VOAL

VOAL

Ukraina shpall mobilizim të përgjithshëm, çfarë përmban dekreti i Presidentit që është në fuqi për 90 ditë

Presidenti ukrainas, Volodymyr Zelenskiy tha se 137 shtetas ukrainas – ushtarë dhe civilë – u vranë të enjten, në ditën e parë të operacionit ushtarak rus kundër Ukrainës.

Zelenskiy po ashtu bëri të ditur se ka nënshkruar dekretin për urdhërimin e mobilizimit të përgjithshëm.

Të gjithë rezervistët janë thirrur në ushtri, thuhet në dekret. Ky dekret do të jetë në fuqi për 90 ditë.

Gjatë një adresimi, Zelenskyi tha se Ukraina është “lënë vetëm” pasi Kremlini nisi operacion të shkallës së gjerë.

“Ne jemi lënë vetëm që ta mbrojmë shtetin tonë. Kush është gati të luftojë përkrah nesh? Unë po e shoh askënd”, tha ai në një video-adresim.

Sipas një raporti të Global Firepower, Ukraina ka 250,000 forca rezerviste, aq sa ka edhe Rusia.

Rusia më 24 shkurt nisi një operacion të shkallës së gjerë, për siç tha “çmilitarizimin” e Ukrainës.

Shtetet e Bashkuara kanë thënë se do ta mbajnë përgjegjëse Rusinë për agresionin ndaj Ukrainës. Uashingtoni, por edhe Bashkimi Evropian kanë njoftuar se kanë vendosur sanksione të reja ndaj Rusisë, pasi Kremlini nisi sulmin kundër Kievit./Rel

Deti Jon nën patrullimin e NATO-s – Anija ruse raketa lëshuese “Mareshall Ustinov” u largua nga ujrat e Mesdheut Qendror – Nga Alba Kepi

Prej disa orësh anija ruse raketa lëshuese “Mareshall Ustinov” është pozicionuar në detin Jon, 200 milje larg brigjeve jugore italiane, rreth 180 milje larg portit të Tarantos ku është ndodhet baza kryesore e Natos në Mesdhe.

“Mareshall Ustinov”  konsiderohet killer i avionëve e më i madhi i flotës ruse, i gjatë rreth 180 metra me aftësinë të lëshoj drejt një këndi të largët 16 raketa njëherësh.

Lajmi është përcjellë nga të gjitha mediat italiane, përmes informacionit të marrë nga një “spotter” i cili gjurmon lëvizjet e mjeteve militare në rrugë ajrore e detare.

Anija ruse gjatë 24 orëve të fundit është larguar nga ujërat e Mesdheut Qëndror duke iu afruar brigjeve jugore jonike italiane e gjatë paradites së sotme 24 shkurt 2022 po spostohet në jug të Kretës e me shumë gjasa po drejtohet në portin sirian Tartus.

Po në ujërat e Jonit përballë anijes ruse, ndodhet e pozicionuar dhe anija aeroplanmbajtëse amerikane Truman e cila mban rreth 60 avionë bombardues të tipit F-18 Hornet.

Anije ruse raketa lëshuese “Mareshall Ustinov” ka hyrë në ujërat e detit Jon në fundjavën e shkuar, e ka vënë në alarm sistemin e sigurisë së Natos.

Nga bazat ushtrake të NATO-s dy avionë ushtarakë po patrullojnë nga ajri brigjet jugore italiane, ku është pozicionuar anija ushtrake ruse.

Ndërkohë gjatë paradites së sotme nga baza ushtrake italiane Aviano është nisur drejt bazës Cljul të Rumanisë avioni furnizues karburanti USAF KC-135R.

Ndërkohë dy avionë të tjerë italianë po patrullojnë Detin Jon; avioni ATR P-72B (MM62321), i nisur nga aeorporti ushtarak Pratica del Mare në Romë e Leonardo AË-139 (MM81932),  i nisur nga baza e Katanias.

Kryeministri italian Mario Draghi ka thirrur mbledhjen e Këshillit të lartë të Sigurisë e gjatë pasdites pritet një komunikim zyrtar i qeverisë italiane.

Kjo e fundit ka deklaruar se Italia me aleatët e saj në NATO po fuqizon sigurinë lindore të Aleancës së Atlantikut Verior e po forcon kontributin e saj ushtarak në vendet e aleancës më të ekspozuara nga sulmi ushtarak rus në Ukrainë./oranews.tv

 

Zelenskyi: Forcat ruse po tentojnë të marrin kontrollin e Çernobilit

RFE/RL

Presidenti ukrainas, Volodymyr Zelenskiy, ka thënë të enjten se forcat ruse po tentojnë të marrin kontrollin e uzinës bërthamore, Çernobil.

Aty ka ndodhur katastrofa më e keqe bërthamore.

Forcat ushtarake ruse kanë hyrë aty dhe luftimet kanë rritur frikën se mund të shkaktohet ndonjë katastrofë bërthamore e shkallës së gjerë, kanë thënë zyrtarët ukrainas.

“Forcat pushtuese ruse janë duke tentuar të marrin kontrollin e Çernobilit. Ushtarët tanë janë duke dhënë jetën që tragjedia e vitit 1986 të mos përsëritet më”, ka thënë Zelenskyi në Twitter.

Ai ka thënë se forcat e Kievit janë duke luftuar me trupat ruse për kontrollin e Çernobilit, nga i cili është përhapur mbetje radioaktive përreth Evropës, kur një nga reaktorët bërthamorë ka shpërthyer në prill të vitit 1986.

Në uzinën, e cila gjendet 130 kilometra në veri të Kievit, reaktori që dikur ka shpërthyer, tani është i mbuluar me strehë mbrojtëse për të parandaluar rrezatimin.

Presidenti Zelensky: Rusia e sulmoi Ukrainën njësoj si Hitleri në Luftën e Dytë Botërore

Rusia e ka sulmuar Ukrainën në një “mënyrë dinake”, duke vepruar pothuajse njësoj si Hitleri në Luftën e Dytë Botërore, tha udhëheqësi ukrainas Volodymyr Zelensky në një fjalim televiziv të enjten, ndërkohë që forcat ruse hynin në vend nga të tre anët.

Ai bëri thirrje që “të gjithë ata që janë në gjendje” të bashkohen me ushtrinë dhe u bëri thirrje të gjithë veteranëve që të dalin në krye.

Zelensky shtoi se ushtria ukrainase është e angazhuar në “luftime të ashpra për të shmangur sulmet në Donbas në lindje, në veri dhe në jug”.

“Armiku ka pësuar viktima të rënda dhe ato do të jenë edhe më të rënda … sepse ata e shkelën tokën tonë,” paralajmëroi ai. syri.net

Stoltenberg: NATO do të mbrojë secilin “inç” të territorit të aleancës

RFE/RL

Sekretari i Përgjithshëm i NATO-s, Jens Stoltenberg, ka thënë se sulmi i Rusisë ndaj Ukrainës ka dëmtuar paqen në Evropë dhe është zotuar se aleanca do të mbrojë “secilin inç” të territorit të vendeve anëtare.

“Ne do të përgjigjemi me unitet edhe më të madh”, ka thënë Stoltenberg në një konferencë për media, pas mbajtjes së një takimi urgjent me ambasadorët e NATO-s në Bruksel.

“Ajo çfarë ne bëjmë është mbrojtja”, ka thënë Stoltenberg, i cili ka konfirmuar se NATO-ja do të mbajë një samit virtual me 30 vendet anëtare më 25 shkurt.

Stoltenberg ka përsëritur përkushtimin e aleancës ndaj Artikullit 5, i cili parasheh që sulmi ndaj një vendi anëtar, nënkupton sulm ndaj të gjitha vendeve tjera anëtare.

Ai ka thënë se aleanca do të aktivizojë “planet e mbrojtjes” për vendet aleate që nuk janë anëtare.

Shefi i NATO-s ka thënë se aleanca e Perëndimit është duke rritur kapacitetet për mbrojtje.

Ai ka kritikuar sulmin rus ndaj Ukrainës, duke thënë se ka qenë “sulm i qëllimshëm, gjakftohtë dhe që është planifikuar gjatë”.

Sipas tij, “Rusia është duke përdorur forcën në tentim për të rishkruar historinë”.

“Rusia ka sulmuar Ukrainën. Ky është akt brutal i luftës. Jemi me popullin e Ukrainës”, ka thënë ai.

Sulmi i Moskës ndaj Ukrainës ka nisur në orët e para të 24 shkurtit.

Raketat janë nisur në aeroporte dhe infrastrukturë ushtarake në rreth 25 qytete.

Presidenti rus, Vladimir Putin ka urdhëruar “operacion special” për të çmilitarizuar Ukrainën.

Veprimi i Kremlinit ka nxitur zemërim dhe është dënuar në gjithë botën.

Shtetet e Bashkuara dhe aleatët e kanë paralajmëruar sanksione të ashpra kundër Moskës.

Ukraina ndërpret marrëdhëniet diplomatike me Rusinë

Pasi Rusia nisi sulmet ushtarake ndaj Ukrainës në orët e para të mëngjesit të sotëm, vjen kundërpërgjigja nga ky shtet.

BBC shkruan se Ukraina ka ndërprerë zyrtarisht marrëdhëniet diplomatike me Rusinë pas pushtimit të saj në territorin ukrainas.

Ky fakt u bë i ditur nga presidenti Volodymyr Zelensky në një konferencë për shtyp. bw

Ukraina do të shpallë gjendje emergjente

RFE/RL

Një zyrtar i lartë i sigurisë në Ukrainë, Oleksiy Danilov, tha më 23 shkurt se Ukraina do të shpallë gjendje emergjente në të gjithë territorin e saj, përveç rajoneve Donetsk dhe Luhansk ku gjendja emergjente është e vendosur nga viti 2014.

Ai tha se gjendja e jashtëzakonshme do të zgjasë 30 ditë dhe mund të zgjatet edhe për 30 ditë të tjera.

Separatistët pro-rusë kanë kontrolluar pjesë të Donetskut dhe Luhanskut që nga viti 2014. Rusia i njohu ato si shtete të pavarura dhe miratoi dërgimin e trupave të saj atje gjatë kësaj jave.

Danilov tha gjithashtu se presidenti i Ukrainës, Volodymyr Zelenskiy nuk kishte diskutuar zhvillimin e armëve bërthamore, diçka që presidenti i Rusisë, Vladimir Putin tha se përbën një kërcënim strategjik për Rusinë.

Ukraina po përballet me atë që Perëndimi thotë se është kërcënimi i një pushtimi të afërt në shkallë të plotë nga Rusia.

Presidenti rus Vladimir Putin këtë javë njohu pavarësinë e dy rajoneve separatiste në Ukrainën lindore dhe tha se do të dërgonte trupa ruse në këto territore, lëvizje të dënuara nga Perëndimi dhe Kombet e Bashkuara.

Ndërkohë, Ukraina ka deklaruar se po thërret rezervistët ushtarakë të moshës 18-60 vjeç për një vit shërbimi, por se nuk po urdhëron një mobilizim të përgjithshëm të trupave në këtë kohë.

Ukraina u kërkon qytetarëve të saj të largohen nga Rusia

RFE/RL

Ukraina po u kërkon qytetarëve të saj që të shmangin udhëtimet në Rusi dhe që ata që janë atje të largohen menjëherë, duke përmendur një ndërprerje të mundshme të shërbimeve konsullore përballë tensioneve në rritje me Rusinë.

“Për shkak të përshkallëzimit të agresionit rus kundër Ukrainës, i cili mund të çojë në një reduktim të konsiderueshëm të asistencës së mundshme konsullore në Rusi, Ministria e Jashtme u bën thirrje qytetarëve të Ukrainës që të përmbahen nga udhëtimi në Rusi dhe që ata në atë vend të largohen menjëherë nga territori i saj. ”, tha ministria në një deklaratë më 23 shkurt.

Sipas shifrave të regjistrimit rus, rreth 1.9 milionë ukrainas jetojnë në Rusi që nga viti 2010, me shumë familje të përziera të ukrainasve dhe rusëve.

Ukraina po përballet me atë që Perëndimi thotë se është kërcënimi i një pushtimi të afërt në shkallë të plotë nga Rusia.

Presidenti rus Vladimir Putin këtë javë njohu pavarësinë e dy rajoneve separatiste në Ukrainën lindore dhe tha se do të dërgonte trupa ruse në këto territore, lëvizje të dënuara nga Perëndimi dhe Kombet e Bashkuara.

Ndërkohë, Ukraina tha se po thërret rezervistët ushtarakë të moshës 18-60 vjeç për një vit shërbimi, por se nuk po urdhëron një mobilizim të përgjithshëm të trupave në këtë kohë.

BE: Serbia të harmonizojë politikat e saj me vendimet e bllokut kundrejt Rusisë

VOA

Bashkimi Evropian pret që të gjitha vendet që aspirojnë integrimin në këtë bllok, të harmonizojnë politikat e tyre me vendimet e BE-së, përfshirë edhe vendosjen e sanksioneve ndaj Rusisë, për shkak të veprimeve të saj në Ukrainë.

Shumica e udhëheqësve të Ballkanit dënuan vendimin e Rusisë për të njohur dy rajone separatiste në Ukrainën lindore, përveç Serbisë.

Zëdhënësi Bashkimit Evropian, Peter Stano, i tha programit në gjuhën serbe të Zërit të Amerikës, se vendet që janë në procesin e anëtarësimit pritet të respektojnë vendimet e BE-së.

“Serbia është vend kandidat dhe për këtë pritet të harmonizohet me vendimet e BE-së në fushën e politikës së jashtme dhe të sigurisë”, tha ai.

“Serbia është në rrugën e saj evropiane. Serbia ka mbështetur gjithmonë integritetin e Ukrainës, por në anën tjetër, rreth 85 për qind e serbëve, çfarëdo që të ndodhë, do të jenë në anën e Rusisë”, tha presidenti serb Aleksandër Vuçiç.

Të martën ai tha se “do ta dënonte njohjen e pavarësisë së rajoneve separatiste në lindje të Ukrainës nga Rusia, nëse presidenti ukrainas, Volodymyr Zelenskyy, do të dënojë bombardimet e NATO-s ndaj Serbisë në vitin 1999”, duke iu përgjigjur një deklarate të ambasadorit të Ukrainës në Serbi, Oleksandr Alexandrovich, i cili tha se populli ukrainas pret që Serbia të dënojë veprimin rus.

