Presidenti Donald Trump shkëmbeu replika të dielën me gazetën The Wall Street Journal mbi një citim të tij – nëse ka tashmë apo do të ketë në të ardhmen një marrëdhënie të mirë me udhëheqësin koreano-verior Kim Jong Un, që ka qënë një objektiv i shpeshtë i udhëheqësit amerikan lidhur me zhvillimin e armëve bërthamore nga Pheniani.

Katër gazetarë të gazetës intervistuan presidentin Trump në Shtëpinë e Bardhë javën e kaluar, intervistë që u regjistrua si nga gazeta ashtu edhe zyrtarët e Shtëpisë së Bardhë. Por tani të dyja palët po debatojnë për atë që presidenti tha rreth Kim Jon Unit.

Në një pikë, presidenti Trump, sipas transkriptit të gazetës, thotë se ai ka një “marrëdhënie të mirë” si me presidentin kinez Xi Jinping ashtu edhe me kryeministrin japonez Shinzo Abe, duke shtuar, “dhe ndoshta kam një marrëdhënie të mirë me Kim Jong Unin e Koresë së Veriut”.

“Unë kam marrëdhënie me njerëzit, dhe mendoj se ju si gazetarë jeni të habitur nga ky fakt”, tha presidenti.

Një nga gazetarët ndërhyri duke thënë, “që të jemi të qartë, ju nuk keni folur me udhëheqësin e Koresë së Veriut, kur thoni se keni një marrëdhënie me Korenë —”

Por presidenti Trump u përgjigj, “Unë nuk dua të komentojë për këtë – nuk them as kam dhe as nuk kam marrëdhënie. Por unë thjesht nuk kam—”

Gazetari tha, “disa njerëz shohin tweet-et tuaja, që janë ndonjëherë luftarake ndaj Kim Jon Unit…”

Trump përgjigjet, “Sigurisht, ju shihni shumë gjëra dhe pastaj papritur jam mik i ngushtë me dikë. Mund t’u jap 20 shembuj. Ju më jepni 30. Jam njeri shumë fleksibël.”

Të dielën megjithatë, përmes një komenti në Twitter presidenti Trump, hodhi poshtë version e gazetës lidhur me citimin për Kim Jong Unin duke thënë, “The Wall Street Journal deklaron gabimisht se iu kam thënë se “kam një marrëdhënie të mirë me Kim Jong Un. Sigurisht nuk e kam thënë këtë. Thash ‘do të kem një marrëdhënie të mirë me Kim Jong Un,’ dhe kjo është diçka shumë ndryshe. Fatmirësisht tani i regjistrojmë bisedat me gazetarët dhe ata e dinin mirë çfarë doja të thoja. Ata thjesht donin një ngjarje. Lajme të Rreme!”

Si gazeta ashtu edhe Shtëpia e Bardhë postuan regjistrimet e tyre të intervistës dhe duket se kuota e gazetës është e saktë, edhe nëse tani zoti Trump thotë tani se ai donte të thoshte se do të kishte një marrëdhënie të mirë me zotin Kim në një të ardhme.

Zyrtarët e emergjencave në Havaji thanë të shtunën se alarmi për një kërcënim me raketë balistike ishte i rremë.

Në tekstin e alarmit thuhej se drejt Havajit po vinte një kërcënim dhe se nuk ishte fjala për ndonjë alarm stërvitor. Ndërkaq banorëve u kërkohej që të gjenin strehim për t’u mbrojtur.

Alarmi shkaktoi panik kur u shfaq në celularët e njerëzve të shtunën në mëngjes, por pak pas kësaj, autoritetet thanë se fjala ishte për një gabim.

Në këtë ekran celulari shihet alarmi i rremë për një raketë balistike që vjen nga Agjencia e Menaxhimit të Emergjencave të Havajit më 13 janar 2018.

Zëdhënësi i Agjencisë për Menaxhimin e Emergjencave në Havaji Richard Rapoza tha se nuk është e qartë se çfarë e shkaktoi alarmin.

Senatori i Havajit Brian Schatz tha se alarmi i rremë për kërcënim me raketë erdhi si pasojë e një “gabimi njerëzor” dhe ishte “krejtësisht i pafalshëm”.

