VOAL

VOAL

Trumpi feston shfajësimin nga Senati

Presidenti amerikan, Donald Trump, që përballet me fushatë për rizgjedhje dhe ndoshta edhe me hetime tjera në të ardhmen, ka festuar shfajësimin nga akuzat për abuzim të pushtetit dhe pengim të punës së Kongresit.

Pasi ka hyrë në sallë ku është pritur me duartrokitje të mëdha nga ligjvënësit republikanë, zyrtarë të administratës dhe figura të mediave konservatore në Shtëpinë e Bardhë, Trump ka thënë se demokratët kanë nxitur përpjekje “të korruptuara” për të dëmtuar presidencën e tij.

“Unë kam bërë gjëra të këqija në jetën time, e pranoj… mirëpo ky është rezultati përfundimtar”, ka thënë Trump, teksa ka mbajtur një kopje të gazetës Washington Post me titull kryesor “Trump u shfajësua”.

Senati i kontrolluar nga republikanët, ka votuar të mërkurën për ta shfajësuar Trumpin, në procesin e nisur nga demokratët në Dhomën e Përfaqësuesve.

Kjo ka qenë vetëm hera e tretë në histori që një president amerikan është përballur me një proces të tillë.

Udhëheqësja e Dhomës së Përfaqësuesve, Nancy Pelosi ka thënë se deklaratat e Trumpit kanë qenë “plotësisht të papërshtatshme, sidomos gjatë Lutjeve të Mëngjesit”.

Përgjatë kësaj ceremonie, Trump ka akuzuar “disa njerëz shumë të pasinqertë dhe të korruptuar”, që kanë kërkuar ta largojnë atë përmes procesit që e ka konsideruar “mashtrim”.

Në gjyqin kundër tij, 52 ligjvënës kanë votuar për ta liruar atë nga akuza për abuzim të pushtetit, derisa 48 kanë thënë se ai është fajtor.

Senatori, Mitt Romney ka qenë republikani i vetëm që ka votuar kundër Trumpit.

Pas votimit, Trump ka akuzuar Romneyn se është “aset i fshehtë” i Partisë Demokratike, që vetëm pretendon se është republikan.

Senatori Mitt Romney.

Senatori Mitt Romney.

Në votimin për akuzën e dytë, për pengim të punës së Kongresit, 53 ligjvënës kanë votuar për të shpallur presidentin të pafajshëm derisa 47 e kanë konsideruar atë fajtor.

Akuzat janë ngritur pas dyshimeve se presidenti i 45-të i SHBA-së ka kushtëzuar ndihmën ushtarake në vlerë të miliona dollarëve për Ukrainën, në këmbim të nisjes së hetimeve për rivalin e tij politik, demokratin, Joe Biden.

Demokratët kanë akuzuar Trumpin se përveç ndihmës ushtarake, ai ka kushtëzuar me hetime edhe një vizitë në Shtëpinë e Bardhë të homologut të tij ukrainas, Volodymyr Zelenskiy, derisa Ukraina të bënte publik lajmin për nisje të hetimeve.

Trump nga fillimi ka mohuar çdo keqbërje në marrëveshjet e tij me Ukrainën.

Përgatiti: Krenare Cubolli

FBI: Kina rreziku më i madh

FBI-ja shpalli të enjten Kinën si kërcënimin më të madh për forcat e zbatimit të ligjit në Shtetet e Bashkuara. Drejtori i agjencisë Christopher Wray tha se Pekini po kërkon të vjedhë teknologji amerikane “duke përdorur çdo mjet të nevojshëm”.

Ai shtoi se 56 zyrat rajonale të agjencisë kanë hapur rreth 1 mijë hetime lidhur me përpjekjet nga ana e Kinës për të vjedhur teknologji.

Shefi i kundërzbulimit në FBI John Brown tha agjencia ka arrestuar 24 persona në 2019-n lidhur me raste ku përfshihej Kina dhe gjatë këtij viti janë arrestuar 19 persona të tjerë.

Gjatë një konference në Uashington DC në qendrën për Studimeve Strategjike e Ndërkombëtare (CSIS) zoti Brown tha se FBI-ja besonte “se asnjë vend nuk paraqet një kërcënim më të madh sesa Kina komuniste”. Zoti Wray tha se kërcënimi duhej të përballej me veprimeve nga gjithë qeveria amerikane.

FBI-ja po kryen 1 mijë hetime që kanë të bëjnë me përpjekjet e mbetura në tentativë të Kinës për të vjedhur teknologji amerikane në pothuajse çdo sektor të industrisë“, tha ai.

Zoti Wray shtoi se Kina po shfrytëzon në mënyrë agresive hapjen akademike të SHBA-së për të vjedhur teknologji, duke përdorur “bashkëpunëtore në kampuse” dhe duke krijuar “institute në kampuset amerikane”.

Drejtor i Kundërzbulimit Kombëtar dhe Qendrës së Sigurisë William Evanina tha në konferencë se Kina kishte si përparësi të veçantë vjedhjen e teknologjisë së avionëve amerikanë dhe makinave elektrike. zëri i amerikës

Senati amerikan e shpall presidentin Trump të pafajshëm

Senati amerikan e liroi Presidentin Donald Trump nga dy akuzat e ngritura për shkarkimin e tij: shpërdorim pushteti dhe pengim i Kongresit.

Senati i kontrolluar nga republikanët votoi të mërkurën pasdite 52 me 48 për ta liruar Presidentin nga akuza e parë se kishte bllokuar ndihmën ushtarake për Ukrainën në këmbim të asaj që demokratët thonë se ishin hetime të motivuara politikisht. Votimi për akuzën e dytë, pengim i Kongresit, përfundoi me rezultatin 53 me 47.

Përfundimisht presidenti u lirua nga të dyja akuzat.

Një nga senatorët republikanë, Mitt Romney, votoi pro akuzës së parë ndaj zotit Trump që synonte shkarkimin e tij. Ai ishte i vetmi që u nda nga republikanët duke votuar kundër.

Zoti Romney i cili e ka kritikuar edhe më parë zotin Trump për çështje të tjera, e quajti kërkesën që Presidenti i bëri autoriteteve në Ukrainë për të hetuar rivalin e tij politik Joe Biden “një gabim të rëndë” dhe tha se zoti Trump ishte “fajtor për shpërdorim të rëndë të besimit publik”.

“Ajo që ai bëri nuk ishte “perfekte”, tha zotit Romney në Senat, duke iu referuar mënyrës se si Presidenti Trump e ka përshkruar bisedën e tij telefonike me presidentin e Ukrainës.

“Ajo ishte një sulm flagrant ndaj të drejtës sonë për të zgjedhur, sigurisë sonë kombëtare dhe vlerave tona themelore”, shtoi senatori republikan.

Deri përpara kësaj deklarate, asnjë prej 53 senatorëve republikanë nuk kishte dhënë ndonjë sinjal se do të votonte kundër Presidentit, për shkarkimin e të cilit nevojiteshin votat e dy të tretës së anëtarëve të Senatit me 100 vende.

Po ashtu, asnjëri nga të 47 demokratët nuk votoi në një linjë me republikanët për ta liruar presidentin nga akuzat.

Shpallja jofajtor e Presidentit Trump mund të ketë ndikime afatgjata në politikë dhe në ekuilibrin e pushtetit në Uashington. Ajo e fuqizon politikisht presidentin në fushatën e tij për zgjedhjet e nëntorit 2020.

Gjatë fjalimit të tij vjetor mbi gjendjen e vendit që u mbajt të martën në mbrëmje Presidenti nuk e përmendi procesin për shkarkimin e tij. Por ai e ka kritikuar në mënyrë të vazhdueshme duke e cilësuar si “gjueti shtrigash”, e duke theksuar se nuk ka bërë asnjë shkelje.

Demokratët thanë se “administrata, zyrtarët kryesorë të saj dhe republikanët e Senatit po fshehin të vërtetën”. Sipas senatorit Chuck Schumer, “akuzat janë jashtëzakonisht të rënda.” “Ndërhyrja në zgjedhje, shantazhimi i një vend të huaj për të ndërhyrë në zgjedhjet tona, këto cënojnë thelbin e demokracisë sonë”, tha ai.

Udhëheqësi i shumicës në Senat Mitch McConnell, i cili luajti rol kyç në zhvillimin e një procesi të shkurtuar gjykimi, duke mos lejuar thirrjen e dëshmitarëve, tha se akuzat ndaj presidentit Trump “nuk përbëjnë aspak një çështje që mund të çonte në largimin e parë nga detyra të një presidenti në historinë amerikane”.

Pete Buttigieg udhëheq në garën e parë të demokratëve për president

Pete Buttigieg.

Pete Buttigieg, ish-kryetar i një qyteti në Indiana, ka shënuar fitore të lehtë në rrethin e parë zgjedhor në Ajoa, proces i cili në muajt vijues përcakton se kush fiton nominimin e demokratëve në garën për president të Shteteve të Bashkuara.

Pas numërimit të 62 për qind të votave, Buttigieg ka fituar 26.9 për qind të përkrahjes, i përcjellë nga senatori, Bernie Sanders me 25.1 për qind, më pas senatorja Elizabeth Warren me 18.3 për qind dhe ish nën-presidenti amerikan, Joe Biden me 15.6 për qind.

Në këtë rreth zgjedhor, kandidatët garojnë për të fituar sa më shumë delegatë në konventën shtetërore të partisë që zhvillohet më vonë gjatë vitit.

Buttigieg, 38-vjeçar, që nuk ka qenë i njohur në gjithë kombin një vit më parë, e ka konsideruar rezultat preliminar si “fitore të jashtëzakonshme”.

Pas publikimit të rezultateve të para, ai ka përmendur homoseksualitetin e tij, duke thënë se rezultati i Ajoas flet shumë për këtë çështje.

“Kjo vlen për fëmijët, për dikë në komunitet që mendon nëse i ai apo ajo i përkasin familjes që kanë. Nëse besoni në veten dhe shtetin tuaj, ekziston përkrahje e madhe në atë besim”, ka thënë ai.

Rezultatet e pjesshme janë publikuar 20 orë pas përfundimit të procesit të votimit.

Numërimi i votave është thënë të jetë vonuar për shkak të “gabimit të kodimit”.

Ajoa ka 41 nga 1,9991 delegatët që kërkohet të ofrojnë mbështetje për nominimin e kandidatit për garën presidenciale.

Nga viti 1996, secili demokrat që ka fituar rrethin e parë zgjedhor në Ajoa ka siguruar nominimin e partisë për zgjedhjet e muajit nëntor.

Sanders, Biden, Warren, dhe Buttigieg aktualisht konsiderohen kandidatët kryesorë në garë. rel

Presidenti Trump mban fjalimin mbi gjendjen e vendit, një ditë para votimit në Senat

Keida Kostreci

Presidenti i Shteteve të Bashkuara, Donald Trump mbajti fjalimin tradicional për gjendjen e vendit në një klimë të tensionuar në Uashington, një ditë para votimit në Senat për sharkimin ose jo të tij. Por Presidenti Trump tha se Shtetet e Bashkuara janë më të fuqishme se kurrë dhe u përqendrua tek sukseset e administratës së tij. Megjithatë për çështjet ku republikanët dhe demokratët janë në skaje të kundërta, qëndrimet e tij nuk ofruan një emërues të përbashkët.

Dy vështrime të ndryshme për ekonominë

Presidenti Donald Trump e hapi fjalimin me një mesazh optimist:

“Tregu i vendeve të punës është rritur, varfëria po fundoset, krimi po bie, besimi po rikthehet dhe vendi ynë po lulëzon dhe po gëzon respekt të madh përsëri! Armiqtë e Amerikës janë në arrati, mirëqenia e Amerikës është në rritje dhe e ardhmja e Amerikës është e shkëlqyer”, tha ai, para se të deklaronte se gjendja e vendit është “më e fuqishme se kurrë”.

Ndërsa republikanët brohorisnin “katër vjet të tjerë”, një kujtesë se të dyja palët e kanë kthyer vështrimin nga zgjedhjet e nëntorit, Presidenti Trump foli për një papunësi të ulët rekord, veçanërisht mes afrikano-amerikanëve, grave dhe veteranëve.

“Unë i mbaj premtimet. Vetëm në tre vjet, e kemi asgjësuar mentalitetin se Amerika është në rënie dhe e kemi hedhur poshtë tkurrjen e fatit të Amerikës. Po ecim përpara me një ritëm që ishte i paimagjinueshëm vetëm pak kohë më parë dhe nuk do të kthehemi më kurrë mbrapsht”, tha ai.

Por disa nga pretendimet e Presidentit Trump si për shembull se Shtetet e Bashkuara janë bërë prodhuesi më i madh i naftës dhe gazit natyror dhe se sektori i prodhimit është rritur nën administratën e tij, u hodhën poshtë nga kontrolli i fakteve kryer nga agjencia e lajmeve AP.

Dhe përgjigjia e demokratëve u përqendrua pikërisht tek ekonomia.

Guvernatorja e Miçiganit, Gretchen Whitmer që foli në emër të partisë së saj tha se “punëtorët amerikanë po vuajnë”.

“Miliona vetë mezi po ia dalin ose nuk kanë para që të mbarojnë muajin, pasi paguajnë për transportin, borxhet studentore dhe ilaçet. Kështuqë kur presidenti thotë që ekonomia është e fortë, pyetja ime është: e fortë për kë?”, tha ajo.

Zoti Trump foli gjithashtu për politikat e tij tregëtare, të cilat tha ai po e forcojnë Amerikën.

“Para disa ditësh ne nënshkruam një marrëveshje të re të pashembullt me Kinën që do t’i mbrojë punëtorët tanë, pronën tonë intelektuale, do të sjellë miliarda dollarë në thesarin tonë dhe do të hapë tregje të reja për produkte të prodhuara pikërisht në Shtetet e Bashkuara të Amerikës”, tha ai.

Presidenti tha se administrata e tij ka investuar 2.2 trilionë dollarë në ushtri, përfshirë krijimin e degës së re të quajtur Forca Hapësinore, si edhe se aleatët e NATO-s po paguajnë tani pjesën që u takon për mbrojtje.

Politika e jashtme

Një nga momentet kur të dyja palët duartrokitën ishte kur zoti Trump prezantoi udhëheqësin venezualian të opozitës Juan Guaido që ishte në galerinë e të ftuarve, duke e quajtur udhëheqësin legjitim të vendit.

Duke folur për Lindjen e Mesme, zoti Trump tha se 100 për qind kalifatit të Shtetit Islamik është shkatërruar, duke përmendur vrasjen e udhëheqësit të grupit, Abu Bakar al-Baghdadi dhe kryegjeneralit iranuan Qassem Soleimani.

“Mesazhi ynë ndaj terroristëve është i qartë: nuk do t’i shpëtoni kurrë drejtësisë amerikane. Nëse sulmoni qytetarët tanë, e paguani me jetën tuaj”, tha ai.

Por një raport i fundit i zyrtarëve amerikanë të mbrojtjes dhe zbulimit thotë se operacioni që vrau al al-Baghdadin në Siri, tetorin e kaluar, pothuajse nuk e ka frenuar fare grupin.

Agjencia e Zbulimit e Departamentit të Mbrojtjes analizon se struktura e komandës dhe strukturës e organizatës si edhe shumë nga rrjetet e saj klandestine mbeten të paprekura.

Presidenti tha se është në dorën e regjimit iranian që të heqë dorë ose jo nga synimi për të prodhuar armë bërthamore dhe për të ndalur përhapjen e terrorit, duke i ofruar ndihmë për të mëkëmbur ekonominë nëse bashkëpunon.

Procesi i shkarkimit, i papërmendur por i pranishëm

Është e pamundur ta shkëpusësh fjalimin e presidentit Trump nga momenti kur ai u mbajt, një ditë para se të votohet nëse do të shkarkohet ose jo dhe në një vit zgjedhjesh.

Është praktikisht e sigurt që senatorët do ta lirojnë Presidentin nga akuzat e shpërdorimit të pushtetit dhe pengimit të drejtësisë pasi partia e tij republikane ka shumicën në Senat, ndërkohë që për shkarkimin e një presidenti kërkohet një shumicë prej dy të tretat e votave.

Presidenti nuk e përmendi procesin e shkarkimit dhe ndoshta vetëm një fjali, mund të interpretohet sikur i referohej atij.

“Të vetmet fitore që kanë rëndësi në Uashington, janë ato që japin rezultate për popullin amerikan”, tha zoti Trump.

Por tensioni ishte i dukshëm me Kryetaren e Dhomës së Përfaqësuesve, Nancy Pelosi – udhëheqësja më e lartë demokrate që drejtoi procesin e shkarkimit – ulur pas tij.

Të dy kundërshtarët politikë nuk ishin takuar prej muajsh.