Serbia akuzon NATO-n për “agresion” për shkak të bombardimeve të pranverës së vitit 1999, që u dhanë fund mizorive të forcave serbe në Kosovë. Nëntë vjet pas ndërhyrjes së NATO-s, Kosova shpalli pavarësinë që vazhdon të kundërshtohet nga Serbia.

Ndonëse zyrtarisht kërkon anëtarësimin në Bashkimin Evropian, udhëheqja populiste e Serbisë ka forcuar më tej lidhjet e ngushta politike dhe ushtarake me aleaten sllave Rusinë, si dhe me Kinën.

Serbia është zotuar të qëndrojë jashtë NATO-s dhe ka refuzuar t’u bashkohet në të kaluarën sanksioneve perëndimore kundër Rusisë për shkak të politikave të saj në Ukrainë.

Putin njeh rajonet separatiste të Ukrainës- A është kjo ‘shkëndija’ e luftës?

Presidenti rus Vladimir Putin shpalli njohjen e pavarësisë së Donetsk dhe Luhansk, dy zona të shkëputura të Ukrainës, të kontrolluara nga separatistët e mbështetur nga Rusia, në një fjalim televiziv drejtuar kombit. Një gjest ky që përfaqëson një përshkallëzim të krizës ukrainase.

Agjencia e lajmeve TASS raporton se Kremlini ka bërë të ditur se “presidenti rus Vladimir Putin ka njoftuar se është gati të nënshkruajë një dekret për njohjen e pavarësisë së republikave separatiste të Donbasit për kancelarin gjerman Olaf Sholz dhe presidentin francez Emmanuel Macron”.

Kancelari gjerman Olaf Scholz dhe presidenti francez Emmanuel Macron thanë se ishin “të zhgënjyer” nga vendimi i Vladimir Putin për të njohur republikat separatiste të Ukrainës lindore.

“Pas një takimi të Këshillit të Sigurimit të Rusisë, presidenti Vladimir Putin ka njoftuar se do të vendosë të hënën nëse do të njohë dy republikat e vetëshpallura separatiste Donetsk dhe Lugansk në rajonin Donbass të shkatërruar nga lufta të Ukrainës”, raporton Russia Today.

Rebelët e mbështetur nga Rusia në ato zona të vendosura në rajonin lindor të Donbasit të Ukrainës, kanë luftuar kundër ushtrisë ukrainase që nga viti 2014, por Moska nuk i ka njohur zyrtarisht republikat e tyre të vetëshpallura. Ukraina dhe Perëndimi kanë frikë se nëse kjo ndodh, kjo mund ta bëjë Moskën të dërgojë haptazi forca ushtarake në zonë.

Denis Pushilin, kreu i Republikës Popullore të Donetskut dhe Leonid Pasechnik, lideri i Republikës Popullore të Luhanskut, sot i bënë thirrje Putinit që të njohë rajonet e tyre. Zyrtarët e lartë duke përfshirë Sergei Naryshkin, shefin e inteligjencës së jashtme dhe ministrin e brendshëm Vladimir Kolokoltsev thanë se Rusia duhet ta bëjë këtë.

Ndërkohë një shpërthim i fuqishëm ka tronditur qendrën e Luganskut, kryeqytetin e republikës së shkëputur në lindje të Ukrainës, të hënën vonë. Lajmi u raportua në media menjëherë pasi Puti shpalli njohjen e këtij rajoni si të pavarur.

Shpërthimi ka ndodhur jashtë një ndërtese ku ndodhet zyra e Qendrës së Përbashkët për Kontrollin dhe Koordinimin (JCCC) për armëpushimin dhe stabilizimin e vijës së demarkacionit në Republikën Popullore të Luganskut (LPR).

Pamjet e paverifikuara që qarkullojnë në internet tregojnë një automjet të dëmtuar rëndë në flakë jashtë ndërtesës. Shpërthimi shkatërroi xhamat e ndërtesës, si dhe ndezi alarmet e shumë makinave të parkuara jashtë. syri.net

BE shqyrton rrugët për të penguar shpërbërjen e mundshme të Bosnjës

VOA/Marrë nga Associated Press

Ministrat e Jashtëm të Bashkimit Evropian, po diskutojnë të hënën rrugët për të zbutur tensionet në Bosnje dhe për të parandaluar shpërbërjen e mundshme të vendit ballkanik të ndarë etnikisht, ndërsa marrëveshja e paqes e ndërmjetësuar mbi 25 vjet më parë, vazhdon të zhbëhet.

“Retorika nacionaliste dhe separatiste po rritet në Bosnje dhe Hercegovinë dhe po rrezikon qëndrueshmërinë dhe madje tërësinë e vendit”, tha shefi i politikës së jashtme të BE-së Josep Borrell në Bruksel, në fillim të takimit të ministrave të Jashtëm të bllokut 27-vendesh.

Ai tha se “ministrat duhet të marrin një vendim se si t’i ndalojnë këto dinamika në Bosnje dhe Hercegovinë dhe të shmangin mundësinë që vendi të shpërbëhet. Kjo është një situatë kritike”, tha ai.

Muajin e kaluar, Shtetet e Bashkuara njoftuan për sanksione të reja kundër udhëheqësit serb të Bosnjës, Milorad Dodik, i cili prej vitesh ka bërë thirrje që pjesa e Bosnjës e drejtuar nga serbët të shkëputet nga pjesa tjetër e vendit dhe të bashkohet me Serbinë.

Shtetet e Bashkuara e akuzuan atë për “veprimtari korrupsioni” që kërcënojnë të destabilizojnë rajonin dhe të dëmtojnë marrëveshjen e Dejtonit.

Milorad Dodik thotë se ai dhe serbët e Bosnjës po vihen padrejtësisht në shënjestër dhe po akuzohen padrejtësisht për korrupsion.

Marrëveshja e Paqes e Dejtonit e vitit 1995, i dha fund luftës në Bosnje, e cila shkaktoi vdekjen e mbi 100,000 vetëve dhe la miliona të pastrehë. Marrëveshja krijoi dy njësi të veçanta qeverisëse në Bosnje – njëra e drejtuar nga serbët e Bosnjës dhe tjetra e mbizotëruar nga boshnjakët. Të dyja njësitë janë të lidhura me institucione të përbashkëta mbarëkombëtare dhe të gjitha veprimet në nivel kombëtar kërkojnë konsensus nga të tre grupet etnike.

Shumica e vendeve të BE-së duan gjithashtu të godasin Dodikun me sanksione, por Hungaria, Kroacia dhe Sllovenia janë kundër dhe ka të ngjarë të pengojnë çdo përpjekje për të vendosur masa kufizuese ndaj tij.

Ministri i Jashtëm austriak, Alexander Schallenberg, tha se “veprimet e Dodikut dhe Republikës Serbe, janë jashtëzakonisht të rrezikshme, luajnë me integritetin e shtetit dhe kjo për ne nuk mund të kalojë”.

Ai paralajmëroi se Bosnja dhe Ballkani, nuk duhet të bëhen “një shesh lojërash për aktorët jashtë Evropës”. Rusia ka premtuar veçanërisht mbështetje për Dodikun dhe bashkëpunëtorët e tij.

BE-ja po kërkon gjithashtu që reforma zgjedhore të miratohet përpara zgjedhjeve në Bosnje më vonë gjatë këtij viti.

Ajo që BE-ja dëshiron të shohë, tha ministri i Jashtëm irlandez, Simon Coveney, është “një paketë e plotë reformash, e rënë dakord dhe zbatuar përpara zgjedhjeve, në mënyrë që të mund të kemi zgjedhje që më pas sigurojnë formimin e një qeverie që mund të funksionojë”.

“Ne duam të shohim paqe dhe qëndrueshmëri në Bosnje dhe Hercegovinë dhe mendoj se paketa e reformave sigurisht që do të ndihmonte” një synim të tillë, tha ministri Coveney.

Zelenskiy: Do ta mbrojmë veten me apo pa partnerët tanë

RFE/RL

Presidenti i Ukrainës, Volodymyr Zelenskiy, i është bashkuar thirrjeve të liderëve perëndimorë që Rusia të shtensionojë situatën, pas grumbullimit të mbi 150,000 trupave përgjatë kufijve të Ukrainës, që ka rritur frikën se Moska po përgatitet ta pushtojë fqinjin e saj.

Zelenskiy tha në Konferencën për Siguri të Mynihut se Ukraina do ta mbrojë tokën e saj me apo pa ndihmën e partnerëve.

Këto komente ai i bëri pas një takimi që zhvilloi në margjinat e kësaj konference me nënpresidenten amerikane, Kamala Harris. Kjo e fundit, tha në Konferencën e Mynihut se çdo pushtim i mëtejmë i Ukrainës nga Rusia do të pasohet me forcimin e krahut lindor të NATO-s dhe se Moska do të përballej me pasoja “të paprecedentë”.

“Ne nuk do të ndalemi me masat ekonomike. Ne do të forcojmë më tej aleatët tanë të NATO-s në krahun lindor” në përgjigje të një pushtimi, tha Harris më 19 shkurt, teksa mori pjesë në Konferencën e Sigurisë së Mynihut.

Në rast të sulmit rus, Harris po ashtu paralajmëroi se Rusia do të përballej me kosto financiare të “paprecedentë” dhe shtoi se një sulm i tillë do të afronte aleatët evropianë më shumë me SHBA-në.

Këto komente të Harris erdhën një ditë pasi presidenti i Shteteve të Bashkuara, Joe Biden, tha se është i “bindur” se presidenti rus, Vladimir Putin, ka marrë vendimin që ta pushtojë Ukrainën.

Perëndimi thotë se Rusia ka grumbulluar mbi 150,000 trupa përgjatë kufirit me Ukrainën dhe se Moska po përgatitet që ta pushtojë Ukrainën, por Kremlini hedh poshtë këto pretendime, duke thënë se nuk ka plane të tilla.

“Më lejoni të jem e qartë kur them me siguri absolute: Nëse Rusia e pushton më tej Ukrainën, Shtetet e Bashkuara, së bashku me partnerët dhe aleatët tanë, do të vendosim kosto të mëdha ekonomike dhe të paprecedentë”, tha Harris.

Zelenskiy tha në Mynih se fuqitë perëndimore duhet të heqin dorë nga ajo që ai e quajti politikë “e butë” karshi Moskës.

“Ukraina ka pranuar garanci të sigurisë për braktisjen e arsenalit të tretë më të madh bërthamor në botë. Ne nuk kemi armë. Dhe as siguri… Por, ne kemi të drejtë – të drejtën që të kërkojmë nga një politikë e butë në një politikë që garanton siguri dhe paqe”, tha ai.

Bota ka dështuar karshi Ukrainës sepse arkitektura e sigurisë nuk mund të rregullohet, tha Zelenskiy.

“Arkitektura e sigurisë së Evropës është pothuajse e shkatërruar. Është shumë vonë që të flasim për rregullimin e saj”, tha ai.

Lideri ukrainas kritikoi shtetet që nuk i kanë ofruar ndihmë ushtarake Kievit, duke thënë se ndihma e dhënë deri më tani ishte më shumë “si një shurup për kollitje sesa një vaksinë e mirë për COVID-19” kundër një kërcënimi real, që mund të zgjerohet nëpër Evropë, pasi ta ketë goditur së pari Ukrainën.

“Për tetë vjet, Ukraina ka shërbyer si mburojë. Një mburojë e besueshme që ka frenuar një nga ushtritë më të mëdha në botë”, tha ai.

Harris: SHBA-ja kërkon zgjidhje diplomatike për krizën

Gjatë konferencës në Mynih, nënpresidentja Harris tha se administrata Biden, së bashku me aleatët, ka kërkuar që të angazhohet në vullnet të mirë me Moskën që të gjendet një zgjidhje diplomatike, por Kremlini nuk ka pasur vullnet të mirë.

“Rusia vazhdon të thotë se është e gatshme për bisedime, por në të njëjtën kohë ngushton rrugët për diplomaci”, tha Harris.

“Veprimet e tyre thjesht nuk përkojnë me fjalët e tyre”, shtoi nënpresidentja amerikane.

Ndërkaq, kryeministri britanik, Boris Johson, gjatë kësaj ngjarjeje të zhvilluar në Mynih të Gjermanisë, tha se nëse shtetet perëndimore dështojnë të mbajnë premtimet e tyre për mbështetjen e pavarësisë së Ukrainës, do të kishte pasoja në mbarë botën, përfshirë edhe Tajvanin.

“Çdo herë kur ministrat perëndimorë kanë vizituar Kievin, ne e kemi siguruar popullin e Ukrainës dhe liderë e tyre se ne mbështesim sovranitetin dhe pavarësinë e tyre”, tha Johnson.

“Nëse Ukraina rrezikohet, tronditja do të bëjë jehonë në mbarë botën. Dhe ato jehona do të dëgjohen në Azinë Lindore, do të dëgjohen në Tajvan”, shtoi ai.

Stoltenberg i bën thirrje Rusisë të ndalojë përgatitjet për luftë

Më herët gjatë të shtunës, Sekretari i Përgjithshëm i NATO-s, Jens Stoltenberg, i bëri thirrje Rusisë që të tërheqë trupat nga kufirin me Ukrainën dhe të punojë për zgjidhjen e krizës në mënyrë paqësore.

Në Konferencën e Sigurisë në Mynih, Stoltenberg tha se deri më tani nuk kanë parë sinjale që mbështesin pretendimet e Moskës se ka filluar tërheqjen e trupave pranë Ukrainës, por sipas tij, po ndodhë e kundërta.

“Ne i bëjmë thirrje Moskës që të bëjë atë që po thotë se po bën, të tërheqë trupat nga kufijtë e Ukrainës. Ky do të ishte një hap i parë i rëndësishëm drejt një zgjidhjeje paqësore. Nuk është vonë për Rusinë që ta ndryshojë kursin, të tërhiqet, të ndalojë përgatitjet për luftë dhe të fillojë që të punojë për një zgjidhje paqësore”, tha Stoltenberg.

Ai tha se grumbullimi ushtarak në dhe përreth Ukrainës është më i madh që prej Luftës së Ftohtë.

