Teksasi u bë shteti i parë amerikan që kaloi të mërkurën 1 milion raste me koronavirus; Kalifornia është në vend të dytë me një diferencë që po ngushtohet.

Zyrtarë të shëndetësisë në shtetin e dytë më të madh për nga popullsia regjistruan 10 800 raste të reja të martën – një shifër e re rekord. Megjithëse nuk ka sinjale që zyrtarët do të vënë në zbatim masa emergjente kufizuese për të ngadalësuar përhapjen, agjencia e lajmeve Associated Press njoftoi se një zyrtar bashkiak në Fort Uorth, qyteti i pestë më i madh në këtë shtet, po bën thirrje për pezullimin e aktiviteteve sportive për fëmijët dhe të rinjtë. Disa spitale rurale kanë ngritur tenda që shërbejnë si klinika shëndetësore.

Të mërkurën, zyrtarë shtetërorë të shëndetësisë njoftuan për 6,779 pacientë të shtruar në spitale, pasi pati 609 pacientë të rinj – një ndër rritjet më të theksuara ditore të regjistruara në këtë shtet.

Gjendja në Vend

SHBA regjistroi 61,964 pacientë të shtruar në spitale të martën, duke thyer me më shumë se 2000 pacientë nivelin rekord për rastet brenda një dite të shënuara në mes të prillit.

Me keqësimin e gjendjes së pandemisë, Qendra për Kontrollin dhe Parandalimin e Sëmundjeve ka rishikuar udhëzimet lidhur me maskat, duke thënë të martën se vënia e maskave nuk mbron vetëm të tjerët, por edhe personin që mban maskë.

Qendra citon disa studime që konfirmojnë se “vënia e maskave ndihmon për të kontrolluar përhapjen e virusit, përfshirë një studim me dy stiliste që mbanin maska, megjithëse ishin të infektuara dhe kishin simptoma të sëmundjes. Studimi arrin në përfundimin se nga që kishin vënë maskë, stilistet nuk infektuan 67 klientë që më pas u kontaktuan nga gjurmuesit e përhapjes së infeksionit”.

SHBA, rreziku i rikthimit të një vale të dytë të pandemisë

Guvernatori i Nju Jorkut Andrew Cuomo vendosi të mërkurën një raund të ri kufizimesh që synojnë frenimin e përhapjes së koronavirusit ndërsa niveli i infeksioneve dhe shtrimeve në spital po rritet në shtetin që ishte epiqendra e shpërthimit në SHBA, në fazat e hershme të pandemisë.

Zoti Cuomo urdhëroi mbylljen e bareve, restorante dhe palestra në të gjithë shtetin duke filluar prej orës 10:00 në mbrëmje si dhe kufizoi në 10, numrin e njerëzve që mund të marrin pjesë në festa private.

Masat e reja, të cilat hyjnë në fuqi të premten, vijnë një ditë pasi Kalifornia dhe disa shtete të Amerikës qendrore forcuan kufizimet ndaj banorëve të martën në një përpjekje për të frenuar përhapjen e shpejtë të virusit.

“Ky është shansi ynë i fundit për të ndaluar një valë të dytë“, shkruante në një postim në twitter të mërkurën kryebashkiaku i qytetit të Nju Jorkut Bill de Blasio.

Ndërsa numri i infeksioneve, shtrimeve në spital dhe vdekjeve si pasojë e COVID-19-s po rriten në të gjithë vendin, po shtohen gjithnjë e më shumë sinjalet se një valë e dytë mund të përfshijë zonat në verilindje, të cilat ia kanë dalë deri tani të vendosin nën kontroll pandeminë pas goditjes që morën në pranverë.

CDC-ja ka raportuar rreth 240 mijë vdekje nga koronavirusi.

Shtetet e Bashkuara raportuan më shumë se 1,450 vdekje të martën, shifra më e lartë e regjistruar brenda një dite që nga mesi i gushtit, sipas një analize të agjencisë Reuters.

Në Nju Xhersi, një nga pikat e nxehta të hershme në SHBA, një rritje e madhe e rasteve në Newark, qyteti më i madh i shtetit, detyroi Kryetarin e Bashkisë Ras Baraka të zbatojë masa agresive, përfshirë një ndalim-qarkullimi për zona të caktuara.

Në Newark, niveli i rasteve pozitive me koronavirus u rrit në 19 për qind, më shumë se dyfishi i mesatares shtatë-ditore të shtetit prej 7.74 për qind siç tha zoti Baraka në një deklaratë të martën.

Guvernatori i Nju Xhersit Phil Murphy njoftoi disa kufizime të hënën si përgjigje ndaj rritjes së rasteve me COVID-19 në shtet dhe shpërthimit të rasteve pozitive mes banakierëve.

Në shtetin e Marilendit, ku shkalla e rasteve pozitive me COVID-19 u regjistrua 5.6 për qind të mërkurën, zyrtarët njoftuan për rritje të numrit të shtrimeve në spital.

Më shumë se 800 persona po trajtohen për koronavirus në spitalet e këtij shteti që nga e mërkura, numri më i lartë ditor që nga muaji prill sipas Mike Ricci, drejtori i komunikimit i Guvernatorit Larry Hogan.

Të martën një numër rekord njerëzish kanë vdekur si pasojë e COVID-19 në disa shtete qendrore e perëndimore, përfshirë Alaskën, Indianën, Mizurin, Dakotën e Veriut, Uiskonsin dhe në shtetin Uajoming.

Zyrtarët në shtetet më të goditura nga virusi iu lutën banorëve të qëndrojnë sa më shumë në shtëpi e të dëgjojnë këshillat e ekspertëve duke vendosur maska, duke larë duart dhe duke ruajtur distancën fizike.

zëri i amerikës

Presidenti i zgjedhur Joe Biden ka zgjedhur këshilltarin e tij të vjetër Ron Klain për të shërbyer përsëri në rolin e shefit të stafit të tij, duke vendosur një ndihmës me përvojë prej disa dekadash në rolin kryesor në stafin e presidentit.

Zoti Klain do të drejtojë një Shtëpi të Bardhë që ka të ngjarë të jetë e përqëndruar tek përgjigja ndaj pandemisë së koronavirusit, e cila vazhdon të përhapet pa kontroll në të gjithë vendin. Ai do të përballet gjithashtu me sfidën për të punuar me një Kongres të ndarë që mund të përfshijë një Senat të udhëhequr nga republikanët. Zoti Klain shërbeu si koordinator për përgjigjen ndaj Ebolës gjatë shpërthimit të virusit në vitin 2014.

Në një deklaratë të mërkurën mbrëma, zoti Biden u shpreh se ai zgjodhi zotin Klain për këtë post sepse përvoja e tij e gjatë në Uashington e kishte përgatitur atë për sfida të tilla.

“Përvoja e tij e thellë dhe e larmishme dhe aftësia për të punuar me njerëz të të gjithë spektrit politik është pikërisht ajo që më duhet në një shef të stafit të Shtëpisë së Bardhë ndërsa përballemi me këtë moment krize dhe bashkojmë vendin”, tha zoti Biden.

Zoti Klain shërbeu si shef i personelit të zotit Biden gjatë mandatit të parë të presidentit Barack Obama, ishte shef i personelit të nënpresidentit Al Gore në mes të viteve 1990 dhe ishte një nga këshilltarët kryesorë në fushatën e zotit Biden, duke udhëhequr përgatitjet e debatit të tij dhe përgjigjen ndaj koronavirusit. Ai është njohur dhe ka punuar me zotin Biden që nga fushata presidenciale e demokratëve në vitin 1987.