Në fillim Presidenti Trump i dha kopjen e fjalimit zonjës Pelosi, por nuk ia dha dorën, ndërsa ajo zgjaste të sajën. Zonja Pelosi vetëm pak sekonda më pas, prezantoi Presidentin pa përdorur shprehjen tradicionale “është një nder dhe kënaqësi e veçantë të prezantoj Presidentin e Shteteve të Bashkuara” dhe në fund të fjalimit, ajo grisi kopjen e saj ndërsa presidenti ishte në podium.

Bill Sweeney, profesor në Universitetin Amerikan tha se ishte fjalimi më partiak që kishte dëgjuar ndonjëherë.

“Veprimet e tij, fakti që nuk i dha dorën zonjës Pelosi. Prezantimi që i bëri kryetarja Pelosi, duke mos thënë disa nga fjalët që janë taditë dhe pastaj kur shihje republikanët brohorisnin në çdo moment dhe demokratët rrinin ulur. Nuk ishte fjalim për gjendjen e vendit. Ishte fjalim për rizgjedhje”, i tha ai Zërit të Amerikës.

Me një sy nga zgjedhjet e nëntorit

Për çështjet ku të dyja palët janë më të polarizuara, qëndrimet e zotit Trump, binin pa mëdyshje në qendër të pozicioneve republikane.

Kështu ishte për shembull çështja e imigracionit.

Presidenti Trump akuzoi “politikanët” radikalë, që u japin strehë të sigurt “të huajve të paligjshëm kriminelë”.

“Nëse hyni ilegalisht, do të dëboheni menjëherë”, tha ai.

Ai tha se duhet të reformohet sistemi i imigracionit, në favor të një sistemi merite.

Ai premtoi gjithashtu se do ta mbrojë gjithmonë Amendamentit e Dytë për të drejtën e armëmbajtjes që ai thotë se është nën sulm.

Dhe në galerinë e të ftuarve ishte personaliteti konservator i medias, Rush Limbaugh, i cili sapo ka njoftuar se është me kancer dhe të cilin zoti Trump e nderoi me medaljen e lirisë. Zoti Limbaugh shihet nga liberalët dhe demokratët si dikush që ngjall gjuhën e urrejtjes.

“Mendoj se mesazhi i tij ishte efektiv për bazën e tij. Por baza nuk është shumica e popullit amerikan”, tha profesor Sweeney.

Sondazhi i fundit i organizatës Gallup tregon se baza republikane është në masë dërrmuese me zotin Trump dhe se madje procesi i shkarkimit mund t’ia ketë forcuar pozitat. Rezultatet që dolën të martën tregojnë se 94 për qind e republikanëve e miratojnë punën e tij, 6 për qind më shumë sesa një muaj më parë. Dhe megjithëse shkalla e miratimit në nivel kombëtar, 49 për qind e bën Presidentin Trump të parin që nuk e ka arritur kurrë 50 për qindshin, kjo shifër është tre për qind më e lartë sesa mbështetja e ish-Presidentit Barack Obama në të njëjtën periudhë të presidencës. Shifra e mëparshme më e lartë për zotin Trump ishte 46 për qind në prill të vitit të kaluar.

Miliarderi Bloomberg intensifikon fushatën presidenciale

Ish kryetari i bashkisë së Nju Jorkut dhe miliarderi Michael Bloomberg ishte i fundit mes kandidatëve demokratë që hyri në garën presidenciale dhe i vetmi kandidat që ende nuk ka marrë pjesë në debatet e demokratëve. Amerikanët mësojnë për axhendën dhe platformën e tij nga reklamat politike që ai vetë i financon. Kohët e fundit, zoti Bloomberg hapi një zyrë të re në Harlem, zyra e parë e fushatës së tij në shtetin e Nju Jorkut. Korrespondentja e Zërit të Amerikës, Nina Vishneva sjellë hollësitë.

Në Rrugën 125 të Harlemit, në qytetin e Nju Jorkut ndodhet zyra e re e fushatës së kandidati presidencial Mike Bloomberg.

Zyra ende nuk është përfunduar nga brenda, por hapja zyrtare e saj është bërë.

“Unë jetoj këtu afër, shoh se ai po vendoset në Harlem, që është gjë e mirë, ai është i angazhuar me komunitetin. Kam qenë aktiv në fushatën e kandidates Kamala Harris, për fat të keq, ajo u tërhoq nga gara sepse nuk u angazhua sa duhet. Të shohim se çfarë do të ndodhë!”, thotë një banor i Harlemit.

Për të marrë emërimin e Partisë Demokrate si kandidat për President, Bloomberg do të ketë nevojë për mbështetjen e votuesve afrikano-amerikanë, të cilët janë një grup i konsiderueshëm në zgjedhjet paraprake të demokratëve.

Politika e ndalimit dhe kontrollimit e zbatuar nga administrata e zotit Bloomberg, kur ai ishte kryetar i bashkisë së Nju Jorkut, një ligj që lejonte policinë të ndalonte dhe të kontrollonte njerëzit për armë dhe kontrabandë, vuri në shënjestër anëtarët e komuniteteve pakicë.

Mënyra se si ky ligj u zbatua u shpall antikushtetuese nga Gjykata Federale e Nju Jorkut.

Pas hyrjes në garën presidenciale, Bloomberg kërkoi falje për veprimet e tij të së kaluarës. Qëllimi i tij më i madh tani, thotë ai, është të frenojë Presidentin Donald Trump.

“Përparësia ime e parë është të heq nga pushteti Donald Trumpin. Po shpenzoj të gjitha paratë e mia për të hequr Trumpin. Doni që unë të shpenzoj më shumë, apo më pak?”

Bloomberg tashmë ka shpenzuar dhjetëra miliona dollarë për reklama televizive dhe është gati të shpenzojë deri në një miliard dollarë të parave të tij në garën për president.

Mesatarisht, ai shpenzon rreth 3 milionë në ditë për fushatën.

Megjithatë, shumë njerëz e shohin strategjinë e Bloomberg-ut si një dëshirë për të “blerë demokracinë”.

“Ne nuk kemi nevojë për para. Ne kemi nevojë për një udhëheqës! Dikush që do të na çojë në një vend të mirë. Bloombergu mendon se më

shumë para mund ta sjellin atë në këtë pozitë”, thotë një banore e Nju Jorkut.

Por këshilltari politik Hank Sheinkopf thotë se pozicioni centrist i Bloombergut mund të funksionojë.

“Mike Bloomberg nuk merr vendime pa bërë kalkulime, ai ka mbaruar studimet për inxhinieri. Ai ka një ide për çdo gjë që bën. Nëse nuk fiton dot, ai me siguri do të jetë në gjendje të ketë ndikim në rezultatin e zgjedhjeve në vjeshtë.”

Pavarësisht se nuk ka marrë pjesë në debatet e demokratëve, Bloomberg po fiton terren. Sipas sondazheve, tani ai është kandidati i pestë më i njohur i demokratëve pas konkurrentëve Joe Biden, Bernie Sanders, Elizabeth Warren dhe Pete Buttigieg.

Bloomberg ka marrë një mbështetje të madhe nga Judge Judy, një personazh i famshëm amerikan i cili drejton një emision televiziv popullor që merret me zgjidhjen e çështje të vogla juridike.

Airbus gjobitet me 3.9 miliardë dollarë për përfshirje në ryshfete

Departamenti amerikan i Drejtësisë njoftoi të premten se prodhuesi evropian i avionëve, Airbus SE ka pranuar të paguajë më shumë se 3.9 miliardë dollarë gjoba tek autoritetet në Shtetet e Bashkuara, Britani dhe Franca në kuadër të një marrëveshje pas akuzave për ryshfet, si dhe shkelje të kontrollit të eksportit të armëve.

Airbus filloi negociatat për një marrëveshje me Departamentin e Drejtësisë tre ditë pasi prokurorët federalë akuzuan kompaninë për shkelje të Ligjit mbi Praktikat e Korrupsionit të Huaj (FCPA) dhe komplot për të shkelur Ligjin e Kontrollit të Eksportit të Armëve (AECA) dhe rregulloret e tij të zbatimit.

Akuzat për ryshfet rrodhën nga dyshimet për një skemë të kompanisë për t’u ofruar dhe paguar ryshfete zyrtarëve të huaj, përfshirë atyre të qeverisë kineze, për të marrë kontrata për shitjen e avionëve.

Akuzat për shkelje të Ligjit të Kontrollit të Eksportit të Armëve rezultuan nga dështimi i kompanisë Airbus për t’i njoftuar autoritetet amerikane në lidhje me kontributet për organizatat politike dhe fitimet e bëra në lidhje me shitjen e avionëve një ushtrie të huaj.

Departamenti i Drejtësisë e përshkroi marrëveshjen si “zgjidhja më e madhe globale e ryshfeteve të huaja deri tani”.

“Airbus u angazhua në një skemë shumëvjeçare dhe masive për të forcuar në mënyrë korruptive interesat e saj të biznesit duke paguar ryshfete në Kinë dhe vendet e tjera dhe duke i fshehur ato ryshfete,” tha Ndihmës Prokurori i Përgjithshëm Brian A. Benczkowski i Divizionit Kriminal të Departamentit të Drejtësisë.

Si pjesë e marrëveshjes, Airbus do t’i paguajë afro 600 milionë dollarë autoriteteve amerikane, 2.29 miliardë dollarë autoriteteve në Francë dhe më shumë se 1 miliard dollarë Zyrës për Mashtrime të Rënda të Britanisë. zëri i amerikës

Gjyqi kundër Trumpit: Demokratët nuk i sigurojnë votat për të thirrur dëshmitarët

Ilustrim.

Demokratëve në Shtetet e Bashkuara u është dhënë një goditje e madhe në përpjekjet e tyre për të thirrur dëshmitarë në gjyqin ndaj presidentit amerikan, Donald Trump.

Ata kishin nevojë për katër vota të senatorëve republikanë, për të votuar në mënyrë që të lejohet paraqitja e dëshmitarëve, por njëri nga senatorët tha se nuk do ta mbështes kërkesën e demokratëve.

Senatori, Lamar Alexander, tha se demokratët e kanë dëshmuar se Trump kishte vepruar në mënyrë të papërshtatshme, por kjo nuk ishte një vepër për shkarkim.

Njoftimi i hap rrugën lirimit të mundshëm të presidentit nga Senati qysh ditën e premte.

Në Senatin me 100 ulëse, gjenden 52 republikanë.

Për çfarë akuzohet Trumpi?

Presidenti amerikan akuzohet për abuzim të pushtetit në lidhje me veprimet e tij kundrejt Ukrainës, si dhe për pengim të punës së Kongresit, i cili menjëherë ka nisur hetime lidhur me veprimet e Trumpit.

Demokratët në Dhomën e Përfaqësuesve kanë thënë se Trump ka pezulluar ndihmën ushtarake në vlerë të 400 milionë dollarëve për Ukrainën, dhe ftesën për vizitë në Shtëpinë e Bardhë për presidentin e ri ukrainas, Volodymyr Zelenskiy, duke i kërkuar Kievit që të nisë hetime kundër një rivali politik.

Trump ka kërkuar nga Ukraina të hetojë Joe Bidenin, i cili është aktualisht një prej kandidatëve kyçë në garën e demokratëve për ta sfiduar Trumpin.

Përveç ish nën-presidentit amerikan, Trump ka kërkuar hetime edhe për djalin e Bidenit, Hunter.

Trump i ka mohuar akuzat dhe gjyqin ndaj tij e ka quajtur “gjueti shtrigash”. rel

Gjyqi i presidentit Trump në Senat hyn në fazë të re

Avokatët e Presidentit Trump mbyllën seancën e tyre të mbrojtjes të martën, duke u thënë 100 senatorëve se Presidenti nuk bëri asgjë të gabuar në bisedëne tij me udhëheqësin e Ukrainës.

Me përfundimin e mbrojtjes nga ekipin ligjor i Presidentit Trump, gjykimi për shkarkimin e tij në Senat kalon tani në fazën tjetër: në atë me pyetjet me shkrim të senatorëve drejtuar të dyja palëve.

Republikanët dhe Demokratët e Senatit do të alternojnë paraqitjen e pyetjeve të tyre me shkrim për t’u lexuar nga Kreu i Gjykatës së Lartë John Roberts.

Faza e parë e gjyqit në Senat përfundoi ndërsa vazhdojnë përplasjet për pranimin e dëshmitarëve dhe provave të reja në fazën tjetër -përfshi ish-këshilltarin e Sigurisë Kombëtare John Bolton.

Presidenti Trump mblodhi mbështetësit e tij në shtetin e Nju Xhersit… vetëm disa orë pasi ekipi i tij ligjor mbylli argumentat mbrojtëse në Kongres.

“A po bëjmë një procedurë shkarkimi sepse ndihma u dha tre javë para përfundimit të vitit fiskal? Për një telefonatë 6-minuta? Në fund tëfundit, kjo është e gjitha”,tha Jay Sekulow, avokat i President Trump.

Avokatët e presidentit përdorën vetëm gjysmën e kohës së tyre të caktuar … duke u thënë senatorëve se përpjekjet e demokratëve për shkarkimin e presidentit janë të rrezikshme.

“Ajo që po ju kërkojnë të bëni është të shkarkoni një president të suksesshëm në prag të zgjedhjeve në kundërshtim me Kushtetutën. Kjo do të ndryshonte në mënyrë të rrezikshme vendin tonë dhe do tëdobësonte përgjithmonë të gjitha institucionet tona demokratike. Ju të gjithë e dini se kjo nuk është në interes të popullit amerikan”, tha Pat Cipollone, këshilltar i Shtëpisë së Bardhë.

Por gjyqi është shumë larg përfundimit-pasi po rritet presioni për të thirrur ish këshilltarin e Sigurisë Kombëtare John Bolton për të dëshmuar.

“Nëse kolegët e mi republikanë tani dështojnë të thërrasin dëshmitarë, ata në thelb po shkatërrojnë Kushtetutën dhe po shkelin ligjin që kërkon që ata të dëgjojnë këta dëshmitarë. John Bolton ishte në dhomë kur u bë telefonata. Ishte me sy dhe veshë aty bshkë me presidentin. Ai e quajti atë si një marrëveshje droge. U përpoq ta ndalonte. Ne duhet që pa diskutim ta dëgjojmë këtë dëshmi”, tha senatori demokrat Richard Blumenthal.

Që të mund të thirren dëshmitarë duhet që katër senatorë republikanë t’u bashkohen demokratëve. Por jo të gjithë republikanët kanë besim në ato që mund të thotë zoti Bolton.

“John Bolton është një punonjës i pakënaqur, shumë i zemëruar dhe i pushuar nga puna, i cili dëshiron të bëjë miliona dollarë me dëshmi. Një pyetje e rëndësishme për John Boltonin është: ‘Pse nuk doje të dëshmoje një muaj më parë, por tani që po fiton miliona dollarë për një libër? Çfarë ka ndryshuar?’, pyet senatori republican, Rand Paul.

Republikanët po bëjnë thirrje për një marrëveshje që do të sillte si dëshmitarë ish-nënpresidentin Joe Biden dhe djalin e tij, Hunter. Demokratët argumentojnë se Biden dhe djali i tij nuk kanë asnjë lidhje me këtë proces.

“Nëse ata dëshirojnë këmbime dëshmitarësh, atëherë le të thërrasin Mick Mulvaney. Mick Mulvaney ka thënë se ai kundërshton ato që do të thotë John Bolton. Le të thërrasin Mick Mulvaneyn. Le të thërrasin Sekretarin Pompeo. Le të thërrasin njerëz që janë dëshmitarë të përhershëm të këtij skandali dhe kësaj skeme korruptive, nëse duan këmbim dëshmitarësh. Por kjo nuk është vërtet ajo që duan. Ata duan një shpërqendrim. Dhe nuk mendoj se senatorët duan të lejojnë që ky proces të kthehet në një cirk”, tha ligjvënësi Adam Schiff.

Anketat tregojnë se shumica e amerikanëve dëshirojnë prova të reja dhe dëshmitarë në gjyqin në senat, i cili vazhdon me pyetjet e senatorëve. zëri i amerikës

Presidenti Trump sulmon ish-këshilltarin e sigurisë kombëtare John Bolton

Presidenti Donald Trump ndërmori sot sulmin më të ashpër deri tani ndaj ish-këshilltarit të tij të sigurimit kombëtar John Bolton, i cili në një dorëshkrim të librit të tij ende të pabotuar, thotë se Presidenti Trump luajti rol qendror në fushatën e presioneve me motive politike ndaj Ukrainës.

Presidenti Trump tha në Twitter se vite më parë zoti Bolton “nuk mori dot miratimin si ambasador i SHBA në Kombet e Bashkuara dhe që nga ajo kohë nuk merrte dot miratim për asgjë.” Ai, shkruan presidenti Trump, “më lutej për një post që të mos kërkonte miratimin e Senatit.”

“Nëse do të kisha dëgjuar atë, shkruan Presidenti, ne do të ishim sot në Luftën e Gjashtë Botërore.”

Presidenti Trump shkruan se zoti Bolton, i cili e la postin e këshilltarit të sigurisë kombëtare në shtator, “menjëherë pas kësaj shkroi një libër të pandershëm dhe të pavërtetë me informacione të klasifikuara. Si mund ta bëjë dikush këtë?” – pyet Presidenti.

