Kërkesa e kryeredaktorit të  DITA-s për t’u shprehur se kush është Njeriu i vitit 2017 dhe për asimetri dhe Anti-njeriu i të njëjtit vit, më krijon një ndjesi të dyzuar.

Në thelb është tejet e vështirë të jesh i saktë dhe i vërtetë deri në fund për  t’u përgjigjur.

Ndonëse duket si pyetje standarde është në të  gjitha pikëpamjet edhe një test për secilin për të reflektuar mënyrën e  arsyetimit  dhe të konceptimit vetjak, për  të patur edhe një tendencë të afrimit të se vërtetës publike.

Nëse bëhet fjalë për një personalitet të kombit shqiptar, të përmasave të vetëkuptueshme dhe të brendashkruar tek një figurë për mendimin tim modest Neriu i Vitit 2017 është politikani Albin Kurti.

Padyshim më i votuari në Kosovë, padyshim një personalitet i pazakontë karizmatik, Albin Kurti është politikani i parimeve të mëdha progresive dhe më i dallueshmi nga tërë sekti i çuditshëm dhe kalimtar i politikanëve shqiptarë  të ditës, të tranzicionit grotesk gati 30 vjeçar.

Albin Kurti është-një shëmbëlltyrë e dinjitetit,- të situatave  të përballjes së arsyes historike dhe të vizionit modern, që ka stimuluar fuqishëm dhe pandalshëm një lëvizje qytetare dhe të partisë së Vetëvendosjes në Kosovë, të admirueshme dhe kurajoze, mes sakrificave dhe të privacioneve të panumërta dhe skenarëve të përçarjes dhe të shkatërrimit të kësaj partie.

Albin Kurti ndryshon nga politikanët e tjerë.

Kultura e tij politike është e  nivelit filozofik dhe  europian,- që ngrihet mbi të tjerët- , dallueshëm dhe qartësisht.

E kam dëgjuar  shumë herë-ligjërimi i tij politik dhe shoqëror të kujton Fan Nolin.

Ai nuk është politikani i sloganeve dhe korrupsionit marramendës dhe endemik, por një misionar .

I futur përdhunshëm disa herë në burg, padrejtësisht, Albin Kurti ,si deputet i popullit në parlamentin e Kosovës, nuk është vetëm mjeshtër i ligjërimit, por një zbulimtar i të vërtetave, trim dhe qytetar i madh.

Albin Kurti është  pra Njeriu i Vitit 2017 për mua- nuk ka asnjë rëndësi nëse ka njerëz të tjerë, që nuk janë dakord me mua për këtë zgjedhje, absolutisht.

Sepse vlerësimi i Albin Kurtit, përtej çdo idhujtarie, -ai vetë e urren idhujtarinë dhe e godet,- është prej kohësh  tashmë një  çështje e optikës madhore të historisë dhe jo e paragjykimeve dhe skenareve shqiptarofobë dhe provinciale dhe  mjerisht të egër dhe të paligjësuar, primitivë, klientelistë, ndaj Albin Kurtit.

Po Antinjeriu i Vitit 2017?

E kam të pamundur t’i përgjigjem kësaj kërkese gati hokatare dhe  humoristike.

E Keqja është bërë shumë e madhe – ajo ka shumë e shumë emra, emrat e oligarkëve të pashpirt, injorantë dhe mediokër, të fabrikimit si në Akademinë e  Laputës së Suiftit të personaliteteve të rremë, ose të shpirtrave të vdekur gogolianë, të deputetëve, me emra të ndërruar,- me ndryshime mafioze identitetesh,- që nga hajdutë të rëndomtë dhe banalë, të neveritshëm,- kanë arritur të bëhen (si vallë, si vallë ?) “përfaqësues të popullit “- ( o Zot, të cilit popull?),- të lajmit apokaliptik, se shqiptarët janë bërë përdorues  masivë të kokainë etj- që nuk dua ta besoj- po ajo që ndodh është më e rëndësishme,- se ajo që unë mund të mendoj me skepticizëm.

Nuk mundem dot ta personalizoj se kush është Anti-njeriu i Vitit 2017.

Ndërkohë mund të shtoj se viti 2017 në shumë aspekte qe një vit i marrëzishëm politik, sidomos për ekseset absurde  dhe lojën ambiguide të reformës në drejtësi etj.

Por kjo reformë nuk do të ndalet-për këtë jam i  vetëdijshëm dhe i sigurtë.

Viti 2017 është dhe viti i vdekjes në Londër  së sociologut të madh Zygmunt Bauman, një nga ata gjigantë të mendimit si  C.Ëright Mills, Emile Durheim dhe Max Veber, që ka bërë një analizë universale dhe iluminuese të shoqërisë së sotme.

Si askush!

Në librin e tij  emblematik  “Moderniteti i lëngët ” (“Liquid Modernity”) ai jep një tablo tronditëse të aktualitetit botëror, të pasojave të rënduara dhe katastrofike të Neo-liberalizmit ekonomik dhe banalitetit të  subkulturave,- të  kitsch-spektakleve dhe propagandës bajate dhe primitive,- post-faktuale.

Bauman citon mendimtarin e madh amerikan  George  Steiner, që thotë se realiteti sot është një “kulturë kazinoje”, plot pasiguri, ku strukturat e koncepteve dhe nocioneve tradicionale dhe shekullore shprishen dhe strukturohen, lëngëzohen.- dhe  këto koncepte dhe nocione humbin dallimshmërinë dhe  shpërbëjnë etikën dhe kauzat e mëdha humanistike, kredencialet e  të  ardhmes.

Ndoshta Bauman me horizontin e tij të jashtëzakonshëm do të jepte një përgjigje konceptuale-e theksoj përsëri-konceptuale, për të Keqen  dhe anti-njerëzit e panumërueshëm dot, ku janë patjetër,- edhe anti-njerëzit e Shqipërisë.

Por unë e kam të pamundur, të pamundur !

Gruaja e Kryeministrit Ramush Haradinaj, Anita i ka ofenduar mediat e Kosovës, të cilat kanë raportuar se burrit të saj i është refuzuar viza për Amerikë. Madje, Anita Haradinaj, e cila punon si prezantuese e lajmeve në RTK, ka krahasuar mediat e Kosovës me ato të Milloshevicit. E ka përmendur Tanjugun si krahasim me mediat kosovare.

“Qy qy Kryeministrit me dy pasaporta me iu refuzu visa ????, kur po doni po thoni Ti lehte e ke per viza, kur po doni po thoni iu refuzu, bravo bre si Tanjugu jeni bo ???????? hajde gazetari hajde”, ka shkruar Anita Haradina, e cila më pas e ka fshirë postimin. Nuk ka dhënë sqarime se pse ka bërë një veprim të tillë.

Tanjugu i Serbisë vazhdimisht ka qenë media e afërt me pushtetit serb. Ka qenë e afërt me udhëheqësin e Serbisë, Sllobodan Milloshevic, i cili e ka përdorë për propagandë gjatë luftërave në ish-Jugosllavi. Ka qenë e njohur për dezinformata dhe lajme propagandisitke.

Ndërkohë, Anita Haradinaj, e cila ka fyer mediat e Kosovës, merret me prezantim. Disa herë në javë del në RTK si moderatore e lajmeve.

Sidoqoftë, Ramush Haradinaj, kishte reaguar më racionalisht kur mediat kishin dhënë lajmin se atij i është refuzuar viza për në SHBA. Kishte thënë se beson se do ta marrë vizën  derisa kishte thënë fjalë të mëdha për amerikanët.

Kryeministri i Kosovës e ka planifikuar të shkojë për një vizitë në Shtetin e Iowas gjatë muajit të ardhshëm.

Është raportuar se Kryeministri, nëse merr vizën, merr pjesë edhe në Lutjen e Mëngjesit në Amerikë.

Ramush Haradinaj është bërë Kryeministër në një koalicion me PDK, AKR dhe minoriteteve. Ende nuk dihet saktë nëse Qeveria e udhëhequr prej tij ka 60 apo 61 deputetë.

Mirditorët që e shkulën flamurin turk nga tokat shqiptare, prokuroria nuk guxon t’ i zvarris nëpër gjyqe. Mirditorët duhet t’i vlerësojmë lartë për atdhedashuri, sepse e mbrojtën kushtetutën shqiptare dhe dinjitetin shtetëror të nëpërkëmbur. Janë zyrtarët shqiptarë ata që duhen të japin dorëheqje, pse lejuan të përdhoset territori i shtetit, ndërsa ndërtimtarët turq që e keqpërdorën mikpritjen – të dëbohen.

Nuk ka shtet të pavarur e sovran që do ta lejonte përdhosjen e territorit të vet me flamuj të huaj, në vendin ku nuk është i paraparë me ligj e me konventa ndërkombëtare. Shteteve satelite e republikave banane me shtetarë të korruptuar, sikurse është Shqipëria, stampimi i flamurit të huaj nuk u bënë përshtypje.

Por ja që dolën disa burra dhe i thanë stop veprimit të shtetarëve të korruptuar. Flamuri turk nuk e ka vendin në Mirditë, nuk e ka vendin në asnjë cep të territorit shqiptar jashtë ambasadave e përfaqësive diplomatike.

E kuptoja se kishin urdhër, por nuk e arsyetoja policinë shqiptare që ndaloi mirditorët të cilët e hoqën flamurin turk në vendin ku nuk e lejonte kushtetuta e ligji shqiptar. Por ta kenë mendjen prokurorët e gjyqtarët që i zvarrisin nëpër gjyqe mirditorët. Prokurorët duhej të urdhëronin heqjen e flamurit të huaj, në zbatim të ligjit. S’ka ligj që guxon t’i dënojë mirditorët për shkuljen e flamurit të huaj nga tokat shqiptare.

Flamuri turk dhe flamuri serb ende zgjojnë imazhe të frikshme në territorin shqiptar, prandaj shteti duhet të na kursej nga këto simbole të gjenocidit.

Ndërkaq turqit edhe po e ndërtuan një nevojtore, në ballë e vënë flamurin e tyre. Dhe nuk ishte hidrocentrali në Mirditë i vetmi që e ka të stampuar flamurin turk në beton, në jugun shqiptar para dy vjetësh e pashë një hidrocentral ku ishte stampuar vetëm flamuri turk. U thash bashkudhëtarëve në makinë: na paska hangër dreqi, na paska pushtuar turku.

Turqia nuk na ndihmoi të çliroheshim nga Serbia, ndërsa na e ngul kudo flamurin. Në Prishtinë bie fjala nga mijëra agjenci turistike e firma të huaja, e vetmja agjencia turke e avionëve e ka ngul në trotuar flamurin e Turqisë.

ShBA-të e Evropa perëndimore e çliruan Dardaninë, investuan pa kthim miliarda euro në ndërtimin e vendit, e ngjallën nga koma Shqipërinë, por askund nuk e imponuan flamurin e tyre, edhe pse të gjithë shqiptarët i duan flamujt amerikanë e evropianë. Turqia në çdo situatë me arrogancë përpiqet ta krijojë përshtypjen edhe në botë se na ka pushtuar: me flamuj, me xhami, me bakllava, muzikë të shpifur tallava dhe me agresion te telenovelave të dobëta për idiotë.

Dhuna është fenomen sa social aq  edhe social-psikologjik.Si formë e ushtrimit të forcës për të dëmtuar dikë tjetër emocionalisht ,psikologjikisht  dhe fizikisht ,ajo fatkeqësisht është e pranishme ende në shoqërinë shqiptare  në tërësi ,në shkollë  dhe në institucionet tjera  të edukimit ,e pse jo,edhe në nivelet e ndryshme të shtetit  dhe më gjerë.Ne kemi një mision  fisnik dhe detyrim edhe moral  që këtë dukuri negative të një shoqërie  me demokraci ende të vrishtë ta njohim në shumëanshëmrinë e saj,ta analizojmë  në thellësi  duke u  munduar të gjejmë burimin ,të përcaktojmë pasojat dhe mbi këtë bazë të marrim masa për ta parandaluar atë.Së paku  të ulim ndjeshëm intensitetin dhe pasojat.Fatkeqësisht ,dhuna është e pranishme në mjaft raste në komunitet ,në institucione të shtetit dhe në kompani e firma private ,në rrugët dhe rrugicat  e vogla në thellësi të pallateve ,në familje …

Aq më e papranueshme është ajo edhe në shkollë.

Shpeshherë ,përceptimi  për dhunën  është i kufizuar .Dhuna ,më së shumti ,përceptohet si e tillë vetëm në rastet e ushtirmit të  forcës fizike  të një idnividi apo grupi social  ndaj një individi ose grupi tjetër social ,që në raste ekstreme ka kosto  të lart që shprehet  edhe me humbje jetësh për shkaqe  ta pamotivuara që në media  përdoret  rëndom termi  “për arsye banale”.Në pamjen e saj të vërtet  shuna shfaqet në formën e dhunës insitucionale ,sociale ,ekstreme ,seksuale ,emocionale e psikologjike  në tërësi ,fizike dhe fizike ekstreme etj.Asnjë  nga institucionet nuk është realisht i imunizuar  nga format e dhunës.