Zgjedhja e zotit Klain nënvizon përpjekjen që administrata e ardhshme Biden do të bëjë në përgjigjen e saj ndaj koronavirusit qysh ditën e parë. Klain ka përvojë në shëndetin publik si koordinator i përgjigjes për Ebolën dhe luajti një rol kryesor në hartimin dhe zbatimin e planit të rimëkëmbjes ekonomike të administratës Obama në vitin 2009. zëri i amerikës

Pothuajse 80 përqind e amerikanëve, përfshirë më shumë se gjysmën e republikanëve, njohin presidentin e zgjedhur Joe Biden si fitues të zgjedhjeve të 3 nëntorit pasi shumica e agjencive të lajmeve e shpallën atë fitues të garës bazuar në epërsinë e tij në shtetet fushëbetejë, sipas një sondazhi të agjencisë së lajmeve Reuters dhe kompanisë Ipsos.

Ndërsa gara me presidentin e tanishëm republikan Donald Trump ende mbeti e papërcaktuar në tre shtete deri të martën vonë pasdite, Biden, të cilit i duheshin 270 vota të Kolegjit Zgjedhor për të fituar, kishte 279 kundrejt 214 votave elektorale të Presidentit Trump, sipas organizatës kërkimore “Edison Research”.

Biden mori 76.3 milionë vota, ose 50.7 përqind të të gjitha votave të numëruara deri të martën, ndërsa Presidenti Trump mori 71.6 milionë, ose 47.6 përqind të totalit të votave.

Anketa kombëtare Reuters/Ipsos, e cila u bë mes të shtunës dhe pasditës së të martës, zbuloi se 79 përqind e të rriturve në Shtetet e Bashkuara besojnë se Biden fitoi zgjedhjet presidenciale. 13 përqind e pjesëmarrësve në anketë thanë se zgjedhjet nuk janë vendosur ende, 3 përqind thanë se Trump fitoi dhe 5 përqind thanë se nuk e dinin rezultatin.

Rezultatet u ndanë disi përgjatë vijave partiake: rreth gjashtë në 10 republikanë dhe pothuajse çdo demokrat thanë se Biden i fitoi zgjedhjet.

“Edison Research”, organizata e cila bëri exit-pollet për agjencinë e lajmeve Reuters dhe mediat kryesore, të shtunën e shpallën zotin Biden fitues të zgjedhjeve pasi ai e zgjeroi epërsinë ndaj Presidentit Trump në Pensilvani.

Presidenti Trump ende nuk e ka njohur rezultatin e zgjedhjeve. Ai shpalli fitoren para kohe, shumë kohë para përfundimit të numërimit të votave dhe është ankuar pa dhënë prova se ai është viktimë e manipulimit të gjerë të votave.

Pretendimet e tij janë përsëritur nga anëtarë të kabinetit të tij.

Prokurori i Përgjithshëm amerikan, William Barr ka autorizuar nisjen e hetimeve federale mbi pretendime “substanciale” për parregullsi në votime dhe sekretari i shtetit Mike Pompeo të martën tha se ai parashikon “një tranzicion të qetë në një administratë të dytë të Presidentit Trump”.

Sondazhi i Reuters/Ipsos ishte pjesë e një sondazhi më të gjerë të zhvilluar mes ditës së premte dhe të martës, dhe përfshinte përgjigje të marra para shpalljes së fituesit të garës presidenciale nga mediat.

Sondazhi tregoi se 70 përqind e amerikanëve, përfshirë 83 përqind të demokratëve dhe 59 përqind e republikanëve besojnë se zyrtarët e tyre lokalë të zgjedhjeve e “bënë punën me sinqeritet”.

Sondazhi zbuloi gjithashtu se 72 përqind e pjesëmarrësve mendojnë se kandidati që ka marrë më pak vota elektorale duhet të pranojë humbjen, dhe 60 përqind e tyre mendojnë se do të ketë një transferim paqësor të pushtetit kur mandati i Presidentit Trump të përfundojë në janar.

zëri i amerikës

Presidenti i zgjedhur Joe Biden tha të martën se asgjë nuk do ta ndalë transferimin e pushtetit në SHBA, megjithëse Presidenti Donald Trump pretendon pa prova se zgjedhjet u karakterizuan nga mashtrime dhe disa prej aleatëve të tij republikanë mbështesin proceset ligjore të hapura për këtë qëllim.

Kreu i shumicës republikane të Senatit, Mitch McConnell ka mbështetur të drejtën e Presidentit Trump për të ndërmarrë sfida ligjore ndaj fitores së zotit Biden në disa shtete “fushëbetejë” si Pensilvania. Disa të republikanë me pozita të larta në Senat janë përpjekur të ngjallin dyshime për rezultatin.

Zoti Biden siguroi më shumë se 270 votat e nevojshme të Kolegjit Zgjedhor, duke fituar Pensilvaninë të shtunën pas katër ditësh të tensionuara të numërimit, i cili u vonua për shkak të rritjes së numrit të fletëvotimeve me postë.

Zoti Biden tha në një fjalim në Delauer se ekipi i tij po vazhdon punën për formimin e një administrate të re që do të nisë funksionimin në Ditën e Inaugurimit, më 20 Janar 2021, sido që të jetë.

“Ne do të vazhdojmë, duke ecur së bashku, në mënyrë konsistente për të formuar administratën tonë, Shtëpinë e Bardhë, dhe për të shqyrtuar se cilët njerëz do të zgjedhim për pozitat e Kabinetit. Asgjë nuk do ta ndalë këtë,” tha ai.

Zoti Biden tha se ishte “turp” që zoti Trump nuk i ka pranuar zgjedhjet.

Sekretari amerikan i Shtetit Mike Pompeo parashikoi një administratë të dytë Trump në komentet që bëri të martën, të cilat ishin në kundërshtim me urimet e bëra në biseda telefonike midis zotit Biden dhe udhëheqësve të Britanisë, Francës, Gjermanisë dhe Irlandës.

“Me disa përjashtime të kuptueshme, e gjithë Partia Republikane është vënë në një pozicion frikësimi të butë nga presidenti, por ka vetëm një president në një kohë,” tha zoti Biden, i cili buzëqeshi kur u pyet në lidhje me komentet e zotit Pompeo.

Më pas, në një intervistë me Fox News, zoti Pompeo duket se i zbuti komentet e tij. Ai tha: “Unë kam shumë besim se do të kemi një tranzicion të mirë,
se do të sigurohemi që kushdo që është në detyrë në mesditën e 20 janarit do t’i ketë të gjitha mjetet në dispozicion për të mbajtur të sigurt amerikanët.”

Në seancën e parë me pyetje-përgjigje që nga fitorja e tij, zoti Biden u pyet se çfarë do t’i thoshte zotit Trump, nëse ishte duke e parë në televizion atë moment.

Presidenti i zgjedhur u përgjigj: “Zoti President, mezi pres të flas me ju”.

zëri i amerikës

Pas fitores me rezultat të ngushtë, Presidenti i zgjedhur Joe Biden pritet të marrë drejtimin e vendit të ndarë politikisht që po përballet me pandeminë vdekjeprurëse dhe ekonominë e dëmtuar rëndë prej saj. Analistët mendojnë se suksesi i demokratit të moderuar mund të varet nga tejkalimi i dallimeve politike me republikanët dhe sigurimi i përkrahjes së progresistëve të partisë së tij.