Siç njofton gazeta Nju Jork Tajms, në dorëshkrimin e tij, zoti Bolton e kundërshton versionin e dhënë nga Presidenti Trump për çështjen e ndihmës ushtarake prej 391 milion dollarësh ndaj Ukrainës. Sipas gazetës, ai thotë se presidenti e bllokoi ndihmën deri sa Ukraina të fillonte hetimet ndaj ish-nënpresidentit Joe Biden dhe të birit të tij Hunter.

SHBA, Kinës: Ndani më shumë informacione për virusin

Dr. Anthony Fauci

Zyrtarët amerikanë të shëndetësisë po i bëjnë thirrje Kinës të ndajë më shumë informacione se si po përhapet koronavirusi i ri i shfaqur në qytetin Wuhan.

Virusi ka infektuar më shumë se 4500 njerëz në 18 vende, kryesisht në Kinë. Më shumë se 100 kanë vdekur.

Ekspertët kinezë kanë njoftuar se virusi mund të përhapet edhe nga pacientët që nuk shfaqin simptoma. Por zyrtarët amerikanë të shëndetësisë thonë se nuk dëshirojnë të komentojnë rreth një deklarate të tillë.

“CDC (Qendrës për Kontrollin e Sëmundjeve) nuk i është dhënë mundësia t’i shqyrtojë këto të dhëna,” tha Drejtori i Qendrës, Robert Redfield në një konferencë shtypi të martën. “Kinezët besojnë se i kanë ato të dhëna. Shpresa jonë është të jemi në gjendje t’i studiojmë ato dhe të jemi më të saktë.”

Nëse pacientët e përhapin virusin pa shfaqur simptoma, kjo kërkon procedura të ndryshme ekzaminimi, tha Drejtori i Institutit Kombëtar të Alergjive dhe Sëmundjeve Infektive, Anthony Fauci.

Dr. Fauci tha se pacientët pa simptoma nuk ka gjasa të kenë shumë ndikim në përhapjen e sëmundjes.

“Në të gjithë historinë e viruseve që prekin frymëmarrjen, të çdo lloji qofshin, transmetimi asimptomatik nuk ka qenë kurrë burimi i shpërthimit të sëmundjeve,” tha ai.

Zyrtarët kanë identifikuar pesë raste në Shtetet e Bashkuara dhe deri tani asnjë rast transmetimi të sëmundjes nga njeriu te njeriu. Dr. Redfield tha se rreziku për amerikanët aktualisht është i ulët, por beson se do të ketë edhe raste të tjera.

Të gatshëm dhe të aftë

Shtetet e Bashkuara kanë ofruar të dërgojnë ekspertë në Kinë për të ndihmuar në kontrollin e sëmundjes, por Sekretari i Shëndetit dhe Shërbimeve Njerëzore Alex Azar tha se Pekini nuk e ka pranuar ofertën.

“Ekspertët e CDC janë të gatshëm dhe të aftë të shkojnë në Kinë ose mbi bazën e bashkëpunimit dypalësh ose nën kujdesin e Organizatës Botërore të Shëndetit,” tha ai.

OBSH njoftoi në një deklaratë të martën se organizata “do të dërgojë ekspertë ndërkombëtarë për të vizituar Kinën sa më shpejt të jetë e mundur”. ((https://www.who.int/news-room/detail/28-01-2020-who-china-leaders-discuss-next-steps-in-battle-against-coronavirus-outbreak))

“Qëndrimi i qeverisë kineze, nivelet e bashkëpunimit dhe bashkëveprimit me ne janë krejtësisht të ndryshme nga ajo që pamë në vitin 2003,” kur zyrtarët u përpoqën ta mbulonin shfaqjen e sindromës së rëndë akute të frymëmarrjes (SARS), një sëmundje që shkaktoi gati 800 të vdekur në të gjithë botën, tha Azari. “Dëshiroj t’i lavdëroj ata për këtë.”

Sidoqoftë, ai tha, “ne po i bëjmë thirrje Kinës. Më shumë bashkëpunim dhe transparencë janë hapat më të rëndësishëm që mund të ndërmerren për një përgjigje më të efektshme”.

Kundërmasat

Nuk ekziston ndonjë trajtim i miratuar për infeksionin koronavirus, por Dr. Fauci thotë se disa kura janë në studim e sipër, përfshirë medikamente që kanë treguar njëfarë efektiviteti kundër virusëve Ebola dhe HIV.

Një vaksinë është në studim e sipër dhe Dr. Fauci shpreson të fillojë provat e para brenda tre muajve të ardhshëm.

Ai paralajmëroi, megjithatë, se “të nisësh provat e Fazës së Parë nuk do të thotë se ke një vaksinë të gatshme për përdorim”. Do të duhen disa muaj për të përcaktuar nëse vaksina është e sigurt dhe që të mund të kalohet në testime të tjera. Ai vuri në dukje se kur u konfirmuan rezultatet e provave të para me vaksinën kundër SARS, sëmundja ishte vënë tashmë nën kontroll.

Zyrtarët po ekzaminojnë udhëtarët e ardhur nga Kina në 20 aeroporte të SHBA. zëri i amerikës

Akuza ndaj profesorit të Harvardit për pjesëmarrje në programet kineze

Qeveria amerikane ngriti akuza të martën ndaj shefit të një departamenti në Universitetin e Harvardit dhe një punonjësi në Universitetin e Bostonit, se nuk kanë bërë të njohura marrëdhëniet e tyre me agjencitë kineze të kërkimit shkencor edhe pse kanë përfituar fonde nga qeveria amerikane për hulumtime.

Prokurorët ngritën akuza ndaj shefit të Departametit të Kimisë dhe Biologjisë Kimike në Universitetin e Harvardit Charles Lieber, se ka gënjyer lidhur me pjesmarrjen e tij në një program kinez të quajtur “Plani i Mijëra Talenteve”.

Sipas dokumenteve gjyqësore, zoti Lieber kishte bërë deklarime të rreme, fiktive dhe të pavërteta pranë Departamentit amerikan të Mbrojtjes lidhur me rolin e tij në planin kinez. Ai po ashtu kishte përdorur të njëjtat taktika me Insitutin Kombëtar të Shëndetit lidhur me rolin dhe lidhjet e tij me Universitetin Teknologjik të Wuhanit në Kinë.

Në bazë të dokumenteve të gjykatës, Lieber akuzohet për deklarata të rreme ndaj një agjencie qeveritare. Prokurorët po ashtu kanë ngritur akuza ndaj një punonjësi të Universitetit të Bostonit se ka gënjyer në lidhje me punësimin për ushtrinë kineze, tha për median një zëdhënës i Departamentit të Drejtësisë.

Këto janë zhvillimet e fundit në vazhdën e një serie akuzash të ngritura nga qeveria amerikane ndaj disa akademikëve lidhur me marrëdhëniet e tyre me Kinën.

Prokurorët federalë akuzuan muajin e kaluar një student kinez të mjekësisë se ishte përpjekur të kontrabandonte jashë Amerikës ekzemplarë të kërkimeve për kancerin. Në gusht, po ashtu u ngritën akuza ndaj një studiuesi në Universitetin e Kansasit, se kishte refuzuar të bënte të ditura lidhjet me një unviersitet kinez. zëri i amerikës

Plani i Trumpit: Zgjidhje me dy shtete për konfliktin izraelito-palestinez

Presidenti Donald Trump publikoi të martën planin e tij të paqes Izraelito-Palestinez, gjatë një takimi në Shtëpinë e Bardhë me Kryeministrin e Izraelit Benjamin Netanjahu. Plani është rezultat i një pune tre vjeçare të këshilltarit të lartë të Presidentit, Jared Kushner, i cili është njëkohësisht edhe dhëndri i zotit Trump.

Përpara njoftimit të planit për paqe në Lindjen e Mesme zoti Trump ka zhvilluar takime me zotin Netanjahu dhe udhëheqësin e opozitës izraelite Benny Gantz për t’i njohur ata me përmbajtjen e tij.

Zoti Netanjahu e ka cilësuar planin si “mundësia e shekullit që nuk duhet humbur”. Zoti Gantz e quajti atë një “moment historik të rëndësishëm”.

Një zëdhënës i zotit Netanhaju tha se kryeministri izraelit do të nisej drejt Moskës të mërkurën për të njohur Presidentin rus Vladimir Putin mbi propozimin.

Ndërkohë të martën me mijëra palestinezë demonstruan kundër planit amerikan, disa orë përpara publikimit të tij në një ceremoni në Uashington.

Ndërsa udhëheqësit izraelitë e kanë mirëpritur planin, udhëheqësit palestinezë e kanë kundërshtuar atë edhe pse nuk është bërë ende publik. Ata thonë se administrata e zotit Trump është e njëanshme, pro Izraelit.

Palestinezët frikësohen se plani i zotit Trump do të shuajë shpresat që ata kanë për një shtet të pavarur në Bregun Perëndimor, në Gazë dhe në lindje të Jeruzalemit.

Ndërkohë të martën ndaj zotit Netanjahu është ngritur një padi zyrtare në gjykatë lidhur me akuza për korrupsion, një zhvillim që pasoi vendimin e kryeministrit izraelit për të hequr dorë nga një kërkesë e tij për të kërkuar imunitet parlamentar nga ndjekja penale. zëri i amerikës

Presidenti i Shteteve të Bashkuara, Donald Trump, bëri thirrje për një zgjidhje me dy shtete të konfliktit midis Izraelit dhe palestinezëve, gjatë prezantimit të planit të tij për Lindjen e Mesme.

Megjithatë ai tha se plani parasheh që Jerusalemi të mbetet kryeqytet “i pandarë” i Izraelit.

Presidenti amerikan shtoi se plani prej 80 faqesh, që është “më i detajuari” ndonjëherë, premton se shteti i ardhshëm palestinez do të jetë “i lidhur” me Jerusalemin Lindor.

Ai tha se marrëveshja do të “dyfishonte” territorin nën kontrollin e palestinezëve.

Palestinezët duan shtet të pavarur në Bregun Perëndimor dhe Gaza, me kryeqytet Jerusalemin Lindor.

Statusi përfundimtar i Jerusalemit ka qenë gjithmonë një nga pyetjet më të vështira dhe më të ndjeshme në konfliktin izraelito-palestinez.

Presidenti Trump gjatë një paraqitjeje së bashku me kryeministrin e Izraelit, Benjamin Netanyahu, tha se plani “mund të jetë mundësia e fundit” për palestinezët.

Netanyahu tha se është një plan i mrekullueshëm për Izraelin dhe për paqen.

Ai shprehu gatishmërinë të negociojë me palestinezët bazuar në këtë plan.

Konferenca e përbashkët e Trumpit dhe Netanyahut.

Konferenca e përbashkët e Trumpit dhe Netanyahut.

Kreu i opozitës izraelite, Benny Gantz, i cili gjithashtu u takua me Trumpin të hënën, e quajti planin “një moment historik dhe të rëndësishëm”.

Udhëheqësit palestinezë thonë se ata nuk janë ftuar në Uashington për prezantimin e “projektit të fshehtë të paqes” të presidentit Trump.

Mijëra palestinezë protestuan në Rripin e Gazës, kundër planit të paqes.

Megjithatë, të hënën, udhëheqësi palestinez, Mahmoud Abbas, tha se nuk do të pajtohej me ndonjë marrëveshje që nuk siguronte një zgjidhje dy-shtetesh.

Një zyrtar i lartë amerikan i ka thënë agjencisë Reuters, se nëse palestinezët pranojnë të negociojnë atëherë mund të ketë lëshime në të ardhmen.

Pikat kryesore të planit?

Agjencia Reuters ka publikuar disa pjesë kyçe të cilat i adreson plani i presidentit Trump:

* Statusi i Jerusalemit, duke përfshirë vendet historike të shenjta.

* Vendosja e kufijve me pajtim të dyanshëm.

* Arritja e marrëveshjeve të sigurisë që do të hiqte frikën e Izraelit nga sulmet e palestinezëve dhe fqinjëve armiqësorë.

* Kërkesa palestineze për shtetësi në territorin e Bregut Perëndimor, Rripin e Gazës dhe Jeruzalemin Lindor – të okupuar nga Izraeli në luftën e Lindjes së Mesme në vitin 1967. ( Palestinezët kërkojnë që Izraeli të largojë vendbanimet e tij në Bregun Perëndimor dhe Jerusalemin Lindor. Më shumë se 400,000 izraelitë tani jetojnë midis rreth 3 milionë palestinezëve në Bregun Perëndimor, me 200,000 banorë të tjerë në Jerusalemin Lindor).

* Gjetja e një zgjidhjeje për situatën e rëndë të miliona refugjatëve palestinezë.

* Marrëveshjet për të ndarë burimet natyrore, siç është uji.

Historiku i planit

Këshilltari i Shtëpisë së Bardhë, Jared Kushner, është autor kryesor i planit. Ai shpalli fazën e parë të planit në Bahrein gjatë muajit qershor 2019.

Faza e parë e planit bënte thirrje për një fond investimi 50 miliardë dollarësh për të forcuar ekonomitë palestineze dhe vendeve arabe fqinje.

Kushner ka punuar për dy vjet në këtë plan, të cilin presidenti i Shteteve të Bashkuara, Donald Trump e ka quajtur “marrëveshje të shekullit”.

Prezantimi i planit vjen në kohën kur si presidenti amerikan, Donald Trump ashtu edhe ai izraelit, Benjamin Netanyahu, janë duke u përballur me akuza dhe procese gjyqësore.

Trump përballet me një proces gjyqësor për shkarkim në Senat ndërsa ndaj Netanyahut është ngritur akuzë për korrupsion.

Të dy mohojnë akuzat.

Trump dhe Netanyahu këtë vit përballen me fushatat e rizgjedhjes – Netanyahu në mars dhe Trump në nëntor.

Përgatiti: Kestrin Kumnova

Mitch McConnell dhe gjyqi për shkarkimin e Presidentit Trump

Kushtetuta amerikane kërkon që Senati të jetë përgjegjës për mbajtjen e një gjyqi për shkarkimin e presidentit. Por nuk thotë asgjë për mënyrën se si duhet të zhvillohet gjykimi. Ndërsa ekzistojnë disa rregulla që janë përcaktuar për këtë gjykim, drejtimi i tij më tej do të përcaktohet nga udhëheqësi i shumicës në Senati, Mitch McConnell.

Pas kësaj thirrjeje me fjalë të buta qëndron një realitet i vështirë: Mitch McConnell ka pushtetin të përcaktojë rrjedhën e gjyqit të fajësimit të Presidentit Donald Trump. Dhe McConnell është i njohur për kontrollin e vendosur të republikanëve.

U desh një jetë e tërë shtrëngimi duarsh, shkëmbime favoresh dhe fitore në zgjedhje që McConnell të arrinte qëllimin e tij të përjetshëm për të qenë udhëheqësi i shumicës së Senatit amerikan.

Lindur në Alabama, McConnell mposhti poliomielitin në fëmijëri para se të shkonte të jetonte në Kentucky kur ishte 14 vjeç. Në moshën 22 vjeçare, ai u bë praktikant në Senatin amerikan.

Rrugëtimi i McConnell për në krye të Senatit filloi në vitin 1984, duke mposhtur rivalin demokrat me rreth 5,000 vota, dhe duke u bërë i pari republikan që fitoi zgjedhjet në Kentucky në 16 vjet.

Zgjedhja si senator ishte qëllimi i tij i vetëm. Pasi mbërriti aty, McConnell i vuri syrin pozicionit udhëheqës. Përpjekjet e tij për të mposhtur përpjekjet e demokratëve për të kufizuar kontributet dhe shpenzimet në fushatë i dhanë ati një emër të mirë mes republikanëve.

“Askush nuk e njeh Senatin më mirë sesa Mitch McConnell. Ai ka qenë atje për një kohë të gjatë. I njeh nevojat dhe interesat e senatorëve të ndryshëm, veçanërisht në anën republikane”, thotë Darryl West me Institutin Brookings.

Kur republikanët ishin në pakicë, McConnell zotëroi rregullat e ndërlikuara të Senatit. Mes tyre: ai që njihet si filibuster, – procesi që lejon çdo senator të flasë në sallën e Senatit për aq kohë sa të jetë e mundur fizikisht, në përpjekje për të mos miratuar ose ndryshuar një ligj.

Mundësia e McConnell për të bllokuar përpjekjet e demokratëve u shpërblye nga republikanët e Senatit, të cilët e zgjodhën si drejtuesin e tyre në vitin 2007.

Kur demokrati Barack Obama u zgjodh president në vitin 2008, McConnell ishte vija e parë e mbrojtjes së republikanëve. Në vitin 2010, ai nuk maskoi qëllimin e qartë të republikanëve – duke bërë një deklaratë që e bëri zotin McConnell të famshëm në partinë e tij dhe duke nxitur një reagim të irrituar nga demokratët.