Senatori i bëri komentet në llogarinë e tij Twitter, pasi zyrtarët e menaxhimit të emergjencave konfirmuan gabimin. Zoti Schatz bëri thirrje për përgjegjshmëri dhe për krijimin një procesi alarmesh që të jetë i imunizuar nga gabimet.

Mjeku i presidentit Donald Trump e shpalli atë me “shëndet të shkëlqyeshëm” pas kontrollit të parë fizik të presidentit që nga inaugurimi i tij gati një vit më parë.

“Presidenti gëzon shëndet të shkëlqyer dhe mezi pres të jap disa detaje të martën”, tha Dr. Ronny Jackson, në një deklaratë që u nda me shtypin nga zëdhënësja e Shtëpisë së Bardhë Sarah Huckabee Sanders.

Jackson, një kundër-admiral i marinës amerikane, është mjeku personal i presidentit.

Presidenti Trump kaloi pak më shumë se tre orë në Qendrën Kombëtare Ushtarake Walter Reed.

Presidenti mbërriti në Palm Beach të Floridas, pak pasi mjeku njoftoi se ai është në gjendje “jashtëzakonisht të mirë”.

Presidenti Trump po e kalon fundjavën në vendpushimin e tij në Mar-a-Lago me zonjën e parë Melania Trump dhe djalin e tyre, Barron Trump.

Meqënëse ligjet federale për privatësinë e shëndetit mbulojnë edhe presidentin, do të jetë në dorën e zotit Trump të vendosë se çfarë informacioni do të bëjë publik lidhur me kontrollin mjekësor.

Presidenti Donald Trump u dha një ultimatum aleatëve evropianë të Amerikës që të ndreqin “të metat e tmerrshme”, siç u shpreh ai, në marrëveshjen bërthamore me Iranin, përndryshe ai do t’i tërheqë Shtetet e Bashkuara brenda disa muajve nga marrëveshja.

Zoti Trump e bëri kërcënimin ndërkohë që shtyu më tej afatet për imponimin e sanksioneve kundër Iranit, duke e lënë marrëveshjen në fuqi, të paktën për një farë kohe.

“Ky është një shans i fundit,” paralajmëroi Presidenti Trump në një deklaratë ku formuloheshin disa rregulla të reja dhe të ashpra për Iranin. Nëse ato nuk zbatohen, thuhej aty, “Shtetet e Bashkuara nuk do ta shtyjnë më vendosjen e sanksioneve dhe nuk do t’i përmbahen marrëveshjes bërthamore për Iranin.”

Deklarata e zotit Trump i vë para një trysnie të madhe Britaninë, Francën dhe Gjermaninë, vendet evropiane nënshkruese të paktit bërthamor me Iranin. Presidenti Trump kërkon që këto vende të ndihmojnë Shtetet e Bashkuara për të krijuar një marrëveshje të re, e cila të ketë si qëllim ta pengojë Iranin të shkallëzojë përsëri aktivitetin bërthamor në dekadën e ardhshme, siç lejon marrëveshja e vitit 2015 e arritur nga Presidenti Barak Obama. Irani ka thënë se nuk është i interesuar për një rinegocim të marrëveshjes.

Sanksionet që Presidenti Trump i shtyu, kanë të bëjnë me bankën qendrore të Iranit. Këto sanksione e shkëputnin Iranin nga sistemi financiar ndërkombëtar, deri kur ato u pezulluan nga ish-Presidenti Obama në bazë të marrëveshjes bërthamore. Zoti Trump shtyu edhe imponimin e ndëshkimeve të tjera amerikane të parashikuara në marrëveshja, që përfshinin sektorët e naftës dhe gazit të Iranit.

Lidhur me këto sanksione, Presidentit Trump do t’i duhet të vendosë në pranverë.

Megjithatë, paralelisht me lëshimet e së premtes, presidenti vendosi sanksione të tjera për Iranin në lidhje me shkeljet e të drejtave të njeriut dhe prodhimin e raketave balistike nga ana e Teheranit.

Masat e reja prekin 14 zyrtarë iranianë si dhe kompani dhe biznesmenë nga Irani, Kina e Malajzia, duke ngrirë çdo pasuri që ata kanë në SHBA dhe duke ndaluar amerikanët të bëjnë biznes me ta.

Presidenti amerikan, Donald Trump, ka anuluar udhëtimin e planifikuar në Londër.

