Kur Donald Trump shpalli kandidaturën për president, një këshilltar i tij, George Papadopoulos, u përpoq të mundësonte një takim mes zyrtarëve rusë dhe fushatës Trump. Në një intervistë në atë kohë, Donald Trump e përshkroi Papadopoulos si “një këshilltar për energjetikën dhe naftën, djalë i shkëlqyer”.

Takimi mes fushatës Trump dhe zyrtarëve rusë nuk u realizua. Por të hënën, Prokurori Special Robert Mueller bëri të ditur se Papadopoulos kishte pranuar në fillim të tetorit fajësinë lidhur me akuzat se u kishte dhënë agjentëve federalë informata të rreme. Bëhet fjalë për përgjigjet e tij ndaj pyetjeve të hetuesve të FBI-së lidhur me kohën dhe rëndësinë e kontakteve të tij me “një profesore jashtë SHBA”. Ai e pranon se ishte në dijeni të kontakteve të shumta që kishte profesorja me zyrtarë rusë, dhe se ajo dinte “të palara” lidhur me rivalen e zotit Trump, Hillary Clinton dhe për kontakte me një “grua ruse” që mendohet se ishte mbesa e Presidentit Vladimir Putin.

Sipas dokumentit të fajësisë, Papadopoulos u kishte thënë zyrtarëve të FBI-së në një intervistë më 27 janar se kishte pasur kontakte me profesoren para se të përfshihej në fushatën e zotit Trump dhe se kontaktet me gruan ruse ishin të rastësishme dhe pa shumë afrimitet, por sipas prokurorëve këto deklarata ishin gënjeshtra.

Sipas aktpadisë, Papadopoulos kishte bërë një numër deklaratash të rreme ose kishte fshehur fakte lidhur me të njohurit e tij rusë si dhe një person që njihte në Ministrinë e Jashtme ruse.

Pasi pranoi fajësinë, Papadopoulos mund të dënohet me deri në pesë vjet burg dhe një gjobë prej 250 mijë dollarësh, por ndëshkimi mund të ulet ndjeshëm nëse dëshmon kundër kontakteve me zyrtarët e fushatës Trump.

Ish-menaxheri i fushatës zgjedhore të Donald Trumpit, Paul Manafort dhe një ish-ortak i tij, Rick Gates, iu dorëzuan autoriteteve federale sot. Ata do të dalin së shpejti para gjykatës ku do t’u lexohen akuzat nga prokurorët federalë.

Manafort dhe Gates janë të akuzuarit e parë për vepra penale, nga prokurori special Robert Mueller i cili po heton se çfarë kontaktesh kanë pasur agjentë rusë me shtetas amerikanë dhe veçanërisht punonjës të fushatës Trump dhe si kanë ndikuar këto kontakte tek procesi zgjedhor në Shtetet e Bashkuara në 2016.

Sipas agjencisë së lajmeve Associated Press, këto informata u bënë të ditura nga një person i afërt me hetimet, i cili foli në kushte anonimiteti.

Në aktpadinë e Departamentit të Drejtësisë (lexoni aktpadinë), Manafort dhe Gates akuzohen se nuk kanë respektuar ligjin për agjentët e qeverive të huaja, duke mos deklaruar punën e tyre në interes të qeverisë së Ukrainës. Paul Manafort akuzohet edhe për pastrim parash dhe afere korruptive për të shmangur taksat. Ende nuk kanë dalë akuza konkrete për aktivitet që mund të ketë ndikuar tek procesi zgjedhor.

Që nga fillimet e hetimeve, ish-menaxheri i fushatës së Donald Trumpit, Paul Manafort ishte ndër personat më të përfolur.

“Nëse janë ngritur akuza kundër Paul Manafortit, dhe sipas fjalëve, ai u ka thënë të tjerëve se mund të jetë ndër të akuzuarit, mund të arrijmë të marrim përgjigje për disa pyetje shumë esenciale: qeveria ruse, përmes ndërmjetësve të saj, po kontaktonte fushatën Trump, Paul Manafortin dhe të tjerë; po ofronte informata mbi Hillary Clintonin që mendonte se do të ndihmonin fushatën e kandidatit Trump. Pyetja është: çfarë informatash u përcollën, nga kush dhe kujt iu dorëzuan gjatë këtij procesi,” pyet ligjvënësi demokrat Adam Schiff.