Presidenti i zgjedhur Joe Biden premtoi gjatë fushatës të zgjerojë mundësitë për qasje në kujdesin shëndetësor, ndihma për punëtorët me pahë të ulët dhe investime në energjinëp e pastër duke krijuar miliona vende të reja pune. Por sfida e tij e parë do të jetë trajtimi i pandemisë së koronavirusit, që sipas Universitetit Johns Hopkins ka shkaktuar mbi 237 vdekje në ShBA.

“Nuk do të kursejë përpjekjet dhe angazhimin për të frenuar pandeminë“, tha Presidenti i zgjedhur, Joe Biden.

Zoti Biden të hënën themeloi grupin e punës kundër koronavirusit, i cili do të përqëndrohet në shtimin e testimeve, rritjen e prodhimit të pajisjeve mbrojtëse për punonjësit e kujdesit shëndetësorë si dhe zhvillimin dhe shpërndarjen e vaksinave.

Por, suksesi i axhendës së tij, varet nga lëvizjet e zotit Biden për të tejkaluar dallimet partiake që janë shtuar gjatë mandatit të Presidentit në largim, Donald Trump.

“Ndarjet janë të thella. Shpresoj të futemi në një shteg shërimi. Nuk do të ndodhë as shpejtë e as lehtë“, thotë David Redlawsk, Profesor i Politikave në Universitetin e Delauerit.

Zoti Biden mund të përballet me kundërshtim të madh nga udhëheqësi i republikanëve në Senat, Mitch McConnell, i cili do të përcaktojë axhendën e kësaj dhome të kongresit, nëse republikanët fitojnë një nga dy garat e balotazhit në Xhorxhia në janar.

“Zoti McConnel mund të mos lëvizë nga qëndrimet e tij dhe të mos lejojë nisma liberale”, thotë Shannon O’Brien, Profesore e Politikave amerikane.

Presidenti i zgjedhur shihet si njeriu i përshtatshëm për të tejkaluar dallimet, pasi ai ka shërbyer për dekada si senator dhe më pas nënpresident në administratën Obama. Raporti i tij me zotin McConnel dhe të tjerët do të vihet në provë.

“Ai mund të shfrytëzojë marrëdhëniet e tij për të ndërtuar koalicione të mundshme që mbase nuk i kemi parë në katër vitet e fundit”, tha Jeff Bennet, Profesor komunikimi në Universitetin Vanderbilt.

Zoti Biden ka theksuar nevojën e bashkëpunimit midis partive për të arritur të mirën e përgjithshme.

“Për të pasur sukses, duhet të mos i shohim kundërshtarët si armiq. Nuk jemi armiq, jemi amerikanë“, deklaroi Presidenti i zgjedhur Joe Biden.

Por udhëheqësi demokrat do të përballet gjithashtu me presionin e krahut më liberal të partisë së tij, të ashtuquajturit progresistët, që duan një sistem të përgjithshëm shëndetësor të financuar nga qeveria dhe masa agresive për luftimin e ndryshimeve klimatike.

Disa demokratë të ekstremit të majtë, si ligjvënësja e Nju Jorkut, Aleksandria Ocasio-Cortez, kanë shprehur tashmë zhgënjimin, pasi sipas saj demokratët e moderuar, pasi zgjidhen braktisin kauzat progresive dhe kërkojnë marrëveshje me republikanët.

Nënpresidentja e zgjedhur Kamala Harris hyri në histori këtë javë duke u bërë gruaja e parë që fiton zgjedhjet. Materiali në vazhdim na njeh me rrugën që e solli zonjën Harris në pozicionin e dytë më të fuqishëm në qeverinë amerikane.

Një moment historik në Shtetet e Bashkuara…

“Ndërsa mund të jem gruaja e parë në këtë post, nuk do të jem e fundit”, tha nënpresidentja e zgjedhur.

56-vjeçarja Harris falënderoi presidentin e zgjedhur Joe Biden dhe votuesit…. që e zgjodhën atë për t’u bërë gruaja e parë me ngjyrë dhe indiano-amerikane që do të shërbejë si nënpresidente e Shteteve të Bashkuara.

“Ne kemi pasur gra në Gjykatën e Lartë. Kemi Nancy Pelosin si kryetare të Dhomës së Përfaqësuesve në Kongres, por asnjëherë nuk kemi patur një grua në degën ekzekutive si nënpresidente – ende jo si presidente. Dhe jo vetëm kaq, por kemi një grua me ngjyrë, një grua nga prindër emigrantësh që erdhën në këtë vend për një jetë më të mirë”, thotë Barbara Perry me Universitetin e Virxhinias.

Vajza e një nëne indiane dhe një babai xhamajkan, zonja Harris u rrit në Oakland, të Kalifornisë. Një pikturë murale e saj është tani në shkollën ku ajo çohej me autobuz si fëmijë, si pjesë e përpjekjeve të integrimit racor.

“Ajo theu kaq shumë barriera të ngurta për kaq shumë gra”, tha ligjvënësja demokrate Barbara Lee.

E diplomuar në Universitetin Howard, një kolegj i përbërë kryesisht nga studentë me ngjyrë në Uashington, Harris u bë prokurorja e parë grua me ngjyrë në San Francisko në vitin 2004 dhe më pas Prokurore e Përgjithshme e Kalifornisë në vitin 2010.

Gjatë protestave të lëvizjes “Black Lives Matter” këtë verë, disa përfaqësues progresistë u ankuan se zonja Harris kishte qenë një prokurore shumë e ashpër, kishte marrë pozicione kontradiktore mbi dënimin me vdekje dhe nuk arriti ta mbante policinë përgjegjëse për sjellje të ashpra.

Kamala Harris për herë të parë hyri në histori në Kaliforni kur u zgjodh në Senatin amerikan.

“Është e rëndësishme që amerikanët të shohin në pushtet, njerëz që duken si vetë ata”, thotë Shannon Bow O’Brien me Universitetin e Teksasit.

Kamala Harris – e cila flet shpesh për rolin e saj si teze dhe nënë e fëmijëve të bashkëshortit të saj – është e martuar me avokatin Doug Emhoff, i cili tani do të jetë zotëria i dytë – një pozicion krejtësisht i ri në historinë e Shtëpisë së Bardhë. Dhe ndërsa puna më e rëndësishme për një nënpresidente është të jetë gati të marrë rolin e presidentit nëse është e nevojshme, analistët thonë se Kamala Harris mund të trumpetojë arritjet e saj historike.

“Ajo mund të jetë një grua-shteti që do të përfaqësojë Shtetet e Bashkuara jashtë, por mendoj se ajo ashtu do të udhëtojë kudo edhe brenda Shteteve të Bashkuara, për të përhapur simbolikën e asaj që po bën”, thotë Barbara Perry.

Një rol i ri global në Shtëpinë e Bardhë – që po festohet deri në gjysmën tjetër të botë, në fshatin e paraardhësve të saj në Indi.

Ndërsa Presidenti Donald Trump ka refuzuar të pranojë humbjen e zgjedhjeve dhe pretendon për manipulime në numërimin e votave, administrata e tij ende nuk ka filluar të ndihmojë fituesin e parashikuar, Presidentin e zgjedhur Joe Biden, në fazat fillestare të marrjes së kontrollit të qeverisë.