“Gjatë javës së kaluar, disa thanë se u tregova pa takt kur sugjerova që përparësia jonë kryesore politike gjatë dy viteve të ardhshme duhet të ishte mohimi i Presidentit Obama për një mandat të dytë”.

Obama fitoi rizgjedhjen, por McConnell përfundimisht pati fjalën e fundit në vitin 2016, kur refuzoi të caktonte një seancë apo votim për zgjedhjen e të emëruarit të Obamës, Merrick Garland për një post në Gjykatën e Lartë. Ky vend bosh – dhe shumë të tjerë në të gjithë sistemin e gjykatave federale – – u plotësuan pasi u zgjodh presidenti republikan Donald Trump.

Tani, Trumpi përballet me një gjykim për shkarkim në Senat. Si drejtues i shumicës, McConnell ka votat për të hartuar procedurat. Ai ka pranuar se po koordinon strategjinë me avokatët e zotit Trump, duke u thënë gazetarëve se “nuk është një gjykatës i paanshëm pasi ky është një proces politik”.

“Motivimi kryesor i McConnell është mbajtja e kontrollit të shumicës së Senatit nga republikanët. Pothuajse çdo vendim që ai merr është nga ai këndvështrim … “, thotë Darryl West.

Ndërkohë që disa senatorë republikanë përballen me fushata të vështira për rizgjedhje në shtete të tilla si Maine, Kolorado dhe Arizona, drejtimi i senatorit McConnell për politikën e gjykimit mund të përcaktojë nëse ai do të vazhdojë ta mbajë postin e ëndërrave të tij si drejtues i shumicës në Senat. zëri i amerikës

Dëshmia e John Boltonit mund të ndryshojë rrjedhën e gjyqit për shkarkim

Gjyqi për shkarkimin e Presidentit Donald Trump rifilloi të hënën mes njoftimeve për prova të reja që mund të ndryshojnë votën e senatorëve republikanë lidhur me dëshmitarët e mundshëm, nga fundi i kësaj jave. Sipas një artikulli në gazetën New York Times, ish-Këshilltari i Sigurisë Kombëtare, John Bolton ka pohuar se zoti Trump i ka thënë personalisht se e kishte kushtëzuar ndihmën për Ukrainën me një hetim të rivalëve të tij politikë. Kjo mund të jetë një pike kthese në çështjen për shkarkim.

Zoti Bolton – që prej kohësh është kërkuar si dëshmitar nga demokratët në Kongres – është vënë përsëri në qendër të përpjekjeve të tyre, pasi në një një libër ende të pabotuar të tij, pjesë të të cilit dolën në shtyp, pretendon se një dëshmi e tij do të konfirmonte akuzat për abuzim me pushtetin kundër Presidentit Trump.

“Jo vetëm që ka prova të mëtejshme që presidenti bllokoi ndihmën për të përfituar politikisht dhe kërkuar hetim, por duket se ka një përpjekje gjigande për të fshehur këtë të vërtetë mes kaq shumë njerëzve me peshë në Shtëpinë e Bardhë, që e dinin dhe nuk thanë asgjë, jo më të përpiqeshin ta ndalnin. Edhe nëse kishte ndonjë fije logjike në vendimin për të mos dëgjuar dëshmitarë dhe shqyrtuar dokumente, libri i zotit Bolton, e rrëzoi atë”, tha senatori Chuck Schumer, udhëheqës i pakicës demokrare në Senat.

Por në ditën e dytë të argumentave të ekipit të mbrojtjes së Presidentit, avokatët e tij, u morën vetëm indirekt me pretendimet e zotit Bolton.

“Ne merremi me provat e përfshira në transcript, me informacionin publik. Nuk merremi me spekullimet që nuk bazohen në standardet për provat”, tha Jay Sekulow, këshilltar ligjor i Shtëpisë së Bardhë.

Ndërsa presidenti i hodhi plotësisht poshtë.

“Mund t’u them se nuk i është thënë asgjë John Boltonit”, tha ai.

Por informacioni i ri duket se po i bën disa senatorë republikanë të jenë të hapur të votojnë për dëshmitarë.

“Medoj që ka gjithnjë e më shumë gjasa që republikanë të tjerë të bashkohen me ne që duam të dëgjojmë dëshminë e John Boltonit. Dëshmitarë ose dokumenta të tjera, është tjetër çështje por mendoj se është bërë e qartë se dëshmia e John Boltonit është e rëndësishme për vendimin tonë”, tha senatori republikan, Mitt Romney.

Do të duhej që katër senatorë republikanë të votonin me demokratët, që të miratohej pranimi i dëshmitarëve. Aleati i zotit Trump, Lindsey Graham tha se ishte i hapur për një mundësi të tillë. Shumica e senatorëve republikanë thanë se koha e përshtatshme për të konsideruar dëshminë e zotit Bolton do të jetë nga fundi i kësaj jave, kur të votojë gjithë senati për këtë çështje.

“Është e qartë që do ta diskutojmë seriozisht. Bëhet fjalë për të enjten ose të premten, pastaj të shohim se ç’do të ndodhë”, tha senatori republikan Mike Braun.

Një votim për të lejuar zotin Bolton si dëshmitar mund të hapte rrugën për zyrtarë të tjerë aktualë dhe të shkuar të administratës për të dëshmuar por republikanët ka gjasa që të kërkojnë dëshmitarët e tyre, përfshirë ish-nënpresidentin Joe Biden dhe të birin e tij, Hunter.

Puna e Hunterit në kompaninë ukrainase të gazit Burisma, është një nga çështjet e përmendura nga ekipi mbrojtës i zotit Trump, që ka përsëritur pretendimin kryesor se zoti Trump nuk ka bërë asgjë të gabuar.

“Presidenti gjatë gjithë kohës ka vepruar në përputhje me autoritetin e tij kushtetues dhe interesat ndërkombëtare. Të pyesësh një udhëheqës të huaj që të hetojë korrupsionin, nuk është shkelje detyre”, tha zoti Sekulow.

Argumentat hapëse në gjyq, pritet të përfundojnë deri të mërkurën, pasuar nga mundësia që senatorët të bëjnë pyetje për çështjen. zëri i amerikës

SHBA, në prag të planit për paqen izraelito-palestineze

Kryeministri izraelit Benjamin Netanyahu dhe ish-shefi i ushtrisë Benny Gantz, sfiduesi i tij në zgjedhjet e parakohshme të marsit, zhvillojnë sot takime të ndara në Shtëpinë e Bardhë, ku presidenti Donald Trump pritej të ndante hollësi rreth planit të tij të shumëpritur për zgjidhjen e konflikti izraelito-palestinez.

Shpallja në publik e planit pritet të bëhet të martën gjatë një konference të përbashkët shtypi me pjesëmarrjen e Presidentit Trump dhe Kryeministrit Netanyahu.

Duke folur të hënën në Zyrën Ovale me kryeministrin Netanyahu, Presidenti Trump tha se plani i tij “ka shumë kuptim për të gjithë.”

Ai nuk pranoi të zbulojë hollësi dhe të shpjegonte se përse plani do të ishte i favorshëm për palestinezët, por tha se “është diçka që ata duhet ta dëshirojnë”.

Palestinezët nuk kanë pranuar të bisedojnë me administratën Trump, si protestë ndaj politikave pro-izraelite të presidentit, siç ishte zhvendosja e ambasadës amerikane nga Tel Avivi në Jeruzalem.

Palestinezët druajnë se plani do t’i shuajë shpresat e tyre për një shtet të pavarur në Bregun Perëndimor, Jeruzalemin Lindor dhe Rripin e Gazës. Udhëheqësit palestinezë thonë se ata nuk u ftuan nga Uashingtoni dhe se asnjë plan paqeje nuk mund të funksionojë pa pjesëmarrjen e tyre.

“Ata ndoshta nuk do ta pëlqejnë atë fillimisht,” tha Presidenti Trump. Por mendoj se në fund do ta pëlqejnë…. Është një plan shumë i mirë për ta. Në fakt është tepër i mirë për ta,” tha ai.

Ministria e jashtme palestineze tha në një deklaratë të dielën se asnjë Palestinez nuk do ta pranonte planin.

Presidenti Trump e ka reklamuar projektin e tij si “marrëveshjen e shekullit”, por hollësitë kanë mbetur të fshehta gjatë tre viteve punë për të arritur deri në shpalljen e tij. zëri i amerikës

Gjyqi në Senat, argumentet e republikanëve dhe aludimet e z. Bolton

Avokatët e Presidentit amerikan Donald Trump rifilluan të hënën mbrojtjen në gjyqin në Senat, ndërkohë që republikanët të cilët kanë aty shumicën, po përpiqen t’u përgjigjen akuzave të një ish këshilltari të sigurimit kombëtar që aludon se zoti Trump i kishte thënë se synonte të bllokonte ndihmën ushtarake për Ukrainën derisa Kievi të fillonte hetimet ndaj rivalit kryesor demokratik të presidentit.

Senatori Lindsey Graham, mbrojtës i vendosur i Presidentit Trump, u tha gazetarëve se do të mbështeste posedimin me mënyra ligjore të dorëshkrimit të librit të ri të zotit John Bolton, “Dhoma ku ndodhën ngjarjet”, për t’i bërë atij “një vlerësim dhe për të parë nëse ekzisojnë arsye që dorëshkrimi të hyjë në procesverbal.”

Aludimi i zotit Bolton se Presidenti Trump synonte që Ukraina të hetonte ish-nënpresidentin Joe Biden dhe djalin e zotit Biden para se ai të zhbllokonte 391 milion dollarët ndihmë me të cilat Kievi do të luftonte kundër separatistëve pro-rusë, minon një ndër argumentet kryesore të avokatësve mbrojtës, të cilët thonë se presidenti nuk ka gisht në ndonjë marrëveshje “më jep-të jap” me Ukrainën, pra ndihmë në këmbim të një hetimi me ngjyra politike.

Deri tani, demokratët që kanë pakicën në Senat, ishin duke zhvilluar një betejë të kotë për të bindur të paktën katër senatorë republikanë me të cilët të formonin një shumicë të thjeshtë për të kërkuar që zoti Bolton dhe zyrtarë të tjerë të Presidentit Trump të dëshmojnë lidhur me atë që dinë rreth ngjarjeve në prapaskenë të lidhura me Ukrainën.

Avokatët e zotit Trump thonë se nuk ka fakte të dorës së parë që të tregojnë se disa zyrtarë kanë folur drejtpërdrejt me presidentin për veprimet e tij në Ukrainë. Por zoti Bolton është takuar shpesh me presidentin deri sa ai e largoi atë shtatorin e kaluar nga posti i këshilltarit të sigurimit kombëtar.

Të hënën, ndërsa hapej dita e dytë e mbrojtjes së Presidentit Trump, avokati i tij Jay Sekulow u tha të 100 senatorëve që luajnë rolin e jurisë, se veprimet e presidenti “në çdo kohë” kanë qenë të ligjshme dhe brenda autoritetit të tij kushtetues.

Avokati mbrojtës i zotit Trump, Kenneth Starr e quajti Dhomën e Përfaqësuesve të drejtuar nga demokratët “një institucion që ka humbur drejtim” në nxitimin për të ngritur akuza ndaj udhëheqësit amerikan, duke bërë “plot shkelje të procesit themeltar” dhe duke e trajtuar padrejtësisht presidentin Trump.

Starr tha se në vend që të largojë zotin Trump nga detyra, Senati duhet ta lirojë atë nga akuzat dhe të “lejojë njerëzit të vendosin” fatin e tij në zgjedhjet e nëntorit, ku ai po kërkon një mandat të dytë në Shtëpinë e Bardhë. Avokati Starr ishte personi që drejtoi hetimin, i cili çoi në ngritjen e akuzave ndaj ish-Presidentit Bill Clinton në vitin 1998.

Senatori Mitt Romney nga shteti Juta, një republikan që mbështet thirrjen e dëshmitarëve, të cilët zoti Trump nuk i ka lejuar të dëshmojnë në proces, tha se ato që rezultojnë nga libri i zotit Bolton e bëjnë “gjithnjë e më të mundur” që më shumë senatorë republikanë të kërkojnë dëgjimin e dëshmitarëve.

Shumë republikanë të Senatit dhe zyrtarë të Shtëpisë së Bardhë mezi presin që zoti Trump të lirohet nga akuzat deri në fund të javës, përpara se të mbajë fjalimin për gjendjen e vendit javën e ardhshme. Thirrja e dëshmitarëve mund të zgjaste ndjeshëm gjyqin në Senat. zëri i amerikës

Trump: E “dërmuam plotësisht” çështjen e ngritur nga demokratët

Katherine Gypson

Presidenti Donald Trump tha të dielën se avokatët e tij “dërmuan plotësisht” çështjen që kanë ngritur demokratët kundër tij duke synuar shkarkimin nga detyra.

Një një postim në twitter pasi ekipi i tij ligjor mbylli ditën e parë të paraqitjes së argumenteve mbrojtëse Presidenti shkruante se “gjuetia e shtrigave është një ndërhyrje masive në zgjedhje që nuk është parë kurrë më parë“.

Ai sulmoi prokurorin kryesor të demokratëve, ligjvënësin Adam Schiff, duke e cilësuar atë si “politikan të korruptuar” dhe siç shtonte më tej ai “ndoshta një njeri shumë të sëmurë.

Ai (Schiff) nuk e ka paguar çmimin, për atë që i ka bërë vendit tonë!“, shkruante zoti Trump.

Zoti Schiff tha për televizionin NBC News se ai i sheh komentet e zotit Trump si një kërcënim.

Ai është një president i inatosur dhe hakmarrës dhe nuk kam asnjë dyshim për këtë”, tha zoti Schiff. “Dhe nëse mendoni ndryshe, mjaft të shihni postimet e tij për mua sot, ku shkruan se duhet të paguaj një çmim”, tha ai.

Java e parë e gjyqit ndaj Presidentit Donald Trump në Senat u mbyll të shtunën, ndërsa avokatët e presidentit filluan mbrojtjen e tij, duke argumentuar se Presidenti nuk kishte bërë asnjë gabim në komunikimet e tij me Ukrainën. Ekipi i avokatëve mbrojtës ka tre ditë kohë për të argumentuar para 100 senatorëve të cilët do të vendosin për largimin ose jo nga detyra të Presidentit Trump. Korrespondentja e Zërit të Amerikës Katherine Gypson sjell hollësitë.

Në një ditë të shkurtër të shpalosjes së argumenteve fillestare, të përshkruar si një prezantim paraprak, avokatët e Shtëpisë së Bardhë sulmuan nga fronte të ndryshme demokratët. Së pari ata e quajtën të pabazë akuzën për shkarkimin e Presidentit.

“Demokratët akuzuan presidentin se përdori ndihmat për sigurinë për të detyruar Presidentin (Voldymyr) Zelenskiy të njoftojë hapjen e hetimit (ndaj djalit të ish nënpresidentit Biden). Por si mund të jetë e mundur kjo kur ukrainasit nuk ishin në dijeni se ndihma e sigurisë ishte pezulluar? Nuk mund të ketë një kërcënim, nëse personi që po kërcënohet nuk e di. Nuk mund të ketë një ofrim të një favori, nëse favori nuk ekziston”, tha Mike Purpura, avokat i Shtëpisë së Bardhë.

Avokatëtë e Shtëpisë së Bardhë argumentuan se presidenti ka kompetenca të gjera për vendimmarrje.

“Mos rënia dakord me vendimet e presidentit për çështje të politikës së jashtme, ose mbi atë se nga kush i merr këshillat, nuk është një arsye për shkarkimin e tij”, tha avokati i Shtëpisë së Bardhë, Jay Sekulow.

Avokatët e Presidentit Trump kritikuan gjithashtu menaxherët e demokratë të gjyqit për hamendjet në lidhje me motivet e presidentit.

“Kjo është e rreme. Kjo nuk është thirrja e vërtetë. Kjo nuk është provë. Ky nuk është transkripti (i telefonatës)”, tha avokati Mike Purpura.

Demokratët thonë se problemi mund të zgjidhet me lehtësi nëse republikanët lejojnë paraqitjen e dëshmisë së dorës së parë që republikanët deri më tani kanë refuzuar ta bëjnë.

“Përshtypja ime e fortë nga dy orët e para është se çështja e sjelljes së dëshmitarëve dhe dokumenteve është bërë edhe më e rëndësishme”, tha senatori demokrat Tim Kaine.

Demokratët kanë kërkuar paraqitjen si dëshmitarë të disa zyrtarëve dhe ish zyrtarëve të administratës, duke përfshirë Ambasadorin John Bolton dhe Shefin e Personelit të Shtëpisë së Bardhë, Mick Mulvaney, i cili u tha gazetarëve vitin e kaluar se pezullimi i ndihmës ishte i lidhur me kërkesat e presidentit.