Natyrisht në mjedise e insitucionet të ndryshme ,ajo ka dinamika të ndryshme .Vetëm  për të krijuar një përceptim  më të plotë për elementët  dhe format e dhunës  në tërësi ,le t’u referohemi  politikës ,ku dhuna “qarkullon” me shumicë .Për shembull,raste të dhunës shfaqen vertikalisht në të gjithë piramidën e shtetit .Më e theksuar  është ajo në ato institucione ku përkeqësohen  marrëdhëniet ,ku fryma e grupit rëndohet si pasojë e përpjekjeve të drejtuesve  për të shfrytëzuar pushtetin deri në abuzim të tij,me qëllim “që të disiplinohet” puna në insitucion apo ndërrmarrje.Po kështu ,e përhapur është edhe dhuna sociale  , “viktimat” e së cilës janë  kryesisht fëmijët dhe adoleshentët  e tërhequr nga jeta e grupit ,që rrinë disi larg shokëve  dhe shoqeve në shkollë dhe në mjedise  të tjera shoqërore .Për arsye nga më të ndryshmet ata nuk integrohen me mjedisin  psiko-kulturor  ku e kalojnë kohën  dhe rriten.Jeta e vetmuar është tipar dallues  i këtij grupimi .Fëmijët  të kësaj natyre  ndjehen keq psikologjikisht dhe emocionalisht,ndjehen disi të huaj në vendin e tyre .Po kështu ,dë dukshme janë dhe rastet  e dhunës fizike të shprehur në përdorimin e forcës  se një individi ose grupi  ndaj një individi dhe grupi tjetër social.Është e pranishme në komunitet ,në familje ,ndaj fëmijëve dhe bashkëshortëve  dhe individëve të tjerë të pambrojtur .Jo më pak e pranishme është dhuna fizike  edhe në shkollë,në isntitucionin e vetëm të edukimit që jep arsim dhe edukatë në mënyrë të organizuar.

Me format e dhunës emocionale ,që shprehen  virtualisht ,pothuajse jemi  socializuar në njsë masë të caktuar të gjithë.Rëndom shohim ose jemi në rolin e atyre që e ushtrojnë këtë dhunë ku punojmë  dhe jetojmë.Fjalët ofenduese qe e dëmtojnë emocionalisht bashkëshortin ose bashkëshorten,nxënësin,punonjësin,shokun  e shoqen etj,na shoqërojnë në të shumtën e herës .Siç duket një formë e tillë dhune ,kur krahasohet  me dhunën që të dëmton fizikisht ose që padrejtësisht e hedh punonjësin në rrugë,nuk ka ndonjë peshë të madhe në jetën e individit tek ne.Ndonëse  në një shoqëri të lirë dhe me demokraci të zhvilluar  edhe kjo dhunë është e papranueshme .Dhunën  e tyre intelektual  përpiqen ta “kompensojnë”  me forcën e pushtetit  të pushtetit  të përkohshëm që mund t’u jetë dhënë për çdo lloj kontributi ,me përjashtim  të atij profesional e kulturor në tërësi.Elementët e dhunës fizike  përdoren  në familje ndaj fëmijëve dhe jo vetëm,nga baballarë dhe të rritur,që e përdorin alkolin dendur dhe deri në atë masë sa kjo kategori  bëhen vartës ndaj ndaj pijes.Sa më shumë alkol që ata përdorin aq më të dhunshëm shfaqen në familje.Pjesët e grupimit të kësaj dhune janë edhe baballarët dhe bashkëshortët që mendojnë shpesh herë negativisht për sjelljen e fëmijëve dhe grave të tyre.

Niveli i ulët kulturor dhe formimi i pakët qytetar,diferencat  e mëdha në disa raste  mes çifteve  dhe xhelozia më së shumti si fenomen se sa si realitet ,i bën një kategori burrash të dhunshëm.Në psikikën e tyre sundon forca dhe kultivimi i frikës ,në vend të logjikës  dhe të arsyes.Ai që e trazon shpirtin e qytetarëve sot tek ne,është varfëria ,pamundësia  e një  për të siguruar kushtet minimale të jetesës si dhe problemet  e mëdha që kanë  me pronat ku në mjaft raste vepron “Maliqi” dhe jo ligji,ku pronarët pa prona janë bërë e po bëhen padrejtësisht me prona.Në pamundësi  për të gjetur zgjidhje nga strukturat përkatëse të  shtetit  dhe të shoqërisë ,njerzit dalin jashtë kontrollit ,nuk i kontrollojnë emocionet e tyre.Në këto kushte sjellja agravon dhe bëhet,siç po ndodh pothuajse përditë,konfliktuale  dhe me pasoja.Dhunën seksuale e ushtrojnë kryesisht individët  me deformime dhe çrregullime narciste të personalitetit .Ata janë kryesisht maniakë dhe shumë të rrezikshëm për shoqërinë.Më përjashtime shumë të rralla ,dhuna në të gjitha format e saj nuk ka efekte pozitive ,pavarsisht  se ku  dhe ndaj kuj ushtrohet.

Imagjinoni një dejtues shkolle ose institucioni,i cili nuk di ose komunikon me të me punonjësit ,që nuk ka aftësi t’i menaxhojë mirë punët ,që në vend të logjikës,argumentit,dhe arsyes përdor mosaryen  unin dhe forcën e pushtetit  provizor ,që bie viktimë e deformimeve  që mund të marrë ose merr nga “shoqet dhe shokët” e saj,që i shikon nga lart dhe  nga larg vartësitë ,mësuesit ,kolegët  dhe nxënësit:Çfarë ndodh në të tilla kushte?Pa u ndjerë frytet e përçarjes ,e frymës  që nuk o shërben punës,kultivohet autoriteti i rremë  dhe mungesa e mosbesimit  mes individëve  dhe palëve ,ndërtohen marrëdhënie  të ndera etj.E keqja është se kjo frymë dhe formë drejtimi  ,e shorehut në  formën e dhunës institucionale ,përcillet deri tek punonjësi më i thjehstë ,deri tek vartësit  më të largët  dhe tek nxënësit .E gjitha kjo e dëmton punën dhe vetë personat  që “vishen me kostume” të tilla të përkohshme të autoritetit  false  dhe të dal tahsmë  nga moda.Në shkollë dhunën ndaj nxënësve  që e përdorin  mësuesit me formim të dobët ,sidomos profesional.Në pamundësi  për të komunikuar me adoleshentët me gjuhën  e tyre ndodh  që mësues  të veçantë bëjnë presion  përmes  notës tek nxënësit ,i shohin ata me një farë përçmimi dhe në pozitat e njeriu që,sipas tyre ,i di të gjitha ,paçka se një grup nxënësish dhe studentësh  mund të dinë më shumë  se mësuesi ose pedagogu i tyre.Ku bëhet  mësim me të meta ,ku individë  dhe grupe  nxënësish nuk merren me punë  gjatë mësimit ,ata bëhen  “shkaktarë” të prishjes  së mësimit.Në këto kushte për ta  “displinuar” klasën vepron mësuesi autoritar ( jo me autoritet)  dhe përmes  dhunës “vendos” kush  qetësi ,ose i duket atij  se e arrijnë një gjë të tillë ,paçka se pasojat  mund të jenë  aq të mëdha sa ky lloj mësuesi  nuk i parashikon .Fjala vjen një konflikt i pamunduar mund ta çojë shtrirjen e tij  në familje,rrjedhimisht ai sjellë shumë pasoja  për të gjithë palët.Në familje  dhuna ndaj fëmijëve  kultivon dhunë e cila transmetohet ,si rregull edhe tek brezat pasardhës .

Dhuna fizike ,ndryshe nga arsyeja  dhe komunikimi i hapur ,kultivon  frikë dhe ankth  që e dëmtojnë shumë personalitetin  dhe karakterin e fëmijëve  në formim e sipër.Të gjithë kanë detyrime për mënjanimin e dhunës:shkolla,familja,shoqëria civile ,institucionet  shteti e strukturat e tij,shoqatat që veprojnë  etj.Ne duhet të ndryshojmë  pak e përditë mendimin  se dhuna  është mesjetare ,se civilizimi  dhe qytetaria  nuk e pranojnë  atë.Po ndryshuam  mendimin do të krijojmë baza për tu fokusuar  më mirë  në kultivimin e vlerave  të një demokracie  pa dhunë.Në mes të këtyre institucioneve shkolla  dhe familja kanë shumë përgjegjësi dhe  detyrime,se ato duhet të veprojnë  në mënyrë të kualifikuar  dhe së bashku për ta arritur qëllimin  për të cilin po flasim.Gjykoj se ka ardhurqë,krahas   përmirësimeve në sistemin  e punës  së shkollës dhe fakulteteve  të mësuesisë ,të hidhen hapat e para për trajnimin e prindërve ,pasi ata kanë shumë të meta në njohjen e moshës ,të mënyrës  së sjelljes dhe të komunikimit sidomos  me adoleshentët.Vetëm shkallë-shkallë  klima do të zbutet dhe shoqëria do të emancipohet .Për rrjedhojë edhe dhuna  do të pakësohet dhe me kalimin  e kohës do të shkojë drejt  zhdukjes.

Zyra e Kryeministrit Ramush Haradinaj, përmes një përgjigje me shkrim, ka reaguar ndaj deklaratave se Qeveria e Kosovës do të procedojë në Parlament një nismë për zhbërjen e Gjykatës Speciale. Nuk e kanë mohuar një gjë të tillë, por kanë thënë se përkrahin nismën e deputetëve për shfuqizimin i Speciales. Kanë thënë, po ashtu, se me Sepcialen nuk bën të bëhen lojëra të tilla për përfitime personale e politike.

“Nuk komentojmë deklarata të liderëve të partive politike për çështje të këtilla. Ne respektojmë nismën e deputetëve të Kuvendit të Kosovës për Dhomat e Specializuara. Megjithëkëtë, temat e këtilla të ndjeshme nuk duhet të shërbejnë për lojëra dhe përfitime personale e politike”, thuhet në përgjigjen e Qeverisë për Express.

Ramush Haradinaj kishte refuzuar të niste nga Qeveria zhbërjen e Gjykatës Speciale. Por kishte përkrahur nismën e deputetëve, të cilët dështuan për shkak se s’kishin kuorum për ta çuar në Parlament zhbërjen e Speciales.

Ndërkohë, sot, Albin Kurti, tregoi se pasi ka takuar dy ambasadorë, u ka treguar se Specialja do të shfuqizohet përmes një projektligji të sponsorizuar nga Qeveria e Kosovës.

“Kurti, Mulhaxha-Kollçaku dhe Konjufca përsëritën qëndrimin e Lëvizjes VETËVENDOSJE! mbi padrejtësinë dhe dëmin që shkakton Gjykata Speciale por edhe për mungesën e seriozitetit dhe sinqeritetit të kësaj iniciative. Sidoqoftë, iniciativa tash ka ndryshuar formën dhe shpejtësinë pasi që ajo do të vie si Projekt-Ligj i qeverisë e jo më si nismë e deputetëve në Kuvend”, thuhet në njoftimin e Vetëvendosjes.

Kadri Veseli ishte treguar i pafuqishëm pasi s’kishte arritur të bënte kuorum për të çuar përpara zhbërjen e Speciales.

Presidenti Hashim Thaçi kishte deklaruar se respekton çdo nismë të deputetëve.

Gjykata Speciale e themeluar më 2015 me vendim të Parlamentit ishte planifikuar të shfuqizohej në fund të vitit të kaluar përmes një nisme të deputetëve të pushtetit. Kishte dështuar të kalonte në Kryesinë e Kuvendit në mungesë kuorumi.

Kishin reaguar ambasadorët e  SHBA’së dhe vendeve të BE’së, duke thënë se një nismë e tillë shkatërron raportet e Kosovës me bashkësinë ndërkombëtare.

Prapa kësaj nisme kishin qenë Hashim Thaci, Kadri Veseli e Ramush Haradinaj.

Burime të Express kanë treguar se Vetëvendosje është pajtuar të votojë pro shfuqizimit të Speciales nëse nisma shkon përmes Qeverisë.

Pajtimi ka ndodhur ne takimin që kanë pasur para dy ditësh Glauk Konjufca me Bilall Sherifin, Ahmet Isufin e Memli Krasniqin.

Shumë shpejt pritet të nisin fluturimet direkte Tiranë-Tel Aviv.

Ka qenë Ambasada e Shqipërisë në Izrael, ajo e cila nëpërmjet një njoftimi në faqen e internetit, ka bërë të ditur lajmin.

Prej kohësh mes dy vendeve është diskutuar vendosja e fluturimit direkt dhe kompania që ka shfaqur interes ka qenë “Israir”, e cila planifikon të zhvillojë dy fluturime në javë Tel Aviv–Tiranë.

