Mbërrin në Itali ekipi i mjekëve dhe infermierëve shqiptarë. Për ti pritur në aeroport ka shkuar vetë ministri i Jashtëm i Italisë, Luigi Di Maio.

Ai gjeti rastin të falenderonte popullin shqiptar, qeverinë dhe kryeministrin Rama si dhe shtoi se Shqipëria me solidaritetin e treguar sot u tregoi vendeve të tjera të BE-së arsyen pse u krijua BE-ja.

“Falenderoj kryeministrin Edi Rama, qeverinë dhe popullin për solidaritetin e madh që po na tregojnë. Para se këta mjekë hypnin në avion, kryeministri shqiptar mbajti atje një fjalim mallëngjyes, tha se edhe ata po përballen me luftën kundër koronavirusit por se atje s’mund të mbanin rezerva në një kohë që neve këtu në Itali, miqëve të tyre po na mbarojnë rezervat. Solidariteti i tyre tregon një arsye më shumë që Shqiëpria të hyjë sa më parë në BE. Shpirti i solidaritetit është ajo vlerë që e bëri të lindë BE dhe që po ua kujton Shqipëria vendeve të BE sot. Faleminderit Shqipëri, faleminderit qeveria”.

Di Maio shtoi se mjekët shqiptarë do të ndihmojnë në zonën më të nxehtë të përhapjes së sëmundjes së koronavirusit në Itali, në atë të Lombardisë.

“ Nesër këta mjekë dhe infermierë do shkojën në Lombardi aty ku është vatra më e nxehtë e virusit. Njerëzve tanë po iu shkon ndihmë dhe për këtë jemi të lumtur”,- vijoi ai. bw

voal.ch – Pas gjendjes shumë të rënduar në Itali prej pandemisë të Covid 19, ku vetëm sot kanë humbur jetën 919 njerëz, ka reaguar Papa Françesku duke u lutur në sheshin e Shën Pjetrit bosh.

Ka reaguar gjithashtu edhe Presidenti i Italisë Sergio Mattarella me një apel për Europën:

Presidenti italian Sergio Mattarella ka paralajmëruar : “Evropa ose e kupton seriozitetin e kërcënimit ose nesër do të jetë vonë. Ne kemi nevojë për veprim të përbashkët “.

Presidenti Mattarella pasi ka falenderuar popullin italian dhe veçanërisht profesionistët e shëndetit, mjekët, infermierët, forcat e rendit dhe të gjithë ata që janë në vijat e para për t’u përballur me “një faqe të trishtuar në historinë tonë”.

Presidenti Mattarella nisur nga situata shumë e rëndë ka mbajtur i ka bërë apel Europës duke mbajtur qendrim të qartë kritik : “Në Bashkimi Evropian, Banka Qendrore dhe Komisioni, ditët e fundit, kanë marrë vendime të rëndësishme dhe pozitive financiare dhe ekonomike, të mbështetura nga Parlamenti Evropian,  por Këshilli i krerëve të qeverive kombëtare nuk e ka bërë ende këtë. Kjo pritet të ndodhë konkretisht në ditët në vijim “. Një mesazh i ashpër, ndaj “skifterëve” të Evropës, shkruan Corriere.it duke komentuar fjalën e Mattarella-s

Për kreun e shtetit italian, “modelet e vjetra” duhet të tejkalohen, përndryshe mbi kokë rreziku është ai i shpërbërjes: “Shpresoj që të gjithë ta kuptojnë plotësisht, para se të jetë vonë, serioziteti i kërcënimit për Evropën. Solidariteti nuk kërkohet vetëm për shkak të vlerave të përbashkëta me Bashkimin Europian, por edhe të interesit të përbashkët “. Ky ishte një nga thekset kryesore të fjalës të Mattarella-s drejtuar sot përmes televizionit popullit italian.

Italia vazhdon që të jetë shteti me më shumë vdekje, për shkak të koronavirusit.

Në shtetin italian, koronavirusi ka shkaktuar gjithsej 8215 viktima, deri në këto momente.

Ndërsa, të prekur nga Covid-19 numërohen 80 589 persona.

Italia është shteti me më shumë të prekur nga koronavirusi, ndërsa SHBA ka numrin më të lartë të të infektuarve.

Koronavirusi ka nisur të shkaktojë viktima të shumta në shtetet perëndimore e europiane.

Në Francë, në 24 orët e fundit, janë shënuar 365 viktima. Në shtetin francez, kanë vdekur gjithsej 1696 persona nga koronavirusi.

Numri total i të prekurve nga koronavirusi në Francë ka shkuar në 29 155 vetë.

Janë shëruar gjithsej 4948 persona të infektuar me koronavirus.

Një tjetër shifër alarmante vjen nga Italia, sa i takon stafit mjekësor të infektuar me COVID-19.

Duke cituar sindikatën “Assomed Anaao”, agjencia italiane e lajmeve “ANSA” raporton se janë infektuar deri më tani  5000 punonjës shëndetësorë.

Kjo sindikatë bëri thirrje për veprim të menjëhershëm për t’u ofruar të gjithë punëtorëve pajisje mbrojtëse.

Shefja e sindikatës së Piemonte, Chiara Rivetti deklaroi se të martën dy kirurgë të tjerë ishin vendosur në pajisjet për frymëmarrje për shkak të gjendjes kritike shëndetësore.

Kujtojmë se deri më tani në Itali coronavirusi ua ka marrë jetën 6,820 personave, kurse numri i përgjithshëm i të prekurve me COVID-19 në këtë shtet që nga fillimi i shpërthimit të pandemisë ka shkuar në 69.176.

Ministri gjerman i Evropës, Michael Roth, me apel ndaj Kosovës: Korona nuk pyet për grindjet mes politikanëve!

Nisur nga kriza aktuale në politikë e brendshme të Kosovës, ministri gjerman i Evropës, Michael Roth, i është drejtuar me në apel Kosovës dhe lidershipit kosovar.

Në një deklaratë për media që e ka DW, ai kërkon nga këta që të përqendrohen në përballjen me sfidën e pandemisë së koronavirusit.