Moska ka pretenduar se ka nisur tërheqjen e trupave nga kufirin me Ukrainën, por NATO dhe Shtetet e Bashkuara kanë thënë se nuk kanë parë sinjale të tilla.

“Ne nuk e dimë se çfarë do të ndodhë, por rreziku për konflikt është real. Aleatët e NATO-s po vazhdojnë përpjekjet e tyre të fuqishme diplomatike për të gjetur një zgjidhje politike”, tha Stoltenberg.

Stoltenberg tha se i ka dërguar ftesë ministrit të Jashtëm rus, Sergei Lavrov që të takohet së bashku me NATO-n dhe aleatët e saj në kuadër të Këshillit NATO-Rusi, teksa shtoi se aleanca ushtarake po vazhdon përpjekjet diplomatike për të gjetur një zgjidhje politike.

Duke folur për kërkesat e sigurisë të prezantuara nga Rusia, Stoltenberg tha se Moska e di që disa kërkesa nuk mund të realizohen.

“Rreziku tani është kombinimi i këtij grumbullimi masiv ushtarak me retorikën kërcënuese, duke vendosur përpara kërkesa që ata e dinë se ne nuk mund t’i plotësojmë e duke thënë: ‘Nëse ju nuk i plotësoni këto kërkesa, do të ketë pasoja ushtarake’”, tha Stoltenberg.

“Kjo është normalja e re, ku kemi Rusinë që haptazi konteston vlerat thelbësore për sigurinë evropiane dhe më pas tregon vullnetin për të përdorur forcën ose kërcënon se do të përdorë forcë për të marrë atë që do”, tha ai.

Rusia ka kërkuar që NATO të mos e pranojë kurrë Ukrainën dhe që aleanca të tërhiqet nga Evropa Lindore dhe Qendrore. Stoltenberg vuri në pah se për herë të parë, Kina i është bashkuar Rusisë në thirrjet ndaj aleancës ushtarake që të mos pranojë anëtarë të rinj.

Ndërkaq, presidentja e Komisionit Evropian, Ursula von der Leyen gjatë panelit në Mynih tha se Rusia rrezikon që të humbë prosperitet nëse e pushton Ukrainën, duke u zotuar se do të ketë një pako të sanksioneve ekonomike dhe financiare ndaj Moskës në rast të ndonjë agresioni.

Ajo tha se Bashkimi Evropian është i gatshëm të ndalojë furnizimet me gazin rus.

“Mund të them se në rast të ndalesës me furnizimet me gaz nga Rusia, ne do të jemi të sigurt gjatë këtij dimri”, tha ajo.

Von der Leyen e akuzoi gjigantin rus të gazit, Gazprom se “qëllimshëm po tenton të dërgojë sa më pak furnizime, ndërkaq çmimet dhe kërkesat janë të mëdha”.

Stoltenberg i bën thirrje Rusisë të ndalojë përgatitjet për luftë

RFE/RL

Sekretari i Përgjithshëm i NATO-s, Jens Stoltenberg, i bëri thirrje Rusisë që të tërheqë trupat nga kufirin me Ukrainën dhe të punojë për zgjidhjen e krizës në mënyrë paqësore.

Në Konferencën e Sigurisë në Mynih, Stoltenberg tha se deri më tani nuk kanë parë sinjale që mbështesin pretendimet e Moskës se ka filluar tërheqjen e trupave pranë Ukrainës, por sipas tij, po ndodhë e kundërta.

“Ne i bëjmë thirrje Moskës që të bëjë atë që po thotë se po bën, të tërheqë trupat nga kufijtë e Ukrainës. Ky do të ishte një hap i parë i rëndësishëm drejt një zgjidhjeje paqësore. Nuk është vonë për Rusinë që ta ndryshojë kursin, të tërhiqet, të ndalojë përgatitjet për luftë dhe të fillojë që të punojë për një zgjidhje paqësore”, tha Stoltenberg.

Ai tha se grumbullimi ushtarak në dhe përreth Ukrainës është më i madh që prej Luftës së Ftohtë.

Perëndimi thotë se Rusia ka grumbulluar mbi 150,000 trupa përgjatë kufirit me Ukrainën dhe se Moska po përgatitet që ta pushtojë Ukrainën, por Kremlini hedh poshtë këto pretendime, duke thënë se nuk ka plane të tilla.

Moska ka pretenduar se ka nisur tërheqjen e trupave nga kufirin me Ukrainën, por NATO dhe Shtetet e Bashkuara kanë thënë se nuk kanë parë sinjale të tilla.

“Ne nuk e dimë se çfarë do të ndodhë, por rreziku për konflikt është real. Aleatët e NATO-s po vazhdojnë përpjekjet e tyre të fuqishme diplomatike për të gjetur një zgjidhje politike”, tha Stoltenberg.

Një ditë më parë presidenti i Shteteve të Bashkuara, Joe Biden, tha se është i “bindur” se presidenti rus, Vladimir Putin, ka marrë vendimin që ta pushtojë Ukrainën.

Stoltenberg tha se i ka dërguar ftesë ministrit të Jashtëm rus, Sergei Lavrov që të takohet së bashku me NATO-n dhe aleatët e saj në kuadër të Këshillit NATO-Rusi, teksa shtoi se aleanca ushtarake po vazhdon përpjekjet diplomatike për të gjetur një zgjidhje politike.

Duke folur për kërkesat e sigurisë të prezantuara nga Rusia, Stoltenberg tha se Moska e di që disa kërkesa nuk mund të realizohen.

“Rreziku tani është kombinimi i këtij grumbullimi masiv ushtarak me retorikën kërcënuese, duke vendosur përpara kërkesa që ata e dinë se ne nuk mund t’i plotësojmë e duke thënë: ‘Nëse ju nuk i plotësoni këto kërkesa, do të ketë pasoja ushtarake’”, tha Stoltenberg.

“Kjo është normalja e re, ku kemi Rusinë që haptazi konteston vlerat thelbësore për sigurinë evropiane dhe më pas tregon vullnetin për të përdorur forcën ose kërcënon se do të përdorë forcë për të marrë atë që do”, tha ai.

Rusia ka kërkuar që NATO të mos e pranojë kurrë Ukrainën dhe që aleanca të tërhiqet nga Evropa Lindore dhe Qendrore. Stoltenberg vuri në pah se për herë të parë, Kina i është bashkuar Rusisë në thirrjet ndaj aleancës ushtarake që të mos pranojë anëtarë të rinj.

Ndërkaq, presidentja e Komisionit Evropian, Ursula von der Leyen gjatë panelit në Mynih tha se Rusia rrezikon që të humbë prosperitet nëse e pushton Ukrainën, duke u zotuar se do të ketë një pako të sanksioneve ekonomike dhe financiare ndaj Moskës në rast të ndonjë agresioni.

Ajo tha se Bashkimi Evropian është i gatshëm të ndalojë furnizimet me gazin rus.

“Mund të them se në rast të ndalesës me furnizimet me gaz nga Rusia, ne do të jemi të sigurt gjatë këtij dimri”, tha ajo.

Von der Leyen e akuzoi gjigantin rus të gazit, Gazprom se “qëllimshëm po tenton të dërgojë sa më pak furnizime, ndërkaq çmimet dhe kërkesat janë të mëdha”.

Në Konferencën e Sigurisë të Mynihut do të marrë pjesë edhe presidenti ukrainas, Volodymyr Zelenskiy. Po ashtu, kësaj konference do t’i adresohet edhe nënpresidentja amerikane, Kamala Harris, e cila pritet ta paralajmërojë Rusinë se në rast të një pushimi, do të rritet prezenca e NATO-s si dhe Moska do të ketë pasoja të mëdha financiare, tha një zyrtar i administratës amerikane, që foli me gazetarët në kushte anonimiteti.

Por, ky zyrtar i administratës tha se Harris do të përçojë mesazhin se Uashingtoni është i hapur për diplomaci “qoftë edhe në këto momente të fundit”.

Gjermania me të dërguar të posaçëm për Ballkanin Perëndimor

VOA

Qeveria gjermane emëroi të premten politikanin Manuel Sarrazin, si të dërguar të posaçëm për rajonin e Ballkanit Perëndimor.

Zoti Sarrazin, që është nga radhët e të gjelbërve, ishte deputet në Bundestag nga viti 2008 deri në vitin 2021.

Bashkëpartiakja e tij, Viola von Cramon, raportuese për Kosovën në Parlamentin Evropian, duke e përgëzuar zotin Sarrazin tha se “Ballkani Perëndimor ka nevojë për një mbështetje të fuqishme nga Bashkimi Evropian”, ndërsa e cilësi atë si mbështetës të fuqishëm të zgjerimit të bllokut.

Zoti Sarrazin do të jetë i dërguari i katërtë perëndimor për rajonin. Aktualisht zv/ndihmës sekretari amerikan i shtetit, Gabriel Escobar është në postin e të dërguarit të posaçëm amerikan, Sir Stuart Peach i dërguar i posaçëm i Britanisë së Madhe, ndërsa Miroslav Lajçak, në detyrën e të dërguarit të posaçëm të BE-së për bisedimet Kosovë – Serbi dhe çështjet tjera të Ballkanit Perëndimor.

Që të gjithë janë pjesë e përpjekjeve për një marrëveshje ndërmjet Kosovës dhe Serbisë në kuadër të bisedimeve të ndërmjetësuara nga Bashkimi Evropian.

Në fillim të muajit shkurt i dërguari amerikan, Gabriel Escobar dhe ai evropian, Miroslav Lajçak, qëndruan në Prishtinë dhe në Beograd në kuadër të përpjekjeve për ripërtëritjen e bisedimeve Kosovë – Serbi.

Javën e ardhshme në Bruksel pritet një takim ndërmjet kryenegociatorëve të të dyja palëve, Besnik Bislimi e Petar Petkoviç, që shihet si pjesë e përpjekjeve për të siguruar një takim midis kryeministrit të Kosovës, Albin Kurti dhe presidentit të Serbisë Aleksandër Vuçiç.

Takimi i fundit i nivelit të lartë është mbajtur në korrik të vitit të kaluar. Zyrtarët evropian shpresojnë që ata të takohen gjatë muajit të ardhshëm, ndonëse pritjet për ndonjë përparim janë të pakta, meqë Serbia mban zgjedhjet presidenciale e parlamentare në fillim të muajit prill.

Kosova dhe Serbia janë përfshirë në bisedime të lehtësuara nga Bashkimi Evropian që nga viti 2011 për arritjen e një marrëveshje për normalizimin e marrëdhënieve, që është kusht për përparimin e tyre drejt integrimeve evropiane.

Serbia e cila kundërshton pavarësinë e Kosovës ka hapur disa kapituj të negociatave për anëtarësim në BE, ndërsa Kosova vazhdon të mbetet fundit në proceset integruese.

Kancelari gjerman: Perëndimi gati për dialog serioz me Rusinë

VOA/Ken Bredemeier, Marrë nga Reuters dhe AP

Në kuadër të përpjekjeve diplomatike për të zbutur tensionet mes Ukrainës dhe Rusisë, kancelari gjerman Olaf Scholz takoi sot Presidentin ukrainas Volodymyr Zelenskiy në Kiev, ndërsa nesër udhëheqësi gjerman ndalon në Moskë për bisedime me presidentin rus Vladimir Putin.

Kancelari Scholz tha të hënën se vendet perëndimore “janë gati për një dialog serioz me Rusinë për çështjet e sigurisë evropiane”, por se gjithashtu presin nga Presidenti rus Vladimir Putin që të ulë tensionet e krijuara nga kërcënimi për një sulm ndaj Ukrainës.

Zoti Scholz i ofroi kështu një mundësi të re Kremlinit pas takimit me Presidentin ukrainas Volodymyr Zelenskiy në Kyiv, megjithëse ndërkohë Shtetet e Bashkuara dhe vendet aleate kanë paralajmëruar se zoti Putin mund të urdhërojë një sulm masiv ndaj Ukrainës brenda disa ditësh, duke filluar me bombardime me raketa dhe nga ajri dhe duke u pasuar nga një sulm i shpejtë nga toka.

Në një email dërguar Zërit të Amerikës, një zyrtar i NATO-s e përkufizon ngërçin si një “moment të rrezikshëm për sigurinë evropiane. Një konflikt madhor në Ukrainë mund të shkaktonte zhvendosjen e një numri të madh njerëzish që do t’i largoheshin luftimeve. Ka ende kohë për të shmangur vuajtje të tilla të panevojshme. Duhet bërë gjithçka për të shmangur pasoja të tilla tek civilët”.

Presidenti ukrainas Zelenskiy tha në një fjalim televiziv drejtuar kombit të hënën se kishte dëgjuar se ofensiva ushtarake ruse mund të fillonte të mërkurën, dhe se do ta shpallte ditën në fjalë, ditë të unitetit kombëtar. Ai nuk tha se nga e kishte marrë këtë informacion.

Shtëpia e Bardhë tha se Presidenti i Shteteve të Bashkuara Joe Biden bisedoi të hënën me Kryeministrin britanik Boris Johnson rreth përpjekjeve për të përmirësuar pozitat mbrojtëse të NATO-s në krahun lindor pranë Rusisë.

Nuk pati komente të menjëhershme nga Rusia për mesazhin e Kancelarit gjerman Scholz. Më herët megjithatë, Ministri i Jashtëm rus Sergey Lavrov i sugjeroi zotit Putin që të vazhdojnë bisedimet me Shtetet e Bashkuara dhe vendet e NATO-s, megjithëse Perëndimi ka refuzuar kërkesën kryesore të zotit Putin për të përjashtuar mundësinë e anëtarësimit të Ukrainës në NATO.

I ulur në anën tjetër të një tryeze të gjatë konferencash përballë Presidentit Putin, zoti Lavrov i tha udhëheqësit rus se megjithëse Shtetet e Bashkuara dhe NATO kanë refuzuar të ndalin dërgimin e armëve drejt Ukrainës, ose të tërheqin forcat e dislokuara në Evropën Lindore, ata kanë ofruar të negociojnë për dislokimin e raketave në Evropë dhe për stërvitjet e NATO-s që zhvillohen në vendet më afër Rusisë.

I pyetur nga zoti Putin nëse do të kishte kuptim të vazhdohej angazhimi diplomatik me udhëheqësit perëndimorë, zoti Lavrov u përgjigj se ekziston ende hapësira për bisedime dhe propozoi vazhdimin e tyre.