Ai u vuri pikën spekulimeve rreth vizitës në një postim në rrjetin social twitter para mesnatës së të enjtes.

“Arsyeja për të cilën e anulova udhëtimin në Londër është se nuk jam tifoz i madh vendimit të administratës Obama që shiti, mbase ambasadën më të mirë të vendosur në vendin më të mirë, për një ‘dyshkë’, vetëm për të ndërtuar një të re për 1.2 miliardë dollarë. Pazar i keq. Duan ta pres shiritin – JO”, shkroi ai.

Megjithatë, në faqen e internetit të ambasadës amerikane, thuhet se qeveria amerikane bleu vendin për ambasadën e re në vitin 2008, përpara se presidenti Barack Obama të marrë detyrën në janar të vitit 2009. Ndërtesa e vjetër u shit në vitin 2009.

Ishte planifikuar që presidenti Trump të udhëtojë për një vizitë pune në Londër nga fundi i muajit shkurt, kur ai pritej të përuronte ambasadën e re dhe të takohej me kryeministren Theresa May, por nuk ishte vendosur një datë e saktë.

Shtypi britanik shkroi se presidenti Trump thuhet se ishte i pakënaqur për mungesën e “kambanave dhe brohoritjeve ” gjatë udhëtimit dhe faktin se ai nuk do të ishte në gjendje të takohej me mbretëreshën Elizabeth, sepse vizita e tij ishte ulur nga një vizitë shtetërore në një vizitë pune, e cila ka shumë më pak prestigj.

Ndërtesa e re e ambasadës, që sheh mbi lumin Thames, filloi të ndërtohet në nëntor të vitit 2013 dhe u financua tërësisht nga shitja e pronave të tjera amerikane në Londër.

Presidenti Donald Trump i habiti ligjvënësit të enjten gjatë një takimi në Shtëpinë e Bardhë për emigracionin, kur sipas njoftimeve iu referua Haitit dhe vendeve afrikane me një fjalë të papërshtatshme.

“Pse i pranojmë gjithë këta njerëz nga vende (…) të vijnë këtu”, pyeti presidenti, sipas një njoftimi që u raportua për herë të parë nga gazeta Washington Post dhe u konfirmua nga televizioni CNN. Fjala e përdorur prej tij mund të përkthehet afërsisht si “të pista dhe të varfra”.

Zoti Trump tha se Shtetet e Bashkuara duhet të lejojnë më shumë njerëz nga vende të tilla si Norvegjia, kryeministrja e së cilës u takua me të në Shtëpinë e Bardhë të mërkurën.

E pyetur nga mediat, përfshirë Zërin e Amerikës, Shtëpia e Bardhë lëshoi një deklaratë ku thuhej se presidenti do të pranojë vetëm një marrëveshje emigracioni që “trajton si duhet sistemin e llotarisë së vizave dhe emigracionin zinxhir” – dy programe të cilat dëmtojnë ekonominë tonë dhe lejojnë terroristët në vend.” Emigracioni zinxhir është një term i përdorur nga kritikët e emigracionit, të cilët i referohen sistemit që lejon të afërmit të sponsorizojnë anëtarët e familjes për të ardhur në Shtetet e Bashkuara.

Shtëpia e Bardhë nuk konfirmoi dhe as nuk mohoi nëse Presidenti kishte përdorur fjalën e papërshtatshme kur kishte folur për Haitin dhe Afrikën.

Në deklaratë thuhej gjithashtu se Presidenti Trump gjithmonë do të refuzojë “masat e përkohshme dhe të dobëta që u krijojnë pengesa atyre emigrantëve të cilët kërkojnë një jetë më të mirë në Shtetet e Bashkuara nëpërmjet një rruge të ligjshme.”

Gjithashtu, Zëri i Amerikës u interesua pranë zyrave të ligjvënësve që thuhet se ishin të pranishëm në takim.

Sipas njoftimeve, Presidenti Trump i bëri komentet kur senatori Dick Durbin, demokrat nga shteti Ilinoi, po shpjegonte kuadrin e një marrëveshjeje të arritur nga gjashtë senatorë të të dyja partive, marrëveshje që synon mbrojtjen nga deportimi të rreth 800 mijë emigrantëve të rinj, si dhe forcimin e sigurisë së kufirit, sipas gazetës Washington Post.