“Po e ndjek me shqetësim të shtuar situatën e brendshme politike në Kosovë. Numri i personave të infektuar me koronavirus në vend po rritet, dhe tashmë ka edhe një rast vdekjeje. Ndërkohë, disa politikanë të papërgjegjshëm në Prishtinë duket se përfitojnë pa turp nga situata dramatike. Ata po përpiqen të rrëzojnë qeverinë. Ata madje shkojnë aq larg sa të deklarojnë publikisht që kufizimet e daljes së qeverisë nuk duhet të respektohen. Mund t’u bëj thirrje vetëm qytetarëve të Kosovës: Mbroni veten dhe njerëzit, qëndroni në shtëpi, “#stayhome”. Dhe unë u them atyre që janë përgjegjës për politikën: Corona nuk pyet për grindjet dhe ndjeshmëritë në politikën e brendshme! Tani është koha të merret përgjegjësi, të qëndrohet së bashku dhe të mbrohet popullsia. Po rrezikohet shumë! Vetëm duke punuar së bashku ne mund ta kapërcejmë këtë krizë shëndetësore të paparë”, tha ai.

Të martën pasdite, në një konferencë shtypi, kryetarja e Parlamentit të Kosovës, Vjosa Osmani, kishte bërë të njohur vendimin e kryesisë së parlamentit për të mbajtur votën e mosbesimit kundër qeverisë aktuale të kryesuar nga Albin Kurti i Vetëvendosjes. Vjosa Osmani vetë ishte kundër këtij mocioni votëbesimi.

Më parë edhe Shtetet e QUINT-it u kishin bërë thirrje institucioneve dhe liderëve të Kosovës që në këtë periudhë si prioritet të kenë përballimin e sfidës me koronavirusin, duke respektuar dispozitat e Kushtetutës dhe kompetencat që ajo iu siguron atyre.

Ish-presidenti i Finlandës, Martti Ahtisaari, njëherësh ish-ndërmjetësues i Kombeve të Bashkuara në bisedimet për statusin e Kosovës, ka dalë pozitiv në testin për koronavirus, thuhet në një njoftim të Zyrës së Presidencës finlandeze.

“Infektimi është konfirmuar të hënën, më 23 mars. Presidenti Ahtisaari është mirë, marrë parasysh situatën”, thuhet në njoftim.

Lajmi është konfirmuar edhe nga djali i Ahtisaarit, Marko, përmes një postimi në Twitter.

Ai ka thënë se tre ditë më herët, edhe nëna e tij është konfirmuar si rast me koronavirus.

Ahtisaari, i cili i ka 82 vjet, ka qenë në krye të Finlandës nga viti 1994 deri më 2000.

Më 2008 ka fituar Çmimin Nobel për Paqe për kontributin shumëvjeçar në ndërmjetësimin e paqes.

Në Finlandë janë konfirmuar 700 raste të të infektuarve me koronavirus dhe një viktimë. rel

Italia merr një tjetër goditje të fortë nga pandemia që mban emrin COVID-19. Në 24 orët e fundit në shtetin fqinjë kanë humbur jetën nga koronavirusi 601 persona, 48 persona më pak se dje. Ndërsa ditën e shtunë numri i viktimave ishte 793

Në total numri i të vdekurve në Itali që prej nisjes së pandemisë më 21 shkurt është 6.077. Të dhënat e reja i bëri me dije kreu i emergjencave civile në konferencën e përditshme për shtyp, Angelo Borrelli.

Gjashtë pacientë me Covid-19 do të transferohen nga Lombardia në Saksoni. Kjo është ajo që Gjermania ka ofruar të bëjë në ndihmë të popullit italian.

Lajmi u konfirmua nga guvernatori Michael Kretschmer. Gjermania është vendi i parë i huaj që i ofron Italisë transferimin e pacientëve të infektuar me koronavirus në spitalet e tyre.

Landi gjerman i Saksonisë do të marrë gjashtë pacientë pozitivë me Covid-19 nga Italia dhe më pas do t’i trajtojë ata në spitale në rajonin e tij. Michael Kretschmer tha se ai iu përgjigj në këtë mënyrë kërkesës nga Italia. “Është një sinjal shumë i rëndësishëm që edhe ne mund të ndihmojmë edhe të tjerët”, tha ai. Ndërsa është hera e parë që pacientët italianë janë transferuar në një vend tjetër të BE shkruan TG.com 24.

Gjermania është e gatshme të mirëpresë edhe francezët. Spitalet gjermane në zonën në kufi me Francën janë gjithashtu të gatshëm të ndihmojnë pacientët francezë që vuajnë nga koronavirusi.

Në traktatin e miqësisë së Aachen (një marrëveshje midis Francës dhe Gjermanisë) ekziston gjithashtu një i mbështetjes së ndërsjellë në sektorin e shëndetësisë. bw

Angela Merkel rezulton negative në testin e koronavirusit.

Kancelarja gjermane prej dy ditësh ndodhej në karantinë për shkak se kontaktoi një doktor të premten që rezultoi më pas pozitiv.

Merkel ka qëndruar e mbyllur ku ka kryer edhe detyrën e saj.

Lajmi është bërë i ditur nga zëdhënësja e saj Steffen Seibert, e cila ka thëne se kancelja ka rezultuar negative ne testin e parë ndaj COVID-19.

Kur krijimtaria, shkathtësia dhe mençuria e italianëve mblidhen bashkë për të përballuar një problem serioz, lindin zgjidhje të cilat, edhe në krizën më të madhe të pas periudhës së pasluftës si ajo që po përjeton Italia, mund të japin frymë dhe lehtësim, për pacientët dhe mjekët që po përballen me mungesën e respiratorëve për shkak të numrit të madh të të infektuarve nga infeksioni i koronavirusit.

Në Itali, dy profesorë reanimatorë të shkencave Mjekësore të Universitetit të Bolonjës kanë krijuar një qark, i aftë të për të lidhur një respirator në dy pacientë në vend të një dhe brenda 48 orësh kompania Mirandola e realizojë atë dhe furnizoi spitalin e qytetit me modelin mekanik të prototipit të parë, të testuar me sukses në spitalin e Sant’Orsola në Bolonjë.

Respiratori mekanik për të furnizuar dy pacientë tani ka hyrë në prodhim dhe do të dërgohen në provincat më të prekura nga infeksioni i koronavirusit.

Komisioneri për emergjencën e Koronavirusit, Sergio Venturi është shprehur se kjo u realizua fal bashkëpunimit të suksesshëm mes mjeksisë dhe industrisë, gjë e cila do të vërë në dispozicion të sistemit shëndetësor një pajisje shumë të çmuar, e aftë të dyfishojë vendet në kujdesin intensiv.

Protagonisti kryesorë i mekanizmit është Profesori Marco Ranieri, drejtor i Anesteziologjisë dhe Kujdesit Intensiv në spitalin e Sant’Orsola si dhe profesori Antonio Pesenti që duke u këshilluar edhe me kolegë të tjerë, krijuan qarkun që shpëton jetë.

