VOAL

VOAL

Copyright © 2022

VOAL

Rajon

Turqi, gjendet hamami i lashtë 9 shekuj

Kryetari i gërmimeve në zonën arkeologjike Harran, Mehmet Önal, tha për gazetarët se hamami i përket periudhës së Dinastisë Zengide dhe shtetit Ejubid

SHANLIURFA – Në zonën arkeologjike Harran në provincën Şanliurfa të Turqisë arkeologët kanë gjetur një hamam i cili i përket shekullit 12 ose 13.

Si rezultat i gërmimeve arkeologjike brenda mureve të pallatit në qytetin antik Harran, një nga vendbanimet më të lashta në botë, që nga vitet gjashtë mijë para erës sonë, i cili ishte edhe kryeqendër e asirianëve dhe emevitëve, është gjetur hamam me kupola që i përket periudhës së shtetit Ejubid, rreth 900 vite më parë.

Kryetari i gërmimeve në zonën arkeologjike Harrna, Mehmet Önal, tha për gazetarët se hamami i përket periudhës së Dinastisë Zengide dhe shtetit Ejubid.

Ai theksoi se hamami ka tri kupola, duke shtuar se kupolat janë të ruajtura pjesërisht, ndërkohë që muret e dhomave tërësisht. Ai thekson se hamami përmban çezma, pishina të rrumbullakëta, vende për ngrohje, dhoma private si dhe gypa për ujë të ngrohtë dhe të ftohtë.

“Ibn Shedad, i cili ka shëtitur në Harran në shekullin 13, flet për 14 hamamë në Harran. Prej tyre, dy janë gjetur si rezultat u gërmimeve që i kemi zhvilluar”, tha Önal.

Önal vuri në dukje se Mahmut Zengi, kreu i Dinastisë Zengide, dhe Salahudin Ejubi kanë ardhur në Harran.

“Nuredin Mahmut Zengi dhe Salahudin Ejubi duhet të jenë larë në hamamin e pallatit”, u shpreh Önal, duke shtuar se me projektet që do të vazhdojnë edhe vitin e ardhshëm, para vizitorëve do të shfaqin mbetje mahnitëse të pallatit, salloneve dhe veprave relievike në të.

Në ndërkohë, kryebashkiaku i Şanliurfas, Nihat Çiftçi dhe guvernatori Abdullah Erin, theksojnë se Harran është vend i rëndësishëm historik dhe se besojnë se gërmimet arkeologjike do të ndihmojnë në rritjen e turizmit në këtë vend.

Athina tronditet nga një sulm terrorist, i vendoset bombë Gjykatës së Apelit (FOTOT)

ATHINE- Sulm terrorist në Gjykatën e Apelit në Athinë. Mësohet se një bombë ka shpërthyer në orën 03:35 të mëngjesit të sotëm. Mediat greke raportojnë se nga shpërthimi u shkaktuan dëme të mëdha materiale.

 

Nga të dhënat paraprake mësohet se bomba ishte vendosur në një çante nga 4 persona, në hyrje të gjykatës. Terroristët kishin zbritur nga një furgon, ndërsa dy prej tyre kishin vendosur në godinë mjet shpërthyes.

Ndërkohë, njëri nga terroristet qëlloi me armë dhe plagosi rende rojën e Gjykatës se Apelit. Në orën 02:35 ata telefonuan dy gazeta për të paralajmëruar për shpërthimin.

Sakaq, dyshohet se pas sulmit fshihet organizata terroriste “OLA” ose organizata “Kryengritja”. Ministria e Drejtësisë Kondonis dënon aktin terrorist. “Donin te vrisnin rojen, nje njeri ne krye te detyres. Sulm ndaj demokracise”, deklaroi ai ne ERT.
efeteio_mera5-768x480

efeteio_mera7-768x524
efeteio_mera5-768x480

25348342_1699917146707162_7447522544293043023_n

25498026_1699917240040486_2799960964193490100_n

25508050_1699917333373810_3829669829802049877_n

25551834_1699917100040500_3456448920446761338_n

Serbia fillon ndërtimin e “Autostradës së Paqes” Nish-Prishtinë-Durrës

BEOGRAD- Serbia do të fillojë vitin e ardhshëm ndërtimin e seksionit të parë të së ashtuquajturës “Autostrada e Paqes” Nish-Prishtinë-Durrës, deklaroi zëvendëskryeministrja serbe, njëkohësisht edhe ministre e Ndërtimit, Transportit dhe Infrastrukturës, Zorana Mihajloviç.

“Seksioni Nish-Ploçnik është 36 kilometra i gjatë, ndërkohë që i gjithë projekti kushton 212 milionë euro”, deklaroi Mihajloviç duke shtuar se të dhënat financiare ishin ende paraprake.

“Ky seksion do të ndërtohet me ndihmën edhe të Bankës Evropiane të Investimeve (EIB) dhe Bankës Evropiane për Rindërtim dhe Zhvillim (BERZH)”, shtoi ajo.

Mihajloviç tha se projekti i dokumentacionit ishte financuar nga Fondi i Ballkanit Perëndimor.

“Nuk ka rrugë që nuk është domethënëse për Serbinë. Kjo rrugë nënkupton lidhjen me rajonin. Serbia nuk ka det dhe kjo është arsyeja që ajo ka nevojë për porte”, deklaroi zëvendëskryeministrja serbe.

Oferta imobiliare e Greqisë për rusët e kinezët: Bli shtëpi dhe të jepet pasaportë

Bilanci i tregut imobiliar në Greqi po “shpërthen” teksa oligarkët rusë dhe kinezë po nxitojnë të rrëmbejnë një shtëpi të bukur me pamje nga Partenoni, blerje e cila është një “vizë e artë” sa i përket lëvizjes, pasi i lejon për të hyrë në Evropë si një vend anëtar i Shengenit, pra pa kontrolle doganore.

George Kachmazov, një agjent i pasurive të patundshme ruse, raporton për Bloomberg, se bleu një pronë në Athinë.

Mes rusëve dhe grekëve lidhjet kulturore janë të forta, edhe për shkak të fesë së përbashkët ortodokse dhe alfabetit të ngjashëm.

Një rrezik? Realisht jo. Për Kachmazov, plani i shitjes është i qartë: blerja e pronës në Greqi mund t’i japin investitorit një të ashtuquajtur “vizë të artë”, një pasaportë grekë e rezervuar për një të huaj që bën një blerje të pasurive të patundshme në vendin përkatës, dhe me të përfiton lëvizjen në pjesën më të madhe të Evropës.

Përveç kësaj, tregu i pasurive të paluajtshme të Greqisë mund të jetë gati për një kthim të investimit, duke ndihmuar blerësit të fitojnë para me blerjen e tyre, me një fitim të mirë kapital.

“Tregu i pasurive të patundshme në Greqi është një nga të paktët në Evropë që ende nuk është shëruar nga kriza e rëndë ekonomike e vitit 2008,” tha Kachmazov në një intervistë në Athinë. “Çmimet në Spanjë, Portugali, Irlandë, Poloni dhe Hungari po shkojnë drejt niveleve para krizës për shkak të likuiditetit të lartë të lëshuar nga BQE në Evropë”, tha ai.

Kachmazov është në mesin e agjencive të pasurive të paluajtshme që ndihmon blerësit e interesuar për prona në Greqi, ata nga Rusia, Kina, Turqia dhe vende të tjera, të gatshëm për të investuar në një treg që mund të jetë në prag të një zgjimi, ndërsa vendi është duke u përgatitur për të dalë nga programi i saj i shpëtimit në gusht 2018 dhe kështu kthehet në tregun ndërkombëtar të kapitaleve.

Çmimet e pronës në Greqi ranë me më shumë se 25 për qind, që nga kriza e borxhit evropian që filloi në vitin 2008. Çmimet për apartamente në Athinë brenda pesë viteve u ulën me 45 për qind, në mes të 2008 dhe qershorit 2017, sipas të dhënave të Bankës së Greqisë, udhëhequr nga Janis Sturnaras, ish-ministri i Financave i qeverisë së dikurshme të Antonis Samaras, shkruan “il Sole 24 Ore”.

Viza e BE-së
Kërkesa për prona në Greqi nga blerësit kinezë u rrit me pothuajse 159% në tremujorin e tretë krahasuar me të njëjtën periudhë të vitit 2016. Për investitorët kinezë, marrja e vizave për banorët është arsyeja kryesore për të investuar në vend, tha Carrie Law, drejtuesi i agjencisë së pasurive të patundshme.

“Është një nga vizat më të kërkuara që lejon që investimet e pasurive të paluajtshme të përdoren për të arritur shtetësinë europiane. Përveç kësaj, Greqia është tre deri në katër orë më afër nga ana ajrore në Kinë se sa Barcelona dhe Lisbona, dy qytete të tjera shumë të njohura në vendet që kanë histori sa i përket investimeve interesante, sipas tij. Duke mos harruar të përmendet se prania ekonomike kineze në vendin e Mesdheut është shumë e fortë, vetëm kujtoni se porti i Pireut është në duart e kompanisë Cosco”, tha ai.

