Presidenti amerikan Donald Trump bëri një thirrje kundër Grupit të Lirisë, republikanët më konservatorë të Kongresit, që ishin kryesisht përgjegjës për dështimin e përpjekjeve për të ndryshuar ligjin e kujdesit shëndetësor.

Në një postim në Twitter të enjten, zoti Trump u bëri thirrje republikanëve që të sfidojnë anëtarët e këtij grupi dhe demokratët.

Mesazhi i Presidentit Trump dukej se inkurajonte sfidat ndaj anëtarëve të këtij grupi në votimet brenda partisë për zgjedhjet për anëtarët e Kongresit, vitin e ardhshëm. Grupi i Lirisë ka rreth 32 anëtarë, shumica e të cilëve fituan lehtësisht zgjedhjet në distrikte me prirje republikane.

Administrata e Presidentit Trump nuk është e kënaqur me pavarësinë e këtij grupi. Presidenti u përpoq me forcë të bindte anëtarët e tij për të zëvendësuar ligjin e kujdesit shëndetësor të ish-Presidentit Obama.

Por përpjekjet e tij dështuan të premten e kaluar përballë kundërshtimit të Grupit të Lirisë, pasi zoti Trump dhe Kreu i Dhomës së Përfaqësuesve Paul Ryan nuk arritën të bindnin numrin e nevojshëm të ligjvënësve që të votonte në favor të tyre.

Filimisht Presidenti Trump fajësoi demokratët për humbjen, por më pas kritikoi Grupin e Lirisë.

Paralajmërimi i zotit Trump vjen ndërsa republikanët po bëhen gati për një muaj debate brenda partisë për përparësitë e buxhetit.

Kongresi duhet të miratojë një paketë shpenzimesh deri më 28 prill, për të shmangur ndaljen e funksionimit të qeverisë.

Presidenti kinez Xi Jinping do të vizitojë Shtetet e Bashkuara për bisedime me presidentin Donald Trump më 6 prill. Lajmi u konfirmua sot nga Shtëpia e Bardhë.

Takimi dy ditor do të zhvillohet në rezortin e presidentit Trump në Maralago të Floridës.

Në deklaratën e Shtëpisë së Bardhë, që nuk jep shumë hollësi mbi takimin, thuhet se bisedimet do të përfshijnë “çështje globale, rajonale dhe të mardhënieve dy palëshe me interes të ndërsjellë”.

Gjatë fushatës për president zoti Trump ka qenë kritik ndaj praktikave tregtare të Kinës. Ai ka kërcënuar se do të vendosë tarifa të ashpra për mallrat që importohen nga Kina.

Në fillim të këtij muaji Sekretari Amerikan i Shtetit Rex Tillerson vizitoi Kinën në përgatitje për vizitën e presidentit Xi. Sekretari i shtetit i shprehu presidentit kinez interesimin e Presidentit Trump për të rritur mirëkuptimin mes dy vendeve.

Shkalla e miratimit të punës që po bën presidenti Donald Trump ka mbetur në nivelin e rreth 40 për qind, që nga koha kur mori zyrtarisht detyrën në janar. Kjo falë mbështetjes së fortë të republikanëve, të cilët nuk e shohin zotin Trump si përgjegjës për dështimin e përpjekjes për të zëvendësuar sistemin e kujdesit shëndetsor.

Një sondazh i ri i kryer nga rrjeti mediatik CBS në periudhën 25 mars deri më 28 mars, tregon se 40 për qind e amerikanëve e miratojnë punën që po bën zoti Trump. Një shifër përgjithësisht e pandryshuar nga 39 për qind që kishte në fund të shkurtit dhe 40 për qind në fillim të po atij muaji.

Sipas republikanëve të anketuar, faji për dështimin e zëvendësimit të “Obamacare” qëndron tek projektligji që u propozua dhe jo tek mënyra sesi presidenti trajtoi një prej premtimeve të tij kryesore të fushatës.

49 për qind e të anketuarve thanë se projektligji dështoi sepse “nuk kishte mbështje të gjerë”. Mes republikanëve 41 për qind dhanë të njëjtën përgjigje.

30 për qind e republikanëve thanë se projekt-ligji nuk siguroi mbështetje të mjaftueshme pasi “demokratët nuk ranë dakort për kompromis”. Vetëm 14 për qind e të gjithë të intervistuarve dhanë të njejtën përgjigje.

40 për qind e amerikanëve, duke përfshirë 67 për qind të demokratëve, besojnë se Rusia ndërhyri në zgjedhjet presidenciale të vitit 2016 me qëllim për të ndihmuar Donald Trumpin të fitojë. Me këtë vlerësim pajtohen vetëm 13 për qind e republikanëve.

Shumica e demokratëve dhe të pavarurve besojnë se është e mundshme që bashkëpunëtorët e Donald Trumpit të kenë patur kontakte të papërshtatshme me zyrtarë të qeverisë ruse. Por tre të katërtat e republikanëve nuk besojnë se këto kontakte kanë ndodhur.