Por ende nuk ka asnjë datë të saktë se kur pritet të nis nga puna linja e re ajrore që do lidh Shqipërinë me Izraelin, ndërsa pritshmëritë janë që fluturimi i parë të kryhet brenda 6 mujorit të parë të këtij viti.

Viti 2017 shënoi rritje të aplikimeve për regjistrim të markave shqiptare. Janë produkte që një pjesë e mirë eksportohen dhe kanë fituar emër në tregjet europiane dhe më gjerë.

Gjatë gjithë vitit të kaluar aplikuan për regjistrim të markës 1161 biznese.

Drejtori i Përgjithshëm i Drejtorisë së Pronësisë Industriale, Elvin Lako, bëri të ditur në një aktivitet me rastin e përmbylljes së vitit 2017 se ka pasur rritje të interesit.

“I është dhënë rëndësi e veçantë aktiviteteve për ndërgjegjësimin e biznesit dhe publikut në tërësi. Është arritur të zhvillohen fushata takimesh me biznesin, duke ofruar asistencë dhe konsulencë për vlerësimin e PI si një kapital që mbrohet vetëm nëpërmjet regjistrimit dhe për ngritjen strategjive që çdo biznes duhet të ketë për ta kthyer PI në burim fitim

Për sa më sipër stafi DPPI ka kryer mbi 100 takime, duke shkuar në ambientet e biznesit jo vetëm në Tiranë, por edhe në rrethe të ndryshme të Shqipërisë. Ky aktivitet promovues solli si rezultat rritjen e konsiderueshme të aplikimeve për regjistrim të markave duke arritur një rekord të ri prej 1161 Markash”, tha Lako për Monitor.

Veriu rekord me produktet

Pjesa e Veriut të Shqipërisë ka pasur vëmendje të veçantë në regjistrimin e produkteve shqiptare që janë të njohura tashmë përtej kufijve.

“Në 2017 vlen për t’u përmendur që kemi rritje të aplikimeve për tregues gjeografikë të produkteve shqiptare kryesisht nga zonat veriore të Shqipërisë si: Gështenja e Tropojës, Gështenja e Malësisë së Madhe, Mjalti i Gështenjës së Tropojës, Mjalti i Gështenjës- Malësi e Madhe, Boronica e Bjeshkëve të Tropojës, Boronica e Bjeshkëve Kuksiane”, shprehet Lako.

Regjistrimi i markave shihet si një nga komponentët kryesorë të rritjes së konkurrencës dhe zhvillimit të biznesit përmes rritjes së eksporteve.

Ky është materiali i parë i siguruar nga Politiko.al. Gjatë tij të do të dëgjoni një bisedë disa minutëshe, regjistruar

nga Prokuroria e Katanias, zhvilluar ndërmjet pjesëtarëve të ‘klanit Habilaj’, të mbajtur në përgjim për disa vjet.

Politiko e ka zbardhur bisedën të plotë, por këshillohet dëgjimi i saj për të kuptuar më mirë, jo vetëm fillin e bisedës, por edhe për të siguruar një ide më të qartë të dialogjeve mes të përgjuarve. Teksti i shkaton shumë humbje ngjyrave, dhe ndoshta vetë thelbit të bisedës.

Me ‘B’ janë shënuara biseduesit dhe me numra secili prej tyre. Në fund të audios së transkriptuar keni edhe një komentar shpjegues të Politiko.al:

AUDIO 1

B1: …Se ke edhe shumë punë këtu i tha.

Pse, i tha Moisiu, nuk janë njerëz të mirë këta?

Çfarë njerëz të mirë, ata janë bastardë, i tha.

Eee, kështu si thoni ju ata janë bastardë, tha Moisiu. Moisiu për të nxjerrë sytë, ngacmonte ata.

O vëlla, i thashë unë, i fola shqip, thuaj i thashë, se unë i njoh më mirë se sa juve; më mori punën para dy muajsh.

(Qeshin)

Qeshte Moisiu, o (emër italian, nuk kuptohet), çfarë tha ky çfarë tha ky, çfarë tha ky?

Lëre tha, karton, tha.

Vajta atje, më thoshte pronari mua, se pronari kishte folur me Saimirin…që i kishte ashtu kostumin.

Eeeeeeee.

Më tha mua i lecioni, më tha mua, lecioni… unë e mora si leksione.

B 2: -Po.

I lecioni më tha, i thonë votime. I leccioni më tha, benne.

I thashë unë: çfarë i ke thënë këtij, jemi në shkollë ne tani, çfarë i ke thënë?

Jo, or jo, më thoshte mua, pyet për votimet se ka fol’ me Saimirin. Po, i thashë unë, i kanë q… nënën në gropë, i

kanë vjedh’ të gjitha votat. Ja, kshu do futet Shqipëria në Europë. Fillova politikën unë me atë. (qeshin).

Aman o, lëre më thoshte Moisiu, se mo vjen ai këtu se ka mbajtur numrin (qeshin të gjithë), se i kishte pëlqyer.

More vesh ça i kishte blerë Moisiu nuses së atij?

Biseduesi 2: Eeeeee…

B1: 15 mijë euro gjerdan..

B2: Ça thu ti re?

B1: Tani për tani.

B1: Përveç lekëve (ndërhyn B2:… kostumeve…shefave që paguante.)

B1: Përveç Sokolit që mori lekët për punën…Saimiri nuk donte lekë. Edhe u dha…i dha gjerdan. Komplet diamant.

(Njëri nga bashkëbiseduesit del nga makina. Lënë takim për të nesërmen ora 8.45 te ‘Peshku’.

Në makinë dëgjohet vetëm muzika e radios).

KOMENTAR

Çfarë ka të re në këtë material të publikuar nga PolItiko. al? është pyetja e parë, duke ditur faktin se shumë elementë të dosjes Habilaj, të grumbulluar në përgjimet italiane, janë zbardhur nga media. Gjëja e parë, e pahasur në materialet e mëparshme, është fakti se përgjimet e këtij materiali audio lënë të kuptohet qartë fakti se ish-ministri Tahiri ka patur kontakte, jo vetëm me Habilajt, por edhe me partnerët italianë të tyre. Me sa duket, ai nuk ka qenë vetëm një ‘lehtësues’ me infrastrukturë dhe inuencë shtetërore, por ka zbritur edhe në ‘terren’.

Kjo del qartë në bisedën e mësipërme, kur njëri prej të përgjuarve i kërkon tjetrit që të mos masë shumë (“se mos vjen këtu ai, se i ka mbajtur numrin”).

Elementi i dytë i ri lidhet me zgjedhjet. Del po aq qartë nga materiali i këtushëm se Tahiri ka folur edhe me italianët për zgjedhjet e pritshme në Shqipëri. Kushtojini vëmendje pjesës kur ndodh ngatërresa gjuhësore: italiani që i përmend zgjedhjet (elezzioni) dhe i përgjuari që kujton se po etpër leksione.

Elementi i tretë, ka të bëjë me sigurinë që jep ky pasazh zanor mbi atë se, a është kamionist Saimiri që del në përgjime, apo është ministër. Këtu fitet për një njeri me pushtet që quhet Saimir, që merr dhurata të shtrenjta dhe që është i shqetësuar për zgjedhjet.

Kreu i Partisë Demokratike, Lulzim Basha e ka nisur vitin 2018 i revoltuar. Përmes një reagimi në rrjetin social “Facebook” pas ndalimit nga policia të dy pjesëmarrësve në protestën e opozitës më 18 dhjetor.

Një prej tyre, Osman Levanaku, u ndalua në pikën e kalimit kufitar të Qafë-Thanës më 31 dhjetor, ndërsa më 1 janar u ndalua nga policia në pikën e kalimti kufitar në Morinë, Fiqirie Nezaj.

Këto veprime të policisë, Basha i ka cilësuar si reagime “prej frikacaku të kryeministrit Rama”.

“Ndalimi i protestuesve edhe ne naten e nderrimit te viteve eshte reagim prej frikacaku i Edi Rames nga zemerimi masiv i qytetareve, qe fale bashkeqeverisjes se tij me krimin, jane sot me te varfrit ne Europe. Ndersa me bekimin e tij kalojne tonelata droge drejt Italise, policia e urdheruar nga Edi Rama dhe vellai i trafikantit te droges, Fatmir Xhafa, po ndalon qytetaret qe u ngriten kunder dhunimit te kushtetutes, kunder emerimit te Edi Rames kryeprokuror. Keto jane shenjat e tmerrit qe i ka kapur nga protesta e rradhes. Burgosja e qytetareve nuk e shpeton dot Edi Ramen, sepse nje popull te tere nuk e burgos dot. Burgu eshte vendi per trafikantet, bashkepuntoret e krimit ne pushtet, per te korruptuarit qe Edi Rama po ben gjithcka per t’i mbrojtur, jo per qytetaret qe ngrihen se nuk sigurojne dot buken e femijeve te tyre, ngrohjen ne kete dimer te acarte, nuk paguajne dot faturat qe rriten cdo vit. Me akte te tilla Edi Rama nuk ben gje tjeter veçse po firmos me shpejtesi fundin e tij politik. Shqiptaret e vrane friken 28 vite me pare. Kushdo qe perpiqet te riktheje sundimin permes frikes, do te kete te njejtin fund!”, shkruan Basha në Facebook.

Mbrëmjen e djeshme për rreth 20 minuta ashtu si edhe gjatë ndërrimit të viteve, gjysma e kryeqytetit ka vuajtur mungesën e energjisë elektrike, për të paktën 20 minuta, pas një defekti në linjën 110 kv që furnizon me energji nënstacionin e uzinës së Traktorëve dhe Kinostudion.

Por ashtu si rastin e parë, duke iu referuar burimeve zyrtare pranë OST-së “BalkanWeb” mëson se linja dyshohet të jetë qëlluar sërish gjatë natës siç mund të shihni edhe në foton e siguruar nga “BalkanWeb”. Aty duken qartë gjurmët e plumbit që ka depërtuar në telat përcjellës.

Punonjësit e OST kanë punuar gjatë natës dhe kanë rregulluar defektin, ndërsa OST ka depozituar sërish një denoncim pranë komisariatit numër 4. Blutë e kryeqytetit kanë nisur menjëherë hetimet për dëmtimin e linjës 110 Kv të OST në Babrru.

Ndalohet një tjetër aktiviste e opozitës në pikën kufitare të Morinës. “BalkanWeb” mëson se bëhet fjalë për zonjën Fiqirije Nezaj, 50 vjeçe, e cila është ndaluar nga policia kufitare pasi rezultonte të ishte person në kërkim.

Partia Demokratike thotë se, zonja Nezaj nuk ishte njoftuar se ishte në kërkim nga policia, ndërsa mbahet në Komisariatin e Kukësit bazuar mbi akuza fallco dhe pa prova.

Më 31 janar u ndalua edhe ish-sheshi i FNSH, Osman Levanaku, në pikën e kalimit kufitar të Qafë-Thanës, pasi rezultonte person në kërkim, edhe ai për shkak të protestës. Ai po udhëtonte drejt Strugës me familjen e tij, ku kishte prenotuar për të festuar natën e ndërrimit të viteve.

Numri i të burgosurve në burgjet italiane është rritur.  Më 2016 ishin 54 653, 4.8% më tepër se viti paraardhës. Shifra është bërë e ditur nga autoritetet italiane, duke nënvizuar se bëhet fjalë për një sinjal që duhet monitoruar me vëmendjen.

Të burgosurit janë pothuajse të gjithë meshkuj, 95.8% e totalit, çereku (25.9%) janë toksikodipendentë, ndërkohë që një e treta, 18 621 persona, 34.1% e të burgosurve, janë të huaj.

Shqiptarët e nisin ditën e sotme me numërimin pas për 25 milionë euro që do të dalin nga xhepat e tyre përgjatë gjithë vitit 2018 si taksa shtesë me paketën e fundit fiskale, ku peshën më të madhe do ta zërë taksa e rritur e pronës.

Kanë zgjedhur natën e ndërrimit të viteve me sa duket si momentin më të përshtatshëm për veprimtarinë tyre të paligjshme, por kanë përfunduar në pranga.

Tre të rinj nga Vlora janë arrestuar nga policia italiane, pasi gomonia e tyre e ngarkuar me drogë dhe armë u kap pas një operacioni të policisë në San Foca, Leçe mbrëmjen e djeshme.

Të arrestuarit janë 3 shqiptarë nga Vlora, 25 vjecarë, inicialet e dy prej te cileve jane S.O. dhe S.A.

Forcat ajrore të Guardia di Finanza kanë dalluar mjetin lundrues dhe janë vënë në ndjekje edhe me anije, ndërkohë që trafikantët u përpoqën të largoheshin. Ndjekja përfundoi pak milje larg bregut të San Foca di Melendugno me arrestimin e tre të rinjve.

Autoritetet italiane vijojnë hetimet për rastin në fjalë, ndërsa lënda narkotike do të peshohet.

Voal dhe botuesit e saj i urojnë shqiptarët mbarë:

Gëzuar Viti i Ri 2018!