Deklarata e Shtëpisë së Bardhë

“Disa politikanë të Uashingtonit zgjedhin të luftojnë për vendet e huaja, por Presidenti Trump gjithmonë do të luftojë për popullin amerikan. Presidenti do të pranojë vetëm një marrëveshje emigrimi që trajton në mënyrën e duhur sistemin e llotarisë së vizave dhe emigrimin zinxhir – dy programe që dëmtojnë ekonominë dhe lejojnë terroristët në vendin tonë. Ashtu si vendet e tjera që kanë emigrim mbi bazë meritash, Presidenti Trump po lufton për zgjidhje të përhershme që e bëjnë vendin tonë të fortë duke mirëpritur ata që mund të kontribuojnë në shoqërinë tonë, të rrisin ekonominë dhe të asimilohen në vendin tonë të madh. Ai do të kundërshtojë gjithmonë masat e përkohshme, të dobëta dhe të rrezikshme, që kërcënojnë jetën e amerikanëve dhe pengojnë ata emigrantë të cilët kërkojnë një jetë më të mirë në Shtetet e Bashkuara nëpërmjet një rruge të ligjshme”.

Ish strategu i Shtëpisë së Bardhë Steve Bannon dha dorëheqjen si kreu ekzekutiv i Rrjetit të Lajmeve Breitbart, njoftoi ky rrjet të martën.

Dorëheqja vjen në klimën e krijuar pas komenteve të ashpra që thuhet se ai ka bërë në adresë të Presidentit Donald Trump dhe familjes së tij në librin e titulluar “Zjarr dhe furi” të autorit Michael Wolff që doli në qarkullim javën e kaluar.

Wolff shkruante në libër se zoti Bannon e quajti “akt tradhtie” dhe “jopatriotik” një takim të vitit 2016 mes të birit të presidentit, Donald Trump Jr, dhëndrrit të Presidentit, Jared Kushner, dhe disa shtetasve rusë.

Zoti Bannon parashikonte gjithashtu në libër se Robert Mueller, prokurori i posaçëm që heton rreth një bashkëpunimi të fshehtë mes fushatës së zotit Trump dhe Rusisë, do ta “thyente” të birin e zotit Trump “si një vezë në televizionin kombëtar”.

Senati i SHBA, Dhoma e Përfaqësuesve dhe një prokuror i posaçëm po hetojnë rreth çdo ndërhyrjeje të supozuar ruse në zgjedhjet presidenciale, akuzë që mohohet si nga Kremlini ashtu edhe nga zoti Trump.

Presidenti dhe stafi i tij e kanë sulmuar ashpër zotin Bannon, duke e quajtur atë të pabesë dhe të paturp. Presidenti tha javën e shkuar se Bannon “humbi logjikën” pasi u hoq nga Shtëpia e Bardhë në muajin gusht.

Pas bujës që shkaktoi libri, zoti Bannon qëndroi disa ditë në heshtje, por pastaj u përpoq t’u bënte korrigjime komenteve. Të dielën, ai lëshoi një deklaratë të dielën ku lavdëronte të birin e presidentit, por nuk kërkoi falje për kritikat që kishte bërë ndaj vajzës së presidentit, Ivanka Trump dhe bashkëshortit të saj, Kushner.

Si pasojë e librit, Bannon humbi gjithashtu financuesen e tij kryesore, Rebekah Mercer. Zonja Mercer dhe i ati i saj, miliarderi Robert Mercer, pjesë e Breitbart News Network, janë disa nga pronarët e Rrjetit Breitbart News dhe kanë ndikim në funksionimin e këtij rrjeti. Javën e kaluar, zonja Mercer u distancua nga Bannon, duke thënë në një deklaratë se mbështeste Presidentin Trump dhe platformën mbi të cilën ai është zgjedhur.

Bannon iu bashkua rrjetit Breitbart në vitin 2012 dhe ndihmoi në rritjen e ndikimit të këtij rrjeti, të cilin ai dikur e pat quajtur platformë e së djathtës alternative, një bashkim i lirë i neonazistëve, supremacistëve të bardhë dhe antisemitëve.

Shtëpia e Bardhë nuk komentoi menjëherë rreth lajmit për largimin e zotit Bannon, por sekretarja e shtypit Sarah Huckabee Sanders, javën e kaluar, i bëri thirrje Rrjetit konservator të lajmeve të “shihte mundësinë” e distancimit nga zoti Bannon.