Ndërsa shumica e amerikanëve thonë se FBI-ja duhet të hetojë lidhjet e mundshme mes zyrtarëve të fushatës së zotit Trump dhe Rusisë, me këtë qëndrim bien dakord vetëm një e treta e republikanëve.

Shumica e të anketuarve me bindje republikane besojnë se zyra e zotit Trump mund të jetë përgjuar gjatë fushatës. Gjysma e të anketuarve, pa bindje politike, gjithashtu besojnë se është përgjuar, ndërkohë që shumica e demokratëve mendojnë që jo.

Anketa tregon vlerësim të madh nga republikanët për punën e kryetarit të Dhomës së Përfaqësuesve Paul Ryan. 60 për qind e republikanëve e miratojnë punën e tij krahasuar me 33 për qind të të gjithë të anketuarve.

Rex Tillerson po bën vizitën e pare si Sekretar Shteti në Turqi, një aleat kyç i NATO-s.

Operacioni i ardhshëm për të dëbuar Shtetin Islamik nga kryeqyteti i tij i vetëshpallur, Raqqa në Siri, pritet të jetë në krye të axhendës së zotit Tillerson në Ankara. Ai do të takohet me udhëheqësit e vendit, përfshirë Presidentin Recep Tayyip Erdogan. Mbështetja e Uashingtonit për grupin kryengritës kurd sirian, PYD dhe milicinë e tij YPG në luftën kundër Shtetit Islamik, ka qenë dhe mbetet një pike tensioni me Ankaranë që i akuzon ata se janë të lidhur me PKK-në, që po lufton kundër shtetit turk.

“Pa dyshim që ka një sërë çështjesh kritike duke filluar nga Siria”, thotë Sinan Ulgen, një studiues në Institutin Carnegie në Evropë. Zoti Ulgen thotë se në Ankara ka shpresa të mëdha pas zgjehdhjes së Donald Trumpit.

“Pasi Donald Trumpi u bë president, Turqia u përpoq të ushtronte ndikim tek udhëheqësit e rinj amerikanë, për të ndërprerë lidhjen mes Shteteve të Bashkuara dhe kurdëve sirianë të grupit PYD, që Ankaraja e konsideron një organizatë terroriste që godet interesat e saj jetike. Pra kjo është një çështje shumë e vështirë”.

Zyrtarisht, Presidenti Donald Trump nuk ka marrë një vendim për vazhdimësinë e mbështetjes së grupeve kurde siriane, që përbën boshtin e Forcave Demokratike Siriane, që po luftojnë aktualisht Shtetin Islamik dhe po marshojnë drejt Raqqa-s. Por në terren, mbështetja amerikane është rritur në mënyrë të ndjeshme përballë shqetësimeve të Ankarasë.

Analistët lënë të kuptohet se Ankaraja do të kërkojë garanci nga zoti Tillerson që forcat kurde do të tërhiqen me shpejtësi nëse marrin pjesë në marrjen nën kontroll të Raqqa-s. Sekretari Tillerson mund të ndihmojë në zbutjen e pakënaqësisë së Ankarasë nëse ashtu siç pritet,ai diskuton çështjen e krijimit të zonave të sigurta në Siri për kthimin e sirianëve, një kërkesë kryesore e Ankarasë.

“Nuk do të ishte habi nëse Shtetet e Bashkuara mbështesin PYD-inë përsa i takon Raqqa-s. Është si të shohësh me xhiro të ngadalrta një përplasje treni. Gjithkush e di që do të ndodhë”, thotë ish diplomati i lartë turk, Aydin Selcen, që ka shërbyer në shumë vende të rajonit dhe në Uashington.

Por zoti Selcen mendon se meqenëse Ankaraja do që të realizojë një vizitë shtetërore në Uashington, do të ketë prirjen që të mos lejojë mosmarrëveshjet për Sirinë, të dëmtojnë vziitën e zotit Tillerson.

Frenimi i sjelljes agresive rajonale të Iranit, pritet të jenë një nga temat kryesore ku interesat e dy vendeve përputhen dhe pjesë e bisedimeve në takimet e zotit Tillerson, thotë analisti Ulgen.

Edhe marrëdhënia e Ankarasë me Moskën pritet të jetë në programin e Sekretarit amerikan të Shtetit. Muajt e fundit, ka pasur një shqetësim në rritje mes aleatëve të Turqisë në NATO lidhur me drejtimin e vendit, shqetësime që duket se Ankaraja i ka ushqyer, duke e parë rivendosjen e marrëdhënieve miqësore me Rusinë, si një kartë të vlefshme në negociatat me aleatët perëndimorë.

Por afrimi mes dy vendeve, mund të jetë duke shfaqur shenja ftohjeje dhe ish-diplomati Selcen parashikon se kjo mund t’I japë një shtysë përmirësimit të marrëdhënieve mes Shteteve të Bashkuara dhe Turqisë.