Kombi shqiptar

ka 26 vjet në Shtetin Amë,

pothuaj dy dekada në Kosovë,

mbi 16 vjet në Maqedoni

që përjeton dramën e madhe të zhgënjimit nga klasa e vet politike,

Diktatura dhe pushtuesi është zëvendësuar me trashëgimtarë të regjimit të vjetër dhe politikanë të inkriminuar!

Ata nuk e duan integrimin e kombit shqiptar në trungun Europian nga e ka prejardhjen!

Prandaj i lënë shqiptarët pa shtet ligjor, në mjerim e vafëri, pa punë e të ardhme,

ndërsa për vete kanë uzurpuar shtetin dhe pasuritë e shqiptarëve

kanë uzurpuar

pushtetin politik dhe atë ekonomik!

Kjo klasë politike është e rrezikshme për kombi shqiptar!

Kjo klasë politike ua ka vjedhur lirinë shqiptarëve!

Ajo nuk e do integrimin e shqiptarëve në BE!

Ajo i do shqiptarët të mbeten lypsarë ose emigrantë!

Sepse kësisoj mund ta mbajë Shqipërinë, pronën e shqiptarëve, si pronën e saj private!

Prandaj nuk i përmbush reformat!

Prandaj nuk e lufton mafien!

Prandaj i lë shqiptarët pa shtet social!

Prandaj i lë shqiptarët pa asnjë perspektivë!

Sepse përmbushje reformash do të thotë largim të saj nga skena politike!

26 vjet në shtetin amë,

gati dy dekada në Kosovë

e pothuaj 16 vjet në Maqedoni,

kombi shqiptar sheh të njëjtat fytyra që vijojnë ta vjedhin dhe keqpërdorin votën e sovranit!

Kjo klasë politike nuk meriton të jetë më në pushtet!

Kjo klasë politike nuk meriton të jetë më në pushtet!

Kjo klasë politike nuk meriton të jetë më në pushtet!

Ky është refreni i këtij urimi!

Voal uron që kjo klasë politike më së paku të dalë këtë vit në pension dhe ta ketë pensionin nga 100 Euro sikur e kanë edhe pensionistët në Shqipëri e Kosovë!

Ky është urimi i Voal dhe botuesve të saj Elida dhe Skënder Buçpapaj për vitin e ri 2018!

Me ndihmën e Zotit dhe mençurinë e shqiptarëve ky urim u bëftë realitet!

Amin!

Elida Buçpapaj

Skënder Buçpapaj

Një biznesmen 41-vjeçar, ka tentuar t’i japë fund jetës gjatë ditës së djeshme në mënyrë tragjike.Ngjarka ndodhi në fshatin Xhafzotaj të Durrësit, ku pronar i një lokali, me iniciale A.H pasi theu xhamat e lokalit të tij tek ‘4 rrugët e Shijakut’ tentoi të pinte lëndë helmuese.

Pasi u njoftua për rastin, policia mbërriti në vendin e ngjarjes ndërsa nisi hetimet.

Ndërkohë, 41-vjeçari ndodhet në spital, jashtë rrezikut për jetën ku po merr ndihëm e nevojshme mjekësore.

Njoftimi i policisë:
Më datë 29.12.2017, u referuan materialet në Prokurorinë e Rrethit Gjyqësor Durrës, për shtetasin A.H, vjeç 41, banues në Xhafzotaj, pasi dyshohet se, në Katër-Rrugët e Shijakut, ka thyer xhamat e lokalit të tij dhe ka tentuar të pijë lëndë helmuese, i cili ndodhet në spitalin e Durrësit, jashtë rrezikut për jetën.

Prokuroria e Tiranës nisi një letër-porosi drejt SHBA-së për kontratat e lobimit të Partisë Demokratike.

Mësohet se në qendër të hetimit është burimi i 625 mijë eurove që janë paguar për dy kompanitë amerikane “Biniatta Trade LP’ dhe “Stonington Strategies”.

Nga KQZ është kërkuar vënia në dispozicion e dosjes që ka paraqitur Partia Demokratike me faturat e shpenzimeve, raportin e auditimeve, si dhe tabelat e plota së bashku me kontratat që ka dorëzuar Partia Demokratike mbi fushatën e zgjedhjeve parlamentare të vitit 2017.

Gjithashtu Partisë Demokratike i është kërkuar paraqitja e të dhënave të plota mbi kontratën e nënshkruar. KQZ ka deklaruar se gjithçka është publike dhe e pasqyruar në faqen në internet të këtij institucioni. E njëjta gjë është pohuar edhe nga Partia Demokratike.

Me këto para hetuesit dyshojnë se është paguar lobimi për një takim me kreut të opozitës Lulzim Basha dhe presidentit të Amerikës Donald Trump, 2 javë para zgjedhjeve të 25 qershorit 2017. /Lapsi.al/

TIRANE– Rrjeti i njohur i hotelerisë “Sheraton”, që prej 14 vitesh ka operuar në vendin tonë, në muajin janar do të largohet nga Shqipëri.

Lajm e ka bërë të ditur Shoqata Shqiptare e Turoperatorëve & Agjencive Turistike (ATOA), ku përmes një deklarate për mediat e ka konsideruar këtë vendim një lajm të keq. Mes të tjerash ATOA deklaroi faktin se qeveria nuk duhet të tregohej aq indiferente, ndërsa shtoi se duhet të ishte një nga aktoret kryesor ne tavolinën e bisedimeve.

“Sheratoni (që një vit me parë u ble nga grupi më i madh hotelerik në botë Marriott) është një emër shumë serioz dhe me peshë në grupet e zinxhirëve hotelerik. Për 14 vite me radhë Sheraton Tirana i besoi emrin e vet, një destinacioni problematik dhe me imazh shumë të cënuar siç ishte Shqipëria, duke riskuar në kosto të imazhit dhe biznesit të vet, imazhin e një vendi ku s’kishte shkelur asnjë zinxhir hotelerik më parë. Për më tepër në 2003 kur Sheratoni vendosi të vinte në Tiranë, shumë pak kryeqytete në rajon kishin hotele brand të këtij niveli. Madje edhe sot e kësaj dite Sheraton nuk ka çdo vend fqinj. Nuk jemi të sigurt sesa rol mund të luante qeveria për të frenuar ikjen e të vetmit hotel brand në vend, por jemi të sigurt qe nuk mund të bënte indiferentin por te ishte një nga aktoret kryesor ne tavolinën e bisedimeve. Sepse përpara se të kërkohen hotele brand të reja, duhen mbajtur ato pak që kemi aktualisht”, thuhet në njoftimin e Shoqatës Shqiptare e Turoperatorëve & Agjencive Turistike.

Rrezohen akuzat ndaj ish deputetit Armando Prenga. Gjykata e Kurbinit ka pushuar sot ceshtjen ndaj ish-deputetit. Mesohet se gjykata e ka pushuar çështjen ndaj tij, në kohën kur Prokuroria ishte kërkuar 6 muaj burg për të, raportoin “News 24”.

Prokuroria e Përgjithshme pati njoftuar në shkurt të vitit 2017 se nga verifikimi i të dhënave brenda dhe jashtë Shqipërisë për deputetin Prenga, ka rezultuar se ai nuk ka deklaruar precedentët penalë në Itali në vitet 1996-1997, si dhe një vendim të formës së prerë të gjykatës së Kurbinit në Shqipëri, në të cilin është dënuar me gjobë për “falsifikim dokumentesh”.

Letra e Prenges kur dha doreheqjen 

Duke u shprehur konsidaratën e falenderimet për bashkëpunimin e deritanishëm, më lejoni që nëpërmjet kësaj letre të ju paraqes doreheqjen time nga mandati i dupetetit të PS në qarkun e Lezhës.

Dëshiroj t’ju informoj ju zoti kryetar, por edhe opinionin publik, se ligji për dekriminalizimin në asnjë dispozitë të tij, nuk parashikon ndërprerjen e mandatit të të zgjedhurve për një dënim me gjobë, sic është rasti im, por për qetësinë time dhe të familjes sime, deklaroj si më sipër se heq dorë sot dhe gjithmonë nga mandati që zgjedhësit e mi dhe Kushtetuta më ka ngarkuar.

Së fundmi i konsideroj të padrejta dhe shpifje, të ulëta, akuzat politike të opozitës dhe personave të autorizuar prej tyre.

Letra e Prokurorise drejtuar KQZ:

Sipas Vendimit te Kuvendit nr.17/2016, mosplotesimi i te dhenave “….passjell perjashtimin e menjehershem nga funksioni publik….”. Pra, vetem duke u mbeshtetur ne faktin qe ka nje vendim penal te padeklaruar (te gjykates se Kurbinit), deputetit duhet t’i nderpritet mandati.

Prokuroria e Pergjithshme ka derguar pergjigjen diten e sotme per t’i dhene mundesine KQZ-se qe te shqyrtoje brenda afatit ligjor vendimin e Prokurorise per konstatimin per nderprerje te mandatit te deputetit Prenga.

KQZ ka detyrim qe te shqyrtoje vendimin e Prokurorise brenda 10 diteve nga vendimmarrja e Prokurorise.

Prokuroria e Pergjithshme ka marre vendim per konstatimin e nderprerjes se mandatit te deputetit Prenga ne dt.15.02.2017″, thuhet ne njoftimin e Prokurorise.

Shkresa e Prokurorisë: Prenga, i dënuar për vjedhje pasurish

Prokuroria e Përgjithshme i ka dërguar KQZ-së, më datë 16 shkurt 2017, një kërkesë për heqjen e mandatit të deputetit të PS-së, Armando Prenga. Prokuroria ka zbuluar një vendim gjyqësor të formës së prerë të vitit 2005 që Armando Prenga është dënuar për “falsifikim dokumentesh”, duke marrë 450 mijë lekë gjobë.

Shkresa e firmosur nga prokuroria Rovena Gashi ka theksuar se ka marrë përgjigje nga INTERFORZA italiane se Armando Prenga, alias Mondi, është i dënuar për “vjedhje pasurish” në Itali, “marrje pasurive të vjedhura”, “deklarata të rremë për identitetin” dhe “falsifikime”.

“Nëpërmjet korrespondencës me Zyrën e Ndërlidhëse të policisë italiane në Shqipëri, INTERFORZA, sektorit të Verifikimit të Integritetit, është informuar me shkresat e datës 21.12.2016 dhe 22.12.2016 se subjekti Armando Prenga, alias Mondi, lindur më 26.06.1974, rezulton me precedentë penalë në shtetin italian për vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë në vitet 1996-1997 në qytetin e Milanos”, thuhet në kërkesën e Prokurorisë.

Po ashtu, të njëjtat vepra i ka raportuar edhe Zyra Kombëtare EUROPOL, pranë Ministrisë së Punëve të Brendshme.

“Fakti që në formular nuk është pasqyruar asnjë e dhënë e përcjellë në lidhje me vendimin penal të formës së prerë dhënë nga Gjykata e Shkallës së parë Kurbin, apo nga autoritetet italiane të drejtësisë në lidhje me të kaluarën e tij kriminale, e bën këtë subjekt të përfshirë në kushtet e ndalimit të ushtrimit të funksionit publik si deputet i Kuvendit të Shqipërisë”, thuhet në letrën e Prokurorisë.

Të gjitha pritshmëritë, makthet e politikës dhe sfidat për vitin 2018 konsistojnë në finalizimin e zbatimit të Reformës në Drejtësi.

Dhe zbatimi i reformës duhet të kalojë përmes disa pikave kulmore, siç është ngritja e SPAK-ut, rezultatet e para të Vetingut, konstituimi i Këshillit të Lartë të Prokurorisë, i Këshillit të Lartë Gjyqësor si dhe zgjedhja e kryeprokurorit me mandat 7-vjeçar nga KLP dhe Parlamenti.

Vetingu në Policinë e Shtetit dhe reforma në të gjithë piramidën e administratës publike, janë një tjetër sfidë për vitin që vjen.

Në fokus të vëmendjes do të jetë edhe aksioni politik i opozitës, i cili do të nisë në janar, me qëllim për të rrëzuar qeverinë ‘Rama 2’ dhe kryeprokuroren e re të përkohshme Arta Markun. Vendimi i Këshillit të Ministrave të BE për çeljen ose jo të negociatave do të jetë një tjetër ngjarje që do të shënjojë vitin 2018 për shqiptarët.
Ngritja e mundimshme e SPAK-ut

SPAK-ut është një strukturë e veçantë e parashikuar në Kushtetutën e ndryshuar dhe në një ligj të veçantë. Kjo strukturë ka si objekt gjurmimin, hetimin dhe ndëshkimin e korrupsionit dhe krimit në nivele të larta. SPAK-u përbëhet nga Byroja Kombëtare e Hetimit, Prokuroria e Posaçme dhe Gjykatat e Speciale. Për miratimin e kësaj strukture të frikshme që ka trembur politikanë, kanë luftuar për tre vite me radhë amerikanët dhe vendet e BE.