Greqia ka dhënë 2.053 “viza të arta” ndërmjet 2013 dhe tetorit 2017, për investitorë kinezë që përfaqësojnë 43%, sipas agjencisë shtetërore përgjegjëse për nxitjen e investimeve dhe eksporteve. Rusët janë në vendin e dytë me 18.6 për qind dhe investitorët e Turqisë fqinje në vendin e tretë me 8.4 për qind. Greqia ka përfituar mbi 513 milionë euro investimeve të huaja nga programi “viza e artë”./monitor/

Demarkacioni, Kryeministri i Malit të Zi do të vizitojë Kosovën

Një zgjidhje për çështjen e komplikuar të demarkacionit që po e mban peng liberalizimin e vizave, mund të gjendet pas disa javësh.

Burime të Express bëjnë me dije se muajin e ardhshëm Kosovën pritet ta vizitojë kryeministri i Malit të Zi, Dusko Markovic, me ftesë të kryeministrit Ramush Haradinaj.

Kriza ka shkaktuar nga çështja e demarkacionit mund të nis të zgjidhet pas disa javësh.

Kryeministri i Malit të Zi pritet të qëndrojë në Kosovë nga data 20 deri më 30 janar vitin e ardhshëm, merr vesh Gazeta Express nga burimet.

Mbrëmë Haradinaj ka qëndruar në Bruksel, ku ka takuar shefin e Qeverisë së Malit të Zi, i cili po ashtu ka qëndruar në Kryeqytetin europian bashkë me 6 kryeministrat e vendeve të Ballkanit Perëndimor.

Marrëveshja për kufirin me Malin e Zi është dërguar në Kuvend, por ende nuk është nxjerrë në rend dite.

Bashkë me të është dërguar edhe një raport i haruat nga Komisioni Bulliqi, ku thuhet se Kosova ka humbur tokë nga kjo marrëveshje.

Nuk dihet ende se kur do ta kenë deputetët e Kuvendit të Kosovës në agjendë këtë cështje.

Sido që të jetë koalicioni aktual, sipas kryeministrit Haradinaj e ka të vështirë t’i sigurojë 2/3 e votave të nevojshme për miratimin e kësaj marrëveshjeje.

Haradinaj para nisjes në Bruksel ka deklaruar se vizita e tij në Bruksel do të sjellë një lajm rreth kësaj teme.

Mbetet të shihet se cili do të jetë reagimi i Malit të Zi për demarkacionin, kur dihet se zyrtarët e këtij shteti vazhdimisht kanë përsëritur se demarkacioni është temë kryer për ta.

Kotzias: Vendimi i qeverisë shqiptare për varret e ushtarëve grekë, një hap i madh besimi

ATHINË – Ministri i Jashtëm grek, Nikos Kotzias përshëndeti vendimin e qeverisë shqiptare për ndërtimin e varrezave të ushtarëve grekë, të vrarë në malet e Shqipërisë gjatë Luftës së Dytë Botërore duke e konsideruar një hap të madh besimi mes dy palëve, njoftoi “greekreporter”.

“Vendimi tregoi se diplomacia mund të arrijë më shumë sesa të bërtiturat pa kuptim”, iu përgjigj Kotzias një pyetje gjatë një deklarate të përbashkët me homologun e tij afgan, Salahuddin Rabbani, i cili ndodhet për një vizitë në Greqi.

Duke përshëndetur njoftimin e qeverisë shqiptare për një ligj që rregullon çështjen e ushtarëve dhe oficerëve grekë të rënë në Shqipëri, ndërkohë që po luftonin përkrah trupave të Boshtit, Kotzias theksoi se kemi të bëjmë me një hap shumë pozitiv përpara, që vjen pas rindërtimit të kishës së vogël të “Shën Thanasit” që u dëmtua vitin e kaluar në Himarë dhe që u financua nga qeveria shqiptare.

Vuçiç: Serbia e përkushtuar për zhvillimin e marrëdhënieve politike me Rusinë

Presidenti i Serbisë, Vuçiç sot në Moskë u takua me Zëvendëskryeministrin e Qeverisë të Federatës Ruse Dmitry Rogozin me të cilin diskutuan për marrëdhëniet dypalëshe, situatën në rajon dhe bashkëpunimin ekonomik

MOSKË – Presidenti i Serbisë, Aleksandër Vuçiç sot në Moskë u takua me Zëvendëskryeministrin e Qeverisë të Federatës Ruse Dmitry Rogozin me të cilin diskutuan për marrëdhëniet dypalëshe, situatën në rajon dhe bashkëpunimin ekonomik.

Vuçiç ka theksuar se Serbia fuqimisht është e përkushtuar për zhvillimin e mëtejshëm të marrëdhënieve politike me Federatën Ruse në bazë të partneritetit strategjik dhe gatishmërinë e të dyja palëve për thellimin e mëtejshëm në të gjitha fushat.

Ai u shpreh i kënaqur me dinamikën e arritur të takimit në nivel të lartë dhe shprehu mirënjohje për mbështetjen e fortë dhe të qëndrueshme të Rusisë për integritetin territorial dhe sovranitetin e Serbisë, njofton Zyra e Presidentit të Serbisë.

Vuçiç shtoi se është shumë e rëndësishme që Serbia të vazhdojë të shkëmbejë rregullisht informacion me Rusinë dhe të koordinojë aktivitetet në organizatat ndërkombëtare rreth çështjes së Kosovës.

Ai vuri në dukje se Rusia është një nga partnerët strategjikë ekonomikë dhe të tregtisë së jashtme të Serbisë. Ai diskutoi gjithashtu faktin se shkëmbimi i përgjithshëm tregtar në vitin 2016 arriti në 2.3 miliardë dollarë amerikanë, duke shtuar se në periudhën e ardhshme Serbia do të përqendrojë vëmendjen në forcimin e bashkëpunimit ekonomik me Rusinë, për të shfrytëzuar privilegjet e marrëveshjes për tregti të lirë.

“Ne duam që bashkëpunimi ekzistues në fushën e energjisë, bujqësisë, telekomunikacionit dhe fushave të tjera të përmirësohet dhe forcohet. Serbia është e interesuar për furnizim të qëndrueshëm të energjisë për të mundësuar sigurinë e energjisë së vendit”, përfundoi Vuçiç. aa

Mbesa e Goce Dellçevit pranon idenë se Çento donte të bashkojë Maqedoninë me Bullgarinë

 

Ish sekretarja e Presidentit të parë të Maqedonisë, Metoja Andonov Çento, njëherit edhe mbesa e Goce Dellçevit në një intervistë të dhënë për mediat bullgare ka pohuar se përkushtim i Çentos nuk ka qenë bashkimi i Maqedonisë me federatën jugosllave, por qëllim ka pasur që Maqedonia të bashkohet me Bullgarinë, dhe për këtë shkak e kanë dënuar me 11 vite burg

“Unë jam e vetmja që kam ngelur gjallë këto 93 vite. I kam mbijetuar të gjitha, jo pse isha rrugaçe. por, pse isha luftëtare të gjithë jetën time. Këtu i kam të gjitha punët e pista që janë shkruar për mua.Kam qenë sekretare e Presidentit të parë të Maqedonisë, Metodija Andonov Çento. Përkushtimi i tij nuk ishte bashkimi më Federatën e Jugosllavisë, por përkushim ai ka pasur bashkimin e Maqedonisë më Bullgarinë. E dënuan më 11 vite burg, nëntë i vuajti dhe vdiq si njeri. Unë kam dy libra për këtë gjë. Ja këtu i kam. Mund edhe ti lexoni.”, thotë mbesa e Goce Dellçevit, Katerina Trajkova Nurxhieva./TetovaPress.

Turqi, shpërndahen tekstet e para shkollore të lëndës së gjuhës shqipe

ANKARA – Tekstet e para shkollore dhe materialet mësimore të përgatitura nga Ministria e Arsimit e Turqisë për lëndën e gjuhës shqipe, e cila u fut në planprogramin mësimor si lëndë zgjedhore, u janë shpërndarë nxënësve.

Sipas të dhënave të siguruara nga AA, Ministria e Arsimit dhe Universiteti i Thrakisë më 21 tetor të vitit të kaluar kishin firmosur protokoll bashkëpunimi për mësimin e gjuhës shqipe dhe asaj boshnjake në kuadër të lëndës zgjedhore Gjuhë dhe Dialekte të Gjalla.

Si rrjedhojë, planprogrami për gjuhën shqipe dhe boshnjake për klasat 5, 6, 7 dhe 8 të shkollave të mesme të ulëta (sipas sistemit arsimor në Turqi) u pranua për t’u zbatuar si lëndë zgjedhore duke filluar nga viti akademik 2017-2018, pas miratimit të Bordi Edukativ Arsimor i Turqisë.

Muajin e kaluar, mes Ministrisë së Arsimit dhe Rektoratit të Universitetit të Thrakisë u nënshkrua marrëveshje për dhurim lidhur me përgatitjen e teksteve dhe materialeve shkollore për lëndën e gjuhës shqipe dhe asaj boshnjake.

Tekstet dhe materialet shkollore të gjuhës shqipe, të përgatitura nga një komision në kuadër të Rektoratit të Universitetit të Thrakisë, janë miratuar edhe nga ministria.

Tekstet u ndanë për nxënësit e klasës së tetë

Lënda e gjuhës shqipe është zgjedhur nga 44 nxënës në Shkollën “Alija Izetbegoviç” në Kemalpasha të Izmirit. Nxënësve të kësaj shkolle librat e gjuhës shqipe u shpërndanë pa pagesë.