Presidenti Trump vazhdoi sot kritikat për librin e ri provokativ “Zjarr dhe Furi” që e portretizon vitin e parë të presidencës së tij si të rrëmujshëm, dhe atë vetë si fëmijë që ndoshta ka nevojë për ndihmë psikiatrike. Libri me autor Michael Wolff që doli në shitje dje flet rreth intrigave në Shtëpinë e Bardhë gjatë administratës Trump. Korrespondenti i Zërit të Amerikës për Shtëpinë e Bardhë, Peter Heinlein, njofton se presidenti Donald Trump thuhet të jetë i zemëruar me ish-këshilltarin Steve Bannon, i cili citohet të ketë bërë disa komente të dyshimta për presidentin dhe familjen e tij.

Libri “Zjarr dhe Furi”, ka bërë bujë në Uashington. Njerëzit qëndruan në rradhë për të blerë kopje të librit, pavarësisht temperaturave të ulëta që arritën minus 12 gradë celsius.

Presidenti reagoi vetë, me “zjarr dhe furi”.

“Unë mendoj se zemërim, revoltim, do të ishin fjalët e përshtatshme kur flitet për këto lloj deklaratash të rreme, kundër Presidentit, administratës së tij dhe familjes së tij” tha zëdhënësja e Shtëpisë së Bardhë, Sarah Huckabee Sanders.

Në Twitter, presidenti Trump e quajti librin “të rremë” dhe “plot gënjeshtra” dhe talli ish-këshilltarin Steve Bannon, duke e quajtur atë “Sloppy Steve”, pasi Bannon u citua ta përshkruante një takim midis djalit të madh të presidentit Trump dhe një grupi rusësh gjatë fushatës zgjedhore të 2016-ës si “tradhëtues” dhe “jopatriotik”.

“Unë nuk flas me të. Unë nuk flas me të. Unë nuk flas me të” tha presidenti amerikan.

Por autori Michael Wolff tha se ai qëndron pas gjithçkaje të shkruar në libër.

Në një intervistë televizive me rrjetin NBC, ai tha: “Besueshmëria ime po vihet në pikëpyetje nga një njeri që ka më pak besueshmëri sesa ndoshta gjithë ata që kanë ecur ndonjëherë në Tokë deri tani”.

Autori Wolff tha se stafi i Shtëpisë së Bardhë e përshkruan presidentin si “një fëmijë”, që do të thotë se “ka nevojë t’i plotësohen menjëherë kërkesat”.

“Zjarr dhe Furi” përqëndrohet në rrëmujën e Shtëpisë së Bardhë, duke ngritur pyetje rreth shëndetit mendor të presidentit Trump. Ekziston shqetësimi se libri gjithashtu po e largon vëmendjen e mediave nga lajme të tjera të rëndësishme.

“Një seri krizash ndërkombëtare nga Venezuela në Ukrainë deri në Kongo, Koreja e Veriut, Deti i Kinës Jugore, një numër i madh çështjesh ndërkombëtare që janë injoruar në masë të madhe në mbulimin mediatik, sepse ekziston kjo atmosferë e ngjashme me një cirk në Uashington” thotë hulumtuesi Dan Mahafee, i Qendrës për Studimin e Presidencës dhe Kongresit.

Vëzhguesit vënë në dukje se për shkak të bujës së librit “Zjarr dhe Furi”, u la në hije vendimi i së enjtes i presidentit Trump për të lejuar shpime për naftën në pothuajse të gjitha ujërat bregdetare të Shteteve të Bashkuara, duke hequr ndalimin e vendosur nga presidenti Barack Obama pranë fundit të mandatit të tij.

Presidenti Donald Trump po takohet me ligjvënësit republikanë dhe anëtarët e kabinetit të tij në shtëpinë presidenciale të pushimit, Camp David për të vendosur prioritetet legjislative të administratës për vitin 2018 dhe për të hartuar një strategji për zgjedhjet afatmesme në nëntor.

“Ne do të shkojmë në kampin David me shumë senatorë të shquar republikanë, dhe ne po e bëjmë përsëri Amerikën, një vend të madh”, tha presidenti kur u largua nga Shtëpia e Bardhë të premten.