Kur ndërkombëtarët thonë se politika dhe gjyqësori kanë frikë nga reforma, i referohen pikërisht SPAK-ut. Fillimisht, ngritja e SPAK u tentuan të sabotohej, duke mos votuar ndryshimet Kushtetuese, por deputetët që bënë rezistencë u kërcënuan se do të futeshin në listën e zezë të SHBA.

Më pas, SPAK-u u bllokua përmes zvarritjes së Vetingut nga armata e gjyqtarëve dhe një pjesë e politikës, duke ankimuar ligjin në Kushtetuese. Aktualisht, zbatimi i ligjit të SPAK-ut është bllokuar për shkak të zvarritjes së ngritjes së KLP dhe KLGJ, po nga politika dhe gjyqësori. Gjithsesi, procesi ka hyrë në një rrugë pa kthim. Duke iu referuar procedurave dhe afateve, lëvizjet e para për ngritjen e SPAK-ut do të nisin në muaj mars të këtij vitit 2018.

Për ngritjen e strukturave të SPAK do të asistojnë përfaqësues të SHBA dhe BE. Njerëzit që do të bëhen pjesë e këtyre strukturave do të kalojnë Vetingun, duhet të plotësojnë kushte dhe kritere të forta si dhe do të jenë nën monitorim të rreptë nga struktura të tjera të posaçme.

Dosjet që do jenë objekt i SPAK-ut

Në kompetencë të Byrosë së Hetimit dhe Prokurorisë së Posaçme do të jenë 40 vepra të ndryshme penale dhe të gjitha dosjet e funksionarëve dhe ish-funksionarëve shtetërorë që nuk janë hetuar apo gjykuar deri më sot.

Disa nga veprat penale që do hetohen nga Byroja dhe do gjykohen nga Gjykatat e Speciale janë korrupsioni pasiv dhe aktiv i funksionarëve të lartë shtetërorë ose i të zgjedhurve vendorë si dhe korrupsioni aktiv dhe pasiv i gjyqtarit, prokurorit dhe i funksionarëve të tjerë të drejtësisë.

Gjithashtu, në kompetencë të organeve të SPAK-ut do të jenë çdo vepër penale që dyshohet se është kryer apo që është kryer nga funksionarë apo ish-funksionar shtetëror që nga viti 1991 deri në ditët sotme. Pra, çdo aktivitet i paligjshëm i zyrtarëve dhe ish-zyrtarëve që pas rënies së regjimit komunist, mund të hetohet dhe gjykohet.

Funksionarët në shënjestër

Objekt i Byrosë Kombëtare të Hetimit, Prokurorisë së Posaçme dhe Gjykatave Speciale do të jenë veprat penale të presidentit dhe ish-presidentëve, kreut të kuvendit dhe ish-kryetarëve të Kuvendit, kryeministrit dhe ish-kryeministrave, ministrave dhe ish-ministrave, të të gjithë deputetëve dhe ish-deputetëve, të anëtarëve të Gjykatës Kushtetuese dhe Gjykatës së Lartë, të kryeprokurorit dhe ish-kryeprokurorit, të krerëve të organeve të reja të drejtësisë dhe të drejtuesve të institucioneve qendrore apo të pavarura që nga viti 1991.

Roli i FBI

Shtetet e Bashkuara të Amerikës, me anë të ekspertëve të FBI dhe të drejtësisë penale, do të mundësojnë mbikëqyrjen dhe kontrollin e veprimtarisë së Byrosë Kombëtare të Hetimit, duke marrë pjesë edhe në hetime të caktuara.

Në ligjin për SPAK, janë parashikuar edhe ekipe të përbashkëta hetimore mes Shqipërisë-SHBA-BE, për të gjitha veprat penale në kompetencë të Prokurorisë së Posaçme dhe Gjykatës Speciale. Ekipet e përbashkëta hetimore do të bazohen në konventat ndërkombëtare, konkretisht, në nenin 13 të Konventës së Bashkimit Evropian për Ndihmën e Ndërsjelltë Ligjore.

Dosjet

Në kompetencë të Byrosë së Hetimit dhe Prokurorisë së Posaçme do të jenë 40 vepra të ndryshme penale dhe të gjitha dosjet e funksionarëve dhe ish-funksionarëve shtetëror që nuk janë hetuar apo gjykuar deri më sot.

Sfidat

Të gjitha pritshmëritë, makthet e politikës dhe sfidat për vitin 2018 duket se konsistojnë në finalizimin e zbatimit të Reformës në Drejtësi dhe impaktin e saj. Finalizimi i zbatimit të reformës duhet të kalojë përmes disa pikave kulmore, siç është ngritja e SPAK-ut.

Funksionarët në shënjestër të SPAK

Presidenti i Republikës, ish-presidentët
Kryetari i Kuvendi, ish-kryetarët e Kuvendit
Kryeministri, ish-kryeministrat
Ministrat, ish-ministrat
Gjyqtarët e Gjykatës Kushtetuese, ish-gjyqtarët e Gjykatës Kushtetuese
Gjyqtarët e Gjykatës së Lartë, ish-gjyqtarët e Gjykatës së Lartë
Prokurori i Përgjithshëm, ish-kryeprokurorët
Inspektorit të Lartë të Drejtësisë
Kryetarit të Bashkisë, ish-kryebashkiakët
Deputetët, ish-deputetët
Zëvendësministrat, ish-zëvendësministrat
Anëtarët e Këshillit të Lartë Gjyqësor
Anëtarët e Këshillit të Lartë të Prokurorisë,
Drejtuesit e institucioneve qendrore, ish-drejtuesit e institucioneve qendrore
Drejtuesit e institucioneve të pavarura, ish-drejtuesit e institucioneve të pavarura

Veprat penale në kompetencë të Byrosë dhe Prokurorisë së Posaçme

Korrupsioni pasiv i funksionarëve të lartë shtetërorë ose i të zgjedhurve vendorë, dënohet me burgim nga katër deri në dymbëdhjetë vjet.
Korrupsioni aktiv i nëpunësve të huaj publikë, dënohen me burgim, nga gjashtë muaj gjer në tre vjet.
Korrupsioni aktiv i gjyqtarit, prokurorit dhe i funksionarëve të tjerë të drejtësisë, dënohen me burgim nga një vit deri në katër vjet.
Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë, dënohen me burgim nga tre deri në dhjetë vjet.
Çelja e depozitave ose e llogarive bankare, anonime ose me emra fiktivë, dënohet me burgim deri në tre vjet.
Genocidi, dënohet jo më pak se dhjetë vjet ose me burgim të përjetshëm.

Krime kundër njerëzimit, vrasjet, zhdukja me forcë, shfarosjet etj., dënohen jo më pak se pesëmbëdhjetë vjet ose me burgim të përjetshëm.
Krimet e luftës, si vrasja, keqtrajtimi ose dëbimi, dënohet jo më pak se pesëmbëdhjetë vjet ose me burgim të përjetshëm.
Vrasja për gjakmarrje, dënohet jo më pak se tridhjetë vjet ose me burgim të përjetshëm.
Vrasjet në rrethana të tjera cilësuese, dënohet jo më pak se njëzet vjet ose me burgim të përjetshëm.
Vrasja e funksionarëve publikë, dënohet me burgim jo më pak se tridhjetë vjet ose me burgim të përjetshëm.
Vrasja e punonjësve të Policisë së Shtetit.

Vrasja për shkak të marrëdhënieve familjare.
Rrëmbimi ose mbajtja peng e personit, burgim jo më pak se njëzet vjet dhe, kur është shkaktuar vdekja, me burgim të përjetshëm.
Shtrëngimi me anë të kanosjes ose dhunës për dhënien e pasurisë, dënohet deri në pesëmbëdhjetë vjet, kur vepra ka sjellë si pasojë vdekjen, dënohet me burgim të përjetshëm.

Trafikimi i personave të rritur, dënohet nga dhjetë deri në pesëmbëdhjetë vjet.
Rrëmbimi i avionëve, anijeve dhe mjeteve të tjera, dënohet nga dhjetë gjer në njëzet vjet.
Trafikimi i të miturve, dënohen nga dhjetë deri në njëzet vjet.

Atentati, dënohet jo më pak se pesëmbëdhjetë vjet ose me burgim të përjetshëm.
Komploti, dënohet nga pesë gjer në pesëmbëdhjetë vjet.
Kryengritja, nga pesëmbëdhjetë gjer në njëzet e pesë vjet, udhëheqësit me burgim të përjetshëm.
Vepra me qëllime terroriste, jo më pak se pesëmbëdhjetë vjet ose me burgim të përjetshëm.

Financimi i terrorizmit, jo më pak se pesëmbëdhjetë vjet ose me burgim të përjetshëm.
Fshehja e fondeve dhe e pasurive të tjera, që financojnë terrorizmin, jo më pak se pesëmbëdhjetë vjet.
Rekrutimi i personave për kryerjen e veprave terroriste, jo më pak se dhjetë vjet.

Stërvitja për kryerjen e veprave me qëllime terroriste, jo më pak se shtatë vjet.
Thirrja publike për kryerjen e veprave me qëllime terroriste, nga katër deri në dhjetë vjet.
Prodhimi i armëve luftarake, nga pesë gjer në pesëmbëdhjetë vjet.
Organizata terroriste, dënohet nga shtatë deri në pesëmbëdhjetë vjet.
Banda e armatosur, dënohet me burgim nga pesë deri në dhjetë vjet.

Nxitja e urrejtjes ose grindjeve, dënohet me burgim nga dy deri në dhjetë vjet.
Pjesëmarrja në veprime luftarake në një shtet të huaj, dënohet me burgim nga pesë deri në dhjetë vjet.
Organizimi për pjesëmarrje në veprime luftarake në një shtet të huaj, dënohet nga tetë deri në pesëmbëdhjetë vjet.
Thirrja për pjesëmarrje në veprime luftarake të dhunshme në një shtet të huaj, dënohet me deri në tre vjet.
Trafikimi i armëve dhe i municionit, dënohet nga dhjetë gjer në njëzet vjet.

Trafikimi i lëndëve plasëse, djegëse, helmuese dhe radioaktive, dënohet nga dhjetë gjer në njëzet vjet.
Trafikimi i narkotikëve, dënohen me burgim jo më pak se pesëmbëdhjetë vjet.
Organizimi dhe drejtimi i organizatave kriminale, dënohet nga 10 deri në 20 vjet.
Organizata kriminale, dënohet me burgim nga katër deri në tetë vjet.
Grupi i strukturuar kriminal, dënohen me burgim nga tre deri në tetë vjet./shqiptarja.com

Kryetari i Partisë Demokratike, Lulzim Basha, tha në Lezhë se vendi ndodhet në një udhëkryq vendimtar, ku shumica absolute e shqiptarëve të ndershëm po varfërohet dhe po humbet të drejtat nga sundimi i një pakice të kriminalizuar dhe të korruptuar.

Basha u shpreh se Shqipëria sot nuk ka një qeveri dhe kryeministër, por ka një bandë dhe kapobandë, që e ka kthyer vendin në zonë të lirë për krimin dhe po kap drejtësinë për të mos dhënë llogari para saj.

Akti antikushtetues i kapjes politike të Prokurorit të Përgjithshëm është prova me e qartë.

“Efektin e parë të emërimit të Ramës kryeprokuror e patë me kthimin e pasaportës tek Saimir Tahiri. Ky është fillimi i një akti antikushtetues, i cili përqëndron pushtetin e drejtësisë në duart e personit që duhet të përgjigjet para drejtësisë dhe i jep një goditje, ndoshta vdekjeprurëse, reformës në drejtësi.”- theksoi Kryetari i PD-së.

Lulzim Basha tha se skandali i Saimir Tahirit, Ministrit të Brendshëm që drejtonte trafikun ndërkombëtar të drogës me bekimin e kryeministrit, ka vulosor fatin e Edi Ramës dhe qeverisë së tij.

“Prandaj ju them sot, se qeveria e Edi Ramës është e vdekur politikisht dhe ai vetë është një kufomë politike i diskredituar para shqiptarëve, i diskredituar para faktorit ndërkombëtar. Ata që deshën t’i japin një shans të fundit Edi Ramës, shqiptarë dhe të huaj, kanë parë dhe po shohin sa po u kushton kjo.”

Në këtë udhëkryq, kur Shqipëria ndodhet në një krizë politike, ekonomike dhe morale, kreu i Partisë Demokratike ka një mesazh për çdo shqiptar që dëshiron një jetë dinjitoze në Shqipëri.

“Detyra jonë është që të bëjmë bashkimin më të madh të shqiptarëve që nga viti i themelimit tonë, të bëhemi zëdhënësit dhe përçuesit e kësaj shumice absolute të shqiptarëve dhe t’u themi se rrugëdalja nuk është as rënia në depresion, as vetëflijimi, as tragetet, as emigrimi, as avioni por bashkimi në sheshet e protestës.”

Kryetari i opozitës shpjegoi çfarë synohet me protestat dhe çfarë do të thotë krijimi i një qeverie antimafia.