“Nëse kjo ishte me të vërtetë për luftimin e kurrupsionit nga Presidenti Donald Trump, atëherë pse e fshehu atë nga Kongresi? Pse nuk i thanë popullit amerikan se çfarë po bënin? Arsyeja që ata nuk e kanë njoftuar popullin Amerikan është sepse ishte një kërcënim i korruptuar për t’i ndihmuar ata që të vidhnin zgjedhjet”, tha ligjvënësi demokrat Adam Schiff, menaxher i gjyqit në senat.

Prezantimi dy orësh nga mbrojtja e Presidentit Trump dukej se kishte më shumë efekt tek republikanët sesa argumentet shumë më të gjatë të demokratëve.

“Për 23 orë nuk dëgjuam asgjë përveç disa vogëlsirave dhe një këndvështrimi të vetëm. Në këto dy orë, unë mendoj se ata bënë më shumë përparim sesa tërësia e asaj që ata na vunë, me male informacioni, gjëra të vogla dhe thjesht nuk arritën në pikën e duhur”, tha senatori republikan Mike Braun.

Gjyqi pritet të rifillojë të hënën me vazhdimin e paraqitjes së argumenteve nga avokatët mbrojtës të Presidentit.

Vdes në aksident ajror ylli i basketbollit Kobe Bryant

Ylli në pension i basketbollit Kobe Bryant ka humbur jetën pasi helikopteri me të cilin po udhëtonte u rrëzua në Calabasas të Kalifornisë të dielën në mëngjes, njoftoi agjencia e lajmeve TMZ.

Kobe Bryant po udhëtonte me të paktën tre persona të tjerë në helikopterin e tij privat kur zbriti në Calabasas, rreth 65 kilometra në veriperëndim të Los Angeles.

Sherifi i Qarkut në Los Anxhelosit shkruante në Twitter se pesë vetë humbën jetën pas rrëzimit të një helikopteri në Calabasas dhe se nuk kishte të mbijetuar. zëri i amerikës

Trumpi zotohet për publikim të planit për paqe në Lindje të Mesme

Presidenti amerikan, Donald Trump ka thënë se planifikon të prezantojë planin e tij për paqe në Lindje të Mesme më 28 janar, në ditën kur është raportuar se do të takohet me kryeministrin izraelit, Benjamin Netanyahu në Uashington.

“Ndoshta do ta prezantojmë planin pak para vizitës”, u ka thënë Trump gazetarëve teksa ishte nisur për në Florida, pas pjesëmarrjes në Forumin Ekonomik Botëror në Davos të Zvicrës.

“Është një plan fantastik. Është një plan për të cilin kemi punuar shumë”, ka shtuar ai.

Palestinezët, që nuk kanë qenë të ftuar në Shtëpinë e Bardhë në takimin me Netanyahun, kanë dënuar menjëherë këtë njoftim.

Nabil Abu Rudeineh, zëdhënësi i presidentit të Autoritetit Palestinez, Mahmoud Abbas, ka thënë: Ne e paralajmërojmë Izraelin dhe administratën amerikane që të mos kalojnë linjat e kuqe”.

“Ky hap vetëm rikonfirmon kundërshtimin tonë absolut të asaj çfarë ka bërë administrata amerikane deri tani, sidomos me njohjen e Jerusalemit si kryeqytet të Izrealit”, ka thënë zëdhënësi.

Palestinezët janë zemëruar edhe nga ajo që e konsiderojnë si qasje pro-izraelite e Trumpit, duke përfshirë vendimin për transferim të ambasadës amerikane në Izreal nga Tel Avivi në Jerusalem.

Palestinezët kërkojnë që Jerusalemi Lindor të jetë kryeqyteti i tyre në të ardhmen.

Izraeli ka aneksuar Jerusalemin Lindor dhe ka shpallur gjithë qytetin si kryeqytet, një hap që nuk është njohur nga komuniteti ndërkombëtar.

Trump po ashtu nuk ka përkrahur zgjidhjen me dy shtete për konfliktin disa dekadësh, një formulë ndërkombëtare që do të mund të rezultonte me funksionimin e shtetit palestinez dhe Izraelit.

Presidenti amerikan ka thënë se ka biseduar “shkurt” me palestinezët, të cilët sipas tij “kanë shumë motiv për të arritur marrëveshje”.

“Jam i sigurt se në fillim mund të reagojnë në mënyrë negative, mirëpo plani është shumë pozitiv për ata”, ka thënë Trump. rel

SHBA, kufizime për “turizmin e lindjeve”

Administrata e Presidentit Donald Trump publikoi të enjten rregulla të reja vizash që synojnë kufizimin e “turizmit të lindjeve”, një praktikë me të cilën gratë vijnë në SHBA për të lindur, në mënyrë që fëmijët e tyre të marrin shtetësinë amerikane.

Aplikantëve do t’u refuzohen vizat turistike nëse zyrtarët konsullorë përcaktojnë se ato synojnë të vijnë në SHBA kryesisht për të lindur. Por për zyrtarët do të jetë e vështirë të bëjnë dallimin nëse ato vijnë për shkaqe mjekësore apo për të lindur. Gratë me nevoja mjekësore do të trajtohen si të huajt e tjerë që hyjnë në SHBA për trajtim mjekësor dhe duhet të dëshmojnë se i kanë paratë për të paguar, përfshirë shpenzimet e transportit dhe të jetesës.

Praktika e udhëtimit në SHBA për të lindur është në thelb e ligjshme, megjithëse ka patur raste që autoritetet kanë arrestuar operatorët e agjencive të turizmit të lindjeve për mashtrime me vizat ose evazion fiskal.

Në rregulloren e re thuhet se Departamenti i Shtetit “nuk beson që vizitat në Shtetet e Bashkuara me qëllim kryesor marrjen e nënshtetësisë amerikane për një fëmijë, duke lindur në Shtetet e Bashkuara, janë një veprimtari legjitime për kënaqësi ose e një natyre rekreative”.

Administrata e Presidentit Donald Trump po i kufizon të gjitha format e imigracionit, por Presidenti Trump ka shprehur shqetësim të veçantë për çështjen e marrjes së nënshtetësisë me anë të lindjes. Sipas Kushtetutës amerikane, kushdo që ka lindur në SHBA konsiderohet shtetas amerikan.

Presidenti ka kërcënuar se do t’i japë fund kësaj praktike, por studiuesit ligjorë kanë thënë se kjo nuk është aq e lehtë për t’u realizuar. zëri i amerikës

SHBA, nis paraqitja e argumenteve në gjyqin ndaj Presidentit

Në Uashington, demokratët e Dhomës së Përfaqësuesve akuzuan të mërkurën Presidentin Donald Trump se vuri në lëvizje një “skemë korruptive” për t’i bërë presion Ukrainës që ajo të hetonte rivalin e tij politik, ish-nënpresidentin demokrat Joe Biden, me synimin mashtrues për të fituar zgjedhjet presidenciale të 2020-s.

Kongresmeni Adam Schiff u tha të 100 anëtarëve të Senatit që luajnë rolin e jurisë në gjyqin e presidentit se “Presidenti ka treguar që ai beson se është mbi ligjin dhe se i përbuz kufijtë që i njeh ligji.”

Demokratët kanë ngritur dy akuza ndaj Presidentit republikan Trump, me synim shkarkimin e tij në gjyqin që po zhvillohet në Senat.

Ligjvënësi Schiff, duke paraqitur në Senat argumentet e demokratëve kunër zotit Trump, tha se presidenti i 45-të i vendit kërkoi “ndihmë nga jashtë për të favorizuar politikisht veten e tij” në zgjedhjet amerikane.

Zoti Schiff është anëtari kryesor i grupit të Dhomës së Përfaqësuesve që luajnë rolin e prokurorëve në këtë gjyq. Ai tha se presidenti pezulloi 391 milion dollarë ndihma ushtarake të miratuara nga kongresi për Ukrainën, “një vend në luftë me Rusinë”, ndërsa i bënte presion Presidentit ukrainas Volodymyr Zelenskiy për të hapur hetime ndaj zotit Biden dhe djalit të tij Hunter në bordin e një kompanie ukrainase të gazit natyror.

Për këtë, tha zoti Sciff, “ai përdori fuqitë shtetërore që i ishin besuar vetëm atij,” dhe shtoi se veprimet e Presidentit Trump “shkelën betimin e tij të shenjtë ndaj detyrës”.

Ligjvënësi tha se presioni i zotit Trump ndaj Presidentit Zelenskiy ishte njëlloj si t’i kërkonte një udhëheqësi të huaj “të bënte punën e tij të ndyrë politike”, pasi në zgjedhjet e nëntorit do të përballet ndoshta me rivalin Biden, i cili është në krye të sondazheve të votuesve demokratë.

Gjatë 13 orëve debat që filloi të martën pasdite dhe përfundoi të mërkurën herët në mëngjes, demokratët humbën disa votime radhazi ndaj shumicës republikane të Senatit rreth çështjes nëse do të paraqiten në gjyq dokumente dhe dëshmitarë të tjerë.

Pasditen e së mërkurës ishte radha e demokratëve të dilnin në foltoren e Senatit për të paraqitur me hollësi argumentet e tyre rreth veprimeve të Presidentit Trump në Ukrainë. Kjo ishte e para nga tre seancat tetë-orëshe ku ata do të flasin për çështjen.

“Nuk ka asnjë mosmarrëveshje serioze në lidhje me faktet themelore,” tha zoti Schiff, duke shtuar se në vend të kësaj, avokatët e Shtëpisë së Bardhë që mbrojnë zotin Trump thjesht do të argumentojnë se ai nuk mund të hiqet nga detyra për abuzimin e pushtetit presidencial.

Para se të fliste në Senat, zoti Schiff u tha gazetarëve: “Faktet janë diskredituese dhe ne do t’i paraqesim ato në detaje të hollësishme.”

Të shtunën, avokatët e Presidentit Trump do të fillojnë mbrojtjen e tyre gjatë tre ditëve. Presidenti përballet me dy akuza: shpërdorim pushteti dhe pengim i përpjekjeve të kongresit për të hetuar veprimet e tij të lidhura me Ukrainën.

Demokratët argumentojnë se Presidenti Trump nuk kishte asnjë interes për të luftuar korrupsionin në Ukrainë, siç pretendojnë disa republikanë, përveçse ta bindëte Zelenskiy-n të shpallte hetime kundër zotit Biden dhe të birit të tij.

Pat Cipollone, avokat i Presidentit Trump

Pat Cipollone, avokat i Presidentit Trump

Avokatët e Presidentit thonë nga ana e tyre se ai thjesht po bënte politikë të jashtme, diçka legjitime për një president, prandaj duhet të lirohet menjëherë nga akuzat. Ata thonë se Dhoma e Përfaqësuesve nxitoi të ngrejë akuza për shkarkimin e zotit Trump me një proces të çalë, në të cilin presidenti nuk u trajtua në mënyrë të drejtë.

Ndërsa gjyqi zhvendoset tek thelbi i akuzave kundër zotit Trump, është pëothuajse e sigurt se Senati, me shumicë republikane, do ta nxjerrë atë të pafajshëm. zëri i amerikës

Trumpi do t’i bashkohet nismës për një trilion pemë

Presidenti i Shteteve të Bashkuara, Donald Trump, tha se SHBA-ja do t’i bashkohet nismës për një trilion pemë, të ndërmarrë në Forumin Ekonomik Botëror, në Davos të Zvicrës.

Trump i bëri komentet në hapje të Forumit, i cili po shoqërohet me thirrjet e aktivistëve për të ndërmarrë më shumë hapa për luftimin e ndryshimeve klimatike.

Me planin e shpallur, një trilion drunj duhet të mbillen këtë dekadë me kontributet financiare të bizneseve, qeverive dhe filantropëve.

Iniciativa synon t’i japë një impuls ripyllëzimit në mbarë botën, për të luftuar dioksidin e karbonit të tepërt në atmosferë, i cili, sipas shkencëtarëve, është përgjegjës për rritjen e temperaturave globale.

“Jam besimtar i madh i mjedisit. E dua ujin më të pastër dhe ajrin më të pastër”, tha Trump.

Trump iu adresua Forumit Ekonomik Botëror vetëm disa orë përpara se në Senatin e Shteteve të Bashkuara të nisë gjykimi i tij.

Trump akuzohet se i ka bërë presion Ukrainës për të hetuar një rival të tijin politik.

Dhoma e Përfaqësuesve e Shteteve të Bashkuara, e udhëhequr nga rivalët e tij demokratë, i ka ngritur akuzat formale kundër tij në muajin dhjetor. rel

Trump në Davos: SHBA, në mesin e një bumi ekonomik

Presidenti i SHBA Donald Trump përshëndeti arritjen e dy marrëveshjeve të mëdha tregtare dhe tha se amerikanët po “fitojnë përsëri si kurrë më parë”, ndërkohë që mbajti fjalimin e hapjes në Forumin Ekonomik Botëror në Davos të Zvicrës.

Fjalimi mbahet pak orë përpara se në Senatin e SHBA të fillojë në formën e plotë gjyqi rreth akuzave të ngritura nga demokratët e Dhomës së Përfaqësuesve që synojnë shkarkimin e tij.

Presidenti Trump bëri një përshkrim të atyre që i quajti fitore për punonjësit e shtresës së mesme dhe bizneset, përfshirë fazën e parë të një marrëveshjeje tregtare me Kinën dhe miratimin nga Senati të një marrëveshjeje të re tregtare me Kanadanë dhe Meksikën.

“Kur fola në këtë forum dy vjet më parë, ju thashë se kishim filluar rimëkëmbjen e madhe të Amerikës” tha Presidenti Trump. “Sot jam krenar të deklaroj se Shtetet e Bashkuara janë në mesin e një bumi ekonomik, të tillë që bota nuk ka parë kurrë më parë.”

Ai u bëri thirrje vendeve të tjera të ndjekin shembullin e tij dhe të çlirojnë qytetarët e tyre nga “burokracia shtypëse”.

Në agjendën e Presidentit Trump para kthimit në Uashington të martën pasdite ishin takimet me disa udhëheqës botërorë, mes të cilëve Presidenti i Irakut Barham Salih, Kryeministri pakistanez Imran Khan, Presidentja e Konfederatës Zvicerane Simonetta Sommaruga, Presidentja e Komisionit Evropian Ursula von der Leyen, si dhe presidenti i qeverisë rajonale të Kurdistanit, Nechirvan Barzani.

Në konferencën vjetore të Davosit janë ftuar më shumë se 3,000 pjesëmarrës, ndërkohë që numri i personelit ushtarak dhe policisë për masat e sigurisë arrin në 5,000.

Qindra protestues, disa të veshur me kostume të koalave për të rritur ndërgjegjësimin për zjarret shkatërruese në Australi, u drejtuan për në Davos duke marshuar përmes një shtegu malor dhe pastaj me tren, pasi autoritetet kanë ndaluar hyrjen në këmbë në këtë qytet alpin. Ata kërkojnë që udhëheqësit globalë në forum të tregohen më agresivë lidhur me ndryshimin e klimës.

Presidenti Trump foli gjithashtu mbi përqëndrimin te rritja ekonomike dhe kundërshtoi ata që i quajti “profetë të pesimizmit me parashikimet e tyre të apokalipsit”.

“Ata parashikuan një krizë të mbipopullimit në vitet ’60, uri masive në vitet ’70 dhe fundin e naftës në vitet 90. Këta alarmistë kërkojnë gjithmonë të njëjtën gjë: fuqi absolute për të dominuar, transformuar dhe kontrolluar çdo aspekt të jetës sonë. Ne nuk do t’i lejojmë kurrë socialistët radikalë të shkatërrojnë ekonominë tonë, vendin tonë ose të zhdukin lirinë tonë”, tha Presidenti Trump.

I pyetur për aktivisten e mjedisit Greta Thunberg, e cila do të hapte një debat për shmangien e një “apokalipsi klimatik” menjëherë pas fjalimit të Presidentit Trump, udhëheqësi amerikan tha se ishte njeri që besonte shumë te mjedisi dhe shtoi se dëshironte ajër dhe ujë të pastër. zëri i amerikës

Trump niset për në Davos para fillimit të gjykimit të tij për shkarkim në Senat

Washington

Presidenti i SHBA-ve, Donald Trump, është nisur për në Zvicër ku do të marrë pjesë në Forumin Ekonomik Botëror të Davosit, një ditë para fillimit të gjykimit për shkarkimin e tij në Senat, transmeton Anadolu Agency (AA).

Trump nuk do të jetë në Washington dy ditët e para të seancave të gjykimit në Senat.

Në një deklaratë me shkrim nga Shtëpia e Bardhë thuhet se Trump në Davos do të zhvillojë takime dypalëshe me presidentin irakian, Barham Salih, kryeministrin e Pakistanit, Imran Khan, kreun e Qeverisë Rajonale Kurde (KRG) të Irakut, Nechirvan Barzani, presidenten e Konfederatës Zviceriane, Simonetta Sommaruga, presidenten e Komisionit Evropian, Ursula von der Leyen dhe themeluesin e Forumit Ekonomik Botëror, Klaus Schwab.