Zëvendëspresidenti Mike Pence dhe disa sekretarë të kabinetit do të marrin pjesë gjithashtu në takim.

Presidenti po kërkon më shumë sukses legjislativ pas miratimit të fundit të projekt-ligjit për shkurtimin e taksave.

Temat në listën e prioriteteve legjislative do të përfshijnë buxhetin, infrastrukturën, imigracionin, reformën e mirëqenies dhe zgjedhjet afatmesme.

Ligjbërësit, megjithatë, duhet të punojnë shpejt për të miratuar një plan financimi deri më 19 janar për të shmangur mbylljen e qeverisë.

E ardhmja e qindra mijëra të rinjve që kanë hyrë ilegalisht në Shtetet e Bashkuara si fëmijë është gjithashtu përpara Kongresit. A do t’u lejohet të qëndrojnë në vend apo do të dëbohen në një vend ku shumë prej tyre nuk kanë lidhje?

Presidenti Trump ka propozuar që të ashtuquajturit Dreamers të qëndrojnë në vend nëse ai merr fonde për ndërtimin e një muri mes Shteteve të Bashkuara dhe Meksikës, diçka që ai e premtoi gjatë fushatës së tij presidenciale. Demokratët ka të ngjarë t’u bëjnë republikanëve rezistencë në këtë lëvizje.

Republikanët gjithashtu kanë qenë të etur për të ulur programet e përfitimeve sociale.

Përparësitë e republikanëve mund të ndalen megjithatë, nëse demokratët janë të suksesshëm gjatë zgjedhjeve afatmesme për në Kongres.

Trump po përballet me kritika në rritje në lidhje me stilin e tij presidencial. Ai e fillon vitin e ri me publikimin e një libri bombë, “Zjarr dhe Furi” nga Michael Wolff, i cili e përshkruan presidentin si fëmijë dhe që ka nevojë për ndihmë psikiatrike.

Mbetet për t’u parë se si libri dhe shqetësimet e tjera për statusin mendor të presidentit Trump do të ndikojnë në sondazhet e ardhshme.

Të gjithë 435 anëtarët e Dhomës së Përfaqësuesve dhe një e treta e 100 anëtarëve të Senatit do të garojnë në zgjedhjet e mesmandatit në vitin 2018.

Presidenti turk Rexhep Tajip Erdogan është një ndër dy zyrtarët e lartë turq që kanë bërë ose po bëjnë vizita në vendet e Bashkimit Europian dhe që analistët thonë se janë një ofensivë diplomatike për rivendosjen e marrëdhënieve me bllokun prej 28-anëtarësh. BE-ja është partnerja numër një e Turqisë për importet dhe eksportet e saj.

Marrëdhëniet mes Ankarasë dhe Bashkimit Evropian megjithatë, janë të tensionuara, pjesërisht për çështjen e të drejtave të njeriut në Turqi. Një shkak tjetër ka qenë referendumi i debatueshëm vitin e kaluar për të zgjeruar kompetencat e zotit Erdogan si president. Arsye ka qenë gjithashtu emigracioni i refugjatëve dhe kërkesat e Turqisë për udhëtimin pa viza të qytetarëve të saj kudo në BE.

Presidenti Erdogan u takua të premten në Francë me homologun e tij Emmanuel Macron për bisedime mbi Sirinë dhe tregtinë dhe nënshkroi me të një seri kontratash. Dy presidentët ishin gjithashtu të pranishëm në nënshkrimin e një marrëveshjeje me të cilën kompania Turkish Airlines do të blejë 25 avionë nga firma Airbus.

Në një intervistë të këtyre ditëve, Presidenti Macron konfirmoi se ai flet rregullisht me zotin Erdogan, biseda që analistët thonë se vlerësohen nga presidenti turk.

“Hapat që kemi ndërmarrë deri tani me zotin Macron janë të gjitha në drejtimin e duhur dhe kam shumë shpresa te zoti Macron,” u tha gazetarëve zoti Erdogan përpara se të nisej për në Paris.

Turqia po kërkon të hyjë Bashkimin Evropian, por nuk mund ta bëjë këtë nëse nuk plotësohen kritere të caktuara për anëtarësimin. Përpara vizitës në Paris, zëdhënësi i presidentit turk, Ibrahim Kalin, duke folur për kanalin e lajmeve Francë 24, i dërgoi një mesazh BE-së. “Ne si Turqi, – tha ai, – e shohim anëtarësimin në BE si qëllim strategjik; megjithatë, vitet e fundit, nuk janë bërë shumë përparime në këtë drejtim për shkak të disa arsyeve. Ne duam t’i kapërcejmë këto probleme”.

