midis gjykatave dhe gjyqtarëve dhe nxit specializimin, me pasojë reduktimin e kohës së nevojshme për shqyrtimin e një çështjeje e dhënies së një drejtësie më cilësore”.

Reduktimi i fortë i numrit të gjykatave duket se lidhet ngushtë me largimet e ndjeshme të gjyqtarëve nga sistemi për shkak të procesit të vettingut. Afro gjysma e tyre tanimë janë shkarkuar.

Harta e re ju nënshtrua një procesi të gjatë konsultimi. Por zoti Haxhia tha sot se pas vendimit të KLGJ-së, këto konsultime sipas tij duket të kënë qenë false, “pasi sugjerimet e tona nuk janë marrë në konsideratë”.

Ish kryeministri Sali Berisha i cili ka rimarrë drejtimin e Partisë Demokratike, u shpreh se sipas tij, harta e re e gjyqsorit është një ndëshkim i ri për qytetarët, një rrënim i të drejtës së qytetarëve shqiptarë për një proces të rregullt gjyqësor.

Propozimi i Këshillit të Lartë gjyqësor do të duhet të marrë dhe mendimin e Këshillit të Lartë të Prokurorisë, Prokurorit të Përgjithshëm dhe Ministrit të Financave, përpara se t’i përcillet për vendim qeverisë.

Pas tetë vitesh, kryeministri Edi Rama duket sikur është zmbrapsur në lidhje me lumin e Vjosës.

Qeveria e tij nënshkroi nj ditë më parë një marrëveshje me organizatën amerikane Patagonia për të hartuar një draft, ku Vjosa do të shpallet Park Kombëtar.

Por sipas Associated Press, do të duhen vite derisa Vjosa të shpallet park.

Aktualisht Vjosa është një zonë e mbrojtur.

As qeveritarët dhe as organizatat joqeveritare nuk ishin në gjendje që të deklarojnë se sa i madh do jetë parku i ri.

Deri tani dihet se Rama ka thënë se do jetë parku më i madh në Shqipëri. Sa për krahasim, parku i Valbonës është rreth 8 mijë hektarë.

Mbrojtja e Vjosës, i cilësuar si një prej lumenjve të fundit të egër në Europë, ka aktivizuar shumë emra të njohur në vend dhe jashtë.

Mes tyre edhe aktori i famshëm, Leo DiCaprio.

syri.net

Policia italiane ka arrestuar një ish-zyrtar shqiptar për trafik droge. 

Mësohet se i arrrestuari është Agim Kajmaku, ish-kryetar i bashkisë së Vorës, shkruan Report Tv, media pranë kryeministrit Edi Rama.

Personi i arrestuar nga policia italiane është  ditëlindjes 6 korrik 1971, të dhënat të cilat korrespondojnë me ato të ish-kryebashkiakut socialist të Vorës.

Kajmaku është arrestuar në 27 maj 2022 me 20 kg kokaine në zonën e San Benedeto del Tronto.

Operacioni vijon dhe Italia ka kërkuar edhe bashkëpunimin e Policisë Shqiptare.

Agim Kajmaku u shkarkua nga detyra e kryebashkiakut të Vorës që mori në 30 qershor 2019, pasi nuk deklaroi një procedim penal në Greqi.

Njësia e dekriminalizimit në Prokurori, ngriti ndaj Kajmakut akuzën e falsifikimit të formularit të vetëdeklarimit si dhe për kryerjen e funksionit pasi i kishte përfunduar mandati.

Agim Kajmaku kishte mashtruar me formularin e dekriminalizimit, duke fshehur identitetin Jorgo Toto, me të cilin ishte ndjekur penalisht në Greqi. Pasi u provuan akuzat, KQZ i hoqi mandatin Kajmakut, por pikërisht në atë dy ai shkarkoi dy nënkryetarët e bashkisë, që u cilësua si i paligjshëm nga gjykata dhe rëndoi akuzën ndaj tij.

Agim Kajmaku u arrestua në korrik 2020, disa muaj pasi ishte shpallur në kërkim, në një spital privat në Tiranë ku po trajtohej për probleme shëndetësore.

Por dy ditë pas ndalimit, Kajmaku u la i lirë më 8 korrik 2020, kur Gjykata e Apelit ndryshoi masën e shkallës së parë nga ‘arrest me burg’ në ‘detyrim paraqitje’.