Porosia e bërë te kompania Mirandola është për rreth 1000 copë të cilat fillimisht do të shpërndahen në Emilia-Romagna dhe Lombardi ku nevoja është edhe më e madhe

Sidoqoftë, ka situata në Emilia-Romagna të cilat përkundër përpjekjeve të bëra janë në kufijtë e fundit përsa i takon numrit të shtretërve në kujdesin intensiv. Plani i Rajonit është për të rritur numrin e shtretërve shtesë për pacientët me Covid-19. Në Parma numri i tyre është shtuar me 3.023 vende nga të cilat 416 në kujdes intensiv. Konkretisht, në Piacenza ka 578 shtretër (nga të cilët 40 për kujdes intensiv), 675 në Parma (58 kujdes intensiv), 550 në Reggio Emiglia (48 kujdes intensiv), 280 në Modena (74 kujdes intensiv), 453 në zonën metropolitane të Bologna dhe Imola (105 në kujdesin intensive), 58 në Ferrara (22 në kujdesin intensive) etj etj.

Edhe spitale private kanë vënë në dispozicion të Ministrisë së Shendetësisë shtretërit e tyre që tashmë janë pjesë e rrjetit të spitaleve dhe reparteve për pacientët me Covid. Në Piacenza, zona më e prekur nga koronavirusi, ushtria dhe Mbrojtja Civile po përfundojnë ndërtimin e një spitali në terren, ku personeli mjekësor ushtarak do të punësohet dhe do të ketë 40 shtretër shtesë. Gjithashtu në Piacenza do të punësohen mjekë dhe infermierë shtesë, përfshirë ata që do diplomohen në javët e fundit dhe që kanë shprehur gadishmërinë e tyre për t’u thirrur në shërbim.

Konsumi i energjisë elektrike në një numër vendesh evropiane ka shënuar rënie dramatike për shkak të përhapjes së pandemisë globale të koronavirusit (COVID-19), ku Italia është njëra nga vendet më të goditura me një rënie të kërkesës prej 19.5 për qind javën e kaluar, tregojnë të dhënat e përpiluara nga Anadolu Agency (AA).

Organizata Botërore e Shëndetësisë (OBSH) e ka shpallur shpërthimin e virusit që tani është përhapur në 159 vende dhe territore një pandemi.

Masat për parandalimin e përhapjes së virusit përfshirë mbylljen e dyqaneve, objekteve, restoranteve, qendrave tregtare dhe uljen e aktiviteteve ekonomike, të cilat çuan në një rënie dramatike të konsumit të energjisë.

Për më tepër, një numër vendesh që sollën masa të rrepta për të parandaluar përhapjen e virusit, përfshirë gjendjen e jashtëzakonshme në Itali, dhe kufizimin e lëvizjes së lirë të njerëzve në Francë dhe Spanjë gjithashtu ndikuan në konsumin e energjisë elektrike.

Sipas të dhënave të Rrjetit Evropian të Operatorëve të Sistemit të Transmisionit për Energjinë Elektrike (ENTSO-E) në javën 12 që mbulon 16 deri 20 mars të vitit 2020, konsumi i energjisë në Itali pati një ulje prej 19.5 për qind me një mesatare në orë prej 28.7 gigavat në krahasim me të njëjtën javë të vitit të kaluar.

Konsumi kishte në një mesatare në orë prej 35.2 gigavat në të njëjtën javë të vitit 2019, tregojnë të dhënat.

Deri më 20 mars, numri i rasteve me COVID-19 në Itali ishte 41.035 me një numër vdekjesh prej 3.405 personash.

Poashtu konsumi i energjisë ishte më i ulët edhe në Francë me 16.5 për qind gjatë së njëjtës periudhë, veçanërisht pasi vendi filloi të kufizojë lëvizjet më 17 mars.

Deri më 20 mars, numri i rasteve në Francë kishte arritur në 12.612, me 450 të vdekur.

Spanja, si një nga vendet evropiane me rastet më të larta të COVID-19, pati një rënie prej 7.8 për qind të konsumit të energjisë elektrike për të njëjtën periudhë.

Konsumi i energjisë në vend qëndroi mesatarisht në orë prej 27 gigavat midis 16 dhe 20 marsit të vitit 2020.

Në vend u raportuan 18.077 raste të COVID-19 deri në të njëjtën datë.

Gjermania, Belgjika dhe Zvicra pritet të shohin uljen e konsumit të energjisë duke filluar nga kjo javë me futjen e masave më të rrepta për të parandaluar përhapjen e virusit.

ITALI

Italia vijon me rritjen e shirave sa i përket pacientëve të koronavirusit teksa janë 5 mijë e 476 viktima deri më 22 mars.

Po ashtu numri i të prekurve pritet të shkojë në 60 mijë teksa deri më sot shënon 59,138. Italia pësoi një rritje përsëri me 651 viktima sa i përket 24 orëve të fundit por numri i të rekuperuarve shënoi më i lartë 952, ndërsa në total 7024.

Por numri i të infektuarve vijon me hapa të mëdhenj teksa vetëm në 24 orët e fundit 5,560 rezultuan pozitivë.

Kancelarja gjermane, Angela Merkel jep një shembull të mirë në supermarket. Ajo u fotografua dje nga Bild Zeitung, tabloidi gjerman më i shitur, rreth orës 5 të pasdites, me të njetin kostum blu, pak pasi kishte mbajtur një fjalim para kombit të saj: “Gjithçka, tani, do të provohet”.

Kancelarja ia ka dalë të japë një shembull të mirë duke zbatuar rregullin e rreshtimit në supermarket. Ajo ka qëndruar në rresht deri sa I ka ardhur radha për të bërë pagesën në kasë.

Edhe kësaj here Merkel ka zgjedhur një market afër shtëpisë së saj për të bërë Pazar, në rrethin Mitte, në Berlin. Në karrocën e saj përvec disa ushqimeve ka edhe disa shishe me verë.

Italia po trondit botën me të dhënat nga COVID-19. Autoritetet kanë publikuar bilancin e 24 orëve të fundit sa i përket të prekurve me Koronavirus. Numri i viktimave ka shkuar në 4825, që do të thotë janë 793 viktima në 24 orët e fundit.

Rastet janë shtuar me 4821 duke e çuar në 42681 numrin total të rasteve aktive. Numri i të shëruarave ka shkuar në 6072 dhe 2857 janë në gjendje kritike.