Agjencia qeveritare që njihet shkurtimisht si GSA ose Administrata e Shërbimeve të Përgjithshme, ka përgjegjësinë për të njohur zyrtarisht zotin Biden si presidentin e ri dhe për të filluar procesin e kalimit të pushtetit, që zyrtarisht bëhet ditën përurimit të presidentit me 20 janar. Agjencia cakton zyrat për ekipin e tranzicionit të zotit Biden në mjediset qeveritare dhe ndihmon në detyra të tjera të nevojshme. Por Emily Murphy, kreu i agjencisë nuk e ka filluar procesin.

Një zëdhënës i Administratës së Shërbimeve të Përgjithshme (GSA) tha se agjencia nuk do të fillojë procesin e tranzicionit deri sa fitorja e zotit Biden të çertifikohet zyrtarisht, por është e paqartë se kur mund të ndodhë kjo, meqënëse ende vazhdon numërimi i votave në një pjesë të madhe të vendit.

Rezultati i zgjedhjeve është i paqartë vetëm në pak shtete dhe organizatat kryesore të medias kanë nxjerrë demokratin Biden si fitues. Presidenti Trump nuk ka pranuar të njohë rezultatin ndërsa fushata e tij ka hapur disa padi ligjore duke pretenduar, pa prova deri tani, se parregullsitë në votimet e së martës, dhe ditët pasuese të numërimit të votave i kushtuan atij fitoren e zgjedhjeve.

Zoti Trump shpreson që paditë ligjore do ta ndihmojnë atë të përmbysë rezultatin e votave të fituara nga zoti Biden në Kolegjin Elektoral, që përcakton fituesin e zgjedhjeve presidenciale, dhe jo të votës popullore, megjithëse zoti Biden udhëheq edhe me votën popullore.

Udhëheqësi i shumicës së senatit Mitch McConnell tha të hënën se Presidenti Trump, “ka 100% të drejtë të shqyrtojë akuzat për parregullsi dhe të peshojë alternativat ligjore”. “Institucionet tona janë ndërtuar pikërisht për këtë,” tha zoti McConnel në Senat, ndërsa shtoi se procesi do të zhvillohet dhe “do të arrijë në zgjidhjen e tij”.

Zoti Biden dhe Nënpresidentja e zgjedhur Kamala Harris po vazhdojnë me planet e tyre të tranzicionit, fillimisht duke u takuar me ekspertë të shëndetit lidhur me përpjekjet për frenimin e pandemisë së koronavirusit në Shtetet e Bashkuara. Sipas të dhënave nga Universiteti Johns Hopkins, virusi u ka marrë jetën 237 mijë amerikanëve ndërsa 10 milionë të tjerë rezultojnë të infektuar. Ndërkohë, kampi i zotit Biden po kërkon bashkëpunim për tranzicionin nga zyrtarët e Presidentit Trump.

Zonja Jen Psaki, ndihmëse e zotit Biden në procesin e tranzicionit, tha të dielën në rrjetin Twitter se, “Siguria kombëtare dhe interesat ekonomike të Amerikës varen nga sinjalet e qarta dhe të shpejta të administratës se qeveria e Shteteve të Bashkuara do të respektojë vullnetin e popullit amerikan dhe do të angazhohet për një transferim të qetë dhe paqësor të pushtetit.”

Akti i njohjes së “fituesit të pritshëm” nga GSA, i hap rrugën ekipit të tranzicionit të adminisitratës së re të ketë qasje në kompjuterat qeveritarë, i siguron atij mbështetje logjistike, si dhe i paguan pagat.e tyre. Buxheti i tranzicionit për këtë vit është parashikuar në 10 milionë dollarë.

Zyrtarët e rinj pajisen me adresë emaili qeveritare dhe kanë zyra në çdo agjenci qeveritare. Zyrtarët po ashtu mund të fillojnë të plotësojnë formularët përkatës mbi të ardhurat financiare dhe konfliktet e interesit, para se të marrin detyra e reja qeveritare.

Qendra për Tranzicionin Presidencial, një organ jopartiak, po ashtu u kërkoi zyrtarëve të administratës së zotit Trump që të “fillojnë menjëherë procesin e tranzicionit paszgjedhor, që ekipi i zotit Biden të përfitojë plotësisht nga burimet e disponueshme sipas Aktit të Tranzicionit Presidencial”. Grupi tha se, “Kjo ishte një fushatë e ashpër, por historia është e mbushur me shembuj të presidentëve që dolën nga fushata të tilla dhe që ndihmuan me mirësjellje pasardhësit e tyre.”

Presidenti Donald Trump njoftoi të hënën se ka larguar nga detyra Sekretarin e Mbrojtjes Mark Esper dhe se e ka zëvendësuar atë me drejtorin e Qendrës Kombëtare Kundër Terrorizmit, Christopher Miller. Ai tha se zoti Miller do të fillonte menjëherë detyrën si Sekretar i Mbrojtjes në detyrë.

“Mark Esper e ka përfunduar detyrën“, shkruante zoti Trump në Twitter. “Jam i kënaqur të njoftoj se Christopher C. Miller, drejtori shumë i respektuar i Qendrës Kombëtare Kundër-Terrorizmit (i konfirmuar unanimisht nga Senati), do të jetë sekretari në detyrës i Mbrojtjes, vendim që hyn në fuqi menjëherë“, siç shkruante ai.

Largimi i zotit Esper pritej prej muajsh pasi në qershor ai ndërmori hapin e pazakontë për të kundërshtuar publikisht presidentin, duke thënë se trupat nuk do të dërgoheshin për të kontrolluar valën e protestave në qytetet amerikane./VOA

Demokrati Joe Biden, i parashikuar si fitues i zgjedhjeve presidenciale në garën me Presidentin Trump, filloi pa vonesë të dielën përgatitjet për të marrë në dorë qeverisjen dhe anulimin e disa politikave të administratës Trump pasi të bëhet inaugurimi më 20 janar.

Presidenti i zgjedhur Joe Biden dhe zëvendësja e tij e zgjedhur Kamala Harris, hapën një faqe interneti për transferimin e pushtetit, duke thënë se do të përqëndrohen pa vonesë tek pandemia, recesioni ekonomik, ndryshimet klimatike dhe racizmi sistematik.

“Po përgatitemi të udhëheqim që në ditën e parë, që administrata Biden-Harris të jetë në gjendje të përballet me sfidat më urgjente: mbrojtjen e shëndetit të kombit, rikthimin e mundësive për sukses, avancimin e barazisë racore dhe luftën kundër krizës klimatike”, duke shtuar se “ne qëndrojmë së bashku si një Amerikë. Ne do të ngrihemi më të fuqishëm se më parë”.

Ndihmësit e tij thanë se në ditët e para në detyrë, zoti Biden planifikon që të ribashkojë SHBA me Marrëveshjet e Parisit për klimën si dhe të anulojë daljen nga Organizata Botërore e Shëndetësisë.

Zoti Biden ka në plan të anulojë urdhëresën për ndalimin e udhëtarëve thuajse nga të gjitha vendet me shumicë myslimane dhe të riaktivizojë programin që lejon qëndrimin në vend të të rinjve të sjellë në SHBA në mënyrë të paligjshme nga vende të tjera si të mitur të pashoqëruar nga prindër.

Gjatë fushatës, zoti Biden tha gjithashtu se ka në plan të rikthejë vendin në marrëveshjen ndërkombëtare për të kufizuar ambicjet bërthamore të Iranit. Administrata Trump e tërhoqi Amerikën nga marrëveshja.