Zoti Tillerson mund të përballet edhe me çështje të tjera delikate, si për shembull kërkesa e Ankarasë për ekstradimin e klerikut turk Fethullah Gulen, të cilin Turqia e konsideron përgjegjës për organizimin e grushtit të dështuar të shtetit në korrik. Uashingtoni këmbëngul se kjo është një çështje që u takon gjykatave a zgjidhin. Sekretari Tillerson ka gjasa të përballet me kërkesën që Gulen të kapet dhe të mbahet i ndaluar, në pritje të kërkesës së Ankarasë për ekstradim.

The Washington Post ka raportuar se Fiona Hill, analiste për Rusinë dhe eksperte për presidentin Vladimir Putin, do të marrë postin e drejtores së lartë për Evropë dhe Rusi në Këshillin për Siguri Kombëtare të Shtëpisë së Bardhë.

Për këtë çështje, Washington Post ka raportuar më 28 mars, duke cituar zyrtarë të paidentifikuar nga Shtëpia e Bardhë. Në fillim të marsit, mediat kishin raportuar se presidenti Donald Trump dëshiron ta emërojë Hillin në këtë pozitë por kjo gjë nuk është konfirmuar.

Hill prej vitit 2006 deri 2009, kishte shërbyer si zyrtare e inteligjencës kombëtare për Rusi dhe Euroazi në Këshillin Kombëtarë të Inteligjencës.

Një grup senatorësh republikanë po shpërndajnë akuza të rreme nga një organizatë e dyshimtë në mbështetje të forcave të korruptuara e antidemokratike të rajonit.

Sekretari i Shtetit Rex Tillerson po përpunon përgjigjen e tij për një letër që i është dërguar më 14 Mars bga gjashtë senator për ta nxitur të hetojë veprimtaritë e Ambasadave Amerikane, misioneve të USAID-it, zyrave diplomatike që punojnë në mbështetje të demokracisë nëpër botë.

Senatori Mike Lee (përfaqësues i shtetit të Utah), hartuesi kryesor dhe senatorët e tjerë, padyshim që përhapën aludime të rreme të ngritura nga një fletëpalosje e shpërndarë në Kongres nga një grup maqedonas, Stop Operation Soros, krijuar nga Cvetin Chilimanov, redaktor i Shërbimit Shtetëror të Lajmeve në Maqedoni dhe një ish punonjës i zyrës së Presidentit.

Letra ka në qender përpjekjet e dy ambasadorëve amerikanë në karrierë për të përkrahur demokracinë në Maqedoni e Shqipëri, duke nënkuptuar që misionet e tyre u futën hundët në partitë politike “për të forcuar të majtën”. Ajo supozon që fondacioni Shoqëria e Hapur për Maqedoninë dhe fondacioni Shoqëria e Hapur për Shqipërinë, të cilat financohen nga filantropi milioner George Soros, luajtën rolin e ndërmjetësit në këtë veprimtari.

Tillerson duhet ta injorojë letrën, sepse nuk ka asgjë për tu hetuar. Përvec faktit se është e mbushur me pasaktësi lidhur me punën e fondacionev, senatorët i bëjnë jehonë argumenteve të Kremlinit dhe përkrahin agjendën e elementeve të korruptuar e anitdemokratikë në rajon.

Këtë unë e di mirë sepse jam drejtor i Iniciativës Shoqëria e Hapur për Europën, themeluar nga Soros. Gjithashtu, jam maqedonas. Në 2015  vendi im u përfshi nga kriza politike pasi një parti opozitare publikoi një seri rregjistrimesh të zbuluara të bisedave. Njëra dukej sikur tregonte Kryeministrin e kohës Nikolla Gruevski që inkurajonte zyrtarë të zgjedhjeve të zhvlerësonin votat e hedhura kundër parties së tij. Të tjera regjistrime shfaqën një korrupsion të shfrenuar dhe një program survejimi masiv që shënjestronte 20 000 njerëz. Si përgjigje, qindra mijëra protestues kundër qeverisë dolën nëpër rrugët e Maqedonisë në 2015 dhe 2016 dhe një prokuror i vecantë nisi një hetim kundër Gruevskit, që u nxit nga BE të tërhiqej.

Zgjedhjet e fundvitit të kaluar nuk i dhanë asnjërës parti mandatet e mjaftueshme për të krijuar një qeveri të re, Gruevski mbetet forca më e rëndësishme në një Maqedoni të ndarë.

Përballë një dënimi të mundshëm me burgim, Gruevski nuk duket i gatshëm të marrë përsipër përgjegjësinë për krimin dhe krizën politike shkaktuar nga hetimi që po vazhdon. I qortuar nga BE-ja dhe i gatshëm për ta hedhur fajin diku tjetër, ai duket sikur i merr fjalimet e gatshme nga Moska. Ka papagalluar propagandën e Kremlinit që i etiketon zërat kritikë si armiq të populllit. Soros, që sponsorizon bashkë me donatorë të tjerë privatë dhe BE-në, organizata të pavarura, janë bërë “koka turku” të volitshme.