Ndërsa numri i të vdekurve në të gjithë botën ka shkuar në 12773.

Nga viktimat e ditës së sotme vlen të theksohet se vetëm në zonën e Lombardisë e cila është edhe epiqendra e koronavirsut janë shënuar 546 viktima në 24 orët e fundit.

Është rritur në mënyrë dramatike numri i personave të prekur nga koronavirusi në Gjermani.

Mediat botërore raportojnë se numri i të prekurve në vetëm pak kohë ka shkuar nga 2705 në 12 662 persona. Instituti Robert Koch tha se shtimi i rasteve në të tillë mënyrë është një alarm për vendin.

Autoritetet kanë thënë se numri i të vdekurve tashmë ka shkuar në 47 vetë, duke u rritur me 16 persona nga 31 që u njoftuan të premten. bw

Romë

Vijon me ritme të larta bilanci i viktimave dhe i të prekurve me koronavirus në Itali. Numri i viktimave të koronavirusit në vendin fqinj mbërriti në 4.032 brenda katër javësh.

Në konferencën për shtyp të së premten, kreu i Mbrojtjes Civile, Borrelli njoftoi se numri i viktimave në 24 orët e fundit është rritur me 627 duke shkuar në 4032. Gjithashtu janë edhe 4670 të prekur të rinj duke cuar numrin në total 37.860 nga virusi me origjinë nga Kina. Vetëm në Lombardi, e cila është provinca me e prekur nga COVID -19 kanë ndërruar jetë brenda 24 oreve 381 persona.

Sistemi i shumë lavdëruar shëndetësor i Italisë është sot në buzë kolapsi, sidomos në veriun e pasur të vendit, ku është dhe përqendrimi më i madh i infektimeve.

Mjekët kinezë që kanë mbërritur dy ditë më parë në Milano për të ndihmuar, thanë se masat e marra në Lombardi nuk ishin “të rrepta mjaftueshëm”.

Madrid

Në një intervistë për Telegrafin, shefja e Zyrës së Bashkimit Evropian në Kosovë, Nataliya Apostolova ka folur për zhvillimet e fundit politike në Kosovë, duke bërë thirrje që në situatën pas pandemisë COVID -19 të ketë unitet dhe konsensus politik për të tejkaluar krizën.

Ambasadorja Apostolava ka thënë se Bashkimi Evropian po ndjek nga afër zhvillimet e fundit politike në vend.

“Ne po ndjekim nga afër zhvillimet në vazhdim në Kosovë. Situata aktuale e pashembullt e shpërthimit të COVID-19 bën thirrje për konsensus, unitet politik dhe qëllim të përbashkët në krizë” ka thënë Apostolova për Telegrafi.

Sipas saj, në këtë kohë partitë politike duhet të kenë unitet për mirëqenien e popullit.

“Partitë politike duhet të kujdesen para së gjithash për mirëqenien e popullit të Kosovës mbi ndonjë interes partiak” ka thënë Apostolova.

Ndryshe, në kohën kur krejt bota edhe shtetet individuale po merren me çështjen e menaxhimit të situatës pas shpërthimit të pandemisë me COVID-19, në Kosovë ka shpërthyer kriza politike ndërmjet partnerëve të koalicionit Lëvizjes Vetëvendosje dhe Lidhjes Demokratike të Kosovës.

Kjo erdhi pasi kryeministri Albin Kurti ka shkarkuar ministrin e Brendshëm, Agim Veliu për të cilin tha pos tjerash se ka shpërndarë panik te qytetarët me deklaratat për coronavirusin.

Ndryshe, LDK ka prezantuar largimin nga Qeveria dhe ka nisur një mocion i cili është përkrahur deri tash nga AAK dhe NISMA Socialdemokrate për rrëzimin e Qeverisë Kurti.

Romë

Drejtori për Evropën i Organizatës Botërore të Shëndetësisë (OBSH) ka bërë thirrje për veprime të guximshme, në të gjitha vendet evropiane kundër pandemisë së koronavirusit.

Duke e përshkruar Evropën si “epiqendrën” e re të shpërthimit global, drejtori rajonal i OBSH-së, Hans Kluge tha më 17 Mars se “çdo vend, pa asnjë përjashtim, duhet të ndërmarrë veprimet e tij më të guximshme për të ndaluar ose ngadalësuar kërcënimin nga përhapja e virusit”.

Ai tha se bota po përballet me “kohë të paparë” dhe se është e rëndësishme që vendet “të punojnë së bashku, të mësojnë nga njëri-tjetri dhe të harmonizojnë përpjekjet”.

Vërejtjet e Kluge erdhën ndërsa më shumë vende të BE-së shtrënguan masat e shëndetit publik, që kanë detyruar shumë biznese të mbyllen dhe banorët të qëndrojnë në shtëpi.

Në Shtetet e Bashkuara dhe Mbretërinë e Bashkuar, udhëzimet janë shpallur nga presidenti, Donald Trump dhe kryeministri, Boris Johnson. Ata rekomandojnë që njerëzit të praktikojnë “distancimin shoqëror” – duke qëndruar të paktën dy metra nga njerëzit e tjerë në publik.

Por as Trump dhe as Johnson nuk kanë imponuar llojin e rregullave të detyrueshme të mbylljes mbarëkombëtare që tani janë në fuqi në vende si Italia, Spanja, Franca dhe Çekia. rel

Rajoni i Venetos për të frenuar përhapjen e koronavirusit, synon modelin e “tamponëve në tapet”, ose ndryshe tamponë të gjithëve, mbi të gjithë njerëzit. Qëllimi është të gjurmojmë këdo që është pozitiv për Covid-19, në veçanti njerëzit e ashtuquajtur “asimptomatikë” të cilët, duke mos u izoluar, vazhdojnë të përhapin virusin. “Edhe nëse gjej vetëm një rast pozitiv – shpjegon guvernatori i Rajonit, Luca Zaia – do të thotë që do të kem 10 më pak të infektuar”.

Strategjia e tamponëve tapetë duket se ka funksionuar në Korenë e Jugut, ku autoritetet kanë testuar qindra mijëra njerëz, përfshirë kontrollimin e lëvizjeve të tyre përmes telefonave celularë dhe teknologjisë satelitore. Zaia, i cili të paktën tani për tani hedh poshtë polemikat “me autoritetin qendror dhe pretendimet për autonomi”, i tha “Il Corriere della Sera” se dëshiron të paguajë gjithçka me paratë e Rajonit.