Zoti Lavrov tha se bisedimet “nuk mund të vazhdojnë pafundësisht , por në këtë pikë do të sugjeroja t’i vazhdojmë dhe t’i zgjerojmë”.

Analistët thonë se veçanërisht në Rusi, zoti Scholz duhet të përcjellë mesazh të qartë se perëndimi ka unitet dhe se nuk mund të përçahet.

Presidenti ukrainas Volodymyr Zelenskiy tha se vendi i tij do të vazhdojë të ndjekë synimin për anëtarësim në NATO, pavarësisht kundërshtimit rus dhe skepticizmit të disa vendeve perëndimore.

“Sot, shumë gazetarë dhe udhëheqës po japin shenja të vogla për Ukrainën se është e mundur që të shmanget rreziku dhe që të mos ngrihet vazhdimisht çështja e anëtarësimit në aleancë në të ardhmen, sepse këto rreziqe lidhen me reagimin e Federatës Ruse”, tha zoti Zelenskiy në një konferencë të përbashkët me kancelarin gjerman Olaf Scholz.

“Besoj se duhet të vazhdojmë të ecim në rrugën që e kemi zgjedhur”, shtoi udhëheqësi ukrainas.

Nga ana e tij, kancelari gjerman Olaf Scholz tha se pret hapa konkretë nga Rusia për të shmangur konfliktin me Ukrainën, ndërsa shtoi se Gjermania dhe aleatët perëndimorë janë të gatshëm për dialog serioz me Rusinë mbi çështjen e sigurisë evropiane.

Udhëheqësi gjerman njoftoi një kredi të re prej 150 milionë eurosh për Ukrainën, ndërsa shtoi se Perëndimi është gati për vendosjen e sanksioneve të gjera dhe të efektshme, nëse Rusia shkel integritetin territorial të Ukrainës.

Vizita e zotit Scholz në Ukrainë është në kuadër të përpjekjeve diplomatike për të zbutur tensionet e larta mes Kievit dhe Moskës, ndërsa zyrtarët perëndimorë të zbulimit paralajmërojnë se një sulm rus ndaj Ukrainës është gjithnjë e më i afërt.

Të martën zoti Scholz ndalon në Moskë, ku do të takohet me presidentin rus Vladimir Putin. Gjermania, sikur edhe disa vende tjera, u ka bërë thirrje qytetarëve të saj të largohen sa më parë nga Ukraina.

Qeveria ka refuzuar furnizimin me armë të Ukrainës dhe ka shmangur deklarimin konkret se cilat sanksione ndaj Rusisë do të mbështeste Gjermania. Pozicioni i paqartë gjerman ka ngjallur kritika brenda dhe jashtë vendit. Ekspertët thonë se veçanërisht gjatë vizitës në Moskë, është e rëndësishme që zoti Scholz të theksojë se Gjermania është në të njëjtën linjë me aleatët evropianë dhe amerikanë.

“Zoti Scholz duhet të përcjellë një mesazh të qartë në Moskë se aleanca perëndimore ka unitet. Moska duhet ta kuptojë se aleanca perëndimore nuk mund të përçahet”, thotë Markus Ziener nga Fondi Gjerman Marshall.

Megjithë ngurrimin gjerman për të komentuar të ardhmen e gazsjellësit Nord Stream 2 në rast se Rusia pushton Ukrainën, ekspertët mendojnë se e ardhmja e furnizuesit me gaz natyror është nën rrezik.

Presidenti amerikan Joe Biden tha javën që shkoi se Nordstream 2 do të bllokohej në rast të sulmit rus.

Kjo do të dëmtonte ekonominë ruse, por gjithashtu do të shkaktonte probleme për furnizimin me gaz të Gjermanisë. Punimet e gazsjellësit kanë përfunduar, por ai ende nuk është vënë nën funksionim.

“Gjermania nuk ka shumë mjete për të ushtruar ndikim, përveç nëse thotë se nuk do të miratojë gazsjellësin Nord Stream 2. Gjermania është shumë e kufizuar. Vendi është zotuar për furnizim me gaz. Ndryshe nga vendet e tjera evropiane, ne nuk kemi diversifikuar furnizimet tona me gaz dhe jemi zvarritur në tranzicionin energjetik. Pra ne kemi bërë shumë gabime dhe tani po pagujmë çmimin”, thotë Ckaudia Kemfert nga Instituti gjerman për Kërkime Ekonomike.

Rusia ka grumbulluar më shumë se 100 mijë trupa përgjatë kufirit të saj me Ukrainën dhe ka kryer një seri manovrash ushtarake në rajon, por thotë se nuk ka plane për të pushtuar fqinjin e saj.

Moska kërkon garanci nga Perëndimi se NATO nuk do të lejojë anëtarësimin e Ukrainës dhe vendeve të tjera ish-sovjetike në aleancën veri-perëndimore. Rusia gjithashtu kërkon që NATO të ndalojë dërgimin e armëve në Ukrainë dhe tërheqjen e trupave të tyre nga Evropa Lindore. Shtetet e Bashkuara dhe NATO i kanë refuzuar këto kërkesa.

Ukraina kërkon të takohet me Rusinë për grumbullimin ushtarak

RFE/RL

Ukraina ka kërkuar një takim urgjent me Rusinë dhe dhjetëra shtete evropiane, për të marrë një shpjegim lidhur me grumbullimin e forcave ruse në kufi me Ukrainën.

Ministri i Jashtëm ukrainas, Dmytro Kuleba, tha se Rusia ka injoruar kërkesën zyrtare të Kievit për shpjegim pse Moska ka pozicionuar mbi 100,000 trupa dhe armë të avancuara përreth Ukrainës.

“Ukraina po thërret një takim me Rusinë dhe të gjitha shtetet anëtare në 48 orët e ardhshme për të diskutuar për lëvizjet e trupave ruse përgjatë kufirit tonë”, tha ai të dielën, më 13 shkurt.

Ukraina e ka bërë këtë kërkesë përmes Organizatës për Siguri dhe Bashkëpunim në Evropë, pjesë e së cilës është edhe Rusia.

Sipas Dokumentit të Vjenës më 1990 kërkon që 57 anëtarët e Organizatës për Siguri dhe Bashkëpunim në Evropë (OSBE) për të ndarë informacione lidhur me forcat ushtarake të tyre dhe të njoftojnë njëri-tjetrin për aktivitete të mëdha.

“Nëse Rusia është serioze kur flet për sigurinë në hapësirën e OSBE-së, ajo duhet të përmbushë angazhimin e saj për transparencën ushtarake në mënyrë që të ulë tensionet dhe të rrisë sigurinë për të gjithë”, tha Kuleba.

Ende nuk ka ndonjë përgjigje zyrtare nga Moska për kërkesën e Kulebas.

Shtetet e Bashkuara kanë shprehur frikën se grumbullimi i trupave ruse mund të çojë në pushtimin e Ukrainës. Uashingtoni ka thënë se një gjë e tillë mund të ndodhë në “çdo moment”.

Rusia ka grumbulluar mbi 130,000 trupa në afërsi të kufijve të Ukrainës. Moska ka hedhur poshtë se ka plane që ta pushtojë Ukrainën.

Frank-Walter Steinmeier rizgjidhet si president i Gjermanisë

VOA/Marrë nga Reuters dhe AP

Frank-Walter Steinmeier u zgjodh për një mandat të dytë pesëvjeçar si president i Gjermanisë të dielën pasi një asamble e posaçme votoi për politikanin veteran në postin e rëndësishëm por kryesisht ceremonial.

Ai shihet si simbol i konsensusit dhe vazhdimësisë.

Zgjedhja e zotit Steinmeier me votim të fshehtë nga shumica e asamblesë që përbëhej nga anëtarët e Bundestagut dhe përfaqësues të 16 shteteve të Gjermanisë ishte e pritshme, pasi mbështetej gjerësisht nga shumica e partive kryesore të Gjermanisë në një kohë trazirash globale dhe pas ndryshimit të fundit të qeverisë.

Në fjalën e tij pas rizgjedhjes, presidenti Steinmeier kritikoi grumbullimin e trupave të ushtrisë ruse pranë Ukrainës, duke thënë se e paralajmëronte Presidentin Vladimir Putin të mos e nënvlerësonte forcën e demokracisë.

Demokracia zuri një vend të rëndësishëm në fjalimin e tij.

“Përgjegjësia ime është ndaj të gjithë atyre që jetojnë në vendin tonë. Unë jam jopartiak, por nuk jam neutral kur bëhet fjalë për kauzën e demokracisë. Ata që luftojnë për të mbrojtur demokracinë do të më kenë në krah. Ata që e sulmojnë do të më kenë kundërshtar,” tha ai.

Ai premtoi gjithashtu se do të shërojë plagët e shkaktuara nga koronavirusi.

Zoti Steinmeier është presidenti i 12-të i Gjermanisë që pas Luftës së Dytë Botërore. Ai ishte këshilltar i lartë i qeverisë për ish-kancelarin Gerhard Shrëder dhe ministër i Jashtëm nën qeverisjen e ish-kancelares Angela Merkel.

Kancelari gjerman Scholz shkon në Kiev dhe Moskë, në përpjekje për zbutjen e tensioneve

VOAL/Marrë nga Reuters dhe AP

Kancelari gjerman Olaf Scholz shkon në Ukrainë dhe Rusi këtë javë në një përpjekje për të ndihmuar në zbutjen e tensioneve të përshkallëzuara pasi zyrtarët e zbulimit perëndimor paralajmëruan se Rusia mund të ndërmarrë një sulm rus ndaj Ukrainës brenda disa ditësh. Gjermania është një nga vendet që u ka bërë thirrje qytetarëve të saj të largohen nga Ukraina sa më shpejt të jetë e mundur.

Përpara vizitave të tij të para si kancelar në Kiev të hënën dhe Moskë të martën për takime me presidentët ukrainas dhe rus, zoti Scholz përsëriti paralajmërimin e tij ndaj Rusisë, si bëri thirrje që të vazhdojnë përpjekjet diplomatike.

“Është detyra jonë që të parandalojmë një luftë në Evropë, duke i dërguar një mesazh të qartë Rusisë se çdo agresion ushtarak do të kishte pasoja të rënda për Rusinë dhe perspektivën e saj, dhe se ne jemi të bashkuar me aleatët tanë”, tha kancelari Scholz në parlamentin gjerman të premten.

Por ai shtoi se duhen bërë të gjitha përpjekjet për vazhdimin e bisedimeve.

Megjithatë një burim nga qeveria gjermane i tha agjencisë së lajmeve Reuters se Berlini nuk pret “rezultate konkrete” nga bisedimet me Presidentin rus, Vladimir Putin.

Ndërkohë zëvendës kancelari dhe ministri i ekonomisë i Gjermanisë, Robert Habeck, tha të dielën në një intervistë se Evropa mund të jetë në prag të luftës.

Zoti Habeck nuk dha detaje por iu referua grumbullimit masiv të forcave të armatosura të dy vendeve përballë njëra-tjetrës.

Zoti Scholz ka thënë vazhdimisht se Moska do të paguante një “çmim të lartë” në rast të një sulmi, por refuzimi i qeverisë së tij për të furnizuar Ukrainën me armë vdekjeprurëse ose për të përcaktuar se cilat sanksione do të mbështeste kundër Rusisë, janë kritikuar brenda dhe jashtë vendit dhe kanë ngjallur pikëpyetje në lidhje me vendosmërinë e Berlinit për t’i bërë ballë Rusisë.

Danimarka, e gatshme të lejojë dislokimin e trupave amerikane

Kryeminstrja e Danimarkës, Mette Frederiksen.

RFE/RL

Kryeministrja e Danimarkës tha se ky shtet anëtar i NATO-s është i gatshëm që të lejojë stacionimin e trupave amerikane si pjesë e një marrëveshjeje dypalëshe të mbrojtjes.

“Shtetet e Bashkuara kanë komunikuar me Danimarkën, duke i propozuar bashkëpunim dypalësh në fushën e mbrojtjes”, tha Mette Frederiksen gjatë një adresimi për gazetarë më 10 shkurt.

“Natyra ekzakte e këtij bashkëpunimi ende nuk është definuar, por mund të përfshijë prezencën e trupave amerikane, materialeve dhe pajisjeve ushtarake amerikane në tokën daneze”, tha ajo.

Departamenti amerikan i Shtetit ka mirëpritur deklaratat e Frederiken dhe tha se marrëveshja, kur të miratohet, “do të lejojë që shtetet tona të thellojnë partneritetin” dhe “të forcojnë bashkëpunimin në kuadër të operacioneve të NATO-s”.

Ushtria amerikane veçse ka prani të përhershme të trupave në disa shtete evropiane, përfshirë në Gjermani, Belgjikë dhe Britani.

Tensionet janë rritur muajve të fundit pasi Rusia ka grumbulluar mbi 100,000 trupa përgjatë kufirit me Ukrainën, duke rritur frikën për një pushtim të mundshëm.

Moska mohon se ka plane që ta pushtojë Ukrainën, që nuk është anëtare e NATO-s, por ka lidhje të ngushta me Perëndimin.

Shtetet e NATO-s së fundmi kanë rritur praninë e tyre ushtarake në Norvegji, Evropën Lindore dhe në shtetet e Baltikut për t’i siguruar aleatët në rast të një agresioni rus.

Ministri danez i Mbrojtjes, Morten Bodskov, tha se çdo marrëveshje ushtarake me SHBA-në nuk do të përfshinte ndonjë bazë të përhershme ushtarake të SHBA-së në Danimarkë dhe se armët bërthamore nuk do të stacionoheshin në territorin danez.

Bisedimet formale për marrëveshjen ushtarake pritet të nisin në muajt në vazhdim, thanë zyrtarët.

Ndërron jetë politikani dhe diplomati i njohur Eduard Kukan

Eduard Kukan, ish-ministër i Jashtëm i Sllovakisë, dhe ish deputet në Parlamentin Europian, ka ndërruar jetë në moshën 83-vjeçare, njoftoi Ministria e Jashtme e Sllovakisë.

Kukan ka qenë një nga mbështetësit e Shqipërisë në Parlamentin Europian, kryetari i Grupit punues të Komitetit të Punëve të Jashtme të PE për Ballkanin Perëndimor dhe shpesh pjesë e delegacioneve ndërkombëtare që ndërmjetësonin krizat e politikës shqiptare.