Nxënësit do të kenë mundësi të mësojnë lëndën e gjuhës shqipe për dy orë në javë, duke u mbështetur me kurse shtesë gjatë fundjavës.

Po ashtu, Drejtoria Lokale e Arsimit në Kemalpasha dhe Shoqata Kulturore Shqiptare në Turgutlu këtë muaj kanë firmosur protokoll për hapjen e kursit të gjuhës shqipe. Ligjërimi në këto kurse mbështetëse të fundjavës do të bëhet nga një mësimdhënës i lindur në Shqipëri.

Ndërkohë, së shpejti pritet edhe shpërndarja e teksteve për lëndën e gjuhës boshnjake, të cilat aktualisht janë në procedurën e shtypjes, ndërsa ende vazhdon përgatitja e materialeve mësimore për këtë lëndë.

Rreth 500 refugjatë në Serbi po jetojnë nën qiell të hapur

Pamje nga një kamp në Serbi

Të paktën 500 refugjatë dhe emigrantë janë duke jetuar në Serbi në kushte të improvizuara apo nën qiell të hapur, ndonëse moti po fillon të ashpërsohet çdo ditë, ka thënë anëtarë të organizatës, Mjekët pa Kufij.

Më shumë se 100 emigrantë jetojnë në zonën e Soborit në veri të Serbisë, është thënë nga organizata me bazë në Francë.

Emigrantët kanë thënë se dëshirojnë të kërkojnë ndihmë në kampet e ofruara nga shteti mirëpo frikësohen se mund të largohen nga vendi, pasi ata planifikojnë që të vazhdojnë rrugëtimin e tyre për të arritur në vendet e Evropës Perëndimore.

Komisariati serb për refugjatë, i cili është përgjegjës për kujdesin ndaj refugjatëve dhe imigrantëve, konsideron se ka mjaftueshëm hapësira për ata që paraqiten në qendrat për emigrim në Serbi.

Sipas të dhënave zyrtare në këto qendra aktualisht banojnë 4,150 persona.

Daçiçi: Kosova është Jerusalemi i Serbisë

Ministri i jashtëm i Serbisë Ivica Daçiç ka deklaruar se Serbia dhe Izraeli kanë marrëdhënie miqësore me traditë të pasur dhe se Kosova është Jerusalemi serb.

“Kosova është Jerusalemi ynë”, tha sot Daçiq në fillim të një konference në Beograd, me rastin e 25 vjetorit të vendosjes së raporteve diplomatike ndërmjet Izraelit dhe Jugollavisë, e pastaj Serbisë, raporton agjencia Beta.

Mëtutje, ai ka theksuar se Serbia e çmon qëndrimin parimor të Izraelit për mospranimin e shpalljes së njëanshme të pavarësisë së Kosovës, dhe kjo, sipas Daçiqit, “reflekton pozitivisht në cilësinë dhe përmbajtjen e raporteve të përgjithshme” ndërmjet dy vendeve.

Ambasadorja e Izraelit në Beograd, Alona Fisher-Kamm, gjatë fjalimit të saj në këtë tubim, e ka falënderuar Serbinë për “drejtimin në të cilin shkojnë raportet në të mirë të dy popujve”. Ajo ka theksuar se këmbimi i mallrave dhe investimet izraelite në Serbi janë rritur.

Erdogan kërkon njohjen e Jerusalemit kryeqytet palestinez

Recep Tayyip Erdogan

Presidenti i Turqisë, Recep Tayyip Erdogan, u ka bërë thirrje vendeve nga e gjithë bota, që ta njohin “Jerusalemin e okupuar si kryeqytet të Palestinës”, në përgjigje të njohjes së këtij qyteti të ndarë nga Shtetet e Bashkuara, si kryeqytet të Izraelit.

Duke e hapur samitin e Organizatës për bashkëpunim islamik (OIC) sot në Stamboll, zoti Erdogan tha se Jerusalemi është “vijë e kuqe” për myslimanët, të cilët nuk do të pranojnë çfarëdo agresioni kundër vendeve të shenjta islamike.

Ai po ashtu, e ka kritikuar ashpër Izraelin, duke e cilësuar si “shtet terrori”.

Presidenti i Autoritetit Palestinez, Mahmud Abbas, e ka përsëritur qëndrimin e tij se lëvizja e Shteteve të Bashkuara, e ka përfunduar rolin e Uashingtonit si ndërmjetësues i paqes në Lindjen e Mesme.

Çedomir Jovanoviç: Kosova barrë e madhe për Serbinë

Hapja e dy kapitujve të rinj në rrugën e anëtarësimit të Serbisë në Bashkimin Evropian përbën një hap pozitiv drejt anëtarësimit të plotë në BE.

 

Kështu ka deklaruar kryetari i Partisë Liberal Demokratike të Serbisë Çedomir Jovanoviç, transmeton Klan Kosova. Ai gjithashtu ka deklaruar se është e qartë se problemi i hapur i Kosovës është një barrë në rritje për vendin e tij.

Jovanoviç ka thënë në një deklaratë se mesazhi që kanë marrë në Bruksel sugjeron se, pavarësisht dy kapitujve të hapur, ka pakënaqësi me marrëdhëniet në mes të Beogradit dhe Prishtinës “si rezultat i vonesave në negociatat dhe mungesës së zgjidhjeve konkrete.”. Ai beson se presioni i vendeve udhëheqëse në Evropë po rritet për të zgjidhur këto çështje sa më shpejt që të jetë e mundur./Klan Kosova.

BE do të hapë kapitujt e rinj me Malin e Zi dhe Serbinë

Flamuri i Bashkimit Evropian, foto nga arkivi

Bashkimi Evropian pritet të hapë sot kapitujt e rinj në negociatat me Malin e Zi dhe Serbinë, duke u afruar më tutje drejt anëtarësimit të këtyre vendeve në BE.

Mali i Zi do të hapë “kapitujt e rinj të negocitatave”, lidhur me lirinë e lëvizjes për punëtorët.

Kjo do të sjellë në 30 nga 33 numrin e kapitujve të hapur deri tash në mes të Podgoricës dhe Brukselit.

Tre kapitujt e tjerë tashmë janë negociuar ose janë mbyllur.

Serbia ndërkaq do të hapë kapitujt për ligjin dhe marrëdhëniet e jashtme.

Deri tash ky vend ka hapur 12 kapituj, ndërsa dy prej tyre janë mbyllur tashmë.

Serbia dhe Mali I Zi janë vendet e Ballkanit që kanë më së shumti mundësi t’i bashkohen BE-së.

Qendra humanitare ruse baza destabilizuese në Ballkan

Në mediat ndërkombëtare një zë të veçantë zuri lajmi i publikuar nga agjencitë shtetërore ruse ku theksohet se Vladimir Putin ka firmosur dekretin për modernizimin e armatimit të flotës detare dhe ushtrisë ruse.

Ky veprim sipas analistëve gjeopolitik vjen menjëherë pas urdhërit të Putinit të mes Nëntorit 2017 ku kërkoi angazhimin e përfaqësive diplomatike në Ballkan dhe shprehu gatishmërinë për rritjen e numrit të punonjësve të përfaqësive në Maqedoni, Shqipëri, Slloveni, Kroaci.

Sipas të përditshmet italiane “Il Mondo”: “Putin kërkon urgjentisht aktivizimin e qendrës së spiunazhit rus në Serbi”dhe dërgimin e trupave ruse në zonën në kufi me Kosovën dhe Selinë e Forcave të SHBA.

Sipas analistit italian Prof.Segui Rusia në Balkan i ka shtuar forcat e saj speciale dhe në veçanti agjentët sekretë.

Anëtarët e shërbimeve sekrete të inteligjencës ruse GRU, SVR dhe FSB realizuan mbledhjen e jashtëzakonshme në Qendrën e Drejtimit të Operacioneve sekrete me Seli në Beograd.

Në këtë takim të nivelit të lartë mendohet se morën pjesë përfaqësues të GRU dhe SVR të qendrës së 2 më të madhe në Rajon me Seli në Sofie dhe përfaqësuesit e Qendrës së spiunazhit me seli në Vienë-Austri. Menjëherë pas takimit u shpërndanë në internet informacione që kritikojnë aksionet e ndërmarra nga diplomatët rus të Shqipërisë, Maqedonisë, Sllovenisë dhe përfaqësitë në Kosovë e Mal të Zi.

Mbledhja e Nëntorit mblodhi në Beograd jo vetëm diplomatët rus të ambasadave në vendet e Ballkanit por me urdhër presidencial duket se morën pjesë edhe disa gazetarë të Sputnik, RussiaToday, Russkimir si dhe drejtuesit e shoqatave të bashkëatdhetarëve pasi Presidenti Putin e konsideron Ballkanin akoma objektiv të Rusisë.

Në datë 21 Nëntor 2017 në hotel Ambasador në Serbi dhe në Mal të Zi u mblodhën për 3 ditë rresht përfaqësuesit e Qendrave “humanitare” ruse të ardhur nga Viena, Sofia dhe u takuan në Serbi.