“Nuk më intereson shumë buxheti – thotë ai – vlen gjithmonë më pak se jeta e bashkëqytetarëve të mi. Mos më bëj të them se nuk më plas për paratë, por me pak fjalë ne e kuptojmë njëri-tjetrin. Të gjitha me shpenzimet tona”. Dhe për të përmbushur nevojën për teste që “kompanitë i shpërndajnë me pikatore”, “ne do t’i bëjmë ato në shtëpi”.

Në mbështetje të linjës së tij, i ndryshëm nga ai i rajoneve të tjera, ai thotë se “nëse nuk do t’i kishim bërë tamponët të gjithëve, Vo ‘Euganeo do të kishte pasur një epidemi. Nëse për absurditet i bëni testin një popullatë të tërë, të paktën ju keni një rezultat kë duhet të izoloni”. Ajo që ndodh në Veneto është një rikonstruksion “i kontakteve të një personi të gjetur pozitiv dhe simptomatik dhe pastaj iu bëjmë të gjithëve me radhë tamponin. Jemi në një kuotë prej 40 mijë në të gjithë rajonin: 2.700 pozitivë pa simptoma, dhe kemi izoluar edhe 7 mijë të tjerë që kanë pasur kontakte me ta”.

Për disa anëtarë të komunitetit shkencor, a është bërja e tamponëve për të gjithë një lloj “rrjete fundore”? Zaia përgjigjet: “Respekt maksimal për të gjithë, me të vërtetë. Por është e njëjta botë që nuk na dha asnjë indikacion ndërsa po vinte koronavirusi. Shumë nga ata thanë se ishte një grip i thjeshtë. Të tjerët që maskën duhet ta vendosë vetëm personi i sëmurë” . bw

Ministri i Punëve të Brendshme të Francës, Christophe Castaner, ka njoftuar se janë mobilizuar 100 mijë forca policore dhe të xhandarmërisë për të kontrolluar lëvizjet e qytetarëve për shkak të shpërthimit të koronavirusit, raporton Anadolu Agency (AA).

Castaner tha se ata që nuk respektojnë rregullat e reja do të dënohen deri në 135 euro.

Presidenti Emmanuel Macron dje njoftoi se lëvizja do të kufizohet për 15 ditë, duke filluar nga sot.

Deri dje, Franca raportoi për 6.633 të infektuar dhe 148 të vdekur, një rritje prej 21 të vdekurve dhe 1.210 raste të reja nga virusi i njohur si Covid-19.

Virusi u shfaq fillimisht në dhjetor në qytetin kinez Wuhan dhe është përhapur në të paktën 146 vende dhe territore. Organizata Botërore e Shëndetësisë shpalli pandemi botërore.

Në Itali, ka shkuar në 349 numri i personave që kanë vdekur nga koronavirusi.

Numri i të vdekurve ka shkuar deri tani 2158 . Ndërsa, 349 pacientë nga koronavirusi kanë ndërruar jetë në 24 orët e fundit.

Italia vazhdon të ketë numrin e të prekurve nga koronavirusi më të lartin në Europë dhe të dytin në botë, pas Kinës. Numri i viktimave tashmë thuajse është dyfishuar që nga dita e enjte, pikërisht për shkak të koronavirusit, raportojnë mediat botërore.

Italia deri tani ka shënuar 27.980 të infektuar, krahasuar me 15 113 katër ditë më parë. Agjencia e Mbrojtjes Civile tha se numri i vdekjeve është rritur me 19.2 përqind.

Numri i përgjithshëm i rasteve në Itali, vendi evropian i goditur më së shumti nga virusi, u rrit në 27.980 nga një 24747 rastet e mëparshme.

Rritet frikshem bilnaci i viktimave nga Covid-19 në Itali. Gjatë konferencës për shtyp të orës 18-00 Mbrojtja Civile deklaroi që numri I të vdekurve vetëm sot ka qenë 368, duke e cuar kështu numrin e viktimave gjithsej në të gjithë italinë me 1809.

Numri i personave pozitivë ka shkuar në 20603. Nga dje numri I të infektuarve është rritur me 2853, ndërsa numri I përgjithshëm I të infektuarve përfshirë viktimat dhe të shëruarit, ka arritur 27.747.

Personat e shëruar janë 2335, 369 më shumë se dje. bw

Paris

Ish-sekretari i përgjithshëm i NATO-s, Javier Solana, është dërguar në spital pas diagnostikimit me koronavirus, i ka thënë një burim agjencisë “Reuters”, duke shtuar se shëndeti i tij është duke u përmirësuar.

Lajmin për dërgimin e tij në spital fillimisht e publikoi gazeta ABC të premten. Kjo gazetë raportoi se Solana është shtrirë në një spital të Madridit.

Solana, 77 vjeç, ka shërbyer si sekretar i përgjithshëm i NATO-s nga viti 1995 deri në vitin 1999, më pas si përfaqësues i lartë i BE-së për Çështje të Jashtme nga viti 1999 deri në vitin 2009. Më herët, nga viti 1992 deri në vitin 1995, ai ishte ministër i jashtëm i Spanjës.

Ai kishte marrë pjesë në një tubim me ministren e jashtme të Spanjës, Arancha Gonzalez, të hënën e kaluar, shkruan “National Post”, transmeton Gazeta Express.

Voal.ch – Ekspertë kinezë të mjekëve në luftën kundër Coronavirus mbërrijnë në Itali: “Ne do t’ju ndihmojmë ta luftoni atë”

Nëntë mjekë që janë specializuar në Covid-19 në muajt e fundit, së bashku me 31 ton furnizime shëndetësore, janë nisur drejt Romës.

Ata do të ndihmojnë kolegët italianë për të luftuar epideminë e koronavirusit .

Midis materialeve të sjella ka pajisje të njësisë së kujdesit intensiv, pajisje mbrojtëse dhe ilaçe antivirale.

“Tani është një luftë globale”, tha Sun Shuopeng, nëndrejtori i Kryqit të Kuq dhe drejtues i ekipit kinez për “Global Times” para se të largohej.

“Mënyra se si ne trajtojmë kontakte të ngushta, pacientë të sëmurë në mënyrë kritike dhe pacientë me simptoma të buta është e ndryshme,” shpjegoi Sun Shuopeng.

Sipas drejtuesit të ekipit, furnizimet mjekësore vijnë nga disa qytete kineze dhe gjithashtu përfshijnë disa ilaçe bimore siç është kapsula Lianhuaqingwen.