‘Duke shërbyer në kohë tepër kërkuese, ai ia kushtoi jetën ndërtimit të Shërbimit të Jashtëm të Sllovakisë. Vendimet e tij vendimtare bënë të mundur anëtarësimin tonë në Bashkimin Europian dhe NATO.

Pa të, historia e Sllovakisë mund të kishte qenë tepër e ndryshme’, thuhet në njoftimin e Ministrisë së Jashtme të Sllovakisë në Twitter. syri.net

Komandantët e lartë rusë mbërrijnë në Bjellorusi, sot nis stërvitja ushtarake

VOA/Ken Bredemeier

Të mërkurën në Bjellorusi mbërritën komandantët e lartë ushtarakë rusë. Ata do të mbikëqyrin 30,000 trupa ruse gjatë një stërvitjeje ushtarake 10 ditore me ushtrinë bjelloruse, në atë që shihet si shfaqja më e fundit e forcës së Moskës, përgjatë kufirit me Ukrainën.

Rusia ka dërguar për stërvitjen në Bjellorusi dy sisteme raketore tokë-ajër, S-400 dhe avionë të shumtë luftarakë. Gjenerali Valery Gerasimov, shef i Shtabit të Përgjithshëm të Forcave të Armatosura ruse, do të drejtojë stërvitjen që nis të enjten.

Stërvitja në Bjellorusi është kërcënimi më i fundit ndaj Ukrainës, kryeqyteti i së cilës, Kievi, ndodhet vetëm 210 kilometra në jug të saj. Moska gjithashtu ka dërguar anije luftarake në Detin e Zi dhe ka grumbulluar më shumë se 100,000 trupa përgjatë krahut lindor të Ukrainës.

Po kështu edhe qeveria e Ukrainës njoftoi një stërvitje ushtarake 10-ditore, që nis gjithashtu të enjten, gjatë së cilës do të përdoren avionë pa pilot dhe raketa antitank të furnizuara nga aleatët perëndimorë të Kievit.

Zëdhënësi i Kremlinit Dmitry Peskov tha se Rusia po organizonte stërvitje të përbashkëta me Bjellorusinë për t’u përballur siç tha ai, me “kërcënimet e pashembullta ndaj sigurisë”.

Rusia dhe Bjellorusia janë përballur me kërcënime të pashembullta, natyra dhe përqendrimi i të cilave, për fat të keq, është shumë më i madh dhe shumë më i rrezikshëm se më parë”, u tha zoti Peskov gazetarëve.

Ekspertët perëndimorë të zbulimit thonë se ata besojnë se Moska ka dislokuar 70% të kapacitetit të saj ushtarak për një pushtim të plotë të Ukrainës, një vend që në vitet e fundit ka anuar nga Perëndimi e po kërkon t’i bashkohet NATO-s, aleancës ushtarake perëndimore të formuar pas Luftës së Dytë Botërore.

Presidenti rus Vladimir Putin ka mohuar se ka në plan të pushtojë Ukrainën, por ka kërkuar që Perëndimi që të pengojë anëtarësimin e këtij vendi në NATO dhe që aleatët perëndimorë të tërheqin trupat dhe armatimet e tyre të vendosura pranë Rusisë.

Si përgjigje, Perëndimi ka thënë se Rusia nuk ka të drejtë vetoje në procesin e anëtarësimit të një vendi në NATO, por nga ana tjetër ka shprehur gatishmërinë të negociojë me Moskën mbi çështjen e dislokimit të raketave në Evropën Lindore dhe stërvitjet periodike ushtarake të NATO-s.

Presidenti francez Emmanuel Macron bisedoi të hënën me Presidentin rus Putin dhe të martën me Presidentin ukrainas Volodymyr Zelenskiy, por takimet nuk duket t’i kenë lehtësuar tensionet apo reduktuar mundësinë e një pushtimi.

Nuk duhet të nënvlerësoni tensionin që rrethon situatën që po jetojmë, natyrën e tij të pashembullt”, tha zoti Macron në Kiev. “Nuk besoj se kjo krizë mund të zgjidhet me disa orë diskutime”, shtoi ai.

Zëvendësministri i Jashtëm rus Sergei Ryabkov tha të mërkurën se çdo gjë varet nga ajo nëse Shtetet e Bashkuara dhe NATO janë të gatshme të negociojnë seriozisht mbi kërkesat e Rusisë. Ai e quajti përgjigjen që NATO i dha Rusisë, lidhur me kërkesat e saj, “të vrazhdë e me gjuhë sfiduese”.

Ndërkohë parlamenti sllovak, një vend anëtar i NATO-s, miratoi të mërkurën një traktat ushtarak në fushën e mbrojtjes me Shtetet e Bashkuara, të ngjashëm me paktet që Uashingtoni ka me aleatët e tjerë të NATO-s.

Traktati, i nënshkruar nga Sekretari amerikan i Shtetit Antony Blinken javën e kaluar, i mundëson ushtrisë amerikane të përdorë dy baza të forcave ajrore sllovake për 10 vjet, ndërsa Sllovakia do të marrë 100 milionë dollarë nga Shetetet e Bashkuara për modernizimin e tyre.

Kryeministri i Sllovakisë Eduard Heger tha se traktati do të “rrisë ndjeshëm sigurinë e vendit”, por kundërshtarët e tij thonë se ai do të komprometonte sovranitetin e vendit.

Sekretari Blinken tha se traktati nuk do të krijonte baza të përhershme ushtarake apo një prani të përhershme trupash amerikane në Sllovaki.

Trupat amerikane pritet të mbërrijnë në Rumani

VOAL/Marrë nga Reuters

Trupat amerikane që do të transferohen në Rumani nga Gjermania pritet të mbërrijnë atje të mërkurën mbrëma, tha ministria rumune e mbrojtjes. Ajo tha se ato do të mbrojnë krahun lindor të NATO-s nga përhapja e mundshme e krizës mbi Ukrainën.

Shtetet e Bashkuara po dërgojnë rreth 3,000 trupa shtesë në Poloni dhe Rumani për të forcuar mbrojtjen e Evropës Lindore. Në Rumani, Shtetet e Bashkuara do të transferojnë nga Gjermania njesinë ushtarake “Stryker”.

Ministria rumune e mbrojtjes tha se një pjesë e kontigjentit të trupave amerikane do të hyjë në Rumani rreth orës tetë në mbrëmje dhe do të vazhdojë udhëtimin drejt bazës ushtarake Mihail Kogalniceanu në qarkun lindor të Konstancës.

Forcat amerikane e kanë përdorur bazën ajrore Mihail Kogalniceanu në Detin e Zi që nga viti 1999. Rumania, anëtare e NATO-s që nga viti 2004, ka gjithashtu një sistem të mbrojtjes nga raketat balistike.

Njesia “Stryker”, e krijuar me synimin posaçërisht për dislokime të shpejta, do t’u bashkohet 900 ushtarëve të tjerë amerikanë që aktualisht ndodhen në Rumani me rotacion, disa si pjesë e forcës së NATO-s dhe disa sipas marrëveshjeve të veçanta dypalëshe.

Franca ka ofruar gjithashtu të jetë vendi udhëheqës i një misioni të ardhshëm të NATO-s në Rumani, i cili mund të ketë rreth 1,000 trupa nga vende të ndryshme dhe për këtë çështje një vendim mund të merret në takimin e ardhshëm të ministrave të mbrojtjes të NATO-s në mes të shkurtit.

“Me kontributin tonë, ne do të përpiqemi të plotësojmë çdo gjë që bën NATO dhe në përgjithësi ne mbështesim përpjekjet e NATO-s për të ndërtuar grupin e betejës këtu”, u tha gazetarëve në Bukuresht të mërkurën këshilltari i Departamentit amerikan të Shtetit, Derek Chollet.

“Forcimi i krahut lindor nga veriu në jug është në krye të agjendës së NATO-s, nuk ka dyshim për këtë. Një gjë që ia kemi bërë shumë të qartë palës ruse është se nëse ata vazhdojnë këtë kurs të përshkallëzimit dhe nëse nxjerrin ushtrinë në rrugë në lidhje me Ukrainën, ata do të shohin dislokimin e më shumë aftësive të NATO-s në krahun lindor”, shtoi ai.

Arrestohet në Itali ish-Gjenerali i Guardia di Finanza, mik i ngushtë i Engjëll Agaçit, fqinj i tij në Romë

Ish-Gjenerali i Guardia di Finanza-s, Fabrizio Lisi është arrestuar në Itali ditën e sotme.

Ai akuzohet për korrupsion. Lisi është mik i ngushtë i Sekretarit të Përgjithshëm të kryeministrit Rama, Engjëll Agaçi.

Lisi e Agaçi janë fqinj në Romë, ku i kanë vilat pranë njëra-tjetrës.

Atij i është ofruar masa ‘arrest në shtëpi’, që është firmosur nga gjyqtari.

Mes të arrestuarve janë edhe katër persona të tjerë. Ata janë ndaluar pas një operacioni nga ROS Napoli në kuadër të hetimeve kundër korrupsionit të koordinuara nga prokurori.

Mes të tjerëve në pranga kanë përfunduar Roberto Penna, zv/prokuror në Salerno dhe partnerja e tij, avokatja Maria Gabriella Gallevi.

Veprat për të cilat akuzohen të ndaluarit janë korrupsioni për ushtrimin e funksioneve, korrupsioni për një vepër në kundërshtim me detyrën zyrtare, korrupsioni në aktet gjyqësore dhe nxitja e padrejtë për të dhënë ose premtuar përfitime.

Arrest shtëpiak iu njoftua edhe sipërmarrësve Francesco Vorro, Umberto Inverso e Fabrizio Lisi. Gjyqtari hetues i Napolit ka firmosur masën e paraburgimit për pesë personat e lartpërmendur.

/Hashtag.al

Sllovakia miraton traktatin për dhënien e dy bazave ajrore SHBA-së

RFE/RL

Parlamenti i Sllovakisë të mërkurën ka miratuar një traktat për mbrojtje ushtarake me Shtetet e Bashkuara.

Marrëveshja për Bashkëpunim të Mbrojtjes kaloi me 79 vota për dhe 60 kundër.

Ky traktat do t’i lejojë ushtrisë amerikane që të përdorë dy baza ajrore – bazën Malacky-Kuchyna dhe Sliac – për dhjetë vjet në Sllovaki, shtet anëtar të NATO-s. Si shpërblim Sllovakia do të marrë 100 milionë dollarë nga SHBA-ja, me qëllim të modernizimit të bazave.

Marrëveshja u nënshkrua nga sekretari amerikan i Shtetit, Antony Blinken, dhe ministri i Mbrojtjes së Sllovakisë, Jaroslav Nad, më 3 shkurt në Uashington. Kjo marrëveshje duhet të ratifikohet edhe nga presidentja Zuzana Caputova, e cila e mbështet traktatin.

Votimi për këtë traktat ndodh në kohën e rritjes së frikës se Rusia po planifikon ta pushtojë Ukrainën. Moska ka vendosur mbi 100,000 trupa përgjatë kufijve të Ukrainës, por insiston se nuk po planifikon ndonjë sulm. Sllovakia gjendet në kufi me Ukrainën.

Traktati është mbështetur nga Qeveria e kryeministrit Eduard Heger, i cili ka thënë se do ta “rrisë sigurinë tonë në mënyrë të konsiderueshme”. Por, marrëveshja është kundërshtuar fuqishëm nga opozita, që ka argumentuar se ajo komprometon sovranitetin e shtetit, duke bërë që prezenca e trupave ushtarake në territorin sllovak të jetë e përhershme. Po ashtu, opozita ka thënë se traktati mund të mundësojë edhe dislokimin e armëve bërthamore në Sllovaki.

Qeveritë në Sllovaki dhe SHBA kanë hedhur poshtë këto akuza.

“Asgjë në marrëveshjen e sotme nuk krijon bazë të përhershme për SHBA-në apo për prezencë të përhershme të trupave amerikane në Sllovaki dhe marrëveshja respekton plotësisht sovranitetin dhe ligjet sllovake”, ka deklaruar sekretari Blinken gjatë ceremonisë së nënshkrimit të traktatit.

Mijëra qytetarë protestuan të martën para Parlamentit kur deputetët sllovakë nisën diskutimet për këtë temë.

Protesta bashkoi opozitën sllovake, përfshirë partinë e ekstremit të djathtë, Partia Popullore për Sllovakinë Tonë dhe partinë e majtë, Partinë Socialdemokrate të ish-kryeministrit, Robert Fico.

SHBA-ja ka arritur marrëveshje të ngjashme me 23 shtete të tjera të NATO-s, përfshirë Poloninë dhe Hungarinë, që janë dy shtete fqinje të Ukrainës në krahun lindor të aleancës ushtarake.

Sipas marrëveshjes, çdo dislokim i trupave amerikane duhet të miratohet nga Qeveria dhe Parlamenti i Sllovakisë.

Macron nga Moska: duhet një përgjigje e dobishme që na mundëson të shmangim luftën

Presidenti francez Emmanuel Macron gjatë takimit me presidentin rus Vladimir Putin në Kremlin (Moskë, 7 shkurt 2022)

VOA/Jamie Dettmer, Ken Bredemeier

Presidenti francez Emmanuel Macron është duke u takuar sot në Moskë me Presidentin Vladimir Putin, në përpjekje për të parandaluar rrezikun e një pushtimi të Ukrainës.

Ai i tha homologut të tij rus, Vladimir Putin se Evropës dhe Azisë i duhet një përgjigje “e dobishme” për t’i dhënë fund ngërçit në Ukrainë.

“Një përgjigje e dobishme do të thotë një përgjigje që na mundëson të shmangim luftën dhe të ngremë struktura besimi dhe stabiliteti”, i tha zoti Macron zotit Putin gjatë takimit në Kremlin për krizën në Ukrainë.

Megjithatë, Kremlini tha paraprakisht se nuk pret një zgjidhje të menjëhershme të ngërçit me Perëndimin.

“Situata është tepër komplekse për të pritur një arritje vendimtare gjatë një takimi të vetëm”, u tha gazetarëve zëdhënësi i Kremlinit, Dmitry Peskov.