Në Kongresin Amerikan është rënë dakort gjerësisht se përkrahja e organizatave të shoqërisë civile të globit nuk është cështje partiake. Që në kohën e Ronald Reganit, të dy partitë kanë bërë tepër për të ndihmuar vendet që ishin në tranzicionin nga komunizmi drejt demokracisë. Gjithsesi, në letër, senatorët i kërkojnë Tillersonit që të ndalojë promovimin e demokracisë që “po tregon mungesë respekti ndaj sovranitetit kombëtar”. Një interpretim i tillë prezumon që qeveritë janë të shenjta dhe sovrane, e jo në fakt votuesit që i zgjedhin ato, dhe që një shoqëri civile e shëndetshme minon zhvillimin e vendit.

Duke bërë këto deklarata, senatorët kanë shtyrë padashje rrëfenjën autoritare të Presidentit Rus Vladimir Putin drejt e në Kapitol. Duke zgjedhur fjalë të ngjashme me ato që media ruse përdorte për të përshkruar krizën në Ukrainë, që etiketoi të gjitha mospajtimet e popullit si të krijuara nga perëndimi, letra akuzon USAID-in që po e destabilizon Shqipërinë, një vend ish komunist, tashmë aleat në NATO; duke nxitur reformën në drejtësi atje.

Ata nuk japin asnjë provë që ta materializojë deklaratën përvec faktit se USAID ka sponsorizuar punën e Open Society Foundation for Albania, dhe edhe kjo është e pasaktë.
Ndryshe nga supozimet e rreshtuara në një letër nga “liderë të respektuar nga Shqipëria” anonimë, fondacioni Shoqëria e Hapur për Shqipërinë nuk ka pranuar as administruar kurrë fonde nga USAID-i.

Ajo nuk e ka krijuar Dokumentin Strategjik për Reformën Gjyqësore në Shqipëri sic deklaron letra, komisioni multipartiak i parlamentit Shqiptar për reformën gjyqësore e hartoi atë. Fondacioni mbështeti procesin duke financuar komisionin dhe skuadrën e ndihmës teknike, por nuk kishte asnjë lidhje me dokumentin. Senatorët duket se kanë rënë viktima të një ushtrimi politik për të zhvlerësuar procesin e reformës gjyqësore dhe Kryeministrin, ironike kur llogarit shqetësimin e tyre për stabilitetin e vendit.

Mbase pjesa më alarmuese është që letra e senatorëve barazon nxitjen për një “agjendë progressive” me promovimin e një “agjende politike”. Ata mesa duket harrojnë që progresi, në sundimin e ligjit, demokraci e në respektimin e të drejtave të njeriut, është një ideal njerëzor mishëruar në ligjin ndërkombëtar nga qeveri nga të gjitha anët e spektrumit politik. Senatorët argumentojnë që debate kritik dhe reforma që ka qëllim ta realizojë këtë ideal, kanë patur një “efekt destabilizues” në rajon.

Historia tregon se ata e kanë gabim. Nuk është rastësore që vendet më të suksesshëm në botë (kujtoni Gjermaninë ose Hollandën, pa përmendur SHBA-të) i mirëpresin debatet politike kumbuese dhe të shumëllojshme. Duke i thënë e iu drejtuar shqetësimeve të publikut krijohet një stabilitet kohëgjatë, dhe duke i shtypur vetëm i ushqen me frustrim dhe rrit mundësitë për paqëndrueshmëri.

Nuk është e habitshme që senatorët kanë dëgjuar nga lider të ngulitur që i shohin shoqëritë civile kritike si armiq. Politikanëve nuk i pëlqejnë kritikat. Ppr hetimi që ata kërkojnë do të shënjestronte punën e organizatave prodemokratike si International Republican Institute (IRI), National Democratic Institute (NDI), National Endowment for Democracy (NED), U.S. Institute of Peace (USIP), dhe pafund të tjera nëpër botë, duke u bazuar në atë që duket se janë thjesht komente të politikanëve që shohin interesat e tyre në dy shtetet.

Miratimi i një hetimi të tillë do të shënonte një largim të rrezikshëm nga dekadat kur politika amerikane promovonte demokracinë dhe të drejtat e njeriut jashtë kufijve të vet, praktikë e të dy administratave, si republikane, ashtu edhe demokratike. Do të shënonte braktisjen e botëkuptimit që interesat e SHBA-ve plotësohen nga marrëdhënie me shtete paqësore, të qëndrueshme që ndajnë të njëjtat vlera demokracie.

Letra po ashtu injoron faktin që shumë prej punës së fondacionit është e destinuar të mbështesë institucione shtetërore.  Tillerson duhet ta llogarisë këtë para se të marrë vendimin e tij. Që kur Sorosi themeloi the Open Society Foundations në 1979, puna jonë ka ndihmuar në përmirësimin e jetës së miliona njerëzve nëpër botë.