Partia Demokratike ka miratuar këtë të shtunë edhe dy udhëzime me për plotësimin e strukturës organizative të degës, si dhe saktësimin e listave të anëtarësisë. Në udhëzime bëhet me dije se procesi për saktësimin e anëtarësisë duhet të përfundojë brenda datës 10 korrik 2022.

SYRI TV

Në mbledhjen me krerët e degëve, Partia Demokratike ka miratuar edhe dy udhëzime, me qëllim plotësimin e strukturës organizative të degës, si dhe saktësimin e listave të anëtarësisë.

Në udhëzimi bëhet me dije se në çdo degë të PDSH –së, krahas zgjedhjes së sekretarit Politik të Degës do të zgjidhen edhe sekretarët funksional, të cilët janë strukturë ndihmëse në degë dhe përgjigjen pranë sekretariatëve përkatëse në qendër.

Sipas udhëzimit sekretarët funksional në momëntin që zgjidhen, dorëhiqen nga të qënurit anëtar kryesie i votuar, dhe në kryesinë e degës hyjë anëtarët më të votuar sipas radhës.

Sa i takon saktësimit të listës së anëtarësisë në udhëzim theksohet do të konsiderohen anëtarë të degës të PD-së të gjithë ata të cilët rezultojnë në emigracion sezonal, për të cilët kryesia e degës merr masa për plotësimin e formularit menjëherë pas mbarimit të sezonit.

Si dhe do të konsiderohen anëtarë të degës të gjithë ata të cilët rezultojnë me vendbanim fizik në territorin e degës, pavarsisht në se gjendja e tyre civile ndodhet në një tjetër territor të ndryshëm nga ai I degës.

Sipas udhëzimit ky process duhet të përfundojë brenda datës 10 korrik 2022.

Berisha: Bashizmi induktoi apatinë! Ish-kreu i Mallakastrës mori 97 tendera nga Rama

Kryetari demokrat, Sali Berisha, deklaroi në takimin me krerët e degëve, se Lulzim Basha dhe ndjekësit e tij imponuan një apati të rrezikshme në PD.

“Apatia u induktua në tetë vite nga qëndrimet e papërgjegjshme të udhëheqjes së saj dhe të pazareve të pandershme dhe të turpshme të udhëheqjes së saj, nga flirtet e padenja me pushtetin e Edi Ramës.

Unë mund t’ju jap sot vetëm një shembull. Aktualisht një nga mbështetësit kryesorë të bashizmit, ish-kryetari i Mallakastrës, është fituesi i 97 tenderave nga qeveria lokale dhe vendore.

Ndaj edhe bilbilon Enkelejdi siç i thotë Rama. Për të mos thënë problemet e tjera madhore të bëra të qarta tani publikisht të Bashës e të ndonjë tjetri.

Ky është një problem shumë serioz për ne, sepse përgjegjësia jonë është që të dalim sa më shpejt nga kjo gjendje. Është e vërtetë që këtë gjendje e kanë krijuar pazaret e udhëheqjes me qeverinë, por kjo gjendje shndërron në letër të pavlerë të gjithë aksionin e demokratëve nga shtatori gjer më sot, që bënë një mrekulli absolutisht të vërtetë të madhe për Shqipërinë dhe Europën, ngritën në këmbë forcën e tyre politike si forcë të vërtetë opozitare.

E ngritën në këmbë përballë presionit, terrorit dhe trysnive të shumëllojta dhe të jashtëzakonshme. Ata presin udhëheqjen tani. Ata presin një drejtim nga ne,” tha Berisha.

Berisha: Revolta ndaj regjimit po zien! Duhet të krijojmë me shpejtësi frontin opozitar

Kryetari demokrat, Sali Berisha tha se do të vazhdojë të akuzojë Taulant Ballën e PS për lidhjet me Nuredin Dumanin.

“Do ia them në parlament. Nuk ka nevojë që t’ia jap unë prokurorisë se ajo i ka në dosje. Mund të thuash se përse po i fsheh prokuroria? Ato që do ia them në parlament, prokuroria i ka në dosje. Është normale që unë t’ia them në parlament, sy më sy. Më komode është kur e ke përballë,” tha Berisha.