“Gjatë ditëve të fundit, nuk ka patur asgjë të re për çështjen e garancive të sigurisë për Rusinë”, tha zoti Peskov. “Bashkëbiseduesit tanë perëndimorë preferojnë mos ta përmendin këtë temë”.

Moska ka dislokuar mbi 100 mijë forca përgjatë kufirit lindor të Ukrainës dhe në Bjellorusi. Perëndimi mendon se zoti Putin mund të urdhërojë në çdo moment një pushtim të kësaj republike ish-sovjetike.

Franca, Shtetet e Bashkuara dhe aleatët e NATO-s kanë refuzuar kërkesat e Moskës për të përjashtuar mundësinë e anëtarësimit të Ukrainës në aleancën perëndimore të krijuar pas Luftës së Dytë Botërore.

Përpara se të largohej nga Parisi, zoti Macron i the gazetës Le Journal du Dimanche, se “duhet të jemi shumë realistë. Nuk do të përftojmë gjeste unilaterale, por është thelbësore të parandalojmë një përkeqësim të situatës, përpara se të kemi krijuar mekanizma dhe gjeste reciproke mirëbesimi”.

Pas takimit me zotin Putin, Presidenti francez do të jetë të martën në Kiev për bisedime me udhëheqësit ukrainas.

Ndërkaq në Uashington, Presidenti amerikan Joe Biden po takohet në Shtëpinë e Bardhë me Kancelarin gjerman Olaf Scholz. Ky është takimi i tyre i parë në person, që kur zoti Scholz mori detyrën në muajin dhjetor.

Bisedimet e tyre do të përqëndrohen gjithashtu tek ulja e tensioneve në Evropën Lindore dhe tek parandalimi i një pushtimi të Ukrainës nga Rusia.

Qëndrimet e zotit Macron dallojnë dukshëm nga mënyra se si administrata e presidentit amerikan, Joe Biden, e karakterizon grumbullimin ushtarak të Moskës dhe rrezikun e një sulmi rus.

Një pushtim rus i Ukrainës “mund të ndodhë në çdo kohë”, tha të dielën Këshilltari i Sigurisë Kombëtare i Shtëpisë së Bardhë, Jake Sullivan.

“Ne besojmë se rusët kanë ngritur mundësitë për të kryer një operacion të rëndësishëm ushtarak në Ukrainë dhe ne kemi punuar shumë për të përgatitur një përgjigje”, tha zoti Sullivan në emisionin “Meet the Press” të NBC. Sullivan dhe zyrtarë të tjerë amerikanë vlerësojnë se Komentet e zotit Sullivan vijnë pas dy zyrtarë amerikanë thanë se Rusia ka grumbulluar të paktën 70 për qind të forcave të saj ushtarake të nevojshme për një pushtim.

Pretendimi i presidentit Macron se negociatat e tij me Rusinë do të parandalojnë një konflikt ushtarak, shkaktoi përçmim të rivalëve të tij politikë në Francë. Disa komentatorë dhe analistë, paralajmëruan se ai po vinte në rrezik besueshmërinë e tij si negociator, duke tërhequr vërejtjen se përpjekjet e tij që nga viti 2017 për t’u marrë vesh me udhëheqësin rus, kanë dështuar.

Franca do të mbajë zgjedhjet presidenciale në muajin prill dhe kundërshtarët e presidentit Macron e akuzuan atë se po përpiqet të shfrytëzojë politikën e jashtme, në përpjekje për të rritur shpresat e tij për t’u rizgjedhur.

Gjuha e presidentit Macron “e bën nervoze pjesën tjetër të Evropës”, thotë analisti i politikës së jashtme, Ulrich Speck, një bashkëpunëtor në Fondin Gjerman Marshall.

Presidenti Macron ka kërkuar ruajtjen e lidhjeve me Rusinë, me gjithë aneksimin e Krimesë nga Moska në vitin 2014. Në librin e tij të fushatës së vitit 2017, “Revolucioni”, presidenti Macron shkroi se “do të ishte gabim të shkëputeshin lidhjet me këtë fuqi të Evropës Lindore (për shkak të Krimesë) në vend që të krijonim një marrëdhënie të qëndrueshme”.

Menjëherë pas marrjes së detyrës, ai e priti presidentin rus Putin në Versajë mes bisedave për uljen e tensioneve, por, takimi nuk shkoi sipas planit dhe nuk pati një bisedë kokë më kokë. Presidenti Macron kritikoi Rusinë për përpjekje për të ndërhyrë në zgjedhjet perëndimore duke përhapur lajme të rreme, dezinformata dhe gënjeshtra. Ai foli për “linja shumë të qarta” të sjelljes.

Dy vjet më vonë, presidenti francez u përpoq sërish për një zbutje. kur priti presidentin Putin në rezidencën verore të presidentit francez. në Riviera.

Në një fjalim, ai paralajmëroi se Evropa është gjetur në mes të një Lufte të re të Ftohtë, duke thënë se “nuk është në interesin tonë të ndjehemi të dobët dhe fajtorë, të harrojmë të gjitha mosmarrëveshjet tona dhe të përqafojmë përsëri njëri-tjetrin, (por) kontinenti evropian, nuk do të jetë kurrë i qëndrueshëm, nuk do të jetë kurrë i sigurt, nëse nuk i qetësojmë dhe nuk i sqarojmë marrëdhëniet tona me Rusinë”.

Macron është mëdyshur në të kaluarën gjithashtu, për të vendosur sanksione të reja ndaj Rusisë së Vladimir Putinit.

Disa kritikë të presidentit Macron, thonë se përpjekjet e tij për të rivendosur marrëdhëniet me Moskën, kanë të bëjnë me ambiciet e tij personale dhe synojnë të rrisin rolin e tij në çështjet ndërkombëtare më shumë se çdo gjë tjetër.

Ashtu si udhëheqësi ikonë i Francës pas Luftës së Dytë Botërore, gjenerali Charles de Gaulle, presidenti Macron e sheh Francën si një “fuqi balancuese” midis Rusisë dhe Shteteve të Bashkuara. Përpjekjet e tij diplomatike alarmojnë disa nga aleatët evropianë të Francës, veçanërisht fqinjët e afërt të Rusisë.

Politikanët polakë e kanë akuzuar atë për injorim të faktit se Rusia nuk ka ndryshuar me të vërtetë synimet e saj ekspansioniste dhe janë të shqetësuar se përpjekjet e presidentit Macron si ndërmjetës midis Rusisë dhe Shteteve të Bashkuara, do të bëjnë që evropianët të jenë të ‘baraslarguar’ midis Moskës dhe Uashingtonit.

Muajin e kaluar, në një fjalim në Parlamentin Evropian, presidenti Macron bëri thirrje që Bashkimi Evropian të zhvilloje bisedimet e veta me Kremlinin dhe tha se blloku duhet të negociojë një pakt sigurie dhe stabiliteti me Rusinë. Disa udhëheqës Evropës Qendrore dhe vendeve baltike, thanë se komentet e tij ishin të gabuara dhe rrezikonin të inkurajonin Kremlinin të përpiqej të nxiste SHBA-në dhe BE-në, kundër njëri-tjetrit.

Si Shtetet e Bashkuara ashtu edhe Britania, kanë paralajmëruar se një pushtim i plotë rus i Ukrainës mund të jetë i pashmangshëm, si pjesë e një përpjekjeje për të rivendosur një sferë të ndikimit rus në Evropën Lindore dhe Qendrore.

Rusia kërkon që Ukraina të mos bëhet kurrë anëtare e NATO-s dhe thotë se prania ushtarake e NATO-s duhet të hiqet nga shtetet ish-komuniste të Evropës Lindore, që i janë bashkuar aleancës perëndimore. Zyrtarët e NATO-s thonë se vendet duhet të jenë të lira të vendosin nëse do t’i bashkohen aleancës.

Në intervistën e tij me gazetën, Le Journal de Dimanche, presidenti Macron foli sërish për një marrëveshje të re evropiane të sigurisë, duke thënë se ndërsa “siguria dhe sovraniteti i Ukrainës ose i ndonjë shteti tjetër evropian, nuk mund të jetë subjekt kompromisi”, është “gjithashtu e ligjshme që Rusia të shtrojë çështjen e sigurisë së saj”.

“Ne duhet të mbrojmë vëllezërit tanë evropianë duke propozuar një ekuilibër të ri të aftë për të ruajtur sovranitetin dhe paqen e tyre. Kjo duhet bërë duke respektuar Rusinë dhe duke kuptuar traumat bashkëkohore të këtij populli dhe kombi të madh”, tha ai.

Justyna Gotkowska e Qendrës për Studime Lindore, një grup kërkimor me seli në Varshavë, shtron pyetjen se kush e ka mandatuar presidentin Macron të flas për një sistem të ri të sigurisë evropiane.

“Çfarë legjitimiteti ka Macroni për ta propozuar këtë? Evropianët nuk kanë rënë dakord në NATO dhe në OSBE për një “ekuilibër të ri”, përkundrazi”, shkroi ajo.

Zyrtarët francezë thonë se udhëtimi i presidentit Macron është bashkërenduar plotësisht me aleatët perëndimorë dhe i thanë agjencisë së lajmeve, Reuters, se Pallati Élysée ka mësuar nga gabimet e së kaluarës për t’u siguruar që të gjithë aleatët e BE-së dhe NATO-s të mbahen plotësisht të informuar për bisedimet e zoti Macron me presidentin Putin”.

Ulrich Speck, i fondit gjerman Marshall, tha se do të kishte qenë më mirë nëse presidenti Macron do të ishte shoqëruar nga udhëheqës të tjerë perëndimorë në udhëtimin e tij në Moskë. “Do ta bënte Evropën të duket shumë më e fortë dhe do të sigurohej që të ketë një mesazh të bashkuar”, shkroi ai.

*Artikulli përmban të dhëna nga agjensia e lajmeve Reuters.

Qindra trupa amerikane elitë mbërrijnë sot në Poloni

VOA

Qindra trupa amerikane elitë pritet të mbërrijnë në pjesën juglindore të Polonisë të dielën, pranë kufirit me Ukrainën, pas vendimi të marrë nga Presidenti Joe Biden për të diskoluar 1700 ushtarë atje, mes frikës së një pushtimi të Ukrainës nga Rusia.

Trupat e Divizionit 82 të këmbësorisë, të specializuara për sulme nga ajri, pritet të mbërrijnë në aeroportin Rzeszow-Jasionka. Komandanti i tyre është gjeneral major Christopher Donahue, i cili ishte ushtaraku i fundit amerikan që u largua nga Afganistani më 30 gusht.

Presidenti Biden ka urdhëruar trupa shtesë amerikane që të dislokohen në Poloni, Rumani dhe Gjermani për t’u treguar aleatëve dhe kundërshtarëve të Shteteve të Bashkuara angazhimin e Uashingtonit ndaj krahut lindor të NATO-s, mes të tensioneve në rritje mes Rusisë dhe Ukrainës.

Divizioni mund të dislokohet me shpejtësi brenda 18 orëve e të kryejë sulme me parashutë për të marrë kontrollin e objektivave kryesore. Divizioni me bazë në Fort Bragg të Karolinës së Veriut daton prej vitit 1917.

Më herët gjatë javës, avionët amerikanë sollën pajisje logjistike në përgatitje për mbërritjen e divizionit në aeroport, i cili ndodhet rreth 90 kilometra nga kufiri Poloni-Ukrainë.

Ushtarët polakë kanë punuar më parë me divizionin amerikan në misione në Irak dhe Afganistan, sipas Major Przemyslaw Lipczynski, zëdhënës i Divizionit të 18-të të ushtrisë polake.

Rreth 4,000 trupa amerikane janë vendosur në Poloni që nga viti 2017, duke ndjekur një cikël rotacioni.

Ukrainë, banorët e qytetit Dnipro përgatiten për luftë

VOA

Dnipro është qyteti që ndodhet më pranë rajoneve Donetsk dhe Luhansk në Ukrainë, në të cilat në vitin 2014 dhe 2015 ndodhën kryengritjejet separatiste të mbështetura nga Rusia.

Nga ky qytet, ku shumica flasin rusisht, shumë qytetarë luftuan kundër forcave separatiste. Shumë prej tyre e shohin me shqetësim krizën aktuale.

“Natyrisht, ne jemi të shqetësuar. Ne kemi kaluar tashmë luftra. Kam luftuar deri në vitin 2016. Unë përdor snajper. Unë e di se çfarë është lufta. Ne do të mbijetojmë”, thotë Mikhail, banor i këtij qyteti.

Trauma e një lufte që ka shkaktuar viktima tani rrezikon të përsëritet. Por në këtë qytet qetësia mbizotëron, me shpresën se kërcënimi nga Moska nuk do të bëhet realitet.

Megjithatë qyteti po përgatitet edhe për më të keqen. Autoritetet po rinovojnë bunkerët e vjetër të epokës sovjetike, të cilët për ironi, kishin për qëllim të mbronin qytetarët nga një sulm i NATO-s.

“Kjo strehë është gjithmonë gati. Ne kontrollojmë periodikisht tubacionet, energjinë, ujin, gjithçka të nevojshme për të pritur njerëzit kur është e nevojshme”, thotë Vitali Kerdruk, zyrtar i qytetit.

Pavarësisht kërcënimeve të vazhdueshme nga Rusia për një luftë të re, jeta normale në qytet vijon.

Artistët në teatrin e operës dhe baletit të qytetit nuk e kanë ndërprerë punën për asnjë ditë të vetme, pavarësisht ankthit të luftës.

“Është shumë e vështirë. Ka shumë ukrainas që kanë të afërm dhe miq në Rusi, por situata është duke u zhvilluar kështu. Jemi mësuar me këtë dhimbje dhe jetojmë me të”, thotë Tatiana Galnik, këngëtare e Operës së Dnipros.

Rusia ka grumbulluar më shumë se 100 mijë trupa pranë kufijve të Ukrainës, ndërsa Perëndimi ka paralajmëruar për një sulm të mundshëm rus. Moska nga ana tjetër mohon se ka në plan të sulmojë Ukrainën.

Stoltenberg: Rusia dislokon në Bjellorusi numrin më të madh të trupave që nga Lufta e Ftohtë

VOA

Sekretari i Përgjithshëm i NATO-s Jens Stoltenberg tha sot se Rusia ka dislokuar aktualisht numrin më të madh të trupave dhe pajisjeve ushtarake në Bjellorusi që nga Lufta e Ftohtë. Ndërkohë Moska po vazhdon të rrisë praninë ushtarake në pjesë të tjera në kufi me Ukrainën. Sekretari i Përgjithshëm i NATO-s i bëri thirrje Rusisë të ulë tensionet dhe përsëriti paralajmërimin e Perëndimit se çdo agresion i mëtejshëm rus do të përballej me pasoja të rënda e kosto të lartë.

Sekretari i Përgjithshëm i NATO-s Jens Stoltenberg shprehu shqetësimin të enjten se Rusia po vazhdon të grumbullojë trupa ushtarake rreth Ukrainës çka ka çuar aktualisht, në dislokimin më të madh të trupave e pajisjeve ushtarake në Bjellorusi, në 30 vitet e fundit.

Zoti Stoltenberg tha se numri i forcave ushtarake ruse në Bjellorusi pritet të shkojë në 30,000.

“Sapo kemi diskutuar rreth rritjes së vazhdueshme të pranisë ushtarake të Rusisë rreth Ukrainës, e cila ka aktualisht mbi 100,000 trupa. Gjatë ditëve të fundit, kemi parë lëvizje të konsiderueshme dhe forca ushtarake ruse në Bjellorusi. Ky është dislokimi më i madh rus atje që nga Lufta e Ftohtë, dhe pritet që numri të shkojë në 30,000 trupa luftarake, përfshirë Forca të Operacioneve Speciale ‘Spetsnaz’, avionë luftarakë, mes tyre Su-35, raketa me rreze të shkurtër veprimi ‘Iskander’ si dhe sisteme të mbrojtjes ajrore S-400. Pra, flasim për një gamë të gjerë kapacitetesh moderne ushtarake. E gjithë kjo do të kombinohet me stërvitjen vjetore të forcave bërthamore ruse, që pritet të zhvillohet këtë muaj”, tha ai.

Sekretari i Përgjithshëm i NATO-s i bëri thirrje Rusisë të ulë tensionet dhe përsëriti paralajmërimin e Perëndimit se çdo agresion i mëtejshëm rus do të përballej me pasoja të rënda e kosto të lartë. Zyrtarët rusë mohojnë se kanë në plan të pushtojnë Ukrainën.

NATO ka bërë të ditur se nuk ka ndërmend të vendosë trupa në Ukrainë ne rast të një pushtimit rus, por aleanca ka filluar ndërkohë të përforcojë praninë ushtarake në vendet anëtare aty pranë, veçanërisht në Estonisë, Letoni, Lituani dhe Poloni.

Aleanca ushtarake, me 30 anëtarë, ka në plan gjithashtu të forcojë mbrojtjen në rajonin e Detit të Zi, pranë Bullgarisë e Rumanisë.

U rizgjodh President i Italisë – Sergio Mattarella bën betimin

 

VOAL – “Betohem t’i jem besnik Republikës dhe të respektoj me besnikëri Kushtetutën e saj.” Pas betimit si President i Republikës, Sergio Mattarella ( Serxho Matarela) u prit me duartrokitje të forta nga salla Montecitorio. Në të njëjtën kohë, 21-ta tradicionale filloi nga Janiculum. të shtëna topash.

“Do ta kryej detyrën time sipas parimeve dhe normave të Kushtetutës, ndaj së cilës sapo kam ripërtërirë betimin e besnikërisë dhe të cilës jam përpjekur t’i qëndroj në çdo kohë gjatë shtatë viteve të fundit. Shkronja dhe fryma e Karta do të vazhdojë të jetë pika referimi e veprimit tim”, tha Mattarella.

“Parlamenti dhe përfaqësuesit e rajoneve kanë bërë zgjedhjen e tyre. Është për mua një thirrje e re – e papritur – për përgjegjësi, por nuk mund dhe nuk kam ndërmend të shpëtoj prej saj”, tha ai gjatë ceremonisë së inaugurimit në Montecitorio.

“Kthehem pra, para këtij Kuvendi, në vendin më të lartë të përfaqësimit demokratik, ku vullneti i popullit gjen shprehjen e tij maksimale. Ju falënderoj për besimin që më keni treguar duke më thirrur për herë të dytë në përfaqësojnë unitetin e Republikës”, shtoi ai.

I zgjedhur për një mandat të dytë

Sergio Mattarella u rizgjodh president të shtunën në mbrëmje, me 759 vota (kuorumi ishte 505 vota). Deri në atë moment ai e kishte përjashtuar gjithmonë një mandat të dytë. Më parë, në historinë e Republikës kishte vetëm një të rizgjedhur tjetër, në vitin 2013, Giorgio Napolitanon. rsi-eb

Itali, arkeologët zbulojnë rrënojat e tempullit antik kushtuar Athinasë

Arkeologët në Italinë jugore kanë gërmuar rrënojat e një tempulli 2500-vjeçar, si dhe objekte nga një betejë e madhe detare të ruajtura në vendin e shenjtë.

Tempulli iu kushtua Athinasë, perëndeshës së mençurisë, dhe u zbulua në parkun arkeologjik Paestum në jug të qytetit të Salernos, sipas një deklarate nga Ministria e Kulturës.

Struktura, e cila ishte afro 18 metra e gjatë dhe 7 metra e gjerë, ofron një pasqyrë të fazës më të vjetër të Paestum, dikur një qytet i madh grek që u themelua nga kolonistë nga Azia e Vogël, sipas deklaratës.

Reliket nga beteja detare e Alalia-s, e cila besohet të ketë ndodhur midis 540 pes dhe 535 pes, ishin brenda tempullit, tha drejtori i përgjithshëm i Muzeve Italiane, Massimo Osanna.

Midis gjetjeve ishin dy helmeta. Sipas Osanna, pritet të kryhet një ekzaminim laboratorik për të zbuluar nëse në to fshihen mbishkrime që mund të japin informacion për identitetin e ushtarëve që i mbanin.

Studiuesit supozojnë se tempulli është ndërtuar pas betejës detare, për të cilën historiani i lashtë grek Herodoti tha se u zhvillua në bregun lindor të ishullit mesdhetar të Korsikës. bw

Në moshën 80-vjeçare, Sergio Mattarella pranon të mbajë edhe një mandat, rizgjidhet President i Italisë

Presidenti italian, Sergio Mattarella, ka rënë dakord të shërbejë një mandat të dytë pasi partitë e koalicionit nuk arritën të bien dakord për një kandidat kompromisi për postin.

80-vjeçari doli si zgjedhja më e duhur pas gjashtë ditësh votime shpesh të tensionuara në Romë ku partite e mazhorances rane dakord vetem sot ne votimin e tete me 759 vota.

Ai kishte shprehur dëshirën për të lënë detyrën, por mediat vendase raportuan se kryeministri Mario Draghi e kishte bindur të qëndronte për “stabilitetin” e Italisë. Mattarella pritet të rizgjedhet zyrtarisht më vonë të shtunën. Duke shpallur vendimin e Mattarella-s për të qëndruar në detyrë, ministrja për Çështjet Rajonale, Mariastella Gelmini përshëndeti “ndjenjën e përgjegjësisë dhe lidhjen e tij me vendin dhe institucionet”.

Partitë në koalicionin qeverisës të Italisë ranë dakord ta rizgjedhin atë të shtunën pasi shtatë raunde votimi dështuan për të zgjedhur një kandidat alternativ dhe zbuluan ndarje të thella në qeverinë e koalicionit të Draghi. bw

Presidenti francez Macron i bën thirrje homologut rus Putin të respektojë sovranitetin e fqinjëve

VOA

Presidenti francez Emmanuel Macron i tha të premten homologut të tij rus Vladimir Putin se Rusia duhet të respektojë sovranitetin e fqinjëve të saj, tha një zyrtar i presidencës franceze, ndërsa aleatët perëndimorë përpiqen të ulin tensionet mbi Ukrainën.

Të dy udhëheqësit ranë dakord gjithashtu gjatë një bisede telefonike se vendet e tyre do të angazhohen në diskutime diplomatike katërpalëshe, sipas formatit të Normandisë si pjesë e përpjekjeve për të zbutur tensionet, shtoi zyrtari.

Presidenti Putin tha se ai do që të vazhdojë dialogun dhe se është e rëndësishme të punohet për zbatimin e marrëveshjeve të Minskut,” tha zyrtari francez, duke shtuar se zoti Putin theksoi se nuk donte që situata të përshkallëzohej.

Sipas Kremlinit, gjatë bisedës me zotin Macron, presidenti Putin tha se Shtetet e Bashkuara dhe NATO-ja nuk u kishin dhënë përgjigje kërkesave kryesore të Moskës për sigurinë lidhur me krizën në Ukrainë, por se pala ruse ishte e gatshme të vazhdonte bisedimet.

Ky është reagimi i parë i zotit Putin lidhur me përgjigjet e Shteteve të Bashkuara dhe NATO-s ndaj kërkesave ruse.

Një gjykatë në Stamboll ka refuzuar apelin për lirimin e gazetares turke Sedef Kabas

Një gjykatë e Stambollit ka refuzuar  apelin  kundër arrestimit të gazetares Sedef Kabaş, e cila u burgos në fundjavë për akuzën e “fyerjes” së Presidentit Recep Tayyip Erdoğan.
Më 24 janar, avokati Uğur Poyraz kërkoi lirimin e Kabaş, duke përmendur Konventën Evropiane të të Drejtave të Njeriut, vendimet e Gjykatës Evropiane të të Drejtave të Njeriut (GJEDNJ) dhe Kushtetutën turke, njoftoi agjencia e lajmeve Demirören më 26 janar.
Gjykata e Shkallës së Parë e Stambollit hodhi poshtë ankesën e avokatit, duke argumentuar se kishte “dyshim të fortë se krimi ishte kryer në mënyrë eksplicite në një formë të rëndë”.
Gjykata tha gjithashtu se Kabaş kishte dalë në gjyq për “një akuzë të ngjashme” më parë.
Kabaş u burgos më 22 janar në pritje të gjyqit.
Fyerja e supozuar kundër Erdoganit ishte në formën e një proverb të lidhur me pallatin që Kabaş e shprehu si në kanalin televiziv TELE1 ashtu edhe në llogarinë e saj në Twitter. “Një ka mund të gjejë rrugën e tij në pallat, por kjo nuk e bën atë mbret, përkundrazi ai e kthen pallatin në një hambar, “tha Kabataş në TV live dhe më vonë në një postim në Twitter. Në mbrojtjen e saj më vonë, Kabaş mohoi akuzat dhe tha se vërejtjet e saj përbënin një proverb./Duvar English

Gjermania mbron politikën e saj ndaj Ukrainës

Berlin

Ministrja e Jashtme e Gjermanisë, Annalena Baerbock, mbrojti politikën e vendit të saj ndaj kritikave se kanë bërë shumë pak për Ukrainën, transmeton Anadolu Agency (AA).

Në një fjalim në parlamentin federal, Baerbock, tha se “Ukrainën e mbështesim ushtarakisht. E kemi furnizuar me helmeta ushtarake mbi kërkesën e Ukrainës. Kjo ishte kërkesa e veçantë që kemi përmbushur fillimisht”.

Duke folur rreth kritikave ndaj politikës së vendit të saj për Ukrainën, ministrja gjermane Baerbock deklaroi:

“Disa kërkojnë dorëzimin emergjent të armëve. Në situata të vështira duhet të bëni autokritikë për veprimet tuaja. Një deklaratë për shtyp mund të shkruhet shpejt, por kthimi i drejtimit tuaj të politikës së jashtme në 180 gradë duhet të bëhet me vetëdije të plotë”, tha kryediplomatja gjermane.

Ajo gjithashtu u shpreh se “duhet të parandalohet mbyllja e sërishme e rrugëve diplomatike”, duke shtuar: “Ukrainën duhet ta forcojmë ekonomikisht dhe financiarisht sepse njerëzit në shekullin e 21 nuk kërcënohen vetëm me topa”.

Belgjika në pasaporta do të vendosë fotografi të filmave vizatimorë

Bruksel

Dizajni i pasaportave të reja që do të shtypen në Belgjikë do të shfaq pamje nga romanet me famë botërore vendore si ‘Tintin’, ‘Red Kit’ dhe ‘The Smurfs’, transmeton Anadolu Agency (AA).

Qeveria belge ka njoftuar se pasaportat nuk do të përmbajnë më imazhe ndërtesash, por në vend të kësaj do të përmbajnë personazhe dhe objekte nga librat komikë.

Modelet e reja të pasaportave u prezantuan nga sekretarja e shtetit, Sophie Wilmes. Raketa e Tintin u shfaq në faqen e parë të pasaportës së mbajtur nga Wilmes, duke thënë se pasaporta belge është një nga më të fuqishmet në botë.

Veprat e romaneve belge u botuan në shumë vende të botës dhe ato u bënë filma vizatimor ose u xhiruan filma artistikë. Këtu përfshihen personazhe si ‘Tintin’, ‘Red Kit’, ‘The Smurfs’, ‘Nero’, ‘Jommeke’ dhe ‘Le Chat’.

Gjithashtu thuhet se elementet e sigurisë kundër falsifikimit në pasaportat e reja që do të lëshohen në Belgjikë janë dyfishuar në 48. Në pasaportat e reja është shtuar barkodi dhe dy faqe të tjera.

Ukrainë, një ushtar vret 5 pjesëtarë të Gardës Kombëtare

Kiev

Një ushtar në rajonin Dnjepër të Ukrainës ka vrarë 5 kolegët e tij, transmeton Anadolu Agency (AA).

Në njoftimin nga Ministria e Brendshme e Ukrainës thuhet se një pjesëtar i Gardës Kombëtare të Ukrainës ka hapur zjarr ndaj ushtarëve që patrullonin në fabrikën shtetërore të prodhimit të teknologjisë raketore dhe hapësinore “Yuzhmash” në rajonin Dnipro.

Si pasojë e incidentit janë vrarë 5 ushtarë ndërsa 5 të tjerë janë plagosur.

Theksohet se ushtari që kreu sulmin është larguar nga vendi i ngjarjes me armë.

Policia ka nisur një operacion në rajon për të kapur ushtarin.

Ukraina do të zhvillojë stërvitje masive për popullatën civile

Kiev

Ministria e Punëve të Brendshme e Ukrainës planifikon të zhvillojë stërvitje kolektive për popullatën civile në rast të një emergjence të mundshme, transmeton Anadolu Agency (AA).

Sipas një deklarate me shkrim nga Ministria e Punëve të Brendshme të Ukrainës, Denis Monastyrsky, ministri i i Brendshëm, është takuar me disa zyrtarë në vend.

“Ministria e Punëve të Brendshme të Ukrainës do të zhvillojë stërvitje kolektive për popullatën civile në rast të një emergjence të mundshme. Stërvitjet do të zhvillohen në pjesë të ndryshme të vendit. Do të kontrollohet gjithashtu funksionimi i sistemeve të sigurisë civile në vendbanimet e Ukrainës”, ka thënë ministri Monastyrsky.

Rusia kohët e fundit ka grumbulluar 100.000 trupa pranë Ukrainës, duke shkaktuar shqetësime se Kremlini mund të planifikojë një tjetër ofensivë ushtarake kundër fqinjit të tij ish-sovjetik.

Moska ka mohuar se po përgatitet për pushtim dhe ka thënë se trupat e saj janë atje për stërvitje.

Gjermania, hallka e dobët e Aleancës Perëndimore

VOA

Diplomatë dhe analistë thonë Gjermania nuk duket se i sheh kërcënimet ushtarake ruse kundër Ukrainës me të njëjtën ndjesi urgjence si Shtetet e Bashkuara dhe disa nga aleatët e saj evropianë, të cilët kanë filluar ta shohin Berlinin si një hallkë të dobët të aleancës perëndimore.

Kancelari i ri i vendit, Olaf Scholz, është bërë pjesë e zërave kritikë perëndimorë që kanë paralajmëruar pasoja masive për Rusinë nëse Presidenti Vladimir Putin urdhëron një pushtim të Ukrainës, por Gjermania ka refuzuar kërkesat e Ukrainës për ndihmë ushtarake, gjë që ka shkaktuar zemërim në Kiev. Berlini ka bllokuar gjithashtu shtetet baltike, Letoninë, Estoninë dhe Lituaninë të furnizojnë Kievin me armë të prodhuara në gjermani.

Shqetësimi i Kievit, u thellua edhe më tej të shtunën kur kreu i forcave detare gjermane, zëvendës-admirali Kay-Achim Schönbach, e përshkroi frikën perëndimore për një pushtim rus si të pakuptimta dhe bëri thirrje që Vladimir Putini të trajtohet me respektin që ai kërkon dhe ndoshta që meriton, sikurse tha ai. Por ministria gjermane e mbrojtjes i dënoi komentet me shpejtësi dhe admirali dha dorëheqjen menjëherë.

Megjithatë kjo nuk ka arritur të shuajë zemërimin e Ukrainës. Kievi beson se komentet e admiralit pasqyrojnë mendimin e një pjese të të politikanëve me ndikim në Gjermani ndaj i ka bërë thirrje Berlinit të ndryshojë gjithë pozicionin e tij mbi konfliktin gjeopolitik.

Sot më shumë se kurrë, vendosmëria dhe solidariteti i Ukrainës dhe partnerëve të saj janë të rëndësishëm për të frenuar synimet shkatërruese të Rusisë”, tha ministria e Jashtme e Ukrainës.

Zyrtarët ukrainas kanë vënë në dukje një sërë pozicionesh zhgënjyese që ka mbajtur Gjermania mes frikës në rritje të perëndimit se lufta po afron.

Gjithçka po shkon drejt konfliktit të armatosur“, tha shefi i mbrojtjes së Estonisë, gjenerali Martin Herem. Ai dhe homologët e tij në Evropën Qendrore po vëzhgojnë nga afër për të parë nëse rezervistët rusë janë mobilizuar. Ata druhen se Presidenti Putin e ka riarmatosur Rusinë në dekadën e fundit për këtë moment dhe se ai aktualisht po pret që terreni të ngrijë nga moti i ftohtë, në mënyrë që forcat e blinduara ruse ta kenë më të lehtë të kalojnë nëpër Ukrainë.

Berlini ka mbetur i paqartë nëse do të jetë i përgatitur që në rast të shpërthimit të luftës të mbyllë gazsjellesin nënujor të sapopërfunduar ‘Nord Stream 2’, i cili do të transportojë gaz natyror nga Rusia në Gjermani.

Duke iu përgjigjur trysnisë në rritje të brendshme e ndërkombëtare, zoti Scholz tha javën e kaluar se Gjermania është e gatshme të diskutojë mbylljen e gazsjellësit nëse Rusia sulmon (Ukrainën), por ka nguruar të përkushtohet për diçka më shumë.

Qëndrimi i dyzuar i zotit Scholz, ka shqetësuar shumë anëtarë të NATO-s.

Berlini ka kundërshtuar propozime të tilla sikurse përjashtimi i Rusisë nga sistemi ndërkombëtar i pagesave ndërkufitare ‘SWIFT’ si pjesë e paketës së mundshme të sanksioneve nga Perëndimi, në rast pushtimi të Ukrainës. Javën e kaluar, zyrtarët gjermanë i thanë gazetës kryesore të biznesit të vendit se përjashtimi i Rusisë nga ‘SWIFT’, nuk ishte diçka që po merrej në konsideratë.

Këshilli i Sigurisë Kombëtare i SHBA-së e ka mohuar këtë gjë, duke thënë se “të gjitha opsionet janë në tavolinë”.

Shtetet baltike kanë shprehur gjithashtu zhgënjimin e tyre lidhur me hezitimin e Berlinit për t’i dhënë atyre dritën jeshile për të furnizuar Ukrainën me pajisje ushtarake të prodhimit gjerman. Ministrja e Mbrojtjes e Gjermanisë Christine Lambrecht i tha gazetës ‘Welt am Sonntag’ të shtunën se dërgesat e armëve në Ukrainë “aktualisht nuk janë të dobishme”. Ukrainasit kanë lobuar furishëm në Berlin për të siguruar anije për të mbrojtur brigjet e tyre në Detin e Zi dhe Detin Azov.

Disa analistë thonë se zoti Scholz është në një pozicion të ndërlikuar për sa i përket politikës së brendshme të Gjermanisë dhe se shumë nga ato që interpretohen nga të huajt, si tërheqje në një drejtim ndryshe nga ai i aleatëve, duhet të shihen më shumë, si një paqartësi strategjike e qëllimtë, për të mbajtur të bashkuar qeverinë e tij të koalicionit trepartiak e cila është thellësisht e ndarë mbi marrëdhëniet me Rusinë.

Partia e vetë kancelarit, Social Demokratët (PSD), partneri kryesor i koalicionit, ka një krah të majtë të fuqishëm që mbron një qasje për lidhje më të ngushta me Moskën dhe udhëheqësi i saj në parlament, Rolf Mützenich, ka mbrojtur idenë e një “rendi të ri paqeje evropiane duke përfshirë Rusinë”.

Madje edhe të moderuarit e social demokratëve ngurrojnë të ndjekin një politikë të ashpër ndaj Rusisë. Ata favorizojnë zbutjen dhe dialogun. Ministri gjerman i Mbrojtjes Lambrecht dhe Sekretari i Përgjithshëm i Social Demokratëve, Kevin Kühnert, janë kundër mbylljes së gazsjellësit ‘Nord Stream 2’, duke thënë se kjo çështje duhet të trajtohej veçmas nga kriza gjeopolitike që po shpaloset.

Ata duan që gazsjellësi, i cili është në pritje të miratimit nga entet rregullatore, të nisë të funksionojë. Më shumë se 60 për qind e gjermanëve pajtohen me ta, sipas një sondazhi të publikuar javën e kaluar nga transmetuesi shtetëror ‘ARD’.

Të Gjelbrit dhe Demokratët e Lirë të qendrës së djathtë duan që Gjermania të ndjekë një politikë shumë më të drejtpërdrejtë ndaj Rusisë. Por si për t’i komplikuar më tej gjërat, të Gjelbrit, origjina e të cilëve bazohet tek lëvizjet paqësore anti-bërthamore të viteve 1970 dhe 1980, janë ideologjikisht kundër eksportit të armëve në zonat e konfliktit.

Që kur qeveria e re e koalicionit mori detyrën në dhjetor, ka mbretëruar konfuzioni se kush po vendos tashmë rreth politikës gjermane ndaj Rusisë, Kancelari i udhëhequr nga Social Demokratët apo Ministria e Jashtme e udhëhequr nga të Gjelbërit? Kjo përfshin natyrshëm rolin dhe rëndësinë e gazsjellësit ‘Nord Stream 2’, i cili ende pret miratimin nga entet rregullatore gjermanë dhe të BE-së që të nisë të operojë”, thotë Jana Puglierin, shefe e zyrës në Berlin të Këshillit Evropian për Marrëdhëniet me Jashtë, një organizatë kërkimore mbi çështje të politikave.

Kakofonia e zërave nuk paraqet një pamje të qartë mbi rolin e udhëheqësve gjermanë, shton ajo.

Sipas zonjës Puglierin ndarjet brenda koalicionit gjerman ka të ngjarë të përkeqësohen në javët e ardhshme me rritjen e frikës për pasojat në ekonomike të vendit si rezultat i çdo konfrontimi gjeopolitik në zhvillim. Gjermania eksporton makineri, automjete dhe pjesë të tyre në Rusi dhe prodhuesit e automjeteve me ndikim politik në jetën e vendit druhen rreth pasojave që mund të sjellë një përplasje e mundshme.

Vendosja e sanksioneve të reja të gjera dhe ndëshkuese perëndimore ndaj Rusisë ka të ngjarë të ketë pasoja të mëdha ekonomike për Gjermaninë, veçanërisht nëse Moska hakmerret duke pezulluar furnizimet me gaz natyror të këtij vendi.

Ashtu si vendet e tjera të Evropës Perëndimore, Gjermania po lufton me një krizë energjitike dhe rritje të çmimit të energjisë. Sipas Eurostat, zyrës statistikore të Bashkimit Evropian, Gjermania blen 50 deri në 75 për qind të furnizimeve të saj me gaz natyror nga Rusia.

Dhjetë anëtarë të tjerë të BE-së, përfshirë Bullgarinë, Çekinë, Estoninë, Letoninë dhe Hungarinë, sigurojnë gjithashtu më shumë se tre të katërtat e importeve të tyre të gazit natyror, nga Rusia.

Zyrtarët ukrainas dhe aleatët e Gjermanisë në NATO druhen se çdo lëkundje e një lojtari kaq të rëndësishëm saç është Gjermania, mund të vihet re nga presidenti rus, i cili ka qenë i aftë të shfrytëzojë ndarjet evropiane në të kaluarën, duke i ofruar si dëshmi se aleanca kundër tij nuk është aq e bashkuar sa Uashingtoni dhe Kievi do të dëshironin. Ata druhen se kjo mund ta shtyjë udhëheqësin rus të bëjë një lojë të madhe kumari ushtarak.

Kjo është arsyeja pse vendimi i Berlinit të premten për të penguar Estoninë që t’i shesë Ukrainës armë të prodhuara në Gjermani, ishte një gabim“, thotë kryetari i komisionit të Punëve të Jashtme në parlamentin britanik Tom Tugendhat.

Shefi i Marinës i shkarkuar: Si një akullthyes i mbërthyer

Foto marrë nga DW

 

Gazetari Till Fähnders në një koment për largimin e zvadmiralit të marinës gjermane për Frankfurter Allgemeine Zeitung online, të cilin po e sjellim për lexuesin e voal.ch.

Gjykimi i gabuar për të cilin foli më vonë Kay-Achim Schönbach ishte ndoshta i natyrshëm në paraqitjen e tij në një institut kërkimi në kryeqytetin indian të Nju Delhit. Në fillim të ngjarjes, e cila më pas do të kishte pasoja kaq të rënda diplomatike, inspektori i Marinës Gjermane e filloi fjalën e tij duke thënë se “pjesërisht po bënte deklarata zyrtare”, por pjesërisht po paraqiste “mendimin privat dhe qëndrimin e tij personal”. . Komandanti i Përgjithshëm me përvojë i Marinës mund të ketë anashkaluar faktin se nëse ai do të shfaqej me uniformë do të jepte titullin e tij të plotë përpara Institutit për Studime dhe Analiza të Mbrojtjes Manohar Parrikar (MP-IDSA) dhe çdo deklaratë do t’i konsiderohej zyrtare.

Rasti ishte vizita e fregatës gjermane “Bayern” në qytetin lindor të Indisë, Mumbai, e para e një luftanijeje gjermane në pothuajse 20 vjet. “Mendimi personal” me të cilin Schönbach më pas shkaktoi një stuhi politike erdhi vetëm pas fjalimit të tij dyzet minutësh, në të cilin ai kishte folur për strategjinë e Gjermanisë në Indo-Paqësorin, siç ishte planifikuar. I rrethuar nga burra të tjerë me uniformë, Schönbach u ul përballë mikpritësve indianë në një tryezë konferencash. Pikërisht gjatë seancës së pyetjeve dhe përgjigjeve në një atmosferë të relaksuar, zv/admirali u rrëmbye me deklaratat për konfliktin në Ukrainë dhe presidentin rus Putin, të cilat përfundimisht u përhapën edhe në mediat sociale përmes një videoje të shkurtër në Twitter.

Në atë ai e përshkroi, ndër të tjera tha se, aneksimi rus i Krimesë ukrainase është si një fakt të pakthyeshëm (“Krimeja është zhdukur, nuk do të kthehet më”) dhe kërkoi “respekt” për presidentin rus Putin. Nuk kaloi shumë kohë dhe komentet e tij u përhapën gjerësisht. Ministria e Jashtme e Ukrainës thirri ambasadorin gjerman dhe e shpjegoi këtë me “papranueshmërinë e deklaratave”. Një zëdhënës i Ministrisë së Mbrojtjes në Berlin tha se përmbajtja dhe zgjedhja e fjalëve në asnjë mënyrë nuk korrespondojnë me qëndrimin e Ministrisë Federale të Mbrojtjes. Vetë Zëvendës Admirali kërkoi falje në Twitter për deklaratat e tij “të pamatura” të politikës së sigurisë.” Dhe më pas dha dorëheqjen./Përktheu Elida Buçpapaj


Send this to a friend