Pritet që Trump të mbajë një fjalim në hapjen e sesionit në ditën e parë në Davos si dhe të bëjë vlerësime gjithëpërfshirëse lidhur me marrëdhëniet tregtare dhe ekonomike të SHBA-së me vendet pjesëmarrëse në samit.

Ndërkohë tërheq vëmendjen se Trumpi do të takohet edhe me presidentin irakian i cili pas tensioneve ushtarake me Iranin ka kërkuar largimin e ushtarëve amerikanë nga vendi.

Burimet e Shtëpisë së Bardhë njoftuan se Trump gjatë periudhës që do të qëndrojë në Davos do të jetë vazhdimisht në kontakt me ekipin e mbrojtjes në Senat dhe se do të ndjekë nga afër zhvillimet.

Gjithçka gati për nisjen e gjyqit kundër Trumpit në Senat

Todd Prince

Senati i Shteteve të Bashkuara do të dëgjojë argumentet në gjyqin e tretë që është duke u zhvilluar ndonjëherë për shkarkim të një presidenti në pozitë, në historinë gati 250-vjeçare amerikane.

Gjyqi kundër presidentit amerikan, Donald Trump ka nisur më 16 janar, pas betimit të kryer nga shefi i Gjykatës Supreme, John Roberts, në pozitën e udhëheqësit të këtij procesi.

Shefi i Drejtësisë në SHBA, John G. Roberts.

Shefi i Drejtësisë në SHBA, John G. Roberts.

Liderët demokratë të Dhomës së Përfaqësuesve kanë lexuar akuzat, të njohura si Artikujt për Shkarkim, të cilat kanë shtyrë Senatin e udhëhequr nga demokratët që të informojnë edhe zyrtarisht presidentin Trump për gyqin, dhe t’i ofrojnë atij mundësinë e përgjigjjes ndaj akuzave.

Gjyqi, që do të transmetohet edhe në kanale televizive dhe i cili mund të zgjasë disa javë, po zhvillohet në periudhë kritike për jetën politike në SHBA, pasi demokratët janë duke u përgatitur për rrethin e parë të zgjedhjeve, të cilat ka mundësi të përcaktojnë se kush prej demokratëve do ta sfidojë republikanin Trumpin, në zgjedhjet e muajit nëntor.

Katër kandidatë që garojnë për të fituar nominimin e demokratëve për president, Michael Bennet, Amy Klobuchar, Bernie Sanders, dhe Elizabeth Warren, janë senatorë, andaj atyre do t’iu duhet të kufizojnë aktivitetet e fushatës së tyre, në mënyrë që të marrin pjesë në gjyqin kundër Trumpit.

Rrethi i parë i zgjedhjeve do të zhvillohet në Ajoa më 3 shkurt.

Për çfarë akuzohet Trumpi?

Presidenti amerikan akuzohet për abuzim të pushtetit në lidhje me veprimet e tij kundrejt Ukrainës, si dhe për pengim të punës së Kongresit, i cili ka nisur hetime lidhur me veprimet e Trumpit.

Demokratët në Dhomën e Përfaqësuesve kanë thënë se Trump ka pezulluar ndihmën ushtarake në vlerë të 400 milionë dollarëve për Ukrainën, dhe ftesën për vizitë në Shtëpinë e Bardhë për presidentin e ri ukrainas, Volodymyr Zelenskiy, duke i kërkuar Kievit që të nisë hetime kundër një rivali politik.

Trump ka kërkuar nga Ukraina të hetojë Joe Bidenin, i cili është aktualisht një prej kandidatëve kyçë në garën e demokratëve për ta sfiduar Trumpin.

Përveç ish nën-presidentit amerikan, Trump ka kërkuar hetime edhe për djalin e Bidenit, Hunter.

Ish nën-presidenti amerikan, Joe Biden.

Ish nën-presidenti amerikan, Joe Biden.

Hunter Biden ka qenë pjesë e bordit të kompanisë, Burisma Holdings, e cila prodhon gaz, derisa babai i tij ka shërbyer në administratën e ish-presidentit amerikan, Barack Obama dhe ka qenë njeriu kryesor i Shtëpisë së Bardhë në çështjet e lidhura me Ukrainën.

Prokurorët ukrainas më 2014 kanë hapur një rast për korrupsion kundër kompanisë Burisma, e cila është në pronësi të një ish-kryeminsitri.

Trump pretendon, pa të dhëna, se Biden i ka bërë presion Kievit që të shkarkojë prokurorët në mënyrë që të mbrojë kompaninë Bursma dhe djalin e tij.

Biden në anën tjetër ka mohuar akuzat.

Trump po ashtu i ka kërkuar Ukrainës të hetojë një teori diskredituese që thotë se Ukraina, dhe jo Rusia, ka ndërhyrë në zgjedhjet presidenciale të vitit 2016 në SHBA.

Agjencitë amerikane të inteligjencës kanë arritur në përfundim se Rusia ka ndërhyrë në zgjedhjet e vitit 2016, në të mirë të Trumpit.

Presidenti është përballur me hetimet për Rusinë në pjesën më të madhe të udhëheqësisë së tij, ndonëse vazhdimisht këtë proces e ka cilësuar “mashtrim” dhe “gjueti shtrigash”.

Dhoma e Përfaqësuesve ka nisur hetime për të kuptuar nëse Trump i ka bërë presion Ukrainës në muajin shtator dhe nga ajo kohë ka ftuar për dëshmi një varg dëshmitarësh nga Shtëpia e Bardhë, Departamenti amerikan i Shtetit dhe agjenci tjera.

Trump ka urdhëruar disa zyrtarë që të mos u përgjigjen ftesave për dëshmi, situatë që ka rezultuar me akuzën e dytë për pengim të punës së Kongresit.

A nuk është shkarkuar veçse Trumpi?

Po, sipas Dhomës së Përfaqësuesve.

Mirëpo kjo vetëm i bie se ai është akuzuar zyrtarisht, pas hetimeve dhe votimit në Dhomën e Përfaqësuesve.

Pas përfundimit të hetimeve, Komiteti për Inteligjencë i kësaj Dhome ka publikuar një raport më 3 dhjetor të vitit të kaluar, duke e akuzuar presidentin për kryerje të krimeve.

Udhëheqësja e Dhomës së Përfaqësuesve, Nancy Pelosi duke nënshkruar artikujt për shkarkim të Trumpit.

Udhëheqësja e Dhomës së Përfaqësuesve, Nancy Pelosi duke nënshkruar artikujt për shkarkim të Trumpit.

Në procesin e zhvilluar më 18 dhjetor, 230 kongresistë kanë votuar në të mirë të akuzës së parë, 197 kundër dhe 229 për akuzën e dytë në krahasim me 198 që kanë qenë kundër.

Të gjithë republikanët kanë votuar kundër dy akuzave, derisa disa demokratë kanë abstenuar apo kanë kundërshtuar ato.

Si do të zhvillohet gjyqi?

Pjesëtarët demokratë të Dhomës së Përfaqësuesve do të udhëheqin procesin gjyqësor në Senat. Në ekipin ligjor të presidentit përfshihen: Këshilltari i Shtëpisë së Bardhë, Pat Cipollone, avokati personal i Trumpit, Jay Sekulow, Ken Starr, që ka hetuar ish-presidentin amerikan, Bill Clinton në vitet 1990 dhe Alan Dershowitz, profesor i ligjit kushtetues në Harward dhe avokat që ka përfaqësuar figura të mirënjohura botërore, siç është kampioni botëror i boksit, Mike Tyson dhe ylli i futbollit, O.J. Simpson.

Gjyqi do të nisë më 21 janar në orën 13:00 sipas kohës lokale dhe do të zgjasë gjashtë ditë në javë, nga e hëna në të shtunë.

Seancat ditore pritet të zgjasin 4-5 orë.

Lideri i shumicës në Senat, Mitch McConnell.

Lideri i shumicës në Senat, Mitch McConnell.

Sipas gjyqit kundër ish-presidentit amerikan, Bill Clinton, një model që ka shtyrë përpara lideri i shumicës në Senat, Mitch McConnell, secila palë nuk mund të ketë më shumë sesa 24 orë për të prezantuar deklaratat hyrëse.

Më pas secila palë do të duhej të kishte 16 orë, ashtu që senatorët të kenë mundësi për të shtruar pyetje me shkrim.

Senati ka shumë mundësi që të votojë si të vazhdojë me procedurat e gjyqit, duke përfshirë ftesat për dëshmitarë dhe dokumente tjera.

Një shumicë prej 51 senatorësh duhet të votojë për të miratuar prezantimin e dëshmitarëve apo të dhënave tjera.

Aktualisht në Senatin me 100 ulëse, gjenden 52 republikanë.

Teksa janë prezantuar të dhëna të reja që mbështesin akuzat për shkarkim të Trumpit, demokratët në Senat kanë kërkuar dëshmitarë të rinj dhe qasje në dokumente shtesë.

Lev Parnas, qytetar amerikan, i lindur në ish-Bashkimin Sovjetik, gjendet në qendër të të dhënave të reja, pasi ai u ka treguar mediave për herë të parë javën e kaluar se ai i ka kërkuar Ukrainës që të hetojë Bidenët me urdhër të avokatit personal të Trumpit, Rudy Giuliani.

Parnas po ashtu ka thënë se ka gatishmëri për të dëshmuar.

Ndërkohë Dhoma e Përfaqësueseve kërkon siguri që gjykimi nuk do të përfundojë shpejt ashtu që Trump të shpallet i pafajshëm nga republikanët e Senatit.

Republikanët në anën tjetër kanë refuzuar kërkesa për diçka të tillë.

Sipas ligjit, gjykatësi, Justice Roberts do të mbikëqyrë procesin, siç parashihet me ligj. Robert është emëruar shefi i drejtësisë nga ish-presidenti republikan, George W. Bush më 2005.

Përgjatë gjyqit, senatorët do të vëzhgojnë në qetësi procesin.

Pas përfundimit të procesit, senatorët do të votojnë për secilën akuzë.

Nëse dy të tretat e senatorëve, 67 nga 100, e shpallin presidentin fajtor, Trump largohet nga zyra.

Megjithatë, mundësia e jetësimit të këtij rasti të pashembullt është e pakët.

Republikanët kanë 53 nga 100 ulëse sa ka Senati, që nënkupton se 20 prej këtyre pjesëtarëve do të duhet të kalojnë linjat partiake, për të votuar për shkarkim të presidentit republikan.

A ka pasur gjyq për shkarkim të ndonjë presidenti tjetër në Senat?

Po. Demokrati, Andrew Johnson ka qenë presidenti i parë amerikan që është përballur me gjyq për shkarkim.

Johnson, ka fituar pushtetin pas vrasjes së Abraham Lincolnit.

Ai është akuzuar nga Dhoma e Përfaqësuesve, atëbotë e kontrolluar nga republikanët, për shkarkim të paligjshëm të Sekretarit për Luftë, John Stanton më 1868.

Senati nuk ka miratuar akuzat kundër tij për një votë, mirëpo Johnson nuk ka fituar nominimin e partisë për të garuar për president në zgjedhjet e vitit 1868.

Ish-presidenti amerikan, Bill Clinton.

Ish-presidenti amerikan, Bill Clinton.

Më 1998, demokrati, Bill Clinton është akuzuar nga republikanët në Dhomën e Përfaqësuesve se ka gënjyer nën betim dhe ka penguar punën e drejtësisë në çështjen rreth marrëdhënies të tij seksuale që ka pasur me një praktikante.

Megjithatë, Senati i kontrolluar nga demokratët nuk ka votuar për largimin e tij nga zyra.

Presidenti i 37-të i SHBA-së, Richard Nixon, ka dhënë dorëheqje para se të votohej për gjyqin kundër tij në Dhomën e Përfaqësuesve.

Përgatiti: Krenare Cubolli

Trump: Fluturimet Kosovë-Serbi, një fitore

Presidenti i Shteteve të Bashkuara Donald Trump e quajti fitore marrëveshjen mes Kosovës dhe Serbisë për vendosjen e fluturimeve të drejtpërdrejta mes dy vendeve.

Në një postim në Twitter të hënën në mbrëmje, Presidenti Trump shkruante:

“Të gjithë thoshin se nuk bëhej dot. Por për herë të parë në një gjeneratë do të ketë fluturime të drejtpërdrejta midis Serbisë dhe Kosovës. Një tjetër fitore.”

Në postimin e tij, Presidenti Trump falenderon Ambasadorin Robert O’Brien, këshilltar i sigurisë kombëtare të Shtëpisë së Bardhë dhe Ambasadorin e SHBA në Gjermani, Richard Grenell.

Diplomatët amerikanë ndërmjetësuan të hënën nënshkrimin e një marrëveshjeje midis Kosovës dhe Serbisë për rihapjen e linjës ajrore Prishtinë – Beograd, në një përpjekje për përmirësimin e lidhjeve ekonomike midis dy vendeve.

Marrëveshja u nënshkrua nga Milun Trivunac, sekretar shtetëror në ministrinë serbe të Ekonomisë dhe Eset Berisha drejtor i Autoritetit të Aviacionit Civil të Kosovës në ambasadën amerikane në Berlin.

Të pranishëm ishin ambasadori i SHBA në Berlin, Richard Grenell, i dërguar i posaçëm i presidentit Trump për bisedimet e paqes Kosovë – Serbi si dhe këshilltari për Siguri Kombëtare, Robert O’Brien.

Martin Luter Kingu në 2 minuta (video)

Martin Luter King ishte mishërim i luftës së afrikano-amerikanëve për të drejta të barabarta, para gjysmë shekulli.

Marsin e vitit 1963 ai mbajti në Uashington fjalimin historik “Unë kam një ëndërr”, ku të pranishëm ishin rreth 250 mijë njerëz.

Fjalia që ai tha se “Nga një mal dëshpërimi, një gur shprese…”, frymëzoi krijuesin e përmendores.

Ky “mal” është nëntë metra i lartë, ndërsa “guri i shpresës” është i gdhendur në të.


Punimi është realizuar nga artisti kinez Keu Yixin.

Muret e monumentit janë të mbushura me citate të Martin Luter Kingut.

Skulptura e tij duket sikur është një vepër e papërfunduar, sikurse edhe jeta e aktivistit u ndal në gjysmë, pasi ai u vra në vitin 1968 në moshën 39 vjeçare.

Në fakt, ai i dha historisë amerikane një drejtim të ri.

Martin Luter Kingu vazhdon të frymëzojë njerëzit në mbarë botën. zëri i amerikës

Amerikanët kujtojnë Martin Luther Kingun

Në ditën e Martin Luther King-ut, që kremtohet të hënën e tretë të çdo janari, pretendentët demokratë për zgjedhjet presidenciale vizituan një kishë baptiste në Karolinën e Jugut dhe me krahë të bashkuara marshuan bashkë me dhjetëra mijë njerëz të tjerë.

Përpara marshimit, në kishën e Zionit në qytetin Kolumbia, kandidatët Bernie Sanders dhe Elizabeth Warren shtrënguan duart në shenjë pajtimi pas debatit presidencial mes demokratëve pak ditë më parë, ku zonja Warren refuzoi ta bëjë këtë.

Të dy ata së bashku me rivalen Amy Klobuchar morën pjesë në shërbesën përkujtimore dhe më pas, në marshimin në rrugë drejt rezidencës së guvernatorit, me ta u bashkuan kandidatët Joe Biden, Pete Buttigieg dhe kandidatë të tjerë.

Në debatin e javës së kaluar, Warren dhe Sanders u përplasën rreth disa komenteve të bëra në një bisedë private mes tyre rreth shanseve që zgjedhjet presidenciale të fitohen nga një grua. Senatori Sanders i zgjati dorën rivales së tij por ajo nuk ia shtrëngoi.

Tani, në ditët e fundit para se të hidhen votat e para në garën presidenciale demokrate për zgjedhjet e 2020-s, kandidatët kryesorë të partisë po e ndajnë kohën e tyre midis shteteve të rëndësishme të votimeve paraprake, Karolina e Jugut dhe Ajova, duke marrë pjesë në ceremoni të ndryshme për nder të Martin Luther Kingut.

Marshimi i së hënës mblodhi më shumë kandidatë sesa në dy debatet e fundit. Gjatë marshimit të tyre, në altoparlante buçiste fjalimi historik i Martin Luther Kingut “Unë kam një ëndërr”. zëri i amerikës

Gjyqi kundër Presidentit dhe argumentat e nxehta të palëve

Ligjvënës demokratë, aktorët kryesorë të procesit që synon shkarkimin e Presidentit dhe anëtarë të ekipit ligjor të zotit Trump, debatuan në distancë të dielën lidhur me atë nëse përpjekjet e Presidentit për të nxitur Ukrainën për të nisur një hetim nga i cili mund të përfitonte politikisht, përbënin shkelje që të nivelit që parashikon Kushtetuta për shkarkimin e një presidenti.

Gjyqi në Senat ndaj zotit Trump u hap zyrtarisht javën e kaluar dhe të martën do të dëgjohen argumentet hapëse të palëve. Por ndërkohë përfaqësuesit e ekipit ligjor të Presidentit me komentet e tyre në media të dielën, dhanë një shije të asaj që pritet në Senat.