“Balla ka probleme me drejtësinë dhe do të ketë të tjera probleme. Unë i bëj publike gjërat kur e gjykoj unë se duhen bërë publike. Ai ka shumë probleme dhe gradualisht do të shkojë aty ku e meriton”.

“Ai duhet të tregojë si e shpërbleu Dumanin për ta shpëlarë nga akti i vendosjes së revoles… Ata tregojnë që po, e ka vendosur, dyshojnë sepse ky i ka kërkuar të marrin pjesë në fushatën e  tij elektorale dhe i kanë thënë jo. Revolen ia kanë vendosur në një vend që e shihnin të gjithë… Për revolen e fshehur, pesë vetë janë në burg për këtë.  Edhe kuptohet që revolën e kanë vendosur. Po si do e shihnin në një vend të dukshëm një revole krimi? E kanë zor për të gjetur një revole? Se s’mund ta hidhte ai në Shkumbin. Drejtësia vonon, por nuk harron. Kështu që Tao s’e ka punën mirë. Ka probleme me drejtësinë. Do ketë, jua them unë juve. Ka dhe probleme të tjera ai.
Do i bëj publike, por kur do i gjykoj unë. Ai gradualisht do të shkojë atje ku e meriton. Ka problem, është njeri me shumë probleme”

Protestat/ Berisha: Qytetarët nuk e presin shtatorin! Alibeaj e Bardhi i shërbejnë Ramës

“Me zgjedhjen e presidentit të ri të vendit, në Shqipëri është vendosur sistemi i plotë monist”.

Këtë deklaroi kryetari demokrat, Sali Berisha në deklaratën e përjavshme për mediat.

Sipas kreut të PD-së për herë të parë pas 31 viteve, në vendin tonë të gjitha pushtet janë në duart e një force politike dhe të njeriu të vetëm, duke zhdukur balancën e pushteteve.

Sipas Berishës kjo u arrit përmes krimit drogës, varfërisë dhe mbështetjes së Soros.

“Edi Rama pati mbështetjen e fuqishme të George Soros dhe fondacionit të tij në Tiranë për të kapur çdo pushtet.

Falë tij ai vuri nën kontroll drejtësinë. Soros, përmes deklaratave të njerëzve të tij, përligji vjedhjen e votave në zgjedhjet e fundit dhe ndërhyri por të larguar nga skena politike Sali Berishën, me objektivin e vetëm që të ndihmojë Edi Ramën dhe regjimin e tij të korruptuar.

PD u bën thirrje qytetarëve të ngrihen në mbrojtje të idealeve demokratike për të shpëtuar Shqipërinë nga regjimi komunist i Edi Ramës, i mbështetur nga Soros,” tha Berisha.

Berisha: Është vendosur monizmi i plotë, jetik krijimi i frontit opozitar dhe ngritja e qytetarëve

Kryetari demokrat, Sali Berisha tha se PD do të realizojë hapjen dhe do ngrejë një front të madh opozitar.

“Hapja nënkupton afrimin në PD të individëve me vlera, të njerëzve me ideale që duan t’i afrohen kësaj partie. Isha në Elbasan, një grup pedagogësh, mjekësh, mësues, shpallën anëtarësimin e tyre në PD. Kjo është një gjë e madhe.

Përveç kësaj, në kuadrin e hapjes, tani do të ngrihen bordet kombëtare, në të cilat ne, sipas fushave, do përpiqemi që të tërheqim personalitetet më të shquara, më të ditura, të atyre fushave, brenda dhe jashtë vendit,” tha Berisha.

“Kjo është për partinë, fronti është diçka tjetër. Fronti është vendosja e organizuar, ose krijimi i një fronti të përbashkët me të gjitha forcat politike opozitare, me të gjithë individët apo organizatat e shoqërisë civile që duan të angazhohen”, tha Berisha.

I pyetur se kur do mbahen protestat, Berisha tha: “Unë jam shumë i vonuar në artikulimin tim pasi zemrat e njerëzve po ziejnë. Revoltat po zien anekënd vendit. E kam thënë njëherë dhe po e përsëris prapë. Lëvizjet janë shumë interesante, ndonjëherë i udhëheq ti, ndonjëherë të udhëheqin ato.

Kërkesa për protestë është universale. PD është e vonuar. Ne do jemi në lartësinë e detyrimeve”.