Fondacioni Shoqëria e Hapur Maqedoni me mbështetjen e tij ishte thelbësore për mbijetesën e vendit në vitet e saj të hershme. Nën bllokadë nga fqinjët pasi deklaroi pavarësinë në 1991 gjatë ndarjes nga jugosllavia, fondacioni ndihmoi të mbante gjallë sistemin e kujdesit shëndetësor të Maqedonisë, duke sjellë medikamente, pajisje laboratory, ambulance dhe pajisje sanitare në 45 spitale dhe klinika në të gjithë vendin. Në 1994, ajo pagoi 50 % të kostos për 40 fluturime masive mallrash drejt Sllovenisë që fermerët mMaqedonas të mund të dërgonin prodhimet e tyre të freskëta në një treg europian.

Deri më sot, Fondacioni Shoqëria e Hapur Maqedoni ka shpenzuar 171 500 dollarë më shumë se sa qeveria e Maqedonisë për t’i mundësuar njerëzve më të varfër të vendit shërbim ligjore falas. Këto projekte ofrojnë ndihmë ligjore për cdo person apo organizato së cilës i refuzohet dhënia e informacionit për veprimtari qeveritare, si për shembull shpenzimet për një projekt infrastrukturor vendor. Fondacioni ka mundësuar këshillim ligjor falas për 100 viktima të dhunës në familje. Ai ka ndihmuar edhe qeverinë duke paguar për një sistem të ri të regjistrimeve digjitale për sistemin e shëndetësisë kombëtare dhe ka financuar website-in e ministries së drejtësisë së vendit.

Fondacioni Shoqëria e Hapur Maqedoni ka ndihmuar në trajnimin e më shumë se 2000 mësuesve për të përdorur metodologji mësimore ndërvepruese dhe ka paguar për rinovimin dhe pajisjen e amfiteatërve, korridorëve, tualeteve, bibliotekat multimedia, dhe klasat në tetë fakultete të trajnimit të arsimtarëve në katër universitete shtetërore. Gjatë krizës ekonomike të 2009 deri në 2011, ajo përdori fonde emergjence për tu paguar 1.9 milion dollarë organizatave që u mësonin fermerëve dhe biznesmenëve të biznesit të vogël menaxhim financiar që të mund ta mbanin gjallë aktivitetin e tyre.

Fondacioni Shoqëria e Hapur për Shqipërinë ka shpenzuar më shumë se 57 milion dollarë për të ndërtuar 275 shkolla dhe kopshte kudo në vend.

Shtatëdhjetë përqind e popullsisë ka përfituar nga këto shkolla, dhe fëmijët vazhdojnë të edukohen në to. Programi i internetit nga Open Society e bëri Shqipërinë të hapur ndaj botës së jashtme, duke vendosur antenën e parë të internetit në vend në 1997 dhe duke ndihmuar për shërbimet online falas në biblioteka, universitete dhe OJQ.

Fondacionet “Shoqëria e Hapur” krenohen me trasparencën dhe mospërfshirjen e tyre politike.  Ne avancojmë të drejtat e njeriut dhe liritë themelore për afatin kohëgjatë, pavarësisht nga drejtuesit politikë të kohës. Nëse drejtuesit me tendenca autoritare ndalojnë mbështetjen nga ana e OJQ-ve të guximshme që i vënë ato në dyshim, aktivistët do të ishin gjithmonë e më tepër të pambrojtur ndaj ngacmimit, përfrikësimit dhe dhunës. Bota do të bëhej më pak e qëndrueshme.

Sekretari i Shtetit duhet të mendohet gjatë para se të dali pas angazhimeve politike ndërkombëtare të Amerikës. Braktisja e tyre do ta conte vendin, dhe botën, në një drejtim tjetër dhe mjaft të errët.  –

Balkan Conspiracy Theories Come to Capitol Hill

Shtetet e Bashkuara të Amerikës deklarojnë se asnjë prej çështjeve të mprehta të aktualitetit politik në vend nuk duhet të jetë shfajësim për bojkotin e Parlamentit, bllokimin e zgjedhjeve dhe Reformës në Drejtësi.

Në përgjigje të interesimit të Top Channel, ambasada amerikane në Tiranë tha se administrata e Trump nuk e mbështet protestën e Partisë Demokratike. SHBA apelon për dialog mes palëve.

Pas kthimit nga Shtetet e Bashkuara të Amerikës, Lulzim Basha ka deklaruar se ka marrë mbështetje për kauzën e opozitës, gjatë takimeve me zyrtare të administratës se Presidentit Trump si edhe me senatorë e kongresmenë.

Top Channel iu drejtua ambasadës së Shteteve të Bashkuara ne në Tiranë dhe e pyeti se në çadër zoti Basha duket se pretendon se ka mbështetjen e administratës Trump për protestën e PD. A është kjo e vërtetë?