Masat e forta të ndërmarra nga Ankaraja pas grushtit të dështuar të shtetit në vitin 2016 kanë rezultuar në dhjetëra mijëra arrestime dhe në burgosjen e dhjetëra njerëzve, duke përfshirë gazetarë. Masat kërcënojnë keqësimin e mëtejshëm të marrëdhënieve të trazuara me BE-në.

Përpara vizitës së zotit Erdoganit, Presidenti Macron bëri një koment që padyshim drejtohej edhe ndaj Turqisë. “Liria e shtypit po dëmtohet jo vetëm në diktatura, por edhe në disa shtete demokratike evropiane,” u tha ai gazetarëve.

Shqetësimet për të drejtat e njeriut do të jenë një pengesë edhe më e madhe në përpjekjet e Ankarasë për të zbutur marrëdhëniet me vendin tjetër të fuqishëm të Evropës, Gjermaninë. Marrëdhëniet gjermano-turke pothuajse u shkatërruan vitin e kaluar lidhur me akuzat e Ankarasë se Berlini strehonte qindra njerëz të lidhur me përpjekjen e grushtit të shtetit në 2016. Ndërkohë, Gjermania e ka krahasuar me pengmarrje arrestimin dhe burgimin e një numri të qytetarëve të saj, duke përfshirë dy gazetarë dhe një aktivist për të drejtat e njeriut.

Takimi i Ministrit të Jashtëm turk Mevlut Cavusoglu me homologun e tij gjerman, Sigmar Gabriel të shtunën në Goslar të Gjermanisë bëhet pikërisht për të diskutuar këto çështje.

“Të dyja palët kanë interes për një fillim të ri në marrëdhëniet dypalëshe, ndërsa jetojmë në një kohë të mbushur me sfida”, tha Cavusoglu në një artikull të shkruar për një gazetë gjermane. “Nuk është koha për diplomacinë e konfrontimit,” tha ai.

Pas një takimi të paparashikuar midis dy ministrave të jashtëm në nëntor në Antalia, të dyja palët kanë filluar të ndërmarrin hapat e parë për të zbutur tensionet. Tre gjermanë të paraburgosur janë liruar. Deniz Yucel, një gazetar për gjermanes Die Welt, mbetet i burgosur, ndonëse kushtet e tij janë përmirësuar, duke e hequr nga qelia e izolimit.

Pavarësisht hapave të tillë, ekspertët paralajmërojnë se Ankara përballet me një proces të zgjatur në përmirësimin e marrëdhënieve me BE-në.

Megjithatë, duke pasur parasysh izolimin e saj në rritje, Turqia mund të vendosë të bëjë më shumë gjeste në drejtim të Evropës. Turqia përballet me një situatë të ngjashme me aleatin tjetër të saj perëndimor, Shtetet e Bashkuara. Deri tani, Ankaraja i ka hedhur sytë nga Moska, duke dërguar mesazhin se ajo mund të bëjë edhe pa aleatët e saj tradicionalë. Por rritja e varësisë nga Moska po vjen me një kosto në rritje.

“Rusia është motori kryesor ndërsa Turqia karroca e politikës ruse”, thotë profesori i marrëdhënieve ndërkombëtare Husein Bagçi i Universitetit Teknik të Lindjes së Mesme në Ankara. “Për fat të keq në këtë moment, Turqia po bën dhe po përsërit atë që thotë Rusia. Pra, Turqia është futur së tepërmi nën ndikimin e Rusisë, gjë që nuk kishte ndodhur kurrë në 25 vitet e fundit”.

Edhe pse Ankaraja ka gjetur një farë emëruesi të përbashkët me Moskën në rajon, dy vendet janë rivalë historikë siç është rasti edhe me Iranin, një vend tjetër me të cilin Turqia ka filluar të ngrohë marrëdhëniet.

Vëzhguesit thonë se Ankaraja tani ndoshta po e kupton situatën e pasigurt me të cilën po përballet si dhe nevojën për një qasje më të balancuar diplomatike.