Situata në Lindjen e mesme nuk po zhvillohet sipas parashikimeve të Moskës dhe kjo në vazhdën e përpjekjeve për të kontrolluar vendet e Ballkanit ku futet Shqipëria, Mal i Zi, Maqedonia konsiderohet nga specialistët gjeopolitikanët si strategjia e re e joshjes së pushtetarëve nga diplomatët rus.

Për këtë plan të ri do është rritur edhe fondi specifik i miratuar me dekret presidencial ku Shqipëria dhe vendet e Ballkanit do të jenë vende ku do të investohet para, burimi i të cilave nuk dihet.

Buxheti rus pritet të miratohet në fund të vitit 2017 dhe ekonomisët nuk e arsyetojnë dot këtë manovër të Moskës por e shohin si orvatjen e fundit të tyre për të mos humbur Shqipërinë dhe betejën me Ballkanin dhe SHBA.

Pas takimit të krerëve të Inteligjencës ruse në Balkan filluan lëvizjet në ambasadat ruse në Mal të Zi, Kroaci, Slloveni, Maqedoni dhe në Shqipëri. Ish agjentët e dëbuar me vendim të Presidentit Putin do të zëvendësohen nga agjentë të rinj të zgjedhur nga Këshilli i përzgjedhjes në Moskë. Agjentët e rinj janë përzgjedhur për tu infiltruar në radhët e gazetarëve që shquhen për lidhjet me Sputnik dhe RussiaToday. Po ashtu, Putin duket se ka udhëruar zëvendësimin e ambasadorit rus në Tiranë Alexandër Karpushin për përformancë shumë të dobët.

Këto mendohet se janë përpjekjet e dëshpëruara të Moskës për të tentuar rritjen e influencës ruse në Ballkan dhe për të dhënë një mësim shërbimeve sekrete për të cilët nuk është i kënaqur me punën e kryer sidomos në Ballkan dhe në Shqipëri./Faktori.al

Presidenti turk viziton Greqinë

Presidenti turk Rexhep Tajip Erdogan foli sot mbi nevojën e rishikimit të një traktati të vitit 1923, i cili ndër të tjera përcakton kufijtë e Turqisë me fqinjët e saj.

Komentet e tij u bënë gjatë një takimi me presidentin grek Prokopis Pavlopulos, në fillim të një vizite dy ditore në Athinë.

Presidenti grek Pavlopulos e hodhi poshtë sugjerimin e zotit Erdogan, duke thënë se Traktati i Lozanës nuk ka nevojë “as për ndryshim, as për rishikim”.

Presidenti Erdogan ngriti dhe çështjen e turqve etnikë që jetojnë në Greqi, duke shprehur dyshime në se ata gëzojnë lirinë për të ushtruar besimin e tyre, duke përmendur pakicën myslimane që jeton në krahinën e Trakës.

Pritet që nesër udhëheqësi turk të zhvillojë një vizitë në këtë zonë.

Zoti Erdogan është presidenti i parë turk që bën një vizitë zyrtare në Greqi prej dekadash.

Akademia e Serbisë: Nuk heqim dorë nga Kosova për asnjë çmim

Historiani dhe akademiku serb, Vasilije Krestic ka thënë se Akademia e Shkencave dhe Arteve të Serbisë nuk do të heqë dorë nga Kosova për çfarëdo lloj çmimi.

“Në këndvështrimin tim Akademia do të qëndrojë në pikën ku nuk do t’i çoj duart nga Kosova dhe Metohija për asnjë çmim. Nuk ka një njohje formale të shtetit të vetëshpallur nga shqiptarët në Kosovë”, ka thënë anëtari i kësaj akademie për një radio beogradase, transmeton lajmi.net.

Krestic ka shtuar se Kosova është pjesë integrale e Serbisë dhe është një ‘vijë e kuqe’ mbi të cilën nuk mund të kapërcehet.

Sipas tij, lufta që populli serb në Kosovë të ketë një status normal duhet të vazhdojë.
“Nëse luftojmë kudo për demokraci atëherë nuk duhet të lejojmë dhunë kundër serbëve në Kosovë, kjo dhunë është në çdo hapë dhe nuk po ndalet. Ka shumë gjëra që duhet t’i luftojmë”, ka përfunduar Krestic.

Fjalët e amerikanëve sipas Daçiq: Marrim pjesë në dialog nëse pajtohen Kosova dhe Serbia

Dacic ka qëndruar këto në ditë Uashington, bashkë me ministrat e rajonit. Atje, sipas tij, i kanë thënë që SHBA s’ka propozuar që të jetë pjesë e dialogut në Bruksel. Por, sipas tij, amerikanët kanë thënë se do të jenë pjesë e dialogut nëse pajtohen palët.

“Atë që po e flasin Thaçi e Haradinaj e ka demantuar administrata amerikane. Madje edhe në bisedime me Federica Mogherinin ata i thanë asaj se nuk qëndrojnë pas deklaratave të tyre”, ka thënë Daçiq.

Ai ka shtuar se zyrtarët amerikanë kanë thënë se ”nuk ikin nga kjo, porse kjo duhet të jetë çështje konsensusi dhe e propozimit të përbashkët”.

“Asambleja e Përgjithshme e ka transferuar dialogun Beograd- Prishtinë në nivelin europian dhe çdo ndryshim i ri formati do të kuptonte format të ri bisedimesh, e është e sigurt se edhe Serbia do të kishte kë ta propozonte anëtarë të rinj e që nuk janë pjesëtarë të Bashkimit Europian”, ka thënë ai për “Zërin e Amerikës”.

I pyetur se kë do ta ftonte Serbia në dialog, Dacic ka aluduar në Rusinë.

“Dikë që do të ishte në anën tonë” ka thënë ai.

Ai ka shtuar se gjatë bisedave me zyrtarë amerikanë ka insistuar që të gjendet “minimumi i interesave të përbashkëta” e të mos krijohet imazhi se SHBA-ja dhe vende të tjera perëndimore kanë interesa të tjera nga ajo që ka Serbia.

“Po ashtu edhe roli i vendeve të tjera perëndimore ka qenë që të mos bëhet presion ndaj Serbisë ta njohë Kosovën, por që të arrihet te zgjidhja e pranueshme për të dy palët që do të respektonte interesat e serbëve e të shqiptarëve në Kosovë”, ka thënë Daçiq

Rriten tensionet Kroaci-Serbi pas vendimit të Gjykatës së Hagës

“Praljak zgjodhi të vdiste dhe jo të jetonte si i burgosur i dënuar për krime që nuk i ka kryer. Kroacia nuk sulmoi askënd. Përkundrazi, mbështeti unitetin e Bosnjës. Sulmuesit ishin ushtritë serbe dhe jugosllave të udhëhequra nga Millosheviçi”

BEOGRAD – Një mosmarrëveshje e re mes Kroacisë dhe Serbisë ka shpërthyer pas vdekjes së papritur të të dyshuarit kroat për krime lufte, Slobodan Praljak, i cili ditën e djeshme piu helm në Gjykatën e OKB-së në Hagë.

Gjykata Penale Ndërkombëtare për ish-Jugosllavinë (ICTY) dje dënoi një grup prej gjashtë kroatëve të Bosnjës e Hercegovinës (BeH) nga Lufta e Bosnjës në periudhën 1992 – 1995, gjithsej me 111 vjet burg.

Njëri nga grupi i të dënuarve, ish-gjenerali Slobodan Praljak, u ngrit në këmbë, refuzoi dënimin dhe piu helm nga një shishe e vogël. Më vonë, në Gjykatën e Hagës u konfirmua se Praljak kishte vdekur në spital.

Këshilli i Apelit gjithashtu konfirmoi edhe një herë se presidenti i atërhershëm kroat, Franjo Tudjman, gjatë Luftës së Bosnjës bashkoi forcat me forcat kroate në vend me një “iniciativë të përbashkët kriminale”.

Presidentja kroate, Kolinda Grabar-Kitaroviç, sot tha se vendi i saj nuk ka sulmuar askënd, duke fajësuar forcat serbe në vend.

“Praljak zgjodhi të vdiste dhe jo të jetonte si i burgosur i dënuar për krime që nuk i ka kryer. Kroacia nuk sulmoi askënd. Përkundrazi, mbështeti unitetin e Bosnjës. Sulmuesit ishin ushtritë serbe dhe jugosllave të udhëhequra nga Millosheviçi”, tha Kitaroviç.

Ajo shtoi se është “e padrejtë” që boshnjakët dhe serbët nuk u dënuan për sulme ndaj kroatëve të Bosnjës.

Megjithatë, presidenti serb, Aleksandar Vuçiç, tha se ishte e lehtë për të gjithë të fajësojnë serbët kur flasin për luftën, duke shtuar se askush nuk ishte dënuar për krime kundër serbëve. aa

Shqipëria merr kryesimin e grupit të Detit të Zi

Asambleja e Përgjithshme e PABSEC-së do të mbahet mes datës 19 dhe 21 qershor të vitit të ardhshëm në Tiranë

KIEV – Ukraina i ka dorëzuar Shqipërisë kryesimin me rotacionin gjashtëmujor të Asamblesë Parlamentare të Bashkëpunimit Ekonomik të Detit të Zi (PABSEC).

Në fund të seancës së 55-të plenare të PABSEC-it të mbajtur në Kiev, presidenti i Kuvendit të Ukrainës, Andriy Parubii ia kaloi kryesimin Tiranës.