Përgjigjja e një prej zëdhënësve të Ambasadës ishte kjo: “Jo. Qeveria e Shteteve te Bashkuara mbështet zgjedhje të lira dhe të ndershme, dekriminalizimin dhe luftën kundër narkotikëve, por këto çështje nuk duhet të përdoren si shfajësime për të bojkotuar Parlamentin, për të bllokuar zgjedhjet, apo për të vonuar zbatimin e reformës së gjyqësorit. Nxisim dialogun midis qeverisë dhe opozitës për t’i zgjidhur këto”.

Presidenti amerikan Donald Trump po e kthen vëmendjen tek reforma e taksave, pas dështimit të përpjekjes për të shfuqizuar dhe zëvendësuar planin për reformën e shëndetësisë.

“Do të thoja që ndoshta do të fillojmë me përpjekje intensive për shkurtime të thella dhe reformë në taksa. Ky do të jetë hapi i mëtejshëm”, tha zoti Trump të premten në Shtëpinë e Bardhë pasi republikanët tërhoqën legjislacionin për të zëvendësuar Ligjin pët Kujdes Shëndetësor të Përballueshëm, ose siç njihet nga shume vetë, Obamacare.

Më herët të premten. Sekretari i Thesarit Steven Mnuchin tha gjatë një interviste se kishte dy muaj që punonte me projekt-ligjin për reformën në taksa.

Ai tha se paketa do të përfshinte propozime për shkurtimin e taksave për individët dhe korporatat.

“Fokusi ynë kryesor është të shkurtojmë taksat për klasën e mesme, jo për më të pasurit”, tha ai.

Tashmë për një vizë drejt SHBA do të kontrollohen edhe rrjetet sociale. Urdhrat diplomatikë që janë dërguar javën e fundit nga sekretari i shtetit Rex Tillerson për të gjitha ambasadat amerikane i jepen instruksione konsullatave që të rrisin kontrollet e tyre. Në radhë të parë kërkohet ‘verifikim ekstrem’, një gjë që Trump e kishte kërkuar gjatë fushatës presidenciale. Rregullat shtesë do të kërkojnë nga aplikantët për të kaluarën e tyre, do t’i bëhet një kontroll në historinë e tyre të rrjeteve sociale si dhe të shikohet nëse ata kanë kaluar ndonjëherë në ndonjë territor që kontrollohet nga Shteti Islamik.

Rregullat e reja nuk do të aplikohen vetëm për 38 vende  ku përfshihen shumica e vendeve evropiane dhe aleatëve si Australia, Zelanda e Re, Japonia dhe Koreja e Jugut, qytetarët e të cilëve mund të marrin viza me procedurë të shpejt nëpër mes programit për heqjen e vizave. Asnjë vend nga Lindja e Mesme apo Afrika s’do të jenë pjesë e këtij programi. Më 2016, SHBA kishte lëshuar më shumë se 10 milion viza për vizitorët e huaj, por për vitin 2017 administrata e Trump do ta bëj edhe më vështirë hyrjen e miliona vizitorëve në Amerikë pasi që do të kërkojë nga ta kontrolle të reja sigurie për të dhënë viza turistike, biznesi apo për vizita të të afërmve.

Burime të udhëheqësve republikanë në Kongres thanë se të enjten Dhoma e Përfaqësuesve e ka shtyrë votimin për shfuqizimin dhe zëvendësimin e ligjit për shërbimin shëndetësor, që njihet si “Obamacare”.

Burime të paidentifikuara komentuan të enjten me disa media amerikane, vetëm disa orë para votimit të pritshëm.

Anëtarë të bllokut të ekstremit të djathtë të Dhomës së Përfaqësuesve, të njohur si “Komiteti i lirisë” , thanë pas takimit me Presidentin Donald Trump, se nuk kanë arritur marrëveshje lidhur me shfuqizimin e programit “Obamacare”.

Ligjvënësi Mark Meadows, kryetar i “Komiteti i lirisë”, konfirmoi se grupi i tij dhe presidenti nuk kishin arritur marrëveshje për këtë çështje.

Megjithatë, Shtëpia e Bardhë pati një interpretim të ndryshëm lidhur me bisedimet me konservatorët në Kongres, duke bërë një deklaratë, ku thuhej se të dyja palët kishin ndërmarrë “një hap pozitiv” drejt shfuqizimit së ligjit për kujdesin shëndetësor.

Zëdhënësi i Shtëpisë së Bardhë, Sean Spicer, i tha gazetarëve se shumë ligjvënës kishin lënë të kuptohet se do të votojnë për shfuqizimin e Obamacare. Por, ai shtoi se “në fund të fundit, ne nuk mund t’i detyrojmë njerëzit të votojnë.”

Dukshëm kjo çështje ka përçarë partinë republikane dhe presidenti Trump si dhe udhëheqësit republikanë në Kongres po përpiqen të gjejnë votat e mjaftueshme për shfuqizimin e kujdesit shëndetësor të miratuar nga administrata e presidentit Obama dhe për ta zëvendësuar atë me një sistem të ri shëndetësor.