“Kapsula Lianhuaqingwen ka rezultuar e efektshme në trajtimin e Covid-19.

Vende të tjera kanë filluar të mësojnë efektivitetin e trajtimit të mjekësisë tradicionale kineze,” tha Sun.

Sun i tha Global Times se kthimi i ekipit mjekësor në Kinë do të varet nga mënyra se si po ndryshon situata në Itali./EB/

Pandemia e koronavirusit ka mbërritur “në zemrën” e qeverisë spanjolle, raportojnë mediat e huaja.

Zëvendëskryeministri Pablo Iglesias është futur në karantinë pasi gruaja e tij, Ministrja e Barazisë Irene Montero, doli pozitive ndaj testit për COVID-19.

Tani të gjithë anëtarët e qeverisë, nga sot (12 mars) do të izolohen dhe do të testohen për virusin.

Një zëdhënës i qeverisë tha se “protokollet parandaluese” kanë qenë në fuqi prej disa ditësh në ndërtesat e parlamentit, por ato tani do të rriten.

Takimi i kabinetit qeverisës i planifikuar për sot do të përfshijë vetëm ministra që roli i tyre konsiderohet thelbësor për t’iu përgjigjur krizës.

Konferenca e zakonshme për shtyp pas takimit do të mbahet në distancë me Kryeministrin Pedro Sanchez duke iu përgjigjur pyetjeve në internet.

Bashkimi Evropian tha të enjten se vendimi i presidentit të Shteteve të Bashkuara, Donald Trump, për të ndaluar fluturimet nga Evropa për në SHBA, është marrë “në mënyrë të njëanshme” dhe “pa konsultime”.

Duke folur nga Zyra Ovale të mërkurën vonë, Trump tha se fluturimet nga 26 vende të Evropës – që janë pjesë e zonës së lëvizjes së lirë Schengen – për në Shtetet e Bashkuara, do të pezullohen për 30 ditë, për të parandaluar përhapjen e mëtejshme të koronavirusit në SHBA.

Mbretëria e Bashkuar, Irlanda dhe vendet e tjera jashtë Schengenit nuk janë të ndikuara nga kjo ndalesë.

Përjashtime bëhen edhe për qytetarët amerikanë.

“Koronavirusi është krizë globale, nuk është i kufizuar në ndonjë kontinent dhe kërkon bashkëpunim në vend të veprimit të njëanshëm”, thanë përmes një deklarate të përbashkët presidentja e Komisionit Evropian, Ursula von der Leyen, dhe presidenti i Këshillit Evropian, Charles Michel.

“Bashkimi Evropian është duke ndërmarrë veprime të fuqishme për të kufizuar përhapjen e virusit”, thanë ata.

Dhjetëra vende të Evropës janë prekur nga një koronavirus i ri, që besohet se e ka origjinën në Kinë.

Vendi i goditur më se keqi është Italia, me mbi 12,000 njerëz të infektuar dhe me mbi 820 të vdekur.

Rastet e para me koronavirusin, i cili shkakton sëmundjen e identifikuar si COVID-19, janë shfaqur në Vuhan të Kinës në muajin dhjetor.

Simptomat që i shkakton kjo sëmundje janë të ngjashme me pneumoninë.

Në SHBA janë mbi 1,300 raste të konfirmuara me koronavirus, ndërsa 38 pacientë kanë humbur jetën. rel

Presidenti i Parlamentit Europian, David Sassoli, ka thënë se ai do të punojë nga shtëpia për dy javët e ardhshme pasi vizitoi Italinë në fundjavë dhe do të ndjekë masat për vetëizolim.

Sassoli i cili është italian nga Firence thotë se kjo është një situatë delikate për të gjithë por koronavirusi nuk mund të bllokojë demokracinë prandaj ai do vijojë të ushtrojë detyrat e tij si President i PE nga shtëpia e tij.

“Këshillat e reja të paraqitura nga qeveria italiane shtrin$e zonën e mbrojtur në të gjithë territorin kombëtar. Kjo ka pasoja të rëndësishme për sjelljen e eurodeputetëve italianë. Për këtë arsye, unë kam vendosur pasi kam qenë në Itali gjatë fundjavës së fundit, si masë paraprake, të ndjek masat e treguara dhe të ushtroj funksionin tim si President nga shtëpia ime në Bruksel në përputhje me 14 ditët e treguara nga protokolli shëndetësor .Covid-19 i detyron të gjithë të jenë përgjegjës dhe të jenë të kujdesshëm. Është një moment delikat për të gjithë ne. Parlamenti do të vazhdojë të punojë për të ushtruar detyrat e tij. Asnjë virus nuk mund të bllokojë demokracinë”, tha Sassoli.

Italia ka vendosur 16 milionë njerëz në karantinë derisa po lufton kundër shpërndarjes së koronavirusit.

Banorët në 15 provinca qendrore dhe veriore të Italisë duhet të marrin leje për të udhëtuar. Milano dhe Venediku janë tashmë të përfshira nga ky virus.

Shkollat, palestrat, pishinat dhe qendrat e skijimit do të mbyllen tërësisht si dhe të gjitha ngjarjet publike do të anulohen, tha kryeministri Giuseppe Conte.

Këto masa të jashtëzakonshme do të zgjasin deri më 3 prill.

Javën e kaluar, qeveria ka njoftuar për mbylljen e të gjitha shkollave dhe universiteteve për 10 ditë. Italia është vendi më i prekur Evropian nga virusi.

Numri i viktimave ka shkuar në 230 deri të shtunën, me më shumë se 36 viktima brenda 24 orëve. Numri i të prekurve ka shkuar në 5 883 të shtunën.

“Ne duam të garantojmë shëndet për qytetarët tanë. E kuptojmë se këto masa do të kërkojnë sakrifica, por na duhet të marrim përgjegjësi për veten”, tha kryeministri.

Nën masat e reja, banorët e rajonit të Lombardisë nuk do të lejohen të hyjnë ose të dalin. Ky rajon ka 10 milionë banorë dhe Milano është qendra kryesore.

Deri tash, 50 mijë persona janë prekur nga masat e karantinës në Italinë veriore.

Ndërkohë, Irani ka konfirmuar më shumë se 6 mijë të prekur dhe 145 viktima, në mesin e të cilëve edhe një ligjvënëse iraniane.

Më shumë se 100 mijë persona janë prekur nga ky virus në botë dhe rreth 3 mijë e 500 persona kanë humbur jetën. rel

Eksperti gjerman dhe njohësi i rrethanave politike në rajonin e Ballkanit Perëndimor, Bodo Weber, në një intervistë ekskluzive për Gazetën Express ka folur rreth zhvillimeve të fundit politike në Prishtinë rreth dialogut me Serbinë dhe vendimin e qeverisë së re rreth taksës 100 %.

Weber ka thënë se vendimi i fundit i Albin Kurtit për heqje të pjesshme të taksës është një vendim që tregon një racionalitet dhe shprehje të vullnetit të mirë, ndërkohë shton se nuk e kupton pse një vendim i tillë është i papranueshëm për Richard Grenellin, kur dy kushtet e kreut të qeverisë kosovare janë plotësisht në përputhje me politikën amerikane.

“Një gjest i arsyeshëm i vullnetit të mirë në emër të qeverisë, që do të duhej të ishte përshëndetur jo vetëm nga Brukseli por edhe nga Washingtoni. Pse? Sepse vendimi i Kurtit për pezullimin e pjesshëm të taksës është i lidhur me dy kushte. Së pari, heqja e barrierave tregtare jo-tarifore nga Serbia drejt Kosovës. Kjo kërkesë është plotësisht në përputhje me obligimet e marra nga CEFTA, dhe me promovimin e idesë së Vuçiqit për të ashtuquajturin Minishengen, këtë e mbështet edhe ambasadori Grenell nëse nuk gabohem”, ka thënë Bodo Weber.

Ai tutje ka shtuar se kushtet e Kurtit janë në përputhje edhe me insistimin e presidentit Trump për drejtësi në marrëdhëniet e tregtisë në rangun ndërkombëtar.

Tutje eksperti gjerman ka thënë se edhe kërkesa e dytë e Kurtit që Serbia ti japë fund fushatës për njohjet është kërkesë edhe e QUINT-it, ku janë anëtare edhe Shtetet e Bashkuara të Amerikës.

“Nuk shoh ndonjë arsye pse z. Grenell duhet të kritikojë një veprim të qeverisë së Kosovës, përveç nëse ai ka ndonjë qëllim jo të sinqert”, ka potencuar Weber.

Në këtë intervistë Weber ka folur edhe rreth mos koordinimit Thaçi-Kurti rreth politikës së jashtme, duke qenë se presidenti është kundër përfshirjes së BE’së në dialog me një të dërguar special, ndërsa Kurti në anën tjetër deklarohet se mezi pret që të punojë me emisarin e Brukselit për negociatat me Beogradin.

Analisti gjerman në këtë intervistë për Express ka thënë se Hashim Thaçi po e keqpërdor kritikën e bërë nga vetë Weber dhe kolegët e në DPC rreth nominimit të mundshëm të Miroslav Lajcak në pozitën e emisarit të Brukselit për dialogun Kosovë-Serbi.

Tutje Weber ka komentuar edhe konferencën e Thaçit të bërë pas kthimit nga Washingtoni. Sipas tij në atë fjalim, presideni i Kosovës i ka shpallur të vdekura negociatat e Brukselit.

“Presidenti Thaçi në konferencën e tij të jashtëzakonshme në Prishtinë, pas vizitës në Washington, pa u koordinuar me askënd, i shpalli të vdekura negociatat e drejtuara nga Brukseli. Mirë, perspektiva evropiane e Serbisë dhe Kosovës është e lidhur me këto negociata, dhe kjo nënkupton që presidenti juaj në mënyrë bazike ka deklaruar si të vdekura edhe aspiratat e vendit tuaj për t’u anëtarësuar në Bashkim Evropian”, ka theksuar Bodo Weber.

Anëtari i DPC në këtë intervistë ka komentuar edhe deklaratën e Thaçit se gjithmonë ka zhvilluar negociata në mënyrë transparente.

Weber thotë se sipas informacioneve që ka “njëri nga tre liderët që kanë marrë pjesë në negociatat e Brukselit, në marsin e 2018-ës ka vrapuar nëpër qytete evropiane me harta në dorë për të shkëmbyer territoret dhe për ta ndarë Kosovën. Megjithatë presidenti Thaçi dhe Vuçiq e publikuan idenë e tyre për shkëmbim të territoreve gjysmë viti më vonë, në gusht të vitit 2018”.

Teksa ka folur për deklaratat e Thaçit për transparencë në negociatat e Brukselit, Weber ka zbuluar edhe një detaj tjetër të padëgjuar deri sot.

Sipas analistit gjerman, presidenti Thaçi bashkë me ekipin e tij në fillim të negociatave për një marrëveshje finale dhe gjithëpërfshirëse në vitin 2017 ishin përgatitur që ta largonin kërkesën për njohje të plotë formale të Kosovës nga Serbia.

“Ndoshta gabohem, por nuk janë në dijeni nëse një gjë e tillë është diskutuar me ndonjë prej institucioneve relevante të shtetit apo politik bërësit”, ka potencuar Weber.

Tutje Weber thotë se përformanca aktuale e Thaçit karshi Washingtonit më shumë duket si një krizë serioze kushtetuese-kosovare sesa një problem i politikës së jashtme.

Eksperti gjerman tutje ka shtuar se Kosova ka të drejtën e botës për t’u ndjerë e pakënaqur me dobësinë e BE’së, por sipas tij për Prishtinën është më e favorshme që të anëtarësohet në një Evropë të tillë se sa të pajtohet me administratën e presidentit Trump.

“Kur bëhet fjalë për diferencat transatlantike dhe përballjen e Kosovës, presioni i pahijshëm politik që vjen nga administrata e Trumpit fatkeqësisht nuk është diçka e re për Kosovën. Por qeveria paraprake dhe koalicioni qeverisës ka demonstruar se një presion i tillë është i menagjueshëm. Në anën tjetër, Kosova ka gjithë të drejtën të jetë e pakënaqur me jo qëndrueshmërinë dhe dobësinë e BE-së. Edhe unë vetë jam. Por ngjitja në një BE të tillë është më e favorshme për interesin e Kosovës se sa pajtimi me administratën e Trumpit”, ka theksuar Weber.

Sipas tij Kosova do të mund të ndikojë në dialogun e BE’së, nëse siguron një qëndrim politik parimor dhe nëse insiston në kornizën dhe parimet origjinale të dialogut që Serbia duhet të pranojë realitetin e një Kosove të pavarur dhe që koha e ndryshimit të kufijve në Ballkan ka mbaruar. Shtuar kësaj, Weber thotë se Kosova duhet të prezantojë unitet në vend të kaosit të akterëve politik.