Tranzicioni i pushtetit shpesh sjell ndryshime politike të shpejta, por pritet që kalimi nga administrata Trump në atë Biden të jetë zhvendosja më e ndjeshme në dekadat e fundit të politikës amerikane.

Një ndihmës i zotit Biden tha në intervistën për rrjetin CNN “Në çdo aspekt ne do të hedhim themelet për administratën Biden-Harris për të kthyer me sukses besimin në institucione dhe për të udhëhequr qeverinë federale”.

Gjatë katër viteve në Shtëpinë e Bardhë, Presidenti Trump nuk e ka fshehur kënaqësinë që sfidonte normat politike dhe ka të ngjarë që përmbyllja e mandatit të tij katër vjeçar të mos jetë ndryshe.

Presidenti Trump Nuk Ka Pranuar Humbjen

Presidenti nuk i ka telefonuar rivalit për ta uruar për fitore dhe nuk ka pranuar humbjen.

Ekipi i presidentit republikan Donald Trump tha të shtunën se kishte ngritur padi në Arizona, në të cilën pretendon se qarku më i populluar i këtij shteti jugperëndimor skualifikoi në mënyrë të gabuar një numër votash të hedhura ditën e zgjedhjeve nga disa votues.

Në padinë, e ngritur në Gjykatën e Lartë shtetërore të Qarkut Marikopa, thuhet se punonjësit e zgjedhjeve u kishin thënë disa votuesve të shtypnin një buton, pasi një makinë kishte zbuluar një votë të tepërt.

Paditësit thonë se ditën e zgjedhjeve janë përdorur makineri të reja votimi dhe se ato vota mund të kenë qenë “përcaktuese” në rezultatin e garës Trump-Biden, i cili u shpall fitues të shtunën nga rrjetet e mëdha televizive.

Presidenti Trump u largua nga Shtëpia e Bardhë të shtunën që të shkonte për të luajtur golf dhe nuk bëri ndonjë paraqitje publike, ndërsa komentoi në rrjetin Twitter se ai “fitoi zgjedhjet me një diferencë të madhe”.

Fushata e zotit Trump lëshoi një dekleratë ku tha se zoti Biden “po nxiton të paraqitet në mënyrë të gabuar si fitues”, duke premtuar sfida ligjore për të “sigurar që fituesi i ligjshëm të marrë drejtimin”, një pretendim për të cilin shumica e ekspertëve thonë se nuk ka gjasa të ndodhë. Jeff Bennet është profesor në Universitetin Vanderbilt.

Presidenti i zgjedhur Joe Biden, një figurë e njohur në qarqet politike të Uashingtonit prej gati gjysmë shekulli, do të pasojë Presidentin Donald Trump në janar. Korrespondenti i Zërit të Amerikës, Mike O’Sullivan i hedh një vështrim karrierës së politikanit me përvojë, i cili arriti fitoren e tij më të madhe në politikë, katër vjet pas largimit nga posti i nënpresidentit.

Rezultati i zgjedhjeve u përcaktua nga pak shtete, duke përfshirë edhe Pensilvaninë, ku dallimi në vota midis kandidatëve ishte shumë i ngushtë.

Presidenti aktual dhe mbështetësit e tij pretendojnë se parregullsitë përmbysën rezultatin dhe se gjithçka mund të ndryshojë.

Por kur rrjetet amerikane të lajmeve parashikuan se epërsia e zotit Biden ishte e pakapërcyeshme, ai deklaroi fitoren dhe bëri thirrje për tejkalimin e ndarjeve politike në vend.

“Për të gjithë ata që votuan Presidentin Trump, e kuptoj zhgënjimin tuaj sonte, edhe unë kam humbur disa herë. Por tani, le t’i japim një mundësi njëri tjetrit”, tha Presidenti i zgjedhur Joe Biden.

Gjatë fushatës, Presidenti Trump u përqëndrua tek çështje si trazirat shoqërore, rendi dhe ligji, ndërsa zoti Biden e kritikoi Presidentin për mënyrën se si e trajtoi pandeminë.

Presidenti Trump gjatë gjithë kohës mbeti prapa në sondazhe. Ai mbante tubime të mëdha në shtete si Miçigan dhe Uiskonsin, ku votuesit dukeshin të përçarë.

Për tetë vite, zoti Biden ka qenë nënpresident, duke luajtur rol të rëndësishëm në administratën e presidentit Barak Obama.

Ndryshe nga Presidenti Trump, që ishte risi politike kur u zgjodh më 2016, zoti Biden është një politikan me përvojë, diçka që ai e përdori edhe gjatë fushatës.

“Do të them diçka të pazakontë. Unë di të vë një qeveri në punë“, deklaroi Presidenti i zgjedhur, Joe Biden.

Zoti Biden hyri në Senat në moshën 29 vjeçare, detyrë që e mbajti për gati 50 vite.

78 vjeçari do të jetë presidenti më i moshuar në historinë e Shteteve të Bashkuara.

“Ai është neutral në sjellje dhe kjo do ta dëmtonte shumë përballë Donald Trumpit. Kjo në të vërtetë u ofron njerëzv dy alternativa mjaft të mprehta,” u shpreh Larry Sabato i Universitetit të Virxhinias.

Zoti Biden u zgjodh si kandidat i Partisë Demokrate pasi mposhti pretendentët më liberalë në zgjedhjet paraprake. Një prej tyre ishte ajo që do të bëhet nënpresidente e tij e zgjedhur, Kamala Harris.

Tubimet zgjedhore të zotit Biden ishin të vogla dhe pa shumë njerëz për shkak të pandemisë.

Presidenti i zgjedhur mbajti një fjalim në shtetin kyç të Pensilvanisë, një ditë përpara zgjedhjeve të 3 nëntorit.

“Nesër mund t’i japim fund një presidence që dështoi të mbrojë vendin. Nesër mund t’i japim fund një presidence që ndezi flakën e urrejtjes në të gjithë vendin”, tha zoti Biden.

Një ditë para zgjedhjeve, edhe zoti Trump shfaqi besim në Usikonsin.

“Mbani në mend çfarë kam thënë katër vite më parë. Unë jam zëri juaj dhe të gjithë së bashku do ta bëjmë Amerikën madhështore sërish. Kjo është ajo që kemi bërë dhe që po bëjmë“, kishte deklaruar zoti Trump.

Në këto zgjedhje amerikanët votuan në shifra rekord, gati 90 për qind e qyetarëve me të drejtë vote.

Rezultati i ngushtë tregon se sa i ndarë është elektorati amerikan.

Sfidat ligjore nënkuptojnë se zgjedhjet mund të vendosen përfundimisht në gjykatë.

Presidentin e ardhshëm të ShBA-së e pret detyra e vështirë: bashkimi i një vendi të ndarë.

Shtetet e Bashkuara prijnë për nga numri i rasteve me COVID-19 në botë me rreth 9 milionë të infektuar. Ndërkohë të dhënat tregojnë se të premten u regjistrua numër rekord prej 100 mijë rastesh të reja brenda një dite.

Në shtete si Uiskonsin autoritetet u kërkuan qytetarëve të ndihmojnë në parandalimin e përhapjes së virusit.

“Duhet të ndërmarrim veprime të rëndësishme e kolektive. Duhet të qëndrojmë në shtëpi. Shmangni kontaktin me njerëzit që nuk jetoni”, tha Andrea Palm i Departamentit të Shërbimeve Shëndetësore në Uiskonsin.