“Shfuqizimi dhe zëvendësimi”, ashtu siç shprehen republikanët, i planit të presidentit Obama, ishte një nga premtimet dhe temat krysore mbi të cilën u bazua fushata e presidentit Trump dhe e republikanëve. Por sot që pritet votimi në Kongres, republikanët deri tani duket se nuk i kanë votat e mjaftueshme. Ndërsa ata janë të bashkuar për ta shfuqizuar sistemin e kujdesit shëndetësor të presidentit Obama, ata janë të përçarë përsa i përket sistemit të ri me të cilin do ta zëvëndësojnë atë. Ndarjet më të mëdha janë mes republikanëve konservatorë, që thonë se ligji i ri nuk bën shkurtime sa duhet dhe republikanëve më të moderuar që thonë se shkurtimet e parashikuar janë shumë të thella.

Para disa ditësh presidenti Trump i paralajmëroi ligjvensësit republikanpë që ende hezitojnë se në se ata nuk votojnë për ta shfuqizuar Obamacare, kjo do t’i zemëronte zgjedhësit dhe mund t’u kushtonte ligjvënësve vendet e tyre në Kongres, në zgjedhjet e 2018. Ligji i ri në se kalon në Dhomën e Përfqësuesve duhet të miratohet edhe nga Senati, ku fati i tij është po ashtu i i pasigurt.

Zoti Trump dhe republikanët e kanë kundërshtuar prej kohësh programin 7 vjeçar të ish presidentit Obama për shëndetsinë. Programi ka rritur me 20 milionë numrin e amerikanë të siguruar, por republikanët pretendojnë se në formën e tanishme pagesat për të do të rriten aq shumë sa do të bëhen të papërballueshme.

Zyra e pavarur e buxhetit në Kongres arriti në përfundimin se 24 milionë amerikanë do të humbasin sigurimin shëndetësor gjatë dekadës së ardhshme, nëse miratohet plani republikan. Presidenti Trump dhe udhëheqësit republikanë mbrojnë fort argumentin se plani i tyre, ndryshe nga “Obamacare”, do t’u japë njerëzve mundësinë të blejnë një plan që mbulon nevojat e tyre dhe që ata mund t’a përballojnë financiarisht.

Sot paradite, ish presidenti Obama përmes një deklarate u bëri thirrje ligjvenësve të mos miratojnë ndryshime që nuk do ta përmirësonin sistemit e kujdesit shëndetësor për amerikanët. Në se republikanët duan t’i bëjnë përmirësime sistemit aktual, thotë ish presidenti, ata mund të negociojnë me demokratët dhe të miratojnë ndryshimet përkatëse.

Komisioni i Zbulimit në Dhomën e Përfaqësuesve të Kongresit amerikan u mblodh sot pas dyerve të mbyllura, një ditë pas konfuzionit të krijuar lidhur me hetimet rreth akuzave të Presidentit Donald Trump se ai ka qenë përgjuar nga paraardhësi i tij, ish-presidenti Barack Obama.

Kongresmeni republikan Devin Nunes, kryetar i komisionit, i doli në mbrojtje deklaratave të bëra dje se bisedat e përgjuara në mënyrë të ligjshme të agjentëve të huaj, të cilët flisnin me zyrtarë të fushatës së zotit Trump pas zgjedhjeve të nëntorit, por para inaugurimit të tij, kishin çuar në interceptim rastësor të komenteve të bëra nga ndihmësit e zotit Trump, dhe ndoshta nga vetë zoti Trump.

Kongresmeni Nunes foli me gazetarët dhe me vetë presidentin në lidhje me këto materiale, pa informuar asnjërin prej 21 anëtarëve të Komisionit.

Zoti Nunes tha se dhënia e informacioneve shpjeguese dhe një takim që ai pati më vonë me Presidentin Trump në Shtëpinë e Bardhë ishte thjesht një gjykim i tij personal.

Pas seancës me anëtarët e tjerë të Komisionit, zoti Nunes kërkoi ndjesë për nxjerrjen e informacionit në mënyrë të njëanshme.

Kreu i FBI-së James Comey ka thënë se nuk ka asnjë informacion që mbështet akuzat e zotit Trump në Twitter se ish-Presidenti Obama ka përgjuar kullën Trump në javët para zgjedhjeve të nëntorit.

Më poshtë teskti i plotë i fjalimit të Z. Engel në anglisht:

https://democrats-foreignaffairs.house.gov/news/press-releases/engel-remarks-us-policy-toward-kosovo

Dy vëzhgues të hershëm të zhvillimeve në Ballkan Edward Joseph dhe Januzs Bugajski analizojnë situatën e krijuar dhe paralajmërojnë për pasoja të rënda në se kriza nuk zgjidhet. Ata komentuan për korrespondentin e shërbimit maqedonas të Zërit të Amerikës, Jane Bojadzevski.