Weber tutje thotë se qeveria e Kosovës duhet të definojë pozicionin e saj negociues, duke filluar me negocimin e principeve, duke insistuar në definimin e dialogut politik. Sipas tij një gjë e tillë duhet të behët duke u bazuar në interesin e një Kosove të pavarur, multi-etnike që synon të ketë raporte të mira me të gjithë fqinjët, përfshirë edhe Serbinë.

“Nuk duhet ta dëgjojë askënd në veçanti as në Washington e as në Bruksel. Dhe duhet shtruar pyetja kushtetuese, se kush negocion në emër të Kosovës”, ka potencuar tutje anëtari i DPC, i pyetur se kë duhet të dëgjojë qeveria Kurti, Washingtonin apo Brukselin sa i përket dialogut me Serbinë.

Përveç tjerash Weber thotë se qeveria duhet të interesohet edhe për arritjen e një shumice të mjaftueshme bashkë me opozitën për miratimin e një marrëveshje të ardhshme me Serbinë.

Sa i përket luftës Kurti-Thaçi rreth asaj se kush duhet t’i drejtojë negociatat, Weber kujton vendimin e Gjykatës Kushtetuese të Kosovës, që autorizonte kryeministrin për drejtimin e negociatave.

“Nëse nuk gabohem, Gjykata Kushtetuese e Kosovës e ka përcaktuar se dialogut duhet të udhëhiqet nga kryeministri dhe qeveria. Një vendim i tillë parashihet edhe një rol të presidenti, por sigurisht që nuk e ka autorizuar atë që të veprojë një anshëm, e lërë më të marr vendime”, ka përfunduar Bodo Weber./GazetaExpress/

Shkrimtari i famshëm kilian është shtruar në spital në një spital të Asturianit në Spanjë

VOAL – Luis Sepúlveda u shtrua në spital në një spital Asturian në Spanjë për shkak të pneumonisë akute dhe u testua pozitiv për testin e koronavirusit. Sepúlveda, i cili është 70 vjeç, është shtruar në Spitalin Qendror Universitar të Asturias (HUCA) në Oviedo me gruan e tij 66-vjeçare. Të dy kanë qenë të izoluar, zbulon gazeta “Voz de Asturias”.

Gruaja e tij Carmen Yanez, e cila thotë se është “mirë”, tha se simptomat e para u shfaqën kur u kthye në Gijon, ku ata jetojnë, pas një javë qëndrimi në Portugali, për të marrë pjesë në festivalin “Correntes d’Escritas”, midis 18 dhe 23 shkurt, në Póvoa da Varzim. Sepúlveda filloi të ketë simptomat e para të martën 25 shkurt, dy ditë pasi u largua nga Portugalia, por u vizitua nga një doktor të enjten më 27.

Spanja tani ka 73 raste të konfirmuara të koronavirusit. Kreu i Qendrës së Koordinimit të Emergjencave Fernando Simón tha të Dielën në mëngjes, duke shtuar se 90% e rasteve ishin importuar ose kanë të bëjnë me raste të importuara. Dy njerëz janë shëruar. Spanja mbetet në nivelin e gatishmërisë një, tha Simón. ats

Ambasadori i Gjermanisë në Prishtinë, Christian Heldt ka thënë se vendimi i kryeministrit të Kosovës, Albin Kurti për të nisur heqjen e taksës 100 për qind ndaj produkteve të Serbisë dhe Bosnjë e Hercegovinës, është një hap i rëndësishëm që mund të çojë drejt rinisjes së dialogut për normalizimin e raporteve ndërmjet Prishtinës dhe Beogradit.

“Hap i rëndësishëm dhe kurajoz nga kryeministri Albin Kurti, vetëm disa javë pasi mori detyrën. Tani kjo duhet të çojë në një proces konstruktiv të heqjes së barrierave tregtare dhe të lëvizjes së lirë ndërmjet Kosovës dhe Serbisë dhe riangazhim në dialog që çon në normalizimin e plotë”, ka shkruar ambasadori gjerman, Heldt në një postim në Twitter.

Më 27 shkurt, kryeministri i Kosovës, Albin Kurti njoftoi se nga data 15 mars, do të hiqet tarifa 100 për qind për lëndën e parë që importohet nga Serbia dhe Bosnjë e Hercegovina. Ai ka thënë se nëse Serbia zotohet për heqjen e barrierave jotarifore dhe ndalë fushatën për çnjohjen e Kosovës, nga 1 prilli, taksa prej 100 për qind do të hiqet prej një periudhë prej 90 ditësh. Siç ka thënë Kurti në një konferencë për media, nëse Serbia nuk reflekton gjatë kësaj periudhe, Kosova nga data “15 qershor do ta rikthejë tarifën për importet nga Serbia, ndërkaq që do të vazhdohet edhe zbatimi i filluar më 1 prill i reciprocitetit”.

Ky vendim i kryeministrit Kurti nuk është mirëpritur nga Shtetet e Bashkuara të Amerikës. Ambasadori amerikan në Gjermani, njëherësh i dërguari i Shtëpisë së Bardhë për dialogun, Richard Grenell, e ka cilësuar si “gabim” masat gjysmake të Kurtit, në raport me taksën.

“Ne nuk mbështesim masat gjysmake të kryeministrit Kurti. Pozicioni ynë është i qartë: tarifat duhet të hiqen plotësisht. Kurti po bën gabim serioz”, kishte deklaruar Grenell, pas njoftimit të Kurtit për taksën.

Por, Bashkimi Evropian ka mirëpritur vendimin eKurtit për nisjen e heqjes së taksës.

“Ky hap mund të ketë një efekt pozitiv në rivendosjen e tregtisë rajonale dhe të ofrojë një hapje për rifillimin e dialogut midis Beogradit dhe Prishtinës të lehtësuar nga Bashkimi Evropian”, është thënë në një deklaratë të Peter Stano, zëdhënësit të Përfaqësuesit të lartë të BE-së, Josep Borrell.

Taksa prej 100 për qind ishte vendosur në nëntor të vitit 2018 nga Qeveria e kaluar e Kosovës, e udhëhequr nga Ramush Haradinaj.

Pas vendosjes së taksës, Serbia ka refuzuar që të vazhdojë dialogun me Kosovën, të ndërmjetësuar nga BE-ja. Brukseli dhe Uashingtoni në vazhdimësi i kanë kërkuar Kosovës që të heqë taksën, në mënyrë që t’i hapet rrugë vazhdimit të bisedimeve. rel