“70 nga 72 qarqet e shtetit tonë kanë nivele shumë të larta të sëmundjes. Spitalet janë të mbingarkuara. Dje, një në pesë spitale në Uiskonsin raportoi shkurtim kritik të stafit”, tha Julie Willems Van Dijk, e Departamentit të Shërbimeve Shëndetësore në Uiskonsin.

Sipas të dhënave të Universitetit Johns Hopkins në çdo 1.2 sekonda një amerikan rezulton pozitiv ndërsa një vdes çdo 107 sekonda.

Vendi i dytë më i prekur në botë është India që të enjten raportoi mbi 8 milionë raste prej fillimit të pandemisë. Ministria e shëndetit tha se ka një rritje prej 50 mijë infektimesh të reja ditore.

“Arritëm në 8 milionë infektime sepse njerëzit nuk po respektojnë distancimin fizik. Po ashtu, njerëzit nuk po i lajnë shpesh duart. Kemi shumë pacientë që vijnë pa një maskë në spitale dhe nuk u shmangen turmave”, tha Dr. Pankaj Yadav nga një spital nëDistriktin Moradabad.

Ekspertët bëjnë thirrje për kujdes ndërsa paralajmërojnë një valë të dytë të pandemisë.

“Nuk duhet ta ulim vigjilencën, sepse mund të vuajmë një valë të dytë. Ajo që kemi mësuar nga sëmundjet SARS dhe MERS, vala e dytë është më e rrezikshmja”, këshillon Prasanna Kumar T, Pulmologe në Spitalin MS Ramaiah.

Brazili është vendi i tretë më i goditur pas SHBA-së dhe Indisë, por zë vendin e dytë në botë për nga numri i viktimave me COVID-19.

Presidenti brazilian Jair Bolsonaro kritikoi vendet që rikthyen masat e izolimit me qëllim bllokimin e përhapjes së mëtejshme të virusit. Ndërsa numri i vdekjeve rritet, Brazili është kthyer në vendin kyç të testimit të vaksinës kundër koronavirusit si dhe ka miratuar provat klinike të fazës të fundit për katër vaksina.

zëri i amerikës

Senati amerikan konfirmoi të hënën Gjyqtaren e Gjykatës së Apelit Amy Coney Barrett si anëtaren më të re të Gjykatës së Lartë me 52 vota pro dhe 48 kundër.

Senatorja republikane nga shteti Mejn, Susan Collins iu bashkua të gjithë demokratëve të Senatit që votuan kundër emërimit të zonjës Barrett. Senatorja Collins tha se nuk do të votonte për emërimin e Gjyqtares Barrett për shkak të momentit të zhvillimit të këtij votimi, kur mbeten tetë ditë deri në zgjedhjet presidenciale.

Sipas agjencisë së lajmeve Associated Press, në bazë të arkivave ekzistuese historike, asnjë anëtar tjetër i Gjykatës së Lartë nuk është konfirmuar pa mbështetjen e asnjë prej senatorëve të partisë opozitare, në të paktën 150 vjet.

Zonja Barrett është e treta anëtare e Gjykatës së Lartë e emëruar nga Presidenti Donald Trump, gjë që ndikon fuqimisht në balancën ideologjike të gjykatës më të lartë në vend. Me përfshirjen e zonjës Barrett, gjykata me nëntë anëtarë ka tani një shumicë të konsiderueshme konservatore prej 6-3.

Anëtari i Gjykatës së Lartë Clarence Thomas pritet të kryesojë ceremoninë e betimit të Gjykatëses Barrett të planifikuar të zhvillohet në Shtëpinë e Bardhë në orët e vona të së hënës.

Demokratët kanë kundërshtuar emërimin e zonjës Barrett, duke shprehur rezerva si për përgatitjen e saj, ashtu edhe për procesin e plotësimit me kaq nxitim të vendit të gjykatëses Ruth Bader Ginsburg.

Demokratët kishin argumentuar se vendimi për zgjedhjen e një anëtari të ri të gjykatës duhet t’i lihej kandidatit që do të fitonte zgjedhjet presidenciale, një qëndrim që republikanët mbajtën për plotësimin e një vendi të zbrazët në gjykatë në fillim të vitit zgjedhor 2016.

“Senati po vepron siç duhet,” tha të dielën udhëheqësi i shumicës së Senatit Mitch McConnell. “Ne po vazhdojmë me procesin e emërimit”.

Senati votoi 51- 48 të dielën për t’i mbyllur fjalimet e gjata që synojnë të bllokojnë votimin, duke i hapur rrugën votimit përfundimtar.

“Demokratët po marrin fjalën gjithë natën për të luftuar këtë proces të rremë nga Republikanët e Senatit,” tha udhëheqësi demokrat i Senatit Chuck Schumer. “Ne nuk do të ndalemi së luftuari.”

Senatorja demokrate Elizabeth Warren e cilësoi votën “të papërligjshme” dhe “grahmat e fundit të një partie të dëshpëruar,” njoftoi agjencia e lajmeve Associated Press.

Gjyqtarja Barrett mund të jetë një ndër gjykatësit që mund të peshojnë padi të ngritura lidhur me rezultatin e zgjedhjeve, megjithëse nuk është e sigurtë nëse ajo do të kërkojë të përjashtohet pasi u emërua nga Presidenti Trump. Gjatë seancave të konfirmimit ajo nuk pranoi të jepte një përgjigje të qartë ndaj pyetjes.

Zonja Barrett do të jetë një nga gjyqtarët që do të vendosin më 10 nëntor nëse do të shfuqizohet Ligjin për Kujdesin Shëndetësor, të cilin zoti Trump ka kërkuar ta rrëzojë.

Ligji, i njohur gjerësisht si “Obamacare”, i miratuar gjatë administratës së ish-Presidenti Barack Obama në 2010, është një masë që siguron kujdes shëndetësor për miliona amerikanë. Fati i ligjit është një shqetësim thelbësor për shumë njerëz mes numrit të shtuar të rasteve të reja të koronavirusit në Shtetet e Bashkuara.

Republikanët kanë argumentuar prej kohësh që Obamacare u kushton shumë taksapaguesve dhe i jep qeverisë shumë kontroll mbi kujdesin shëndetësor. Kongresi i udhëhequr nga Republikanët në vitin 2017 eliminoi klauzolën e ligjit e cila e bënte të detyrueshme blerjen e sigurimit shëndetësor. Ata tani duan që Gjykata e Lartë të shfuqizojë ligjin në tërësi, duke thënë se pa këtë dispozitë, pjesa tjetër e ligjit nuk mund të qëndrojë.

Kandidati demokrat për president, Joe Biden, tha se nëse i fiton zgjedhjet, ai do të krijojë një komision dypartiak për të shqyrtuar reformimin e sistemit të drejtësisë që ai e quajti “të dalë nga binarët”, duke vënë në dukje se ka alternativa të tjera që mund të merren parasysh përveç zgjerimit të Gjykatës së Lartë.

Biden, sfiduesi i Presidentit republikan Donald Trump në zgjedhjet e 3 nëntorit, i bëri komentet në një intervistë për emisionin “60 minuta” të kanalit CBS që do të transmetohet këtë fundjavë. Një pjesë e intervistës u bë publike të enjten.

Ish-nënpresidenti amerikan tha se ai do të krijojë një komision dypartiak të studiuesve ligjorë që do të përfshinte demokratë, republikanë, liberalë dhe konservatorë për të rishikuar gjyqësorin amerikan.