Eduard Joseph, ekspert për Ballkanin në Qendrën për Marrëdhënie Transatlantike mendon se kriza e tanishme politike në Maqedoni është artificiale, e panevojshme dhe është shkaktuar nga refuzimi i partisë VMRO-DPMNE për të pranuar të drejtën kushtetuese të një partie opozitare për të formuar qeverinë. Efekti i kësaj krize thotë eksperti është shumë i rëndë. Ai i quan thirrjet e ish kryeministrit Nikolla Gruevski që njerëzit të dalin në rrugë në mbrojtje të vendit të papërgjegjëshme dhe potencialisht të rrezikshme.

“Thirrjet për protesta në rrugë për të mbrojtur vendin, sikur vendi të ishte nën ndonjë lloj kërcënimi, kur ky nuk është gjë tjetër veçse një proces demokratik i një koalicioni tjetër qeverisës që ka hartuar një qeveri e që mund të drejtojë vendin, ta kundërshtosh këtë dhe të bësh këto thirrje për mbrojtjen e vendit, është e papërgjegjëshme dhe potencialisht e rëndë”.

Janush Bugajski, hulumtues në Qendrën për Analizat e Politikës së Jashme Evropiane thotë se Maqedonia është pranë një krize madhore. Ai e quan kërkesën e opozitës për të rifilluar punimet në parlament si të rëndësishme, por më e rëndësishme thotë ai, është formimi i një qeverie legjitime, të pranuar nga presidenti, sipas kushtetutës dhe në përputhje me rezultatet e zgjedhjeve.

“Duket se situata është bllokuar. Kjo mund të çojë nga një krizë në një tjetër dhe mund të përkeqësohet shumë më shpejt nga sa mendohet”.

Për zotin Joseph, argumenti i shtruar nga presidenti i vendit për rrezikshmërinë që mund të vijë nga e ashtuquajtura platforma shqiptare është e padrejtë dhe e motivuar politikisht.

“Së pari kjo nuk është diçka e re, nuk ka qënë sekret dhe votuesit e kanë ditur. Së dyti, nocioni se ky është një farë rreziku nuk është i llogjikshëm – çdo qeveri maqedonase që nga pavarësia ka pasur parti shqiptare në përbërje. Partia Bashkimi Demokratik për Integrim ka qënë pjesë e qeverisë së Gruevskit megjithëse në një periudhë quhej grupim terrorist. Pra nocioni që kjo parti është e denjë për të qënë pjesë e qeverisë së Gruevskit, por është e padrejtë për një parti të opozitës të ketë në koalicion një parti shqiptare është e pallogjikshme”.

Janush Bugaski thotë se në se e sheh platformën shqiptare, kërkesat nuk janë aq larg nga Marrëveshja e Ohrit. Shumë shqiptarë, thotë ai nuk ishin të kënaqur me punën e koalicionit të mëparshëm qeveritar.

“Kjo nuk ka të bëjë aq shumë me të drejtën e gjuhës për mendimin tim sesa me premtimet ekonomike. Qeveria nuk ka favorizuar pjesën shqiptare të popullatës, duke e diskriminuar për interesat e saj, por këtu përfshihen edhe social-demokratët. Kjo është arsyeja përse edhe social-demokratët janë kundër performancës të qeverisë së mëparshme. Shumë shqiptarë votuan për opozitën maqedonase dhe jo për partitë shqiptare”.

Sipas zotit Bugajski, kriza politike mund të shoqërohet me konflikte të reja etnike.

Edward Joseph e sheh mundësinë e zgjedhjeve të reja të propozuar nga ish kryeministri Gruevski si të padrejtë dhe të pabazë. Në një sistem parlamentar thotë ai, shkaku për të patur zgjedhje të reja, është atëhere kur rezultatet e zgjedhjeve janë të tilla që nuk mund të çojnë në krijimin e një qeverie. Por në këtë rast thotë eksperti, është e qartë se ka një qeveri që mund të krijohet.

Sipas tij, Bashkimi Evropian dhe Shtetet e Bashkuara kanë mundësi ta zgjidhur krizën.

“Ambasada dhe ambasadori amerikan në Shkup duhet të jenë të palëkundur në zbatimin e parimeve demokratike, të kuptojnë çfarë implikimesh ka kjo situatë jo vetëm për Maqedoninë por për rajonin në gjërësi dhe mbarë Evropën”.

Sipas zotit Joseph, duhet një qëndrim i prerë kundër përpjekjeve të qeverisë për të shkatërruar procesin demokratik kur nuk ju pëlqejnë rezultatet e zgjedhjeve apo koalicioni i formuar në parlament.

Sipas zotit Bugajski, Shtetet e Bashkuara duhet të sjellin të dyja palët pranë dhe t’i paralajmërojnë se po rrezikojnë të ardhmen e vendit. Nga ana tjetër duhet të ketë një farë nxitje për anëtarësimin në Nato.

“Mendoj se kjo lojë është zgjatur shumë me Greqinë. Maqedonia duhet të ketë një të ardhme, duhet të ketë një vizion për çfarë është arritur dhe çfarë pritet të arrijë. Pa një vizion të tillë, mendoj se vendi do të zhytet në kaos”.