“T’ia bëjmë të qartë se nuk po e bëjmë këtë që të ikë Edi Rama dhe të vijë unë me protestë, apo të jem unë kryetari i qeverisë së përkohshme, jo! Ne kërkojmë largimin e shkaktarit numër një dhe krijimin e kushteve për funksionimin e demokracisë dhe reformës në drejtësi. Ndaj kemi parashtruar nevojën për një qeveri antimafia.”

Basha tha se qeveria antimafia do të garantojë reformën zgjedhore, mosprekjen e votës dhe, përmes zgjdhjeve të lira e të ndershme, garanton një qeveri që lidh fatin e vet me atë të qytetarëve.

TIRANE- Ka mbërritur në aeroportin e Rinasit trupi i pajetë i Florenc Beqirajt, 23-vjeçarit nga Shkodra që ndërroi jetë në spitalin e Marsejës me datë 22 dhjetor.

Duke u nisur nga rrethanat misterioze ku humbi jetën e polemikat e shumta që shkaktoi pas pretendimeve të familjarëve se Florenci nuk ka tentuar vetëvrasjen, por dikush ka dashur ta mbysë brenda kampit ku qëndronte, trupi i të riut i është nënshtruar ekspertizës mjeko-ligjore në Francë.

Zbardhja e ekspertizës do t’i jepte fund edhe rrethanave të dyshimta të dhe të bëhet publike nga spitali francez, ku Florenci qëndroi në koma për disa ditë.

Vota e Shqipërisë në OKB, ka ngjallur shumë debat në vend, ku janë përfshirë të gjithë aktorët politikë.

Ministri për Evropën dhe Punët e Jashtme, Ditmit Bushati, në një intervistë për televizionin Klan, ka reaguar në lidhje me këtë çështe, duke thënë se letra e presidentit ka qenë e nxituar.

“Nuk kam asnjë lloj dëshire të komentoj veprimet e pamendurara, të nxituara që mund të marrin aktorë të ndryshëm, përfshirë këtu edhe Presidentin e Republikës. Faktet flasin qartë, trillimet janë një çështje tjetër, çdokush është i lirë të shkruajë, të përdorë pozicionin shtetëror, por mund të them që Shqipëria është një Republikë Parlamentare. Ekskluzivitetin në formulimin e politikës së jashtme e ka qeveria”.

Të gjithë ata që e cilësuan si votë kundër Shteteve të Bashkuara të Amerikës, përfshirë edhe kreun e shtetit, ministri i quan diletantë.

“Është për të ardhur keq sepse të gjithë këta që kanë folur për këtë çështje, përfshirë dhe Presidentin e Republikës, nuk kanë marrë mundimin për të lexuar tekstin e rezolutës së votuar ku nuk ka asnjë paragraf as për SHBA, as për qëndrimin e Presidentit Trump. I gjithë ky teatër absurd që po luhet gjithë këto ditë nga këto diletantë, të krijon përshtypjen e një teatri të lodhur, të krijon përshtypjen që ky grup aktorësh të mbetur pa kauzë nuk kanë çfarë bëjnë gjë tjetër, veçse të spekulojnë mbi këtë çështje, e cila në fakt duket sikur do ta nxjerrin Shqipërinë një shtet qesharak që nuk është”.

Një 43 vjeçare nga në fshati Dyshnik i Beratit i ka vënë flakën vetes duke u lyer me benzinë. Ngjarja e rëndë është shënuar sot rreth orës 13:30 minuta në Berat.

“Bashkëshorti i saj shtetasi G.S, 49 vjeç, ka tentuar për të fikur flakët, por është djegur dhe vetë” tha policia në informacionin paraprak.

Burre e grua jane derguar per mjekim në Spitalin Rajonal Berat.

Nga deklarimet e familjarëve dyshohet se shtetasja T.M, vuan prej kohësh nga depresioni, tha policia.

Grupi hetimor po kryen veprimet për zbardhjen e plotë të ngjarjes.

TIRANË – Fatjon CUKA

Në kryeqytetin e Shqipërisë, Tiranë, punimet për ndërtimin e Xhamisë së Namazgjasë vazhdojnë pa ndërprerje, ndërsa aktualisht ajo ka marrë pothuajse pamjen e plotë për shkak edhe të avancimit të punimeve me ritme të shpejta.

Xhamia po ndërtohet pranë godinës së Kuvendit të Shqipërisë, ndërsa kur të përfundojnë punimet për ndërtimin e saj të plotë, do të jetë xhamia më e madhe në Ballkan.

Punimet për ndërtimin e xhamisë filluan në maj të vitit 2015 me një ceremoni ku merrte pjesë edhe presidenti i Republikës së Turqisë, Recep Tayyip Erdoğan, si dhe zyrtarë të lartë të Republikës së Shqipërisë dhe Republikës së Turqisë. Që nga ajo kohë punimet kanë vazhduar pa ndërprerje dhe me ritme të shpejta.

– “Xhamia si karabina ka përfunduar”

Yasin Şengül, koordinator në zyrën e këshilltarit të çështjeve fetare pranë Ambasadës së Turqisë në Tiranë, në një prononcim për Anadolu Agency (AA), duke folur për ecurinë e punimeve të xhamisë, tha se procesi i veshjes me shtresë plumbi ka përfunduar 70 për qind.

“Është parashikuar që të përfundojë (ndërtimi) në fund të vitit 2018. Si karabina është përfunduar dhe 70 për qind e procesit të veshjes me shtresë plumbi ka përfunduar. Minaret kanë përfunduar së ndërtuari, ndërsa sa i përket veshjes me mermer pjesa më e madhe edhe tek kjo fazë ka përfunduar. Ndërkohë në katet e poshtme vazhdojnë instalimet hidraulike dhe elektrike. Xhamia po ndërtohet në një sipërfaqe prej 10 mijë metra katrorë, ndërsa vetëm xhamia si karabina ndodhet në një hapësirë rreth 5 mijë metër katrorë. Xhamia është e përbërë nga katër minare, kupola kryesore dhe pjesa qendrore e xhamisë. Gjithashtu xhamia do të ketë edhe ambientet e jashtme”, thekson Şengül.

Sipas tij, sa i përket numrit të besimtarëve që mund të kryejnë ritet fetare, vetëm në pjesën e brendshme ka një kapacitet afërisht për 5.000 besimtarë, ndërsa duke përfshirë edhe pjesën e jashtme të xhamisë mund të arrijë një numër prej 10 mijë personash.

– “Turqia bëri realitet ëndrrën 100-vjeçare të popullit shqiptar”

“Kjo (Xhamia e Namazgjasë) është një ëndërr gati 100-vjeçare e popullit shqiptar, ku për arsye të ndryshme nuk është arritur të realizohet. Vetëm në vitin 2015 filloi të realizohet kjo ëndërr e tyre. Ne si popull vëlla musliman i Turqisë e dhurojmë për shqiptarët, duke bërë realitet këtë xhami. Xhamia është një ndërthurje e arkitekturës osmane dhe arkitekturës së re moderne. Ndërtimi i xhamisë financohet nga Kryesia e Çështjeve Fetare të Turqisë (Dijanet) dhe Fondacioni i Kryesisë së Çështjeve Fetare të Turqisë me shumën rreth 30 milionë euro. Ngjitur me Xhaminë e Namazgjasë do të ndërtohet dhe një muze, i cili do të quhet muzeu i bashkëjetesës fetare”, tregon Şengül.

Sa i përket kateve të nëndheshme, janë dy katet e garazhit, si dhe kati zero që do të jetë multifunksional, ku do të ketë bibliotekë, sallë konferencash, restorant dhe ambiente për kurse fetare. Pasi të përfundojnë të gjitha punimet, është programuar një ceremoni inaugurimi për Xhaminë e Namazgjasë.

Ndërkohë, qytetarë të shumtë shpesh vizitojnë ambientet ku po ndërtohet xhamia për të shikuar nga afër ecurinë e punimeve, ndërsa ajo përveç funksioneve për besimtarët muslimanë pritet të jetë një destinacion turistik për shumë turistë të huaj dhe vendas.

Besimtarët muslimanë në Tiranë, gjatë viteve të tranzicionit janë përballur me vështirësi në kryerjen e riteve të tyre, për shkak të numrit të vogël të xhamive dhe hapësirave të pakta të tyre, ku falja e namazit të bajrameve gjatë viteve të fundit është kryer në Bulevardin “Dëshmorët e Kombit” dhe Sheshin “Skënderbeu”.

Vendimi i Presidentit të Republikës Ilir Meta për t’i dhënë shtetësinë shqiptare Kryepeshkopit Anastas Janullatos, ka sjellë reagime pozitive menjëherë në opinionin publik.

Menjëherë pas njoftimit në faqen e Presidencës për lajmin në fjalë, të shumtë kanë qenë qytetarët që e kanë përgëzuar Presidentin Meta për vendimin, duke e cilësuar të duhurin dhe të vonuar madje.

Mes komenteve të shumta, është edhe ai i aktorit të madh shqiptar Robert Ndrenika. Ky i fundit ka komentuar duke nënvizuar se “kur sheh të tilla vendime, e bën të ndjehet qytetar europian.”

Aktori Ndrenika falenderon Presidentin Meta duke e cilësuar këtë një lajm që i nderon të gjithë shqiptarët.

“Më në fund! Po bindem që jemi Europiane! Faleminderit zoti President! Ky lajm i nderon të gjithë!” shkruan aktori i njohur.

Presidenti Ilir Meta ka firmosur në 22 dhjetor dhënien e shtetësisë shqiptare për kreun e kishës Ortodokse, Janullatos.

Por kërkesa e tij për te marrë shtetësinë shqiptare daton që në viti  1992 kur President ishte Sali Berisha.

Dosja qëndroi në tryezën e Presidentit edhe gjatë mandateve 5-vjeçare të Meidanit, Moisiut, Topit dhe Nishanit të cilët ndoqën praktikën e paraardhësit, duke ia kaluar pasuesit vendimmarrjen.

Historia e ardhjes së Janullatosit në krye të Kishës Ortodokse Autoqefale Shqiptare, zë fill në qershor të vitit 1991, ku u ngarkua me detyrën e ekzarkut nga Patriarkati Ekumenik i Kostandinopojës, me titullin peshkop i Andrusës. Në atë kohë ndodhej në Afrikën Lindore, i ngarkuar me detyrën e “Kryepeshkopit aktiv” për mëkëmbjen e Kishës Ortodokse të Kenias, Ugandës dhe Tanzanisë, me qendër në Nairobi. Caktimin e tij si ekzark në Shqipëri e miratoi edhe presidenti Ramiz Alia.

Autostrada Tiranë-Durrës nuk ka pasur më sot pamjen e zakonshme, e rrethuar me palma që në pjesën më të madhe janë të thara.
Ato kanë filluar të priten që ditën e djeshme, siç tregohet dhe nga fotot e realizuara sot në mëngjes.

Pak javë më parë, Bashkia Tiranë njoftoi projektin për t’i zëvendësuar palmat me pisha, teksa kaloi vendimin ndryshime dhe rishpërndarjen e fondeve në buxhetin e Bashkisë së kryeqytetit për vitin 2017. osto e plotë e projektit “Furnizim dhe vendosje drurë dekorativë në zonën industriale Kamëz-Kashar” është 333.8 milionë lekë, ose gati 2.5 milionë euro, e shpërndarë në 66.7 milionë lekë në 2017-n, 117 milionë lekë në 2018-n dhe 150 milionë lekë në 2019-n. Ndërsa një ditë më parë Bashkia miratoi edhe projek buxhetin e vitit 2018.

Gjatë periudhës që sapo kaloi me thatësirë të pazakonte, bimësia dekorative (palmat e mbjella) nuk u përshtatën me kushtet klimatiko-tokësore të Tiranës, kësisoj nuk i mbijetuan zhvillimit të ciklit të tyre jetësor”, thuhet në relacion. Për këtë arsye propozohet që në vend të palmave të mbillen lloje dekorativësh të pishës së butë, që përshtaten me klimën dhe mjedisin.

Duke qenë se peridha më e mirë për mbjelljen e pishës së butë është muaji dhjetor, kërkohet përfshirja në buxhet e këtij investimi. Për ujitje propozohet sistemi ujitës artificial në formë shiu.

Palmat në autostradë u mbollën rreth tre vjet më parë, si pjesë e një plani që përfshiu dhe rregullimin e sinjalistikës në zonën Mbikalimi i Kamzes dhe i Kasharit deri në aeroportin e Rinasit. Kosto e mbjelljes së tyre u raportuar në atë kohë në rreth 600 mijë euro. Dimrin e kaluar palmat nuk i rezistuan të ftohtit dhe u thanë në pjesën më të madhe të tyre.

Plani për zgjerimin e autostradës

Zëvendësimi i palmave me pisha vjen në një kohë që në sirtarët e ish ministrisë së transporteve, që tashmë është pjesë e ministrisë së Energjisë dhe Transporteve gjendet projekti për zgjerimi e autostradës Tiranë Durrës, duke e bërë me tre korsi. Autoriteti Rrugor Shqiptar prezantoi në shtator të një viti më parë projekt-idenë për zgjerimin e Autostradës Tiranës-Durrës nga Vora në Durrës, të përgatitur nga SPEA Engineering. Projekti është i ndarë në tre lote dhe i pari mbikalimi Kamëz-Vorë, 11 kilometër. Loti i dytë, Vorë–Sukth me gjatësi 10 kilometër dhe loti i tretë, Sukth–Durrës (Nyja e Dajlanit) me gjatësi 8 kilometër.

Studim-Projektimi për Zgjerimin e Superstradës Tiranë-Durrës ka për objektiv kryesor projektimin e nje infrastrukturë të kategorisë “A”, e cila duhet të ketë karakteristikat për të përballuar volumet gjithnjë e në rritje të trafikut në këtë arterie kryesore të vendit, si dhe të përmirësojë gjendjen e shtresave rrugore ekzistuese tashmë tejet të amortizuara në një pjesë të madhe të Superstradës, thuhej në materialin e Autoritetit.

Ky segment rrugor është më i ngarkuar në trafikun e mjeteve dhe arrin kulmin në periudhën e verës, sidomos vitet e fundit me ndërtimin e autostradës së re Milot- Morine e më tej në drejtim të Kosovës, por pa lënë jashtë dhe zona të tjera të rajonit.

Sipas raportit, rritja e vazhdueshme e trafikut e ka bërë të domosdoshme studimin për zgjerimin e kësaj superstrade për ta sjellë në parametrat e nevojshëm për përballimin e trafikut gjithmonë e më të rënduar. Por jo vetëm kaq, sepse prej vitesh në këtë segment rrugor ka pasur dëmtime të shtresave rrugore, çarje, dëmtime, ulje e gropëzime në gjatësi të konsiderueshme në të dy anët e rrugës, dhe veçanërisht në koristë anësore (sidomos atë Vorë – Durrës).

Por zgjerimi i rrugës dhe lehtësimi i trafikut tashmë do të duhet të presë, teksa palmat do ia zënë vendin pishave, që do të zbukurojnë sërish dy anët e autostradës./Monitor

Prej disa kohës shpërblimi për bebet prej 5 mijë lekësh të rinj i cili jepet nga Bashkia e Tiranës, nuk po shpërndahej për mungesë fondesh. Me anë të një akti normativ të bërë nga Bashkia e Tiranës, ka nisur shpërndarja e këtij fondi.

Ditën e enjte janë hedhur pagesat e prapambetura për lindjen e fëmijëve për më shumë se 70% të vogëlushëve në Tiranë.

Bëhet fjalë për pagesat prej vitit 2011 deri në vitin 2015, të cilat nuk ishin dhënë prej vitesh nga bashkia e kryeqytetit. Kur bashkinë e drejtonte Lulzim Basha, pagesat për shpërblimin e bebeve nuk janë dhënë. Në momentin që Kryebashkiaku Veliaj mori detyrën, u shpreh se do jepeshin pagesat nga vitit 2015 e mbrapa, duke bërë që fëmijët të cilët kishin lindur në harkun kohor 2011-2015 të mos merrnin shpërblimin.

Akti normativ

Por duket se qeveria ka zgjidhur këtë çështje pasi në aktin normativ të miratuar në fillim të dhjetorit, përpos shpërblimeve të fundvitit, parashikonte edhe dhënien e të gjitha shpërblimeve për fëmijët. Ligji thotë se çdo fëmijë merr një pagesë prej 5 mijë lekë kur lind. Në vitet 2011-2015 kjo pagesë nuk është dhënë në Bashkinë e Tiranës, por edhe në disa bashki të tjera.

Lekët në llogarinë bankare

Të gjitha çiftet që kanë lindur fëmijë nga viti 2011-2015, në llogaritë bankare që kanë dorëzuar për të marrë shpërblimin për bebet, kanë 5 mijë lekë shtesë prej ditës së enjte. Shpërblimi është shpërndarë nga Thesari i Shtetit në llogaritë bankare të familjeve. Siç duket sot fëmijë që janë në moshën 5 apo 6 vjeç, do të marrin shërblimin që u jep shteti dhe bashkia kur kanë lindur.

Pavarisht se këta vogëlush janë gati për të shkuar në shkollë, vetëm sot do të arrijnë të marrin shpërblimin e lindjes. Gazeta u interesua pranë Bashkisë së Tiranës, e cila konfirmoi dhënien e shpërblimeve për pjesën më të madhe të njësisë administrative. Janë më shumë se 5 mijë fëmijë që kanë marrë tashmë shpërblimin e lindjes. Bashkia thekson se janë kryer pagesat për vogëlushët e lindur në vitit 2011-2015, ndërkohë që vijon procesi për pjesën tjetër.

Shpërblimet

Shpërblimi i prapambetur për vogëlushët do të jepet në të gjithë vendin. Aktualisht janë bërë pagesat e prapambetura vetëm për fëmijët që kanë lindur në Tiranë, në vitet 2011-2015. Shpërblimi për fëmijët e tjerë do të vijojë edhe në fillim të muajit janar 2018. Në kryeqytet çdo fëmijë sapo lind merr një shpërblimi nga shteti prej 5 mijë lekë, por edhe nga Bashkia e Tiranës.

Gazetari i ‘Fax News’ Artur Çani ka udhëtuar drejt Italisë dhe ka mundur ti marrë një intervistë të shkurtër oficerit të Guardia Di Finanza Alessandro Giuliani i cili ka dhënë një deponim në Gjykatën e Bolonjës për llogari të drejtësisë shqiptare.

Ai ka qenë për tre vite në Shqipëri dhe ka bashkëpunuar me Dritan Zaganin.

Giuliani ka deklaruar se oficeri i antidrogës Dritan Zagani nuk kishte lidhje me kriminelë dhe se nuk ishte paguar nga shërbime të huaja.

“Mund të them se erdha këtu se ma kërkuan, bëhet fjalë për çëshje shqiptare, Zagani është miku im dhe për mua është një polic i mirë. Kur kam punuar me të, ka qenë një djalë i mirë. Nuk është një personazh që është i lidhur me krimin. Absolutisht nuk është i lidhur apo paguar nga shërbime të tjera”, tha Giuliani.

I pyetur për lidhjet e krimit me politikën në Shqipëri ai tha se nuk mund të fliste për një çështje të tillë.

“Nuk mund të flas për një çështje të tillë”, tha ai.

Deponimi i oficerit të GDF-së në Gjykatën e Bolonjës ka të bëjë me punën e tij në Shqipëri përgjatë tre viteve të qënridrimit. Ai dyshohet se ka qenë i lidhur me Zaganin dhe aludohet se ka patur lidhje me krimin, por edhe ka paguar Zaganin për të marrë informacione.

TIRANË- Pas vdekjes së 23-vjeçarit shqiptar Florenc Beqiraj në Francë, Presidenti Ilir Meta ka komunikuar dhe i ka përcjellë ngushëllimet familjarëve të të riut.

Njëkohësisht Meta iu bëri me dije mbi interesimin e tij për sqarimin e rrethanave që çuan në humbjen e jetës së Florencit.

Mësohet gjithashtu se Presidenti Meta bisedoi me Ambasadorin e Shqipërisë në Francë për të mundësuar sjelljen e trupit të tij të pajetë në Shqipëri në një kohë sa më të shpejtë.

Komisionerja për Mbrojtjen nga Diskriminimi bëri të ditur se është aktualisht në një proces gjyqësor me Fondin e Sigurimit të Detyrueshëm Shëndetësor për një fëmijë, të cilit iu refuzua operacioni i detyrueshëm nga ligji për përmirësimi i dëgjimit të tij.

Komisionerja për Mbrojtjen nga Diskriminimi, Irma Baraku, tha se më herët mori një vendim diskriminimi për shërbime mjekësore të mangëta e mosdhënien fare si në rastin e fëmijëve me leucemi.

“Më pas na erdhi një çështje e përsëritur për të sëmurët me kancer, të cilën po e studiojmë në thellësi. Kemi edhe ankesa nga pakicat rome dhe egjiptiane, se nuk u as jepen ilaçe as trajtim dinjitoz dhe madje fyes, sjellje që rëndon shëndetin dhe psikologjinë e tyre” – tha ajo.

Sipas Komisioneres, personat LGBTI janë të diskriminuar nga mjekësia, po ashtu edhe personat e dënuar, që vuajnë mosmarrjen e shërbimit mjekësor. Ajo propozoi që sëmundjet kronike dhe sëmundjet e rënda duhet të kenë përparësi në shërbimet mjekësore.

Megjithatë, në gjykatën e Tiranës në dy vitet e fundit nuk ka asnjë proces gjyqësor për të drejtat e pacientit, apo që të jetë dënuar një institucion shëndetësor, shtetëror apo privat.

Kryetarja e Gjykatës së Tiranës, Enkelejda Hajro, thotë se “fakti që janë një numër kaq i vogël i këtyre çështjeve në gjykatë tregon se pacientët nuk i njohin të drejtat e tyre, nuk dinë t’i kërkojnë dhe të vënë para përgjegjësisë strukturat mjekësore”.

Shqipëria ka një komunitet fëmijësh me probleme dëgjimi dhe mosmjekimi i rregullt i diskriminon ata.

Avokati Andi Muratej po ndjek nga afër një fëmijë që pas lindjes vuan me shurdhësi të rëndë, sepse nuk ka marrë mjekime nga spitali publik, edhe pse ajo është pjesë e paketës falas.

Ai është duke ndihmuar edhe familjen e një pacienti, që iu bënë analizat gabim gjatë shtatzanisë dhe më pas u zbulua se fëmija u prek nga talasemia.

“Analiza e gabuar laboratorike shkeli të drejtën e familjes, neni 8 i Konventës Europiane për të drejtat e njeriut. Klinika po kërkojmë të shërblejë dëmin pasuror dhe jopasuror të kësaj familjeje” – tha ai.

Besart Nezaj, pacient me hemofili dhe përfaqësues i shoqatës, denoncoi mungesën e ilaçeve, në bashkëpunim me shoqatën “Together for Life”, e cila po punon për të drejtat e pacientëve.

Sipas drejtueses së kësaj organizate, Egla Bardhi, “shkelja e të drejtave të pacientëve është kapitulli më i rëndë i shkeljes së të drejtave njerëore në Shqipëri”.

Pacientët e dëmtuar ngrenë menjëherë padi penale në prokurori, duke kërkuar dëmshërblim, por prokuroria ia kalon rastet Urdhërit të Mjekut, i cili nga ana e vet mundet vetëm të gjobitë mjekët apo t’i largojë nga profesioni.

Urdhëri i Mjekut ka nisur një bashkëpunim të ngushtë me prokurorinë për të zgjidhur konflikte, që lindin nëpër spitale.

Përfitimi i dëmshpërblimeve është shumë i vështirë për pacientët, por te Urdhëri i Mjekut ka një shtim të ankesave qysh nga shërbimi ambulator e deri te shërbimi terciar.

Ndërkombëtarët:
“vetëm budallenjtë mund të mendojnë se ndërkombëtarët do ta miratonin atë që bëmë ne, po të qe kapje e Prokurorisë”

Akuzat ndaj opozitës:
“janë ata që kanë kapur prokurorët, jo ne” dhe: “zgjedhja e prokurorit është një hap i rëndësishëm në realizimin e reformës në drejtësi, por opozita nuk e do, sepse ka frikë nga drejtësia, dhe kështu, për interesin e saj, po pengon integrimin e Shqipërisë në Europë.”

Janë dy gjethe fiku që e mbulojnë deri diku Ramën nga sulmet e opozitës, por që nuk mund ta mbulojnë nga një realitet që e shohin edhe ata që nuk kanë hall as të mbrohen nga drejtësia dhe as t’i marrin Ramës karrigen, por që të jetojnë në një vend ku drejtësia t’i trajtojë të gjithë si të barabartë përpara ligjit. Dhe ky realitet është ai se ne kemi në krye të qeverisë një Kryeministër që, me vetëdije të plotë, ka ndërtuar këta pesë vjet një koalicion me krimin e organizuar dhe me një oligarki gjithnjë e më kriminale për të sunduar e grabitur shqiptarët dhe se, nga frika e drejtësisë së vërtetë, për të mbrojtur dhe forcuar këtë pushtet kriminal, ka nevojë të ketë nën kontroll drejtësinë. Vetëm budallenjtë nuk e shohin se ky ishte qëllimi i Ramës dhe të vetëve, në mënyrën se si e zgjodhën Kryeprokuroren të hënën, 18 dhjetor 2017.