Asambleja e Përgjithshme e PABSEC-së do të mbahet mes datës 19 dhe 21 qershor të vitit të ardhshëm në Tiranë.

Vendet anëtare të PABSEC-së janë Shqipëria Turqia, Rumania, Armenia, Bullgaria, Gjeorgjia, Moldavia, Rusia, Serbia, Ukraina dhe Greqia.

Asambleja PABSEC-së, siguron bazën ligjore për bashkëpunimin ekonomik, tregtar, social, kulturor dhe politik ndërmjet vendeve anëtare.

Shkup: Arrestime të tjera për ngjarjet e dhunshme të 27 prillit në parlament

Policia maqedonase me urdhër të Prokurorisë publike ka ndaluar ish-ministrin e brendshëm dhe ish-drejtor i Byrosë për siguri publike Mitko Çavkov dhe deputetët e VMRO-DPMNE-së Kërsto Mukovski, Zhaklina Stefanovska si dhe disa persona të tjerë në lidhje me ngjarjet e dhunshme të 27 prillit në parlamentin e vendit.

Ministria e punëve të brendshme nuk ka dhënë më shumë hollësi për këtë veprim, ndërsa ka paralajmëruar se për këtë do të njoftojë gjatë ditës.

Mitko Çavkov, si zyrtar kompetent policor gjatë trazirave të 27 prillit nuk kishte komanduar dërgimin me kohë të forcave shtesë të policisë për të mbrojtur institucionin më të lartë ligjvënës dhe deputetët e rrezikuar brenda tij. Sipas ish-ministrit të brendshëm Agim Nuhiu, z. Çavkov nuk i ishte përgjigjur thirrjeve të tij telefonike.

Ndërkaq, deputeti Kërsto Mukovski duket në një filmim nga regjistrimet e shërbimit të parlamentit duke hapur dyert e hyrjes kryesore të parlamentit për të hyrë turma e njerëzve, të cilët sulmuan fizikisht deputetët brenda.

Në këto ngjarje më së keqi pati pësuar Ziadin Sela, kryetar i Aleancës për Shqiptarët dhe Zoran Zaev, kryetar i Lidhjes Social Demokrate, aktualisht kryeministër i Maqedonisë.

Disa persona ndodhen tashmë në paraburgim prej para pak muajsh nën akuzat për tentim vrasjeje ndaj z. Sela.

Greqi: Bllokohet skafi që u nis nga Shqipëria me rreth 2 tonë marijuanë

Roja bregdetare greke tha se u përfshi në një operacion për goditjen e një rrjeti ndërkombëtar të trafikut të marijuanës.

Burimet greke flasin për bllokimin e një sasie të madhe marijuane prej gati 2 tonësh dhe për arrestimin e tre skafistëve, dy shqiptarë dhe një Italian, që ndodheshin në bordin e një motoskafi super të shpejtë me tre motorë.

Burimet paraprake greke flasin se mjeti dyshohet se u nis nga Shqipëria pasditen e së premtes dhe ngarkesa ishte destinaur për në Greqi dhe në Itali. Sipas mjeteve greke të informimit Autoritetet portuale të Detit Jon filluan ndjekjen në Veri të ishullit grek të Korfuzit fqinj me Shqipërinë.

Sipas burimeve greke operacioni që filloi nga ujërat e Detit Jon mbërriti më pas në ujërat e Egjeut në një zonë detare të hapur. Gjatë operacionit krahas anijeve të marinës greke u angazhuan edhe forcat ajrore me elikopterë. Burimet greke flasins se pas ndalimit të skafit u kryen edhe arrestime të tjera në rrugë tokësore në zonat pritëse të sasive të marijuanës.

Ja pse Sofja këmbëngul për njohjen e pakicës kombëtare bullgare në Republikën e Kosovës

Bullgaria ka shtuar përpjekjet e saj për njohjen e pakicës kombëtare bullgare në Republikën e Kosovës.

Kështu ka bërë të ditur në një intervistë për Radion Kombëtare Bullgare, kryetari i Agjencisë Shtetërore për Bullgarët Jashtë Shtetit, Petër Harallampiev.

Sipas tij, pas suksesit historik lidhur me njohjen e minoritetit bullgar në Shqipëri, që ndodhi një muaj më parë, në kohë të afërt kjo mund të bëhet fakt edhe në Kosovë, ku supozohet se jetojnë afër 50 mijë pjesëtarë të komunitetit bullgar.

Pas 65 vitesh një President i Turqisë viziton Greqinë

ANKARA – Zëvendëskryeministri i Turqisë Hakan Çavuşoğlu tha se presidenti i këtij vendi Recep Tayyip Erdoğan do të jetë presidenti i parë turk i cili do të vizitojë Greqinë pas 65 vitesh.

Duke folur për vizitën e cila do të realizohet gjatë ditëve në vijim, Çavuşoğlu tha se “Kemi tre projekte konkrete. Njëri prej tyre është ekspedita e trageteve për transportin e njerëzve dhe mallrave nga Izmiri në Selanik. Projekti i dytë ndërtimi i linjës së trenit të shpejtë nga Stambolli për në Selanik dhe i treti ndërtimi i urës në portat doganore Kipi dhe Ipsala”.

Çavuşoğlu tha se vizita e presidentit Erdoğan në Greqi do të ngritë marrëdhëniet ndërmjet këtyre dy vendeve në një nivel më të mirë.

Ai bëri të ditur se në fillim të këtij muaji edhe ai vetë ka vizituar Komotinin, që është vendlindja e tij. Çavuşoğlu tha se në kuadër të vizitës së tij ka zhvilluar kontakte në Athinë dhe në Thrakinë Perëndimore.

“Nuk mund ta ndryshojmë të vërtetën se jemi fqinj”

“Nuk mund ta ndryshojmë të vërtetën se Greqia dhe Turqia janë fqinj”, tha Çavuşoğlu duke theksuar nevojën për zhvillimin e bashkëpunimit i cili do të mundësojnë forcimin e dy shteteve në aspektin e marrëdhënieve fqinjësore si dhe për rritjen e standardeve jetësore të popullit.

Sipas tij, në muajin shkurt në Selanik do të realizohet Takimi i Nivelit të Lartë për Bashkëpunimin Strategjik.

“Mendoj se kjo vizitë do të ketë rezultate shumë të rëndësishme”

Lidhur me vizitën të cilën presidenti Erdoğan do të realizojë në Greqi, Çavuşoğlu tha se “Presidenti do ta vizitojë Greqinë si një president i Republikës së Turqisë për herë të parë pas 65 vitesh. Mendoj se se kjo vizitë do të ketë rezultate shumë të rëndësishme. Gjatë vizitës sime në rajonin e Thrakisë Perëndimore, ne u pritëm me një dashamirësi të madhe nga bashkatdhetarët tanë në Komotini dhe Ksanthi. Kjo është sigurisht një emocion që buron nga prania e presidentit tonë, i cili gjithmonë mendon për ata dhe zemra e të cilit rrah për ta. Ky është një emocion i cili buron nga ajo që shohin se një Turqi 80 milionëshe është pranë tyre”.

Seancë e përbashkët e qeverive të Maqedonisë dhe Bullgarisë

Kjo është seanca e parë ndërqeveritare që e mban Qeveria e kryeministrit Zaev me qeverinë e shtetit fqinj. Në dhjetor në Pogradec është dakorduar edhe seancë e përbashkët qeveritare midis Shqipërisë dhe Maqedonisë

SHKUP – Sot në Shtëpinë e ARM-së në Strumicë do të mbahet seanca e parë e përbashkët mes qeverive të Republikës së Maqedonisë dhe Republikës së Bullgarisë, ku pritet të firmosen disa marrëveshje dhe memorandume.

Seanca do të fillojë me bisedime në katër sy mes dy kryeministrave ku do të vijojë seanca plenare.

Qeverinë e Maqedonisë e përfaqësojnë kryeministri Zoran Zaev, zëvendëskryeministrat Bujar Osmani, Koço Agjushev si dhe ministrat Oliver Spasovski, Radmilla Shekerinska, Nikolla Dimitrov, Goran Sugarevski, Lupço Nikollovski, Damjan Mançevski, Suhejl Fazliu, Sadulla Duraku, Kire Naumov dhe Dragi Rashkovski.

Nga ana bullgare në seancë do të marrin pjesë zëvendëskryeministrat Tomisllav Donçev, Krasimir Karakaçanov dhe Eketarina Zaharieva, ministrat Valentin Radev, Nikollaj Nankov, Neno Dimov, Rumen Porozhanov, Ivajlo Moskovski, Emil Karanikollov, Temenuzhna Petkova dhe Nikolna Angellkova.

Në këtë seancë të përbashkët qeveritare mes Maqedonisë dhe Bullgarisë pritet të nënshkruhen nëntë dokumente për bashkëpunim dypalësh në fushën e politikës së jashtme, investimeve, energjetikës, mbrojtjes, turizmit, telekomunikimeve, infrastrukturës dhe për reagime gjatë katastrofave natyrore.