Avokati Alan Dershowitz, një prej anëtarëve të ekipit që do të mbrojë zotin Trump tha për CNN-in se ai parashikon të provojë përpara senatorëve se “edhe nëse faktet e paraqitura janë të vërteta, ato nuk ngrihen në nivelin e një vepre që duhet të çonte në ngritjen e akuzave zyrtare ndaj zotit Trump me synim shkarkimin e tij nga detyra”, siç tha ai.

Të 100 anëtarët e Senatit gjatë procesit gjyqësor do të luajnë rolin e jurisë dhe do të vendosin mbi fatin e Presidentit Trump. Ata do të vendosin nëse zoti Trump ka kryer një “krim e kundërvajtje” të atij niveli që parashikon Kushtetuta amerikane për heqjen e një presidenti nga detyra.

Ndërsa gjyqi po afron mbetet e pamundur që Senati të shkarkojë zotin Trump, në kushtet kur shumica e tij përbëhet nga republikanët. Për shkarkimin e presidentit do të duheshin dy të tretat e votave të anëtarëve të Senatit.

Në korrikun e vitit të kaluar zoti Trump i kërkoi presidentit ukrainas Volodymyr Zelenskiy që të nisë një hetim ndaj kundërshtarit të tij më të fortë në radhët e demokratëve për garën e 2020-s, ish-Nënpresidentit Joe Biden dhe djalin e tij Hunter Biden.

Telefonata mes dy udhëheqësve ndodhi në të njëjtën kohë që zoti Trump mbante të bllokuar 391 milionë dollarëve ndihmë ushtarake për Kievin, ndihmë që më pas u lëvrua.

Zoti Dershowitz argumentoi se veprimet e zotit Trump nuk përbënin një sjellje kriminale. Ai tha se “nëse argumenti i tij triumfon” dhe Senati vendos se nuk ka pasur ndonjë vepër që mund të çojë në shkarkimin e Presidentit “nuk do të ketë nevojë për dëshmitarë” në gjyq dhe se “Senati duhet të votojë për ta shfajësuar zotin Trump ose të pushojë çështjen kundër tij”, siç tha ai.

Ligjvënësi Adam Schiff, udhëheqësi i grupit prej 7 ligjvënësish demokratë që do të shërbejnë si prokurorë gjatë gjyqin në Senat, tha për televizionin ABC se “faktet nuk po merren seriozisht” duke përmendur ndër të tjera se Presidenti pengoi me qindra miliona dollarë ndihmë ushtarake për një aleat në luftë me Rusinë.

Të shtunën, ligjvënësit e Dhomës së Përfaqësuesve të cilët po bëjnë presion për dënimin e zotit Trump si dhe ekipi mbrojtës i Presidentit paraqitën argumentat ligjore për këtë çështje.

Ligjvënësit e Dhomës thonë se është e qartë se “provat përcaktojnë plotësisht” se zoti Trump është fajtor për të dyja akuzat me të cilat përballet.

Ndërkohë ekipi juridik i zotit Trump e quan përpjekjen e fajësimit të tij “një sulm të rrezikshëm ndaj të drejtës së popullit amerikan për të zgjedhur lirisht presidentin”. zëri i amerikës

Eliot Engel letër admiralit James Foggo: Kujdes me deklaratat për Serbinë

Ligjvënësi amerikan, Eliot L. Engel, i bëri thirrje të shtunën admiralit amerikan James Foggo, komandant i marinës amerikane për Evropën, që të jetë i kujdesshëm në komentet e ardhshme rreth Serbisë, duke i tërhequr vëmendjen atij në shqetësimin e Shteteve të Bashkuara për orientimin e Beogradit dhe marrëdhëniet e tij më Moskën.

Zoti Engel që kryeson Komisionin për Punë të Jashtme të Dhomës së Përfaqësuesve në një letër dërguar admiralit Foggo, i cili është komandant i forcave të NATO-s më seli në Napoli, shpreh shqetësimin e tij rreth komenteve që admirali kishte bërë në një intervistë më 16 dhjetor të vitit të kaluar në Beograd rreth bashkëpunimit ndërmjet NATO-s dhe Serbisë që “nuk e pasqyrojnë në mëyrën e duhur politiken e Shteteve të Bashkuara dhe bien ndesh me një raport të Depatmentit të Mbrojtjes që është dërguar në Kongres më herët gjatë këtij viti.

Zoti Engel citon admiralin Foggo të ketë thënë se ‘unë e shoh bashkëpunimin (NATO-Serbi) duke u përmirësuar në mendjen time’. ‘Tani për tani ato janë partnerë dhe vendi juaj është shumë i lumtur me këtë, dhe kjo është e shkëlqyeshme. Ne jemi në rregull edhe më këtë. Kështu që ju do të zgjidhni dhe merrni atë që dëshironi të bëni dhe sa larg dëshironi të çoni këto marrëdhënie, dhe ne do të jemi atje për ju’.

“Brenga ime ka të bëjë me shmangien e shqetësimeve të Shteteve të Bashkuara lidhur me zgjerimin e lidhjeve në fushën e sigurisë ndërmjet Serbisë dhe Rusisë që nga viti 2012. Në raportin dërguar Kongresit me 31 maj të vitit 2019, Departamenti i Mbrojtjes shpjegon me hollësi marrëdhëniet e zgjeruara ndërmjet Serbisë dhe Rusisë”, shkruan zoti Engel duke nënvizuar disa prej qëndrimeve në shprehura në raport.

“Serbia siguron mjedisin më të favorshëm për ndikimin rus në Ballkanin Perëndimor … Para Partisë Përparimtare serbe të Presidentit Aleksandër Vuçiç që mori pushtetin në vitin 2012, marrëdhëniet dypalëshe ushtarake serbe me Rusinë ishin të pakta”

Pas zgjedhjeve të vitit 2012 në Serbi, Partia Përparimtare serbe ndërmori hapa për të shtuar marrëdhëniet e saj ushtarake me Rusinë, duke çuar në nënshkrimin e një marrëveshje zyrtare të bashkëpunimit në fushën e mbrojtjes në nëntor të vitit 2013 … Stërvitjet e para ndonjëherë ushtarake midis Rusisë dhe Serbisë, më emrin e koduar, SREM-2014, u zhvillua më vonë atë vit në Serbi, duke përfshirë më shumë se 400 forca ajrore ruse dhe serbe…. Në vitin 2014, Forcat e Armatosura Serbe organizuan një parakalim ushtarak për presidentin rus Vladimir Putin, duke lëvizur ia përshtatur datën e festës të këtyre forcave vizitës së presidenti Putin.

Ritmi i stërvitjeve është rritur që nga viti 2014… Serbia mori një dhuratë prej gjashtë avionësh MiG-29 të përdorur rus në tetor të vitit 2017…. Serbia ka porositur katër helikopterë Mi-35 dhe planifikon të porosis Sistemet e raketave tokë-ajër Pancir S1. Serbia gjithashtu mori një dhuratë prej 30 tankesh T-72 dhe 30 automjeteve BRDM-2 nga Rusia në këtë kohë”, citon zoti Engel raportin e Departamentit të Mbrojtjes.

Në letër zoti Engel shkruan se “Diplomatët e Shteteve të Bashkuara ka kohë që janë shprehur të pakënaqur me gatishmërinë e Beogradit për të kapërcyer kufirin midis Lindjes dhe Perëndimit. Serbia nuk e ka harmonizuar politikën e saj të jashtme me Bashkimin Evropian, me gjithë kërkesat në kuadër të procesit të anëtarësimit në BE dhe vazhdon të refuzojë një sërë përparësish të përbashkëta SHBA-BE”.

Për më tepër, “Serbia me dëshirë refuzon të ndjekë anëtarësimin në NATO” sipas raportit të lartpërmendur të Departamentit të Mbrojtjes. Ish Zëvendës Ndihmës Sekretari i Shtetit për Evropën (Hoyt Yee) në mënyrë të përmbledhur artikuloi shqetësimin e Shteteve të Bashkuara rreth Serbisë duke thënë, ‘Vendet duhet të zgjedhin se cilën rrugë të ndjekin, pavarësisht se sa e vështirë do të ishte, vendi duhet të bëjë zgjedhjet e tij strategjike, të cilat duhet të jenë pjesë e politikës zyrtare … Ju nuk mund të uleni në dy karrige në të njëjtën kohë. ”

Zoti Engel thekson në letër mirëkuptimin për “shpresën” e admiralit që Serbia një ditë të bashkohet me NATO-n, “por ajo ditë nuk është afër. Dhe rruga e saj drejt Bashkimit Evropian gjithashtu mbetet e mbyllur nëse nuk e njeh dhe nuk bën paqe me Kosovën. Prandaj, unë ju bëj thirrje që në komentet e ardhshme për Serbinë, ju më me kujdes të drejtpeshoni deklaratat tuaja në mënyrë që shqetësimet e Shteteve të Bashkuara për orientimin e Beogradit dhe marrëdhëniet e tij alarmante me Moskën, të shprehen me saktësi”, shkruan zoti Engel. zëri i amerikës

Mediat kundër rregullave shtrënguese gjatë gjyqit të Presidentit

Për të tretën herë në historinë e Shteteve të Bashkuara, senatorët janë shndërruar në jurinë që do të gjykojë presidentin amerikan e që do të vendosë nëse ekzistojnë prova të mjaftueshme për ta larguar nga detyra. Anëtarët e Kongresit japin llogari për vendimet e tyre përpara një shtypi të lirë që bën pyetje të vështira rreth veprimtarisë së tyre. Por siç njofton korrespondentja e Zërit të Amerikës Katherine Gypson, rregullat e reja për gjyqin e Presidentit Trump mund ta ndryshojnë këtë gjë.

Qasja është parimi themelor që u lejon gazetarëve t’u drejtojnë pyetje ligjvënësve amerikanë dhe këta të fundit të shpjegojnë veprimet e tyre nëpërmjet mediave. Në dallim nga Shtëpia e Bardhë, Pentagoni dhe Departamenti i Shtetit, në Kongres, gazetarëve u është dhënë gjithnjë një liri relativisht e gjerë veprimi.

“Bukuria e politikave që kemi në Shtetet e Bashkuara është se ne mundemi në fakt të përballemi me zyrtarët e zgjedhur dhe të mos i frikësohemi burgut. Kemi në fakt qasjen tek vendimmarrësit për t’i pyetur se çfarë qëndrimi kanë, madje edhe për situata të sikletshme”, thotë Al Tompkins, i Institutit “Poynter”.

Por kjo gjë po ndryshon me procesin gjyqësor ndaj Presidentit Trump. Protestat në godinën e Senatit gjatë konfirmimit të anëtarit të Gjykatës së Lartë Brett Kavanaugh, i kanë krijuar policisë së Kapitolit dhe maxhorancën republikane shqetësimin se diçka e ngjashme mund të ndodhë gjatë gjyqit të Presidentit Trump.

“Njerëzit ishin të përzier me protestuesit në të njëjtat mjedise. Shqetësimet se këtë radhë protestuesit mund të hyjnë edhe brenda sallës, u pasuan me masa të tepruara. Janë shtuar aq shumë masat e sigurisë, sa që e kanë bërë të pamundur për gazetarët të bëjnë punën e tyre”, thotë zoti Tompkins.

Kjo do të thotë se për ca kohë nuk do t’i shohim më gazetarët duke ndjekur senatorët që nuk duan të japin përgjigje…

Rregullat e reja janë kritikuar nga disa republikanë.

“Është thellësisht marrëzi… Nuk jam dakort. Senatorët janë burra e gra në moshë të rritur. Dimë si të themi ‘No comment. Jo, nuk dua t’i përgjigjem kësaj pyetjeje tani. Nuk jam gati’. Prandaj nuk e kuptoj pse po veprojmë kështu”, thotë Senatori republikan John Kennedy.

Shumë senatorë demokratë frikësohen se punimet në sallën e Senatit gjatë procesit gjyqësor ndaj Presidentit Trump mund të zhvillohen pa praninë e mediave gjatë pikave kyçe të procesit.

“Mendojmë që procesi të jetë i hapur nga fillimi në fund. Shpresoj të jetë kështu. Republikanët mund të votojnë sigurisht në çdo moment për të kaluar në proces me dyer të mbyllura. Ata kanë shumicën në këtë proces që përcaktohet nga vota. Mendoj që populli amerikan duhet të dijë çfarë ndodh këtu”, thotë Senatori demokrat Robert Menendez.

Në këtë mënyrë mund t’ju vështirësohet edhe më tej puna gazetarëve që do të përpiqen të informojnë publikun për procesin gjyqësor ndaj presidentit amerikan. Ky është një lloj testi për demokracinë amerikane që shfaqet një herë në një gjeneratë. Organizatat e mediave po punojnë dhe negociojnë për ta ruajtur këtë qasje kaq të rëndësishme.

Gjyqi në Senat: Ja ekipi që do të mbrojë Presidentin

Ekipi ligjor i Presidentit Donald Trump do të përfshijë ish-profesorin e së drejtës të universitetit Harvard Alan Dershowitz dhe Ken Starr, ish-këshilltarin e pavarur që drejtoi hetimin e çështjes “Whitewater” ndaj Presidentin Bill Clinton. Hetimet u përqëndruan në investime në fushën e pasurive të paluajtshme të Bill e Hillary Clinton-it si dhe bashkëpunëtorëve të tyre.

Sipas agjencisë “Associated Press” e cila i referohej një burimi që kishte informacion mbi këtë çështje ekipi ligjor i Presidentit Trump do të përfshijë gjithashtu dhe ish-Prokuroren e Përgjithshme të Floridës dhe aleaten e zotit Trump, Pam Bondi.

Zoti Dershowitz e konfirmoi rolin e tij në një seri postimesh në twitter të premten. Ai shkruante se “do të paraqesë gjatë gjyqit në Senat argumente kushtetuese kundër fajësimit të Presidentit dhe largimit të tij nga detyra”.

Ndërsa profesori Dershowitz nuk është i njëanshëm kur bëhet fjala për kushtetutën, ai e ka kundërshtuar ngritjen e akuzave për shkarkimin e Presidentit Bill Clinton dhe ka votuar për Hillary Clintonin. Ai beson se çështja në fjalë shkon në zemër të Kushtetutës sonë të fortë”, shkruante ai në një tjetër tweet.

Këshilltari i Shtëpisë së Bardhë Pat Cipollone dhe avokati personal i zotit Trump, Jay Sekulow, pritet të kenë rolet kryesore në ekipin e mbrojtjes. Anëtarë të tjerë të ekipit do të jenë Jane Raskin, i cili ishte pjesë e ekipit ligjor të presidentit gjatë hetimit mbi ndikimin e Rusisë në zgjedhje drejtuar nga ish-Prokurori i Posaçëm Robert Mueller si dhe Robert Ray, i cili ka qenë gjithashtu pjesë e hetimeve në kuadër të çështjes “Whitewater”.

Presidenti Trump akuzohet për abuzim me detyrën dhe pengimit të hetimeve të Kongresit.

Senati amerikan e nisi gjyqin ditën e enjte me betimin e senatorëve që do të shërbejnë në proces si gjykatës. Gjyqi nis ditën e martë të javës që vjen. zëri i amerikës

SHBA: “Marshimi i Grave” dhe mesazhi i lëvizjes

Mijëra gra pritet të marshojnë në disa qytete amerikane të shtunën, për të katërtin vit me radhë, në mbrojtje të një sërë çështjesh, përfshirë barazinë gjinore dhe të drejtat e grave.

Në dhjetëra qytete janë planifikuar tubime, përfshirë Uashingtonin, ku marshimi i parë i grave në 2017-n tërhoqi me qindra mijëra persona vetëm një ditë pas betimit të Presidentit Donald Trump.

Marshimi ka përfshirë një mesazh politik që kur nisi në vitin 2017, kur shumë prej pjesëmarrësve mbanin kapele rozë të thurura që janë kthyer në simbol të ndjenjave të grave kundër presidentit Trump.

Pas 2017-s politika vazhdoi të jetë një temë e fortë e “Marshimit të Grave” përfshirë edhe 2018-n kur organizatorët e zhvendosën marshimin në Nevada, një shtet fushë-beteje për zgjedhjet për Kongresin që u mbajtën po atë vit si dhe në 2019-n kur marshimi u kthye në Uashington.

Disa nga kandidatët demokratë për president në vitin 2020 planifikojnë të marrin pjesë këtë vit në Marshimin e Grave në qytete të ndryshme të vendit. Pete Buttigieg, ish-kryebashkiaku i South Bend-it planifikon të marrë pjesë në marshimin që mbahet në Reno të Nevadës ndërsa ish-guvernatori i Masaçusetsit Deval Patrick do të jetë në tubimin e Karolinës së Jugut. Senatori Michael Bennet dhe biznesmeni Andrew Yang do të marrin pjesë përkatësisht në Nju Hampshajër dhe Ajoua.