Ndërkaq, po ta shohim pak më me gjakftohtësi ngjarjen e fundit, na duhet të themi se opozita s’ka pse bën sikur po ndodh e pabëra, pasi kapja e drejtësisë nga partia në pushtet është një histori e stërpërsëritur. Ne kemi pasur vazhdimisht një konflikt mes maxhorancës e opozitës, të cilat vazhdimisht kanë akuzuar njëra-tjetrën për vjedhje e grabitje të shqiptarëve. Deri dje, pakti i tyre me drejtësinë ka qenë që, edhe pse e kapur nga maxhoranca, ajo i ka lënë të patrazuar eksponentët e opozitës të gëzojnë “arritjet” e tyre në vjedhjen e shqiptarëve. Akuzat gjithnjë kanë mbetur veçse në rrafshine lojës politike. Kurse, në mungesën e një drejtësie që do të duhej të hetonte e pavarur të vërtetat e korrupsionit të secilës palë (që do të përkthehej në futjen në burg të eksponentëve të të dyja palëve) politikanët tanë kanë futur në lojë ndërkombëtarët, që kanë bërë arbitrin politik në konflikt. Kjo shpjegon rëndësinë që ka marrë lufta për të bindur ndërkombëtarët, se cila palë ka të drejtë, që fare mirë mund të quhet edhe luftë për kapjen e ndërkombëtarëve.

Në rastin në fjalë vazhdojmë të jemi në përsëritjen e historisë: çështja po trajtohet si një konflikt midis maxhorancës dhe opozitës, ku si arbitër të vetëm janë ndërkombëtarët me në krye ambasadorët e SHBA dhe EU. Ramës, që është në maxhorancë, i intereson kjo pasi gjysmë të vërtetat e tij mbështeten më shumë nga ndërkombëtarët, sesa gjysmë të vërtetat e opozitës. Sot për sot mund të thuhet se, me gjithë të çarat që ka pësuar qeverisja Rama për shkak të provave evidente të implikimit të saj me botën e krimit, nuk jemi ende në pikën që arriti Berisha në shkurt të vitit 1997, kur e përditshmja e rëndësishme britanike “The Independent” shkroi artikullin e famshëm: “Ky regjim gangsterësh që ne mbështesim”, duke akuzuar haptazi politikanët perëndimorë për mbështetjen që i jepnin regjimit të gangsterëve të Berishës në atë kohë. Sot jemi në një situatë ku regjimi i gangsterëve të Ramës mbështetet nga ndërkombëtarët.

Se si dhe se pse janë të kapur ndërkombëtarët nga maxhoranca e radhës është një çështje e trajtuar shpesh së fundmi. Pa hyrë gjatë në këtë histori, do të thosha se ajo fillon që nga korruptime ambasadorësh të veçantë e interesa shtetesh e biznesesh të tyre, deri te fakti se ndërkombëtarëve, veçanërisht Brukselit, i intereson të mbajnë gjallë narrativën se Shqipëria ka bërë hapa përpara në këtë tranzicion të pambaruar dhe jo të pranojnë faktin se sot nuk bëhet më fjalë për një rrugë drejt demokracisë, por për rrugën drejt instalimit të një regjimi antidemokratik me bazë ekonomike paratë e krimit.

Pyetja që shtrohet në këto rrethana është: Çfarë duhet të bëjë opozita e ndodhur midis Prokurorisë së kapur dhe ndërkombëtarëve të kapur? Ka që thonë se duhet të grisë mandatet për t’i treguar botës se Shqipëria nuk është një vend normal, sepse përndryshe ajo do të shërbente si fasadë demokratike e regjimit të gangsterëve. Ky është argumenti i atyre që mbështesnin edhe mosdaljen e PDsë nga çadra. Është një argument që do të mund të funksiononte nëse opozita jonë nuk do të kishte mëkatet e së kaluarës, e prandaj do të ndiqej nga njerëzit, përtej militantëve. Por, gjithsesi, është një argument që, për shkak të dobësisë që përmenda, ka edhe një dobësi tjetër të madhe: ai mbështetet në idenë se duhet të bindim ndërkombëtarët se këtu kemi një regjim gangsterësh, që s’është larg idesë se, mungesë të mbështetjes së fortë popullore, për shkak të mëkateve, pushtetin duhet ta marrim me ndërkombëtarët.

Sipas mendimit tim – duke pasur parasysh edhe mbështetjen që i dhanë ndërkombëtarët Ramës kur Basha ishte në çadër – djegia e mandateve dhe dalja e opozitës në rrugë jashtëparlamentare me motiv zgjedhjen antikushtetuese të Prokurorit të Përkohshëm nuk do t’i bindte ndërkombëtarët se opozita ka të drejtë. Historia provon se këta i bind ose populli i revoltuar nga padrejtësia dhe grabitja e madhe që po përjeton e që, prandaj, del në rrugë, si në vitin 1997, me shpresën se ata që do të vijnë do t’ia kthejnë drejtësinë dhe gjënë e grabitur, ose kur janë ndërkombëtarët vetë që e nxisin popullin të dalë në rrugë sepse duan të ndërrojnë një regjim që është kundër interesave të tyre. Nuk jemi në asnjërin nga këta dy raste. Madje, do të thosha se në kushtet e sotme opozita ndodhet përpara një rreziku më të madh se opozitat e më- parshme, të cilat, siç e thashë më sipër, drejtësia i ka lënë të qeta. Ajo ndodhet midis një dare që ka si dhëmbë më një anë Prokurorinë e kapur dhe në anën tjetër ndërkombëtarët e kapur dhe loja politika, ka ardhur sot në një stad që Rama me shumë gjasa nuk do ta lerë të qetë opozitën, siç e ka lënë Berisha dhe Meta dje. Ai mund ta përdorë Kryeprokuroren e kapur për të mbrojtur veten dhe për të shkatërruar opozitën, duke arrestuar në mënyrë selektive eksponentë të saj, ndërkohë që, dhëmbi tjetër i darës, ndërkombëtarët e kapur, që do t’i bekojnë këto akte selektive si prova të suksesit të reformës në drejtësi, pra si hapa përpara të Shqipërisë drejt integrimit në BE. Ka që në këtë pikë mund të hedhin argumentin se do të ishte më mirë të asgjësohej fare kjo opozitë mëkatare se kështu do të lindte një opozitë e re e pastër. Gjykoj se në kushtet e pushtetit të krimit, kjo s’mund të ndodhë. Një përdorim i drejtësisë nga krimi mund të çojë veçse në padrejtësi edhe më të mëdha: në eliminimin përfundimtar të opozitës dhe të çdo zëri që denoncon pushtetin e krimit. Shenjat e kësaj sjelljeje Rama i ka dhënë me bollëk. Prandaj, që të demaskohet në mënyrë sa më efikase ky rrezik, lipset që opozita të qëndrojë në Parlament dhe të zgjedhë një rrugë më graduale përshkallëzimi të aksionit të saj politik. Në këtë rrugë asaj i duhet të bëjë dy gjëra: Së pari, të denoncojë çdo akt selektiv të Kryeprokurores së përkohshme me synim shkatërrimin e opozitës; të ngulmojë që Prokuroria të çojë përpara çështjen “Tahiri” e të tjera; të punojë që të zgjidhet sa më parë Këshilli i Lartë i Prokurorisë që të zgjedhë një kryeprokuror të përhershëm të paktën neutral, si dhe të sqarojë sa më shumë lojën e pisët që kanë luajtur disa ndërkombëtarë në kurriz të demokracisë në Shqipëri. Së dyti, çka më duket edhe më e vështira: të gjejë rrugët jo thjesht me llafe dhe denoncime, por me zgjedhje politike, që të bindë njerëzit se nuk synon thjesht të kalërojë kalin e maxhorancës kur të vijë në pushtet, siç ka bërë më 2005-n, por se synon vërtet të kthehet nga një bandë gangsterësh që kërkon të kapë drejtësinë, mediat, institucionet, në një parti që do të shërbejë si hallkë midis interesave të shoqërisë dhe institucioneve.

Edhe e vetme pra, Shqipëria meqë moralisht përfaqëson edhe Kosovën , duhet të kishte votuar përkrah SHBA-së!

Dëgjova sot një deklarim të presidentit Thaçi, lidhur me votimin e dites së djeshme në OKB , të rezolutës kundër njohjes nga SHBA të Jeruzalemit, si kryeqytet i Izraelit. Thaçi thotë shprehimisht:

“Edhe sikur të ishte vetëm vota e SHBA-së kundër rezolutës në fjalë, Kosova do të ishte e dyta, po të kishte të drejtën e votës në OKB .. “. Me fjalë të tjera zoti Thaçi thumbon indirekt votën kundër të Shqipërisë në OKB për rezolutën e Jerusalemit.

Sigurisht edhe unë i këtij mendimi jam dhe besoj se këtë mendojnë edhe shumica e shqiptarëve, në të dy shtete dhe ne Maqedoni apo Luginë!

Vota pro kësaj rezolute tregoi radhitjen e Shqipërisë sigurisht me shumicën dërrmuese të shteteve anëtare të OKB-së, por krijoi ndjesinë e mosmirënjohjes ndaj SHBA-së dhe asaj që ky shtet i madh ka bërë për Kosovën, dhe pse jo edhe për Shqipërinë dhe gjithë shqiptarët.

Megjithëse në pamje të parë duke u nisur edhe nga shpjegimi që ministri i Jashtëm Ditmir Bushati bëri lidhur me votën e Shqipërisë dje në OKB, jepet përshtypja se Shqipëria ishte e detyruar që të rreshtohej përkrah vendeve të BE-së , pasi aty është edhe vendi i saj, por në këtë rast nuk do të ishte gabim, sikur qoftë edhe për sy të botës të votonte përkrah SHBA-së .

Këtë e them për disa arsye të dukshme dhe të padukshme, ndaj po rreshtoj disa:

Së pari dihet qartë që Shqipëria e ka shprehur gjithmonë dëshirën e një shteti palestinez në takat e tyre ne Lindjen e Mesme dhe nje votë e Shqipërisë pro apo kundër një rezolute të tillë nuk do të bënte ndonjë ndryshim të dukshëm!

Së dyti , pavarësisht seç farë mendojnë vendet e Evropës, Shqipëria nuk e ka luksin që të kundërshtojë SHBA-në, në një rast të tillë ku dihej se edhe sikur të votonte kundër rezolutës, ajo nuk do të kalont, këto ishin pritshmëritë e paravotimit .

Së treti, Shqipëria i ka më shumë borxh SHBA-së se Evropës, pasi vetëm ky shtet i madh me këmbëngulje dhe forcë bëri të mundur shkëputjen e Kosovës nga kthetrat serbe dhe krijimin e shtetit të dytë shqiptarë në Evropë.

Së katërti janë pikërisht BE dhe disa shtete të tjera në Evropë që megjithëse pranuan verdiktin amerikan për Kosovën sot e gjithë ditën vazhdojnë ta zvarritin integrimin e saj drejt prosperitetit evropian, duke vazhduar izolimin dhe variantin “hiq mos e këput”, me plotësimet e dëshirave të okupatorëve serb, dhe injorimin e përhershëm të sakrificës mbi shekullore të popullit shqiptar për ribashkim dhe prosperitet .. !

Së fundmi votimi nga ana morale, uli bujarinë dhe mirënjohjen e shqiptarëve, duke dalë kundër atij që të ka bërë veç mirë!

Nuk dua të futem këtu në detaje, se sa mirë kanë bërë apo keq vendit arab, apo vende të tjera. Lidhur me Kosovën, por dua ta mbyll me shifrën qesharake , që nga 57 vende arabe të Koferencës islamike, vetëm 32 e kanë njohur Kosovën, duke u stepur nga presioni serbo -rus.

Shqipëria do ta ndjejë jam i sigurt këtë “neglizhencë”, të pa nevojshme , që tregoi në marrëdhëniet me SHBA-në .

Edhe e vetme pra, Shqipëria meqë moralisht përfaqëson edhe Kosovën, duhet të kishte votuar përkrah SHBA-së!

Ministri i Jashtem, Ditmir Bushati ka reaguar me nje sqarim te gjate per voten e Shqiperise kunder SHBA dje ne OKB per Jerusalemin.

Me nje shenim ne faqen e tij ne FB, teksa u pergjigjet edhe kritikeve, ai thekson se ajo nuk eshte vote kunder SHBA, por nje qendrim koherent, parimor e të pandryshuar në vite i Shqiperise, ne linje te plote sipas tij me shumicën dërrmuese të vendeve anëtare të OKB-së, NATO-s dhe BE-së, partnerë historikë të SHBA-ve.

Reagimi i Bushatit 

PËR VOTËN E SHQIPËRISË NË OKB!

Në politikë të jashtne nuk e kemi luksin të mos dallojmë faktet nga trillimet. Për ata që ende besojnë te faktet, vota e Shqipërisë dje në Asamblenë e Përgjithshme të Kombeve të Bashkuara nuk është një votë kundër SHBA, por shprehje e qëndrimit tonë koherent, parimor e të pandryshuar në vite, bazuar në konsensusin ndërkombëtar të shprehur në dokumentet e panumërta të OKB-së dhe Rezoluta të Këshillit të Sigurimit, të cilat kanë fuqi detyruese, sikundër në linjë të plotë me qëndrimet e shumicës dërrmuese të vendeve anëtare të OKB-së, NATO-s dhe BE-së, partnerë historikë të SHBA-ve.