Dje, presidenti postoi një koment në Twitter ku sulmonte procesin hetimor si “një sajesë” dhe “gjueti partiake shtrigash”. Presidenti po ashtu u ndal tek njoftimet e fundit nga media se demokratët kishin mbështetur me fonde një hetim të një ish-agjenti britanik që kishte dalë me akuza bombastike, por të pavërtetuara kundër zotit Trump.

“Qëndrimi ynë nuk ka ndryshuar që nga dita e parë. Tani po mësojmë se nëse ka pasur akorde të fshehta me Rusinë, ato i ka bërë Komiteti Demokratik Kombëtar dhe Klintonët, por jo fushata republikane,” tha zëdhënësja e Shtëpisë së Bardhë, Sarah Huckabee Sanders.

Hetimet e Kongresit kanë rezultuar në procese publike ku kanë dalë hollësi mbi fushata të orkestruara nga rusët për të përhapur disinformim, të cilat kanë pasur në objektiv fushatën e kandidates demokrate, Hillary Clinton.

Nesër, shefat ekzekutivë të platformave dixhitale dëshmojnë në Kongres mbi hapat që po marrin për të mbrojtur median sociale nga ndërhyrjet tendencioze nga agjentë të huaj gjatë fushatave politike.

Uashingtoni po përgatitet për akuzat e para penale lidhur me ndërhyrjen e Rusisë në zgjedhjet presidenciale të vitit 2016. Presidenti Donald Trump vazhdoi të pretendojë sot se hetimet janë një “Gjueti Shtrigash”.

Sipas disa mediave kryesore amerikane, një juri federale miratoi të premten akuzat për hetimin që drejtohet nga Prokurori i Posaçëm Robert Mueller. Akuzat mund të bëhen të ditura të hënën se një i dyshuar mund të arrestohet.

Nuk është ende e njohur se kush është në shënjestër apo për natyrën e akuzave. Ato janë të mbyllura me urdhër të një gjykatësi federal.

Por akuzat mund të shënojnë një arritje të rëndësishme në periudhën nëntë-mujore të presidentit Trump në Shtëpinë e Bardhë. Ai shpesh i ka hedhur poshtë hetimet, atë të prokurorit Mueller dhe tre të kryera nga kongresi për lidhje të mundshme mes fushatës së tij dhe Rusisë duke argumentuar se ato janë përpjekje nga demokratët për të shpjeguar humbjen e sfidueses së tij, ish sekretares së Shtetit Hillary Clinton.

Një një koment në Twitter javën e kaluar, Trump tha, “Është pranuar tashmë gjërësisht se pas disa muajsh hetimesh të kushtueshme, nuk ka patur bashkëpunim mes Rusisë dhe Trumpit. Bashkëpunimi ishte me Hillary Clinton.

Të dielën ai tha se nuk kishte “pare asnjëherë kaq shumë zemërim dhe bashkim mes republikanëve për mungesën e një hetimi mbi Clintonin” për financimin e fushatës së saj për kërkimet mbi lidhjet mes Trumpit dhe Rusisë, që u fillua nga një agjenci konservatore lajmesh, Washington Free Beacon, dhe më pas u vazhdua nga fushata Clinton dhe Komiteti Kombëtar Demokrat me një shumë që presidenti sugjeroi të kishte kushtuar për 12 milionë dollarë. Një ish oficer britanik i zbulimit u punësua për hetimin dhe realizoi atë që presidentit Trump thotë se ishte një “dosje e rreme” rreth lidhjeve mes biznesit të tij dhe Rusisë, si dhe akuza të pabaza për lidhjen e tij me prostitute ruse.

Presidenti Trump tha se republikanët janë gjithashtu të zemëruar për mungesën e hetimeve për një marrëveshje për uranium në vitin 2013 në të cilën Rusia mori kontrollin e 20 përqind të prodhimit amerikan dhe lidhjet e supozuara për financimin e fondacionit bamirës të zotit Klintonit, përfshirjen e ish drejtorit të FBI-së James Comey në hetimin e trajtimit të materialeve të klasifikuar në emailet në serverin e saj privat kur zonja Clinton ishte diplomatja më e lartë e vendit nga viti 2009 në 2013 “, dhe shumë më tepër.

“Në vend të kësaj ata kërkojnë për bashkëpunim të fshehtë Trump/Rusia që nuk ekziston”, tha zoti Trump. “Demokratët po përdorin këtë gjueti shtrigash për politikë të keqe, por republikanët po kundër-luftojnë si asnjëherë më parë”.

Në fillimin e vitit 2017-të, komuniteti i agjensive amerikane të zbulimit arriti në konkluzionin se Presidenti rus Vladimir Putin drejtoi personalisht një fushatë për të dëmtuar demokracinë amerikane dhe për të ndihmuar në fitoren e zgjedhjeve nga zoti Trump. Por, asnjë nga hetimet disa mujore nuk ka përfunduar ende dhe nuk janë nxjerrë konkluzione, në kundërshtim nga pretendimet e Presidentit Trump.

Përveç ekzaminimit të ndërhyrjes së Rusisë, zoti Mueller po heton gjithashtu nëse Presidenti Trump pengoi drejtësinë duke shkarkuar zotin Comey, i cili drejtonte hetimet e agjensisë për Rusinë, përpara se të caktohej zoti Mueller, i cili gjithashtu ka qenë më parë drejtor i FBI-së.

Presidenti Trump tha se po mendonte për “çështjen e Rusisë”, kur vendosi të shkarkonte zotin Comey në muajin maj të vitit të kaluar, dhe një ditë më pas iu mburr zyrtarëve rusë në një takim në Shtëpinë e Bardhë, se duke larguar zotin Comey, pati hequr “një presion të madh” ndaj presidencës së tij. Ai e përshkroi zotin Comey si një “i çmendur, krejtësisht i lajthitur”.

Por, pak ditë më pas, Zëvendës Prokurori i Përgjithshëm Rod Rosenstein emëroi zotin Mueller në krye të hetimeve, pasi Prokurori i Përgjithshëm Jeff Sessions ishte vetëdorëhequr nga menaxhimi i hetimit të Rusisë, duke e lënë të zhgënjyer Presidentin Trump.

Ekspertët ligjorë thonë se akuzat fillestare mund të ngrihen ndaj një personazhi dytësor të çështjes, si një strategji e zakonshme e prokurorëve që ndërtojnë dosjen duke ia filluar nga zyrtarët e nivelit të ulët, për t’u fokusuar më pas tek emra më të rëndësishëm.

Kanali televiziv CNN njoftoi se juristë që punojnë si pjesë e ekipit Mueller u panë ditën e premte të hynin në një sallë gjykate federale në Uashington, ku mblidhet juria e madhe federale për të dëgjuar dëshmitarët.

Zoti Mueller mendohet se po shqyrton veprimtarinë e dy zyrtarëve kryesorë të fushatës elektorale Trump: ish-këshilltarin e sigurisë kombëtare Michael Flynn, i cili u shkarkua nga zoti Trump në më pak se një muaj pas marrjes së detyrës, pasi gënjeu Zëvendës Presidentin Mike Pence dhe zyrtarët e tjerë, për konktatet e mbajtura me ambasadorin e Rusisë në Uashington; si dhe, Paul Manafort, i cili ishte për një periudhë të shkurtër vitin e kaluar menaxher i fushatës Trump, ndërkohë që kishte interesa të mëdha lobizmi në Ukrainë, si dhe lidhje me Rusinë.

Disa republikanë kanë filluar të bëjnë thirrje për përfundimin e hetimeve, por një ligjvënës kryesor republikan, Trey Gowdy, i tha sot kanalit Fox News se ai i inkurajon anëtarët e partisë së tij që t’i japin shansin zotit Mueller të bëjë punën e tij dhe se ai nuk ka bërë diçka që mund të dëmtojë besimin tek ai, si dhe se zoti Mueller është plotësisht apolitik. Ligjvënësi Gowdy u shpreh se ai është kundër prerjes së fondeve për hetimet e zotit Mueller.

Ligjvënësi Gowdy, si kryetar i komisionit të mbikqyrjes së qeverisë në Dhomën e Përfaqësuesve, filloi javën e kaluar një hetim për menaxhimin e procesit nga zoti Comey dhe FBI-ja, të përdorimit të një serveri email-i privat nga zonja Clinton.

Një juri e lartë federale në Shtetet e Bashkuara ka miratuar akuzat e para që kanë të bëjnë me hetimin për ndërhyrjen ruse në zgjedhjet amerikane, hetim që drejtohet nga prokurori i posaçëm Robert Mueller.

Media amerikane njofton se paraqitja e akuzave u bë të premten në mbrëmje.

Veprimi i jurisë federale u njoftua fillimisht nga rrjeti CNN i cili citoi burime të kenë thënë se të akuzuarit mund të arrestohen të hënën. Akuzat e sakta janë ende të paqarta.

Një zëdhënës i prokurorit Mueller nuk pranoi të komentonte.

Rrjeti CNN tha se avokatët që punojnë me ekipin e zotit Mueller u pane të hynin në një gjykatë federale në Uashington DC të premten ku juria takohet për të dëgjuar dëshmitë.

Mueller ka mbajtur të fshehtë deri tani informacionet për hetimin.

Ai u emërua si prokuror i posaçëm në maj, pak pas pushimit nga puna të drejtorit të atëhershëm të FBI-së James Comey, për të hetuar pretendimet se fushata Trump kishte bashkëpunuar në mënyrë të fshehtë me Rusinë për të fituar zgjedhjet. Ai po ekzaminon gjithashtu mundësinë që presidenti të jetë përpjekur të ndërhyjë në hetimin për Rusinë.

Shumica e dokumentave dhe të dhënave që lidhen me vrasjen e Presidentit amerikan John F. Kennedy, u vunë në dispozicion të publikut nga Arkivat Kombëtare.

Megjithatë, Presidenti Donald Trump ka urdhëruar që qindra dosje të mbeten sekrete, të paktën përkohësisht, për shkak të shqetësimeve të sigurisë.

Interesi më i madh nga ana akademike për dokumentat e vrasjes përqendrohet tek dosjet që kanë të bëjnë me një vizitë të vrasësit të Presidentit Kennedy, Lee Harvey Oswald, në Meksikë, dy muaj para vizitës së presidentit në Dallas më 22 nëntor, 1963.

Debatet dhe teoritë e konspiracionit filluan të përhapen brenda disa ditësh pas vrasjes.

“Dua të di me saktësi se çfarë ndodhi. Nëse ishte vetëm një person që e vrau, e kuptoj që kjo do ta qartësonte çështjen përgjithmonë, por nëse jo atëherë kjo do të tregonte se çfarë janë në gjendje të bëjnë forcat më të mëdha dhe kjo më frikëson disi. Sidoqoftë, do të doja të dija se çfarë ndodhi”, thotë Chuck Demus.

Një hetim prej 10 muajsh për vrasjen e Presidentit Kennedy nga një komision i drejtuar nga kryetari i Gjykatës së Lartë, Earl Warren arriti në përfundimin se Oswald, personi i vetëm i arrestuar për vrasjen, kishte vepruar i vetëm dhe se pronari i klubit të natës, Jack Ruby veproi i vetëm në vrasjen e Oswaldit, ndërsa ai ishte I ndaluar nga policia dy ditë më pas.

Një anketë e vitit 2013 e organizatës Gallup, tregonte se një shumicë e konsiderueshme e amerikanëve besojnë se kishte edhe persona të tjerë që luajtën rol në vrasje, përveç Oswaldit.

Një valë e fundit dokumentash të lidhura me vrasjen e Presidentit John F. Kennedy në vitin 1963, pritet të bëhen publike sot, duke hedhur ndoshta më shumë dritë mbi një ngjarje tragjike që ka magjepsur publikun dhe ekspertët e presidencës Kennedy për dekada me radhë. Korrespondenti i Zërit të Amerikës, Jim Malone njofton nga Uashingtoni.

Presidenti Kennedy u vra ndërsa limuzina e tij përshkonte Dallasin në Teksas, më 22 nëntor 1963. Ai ishte me gruan e tij, Jackie.

Agjenti i Shërbimit Sekret, Clint Hill shkoi me shpejtësi tek limuzina, disa sekonda pasi presidenti u qëllua.

“Ma mori mendja që plaga ishte vdekjeprurëse, por nuk isha plotësisht i sigurt. Por e vetmja gjë që tha zonja Kennedy ishte “Oh Jack, oh Jack, çfarë bënë kështu?’ dhe pastaj shtoi “Jack, të dua”, kujton ai.

Lee Harvey Oswald, që kishte qenë i arratisur në Bashkimin Sovjetik, u akuzua për vrasjen e Presidentit Kennedy.

I pyetur nëse kishte qëlluar presidentin, ai tha jo.

Oswald u vra dy ditë më pas nga Jack Ruby, pronar i një klubi nate, duke shtuar frikën se bëhej fjalë për një komplot.

Presidenti Donald Trump njoftoi përmes një mesazhi në Twitter, se do të lejonte publikimin e pjesës së fundit të dosjeve të Presidentit Kennedy, pasi ato të rishikoheshin.

Publikimi i plotë i dokumentave, mund të nxjerrë informacione të reja për vrasjen e presidentit, thotë eksperti Larry Sabato.

“Do të jetë një moment i rëndësishëm, sepse më në fund, pas afro 54 vjetësh, studiuesit do të kenë të gjithë informacionin që ka pasur qeveria dhe do të jenë në gjendje të bëjnë vlerësime të reja për vrasjen e Kennedy-t.”

Me interes të veçantë për profesorin Sabato dhe ekspertë të tjerë, është se çfarë dinin agjencitë qeveritare dhe me kë i ndanë informacionet lidhur me vizitat e Oswaldit në ambasadat sovjetike dhe kubaneze në Mexico City para vrasjes.

“Dua të mësoj më shumë se çfarë dinin që më parë dhe pse, nëse mund ta marrim vesh nga dokumentat, nuk kishin komunikuar më mirë me njëri-tjetrin”, thotë ai.

Raporti zyrtar i Komisionit Warren, arriti në përfundimin se Oswald kishte vepruar i vetëm, por publiku ka pasur dyshime për një kohë të gjatë, thotë profesor Sabato.

“Numri i amerikanëve që besojnë se vrasja ishte komplot ka variuar nga 60 deri në 75 për qind, prandaj është shumë e qartë se shumë amerikanë nuk besojnë se Lee Harvey Oswald veproi i vetëm.”

Pavarësisht nga mosbesimi, nuk ka pasur prova përfundimtare që të bëjnë të mendosh se ka pasur persona të tjerë të përfshirë në vrasje, përveç Oswaldit.

Zëvendës ndihmës sekretari amerikan i shtetit, Hoyt Brian Yee, tha në Beograd se vendet që duan të anëtarësohen në Bashkimin Evropian duhet ta dëshmojnë qartazi një gjë të tillë.

Duke folur në një forum mbi ekonominë në Serbi, ai komentoi politikën zyrtare serbe që angazhohet për anëtarësim në Bashkimin Evropian, por edhe ruajtjen e lidhjeve me Moskën, aleaten e Serbisë.

“Nuk mund të qëndroni ulur në dy karrige, posaçërisht nëse ato janë larg njëra tjetrës”, tha ai, duke nënvizuar se kjo nuk është normë në bashkësinë ndërkombëtare.

Ai tha se synim i Shteteve të Bashkuara është që Serbia të jetë e përparuar, ë qëndrueshme, e sigurt dhe e integruar në Bashkimin Evropian, prandaj ajo duhet të punojë me nismat që e afrojnë më BE-në.

“U propozoj partnerëve tanë në Serbi që të pyesin Rusinë se çfarë bën ajo që ta ndihmojë në rrugën dejtë BE-së. Nuk besoj se dhënia e imunitetit diplomatik për personelin e qendrës (humanitare ruse) do të ndihmonte Serbinë që të përmbushë synimin e saj për anëtarësim në Bashkimin Evropian”, tha diplomati amerikan.

Shtetet e Bashkuara kanë shprehur shqetësim për një qendër të emergjencave që Rusia menaxhon në qytetin e Nishit në Serbinë jugore. Disa grupe perëndimore dhe analistë ushtarakë e shohin si një bazë ushtarake të kamufluar që Kremlini e ka ngritur për të mbikëqyrur interesat amerikane në Ballkan.

Qendra ruse që u hap fillimisht në vitin 2012, gjendet relativisht pranë forcës paqeruajtëse prej 4 mijë trupash në Kosovë. Pjesë e forcave ndërkombëtare në Kosovë janë edhe 600 ushtarë amerikanë.

Moska kërkon që personelit të saj t’i jepet imunitet diplomatik, ndërsa mohon çfarëdo veprimtarie të saj përveç trajtimit të emergjencave.

Moska vazhdon të mbështesë pretendimet serbe mbi Kosovën dhe refuzon sikurse edhe Serbia të njohë pavarësinë e saj të shpallur në shkurt të vitit 2008. Ajo i dorëzoi javën që lamë pas gjashtë avionë ushtarakë MiG-29 Serbisë, ndërsa pritet që të dërgojë në Beograd edhe 30 tanke T-72 dhe 30 automjete të blinduara.

Megjithatë Beogradi është përfshirë në një proces bisedimesh për normalizimin e marrëdhënieve me Kosovën në shkëmbim të afrimit më strukturat evropiane. Zoti Hoyt Yee tha se Shtetet e Bashkuara janë të përfshira që nga fillimi në bisedimet ndërmjet Kosovës dhe Serbisë që drejtohen nga Bashkimi Evropian.