Gjatë seancës duhet të nënshkruhet edhe memorandum për mirëkuptim mes Ministrisë së Transportit, Teknologjisë Informatike dhe Komunikimit të Bullgarisë dhe Ministrisë së Shoqërisë Informatike dhe Administratës së Maqedonisë për uljen e tarifave ndërkombëtare për roaming për shërbime të telekomunikimeve, që e aprovuan dje qeveritë e të dy vendeve.

Marrëveshjet janë pjesë e përmbushjes së Marrëveshjes për miqësi, bashkëpunim dhe fqinjësi të mirë të nënshkruar më 1 gusht të këtij viti në Shkup.

Është paraparë konferencë e përbashkët për media të dy kryeministrave Zoran Zaev dhe Bojko Borisov.

Para fillimit të seancës plenare kryeministrat Zaev dhe Borisov do të vendosin lule para monumentit të ish-presidentit Boris Trajkovski.

Kjo është seanca e parë ndërqeveritare që e mban Qeveria e kryeministrit Zaev me qeverinë e shtetit fqinj. Në dhjetor në Pogradec është dakorduar edhe seancë e përbashkët qeveritare midis Shqipërisë dhe Maqedonisë.

Gjatë vizitës zyrtare të kryeministrit Zaev në Beograd është dakorduar edhe seancë e përbashkët mes Qeverive të Maqedonisë sdhe Serbisë, e cila duhet të mbahet nga fundi i shkurtit apo në fillim të marsit të vitit të ardhshëm.

Daçiçi: 14 shtete do ta tërheqin njohjen e Kosovës

Ministri i Jashtëm serb, Ivica Daçiçi, ka deklaruar se lista e vendeve që njohën Kosovën do të zvogëlohet në më pak se 100 vende.

Sipas tij, pas Guineas që ka “tërhequr” njohjen e Kosovës, numri 114 i njohjeve të Kosovës, është gënjeshtër, transmeton Indeksonline.

“Kjo vetëm tregon se lista e 114 vendeve që kanë njohur Kosovën do të zbresë në 100 vende”, ka thënë Daçiq.

Dodik çmendet: Mladiq është hero, dëshmi janë këngët për të

Presidenti i entitetit Republika Sërpska Milorad Dodik, pas vendimit të sotëm të Tribunalit të Hagës për burg të përjetshëm për Ratko Mladiqin, ka deklaruar se ish-komandanti i ushtrisë serbe në Bosnjë gjithmonë ka qenë hero, ndërsa dënimi i tij nuk paraqet kurrfarë befasie, transmeton Expressi.

Dodik ka thënë se “vendimi i sotëm do ta forcojë edhe më shumë popullin serb”. Sipas tij, Mladiqi është hero, për shkak se “në kushte të pamundura ka penguar gjenocidin mbi serbët, si në BeH, ashtu edhe në Kroaci”.

“Ky nuk është dënim i popullit serb, por një shuplakë e turpshme për viktimat serbe. Aktgjykimet nuk mund të ndikojnë mbi faktet tona historike (…) Vetëm historia do të japë përgjigjen përfundimtare se kush është gjenerali Mladiq (…) Për të moti është rezervuar vendi i heroit, sepse ai atë e bëri përmes ushtrisë së vet dhe popullit të vet”, ka thënë Dodik.

Por deklaratat e marra të Dodikut nuk përfundojnë me kaq. Ai ka shtuar edhe se “Mladiqi ka hyrë në këngët serbe” dhe se “kjo është arma e tyre më e fuqishme që zgjat nëpër kohë”

Kandiç: Aktgjykimi për Mladiçin flet mjaft se çfarë komandanti dhe ushtrie ishin

“Për shkak të komandantëve dhe oficerëve të tillë, ne si shoqëri kemi humbur perspektivën e qytetërimit”, theksoi koordinatorja e KOMRA-s, Natasha Kandiç

BEOGRAD – Themeluesja e Fondit për të Drejtën Humanitare dhe koordinatorja rajonale e KOMRA-s në Serbi, Natasha Kandiç, tha sot se vendimi i shkallës së parë të Gjykatës së Hagës, me të cilin ish-komandanti i Ushtrisë së Republikës Sërpska Ratko Mlladiç u dënua me burgim të përjetshëm, konfirmon se Mladiç ka kontribuar në ekzekutimin dhe që është përgjegjës për gjenocid dhe krime kundër njerëzimit.

“Megjithëse Këshilli gjyqësor në versionin përmbledhës të verdiktit paraqiti të dhëna që ishin më pak të njohura për opinionin e gjerë. Vendimi i marrë bazohet në mbi 2.000 fakte”, tha Kandiç.

Sipas saj, pritej që trupi gjykues nuk do të lëshohej në argumentimin e gjenocidit në komunat tjera, për të cilat ngarkohej Mladiç në aktakuzë.

Megjithatë, siç thekson Kandiç, verdikti flet mjaft se çfarë komandanti dhe ushtrie ishte ajo.

“Për shkak të komandantëve dhe oficerëve të tillë, ne si shoqëri kemi humbur perspektivën e qytetërimit”, theksoi koordinatorja e KOMRA-s”, Kandiç.

Sot trupi gjykues shpalli vendimin e shkallës së parë ndaj të cilës ekziston mundësia e apelit.

Gjykimi i Mladiçit filloi në maj 2012, një vit pas arrestimit të tij në Serbi në fund të majit të vitit 2011, pas 16 vitesh në arrati me ç’rast iu dorëzua Gjykatës Ndërkombëtare Penale në Hagë.

Harta e Dodikut për ndarjen e Kosovës dhe Bosnje-Hercegovinës

Presidenti i Republikës Srpska, Millorad Dodik pa hezituar fare nga reagimet publike, ndan Kosovën dhe Bosnje-Hercegovinën.

Në një intervistë ekskluzive për Deutsche Wellen, Millorad Dodik tha se Republika Srpska nuk do të organizojë referendum për shkëputje nga Bosnje-Hercegovina. Por vetëm për momentin, sepse pavarësia e Republikës Srpska, ndarja e kësaj pjese nga Bosnja dhe bashkimi me Serbinë, mbeten “ëndërr e tij”.  Millorad Dodik pohon se Bosnje-Hercegoivna e tanishme “nuk do ta mbijetojë” në formën e tanishme. Për dallim prej shumë politikanëve të tjerë serbë, Dodik nuk heziton fare edhe nga ndarja e Kosovës dhe e Bosnjes. Në intervistën për DW, të zhvilluar nga Zorica Ilic dhe Bahri Cani, Dodik vizaton madje edhe kufitjë e ri të këtyre vendeve.

Reagime të ashpra

Inçizimi i intervistës ku Dodik vizaton kufij të rinj në Ballkan ka zgjuar interesim të madh në shumë media të Serbisë, Bosnje-Hercegovinës dhe Kroacisë. Ka reaguar edhe kabineti i presidentit të Serbisë, Aleksandar Vuçiq, i cili kundërshton ndryshimin e kufijve në Ballkan.

Vizatimin e hartave e ka kundërshtuar edhe lideri i Ligës së Socialdemokratëve në Vojvodinë, Nenad Çanak, i cili tha se “vizatimet e këtilla ta kujtojnë fillimin e tragjedive të tmerrshme nga fillimi i viteve 90-të”.

“Millorad Dodiku po luan me zjarrin që do ta përbinte edhe ate vet“, thotë Çanak. Në serialin e intervistave me liderët e Bosnje-Hercegovinës (Bakir Izetbegoviq, Dragan Çoviq, Mlladen Ivaniq dhe Millorad Dodik), ata prashikojnë të ardhme të vështirë për vendin e tyre. Të gjithë ankohen për bllokimin e institucioneve dhe asnjë prej tyre nuk sheh ndonjë zgjidhje të shpejtë të problemeve, sepse të gjitha vendimet merren me konsensus.

Bosnjaku Izetbegoviq dhe kroati Çoviq do ta njihnin pavarësinë e Kosovës, por këtë e pamundëson kundërshtimi i palës serbe në institucione.

Turqi, nga kontrabandistët konfiskohet Teurati i vjetër 7 shekuj

MUGLA – Në qarkun Seydikemer, të provincës turke Mugla, është konfiskuar një kopje e Teuratit të punuar prej ari dhe e shkruar në lëkurë dreri.

Ekipet e xhandarmërisë erdhën në kontakt me kontrabandistët të cilët përpiqeshin të shesin Teuratin, për të cilin besohet të jetë shtatë shekuj i vjetër.

Pjesëtarët e forcave të sigurisë me të dyshuarit ranë dakord për një çmim prej 7.5 milionë lira (rreth 1.64 milionë euro) dhe organizuan një takim në bregdet.

Në operacion u arrestuan Sadettin U., Selahattin U., Zahit C. dhe Ilker A. dhe u konfiskua kopja e librit të shenjtë të Teuratit.

Sadettin U. u arrestua më pas për kontrabandë, ndërsa të tjerët u liruan me masën e ndalesës.

Libri është dorëzuar në Muzeun Fethiye për përpunim të mëtejshëm. aa

Jovanoviç: Secili politikan në Serbi privatisht ma thotë se kam të drejtë për pavarësinë Kosovës

Kryetari i Partisë Liberal-Demokratike, Çedomir Jovanoviq, në një intervistë të gjatë për Kosova 2.0 ka folur për politikën e tij pro pavarësisë së Kosovës. I pyetur se përse ai është një përkrahës i pavarësisë ai është përgjigjur shkurt “sepse është një realitet”.