“Unë do t’u kërkoj atyre që, pas më shumë se 180 ditësh, të kthehen tek unë me rekomandime se si të reformohet sistemi gjyqësor sepse ai tani po del nga binarët, dhe kjo nuk ka të bëjë me çështjen e shtimit të numrit të anëtarëve të gjykatës”, shtoi zoti Biden.

“Ka një numër alternativash që … shkojnë përtej mbushjes (së gjykatave me më shumë gjyqtarë)”, tha zoti Biden.

Disa njerëz nga e majta kanë hedhur idenë e rritjes së numrit të anëtarëve të Gjykatës së Lartë, e cila aktualisht ka nëntë gjyqtarë, nëse zoti Biden fiton, për t’iu kundërvënë zhvendosjes në të djathtë të gjykatës si rezultat i veprimeve të republikanëve të Senatit në vitin 2016 dhe tani. Republikanët e kanë hedhur poshtë idenë duke e quajtuar atë një përpjekje për të “mbushur gjykatën (me anëtarë të partisë në pushtet)”.

Zoti Biden tha javën e kaluar se ai nuk është “një tifoz” i idesë së rritjes së numrit të gjyqtarëve, por i ka lënë të hapura të gjitha opsionet. Numri prej nëntë anëtarësh i Gjykatës së Lartë është caktuar me ligj më shumë se një shekull më parë. Propozimi për krijimin e një komisioni mund të shërbejë si justifikim për zotin Biden që të mos japë një përgjigje përfundimtare mbi rritjen e numrit të anëtarëve të Gjykatës së Lartë para zgjedhjeve.

Komentet e zotit Biden u bënë publike në të njëjtën ditë që Komisioni Juridik i Senatit amerikan, i kontrolluar nga republikanët votoi për t’i hapur rrugë konfirmimit të plotë të gjyqtares konservatore Amy Coney Barrett, të emëruar nga Presidenti Trump për të mbushur vendin bosh në Gjykatën e Lartë. Senati ka në plan të votojë për konfirmimin përfundimtar të gjyqtares Barret të hënën.

Konfirmimi i saj do t’i jepte organit më të lartë gjyqësor të Shteteve të Bashkuara një shumicë konservatore 6-3, që mund të jetë e rëndësishme në rastet ligjore që përfshijnë abortin, kompetencat presidenciale, të drejtat fetare dhe të armëmbajtjes, të drejtat e komunitetit LGBT dhe çështje të tjera.

Demokratët janë të zemëruar që republikanët e senatit filluan procesin e emërimit të gjyqtares Barrett kaq afër ditës së zgjedhjeve pasi refuzuan në vitin 2016 të fillonin procesin e konfirmimit të kandidatit për anëtar të Gjykatës së Lartë të emëruar nga Presidenti demokrat Barack Obama, me arsyetimin se ishte një vit zgjedhjesh.

Rusia dhe Irani kanë shtënë në dorë informatat e regjistrimit të votuesve amerikanë, tha në një konferencë të rrallë për shtyp kreu i shërbimeve amerikane të zbulimit.

John Ratcliffe, drejtor i shërbimeve amerikane të zbulimit dhe drejtori i FBI-së, Chris Wray thanë se SHBA do të përgjigjej me masa ndëshkuese ndaj çdo vendi të huaj që ndërhynte në zgjedhjet amerikane të 2020.

“Kemi konfirmuar se i njëjti informacion mbi votuesit është shtënë në dorë si nga Irani, ashtu edhe nga Rusia,” tha zoti Ratcliffe gjatë një konference për shtyp të zhvilluar pa paralajmërim. “Kemi diktuar Iranin duke dërguar emaile me emra të sajuara për të frikësuar votuesit, për të nxitur trazira sociale dhe për të dëmtuar Presidentin Trump,” tha ai gjatë komenteve të mërkurën në mbrëmje.

zëri i amerikës

Dy javë nga zgjedhjet presidenciale amerikane të këtij viti, ekspertët politikë po analizojnë një sërë skenarësh me të cilat vendi mund të përballet në ditën e zgjedhjeve dhe në javët në vijim. Mundësitë ndryshojnë midis një fitoreje të qartë nga Presidenti Donald Trump ose ish-nënpresidenti Joe Biden, dhe një beteje të pazgjidhur ligjore që e lë rezultatin të pasigurt në janar, kur Kongresi i ri duhet të çertifikojë rezultatin përfundimtar të zgjedhjeve.

Ekspertët thonë se përcaktimi i fituesit të këtyre zgjedhjeve është veçanërisht i tensionuar për shkak të një niveli të paprecedent të votimit në mungesë të nxitur nga pandemia e koronavirusit. Dallimet e ligjeve mes shteteve mbi mënyrën dhe kohën e numërimit të fletëvotimeve në mungesë lenë të kuptohet se mund të duhen ditë ose javë për të përfunduar numërimin e votave.

Në atë që ai e quan “skenar makthi”, studiuesi politik William Galston i Institutit Brookings thotë se kontestimi i zgjedhjeve me rezultat të ngushtë për të cilin ka dyshime do ta “[zhyste] vendin në kaos në rrethana shumë të pafavorshme”.

Presidenti Trump ka ngritur vazhdimisht shqetësimin që përdorimi masiv i fletëvotimeve me postë do të çonte në një rezultat të manipuluar të zgjedhjeve dhe ka refuzuar vazhdimisht të angazhohet paraprakisht për një transferim paqësor të pushtetit nëse ai humbet. Zoti Biden ka thënë se ai do të pranonte rezultatin e zgjedhjeve, me kusht që të ketë një numërim të drejtë të votave.

Duke patur parasysh trazirat e mundshme që mund të shkaktojnë zgjedhjet e kontestuara, skenari më i mirë do të ishte një rezultat i qartë ose gati i sigurt natën e zgjedhjeve, që edhe mund të ndodhë. Por natyra e sistemit amerikan të zgjedhjes së presidentit lë të hapura rezultate të ndryshme.

Një proces kompleks

Joe Biden, sfiduesi demokrat, aktualisht gëzon një epërsi afërsisht prej 9 deri në 10 pikësh në sondazhet në të gjithë vendin, por presidenca nuk fitohet në bazë të votës popullore. Zgjedhjet presidenciale amerikane vendosen përmes një sistemi kompleks me dy hapa në të cilin votat në nivelin shtetëror pasohen nga një votim i dytë në një organ të njohur si Kolegji Zgjedhor. Shteteve individuale u caktohet një numër i dhënë “elektorësh”, bazuar në popullsinë, dhe pasi të jenë numëruar votat çertifikohet një listë personash që mbështesin fituesin e votës popullore në secilin shtet. (Vetëm në dy shtete, Mejn dhe Nebraska, është e mundur që kandidatët t’i ndajnë mes tyre votat elektorale.)

Sondazhet në disa shtete të caktuara nxjerrin se pavarësisht se është prapa në sondazhet në nivel vendi, Presidenti Trump mund t’i fitojë zgjedhjet edhe nëse ai nuk merr më shumë vota se rivali i tij, siç bëri në vitin 2016, duke fituar në Kolegjin Zgjedhor.