Që nga marshimi i parë, organizimi është përballur me polemika, që kanë përfshirë edhe drejtuesit e saj duke i vënë përballë akuzave për anti-semitizëm. Organizatorët i kanë mohuar vazhdimisht pretendimet. Tre nga katër bashkëdrejtuesit kryesorë të organizatës janë larguar nga grupi dhe organizata ka caktuar një bord të ri që përfshin tri gra hebreje.

Bashkëkryetarja aktuale e “Marshimit të Grave” Isa Noyola, theksoi në një deklaratë se ky do të jetë marshimi i fundit përpara zgjedhjeve të 2020-s.

Në vitin 2020, ne kemi një mundësi për të përfunduar atë që nisëm para tre vitesh, të largojmë Trump-in nga detyra“, tha ajo. zëri i amerikës

Pritet dënimi i ish-ligjvënësit amerikan

Chris Collins, një ish-ligjvënës amerikan nga Nju Jorku, një nga mbështetësit e kahershëm të Presidentit Donald Trump, pritet të marrë dënimin të premten pas u vetëdeklarua fajtor se ishte pjesë e një skeme për nxjerrje të informacioneve të brendshme.
Zoti Collins, u deklarua fajtor lidhur me akuzën për komplot e deklarata të rreme të dhëna përpara gjykatës federale të Manhatanit në muajin tetor, një ditë pasi kishte dhënë dorëheqjen si ligjvënës i Dhomës së Përfaqësuesve. Edhe pse ai përballet me një maksimum prej pesë vitesh burg për secilën nga dy akuzat, si pjesë e marrëveshjes ai mund të dënohet me më pak se pesë vite. Zoti Collins u dënua për nxjerrje të informacionit të brendshëm ndërsa ishte anëtar i bordit dhe gëzonte 16.8 për qind të aksioneve të një kompanie bioteknologjike australiane.

Pasi mësoi nga një email i dërguar nga shefi ekzekutiv i kompanisë se një ilaç eksperimental për sklerozën e shumfishtë kishte dështuar gjatë një prove klinike, zoti Collins ia kishte dhënë këtë informacion të birit, duke i kërkuar atij të shesë aksionet përpara se lajmi të bëhej publik gjë që do të shkaktonte potencialisht zhvlerësimin e tyre. Djali i ish-ligjvënësit e kishte përcjellë këtë informacion edhe tek të tjerë persona. zëri i amerikës

Gjyqi ndaj Presidentit Donald Trump vazhdon të martën

Njerëzit e përfshirë në procesin e gjykimit të Presidentit Donald Trump në Senat kanë përpara një fundjavë të gjatë për të reflektuar rreth roleve dhe përgjegjësive të tyre, falë festës kombëtare amerikane të Martin Luther Kingut.

Senati i dërgoi një lajmërim me shkrim Presidentit Trump të enjten, duke e njoftuar për gjyqin dhe akuzat ndaj tij dhe ai duhet të përgjigjet me shkrim brenda mëngjesit të së shtunës.

Gjyqi për shkarkimin e Presidentit Trump vjen në kohëra ndasish të thella në vend dhe ndërsa demokratët po konkurrojnë për të kandiduar përballë tij në zgjedhjet e ardhshme presidenciale.

Zyra për Llogaridhënien e Qeverisë (GAO), një entitet që mbikqyr qeverinë amerikane, konkludoi të enjten se Presidenti Trump shkeli ligjin buxhetor vitin e kaluar kur pezulloi ndihmën ushtarake për Ukrainën prej 391 milionë dollarësh që kishte miratuar Kongresi. Në të njëjtën kohë, ai i bëri presion Kievit të fillonte hetime që do ta ndihmonin atë politikisht. Ky vendim lidhet me thelbin e procesit për shkarkimin e Presidentit Trump.

Ndihmën që i duhej Ukrainës për luftën ndaj separatistëve pro-rusë në pjesën lindore të vendit, Presidenti Trump e zhbllokoi në shtator, pas 55 ditësh vonesë, dhe pa përftuar çeljen e hetimeve nga Presidenti ukrainas Volodymyr Zelenskiy ndaj njërit prej sfidantëve kryesorë demokratë, ish-Nënpresidentit Joe Biden, si dhe ndaj djalit të tij, Hunter Biden, i cili kishte qenë anëtar bordi i një kompanie ukrainase të gazit.

Por pas hetimit, Zyra për Llogaridhënien e Qeverisë (GAO) konkludoi se “zbatimi i përpiktë i ligjit nuk i lejon presidentit që prioritetet e politikave që Kongresi i ka përcaktuar me ligj, t’i zëvendësojë me përparësitë e politikave të tij”. Në raport përcaktohet se agjensia buxhetore, e kontrolluar nga Presidenti Trump, bllokoi livrimin e fondeve “për arsye politikash”, gjë që nuk e lejon ligji amerikan.

Vendimi i GAO’s u bë publik vetëm dy orë përpara fillimit zyrtar të gjyqit në Senat, ku janë ngritur dy akuza: se Presidenti Trump abuzoi me postin duke u përpjekur ta detyrojë Presidentin ukrainas Zelenskiy të çelë hetime ndaj Joe dhe Hunter Biden, ndërkohë që kishte pezulluar ndihmën ushtarake; si dhe se pengoi përpjekjet e Kongresit për të hetuar veprimet e tij në Ukrainë.

Shtatë ligjvënës, të emëruar si prokurorë të çështjes kundër Presidentit Trump, i paraqitën solemnisht akuzat gjatë një leximi në mesditën e së enjtes në Kapitol. Kryetari i Komisionit të Zbulimit të Dhomës së Përfaqësuesve, Adam Schiff, lexoi akuzat ndaj presidentit të 45-të të Shteteve të Bashkuara, në një seancë të zhvilluar vetëm tre herë në historinë prej dy shekujsh e gjysëm të Senatit amerikan.

Ligjvënësit-prokurorë nga Dhoma e Përfaqësuesve duhet të përgatisin dhe të paraqesin argumentat ligjore të shtunën dhe të hënën.

Kryetari i Gjykatës së Lartë të Shteteve të Bashkuara, John Roberts, bëri betimin për të marrë drejtimin e gjyqit ndaj Presidentit Trump. Pak minuta më vonë, u betuan përpara tij 99 nga 100 senatorët, të cilët do të shërbejnë si juri që do të vendosë për fatin e Presidentit Trump. (Mungonte Senatori James Inhofe, i shteti Oklahoma, për shkak të një emergjence familjare. Ai do ta bëjë betimin javën e ardhshme, kur të ketë filluar gjyqi.) Formula e betimit të ligjvënësve thotë se ata angazhohen të japin “drejtësi të paanshme”. Sidoqoftë, një numër i madh senatorësh e kanë deklaruar tashmë votën e tyre, nëse do të jetë për fajësinë apo pafajësinë e Presidentit Trump.

Pas kësaj pjese përgatitore, gjyqi “i vërtetë” pritet të fillojë të martën e ardhshme, në orën 1 pasdite, në sallën e Senatit.

Zyra për Menaxhimin dhe Buxhetin, po kështu edhe Shtëpia e Bardhë, e hodhën poshtë konkluzionin e GAO’s.

“Nuk jemi dakord me opinionin e GAO’s”, tha një zëdhënës i Zyrës për Menaxhimin dhe Buxhetin. “Zyra jonë ushtron autoritetin e saj për caktimin e fondeve, për t’u siguruar që dollarët e taksapaguesve të shpenzohen në përputhje me përparësitë e presidentit dhe me ligjin”.

Duke qenë se republikanët kanë shumicën në Senat (53 me 47), është pothuajse e sigurtë që Presidenti Trump do të dalë i pafajshëm dhe do të vazhdojë detyrën. Për ta shpallur atë fajtor për secilën nga dy akuzat, nevojiten votat e 2/3 të senatorëve. Disa republikanë kanë kritikuar përpjekjet e Presidentit Trump për të hapur hetime ndaj zotërinjve Biden.

Por asnjë republikan nuk ka bërë thirrje për shpalljen e tij fajtor dhe heqjen nga detyra, ndërsa jemi vetëm më pak se një vit larg momentit kur ai do të përballet me votuesit për një mandat të dytë në Shtëpinë e Bardhë. zëri i amerikës

Senati amerikan fillon gjyqin për procesin e shkarkimit të presidentit

Gjyqi për shkarkimin e mundshëm të Presidentit amerikan, Donald Trump filloi të enjten me një sërë procedurash ceremoniale që përgatisin terrenin për argumentet hapëse në fillim të javës së ardhshme. Është vetëm hera e tretë në historinë amerikane që senatorët do të gjykojnë një president amerikan dhe do të përcaktojnë nëse duhet të shkarkohet apo jo nga detyra. Siç njofton korrespondentja e Zërit të Amerikës, Katherine Gypson gjyqi mbahet ndërsa demokratët argumentojnë se prova të reja vërtetojnë se presidenti është fajtor për vendosjen e kushteve për ndihmën ndaj Ukrainës, në këmbim të interesave të tij politike.

Senatorët amerikanë bënë betimin dhe nënshkruan se do të gjykojnë në mënyrë të paanshme Presidentin Trump.

Ata do të dëgjojnë kryetarin e Komisionit të Dhomës së Përfaqësuesve për Zbulimin, Adam Schiff – dhe gjashtë ligjvënësit e tjerë në rolin e prokurorëve – që do të paraqesin argumentat se pse sipas tyre, presidenti Trump duhet të shkarkohet.

“Asnjë president në historinë e Republikës nuk ka urdhëruar një sfidë të plotë ndaj një hetimi për shkarkim. Ky abuzim me postin shërbeu për të mbuluar shkeljet e vetë presidentit”, tha zoti Schiff.

Procesi për akuzat e shkarkimit në Dhomën e Përfaqësuesve me shumicë demokrate, ishte një betejë e ashpër politike.

Udhëheqësi republikan, Mitch McConnell tha se në Senat do të ishte ndryshe.

“Kjo dhomë e Kongresit ekziston që të shikojmë përtej dramave të ditës dhe të kuptojmë se si veprimet tona do të ndikojnë tek brezat e ardhshëm”, tha ai.

Por demokratët thonë se procesi nuk mund të jetë i drejtë nëse senatorët nuk lejohen të dëgjojnë nga dëshmitarët dhe të shohin dokumentat që ata thonë se provojnë që Presidenti bllokoi ndihmën për Ukrainën në këmbim të hetimeve nga të cilat do të përfitonte fushata për rizgjedhjen e tij.

“Secilit nga ne do t’i duhet të vendosë nëse do ta fillojmë gjyqin me synimin për të zbuluar të vërtetën apo në shërbim të dëshirës së presidentit për të fshehur të vërtetën”, tha senatori demokrat Chuck Schumer.

Gjyqi filloi ndërkohë që një agjenci e pavarur qeveritare, njoftoi se administrata e Presidentit Trump kishte shkelur ligjin kur bllokoi ndihmën për Ukrainën.

Aleatët e Presidentit Trump në Senat thonë se nuk ka asgjë që justifikon shkarkimin.

“Departmenti i Mbrojtjes më tha që në fillim se ishin të shqetësuar për qeverinë e re në Ukrainë. Po të shohësh të dhënat, sasia e parave për Ukrainën ishte e njëjtë si përpara”, tha senatori republikan, Lindsey Graham.

Por Lev Parnas – një bashkëpunëtor i avokatit personal të Presidentit Trump, Rudy Giuliani – mund të bëhet dëshmitar në proces pasi tha se zoti Trump e dinte saktësisht se çfarë po bëhej me Ukrainën. Zoti Trump e mohon një gjë të tillë.

“Nuk mbaj mend të kem biseduar ndonjëherë me të”, tha ai.

Demokratët besojnë se këto informacione të reja do të rrisin presionin për të pranuar dëshmitarë.

“Opinioni publik është rritur në favor të dëshmitarëve dhe dokumentave. Dhe republikanët duhet përballen me publikun për këtë çështje”, tha Nancy Pelosi, Kryetare e Dhomës së Përfaqësuesve.

Gjyqi pritet të fillojë plotësisht të martën kur senatorët të kthehen nga një fundjavë e gjatë feste.

Vendimi: administrata Trump shkeli ligjin duke bllokuar ndihmën për Ukrainën

Presidenti amerikan Donald Trump ka shkelur ligjin vitin e kaluar, duke penguar përkohësisht 391 milionë dollarë ndihmë ushtarake të miratuar nga Kongresi për Ukrainën, ndërsa i bënte presion Kievit të niste hetimet për të përfituar politikisht. Në këtë përfundim ka dalë të enjten një agjenci mbikëqyrëse e veprimtarisë së qeverisë federale, një vendim që përbën thelbin e procesit që synon shkarkimin presidentit amerikan.

Zoti Trump e liroi ndihmën që Ukraina do ta përdorte për të mbështetur përpjekjet e saj kundër separatistëve pro-rusë në pjesën lindore të vendit në muajin shtator, pasi e bllokoi atë për 55 ditë edhe pse Presidenti ukrainas Volodymyr Zelenskiy nuk nisi hetime ndaj ish-Nënpresidentin Joe Biden dhe djalit të tij Hunter Biden. Joe Biden është një nga kundërshtarët kryesorë të zotit Trump për zgjedhjet e 2020-s.

Pas një hetimi të kryer nga zyra e Kongresit për Kontrollin e Veprimtarisë së Qeverisë Federale ajo doli në përfundimin se “zbatimi me besnikëri i ligjit nuk e lejon presidentin të zëvendësojë përparësitë e politikave të tij me ato që ka miratuar Kongresi”. Aty thuhej se Agjencia e Buxhetit e kontrolluar nga zoti Trump kishte bllokuar lëshimin e parave “për arsye politikash”, gjë që nuk është e lejueshme sipas ligjit amerikan.

Vendimi i agjencisë amerikane u njoftua më pak se dy orë përpara fillimit zyrtarisht të procesit të gjykimit në Senat të Presidentit Trump. Zoti Trump akuzohet për abuzim me detyrën për shkak të përpjekjes së dyshuar për të nxitur zotin Zelenskiy të nisë hetimet ndaj zotit Biden dhe djalit të tij ndërsa mbante të bllokuar ndihmën ushtarake si dhe për pengim të hetimeve që po kryente Kongresi mbi këtë çështje.

Në kushtet kur republikanët kanë shumicën në Senat, 53 vende nga 100 gjithsej, është pothuajse e sigurt se ai do të lirohet nga akuzat. Shkarkimi i presidentit kërkon një shumicë prej dy të tretash të anëtarëve të Senatit.

Disa republikanë e kanë kritikuar kërkesën e zotit Trump për të hetuar zotin Biden, por asnjë prej tyre nuk ka kërkuar largimin e tij nga detyra ndërsa ka mbetur më pak se një vit nga gara e radhës presidenciale. zëri i amerikës

Parnas: Presidenti ishte në dijeni të lëvizjeve të Giulianit

Lev Parnas

Lev Parnas, bashkëpunëtori i akuzuar i avokatit personal të Presidentit Trump, i cili u përpoq të bindë Ukrainën që të hetonte ish-nënpresidentin Joe Biden, tha se Presidenti ishte në dijeni të aktiviteteve të avokatit të tij personal Rudy Giuliani në Ukrainë.

Presidenti Trump e ka mohuar se e dërgoi avokatin personal Rudi Giuliani në Ukrainë për të kërkuar fakte diskredituese për zotin Biden, rivalin e tij në zgjedhjet presidenciale të 2020-s.

Por Lev Parnas i tha rrjetit televiziv MSNBC se Presidenti Trump ishte në dijeni të të gjitha lëvizjeve të tij. “Unë nuk do të bëja asgjë pa pëlqimin e Rudy Giulianit ose të presidentit,” tha ai.

Parnas tha gjithashtu se ai kishte shkuar në terren pikërisht për të bërë punën e tyre.

Parnas, biznesmen me origjinë ruse dhe Igor Fruman, një bashkëpunëtor tjetër i zotit Giuliani, janë akuzuar për kontribute të paligjshme ndaj fushatës së kandidatit Trump në zgjedhjet e 2016. Që dy kanë deklaruar se nuk janë fajtorë.

Parnas i tha rrjetit MSNBC se udhëheqësit e Ukrainës nuk kishin asnjë arsye të takoheshin me të. “Por ishin ata, njerëzit e Presidentit Trump, që u thanë të takoheshin me mua. Dhe ky është sekreti që ata përpiqen të fshehin,” tha Lev Parnas.

Ai shtoi se interesi i Presidentit Trump për Ukrainën nuk ishte aspak çrrënjosja e korrupsionit qeveritar. Gjithçka ishte “për Joe Bidenin dhe të birin, Hunter Biden”.

I pyetur për pohimet e Presidentit Trump se nuk e njeh atë, Lev Parnas tha: “Ai gënjen” dhe shtoi se ai ishte me avokatin Giuliani katër ose pesë ditë në javë në Ukrainë, kohë gjatë së cilës Presidenti Trump ishte në kontakt të vazhdueshëm me avokatin. zëri i amerikës


Send this to a friend