“Sepse është diçka e vërtetë. Një realitet. Si mund t’ju them ndryshe kur është realitet? Nuk ishte qëllimi im. Ta injoroni realitetin pas asaj që ndodhi para dhe pas viteve ’90?. Çdo politikan serb pas kamerës më thotë se kam të drejtë. Çdo qytetar në Serbi sot me një logjikë të shëndetshme ju tregon se unë kam të drejtë në këtë çështje dhe në fund ne thjesht vazhdojmë kështu – duke humbur kohë”, tha ai.

Jovanoviq deklaroi se presidenti i Serbisë pranoi që lista serbe të mbështet qeverinë e Haradinajt sepse i është dukur alternativë më e mirë sesa mbështetja e Albin Kurtit.

“Ju e dini, Vuçiç tha se ne duhet të votojmë për Haradinajn sepse ai është një zgjedhje më e mirë se Albin Kurti. Sigurisht që ai duhet të japë disa shpjegime. Haradinaj është një kriminel lufte sipas gjykatave tona. Gjykata jonë e akuzon, dhe në fund, lista serbe voton për Haradinajn. Vucic duhet të luajë këtë rol”

Ai ka folur edhe për rolin e Listës serbe në Kosovë, duke thënë se është instrument i Beogradit në Kosovë.

Për Asociacionin e Komunave me shumicë serbe në Kosovë thotë se është në dëmë të Kosovës.

“Jo, nuk e mbështes atë, sepse është një kërcënim për të ardhmen e Kosovës. Është një shenjë se ne nuk jemi në gjendje të jetojnë së bashku si qytetarë në të ardhmen, por që ne duhet të ndahemi. Kemi nevojë për serbë të Kosovës të integruar plotësisht. Nuk është e lehtë, sepse e kaluara jonë është plot gjakderdhje. Duhet të jemi më të përfshirë në ndërtimin e paqes. Por ne nuk mund të jemi në trenin vdekjeprurës për përjetësinë – për të vrarë njëri-tjetrin dhe për të shkatërruar njëri-tjetrin”, ka thënë ai.

I pyetur për pranin ruse në rajon, ai ka thënë se është i frikësuar nga ky fakt, pasi për Moskën, Kosova është një shtet kriminal.

“Po sigurisht se kam frikë. Për shkak se ata duan të na përdorin dhe ne jemi një mjet i përsosur për një rrëmujë të re në këtë pjesë të Evropës. Ata mbështesin forcat e viteve ’90, të nacionalizmit. Ata mbështesin [Milorad] Dodik dhe kanë një qasje të tmerrshme ndaj Kosovës. Për zyrtarët në Moskë, Kosova është një shtet kriminal. OK, ndoshta në Kosovë mund të përballemi me kriminelët që janë të njëjtë në Moskë. Por ideja është një shtet kriminal është një turp. Por prapa kësaj është të na shtyjë në një luftë të re, sepse çdo luftë në Ballkan është e dobishme për Rusinë”, tha ai tutje.

Çedomir Jovanoviq foli edhe për politikën që do ta aplikonte ndaj Kosovës nëse do të bëhej kryeministër i Serbisë.

“Unë nuk kam asnjë të drejtë ta ndaloj Kosovën. Nëse ju dëshironi të bëheni pjesë e UN. në rregull, bëhuni pjesë e UN. Nëse dëshironi të jeni pjesë e UEFA’së, bëhuni pjesë e saj. Dua të luaj futboll me ju. Më mirë futboll se luftëra. Nuk jam i lumtur që nuk jeni pjesë e UNESCO-së. Për mua, është më e mirë nëse Kosova është në UNESCO sesa në një vrimë të zezë. Politikanët tanë po tregojnë muskujt e tyre, duke na thënë: “Unë kam muskuj për t’i bllokuar ata nga të qenit pjesë e UNESCO-së.” Ideja ime është të punojmë së bashku në këto çështje. Le ta hapim kufirin dhe së bashku të hapim perspektivat e integrimit evropian – pa asnjë gënjeshtër”. Ka thënë ai për 2.O.

Në Stamboll zbulohet specie e re endemike bimore

Specia e zbuluar në të njëjtën kohë është zbulim që ndodh për herë të parë edhe për literaturën botërore

STAMBOLL – Në kuadër të një projekti lidhur me diversitetin biologjik nga Ministria e Pyjeve dhe Menaxhimit të Ujërave e Turqisë, në Stamboll është zbuluar një specie e re endemike bimore e cila është emërtuar si Qepa e Stambollit (Allium istanbulenese).

Sipas një deklarate nga ministria, specia e zbuluar në të njëjtën kohë është zbulim që ndodh për herë të parë edhe për literaturën botërore.

Zbulimi është realizuar në kuadër të “Projektit të Inventarizimit dhe Monitorimit të Biodiversitetit (UBENIS), ndërsa është konstatuar se specia e re, Qepa e Stambollit, nuk i ngjan asnjë mostre të gjinisë “Allium” të mbledhura gjatë punimeve të biodiversitetit në vend.

Specia është përkufizuar edhe shkencërisht, ndërsa në literaturën botërore është emëruar si “Allium istanbulenese”.

Turqia si vend i pasur me lloje të gjinisë Allium, është qendër gjenetike edhe e disa grupeve të tjera.

Gjinia e njohur me emrin shkencor Allium përfshin bimët bulbore me aromë të veçantë, në të cilat bëjnë pjesë qepa, preshi dhe hudhra, ndërkohë që në Turqi në mënyrë natyrore rriten deri në 200 specie të kësaj gjinie.

Ndërkaq, me këtë zbulim, numri i specieve endemike të Stambollit është rritur në 54.

Në deklaratën e Ministrisë së Pyjeve dhe Menaxhimit të Ujërave është cituar edhe ministri Veysel Eroğlu, i cili ka thënë se Turqia është vend mjaft i pasur për sa i përket specieve endemike.

“Me projektin UBENIS të nisur në vitin 2013, deri më sot kemi realizuar punime në 33 provinca. Deri në fund të këtij viti, ne do të kemi përfunduar punimet edhe në 21 provinca, përfshirë Stambollin. Kur të përfundojnë punimet në të gjitha provincat tona, ne do të nxjerrim një hartë të biodiversitetit të Turqisë”, është shprehur Eroğlu. aa

Putini fton Vuçiçin në Moskë

Foto arkivi

Presidenti i Serbisë, Aleksander Vuçiç, takoi të enjten ambasadorin rus në Beograd, Aleksander Çepurin, i cili i dha ftesën e presidentit rus, Vladimir Putin, për të vizituar Moskën në gjysmë të dhjetorit.

Siç njofton kabineti i Vuçiqit, ky i fundit tha se është shumë e rëndësishme që do të ketë rastin të takojë Putinin dhe të bisedojë për marrëdhëniet dypalëshe dhe për propozime konkrete në avancimin e dialogut politik dhe bashkëpunimit ekonomik.

Një nga temat e diskutimit do të jetë edhe bashkëpunimi në fushën e energjetikës, thuhet në njoftim.

Vuçiq tha se shpreson të bisedojë me Putinin edhe për marrëdhëniet në Ballkanin Perëndimor, Evropë, si dhe për gjendjen globale politike dhe ekonomike.

Greqi: U arrestua një grup trafikantësh, kryesisht shqiptarë

Pamje e dy policëve grekë

Policia e Greqisë ka njoftuar mbrëmë se e ka shkatërruar një hallkë të krimit të organizuar, me ç’rast i ka arrestuar 20 trafikantë të dyshuar.

Në këtë operacion të kryer gjatë dy ditëve të javës së kaluar me ndihmën e agjencisë Europol, janë zbuluar katër kapacitete punuese në kryeqytetin Athinë, ku ishin falsifikuar dokumentet.

Shumica e të arresturve ishin shqiptarë, por në mesin e tyre ka pasur edhe grekë me origjinë shqiptare dhe tre sirianë, ka njoftuar policia e Greqisë.

Ata janë të akuzuar për falsifikimin e dokumenteve, përfshirë pasaporta, që kushtonin prej 400-500 euro, kartela kreditore dhe të sigurimit social, raporton agjencia AFP nga Athina.

Ky grup i reklamonte shërbimet e tij në Greqi dhe në gjithë Evropën, nëpërmjet imejlave dhe në Internet, ndërsa i aranzhonte udhëtimet e klientëve të vet në Britani.

Nën presionin e fqinjve të vet evropianë, autoritetet e Greqisë në mënyrë të theksuar e kanë forcuar luftën kundër trafikimit dhe falsifikimit të dokumenteve, prej krizës së migrantëve në vitin 2015.

Daçiçi: Kundërshtojmë thirrjen për të zgjedhur ndërmjet Rusisë dhe perëndimit

Serbia dëshiron ta mbajë balancimin e ndjeshëm ndërmjet Rusisë dhe perëndimit, ka thënë ministri i jashtëm i Serbisë, Ivica Daçiç, duke e refuzuar thirrjen e Shteteve të Bashkuara për tu përcaktuar për njërën anë.

Serbia, vendi më i madh që ka dalur nga shkatërrimi i ish-Jugosllavisë, konsiderohet se ka afërsi natyrore me Rusinë, por është tejet e interesuar për anëtarësim në Bashkimin Evropian.