Kolegji Zgjedhor mblidhet më 14 dhjetor për votimin që përcakton zyrtarisht se kush do të jetë presidenti i ardhshëm. Për të arritur fitoren, një kandidat duhet të marrë të paktën 270 nga gjithsej 538 votat e Kolegjit Zgjedhor. Votat numërohen zyrtarisht në një seancë të përbashkët të Dhomës së Përfaqësuesve dhe Senatit më 6 janar.

Ndërsa shumë shteteve do t’u duhen ditë ose edhe javë për të përfunduar numërimin e të gjitha votave, një numër shtetesh kyçe për rezultatin e zgjedhjeve pritet të shpallin rezultatet e plota ose gati të plota në mbrëmjen e zgjedhjeve ose në fillim të ditës pasuese.

Mes tyre është Florida, një shtet që Presidenti Trump e fitoi në vitin 2016 dhe ku ai dhe zoti Biden tani janë në një garë të ngushtë. Një fitore e zotit Biden në këtë shtet do t’i siguronte atij 29 vota elektorale dhe do t’ia mbyllte gati të gjitha rrugët e fitores zotit Trump. Karolina e Veriut, me 15 vota elektorale dhe Arizona me 11, gjithashtu të rëndësishme për shumicën e skenarëve që mund t’i japin fitoren Presidentit Trump, ka të ngjarë t’i njoftojnë rezultatet herët.

“Ka një arsye për të besuar se ato shtete mund të jenë në gjendje të përfundojnë numërimin e plotë të votave natën e zgjedhjeve, ose mëngjesin e ditës tjetër”, tha Richard H. Pildes, ekspert i ligjit të zgjedhjeve dhe profesor i së drejtës kushtetuese në Universitetin e Nju Jorkut . “Nëse ne e dimë, për shembull, se Presidenti Trump ka humbur Floridën, atëherë edhe nëse Miçigani, Pensilvania dhe Uiskonsini nuk do të kishin përfunduar numërimin e votave, do të kishim një arsye shumë të fortë për të besuar se zoti Biden do t’i fitonte zgjedhjet.”

Miçigani ka 16 vota elektorale, Pensilvania 20 dhe Uiskonsini 10.

Zoti Pildes shton se në një skenar ku rezultati në Florida është shumë i ngushtë dhe nuk mund të përcaktohet fituesi natën e zgjedhjeve, ndërsa shtetet e tjera janë të ndara midis kandidatëve, gjërat shumë shpejt mund të bëhen të debatueshme.

Betejat e mundshme ligjore

“Nëse rezultati është i pasigurt nga, le të themi herët në mëngjes të nesërmen, sepse ka shtete që nuk mund të përfundojnë numërimin e plotë për shkak të vëllimit masiv të fletëvotimeve në mungesë që ende duhet të numërohen … atëherë unë do të prisja mosmarrëveshje të forta në ato shtete për secilën prej atyre fletëvotimeve në mungesë, dhe debate nëse ato duhet të trajtohen si të vlefshme”, thotë Pildes.

Ka disa momente kryesore midis ditës së zgjedhjeve dhe çertifikimit të rezultatit nga Kongresi më 6 janar. I pari prej tyre është 8 dhjetori, e ashtuquajtura data “e sigurt” deri në të cilën shtetet pritet të paraqesin listat e çertifikuara të zgjedhësve tek Arkivisti i Shteteve të Bashkuara.

Në rast se një shtet nuk e ka përfunduar numërimin e votave deri në atë datë, ose për shkak të vazhdimit të numërimit apo veprimeve ligjore, ekziston një dispozitë në ligjin federal që lejon legjislaturën e shtetit të mblidhet dhe të caktojë një listë të elektorëve pa e ditur numrin përfundimtar të votave. Kjo krijon mundësinë që një legjislaturë partiake të caktojë një listë elektorësh që mbështesin kandidatin, i cili në fund humbet votën popullore të shtetit.

Në shtetet ku guvernatori dhe legjislatura janë të ndara midis palëve, ekziston një faktor tjetër komplikues. Për shkak se është guvernatori që zyrtarisht çertifikon listën e zgjedhësve pas një votimi, është e mundur që një shtet mund të paraqesë dy lista elektorësh, të dyja me një pretendim të besueshëm legjitimiteti.

Sipas ligjit federal, nëse Kongresi i ri paraqitet me dy lista konkurruese elektorësh nga i njëjti shtet, Dhoma e Përfaqësuesve dhe Senati votojnë për të përcaktuar se cila do të pranohej. Nëse bien dakord, atëhere merret propozimi që ata zgjedhin. Nëse ata nuk bien dakord, fiton lista e çertifikuar nga guvernatori.

Një rezultat i barabartë në Kolegjin Zgjedhor

Është gjithashtu e mundur, megjithëse nuk ka gjasa, që të mos ketë asnjë fitues të presidencës edhe pas numërimit të votave elektorale. Nëse të dy kandidatët përfundojnë me nga 269 vota secili, është Dhoma e Përfaqësuesve që vendos për fituesin. Megjithatë, në vend të një vote për secilin nga 438 anëtarët Dhomës së Përfaqësuesve, delegacionet për secilin shtet votojnë si një grup, që do të thotë se partia dominuese në secilin shtet do të kontrollonte votën e saj.

Një rezultat i tillë do t’u jepte afërsisht të njëjtën peshë të 600,000 qytetarëve të shtetit Uajoming në zgjedhjen e presidentit sa 40 milionë qytetarëve të Kalifornisë.

Një alternativë e fundit në sistem është mundësia që disa nga zgjedhësit e dërguar për të votuar për presidentin më 14 dhjetor të rezultojnë “të pabesë”. Në një numër të kufizuar rastesh gjatë viteve, elektorët që duhet të votojnë për një kandidat të caktuar kanë hedhur votat e tyre në Kolegjin Zgjedhor për kandidatin tjetër.

Disa shtete kanë miratuar ligje që detyrojnë zgjedhësit të votojnë ashtu siç ka votuar shumica e votuesve të shtetit dhe Gjykata e Lartë ka vendosur që kufizime të tilla janë të ligjshme. Mbetet e mundur që zgjedhësit “e pabesë” të përpiqen të ndikojnë në rezultatin zgjedhjeve, por ekspertët theksojnë se rezultati duhet të jetë tepër i ngushtë që një përpjekje e tillë të jetë e suksesshme dhe do të duhej një shkallë e lartë koordinimi mes anëtarëve të Kolegjit Zgjedhor që do të ishte e vështirë për t’u realizuar.

Është e rëndësishme të theksohet se ndërsa janë të mundur, shumica e këtyre skenarëve nuk ka të ngjarë të ndodhin.

Profesori Pildes, nga Universiteti i Nju Jorkut, thekson se edhe pa një numërim të plotë ë natën e zgjedhjeve, në fund mund të jetë e qartë se kush do të jetë fituesi.

“Edhe në shtetet që nuk mund ta përfundojnë dot numërimin e votave, qarqet e veçanta në ato shtete mund ta përfundojnë numërimin”. “Dhe media do të bëjë krahasimin e rezultatit të votimit të vitit 2020 për Presidentin Trump në ato qarqe me ato të vitit 2016. Dhe nëse nuk paraqitet mirë në mënyrë sistematike ose paraqitet shumë mirë bazuar në këtë krahasim, ky do të jetë një informacion që mund të sinjalizojë shumë fort se në cilin drejtim po shkojnë zgjedhjet, edhe nëse fituesi nuk mund të deklarohet zyrtarisht … Unë mendoj se kjo është e mundur ashtu si çdo skenar tjetër”, thotë profesor Pildes.

zëri i amerikës