Pjesëtarë të shoqërisë civile, por edhe diplomatë perëndimorë janë shprehur të shqetësuar se Serbia po zhvillon një proces të ngadalshëm për ripajtimin në rajon, që është një prej kritereve për integrimet evropiane.

Javën e kaluar ministri serb i Mbrojtjes, Aleksandër Vulin, tha se gjenerali i pensionuar serb, Vladimir Lazareviç, i dënuar nga Gjykata e Hagës me 14 vjet heqje lirie për krime lufte në Kosovë mund të jap mësim në Akademinë Ushtarake në Serbi.

Zëvendës ndihmës sekretari amerikan i shtetit, Hoyt Brian Yee, tha se ideja që “dikush i cili është dënuar për krime lufte mund të jetë ligjërues në akademinë ushtarake, nuk është shenjë e mirë e orientimit të qeverisë që të dënohen krimet e luftës. E kanë vuajtur apo jo dënimin, ata janë përgjegjës”, u tha ai gazetarëve në Beograd.

Ai tha se Shtetet e Bashkuara duan që vendet e Ballkanit perëndimorë të jenë të qëndrueshme. “Ende ka rrezik nga konfliktet kudo ku ka probleme të pazgjidhura. Megjithatë, rrjedha e përgjithshme sa i përket paqes e qëndrueshmërisë është pozitive”.

Shtetet e Bashkuara thonë se do të tërhiqen nga UNESCO, duke e akuzuar organizatën për prirje kundër Izraelit.

Zëdhënësja e Departamentit të Shtetit Heather Nauert tha përmes një deklarate se “SHBA i kanë komunikuar Sekretares së Përgjithshme të organizatës, dëshirën për të mbetur të angazhuar me Organizatën e Arsimit,, Shkencës dhe Kulturës të OKB-së, në rolin e vëzhguesit, pa të drejtat kontribuese të një vendi anëtar.”

Sipas zëdhënëses së Departamentit të Shtetit, tërheqja e Shteteve të Bashkuara nga UNESCO do të ndodhë më 31 dhjetor të këtij viti.

Zyrtarët e organizatës shprehën keqardhje lidhur me vendimin amerikan.

Shtetet e Bashkuara anuluan një kontribut të konsiderueshëm buxhetor tek UNESCO në vitin 2011, si protestë për anëtarësimin me të drejta të plota të palestinezëve në organiztaën kulturore të Kombeve të Bashkuara.

Zjarrfikësit vazhduan të luftojnë gjatë natës ndërmjet të mërkurës dhe të enjtes me zjarret e që lanë pas vetes 23 të vdekur në Kaliforninë Veriore.

Më shumë se 285 veta llogariten të zhdukur në kontenë Sonoma dhe është e paqartë nëse ata kanë pësuar nga zjarret apo janë larguar pa u regjistruar nga autoritetet.

Ndonëse ende nuk dihen shkaqet e zjarrit, ka mendime se ato mund të jenë shkaktuar nga linjat e energjisë elektrike që ishin rrëzuar nga erërat e forta.

Rreth 25 mijë veta mbeten të evakuuar, ndërsa autoritetet thanë se të paktën 3 mijë e 500 shtëpi e biznese janë shkatërruar.

Zjarret përfshinë rreth 69 mijë hektarë vreshtash të njohura botërisht për prodhimin e verës dhe një pjesë e tyre janë shkatërruar tërësisht.

Presidenti Donald Trump ka miratuar fonde federale për të ndihmuar zonat e prekura në Kaliforni.

Ish gruaja e Presidentit Donald Trump, Ivana, ka shkruar një libër, i cili botohet sot, por ajo që ka tërhequr vëmendje këto ditë, janë komentet që ajo bëri gjatë një interviste para botimit të librit.

Në një intervistë që dha dje në televizionin ABC, Ivana bëri shaka, duke thënë se ajo është “Zonja e Parë”, ngaqë ka qenë bashkëshortja e parë e Donald Trumpit.

Melania Trump, Zonja e Parë e vërtetë, duket se nuk u zbavit nga kjo shaka e Ivanës. Zëdhënësja e saj tha se komenti i ish bashkëshortes së Presidentit kishte për qëllim “të tërhiqte vëmendjen dhe ishte një zhurmë që i shërbente asaj”.

Titulli i librit të Ivana Trumpit është “Raising Trump” dhe ka dalë sot në shitje. Në libër ajo i hedh një vështrim jetës së saj dhe rritjes së tre fëmijëve që ka me Donald Trumpin, Donald Jr., Eric dhe Ivanka.