Para disa ditësh, zyrtari i lartë i Departamentit amerikan të shtetit, Hoyt Brian Yee, gjatë vizitës në Beograd tha se Serbia “nuk mund të ulet në dy karrige në të njejtën kohë”.

Këto komente të tij janë kritikuar ashpër në Beograd.

Ministri i jashtëm i Serbisë, Ivica Daçiq, tha se Beogradi do ta mbajë balancimin me perëndimin, Rusinë dhe Kinën”.

“Ajo që ne nuk dëshirojmë është që dikush ta tërheq karrigen tonë nën ne…ajo që është e rëndësishme është që të shohim se çka është në interesin tonë më të mirë”, i tha Daçiq agjencisë Reuters gjatë një interviste.

Greqi, ish-ministri i Mbrojtjes dënohet me 19 vite burg

Tsochatzopoulos, siç thuhet në aktvendimin gjyqësor, është dënuar për korrupsion dhe larje parash lidhur me kontratën për blerjen e nëndetëseve gjermane dhe sistemit kundërajror raketor rus

ATHINË – Ish-ministri grek i Mbrojtjes Akis Tsochatzopoulos (78) është dënuar me 19 vjet burg për larje parash, dhënie ryshfeti dhe evasion fiskal.

Tsochatzopoulos, siç thuhet në aktvendimin gjyqësor, është dënuar për korrupsion dhe larje parash lidhur me kontratën për blerjen e nëndetëseve gjermane dhe sistemit kundërajror raketor rus.

Gjykata në Athinë në fund të procedurës që zgjati tre vite mori vendim me të cilin, në dënime të ndryshme, është dënuar jo vetëm ish-ministri grek por edhe 16 persona të tjerë, përfshirë edhe bashkëshorten dhe vajzën e tij.

Sipas vendimit të gjyqit, Tsochatzopoulos, i cili gjendej në liri me kusht, sërish do të përfundojë prapa grilave.

Tsochatzopoulos në mars të vitit 2013 është dënuar me tetë vite burg për shkak të parashtrimit të dokumenteve të rrejshme mbi pronën dhe të ardhurat. Atëbotë iu shqiptua edhe gjobë prej gjysmë million euro dhe iu konfiskua shtëpia në qendër të Athinës.

Pasi në burg kaloi pothuajse pesë vite, këtë vit me kaucion prej 200 mijë eurosh u lirua me kusht.

Tsochatzopoulos ka qenë ministër i Mbrojtjes prej vitit 1996 deri në vitin 2001 dhe ministër i Zhvillimit prej vitit 2001 deri në vitin 2004.

Vuçiçi: Në bisedë me diplomatin Hoyt Yee i kam mbrojtur interesat serbe

Aleksander Vuçiq (majtas) dhe Hoyt Brian Yee, gjatë bisedimeve në Beograd më 24 tetor të këtij viti

Presidenti i Serbisë, Aleksander Vuçiç, tha se gjatë bisedës me zyrtarin e lartë të Departamentit amerikan të shtetit, Hoyt Brian Yee, i ka mbrojtur interesat e Serbisë.

“Mund të them se kam punuar pastër dhe me përgjegjësi dhe se i kam mbrojtur interesat e Serbisë”, u tha sot gazetarëve në Beograd, presidenti Vuçiq, pas takimit me liderin e Republikës Serbe në Bosnjë-Hercegovinë, Millorad Dodik.

“Hoyt Yee është politikan serioz, i ka paraqitur mesazhet që për ne janë të vështira, por nuk do të thoja se janë të reja”, tha Vuçiq, dhe ka shtuar se “toni ndoshta ishte më i lartë, prandaj edhe unë për një oktavë më fuqishëm i kam mbrojtur interesat e Serbisë”.

Megjithatë, Vuçiq theksoi se është vështirë që pa pasur raporte të mira me Shtetet e Bashkuara, Serbia mund të llogarisë për prosperitet në të ardhmen, raporton agjencia Beta.

“Por, çfarë vendi do të ishin ne sikur të mos kultivonim frymë të lirisë”, tha Vuçiq dhe ka shpjeguar se Beogradi “i respekton interesat e Shteteve të Bashkuara, Evropës, Rusisë, por i respektojmë edhe interesat e Serbisë”.

Në kumtesën pas bisedës së presidentit Vuçiq me zëvendës-ndihmësin e sekretarit amerikan të shtetit, Hoyt Brian Yee, para disa ditësh në Beograd, theksohej se ai ishte i brengosur për ndikimin rus në Ballkan dhe Serbi dhe se kërkonte zgjidhjen e çështjes së ndezjes së Ambasadës së Shteteve të Bashkuara në Beograd dhe zbardhjen e vrasjes së vëllezërve Bytyçi, shtetas amerikanë me prejardhje nga Kosova.

Turqia feston 94-vjetorin e shpalljes së Republikës

Erdogani është shprehur gjatë ceremonisë se “Shpirti që i dha jetën Republikës sonë, që kurorëzonte luftën tonë të pavarësisë me fitoren, sot po qëndron ende në këmbë ashtu si 94 vjet më parë”

ANKARA – Sot Turqia shënon 94-vjetorin e shpalljes së Republikës, ku me këtë rast drejtues të lartë të shtetit kanë vizituar mauzoleun (Anıtkabir) të Ataturkut.

Presidenti Recep Tayyip Erdoğan ka vendosur kurorë me lule në mauzoleun Anıtkabir dhe më pas është kënduar himni kombëtar. Të pranishëm në ceremoni kanë qenë edhe Kryetari i Parlamentit të Turqisë, İsmail Kahraman, Kryeministri Binali Yıldırım, Shefi i Shtabit të Përgjithshëm të Ushtrisë, Gjeneral Hulusi Akar, anëtarë të Këshillit të Ministrave, kryetari i partisë CHP, Kemal Kılıçdaroğlu, kryetari i partisë MHP, Devlet Bahçeli dhe zyrtarë të tjerë.

Presidenti Erdoğan është shprehur gjatë ceremonisë se “Shpirti që i dha jetën Republikës sonë, që kurorëzonte luftën tonë të pavarësisë me fitoren, sot po qëndron ende në këmbë ashtu si 94 vjet më parë. Rezistenca e lavdishme e cila në histori është shënuar si saga historike ’15 korriku’ është formësimi këtij shpirti dhe vullneti të përhapur në të gjithë sipërfaqen e vendit.”

Më pas Erdoğan në librin e shënimeve në Anıtkabir ka shkruar: “I dashur Ataturk, ne me një entuziazëm të thellë po festojmë 94-vjetorin e Republikës së shtetit tonë të fundit të cilin e kemi duke paguar një çmim të rëndë. Republika e Turqisë të cilën ju na e keni lënë amanet është e mbushur plot me sakrifica në çdo fazë të saj dhe është një vepër e një lufte të ashpër. Lufta jonë e Pavarësisë e kurorëzuar me fitore dhe e cila i jep jetë Republikës sonë qëndron ende në këmbë ashtu sikurse 94 vite më parë. Rezistenca e lavdishme e cila në histori është shënuar si saga historike ’15 korriku’ është formësimi këtij shpirti dhe vullneti të përhapur në të gjithë sipërfaqen e vendit. Teksa festojmë 94-vjetorin e themelimit të Republikës sonë përkujtojmë me nder kryesisht ju dhe shokët tuaj të luftës si dhe të gjithë veteranët tanë, si dhe urojmë që mëshira e Allahut të jetë mbi dëshmorët tanë. Gëzuar Ditën e Republikës.”

Pas ceremonisë, kanë vazhduar aktivitete të tjera, ku Anıtkabir është i hapur për vizita edhe për qytetarët.

Çdo vit, Turqia shënon më 29 tetor Ditën e Republikës, pasi në vitin 1923 u shpall Republika e Turqisë.

Greqi, arrestohet i dyshuari për sulmin me bombë ndaj ish kryeministrit

Ish kryeministri grek, Lucas Papademos, pësoi lëndime serioze të kofshës dhe trupit, kur në maj të vitit të kaluar hapi “letrën bombë” në automjetin e tij

ATHINË – Policia greke arrestoi një person të dyshuar për sulmin me bombë ndaj ish-kryeministrit të vendit në maj të vitit të kaluar. I dyshuari 29-vjeçar, emri i të cilit nuk u publikua, u arrestua të shtunën në mëngjes.

Ish kryeministri grek, Lucas Papademos (70), pësoi lëndime serioze të kofshës dhe trupit, kur në maj të vitit të kaluar hapi “letrën bombë” në automjetin e tij.

Ai kaloi më shumë se një muaj në trajtim. Dy persona të tjerë u plagosën më lehtë në shpërthimin e bombës.

Papademos ishte kryeministër për gjashtë muaj në periudhën 2011- 2012 dhe gjithashtu është ish-zëvendësguvernator i Bankës Qendrore Evropiane.

Policia shtoi se i dyshuari mund të ketë qenë i përfshirë edhe në dërgimin e një “pakete bombë” në mars të këtij viti në Ministrinë e Financave të Gjermanisë dhe në zyrën e Fondit Monetar Ndërkombëtar në Paris, ku në një shpërthim të dobët u plagos një person.

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend